JKW-KABUM-14-PHA-030

🚧 This website is under continued development. We appreciate your patience!

First section in volume. Back to Volume PageNext Section

Wylie title	gu ru rgyal ba'i gdung 'dzin gyi phrin las snying po khrigs su bsdebs pa khams gsum dbang sdud
Location	mkhyen brtse'i bka' 'bum Volume 14, sde tshan 31, Pages 481-491 (Folios 1a to 6a4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	མཆོག་གྱུར་གླིང་པ་ (mchog gyur gling pa)
Citation	'jam dbyangs mkhyen brtse'i dbang po. gu ru rgyal ba'i gdung 'dzin gyi phrin las snying po khrigs su bsdebs pa khams gsum dbang sdud. In 'jam dbyangs mkhyen brtse'i dbang po'i bka' 'bum, Vol. 14: 481-491. Khams sde dge rdzong sar dgon: Rdzong sar blo gros phun tshogs, 2020.
Genre	Activity Manual - las byang
Cycle	བླ་མའི་ཐུགས་སྒྲུབ་བར་ཆད་ཀུན་སེལ་ (bla ma'i thugs sgrub bar chad kun sel)
Deity	rgyal ba'i gdung 'dzin
Colophon	།ཞེས་པའང་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་གཏེར་གཞུང་རྩ་བ་གྲུབ་པའི་མན་ངག་གིས་བྱེ་བའི་རྗེས་སུ་འབྲངས་ཏེ་བཀླག་པས་གྲུབ་པར་བསྡེབས་པའི་དགེ་བས་བརྟན་གཡོ་སྲིད་ཞིའི་ལེགས་ཚོགས་ཐམས་ཅད་འདོད་རྒུར་འདུ་བའི་རྒྱུར་གྱུར་ཅིག། །།སརྦ་དཱ་ཤྲཱེ་ཡོ་བྷ་བ་ཏུ།
	zhes pa'ang mtsho skyes bla ma dgyes pa'i 'bangs mkhyen brtse'i dbang pos gter gzhung rtsa ba grub pa'i man ngag gis bye ba'i rjes su 'brangs te bklag pas grub par bsdebs pa'i dge bas brtan g.yo srid zhi'i legs tshogs thams cad 'dod rgur 'du ba'i rgyur gyur cig/__//sarba dA shrA+e yo b+ha ba tu/

1 Texts in this Section (sde tshan or chos tshan)

481-491	གུ་རུ་རྒྱལ་བའི་གདུང་འཛིན་གྱི་ཕྲིན་ལས་སྙིང་པོ་ཁྲིགས་སུ་བསྡེབས་པ་ཁམས་གསུམ་དབང་སྡུད། gu ru rgyal ba'i gdung 'dzin gyi phrin las snying po khrigs su bsdebs pa khams gsum dbang sdud Activity Manual - las byang	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །བླ་མའི་ཐུགས་སྒྲུབ་བར་ཆད་ཀུན་སེལ་ལས། གུ་རུ་རྒྱལ་བའི་གདུང་འཛིན་གྱི་ཕྲིན་ལས་སྙིང་པོ་ཁྲིགས་སུ་བསྡེབས་པ་ཁམས་གསུམ་དབང་སྡུད་ཅེས་བྱ་བ་བཞུགས་སོ།།

།།ན་མོ་གུ་རུ་པདྨ་རཱ་ཛཱ་ཡ། འདིར་སྲིད་ཞིའི་ཕུན་སུམ་ཚོགས་པའི་དགེ་མཚན་མཐའ་དག་རིག་སྔགས་ཀྱི་སྦྱོར་བས་དབང་དུ་བྱ་བའི་སླད་དུ། ཟབ་མོ་ཐུགས་ཀྱི་སྒྲུབ་པའི་ཆ་ལགས་གུ་རུ་རྒྱལ་བའི་གདུང་འཛིན་པདྨ་རྒྱལ་པོའི་སྒོམ་བཟླས་ཀྱི་རྣལ་འབྱོར་ཉམས་སུ་བསྟར་བའི་ཚུལ་ལ་གསུམ། སྔོན་འགྲོ། དངོས་གཞི། རྗེས་སོ། །དང་པོ་ནི། སྐྱབས་ཡུལ་གསལ་བཏབ་ལ། ན་མོ༔ བདག་དང་མཁའ་མཉམ་སེམས་ཅན་མ་ལུས་ཀུན༔ སྐྱབས་ཀྱི་མཆོག་གྱུར་རྣམས་ལ་སྐྱབས་སུ་མཆི༔ སྨོན་དང་འཇུགས་པའི་བྱང་ཆུབ་སེམས་བསྐྱེད་ནས༔ སྐུ་གསུམ་བླ་མའི་གོ་འཕང་བསྒྲུབ་པར་བགྱི༔ ཞེས་ལན་གསུམ་གྱིས་སྐྱབས་སེམས་བྱ། རང་ཉིད་རྟ་མཆོག་ཧེ་རུ་ཀའི་ང་རྒྱལ་དང་བཅས་ཏེ། ཧཱུྃ་ཧྲཱིཿ གཉིས་སྣང་འཁྲུལ་པའི་གདོན་བགེགས་འབྱུང་པོ་ཀུན༔ གནས་འདིར་མ་འདུག་རང་རང་གནས་སུ་དེངས༔ གཉིས་མེད་ཡེ་ཤེས་ལྷ་སྔགས་ཆོས་སྐུའི་ངང་༔ མཚམས་ཀྱི་དཀྱིལ་འཁོར་རང་བཞིན་ལྷུན་གྱིས་གྲུབ༔ ཧཱུྃ་ཧཱུྃ་ཧཱུྃ་བཛྲ་རཀྵ་རཀྵ་བྷྲཱུྃ༔ ཞེས་བགེགས་ལ་བཀའ་བསྒོ་ཞིང་མཚམས་བཅད། ཨོཾ་ཨཱཿཧཱུྃ༔ སྐུ་གསུམ་བླ་མའི་ལྷ་ཚོགས་དབྱིངས་ནས་བཞེངས༔ གནས་འདིར་བྱིན་ཕོབ་དབང་དང་དངོས་གྲུབ་སྩོལ༔ སྣང་སྲིད་གཞིར་བཞེངས་མཆོད་པའི་ཕྱག་རྒྱ་ཆེ༔ ཀུན་བཟང་རྣམ་འཕྲུལ་རྒྱ་མཚོར་བྱིན་གྱིས་རློབས༔ ཨོཾ་ཨཱཿཧཱུྃ་བཛྲ་གུ་རུ་དྷེ་བ་དྷཱ་ཀི་ནཱི་ཛྙཱ་ན་ཨ་བེ་ཤ་ཡ་ཨ་ཨཱཿ ཧཱུྃ་ཧཱུྃ་ཧཱུྃ༔ ཨོཾ་སརྦ་པཱུ་ཛ་མེ་གྷ་ཨཱཿཧཱུྃ༔ ཞེས་ཡེ་ཤེས་ཀྱི་གཟི་བྱིན་དབབ་ཅིང་གནས་དང་མཆོད་པའི་ཡོ་བྱད་བྱིན་གྱིས་རླབས། །གཉིས་པ་དངོས་གཞི་ལྷ་བསྒོམ་པ་ཡན་ལག་དང་བཅས་པ་ནི། ཧྲཱིཿ ཆོས་སྐུ་དེ་བཞིན་ཉིད་དབྱིངས་འོད་གསལ་ངང་༔ ལོངས་སྐུ་འགགས་མེད་ཀུན་སྣང་སྙིང་རྗེའི་རྩལ༔ སྤྲུལ་སྐུ་རྒྱུ་ཡི་ཏིང་འཛིན་ཧྲཱིཿདམར་པོ༔ དེ་ལས་འོད་འཕྲོས་སྣོད་བཅུད་དངོས་འཛིན་སྦྱངས༔ འབྱུང་བ་རིམ་བརྩེགས་རྡོ་རྗེའི་སྲུང་འཁོར་དབུས༔ བྷྲཱུྃ་ལས་རིན་ཆེན་གཞལ་ཡས་མཚན་ཉིད་རྫོགས༔ ལྟེ་བར་སེང་ཁྲི་པདྨ་ཉི་ཟླའི་སྟེང་༔ རང་རིག་བདེ་གཤེགས་ཀུན་འདུས་པདྨ་འབྱུང་༔ གུ་རུ་རྒྱལ་བའི་གདུང་འཛིན་འགྲོ་བའི་མགོན༔ དཀར་དམར་ཞལ་གདངས་མཆེ་གཙིགས་གྱེན་ལ་གཟིགས༔ གཡས་པའི་ཕྱག་རྒྱས་རལ་གྲི་འབར་བ་དང་༔ གཡོན་པས་འགུགས་པའི་རང་བཞིན་ལྕགས་ཀྱུ་བསྣམས༔ ཐོད་སྐམ་དབུ་རྒྱན་སྟག་ཤམ་རུས་བརྒྱན་འཕྱང་༔ དབང་དྲག་བརྟུལ་ཞུགས་སྤྱོད་པའི་སྐུ་རུ་གསལ༔ དེ་ཡི་ཕྱི་རོལ་པདྨ་འདབ་བཞི་ལ༔ ཤར་དུ་རྡོ་རྗེ་མཁའ་འགྲོ་སྐུ་མདོག་མཐིང་༔ ལྷ་རྣམས་དབང་སྡུད་རྡོ་རྗེ་ལྕགས་ཀྱུ་བསྣམས༔ ལྷོ་རུ་རིན་ཆེན་མཁའ་འགྲོ་སྐུ་མདོག་སེར༔ ལོངས་སྤྱོད་དབང་སྡུད་རིན་ཆེན་ཞགས་པ་བསྣམས༔ ནུབ་ཏུ་པདྨ་མཁའ་འགྲོ་སྐུ་མདོག་དམར༔ ཀླུ་རྣམས་དབང་སྡུད་པདྨ་ལྕགས་སྒྲོག་བསྣམས༔ བྱང་དུ་ལས་ཀྱི་མཁའ་འགྲོ་སྐུ་མདོག་ལྗང་༔ མི་རྣམས་དབང་སྡུད་རྒྱ་གྲམ་དྲིལ་བུ་བསྣམས༔ དར་དང་རིན་ཆེན་པདྨའི་ཕྲེང་བས་བརྒྱན༔ ཞབས་ཟུང་བརྐྱང་བསྐུམ་གར་གྱི་རོལ་པས་བཞེངས༔ སྒོ་བཞིར་འཇིག་རྟེན་ཀུན་ལ་དབང་མཛད་པའི༔ མཐུ་ཆེན་རྒྱལ་པོ་ཆེན་པོ་སྡེ་བཞི་བཅས༔ ཀུན་ཀྱང་ཤིན་ཏུ་ཆགས་ཤིང་སྒེག་པའི་ཉམས༔ སྣང་སྲིད་ཐམས་ཅད་གཡོ་ཞིང་སྡུད་མཛད་པའི༔ འོད་དམར་འཇའ་ཚོན་འཁྲུགས་པའི་ཀློང་ན་གསལ༔ སྣང་སྟོང་ཟུང་འཇུག་ཡེ་ཤེས་སྒྱུ་མའི་སྐུ༔ རྡོ་རྗེ་གསུམ་གྱི་ངོ་བོར་ལྷུན་གྲུབ་ཅིང་༔ ཡེ་ཤེས་རིགས་ལྔའི་དབང་མཆོག་རྫོགས་པར་གྱུར༔ ཨོཾ་ཨཱཿཧཱུྃ༔ ཨོཾ་ཧཱུྃ་ཏྲཱྃ་ཧྲཱིཿཨཱཿ ཨ་བྷི་ཥིཉྩ་ཧཱུྃ༔ ཧཱུྃ་ཧྲཱིཿ ཡུལ་གྱི་མིང་ནི་ལྷོ་ནུབ་རྔ་ཡབ་གླིང་༔ སྤྲུལ་པའི་ཞིང་མཆོག་པདྨ་དྲྭ་བ་ནས༔ སྐུ་གསུམ་དབྱེར་མེད་ཨོ་རྒྱན་པདྨའི་རྒྱལ༔ རབ་འབྱམས་རྩ་གསུམ་རྒྱ་མཚོའི་འཁོར་དང་བཅས༔ མོས་པའི་གནས་འདིར་གདུང་བས་སྤྱན་འདྲེན་ན༔ ཐུགས་རྗེས་ཐུགས་དམ་དབང་གིས་གཤེགས་ནས་ཀྱང་༔ བར་ཆད་ཀུན་སེལ་མཆོག་ཐུན་དངོས་གྲུབ་སྩོལ༔ ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛཿསིདྡྷི་ཕ་ལ་ཧཱུྃ་ཨཱཿ ཛཿཧཱུྃ་བྃ་ཧོཿ ས་མ་ཡ་ཏིཥྛ་ལྷན༔ ཧཱུྃ་ཧྲཱིཿ སྐྱེ་འགགས་འགྱུར་མེད་ཕྲིན་ལས་ཐམས་ཅད་རྫོགས༔ རང་བྱུང་ཐུགས་རྗེས་འགྲོ་བ་མ་ལུས་སྒྲོལ༔ ཡིད་བཞིན་ནོར་ལྷར་དངོས་གྲུབ་ཆར་འབེབས་པའི༔ རིག་འཛིན་འདུས་པའི་ཚོགས་ལ་ཕྱག་འཚལ་ལོ༔ ཨ་ཏི་པཱུ་ཧོཿ པྲ་ཏཱི་ཙྪ་ཧོཿ ཨོཾ་ཨཱཿཧཱུྃ་ཕྱི་མཆོད་འདོད་ཡོན་རྒྱ་མཚོ་སྤྲིན་ལྟར་གཏིབས༔ ནང་མཆོད་སྨན་རཀ་གཏོར་ཚོགས་བསམ་མི་ཁྱབ༔ གསང་མཆོད་བདེ་སྟོང་ཟུང་འཇུག་ཡེ་ཤེས་དབྱིངས༔ འབུལ་ལོ་བཞེས་ནས་མཆོག་ཐུན་དངོས་གྲུབ་སྩོལ༔ ཨོཾ་བཛྲ་ཨརྒྷཾ་པཱདྱཾ་པུཥྤེ་དྷཱུ་པེ་ཨཱ་ལོ་ཀེ་གནྡྷཻ་བིདྱཱ་ཤབྡ་པཉྩ་རཀྟ་པ་ལིཾ་ཏ་མ་ཧཱ་པཱུ་ཛ་ཨཱཿཧཱུྃ༔ ཧྲཱིཿ རྒྱལ་བའི་གདུང་འཚོབ་རིག་འཛིན་པདྨའི་རྒྱལ༔ སྣང་སྲིད་དབང་སྡུད་དྷཱ་ཀཱིའི་སྤྲིན་ཕུང་འཕྲོ༔ བདེ་ཆེན་ཡེ་ཤེས་འབར་བའི་གཟི་བྱིན་གྱིས༔ སྲིད་གསུམ་དབང་དུ་མཛད་ལ་ཕྱག་འཚལ་བསྟོད༔ ཅེས་མཆོད་ཅིང་བསྟོད་པ་དང་བཅས་པའི་མཐར། སྐུའི་གསལ་སྣང་ལ་རྩེ་གཅིག་ཏུ་སེམས་བཟུང་ཞིང་ཟིན་པ་ན། སྔགས་བཟླ་བ་ནི། བྷྲཱུྃ་བི་ཤྭ་བི་ཤུདྡྷེ་ཧྲཱི་ཕ྄ཊ་ཛ༔ བདག་ཉིད་རྩ་བའི་དཀྱིལ་འཁོར་ལས༔ ཡེ་ཤེས་དཀྱིལ་འཁོར་གཉིས་པ་བྱེ༔ མདུན་གྱི་ནམ་མཁར་བཞུགས་པ་ཡི༔ གཉིས་ཀའི་ཐུགས་སྲོག་ཡི་གེའི་མཐར༔ སྔགས་ཕྲེང་སྒྲར་བཅས་འཁོར་བ་ལས༔ འོད་ཟེར་དཔག་ཡས་འཕྲོ་བར་གྱུར༔ ཅེས་ཛཔ྄་ཁང་དབྱེ། གུ་རུ་རྒྱལ་བའི་གདུང་འཛིན་དབྱིངས་ནས་བཞེངས༔ ཐུགས་དམ་གནད་ནས་བསྐུལ་ལོ་ཛཔ྄་སྒྲ་སྒྲོགས༔ སྣང་སྟོང་སྐུ་ཡི་ཕྱག་རྒྱས་སྟོང་གསུམ་གང་༔ གྲགས་སྟོང་གསུང་གི་ཛཔྲ་དབྱངས་འབྲུག་ལྟར་ལྡིར༔ རིག་སྟོང་ཐུགས་ཀློང་འོད་གསལ་ངང་དུ་གནས༔ ལྷ་རྣམས་ཐམས་ཅད་བདེ་བའི་གར་གྱིས་རོལ༔ སྔགས་རྣམས་རྩོལ་མེད་རྡོ་རྗེའི་གླུ་ཡིས་བསྐུལ༔ ཐུགས་ནི་སྒྲོལ་མཛད་ཡེ་ཤེས་སྲོག་དང་བཅས༔ མ་གསལ་བར་དུ་བསྐྱེད་ཅིང་བཟླས་པར་འབད༔ མ་གྲུབ་བར་དུ་དགོངས་པ་མི་གཏོང་གསོལ༔ མ་གཡེལ་ཐུགས་དམ་ཆེན་པོའི་དུས་ལ་བབས༔ བསྙེན་བསྒྲུབ་རྣམ་བཞི་སྟན་ཐོག་འདི་ཉིད་དུ༔ མཐར་ཕྱིན་དཀྱིལ་འཁོར་བདག་པོར་འགྲུབ་པར་མཛོད༔ ཅེས་ཛཔ྄་གྱི་ཕྲིན་ལས་ལ་བསྐུལ་བ་སྔོན་དུ་འགྲོ་བས། ཧཱུྃ རིག་འཛིན་རྒྱལ་བའི་གདུང་འཚོབ་ཐུགས་ཀ་རུ༔ ཟླ་སྟེང་ཧྲཱིཿམཐར་སྔགས་ཀྱི་ཕྲེང་བས་བསྐོར༔ འོད་འཕྲོས་སྲིད་ཞིའི་ཕུན་ཚོགས་ཐམས་ཅད་ཀུན༔ བཀྲ་ཤིས་རྫས་རྟགས་རྒྱལ་སྲིད་རྣམ་བདུན་དང་༔ ལྔ་ལྡན་འཇའ་ཟེར་ཐིག་ལེའི་རྣམ་པར་བསྡུས༔ བདག་ལ་ཐིམ་པས་གཟི་བྱིན་མཆོག་ཏུ་འབར༔ འཁོར་འདས་ཀུན་གྱི་དབང་ཕྱུག་ཆེན་པོར་གྱུར༔ ཅེས་པའི་དམིགས་གནད་རྩེ་གཅིག་པས་བཟླ་བྱ་རྩ་བའི་བསྙེན་སྔགས། ཨོཾ་ཨཱཿཧཱུྃ་བཛྲ་གུ་རུ་པདྨ་རཱ་ཛ་ཨ་ནྲྀ་ཏྲི་ཛཿཛཿསརྦ་སིདྡྷི་ཕ་ལ་ཧཱུྃ༔ ཞེས་གཙོ་བོར་བཟླ་བ་བསྙེན་པ་དང་། སྒྲུབ་པའི་དམིགས་པ་ནི། རང་གི་ཐུགས་ནས་འཕྲོས་པའི་འོད་ཟེར་གྱིས༔ འཁོར་གྱི་མཁའ་འགྲོ་རིགས་བཞིའི་ཐུགས་རྒྱུད་བསྐུལ༔ དེ་ལས་སྤྲུལ་པའི་ཆོ་འཕྲུལ་བསམ་ཡས་འཕྲོས༔ ལྷ་ཀླུ་མི་ཡི་སྐྱེ་འགྲོ་ཐམས་ཅད་དང་༔ ཚེ་དཔལ་ལོངས་སྤྱོད་བརྟན་གཡོའི་དྭངས་བཅུད་ཀུན༔ འོད་དམར་བདེ་ཆེན་ངོ་བོར་མེར་གྱིས་བསྡུས༔ བདག་ལ་ཐིམ་པས་གཟི་བྱིན་ཆེར་འབར་གྱུར༔ ཅེས་བརྗོད་ཅིང་བསམ་ལ་ཧཱ་བཛྲ་དྷཱ་ཀི་ནཱི་སརྦ་དྷེ་བ་པཱ་ཤཾ་ཀུ་རུ་ཛཿ རི་རཏྣ་དྷཱ་ཀི་ནཱི་སརྦ་བཱ་སུ་པཱ་ཤམ་ཀུ་རུ་ཧཱུྃ༔ ནི་པདྨ་དྷཱ་ཀི་ནཱི་སརྦ་ནཱ་ག་པཱ་ཤམ་ཀུ་རུ་བཾཿ ས་ཀརྨ་དྷཱ་ཀཱི་ནཱི་སརྦ་ནྲྀ་པཱ་ཤམ་ཀུ་རུ་ཧོཿ ཞེས་ཅི་ནུས་དང་། སྤྱི་དྲིལ་ལས་སྦྱོར་གྱི་སྔགས། ཧ་རི་ནི་ས་དྷཱ་ཀི་ནཱི་ཙིཏྟ་ཧྲཱིཾ་ཧྲཱིཾ་ཛཿ་ཛཿསརྦ་ཨ་ནྲྀ་ཏྲི་བ་སུ་སིདྡྷི་ཛཿཧཱུྃ་བྃ་ཧོཿ ཞེས་པའང་ཅུང་ཟད་བཟླ། གསུམ་པ་རྗེས་ནི། དབྱངས་གསལ་རྟེན་སྙིང་གི་སྔགས་ཀྱི་ལྷག་ཆད་ཁ་སྐོང་ཞིང་བྱིན་རླབས་ཀྱི་རྒྱུན་བརྟན་པར་བྱ། མཆོད་ཅིང་བསྟོད་ལ། ཧཱུྃ་ཧྲཱིཿ སྙིང་པོ་བྱང་ཆུབ་སེམས་ཀྱི་དཀྱིལ་འཁོར་དུ༔ ཡེ་ཤེས་སྒྱུ་མར་རོལ་པའི་ལྷ་ཚོགས་རྣམས༔ མི་འདའ་རྡོ་རྗེའི་དམ་ཚིག་རྗེས་དགོངས་ལ༔ བྱིན་རླབས་དབང་དང་དངོས་གྲུབ་སྩལ་དུ་གསོལ༔ ཞེས་དང་རྩ་སྔགས་ཀྱི་མཐར། ཀཱ་ཡ་ཝཱ་ཀ་ཙིཏྟ་ཛྙཱ་ན་ཀརྨ་སརྦ་སིདྡྷི་ཕ་ལ་ཧོཿ ཞེས་རྒྱུན་གྱི་དངོས་གྲུབ་བླང་། ཡི་གེ་བརྒྱ་པ་ལན་གསུམ་གྱི་མཐར། ཛཿཧཱུྃ་བྃ་ཧོཿ མདུན་གྱི་ཡེ་ཤེས་པ་རང་ལ་ཐིམ་པས་གསལ་བརྟན་གྱི་གཟི་བྱིན་མཆོག་ཏུ་འབར་བར་གྱུར། ཅེས་བརྗོད་ཅིང་བསམ་ལ། དེ་ཁོ་ན་ཉིད་ཀྱི་ཏིང་ངེ་འཛིན་ལ་མཉམ་པར་འཇོག་པ་ནི། ཧཱུྃ་ཧཱུྃ་ཧཱུྃ། སྣང་སྲིད་སྣོད་བཅུད་ཐམས་ཅད་འོད་དམར་པོ་བདེ་བ་ཆེན་པོའི་ངོ་བོར་ཞུ་ནས་རང་ལ་ཐིམ། རང་ཉིད་ཐུགས་སྲོག་ཧྲཱིཿལ་ཐིམ། ཧྲཱིཿའང་མི་དམིགས་པ་འོད་གསལ་སྟོང་པ་ཉིད་ཀྱི་ངང་དུ་གྱུར་པར་བསམ་ལ་རིག་སྟོང་འཛིན་མེད་ཀྱི་ངང་དུ་བཞག །སྤྲོ་ཞིང་ནུས་ན་རླུང་བུམ་པ་ཅན་གྱི་སྦྱོར་བས་བརྟན་པར་བྱ་བ་ནི་རྫོགས་རིམས་བརྟེན་པའི་དབང་གི་ལས་སྦྱོར་མཐར་ཐུག་པའོ། །དེ་ལས་ལྡང་བ་ན། ཕཊ་ཕཊ་ཕཊ༔ སླར་ཡང་རང་དང་སྣང་བ་ཐམས་ཅད་རིག་འཛིན་པདྨ་རྒྱལ་པོའི་ལྷ་སྔགས་ཡེ་ཤེས་རྣམས་པ་ཐམས་ཅད་པའི་འཁོར་ལོར་བཞེངས་པར་གྱུར། ཧོཿ རིག་འཛིན་བླ་མའི་དཀྱིལ་འཁོར་བསྒྲུབས་པའི་མཐུས༔ བདག་དང་མཐའ་ཡས་སེམས་ཅན་མ་ལུས་ཀུན༔ ཕྲིན་ལས་རྣམ་བཞི་ལྷུན་གྱིས་གྲུབ་པ་དང་༔ འོད་གསལ་ཆོས་སྐུའི་དབྱིངས་སུ་གྲོལ་བར་ཤོག༔ རྩ་བརྒྱུད་བླ་མའི་བྱིན་རླབས་སྙིང་ལ་ཞུགས༔ ཡི་དམ་མཁའ་འགྲོ་ལུས་དང་གྲིབ་བཞིན་འགྲོགས༔ ཆོས་སྐྱོང་སྲུང་མས་བར་ཆད་ཀུན་བསལ་ནས༔ མཆོག་ཐུན་དངོས་གྲུབ་འགྲུབ་པའི་བཀྲ་ཤིས་ཤོག༔ ཅེས་བསྔོ་སྨོན་ཤིས་བརྗོད་ཀྱིས་མཚམས་སྦྱར་ཏེ་སྤྱོད་ལམ་ལ་འཇུག་རྒྱུན་གྱི་རྣལ་འབྱོར་ལ་འདི་ཙམ་གྱིས་དོན་གྲུབ་ཅིང་། ཐུན་འཚམས་སུ་གཏོར་མ་འབུལ་བར་འདོད་ན། གཞུང་ལས། རིན་ཆེན་སྣོད་དུ་ཕྱེ་གཙང་ལ༔ ཤ་ཆང་ལ་དུ་ལན་ཚྭ་དང་༔ རིན་ཆེན་འབྲུ་སྨན་སྦྱར་བ་ཡི༔ གཏོར་མ་ནོར་བུ་འབར་བའི་དབྱིངས༔ ཞེས་གསུངས་པ་ལྟར་རྒྱན་སྤྲོས་གང་མཛེས་སུ་བཞེངས་པའམ། ཅི་འབྱོར་པའི་ཟས་སྣ་ལ་དམིགས་ཏེ། རྃ་ཡྃ་ཁྃ། བྷྲཱུྃ་ལས་རིན་ཆེན་སྣོད་ནང་དུ༔ ཁམས་གསུམ་བརྟན་གཡོའི་དྭངས་བཅུད་ཀུན༔ མ་ལུས་འདུས་པའི་ངོ་བོ་ཉིད༔ གཏོར་མ་བདུད་རྩིའི་རྒྱ་མཚོར་གྱུར༔ ཨོཾ་ཨཱཿཧཱུྃ༔ ཞེས་ལན་མང་དུ་བརྗོད་པས་བྱིན་གྱིས་བརླབ། ལྷ་རྣམས་ཀྱི་ལྗགས་རྡོ་རྗེའི་སྤུ་གུ་ཅན་གྱི་འོད་ཟེར་གྱིས་གཏོར་མའི་བཅུད་དྲངས་ཏེ་གསོལ་བས་དགྱེས་ཤིང་ཚིམ་པར་བསམ་ལ། ཨོཾ་ཨཱཿཧཱུྃ་བཛྲ་གུ་རུ་པདྨ་རཱ་ཛ་ཨ་ནྲྀ་ཏྲི་ཛཿཛཿསརྦ་སིདྡྷི་ཕ་ལ་ཧཱུྃ༔ དྷཱུ་ཀི་ནི་ཧ་རི་ནི་ས་ས་པ་རི་ཝཱ་ར་སརྦ་ལོ་ཀ་བ་ལིངྟ་པཱུ་ཛ་ཧོ༔ སརྦ་སིདྡྷི་རཏྣ་ཧྲཱིཾ་ཛཿ ཞེས་ལན་བདུན་གྱི་ཕུལ། མཆོད་ཅིང་བསྟོད་ལ། ཧོཿ འཁོར་འདས་དབང་བསྐུར་པདྨ་རྒྱལ་པོ་དང་༔ རིགས་བཞིའི་མཁའ་འགྲོ་སྤྲུལ་འཁོར་བཅས་པ་རྣམས༔ ཁམས་གསུམ་དྭངས་བཅུད་གཏོར་མ་འདི་གསོལ་ལ༔ རབ་འབྱམས་དབང་གི་དངོས་གྲུབ་སྩལ་དུ་གསོལ༔ ཅེས་ཕྲིན་ལས་གསོལ། འདི་ཉིད་བཟླས་པའི་མཇུག་ཏུ་མདུན་དུ་ཕྱེས་པའི་ཡེ་ཤེས་ཀྱི་དཀྱིལ་འཁོར་ལ་ཕུལ་ནས་ཕྲིན་ལས་གསོལ་བའི་མཐར་ཡི་གེ་བརྒྱ་པ་བརྗོད་ཅིང་ཛཔ྄་ཁང་བསྡུ་བའམ། ཡང་ན་ཛཔ྄་ཁང་བསྡུས་ཟིན་ནས་གཏོར་མགྲོན་སྐད་ཅིག་གིས་སྤྱན་དྲངས་ཏེ་ཕུལ་ནའང་རུང་ངོ་། །ཚེས་བཅུ་སོགས་ཀྱི་སྐབས་ཚོགས་མཆོད་བྱེད་པར་སྤྲོ་ན་ཕྲིན་ལས་རྒྱས་འབྲིང་གང་རིགས་སོར་བཞག་བགྱིས་པས་འཐུས། བསྙེན་སྒྲུབས་བྱེད་ན། །ཇི་སྐད་བཤད་པའི་རྣལ་འབྱོར་ཐུན་བཞིའི་རིམ་པས་དུས་བསྙེན་ཟླ་བ་གསུམ་སོགས་དང་། གྲངས་བསྙེན་རྩ་བའི་བསྙེན་སྔགས་འབུམ་ཕྲག་བཞི་སྒྲུབ་པའི་སྔགས་འབུམ་ཕྲག་རེ་རེ། ལས་སྦྱོར་ཁྲི་ཕྲག་བཞི་བཟླ། མཚན་མའི་བསྙེན་པ་ནི། གཞུང་ལས་དངོས་སུ་ཟས་ནོར་བུད་མེད་འདུ་བ་དང་༔ འོད་དམར་འཁྱུག་ཅིང་ཆོག་བཙན་གཟི་བྱིན་འབར༔ རྨི་ལམ་ཉི་ཟླ་ཞོན་དང་གླིང་བཞི་བསྐོར༔ རྒྱ་མཚོ་འཐུང་དང་རྒྱལ་པོར་དབང་སྐུར་ཐོབ༔ དེ་སོགས་རབ་འབྱམས་དབང་གི་ལས་འགྲུབ་པའི༔ རྟགས་མཚན་མཐོང་ན་དངོས་གྲུབ་བླང་བར་བྱ༔ ཞེས་གསུངས་པ་ལྟར་རྟགས་མཐོང་བའི་བར་དུ་བརྩོན་པར་བྱ་བ་ཡིན་ཅིང་། གང་ལྟར་ཡང་མཐར་དངོས་གྲུབ་བླང་ཞིང་ཚོགས་ཀྱི་མཆོད་པ་སོགས་གསང་བ་སྤྱིའི་ལུགས་བཞིན་བྱ། དེ་ལྟ་བུའི་བསྙེན་སྒྲུབ་སྔོན་དུ་སོང་ནས་རྩ་བ་དང་། ཡན་ལག་དང་ཕྲ་མོའི་ལས་སྦྱོར་རྣམ་པ་བཅོ་ལྔ་ལ་བརྟེན་ནས་རབ་འབྱམས་དབང་གི་ཕྲིན་ལས་སྒྲུབ་པའི་ཚུལ་ཞལ་གདམས་སྙིང་བྱང་ལ་མན་ངག་ཕྱག་བཞེས་ཀྱི་བརྒྱན་ཏེ་རང་གཞན་གྱི་ཕན་བདེ་སྤེལ་བའི་ཐབས་ལ་བརྩོན་པར་བྱའོ། །ཞེས་པའང་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་གཏེར་གཞུང་རྩ་བ་གྲུབ་པའི་མན་ངག་གིས་བྱེ་བའི་རྗེས་སུ་འབྲངས་ཏེ་བཀླག་པས་གྲུབ་པར་བསྡེབས་པའི་དགེ་བས་བརྟན་གཡོ་སྲིད་ཞིའི་ལེགས་ཚོགས་ཐམས་ཅད་འདོད་རྒུར་འདུ་བའི་རྒྱུར་གྱུར་ཅིག། །།སརྦ་དཱ་ཤྲཱེ་ཡོ་བྷ་བ་ཏུ།། །།

[edit]

