DKR-KABUM-13-PA-018

🚧 This website is under continued development. We appreciate your patience!

Previous Text Back to Volume PageNext Text

རྗེ་བཙུན་འཇམ་དཔལ་དབྱངས་ཀྱི་བསྟོད་པ་བཀྲ་ཤིས་མི་འགྱུར་བའི་དགོངས་དོན་རྣམ་པར་བཤད་པ་ཀུན་མཁྱེན་དགོངས་པའི་སྲོལ་འབྱེད།

Wylie title	rje btsun 'jam dpal dbyangs kyi bstod pa bkra shis mi 'gyur ba'i dgongs don rnam par bshad pa kun mkhyen dgongs pa'i srol 'byed
Location	dil mgo mkhyen brtse bka' 'bum Volume 13, Text 18, Pages 205-212 (Folios 1a to 8a5)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Citation	Khyentse, Dilgo. Rje btsun 'jam dpal dbyangs kyi bstod pa bkra shis mi 'gyur ba'i dgongs don rnam par bshad pa kun mkhyen dgongs pa'i srol 'byed. In Skyabs rje dil mgo mkhyen brtse rin po che'i bka' 'bum, Vol. 13: 205-212. Delhi: Shechen Publications, 1994.
Genre	Detailed Explanation - rnam bshad  ·  Verses of Praise - bstod pa
Deity	'jam dpal dbyangs

Tibetan Text

Wylie

[edit]

༄༅། རྗེ་བཙུན་འཇམ་དཔལ་དབྱངས་ཀྱི་བསྟོད་པ་བཀྲ་ཤིས་མི་འགྱུར་བའི་དགོངས་དོན་རྣམ་པར་བཤད་པ་ཀུན་མཁྱེན་དགོངས་པའི་སྲོལ་འབྱེད་ཅེས་བྱ་བ་བཞུགས།།

