ཀླུ་ལྡིང་ཞབས་དྲུང་ལ་གནང་བའི་ཞལ་གདམས།

🚧 This website is under continued development. We appreciate your patience!

Previous Text Back to Volume PageNext Text

Wylie title	klu lding zhabs drung la gnang ba'i zhal gdams
Location	chos kyi blo gros bka' 'bum Volume 8, sde tshan 10, Text 11, Pages 257-258 (Folios 11a4 to 11b5)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. klu lding zhabs drung la gnang ba'i zhal gdams. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 8: 257-258. Bir, H.P.: Khyentse Labrang, 2012.
Genre	Advice - zhal gdams
Colophon	།ཕྲན་ལ་སྐྱབས་རྟེན་གནང་མི་དགོས་དང་ཁྱེད་ལ་སྐྱབས་འཇུག་རྟག་ཏུ་ཡིད་ལ་སྣང་འཇོག་ཞུ། ཞུ་འདེགས་བཅས་ཆོས་ཀྱི་བློ་གྲོས་པས་ཕུལ།།
	/phran la skyabs rten gnang mi dgos dang khyed la skyabs 'jug rtag tu yid la snang 'jog zhu/__zhu 'degs bcas chos kyi blo gros pas phul//

1 Texts in this Section (sde tshan or chos tshan)

11 257-258	ཀླུ་ལྡིང་ཞབས་དྲུང་ལ་གནང་བའི་ཞལ་གདམས། klu lding zhabs drung la gnang ba'i zhal gdams Advice - zhal gdams	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

༈ ཀླུ་ལྡིང་ཞབས་དྲུང་ལ་གནང་བའི་ཞལ་གདམས། དག་པའི་སྣང་བ་འབྱམས་ཀླས་ཤིང་། །དམ་པའི་ཡོན་ཏན་ཕུལ་བྱུང་བ། །ཆོས་ཀྱི་བཤེས་གཉེན་བླ་མ་རྗེའི། །སྐུ་ཡི་དཀྱིལ་འཁོར་ཉེ་དྲུང་དུ། །གཤམ་དུ་ཕྱག་བྲིས་གནང་འབྱོར་བྱུང་། །ཆོས་ཀུན་རྩ་བ་རང་གི་སེམས། །སྣང་བ་ཐམས་ཅད་རང་སྣང་ཡིན། །མེད་སྣང་སྒྱུ་མ་དང་མཚུངས་ཤིང་། །སེམས་ཡང་གཟུང་འཛིན་རྟོག་པ་འདི། །ཡོད་ཡོད་འདྲ་ཡང་དོན་ལ་མེད། །རྨི་ལམ་ནང་གི་སྐྱེ་ཤི་བཞིན། །དོན་ལ་གྲུབ་པ་མེད་དོ་ལགས། །ཐོག་མེད་དུས་ནས་ད་ལྟའི་བར། །གཉིས་སྣང་འཁྲུལ་པ་འདིས་བཅིང་པས། །གཟུང་འཛིན་གཉིས་བྲལ་གཉུག་མའི་སེམས། །བཅས་བཅོས་མ་བྱེད་རང་གར་ཞོག། ཆོས་དབྱིངས་རང་བཞིན་འོད་གསལ་དེ། །བདེ་བ་ཆེན་པོ་རྒྱུན་ཆད་མེད། །ན་ཚ་སྡུག་བསྔལ་དེ་ལ་མེད། །དེས་ན་རང་སེམས་འཁྲུལ་པ་རུ། །མ་ཤོར་རང་སར་ཟིན་གྱུར་ན། །དེ་ནི་བླ་མ་ཡི་དམ་དང་། །ཆོས་སྐྱོང་ཀུན་གྱི་ངོ་བོ་ཡིན། །འཁོར་བ་ཞེས་བྱ་སྤང་དུ་མེད། །མྱ་ངན་འདས་པ་ཐོབ་བྱ་མེད། །འཁོར་འདས་དབྱེར་མེད་དེ་ལ་ཟེར། །མ་རིག་འཇོམས་པའི་སྒྲོན་མེ་ཡིན། །ནད་གདོན་ཀུན་སེལ་སྨན་ཆེན་ཡིན། །དེ་ཕྱིར་དེ་ལ་ཐུགས་དམ་མཛོད། །རྟོག་པས་བཅིང་ན་གྲོལ་དུས་མེད། །རྣམ་རྟོག་ཐམས་ཅད་རང་ཤར་ཡིན། །རང་གྲོལ་སྐྱེ་མེད་ངང་དུ་ཐོངས། །དེ་སྐད་གདམས་པ་ཉུང་ངུ་ཕུལ། །ཕྲན་ལ་སྐྱབས་རྟེན་གནང་མི་དགོས་དང་ཁྱེད་ལ་སྐྱབས་འཇུག་རྟག་ཏུ་ཡིད་ལ་སྣང་འཇོག་ཞུ། ཞུ་འདེགས་བཅས་ཆོས་ཀྱི་བློ་གྲོས་པས་ཕུལ།། །།

[edit]

!_klu lding zhabs drung la gnang ba'i zhal gdams/__dag pa'i snang ba 'byams klas shing /__/dam pa'i yon tan phul byung ba/__/chos kyi bshes gnyen bla ma rje'i/__/sku yi dkyil 'khor nye drung du/__/gsham du phyag bris gnang 'byor byung /__/chos kun rtsa ba rang gi sems/__/snang ba thams cad rang snang yin/__/med snang sgyu ma dang mtshungs shing /__/sems yang gzung 'dzin rtog pa 'di/__/yod yod 'dra yang don la med/__/rmi lam nang gi skye shi bzhin/__/don la grub pa med do lags/__/thog med dus nas da lta'i bar/__/gnyis snang 'khrul pa 'dis bcing pas/__/gzung 'dzin gnyis bral gnyug ma'i sems/__/bcas bcos ma byed rang gar zhog/__chos dbyings rang bzhin 'od gsal de/__/bde ba chen po rgyun chad med/__/na tsha sdug bsngal de la med/__/des na rang sems 'khrul pa ru/__/ma shor rang sar zin gyur na/__/de ni bla ma yi dam dang /__/chos skyong kun gyi ngo bo yin/__/'khor ba zhes bya spang du med/__/mya ngan 'das pa thob bya med/__/'khor 'das dbyer med de la zer/__/ma rig 'joms pa'i sgron me yin/__/nad gdon kun sel sman chen yin/__/de phyir de la thugs dam mdzod/__/rtog pas bcing na grol dus med/__/rnam rtog thams cad rang shar yin/__/rang grol skye med ngang du thongs/__/de skad gdams pa nyung ngu phul/__/phran la skyabs rten gnang mi dgos dang khyed la skyabs 'jug rtag tu yid la snang 'jog zhu/__zhu 'degs bcas chos kyi blo gros pas phul//___//