DKR-KABUM-09-TA-023

🚧 This website is under continued development. We appreciate your patience!

Previous Text Back to Volume PageNext Text

Wylie title	zab bdun sgyu 'phrul tshe dkar tshogs sgrub kyi gtong thun 'chi med tshangs chen lha'i rnga sgra
Location	dil mgo mkhyen brtse bka' 'bum Volume 9, Text 23, Pages 188-200 (Folios 1a to 13b6)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	མཆོག་གྱུར་གླིང་པ་ (mchog gyur gling pa)
Citation	Khyentse, Dilgo. Zab bdun sgyu 'phrul tshe dkar tshogs sgrub kyi gtong thun 'chi med tshangs chen lha'i rnga sgra. In Skyabs rje dil mgo mkhyen brtse rin po che'i bka' 'bum, Vol. 9: 188-200. Delhi: Shechen Publications, 1994.
Genre	Sadhanas - Evocation Ritual - sgrub thabs
Cycle	ཟབ་བདུན་ཚེ་དཀར་ (zab bdun tshe dkar)
Parent Cycle	ཟབ་བདུན་རྩ་གསུམ་ཚེའི་ཟབ་པ་ (zab bdun rtsa gsum tshe'i zab pa)
Deity	tshe dkar
Colophon	།ཅེས་པའང་སྤྲུལ་པའི་གཏེར་ཆེན་མཆོག་གྱུར་བདེ་ཆེན་གླིང་པའི་ཨེ་ཝཾ་ཆོས་ཀྱི་སྒར་ཆེན་འགྱུར་མེད་གླིང་དུ་ཉེར་མཁོར་གྱུར་པས། རིག་འཛིན་མཆོག་གི་སྐུ་གསུང་ཐུགས་ཀྱི་སྲས་མཆོག་སྤྲུལ་ཨོ་རྒྱན་སྟོབས་རྒྱལ་དང༌། དབུ་མཛད་པདྨ་བཀྲ་ཤིས་ལྷན་རྒྱས་ནས་གསུང་བསྐུལ་བཞིན་རིག་འཛིན་རྩལ་འཆང་གསུམ་གྱི་ཆོས་རྒྱུད་དུ་སྐྱེས་པའི་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་བྲིས་པས་ཟབ་གསང་མཆོག་གི་བསྟན་པའི་དཔལ་ཡོན་ཕྱོགས་དུས་གནས་སྐབས་ཀུན་ཏུ་དར་ཞིང་རྒྱས་པའི་རྟེན་འབྱུང་དུ་གྱུར་ཅིག །སརྦ་དཱ་མངྒ་ལམ། །བི་ཛ་ཡནྟུ།།
	/ces pa'ang sprul pa'i gter chen mchog gyur bde chen gling pa'i e waM chos kyi sgar chen 'gyur med gling du nyer mkhor gyur pas/_rig 'dzin mchog gi sku gsung thugs kyi sras mchog sprul o rgyan stobs rgyal dang*/_dbu mdzad pad+ma bkra shis lhan rgyas nas gsung bskul bzhin rig 'dzin rtsal 'chang gsum gyi chos rgyud du skyes pa'i 'gyur med theg mchog bstan pa'i rgyal mtshan gyis bris pas zab gsang mchog gi bstan pa'i dpal yon phyogs dus gnas skabs kun tu dar zhing rgyas pa'i rten 'byung du gyur cig__/sarba dA mang+ga lam/_/bi dza yan+tu//

Tibetan Text

Wylie

[edit]

༄༅། །ཟབ་བདུན་སྒྱུ་འཕྲུལ་ཚེ་དཀར་ཚོགས་སྒྲུབ་ཀྱི་གཏོང་ཐུན་འཆི་མེད་ཚངས་ཆེན་ལྷའི་རྔ་སྒྲ་ཞེས་བྱ་བ་བཞུགས་སོ།།

ཁྱབ་བྱེད་རྒྱལ་བ་རྟག་པ་བདེ་གཤེགས་སྐུ། །ཁྱབ་བྱ་པདྨའི་རིགས་ལྔ་སྒྱུ་འཕྲུལ་སྤྲིན། །བཀྲ་ཤིས་ཚེ་མཆོག་ཞི་ཁྲོའི་དཀྱིལ་འཁོར་ལྷར། །རབ་དྭངས་ཡིད་ཀྱི་མེ་ཏོག་འཛུམ་པས་མཆོད། འདིར་སྒྱུ་འཕྲུལ་དྲ་བའི་རྒྱུད་ཀྱི་དགོངས་པ་རྣམ་སྣང་ཚེ་མཐའ་ཡས་པའི་ཚོགས་སྒྲུབ་ཆེན་པོའི་གཏོང་ཐུན་བྲི་བ་ལ། ཐོག་མར་མ་ཏྲཾ་བསྒྲལ་བའི་སྐབས་སུ། རྩ་རྒྱུད་གསང་བ་སྙིང་པོ་ལས། ཨེ་མ་ཧོ་བདེ་གཤེགས་སྙིང་པོ་ལས། རང་གི་རྣམ་རྟོག་ལས་ཀྱིས་སྤྲུལ། །ཞེས་གསུངས་པ་ལྟར། ཁམས་གསུམ་གྱི་སེམས་ཅན་རྣམས་ཆོས་ཉིད་བདེ་བ་ཆེན་པོ་དབྱིངས་དང་འདུ་འབྲལ་མེད་པའི་དོན་མ་རྟོགས་པའི་གཏི་མུག་ལྷན་སྐྱེས་ཀྱི་ཆ་ལ་རུ་ཏྲ་ཞེས་བརྡར་བཏགས་པ་སྟེ། སྒྲིབ་པ་དེའི་དབང་གིས་བདག་གཞན་གཉིས་སུ་བཟུང་སྟེ་གནས་དོན་ལུས་ཀྱི་སྣང་བར་ཆགས་སྡང་རང་རྒྱུད་དུ་ཞེན་པ་ལ། ཕྱི་རུ་རུ་ཏྲ་ཕོ་མོ་མ་ནིང་རྒྱུད་གསུམ་བྱུང་ཞིང༌། ནང་དུ་ཉོན་མོངས་དུག་གསུམ་གྱི་སྒྲིབ་པས་སྐུ་གསུང་ཐུགས་རྡོ་རྗེའི་གསང་བ་ལ་བར་དུ་གཅོད་པ་གང༌། སངས་རྒྱས་ཐབས་མཁས་ལ་ཐུགས་རྗེའི་རྩལ་མྱུར་བས་རྣམ་པ་དེ་དང་མཐུན་ལ། ངོ་བོ་སྐུ་གསུམ་གྱི་ཡེ་ཤེས་སྟོབས་སུ་གྱུར་པས་དབང་སྒྱུར་བའི་ཆོས་ཉིད་ངང་གིས་ཁྲོ་བོ་སྲིད་ཞིའི་སྤྱི་དཔལ་ཆེན་པོ་རིགས་གསུམ་གྱི་སྐུར་བཞེངས་པས། རྡོ་རྗེ་ཁྲོས་པའི་མཚོན་ཆས་གཉིས་འཛིན་ཀུན་རྟོག་གི་བདུད་ཀྱི་རྒྱུ་བ་བཅད་ནས། ཕོ་རྒྱུད་རྡོ་རྗེ་ཁྲོས་པའི་ཧེ་རུ་ཀའི་གར་གྱིས་བསྒྲལ། མོ་རྒྱུད་བདེ་ཆེན་འབར་བ་མ་ཆགས་ཐབས་ཀྱི་སྦྱོར་བས་བཏུལ་བ་ལས། གཉིས་མེད་རྡོ་རྗེ་སེམས་དཔའི་ཡེ་ཤེས་ནཱ་དའི་རྒྱུད་ཀྱི་སྒྲ་དབྱངས་རྡོ་རྗེ་ཐེག་པའི་བསྟན་པ་བྱུང་བས་ན། གཞི་རང་བཞིན་ལྷུན་གྱིས་གྲུབ་པའི་ཡེ་ཤེས་ལྷའི་དཀྱིལ་འཁོར་མངོན་དུ་བྱ་སྟེ་སྒྲུབ་པའི་ཆེད་དུ། སངས་རྒྱས་ཀྱི་ཐུགས་རྗེ་འགག་པ་མེད་པའི་རྡོ་རྗེ་ཚེའི་དཀྱིལ་འཁོར་ཞི་ཁྲོ་རྣམ་པར་རོལ་པའི་སྒྲུབ་བྱེད་བྱས་ཏེ། སྔོན་བྱོན་རིག་འཛིན་གོང་མའི་ཕྱག་བཞེས་བསྙེན་སྒྲུབ་ཡན་ལག་བཞིས་ཉམས་སུ་ལེན་པ་ལ། བགེགས་ཀྱི་རྒྱལ་པོ་མ་ཏྲཾ་རུ་ཏྲ་དྲག་པོའི་སྟབས་ཀྱིས་བསྒྲལ་ཞིང་སྤར་ཏེ་རོལ་པའི་བྲོས་མནན་ལ། ཡན་ལག་དུར་ཁྲོད་བརྒྱད་དང་ཁོག་པ་གཞལ་ཡས་ཁང་སྟེ་རྡོ་རྗེའི་ཞིང་ཁམས་སུ་བྱིན་གྱིས་བརླབ་པའི་ཕྱིར། སློབ་དཔོན་སྲིད་ཞིའི་སྤྱི་དཔལ་ཆེན་པོ་ཁྲོ་རྒྱལ་སྟོབས་འདུས་དབང་ཆེན་རྔམས་པ་དཔལ་གྱི་སྐུར་བཞེངས་པས། རྡོ་རྗེའི་རྟ་སྐད་ཐེང་གསུམ་བསྒྲགས་ནས། བདེ་སྟོང་ཡེ་ཤེས་ཆེན་པོའི་རོལ་པ་སྒྲོལ་གིང་དམར་ནག་གཉིས་རྟ་ཕག་ཡབ་ཡུམ་དུ་གསལ་བས་ཁམས་གསུམ་དབྱིངས་སུ་སྒྲོལ་བའི་ལས་རིམ་ལ་འཇུག་པར་ཞུ། ༈ མངའ་གསོལ་སྐབས། འོ་ན་བཀྲ་ཤིས་བདེ་ལེགས་དང་ལྡན་པ་དེང་གི་ཆར། ཇི་སྐད་དུ། རྒྱལ་བ་རྣམས་ནི་འཇིག་རྟེན་བྱོན་པའི་ཚེ། །དེ་ཡི་གསུང་གི་ལུང་ཆེན་རྣམས་ལ་ནི། །ཕྱི་རོལ་རྒོལ་བ་ངན་པ་འབྱུང་སྲིད་པས། །དང་པོ་སྲིད་པ་ཆོས་ཀྱི་ལོ་རྒྱུས་སྨྲོས། །ཞེས་པ་ལྟར་ཕུན་སུམ་ཚོགས་པ་ལྔས་སྒྲུབ་པའི་གཞི་བཟུང༌། བསྙེན་སྒྲུབ་ཡན་ལག་བཞིས་སྒྲུབ་པའི་གཞུང་བསྲང༌། ལས་མཐའ་རྒྱས་ཀྱི་རིམ་པས་སྒྲུབ་པའི་རྗེས་ཀྱི་བྱ་བ་གསུམ་ལས། ཐམས་ཅད་མདོར་བསྡུ་ན་བསྒྲུབ་བྱའི་ལྷ། སྒྲུབ་བྱེད་ཀྱི་ཆོས། བསྒྲུབས་པའི་འབྲས་བུ་གསུམ་གྱི་རྣམ་བཞག་གི་ལོ་རྒྱུས་འཆད་པ་ལ། དང་པོ་ནི། སངས་རྒྱས་རྣམས་མི་སློབ་འབྲས་བུའི་མཆོག་མངོན་དུ་མཛད་པའི་ཡོན་ཏན་གྱི་གཙོ་བོ། རྟེན་སྐུ་ལྔ། བརྟེན་པ་ཡེ་ཤེས་ལྔ། མཛད་པ་ཕྲིན་ལས་དང་གསུམ་དུ་འདུ་བ་ལས་གདུལ་བྱའི་ཡུལ་ལ་རྟག་ཁྱབ་ལྷུན་གྱིས་གྲུབ་པའི་མཛད་པ་ཕྲིན་ལས་ཀྱི་གཙོ་བོ་ནི་གསུང་རྡོ་རྗེ་སྟེ། དེ་ཉིད་ཀྱི་ངོ་བོ་ཆོས་དབྱིངས་སྐྱེ་འགག་གནས་གསུམ་དང་བྲལ་བ་ལས། དམིགས་མེད་རང་བྱུང་གི་རྟག་པ་རྒྱུན་གྱི་ཐུགས་རྗེའི་དཔལ་ལས། རྣམ་པ་དེ་བཞིན་གཤེགས་པ་ཐམས་ཅད་ཀྱི་གསུང་མི་ཟད་རྒྱན་གྱི་འཁོར་ལོའི་དཀྱིལ་འཁོར་གྱི་ཁྱབ་བདག་བདེ་གཤེགས་འོད་མཚན་སྟོང་འབར་པདྨའི་རིགས་ཀྱི་འཁོར་ལོས་སྒྱུར་བ་སངས་རྒྱས་ཚེ་དང་ཡེ་ཤེས་དཔག་ཏུ་མེད་པའི་སྐུར་བཞེངས་པ། དེ་ཉིད་བྱང་ཆུབ་སེམས་དཔའི་ཚུལ་དུ་བསྟན་པ་ཕྱོགས་བཅུའི་སངས་རྒྱས་ཐམས་ཅད་ཀྱི་སྙིང་རྗེའི་རང་གཟུགས་འཕགས་པ་སྤྱན་རས་གཟིགས་དབང་ཕྱུག་ནི། རྡོ་རྗེ་ཐེག་པའི་རྒྱུད་སྡེ་རབ་འབྱམས་ནས་དཀྱིལ་འཁོར་འཁོར་ལོའི་དབང་ཕྱུག་པདྨ་གར་དབང་རྒྱལ་བ་རྒྱ་མཚོར་གྲགས་ཤིང༌། ཚངས་པ་རྔ་སྒྲའི་སྐུ་དང་ཞིང་ཁམས་རྒྱ་མཚོའི་སྤྲོ་བསྡུའི་བདག་ཉིད་རྣམ་སྣང་གངས་ཆེན་མཚོ་ལོངས་སྤྱོད་རྫོགས་པའི་སྐུར་སྣང་བ་ཡིན། དེ་དག་གི་ཐུགས་རྗེ་དང་ཕྲིན་ལས་ཀྱི་ཆ་ཤས་མི་མཇེད་འཇིག་རྟེན་གྱི་གདུལ་བྱའི་དོན་དུ་ཕྱོགས་དུས་རྒྱལ་བ་མ་ལུས་པའི་སྤྱི་གཟུགས་ཨོ་རྒྱན་སངས་རྒྱས་གཉིས་པའི་ཚུལ་དུ་བསྟན་ནས། བཀྲ་ཤིས་བྲག་ཕུག་མཱ་ར་ཏི་ཀར་འཆི་མེད་ཚེ་ཡི་རིག་འཛིན་སྒྲུབ་པའི་ཚེ། སྤྲུལ་གཞི་ཚེའི་མགོན་པོ་ཡབ་ཡུམ་དངོས་སུ་བྱོན་ཏེ། སྐྱེ་འཆིའི་མི་འཇིག་རྡོ་རྗེ་ལྟ་བུའི་ཡེ་ཤེས་ཀྱི་སྐུ་བརྙེས། ཚེ་རྒྱུད་བྱེ་བ་ཕྲག་བརྒྱ་བསྟན་ནས་སྲིད་པ་ཇི་སྲིད་རྡོ་རྗེའི་སྐུ་དེའི་མཁའ་ཁྱབ་འགྲོ་བའི་དོན་མཛད་ཅིང༌། ད་ལྟའང་ཛམ་གླིང་གི་བྱེ་བྲག་ཟངས་མདོག་དཔལ་གྱི་རི་བོར་རྡོ་རྗེའི་སྐུ་དེ་ཉིད་དངོས་སུ་བཞུགས་པས། དེའི་དཀྱིལ་འཁོར་གྱི་སྟོན་པ་དངོས་ལས་གསན་པའི་འཆི་མེད་རྡོ་རྗེ་ཚེའི་རྒྱུད་ལུང་མན་ངག་གི་གསང་བ་བསམ་གྱིས་མི་ཁྱབ་པ་གཞོམ་མེད་རྡོ་རྗེའི་ནཱ་དའི་རང་སྒྲ་རྒྱུན་མི་ཆད་པར་སྒྲོགས་པའི་ཟབ་ཏིག་གི་གསང་བ་དུ་མ་ཞིག །སྙིགས་དུས་ཕྱི་མའི་གདུལ་བྱ་ལ་དགོངས་ནས་བོད་ཀྱི་རྗེ་འབངས་འདུས་པ་སོ་སོའི་སྣོད་དང་དབང་པོའི་ཁྱད་པར་བཞིན། བསྒྲུབ་བྱའི་ལྷའི་སྒོ་ནས་དབྱེ་ན་རྩ་བ་གསུམ། དེ་རེ་རེ་ལ་སྐུ་གསུམ། རིགས་ལྔ་སྤྱི་དང༌། བྱེ་བྲག་གི་སྒྲུབ་ཚུལ་མི་འདྲ་བ་དུ་མ་ལས། སྐབས་འདིར་སྤྱིར་རྒྱལ་བ་རིགས་ལྔ་སྤྱི་སྒྲུབ། བྱེ་བྲག་ཏུ་སྐུ་རྡོ་རྗེ་བདེ་གཤེགས་ཚེ་མཐའ་ཡས་པ་རྒྱལ་བ་རྟག་པའི་གཙོ་བོ་ལ་ཞི་ཁྲོ་རིགས་བརྒྱའི་འཁོར་གྱིས་བསྐོར་བ་སྟེ། སྒྲུབ་བྱེད་རྒྱུད་ལུང་མན་ངག་གིས་དབྱེ་ན། རྒྱུད་མ་ཧཱ་ཡོ་གའི་རྩ་བ་སྒྱུ་འཕྲུལ་དྲ་བ་ཏནྟྲ་སྡེ་བཅོ་བརྒྱད་ལས། ལུང་ཐུགས་དམ་ཟབ་པ་སྐོར་བདུན་གྱི་རྩ་བ། རྩ་གསུམ་གཅིག་དྲིལ་ཚེ་ཡི་ཟབ་པའི་ཡན་ལག་གི་ཆོས་སྡེ་རྣམ་སྣང་སྒྱུ་འཕྲུལ་དྲ་བའི་སྒྲུབ་ཐབས་ཁྱད་པར་ཅན་མན་ངག་བསྐྱེད་རྫོགས་རྫོགས་པ་ཆེན་པོ་ནང་རྒྱུད་ཡོ་ག་གསུམ་གྱི་དགོངས་པ་བཅུད་དུ་དྲིལ་བ་འདི་ཉིད་གངས་ཅན་མིའི་ལྷ་ཆོས་རྒྱལ་ཚངས་པ་ལྷའི་མེ་ཏོག་གི་སྐུ་ཚེ་དང་ཕྲིན་ལས་ནམ་མཁའི་ནོར་བུ་ནམ་མཁའི་ཇི་སྲིད་དུ་འགྲིབ་མེད་འཆར་བའི་དགེ་མཚན་ལ་ཆེད་དུ་དགོངས་པས་བསམ་ཡས་བྲག་དམར་གཡའ་མ་ལུང་དུ་རྒྱལ་དབང་མཚོ་སྐྱེས་རྡོ་རྗེའི་འཆི་མེད་ཚེའི་དཀྱིལ་འཁོར་ཞལ་ཕྱེས་ཏེ། ཚེ་དཔག་མེད་དངོས་སུ་བྱོན་ནས་གྲུབ་པའི་རྟགས་མཚན་མཐའ་ཡས་པ་མངོན་དུ་གྱུར་ཀྱང༌། བོད་ཡུལ་སྤྱིའི་བསོད་ནམས་ཀྱི་སྐལ་པ་ཕྲ་མོར་གྱུར་པས་རྟེན་འབྲེལ་ཇི་བཞིན་མ་བྱུང་ཀྱང༌། སངས་རྒྱས་ཀྱི་ཐུགས་རྗེ་ལ་ནམ་ཡང་འཕེལ་འགྲིབ་མ་མཆིས་པས་སླར་ཡང་སྒྱུ་འཕྲུལ་རིགས་ལྔའི་ཚེའི་དཀྱིལ་འཁོར་འདི་ཉིད་དུ་དབང་བསྐུར་བས། ཆོས་རྒྱལ་ཉིད་དགུང་ལོ་བཅུ་གསུམ་དུ་སྐུ་ཚེ་བསྲིངས་ཏེ། གདམས་པའི་ཟབ་ཆོས་ཕྱི་མའི་གདུལ་བྱ་ལ་དགོངས་པས་ཟབ་གཏེར་དུ་མདོ་ཁམས་གནས་ཆེན་ཉེར་ལྔའི་ཡ་གྱལ། ཡེ་རྒྱལ་ནམ་མཁའ་མཛོད་དུ་རྒྱས་བཏབ་པ་ལྷ་སྲས་དམ་འཛིན་མུ་རུབ་བཙད་པོའི་ཡང་སྲིད་ཨོ་རྒྱན་མཆོག་གྱུར་བདེ་ཆེན་གླིང་པས་སྤྱན་དྲངས་པའི་དུས་བབ་ཀྱི་ཟབ་ཆོས་སྒྱུ་འཕྲུལ་ཚེ་དཔག་མེད་རིགས་ལྔ་སྤྱི་སྒྲུབ་ཀྱི་དཀྱིལ་འཁོར་ལ་བརྟེན་ནས་ཚོམ་བུ་ཚོགས་ཀྱི་སྒྲུབ་པའི་སྐབས་སུ་བབ་པ་སྟེ། འདི་ལ་སྔོན་འགྲོ། དངོས་གཞི། རྗེས་རིམ་གསུམ་ལས། དང་པོ་ལ། ས་གཞི་བརྟག་བསླང༌། དབང་དུ་བྱ་ཞིང༌། སྦྱར་བ་དང་སྲུང་བ། ཕྱི་ནང་གསང་བའི་བཤགས་པ་བཅས་སྔོན་དུ་འགྲོ་བས་རྒྱུད་སྦྱངས་ཤིང༌། གཞན་ཡང་ཕྱི་ནང་གསང་བའི་མཚམས་བཅད་པ། ལྷ་དང་བུམ་པ་སློབ་མ་བཅས་སྔོན་འགྲོ་སྟ་གོན་གྱི་རིམ་པ་རྣམས་རིག་འཛིན་བརྒྱུད་པའི་ཕྱག་བཞེས་བཞིན་ལེགས་པར་གྲུབ་ནས། དངོས་གཞི་གསང་བ་སྔགས་ཀྱི་བསྙེན་སྒྲུབ་ཡན་ལག་བཞིས་གསེང་ལམ་དུ་བཅུག་པའི་ཐོག་མར་སྒྲུབ་པ་པོ་རྣམས་མངའ་གསོལ་ཞིང་གནས་སུ་འགོད་པ་སྟེ། དེ་ཡང་ཆོས་ཉིད་ངོ་བོའི་དབྱིངས་སུ་སྟོན་འཁོར་དགོངས་པ་དབྱེར་མེད་བདེ་སྟོང་ཡེ་ཤེས་ཆེན་པོའི་ཐིག་ལེ་ཉག་གཅིག་ཏུ་རྣམ་དབྱེར་མ་མཆིས་པ་འཁོར་འདས་དག་མཉམ་རོལ་པའི་ལྟ་བའི་གདེང་བསྐྱེད་ཅིང༌། ཆོས་ཅན་རྟགས་ཀྱི་ཕྱག་རྒྱ་འཆི་མེད་རྡོ་རྗེ་ཚེའི་དཀྱིལ་འཁོར་སྒྱུ་འཕྲུལ་དྲ་བ་ཞི་བ་རྡོ་རྗེ་དབྱིངས་ཀྱི་ལྷ་ཚོགས་དང་སྐལ་པ་མཉམ་པའི་རྡོ་རྗེའི་རིགས་ཅན། དཀྱིལ་འཁོར་གཙོ་མཆོག་སྟོན་པ་རྡོ་རྗེ་རྒྱལ་པོ་རྒྱལ་བ་རྟག་པ་ཚེ་དཔག་མེད། ཏན་གན་གྱི་སྒྱུ་རྩལ་ལ་མཁས་ཤིང་ཤེས་རབ་ཀྱི་ཆ་འཛིན་ཡུམ་ཀུན་ཏུ་བཟང་མོ་དབྱིངས་ཕྱུག་མ། རྒྱལ་བ་རིགས་ལྔ་མཚོན་པའི། རྡོ་རྗེ་རྒྱལ་ཚབ། རྒྱལ་ཐེབ་བཞི་ཡུམ་དང་བཅས་པ། སེམས་དཔའ་ལྕམ་དྲལ་བཀྲ་ཤིས་ལྷ་མོ་བརྒྱད། སྒོ་བ་བཞི་སོགས་མཚོན་བྱེད་དུ། སྐད་གདངས་ཆེ་ཞིང་ཆོ་གའི་ལས་ཁྲིགས་ལ་མཁས་པའི་ཀརྨ་ལས་མཁན། མཆོད་པའི་བྱ་བས་དཀྱིལ་འཁོར་དགྱེས་པ་སྐྱེད་པའི་ལས་ཀྱི་རྡོ་རྗེ། མཐོང་བཟློག་ནུས་པའི་རྡོ་རྗེ་སྤྱན་པ། ཕྱི་ནང་གི་བར་ཆད་སྲུང་བའི་རྡོ་རྗེ་མཚམས་པ། དམ་སྲི་ཉུ་ལེ་སྐྲོད་གཟིར་ལ་དབང་བའི་རྡོ་རྗེ་གིང་ཆེན་དང༌། གིང་ཕྲན་སོགས་སྒྲོལ་བའི་ལས་ལ་མཁས་པ། དམ་ཚིག་གཙང་ཞིང་བསྙེན་བཟླས་ལ་བརྩོན་པའི་རྡོ་རྗེ་མཆེད་ལྕམ་ཕོ་མོ། ཕུད་གཙང་བསྐོལ་མཁས་ཀྱིས་སྟོན་འཁོར་མཉེས་པར་མཛད་པ་རྡོ་རྗེ་བྱན་ཕོ། ཞལ་ཟས་ཀྱི་བྱ་བ་གཙང་ཞིང་དག་པར་སྦྱོར་བ་རྡོ་རྗེ་ཕྱག་ཚངས། སྟོན་འཁོར་རྣམས་ཀྱི་ཐུགས་དམ་བསྐང་བའི་བྲན་གྱི་ཁྱེའུ་ཕོ་མོ། ཕྱིའི་ཉུ་ལེ་སྐྲོད་ཅིང་མཆེད་ལྕམ་གྱི་བཀའ་བཞིན་སྒྲུབ་པའི་རྡོ་རྗེ་རྡུལ་ཕྱགས་རྣམས་ལྷག་པའི་ལྷ་རང་རང་གི་ང་རྒྱལ་ལ་གནས་པས་སྒོམ་པའི་གདེང་བསྐྱེད་པ་དང་བཅས། སྔགས་དང་ཕྱག་རྒྱ་ཏིང་ངེ་འཛིན་མཆོད་བསྟོད་བགེགས་འདུལ་སྦྱིན་སྲེག་སོགས་ཚར་གཅོད་རྗེས་འཛིན་གྱི་ཕྲིན་ལས་རྣམས་སྤྱོད་པས་ལམ་དུ་ཁྱེར་ཏེ་མཆོག་དང་ཐུན་མོང་གི་དངོས་གྲུབ་མཆོག་ལ་མྱུར་དུ་སྦྱོར་ཞིང་རིམ་གཉིས་ཀྱི་ཏིང་འཛིན་གོང་འཕེལ་དུ་འགྱུར་བས་ན་སྐབས་སུ་བབ་པའི་ལས་དང་བྱ་བ་དེ་བཞིན་སྒྲུབ་པར་འོས་པའི་ཆེ་རྟགས་སུ་མངའ་གསོལ་བས་འཁོར་ལོའི་བསྒྱུར་བའི་སྲས་རྒྱལ་ཐབས་ལ་བཀོད་པའི་ཚེ། གླང་པོ་ཆེ་ས་སྲུང་གིས་རིན་པོ་ཆེའི་བུམ་པས་སྤྱི་བོ་ནས་དབང་བསྐུར་བ་ནས་སེང་གེའི་ཁྲི་ལ་བཞུགས་པས་སྟོང་གསུམ་གླིང་བཞིའི་འཇིག་རྟེན་དབང་དུ་བྱེད་པ་དང་ཆོས་མཚུངས་པ་མཚོན་ཕྱིར་བདུད་རྩིའི་སྐྱེམས་དྲངས་ཤིང་ཆེ་བ་བརྗོད་པའི་དབྱངས་འབོར་ལེན་ལ་འཇུག་པར་ཞུ། ༈ ཆས་ཞུགས་སྐབས། ཞི་ཆས་ཡོད་སྐབས། གུ་རུ་རིན་པོ་ཆེའི་རྡོ་རྗེའི་གསུང་ལས། རི་བོ་མ་ལ་ཡ་གནམ་ལྕགས་འབར་བའི་རྩེར༔ བདུད་པོ་མ་ཏྲཾ་རུ་ཏྲ་དྲག་པོས་བསྒྲལ༔ སྲིན་མོ་མ་ཚོགས་རྣམས་ལ་སྦྱོར་བར་མཛད༔ གསང་སྔགས་བསྟན་པ་དང་པོ་དེ་ནས་བྱུང་༔ ཞེས་གསུངས་པ་ལྟར་གདུལ་བྱ་སེམས་ཅན་རྣམས་ཀྱི་རྒྱུད་ཀྱི་ཆགས་སྡང་གཉིས། འདུལ་བྱེད་སངས་རྒྱས་ཀྱི་རྣམ་རོལ་ཞི་ཁྲོ་གཉིས་སུ་སྟོན་པས། འདུལ་ཚུལ་རྡོ་རྗེ་ཐེག་པའི་ལམ་གྱི་མཐར་ཐུག་རྡོ་རྗེའི་ཏན་གཎ་གཉིས་ཀྱི་ཕྲིན་ལས་ཚར་གཅོད་རྗེས་འཛིན་གཉིས་སུ་བསྟན་པས། ཁྱབ་བྱ་དུག་ལྔ་ལ་ཁྱབ་བྱེད་གཏི་མུག་ཕྲ་རགས་ཀྱི་སྒྲིབ་གསུམ་བག་ཆགས་དང་བཅས་པ་སྤངས་ནས་སྐུ་གསུམ་བདེ་གསལ་མི་རྟོག་པའི་ཡེ་ཤེས་ཆེན་པོའི་ཀློང་དུ་མངོན་པར་བྱང་ཆུབ་པར་མཛད་པ་ཆོས་ཉིད་ཡིན་པས་ན། སྐབས་འདིར་གང་དག་ཞི་བའི་ཕྲིན་ལས་ཀྱི་རྗེས་སུ་འཛིན་པར་འོས་པའི་གང་ཟག་ལ་རྣམ་པ་དེ་དང་མཐུན་པའི་བདེ་གཤེགས་ཞི་བ་རྡོ་རྗེ་དབྱིངས་ཀྱི་དཀྱིལ་འཁོར་དུ་ཤར་བ་སྟེ། དེ་ཉིད་ལོངས་སྐུ་ཆགས་བཅས་ཀྱི་རྣམ་པར་སྣང་བས་སྐུ་ཞི་ཚུལ་དགུ་དང་ལྡན་ཞིང༌། དེ་མཛེས་པའི་རྒྱན་ཆས་འཇིག་རྟེན་ན་བསོད་ནམས་ཆེན་པོས་སྟོབས་ཀྱི་འཁོར་ལོའི་བསྒྱུར་བའི་ཆ་བྱད་དང་མཚུངས་པ་སྟེ། ཞི་བ་ལོངས་སྤྱོད་རྫོགས་པའི་རྒྱན་ཆས་བཅུ་གསུམ་འདི་གསོལ་བས་ནང་དུ་ས་བཅུ་ལམ་ལྔ་སྐུ་གསུམ་དང་བཅས་པའི་ཡོན་ཏན་ཡོངས་སུ་རྫོགས་པའི་ཆེ་རྟགས་སུ་མཚོན་བྱེད་ཡིན་པས་ན། རང་རང་གི་ལྷག་པའི་ལྷ་ཡི་ང་རྒྱལ་ལ་གནས་པས་ཚིག་དང་མཐུན་པའི་ངེས་ཤེས་རྒྱུད་ལ་སྐྱེད་པར་མཛོད་ཅིག ༈ དཔལ་ཆས་ལ། འོ། གདུལ་བྱ་རྒྱུད་མི་སྲུན་པའི་བདུད་དང་རུ་ཏྲ་མུ་སྟེགས་ཀྱི་ཚོགས་རྣམས་འདུལ་བའི་ཕྱིར་ཆོས་ཉིད་རྣམ་པར་མི་རྟོག་པའི་དབྱིངས་ལས། སྐུ་གར་དགུའི་གཟི་བརྗིད་བསྐལ་པའི་མེ་ལྟར་འབར་བས་གདུག་པ་ཅན་གྱི་ང་རྒྱལ་དང་ཞེ་སྡང་བཅོམ་སྟེ་སེམས་དཔའ་བཀོང་བས་བྲན་དང་འབངས་སུ་བཀོལ་ནས། དེ་དག་གི་རྒྱན་ཆས་དཔལ་དང་དུར་ཁྲོད་ཀྱི་ཆས་རྣམས་རྒྱལ་བྱེད་དཔའ་རྟགས་ཀྱི་ཚུལ་དུ་བཞེས་པའི་རྣམ་ཐར་རྗེས་སུ་དྲན་པ་མཚོན་ཕྱིར་དྲག་གཏུམ་ཁྲོ་བོའི་ང་རྒྱལ་ལ་གནས་པའི་ཆས་རྣམས་ཀྱིས་མངའ་གསོལ་བའི་ཐུགས་མོས་མཛོད་ཅིག ༈ མངའ་གསོལ་རྟགས་གདབ་ཡོད་སྐབས། འོ། དུར་ཁྲོད་རོལ་པའི་ཚོགས་ཁང་རྡོ་རྗེ་གསང་བ་ཆེན་པོའི་གཞལ་ཡས་ཁང་འདིར། རྡོ་རྗེའི་གཏོར་བླུགས་ཀྱིས་རྒྱུད་སྨིན་ཅིང་གསང་བའི་ལྟ་སྒོམ་སྤྱོད་པ་ལ་དབང་བའི་ཧེ་རུ་ཀའི་འདུས་པ་དམ་གཙང་རིག་པ་འཛིན་པ་ཕོ་མོ་ལས། ཐ་མལ་གྱི་སྐྱེ་བོ་འཇུག་ཏུ་མི་གཏུབ་པས་ན་དེ་དག་གི་སྐབས་སྤྱོད་པ་དང༌། ཡེ་ཤེས་བདེ་བ་ཆེན་པོའི་གཟི་བྱིན་གྱིས་ཚོགས་བརྒྱད་དབྱིངས་སུ་དག་སྟེ། འཕགས་པའི་ལམ་ཡན་ལག་བརྒྱད་ཀྱི་སྤངས་རྟོགས་ལ་དབང་བསྒྱུར་བས། དབང་དང་སྟོབས་བཅུའི་དེ་ཉིད་མཐར་ཕྱིན་པས། རྡོ་རྗེ་ཐེག་པའི་བསླབ་པའི་མཐའ་བཅུའི་དེ་ཉིད་ལ་གདེང་ཐོབ་པ་མཚོན་ཕྱིར། སྔོན་དཔལ་ཆེན་པོས་རུ་ཏྲ་བསྒྲལ་བའི་ཚེ། ཁམས་གསུམ་གྱི་གདུག་པ་ཅན་མི་སྲུན་ཤ་ཟ་སྲིན་པོའི་གཟུགས་ལ་ཞེ་སྡང་རུས་མཐར་རྒྱས་པའི་མཆེ་བ་ཅན་གཅན་གཟན་གྱི་པགས་པ། འདོད་ཆགས་ཁྲག་མཐར་རྒྱས་པའི་གཤོག་པ་དང་མཇུག་མ་སྐྱེས་ནས་དུར་ཁྲོད་འཇིགས་པའི་ཆས་ཀྱིས་ལུས་ལ་རྒྱན་དུ་བྱས་པ་རྣམས་རྒྱལ་བྱེད་དཔའ་རྟགས་ཀྱི་ཚུལ་དུ་སྐུ་ལ་བཞེས་ནས་ཁྲག་འཐུང་འབར་བའི་ཆས་སུ་བྱིན་གྱིས་བརླབ་པའི་བྱུགས་པའི་རྩི་གསུམ། འདོགས་པའི་རྒྱན་གཉིས། བགོ་བའི་གོས་གསུམ་བཅས། དུར་ཁྲོད་ཀྱི་ཆས་རྣམས་ཀྱིས་བརྒྱན་ཏེ་ཧེ་རུ་ཀའི་རིགས་སུ་བསྐྲུན་པའི་ཆེ་བའི་དོན་དང་རྟགས་ལ་དགོངས་པ་བཞག་སྟེ། དབྱངས་འབོར་ལེན་དང་ཆས་རྣམས་ཀྱིས་བརྒྱན་པར་ཞུ། ༈ མཆེད་བསྲེ་བསྣན་སྐབས། དེ་ལ་སྤྱིར་རྡོ་རྗེ་ཐེག་པའི་ལམ་གསང་སྔགས་དབང་གི་མཐའ་ཅན། དབང་དམ་ཚིག་གི་མཐའ་ཅན་ཞེས་མཆོག་ཐུན་དངོས་གྲུབ་ཀྱི་རྩ་བ་དམ་ཚིག་དག་པ་ལ་རག་ལས་པ་སྟེ། ས་མ་ཡའི་སྒྲ་ལས་དྲངས་ན་བདག་ཉིད་ཆེན་པོ་རྣམས་ཀྱི་བཀས་བཅད་པའི་མཚམས་ལས་འདའ་མི་རུང་བ། རྣལ་འབྱོར་དབང་ཕྱུག་རྣམས་ཀྱིས་བསླབ་པའི་འཇུག་ལྡོག་ཚུལ་བཞིན་བྱེད་པ་སྟེ། དམ་ཚིག་གི་རྣམ་གྲངས་ཀྱང༌། རྒྱུད་སྡེ་གོང་འོག་རིགས་ལྔ་སྤྱིའི་དམ་ཚིག །ཁྱད་པར་སྔགས་བླ་མེད་ཀྱི་དམ་ཚིག་ཕྱི་ནང་གསང་གསུམ། སྒྲུབ་པ་ལྷག་པའི་དམ་ཚིག་ཉི་ཤུ་སོགས་སོ་སོའི་དབྱེ་བསྡུ་མཐའ་ཀླས་པ་གསུངས་པ་ཀུན། མ་ཉམས་པར་ལེགས་པར་བསྲུངས་ན་ཡོན་ཏན་མ་བཙལ་ལྷུན་གྱིས་གྲུབ། འཇིག་རྟེན་པའི་གཙོ་དང་འཁོར་གྱིས་བཀུར། སངས་རྒྱས་དང་བྱང་ཆུབ་སེམས་དཔས་སྲས་དང་སྤུན་དུ་དགོངས། དེ་བཞིན་གཤེགས་པ་ཉིད་དང་སྤྱོད་ཡུལ་གཅིག །ཆོས་ཐམས་ཅད་ཀུན་ཏུ་བཟང་པོའི་ཞིང་དུ་སྦྱོར་བས་འཇིགས་པ་དང་བག་ཚ་མེད། དྲང་ངེས་ཀྱི་སྡོམ་པ་ཐམས་ཅད་སྲུང་བར་འགྱུར་ཞིང་རྣམ་པར་དག །ཉམས་ཀྱང་སྐོང་བའི་ཐབས་ཀྱིས་སོར་ཆུད་པའི་ཡོན་ཏན་བདུན་དུ་གསུངས་པའི་གནད་ཤེས་པས་འདིར་དཀྱིལ་འཁོར་གཅིག་ལ་བརྟེན། སྟོན་པ་རྡོ་རྗེ་རྒྱལ་པོ་གཅིག་གི་དྲུང་དུ་བསྙེན་པའི་རྡོ་རྗེའི་རིག་པ་འཛིན་པ་མཆེད་ལྕམ་རྣམས་ཀྱང་སྣང་གྲགས་རིག་པ་དཀྱིལ་འཁོར་གྱི་ལྷའི་སྐུ་གསུང་ཐུགས་རྡོ་རྗེའི་དག་སྣང་དང་མ་བྲལ་བས་དམ་ཚིག་སྤང་བླང་ལ་འབད་པ་གལ་ཆེ་བས་མཆེད་བསྲེ་བསྣན་གྱི་རིམ་པ་ལ་འཇུག་པར་ཞུ། ༈ བཟླས་པའི་སྐབས། དེ་ཡང་ཇི་སྐད་དུ་རྣམ་སྣང་མངོན་བྱང་ལས། གཉིས་མེད་ཡེ་ཤེས་འདི་ཉིད་ནི། ཐུབ་པས་སྔགས་ཞེས་གསུངས་པ་ཡིན། ཞེས་པ་ལྟར། རྒྱུ་ཐབས་ཤེས་ཀྱི་ཡི་གེ་ལས་བཟླ་བྱའི་སྔགས་ཀྱི་ངོ་བོར་གྱུར་པ་གང་ཞིག །དངོས་གྲུབ་སྒྲུབ་པ་ལ་ནུས་པ་ཐོགས་མེད་དུ་གྱུར་པ་གྲུབ་པ་བཞི་དང་ལྡན་པ་སྟེ། སྟོང་ཆེན་མཉམ་ཉིད་ཨེ་ཡི་ངོ་བོར་ཆོས་ཉིད་ངོ་བོས་གྲུབ་པ། སྔགས་རང་རང་གི་ངོ་བོར་ཐུན་མོང་མ་ཡིན་པ་སྣང་བའི་རང་བཞིན་བསླུ་མེད་དུ་ཝཾ་ཡིག་བདེ་བ་ཆེན་པོའི་བདག་ཉིད་ཆོས་ཅན་རང་བཞིན་གྱིས་གྲུབ་པ། ཆོས་ཀུན་ལ་མངའ་དབང་བརྙེས་པའི་སངས་རྒྱས་རྣམས་ཀྱིས་ཡི་གེ་གཅིག་ནས་མང་པོའི་བར་གྱི་སྔགས་རྣམས་སུ་ཡེ་ཤེས་ཉིད་རྣམ་པར་འཕྲུལ་པར་བསྟན་པས་ན་བྱིན་གྱི་རླབས་ཀྱིས་གྲུབ་པ། སྨན་དང་ནོར་བུའི་ནུས་པ་བཞིན་དུ་སྔགས་དེ་དག་དངོས་གྲུབ་སྒྲུབ་པའི་ནུས་པ་ཐོགས་པ་མེད་པ་ནུས་པའི་མཐུས་གྲུབ་པ་སངས་རྒྱས་རྣམས་ཀྱི་གསུང་གི་དཀྱིལ་འཁོར་སྟེ། རྟོག་མེད་ཡིད་བཞིན་ནོར་བུའི་ཚུལ་དུ་དངོས་གྲུབ་མཐའ་དག་སྟེར་བ་སྟེ། དེ་ཡང་དཀྱིལ་འཁོར་གྱི་ལྷའི་ཞལ་བལྟ་བ་དང༌། ལྟ་སྒོམ་ཟབ་མོ་རྣམས་ནི་རྒྱུད་དག་པ་འབའ་ཞིག་ལས། ཀུན་གྱི་ཐུན་མོང་མ་ཡིན་ལ། སྔགས་ནི་གདུལ་བྱ་ཐུན་མོང་གི་བཟླར་བཏུབ་པ་དང༌། སྔགས་ཀྱི་ཡི་གེའི་གཟུགས་མཐོང་བ་དང༌། སྒྲ་ཐོས་པ་ཙམ་ཡང་དོན་ཆེན་པོ་དང་ལྡན་པར་འཇམ་དཔལ་རྩ་བའི་རྟོག་པ་ལས། དེ་བཞིན་གཤེགས་པའི་སྔགས་བཟླས་པ། །དེ་ལྟར་སྔགས་རྣམས་དོན་ཡོད་དོ། །སེམས་ཅན་མིག་ཟུར་གྱིས་བལྟས་པའང༌། །རྗེས་སུ་བཟུང་བ་ཉིད་དུ་འགྱུར། །ཞེས་སོ། །དེ་ལྟ་བུའི་ཟབ་མོའི་སྔགས་བཟླ་བ་ལ། ཤེས་རབ་ཟབ་མོའི་སྔགས་ཀྱི་ངོ་བོ། དབྱེ་བ། སྒྲ་དོན། ཕན་ཡོན་ཤེས་པས་ཡིད་ཆེས་བསྐྱེད། ཏིང་འཛིན་ཟབ་མོའི་སྲོག་སྡོམ་གཟེར་བཞི་དང་ལྡན་པས་སྔགས་ཀྱི་དམིགས་པ་ལ་གནས། བརྩོན་འགྲུས་ཟབ་མོའི་སྔགས་བཟླས་པའི་སྐྱོན་དང་བྲལ་ཞིང་ཡོན་ཏན་བཅུ་དང་ལྡན་པས་ནུས་པའི་སྟོབས་བསྐྱེད་པའི་རྫས་སྔགས་ཀྱི་སྦྱོར་བས་སྔགས་ཀྱི་སྤྱོད་པ་མཐར་དབྱུང་ནས། ད་ལྟ་ལས་དང་པོ་པའི་སྐབས་འདིར་ལྷ་ཉིད་སྔགས་ཀྱི་རྣམ་པ་བསྟན་པས་གདུལ་བྱའི་དོན་མཛད་པ་ཡིན་ཞིང༌། སྔགས་བཟླས་པས་ལས་དང་རྣམ་སྨིན་གྱི་སྒྲིབ་པ་ཟད་ནས་ལྷའི་རྗེས་སུ་བཟུང་བའི་སྐལ་བ་ཅན་དུ་གྱུར་པ་ན་སྔགས་ཉིད་ལྷར་གནས་གྱུར་ནས་ཞལ་མཐོང་བ་སྟེ། དོན་དུ་སངས་རྒྱས་ཀྱི་ཡེ་ཤེས་རྣམ་པ་ཐམས་ཅད་པ་ཉིད་གདུལ་བྱ་གང་ལ་གང་འདུལ་དུ་སྣང་བའི་ངེས་ཤེས་ཀྱི་དད་པས། ཡིད་བཟླས་དང༌། ཤུབ་བུར་བཟླས་པ། དབྱངས་སུ་བཟླས་པ་རྣམས་ལས་སྐབས་འདིར། དབྱངས་སུ་གྱེར་བ་དང༌། ཞི་བའི་སྔགས་རྣམས་ཚངས་པའི་དབྱངས་དང་ལྡན་པས་ཡིད་འཕྲོག་པ། འཁུན་ཞིང་གདུང་བས་བཟླ། ཁྲོ་བོའི་སྔགས་རྣམས་འབྲུག་སྒྲ་ལྟར་གདངས་ཆེ་ཞིང་དྲག་པ་དང༌། རྡོ་རྗེ་སྲིན་པོའི་ངུར་སྐད་ཀྱི་གདངས་དང་ལྡན་པ་དང༌། ཛཔ྄་ཀྱི་བཟླས་པ་ཆུ་བོའི་རྒྱུན་བཞིན་ཉིན་མཚན་རྒྱུན་མི་བཅད་པ་དང་བཅས་བཟླ་བར་ཞུའོ། ༈ ཡང་བསྙེན་བཟླས་སྐབས་སུ། དེ་ལ་འདིར་རྡོ་རྗེའི་ཐེག་པའི་ལམ་གྱི་སྙིང་པོ་ནི། བསླབ་པའི་མཐའ་བཅུས་ཉམས་སུ་ལེན་དགོས་པས་ན། དང་པོར་ལྟ་བ་བརྒལ་རྟགས་ཀྱིས་གཏན་ལ་བབ་དགོས་ཏེ། ལམ་སྒྲུབ་པ་ཐམས་ཅད་ལྟ་བ་དང་རྗེས་སུ་མཐུན་པར་འཇུག་པ་ཆོས་ཉིད་ཡིན་པས། རྡོ་རྗེ་ཐེག་པའི་ལམ་སྒོམ་པ་ལ་སོགས་པ་ཀུན་ཀྱང་དག་མཉམ་རྟོགས་པ་འདིའི་ཚུལ་དང་མཐུན་པར་འཇུག་པ་འབའ་ཞིག་ཡིན་པས་ན། པདྨའི་སྙིང་པོའི་རྒྱུད་ལས། མི་སྐྱོད་རྡོ་རྗེ་སེམས་དཔའ་སོགས༔ རིགས་ཀྱི་འཁོར་ལོས་སྒྱུར་བ་ལྔ༔ ཕུང་པོ་ལྔ་ཉིད་རྣམ་པར་དག༔ འབྱུང་བ་དབྱིངས་ཀྱི་ཡུམ་ཆེན་ཏེ༔ ཞེས་སོགས་གསུངས་པ་ལྟར། སྣོད་བཅུད་རྒྱུད་གསུམ་གྱི་ཆོས་ཐམས་ཅད་རིགས་ལྔ་སྒྱུ་འཕྲུལ་དྲ་བའི་སྐུ་དང་ཡེ་ཤེས་ཀྱི་ངོ་བོར་གདོད་ནས་དག་པར་སངས་རྒྱས་པ་ཐབས་སྣང་བའི་ཆ་ཕུང་ཁམས་སྐྱེ་མཆེད་དབང་ཡུལ་བྱ་བྱེད་དང་བཅས་པ་ཚེ་བདག་རིགས་ལྔ་སེམས་དཔའ་ལྕམ་དྲལ་ཐུབ་དྲུག་སྒོ་བ་བྱ་བྱེད་དང་བཅས་པའི་དཀྱིལ་འཁོར་འཁོར་ལོའི་སྤྲིན་ཆེན་པོའི་ཁྱབ་བྱེད་རིགས་ཀྱི་གཙོ་བོ་སྐུ་དེ་བཞིན་གཤེགས་པ་རྒྱལ་བ་རྟག་པ་ཡབ་ཡུམ་གྱི་ཚུལ་དུ་སྣང་བ་དག་པ་ཆེན་པོའི་བདག་ཉིད་གང༌། ཆོས་དབྱིངས་མཉམ་པ་ཆེན་པོ་འཆི་མེད་གཉུག་མ་དོན་གྱི་ཚེ་ལྷའི་ཡེ་ཤེས་ལྔ་གཉིས་སུ་མེད་པའི་ཚུལ་གྱིས་སྐྱེ་འགག་གནས་བྲལ་གྱི་དབྱིངས་སུ་རྟག་ཏུ་འཁྲུལ་པ་མེད་པའི་དོན། བརྒལ་བརྟགས་ཀྱིས་གཏན་ལ་ཕབ་པའི་ལྟ་བའི་བསྒྲུབ་གཞི་སྟེ། ལྟ་བ་དེའི་གནས་ལུགས་ཀྱི་དོན་རྒྱུད་ལ་འབྱོར་བའི་རྒྱུ་ནི་མི་གཡོ་བའི་ཏིང་ངེ་འཛིན་ཏེ་དེ་ལ་སྐུ་བསྐྱེད་པའི་ཕྱག་རྒྱས་རྡོ་རྗེ་ཚེའི་དཀྱིལ་འཁོར་གྱིས་སྣང་སྲིད་དག་པ་རབ་འབྱམས་སུ་ཤར། གསུང་བཟླས་པ་སྔགས་ཀྱིས་དངོས་གྲུབ་ཟབ་མོའི་གནས་ལ་ངེས་པར་སྦྱོར། ཐུགས་འོད་གསལ་དེ་ཁོ་ན་ཉིད་ཀྱིས་ཐམས་ཅད་ལ་རྒྱས་ཐེབ་པས་ཡེ་ཤེས་ཆེན་པོའི་དབྱིངས་སུ་སྦྱོར་བའི་བསྐྱེད་རྫོགས་རིམ་པ་གཉིས་དང་ལྡན་པའི་ཏིང་ངེ་འཛིན་ནི་ལས་དང་དངོས་གྲུབ་ཐམས་ཅད་ཀྱི་རྩ་བ་སྟེ། ལྟ་སྒོམ་དེའི་དྲོད་ཚད་དང་ལྡན་པའི་རྣལ་འབྱོར་པས་ལ་དོར་ན་སྤྱོད་པ་ལ་འཇུག་པས་སྣང་སྤྱོད་ཡེ་ཤེས་ཀྱི་རོལ་པ་ལས་མི་འདའ་བ་ལ་དམ་ཚིག་གི་རྣམ་གྲངས་ཐམས་ཅད་འདུས་པས་དམ་ཚིག་རྣམ་པར་དག་པ་དང༌། གཞི་འབྲས་དབྱེར་མེད་རང་བཞིན་གྱི་དཀྱིལ་འཁོར་གདོད་ནས་གནས་པ་ལ། འཁོར་ཆོས་གཟུགས་བརྙན་གྱི་དཀྱིལ་འཁོར་པར་སྦྱང་པའི་ཕྱིར་ལྷག་པ་གཟུགས་བརྙན་གྱི་དཀྱིལ་འཁོར་ཚུལ་བཞིན་བཞེངས་ཏེ། སྒོམ་པ་ཏིང་ངེ་འཛིན་གྱི་དཀྱིལ་འཁོར་གསལ་གདབ་ཕྱིར་ལྷག་པ་ཏིང་ངེ་འཛིན་དཀྱིལ་འཁོར་དང༌། བྱང་ཆུབ་སེམས་ཀྱི་དཀྱིལ་འཁོར་རྣལ་འབྱོར་ཕོ་མོ་ཚོམ་བུ་ཚོགས་ཀྱི་དཀྱིལ་འཁོར་གྱི་གཞི་ལམ་འབྲས་བུའི་བཀོད་པ་དཀྱིལ་འཁོར་དབྱེར་མེད་དུ་སྣང་བ་ལ་བརྟེན་ནས་གཞི་དུས་གནས་སྐབས་བཞིའི་དྲི་མ་སེལ་བ་དང༌། བསྐྱེད་རིམ་རང་ལུས་གཞན་ལུས་དེ་ཁོ་ན་ཉིད་ཀྱི་ལམ་བཞི་སྒོམ་པ་དང༌། འབྲས་བུ་སྐུ་བཞི་ཐོབ་པའི་ཕྱིར་རྡོ་རྗེ་སློབ་མའི་དབང་ཐུན་མོང་རིགས་པའི་བུམ་དབང་ལྔ་རྗེས་འབྲེལ་རིག་པའི་དབང་ལྔ་དང༌། སྐུ་གསུང་ཐུགས་དབང༌། རྡོ་རྗེ་སློབ་དཔོན་གྱི་དབང་བཅས་དང༌། གསང་བ་ཤེར་ཡེ། ཚིག་དབང་སྟེ་ཟབ་དབང་གསུམ། མཐའ་རྟེན་སྐུ་ཚེ་འབྲང༌། གསུང་ཚེ་ཆང༌། ཐུགས་ཚེ་རིལ་བཅས་པའི་དབང་རྣམས་སྔོན་དངོས་རྗེས་རིམ་ཚང་བས་བསྐུར་ཏེ། དབང་དཀྱིལ་འཁོར་ལ་བརྟེན་ནས་ཐོབ་ཀྱང༌། དབང་སྲོག་རྒྱུད་ལ་འཛིན་པ་དམ་ཚིག་ཡིན་པས། སྤྱི་དང་ཁྱད་པར་ལྷག་པའི་དམ་ཚིག་རྡོ་རྗེ་ཐེག་པའི་རྒྱུད་ལུང་མན་ངག་ལས་འབྱུང་བ་རྣམས་དང༌། ཁྱད་པར་རྡོ་རྗེའི་ཚེ་སྒྲུབ་པའི་དམ་ཚིག་ཏུ་གཏེར་གཞུང་དངོས་ལས། གཞི་དེར་རྟེན་གསུམ་བྱིན་ཅན་ལ༔ ཞག་བདུན་མཆོད་པ་རྒྱུན་མི་བཅད༔ བར་མ་ཆད་པའི་མར་མེ་འབུལ༔ དེ་རྫོགས་སྟོན་མོ་རིགས་བཞི་བྱ༔ ཞེས་རྟེན་འབྲེལ་གནད་ཀྱི་དམ་ཚིག་ཏུ་གསུངས་པ་ལྟར། འཆི་ངེས་ཀྱི་སྲོག་བསླུ། མར་མེ་གཙོ་བོར་གྱུར་པའི་མཆོད་སྦྱིན་སྤྱི་དང༌། ཁྱད་པར་སྐུ་གསུང་ཐུགས་རྟེན་བཞེངས་པ་དང༌། ཚེ་དཔག་ཏུ་མེད་པའི་གཟུངས་དང་སྙིང་པོ་སྒྲོགས་པ། མགྲོན་རིགས་བཞི་ལ་སྟོན་མོ་བྱ་བ་སོགས་གནང་བཀག་གི་མཚམས་ལས་མི་འདའ་བའི་དམ་ཚིག་ཚུལ་བཞིན་སྲུང་བ་དང༌། ཕྱི་ཡོ་བྱད། ནང་ནུས་པ་ཐོབ་པའི་རྣལ་འབྱོར་པས་ཕུན་སུམ་ཚོགས་པ་ལྔས་སྒྲུབ་པའི་གཞི་བཟུང་སྟེ། བསྙེན་སྒྲུབ་ཡན་ལག་བཞིས་སྒྲུབ་པའི་གཞུང་བསྲངས་བའི་ཕྱིར། ཕྱི་ནང་གསང་བའི་མཚམས་བཅད། དཀྱིལ་འཁོར་ལྷ་སློབ་དཔོན་རྫས་སློབ་མ་སྟ་གོན་ལྔ་སྔོན་དུ་འགྲོ་བས་བསྙེན་པ་སྒྲུབ་པའི་གཞུང་བསྲང་ནས་བཟླས་སྒོམ་ལ་འབད་པས་དངོས་གྲུབ་ཉེ་བའི་མཚན་མ་མཐོང་བ་ཉེ་བསྙེན། དངོས་གྲུབ་ཀྱི་མཚན་མ་བརྟན་པོ་ཐོབ་པ་སྒྲུབ་པ། དངོས་གྲུབ་བླང་བ་སྒྲུབ་པ་ཆེན་པོ་བཞིས་དོན་དུ་གཉེར་བའི་ཡན་ལག་རྫོགས་པའི་གྲོགས་སུ། ཉེར་སྤྱོད་ཕྱི། ཡིད་སྤྲུལ་ཀུན་བཟང༌། འདོད་ཡོན་ནང༌། བདེ་ཆེན་གསང་བ། བདུད་རྩི་སྨན་རཀ་གཏོར་མ། བསྟོད་པ་གླུ། ཁྱད་པར་ཚོགས་ཀྱི་འཁོར་ལོ་བཅས་དབང་བཞི་དང་རྗེས་སུ་འབྲེལ་བའི་གནས་སུ་སྟོབ་པ་མཆོད་པ་དང༌། ཕྱི་རོལ་གྱི་རྫས་འཕྲུལ་འཁོར། སྦྱིན་སྲེག །མཆོད་རྟེན། བཅུད་ལེན་སོགས་དང༌། ནང་ལུས་ཀྱི་ཕྱག་རྒྱ་གར། ལྟ་སྟངས་འདུག་ཚུལ་སོགས་དང༌། ངག་གི་བསྙེན་སྒྲུབ་ལས་ཀྱི་བཟླས་བརྗོད། གླུ་བདེན་ཚིག །ཡིད་ཀྱི་ཏིང་ངེ་འཛིན་དང་ལྡན་པས་འཆི་མེད་ཚེ་དང་ཡེ་ཤེས་ཀྱི་དངོས་གྲུབ་གཙོ་བོར་གྱུར་པའི་མཆོག་དང་ཐུན་མོང་གི་ལས་སྒྲུབ་པ་ནི། རོལ་པ་ཕྲིན་ལས། འཆིང་བ་ཕྱག་རྒྱ། ཟློས་པ་སྔགས་རྣམས་ཚང་ལ་མ་ནོར་བར་སྒྲུབ་པ་པོའི་བློ་ནུས་དང་སྦྱར་ཏེ་ཉམས་སུ་བླང་དགོས་པའི་ཚུལ་ཀྱང་ཐུགས་དམ་གསལ་འདེབས་ཀྱི་ཚུལ་དུ་ཞུས་པའོ། ༈ གསུམ་པ་ལས་མཐའ་རྒྱས་ཀྱིས་སྒྲུབ་པའི་རྗེས་སྐྱོང་བ་ལ། སྒྲུབ་པའི་རྒྱུ་རྡོ་རྗེའི་ཁམས་དྲུག་དང་ལྡན་པ་ཐེག་གསུམ་སྤྱི་དང་ཁྱད་པར་རྡོ་རྗེ་ཐེག་པའི་དབང་བཞིའི་ལམ་གྱི་རྟེན་ཕུན་སུམ་ཚོགས་པ་འདི་ཉིད་ཡུན་རིང་དུ་བརྟན་པ་ནི། མངོན་མཐོ་དང་དེས་ལེགས་ཀྱི་དོན་ཐམས་ཅད་བསྒྲུབ་ཏུ་རུང་བ་སྟེ། དེ་ཉིད་སྨན་དང་བཅུད་ལེན་གྱི་སྦྱོར་བས་ཚེ་བསྲིང་བ་ཕྱི་ནང་ཐུན་མོང་གི་ལུགས། སྲོག་གི་སྦྱིན་པ་གཏོང་བ་དང་རྣམ་དཀར་གྱི་བགྱི་བས་ཚེ་བསྲིང་བ་མདོ་སྔགས་ཐུན་མོང་གི་ལུགས། ཏིང་ངེ་འཛིན་དང་རིགས་སྔགས་ཀྱི་སྦྱོར་བ་སོགས་ཐབས་ཟབ་མོའི་རྟེན་འབྲེལ་གྱིས་ཚེ་བསྲིང་བ་སྔགས་ལུགས་ཐུན་མོང་མ་ཡིན་པ་རྣམས་སུ་མཆིས་པ་ལས། བྱ་སླ་ལ་དོན་ཆེ་བ་དངོས་གྲུབ་གཉིས་ཀ་གཅིག་ཆར་ཐོབ་པ་རྡོ་རྗེའི་རིགས་སྔགས་དང་རྒྱུད་ཀྱི་སྦྱོར་བ་ལ་བརྟེན་ནས་ཚེ་སྒྲུབ་པ་ལ། གསར་རྙིང་བཀའ་གཏེར་དག་སྣང་གི་བཀའ་བབ་མཐའ་ཡས་པ་ལས། འདིར་གསུང་རྡོ་རྗེ་འཆི་མེད་གྲུབ་པའི་རིག་འཛིན་གྱི་སྐུར་བཞེངས་པ་རྒྱལ་དབང་མཚོ་སྐྱེས་རྡོ་རྗེས་མངའ་བདག་ཆོས་ཀྱི་རྒྱལ་པོ་ཁྲི་སྲོང་ལྡེའུ་བཙན་དགུང་ལོ་བཅུ་གསུམ་གྱི་བར་དུ་སྐུ་ཚེ་བསྲིང་བའི་སྒྱུ་འཕྲུལ་རིགས་ལྔའི་ཚེ་སྒྲུབ། གུ་རུའི་ཐུགས་དམ་ཟབ་པ་སྐོར་བདུན་གྱི་ནང་ཚན་རྩ་གསུམ་ཚེ་ཟབ་ཀྱི་ཆ་ལག་ཏུ། མདོ་ཁམས་ནམ་མཁའ་མཛོད་དུ་གཏེར་རྒྱས་བཏབ་པ། ལྷ་སྲས་རྣམ་འཕྲུལ་སྤྲུལ་པའི་གཏེར་འབྱིན་གྲུབ་ཐོབ་ཡོངས་ཀྱི་འཁོར་ལོས་བསྒྱུར་བ། ཨོ་རྒྱན་མཆོག་གྱུར་བདེ་ཆེན་གླིང་པས་སྤྱན་དྲངས་པ་སྟེ། འདི་ཉིད་འཆི་ངེས་གང་ཟག་ཀྱང་༔ ལོ་གསུམ་བར་དུ་ངེས་པར་བསྲིང་༔ ཡང་ཡང་བསྐྱར་ན་བཅུ་གསུམ་བར༔ བསྲིང་བར་འགྱུར་བར་ཐེ་ཚོམ་མེད༔ ཅེས་གསུངས་པ་ལྟར། སྤྱིར་སངས་རྒྱས་ཚེ་དཔག་མེད་ཀྱི་མཚན་ཙམ་ཐོས་པས་དུས་མིན་གྱི་འཆི་བ་འཇོམས་པ་སོགས་ཕན་ཡོན་ཚད་མེད་པར་གསུངས་པ་ནི། ལྷ་སྔགས་ཏིང་འཛིན་ཟབ་མོའི་ཁྱད་ཆོས་དང་ལྡན་ཞིང༌། དབང་དང་སྒྲུབ་ཆེན་གྱི་ཁྱད་པར་དུ་མས་དེ་ལས་ཀྱང་ཟབ་ཁྱད་དང་ལྡན་པའི་ཐབས་མཁས་ཚོམ་བུ་ཚོགས་སྒྲུབ་ཀྱི་ལེགས་བྱས་མི་ཟད་པའི་དཔལ་བྱང་ཆུབ་སྤྱོད་པ་རྒྱ་མཚོར་འཇུག་པའི་ཆེད་དུ། མར་མེའི་སྨོན་ལམ་གྱིས་རྒྱས་བཏབ་པ་སྟེ། སྤྱིར་མར་མེ་ཕུལ་བའི་ཕན་ཡོན་སྤྱན་རས་གཟིགས་ཀྱི་མདོ་ལས། བདེ་གཤེགས་མཆོད་རྟེན་མར་མེ་ཕུལ་བ་ན། །རྣམ་གྲོལ་མཆོག་མངའ་སྟོབས་བཅུ་རྣམས་ལྡན་ཞིང༌། །དེ་བཞིན་མ་འདྲེས་ཆོས་ཀྱི་ཕ་རོལ་ཕྱིན། །ཀུན་ནས་སྤྱན་ལྡན་བདེ་བར་གཤེགས་པར་འགྱུར། །ཞེས་གསུངས་པ་དང༌། ཁྱད་པར་གསང་སྔགས་རྡོ་རྗེ་ཐེག་པའི་ལམ་ནས། མར་མེའི་ངོ་བོ་འོད་གསལ་ཡེ་ཤེས་དབྱིངས་ཀྱི་དབང་ཕྱུག་མ་ལ་རྣམ་པ་ས་ཆུའི་དྭངས་མ་རྩི་བཅུད་ཀྱི་ཉིང་ཁུ། མེ་རླུང་གི་དྭངས་མ་དྲོད་དང་གཡོ་བ་གཉིས་ལྡན། རང་བཞིན་འོད་ཟེར་གྱི་ཕྲེང་བ་སོགས་སྣང་བྱེད་ཀྱི་རིགས་དང༌། ནང་བཅུད་ཀྱི་མར་མེ་རྡོ་རྗེ་ཕུང་པོའི་གྲོང་ཁྱེར་དུ་ཡེ་ཤེས་ཀྱི་རྩ་རླུང་ཐིག་ལེའི་སྣང་བས་ཟག་བཅས་ལས་ཉོན་གྱི་མུན་པ་སེལ་བ་དང༌། གསང་བ་བདེ་ཆེན་གྱི་མར་མེས་དགའ་བཞི་སྟོང་པ་ཟུང་འཇུག་གི་སྣང་བས་སད་རྨི་གཉིད་འཐུག་སྙོམས་འཇུག་གི་སྒྲིབ་མུན་འཇོམས་པ་དང༌། དེ་ཁོ་ན་ཉིད་འོད་གསལ་སྣང་བཞིའི་མར་མེས་སྣང་གསུམ་འཕོ་སྒྲིབ་ཀྱི་མུན་པ་སེལ་ནས་སྣང་བཞིའི་སྒྲོན་མ་བཀོད་པ་དབང་བཞི་པའི་ལམ་མཆོག་མཚོན་པའི་དམ་ཚིག་གི་རྟེན་དུ་བྱིན་གྱིས་བརླབས་ནས་ཕུལ་བས་འཁྲུལ་རྟོག་འཁོར་བའི་མུན་པ་བསལ་ཏེ་སྐུ་བཞི་ཡེ་ཤེས་ལྔ་ལྡན་གྱི་སྣང་བ་རྒྱས་པའི་མཆོད་ཕྲེང་སྟོན་པ་རྡོ་རྗེ་རྒྱལ་པོ་དང་འཁོར་ལོའི་དབང་ཕྱུག་དབྱེར་མེད་པ་ལ་ཕུལ་ནས། ཚོམ་བུ་ཚོགས་སུ་སྒྲུབ་པ་ཆེན་པོ་མཐོང་ཐོས་དྲན་རེག་གི་གདུལ་བྱ་ཐམས་ཅད་རྡོ་རྗེའི་གདུང་འཛིན་ཧེ་རུ་ཀའི་གྲོང་ཁྱེར་ཆེན་པོར་ཕྱམ་གཅིག་ཏུ་གྲོལ་བའི་བདེན་ཚིག་མར་མེའི་སྨོན་ལམ་གྱི་དབྱངས་འབོར་ལེན་ལ་འཇུག་པར་ཞུ། །རྒྱལ་ཀུན་རྗེས་བརྩེའི་ཡེ་ཤེས་འཇུག་པའི་མཐུ། །མཁའ་ཁྱབ་འགྲོ་ལ་བུ་གཅིག་ལྟར་བརྩེ་བའི། །རང་གཟུགས་ཚེ་དབང་པདྨའི་ཐུགས་ཏིག་གི །ཕྲིན་ལས་རྟག་ཁྱབ་ལྷུན་གྱིས་གྲུབ་གྱུར་ཅིག །ཅེས་པའང་སྤྲུལ་པའི་གཏེར་ཆེན་མཆོག་གྱུར་བདེ་ཆེན་གླིང་པའི་ཨེ་ཝཾ་ཆོས་ཀྱི་སྒར་ཆེན་འགྱུར་མེད་གླིང་དུ་ཉེར་མཁོར་གྱུར་པས། རིག་འཛིན་མཆོག་གི་སྐུ་གསུང་ཐུགས་ཀྱི་སྲས་མཆོག་སྤྲུལ་ཨོ་རྒྱན་སྟོབས་རྒྱལ་དང༌། དབུ་མཛད་པདྨ་བཀྲ་ཤིས་ལྷན་རྒྱས་ནས་གསུང་བསྐུལ་བཞིན་རིག་འཛིན་རྩལ་འཆང་གསུམ་གྱི་ཆོས་རྒྱུད་དུ་སྐྱེས་པའི་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་བྲིས་པས་ཟབ་གསང་མཆོག་གི་བསྟན་པའི་དཔལ་ཡོན་ཕྱོགས་དུས་གནས་སྐབས་ཀུན་ཏུ་དར་ཞིང་རྒྱས་པའི་རྟེན་འབྱུང་དུ་གྱུར་ཅིག །སརྦ་དཱ་མངྒ་ལམ། །བི་ཛ་ཡནྟུ།། །།

[edit]

@#/__/zab bdun sgyu 'phrul tshe dkar tshogs sgrub kyi gtong thun 'chi med tshangs chen lha'i rnga sgra zhes bya ba bzhugs so// khyab byed rgyal ba rtag pa bde gshegs sku/_/khyab bya pad+ma'i rigs lnga sgyu 'phrul sprin/_/bkra shis tshe mchog zhi khro'i dkyil 'khor lhar/_/rab dwangs yid kyi me tog 'dzum pas mchod/_'dir sgyu 'phrul dra ba'i rgyud kyi dgongs pa rnam snang tshe mtha' yas pa'i tshogs sgrub chen po'i gtong thun bri ba la/_thog mar ma traM bsgral ba'i skabs su/_rtsa rgyud gsang ba snying po las/_e ma ho bde gshegs snying po las/_rang gi rnam rtog las kyis sprul/_/zhes gsungs pa ltar/_khams gsum gyi sems can rnams chos nyid bde ba chen po dbyings dang 'du 'bral med pa'i don ma rtogs pa'i gti mug lhan skyes kyi cha la ru tra zhes brdar btags pa ste/_sgrib pa de'i dbang gis bdag gzhan gnyis su bzung ste gnas don lus kyi snang bar chags sdang rang rgyud du zhen pa la/_phyi ru ru tra pho mo ma ning rgyud gsum byung zhing*/_nang du nyon mongs dug gsum gyi sgrib pas sku gsung thugs rdo rje'i gsang ba la bar du gcod pa gang*/_sangs rgyas thabs mkhas la thugs rje'i rtsal myur bas rnam pa de dang mthun la/_ngo bo sku gsum gyi ye shes stobs su gyur