JKW-KABUM-14-PHA-018

🚧 This website is under continued development. We appreciate your patience!

Previous Section Back to Volume PageNext Section

Wylie title	'phags pa dzam+b+ha la ser po'i bsnyen sgrub kyi cho ga 'dod 'jo'i snying po
Location	mkhyen brtse'i bka' 'bum Volume 14, sde tshan 18, Pages 299-307 (Folios 1a to 5a4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	ཀློང་གསལ་སྙིང་པོ་ (klong gsal snying po)
Citation	'jam dbyangs mkhyen brtse'i dbang po. 'phags pa dzam+b+ha la ser po'i bsnyen sgrub kyi cho ga 'dod 'jo'i snying po. In 'jam dbyangs mkhyen brtse'i dbang po'i bka' 'bum, Vol. 14: 299-307. Khams sde dge rdzong sar dgon: Rdzong sar blo gros phun tshogs, 2020.
Genre	Activity Manual - las byang  ·  Recitation Manual - bsnyen yig  ·  Sadhanas - Evocation Ritual - sgrub thabs
Cycle	ཀློང་གསལ་རྡོ་རྗེ་སྙིང་པོ་ (klong gsal rdo rje snying po)
Deity	dzaM ser
RTZ	In the Rinchen Terdzö: https://rtz.tsadra.org/index.php/Terdzo-WI-054
Colophon	།ཞེས་པའང་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་གཏེར་གཞུང་རྩ་བའི་དགོངས་དོན་ཉུང་གསལ་བཀླགས་པས་གྲུབ་དང་པ་བསྡེབས་པ་དགེ་ལེགས་ཀྱི་འབྱོར་བས་འཇིག་རྟེན་གསུམ་དུ་ཁྱབ་པའི་རྒྱུར་གྱུར་ཅིག
	zhes pa'ang mtsho skyes bla ma dgyes pa'i 'bangs mkhyen brtse'i dbang pos gter gzhung rtsa ba'i dgongs don nyung gsal bklags pas grub dang pa bsdebs pa dge legs kyi 'byor bas 'jig rten gsum du khyab pa'i rgyur gyur cig

1 Texts in this Section (sde tshan or chos tshan)

299-307	འཕགས་པ་ཛམྦྷ་ལ་སེར་པོའི་བསྙེན་སྒྲུབ་ཀྱི་ཆོ་ག་འདོད་འཇོའི་སྙིང་པོ། 'phags pa dzam+b+ha la ser po'i bsnyen sgrub kyi cho ga 'dod 'jo'i snying po Activity Manual - las byang   ·   Recitation Manual - bsnyen yig   ·   Sadhanas - Evocation Ritual - sgrub thabs	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །འཕགས་པ་ཛམྦྷ་ལ་སེར་པོའི་བསྙེན་སྒྲུབ་ཀྱི་ཆོ་ག་འདོད་འཇོའི་སྙིང་པོ་ཞེས་བྱ་བ་བཞུགས་སོ།། །།

ན་མོ་གུ་རུ་ཤྲཱི་ཛམྦྷ་ལཱ་ཡ། འདིར་རིག་འཛིན་གྲུབ་པའི་འཁོར་ལོས་སྒྱུར་བ་གཏེར་ཆེན་ཀློང་གསལ་སྙིང་པོའི་ཟབ་གཏེར་རྩ་གསུམ་རྡོ་རྗེ་སྙིང་པོའི་ཆོས་སྡེ། འཕགས་པ་ཛམྦྷ་ལ་སེར་པོའི་རྣལ་འབྱོར་ལ་བརྟེན་ནས་འདོད་རྒུའི་འབྱོར་བ་ཡིད་བཞིན་དུ་འཇོ་བར་བྱེད་པའི་སྙིང་པོའི་བསྙེན་སྒྲུབ་ཉམས་སུ་བླང་བའི་ཚུལ་ལ་གཉིས། བསྙེན་པ་དང་། སྒྲུབ་པའོ། །དང་པོ་ནི། འདིའི་དབང་ཐོབ་ཅིང་དམ་ཚིག་ལ་གནས་པའི་སྔགས་པས་ཁྲུས་དང་གཙང་སྦྲ་དང་བཅས་གོས་དང་རྒྱན་བཟང་པོས་བརྒྱན་ལ་གནས་དབེན་པར་སྟན་བདེ་བ་ལ་འདུག་སྟེ། སྐྱབས་ཡུལ་གསལ་བཏབ་ལ་སྐྱབས་སུ་འགྲོ་བ་ནི། ན་མོ། རྐང་གཉིས་གཙོ་བོ་མཚན་དང་དཔེ་བྱད་ལྡན༔ འདོད་ཆགས་བྲལ་བ་ཞི་གྱུར་དམ་པའི་ཆོས༔ ཚོགས་ཀྱི་མཆོག་གྱུར་འཕགས་པའི་དགེ་འདུན་ལ༔ བདག་ནི་གུས་པས་ཕྱག་འཚལ་སྐྱབས་སུ་མཆི༔ ལན་གསུམ། སེམས་བསྐྱེད་པ་ནི། མ་གྱུར་འགྲོ་བ་མཁའ་ཁྱབ་སེམས་ཅན་རྣམས༔ དབུལ་ཞིང་ཕོངས་པའི་རྒུད་པ་ཞི་བ་དང་༔ འདོད་རྒུའི་འབྱོར་པ་ཡོངས་སུ་རྒྱས་པའི་ཕྱིར༔ བདག་ནི་ཛམ་ལ་བསྒྲུབ་པར་སེམས་བསྐྱེད་དོ༔ བགེགས་ལ་བཀའ་བསྒོ་བ་ནི། ཧཱུྃ་ཧཱུྃ་ཧཱུྃ༔ ང་ནི་དབང་ཆེན་ཁྲོས་པའི་སྐུ༔ ཁམས་གསུམ་འདི་ན་སུ་ཡང་རུང་༔ གསང་སྔགས་བལྟ་བར་མི་དབང་བའི༔ ལོག་པར་བལྟ་བ་ཕྱིར་དེངས་ཤིག༔ ཧཱུྃ་ཧཱུྃ་ཧཱུྃ་དང་། སུམྦྷ་སོགས་བརྗོད། མཚམས་བཅད་པ་ནི། ཧཱུྃ༔ ཕྱི་སྣོད་གཞལ་ཡས་ནང་བཅུད་ལྷ༔ ཐབས་ཤེས་ཉི་ཟླའི་གའུ་དང་༔ ཕྱི་རོལ་མཚོན་ཆ་མེ་རིའི་གུར༔ སྲུང་བའི་ཚོགས་ཁང་ལྷུན་གྱིས་གྲུབ༔ ཨོཾ་བཛྲ་རཀྵ་རཀྵ་ཧཱུྃ༔ བདག་བསྐྱེད་ནི། པད་ཉིའི་སྟེང་དུ་བདག་སྣང་ཛྃ་ཡིག་ལས༔ ཛམ་ལ་སེར་པོ་ཞལ་གསུམ་ཕྱག་དྲུག་པ༔ ཨུཏྤལ་རིན་ཆེན་འབྲུ་ཡི་རྒྱན་གྱིས་བརྒྱན༔ གཡས་གསུམ་མ་ཏུ་ལོ་ཀ་ལྕགས་ཀྱུ་མདའ༔ ཡུམ་འཁྱུད་ཞགས་པ་ནེའུ་ལེ་གཞུ་འཛིན་གཡོན༔ དར་སྣས་ལེགས་བརྒྱན་རལ་པའི་ཅོད་པན་ཅན༔ ཐུགས་ཀར་ཉི་སྟེང་ཛྃ་མཐར་སྔགས་ཀྱིས་བསྐོར༔ འཕྲོ་འདུ་འོད་ཟེར་ལྕགས་ཀྱུ་ལྟ་བུ་ཡིས༔ རྒྱལ་བའི་ཐུགས་རྗེ་བྱིན་རླབས་བསོད་ནམས་སྟོབས༔ རྒྱལ་པོའི་མངའ་ཐང་དཔལ་དང་འབྱོར་པ་བཀུག༔ པཎ་ཆེན་ཡོན་ཏན་སྙན་དང་གྲགས་པ་དང་༔ འཇིག་རྟེན་ཕོ་མོའི་དབང་ཐང་རླུང་རྟ་བཀུག༔ བདག་སྣང་ཛྃ་ཡིག་གཟི་མདངས་རྒྱས་པར་གྱུར༔ ཅེས་དམིགས་ལ། ཨོཾ་ཛམྦྷ་ལ་ཛ་ལེནྡྲཱ་ཡ་སྭཱ་ཧཱ༔ ཞེས་ཅི་ནུས་བཟླ། ཐུན་བསྡུ་བའི་ཚེ་འོག་ནས་འབྱུང་བ་ལྟར་བསྔོ་སྨོན་བཀྲ་ཤིས་བྱ། དེ་ལྟ་བུའི་རིམ་པས་སྔགས་འབུམ་ཕྲག་བཞི་སོགས་བཟླ་བ་ནི་བསྙེན་པའོ། །གཉིས་པ་ལ་གཉིས། དངོས་བསྟན་ཐོད་པ་ལ་བརྟེན་ནས་བསྒྲུབ་པ་དང་། ཞར་བྱུང་གཏེར་བུམ་གྱི་ཆོ་གའོ། །དང་པོ་ནི། ཕྱི་ནང་གི་མཚན་ཉིད་ལེགས་ཤིང་རྟེན་འབྲེལ་དགེ་བའི་དཔལ་ཅན་གྱི་ཐོད་པ་བཟང་པོ་དྲི་བཟང་པོའི་ཆུས་བཀྲུ། ནང་དུ་ག་བུར་དང་གུར་གུམ་སོགས་སྨན་སྣ་དྲི་ཞིམ་ཅན་བྱུགས་ཤིང་། རིན་པོ་ཆེ། འབྲུ། གོས་དར། ཤིང་ཏོག་སོགས་དཔལ་དང་གཡང་ཅན་གྱི་རྫས་སེལ་མེད་པས་ཕྱུར་བུར་བཀང་བའི་དབུས་སུ་འབྱོར་ན་ཛམྦྷ་ལའི་སྐུ་བྲིས་འབུར་གང་རིགས། མ་འབྱོར་ན་ཨ་རུ་གསེར་མདོག་ཟུར་མ་ཉམས་པ་དར་དམར་ལ་གསེར་གྱིས་བྲིས་པའི་སྔགས་བྱང་གིས་དྲིལ་བ་སྟེགས་བུའི་དབུས་སུ་མེ་ཏོག་སིལ་མར་བཀྲམ་པ་ལ་བཞག །དེའི་མདུན་དུ་གཏོར་མ་རིན་ཆེན་འབར་བའི་དབྱིབས་ཅན་ཁ་ཟས་བཟང་རྒུས་བསྐོར་བ་དང་། མཆོད་པའི་བྱེ་བྲག་བཀོད་པས་མཛེས་པར་བཤམ། མཚམས་དམ་པར་བཅད། སྐྱབས་སེམས་ནས་བཟུང་བཟླས་པའི་བར་གོང་ལྟར་སོང་ནས་མཆོད་གཏོར་རྃ་ཡྃ་ཁྃ་གྱིས་བསང་སྦྱང་། སྟོང་པའི་ངང་ལས་ལྷ་རྫས་དང་ཏིང་ངེ་འཛིན་ལས་གྲུབ་པའི་མཆོད་གཏོར་ནམ་མཁའ་མཛོད་ཀྱི་འཁོར་ལོའི་སྤྲིན་ཆེན་པོར་གྱུར་པར་བསམས་ལ། ན་མ་སྶརྦ་ཏ་ཐཱ་ག་ཏ་བྷྱོ་བི་ཤྭ་སོགས་ཀྱི་སྔགས་རྒྱས་བརླབ། བཛྲ་སྥ་ར་ཎ་ཁྃ་གིས་རྒྱས་པར་སྤེལ། མདུན་གྱི་རྟེན་ཨ་མྲྀ་ཏས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་རིན་ཆེན་ཀ་པཱ་ལ། །ཡངས་ཤིང་རྒྱ་ཆེ་མཚན་ཉིད་ཕུན་སུམ་ཚོགས། །སྲིད་དང་ཞི་བའི་འདོད་རྒུའི་འབྱོར་པའི་སྤྲིན། །ནམ་མཁའ་མཛོད་ཀྱི་འཁོར་ལོར་འཆར་བའི་དབུས། །པད་ཉིའི་སྟེང་དུ་ཛྃ་ཡིག་གསེར་མདོག་ལས། །ཛྃ་ལ་སེར་པོ་ཞལ་གསུམ་ཕྱག་དྲུག་པ༔ ཨུཏྤལ་རིན་ཆེན་འབྲུ་ཡི་རྒྱན་གྱིས་བརྒྱན༔ གཡས་གསུམ་མ་ཏུ་ལོ་ཀ་ལྕགས་ཀྱུ་མདའ༔ ཡུལ་འཁྱུད་ཞགས་པ་ནེའུ་ལེ་གཞུ་འཛིན་གཡོན༔ དར་སྣས་ལེགས་བརྒྱན་རལ་པའི་ཅོད་པན་ཅན༔ ཐུགས་ཀར་ཉི་སྟེང་ཛྃ་མཐར་སྔགས་ཀྱིས་བསྐོར༔ དེ་ལས་འོད་འཕྲོས་ཡེ་ཤེས་སྤྱན་དྲངས་གྱུར༔ སྤྱན་འདྲེན་པ་ནི། ཛཿ རྒྱལ་བ་རྣམས་ཀྱི་ཕྲིན་ལས་བདག༔ འབྱོར་པ་བསྐྱེད་པའི་དཔལ་འབར་བ༔ རིན་འབྱུང་གནོད་སྦྱིན་ཚུལ་འཆང་བ༔ མགོན་པོ་འདིར་གཤེགས་གདན་ལ་བཞུགས༔ ས་མ་ཡ་ཛཿ བཞུགས་གསོལ་ཕྱག་འཚལ་ནི། ལྷུན་གྲུབ་འདོད་དགུའི་རྟེན་མཆོག་ལ༔ བཞུགས་ནས་འབྲས་བུ་མཆིས་པར་མཛོད༔ མོས་གུས་དད་པས་ཕྱག་བགྱི་ན༔ རྟག་ཏུ་མི་འབྲལ་གྲོགས་མཛོད་ཅིག༔ མཆོད་པ་འབུལ་བ་ནི། ཛྃཿ མཆོད་ཡོན་བདུན་དང་རྒྱལ་སྲིད་བཀྲ་ཤིས་བརྒྱད༔ ཀུན་བཟང་རྣམ་ཐར་སྤྲིན་གྱི་ཕུང་པོ་འདི༔ འཕགས་པ་ཐུགས་རྗེའི་རང་བཞིན་ཅན་ལ་འབུལ༔ བཞེས་ནས་འགྲོ་ཀུན་ཚོགས་གཉིས་རྫོགས་གྱུར་ཅིག༔ ཨོཾ་ཛམྦྷ་ལ་ས་པ་རི་ཝཱ་ར་བཛྲ་ཨརྒྷཾ། པཱ་དྱཾ། པུཥྤེ། དྷཱུ་པེ། ཨཱ་ལོ་ཀེ གནྡྷེ། ནཻ་ཝི་དྱེ། ཤབྡ། རཱུ་པ། ཤབྡ། གནྡྷེ། རཱ་ས། སྤཪྴེ་ཨཱཿཧཱུྃ་སྭཱ་ཧཱ། ཞེས་དང་། ནམ་མཁའ་མཛོད་ཀྱི་སྔགས་རྒྱས་འབུལ། བསྟོད་པ་ནི། ཛྃ༔ སྐྱེ་མེད་ཆོས་ཀྱི་དབྱིངས་ལས་བཅོམ་ལྡན་འདས༔ གང་འདུལ་མཛད་པས་སྐྱོད་པའི་ཛམྦྷ་ལ༔ རྒྱལ་བའི་མཛད་པ་འགྲོ་ལ་རྟག་སྐྱོང་བའི༔ གནོད་སྦྱིན་ནོར་བདག་གཙོ་ལ་ཕྱག་འཚལ་བསྟོད༔ བཟླས་པ་བྱ་བ་ནི། རང་གི་ཐུགས་ནས་འཕྲོས་པའི་འོད་ཟེར་གྱིས༔ མདུན་བསྐྱེད་གནོད་སྦྱིན་དབང་པོའི་ཐུགས་རྒྱུད་བསྐུལ༔ དེ་ཡི་ཐུགས་ཀའི་ས་བོན་སྔགས་ཕྲེང་ལས༔ འཕྲོ་འདུ་འོད་ཟེར་ལྕགས་ཀྱུ་ལྟ་བུ་ཡིས༔ རྒྱལ་བའི་ཐུགས་རྗེ་བྱིན་རླབས་བསོད་ནམས་སྟོབས༔ རྒྱལ་པོའི་མངའ་ཐང་དཔལ་དང་འབྱོར་པ་བཀུག༔ པཎ་ཆེན་ཡོན་ཏན་སྙན་དང་གྲགས་པ་དང་༔ འཇིག་རྟེན་ཕོ་མོའི་དབང་ཐང་རླུང་རྟ་བཀུག༔ བདག་སྣང་ཛྃ་ཡིག་གཟི་མདངས་རྒྱས་པར་གྱུར༔ ཅེས་གསལ་བཏབ་ལ། ཨོཾ་ཛམྦྷ་ལ་ཛ་ལེནྡྲཱ་ཡ་སྭཱ་ཧཱ༔ ཞེས་རྟགས་མཐོང་བའི་བར་དུ་བཟླ། རྟགས་ནི་གཞུང་ལས། དངོས་ཉམས་རྨི་ལམ་དུ་ཞལ་མཇལ༔ གསུང་ཐོས༔ འབྲུ་དང་རིན་པོ་ཆེའི་གཏེར་རྙེད༔ ལོ་ཏོག་དང་རྩྭ་དང་འབྲས་བུ་ལེགས་པ༔ དར་ཕྱར་དུང་འབུད་པ༔ རོལ་མོ་སྒྲོགས་པ་ཁྲོམ་འདུ་བ་སོགས་དངོས་གྲུབ་ཀྱི་ལྟས་སྤྱི་དང་མཐུན་པ་འབྱུང་ངོ་༔ ཞེས་གསུངས། ཐུན་བསྡུ་བ་ན་ཡིག་བརྒྱ་དང་། དབྱངས་གསལ་རྟེན་སྙིང་བཟླས་པས་སྔགས་ཀྱི་ལྷག་ཆད་བསྐང་ཞིང་། ནུས་པ་སྤེལ། མཆོད་བསྟོད་གོང་ལྟར་དང་། ནོངས་བཤགས་ནི། མ་རྙེད་ཡོངས་སུ་མ་ཚང་དང་། །གཙོ་བོ་ནུས་པ་མ་མཆིས་པ། །འདིར་ནི་བགྱི་བ་གང་ནོངས་པ། །དེ་ཀུན་ཁྱོད་ཀྱིས་བཟོད་མཛད་རིགས། །ཞེས་དང་ཡི་གེ་བརྒྱ་པ་བརྗོད། བརྟན་བཞུགས་ནི། ཨོཾ། འདིར་ནི་རྟེན་དང་ལྷན་ཅིག་ཏུ། །འཁོར་བ་སྲིད་དུ་བཞུགས་ནས་ཀྱང་། །ནད་མེད་ཚེ་དང་དབང་ཕྱུག་དང་། །མཆོག་རྣམས་ལེགས་པར་སྩལ་དུ་གསོལ། །ཨོཾ་སུ་པྲ་ཏིཥྛ་བཛྲཱ་ཡ་སྭཱ་ཧཱ། ཞེས་མང་དུ་བརྗོད་ཅིང་མེ་ཏོག་འཐོར། བསྔོ་སྨོན་ནི། ཧྲཱིཿ སེམས་བསྐྱེད་དག་པའི་བསྙེན་སྒྲུབ་ཏིང་འཛིན་གྱིས༔ འབྲས་བུ་མཁའ་མཉམ་ཐར་བདེའི་ས་བོན་མཆོག༔ ཀུན་ཀྱང་རྡོ་རྗེ་འཛིན་པའི་ཆོས་སྤྱོད་ནས༔ དབྱེར་མེད་རང་གྲོལ་ཀུན་ཏུ་བཟང་པོར་ཤོག༔ བཀྲ་ཤིས་ནི། ཧྲཱིཿ དུས་གསུམ་ཕྱོགས་བཅུའི་སངས་རྒྱས་མཛད་པ་དང་༔ ཕྲིན་ལས་ནུས་མཐུ་བདེན་པའི་བྱིན་རླབས་ཀྱི༔ བཀྲ་ཤིས་མི་ཟད་ནམ་མཁའི་ཆར་རྒྱུན་གྱིས༔ ཁམས་གསུམ་སེམས་ཅན་ཀུན་ལ་བདེ་ལེགས་ཤོག༔ ཅེས་རྒྱ་ཆེར་བརྗོད་ཅིང་མེ་ཏོག་གི་ཆར་དབབ་བོ། །གཉིས་པ་ནི། རིན་པོ་ཆེའམ་རྫའི་བུམ་པ་གཙང་མ་ལི་ཁྲིའམ་ས་དཀར་གྱིས་བྱུགས། མདུན་རྟགས་ནོར་བུ་འབར་བ་བྲིས་པའི་ནང་དུ་རིན་ཆེན་འབྲུ་སྨན་དར་ཟབ་སོགས་དཔལ་ཅན་གྱི་རྫས་བཟང་པོས་ཕྱུར་བུར་གཏམས། དེའི་དབུས་སུ་ཛམྦྷ་ལའི་སྐུའམ། ཨ་རུ་ར་གསེར་མདོག་སྔགས་བྱང་གིས་དྲིལ་བ་བཅུག །དར་རས་དཀར་སེར་གང་རུང་གིས་ཁ་བཅད་ཅིང་ཚོན་སྐུད་སྣ་ལྔས་མགུལ་པ་དཀྲིས་པ་སྟེགས་བུའི་དབུས་སུ་བཞག །མཆོད་གཏོར་དང་། ཆོ་ག་གཞན་གོང་དང་འདྲ་བ་ལ། མདུན་བསྐྱེད་སྐབས། སྟོང་པའི་ངང་ལས་པད་ཟླའི་གདན་གྱི་སྟེང་། །བྷྲཱུྃ་ལས་བྱུང་བའི་གཏེར་གྱི་བུམ་པ་བཟང་། །རིན་ཆེན་ལས་གྲུབ་མཚན་ཉིད་ཕུན་སུམ་ཚོགས། །ཡངས་ཤིང་རྒྱ་ཆེ་འདོད་རྒུས་གཏམས་པའི་དབུས། །པད་ཉིའི་སྟེང་དུ་ཛྃ་ཡིག་སེར་པོ་ལས། །ཞེས་སོགས་གོང་བཞིན་སྦྲེལ་ལོ། །གལ་སྲིད་བཅའ་གཞི་དེ་དག་མ་གྲུབ་ན། སྒྲུབ་གཏོར་རིན་ཆེན་འབར་བའི་དབྱིབས་ཅན་གྱི་ནང་དུ་ཨ་རུ་ར་གསེར་མདོག་སྔགས་བྱང་གིས་དྲིལ་བ་བཅུག །དར་གདུགས་སེར་པོས་བརྒྱན། སྐུ་ཙཀ་ཡོད་ན་བཙུགས་པ་སྟེགས་བུའི་དབུས་སུ་བཤམ། དེའི་མདུན་དུ་འབུལ་གཏོར་དང་། མཆོད་པ་སོགས་འདྲ། མདུན་བསྐྱེད་སྐབས། སྟོང་པའི་ངང་ལས་རིན་ཆེན་གཞལ་མེད་ཁང་། །ཡངས་ཤིང་རྒྱ་ཆེ་སོགས་མན་ཐོད་སྒྲུབ་ཀྱི་སྐབས་ལྟར་སྦྲེལ་བས་གྲུབ་བོ། །དེ་ལྟ་བུའི་ཐོད་པ་དང་། གཏོར་མ་གང་ཡིན་ཀྱང་རུང་སྟེ། རྟགས་མཐོང་བའི་བར་དུ་རྩེ་གཅིག་གིས་བསྒྲུབས་ལ། རྟགས་མཚན་དགེ་བ་རྙེད་པའི་དུས་སུ་མཛོད་ཀྱི་ཕུག་སོགས་གནས་གཙང་ཞིང་དབེན་པར་བཀུར་སྟི་དང་བཅས་པས་བཞུགས་སུ་གསོལ། དུས་དུས་སུ་མཆོད་བསྟོད་གསོལ་གདབ་སོགས་བགྱིས་པས་ཡིད་བཞིན་གྱི་ནོར་བུ་རྒྱལ་མཚན་གྱི་རྩེ་མོར་མཆོད་པ་ལྟར་འདོད་རྒུའི་འབྱོར་པ་མཆོག་ཏུ་རྒྱས་པར་འགྱུར་བ་ནི་ངེས་པའོ། །ཞེས་པའང་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་གཏེར་གཞུང་རྩ་བའི་དགོངས་དོན་ཉུང་གསལ་བཀླགས་པས་གྲུབ་དང་པ་བསྡེབས་པ་དགེ་ལེགས་ཀྱི་འབྱོར་བས་འཇིག་རྟེན་གསུམ་དུ་ཁྱབ་པའི་རྒྱུར་གྱུར་ཅིག །