gu ru rgyal ba'i gdung 'dzin gyi phrin las khams gsum dbang sdud/ @#/__/bla ma'i thugs sgrub bar chad kun sel las/__gu ru rgyal ba'i gdung 'dzin gyi phrin las snying po khrigs su bsdebs pa khams gsum dbang sdud ces bya ba bzhugs so//__// na mo gu ru pad+ma rA dzA ya/__'dir srid zhi'i phun sum tshogs pa'i dge mtshan mtha' dag rig sngags kyi sbyor bas dbang du bya ba'i slad du/__zab mo thugs kyi sgrub pa'i cha lags gu ru rgyal ba'i gdung 'dzin pad+ma rgyal po'i sgom bzlas kyi rnal 'byor nyams su bstar ba'i tshul la gsum/__sngon 'gro/__dngos gzhi/__rjes so/_/dang po ni/__skyabs yul gsal btab la/__na mo:__bdag dang mkha' mnyam sems can ma lus kun:__skyabs kyi mchog gyur rnams la skyabs su mchi:__smon dang 'jugs pa'i byang chub sems bskyed nas:__sku gsum bla ma'i go 'phang bsgrub par bgyi:__zhes lan gsum gyis skyabs sems bya/__rang nyid rta mchog he ru ka'i nga rgyal dang bcas te/__hU~M hrIH__gnyis snang 'khrul pa'i gdon bgegs 'byung po kun:__gnas 'dir ma 'dug rang rang gnas su dengs:__gnyis med ye shes lha sngags chos sku'i ngang :__mtshams kyi dkyil 'khor rang bzhin lhun gyis grub:__hU~M hU~M hU~M badz+ra rak+Sha rak+Sha b+h+rU~M:__zhes bgegs la bka' bsgo zhing mtshams bcad/__oM AHhU~M:__sku gsum bla ma'i lha tshogs dbyings nas bzhengs:__gnas 'dir byin phob dbang dang dngos grub stsol:__snang srid gzhir bzhengs mchod pa'i phyag rgya che:__kun bzang rnam 'phrul rgya mtshor byin gyis rlobs:__oM AHhU~M badz+ra gu ru d+he ba d+hA ki nI dz+nyA na a be sha ya a AH__hU~M hU~M hU~M:__oM sarba pU dza me g+ha AHhU~M:__zhes ye shes kyi gzi byin dbab cing gnas dang mchod pa'i yo byad byin gyis rlabs/__/gnyis pa dngos gzhi lha bsgom pa yan lag dang bcas pa ni/__hrIH__chos sku de bzhin nyid dbyings 'od gsal ngang :__longs sku 'gags med kun snang snying rje'i rtsal:__sprul sku rgyu yi ting 'dzin hrIHdmar po:__de las 'od 'phros snod bcud dngos 'dzin sbyangs:__'byung ba rim brtsegs rdo rje'i srung 'khor dbus:__b+h+rU~M las rin chen gzhal yas mtshan nyid rdzogs:__lte bar seng khri pad+ma nyi zla'i steng :__rang rig bde gshegs kun 'dus pad+ma 'byung :__gu ru rgyal ba'i gdung 'dzin 'gro ba'i mgon:__dkar dmar zhal gdangs mche gtsigs gyen la gzigs:__g.yas pa'i phyag rgyas ral gri 'bar ba dang :__g.yon pas 'gugs pa'i rang bzhin lcags kyu bsnams:__thod skam dbu rgyan stag sham rus brgyan 'phyang :__dbang drag brtul zhugs spyod pa'i sku ru gsal:__de yi phyi rol pad+ma 'dab bzhi la:__shar du rdo rje mkha' 'gro sku mdog mthing :__lha rnams dbang sdud rdo rje lcags kyu bsnams:__lho ru rin chen mkha' 'gro sku mdog ser:__longs spyod dbang sdud rin chen zhags pa bsnams:__nub tu pad+ma mkha' 'gro sku mdog dmar:__klu rnams dbang sdud pad+ma lcags sgrog bsnams:__byang du las kyi mkha' 'gro sku mdog ljang :__mi rnams dbang sdud rgya gram dril bu bsnams:__dar dang rin chen pad+ma'i phreng bas brgyan:__zhabs zung brkyang bskum gar gyi rol pas bzhengs:__sgo bzhir 'jig rten kun la dbang mdzad pa'i:__mthu chen rgyal po chen po sde bzhi bcas:__kun kyang shin tu chags shing sgeg pa'i nyams:__snang srid