ཞལ་གདམས་ཕན་བདེའི་འཁྲི་ཤིང་ཞེས་བྱ་བ་སོགས་གཡག་ཟེ་ཚེ་དབང་འགྱུར་མེད་ལ་གནང་བ།

🚧 This website is under continued development. We appreciate your patience!

Previous Text Back to Volume PageNext Text

Wylie title	zhal gdams phan bde'i 'khri shing zhes bya ba sogs g.yag ze tshe dbang 'gyur med la gnang ba
Location	chos kyi blo gros bka' 'bum Volume 8, sde tshan 10, Text 10, Pages 252-257 (Folios 8b3 to 11a4)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. zhal gdams phan bde'i 'khri shing zhes bya ba sogs g.yag ze tshe dbang 'gyur med la gnang ba. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 8: 252-257. Bir, H.P.: Khyentse Labrang, 2012.
Genre	Advice - zhal gdams
Colophon	།ཅེས་པའང་གཡག་ཟེ་ཚེ་དབང་འགྱུར་མེད་ནས་གསུང་བསྐུལ་ངོར། །ཆོས་མེད་ཀྱི་སྤྲང་པོ་བཙུན་འཆལ་ཆོས་ཀྱི་བློ་གྲོས་པས་བྲིས་པ་དགེའོ།།
	/ces pa'ang g.yag ze tshe dbang 'gyur med nas gsung bskul ngor/__/chos med kyi sprang po btsun 'chal chos kyi blo gros pas bris pa dge'o//

1 Texts in this Section (sde tshan or chos tshan)

10 252-257	ཞལ་གདམས་ཕན་བདེའི་འཁྲི་ཤིང་ཞེས་བྱ་བ་སོགས་གཡག་ཟེ་ཚེ་དབང་འགྱུར་མེད་ལ་གནང་བ། zhal gdams phan bde'i 'khri shing zhes bya ba sogs g.yag ze tshe dbang 'gyur med la gnang ba Advice - zhal gdams	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

༈ ཞལ་གདམས་ཕན་བདེའི་འཁྲི་ཤིང་ཞེས་བྱ་བ་ནི། བླ་མ་དམ་པའི་ཞབས་ལ་ཕྱག་འཚལ་ལོ། །ཕན་བདེའི་འབྱུང་གནས་སྲིད་ཞི་ཀུན་གྱི་བདག། རང་རིག་འོད་གསལ་ཀུན་བཟང་བདེ་བ་ཆེ། །ཡེ་གྲོལ་དང་པོའི་སངས་རྒྱས་བླ་མ་རྗེར། །བཏུད་ནས་གདམས་པའི་རིམ་པ་ཅུང་ཟད་དབྱེ། །གྲོགས་དག་སྲིད་པའི་ཕུན་ཚོགས་ཇི་སྙེད་པ། །མི་རྟག་མི་བརྟན་སྒྱུ་མའི་རང་བཞིན་དང་། །རྨི་ལམ་སྐབས་སུ་འབྱོར་རྒུད་སྣང་བ་ལྟར། །རང་བཞིན་བདེན་མེད་འཇིག་པའི་ངང་ཚུལ་སོམས། །ཤིན་ཏུ་ཐོབ་དཀའི་དལ་འབྱོར་རིན་ཆེན་འདི། །རྙེད་པ་ད་རེས་ཙམ་ཡིན་འདི་ཉིད་ཀྱང་། །ལུས་སྲོག་གཡོ་བ་ཆུ་ཡི་ཆུ་བུར་བཞིན། །ནམ་འཆི་ཆ་མེད་སོམས་ལ་བློ་སྣ་བསྟུངས། །ལས་ཀྱི་བསགས་པ་ཆུ་ཡི་གཉེར་མ་བཞིན། །རྒྱུན་མི་ཆད་པ་གར་སྐྱེས་གར་གནས་ཀྱང་། །ཆུད་མི་ཟ་ཞིང་རང་ཐོག་སྨིན་ངེས་པས། །རྒྱུ་འབྲས་བླང་དོར་འདི་ལ་གཟབ་པ་གཅེས། །མ་དག་འཁོར་བའི་འཁྲུལ་སྣང་རྒྱ་རེ་ཆེ། །སྡུག་བསྔལ་བརྒྱ་ཕྲག་མང་པོའི་མཚོན་གཟིངས་ཤིང་། །མེ་ཡི་འོབ་དང་སྤུ་གྲིའི་སོ་མཚུངས་པའི། །འཇིག་རྟེན་གསུམ་ན་བདེ་བ་ཅུང་ཟད་མེད། །མནོག་ཆུང་ཉེས་པའི་སྒོ་མང་གནས་འདི་ལས། །མྱུར་དུ་ཐར་ཕྱིར་སྐྱབས་སུ་འགྲོ་བ་དང་། །བདེན་བཞི་རྟེན་འབྲེལ་དོན་ལ་གོམས་པར་མཛོད། །བསླབ་པའི་ཚུལ་ཁྲིམས་སྲིད་པའི་ཆུ་ལོན་འགོག། བསྟན་པའི་རྩ་བ་སོ་སོར་ཐར་འདི་ཡིན། །སྟོན་པ་མཆོག་ཀྱང་ཁྱིམ་སྤང་རབ་ཏུ་བྱུང་། །དེ་རྗེས་འཇུག་ཕྱིར་དེ་ཡི་ཚུལ་ལ་སློབ། །དེ་ལས་ཡོན་ཏན་དཔག་མེད་འཕེལ་བ་དང་། །ཏིང་ངེ་འཛིན་དང་ཟག་མེད་ཤེས་རབ་སོགས། །ཚུལ་ཁྲིམས་ཕུང་པོ་འདི་ལས་འབྱུང་བའི་ཕྱིར། །དྲན་ཤེས་བག་ཡོད་ལྡན་པས་བསྲུང་བར་མཛོད། །དེང་སང་ཐུབ་པའི་བསྟན་པ་ཉམས་དམའ་ཞིང་། །རང་གཞན་འཆོལ་བར་སྤྱོད་པས་སེམས་འདི་སྐྱོ། །འདོད་ལ་ཆགས་པས་ཉེས་པ་ཀུན་གྱི་སྒོ། །སྲེད་པ་འདི་ལས་ཆེ་བ་མེད་ཕྱིར་ན། །སྲེད་སྲིད་མ་རིག་གཞོམ་པའི་ཐབས་ལ་བརྩོན། །ཐེག་ཆེན་ལམ་གྱི་གཙོ་བོ་ངེས་འབྱུང་དང་། །བྱང་སེམས་སྟོང་ཉིད་སྒོམ་པ་འདི་གསུམ་ཡིན། །ངེས་འབྱུང་གཞི་ཐེངས་འགྲོ་ཀུན་ཕ་མར་ཤེས། །བྱམས་དང་སྙིང་རྗེའི་བློ་སྦྱོང་ཟབ་མོ་ལ། །རང་འདོད་ཕྱོགས་རིས་མེད་པར་ཡང་ཡང་སྒོམ། །བདག་གཞན་མཉམ་བརྗེ་ཀུན་རྫོབ་བྱང་ཆུབ་སེམས། །བདག་བས་གཞན་གཅེས་རྒྱུད་ལ་མ་འབྱོང་བར། །ལུང་རིགས་མན་ངག་གསུམ་གྱིས་བསྒོམ་པ་གཅེས། །རྒྱུ་དང་མི་རྒྱུའི་འགྲོ་བ་འདི་ཀུན་ཀྱང་། །བདག་དང་ཕུང་པོ་རྣམ་རིག་སྤྲོས་ཀུན་གྱི། །བདེན་དང་མཚན་འཛིན་རྣམས་ཀྱིས་རབ་སྟོང་པའི། །གདོད་ནས་སྐྱེ་མེད་རབ་ཞི་མཉམ་པ་ཉིད། །མཚན་ཉིད་ཆད་པའི་ཀུན་ཏུ་བཏགས་པ་ཙམ། །མེད་སྣང་སྟོང་པའི་རང་གཟུགས་ཙམ་ཤེས་ནས། །ཇི་སྲིད་གཉིས་སྣང་ཡོད་པ་དེ་སྲིད་དུ། །སྣང་སྟོང་སྒྱུ་མའི་ཚུལ་འདི་འགོག་པ་མེད། །དེ་ཕྱིར་རྒྱུ་འབྲས་མེད་ཅེས་མ་བརྗོད་ཅིག། མཐར་ཐུག་ལྟ་བའི་རྟོགས་པ་ཚད་ཕེབས་དུས། །སྟོང་དང་མི་སྟོང་ཟུང་འཇུག་ལ་སོགས་པ། །ཚིག་ཏུ་བརྗོད་པ་ཐམས་ཅད་བློ་ཡི་ཆོས། །མཁའ་ལྟར་དག་པའི་གནས་ལུགས་ཟབ་མོ་ལ། །བློ་ཡི་སྤྲོས་པ་ཐམས་ཅད་ཉེར་ཞི་བ། །དབུ་མ་ཆེན་པོའི་རང་བཞིན་མངོན་དུ་གྱུར། །དེ་ཡི་གནས་ལུགས་ཇི་བཞིན་མངོན་བྱེད་ལ། །རྒྱུ་ཡི་ཐེག་པའི་ལུང་རིགས་ལ་བརྟེན་ནས། །སྒྲོ་འདོགས་བཅད་པ་དོན་སྤྱིའི་ལྟ་བ་ཙམ། །རྡོ་རྗེ་ཐེག་པར་དབང་གི་ཡེ་ཤེས་དང་། །བསྐྱེད་རྫོགས་ལ་བརྩོན་ཆུ་ཟླར་ལྟ་བ་བཞིན། །དཔེ་ཡི་ཡེ་ཤེས་མངོན་དུ་གྱུར་པ་ལས། །རིམ་གྱིས་དོན་གྱི་ཡེ་ཤེས་རྟོགས་པར་བྱེད། །མཆོག་ཏུ་གསང་བ་ཟབ་མོའི་རྩེ་རྒྱལ་ནི། །འོད་གསལ་རྡོ་རྗེ་རྩེ་མོའི་ཐེག་པ་འདིར། །རང་གི་སྔོན་སྦྱངས་ལས་འཕྲོ་སད་པ་དང་། །དད་དང་དམ་ཚིག་མོས་གུས་རྣམ་པར་དག། རང་བཞིན་དང་ནི་སྦྱངས་པའི་ཤེས་རབ་ཅན། །གསང་བའི་རྒྱལ་པོ་འདི་ཡི་སྣོད་དུ་གྱུར། །སྒོ་གསུམ་འཁྲུལ་བའི་རུ་ཤན་ཕྱེད་པ་དང་། །ཁྱད་པར་སེམས་ཀྱི་རྩ་གདར་ལེགས་བཅད་པས། །འཁྲུལ་པའི་བརྫུན་ཕུག་ཐམས་ཅད་གཏིབ་པ་དང་། །ཡེ་གྲོལ་རིག་པ་གཅེར་བུ་མངོན་སུམ་མཐོང་། །དེ་ལ་བླ་མའི་མན་ངག་ཅོག་བཞག་གི །ཆོས་ཉིད་རིག་བའི་ངང་དེར་འཇོག་པ་ན། །ལྟ་སྒོམ་སྤྱོད་འབྲས་རིག་པའི་ཀློང་དུ་གཅིག། བསལ་བཞག་མེད་པའི་ཀློང་དེར་བབ་ཀྱིས་ཞོག། བཞག་ཅེས་བྱ་བ་ཚིག་གི་བླ་དྭགས་ཙམ། །ཕྱི་ནང་བར་མེད་ཟང་ཐལ་རྒྱ་ཡན་པ། །བཅིང་གྲོལ་ལས་འདས་ནམ་མཁའ་ལྟ་བུའི་ངང་། །རང་བཞིན་འོད་གསལ་ལྷུན་གྲུབ་འདུས་མ་བྱས། །རྒྱུ་དང་རྐྱེན་གྱིས་མ་བསྐྱེད་རང་བྱུང་བ། །དངོས་མཚན་སྤྲོས་པའི་ཆོས་ལས་རབ་ཏུ་འདས། །ཚོགས་བརྒྱད་བློ་ཡི་དྲི་མས་མ་བསླད་པའི། །འོད་གསལ་སེམས་ཀྱི་རྡོ་རྗེའི་གནས་ལུགས་ནི། །ཐོག་མཐའ་མེད་པའི་ཀུན་ཁྱབ་ཀུན་ཏུ་བཟང་། །རྣམ་དབྱེར་མེད་པའི་ཟག་མེད་ཡོན་ཏན་ཆོས། །ཡེ་རྫོགས་གཅིག་དང་དུ་མ་ལས་འདས་པའི། །ངོ་བོ་ཀ་དག་རང་བཞིན་འོད་དུ་གསལ། །ཐུགས་རྗེ་རིག་པའི་འཆར་གཞི་མ་འགགས་པས། །གོ་ཕྱེས་འཁོར་དང་མྱ་ངན་འདས་པའི་ཆོས། །རྩལ་དང་རོལ་པར་ཤར་བ་ངོ་ཤེས་པས། །གཉེན་པོ་གཞན་མེད་རང་སར་གྲོལ་བ་ཡང་། །བཅོས་བསྒྱུར་མི་དགོས་ཅེར་གྱིས་གྲོལ་འདི་མཚར། །ཇི་སྙེད་ལམ་བདེན་བྱ་རྩོལ་བཅས་པ་རྣམས། །དོན་མེད་ངལ་བ་ཙམ་དུ་གྱུར་པའི་ཕྱིར། །ཆོས་ཉིད་དོན་ལ་རྟོག་པའི་སྒྲོག་གིས་བཅིངས། །འདིར་ནི་བྱ་མེད་རང་གཤིས་ངང་འཇོག་པས། །གཟུང་འཛིན་རྟོག་པའི་སྤྲིན་ཚོགས་དབྱིངས་སུ་དེངས། །སྒོ་གསུམ་རྒྱ་གྲོལ་གཞིར་གནས་མངོན་དུ་གྱུར། །སྒྲོན་མ་བཞི་པོ་གནད་ཀྱི་གཅུན་པ་ལས། །ལྷུན་གྲུབ་སྣང་བ་བཞི་ཡི་ལམ་རྩལ་རྫོགས། །གདོད་མའི་ནང་དབྱིངས་ཀ་དག་ཆེན་པོར་གྲོལ། །ཡེ་ཤེས་ནང་གསལ་གཞོན་ནུ་བུམ་སྐུའི་སྦུབས། །འབྲས་བུ་རྒྱལ་པོའི་བཙན་ས་ཟིན་པ་ལས། །སླར་ཡང་ཕྱིར་གསལ་སྐུ་དང་ཡེ་ཤེས་ཀྱི། །མཛད་པ་ཕྲིན་ལས་བསམ་མི་ཁྱབ་པ་ཡིས། །ནམ་མཁའ་ཇི་སྲིད་བར་དུ་ཁྱབ་ཅིང་རྟག། དེ་ལྟའི་ཡེ་གྲོལ་རང་བཞིན་རྫོགས་པ་ཆེ། །སྲིད་པ་གསུམ་གྱི་གྲོང་ཁྱེར་རྒྱུན་གཅོད་ཅིང་། །ཐེག་པ་ཀུན་གྱི་རྩེ་མོར་ཕྱིན་པས་ན། །འདི་ཡི་རང་བཞིན་མཐོང་བས་ཆོས་ཀུན་ཤེས། །དེ་ལ་རྫོགས་པ་ཆེན་པོའི་རྒྱུད་ལུང་དང་། །ཀུན་མཁྱེན་བླ་མའི་གསུང་གི་མཛོད་ཁང་དང་། །གསང་སྔགས་སྙིང་ཐིག་ཆེན་པོའི་གཞུང་བཟང་ལ། །དད་པས་ཡང་ཡང་བལྟ་ཞིང་འདྲིས་པར་མཛོད། །རྟོག་གེའི་རིག་པ་ངན་སྐྱུགས་ལྟ་བུ་ཡིས། །སྔ་འགྱུར་རྒྱུད་ལུང་ཟབ་མོའི་དོན་རྟོགས་དཀའ། །ངེས་པའི་དོན་ལ་སྦྱོར་བའི་ཤེས་རབ་ནི། །དྲི་མ་མེད་པས་ཡང་ཡང་བལྟ་བར་མཛོད། །དེ་ལྟར་བརྩེ་བས་ལེགས་པར་འདོམས་པ་ཡིས། །སྐལ་བཟང་སློབ་མ་ཁྱོད་ལ་ཕན་པ་དང་། །དོན་གཉིས་ལྷུན་གྲུབ་ཆོས་ཀྱི་རྒྱལ་པོ་ཡི། །གོ་འཕང་ཐོབ་ནས་འགྲོ་བའི་དོན་བྱེད་ཤོག། །ཅེས་པའང་གཡག་ཟེ་ཚེ་དབང་འགྱུར་མེད་ནས་གསུང་བསྐུལ་ངོར། །ཆོས་མེད་ཀྱི་སྤྲང་པོ་བཙུན་འཆལ་ཆོས་ཀྱི་བློ་གྲོས་པས་བྲིས་པ་དགེའོ།། །།

