ཞལ་གདམས་མུ་ཏིག་ཕྲེང་བ།

🚧 This website is under continued development. We appreciate your patience!

Previous Text Back to Volume PageNext Text

Wylie title	zhal gdams mu tig phreng ba
Location	chos kyi blo gros bka' 'bum Volume 8, sde tshan 10, Text 18, Pages 271-272 (Folios 18a3 to 18b6)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. zhal gdams mu tig phreng ba. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 8: 271-272. Bir, H.P.: Khyentse Labrang, 2012.
Genre	Advice - zhal gdams
Lotsawa House Link	https://www.lotsawahouse.org/tibetan-masters/jamyang-khyentse-chokyi-lodro/string-of-pearls-advice
Colophon	དེ་ལྟར་གདམས་པའི་ཚིགས་སུ་བཅད་པ་འདི་ཡང་འཇམ་དབྱངས་ཆོས་ཀྱི་བློ་གྲོས་པས་ཤར་མར་བྲིས་ཏེ་ཕུལ་བ་སིདྡྷི་རསྟུ།།
	de ltar gdams pa'i tshigs su bcad pa 'di yang 'jam dbyangs chos kyi blo gros pas shar mar bris te phul ba sid+d+hi rastu//

1 Texts in this Section (sde tshan or chos tshan)

18 271-272	ཞལ་གདམས་མུ་ཏིག་ཕྲེང་བ། zhal gdams mu tig phreng ba Advice - zhal gdams	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

༈ ཞལ་གདམས་མུ་ཏིག་ཕྲེང་བ་བཞུགས་སོ། །བླ་མའི་ཞབས་ལ་ཕྱག་འཚལ་ལོ། །སྔོན་བསགས་བཟང་པོས་འཕེན་པ་ལས། །དལ་འབྱོར་ཡིད་བཞིན་ནོར་བུ་རྙེད། །མཚན་ལྡན་བླ་མའི་ཞབས་ལ་ཐུག། བུ་ཁྱོད་སྐལ་བ་བཟང་ངོ་སྙམ། །ཟབ་རྒྱས་ཆོས་ཀྱི་བདུད་རྩི་ལ། །ཅི་དགར་སྤྱོད་དུ་ཡོད་པའི་སྐབས། །ལེ་ལོའི་དབང་དུ་མ་ཤོར་བར། །བསྟན་པའི་སྙིང་པོ་སྒྲུབ་ལ་རེམས། །ཆོས་ཀུན་རྩ་བ་རང་གི་སེམས། །འདུལ་སྦྱང་བྱེད་ལ་རག་ལས་ཤིང་། །དེ་ཡང་སེམས་ཀྱི་རྩ་བཅད་ན། །གཟུང་འཛིན་གཉིས་མེད་རྟོགས་པར་འགྱུར། །སྐྱེ་འགགས་གནས་གསུམ་དང་བྲལ་ཞིང་། །རང་བཞིན་འོད་གསལ་སྟོང་པ་ཆེ། །འདི་ཀོ་སེམས་ཀྱི་གནས་ལུགས་ལགས། །འདི་ཉིད་རྟོགས་ན་འཆི་མེད་ཀྱི། །བཙན་ས་ཟིན་པར་ཐེ་ཚོམ་མེད། །བསྐྱེད་དང་རྫོགས་པ་ཐམས་ཅད་ཀྱི། །མཐར་ཐུག་འདི་ལ་ཐུག་པར་འགྱུར། །བླ་མ་བསྒོམ་ལ་དབང་བཞི་བླངས། །བསྐྱེད་རིམ་བསྒོམ་ལ་ཞེན་པ་ཆོད། །རྫོགས་རིམ་མཚན་བཅས་བསྒོམ་པ་ཡིས། །ཞུ་བདེ་ལྷན་སྐྱེས་ཡེ་ཤེས་འདྲེན། །མཚན་མེད་རྫོགས་རིམ་ལེགས་བསྒོམ་པས། །འོད་གསལ་ཆེན་པོར་གནས་པ་དང་། །འཁྲུལ་སྣང་ཐམས་ཅད་དབྱིངས་སུ་ཟད། །སྐུ་དང་ཡེ་ཤེས་ལ་དབང་འབྱོར། །གཞན་ཕན་ཕྲིན་ལས་མཐའ་ཡས་སོ། །མི་རྟག་ངེས་འབྱུང་ལས་འབྲས་ལ། །བསམ་ཞིང་དད་དང་མོས་གུས་བསྐྱེད། །བྱམས་དང་སྙིང་རྗེ་བྱང་སེམས་བསྒོམ། །ཅིར་སྣང་ཐམས་ཅད་བླ་མར་ལྟོས། །སྙིང་གར་བསྒོམ་ལ་ཐུགས་ཡིད་བསྲེ། །གསལ་སྟོང་ཟུང་འཇུག་སྐུ་གསུམ་དུ། །ངོ་འཕྲོད་པས་ནི་རྫོགས་སངས་རྒྱས། །སངས་རྒྱས་རང་ལ་གནས་པ་འདི། །གཞན་དུ་བཙལ་བས་རྙེད་མི་འགྱུར། །དེ་ལྟར་གདམས་པའི་ཕྲེང་བ་འདི། །ཁྱོད་ལ་ཕུལ་བས་འདི་དོན་རྙེད། །འཆི་བ་ཆོས་སྐུར་གཏན་ས་ཟིན། །རྡོ་རྗེ་འཆང་དབང་ཐོབ་པར་ཤོག། གལ་ཏེ་བརྟན་པ་མ་ཐོབ་ཀྱང་། །བླ་མ་རྣལ་འབྱོར་མ་དཔལ་གྱིས། །མཁའ་སྤྱོད་གནས་སུ་དྲོངས་གྱུར་ཅིག། དེ་ལྟར་གདམས་པའི་ཚིགས་སུ་བཅད་པ་འདི་ཡང་འཇམ་དབྱངས་ཆོས་ཀྱི་བློ་གྲོས་པས་ཤར་མར་བྲིས་ཏེ་ཕུལ་བ་སིདྡྷི་རསྟུ།། །།

