DKR-KABUM-20-WA-004

🚧 This website is under continued development. We appreciate your patience!

Previous Text Back to Volume PageNext Text

Wylie title	snyan brgyud snying gi gsang mdzod las/ yi dam zhi ba rdo rje sems pa'i phyi sgrub bdag bskyed du zhal bsgyur ba'i rgyun gyi rnal 'byor bde chen snying bcud
Location	dil mgo mkhyen brtse bka' 'bum Volume 20, Text 4, Pages 74-75 (Folios 1a1 to 2a3)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་ (Khyentse, Dilgo)
Associated People	གཉགས་ཛྙཱ་ན་ཀུ་མཱ་ར་ (gnyags dz+nyA na ku mA ra)
Citation	Khyentse, Dilgo. Snyan brgyud snying gi gsang mdzod las yi dam zhi ba rdo rje sems pa'i phyi sgrub bdag bskyed du zhal bsgyur ba'i rgyun gyi rnal 'byor bde chen snying bcud. In Skyabs rje dil mgo mkhyen brtse rin po che'i bka' 'bum, Vol. 20: 74-75. Delhi: Shechen Publications, 1994.
Genre	Daily Practice - rgyun khyer  ·  Sadhanas - Evocation Ritual - sgrub thabs
Cycle	སྙན་བརྒྱུད་སྙིང་གི་གསང་མཛོད་ (snyan brgyud snying gi gsang mdzod)
Deity	rdo rje sems dpa'
Colophon	།ཞེས་པའང་ཟབ་གསང་འདི་ཉིད་ལ་སྔོན་སྨོན་རྟེན་འབྲེལ་གྱིས་ཆོས་ཀྱི་བདག་པོར་གྲུབ་པའི་རྣལ་འབྱོར་པ་ཀློང་ཆེན་ཡེ་ཤེས་རྡོ་རྗེས་བསྙེན་སྒྲུབ་ཉམས་བཞེས་ཀྱི་དད་མོས་འབད་རྩོལ་ཆེན་པོས་ཡང་ཡང་བསྐུལ་བ་ལྟར་ཟབ་མོ་འདི་ཉིད་རང་སྐལ་དུ་ཐོབ་པ་པདྨ་འོད་གསལ་མདོ་སྔགས་གླིང་པ་ཀློང་ཆེན་ནམ་མཁའ་འོད་གསལ་གྱིས་གཏེར་གཞུང་རྩ་བའི་མན་ངག་ལྟར་བྲིས་པས་འགྲོ་ཀུན་ཁྱབ་བདག་རྡོ་རྗེ་སེམས་དཔའི་གསང་གསུམ་ཡེ་ཤེས་ཀྱི་དཀྱིལ་འཁོར་དུ་གཅིག་ཆར་འཇུག་པའི་རྒྱུ་ཁོ་ནར་གྱུར་ཅིག །མངྒ་ལཾ། དགེའོ།།
	/zhes pa'ang zab gsang 'di nyid la sngon smon rten 'brel gyis chos kyi bdag por grub pa'i rnal 'byor pa klong chen ye shes rdo rjes bsnyen sgrub nyams bzhes kyi dad mos 'bad rtsol chen pos yang yang bskul ba ltar zab mo 'di nyid rang skal du thob pa pad+ma 'od gsal mdo sngags gling pa klong chen nam mkha' 'od gsal gyis gter gzhung rtsa ba'i man ngag ltar bris pas 'gro kun khyab bdag rdo rje sems dpa'i gsang gsum ye shes kyi dkyil 'khor du gcig char 'jug pa'i rgyu kho nar gyur cig_/mang+ga laM/_dge'o//

Tibetan Text

Wylie

[edit]