[edit]

klong gsal dzaM ser gyi bsnyen sgrub 'dod 'jo'i snying po/ @#/__/'phags pa dzam+b+ha la ser po'i bsnyen sgrub kyi cho ga 'dod 'jo'i snying po zhes bya ba bzhugs so//__// na mo gu ru shrI dzam+b+ha lA ya/__'dir rig 'dzin grub pa'i 'khor los sgyur ba gter chen klong gsal snying po'i zab gter rtsa gsum rdo rje snying po'i chos sde/__'phags pa dzam+b+ha la ser po'i rnal 'byor la brten nas 'dod rgu'i 'byor ba yid bzhin du 'jo bar byed pa'i snying po'i bsnyen sgrub nyams su blang ba'i tshul la gnyis/__bsnyen pa dang /__sgrub pa'o/__/dang po ni/__'di'i dbang thob cing dam tshig la gnas pa'i sngags pas khrus dang gtsang sbra dang bcas gos dang rgyan bzang pos brgyan la gnas dben par stan bde ba la 'dug ste/__skyabs yul gsal btab la skyabs su 'gro ba ni/__na mo/__rkang gnyis gtso bo mtshan dang dpe byad ldan:__'dod chags bral ba zhi gyur dam pa'i chos:__tshogs kyi mchog gyur 'phags pa'i dge 'dun la:__bdag ni gus pas phyag 'tshal skyabs su mchi:__lan gsum/__sems bskyed pa ni/__ma gyur 'gro ba mkha' khyab sems can rnams:__dbul zhing phongs pa'i rgud pa zhi ba dang :__'dod rgu'i 'byor pa yongs su rgyas pa'i phyir:__bdag ni dzam la bsgrub par sems bskyed do:__bgegs la bka' bsgo ba ni/__hU~M hU~M hU~M:__nga ni dbang chen khros pa'i sku:__khams gsum 'di na su yang rung :__gsang sngags blta bar mi dbang ba'i:__log par blta ba phyir dengs shig:__hU~M hU~M hU~M dang /__sum+b+ha sogs brjod/__mtshams bcad pa ni/__hU~M:__phyi snod gzhal yas nang bcud lha:__thabs shes nyi zla'i ga'u dang :__phyi rol mtshon cha me ri'i gur:__srung ba'i tshogs khang lhun gyis grub:__oM badz+ra rak+Sha rak+Sha hU~M:__bdag bskyed ni/__pad nyi'i steng du bdag snang dza~M yig las:__dzam la ser po zhal gsum phyag drug pa:__ut+pal rin chen 'bru yi rgyan gyis brgyan:__g.yas gsum ma tu lo ka lcags kyu mda':__yum 'khyud zhags pa ne'u le gzhu 'dzin g.yon:__dar snas legs brgyan ral pa'i cod pan can:__thugs kar nyi steng dza~M mthar sngags kyis bskor:__'phro 'du 'od zer lcags kyu lta bu yis:__rgyal ba'i thugs rje byin rlabs bsod nams stobs:__rgyal po'i mnga' thang dpal dang 'byor pa bkug:__paN chen yon tan snyan dang grags pa dang :__'jig rten pho mo'i dbang thang rlung rta bkug:__bdag snang dza~M yig gzi mdangs rgyas