[edit]

!_zhal gdams mu tig phreng ba bzhugs so/__/bla ma'i zhabs la phyag 'tshal lo/__/sngon bsags bzang pos 'phen pa las/__/dal 'byor yid bzhin nor bu rnyed/__/mtshan ldan bla ma'i zhabs la thug/__bu khyod skal ba bzang ngo snyam/__/zab rgyas chos kyi bdud rtsi la/__/ci dgar spyod du yod pa'i skabs/__/le lo'i dbang du ma shor bar/__/bstan pa'i snying po sgrub la rems/__/chos kun rtsa ba rang gi sems/__/'dul sbyang byed la rag las shing /__/de yang sems kyi rtsa bcad na/__/gzung 'dzin gnyis med rtogs par 'gyur/__/skye 'gags gnas gsum dang bral zhing /__/rang bzhin 'od gsal stong pa che/__/'di ko sems kyi gnas lugs lags/__/'di nyid rtogs na 'chi med kyi/__/btsan sa zin par the tshom med/__/bskyed dang rdzogs pa thams cad kyi/__/mthar thug 'di la thug par 'gyur/__/bla ma bsgom la dbang bzhi blangs/__/bskyed rim bsgom la zhen pa chod/__/rdzogs rim mtshan bcas bsgom pa yis/__/zhu bde lhan skyes ye shes 'dren/__/mtshan med rdzogs rim legs bsgom pas/__/'od gsal chen por gnas pa dang /__/'khrul snang thams cad dbyings su zad/__/sku dang ye shes la dbang 'byor/__/gzhan phan phrin las mtha' yas so/__/mi rtag nges 'byung las 'bras la/__/bsam zhing dad dang mos gus bskyed/__/byams dang snying rje byang sems bsgom/__/cir snang thams cad bla mar ltos/__/snying gar bsgom la thugs yid bsre/__/gsal stong zung 'jug sku gsum du/__/ngo 'phrod pas ni rdzogs sangs rgyas/__/sangs rgyas rang la gnas pa 'di/__/gzhan du btsal bas rnyed mi 'gyur/__/de ltar gdams pa'i phreng ba 'di/__/khyod la phul bas 'di don rnyed/__/'chi ba chos skur gtan sa zin/__/rdo rje 'chang dbang thob par shog/__gal te brtan pa ma thob kyang /__/bla ma rnal 'byor ma dpal gyis/__/mkha' spyod gnas su drongs gyur cig/__de ltar gdams pa'i tshigs su bcad pa 'di yang 'jam dbyangs chos kyi blo gros pas shar mar bris te phul ba sid+d+hi rastu//___//