༄༅། །སྙན་བརྒྱུད་སྙིང་གི་གསང་མཛོད་ལས། ཡི་དམ་ཞི་བ་རྡོ་རྗེ་སེམས་པའི་ཕྱི་སྒྲུབ་བདག་བསྐྱེད་དུ་ཞལ་བསྒྱུར་བའི་རྒྱུན་གྱི་རྣལ་འབྱོར་བདེ་ཆེན་སྙིང་བཅུད་བཞུགས། ན་མོ་གུ་རུ་བཛྲ་སཏྭ་ཡ། །པཎ་ཆེན་བི་མ་ལས་སྙན་བརྒྱུད་དུ་གདམས་པ་རྒྱུད་སྡེ་བཞི་འབྲེལ་གྱི་རྡོ་རྗེ་སེམས་དཔའི་ཕྱི་སྒྲུབ་ཀྱི་མན་ངག་བདག་བསྐྱེད་ཀྱི་ཚུལ་དུ་ཉམས་སུ་ལེན་པར་འདོད་པས། ཐོག་མར་སྐྱབས་སེམས་ནི། བླ་མ་རྡོ་རྗེ་སེམས་དཔའ་ནི༔ རང་ངོ་རིག་པས་སྐྱབས་སུ་མཆི༔ མ་རྟོག་སྲིད་ལས་བསྒྲལ་བའི་ཕྱིར༔ གནས་ལུགས་རྡོ་རྗེའི་སེམས་མཆོག་བསྐྱེད༔ ལན་གསུམ་བྱ། བསྐྱེད་བཟླས་དངོས་ནི། ཨ༔ ཆོས་ཀུན་སྟོང་པའི་ཐིག་ལེར་སྦྱངས༔ དེ་ཡི་ངང་ལས་འོད་གསལ་བའི༔ ཡེ་ཤེས་རོལ་པའི་སྣོད་བཅུད་དབུས༔ པད་དཀར་ཟླ་བ་རྒྱས་པའི་སྟེང༔ ཧཱུྃ་ལས་ཆུ་ཤེལ་ལྟར་འཚེར་བའི༔ འོད་ཀྱིས་སྣོད་བཅུད་དོན་གཉིས་བྱས༔ ཡོངས་གྱུར་བཅོམ་ལྡན་རྡོ་རྗེ་སེམས༔ དྲི་མེད་ཟླ་བ་རྒྱས་པའི་མདོག༔ མཚན་དཔེའི་གཟི་བྱིན་མཆོག་ཏུ་འབར༔ ཞི་འཛུམ་ཚུལ་དགུའི་སྒེག་པའི་སྐུ༔ རིན་ཆེན་དར་གྱི་རྒྱན་ཆས་མཛེས༔ ཕྱག་གཡས་རྡོ་རྗེ་ཐུགས་ཀར་གཏོད༔ གཡོན་པས་དྲིལ་བུ་དཀུ་ལ་བརྟེན༔ སེམས་དཔའི་སྐྱིལ་ཀྲུང་འོད་ཟེར་འབར༔ རྒྱལ་ཀུན་སྤྲོ་དང་བསྡུ་བ་ཡི༔ བདག་པོ་མཆོག་ཏུ་ཡང་དག་བཞུགས༔ སངས་རྒྱས་རྣམས་ནི་ཐམས་ཅད་ཀྱི༔ རྡོ་རྗེའི་གསང་བ་གསུམ་དུ་རྫོགས༔ ཞེས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་སྐུ་ཡི་ཁྱབ་བདག་ཏུ་རྣམ་པ་ཞལ་ཕྱག་གསལ་ཞིང༌། འབྲས་བུའི་རྡོ་རྗེ་སེམས་དཔའི་ང་རྒྱལ་བརྟན་པ་དང༌། ཟག་མེད་ཀྱི་སྐུ་དང་ཡེ་ཤེས་མཚོན་པའི་དག་པ་དྲན་པ་ལ་བསླབ་པ་སྐུ་རྡོ་རྗེ་ལམ་གྱི་རྣལ་འབྱོར་དང༌། ཐུགས་ཀར་ཟླ་སྟེང་ཡེ་ཤེས་སེམས༔ རྡོ་རྗེའི་ལྟེ་བར་ཧཱུྃ་སྔགས་འབར༔ འོད་ཀྱིས་སྣང་སྲིད་བདེ་བ་ཆེ༔ རོལ་པ་ཆེན་པོར་ཁྱབ་བརྡལ་ཤར༔ ཞེས་འོད་ཟེར་སྤྲོ་བསྡུས་དོན་གཉིས་སྒྲུབ་ཅིང་སྣོད་བཅུད་བདེ་སྟོང་ཡེ་ཤེས་ཀྱི་འཁོར་ལོར་མོས་པས་རིགས་སྔགས་ཡི་གེ་བརྒྱ་པ་ཅི་ནུས་སུ་བཟླ་བ་གསུང་རྡོ་རྗེ་ལམ་གྱི་རྣལ་འབྱོར་དང༌། དེ་ལྟར་གསལ་བའི་ལྷར་སྣང༌། སྣོད་བཅུད་འོད་ཞུ་རང་ལ་ཐིམ༔ དེ་ཡང་མི་དམིགས་འོད་གསལ་ངང༔ སྣང་གྲགས་རིག་གསུམ་རྡོ་རྗེ་གསུམ༔ གདོད་ནས་དག་མཉམ་ཆེན་པོར་རྫོགས༔ ཞེས་པས་ལྷ་སྔགས་ཀྱི་སྤྲོས་པ་དབྱིངས་སུ་བསྡུས་ནས་ཆོས་ཉིད་རང་བབ་ཀྱི་གནས་ལུགས་མ་བཅོས་པའི་ངང་བསྐྱང༌། སླར་ཡང་སྣང་གྲགས་རིག་པ་རྡོ་རྗེ་གསུམ་གྱི་འཁོར་ལོར་དག་པའི་སྣང་བ་གསུམ་ལམ་དུ་ཁྱེར་བ་ནི་ཐུགས་རྡོ་རྗེ་ལམ་གྱི་རྣལ་འབྱོར་ཏེ། དེ་དག་གིས་སྐྱེ་འཆི་བར་དོ་སྐུ་གསུམ་གྱི་ལམ་དུ་བྱེད་པའི་མན་ངག་གི་སྙིང་པོ་ཟབ་དྲིལ་དུ་གདམས་པའོ། །ཞེས་པའང་ཟབ་གསང་འདི་ཉིད་ལ་སྔོན་སྨོན་རྟེན་འབྲེལ་གྱིས་ཆོས་ཀྱི་བདག་པོར་གྲུབ་པའི་རྣལ་འབྱོར་པ་ཀློང་ཆེན་ཡེ་ཤེས་རྡོ་རྗེས་བསྙེན་སྒྲུབ་ཉམས་བཞེས་ཀྱི་དད་མོས་འབད་རྩོལ་ཆེན་པོས་ཡང་ཡང་བསྐུལ་བ་ལྟར་ཟབ་མོ་འདི་ཉིད་རང་སྐལ་དུ་ཐོབ་པ་པདྨ་འོད་གསལ་མདོ་སྔགས་གླིང་པ་ཀློང་ཆེན་ནམ་མཁའ་འོད་གསལ་གྱིས་གཏེར་གཞུང་རྩ་བའི་མན་ངག་ལྟར་བྲིས་པས་འགྲོ་ཀུན་ཁྱབ་བདག་རྡོ་རྗེ་སེམས་དཔའི་གསང་གསུམ་ཡེ་ཤེས་ཀྱི་དཀྱིལ་འཁོར་དུ་གཅིག་ཆར་འཇུག་པའི་རྒྱུ་ཁོ་ནར་གྱུར་ཅིག །མངྒ་ལཾ། དགེའོ།། །།

