|
|
| (One intermediate revision by one other user not shown) |
| Line 1: |
Line 1: |
| {{Khyentse Metadata | | {{Text |
| |classification=Tibetan Publications | | |classification=Tibetan Publications |
| |subclass=Tibetan Texts | | |subclass=Tibetan Texts |
| Line 27: |
Line 27: |
| }} | | }} |
| {{Header}} | | {{Header}} |
| <h1 style="font-size: 24px !important;">Tibetan Text</h1>
| |
| <onlyinclude>
| |
| {{TibP|༄༅། སོཔདེཤམེཀདིཀྵཾགྲྀཧབིཧརཏིསྨ།
| |
| ༄༅། ཞལ་གདམས་སྐོར་ཕྱོགས་བསྡུས་བཞུགས་སོ། །
| |
| བླ་མའི་ཞབས་ལ་ཕྱག་བཙལ་ནས། །དལ་དང་འབྱོར་པའི་རྟེན་བཟང་འདི། །ད་རེས་ཙམ་ལས་ཐོབ་པར་དཀའ། །མི་ཚེ་ཉི་མ་སོས་དལ་དུ། །མདོ་མེད་སྟོང་ལོག་མི་བྱེད་པ། །དམ་ཆོས་སྒྲུབ་ལ་བརྩོན་པར་ཞུ། །ཚེ་ནི་མི་རྟག་སྐད་ཅིག་གིས། །འཛད་པར་འགྱུར་ལ་དགེ་སྡིག་གི །ལས་བསགས་ཕྱི་བཞིན་འབྲང་བས་ན། །རྒྱུ་འབྲས་སྤངས་བླང་བྱ་བ་དང་། །འཁོར་བའི་སྡུག་བསྔལ་དྲན་པར་གྱིས། །ཆོས་ཀུན་སྔོན་དུ་སེམས་བསྐྱེད་དང་། །དངོས་གཞི་དགེ་བ་གང་བསགས་པ། །དམིགས་མེད་འཛིན་བྲལ་ངང་དུ་བཞག། འཁོར་གསུམ་དག་པའི་བསྔོ་བ་ཡིས། །རྒྱས་འདེབས་སྨོན་ལམ་རྣམ་དག་ཐོབ། །དུས་ཀུན་དྲན་དང་ཤེས་བཞིན་གྱིས། །རང་གི་སེམས་འདི་བསྲུང་བ་དང་། །ཆོས་ཀྱི་རྩ་བ་བྱང་ཆུབ་སེམས། །རང་འདོད་འཁྲི་བ་ཀུན་ཐོངས་ལ། །གཞན་ཕན་དང་དུ་བླང་བ་གཅེས། །ཉེས་ཀུན་རྩ་བ་བདག་འཛིན་གྱི། །འདྲེ་ཆེན་འདི་ཡིས་ཕུང་བས་ན། །ཆོས་ཀུན་འདི་ཡི་ཐོག་ཏུ་སྤུངས། །འགོང་པོ་རྩད་ནས་བརླགས་པར་རེམ། །བྱིན་རླབས་དངོས་གྲུབ་རྩ་བ་ནི། །དཔལ་མགོན་བླ་མར་རག་ལས་པས། །དད་དང་དམ་ཚིག་གཞི་བཟུང་པས། །མོས་གུས་བསྐྱེད་ན་བྱིན་བརླབ་འཇུག། དེ་མེད་དངོས་གྲུབ་ཤིན་ཏུ་ཕྲ། །དེ་ཕྱིར་བླ་མ་སྒྲུབ་པར་བརྩོན། །རང་གི་སེམས་འདི་ཡོངས་སུ་འདུལ། །བསྟན་པའི་སྙིང་པོ་ངེས་དོན་གྱི། །རིག་སྟོང་འོད་གསལ་རྫོགས་པ་ཆེའི། །ཉམས་ལེན་གནད་དུ་ཁེལ་བ་དང་། །སྔ་འགྱུར་བསྟན་ལ་སྒོ་གསུམ་གྱི། །བསྟན་པའི་བྱ་བ་ཅི་ནུས་སྒྲུབས། །རོང་ཀློང་མངའ་རིས་པཎ་ཆེན་དང་། །སྨིན་གཏེར་འཇིགས་གླིང་མི་ཕམ་སོགས། །རིག་འཛིན་བརྒྱུད་པའི་བཞེད་གཞུང་ལ། །རྟོག་གེའི་ངན་སྐྱག་དྲི་མ་ཡི། །བསླད་མིན་དྲི་བྲལ་རང་གཞུང་རྣམས། །བཤད་དང་སྒྲུབ་པས་དར་རྒྱས་སྨོན། །དེ་སྐད་མྱང་གི་གདུང་བརྒྱུད་ནི། །གཞི་ཆེན་རྒྱལ་སྲས་ཀུན་ཉི་ཡི། །བཞེད་ངོར་ཆོས་ཀྱི་བློ་གྲོས་པས། །གང་ཤར་ཉིད་དུ་བྲིས་པ་དགེ། །། ༈ཞལ་གདམས་དགོས་གསུངས་པ། སྐྱབས་དམ་པ་རྩ་བའི་བླ་མ་མཁྱེན། །མི་ང་ལ་ཞལ་གདམས་མ་མཆིས་ཀྱང་། །རྗེ་གོང་མ་རྣམས་ཀྱི་ཞལ་ལུང་ལ། །སྲིད་འཁོར་བ་འདི་ལས་ངེས་འབྱུང་ཐབས། །བློ་ལྡོག་པ་རྣམ་བཞིའི་བློ་སྦྱོངས་མཛོད། །ལས་དཀར་ནག་ཆེ་ཕྲ་བསགས་པ་ཀུན། །ཆུད་མི་ཟ་དུས་སུ་སྨིན་པས་ན། །རྒྱུ་དགེ་སྡིག་སྤངས་བླང་མ་ནོར་བྱ། །ཆོས་ཀུན་གྱི་སྲོག་ཤིང་བྱང་ཆུབ་སེམས། །ཚད་མེད་པ་བཞི་དང་བདག་གཞན་གྱི། །སྡུག་བསྔལ་དང་བདེ་བ་བརྗེ་བ་དེ། །དུས་ཡང་ནས་ཡང་དུ་སྒོམ་པར་ཞུ། །གཞི་བདེ་གཤེགས་སྙིང་པོ་རྟོགས་པ་ལ། །སྒྲིབ་སྦྱངས་དང་ཚོགས་བསགས་རྒྱུན་དུ་འབད། །ལམ་ཟབ་མོ་བླ་མའི་རྣལ་འབྱོར་ལ། །དད་མོས་དང་དམ་ཚིག་གཙང་མས་སྒོམ། །བླ་མ་དེ་རང་སེམས་ཡིན་པར་གོ །སེམས་འཁྲུལ་རྟོག་སྐྱེ་མེད་དུ་ཤེས་ན། །དོན་གནས་ལུགས་རིག་པ་གཅེར་བུར་བུད། །དེ་སྐུ་གསུམ་འདུ་འབྲལ་མེད་པ་ཡི། །གསལ་རིག་དང་སྟོང་པ་དབྱེར་མི་ཕྱེད། །གནས་འགྱུ་དང་རིག་པ་མཉམ་པར་ཞོག། རེ་དོགས་དང་དགག་སྒྲུབ་ཀུན་དོར་ལ། །གཞི་མ་བཅོས་སྤྲོས་དང་བྲལ་བ་ལ། །ལམ་འཛིན་མེད་སྒོམ་མེད་ངང་དུ་བཞག། འབྲས་ཕྱག་རྫོགས་ཆོས་སྐུའི་རང་ཞལ་མཇལ། །ཁམས་གསུམ་གྱི་གྲོང་ཁྱེར་སྟོང་པར་འགྱུར། །ཚིག་དེ་སྐད་དཔག་བསམ་རྒྱ་མཚོའི་ངོར། །མདོ་མེད་ཀྱི་དྲེད་པོ་སྙོམས་ལས་པ། །ཆོས་ཀྱི་བློ་གྲོས་ཞེས་བྱས་ཕུལ། །དགེ་འདི་ཡིས་བྱང་ཆུབ་མཆོག་ཐོབ་ཤོག། ། ༈ ཨོཾ་སྭསྟི། །སྐྱབས་ཀྱི་མཆོག་གྱུར་བླ་མ་རྗེའི། །ཞབས་མཐིལ་སྤྱི་བོའི་རྒྱན་དུ་བཀོད། །བསྟན་འཛིན་སྐྱེས་མཆོག་ཁྱེད་ཉིད་ཀྱི། །ཉམས་བཞེས་གནད་བསྡུས་འབྲི་དགོས་པའི། །བཀའ་ལུང་ཕེབས་ཀྱང་བདག་རང་ལ། །ཉམས་ལེན་གདིང་ཁེལ་མ་མཆིས་སྟབས། །ཐུགས་བསྐྱེད་འདོན་འོས་མི་འདུག་ཀྱང་། །དམ་པའི་ཞལ་ལུང་ཅུང་ཟད་བྲི། །ཡིད་དཔྱོད་སེམས་ཀྱི་ཁང་བུ་བཤིག། གཞི་མེད་རྩ་བྲལ་གཏན་འབེབས་ནས། །བློ་འདས་ཆོས་སྐུའི་རིག་པ་ནི། །ངོ་བོ་མེད་ཅིང་ངོས་བཟུང་བྲལ། །གཏད་མེད་ཟང་ཐལ་བཅིང་གྲོལ་དང་། །ཡོད་མེད་རྟག་ཆད་ལ་སོགས་པ། །མི་གནས་མི་དམིགས་རིག་པ་འདི། །སྟོང་པ་ཕྱང་ཆད་མ་ཡིན་པ། །སྐུ་གསུམ་ལྷུན་གྱིས་རྫོགས་པ་ཆེ། །འོད་གསལ་སྙིང་པོའི་བདག་ཉིད་ཅན། །གཞིར་གནས་ཆོས་སྐུ་ཆེན་པོ་ལ། །རང་བཞིན་བབ་ཀྱིས་བཞག་པ་ལས། །བཅོས་མའི་ལམ་གྱིས་དགོས་པ་མེད། །བསྐྱེད་དང་རྫོགས་པ་ཐམས་ཅད་ཀྱང་། །འདི་ཡི་ངང་ལས་མ་གཡོས་ན། །འདི་ཡིན་འདི་ལས་གཞན་དུ་མེད། །འོན་ཀྱང་དང་པོའི་ལས་ཅན་གྱི། །ཡེངས་པ་ཕྱལ་བར་མ་ཤོར་བ། །ངང་གནས་དྲན་པས་རིག་པ་སྐྱོངས། །མཐར་ནི་དྲན་པ་དབྱིངས་སུ་ཐིམ། །ཁྱབ་བརྡལ་ནམ་མཁའི་འཁོར་ཡུག་ལ། །དྲན་པས་བཟུང་དང་མ་བཟུང་མེད། །དག་དང་མ་དག་རྩལ་སྣང་ཀུན། །ཐུགས་རྗེ་རིག་པའི་རྩལ་ཤར་ལ། །དགག་སྒྲུབ་སྤྲོ་བསྡུ་བྲལ་བར་བཞག། ལྟ་བ་རི་བོ་ལྟར་བརྟན་ཞིང་། །སྒོམ་པ་རྒྱ་མཚོ་མི་གཡོ་ཞིང་། །སྤྱོད་པ་སྣང་བ་རྒྱ་ཡན་དང་། །འབྲས་བུ་རིག་པ་ཅོག་གེར་བཞག། ཚོགས་དྲུག་སྣང་བ་ཐམས་ཅད་ལ། །སྔོན་བསུ་རྗེས་དཔྱོད་མི་བྱ་བར། །འཛིན་མེད་རང་གྲོལ་འགྲོ་བ་གནད། །གནས་སྐབས་ཀུན་ཏུ་མོས་གུས་དང་། །ངེས་འབྱུང་བྱམས་དང་སྙིང་རྗེ་དང་། །བྱང་ཆུབ་སེམས་མཆོག་སྒོམ་པ་དང་། །ཡི་དམ་ལྷ་ཡི་བསྙེན་སྒྲུབ་གཅེས། །དེ་ལྟར་གདམས་པ་ཉུང་ངུ་འདི། །དམ་པ་མཆོག་གི་བཞེད་ངོ་རུ། །ཆོས་ཀྱི་བློ་གྲོས་ཞེས་བྱས་ཕུལ། །དགེ་བས་འཁོར་བ་དོང་སྤྲུགས་ཤོག། །རྒ་རྗེ་ཁམས་དབུས་སྤྲུལ་སྐུ་ལ་གནང་པའོ། ། ༈ རྗེ་བླ་མའི་ཞབས་ལ་ཕྱག་འཚལ་ལོ། །བུ་སྣོད་ལྡན་མཆོག་གསུམ་སྐྱབས་ཁྱོད་ཉོན། །དད་པ་དང་བློ་གྲོས་རབ་ཏུ་བརྟན། །ངེས་འབྱུང་དང་སྐྱོ་ཤས་སྙིང་རྗེ་ལྡན། །ཁྱོད་འདྲ་ལ་ལམ་གྱི་ཡོན་ཏན་རྣམས། །ཟླ་བ་བཞིན་གོང་འཕེལ་འགྲོ་བར་འགྱུར། །ངེད་འདྲ་བའི་དཀོར་ཟན་རྒྱལ་པོ་ལ། །བྱིན་རླབས་དང་ཐུགས་རྗེ་ཆེས་ཕྲ་ཡང་། །སྐལ་ལྡན་གྱི་སློབ་མའི་ཤེས་རྒྱུད་ཀྱི། །མེ་ལོང་ནི་དྭངས་པའི་ངོས་ཡངས་པར། །བྱིན་རླབས་ཀྱི་གཟུགས་བརྙན་འཆར་བར་ངེས། །སེམས་གདོད་ནས་ཀ་དག་སྟོང་པའི་དབྱིངས། །ལྷུན་གྲུབ་ཀྱི་འོད་གདང་རང་ཆས་རྫོགས། །རང་རིག་གི་རང་ཞལ་བལྟ་བ་ལ། །གཟུང་འཛིན་གྱི་དྲི་མའི་སྐྱོན་དང་གྲལ། །དེ་མ་བཅོས་རང་བཞག་སྒོམ་པ་དང་། །གང་ཤར་གྱི་སྤྱོད་པར་རེ་དོགས་མེད། །ཅིར་སྣང་དང་གང་ཤར་རང་སར་གྲོལ། །དེ་རྫོགས་པ་ཆེན་པོའི་གདམས་པ་ལགས། །ཚིག་དེ་སྐད་ཆོས་ཀྱི་བློ་གྲོས་པས། །གང་དྲན་ཤར་མར་བྲིས་པ་འདིས། །ང་དང་འཕྲད་པར་ཁྱད་མེད་སྨོན།། །། ༈ ཨོཾ་སྭ་སྟི། དཔལ་ལྡན་བླ་མ་འཇམ་པའི་རྡོ་རྗེ་ཡི། །ཞབས་ལ་བཏུད་དེ་གདམས་པའི་མགྲིན་གསོས་སྤེལ། །ཤིན་ཏུ་རྙེད་དཀའི་རྟེན་འདི་ད་ཕྱིན་ནས། །ཐོབ་པར་དཀའ་བས་དལ་འབྱོར་དོན་ཡོད་མཛོད། །ཚེ་ནི་མི་རྟག་ཆུ་ཡི་ཆུ་བུར་འདྲ། །འཆི་བདག་བདུད་ནི་དགོང་ཁའི་གྲིབ་སོ་བཞིན། །འཁོར་བའི་སྡུག་བསྔལ་བཟོད་པར་དཀའ་བ་ལ། །བསམ་ནས་རྒྱུ་འབྲས་སྤངས་བླང་ཤིན་ཏུ་གཅེས། །བླ་མ་མཆོག་གསུམ་སྐྱབས་ཀྱི་སྙིང་པོར་ཟུངས། །འགྲོ་ཀུན་ཕ་མར་ཤེས་པས་སྙིང་རྗེ་སྒོམ། །ཚོགས་བསགས་སྒྲིབ་སྦྱོངས་ལམ་ལ་འབད་པ་དང་། །བླ་མར་མོས་གུས་གསོལ་འདེབས་རྟག་ཏུ་བརྩོན། །ལུས་ལྷ་ངག་སྔགས་སེམས་གྱི་འཕྲོ་འདུ་ཀུན། །ཡེ་ཤེས་ཆེན་པོར་ལམ་དུ་ཁྱེར་བ་དང་། །ཟག་བཅས་ཟག་མེད་དགེ་ཚོགས་འགྲོ་ལ་བསྔོ། །སྨོན་ལམ་རྒྱལ་པོ་བཟང་སྤྱོད་འདོན་ལ་རེམ། །སེམས་ཀྱི་གནད་འདི་མ་ཤེས་གྱི་ནར་འཕྱན། །དེ་ཡང་འཁྲུལ་པའི་སེམས་ཀྱི་རྩར་བཅད་པས། །ལུས་ངག་ཡིད་གསུམ་གཞི་མེད་རྩ་བྲལ་དུ། །གཏན་ལ་དབབ་ཅིང་ད་ལྟའི་རིག་པ་ནི། །རང་གསལ་འགག་མེད་དབྱིངས་དང་འདུ་འབྲལ་མེད། །གསལ་རིག་སྟོང་གསུམ་སྐུ་གསུམ་དབྱེར་མེད་པའི། །རང་བྱུང་ཡེ་ཤེས་མཚན་མའི་སྤྱོད་ཡུལ་བྲལ། །གཟུང་འཛིན་རྟོག་པས་མ་བསླད་རང་བབ་ཞོག། རྣམ་རྟོག་གང་ཤར་གདམ་ང་མེད་པར་གྲོལ། །དེ་ལྟར་ཉམས་བླངས་ཡེངས་མེད་བརྩོན་བྱས་ན། །ཚེ་འདིའམ་ནི་བར་དོར་གྲོལ་བ་སྟེ། །གདོད་མའི་ས་ལ་གཏན་སྲིད་ཟིན་པར་འགྱུར། །དེ་སྐད་སྨྲ་བ་བླུན་རྨོངས་ཆོས་བློ་ལ། །དད་པ་ལྡན་པས་བསྐུལ་བ་མ་གཅོག་ཙམ། །མདོར་བསྡུས་ཉིད་དུ་ཕུལ་བའི་དགེ་བ་ཡིས། །སེམས་རྒྱུད་གྲོལ་ཞིང་དོན་གཉིས་ལྷུན་གྲུབ་ཤོག། །མངྒ་ལཾ།། །། ༈ སེམས་ཞེས་བྱ་བ་མི་དྲན་དགུ་དྲན་བྱེད་མཁན་འདི་ཡིན། འདིའི་རང་བཞིན་ནམ་ངོ་བོ་ལ་བརྟགས་པས་བྱུང་གནས་འགྲོ་གསུམ་རྣམ་རྟོག་སྐད་ཅིག་མ་རེ་རེ་སྐྱེ་བ་ག་ལ་ཡོད། དེའང་བྱུང་ས་བྱུང་ཁུངས། གནས་ས་གནས་མཁན། འགྲོ་བ་སྟེ། འགག་མཁན་འགགས་ཡུལ་རྣམས་ངོ་བོ་ཅི་འདྲ་འདུག་བལྟས་པས། དངོས་པོར་གྲུབ་པ་རྡུལ་ཙམ་མེད། མེད་ཀྱང་བཟང་ངན་ཤེས་མཁན་རིག་མཁན་ཞིག་མ་འགགས་པར་ཡོད་པ་དེ་ལ་སྔོན་བསུ་རྗེས་དཔྱོད་སོགས་རྣམ་རྟོག་གིས་བཟོ་བཅོས་མི་བྱེད་པར་རང་བབས་སུ་བཞག་པས་གསལ་རིག་སྟོང་གསུམ་དབྱེར་མི་ཕྱེད་པའི་གནས་ལུགས་བརྗོད་པ་ཐམས་ཅད་དང་བྲལ་བ་ཞིག་རང་མྱོང་གིས་ཤེས་ན་དེ་གའི་རྒྱུན་བསྐྱང་བ་ལ་སེམས་ངོ་བལྟ་ཟེར་བ་ཡིན་ཀྱང་། སྔོན་འགྲོ་སྒྲིབ་སྦྱོང་དང་། བླ་མ་ལ་མོས་གུས་གཏིང་ཚུགས་པས་གསོལ་འདེབས། དབང་བླང་ལ་བརྩོན་པ་གལ་ཆེ་བ་ཡིན། སེམས་ངོ་འདི་ལེགས་པར་ཤེས་ན་དགྲ་གཉེན་ཆགས་སྡང་ཚོར་བ་བདེ་སྡུག་སོགས་ལ་རེ་དོགས་ཆེར་མེད་པ་ཞིག་འབྱུང་རྒྱུ་ཡིན་འདུག། དེ་འདྲ་རང་གཞན་སུས་ཀྱང་རྟོགས་དཀའ་མོ་རེད། སྐུ་ངོ་མ་ལྡོག་ཙམ་དུ་ཆོས་ཀྱི་བློ་གྲོས་པས་ཕུལ།། །། ༈ ཨ་ཧོ་ཡེ། ཀ་དག་གི་གནས་ལུགས་བསམ་བརྗོད་བྲལ། །ཡོད་མེད་ཀྱི་མཐའ་ལས་རབ་འདས་ཤིང་། །མེད་སྟོང་ནི་མ་ཡིན་རང་བཞིན་གྱི། །འོད་གསལ་བའི་རང་གདང་ངང་གི་གསལ། །ལྷུན་གྲུབ་ཀྱི་སྣང་བ་འོད་པོ་ཆེ། །སྒྲོན་མ་བཞིའི་ཉམས་ལེན་ལ་བརྟེན་ནས། །ཆོས་ཅན་གྱི་སྣང་བ་ནང་དབྱིངས་སུ། །ཐིམ་ལ་མ་རྨུགས་ཀྱི་ཡེ་ཤེས་ངང་། །གཡོ་མེད་དགོངས་པའི་བཙན་ས་ཟིན། །སྲིད་གསུམ་དོང་ནས་སྤྲུགས་པར་ཤོག། ། ༈ རྗེ་བླ་མ་རྣམས་ལ་ཕྱག་འཚལ་ལོ། །བསམ་དོན་ཆོས་བཞིན་འགྲུབ་པར་བྱིན་གྱིས་རློབས། །ཁམས་གསུམ་གྱི་འཁོར་བའི་སྡུག་བསྔལ་ལ། །ཡང་ཡང་བསམ་སྟེ་ངེས་འབྱུང་བསྒོམ། །རྙེད་དཀའི་དལ་འབྱོར་རིན་ཆེན་འདི། །མྱུར་དུ་འཇིག་པར་ངེས་པས་ན། །སྙིང་ནས་དམ་པའི་ལྷ་ཆོས་སྒྲུབས། །དགེ་མི་དགེའི་ལས་ནི་ཅི་སྤྱད་ཀྱང་། །འབྲས་མི་བསླུ་ངེས་པར་སྨིན་པས་ན། །རྒྱུ་འབྲས་སྤང་བླང་མ་ནོར་གཅེས། །སྐྱབས་བླ་མ་དཀོན་མཆོག་རྣམ་གསུམ་ལ། །ཡིད་ཆེས་ཀྱི་དད་པ་དྲག་པོ་བསྐྱེད། །མ་ནམ་མཁའི་མཐའ་མཉམ་སེམས་ཅན་ལ། །ཕན་འདོགས་ཀྱི་བསམ་པ་བཟང་པོ་མཛོད། །ཤེས་རྒྱུད་ཀྱི་སྡིག་སྒྲིབ་མ་དག་ན། །ཡེ་ཤེས་ཀྱི་སྣང་བ་མི་འཆར་བས། །བསགས་སྦྱོང་གཉིས་ལ་ནན་ཏན་མཛོད། །བླ་མ་ལ་མོས་གུས་མེད་གྱུར་ན། །མཆོག་ཐུན་གྱི་དངོས་གྲུབ་མི་ཐོབ་པས། །དམ་ཚིག་ངོས་ལྐོག་མེད་པ་ཡིས། །ལམ་ཟབ་མོ་བླ་མའི་རྣལ་འབྱོར་བརྩོན། །གསང་སྔགས་ཀྱི་དབང་བསྐུར་ཐོབ་བྱས་ནས། །ཡི་དམ་གྱི་བསྙེན་སྒྲུབ་བྱེད་པ་དང་། །རིམ་གཉིས་ཀྱི་རྣལ་འབྱོར་བསྒོམ་པ་གཅེས། །སེམས་མ་བཅོས་གཉུག་མའི་རང་བཞིན་འདི། །སྒྲིམ་ཞིང་བསྒྲིམས་པས་སླར་ཡང་སྒྲིབ། །རང་བབས་སུ་ལྷོད་དེ་བཞག་པ་ན། །རང་བབས་ཀྱི་གནས་ལུགས་མཐའ་དབུས་བྲལ། །ནམ་མཁའ་ལྟར་ཡངས་ཤིང་སྟོང་པ་ཆེ། །གཟུང་འཛིན་གྱི་མཚན་མས་མ་གོས་པའི། །རང་བྱུང་འོད་གསལ་གྱི་སྣང་བ་ཆེ། །མཚན་མཚོན་བརྗོད་ལས་འདས་པ་འཆར། །ཡེངས་མེད་བསྒོམ་མེད་དུ་སྐྱོང་བ་ལས། །འཁྲུལ་རྟོག་ཀུན་རང་སར་གྲོལ་བར་འགྱུར། །ཚིག་དེ་སྐད་གདམས་པ་ཉུང་ངུ་འདི། །དད་ལྡན་གྱི་སློབ་མ་ཨོ་བསམ་ནས། །རིང་ནས་བསྐུལ་བའི་བཞེད་སྐོང་དུ། །མདོ་མེད་པའི་དྲེད་པོ་ཆོས་བློས་བྲིས། དགེའོ།། །། ༈ གདམས་ངག་དམར་ཁྲིད་ནི་བླ་མ་གོང་མའི་གསུང་ལས་འབྱུང་བ་རྣམས་གཟིགས་ཁྱབ་ལས་གསར་དུ་ཅིའང་མི་དགོས་ཀྱང་། ཞལ་ངོ་མི་ལྡོག་ཙམ་དུ་འདི་ལྟར། བླ་མའི་ཞབས་ལ་ཕྱག་བཙལ་ནས། །འོད་གསལ་རྡོ་རྗེ་རྩེ་མོ་ཡི། །གདམས་ངག་གནད་ཀྱི་ཉིང་ཁུ་ནི། །མོས་གུས་ལམ་གྱི་གཞི་འདིང་ནས། །འཁྲུལ་པའི་སེམས་ཀྱི་གཞི་རྩ་བཅད། །གཞི་མེད་རྩ་བ་བྲལ་བ་ཡི། །རིག་པ་གསལ་སྟོང་བརྗོད་བྲལ་འདི། །མ་བཅོས་རང་བབ་བསྐྱང་བ་དང་། །གཟུང་འཛིན་རྟོག་ཚོགས་རང་གྲོལ་གྱི། །གནད་དེ་ཤེས་པས་འཆིང་བ་མེད། །དེ་ཡི་བོག་འདོན་ཕྱི་ནང་གི །ནམ་མཁའ་གཅིག་ཏུ་བསྲེས་ལ་གཏད། །འཛིན་མེད་ཁྱབ་བརྡལ་ངང་དུ་བཞག། ངེས་འབྱུང་སྙིང་རྗེ་བྱང་སེམས་སྒོམ། །རྒྱུ་འབྲས་སྤངས་བླངས་བརྩོན་པ་གཅེས། །དེ་སྐད་གདམས་པ་ཉུང་ངུ་འདི། །ཆོས་ཀྱི་བློ་གྲོས་ཞེས་བྱས་ཕུལ།། །། ༈ དཔལ་ལྡན་བླ་མའི་ཞབས་པདྨོར། །གུས་བཏུད་གདམས་པ་ཉུང་ངུར་དབྱེ། །མི་རྟག་འཆི་བ་དྲན་པ་དང་། །ལས་འབྲས་བླང་དོར་ལ་བརྩོན་ཞིང་། །འཁོར་བའི་ཉེས་དམིགས་བསམ་བྱས་ཏེ། །སྲིད་ལས་ངེས་འབྱུང་སྐྱེ་བ་ཡི། །དལ་འབྱོར་རྟེན་འདི་དོན་ཡོད་པ། །བརྩོན་འགྲུས་དྲག་པོས་ཆོས་ལ་འབད། །ཐེག་ཆེན་ལམ་གྱི་རྩ་བ་ནི། །བྱང་ཆུབ་སེམས་ལ་བློ་སྦྱོང་ཞིང་། །བདག་ཏུ་འཛིན་པའི་རྟོག་པ་བཅོམ། །སེམས་ཅན་དོན་དུ་བཀོལ་བར་བྱ། །རྟག་པར་སྨོན་ལམ་བཟང་པོ་གདབ། །རྡོ་རྗེ་ཐེག་པའི་བླ་མ་ལ། །དད་མོས་དྲག་པོ་བསྐྱེད་པ་དང་། །དམ་ཚིག་ཤིན་ཏུ་གཙང་བ་གཅེས། །མོས་གུས་དྲག་པོས་གསོལ་བ་ཐོབ། །དབང་བླངས་ཐུགས་ཡིད་བསྲེ་བྱས་ཏེ། །རང་སེམས་འཁྲུལ་པ་གྱ་གྱུར་འདིའི། །སྐྱེ་འགགས་གནས་གསུམ་རྩ་བདར་ཆོད། །གཞི་རྩ་བྲལ་བར་གཏན་ལ་དབབ། །སྐྱེ་བ་མེད་པ་ཆོས་ཀྱི་སྐུ། །གནས་པ་མེད་པ་ལོངས་སྤྱོད་རྫོགས། །འགགས་མེད་རང་རྩལ་སྤྲུལ་པའི་སྐུ། །སེམས་ཀྱི་གཤིས་ལ་ལྷུན་གྱིས་གྲུབ། །སྟོང་གསལ་ཟུང་འཇུག་དབྱེར་མི་ཕྱེད། །རྟོག་པས་མ་བསླད་གཟུང་འཛིན་བྲལ། །མ་བཅོས་མ་བསྒྱུར་རང་བབ་བཞག། སྤྲོས་མཐའ་བྲལ་བ་ལྟ་བའི་གནད། །ཡེངས་མེད་འཛིན་བྲལ་སྒོམ་པའི་གནད། །གང་ཤར་རང་གྲོལ་སྤྱོད་པའི་གནད། །གཞིར་རྫོགས་མངོན་གྱུར་འབྲས་བུའི་གནད། །དེ་ལྟར་ལྟ་སྒོམ་སྤྱོད་འབྲས་བཞི། །དབྱེར་མེད་གཅིག་ཏུ་དྲིལ་བའི་ངང་། །ལྷ་བསྒོམ་སྔགས་བཟླས་ལ་སོགས་པ། །མཉམ་པར་བཞག་དང་མ་བཞག་ཀུན། །འདི་ཡི་ཀློང་དུ་བསྲེ་ཤེས་ན། །འཁོར་འདས་དབྱེར་མེད་དོན་རྟོགས་ཤིང་། །གྲུབ་མཐའ་རྫོགས་ནས་ལམ་མཐར་ཕྱིན། །རྡོ་རྗེ་འཛིན་ས་ཐོབ་པར་འགྱུར། །དེ་སྐད་བསླབ་པ་གསུམ་ལྡན་པ། །ནུབ་བླ་ཀུན་བཟང་ཆོས་འཕེལ་གྱིས། གསུང་གིས་བསྐུལ་ངོ་མ་ལྡོག་ཙམ་ཆོས་ཀྱི་བློ་གྲོས་ཞེས་བྱས་བྲིས།། །། ༈ གདམས་ངག་གནད་དྲིལ་བཞུགས་སོ། །སྐྱབས་མཚུངས་མེད་ཨོ་རྒྱན་རྗེ་ལ་འདུད། །རྟེན་ཁྱད་འཕགས་དལ་འབྱོར་མི་ལུས་འདི། །རྙེད་དཀའ་བ་ད་རེས་ཐོབ་དུས་འདིར། །བར་མ་དོར་ཆུད་ཟོས་མ་ཤོར་བ། །སྙིང་པོ་ལེན་པའི་ཐབས་ལ་འབད། །ཆོས་ཀུན་གྱི་རྩ་བ་རང་གི་སེམས། །མ་བརྟགས་ན་ཉམས་དགའ་བསླུ་བྲིད་མཁས། །བརྟགས་ཤིང་དཔྱད་ན་གཞི་རྩ་བྲལ། །བྱུང་གནས་འགྲོ་གསུམ་གྱི་ངོ་བོས་སྟོང་། །འཁོར་འདས་ཀྱི་ཆོས་ཀུན་རང་སེམས་ནི། །དག་མ་དག་གི་ཆོ་འཕྲུལ་ཙམ་དུ་ཟད། །གཤིས་ལུགས་ལ་འཁོར་འདས་གྲུབ་པ་མེད། །གདོད་མ་ནས་ཡེ་སྟོང་ཀ་ནས་དག། སྟོང་པ་དེ་ཕྱང་ཆད་མ་ཡིན་པ། །རང་བཞིན་འོད་གསལ་དུ་ལྷུན་གྱིས་གྲུབ། །ཐུགས་རྗེ་ཡི་རིག་པ་འཆར་གཞིར་གནས། །རིག་པ་ལ་མིང་འདོགས་མཚན་མ་བྲལ། །རྩལ་དེ་ལས་འཁོར་འདས་སྣ་ཚོགས་ཤར། །ཤར་ས་དང་ཤར་མཁན་གཉིས་སུ་མེད། །གཉིས་མེད་ཀྱི་ངང་དེར་མ་བཅོས་ཞོག། ལུས་འགྲོ་འདུག་བསྒུལ་བསྐྱོད་བྲལ་བར་བཞག། ངག་རླུང་གི་འབྱུང་འཇུག་རང་བབ་བཞག། སེམས་ཞེན་རྟོག་རྗེས་སུ་མི་འབྲང་བཞག། ཁོངས་ཡངས་ཤིང་སོས་དལ་ལྷུག་པར་བཞག། སྐྱེ་མེད་ཆོས་སྐུའི་རིག་པ་དེ། །རྐྱེན་གྱིས་མ་བསྐྱེད་རང་བྱུང་ཞིང་། །ཧྲིག་གེ་སོ་མ་ལྗེན་ནེ་བ། །གཟུང་འཛིན་གྱི་རྟོག་པས་མ་བསླད་ཅིང་། །ཡིད་དཔྱོད་ཀྱི་གོ་བས་མ་བསླད་པར། །རང་བབ་ཀྱི་བསམ་གཏན་ངང་དེར་ཞོག། ཞོག་ཅེས་བྱ་བའང་ཚིག་ཙམ་སྟེ། །དོན་ཡིན་ལུགས་ལ་བཞག་བྱ་བཞག་བྱེད་མེད། །རིག་སྟོང་ཆོས་སྐུའི་རང་ཞལ་དེ། །དུས་རྟག་ཏུ་རང་ངོ་ཡེངས་མེད་བསྐྱངས། །འཁོར་བའི་ལས་ལ་ཟད་པ་མེད། །ཇི་ཙམ་ཞིག་འབད་ཀྱང་ཕྱི་ཕྱིར་འཕེལ། །དགྲ་གཉེན་གྱི་རྟོག་པ་ཇེ་མང་འགྲོ། །ངན་སོང་གི་རྒྱུ་ནི་གྲུབ་ནས་འོང་། །དེ་བས་ན་བློ་སྣ་ཆོས་ལ་བསྒྱུར། །ཆོས་དང་སྒོ་གསུམ་འདྲིས་བྱས་ན། །ཐར་པ་བྱང་ཆུབ་ཀྱི་ལམ་སྣ་ཟིན། །འཆི་ཁ་འགྱོད་པ་མེད་པ་འོང་། །ཚེ་འདི་དང་ཕྱི་མ་ཐམས་ཅད་དུ། །བདེ་བ་ནས་བདེ་བའི་ལམ་དུ་འགྲོ། །རང་ཉིད་ལ་བཀའ་དྲིན་ཆེ་བ་ཡི། །བླ་མ་དང་ཨོ་རྒྱན་ཆེན་པོ་ནི། །དབྱེར་མེད་དུ་སྤྱི་གཙུག་སྙིང་གར་བསྒོམ། །མོས་གུས་ཀྱི་གདུང་ཤུགས་དྲག་པོ་བསྐྱེད། །རྐྱེན་བཟང་ངན་སྐྱིད་སྡུག་ཅི་བྱུང་ཡང་། །ཕ་བླ་མ་རྗེ་ལ་གསོལ་བ་ཐོབ། །རང་སེམས་དང་དབྱེར་མེད་བསྲེས་ཏེ་ཞོག། ནམ་འཆི་བའི་དུས་ན་ཆགས་སྡང་སྤངས། །རྗེ་ཨོ་རྒྱན་གུ་རུ་སྤྱི་གཙུག་སྒོམ། །རྣམ་ཤེས་ཐིག་དཀར། ལེ་ཧྲཱིཿདམར། ས་མཚན་གསལ། །དཔལ་ཨོ་རྒྱན་ཆེན་པོའི་ཐུགས་ཀར་བསྟིམ། །དེ་ད་ལྟ་རྒྱུན་དུ་སྒོམ་བྱས་ན། །འཆི་དུས་སུ་གསལ་ཐེབས་སླ་བར་འོངས། །དཔལ་རིའི་སྨོན་ལམ་གདབ་པར་བྱ། །མདོར་ན་ཆོས་ཀྱི་ཉམས་ལེན་ནི། །འཁོར་བ་ལ་ཞེན་པ་བཅད་པ་དང་། །འགྲོ་དྲུག་ལ་བྱམས་དང་སྙིང་རྗེ་སྒོམ། །རང་སེམས་འདི་ཡོངས་སུ་འདུལ་བ་ལ། །དུས་རྟག་པར་ཉམས་ལེན་མཛད་འཚལ་ལོ། །དེ་སྐད་ཀྱི་གདམས་པ་ཉུང་ངུ་འདི། །རང་རྒྱུད་ལ་ཉམས་ལེན་མ་མཆིས་ཀྱང་། །རྗེ་དམ་པ་གོང་མའི་གསུང་བཞིན་དུ། །རིགས་ལྡན་གྱི་དགེ་མ་པད་ལུ་ཡི། །གསུང་གིས་བསྐུལ་བ་མ་ལྡོག་ཙམ། །ཆོས་མེད་ཀྱི་དྲེད་པོ་དཀོར་ཟན་མཁན། །ཆོས་ཀྱི་བློ་གྲོས་ཞེས་བྱས་བྲིས།། །། ༈ ཞལ་གདམས་ཕན་བདེའི་འཁྲི་ཤིང་ཞེས་བྱ་བ་ནི། བླ་མ་དམ་པའི་ཞབས་ལ་ཕྱག་འཚལ་ལོ། །ཕན་བདེའི་འབྱུང་གནས་སྲིད་ཞི་ཀུན་གྱི་བདག། རང་རིག་འོད་གསལ་ཀུན་བཟང་བདེ་བ་ཆེ། །ཡེ་གྲོལ་དང་པོའི་སངས་རྒྱས་བླ་མ་རྗེར། །བཏུད་ནས་གདམས་པའི་རིམ་པ་ཅུང་ཟད་དབྱེ། །གྲོགས་དག་སྲིད་པའི་ཕུན་ཚོགས་ཇི་སྙེད་པ། །མི་རྟག་མི་བརྟན་སྒྱུ་མའི་རང་བཞིན་དང་། །རྨི་ལམ་སྐབས་སུ་འབྱོར་རྒུད་སྣང་བ་ལྟར། །རང་བཞིན་བདེན་མེད་འཇིག་པའི་ངང་ཚུལ་སོམས། །ཤིན་ཏུ་ཐོབ་དཀའི་དལ་འབྱོར་རིན་ཆེན་འདི། །རྙེད་པ་ད་རེས་ཙམ་ཡིན་འདི་ཉིད་ཀྱང་། །ལུས་སྲོག་གཡོ་བ་ཆུ་ཡི་ཆུ་བུར་བཞིན། །ནམ་འཆི་ཆ་མེད་སོམས་ལ་བློ་སྣ་བསྟུངས། །ལས་ཀྱི་བསགས་པ་ཆུ་ཡི་གཉེར་མ་བཞིན། །རྒྱུན་མི་ཆད་པ་གར་སྐྱེས་གར་གནས་ཀྱང་། །ཆུད་མི་ཟ་ཞིང་རང་ཐོག་སྨིན་ངེས་པས། །རྒྱུ་འབྲས་བླང་དོར་འདི་ལ་གཟབ་པ་གཅེས། །མ་དག་འཁོར་བའི་འཁྲུལ་སྣང་རྒྱ་རེ་ཆེ། །སྡུག་བསྔལ་བརྒྱ་ཕྲག་མང་པོའི་མཚོན་གཟིངས་ཤིང་། །མེ་ཡི་འོབ་དང་སྤུ་གྲིའི་སོ་མཚུངས་པའི། །འཇིག་རྟེན་གསུམ་ན་བདེ་བ་ཅུང་ཟད་མེད། །མནོག་ཆུང་ཉེས་པའི་སྒོ་མང་གནས་འདི་ལས། །མྱུར་དུ་ཐར་ཕྱིར་སྐྱབས་སུ་འགྲོ་བ་དང་། །བདེན་བཞི་རྟེན་འབྲེལ་དོན་ལ་གོམས་པར་མཛོད། །བསླབ་པའི་ཚུལ་ཁྲིམས་སྲིད་པའི་ཆུ་ལོན་འགོག། བསྟན་པའི་རྩ་བ་སོ་སོར་ཐར་འདི་ཡིན། །སྟོན་པ་མཆོག་ཀྱང་ཁྱིམ་སྤང་རབ་ཏུ་བྱུང་། །དེ་རྗེས་འཇུག་ཕྱིར་དེ་ཡི་ཚུལ་ལ་སློབ། །དེ་ལས་ཡོན་ཏན་དཔག་མེད་འཕེལ་བ་དང་། །ཏིང་ངེ་འཛིན་དང་ཟག་མེད་ཤེས་རབ་སོགས། །ཚུལ་ཁྲིམས་ཕུང་པོ་འདི་ལས་འབྱུང་བའི་ཕྱིར། །དྲན་ཤེས་བག་ཡོད་ལྡན་པས་བསྲུང་བར་མཛོད། །དེང་སང་ཐུབ་པའི་བསྟན་པ་ཉམས་དམའ་ཞིང་། །རང་གཞན་འཆོལ་བར་སྤྱོད་པས་སེམས་འདི་སྐྱོ། །འདོད་ལ་ཆགས་པས་ཉེས་པ་ཀུན་གྱི་སྒོ། །སྲེད་པ་འདི་ལས་ཆེ་བ་མེད་ཕྱིར་ན། །སྲེད་སྲིད་མ་རིག་གཞོམ་པའི་ཐབས་ལ་བརྩོན། །ཐེག་ཆེན་ལམ་གྱི་གཙོ་བོ་ངེས་འབྱུང་དང་། །བྱང་སེམས་སྟོང་ཉིད་སྒོམ་པ་འདི་གསུམ་ཡིན། །ངེས་འབྱུང་གཞི་ཐེངས་འགྲོ་ཀུན་ཕ་མར་ཤེས། །བྱམས་དང་སྙིང་རྗེའི་བློ་སྦྱོང་ཟབ་མོ་ལ། །རང་འདོད་ཕྱོགས་རིས་མེད་པར་ཡང་ཡང་སྒོམ། །བདག་གཞན་མཉམ་བརྗེ་ཀུན་རྫོབ་བྱང་ཆུབ་སེམས། །བདག་བས་གཞན་གཅེས་རྒྱུད་ལ་མ་འབྱོང་བར། །ལུང་རིགས་མན་ངག་གསུམ་གྱིས་བསྒོམ་པ་གཅེས། །རྒྱུ་དང་མི་རྒྱུའི་འགྲོ་བ་འདི་ཀུན་ཀྱང་། །བདག་དང་ཕུང་པོ་རྣམ་རིག་སྤྲོས་ཀུན་གྱི། །བདེན་དང་མཚན་འཛིན་རྣམས་ཀྱིས་རབ་སྟོང་པའི། །གདོད་ནས་སྐྱེ་མེད་རབ་ཞི་མཉམ་པ་ཉིད། །མཚན་ཉིད་ཆད་པའི་ཀུན་ཏུ་བཏགས་པ་ཙམ། །མེད་སྣང་སྟོང་པའི་རང་གཟུགས་ཙམ་ཤེས་ནས། །ཇི་སྲིད་གཉིས་སྣང་ཡོད་པ་དེ་སྲིད་དུ། །སྣང་སྟོང་སྒྱུ་མའི་ཚུལ་འདི་འགོག་པ་མེད། །དེ་ཕྱིར་རྒྱུ་འབྲས་མེད་ཅེས་མ་བརྗོད་ཅིག། མཐར་ཐུག་ལྟ་བའི་རྟོགས་པ་ཚད་ཕེབས་དུས། །སྟོང་དང་མི་སྟོང་ཟུང་འཇུག་ལ་སོགས་པ། །ཚིག་ཏུ་བརྗོད་པ་ཐམས་ཅད་བློ་ཡི་ཆོས། །མཁའ་ལྟར་དག་པའི་གནས་ལུགས་ཟབ་མོ་ལ། །བློ་ཡི་སྤྲོས་པ་ཐམས་ཅད་ཉེར་ཞི་བ། །དབུ་མ་ཆེན་པོའི་རང་བཞིན་མངོན་དུ་གྱུར། །དེ་ཡི་གནས་ལུགས་ཇི་བཞིན་མངོན་བྱེད་ལ། །རྒྱུ་ཡི་ཐེག་པའི་ལུང་རིགས་ལ་བརྟེན་ནས། །སྒྲོ་འདོགས་བཅད་པ་དོན་སྤྱིའི་ལྟ་བ་ཙམ། །རྡོ་རྗེ་ཐེག་པར་དབང་གི་ཡེ་ཤེས་དང་། །བསྐྱེད་རྫོགས་ལ་བརྩོན་ཆུ་ཟླར་ལྟ་བ་བཞིན། །དཔེ་ཡི་ཡེ་ཤེས་མངོན་དུ་གྱུར་པ་ལས། །རིམ་གྱིས་དོན་གྱི་ཡེ་ཤེས་རྟོགས་པར་བྱེད། །མཆོག་ཏུ་གསང་བ་ཟབ་མོའི་རྩེ་རྒྱལ་ནི། །འོད་གསལ་རྡོ་རྗེ་རྩེ་མོའི་ཐེག་པ་འདིར། །རང་གི་སྔོན་སྦྱངས་ལས་འཕྲོ་སད་པ་དང་། །དད་དང་དམ་ཚིག་མོས་གུས་རྣམ་པར་དག། རང་བཞིན་དང་ནི་སྦྱངས་པའི་ཤེས་རབ་ཅན། །གསང་བའི་རྒྱལ་པོ་འདི་ཡི་སྣོད་དུ་གྱུར། །སྒོ་གསུམ་འཁྲུལ་བའི་རུ་ཤན་ཕྱེད་པ་དང་། །ཁྱད་པར་སེམས་ཀྱི་རྩ་གདར་ལེགས་བཅད་པས། །འཁྲུལ་པའི་བརྫུན་ཕུག་ཐམས་ཅད་གཏིབ་པ་དང་། །ཡེ་གྲོལ་རིག་པ་གཅེར་བུ་མངོན་སུམ་མཐོང་། །དེ་ལ་བླ་མའི་མན་ངག་ཅོག་བཞག་གི །ཆོས་ཉིད་རིག་བའི་ངང་དེར་འཇོག་པ་ན། །ལྟ་སྒོམ་སྤྱོད་འབྲས་རིག་པའི་ཀློང་དུ་གཅིག། བསལ་བཞག་མེད་པའི་ཀློང་དེར་བབ་ཀྱིས་ཞོག། བཞག་ཅེས་བྱ་བ་ཚིག་གི་བླ་དྭགས་ཙམ། །ཕྱི་ནང་བར་མེད་ཟང་ཐལ་རྒྱ་ཡན་པ། །བཅིང་གྲོལ་ལས་འདས་ནམ་མཁའ་ལྟ་བུའི་ངང་། །རང་བཞིན་འོད་གསལ་ལྷུན་གྲུབ་འདུས་མ་བྱས། །རྒྱུ་དང་རྐྱེན་གྱིས་མ་བསྐྱེད་རང་བྱུང་བ། །དངོས་མཚན་སྤྲོས་པའི་ཆོས་ལས་རབ་ཏུ་འདས། །ཚོགས་བརྒྱད་བློ་ཡི་དྲི་མས་མ་བསླད་པའི། །འོད་གསལ་སེམས་ཀྱི་རྡོ་རྗེའི་གནས་ལུགས་ནི། །ཐོག་མཐའ་མེད་པའི་ཀུན་ཁྱབ་ཀུན་ཏུ་བཟང་། །རྣམ་དབྱེར་མེད་པའི་ཟག་མེད་ཡོན་ཏན་ཆོས། །ཡེ་རྫོགས་གཅིག་དང་དུ་མ་ལས་འདས་པའི། །ངོ་བོ་ཀ་དག་རང་བཞིན་འོད་དུ་གསལ། །ཐུགས་རྗེ་རིག་པའི་འཆར་གཞི་མ་འགགས་པས། །གོ་ཕྱེས་འཁོར་དང་མྱ་ངན་འདས་པའི་ཆོས། །རྩལ་དང་རོལ་པར་ཤར་བ་ངོ་ཤེས་པས། །གཉེན་པོ་གཞན་མེད་རང་སར་གྲོལ་བ་ཡང་། །བཅོས་བསྒྱུར་མི་དགོས་ཅེར་གྱིས་གྲོལ་འདི་མཚར། །ཇི་སྙེད་ལམ་བདེན་བྱ་རྩོལ་བཅས་པ་རྣམས། །དོན་མེད་ངལ་བ་ཙམ་དུ་གྱུར་པའི་ཕྱིར། །ཆོས་ཉིད་དོན་ལ་རྟོག་པའི་སྒྲོག་གིས་བཅིངས། །འདིར་ནི་བྱ་མེད་རང་གཤིས་ངང་འཇོག་པས། །གཟུང་འཛིན་རྟོག་པའི་སྤྲིན་ཚོགས་དབྱིངས་སུ་དེངས། །སྒོ་གསུམ་རྒྱ་གྲོལ་གཞིར་གནས་མངོན་དུ་གྱུར། །སྒྲོན་མ་བཞི་པོ་གནད་ཀྱི་གཅུན་པ་ལས། །ལྷུན་གྲུབ་སྣང་བ་བཞི་ཡི་ལམ་རྩལ་རྫོགས། །གདོད་མའི་ནང་དབྱིངས་ཀ་དག་ཆེན་པོར་གྲོལ། །ཡེ་ཤེས་ནང་གསལ་གཞོན་ནུ་བུམ་སྐུའི་སྦུབས། །འབྲས་བུ་རྒྱལ་པོའི་བཙན་ས་ཟིན་པ་ལས། །སླར་ཡང་ཕྱིར་གསལ་སྐུ་དང་ཡེ་ཤེས་ཀྱི། །མཛད་པ་ཕྲིན་ལས་བསམ་མི་ཁྱབ་པ་ཡིས། །ནམ་མཁའ་ཇི་སྲིད་བར་དུ་ཁྱབ་ཅིང་རྟག། དེ་ལྟའི་ཡེ་གྲོལ་རང་བཞིན་རྫོགས་པ་ཆེ། །སྲིད་པ་གསུམ་གྱི་གྲོང་ཁྱེར་རྒྱུན་གཅོད་ཅིང་། །ཐེག་པ་ཀུན་གྱི་རྩེ་མོར་ཕྱིན་པས་ན། །འདི་ཡི་རང་བཞིན་མཐོང་བས་ཆོས་ཀུན་ཤེས། །དེ་ལ་རྫོགས་པ་ཆེན་པོའི་རྒྱུད་ལུང་དང་། །ཀུན་མཁྱེན་བླ་མའི་གསུང་གི་མཛོད་ཁང་དང་། །གསང་སྔགས་སྙིང་ཐིག་ཆེན་པོའི་གཞུང་བཟང་ལ། །དད་པས་ཡང་ཡང་བལྟ་ཞིང་འདྲིས་པར་མཛོད། །རྟོག་གེའི་རིག་པ་ངན་སྐྱུགས་ལྟ་བུ་ཡིས། །སྔ་འགྱུར་རྒྱུད་ལུང་ཟབ་མོའི་དོན་རྟོགས་དཀའ། །ངེས་པའི་དོན་ལ་སྦྱོར་བའི་ཤེས་རབ་ནི། །དྲི་མ་མེད་པས་ཡང་ཡང་བལྟ་བར་མཛོད། །དེ་ལྟར་བརྩེ་བས་ལེགས་པར་འདོམས་པ་ཡིས། །སྐལ་བཟང་སློབ་མ་ཁྱོད་ལ་ཕན་པ་དང་། །དོན་གཉིས་ལྷུན་གྲུབ་ཆོས་ཀྱི་རྒྱལ་པོ་ཡི། །གོ་འཕང་ཐོབ་ནས་འགྲོ་བའི་དོན་བྱེད་ཤོག། །ཅེས་པའང་གཡག་ཟེ་ཚེ་དབང་འགྱུར་མེད་ནས་གསུང་བསྐུལ་ངོར། །ཆོས་མེད་ཀྱི་སྤྲང་པོ་བཙུན་འཆལ་ཆོས་ཀྱི་བློ་གྲོས་པས་བྲིས་པ་དགེའོ།། །། ༈ ཀླུ་ལྡིང་ཞབས་དྲུང་ལ་གནང་བའི་ཞལ་གདམས། དག་པའི་སྣང་བ་འབྱམས་ཀླས་ཤིང་། །དམ་པའི་ཡོན་ཏན་ཕུལ་བྱུང་བ། །ཆོས་ཀྱི་བཤེས་གཉེན་བླ་མ་རྗེའི། །སྐུ་ཡི་དཀྱིལ་འཁོར་ཉེ་དྲུང་དུ། །གཤམ་དུ་ཕྱག་བྲིས་གནང་འབྱོར་བྱུང་། །ཆོས་ཀུན་རྩ་བ་རང་གི་སེམས། །སྣང་བ་ཐམས་ཅད་རང་སྣང་ཡིན། །མེད་སྣང་སྒྱུ་མ་དང་མཚུངས་ཤིང་། །སེམས་ཡང་གཟུང་འཛིན་རྟོག་པ་འདི། །ཡོད་ཡོད་འདྲ་ཡང་དོན་ལ་མེད། །རྨི་ལམ་ནང་གི་སྐྱེ་ཤི་བཞིན། །དོན་ལ་གྲུབ་པ་མེད་དོ་ལགས། །ཐོག་མེད་དུས་ནས་ད་ལྟའི་བར། །གཉིས་སྣང་འཁྲུལ་པ་འདིས་བཅིང་པས། །གཟུང་འཛིན་གཉིས་བྲལ་གཉུག་མའི་སེམས། །བཅས་བཅོས་མ་བྱེད་རང་གར་ཞོག། ཆོས་དབྱིངས་རང་བཞིན་འོད་གསལ་དེ། །བདེ་བ་ཆེན་པོ་རྒྱུན་ཆད་མེད། །ན་ཚ་སྡུག་བསྔལ་དེ་ལ་མེད། །དེས་ན་རང་སེམས་འཁྲུལ་པ་རུ། །མ་ཤོར་རང་སར་ཟིན་གྱུར་ན། །དེ་ནི་བླ་མ་ཡི་དམ་དང་། །ཆོས་སྐྱོང་ཀུན་གྱི་ངོ་བོ་ཡིན། །འཁོར་བ་ཞེས་བྱ་སྤང་དུ་མེད། །མྱ་ངན་འདས་པ་ཐོབ་བྱ་མེད། །འཁོར་འདས་དབྱེར་མེད་དེ་ལ་ཟེར། །མ་རིག་འཇོམས་པའི་སྒྲོན་མེ་ཡིན། །ནད་གདོན་ཀུན་སེལ་སྨན་ཆེན་ཡིན། །དེ་ཕྱིར་དེ་ལ་ཐུགས་དམ་མཛོད། །རྟོག་པས་བཅིང་ན་གྲོལ་དུས་མེད། །རྣམ་རྟོག་ཐམས་ཅད་རང་ཤར་ཡིན། །རང་གྲོལ་སྐྱེ་མེད་ངང་དུ་ཐོངས། །དེ་སྐད་གདམས་པ་ཉུང་ངུ་ཕུལ། །ཕྲན་ལ་སྐྱབས་རྟེན་གནང་མི་དགོས་དང་ཁྱེད་ལ་སྐྱབས་འཇུག་རྟག་ཏུ་ཡིད་ལ་སྣང་འཇོག་ཞུ། ཞུ་འདེགས་བཅས་ཆོས་ཀྱི་བློ་གྲོས་པས་ཕུལ།། །། ༈ བླ་མའི་ཞབས་ལ་ཕྱག་བཙལ་ནས། །གདམས་ངག་བདུད་རྩིའི་ཐིག་པ་དབྱེ། །ཁྱོད་ཉིད་སྤྲུལ་པའི་སྐུ་ཞེས་པ། །ལས་ཀྱིས་སྤྲུལ་པ་མ་ཡིན་པར། །ཐུགས་རྗེའི་ཡས་སྤྲུལ་ཡིན་དགོས་ཀྱང་། །མངལ་གྱིས་སྒྲིབ་སོགས་ནོངས་ལྡན་ཕྱིར། །ལམ་ལ་སློབ་པ་ཤིན་ཏུ་རིགས། །དེ་ཡང་ཁས་བླངས་ཚུལ་ཁྲིམས་ཀྱི། །སྡོམ་པ་ད་ལྟ་གནས་པ་དང་། །སླད་ནས་བསྟན་རྩ་དགེ་སློང་གི །སྡོམ་ནོས་མིག་འབྲས་བཞིན་དུ་སྲུངས། །འདི་ནི་ཡོན་ཏན་ཀུན་གྱི་གཞི། །ད་ལྟ་རྣམ་རིག་བཀྲ་བའི་དུས། །ཐོས་བསམ་འབད་པ་བརྒྱ་ཕྲག་བསྐྱེད། །མདོ་སྔགས་རིས་མེད་གཞུང་ལ་བལྟ། །བློ་གྲོས་སྣང་བ་ཐོབ་པར་འགྱུར། །དེ་ནས་གཉིས་འཛིན་གཞོམ་པ་དང་། །བདག་རྒྱུད་གྲོལ་བ་ཐོབ་སླད་དུ། །བསྒོམ་པ་ལ་ནི་འབད་པར་རིགས། །དེས་ནི་ཟབ་མོའི་དོན་གནད་མཐོང་། །མདོར་ན་རང་སེམས་འདི་ཉིད་ནི། །དྲན་ཤེས་བག་ཡོད་བརྟན་པོས་སྲུངས། །སྡིག་པའི་གྲོགས་ངན་རིང་དུ་སྤོངས། །དམ་པའི་རྣམ་ཐར་བཟང་པོར་སློབས། །དེ་སྐད་གདམས་པ་ཉུང་ངུ་འདི། །ས་བོན་ཙམ་དུ་གྱུར་ནས་ཀྱང་། །རྒྱས་པ་སོ་ཐར་མདོ་དང་ནི། །སྤྱོད་འཇུག་སོགས་ལས་དགོངས་བཞེས་འཚལ། །འདེགས་བཅས་ཆོས་ཀྱི་བློ་གྲོས་པས་ཕུལ།། །། ༈ ཐོས་པས་བློ་གྲོས་རབ་ཏུ་རྒྱས་པ་ལས། །ཤེས་རབ་ཕུན་སུམ་ཚོགས་པ་འབྱུང་བར་ངེས། །དེ་ནི་གཏི་མུག་མུན་སེལ་སྒྲོན་མེ་ཡིན། །ཐོས་དོན་བསམ་དང་བསྒོམ་པས་གཏན་འབེབས་ན། །མཚན་ཉིད་ཇི་བཞིན་རྒྱུད་ལ་མྱོང་བའི་ཕྱིར། །དེས་ན་སྙིགས་དུས་ཚེ་ཐུང་ཡུད་ཙམ་འདིར། །སྒྲུབ་ལ་ནན་དུ་བརྩོན་པ་ཤིན་ཏུ་གཅེས། །མ་སྒོམ་ཆོས་དེ་ལྟོག་གྲིར་ཤི་དང་མཚུངས། །སྒྲུབ་པས་དོན་གཉིས་ཕུན་སུམ་ཚོགས་པར་འགྱུར། །ཡི་དམ་ལྷ་ལ་བཟང་ངན་མེད་མོད་ཀྱང་། །རང་གི་རིགས་ཀྱི་ལྷ་སྐལ་གང་ཡིན་བརྟགས། །དཔལ་ལྡན་སྒྱུ་མ་བདེ་མཆོག་འཁོར་ལོ་དང་། །རྡོ་རྗེ་རྣལ་འབྱོར་མ་ལ་བརྩོན་གྱུར་ན། །མགོ་བོའི་ཐོད་པ་བོར་བས་ཆོག་པར་འོང་། །བློ་སྣ་མང་ཞིང་ལྷ་མང་སྒྲུབ་པས་ཕུང་། །མཆོག་སྒྲུབ་ལྷ་རྣམས་ངོ་བོ་གཅིག་པའི་ཕྱིར། །གཅིག་འགྲུབ་པས་ནི་ཐམས་ཅད་རྣལ་འབྱོར་བྱེད། །དེ་ཕྱིར་ལྷ་གཅིག་དག་ལ་སྒྲུབ་པ་གཅེས། །རྡོ་རྗེའི་གནས་ཆེན་གཉན་ལྡོངས་ཤིན་ཏུ་ལེགས། །ཞེས་སྨྲས་སོ། །རབ་བརྟན་དགོན་གྱི་མཁན་པོ་ཤེས་རབ་འབྱུང་གནས་ལ་གནང་བའོ།། །། ༈ ཞལ་གདམས་བསིལ་སྦྱིན་བདུད་རྩི་ཞེས་བྱ་བ་བཞུགས་སོ། །དཔལ་ལྡན་བླ་མའི་ཞབས་ལ་ཕྱག་འཚལ་ལོ། །ལྷར་བཅས་འཇིག་རྟེན་གསུམ་ན་མངོན་མཐོ་བ། །སྟོན་པ་མཉམ་མེད་ཤཱཀྱའི་རྒྱལ་པོ་དང་། །དེ་སྲས་བྱང་སེམས་ཉན་རང་འཕགས་པའི་ཚོགས། །ཁྱད་པར་རྩ་གསུམ་ཀུན་འདུས་མཚོ་སྐྱེས་རྗེའི། །ཞབས་པད་བདེ་ཆེན་འཁོར་ལོར་མཆོད་བྱས་ནས། །གང་ཞིག་ཐར་པ་དོན་དུ་གཉེར་བ་ལ། །ཕན་པའི་གདམས་ངག་བསིལ་སྦྱིན་བདུད་རྩི་ནི། །ལུང་བཞིན་མདོར་བསྡུས་ངག་གིས་བསྙད་པར་བྱ། །ཤིན་ཏུ་རྙེད་དཀའི་རྟེན་བཟང་དལ་འབྱོར་འདི། །ཐོབ་པར་དཀའ་བའི་ཚུལ་ལ་ལེགས་བསམ་ཏེ། །དོན་ལྡན་སྙིང་པོ་བླང་བའི་ཐབས་བཟང་པོ། །ཡང་ཡང་རྒྱུད་ལ་བསྟེན་ཅིང་གོམས་པར་བྱ། །ཚེ་འདི་མི་རྟག་ཆུ་ཡི་ཆུ་བུར་འདྲ། །ལུས་སྲོག་འདི་ནི་མྱུར་དུ་འཇིག་ཅིང་ཟད། །མི་རྟག་མི་བརྟན་སྒྱུ་མའི་ངང་ཚུལ་ལ། །ལེགས་པར་བསམ་ནས་མྱུར་དུ་དམ་ཆོས་མཛོད། །བསགས་པའི་ལས་ནི་ནམ་ཡང་ཆུད་མི་ཟ། །རང་གི་སྟེང་དུ་མྱོང་བར་ངེས་པས་ན། །རྒྱུ་འབྲས་བླང་དོར་ཕྲ་ཞིབ་བསྲུང་བ་འདི། །ཆོས་སྒོར་ཞུགས་པ་རྣམས་ཀྱི་ཉམས་ལེན་མཐིལ། །འཁོར་བ་ཐམས་ཅད་སྡུག་བསྔལ་རང་བཞིན་ཡིན། །བདེ་བའི་གོ་སྐབས་ཅུང་ཟད་ཙམ་ཡང་མེད། །མཐོ་རིས་རྒྱལ་སྲིད་བདེ་བ་ཆེ་ཐོབ་ཀྱང་། །ཡིད་སྨོན་དང་བྲལ་ངེས་འབྱུང་བསྐྱེད་པར་མཛོད། །ཀུན་འབྱུང་བདེན་པའི་ཚུལ་ལ་རབ་བསམ་ནས། །དེ་ཡི་འབྲས་བུ་སྡུག་བསྔལ་སྤང་བའི་ཐབས། །ལམ་གྱི་བདེན་པ་རྒྱུད་ལ་བསྟེན་པ་ཡིས། །ཉེ་བར་ཞི་བའི་འགོག་པ་མངོན་དུ་བྱ། །དེ་ཡང་སྐྱབས་གསུམ་བསླུ་མེད་ཡིད་ཆེས་ཀྱི། །དད་པས་ཉེར་དྲངས་གཞན་ཕན་ལྷག་བསམ་ནི། །རང་འདོད་གཡོ་སྒྱུ་མེད་པར་བསྐྱེད་པ་འདི། །རྒྱལ་སྲས་རྣམས་ཀྱི་སྙིང་ནོར་གཅིག་པུ་ཡིན། །བདེ་གཤེགས་ཆོས་ཁམས་ཡོན་ཏན་རྒྱ་མཚོའི་གཏེར། །རང་ལ་ཡོད་ཀྱང་སྒྲིབ་པའི་སྤྲིན་གྱིས་གཡོགས། །དེ་བསལ་ཚོགས་གཉིས་རྒྱ་ཆེན་བསགས་པ་ལས། །བྲལ་དང་སྨིན་པའི་འབྲས་བུ་མངོན་དུ་འགྱུར། །བདག་དང་ཕུང་པོ་རྣམ་རིག་སྒྲོ་བཏགས་ཆོས། །རིག་པའི་ལམ་ནས་ཡང་དག་དཔྱད་པ་ལས། །མཐར་འཛིན་བདག་ལྟ་དྲུང་ནས་འབྱིན་པ་ཡི། །བདག་མེད་སྤྲོས་བྲལ་ལྟ་བ་གཏན་འབེབས་མཛོད། །དེ་ནས་རྡོ་རྗེ་ཐེག་པའི་ལམ་ཞུགས་ནས། །དབང་གིས་རྒྱུད་སྨིན་དམ་ཚིག་རྣམ་དག་གི །བསྐྱེད་དང་རྫོགས་པའི་རིམ་པར་བརྩོན་པ་ལས། །སྒོ་གསུམ་རྡོ་རྗེ་བཞི་རུ་སྒྲུབ་པར་བྱ། །ཁྱད་པར་དྲན་པས་སྲིད་ཞིའི་འཇིགས་འཕྲོག་པ། །ཀུན་བཟང་བླ་མ་སྙིང་གི་པདྨོ་རུ། །གུས་པས་མཆོད་ན་རྡོ་རྗེའི་བྱིན་འབེབས་ཏེ། །ཡེ་ཤེས་འོད་གསལ་ཉི་མ་སྙིང་དབུས་འཆར། །སྤྲོས་བྲལ་ཀ་ནས་དག་པའི་དབྱིངས་ཆེན་པོར། །ལྷུན་གྲུབ་འོད་གསལ་སྣང་བ་རྟག་འཆར་བས། །ཆོས་ཟད་བློ་འདས་གདོད་མའི་གྲོལ་གཞི་ཆེར། །མངོན་བྱང་ཆུབ་ནས་འཁོར་བ་དོང་སྤྲུགས་བྱེད། །མདོར་ན་སྒོ་གསུམ་བྱ་བ་ཅི་བྱེད་ཀུན། །དམ་པའི་ཆོས་དང་མཐུན་པར་རབ་སྒྲུབ་ནས། །དྲན་དང་ཤེས་བཞིན་བག་ཡོད་བརྟུལ་ཞུགས་ལས། །ནམ་ཡང་ཉམས་མེད་བརྩོན་པར་ཤིན་ཏུ་གཅེས། །སྦྱོར་བ་སེམས་བསྐྱེད་དངོས་གཞི་དམིགས་མེད་དང་། །རྗེས་ལ་ཡང་དག་བསྔོ་བས་རྒྱས་བཏབ་འདི། །ཐེག་ཆེན་ལམ་གྱི་གཞུང་ཤིང་ཡིན་པས་ན། །དེ་གསུམ་སྒོམ་ནས་དགེ་ཚོགས་མཐར་ཕྱིན་མཛོད། །དེ་སྐད་གདམས་བཞིན་རང་གིས་མི་བྱེད་ཀྱང་། །གཞན་ལ་ཕན་པའི་ཤུགས་ཀྱིས་ཉེར་དྲངས་པས། །དམ་པ་རྣམས་ཀྱི་གསུང་གི་རྗེས་འབྲངས་ནས། །ལེགས་པར་འདོམས་པས་ཁྱོད་ཐུགས་གྲོལ་གྱུར་ཅིག། ཅེས་པའང་སྔ་འགྱུར་བསྟན་པའི་ཉི་མ་གྲུབ་དབང་རྫོགས་ཆེན་དྲུག་པ་རིན་པོ་ཆེའི་གསོལ་དཔོན་པད་རབ་བུ་དགེ་ཆུང་རྒྱལ་ནས་གསུང་བསྐུལ་ངོར་རྨོངས་རྒན་ཆོས་ཀྱི་བློ་གྲོས་པས་བྲིས་པའོ། །སརྦ་ཛ་ག་ཏཾ།། །། ༈ རང་གི་སློབ་བུ་མཆོག་གསུམ་སྐྱབས་ལ་སྤྲིང་ཡིག་བཞུགས་སོ། །རྗེ་དྲན་པས་གདུང་སེལ་བླ་མ་ལ། །ཡིད་མོས་གུས་གདུང་བས་གསོལ་བ་འདེབས། །བུ་མཆོག་གསུམ་སྐྱབས་ལ་ཐུགས་རྗེས་ཟུངས། །ཐར་པའི་ལམ་སྣ་དྲང་དུ་གསོལ། །མི་ང་ལ་དག་སྣང་ཆེར་བསྐྱེད་པའི། །མཆོག་གི་མིང་ཅན་སློབ་མ་ཁྱོད། །དད་པ་དང་དམ་ཚིག་ས་གཞི་ལ། །མོས་གུས་ཀྱི་དཔག་བསམ་རབ་རྒྱས་པས། །བྱིན་རླབས་ཀྱི་འབྲས་བཟང་ཐོབ་པ་དེ། །དཀོར་རྒན་ང་བྱིན་ཆེན་མ་ལགས་ཀྱང་། །ཕ་བརྒྱུད་ལྡན་བླ་མའི་ཐུགས་རྗེ་ཡིན། །ཆོས་ཀུན་གྱི་སྔོན་འགྲོར་སེམས་བསྐྱེད་དང་། །དངོས་དམིགས་མེད་ངང་ལ་བློ་བཞག་དང་། །རྗེས་བསྔོ་བ་སྨོན་ལམ་བྱེད་པ་འདི། །བྱང་ཆུབ་སེམས་དཔའི་ཁྱད་ཆོས་ཡིན། །འཁོར་བའི་ཉེས་དམིགས་དྲན་པ་ཡིས། །རྒྱུ་འབྲས་འཇུག་ལྡོག་བྱེད་པ་དང་། །དལ་འབྱོར་རྙེད་དཀའི་འདུ་ཤེས་བསྐྱེད། །དེ་ཡུན་དུ་མི་རྟག་འཆི་བ་དྲན། །དམ་ཆོས་ལ་བརྩོན་འགྲུས་བསྐྱེད་པ་དང་། །སྲིད་འཁོར་བའི་གནས་ལ་ངེས་འབྱུང་མཛོད། །སྐྱབས་ཀུན་འདུས་རྩ་བའི་བླ་མ་དེ། །སངས་རྒྱས་ཡིན་པར་ཐག་བཅད་ནས། །མོས་གུས་ལ་ལྟེམ་རྐྱང་མ་བྱེད་ན། །དེ་ཁོ་ནས་མཆོག་གི་དངོས་གྲུབ་ཐོབ། །གཞི་བདེ་གཤེགས་སྙིང་པོ་འཕོ་འགྱུར་མེད། །ཀ་ནས་དག་པའི་ཆོས་ཉིད་ལ། །གཤིས་སྤངས་བླང་བསལ་བཞག་མེད་ལགས་ཀྱང་། །མ་འདྲེས་ཤན་འབྱེད་ཤིན་ཏུ་གཅེས། །ཀུན་རྣམ་ཀྱི་གསལ་ཆ་རྐྱེན་ལ་ལྟོས། །སྐབས་རེས་འགའ་དྭངས་གསལ་འཕེལ་འགྲིབ་ཅན། །སེམས་བརྒྱལ་སོགས་སྐབས་སུ་དེ་འགག་ལ། །མཐའ་དབུས་དང་བྲལ་བའི་རིག་པ་འདི། །རྐྱེན་བཟང་ངན་གྱིས་བརྫི་བ་མི་ནུས་ཤིང་། །ནང་དུ་བསྡམ་པ་ལྟར་མི་དགོས། །རིག་པ་རྒྱ་གྲོལ་ཕྱོགས་མེད་ཡིན། །ཧད་དེ་བ་ལ་ཟང་ཐལ་ལེར། །སྨྲ་བསམ་བརྗོད་བྲལ་གྱི་གནས་ལུགས་ཡིན། །ནམ་མཁའ་ལྟ་བུ་རྒྱ་རེ་ཡངས། །ཉི་ཟླ་ལྟ་བུ་འོད་གསལ་བ། །ཡེ་ཤེས་དེ་སྤྲོས་མཚན་དངོས་པོ་དང་། །སྤྲོས་མེད་ཀྱི་ཆོས་ལས་འདས་པ་ལ། །རང་བྱུང་གི་རིག་པ་ཞེས་སུ་གྲགས། །བུ་བློ་ཡི་ཆོས་ཀྱིས་མ་འཆིངས་ཤིག། འཆིང་ན་སྲིན་བུའི་ཁ་ཆུ་བཞིན། །རང་གིས་རང་བཅིངས་གྲོལ་དུས་མེད། །རྣམ་རྟོག་བཟང་ངན་གང་ཤར་བ། །བྱུང་ཡང་ཆོས་ཀྱི་དབྱིངས་ལས་བྱུང་། །གནས་ཀྱང་ཆོས་ཀྱི་དབྱིངས་ལ་གནས། །ཐིམ་ཡང་ཆོས་ཀྱི་ཀློང་དུ་ཐིམ། །མཉམ་ཉིད་ཀྱི་ཆོས་ལ་བཟང་ངན་མེད། །བཟང་ངན་གྱི་གདམ་ཀ་བསྐྱུར་ལ་ཐོངས། །མཁར་སྤྲིན་དེངས་བཞིན་རང་གྲོལ་ཞོག། གྲོལ་བྱེད་གཉེན་པོ་གཞན་མི་དགོས། །རྟོག་ཚོགས་དུ་མ་རོ་གཅིག་འདྲེས། །རོ་གཅིག་ངང་ལ་འཛིན་པ་མེད། །མདོར་བསྡུ་ན་གཟུང་འཛིན་གྱིས་མ་བསླད་པར། །ཆོས་ཉིད་རིག་པའི་གཤིས་ལུགས་འདི། །དུས་གསུམ་རྒྱུན་ཆད་མེད་པ་ལ། །བུ་ཡེངས་པར་མ་ཤོར་ཕྱམ་བརྡལ་ཞོག། གུ་ཡངས་བློ་བདེ་ཆེན་པོར་ཞོག། ཞོག་ཅེས་བྱ་བ་ཚིག་ཡིན་ཏེ། །དོན་སྤྱི་ལ་བཞག་བྱ་གཞག་བྱེད་བྲལ། །བསྒོམ་འདོད་ཀྱི་ཞེན་པའི་འཆིང་བ་ཤིགས། །དབྱིངས་སྟོང་པའི་ངོ་བོ་ཆོས་ཀྱི་སྐུ། །གདངས་གསལ་ཆ་ལོངས་སྤྱོད་རྫོགས་པའི་སྐུ། །རྩལ་མ་འགག་ཤར་བ་སྤྲུལ་པའི་སྐུ། །དེ་གསུམ་དུ་དབྱེ་ཡང་དོན་དབྱེར་མེད། །ད་ལྟ་ཡི་རིག་པ་སལ་ལེ་བ། །འདི་ལ་སྐུ་གསུམ་ཚང་བ་ཡིན། །འདི་མ་བཅོས་མ་ཡེངས་དང་ལྡན་ན། །དེ་གོམས་པས་སྐྱེ་ཤི་བར་དོ་ཡི། །འཁྲུལ་རྟོག་སྣང་ཐམས་ཅད་དབྱིངས་སུ་ཐིམ། །ཕྱི་ཡུལ་སྣང་ཕྱི་རུ་མི་བཟུང་ཞིང་། །རིག་པ་ནང་དུ་མ་བཅོས་པ། །སྣང་སེམས་གཉིས་མེད་ཆེན་པོ་ཤར། །དེ་རྟོགས་པས་ཅིར་སྣང་ཀུན་བཟང་རྒྱན། །རིག་པའི་ཆོ་འཕྲུལ་ཆེན་པོར་གོ །གོ་བྱ་གོ་བྱེད་གཉིས་སུ་མེད། །གཉིས་མེད་ཀྱི་ངང་ལ་གང་དགར་ཞོག། འཁོར་བ་འདི་གདོད་ནས་རྣམ་པར་དག། འཁྲུལ་སེམས་གཡའ་དྲིས་གོས་པ་འདི། །བསལ་བའི་ཕྱིར་དུ་བསགས་སྦྱང་བྱ། །བློ་ཆོས་སུ་འགྲོ་བར་ངེས་འབྱུང་བསྐྱེད། །ཆོས་ལམ་དུ་འགྲོ་ཕྱིར་བྱམས་སྙིང་རྗེ། །བྱང་ཆུབ་སེམས་མཆོག་བསྒོམ་པར་བྱ། །ལམ་འཁྲུལ་པ་ཞི་ཕྱིར་སྟོང་ཉིད་བསྒོམ། །འཁྲུལ་ཡེ་ཤེས་དག་ཅིང་ཟུང་འཇུག་གི །ཡེ་ཤེས་རྒྱུད་ལ་སྐྱེ་བའི་ཕྱིར། །རྡོ་རྗེ་ཐེག་པའི་རིམ་གཉིས་བསྒོམ། །དེ་ལས་ཀྱང་འོད་གསལ་རྫོགས་པ་ཆེའི། །ཡེ་ཤེས་རང་ལ་གཞིར་རྫོགས་དེ། །རྗེ་བླ་མའི་དྲིན་གྱིས་ངོ་སྤྲོད་ལ། །བུས་འཛིན་པས་མ་བསླད་རང་སར་ཞོག། རིག་བཟོ་མེད་པའི་རང་གསལ་འདི། །གཉུག་མའི་དྲན་རིག་ཡིན་མོད་ཀྱང་། །ཀུན་གཞིའི་རྣམ་ཤེས་གསལ་ཆ་དང་། །འཁོར་འདས་གཉིས་སུ་འཛིན་པ་འཁྲུལ། །དོན་དམ་གྱི་བདེན་པ་གཅིག་པུ་ལགས། །ཁྱོད་ཀྱི་ཐུན་མིན་ཐུན་མོངས་གི །།རྟོགས་མྱོང་གོ་བ་སྐྱོན་མེད་གསུངས། །མཆོག་འཛིན་དང་ཞེན་པ་མ་བྱེད་ཅིག། གཉིས་སྣང་དབྱིངས་སུ་མ་ནུབ་བར། །རྒྱུ་འབྲས་ཀྱི་སྤང་བླང་ཞིབ་མོར་གྱིས། །བླ་མ་ལ་མོས་གུས་བསྐྱེད་ཅིག་དང་། །དཀར་པོའི་ཚེས་ཀྱི་ཟླ་བ་བཞིན། །ཉམས་རྟོགས་ཇེ་བས་ཇེ་བཟང་འགྲོ། །ཆོས་འདུས་བྱས་ཀྱི་དགེ་ཚོགས་རྒྱ་ཆེར་བསྒྲུབས། །དེ་ལ་བསྔོ་བས་རྒྱས་བཏབ་ཡོད། །ལུས་མེ་ཡི་ཚིག་པའི་སྡུག་བསྔལ་དེས། །ཁྱོད་ཀྱི་ལས་སྒྲིབ་རྒྱ་ཆེར་དག། དེ་བླ་མ་དཀོན་མཆོག་གི་ཐུགས་རྗེ་ཡིན། །དགའ་བ་བསྒོམ་ལ་གསོལ་བ་ཐོབ། །རྣལ་འབྱོར་མ་ཡི་བསྒོམ་བཟླས་དང་། །ཚེས་བཅུའི་མཆོད་པ་མ་ཆག་ཨང་། །ཁྱོད་འདིར་ཕྱོགས་སླེབས་པར་མ་གྱུར་ཀྱང་། །ཁྱོད་དང་ང་གཉིས་འདུ་འབྲལ་མེད། །དེས་ན་ཨེ་འབྱོར་བལྟ་མི་དགོས། །ཚེ་ཐར་སྟོང་གཅིག་དགེ་བ་དང་། །དམ་ཚིག་གཙང་བའི་བདེན་སྟོབས་ཀྱིས། །ངེད་ཀྱང་རིང་དུ་འཚོ་བར་སྨོན། །ཚུལ་ཁྲིམས་ཀྱི་ས་གཞི་གཙང་མ་ལ། །བྱང་ཆུབ་སེམས་ཀྱི་དཔག་བསམ་འཁྲུངས། །མཆོག་ཐུན་གྱི་འབྲས་བུ་བཟང་པོ་དེས། །རང་གཞན་ཀུན་རྟག་ཏུ་བཀྲ་ཤིས་ཤོག། དངོས་འབུལ་འབྱོར་ལན་ཟུར་དུ་ཡོད། །ཆོས་ཀྱི་བློ་གྲོས་ངོ་མས་ཕུལ། སརྦ་མངྒ་ལཾ།། །། ༈ རྗེ་བླ་མ་རྣམས་ལ་ཕྱག་འཚལ་ལོ། །རྟེན་དལ་དང་འབྱོར་པའི་ལུས་འདི་ཉིད། །ནམ་མི་རྟག་འཆི་བ་དྲན་པ་དང་། །འཁོར་བ་ཡི་ཉེས་དམིགས་ལ་བསམ་ནས། །ལས་རྒྱུ་འབྲས་སྤང་བླང་དྲན་པར་མཛོད། །སྐྱབས་བླ་མ་དཀོན་མཆོག་གཙུག་ཏུ་བསྒོམ། །ཡིད་ཆེས་ཀྱི་དད་པས་སྐྱབས་སུ་འགྲོ། །ཁམས་གསུམ་གྱི་སེམས་ཅན་ཕ་མར་ཤེས། །བྱམས་སྙིང་རྗེ་བྱང་སེམས་བསྒོམ་པ་གཅེས། །བསགས་སྦྱོང་ལ་ནན་ཏན་འབད་པ་དང་། །དྲིན་ལྡན་གྱི་བླ་མར་གསོལ་བ་ཐོབ། །བསྐྱེད་རིམ་གྱིས་ཐ་མལ་སྣང་ཞེན་སྦྱངས། །རྫོགས་རིམ་གྱིས་གྱ་ནོམ་ལྷར་ཞེན་སྦྱངས། །དེ་གཉིས་ཀྱི་གནད་འགག་ཟབ་མོ་ནི། །སེམས་མ་བཅོས་གསལ་སྟོང་ཟུང་འཇུག་ངང་། །ཡེངས་མེད་ཀྱི་འཛིན་བྲལ་འཇོག་པ་གནད། །དུས་ཀུན་ཏུ་བཟང་སྤྱོད་སྨོན་ལམ་འདོན། །དགེ་རྩ་རྣམས་བསྔོ་བས་རྒྱས་འདེབས་ཞུ། །ཚུལ་དེ་སྐད་ཆོས་ཀྱི་བློ་གྲོས་པས། །དོན་ལྡན་གྱི་སློབ་བུར་སྤྲིང་བ་དགེ། །། ༈བླ་མ་ལ་ཕྱག་འཚལ་ལོ། བློ་ལྡོག་རྣམ་བཞི་སྐྱབས་འགྲོ་དང་། །བྱམས་དང་སྙིང་རྗེ་བྱང་སེམས་བསྒོམ། །སྒྲིབ་སྦྱོང་ཚོགས་བསག་ནན་ཏན་བྱ། །བྱིན་རླབས་བླ་མའི་རྣལ་འབྱོར་བསྒོམ། །གསོལ་བཏབ་དབང་བླངས་ཐུགས་ཡིད་བསྲེ། །སེམས་ཀྱི་གཞི་རྩ་ལེགས་པར་བཅད། །ལུས་ནི་བསྒུལ་བསྐྱོད་བྲལ་བར་བཞག། ངག་གི་སྨྲ་བ་རྒྱུན་བཅད་ཅིང་། །སེམས་ཀྱིས་རྟོག་པའི་རྗེས་མི་འབྲང་། །འགྱུ་བ་རང་སར་བཞག་པ་དང་། །རླུང་ནི་དལ་ཞིང་མིག་འབྲས་ནི། །དབྱིངས་ལ་གཏད་པ་དེ་ཡི་སྐབས། །རིག་པ་དངོས་མེད་ནམ་མཁའ་ལྟར། །ངོ་བོ་སྟོང་ལ་རང་བཞིན་གསལ། །ཐུགས་རྗེ་རིག་པ་རྟོག་པ་མེད། །ཀུན་གྱི་འཆར་གཞི་གོ་མ་འགགས། །གསལ་དྭངས་ངང་ལ་མ་ཡེངས་བཞག། རྩལ་སྣང་རྟོག་པའི་རྗེས་མི་འབྲང་། །རང་ཤར་རང་གྲོལ་ཉིད་དུ་བྱ། །ཆོས་རྣམས་སྒྱུ་མ་ལྟ་བུར་བལྟ། །ནམ་ཞིག་འཆི་པའི་དུས་བྱེད་ཚེ། །ཞེན་ཆགས་འཁྲི་བ་ཀུན་སྤངས་ལ། །སྤྱི་བོར་རྩ་བའི་བླ་མ་བསྒོམ། །རིག་པ་ཨ་ཡིག་རྣམ་པས་ནི། །བླ་མའི་ཐུགས་ཀར་ཡང་ཡང་སྤར། །དེ་ཡི་ངང་དུ་འཆི་ནུས་ན། །དག་པའི་ཞིང་དུ་སྐྱེ་བར་འགྱུར། །དེ་ཡང་ད་ལྟ་སྦྱངས་པ་ཡི། །གོམས་པས་འཕོ་བར་ནུས་པ་ཡིན། །རྒྱུན་དུ་ཆོས་སྤྱོད་ཁ་བཏོན་དང་། །སེམས་བསྐྱེད་བསམ་པ་བཟང་པོ་ཡི། །བསྔོ་བ་སྨོན་ལམ་བྱ་བ་གཅེས། །ཞེས་པའང་ལ་དཀར་ཨ་ནེ་སྐལ་ཆོས་ལ་ཆོས་ཀྱི་བློ་གྲོས་པས་གདམས་པའོ།། །། ༈ ཆབ་གཙང་རྗེ་བཙུན་སྐུ་ཞབས་ལ་གདམས་པ་དད་པའི་ས་བོན་ཅེས་བྱ་བ་བཞུགས་སོ། །རྗེ་བླ་མ་རྣམས་ལ་ཕྱག་འཚལ་ལོ། །མི་རྟག་འཆི་བ་དྲན་པར་བྱིན་གྱིས་རློབས། །དུས་ད་ལྟའི་སྒྱུ་ལུས་གོག་པོ་འདི། །སྐད་ཅིག་གིས་འགྱུར་ཤིང་འཆི་ལ་ཉེ། །རྐྱེན་བཟང་ངན་ཅི་འོང་མི་ཤེས་པས། །འཕྲལ་འཕྲལ་དུ་དམ་པའི་ཆོས་ལ་འབུངས། །ཚེ་འཇིག་རྟེན་འདི་ཡི་བྱ་བཞག་རྣམས། །མདང་སུམ་གྱི་རྨི་ལམ་ཇི་བཞིན་དུ། །རྟག་མི་ཐུབ་ཆུ་ཡི་ཆུ་བུར་བཞིན། །ཚུལ་དེ་ལ་བསམ་ནས་དགོས་མེད་ཀྱི། །ད་བྱ་བཞག་ཐམས་ཅད་བསྐྱུར་ལ་ཐོངས། །ནམ་འཆི་བའི་དུས་སུ་འཁོར་བསྒྱུར་གྱི། །དཔལ་མངའ་ཐང་འབྱོར་པ་ཡོད་ན་ཡང་། །ཁབ་གཅིག་ཙམ་ཁྱེར་དབང་མེད་པས་ན། །ཕན་ངེས་པ་དམ་པའི་ལྷ་ཆོས་མཛོད། །དགྲ་འཆི་བདག་ནམ་འོང་ངེས་མེད་པས། །ཆོས་སང་བྱེད་གནང་བྱེད་དབང་མ་ཤོར། །ལས་རྒྱུ་འབྲས་བླང་དོར་ལ་བརྩོན་ན། །སྒོ་གསུམ་གྱི་དགེ་བ་དེ་རང་ཡིན། །སྐྱབས་མཐར་ཐུག་བླ་མར་གསོལ་བ་ཐོབ། །དད་པ་དང་དག་སྣང་བསྐྱེད་པར་མཛོད། །བློ་གཏད་ཀྱི་ཡིད་ཆེས་སྐྱེས་གྱུར་ན། །མཆོག་ཐུན་མོང་དངོས་གྲུབ་མྱུར་དུ་ཐོབ། །ཆོས་ཀུན་གྱི་རྩ་བ་བྱང་ཆུབ་སེམས། །འགྲོ་དྲུག་གི་ཕ་མ་དྲིན་ཅན་ལ། །ཕན་འདོད་ཀྱི་ལྷག་བསམ་བརྟན་པོ་མཛོད། །གཞི་གདོད་མའི་སངས་རྒྱས་རང་ཆས་སུ། །རང་ལ་ནི་ཡོད་ཀྱང་ངོ་མ་ཤེས། །དེ་མ་རིག་སྒྲིབ་པ་ཡིན་པའི་ཕྱིར། །ཚོགས་བསག་དང་སྒྲིབ་སྦྱོང་ལ་བརྩོན་པར་ཞུ། །ལུས་སྣང་སྟོང་ལྷ་ཡི་བསྐྱེད་རིམ་བསྒོམ། །ངག་བཟླས་བརྗོད་ལ་རྒྱུན་དུ་བརྩོན་པ་དང་། །སེམས་ངོ་བོ་ཉིད་ཀྱི་གནས་ལུགས་ལ། །སྒོ་གསུམ་པོ་མ་བཅོས་རང་བབ་ཞོག། ཡིད་དཔྱོད་དང་བྲལ་བའི་རིག་པའི་གཤིས། །གསལ་སྟོང་དང་ཟུང་འཇུག་ཆེན་པོར་ཤར། །དེ་མ་ཡེངས་མ་བསྒོམ་འཛིན་མེད་ངང་། །རིག་སྟོང་དང་འོད་གསལ་རྗེན་པར་ཤར། །དེ་སངས་རྒྱས་ཀུན་གྱི་དགོངས་པ་ལགས། །དུས་གསུམ་དུ་བསགས་པའི་དགེ་ཚོགས་རྣམས། །མ་འགྲོ་དྲུག་སེམས་ཅན་རྣམས་ལ་བསྔོ། །ཚུལ་དེ་སྐད་རང་གི་སློབ་མ་ལ། །སྙིང་བརྩེ་བས་གདམས་པའི་དགེ་ཚོགས་རྣམས། །དམིགས་མེད་དུ་བསྔོ་བས་འགྲོ་བ་ཀུན། །སྐུ་གསུམ་གྱི་གོ་འཕང་མངོན་གྱུར་ཤོག། །ཅེས་པའང་རང་དང་དངོས་འཕྲད་ཀྱི་ཚབ་ཏུ་ཆོས་ཀྱི་བློ་གྲོས་པས་སྤྲིང་བའོ། །སརྦ་མངྒ་ལཾ། དགེའོ། ། ༈ ཞལ་གདམས་མུ་ཏིག་ཕྲེང་བ་བཞུགས་སོ། །བླ་མའི་ཞབས་ལ་ཕྱག་འཚལ་ལོ། །སྔོན་བསགས་བཟང་པོས་འཕེན་པ་ལས། །དལ་འབྱོར་ཡིད་བཞིན་ནོར་བུ་རྙེད། །མཚན་ལྡན་བླ་མའི་ཞབས་ལ་ཐུག། བུ་ཁྱོད་སྐལ་བ་བཟང་ངོ་སྙམ། །ཟབ་རྒྱས་ཆོས་ཀྱི་བདུད་རྩི་ལ། །ཅི་དགར་སྤྱོད་དུ་ཡོད་པའི་སྐབས། །ལེ་ལོའི་དབང་དུ་མ་ཤོར་བར། །བསྟན་པའི་སྙིང་པོ་སྒྲུབ་ལ་རེམས། །ཆོས་ཀུན་རྩ་བ་རང་གི་སེམས། །འདུལ་སྦྱང་བྱེད་ལ་རག་ལས་ཤིང་། །དེ་ཡང་སེམས་ཀྱི་རྩ་བཅད་ན། །གཟུང་འཛིན་གཉིས་མེད་རྟོགས་པར་འགྱུར། །སྐྱེ་འགགས་གནས་གསུམ་དང་བྲལ་ཞིང་། །རང་བཞིན་འོད་གསལ་སྟོང་པ་ཆེ། །འདི་ཀོ་སེམས་ཀྱི་གནས་ལུགས་ལགས། །འདི་ཉིད་རྟོགས་ན་འཆི་མེད་ཀྱི། །བཙན་ས་ཟིན་པར་ཐེ་ཚོམ་མེད། །བསྐྱེད་དང་རྫོགས་པ་ཐམས་ཅད་ཀྱི། །མཐར་ཐུག་འདི་ལ་ཐུག་པར་འགྱུར། །བླ་མ་བསྒོམ་ལ་དབང་བཞི་བླངས། །བསྐྱེད་རིམ་བསྒོམ་ལ་ཞེན་པ་ཆོད། །རྫོགས་རིམ་མཚན་བཅས་བསྒོམ་པ་ཡིས། །ཞུ་བདེ་ལྷན་སྐྱེས་ཡེ་ཤེས་འདྲེན། །མཚན་མེད་རྫོགས་རིམ་ལེགས་བསྒོམ་པས། །འོད་གསལ་ཆེན་པོར་གནས་པ་དང་། །འཁྲུལ་སྣང་ཐམས་ཅད་དབྱིངས་སུ་ཟད། །སྐུ་དང་ཡེ་ཤེས་ལ་དབང་འབྱོར། །གཞན་ཕན་ཕྲིན་ལས་མཐའ་ཡས་སོ། །མི་རྟག་ངེས་འབྱུང་ལས་འབྲས་ལ། །བསམ་ཞིང་དད་དང་མོས་གུས་བསྐྱེད། །བྱམས་དང་སྙིང་རྗེ་བྱང་སེམས་བསྒོམ། །ཅིར་སྣང་ཐམས་ཅད་བླ་མར་ལྟོས། །སྙིང་གར་བསྒོམ་ལ་ཐུགས་ཡིད་བསྲེ། །གསལ་སྟོང་ཟུང་འཇུག་སྐུ་གསུམ་དུ། །ངོ་འཕྲོད་པས་ནི་རྫོགས་སངས་རྒྱས། །སངས་རྒྱས་རང་ལ་གནས་པ་འདི། །གཞན་དུ་བཙལ་བས་རྙེད་མི་འགྱུར། །དེ་ལྟར་གདམས་པའི་ཕྲེང་བ་འདི། །ཁྱོད་ལ་ཕུལ་བས་འདི་དོན་རྙེད། །འཆི་བ་ཆོས་སྐུར་གཏན་ས་ཟིན། །རྡོ་རྗེ་འཆང་དབང་ཐོབ་པར་ཤོག། གལ་ཏེ་བརྟན་པ་མ་ཐོབ་ཀྱང་། །བླ་མ་རྣལ་འབྱོར་མ་དཔལ་གྱིས། །མཁའ་སྤྱོད་གནས་སུ་དྲོངས་གྱུར་ཅིག། དེ་ལྟར་གདམས་པའི་ཚིགས་སུ་བཅད་པ་འདི་ཡང་འཇམ་དབྱངས་ཆོས་ཀྱི་བློ་གྲོས་པས་ཤར་མར་བྲིས་ཏེ་ཕུལ་བ་སིདྡྷི་རསྟུ།། །། ༈ རང་གཞན་ལ་གདམས་པ་ཕན་བདེའི་འཁྲི་ཤིང་ཞེས་བྱ་བ་བཞུགས། དཔལ་ལྡན་བླ་མའི་ཞབས་ལ་གུས་པས་འདུད། །སྔོན་བསགས་དགེ་བའི་བསོད་ནམས་མཐུ་བརྟས་པས། །དེང་འདིར་ཆོས་ལྡན་རིགས་སྐྱེས་དལ་བའི་རྟེན། །མི་ཁོམ་བརྒྱད་ལས་གྲོལ་ཞིང་འབྱོར་བཅུ་ཚང་། །འདི་འདྲ་རྙེད་པ་རྒྱལ་བའི་ཐུགས་རྗེ་ཡིན། །དཔེ་དང་གྲངས་སོགས་གང་ལ་དཔག་གྱུར་ཀྱང་། །འདི་འདྲ་རྙེད་པ་སྲིད་མཐའ་མ་བཀག་ཙམ། །འདི་ཡང་ཡུན་དུ་གནས་པ་མ་ཡིན་ཏེ། །འགྲོ་བ་མཆོག་དམན་སྔར་བྱུང་ད་ལྟ་བ། །བརྟགས་དཀའི་འཕོ་འགྱུར་བསམ་མི་ཁྱབ་པ་དང་། །དེ་བཞིན་ཕྱི་སྣོད་འཇིག་རྟེན་འཕེལ་འགྲིབ་སོགས། །གང་ལ་བརྟགས་ཀྱང་མི་རྟག་མི་བརྟན་པ། །ཕྲ་རག་གིས་ནི་ལེགས་པར་གཏན་དབབ་ན། །ཤེས་བྱའི་ཆོས་ཀྱི་བརྫུན་ཕུག་རྡིབ་པར་འགྱུར། །ཆུ་ཡི་ཆུ་བུར་རྩ་རྩེའི་ཟིལ་པ་དང་། །ནམ་ཟླ་དུས་བཞི་དང་སྦྱར་བསྒོམ་པ་གཅེས། །གལ་སྲིད་ཆོས་མེད་དུས་མིན་འཕོས་གྱུར་ན། །སྔ་ཕྱིའི་དགེ་ཤུགས་ཆེ་ཆུང་ཅི་བསགས་པ། །ཆུད་ཟ་མི་འགྱུར་ཟིན་པའི་ཕུང་པོ་ལ། །སྨིན་ཅེས་རྒྱལ་བ་བདེན་པར་སྨྲ་བས་གསུངས། །དེ་ཡང་སྡིག་པའི་འབྲས་བུ་ལོངས་སྤྱོད་ལ། །ངན་སོང་གསུམ་པོའི་སྡུག་བསྔལ་བཟོད་བླག་མེད། །དེ་བཞིན་དགེ་སྡིག་སྤེལ་མར་བྱས་པ་དང་། །ཟག་དང་བཅས་པའི་དགེ་དང་ལུང་མ་བསྟན། །ལས་རྣམས་ཀྱིས་ནི་མཐོ་རིས་གསུམ་ཐོབ་ཀྱང་། །དེར་ཡང་སྡུག་བསྔལ་རྣམ་གྲངས་བརྗོད་མི་ལོང་། །མདོར་ན་ཁམས་གསུམ་རིགས་དྲུག་གང་སྐྱེས་ཀྱང་། །རྩ་བའི་སྡུག་བསྔལ་གསུམ་པོ་ལས་མ་འདས། །ད་ལྟ་རང་རེ་མེ་སྟག་ཕྲ་མོ་དང་། །གྲང་རེག་ཆུང་ངུའི་རེག་བྱ་མི་བཟོད་ན། །རྣམ་གྲངས་མང་ལ་ཡུན་རིང་དོས་དྲག་པའི། །སྡུག་བསྔལ་དེ་ནི་ཅི་སྟེ་བཟོད་ཐབས་ཡོད། །དེས་ན་རང་རྒྱུད་ཐ་བ་རྒོད་པོ་འདི། །ལེགས་པར་དུལ་བའི་ཐབས་མཆོག་རྨད་བྱུང་བ། །སྲིད་ལས་ངེས་པར་འབྱུང་བའི་བློ་གྲོས་འདི། །ཐར་པའི་རྩ་བ་ཡིན་པར་གསུངས་པས་ན། །སྡུག་ལ་སྐྱོ་ཡང་མྱ་ངན་འདས་ལ་དགའ། །འདི་ཉིད་ཆོས་པ་ཀུན་གྱི་གཞི་རྟེན་ཡིན། །ཡལ་བར་མ་དོར་བརྩོན་འགྲུས་དྲག་པོ་ཡིས། །ཡང་ཡང་བསྒོམ་ལ་ངེས་ཤེས་འདྲོང་བར་གྱིས། །འདི་ལ་མ་གོམས་གོང་མ་ཐོབ་མི་འགྱུར། །སངས་རྒྱས་ཆོས་དང་དགེ་འདུན་རིན་པོ་ཆེ། །ཐེག་ཆེན་ཐེག་དམན་གང་གི་རྣམ་བཞག་ལྟར། །བསྒོམ་ཡང་དད་པ་གསུམ་གྱིས་གཞི་བཟུང་སྟེ། །མོས་གུས་མྱུ་གུ་སད་ཀྱིས་མ་ཁྱེར་བས། །སྐྱབས་གནས་ཀུན་འདུས་ཉིད་དུ་ཡོངས་ཤེས་ནས། །ངེས་འབྱུང་ཐར་བ་འདོད་དང་གཞན་ཕན་བློས། །རང་གཞན་རྡུལ་སྙེད་གྲངས་ཀྱི་སྐྱབས་སུ་བསྙེན། །དེས་ནི་ཕྱི་ནང་གཉིས་ཀྱི་ཤན་འབྱེད་འགྱུར། །བསམ་པ་བཟང་པོ་རིན་ཆེན་གསེར་ལྟ་བུ། །ལ་སོགས་དབྱེ་བ་ཉེར་གཉིས་གྲངས་ལྡན་གྱི། །སེམས་བསྐྱེད་རྩ་བ་སྙིང་རྗེའི་མྱུ་གུ་ནི། །རྒྱུ་གཉིས་རྐྱེན་བཞིས་མཆོག་ཏུ་བསྐྱེད་པ་ལས། །བྱང་ཆུབ་སེམས་ཀྱི་ལོ་ཏོག་འཁྲུངས་པས་ན། །རྒྱལ་བའི་སྲས་ཞེས་དམ་པའི་གྲལ་དུ་ཚུད། །ཆོས་འདིས་གཞན་དང་གཞན་དག་འདི་གྲོགས་འགྱུར། །རང་ཉིད་ཞི་བདེ་དོན་གཉེར་དམན་པའི་ལུགས། །འདི་ལྡན་ས་ལམ་དག་ནི་བགྲོད་གྱུར་ཅིང་། །ཚོགས་གཉིས་རྒྱ་ཆེན་བསགས་ལ་འབད་བྱས་ན། །གསེར་འགྱུར་རྩི་མཆོག་ལྟ་བུའི་གདམས་ངག་དང་། །ཅང་ཤེས་རྟ་ལ་ཞོན་ཏེ་འགྲོ་དང་མཚུངས། །དེ་དག་ཀུན་གྱི་རྩ་བ་ལམ་སྟོན་པའི། །ལམ་མཁན་དེད་དཔོན་མཉན་པ་ལྟ་བུ་ཡི། །སྐྱོན་ཟད་ཡོན་ཏན་ལྡན་པའི་བླ་མ་ནི། །ལེགས་པར་བརྟགས་ནས་མ་གུས་སྤྱོད་ལམ་སྤངས། །མཉེས་པ་གསུམ་གྱིས་ཞབས་ཀྱི་པདྨོ་ནི། །སྤྱི་བོའི་གཙུག་ཏུ་བཀོད་ནས་ཞལ་སྒོ་ལས། །བྱོན་པའི་གདམས་པ་ཟབ་མོ་ལེགས་པར་ནོད། །དེ་ཡང་ལེགས་པར་བསམ་ཞིང་དངོས་བཅུད་མྱོང་། །ལུང་རིག་ཚད་མ་ལྡན་པས་ཐེ་ཚོམ་གྱི། །དྲྭ་བ་བཅད་ནས་རང་ཚུགས་ཐོན་བར་བྱ། །དཔེ་ལ་མ་ལུས་སྙིང་ལ་ཡི་གེར་བྲི། །དེ་ནས་མཉམ་འགྲོགས་བདུད་སོགས་སྤོང་བའི་ཕྱིར། །དབེན་པའི་རི་སུལ་དམ་པས་བྱིན་བརླབས་ཤིང་། །བཀྲ་ཤིས་ཡིད་འོང་གྲུབ་པའི་གནས་དེ་རུ། །མཐུན་པའི་གྲོགས་དང་ཡང་དག་འཚོ་བ་ལ། །ཆོག་ཤེས་པར་ནི་བརྟེན་ནས་ཐོས་བསམ་གྱི། །གཏན་ལ་དབབ་པའི་ལྟ་ཐོག་འཇོག་ནས་བསྒོམ། །དེ་ཡང་ཐོས་བསམ་དཔྱད་པ་རྣམ་དག་ཞིག། སྔོན་དུ་མ་སོང་རང་གར་འཇོག་པ་ནི། །མ་རིག་རྨོངས་པ་སླར་ཡང་འཕེལ་བའི་རྒྱུ། །དེ་ཕྱིར་དཔྱད་པས་གཏན་ལ་དབབ་པ་གཅེས། །འཐད་པ་བཞི་དང་བཀའ་རྟགས་ཕྱག་རྒྱ་བཞི། །བདེན་པ་བཞི་དང་རྟེན་འབྲེལ་བདེན་གཉིས་དང་། །བརྟོན་པ་བཞི་ལྡན་ཐོག་མཐའ་བར་དགེ་ཞིང་། །ཉོན་མོངས་ཟད་ཅིང་ཡང་དག་ལམ་སྟོན་ཆོས། །མ་ནོར་ཚུལ་བཞིན་བརྩོན་པས་བླང་བར་བྱ། །ཁས་བླངས་བསླབ་པའི་གནང་བཀག་སོ་མཚམས་ལ། །འདུལ་དང་བསླབ་རྒྱུད་དྲི་མས་མ་གོས་ཤིང་། །འགྱོད་མེད་སེམས་ནི་ལས་རུང་བྱ་བའི་ཕྱིར། །ཞི་ལྷག་ཏིང་ངེ་འཛིན་གྱི་སྒོ་དུ་མར། །འཇུག་ཅིང་ལྡང་བའི་བསམ་གཏན་རྩེ་གཅིག་པ། །བསྟན་དོན་སྙིང་པོར་བྱས་པ་མདོ་སྡེ་དང་། །བསྒོམ་པ་ལས་བྱུང་ཆོས་རབ་རྣམ་འབྱེད་ཀྱི། །ཤེས་རབ་ཁྱད་པར་སྒྲུབ་པའི་ལམ་དེ་ནི། །ཆོས་མངོན་རིན་ཆེན་འདྲེན་པའི་ཤིང་རྟ་ཞེས། །ཡང་ཡང་བསྔགས་པ་དེ་དག་གོ་རིམ་བཞིན། །བསླབ་པའི་ཚུལ་ཁྲིམས་སེམས་དང་ཤེས་རབ་སྟེ། །གསུམ་པོ་འདི་ནང་བསླབ་གཞི་འདུ་བ་ཡིན། །དེས་ན་དཔྲལ་བའི་མིག་ལས་གཅེས་པར་ཟུངས། །འོག་མ་འོག་མའི་ལམ་སྟེགས་ཡིན་པ་དང་། །འོག་མ་ལ་བརྟེན་གོང་མར་བགྲོད་པས་ན། །དམན་མཆོག་གཉིས་ཀྱི་ལམ་ནི་ཤེས་པར་བྱ། །སྤྱིར་ཡང་རྒྱལ་སྲས་དམ་པ་རྣམས་ཀྱིས་ནི། །མི་སློབ་པ་ཡི་ཆོས་ནི་གང་ཡང་མེད། །སློབ་རྒྱུའི་གཙོ་བོ་བདག་མེད་རྣམ་པ་གཉིས། །བདེན་གཉིས་དབྱེར་མེད་རྟོགས་པའི་ལྟ་བ་ཡིས། །ཁྱད་པར་བྱས་པའི་ལྟ་དེ་གཏན་ལ་དབབ། །ཕྱིན་དྲུག་ཀུན་གྱི་གཙོ་བོ་ཤེས་རབ་ལགས། །འཇིག་ཚོགས་ལྟ་བའི་རི་མཐོ་ཉི་ཤུ་དང་། །སུམ་བརྒྱ་དྲུག་ཅུ་ལ་སོགས་འཇིག་རྟེན་ན། །ཕྱིན་ཅི་ལོག་གི་ཕྱི་མོ་གང་ཟག་བདག། ངར་འཛིན་ལྷན་སྐྱེས་རྟག་གཅིག་རང་དབང་ཅན། །ཀུན་བརྟགས་བདག་དེ་རིག་པའི་མཚོན་རྣོན་པོ། །གཅིག་དང་དུ་བྲལ་སོགས་ཀྱིས་གཏན་ལ་དབབ། །རང་བཞིན་གྲུབ་པའི་དངོས་པོ་རྙེད་མི་འགྱུར། །དེ་ལ་ངེས་པའི་ཤེས་པ་བརྟེན་པར་བྱ། །བདག་གིར་གཟུང་བའི་ཕྱི་ནང་སྣོད་བཅུད་དང་། །ཕུང་པོ་ཁམས་སོགས་གསལ་བར་མཐོང་འདི་ཡང་། །རག་པ་རྡུལ་ཕྲན་ལུས་ལ་བདེན་མ་གྲུབ། །ཕྲ་བ་ཆ་མེད་ལས་ཡིན་དེ་ཡང་ནི། །ཕྱོགས་ཆས་དབྱེ་ན་ཆ་མེད་ཉམས་པར་འགྱུར། །བློ་ཡི་རྟོག་པས་ཕར་ལ་བརྟགས་པ་ལས། །དོན་ལ་གྲུབ་ཅིང་རང་རྐྱ་ཐུབ་པ་མེད། །དཔེ་དང་དོན་སྦྱར་དུ་མ་མང་པོས་ནི། །གཟུང་བའི་ཡུལ་ནི་གཏན་ལ་དབབ་པར་བྱ། །དེར་འཛིན་ཤེས་པ་སྣ་ཚོགས་འཆར་བ་དང་། །ཡུལ་ལ་བརྟེན་ནས་བྱུང་བས་མ་གྲུབ་བོ། །དཔེར་ན་རྨི་ལམ་སྣང་བའི་དངོས་པོ་བཞིན། །ཡུལ་དང་ཡུལ་ཅན་གཉིས་ཀ་མ་གྲུབ་པས། །དེ་ལ་དབྱིབས་དང་ཁ་དོག་བྱུང་བ་དང་། །འགྲོ་ས་གནས་ས་གང་དུ་འང་མ་རྙེད་ཅིང་། །དཔེ་དོན་དུ་མས་གཏན་ལ་དབབ་པ་ན། །ཤེས་འདི་རང་བཞིན་མེད་པ་ངེས་ཤེས་འདྲོངས། །གཉིས་མེད་ཡེ་ཤེས་རང་རིག་རང་གསལ་ཙམ། །གྲུབ་བམ་སྙམ་ན་དེ་ཡང་མ་གྲུབ་སྟེ། །དུས་གསུམ་གྲུབ་པ་མེད་པ་དེ་བས་ན། །དེ་དང་ཕྲད་མ་ཕྲད་སོགས་མི་རུང་ཕྱིར། །སེམས་བྱུང་སེམས་དང་ཞིག་དང་མ་ཞིག་སོགས། །ཇི་ལྟར་དེ་ཡི་སྒྲུབ་བྱེད་སྨྲ་ན་ཡང་། །རིགས་པས་དཔྱད་ཚེ་སྐྱོན་ཅན་ཁོ་ན་ཡིན། །སྤྲོས་པ་ཐམས་ཅད་ཉེ་བར་ཞི་བའི་ཕྱིར། །མཐར་ཐུག་དོན་ལ་འཛིན་པ་མཐའ་དག་འགལ། །བདེན་གཉིས་དཔྱོད་པའི་རིག་ཤེས་ཚད་མའི་ངོར། །མཐའ་བཞི་རེ་རེ་ནས་ཀྱང་མ་གྲུབ་ལ། །གཟོད་ནས་རང་བཞིན་མ་དམིགས་དེ་ཡི་ཕྱིར། །བཞི་ཀ་ཚོགས་པའི་སྤྲོས་པ་སྤྱི་ཙམ་ཡང་། །མ་གྲུབ་ཅི་ཕྱིར་བྱེ་བྲག་མེད་པས་སོ། །གྲུབ་དོན་སྤྲོས་བྲལ་སྤྱི་ཙམ་དེ་མ་གྲུབ། །གཟུང་དང་འཛིན་པ་ཐམས་ཅད་བྲལ་བ་ཡི། །ཆོས་ཉིད་བསམ་གྱིས་མི་ཁྱབ་དེ་ཡི་ངང་། །བློ་ཡི་སྤྲོས་པ་ཉེ་བར་ཞི་བ་ཡི། །ལམ་འདིར་འཇུག་ན་རྟག་ཆད་མཐར་མི་ལྷུང་། །མདོར་ན་སྣང་ལུགས་ཀུན་རྫོབ་ངོས་ནས་ནི། །རྟེན་འབྲེལ་ལས་སྐྱེས་མེད་པ་མ་ཡིན་ལ། །གནས་ལུགས་དོན་དམ་ངོས་ནས་རྐྱེན་ལས་སྐྱེས། །ཡོད་པ་མ་ཡིན་སྟོང་དང་རྟེན་འབྱུང་ནི། །ཟུང་དུ་འཇུག་པ་རྐང་གཉིས་གཙོ་བོའི་ལུགས། །སྤྲོས་པའི་རླབས་ཀྱིས་མ་བསྐྱོད་འཇོག་སྒོམ་མོ། །དེ་ལྟའི་ཟབ་མོའི་གནས་ལུགས་མ་རྟོགས་པ། །མཚན་མར་ཞེན་པའི་བློ་ཡིས་བཅིང་བྱས་པའི། །འགྲོ་བ་རྣམས་ལ་བྱམས་དང་སྙིང་རྗེ་དང་། །ལྷག་བསམ་ལ་སོགས་དོན་དམ་ངོར་མ་གྲུབ། །ཀུན་རྫོབ་མ་བརྟགས་ཉམས་དགའི་སྐབས་སུ་ནི། །རང་དང་གཞན་དོན་སྒྲུབ་པར་དགོས་མཐོང་ནས། །སྨོན་འཇུག་སེམས་བསྐྱེད་གཞི་ལམ་འབྲས་གསུམ་པོ། །ཟུང་དུ་འཇུག་ལས་སྐུ་གཉིས་འབྲས་ཐོབ་ཅིང་། །མདོར་ན་རྒྱལ་བའི་སྲས་པོར་ཁས་འཆེ་བས། །ཅི་བྱས་སེམས་ཅན་དོན་དུ་འགྱུར་བ་དང་། །ལྷག་པའི་བསམ་པ་ཡལ་བར་མ་དོར་ན། །བྱང་ཆུབ་སྤྱོད་པའི་སྤྱོད་པ་ཡང་དག་པས། །དོན་གཉིས་འགྲུབ་ལ་དཀའ་ཚེགས་མེད་པ་ཡིན། །ནང་གི་ཉི་མ་སྙིང་ལ་འཆར་བ་ཡི། །ཐབས་མཆོག་རྨད་བྱུང་གསང་བ་སྔགས་ཀྱི་ལམ། །དབང་པོ་ཤིན་ཏུ་རྣོན་པོའི་དབང་བྱས་ནས། །འོག་མ་ཡར་ལྡན་གནད་ཀྱིས་མི་འགལ་བ། །ཆེས་གསང་སྔགས་ཀྱི་ཐེག་པ་ཀུན་གྱི་མཆོག། དེ་ལ་སྟོང་ཉིད་ཙམ་དུ་མཚུངས་མོད་ཀྱང་། །ཁྱད་པར་བདུན་གྱིས་རྡོ་རྗེ་ཐེག་པ་འཕགས། །སྐལ་མེད་ཉན་ཐོས་རིགས་ལ་མ་ཡིན་ནོ། །དེ་ཡང་མ་སྨིན་སྨིན་པར་བྱེད་པ་ཡི། །ཐབས་ལ་དབང་བསྐུར་ཞེས་སུ་གྲགས་པ་གང་། །སྔགས་དོན་ལ་མཁས་རྡོ་རྗེ་སློབ་དཔོན་ལ། །ཐ་མལ་པ་ཡི་འདུ་ཤེས་རབ་སྤངས་ནས། །གུས་པར་བརྟེན་ལས་འོག་མར་རྒྱུད་སྦྱོང་བའི། །གང་ཟག་དེ་ལ་རྡུལ་ཚོན་རས་བྲིས་དང་། །ཚོམ་བུ་ལུས་དཀྱིལ་ཤིན་ཏུ་སྤྲོས་མེད་དེ། །ལྔ་པོ་རྣམས་ཀྱི་མཎྜལ་ལ་བརྟེན་ནས། །བུམ་གསང་ཤེར་དབང་བཞི་པ་ཡན་ལག་བཅས། །བསྐུར་བའི་གནས་ལ་ཆོ་ག་མ་འཁྲུལ་པས། །གཞི་ལ་གསོས་ཐེབ་ལམ་དུས་བསྒོམ་པ་ལས། །རྩ་རླུང་ཐིག་ལེ་བརྟེན་པ་ཡེ་ཤེས་ཏེ། །བཞི་པོའི་མ་དག་དྲི་མ་སོ་སོར་སྦྱངས། །རང་བཞིན་ཡེ་དག་མངོན་དུ་གྱུར་པ་ལས། །སྐུ་བཞིའི་འབྲས་བུ་སད་པར་བྱ་བའི་ཕྱིར། །དག་བྱ་དག་བྱེད་ངོ་སྤྲོད་སྡོམ་པ་དེ། །སྐྱེས་པའི་ངེས་ཤེས་བཅས་པ་རྒྱུ་ཡི་དབང་། །དབང་གི་ཆུ་རྒྱུན་མ་ཆད་བླ་མ་ལས། །ཡང་ཡང་བླང་ངམ་རང་ཉིད་འཇུག་པ་ལས། །བླང་བ་ལམ་གྱི་དབང་སྟེ་གཙོ་ཆེའོ། །ཅི་ཕྱིར་ཡེ་ཤེས་གོང་དུ་འཕེལ་བ་དང་། །མཆོག་ཐུན་དངོས་གྲུབ་ཀུན་གྱི་རྩ་བ་ནི། །དབང་ལས་གཞན་མེད་རྒྱུ་མཚན་བསམ་མི་ཁྱབ། །དེ་ཡང་རིམ་པ་གཉིས་ཀྱི་བདག་ཉིད་དེ། །ཐ་མལ་སྣང་བ་ཐམས་ཅད་ལྷར་བྱིན་བརླབས། །བསྙེན་དང་ཉེ་བསྙེན་སྒྲུབ་པ་སྒྲུབ་ཆེན་རྣམས། །རིམ་བཞིན་བརྩོན་ཅིང་གསལ་དག་བརྟན་གསུམ་གྱི། །དུག་དབྱུང་སྐྱེད་པའི་རིམ་པས་གཟེར་ཐེབས་པས། །གསང་སྔགས་ལམ་གྱི་ལུགས་ནི་འདི་ཡིན་ནོ། །ལྷར་སྣང་ཡེ་ཤེས་བྱིན་གྱིས་བརླབས་པའི་ཕྱིར། །རྩ་ཐིག་རླུང་ལ་གནད་བསྣུན་སྟེང་འོག་སྒོས། །ཐབས་མཆོག་ལ་བརྟེན་བདེ་བའི་རྟོགས་པ་སྦར། །དྲི་བཅས་སྦྱོང་ཞིང་ལམ་དུ་བྱས་པ་ན། །འབྲས་བུ་སྐུ་གསུམ་ཡེ་ཤེས་འདྲེན་པ་ཡི། །སྨིན་བྱེད་དུ་འགྱུར་རྫོགས་པའི་རིམ་པ་དང་། །རྩ་ཐིག་རྣལ་འབྱོར་སོགས་ལ་བརྟེན་པ་ཡིས། །བདེ་བའི་ཡེ་ཤེས་རིམ་བཞིན་སྐྱེས་པ་ན། །ཡིད་དངོས་རིག་མ་ལ་བརྟེན་སྙོམས་ཞུགས་པས། །དཔེ་དོན་ལྷན་སྐྱེས་བདེ་ཆེན་ཡེ་ཤེས་འདྲེན། །ཟག་མེད་རྣམ་པ་ཀུན་གྱི་མཆོག་ལྡན་པའི། །བདེ་སྟོང་ཟུང་འཇུག་ཤིན་ཏུ་ཕྲ་བ་ཡི། །ཡེ་ཤེས་ཉི་མ་སྙིང་ལ་འཆར་བར་འགྱུར། །མདོར་ན་བསྐྱེད་པའི་རིམ་པ་བསྒོམ་པ་ལས། །ཕྱི་ནང་ཐ་མལ་འཁྲུལ་པའི་ཆ་རྣམས་ལྡོག། འཆི་དང་བར་སྲིད་སྐྱེ་སྲིད་ཆ་དང་བཅས། །རིག་པའི་སྒོ་གསུམ་ལྷ་སྔགས་སུ་བལྟ་བའི། །གྱ་ནོམ་ལྷ་རུ་ཞེན་པའི་འཛིན་སྟངས་དག། འབྱིན་སླད་ལུས་གནད་འཁྲུལ་འཁོར་བྱེད་བཅིལ་གྱིས། །རྩ་སྦྱོང་རྡོར་བཟླས་ཁ་སྦྱོར་རྣམ་འབྱོར་གྱིས། །ལས་རླུང་དབུ་མར་བཅུག་ཅིང་གཏུམ་མོ་བསྒོམ། །དེ་ནས་ས་ལམ་རིམ་པར་བགྲོད་ཚུལ་ནི། །བསྐྱེད་པའི་རིམ་པས་ཚོགས་ལམ་ཆེན་པོ་དང་། །རླུང་དང་གཏུམ་མོ་སྦྱོར་ལམ་དྲོད་རྩེ་མོ། །རང་བཞིན་ཐབས་ལྡན་ལུས་ཀྱི་བོགས་དབྱུང་བས། །བཟོད་ཆེན་ཐོབ་པའི་ཐ་མ་ཕྱག་རྒྱ་ཡི། །ཉེ་བརྒྱུད་ལ་བརྟེན་ཡེ་ཤེས་ཕྱོགས་གཅིག་མཐོང་། །གོང་འཕེལ་ས་དགུའི་རྟོགས་པ་མངོན་བྱེད་དོ། །དེ་ལའང་ཡེ་ཤེས་ཐོག་མར་མཐོང་བ་ནས། །སྒོམ་ལམ་ཆེན་པོ་མཐའ་རུ་མ་ཕྱིན་བར། །སློབ་ལམ་སྒྱུ་མའི་སྐུ་ཡི་སྤྲོས་པ་རྣམས། །དབྱིངས་སུ་ཐིམ་ནས་ས་བཅུའི་རྒྱུན་མཐའ་ལ། །འོད་ཟེར་ཆེན་པོའི་དབང་བསྐུར་ནོད་པ་དང་། །ཤེས་བྱའི་སྒྲིབ་བཅོམ་ཀུན་གཞི་གནས་འགྱུར་ཏེ། །ཀུན་ཏུ་འོད་ཀྱི་ས་ལ་མངོན་སངས་རྒྱས། །སྔགས་ལུགས་སྣང་གསུམ་འཕོ་བའི་སྒྲིབ་པ་རྣམས། །སྦྱོང་བྱེད་འབྲས་དབང་བསྐུར་ནས་མི་སློབ་པའི། །ཟུང་འཇུག་མངོན་དུ་བརྙེས་ཤིང་རྫོགས་ཆེན་གྱི། །འོད་གསལ་དགོངས་པའི་རྩལ་ཆེན་རྫོགས་པ་དང་། །སྣང་བཞི་མཐར་ཕྱིན་འཇའ་ལུས་འཕོ་ཆེན་ཐོབ། །ཇི་ཙམ་བཞེད་པར་འགྲོ་བའི་དོན་མཛད་ནས། །སླར་ཡང་གདོད་མའི་དབྱིངས་སུ་ཐིམ་པའི་མོད། །རང་སྣང་ལོངས་སྐུའི་ཞིང་ཁམས་རྣམ་པར་བཀོད། །དེ་ལས་ཕྱེད་སྣང་དེ་ལས་སྤྲུལ་སྐུ་འཆར། །ཁམས་གསུམ་འཁོར་བ་དོང་ནས་སྤྲུགས་པར་འགྱུར། །དེ་ཕྱིར་ཚེ་འདི་ཡུན་ཐུང་སྐད་ཅིག་ཙམ། །འདི་ལ་དལ་རྟེན་སྙིང་པོ་ལེན་པའི་ཐབས། །དམ་པའི་ཆོས་ལ་བརྩོན་ཞིང་ཁྱད་པར་དུ། །བླ་མེད་རྡོ་རྗེ་ཐེག་པའི་ཉེ་ལམ་དང་། །དེ་ཡི་ཡང་སྙིང་མཆོག་གསང་རྫོགས་པ་ཆེར། །བརྩོན་ན་སྲིད་པ་ཐ་མར་བྱེད་པར་འགྱུར། །དེ་སྐད་གདམས་པའི་ཕྲེང་བ་ཉུང་ངུ་འདི། །ཆོས་ཀྱི་བློ་གྲོས་ཞེས་བྱས་སྦྱར་བའི་དགེས། །བདག་སོགས་ཁམས་གསུམ་སེམས་ཅན་མ་ལུས་པ། །ཆོས་ཀྱི་རྒྱལ་པོའི་གོ་འཕང་མྱུར་ཐོབ་ཤོག། སརྦ་མངྒ་ལཾ།། །། ༈ ཕ་བླ་མའི་ཞབས་ལ་ཕྱག་འཚལ་ལོ། །དུས་རྣམ་པ་ཀུན་ཏུ་ཐུགས་རྗེས་ཟུངས། །ལུས་འབྱུང་བཞི་འདུས་པའི་གཡར་ཁང་འདི། །སྐད་ཅིག་གིས་མི་རྟག་མྱུར་དུ་འཇིག། ཚེ་མི་རྟག་རྩྭ་རྩེའི་ཟིལ་པ་འདྲ། །དགྲ་འཆི་བདག་བདུད་པོ་ངམ་ནག་དེས། །དུས་ད་ལྟ་མདུན་ནས་བསུ་ཡིན་འདུག། ལས་མི་དགེའི་རྣམ་སྨིན་ཁུར་ཆེན་དེ། །སེམས་རྣམ་ཤེས་ཀྱི་སྟེང་དུ་ཁྱེར་ནས་འགྲོ། །གྲོགས་མཛའ་བ་རྣམས་ཀྱང་ཤུལ་དུ་བཞག། ཕུག་གསོགས་པའི་ནོར་ཡང་ཁྱེར་དབང་མེད། །གར་འདི་འགྲོ་མེད་པའི་ཡད་ཡུད་དུ། །སྲིད་པའི་ལས་རླུང་དྲག་པོས་བདས། །གཤིན་རྗེའི་འཁྲུལ་སྣང་དཔག་ཏུ་མེད། །དུག་གསུམ་གྱི་གཡང་ས་ཡ་རེ་ང་། །ངན་སོང་གི་སྡུག་བསྔལ་བཟོད་ཐབས་མེད། །དེ་ད་ལྟ་བསམ་ན་སྙིང་རྩ་འདར། །བསམ་ཞིང་བསམ་ཞིང་བླ་མ་དྲན། །ལས་དེ་འདྲ་ཤར་ཚེ་བླ་མ་ལས། །སྐྱབས་གཞན་ན་མེད་དོ་ཐུགས་རྗེས་ཟུངས། །ཕ་གཅིག་བླ་མ་འབོད་དོ་བརྩེ་བས་དགོངས། །ལས་ངན་བདག་ལ་ཐུགས་རྗེས་གཟུང་དུ་གསོལ། །བློ་སྣ་ཆོས་ལ་འགྱུར་བར་བྱིན་གྱིས་རློབས། །བླ་མ་མཁྱེན། །ཅེས་པའང་ཆུ་ལུག་ཟླ་༤ཚེས་༡༥ཉིན་རང་གིས་རང་ལ་གསོས་བཏབ་པ་སྟེ། འཇམ་དབྱངས་ཆོས་ཀྱི་བློ་གྲོས་པས་སོ།། །།}}
| |
| </onlyinclude>
| |
| {{TsagliCall}} | | {{TsagliCall}} |
| <headertabs/> | | <headertabs/> |