par gyur:__ces dmigs la/__oM dzam+b+ha la dza len+d+rA ya swA hA:__zhes ci nus bzla/__thun bsdu ba'i tshe 'og nas 'byung ba ltar bsngo smon bkra shis bya/__de lta bu'i rim pas sngags 'bum phrag bzhi sogs bzla ba ni bsnyen pa'o/__/gnyis pa la gnyis/__dngos bstan thod pa la brten nas bsgrub pa dang /__zhar byung gter bum gyi cho ga'o/__/dang po ni/__phyi nang gi mtshan nyid legs shing rten 'brel dge ba'i dpal can gyi thod pa bzang po dri bzang po'i chus bkru/__nang du ga bur dang gur gum sogs sman sna dri zhim can byugs shing /__rin po che/__'bru/__gos dar/__shing tog sogs dpal dang g.yang can gyi rdzas sel med pas phyur bur bkang ba'i dbus su 'byor na dzam+b+ha la'i sku bris 'bur gang rigs/__ma 'byor na a ru gser mdog zur ma nyams pa dar dmar la gser gyis bris pa'i sngags byang gis dril ba stegs bu'i dbus su me tog sil mar bkram pa la bzhag__/de'i mdun du gtor ma rin chen 'bar ba'i dbyibs can kha zas bzang rgus bskor ba dang /__mchod pa'i bye brag bkod pas mdzes par bsham/__mtshams dam par bcad/__skyabs sems nas bzung bzlas pa'i bar gong ltar song nas mchod gtor ra~M ya~M kha~M gyis bsang sbyang /__stong pa'i ngang las lha rdzas dang ting nge 'dzin las grub pa'i mchod gtor nam mkha' mdzod kyi 'khor lo'i sprin chen por gyur par bsams la/__na ma s+sarba ta thA ga ta b+h+yo bi shwa sogs kyi sngags rgyas brlab/__badz+ra s+pha ra Na kha~M gis rgyas par spel/__mdun gyi rten a mr-i tas bsang /__swa b+hA was sbyang /__stong pa'i ngang las rin chen ka pA la/__/yangs shing rgya che mtshan nyid phun sum tshogs/__/srid dang zhi ba'i 'dod rgu'i 'byor pa'i sprin/__/nam mkha' mdzod kyi 'khor lor 'char ba'i dbus/__/pad nyi'i steng du dza~M yig gser mdog las/__/dza~M la ser po zhal gsum phyag drug pa:__ut+pal rin chen 'bru yi rgyan gyis brgyan:__g.yas gsum ma tu lo ka lcags kyu mda':__yul 'khyud zhags pa ne'u le gzhu 'dzin g.yon:__dar snas legs brgyan ral pa'i cod pan can:__thugs kar nyi steng dza~M mthar sngags kyis bskor:__de las 'od 'phros ye shes spyan drangs gyur:__spyan 'dren pa ni/__dzaH__rgyal ba rnams kyi phrin las bdag:__'byor pa bskyed pa'i dpal 'bar ba:__rin 'byung gnod sbyin tshul 'chang ba:__mgon po 'dir gshegs gdan la bzhugs:__sa ma ya dzaH__bzhugs gsol phyag 'tshal ni/__lhun grub 'dod dgu'i rten