[edit]

@#/_/snyan brgyud snying gi gsang mdzod las/_yi dam zhi ba rdo rje sems pa'i phyi sgrub bdag bskyed du zhal bsgyur ba'i rgyun gyi rnal 'byor bde chen snying bcud bzhugs/__na mo gu ru badz+ra satwa ya/_/paN chen bi ma las snyan brgyud du gdams pa rgyud sde bzhi 'brel gyi rdo rje sems dpa'i phyi sgrub kyi man ngag bdag bskyed kyi tshul du nyams su len par 'dod pas/_thog mar skyabs sems ni/_bla ma rdo rje sems dpa' ni:_rang ngo rig pas skyabs su mchi:_ma rtog srid las bsgral ba'i phyir:_gnas lugs rdo rje'i sems mchog bskyed:_lan gsum bya/_bskyed bzlas dngos ni/_a:_chos kun stong pa'i thig ler sbyangs:_de yi ngang las 'od gsal ba'i:_ye shes rol pa'i snod bcud dbus:_pad dkar zla ba rgyas pa'i steng:_hU~M las chu shel ltar 'tsher ba'i:_'od kyis snod bcud don gnyis byas:_yongs gyur bcom ldan rdo rje sems:_dri med zla ba rgyas pa'i mdog:_mtshan dpe'i gzi byin mchog tu 'bar:_zhi 'dzum tshul dgu'i sgeg pa'i sku:_rin chen dar gyi rgyan chas mdzes:_phyag g.yas rdo rje thugs kar gtod:_g.yon pas dril bu dku la brten:_sems dpa'i skyil krung 'od zer 'bar:_rgyal kun spro dang bsdu ba yi:_bdag po mchog tu yang dag bzhugs:_sangs rgyas rnams ni thams cad kyi:_rdo rje'i gsang ba gsum du rdzogs:_zhes de bzhin gshegs pa thams cad kyi ye shes kyi sku yi khyab bdag tu rnam pa zhal phyag gsal zhing*/_'bras bu'i rdo rje sems dpa'i nga rgyal brtan pa dang*/_zag med kyi sku dang ye shes mtshon pa'i dag pa dran pa la bslab pa sku rdo rje lam gyi rnal 'byor dang*/_thugs kar zla steng ye shes sems:_rdo rje'i lte bar hU~M sngags 'bar:_'od kyis snang srid bde ba che:_rol pa chen por khyab brdal shar:_zhes 'od zer spro bsdus don gnyis sgrub cing snod bcud bde stong ye shes kyi 'khor lor mos pas rigs sngags yi ge brgya pa ci nus su bzla ba gsung rdo rje lam gyi rnal 'byor dang*/_de ltar gsal ba'i lhar snang*/_snod bcud 'od zhu rang la thim:_de yang mi dmigs 'od gsal ngang:_snang grags rig gsum rdo rje gsum:_gdod nas dag mnyam chen por rdzogs:_zhes pas lha sngags kyi spros pa dbyings su bsdus nas chos nyid rang bab kyi gnas lugs ma bcos pa'i ngang bskyang*/_slar yang snang grags rig pa rdo rje gsum gyi 'khor lor dag pa'i snang ba gsum lam du khyer ba ni thugs rdo rje lam gyi rnal 'byor te/_de dag gis skye 'chi bar do sku gsum gyi lam du byed pa'i man ngag gi snying po zab dril du gdams pa'o/_/zhes pa'ang zab gsang 'di nyid la sngon smon rten 'brel gyis chos kyi bdag por grub pa'i rnal 'byor pa klong chen ye shes rdo rjes bsnyen sgrub nyams bzhes kyi dad mos 'bad rtsol chen pos yang yang bskul ba ltar zab mo 'di nyid rang skal du thob pa pad+ma 'od gsal mdo sngags gling pa klong chen nam mkha' 'od gsal gyis gter gzhung rtsa ba'i man ngag ltar bris pas 'gro kun khyab bdag rdo rje sems dpa'i gsang gsum ye shes kyi dkyil 'khor du gcig char 'jug pa'i rgyu kho nar gyur cig_/mang+ga laM/_dge'o//__//