thams cad g.yo zhing sdud mdzad pa'i:__'od dmar 'ja' tshon 'khrugs pa'i klong na gsal:__snang stong zung 'jug ye shes sgyu ma'i sku:__rdo rje gsum gyi ngo bor lhun grub cing :__ye shes rigs lnga'i dbang mchog rdzogs par gyur:__oM AHhU~M:__oM hU~M trA~M hrIHAH__a b+hi Shiny+tsa hU~M:__hU~M hrIH__yul gyi ming ni lho nub rnga yab gling :__sprul pa'i zhing mchog pad+ma drwa ba nas:__sku gsum dbyer med o rgyan pad+ma'i rgyal:__rab 'byams rtsa gsum rgya mtsho'i 'khor dang bcas:__mos pa'i gnas 'dir gdung bas spyan 'dren na:__thugs rjes thugs dam dbang gis gshegs nas kyang :__bar chad kun sel mchog thun dngos grub stsol:__oM AHhU~M badz+ra gu ru pad+ma thod phreng rtsal badz+ra sa ma ya dzaHsid+d+hi pha la hU~M AH__dzaHhU~M ba~M hoH__sa ma ya tiSh+Tha lhan:__hU~M hrIH__skye 'gags 'gyur med phrin las thams cad rdzogs:__rang byung thugs rjes 'gro ba ma lus sgrol:__yid bzhin nor lhar dngos grub char 'bebs pa'i:__rig 'dzin 'dus pa'i tshogs la phyag 'tshal lo:__a ti pU hoH__pra tI ts+tsha hoH__oM AHhU~M phyi mchod 'dod yon rgya mtsho sprin ltar gtibs:__nang mchod sman raka gtor tshogs bsam mi khyab:__gsang mchod bde stong zung 'jug ye shes dbyings:__'bul lo bzhes nas mchog thun dngos grub stsol:__oM badz+ra ar+g+haM pAd+yaM puSh+pe d+hU pe A lo ke gan+d+hai bid+yA shab+da pany+tsa rak+ta pa liM ta ma hA pU dza AHhU~M:__hrIH__rgyal ba'i gdung 'tshob rig 'dzin pad+ma'i rgyal:__snang srid dbang sdud d+hA kI'i sprin phung 'phro:__bde chen ye shes 'bar ba'i gzi byin gyis:__srid gsum dbang du mdzad la phyag 'tshal bstod:__ces mchod cing bstod pa dang bcas pa'i mthar/__sku'i gsal snang la rtse gcig tu sems bzung zhing zin pa na/__sngags bzla ba ni/__b+h+rU~M bi shwa bi shud+d+he hrI pha?T dza:__bdag nyid rtsa ba'i dkyil 'khor las:__ye shes dkyil 'khor gnyis pa bye:__mdun gyi nam mkhar bzhugs pa yi:__gnyis ka'i thugs srog yi ge'i mthar:__sngags phreng sgrar bcas 'khor ba las:__'od zer dpag yas 'phro bar gyur:__ces dzapa? khang dbye/__gu ru rgyal ba'i gdung 'dzin dbyings nas bzhengs:__thugs dam gnad nas bskul lo dzapa? sgra sgrogs:__snang stong sku yi phyag rgyas stong gsum gang :__grags stong gsung gi dzapra dbyangs 'brug ltar ldir:__rig stong thugs klong 'od gsal ngang du gnas:__lha rnams thams cad bde ba'i gar gyis rol:__sngags rnams rtsol med rdo rje'i glu yis bskul:__thugs ni sgrol mdzad ye shes srog dang bcas:__ma gsal bar du bskyed cing bzlas par 'bad:__ma grub bar du dgongs pa mi gtong gsol:__ma g.yel thugs dam chen po'i dus la babs:__bsnyen bsgrub rnam bzhi stan thog 'di nyid du:__mthar phyin dkyil 'khor bdag por 'grub par mdzod:__ces dzapa? gyi phrin las la bskul ba sngon du 'gro bas/__hU~M__rig 'dzin rgyal ba'i gdung 'tshob thugs ka ru:__zla steng hrIHmthar sngags kyi phreng bas bskor:__'od 'phros srid zhi'i phun tshogs thams cad kun:__bkra shis rdzas rtags rgyal srid rnam bdun dang :__lnga