pas dbang sgyur ba'i chos nyid ngang gis khro bo srid zhi'i spyi dpal chen po rigs gsum gyi skur bzhengs pas/_rdo rje khros pa'i mtshon chas gnyis 'dzin kun rtog gi bdud kyi rgyu ba bcad nas/_pho rgyud rdo rje khros pa'i he ru ka'i gar gyis bsgral/_mo rgyud bde chen 'bar ba ma chags thabs kyi sbyor bas btul ba las/_gnyis med rdo rje sems dpa'i ye shes nA da'i rgyud kyi sgra dbyangs rdo rje theg pa'i bstan pa byung bas na/_gzhi rang bzhin lhun gyis grub pa'i ye shes lha'i dkyil 'khor mngon du bya ste sgrub pa'i ched du/_sangs rgyas kyi thugs rje 'gag pa med pa'i rdo rje tshe'i dkyil 'khor zhi khro rnam par rol pa'i sgrub byed byas te/_sngon byon rig 'dzin gong ma'i phyag bzhes bsnyen sgrub yan lag bzhis nyams su len pa la/_bgegs kyi rgyal po ma traM ru tra drag po'i stabs kyis bsgral zhing spar te rol pa'i bros mnan la/_yan lag dur khrod brgyad dang khog pa gzhal yas khang ste rdo rje'i zhing khams su byin gyis brlab pa'i phyir/_slob dpon srid zhi'i spyi dpal chen po khro rgyal stobs 'dus dbang chen rngams pa dpal gyi skur bzhengs pas/_rdo rje'i rta skad theng gsum bsgrags nas/_bde stong ye shes chen po'i rol pa sgrol ging dmar nag gnyis rta phag yab yum du gsal bas khams gsum dbyings su sgrol ba'i las rim la 'jug par zhu/__!__mnga' gsol skabs/_'o na bkra shis bde legs dang ldan pa deng gi char/_ji skad du/_rgyal ba rnams ni 'jig rten byon pa'i tshe/_/de yi gsung gi lung chen rnams la ni/_/phyi rol rgol ba ngan pa 'byung srid pas/_/dang po srid pa chos kyi lo rgyus smros/_/zhes pa ltar phun sum tshogs pa lngas sgrub pa'i gzhi bzung*/_bsnyen sgrub yan lag bzhis sgrub pa'i gzhung bsrang*/_las mtha' rgyas kyi rim pas sgrub pa'i rjes kyi bya ba gsum las/_thams cad mdor bsdu na bsgrub bya'i lha/_sgrub byed kyi chos/_bsgrubs pa'i 'bras bu gsum gyi rnam bzhag gi lo rgyus 'chad pa la/_dang po ni/_sangs rgyas rnams mi slob 'bras bu'i mchog mngon du mdzad pa'i yon tan gyi gtso bo/_rten sku lnga/_brten pa ye shes lnga/_mdzad pa phrin las dang gsum du 'du ba las gdul bya'i yul la rtag khyab lhun gyis grub pa'i mdzad pa phrin las kyi gtso bo ni gsung rdo rje ste/_de nyid kyi ngo bo chos dbyings skye 'gag gnas gsum dang bral ba las/_dmigs med rang byung gi rtag pa rgyun gyi thugs rje'i dpal las/_rnam pa de bzhin gshegs pa thams cad kyi gsung mi zad rgyan gyi 'khor lo'i dkyil 'khor gyi khyab bdag bde gshegs 'od mtshan stong 'bar pad+ma'i rigs kyi 'khor los sgyur ba sangs rgyas tshe dang ye shes dpag tu med pa'i skur bzhengs pa/_de nyid byang chub sems dpa'i tshul du bstan pa phyogs bcu'i sangs rgyas thams cad kyi snying rje'i rang gzugs 'phags pa spyan ras gzigs dbang phyug ni/_rdo rje theg pa'i rgyud sde rab 'byams nas dkyil 'khor 'khor lo'i dbang phyug pad+ma gar dbang rgyal ba rgya mtshor grags shing*/_tshangs pa rnga sgra'i sku dang zhing khams rgya mtsho'i spro bsdu'i bdag nyid rnam snang gangs chen mtsho longs spyod rdzogs pa'i skur snang ba yin/_de dag gi thugs rje dang phrin las kyi cha shas mi mjed 'jig rten gyi gdul bya'i don du phyogs dus rgyal ba ma lus pa'i spyi gzugs o rgyan sangs rgyas gnyis pa'i tshul du bstan nas/_bkra shis brag phug mA ra ti kar 'chi med tshe yi rig 'dzin sgrub pa'i tshe/_sprul gzhi tshe'i mgon po yab yum dngos su byon te/_skye 'chi'i mi 'jig rdo rje lta bu'i ye shes kyi sku brnyes/_tshe rgyud bye ba phrag brgya bstan nas srid pa ji srid rdo rje'i sku de'i mkha' khyab 'gro ba'i don mdzad cing*/_da lta'ang dzam gling gi bye brag zangs mdog dpal gyi ri bor rdo rje'i sku de nyid dngos su bzhugs pas/_de'i dkyil 'khor gyi ston pa dngos las gsan pa'i 'chi med rdo rje tshe'i rgyud lung man ngag gi gsang ba bsam gyis mi khyab pa gzhom med rdo rje'i nA da'i rang sgra rgyun mi chad par sgrogs pa'i zab tig gi gsang ba du ma zhig_/snyigs dus phyi ma'i gdul bya la dgongs nas bod kyi rje 'bangs 'dus pa so so'i snod dang dbang po'i khyad par bzhin/_bsgrub bya'i lha'i sgo nas dbye na rtsa ba gsum/_de re re la sku gsum/_rigs lnga spyi dang*/_bye brag gi sgrub tshul mi 'dra ba du ma las/_skabs 'dir spyir rgyal ba rigs lnga spyi sgrub/_bye brag tu sku rdo rje bde gshegs tshe mtha' yas pa rgyal ba rtag pa'i gtso bo la zhi khro rigs brgya'i 'khor gyis bskor ba ste/_sgrub byed rgyud lung man ngag gis dbye na/_rgyud ma hA yo ga'i rtsa ba sgyu 'phrul dra ba tan+t+ra sde bco brgyad las/_lung thugs dam zab pa skor bdun gyi rtsa ba/_rtsa gsum gcig dril tshe yi zab pa'i yan lag gi chos sde rnam snang sgyu 'phrul dra ba'i sgrub thabs khyad par can man ngag bskyed rdzogs rdzogs pa chen po nang rgyud yo ga gsum gyi dgongs pa bcud du dril ba 'di nyid gangs can mi'i lha chos rgyal tshangs pa lha'i me tog gi sku tshe dang phrin las nam mkha'i nor bu nam mkha'i ji srid du 'grib med 'char ba'i dge mtshan la ched du dgongs pas bsam yas brag dmar g.ya' ma lung du rgyal dbang mtsho skyes rdo rje'i 'chi med tshe'i dkyil 'khor zhal phyes te/_tshe dpag med dngos su byon nas grub pa'i rtags mtshan mtha' yas pa mngon du gyur kyang*/_bod yul spyi'i bsod nams kyi skal pa phra mor gyur pas rten 'brel ji bzhin ma byung kyang*/_sangs rgyas kyi thugs rje la nam yang 'phel 'grib ma mchis pas slar yang sgyu 'phrul rigs lnga'i tshe'i dkyil 'khor 'di nyid du dbang bskur bas/_chos rgyal nyid dgung lo bcu gsum du sku tshe bsrings te/_gdams pa'i zab chos phyi ma'i gdul bya la dgongs pas zab gter du mdo khams gnas chen nyer lnga'i ya gyal/_ye rgyal nam mkha' mdzod du rgyas btab pa lha sras dam 'dzin mu rub btsad po'i yang srid o rgyan mchog gyur bde chen gling pas spyan drangs pa'i dus bab kyi zab chos sgyu 'phrul tshe dpag med rigs lnga spyi sgrub kyi dkyil 'khor la brten nas tshom bu tshogs kyi sgrub pa'i skabs su bab pa ste/_'di la sngon 'gro/_dngos gzhi/_rjes rim gsum las/_dang po la/_sa gzhi brtag bslang*/_dbang du bya zhing*/_sbyar ba dang srung ba/_phyi nang gsang ba'i bshags pa bcas sngon du 'gro bas rgyud sbyangs shing*/_gzhan yang phyi nang gsang ba'i mtshams bcad pa/_lha dang bum pa slob ma bcas sngon 'gro sta gon gyi rim pa rnams rig 'dzin brgyud pa'i phyag bzhes bzhin legs par grub nas/_dngos gzhi gsang ba sngags kyi bsnyen sgrub yan lag bzhis gseng lam du bcug pa'i thog mar sgrub pa po rnams mnga' gsol zhing gnas su 'god pa ste/_de yang chos nyid ngo bo'i