DKR-KABUM-05-CA-042

🚧 This website is under continued development. We appreciate your patience!

Previous Text Back to Volume PageNext Text

Wylie title	zab gnyan rdo rje'i gsang ba'i sogs/ mdzad byang
Location	dil mgo mkhyen brtse bka' 'bum Volume 5, Text 42, Pages 320-321 (Folios 1a1 to 2b1)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	ངག་དབང་བློ་བཟང་རྒྱ་མཚོ་ (Dalai Lama, 5th)
Citation	Khyentse, Dilgo. Zab gnyan rdo rje'i gsang ba'i sogs mdzad byang. In Skyabs rje dil mgo mkhyen brtse rin po che'i bka' 'bum, Vol. 5: 320-321. Delhi: Shechen Publications, 1994.
Genre
Cycle	དག་སྣང་རྒྱ་ཅན་ (dag snang rgya can)

Tibetan Text

Wylie

[edit]

༄༅། ཟབ་གཉན་རྡོ་རྗེའི་གསང་བའི་ཚིག་གི་དབྱིག །མཛེས་རྒྱན་སྔ་འགྱུར་རིག་འཛིན་ཕྱག་བཞེས་བཞིན། །བསྟར་ལེགས་སྔོན་མེད་ནོར་བུའི་དོ་ཤལ་འདི། །དད་དང་གུས་པའི་སོར་མོས་འབད་པས་བསྟར། །སྐལ་ངན་སྙིགས་མའི་མུན་སྲོས་ཤུག་དྲག་པས། །མཆོག་བསྟན་སྣང་བ་འགྲིབ་ལ་ཉེ་བའི་ཚེ། །རྨད་བྱུང་ཆོས་མཆོག་ཚིགས་བཅད་རེ་རེ་ཡང༌། བཙལ་ཞིང་གཅེས་པར་བཟུང་བས་ཚུལ་འདི་བརྩམས། གསེར་ཆོས་ཌཱ་ཀིའི་གསང་མཛོད་ཆེན་པོ་ཡི། །དགོངས་དོན་མ་རྟོགས་འགལ་འཁྲུལ་ནོངས་པའི་སྐྱོན། །སོ་སྐྱེ་བླུན་པོའི་ཉེས་བསགས་གང་མཆིས་པ། །རྩ་གསུམ་ལྷ་དང་སྲུང་མའི་སྤྱན་སྔར་བཤགས། །ལེགས་བྱས་དཀར་པོའི་ཡོན་ཏན་གང་མཆིས་ཀུན། །སྔ་འགྱུར་སྐྱེས་མཆོག་དམ་པའི་བཀའ་དྲིན་ལས། །བྱུང་ཕྱིར་དེ་དགོངས་རྫོགས་དང་རྒྱལ་བསྟན་གྱི། །ཞབས་ཏོག་སྨིན་གྲོལ་སྣང་བ་རྒྱས་ཕྱིར་བསྔོ། །དུས་གསུམ་ལེགས་བྱས་གསེར་གྱི་སྙེ་མ་ལས། །ཕན་བདེའི་འབྲས་བཟང་ཟད་མི་ཤེས་འཇོ་བས། །བསྟན་འཛིན་ཞབས་བརྟན་བཟང་པོའི་མཛད་ཕྲིན་གྱིས། །རྫོགས་ལྡན་མགྲོན་ཁུག་བདེ་བར་ངལ་འཚོ་ཤོག །ཁྱད་པར་པད་དཀར་འཆང་དངོས་ཐམས་ཅད་མཁྱེན། །བསྟན་འཛིན་རྒྱ་མཚོའི་གསང་གསུམ་ཉིན་བྱེད་དབང༌། །གངས་ཅན་གཙུག་གི་རྒྱན་དུ་འཆང་བ་ཡི། །དགའ་སྟོན་འོད་བརྒྱས་མྱུར་དུ་སྤྱོད་གྱུར་ཅིག །ཅེས་སྔ་འགྱུར་རྡོ་རྗེ་ཐེག་པའི་རིང་ལུགས་ལ་བཀའ་གཏེར་དག་སྣང་གི་ཤིང་རྟ་ཆེན་པོ་གསུམ་ལས། ཟབ་མོ་དག་སྣང་གི་སྨིན་གྲོལ་ཚུགས་ཐུབ་ཁྱད་པར་དུ་འཕགས་པ་འདི་ཉིད་ཡིན་ཀྱང༌། དུས་ཀྱི་རྒུད་པ་མི་ཟད་པས་སྨིན་གྲོལ་གྱི་རྒྱུན་དང༌། ཕྱི་མོའི་ཡི་གེ་ཙམ་ཡང་ཉིན་སྐར་དུ་གྱུར་པའི་ཚེ། རྒྱལ་བསྟན་ཡོངས་རྫོགས་ཕྲིན་ལས་གསེར་གྱི་འཁོར་ལོའི་རང་དབང་དུ་བསྒྱུར་བ་སྲིད་ཞིའི་སྤྱི་ནོར་ཆེན་པོའི་གུས་སློབ་ཐ་ཆུང་བདག་ལ་ཡང་ཆོས་འདིའི་རྩ་བ་བཀའ་བརྒྱད་རིག་འཛིན་ཞལ་ལུང་དབང་ཆེན། རྗེ་བཙུན་སྒྲོལ་དཀར་ཚེ་སྦྱིན་ཡིད་བཞིན་འཁོར་ལོའི་རྗེས་གནང༌། བསྟན་སྲུང་དཔལ་ལྷ་དཀར་པོའི་ཚེ་དབང་བཅས་ཀྱི་སྨིན་གྲོལ་སྐལ་བཟང་གི་བཙས་སུ་བརྩེ་བ་ཆེན་པོས་དགྱེས་བཞིན་བསྩལ་ཞིང༌། ཟབ་ཆོས་གླེགས་བམ་ཆ་ཚང་སྤྱི་བོའི་རྒྱན་དུ་ཐོབ་པས། འཇམ་མགོན་བླ་མ་མཁྱེན་བརྩེའི་གཏེར་ཆེན་ཆོས་ཀྱི་བློ་གྲོས་རིན་པོ་ཆེའི་ཐུགས་སྲས་རྫོང་སར་སྒང་སྣ་མཆོག་སྤྲུལ་གྱིས་རྗེ་བླ་མ་ལས་སྨིན་གྲོལ་ཡོངས་རྫོགས་ལན་གཉིས་སུ་གསན་པ་ལས་ཞུ་བར་བརྩམས་པའི། ཚེ་དབང་དང་སྒྲུབ་ཐབས་རྩ་བའི་དགོངས་པ་བཀླག་ཆོག་བྲིས་ན་ལེགས་པའི་ཡན་ལག་ཏུ་འདུག་གསུངས་པ། ཁྱབ་བདག་ཐམས་ཅད་མཁྱེན་པས་ཀྱང་དེ་བཞིན་ལེགས་པའི་བཀའ་ལུང་གསེར་སྒྲོམ་སྤྱི་བོར་ཕེབས་པས་གངས་ཅན་མཁས་གྲུབ་ཡོངས་ཀྱི་དེད་དཔོན་འཇམ་དབྱངས་མཁྱེན་བརྩེའི་དབང་པོའི་གསུང་ཐུགས་སྒྲུབ་རྣམ་གཉིས་སོགས་ལ་བརྟེན་ནས་རང་བློའི་གང་དཔོག་དད་གུས་ལྷག་བསམ་གྱི་འཇུག་པས་སྤ་གྲོ་སྟག་ཚང་སེང་གེ་བསམ་གྲུབ་རྡོ་རྗེའི་ཀེའུ་ཚང་གི་མདུན་རོལ་དབེན་གནས་རྐང་འཐུང་དང་སྤང་ལྗོངས་ཀྱི་བཀོད་པས་མཛེས་པར་བསྙེན་མཚམས་ཀྱི་ཐུན་གསེང་དུ་རས་དཀར་གྱི་ལྡིང་གུར་དུ་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་བྲིས་པ། སྡེ་སྣོད་འཛིན་པ་དྭགས་པོ་སྤྲུལ་སྐུ་འགྱུར་མེད་ཨོ་རྒྱན་བསྟན་འཛིན་ཉི་མ། རང་སློབ་དད་བློ་མཁྱེན་ཡོན་རྨད་བྱུང་སྤྲུལ་སྐུ་ཀུན་དགའ་བཀྲ་ཤིས། རིག་པ་སྨྲ་བ་འགྱུར་མེད་ཚུལ་ཁྲིམས། འཚོ་བྱེད་དྲང་སྲོང་ཤེས་རབ་འབྱོར་ལྡན་སོགས་ཀྱིས་ཡི་གེའི་མཐུན་སྦྱོར་དང་བཅས་ཏེ་གྲུབ་པའི་རྗེས་རྒྱལ་དབང་ཐམས་ཅད་མཁྱེན་པའི་མདུན་སྤྱན་བསྟར་ཞུས་པ་འདིས་གངས་ཅན་བསྟན་འགྲོའི་དགེ་མཚན་རབ་ཏུ་རྒྱས་པས་ཆོས་སྲིད་གསེར་གྱི་འཁོར་ལོ་ཕྱོགས་ཐམས་ཅད་ལས་རྣམ་པར་རྒྱལ་བའི་རྒྱུར་གྱུར་ཅིག། །།