[edit]

!_zhal gdams phan bde'i 'khri shing zhes bya ba ni/__bla ma dam pa'i zhabs la phyag 'tshal lo/__/phan bde'i 'byung gnas srid zhi kun gyi bdag/__rang rig 'od gsal kun bzang bde ba che/__/ye grol dang po'i sangs rgyas bla ma rjer/__/btud nas gdams pa'i rim pa cung zad dbye/__/grogs dag srid pa'i phun tshogs ji snyed pa/__/mi rtag mi brtan sgyu ma'i rang bzhin dang /__/rmi lam skabs su 'byor rgud snang ba ltar/__/rang bzhin bden med 'jig pa'i ngang tshul soms/__/shin tu thob dka'i dal 'byor rin chen 'di/__/rnyed pa da res tsam yin 'di nyid kyang /__/lus srog g.yo ba chu yi chu bur bzhin/__/nam 'chi cha med soms la blo sna bstungs/__/las kyi bsags pa chu yi gnyer ma bzhin/__/rgyun mi chad pa gar skyes gar gnas kyang /__/chud mi za zhing rang thog smin nges pas/__/rgyu 'bras blang dor 'di la gzab pa gces/__/ma dag 'khor ba'i 'khrul snang rgya re che/__/sdug bsngal brgya phrag mang po'i mtshon gzings shing /__/me yi 'ob dang spu gri'i so mtshungs pa'i/__/'jig rten gsum na bde ba cung zad med/__/mnog chung nyes pa'i sgo mang gnas 'di las/__/myur du thar phyir skyabs su 'gro ba dang /__/bden bzhi rten 'brel don la goms par mdzod/__/bslab pa'i tshul khrims srid pa'i chu lon 'gog/__bstan pa'i rtsa ba so sor thar 'di yin/__/ston pa mchog kyang khyim spang rab tu byung /__/de rjes 'jug phyir de yi tshul la slob/__/de las yon tan dpag med 'phel ba dang /__/ting nge 'dzin dang zag med shes rab sogs/__/tshul khrims phung po 'di las 'byung ba'i phyir/__/dran shes bag yod ldan pas bsrung bar mdzod/__/deng sang thub pa'i bstan pa nyams dma' zhing /__/rang gzhan 'chol bar spyod pas sems 'di skyo/__/'dod la chags pas nyes pa kun gyi sgo/__/sred pa 'di las che ba med phyir na/__/sred srid ma rig gzhom pa'i thabs la brtson/__/theg chen lam gyi gtso bo nges 'byung dang /__/byang sems stong nyid sgom pa 'di gsum yin/__/nges 'byung gzhi thengs 'gro kun pha mar shes/__/byams dang snying rje'i blo sbyong zab mo la/__/rang 'dod phyogs ris