dbyings su ston 'khor dgongs pa dbyer med bde stong ye shes chen po'i thig le nyag gcig tu rnam dbyer ma mchis pa 'khor 'das dag mnyam rol pa'i lta ba'i gdeng bskyed cing*/_chos can rtags kyi phyag rgya 'chi med rdo rje tshe'i dkyil 'khor sgyu 'phrul dra ba zhi ba rdo rje dbyings kyi lha tshogs dang skal pa mnyam pa'i rdo rje'i rigs can/_dkyil 'khor gtso mchog ston pa rdo rje rgyal po rgyal ba rtag pa tshe dpag med/_tan gan gyi sgyu rtsal la mkhas shing shes rab kyi cha 'dzin yum kun tu bzang mo dbyings phyug ma/_rgyal ba rigs lnga mtshon pa'i/_rdo rje rgyal tshab/_rgyal theb bzhi yum dang bcas pa/_sems dpa' lcam dral bkra shis lha mo brgyad/_sgo ba bzhi sogs mtshon byed du/_skad gdangs che zhing cho ga'i las khrigs la mkhas pa'i karma las mkhan/_mchod pa'i bya bas dkyil 'khor dgyes pa skyed pa'i las kyi rdo rje/_mthong bzlog nus pa'i rdo rje spyan pa/_phyi nang gi bar chad srung ba'i rdo rje mtshams pa/_dam sri nyu le skrod gzir la dbang ba'i rdo rje ging chen dang*/_ging phran sogs sgrol ba'i las la mkhas pa/_dam tshig gtsang zhing bsnyen bzlas la brtson pa'i rdo rje mched lcam pho mo/_phud gtsang bskol mkhas kyis ston 'khor mnyes par mdzad pa rdo rje byan pho/_zhal zas kyi bya ba gtsang zhing dag par sbyor ba rdo rje phyag tshangs/_ston 'khor rnams kyi thugs dam bskang ba'i bran gyi khye'u pho mo/_phyi'i nyu le skrod cing mched lcam gyi bka' bzhin sgrub pa'i rdo rje rdul phyags rnams lhag pa'i lha rang rang gi nga rgyal la gnas pas sgom pa'i gdeng bskyed pa dang bcas/_sngags dang phyag rgya ting nge 'dzin mchod bstod bgegs 'dul sbyin sreg sogs tshar gcod rjes 'dzin gyi phrin las rnams spyod pas lam du khyer te mchog dang thun mong gi dngos grub mchog la myur du sbyor zhing rim gnyis kyi ting 'dzin gong 'phel du 'gyur bas na skabs su bab pa'i las dang bya ba de bzhin sgrub par 'os pa'i che rtags su mnga' gsol bas 'khor lo'i bsgyur ba'i sras rgyal thabs la bkod pa'i tshe/_glang po che sa srung gis rin po che'i bum pas spyi bo nas dbang bskur ba nas seng ge'i khri la bzhugs pas stong gsum gling bzhi'i 'jig rten dbang du byed pa dang chos mtshungs pa mtshon phyir bdud rtsi'i skyems drangs shing che ba brjod pa'i dbyangs 'bor len la 'jug par zhu/__!__chas zhugs skabs/_zhi chas yod skabs/_gu ru rin po che'i rdo rje'i gsung las/_ri bo ma la ya gnam lcags 'bar ba'i rtser:_bdud po ma traM ru tra drag pos bsgral:_srin mo ma tshogs rnams la sbyor bar mdzad:_gsang sngags bstan pa dang po de nas byung :_zhes gsungs pa ltar gdul bya sems can rnams kyi rgyud kyi chags sdang gnyis/_'dul byed sangs rgyas kyi rnam rol zhi khro gnyis su ston pas/_'dul tshul rdo rje theg pa'i lam gyi mthar thug rdo rje'i tan gaN gnyis kyi phrin las tshar gcod rjes 'dzin gnyis su bstan pas/_khyab bya dug lnga la khyab byed gti mug phra rags kyi sgrib gsum bag chags dang bcas pa spangs nas sku gsum bde gsal mi rtog pa'i ye shes chen po'i klong du mngon par byang chub par mdzad pa chos nyid yin pas na/_skabs 'dir gang dag zhi ba'i phrin las kyi rjes su 'dzin par 'os pa'i gang zag la rnam pa de dang mthun pa'i bde gshegs zhi ba rdo rje dbyings kyi dkyil 'khor du shar ba ste/_de nyid longs sku chags bcas kyi rnam par snang bas sku zhi tshul dgu dang ldan zhing*/_de mdzes pa'i rgyan chas 'jig rten na bsod nams chen pos stobs kyi 'khor lo'i bsgyur ba'i cha byad dang mtshungs pa ste/_zhi ba longs spyod rdzogs pa'i rgyan chas bcu gsum 'di gsol bas nang du sa bcu lam lnga sku gsum dang bcas pa'i yon tan yongs su rdzogs pa'i che rtags su mtshon byed yin pas na/_rang rang gi lhag pa'i lha yi nga rgyal la gnas pas tshig dang mthun pa'i nges shes rgyud la skyed par mdzod cig__!__dpal chas la/_'o/_gdul bya rgyud mi srun pa'i bdud dang ru tra mu stegs kyi tshogs rnams 'dul ba'i phyir chos nyid rnam par mi rtog pa'i dbyings las/_sku gar dgu'i gzi brjid bskal pa'i me ltar 'bar bas gdug pa can gyi nga rgyal dang zhe sdang bcom ste sems dpa' bkong bas bran dang 'bangs su bkol nas/_de dag gi rgyan chas dpal dang dur khrod kyi chas rnams rgyal byed dpa' rtags kyi tshul du bzhes pa'i rnam thar rjes su dran pa mtshon phyir drag gtum khro bo'i nga rgyal la gnas pa'i chas rnams kyis mnga' gsol ba'i thugs mos mdzod cig__!__mnga' gsol rtags gdab yod skabs/_'o/_dur khrod rol pa'i tshogs khang rdo rje gsang ba chen po'i gzhal yas khang 'dir/_rdo rje'i gtor blugs kyis rgyud smin cing gsang ba'i lta sgom spyod pa la dbang ba'i he ru ka'i 'dus pa dam gtsang rig pa 'dzin pa pho mo las/_tha mal gyi skye bo 'jug tu mi gtub pas na de dag gi skabs spyod pa dang*/_ye shes bde ba chen po'i gzi byin gyis tshogs brgyad dbyings su dag ste/_'phags pa'i lam yan lag brgyad kyi spangs rtogs la dbang bsgyur bas/_dbang dang stobs bcu'i de nyid mthar phyin pas/_rdo rje theg pa'i bslab pa'i mtha' bcu'i de nyid la gdeng thob pa mtshon phyir/_sngon dpal chen pos ru tra bsgral ba'i tshe/_khams gsum gyi gdug pa can mi srun sha za srin po'i gzugs la zhe sdang rus mthar rgyas pa'i mche ba can gcan gzan gyi pags pa/_'dod chags khrag mthar rgyas pa'i gshog pa dang mjug ma skyes nas dur khrod 'jigs pa'i chas kyis lus la rgyan du byas pa rnams rgyal byed dpa' rtags kyi tshul du sku la bzhes nas khrag 'thung 'bar ba'i chas su byin gyis brlab pa'i byugs pa'i rtsi gsum/_'dogs pa'i rgyan gnyis/_bgo ba'i gos gsum bcas/_dur khrod kyi chas rnams kyis brgyan te he ru ka'i rigs su bskrun pa'i che ba'i don dang rtags la dgongs pa bzhag ste/_dbyangs 'bor len dang chas rnams kyis brgyan par zhu/__!__mched bsre bsnan skabs/_de la spyir rdo rje theg pa'i lam gsang sngags dbang gi mtha' can/_dbang dam tshig gi mtha' can zhes mchog thun dngos grub kyi rtsa ba dam tshig dag pa la rag las pa ste/_sa ma ya'i sgra las drangs na bdag nyid chen po rnams kyi bkas bcad pa'i mtshams las 'da' mi rung ba/_rnal 'byor dbang phyug rnams kyis bslab pa'i 'jug ldog tshul bzhin byed pa ste/_dam tshig gi rnam grangs kyang*/_rgyud sde gong 'og rigs lnga spyi'i dam tshig_/khyad par sngags bla med kyi dam tshig phyi nang gsang gsum/_sgrub pa lhag pa'i dam tshig nyi shu sogs so so'i dbye bsdu mtha' klas pa gsungs pa kun/_ma nyams par legs par bsrungs na yon tan ma btsal lhun gyis grub/_'jig rten pa'i gtso dang 'khor gyis bkur/_sangs rgyas dang byang chub sems dpas sras dang spun du dgongs/_de bzhin gshegs pa nyid dang spyod yul gcig_/chos thams cad kun tu bzang po'i zhing du sbyor bas 'jigs pa dang bag tsha med/_drang nges kyi sdom pa thams cad srung bar 'gyur zhing rnam par dag_/nyams kyang skong ba'i thabs kyis sor chud pa'i yon tan bdun du gsungs pa'i gnad shes pas 'dir dkyil 'khor gcig la brten/_ston pa rdo rje rgyal po gcig gi drung du bsnyen pa'i rdo rje'i rig pa 'dzin pa mched lcam rnams kyang snang grags rig pa dkyil 'khor gyi lha'i sku gsung thugs rdo rje'i dag snang dang ma bral bas dam tshig spang blang la 'bad pa gal che bas mched bsre bsnan gyi rim pa la 'jug par zhu/__!