[edit]

@#/_zab gnyan rdo rje'i gsang ba'i tshig gi dbyig_/mdzes rgyan snga 'gyur rig 'dzin phyag bzhes bzhin/_/bstar legs sngon med nor bu'i do shal 'di/_/dad dang gus pa'i sor mos 'bad pas bstar/_/skal ngan snyigs ma'i mun sros shug drag pas/_/mchog bstan snang ba 'grib la nye ba'i tshe/_/rmad byung chos mchog tshigs bcad re re yang*/_btsal zhing gces par bzung bas tshul 'di brtsams/_gser chos DA ki'i gsang mdzod chen po yi/_/dgongs don ma rtogs 'gal 'khrul nongs pa'i skyon/_/so skye blun po'i nyes bsags gang mchis pa/_/rtsa gsum lha dang srung ma'i spyan sngar bshags/_/legs byas dkar po'i yon tan gang mchis kun/_/snga 'gyur skyes mchog dam pa'i bka' drin las/_/byung phyir de dgongs rdzogs dang rgyal bstan gyi/_/zhabs tog smin grol snang ba rgyas phyir bsngo/_/dus gsum legs byas gser gyi snye ma las/_/phan bde'i 'bras bzang zad mi shes 'jo bas/_/bstan 'dzin zhabs brtan bzang po'i mdzad phrin gyis/_/rdzogs ldan mgron khug bde bar ngal 'tsho shog_/khyad par pad dkar 'chang dngos thams cad mkhyen/_/bstan 'dzin rgya mtsho'i gsang gsum nyin byed dbang*/_/gangs can gtsug gi rgyan du 'chang ba yi/_/dga' ston 'od brgyas myur du spyod gyur cig_/ces snga 'gyur rdo rje theg pa'i ring lugs la bka' gter dag snang gi shing rta chen po gsum las/_zab mo dag snang gi smin grol tshugs thub khyad par du 'phags pa 'di nyid yin kyang*/_dus kyi rgud pa mi zad pas smin grol gyi rgyun dang*/_phyi mo'i yi ge tsam yang nyin skar du gyur pa'i tshe/_rgyal bstan yongs rdzogs phrin las gser gyi 'khor lo'i rang dbang du bsgyur ba srid zhi'i spyi nor chen po'i gus slob tha chung bdag la yang chos 'di'i rtsa ba bka' brgyad rig 'dzin zhal lung dbang chen/_rje btsun sgrol dkar tshe sbyin yid bzhin 'khor lo'i rjes gnang*/_bstan srung dpal lha dkar po'i tshe dbang bcas kyi smin grol skal bzang gi btsas su brtse ba chen pos dgyes bzhin bstsal zhing*/_zab chos glegs bam cha tshang spyi bo'i rgyan du thob pas/_'jam mgon bla ma mkhyen brtse'i gter chen chos kyi blo gros rin po che'i thugs sras rdzong sar sgang sna mchog sprul gyis rje bla ma las smin grol yongs rdzogs lan gnyis su gsan pa las zhu bar brtsams pa'i/_tshe dbang dang sgrub thabs rtsa ba'i dgongs pa bklag chog bris na legs pa'i yan lag tu 'dug gsungs pa/_khyab bdag thams cad mkhyen pas kyang de bzhin legs pa'i bka' lung gser sgrom spyi bor phebs pas gangs can mkhas grub yongs kyi ded dpon 'jam dbyangs mkhyen brtse'i dbang po'i gsung thugs sgrub rnam gnyis sogs la brten nas rang blo'i gang dpog dad gus lhag bsam gyi 'jug pas spa gro stag tshang seng ge bsam grub rdo rje'i ke'u tshang gi mdun rol dben gnas rkang 'thung dang spang ljongs kyi bkod pas mdzes par bsnyen mtshams kyi thun gseng du ras dkar gyi lding gur du 'gyur med theg mchog bstan pa'i rgyal mtshan gyis bris pa/_sde snod 'dzin pa dwags po sprul sku 'gyur med o rgyan bstan 'dzin nyi ma/_rang slob dad blo mkhyen yon rmad byung sprul sku kun dga' bkra shis/_rig pa smra ba 'gyur med tshul khrims/_'tsho byed drang srong shes rab 'byor ldan sogs kyis yi ge'i mthun sbyor dang bcas te grub pa'i rjes rgyal dbang thams cad mkhyen pa'i mdun spyan bstar zhus pa 'dis gangs can bstan 'gro'i dge mtshan rab tu rgyas pas chos srid gser gyi 'khor lo phyogs thams cad las rnam par rgyal ba'i rgyur gyur cig/__//