ldan 'ja' zer thig le'i rnam par bsdus:__bdag la thim pas gzi byin mchog tu 'bar:__'khor 'das kun gyi dbang phyug chen por gyur:__ces pa'i dmigs gnad rtse gcig pas bzla bya rtsa ba'i bsnyen sngags/__oM AHhU~M badz+ra gu ru pad+ma rA dza a nr-i tri dzaHdzaHsarba sid+d+hi pha la hU~M:__zhes gtso bor bzla ba bsnyen pa dang /__sgrub pa'i dmigs pa ni/__rang gi thugs nas 'phros pa'i 'od zer gyis:__'khor gyi mkha' 'gro rigs bzhi'i thugs rgyud bskul:__de las sprul pa'i cho 'phrul bsam yas 'phros:__lha klu mi yi skye 'gro thams cad dang :__tshe dpal longs spyod brtan g.yo'i dwangs bcud kun:__'od dmar bde chen ngo bor mer gyis bsdus:__bdag la thim pas gzi byin cher 'bar gyur:__ces brjod cing bsam la hA badz+ra d+hA ki nI sarba d+he ba pA shaM ku ru dzaH__ri rat+na d+hA ki nI sarba bA su pA sham ku ru hU~M:__ni pad+ma d+hA ki nI sarba nA ga pA sham ku ru baMH__sa karma d+hA kI nI sarba nr-i pA sham ku ru hoH__zhes ci nus dang /__spyi dril las sbyor gyi sngags/__ha ri ni sa d+hA ki nI tsit+ta hrIM hrIM dzaH dzaHsarba a nr-i tri ba su sid+d+hi dzaHhU~M ba~M hoH__zhes pa'ang cung zad bzla/__gsum pa rjes ni/__dbyangs gsal rten snying gi sngags kyi lhag chad kha skong zhing byin rlabs kyi rgyun brtan par bya/__mchod cing bstod la/__hU~M hrIH__snying po byang chub sems kyi dkyil 'khor du:__ye shes sgyu mar rol pa'i lha tshogs rnams:__mi 'da' rdo rje'i dam tshig rjes dgongs la:__byin rlabs dbang dang dngos grub stsal du gsol:__zhes dang rtsa sngags kyi mthar/__kA ya wA ka tsit+ta dz+nyA na karma sarba sid+d+hi pha la hoH__zhes rgyun gyi dngos grub blang /__yi ge brgya pa lan gsum gyi mthar/__dzaHhU~M ba~M hoH__mdun gyi ye shes pa rang la thim pas gsal brtan gyi gzi byin mchog tu 'bar bar gyur/__ces brjod cing bsam la/__de kho na nyid kyi ting nge 'dzin la mnyam par 'jog pa ni/__hU~M hU~M hU~M/__snang srid snod bcud thams cad 'od dmar po bde ba chen po'i ngo bor zhu nas rang la thim/__rang nyid thugs srog hrIHla thim/__hrIH'ang mi dmigs pa 'od gsal stong pa nyid kyi ngang du gyur par bsam la rig stong 'dzin med kyi ngang du bzhag__/spro zhing nus na rlung bum pa can gyi sbyor bas brtan par bya ba ni rdzogs rims brten pa'i dbang gi las sbyor mthar thug pa'o/__/de las ldang ba na/__phaT phaT phaT:__slar yang rang dang snang ba thams cad rig 'dzin pad+ma rgyal po'i lha sngags ye shes rnams pa thams cad pa'i 'khor lor bzhengs par gyur/__hoH__rig 'dzin bla ma'i dkyil 'khor bsgrubs pa'i mthus:__bdag dang mtha' yas sems can ma lus kun:__phrin las rnam bzhi lhun gyis grub pa dang :__'od gsal chos sku'i dbyings su grol bar shog:__rtsa brgyud bla ma'i byin rlabs snying la zhugs:__yi dam mkha' 'gro lus dang grib bzhin 'grogs:__chos skyong srung mas bar chad kun bsal nas:__mchog thun dngos grub 'grub pa'i bkra shis shog:__ces bsngo smon shis brjod kyis mtshams sbyar te spyod lam la 'jug rgyun gyi rnal 'byor