mchog la:__bzhugs nas 'bras bu mchis par mdzod:__mos gus dad pas phyag bgyi na:__rtag tu mi 'bral grogs mdzod cig:__mchod pa 'bul ba ni/__dza~MH__mchod yon bdun dang rgyal srid bkra shis brgyad:__kun bzang rnam thar sprin gyi phung po 'di:__'phags pa thugs rje'i rang bzhin can la 'bul:__bzhes nas 'gro kun tshogs gnyis rdzogs gyur cig:__oM dzam+b+ha la sa pa ri wA ra badz+ra ar+g+haM/__pA d+yaM/__puSh+pe/__d+hU pe/__A lo ke__gan+d+he/__nai wi d+ye/__shab+da/__rU pa/__shab+da/__gan+d+he/__rA sa/__spaR+she AHhU~M swA hA/__zhes dang /__nam mkha' mdzod kyi sngags rgyas 'bul/__bstod pa ni/__dza~M:__skye med chos kyi dbyings las bcom ldan 'das:__gang 'dul mdzad pas skyod pa'i dzam+b+ha la:__rgyal ba'i mdzad pa 'gro la rtag skyong ba'i:__gnod sbyin nor bdag gtso la phyag 'tshal bstod:__bzlas pa bya ba ni/__rang gi thugs nas 'phros pa'i 'od zer gyis:__mdun bskyed gnod sbyin dbang po'i thugs rgyud bskul:__de yi thugs ka'i sa bon sngags phreng las:__'phro 'du 'od zer lcags kyu lta bu yis:__rgyal ba'i thugs rje byin rlabs bsod nams stobs:__rgyal po'i mnga' thang dpal dang 'byor pa bkug:__paN chen yon tan snyan dang grags pa dang :__'jig rten pho mo'i dbang thang rlung rta bkug:__bdag snang dza~M yig gzi mdangs rgyas par gyur:__ces gsal btab la/__oM dzam+b+ha la dza len+d+rA ya swA hA:__zhes rtags mthong ba'i bar du bzla/__rtags ni gzhung las/__dngos nyams rmi lam du zhal mjal:__gsung thos:__'bru dang rin po che'i gter rnyed:__lo tog dang rtswa dang 'bras bu legs pa:__dar phyar dung 'bud pa:__rol mo sgrogs pa khrom 'du ba sogs dngos grub kyi ltas spyi dang mthun pa 'byung ngo :__zhes gsungs/__thun bsdu ba na yig brgya dang /__dbyangs gsal rten snying bzlas pas sngags kyi lhag chad bskang zhing /__nus pa spel/__mchod bstod gong ltar dang /__nongs bshags ni/__ma rnyed yongs su ma tshang dang /__/gtso bo nus pa ma mchis pa/__/'dir ni bgyi ba gang nongs pa/__/de kun khyod kyis bzod mdzad rigs/__/zhes dang yi ge brgya pa brjod/__brtan bzhugs ni/__oM/__'dir ni rten dang lhan cig tu/__/'khor ba srid du bzhugs nas kyang /__/nad med tshe dang dbang phyug dang /__/mchog rnams legs par stsal du gsol/__/oM su pra tiSh+Tha badz+rA ya swA hA/__zhes mang du brjod cing me tog 'thor/__bsngo smon ni/__hrIH__sems bskyed dag pa'i