med par yang yang sgom/__/bdag gzhan mnyam brje kun rdzob byang chub sems/__/bdag bas gzhan gces rgyud la ma 'byong bar/__/lung rigs man ngag gsum gyis bsgom pa gces/__/rgyu dang mi rgyu'i 'gro ba 'di kun kyang /__/bdag dang phung po rnam rig spros kun gyi/__/bden dang mtshan 'dzin rnams kyis rab stong pa'i/__/gdod nas skye med rab zhi mnyam pa nyid/__/mtshan nyid chad pa'i kun tu btags pa tsam/__/med snang stong pa'i rang gzugs tsam shes nas/__/ji srid gnyis snang yod pa de srid du/__/snang stong sgyu ma'i tshul 'di 'gog pa med/__/de phyir rgyu 'bras med ces ma brjod cig/__mthar thug lta ba'i rtogs pa tshad phebs dus/__/stong dang mi stong zung 'jug la sogs pa/__/tshig tu brjod pa thams cad blo yi chos/__/mkha' ltar dag pa'i gnas lugs zab mo la/__/blo yi spros pa thams cad nyer zhi ba/__/dbu ma chen po'i rang bzhin mngon du gyur/__/de yi gnas lugs ji bzhin mngon byed la/__/rgyu yi theg pa'i lung rigs la brten nas/__/sgro 'dogs bcad pa don spyi'i lta ba tsam/__/rdo rje theg par dbang gi ye shes dang /__/bskyed rdzogs la brtson chu zlar lta ba bzhin/__/dpe yi ye shes mngon du gyur pa las/__/rim gyis don gyi ye shes rtogs par byed/__/mchog tu gsang ba zab mo'i rtse rgyal ni/__/'od gsal rdo rje rtse mo'i theg pa 'dir/__/rang gi sngon sbyangs las 'phro sad pa dang /__/dad dang dam tshig mos gus rnam par dag/__rang bzhin dang ni sbyangs pa'i shes rab can/__/gsang ba'i rgyal po 'di yi snod du gyur/__/sgo gsum 'khrul ba'i ru shan phyed pa dang /__/khyad par sems kyi rtsa gdar legs bcad pas/__/'khrul pa'i brdzun phug thams cad gtib pa dang /__/ye grol rig pa gcer bu mngon sum mthong /__/de la bla ma'i man ngag cog bzhag gi__/chos nyid rig ba'i ngang der 'jog pa na/__/lta sgom spyod 'bras rig pa'i klong du gcig/__bsal bzhag med pa'i klong der bab kyis zhog/__bzhag ces bya ba tshig gi bla dwags tsam/__/phyi nang bar med zang thal rgya yan pa/__/bcing grol las 'das nam mkha' lta bu'i ngang /__/rang bzhin 'od gsal lhun grub 'dus ma byas/__/rgyu dang rkyen gyis ma bskyed rang byung ba/__/dngos mtshan spros pa'i