__bzlas pa'i skabs/_de yang ji skad du rnam snang mngon byang las/_gnyis med ye shes 'di nyid ni/_thub pas sngags zhes gsungs pa yin/_zhes pa ltar/_rgyu thabs shes kyi yi ge las bzla bya'i sngags kyi ngo bor gyur pa gang zhig_/dngos grub sgrub pa la nus pa thogs med du gyur pa grub pa bzhi dang ldan pa ste/_stong chen mnyam nyid e yi ngo bor chos nyid ngo bos grub pa/_sngags rang rang gi ngo bor thun mong ma yin pa snang ba'i rang bzhin bslu med du waM yig bde ba chen po'i bdag nyid chos can rang bzhin gyis grub pa/_chos kun la mnga' dbang brnyes pa'i sangs rgyas rnams kyis yi ge gcig nas mang po'i bar gyi sngags rnams su ye shes nyid rnam par 'phrul par bstan pas na byin gyi rlabs kyis grub pa/_sman dang nor bu'i nus pa bzhin du sngags de dag dngos grub sgrub pa'i nus pa thogs pa med pa nus pa'i mthus grub pa sangs rgyas rnams kyi gsung gi dkyil 'khor ste/_rtog med yid bzhin nor bu'i tshul du dngos grub mtha' dag ster ba ste/_de yang dkyil 'khor gyi lha'i zhal blta ba dang*/_lta sgom zab mo rnams ni rgyud dag pa 'ba' zhig las/_kun gyi thun mong ma yin la/_sngags ni gdul bya thun mong gi bzlar btub pa dang*/_sngags kyi yi ge'i gzugs mthong ba dang*/_sgra thos pa tsam yang don chen po dang ldan par 'jam dpal rtsa ba'i rtog pa las/_de bzhin gshegs pa'i sngags bzlas pa/_/de ltar sngags rnams don yod do/_/sems can mig zur gyis bltas pa'ang*/_/rjes su bzung ba nyid du 'gyur/_/zhes so/_/de lta bu'i zab mo'i sngags bzla ba la/_shes rab zab mo'i sngags kyi ngo bo/_dbye ba/_sgra don/_phan yon shes pas yid ches bskyed/_ting 'dzin zab mo'i srog sdom gzer bzhi dang ldan pas sngags kyi dmigs pa la gnas/_brtson 'grus zab mo'i sngags bzlas pa'i skyon dang bral zhing yon tan bcu dang ldan pas nus pa'i stobs bskyed pa'i rdzas sngags kyi sbyor bas sngags kyi spyod pa mthar dbyung nas/_da lta las dang po pa'i skabs 'dir lha nyid sngags kyi rnam pa bstan pas gdul bya'i don mdzad pa yin zhing*/_sngags bzlas pas las dang rnam smin gyi sgrib pa zad nas lha'i rjes su bzung ba'i skal ba can du gyur pa na sngags nyid lhar gnas gyur nas zhal mthong ba ste/_don du sangs rgyas kyi ye shes rnam pa thams cad pa nyid gdul bya gang la gang 'dul du snang ba'i nges shes kyi dad pas/_yid bzlas dang*/_shub bur bzlas pa/_dbyangs su bzlas pa rnams las skabs 'dir/_dbyangs su gyer ba dang*/_zhi ba'i sngags rnams tshangs pa'i dbyangs dang ldan pas yid 'phrog pa/_'khun zhing gdung bas bzla/_khro bo'i sngags rnams 'brug sgra ltar gdangs che zhing drag pa dang*/_rdo rje srin po'i ngur skad kyi gdangs dang ldan pa dang*/_dzapa? kyi bzlas pa chu bo'i rgyun bzhin nyin mtshan rgyun mi bcad pa dang bcas bzla bar zhu'o/__!__yang bsnyen bzlas skabs su/_de la 'dir rdo rje'i theg pa'i lam gyi snying po ni/_bslab pa'i mtha' bcus nyams su len dgos pas na/_dang por lta ba brgal rtags kyis gtan la bab dgos te/_lam sgrub pa thams cad lta ba dang rjes su mthun par 'jug pa chos nyid yin pas/_rdo rje theg pa'i lam sgom pa la sogs pa kun kyang dag mnyam rtogs pa 'di'i tshul dang mthun par 'jug pa 'ba' zhig yin pas na/_pad+ma'i snying po'i rgyud las/_mi skyod rdo rje sems dpa' sogs:_rigs kyi 'khor los sgyur ba lnga:_phung po lnga nyid rnam par dag:_'byung ba dbyings kyi yum chen te:_zhes sogs gsungs pa ltar/_snod bcud rgyud gsum gyi chos thams cad rigs lnga sgyu 'phrul dra ba'i sku dang ye shes kyi ngo bor gdod nas dag par sangs rgyas pa thabs snang ba'i cha phung khams skye mched dbang yul bya byed dang bcas pa tshe bdag rigs lnga sems dpa' lcam dral thub drug sgo ba bya byed dang bcas pa'i dkyil 'khor 'khor lo'i sprin chen po'i khyab byed rigs kyi gtso bo sku de bzhin gshegs pa rgyal ba rtag pa yab yum gyi tshul du snang ba dag pa chen po'i bdag nyid gang*/_chos dbyings mnyam pa chen po 'chi med gnyug ma don gyi tshe lha'i ye shes lnga gnyis su med pa'i tshul gyis skye 'gag gnas bral gyi dbyings su rtag tu 'khrul pa med pa'i don/_brgal brtags kyis gtan la phab pa'i lta ba'i bsgrub gzhi ste/_lta ba de'i gnas lugs kyi don rgyud la 'byor ba'i rgyu ni mi g.yo ba'i ting nge 'dzin te de la sku bskyed pa'i phyag rgyas rdo rje tshe'i dkyil 'khor gyis snang srid dag pa rab 'byams su shar/_gsung bzlas pa sngags kyis dngos grub zab mo'i gnas la nges par sbyor/_thugs 'od gsal de kho na nyid kyis thams cad la rgyas theb pas ye shes chen po'i dbyings su sbyor ba'i bskyed rdzogs rim pa gnyis dang ldan pa'i ting nge 'dzin ni las dang dngos grub thams cad kyi rtsa ba ste/_lta sgom de'i drod tshad dang ldan pa'i rnal 'byor pas la dor na spyod pa la 'jug pas snang spyod ye shes kyi rol pa las mi 'da' ba la dam tshig gi rnam grangs thams cad 'dus pas dam tshig rnam par dag pa dang*/_gzhi 'bras dbyer med rang bzhin gyi dkyil 'khor gdod nas gnas pa la/_'khor chos gzugs brnyan gyi dkyil 'khor par sbyang pa'i phyir lhag pa gzugs brnyan gyi dkyil 'khor tshul bzhin bzhengs te/_sgom pa ting nge 'dzin gyi dkyil 'khor gsal gdab phyir lhag pa ting nge 'dzin dkyil 'khor dang*/_byang chub sems kyi dkyil 'khor rnal 'byor pho mo tshom bu tshogs kyi dkyil 'khor gyi gzhi lam 'bras bu'i bkod pa dkyil 'khor dbyer med du snang ba la brten nas gzhi dus gnas skabs bzhi'i dri ma sel ba dang*/_bskyed rim rang lus gzhan lus de kho na nyid kyi lam bzhi sgom pa dang*/_'bras bu sku bzhi thob pa'i phyir rdo rje slob ma'i dbang thun mong rigs pa'i bum dbang lnga rjes 'brel rig pa'i dbang lnga dang*/_sku gsung thugs dbang*/_rdo rje slob dpon gyi dbang bcas dang*/_gsang ba sher ye/_tshig dbang ste zab dbang gsum/_mtha' rten sku tshe 'brang*/_gsung tshe chang*/_thugs tshe ril bcas pa'i dbang rnams sngon dngos rjes rim tshang bas