bsnyen sgrub ting 'dzin gyis:__'bras bu mkha' mnyam thar bde'i sa bon mchog:__kun kyang rdo rje 'dzin pa'i chos spyod nas:__dbyer med rang grol kun tu bzang por shog:__bkra shis ni/__hrIH__dus gsum phyogs bcu'i sangs rgyas mdzad pa dang :__phrin las nus mthu bden pa'i byin rlabs kyi:__bkra shis mi zad nam mkha'i char rgyun gyis:__khams gsum sems can kun la bde legs shog:__ces rgya cher brjod cing me tog gi char dbab bo/__/gnyis pa ni/__rin po che'am rdza'i bum pa gtsang ma li khri'am sa dkar gyis byugs/__mdun rtags nor bu 'bar ba bris pa'i nang du rin chen 'bru sman dar zab sogs dpal can gyi rdzas bzang pos phyur bur gtams/__de'i dbus su dzam+b+ha la'i sku'am/__a ru ra gser mdog sngags byang gis dril ba bcug__/dar ras dkar ser gang rung gis kha bcad cing tshon skud sna lngas mgul pa dkris pa stegs bu'i dbus su bzhag__/mchod gtor dang /__cho ga gzhan gong dang 'dra ba la/__mdun bskyed skabs/__stong pa'i ngang las pad zla'i gdan gyi steng /__/b+h+rU~M las byung ba'i gter gyi bum pa bzang /__/rin chen las grub mtshan nyid phun sum tshogs/__/yangs shing rgya che 'dod rgus gtams pa'i dbus/__/pad nyi'i steng du dza~M yig ser po las/__/zhes sogs gong bzhin sbrel lo/__/gal srid bca' gzhi de dag ma grub na/__sgrub gtor rin chen 'bar ba'i dbyibs can gyi nang du a ru ra gser mdog sngags byang gis dril ba bcug__/dar gdugs ser pos brgyan/__sku tsaka yod na btsugs pa stegs bu'i dbus su bsham/__de'i mdun du 'bul gtor dang /__mchod pa sogs 'dra/__mdun bskyed skabs/__stong pa'i ngang las rin chen gzhal med khang /__/yangs shing rgya che sogs man thod sgrub kyi skabs ltar sbrel bas grub bo/__/de lta bu'i thod pa dang /__gtor ma gang yin kyang rung ste/__rtags mthong ba'i bar du rtse gcig gis bsgrubs la/__rtags mtshan dge ba rnyed pa'i dus su mdzod kyi phug sogs gnas gtsang zhing dben par bkur sti dang bcas pas bzhugs su gsol/__dus dus su mchod bstod gsol gdab sogs bgyis pas yid bzhin gyi nor bu rgyal mtshan gyi rtse mor mchod pa ltar 'dod rgu'i 'byor pa mchog tu rgyas par 'gyur ba ni nges pa'o/__/zhes pa'ang mtsho skyes bla ma dgyes pa'i 'bangs mkhyen brtse'i dbang pos gter gzhung rtsa ba'i dgongs don nyung gsal bklags pas grub dang pa bsdebs pa dge legs kyi 'byor bas 'jig rten gsum du khyab pa'i rgyur gyur cig__/