la 'di tsam gyis don grub cing /__thun 'tshams su gtor ma 'bul bar 'dod na/__gzhung las/__rin chen snod du phye gtsang la:__sha chang la du lan tshwa dang :__rin chen 'bru sman sbyar ba yi:__gtor ma nor bu 'bar ba'i dbyings:__zhes gsungs pa ltar rgyan spros gang mdzes su bzhengs pa'am/__ci 'byor pa'i zas sna la dmigs te/__ra~M ya~M kha~M/__b+h+rU~M las rin chen snod nang du:__khams gsum brtan g.yo'i dwangs bcud kun:__ma lus 'dus pa'i ngo bo nyid:__gtor ma bdud rtsi'i rgya mtshor gyur:__oM AHhU~M:__zhes lan mang du brjod pas byin gyis brlab/__lha rnams kyi ljags rdo rje'i spu gu can gyi 'od zer gyis gtor ma'i bcud drangs te gsol bas dgyes shing tshim par bsam la/__oM AHhU~M badz+ra gu ru pad+ma rA dza a nr-i tri dzaHdzaHsarba sid+d+hi pha la hU~M:__d+hU ki ni ha ri ni sa sa pa ri wA ra sarba lo ka ba ling+ta pU dza ho:__sarba sid+d+hi rat+na hrIM dzaH__zhes lan bdun gyi phul/__mchod cing bstod la/__hoH__'khor 'das dbang bskur pad+ma rgyal po dang :__rigs bzhi'i mkha' 'gro sprul 'khor bcas pa rnams:__khams gsum dwangs bcud gtor ma 'di gsol la:__rab 'byams dbang gi dngos grub stsal du gsol:__ces phrin las gsol/__'di nyid bzlas pa'i mjug tu mdun du phyes pa'i ye shes kyi dkyil 'khor la phul nas phrin las gsol ba'i mthar yi ge brgya pa brjod cing dzapa? khang bsdu ba'am/__yang na dzapa? khang bsdus zin nas gtor mgron skad cig gis spyan drangs te phul na'ang rung ngo /__/tshes bcu sogs kyi skabs tshogs mchod byed par spro na phrin las rgyas 'bring gang rigs sor bzhag bgyis pas 'thus/__bsnyen sgrubs byed na/__/ji skad bshad pa'i rnal 'byor thun bzhi'i rim pas dus bsnyen zla ba gsum sogs dang /__grangs bsnyen rtsa ba'i bsnyen sngags 'bum phrag bzhi sgrub pa'i sngags 'bum phrag re re/__las sbyor khri phrag bzhi bzla/__mtshan ma'i bsnyen pa ni/__gzhung las dngos su zas nor bud med 'du ba dang :__'od dmar 'khyug cing chog btsan gzi byin 'bar:__rmi lam nyi zla zhon dang gling bzhi bskor:__rgya mtsho 'thung dang rgyal por dbang skur thob:__de sogs rab 'byams dbang gi las 'grub pa'i:__rtags mtshan mthong na dngos grub blang bar bya:__zhes gsungs pa ltar rtags mthong ba'i bar du brtson par bya ba yin cing /__gang ltar yang mthar dngos grub blang zhing tshogs kyi mchod pa sogs gsang ba spyi'i lugs bzhin bya/__de lta bu'i bsnyen sgrub sngon du song nas rtsa ba dang /__yan lag dang phra mo'i las sbyor rnam pa bco lnga la brten nas rab 'byams dbang gi phrin las sgrub pa'i tshul zhal gdams snying byang la man ngag phyag bzhes kyi brgyan te rang gzhan gyi phan bde spel ba'i thabs la brtson par bya'o/__/zhes pa'ang mtsho skyes bla ma dgyes pa'i 'bangs mkhyen brtse'i dbang pos gter gzhung rtsa ba grub pa'i man ngag gis bye ba'i rjes su 'brangs te bklag pas grub par bsdebs pa'i dge bas brtan g.yo srid zhi'i legs tshogs thams cad 'dod rgur 'du ba'i rgyur gyur cig/__//sarba dA shrA+e yo b+ha ba tu//____//