bskur te/_dbang dkyil 'khor la brten nas thob kyang*/_dbang srog rgyud la 'dzin pa dam tshig yin pas/_spyi dang khyad par lhag pa'i dam tshig rdo rje theg pa'i rgyud lung man ngag las 'byung ba rnams dang*/_khyad par rdo rje'i tshe sgrub pa'i dam tshig tu gter gzhung dngos las/_gzhi der rten gsum byin can la:_zhag bdun mchod pa rgyun mi bcad:_bar ma chad pa'i mar me 'bul:_de rdzogs ston mo rigs bzhi bya:_zhes rten 'brel gnad kyi dam tshig tu gsungs pa ltar/_'chi nges kyi srog bslu/_mar me gtso bor gyur pa'i mchod sbyin spyi dang*/_khyad par sku gsung thugs rten bzhengs pa dang*/_tshe dpag tu med pa'i gzungs dang snying po sgrogs pa/_mgron rigs bzhi la ston mo bya ba sogs gnang bkag gi mtshams las mi 'da' ba'i dam tshig tshul bzhin srung ba dang*/_phyi yo byad/_nang nus pa thob pa'i rnal 'byor pas phun sum tshogs pa lngas sgrub pa'i gzhi bzung ste/_bsnyen sgrub yan lag bzhis sgrub pa'i gzhung bsrangs ba'i phyir/_phyi nang gsang ba'i mtshams bcad/_dkyil 'khor lha slob dpon rdzas slob ma sta gon lnga sngon du 'gro bas bsnyen pa sgrub pa'i gzhung bsrang nas bzlas sgom la 'bad pas dngos grub nye ba'i mtshan ma mthong ba nye bsnyen/_dngos grub kyi mtshan ma brtan po thob pa sgrub pa/_dngos grub blang ba sgrub pa chen po bzhis don du gnyer ba'i yan lag rdzogs pa'i grogs su/_nyer spyod phyi/_yid sprul kun bzang*/_'dod yon nang*/_bde chen gsang ba/_bdud rtsi sman raka gtor ma/_bstod pa glu/_khyad par tshogs kyi 'khor lo bcas dbang bzhi dang rjes su 'brel ba'i gnas su stob pa mchod pa dang*/_phyi rol gyi rdzas 'phrul 'khor/_sbyin sreg_/mchod rten/_bcud len sogs dang*/_nang lus kyi phyag rgya gar/_lta stangs 'dug tshul sogs dang*/_ngag gi bsnyen sgrub las kyi bzlas brjod/_glu bden tshig_/yid kyi ting nge 'dzin dang ldan pas 'chi med tshe dang ye shes kyi dngos grub gtso bor gyur pa'i mchog dang thun mong gi las sgrub pa ni/_rol pa phrin las/_'ching ba phyag rgya/_zlos pa sngags rnams tshang la ma nor bar sgrub pa po'i blo nus dang sbyar te nyams su blang dgos pa'i tshul kyang thugs dam gsal 'debs kyi tshul du zhus pa'o/__!_gsum pa las mtha' rgyas kyis sgrub pa'i rjes skyong ba la/_sgrub pa'i rgyu rdo rje'i khams drug dang ldan pa theg gsum spyi dang khyad par rdo rje theg pa'i dbang bzhi'i lam gyi rten phun sum tshogs pa 'di nyid yun ring du brtan pa ni/_mngon mtho dang des legs kyi don thams cad bsgrub tu rung ba ste/_de nyid sman dang bcud len gyi sbyor bas tshe bsring ba phyi nang thun mong gi lugs/_srog gi sbyin pa gtong ba dang rnam dkar gyi bgyi bas tshe bsring ba mdo sngags thun mong gi lugs/_ting nge 'dzin dang rigs sngags kyi sbyor ba sogs thabs zab mo'i rten 'brel gyis tshe bsring ba sngags lugs thun mong ma yin pa rnams su mchis pa las/_bya sla la don che ba dngos grub gnyis ka gcig char thob pa rdo rje'i rigs sngags dang rgyud kyi sbyor ba la brten nas tshe sgrub pa la/_gsar rnying bka' gter dag snang gi bka' bab mtha' yas pa las/_'dir gsung rdo rje 'chi med grub pa'i rig 'dzin gyi skur bzhengs pa rgyal dbang mtsho skyes rdo rjes mnga' bdag chos kyi rgyal po khri srong lde'u btsan dgung lo bcu gsum gyi bar du sku tshe bsring ba'i sgyu 'phrul rigs lnga'i tshe sgrub/_gu ru'i thugs dam zab pa skor bdun gyi nang tshan rtsa gsum tshe zab kyi cha lag tu/_mdo khams nam mkha' mdzod du gter rgyas btab pa/_lha sras rnam 'phrul sprul pa'i gter 'byin grub thob yongs kyi 'khor los bsgyur ba/_o rgyan mchog gyur bde chen gling pas spyan drangs pa ste/_'di nyid 'chi nges gang zag kyang :_lo gsum bar du nges par bsring :_yang yang bskyar na bcu gsum bar:_bsring bar 'gyur bar the tshom med:_ces gsungs pa ltar/_spyir sangs rgyas tshe dpag med kyi mtshan tsam thos pas dus min gyi 'chi ba 'joms pa sogs phan yon tshad med par gsungs pa ni/_lha sngags ting 'dzin zab mo'i khyad chos dang ldan zhing*/_dbang dang sgrub chen gyi khyad par du mas de las kyang zab khyad dang ldan pa'i thabs mkhas tshom bu tshogs sgrub kyi legs byas mi zad pa'i dpal byang chub spyod pa rgya mtshor 'jug pa'i ched du/_mar me'i smon lam gyis rgyas btab pa ste/_spyir mar me phul ba'i phan yon spyan ras gzigs kyi mdo las/_bde gshegs mchod rten mar me phul ba na/_/rnam grol mchog mnga' stobs bcu rnams ldan zhing*/_/de bzhin ma 'dres chos kyi pha rol phyin/_/kun nas spyan ldan bde bar gshegs par 'gyur/_/zhes gsungs pa dang*/_khyad par gsang sngags rdo rje theg pa'i lam nas/_mar me'i ngo bo 'od gsal ye shes dbyings kyi dbang phyug ma la rnam pa sa chu'i dwangs ma rtsi bcud kyi nying khu/_me rlung gi dwangs ma drod dang g.yo ba gnyis ldan/_rang bzhin 'od zer gyi phreng ba sogs snang byed kyi rigs dang*/_nang bcud kyi mar me rdo rje phung po'i grong khyer du ye shes kyi rtsa rlung thig le'i snang bas zag bcas las nyon gyi mun pa sel ba dang*/_gsang ba bde chen gyi mar mes dga' bzhi stong pa zung 'jug gi snang bas sad rmi gnyid 'thug snyoms 'jug gi sgrib mun 'joms pa dang*/_de kho na nyid 'od gsal snang bzhi'i mar mes snang gsum 'pho sgrib kyi mun pa sel nas snang bzhi'i sgron ma bkod pa dbang bzhi pa'i lam mchog mtshon pa'i dam tshig gi rten du byin gyis brlabs nas phul bas 'khrul rtog 'khor ba'i mun pa bsal te sku bzhi ye shes lnga ldan gyi snang ba rgyas pa'i mchod phreng ston pa rdo rje rgyal po dang 'khor lo'i dbang phyug dbyer med pa la phul nas/_tshom bu tshogs su sgrub pa chen po mthong thos dran reg gi gdul bya thams cad rdo rje'i gdung 'dzin he ru ka'i grong khyer chen por phyam gcig tu grol ba'i bden tshig mar me'i smon lam gyi dbyangs 'bor len la 'jug par zhu/_/rgyal kun rjes brtse'i ye shes 'jug pa'i mthu/_/mkha' khyab 'gro la bu gcig ltar brtse ba'i/_/rang gzugs tshe dbang pad+ma'i thugs tig gi_/phrin las rtag khyab lhun gyis grub gyur cig_/ces pa'ang sprul pa'i gter chen mchog gyur bde chen gling pa'i e waM chos kyi sgar chen 'gyur med gling du nyer mkhor gyur pas/_rig 'dzin mchog gi sku gsung thugs kyi sras mchog sprul o rgyan stobs rgyal dang*/_dbu mdzad pad+ma bkra shis lhan rgyas nas gsung bskul bzhin rig 'dzin rtsal 'chang gsum gyi chos rgyud du skyes pa'i 'gyur med theg mchog bstan pa'i rgyal mtshan gyis bris pas zab gsang mchog gi bstan pa'i dpal yon phyogs dus gnas skabs kun tu dar zhing rgyas pa'i rten 'byung du gyur cig__/sarba dA mang+ga lam/_/bi dza yan+tu//__//