chos las rab tu 'das/__/tshogs brgyad blo yi dri mas ma bslad pa'i/__/'od gsal sems kyi rdo rje'i gnas lugs ni/__/thog mtha' med pa'i kun khyab kun tu bzang /__/rnam dbyer med pa'i zag med yon tan chos/__/ye rdzogs gcig dang du ma las 'das pa'i/__/ngo bo ka dag rang bzhin 'od du gsal/__/thugs rje rig pa'i 'char gzhi ma 'gags pas/__/go phyes 'khor dang mya ngan 'das pa'i chos/__/rtsal dang rol par shar ba ngo shes pas/__/gnyen po gzhan med rang sar grol ba yang /__/bcos bsgyur mi dgos cer gyis grol 'di mtshar/__/ji snyed lam bden bya rtsol bcas pa rnams/__/don med ngal ba tsam du gyur pa'i phyir/__/chos nyid don la rtog pa'i sgrog gis bcings/__/'dir ni bya med rang gshis ngang 'jog pas/__/gzung 'dzin rtog pa'i sprin tshogs dbyings su dengs/__/sgo gsum rgya grol gzhir gnas mngon du gyur/__/sgron ma bzhi po gnad kyi gcun pa las/__/lhun grub snang ba bzhi yi lam rtsal rdzogs/__/gdod ma'i nang dbyings ka dag chen por grol/__/ye shes nang gsal gzhon nu bum sku'i sbubs/__/'bras bu rgyal po'i btsan sa zin pa las/__/slar yang phyir gsal sku dang ye shes kyi/__/mdzad pa phrin las bsam mi khyab pa yis/__/nam mkha' ji srid bar du khyab cing rtag/__de lta'i ye grol rang bzhin rdzogs pa che/__/srid pa gsum gyi grong khyer rgyun gcod cing /__/theg pa kun gyi rtse mor phyin pas na/__/'di yi rang bzhin mthong bas chos kun shes/__/de la rdzogs pa chen po'i rgyud lung dang /__/kun mkhyen bla ma'i gsung gi mdzod khang dang /__/gsang sngags snying thig chen po'i gzhung bzang la/__/dad pas yang yang blta zhing 'dris par mdzod/__/rtog ge'i rig pa ngan skyugs lta bu yis/__/snga 'gyur rgyud lung zab mo'i don rtogs dka'/__/nges pa'i don la sbyor ba'i shes rab ni/__/dri ma med pas yang yang blta bar mdzod/__/de ltar brtse bas legs par 'doms pa yis/__/skal bzang slob ma khyod la phan pa dang /__/don gnyis lhun grub chos kyi rgyal po yi/__/go 'phang thob nas 'gro ba'i don byed shog/__/ces pa'ang g.yag ze tshe dbang 'gyur med nas gsung bskul ngor/__/chos med kyi sprang po btsun 'chal chos kyi blo gros pas bris pa dge'o//___//