༄༅། །ན་མོ་གུ་རུ་ཨ་ཛི་ཏ་མཉྫུ་གྷོ་ཥ་ཡེ། དེ་ཡང་རྒྱུད་ཀྱི་རྒྱལ་པོ་འཇམ་དཔལ་སྒྱུ་འཕྲུལ་དྲྭ་བའི་རྒྱུད་ལས། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་སྐུ་འཇམ་དཔལ་ཡོངས་སུ་དག་པར་བཟུང་བར་བྱའོ། །ཞེས་གསུངས་པ་ལྟར་སྲས་དང་བཅས་པའི་རྒྱལ་བ་མ་ལུས་པའི་རྣམ་ཐར་དང་ཕྲིན་ལས་ཐམས་ཅད་གཅིག་ཏུ་རྫོགས་པ་རྗེ་བཙུན་འཇམ་དཔལ་དབྱངས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་གསང་བ་ཟབ་མོའི་དོན་ཐམས་ཅད་སྟོན་པའི་བསྟོད་པ་གླུར་བླངས་པའི་རྒྱུད་ཀྱི་རྒྱལ་པོའི་གསང་བ་མཐའ་དག་འཇམ་དཔལ་གྲུབ་པའི་སློབ་དཔོན་ཆེན་པོ་མཁས་ཤིང་དངོས་གྲུབ་བརྙེས་པའི་རྗེ་བཙུན་བླ་མ་མི་ཕམ་འཇམ་དབྱངས་རྣམ་རྒྱལ་རྒྱ་མཚོ་ལ་འཇམ་དཔལ་དབྱངས་ཀྱིས་ཞལ་བསྟན་པའི་ཚེ་ཚངས་པའི་དབྱངས་ཀྱི་རང་སྒྲར་བྱུང་བའི་བསྟོད་པ། ཚིག་གི་ཚོགས་ཉུང་ཡང་དོན་ཤིན་ཏུ་ཟབ་ལ་རྒྱ་ཆེ་བ་བཀྲ་ཤིས་་མི་འགྱུར་དུ་གྲགས་པའི་དགོངས་དོན་བཤད་པ་ལ། བསྟོད་པའི་ཐོག་དྲངས་པའི་སྔགས་དོན་གྱིས་མདོར་བསྟན། བསྟོད་པ་དངོས་རྒྱས་པར་བཤད་པ་དང༌། ཆེ་བ་བརྗོད་པ་དོན་བསྡུ་བའོ། །དང་པོ་ནི། ཨོཾ་ཞེས་དེ་བཞིན་གཤེགས་པ་རྣམས་ཀྱི་སྐུ་རྡོ་རྗེ་རྗེས་སུ་མཚོན་པའི་སྔགས་དོན། སངས་རྒྱས་ཀྱི་སྐུའི་གསང་བའི་ཁྱབ་བདག་ནི་འཇམ་དཔལ་དབྱངས་ཉིད་དུ་གྲགས་ཤིང་དེའི་དོན་རྒྱུད་ལས། བཅོམ་ལྡན་འདས་ཀྱི་ཡེ་ཤེས་སྐུ། །གཙུག་ཏོར་ཆེན་པོ་ཚིག་གི་བདག །ཡེ་ཤེས་སྐུ་སྟེ་རང་བྱུང་བ། །འཇམ་དཔལ་ཡེ་ཤེས་སེམས་དཔའ་ཡི། །མིང་ནི་ཡང་དག་བརྗོད་པའི་མཆོག །དོན་ཟབ་དོན་ནི་རྒྱ་ཆེ་ཞིང༌། །དོན་ཆེན་མཚུངས་མེད་རབ་ཞི་བ། །ཐོག་མ་བར་དང་མཐར་དགེ་བ། །ཞེས་གསུངས་པ་ལྟར་སྒྲིབ་བྲལ་ཡེ་ཤེས་ཀྱི་སྐུ་ནི་ལས་ཀྱི་བསྐྱོད་པ་དང་ཟག་པས་བསྡུས་པའི་ཕུང་པོ་ལྔ་ལྟ་བུ་མ་ཡིན་པས་སྣང་སྟོང་མཁའ་ཁྱབ་ནམ་མཁའི་རྡོ་རྗེའི་སྐུ་ཞེས། དངོས་པོའི་ཆོས་ཐམས་ཅད་ལས་འདས་པ། དྭངས་མ་ཡེ་ཤེས་ཀྱི་མཚན་དཔེ་གཞོན་ནུ་མེ་ཏོག་ཐོད་ཅན་གྱི་རོལ་པ་ཕྱོགས་དུས་ཀྱི་ཞིང་དང་ཁྱོན་ཀུན་ན་སྣང་ཞིང་གྲགས་པ། སྐུ་རེ་རེའི་བ་སྤུའི་ཁུང་བུ་གཅིག་ལ་ཡང་སངས་རྒྱས་ཀྱི་ཞིང་གི་རྟེན་བརྟེན་པ་ཐམས་ཅད་རྫོགས་པར་སྟོན་ནུས་པ། ཞིང་དེ་དག་རེ་རེ་བཞིན་སྐུ་དང་མཚན་གྱི་བཀོད་པ་བསམ་ལས་འདས་པར་སྟོན་པའི་ཚུལ་ཅན་སྟེ། སྐུ་དང་གསུང་དང་ཐུགས་ཡོན་ཏན་ཕྲིན་ལས་ཀྱི་བཀོད་པའང་རྣམ་པ་ཐམས་ཅད་པའི་ཡེ་ཤེས་གཅིག་པུའི་ཉམས་ཀྱི་དུ་མའི་གཟུགས་སུ་རོ་མཉམ་རྡོ་རྗེའི་གར་མཛད་པ་ལས་ཐ་དད་དུ་མི་དམིགས་པས་རྡོ་རྗེ་གསུམ་ཀ་གཉིས་མེད་མཉམ་པ་ཉིད་ཀྱི་ཐིག་ལེ་གཅིག་གི་དོན་མཚོན་ཕྱིར་སྐུ་ཞེས་ཐོག་མར་སྨོས་པས་གཞན་དག་ཀྱང་མཚོན་ནུས་ལ། དེས་ན་གསང་གསུམ་དབྱེར་མེད་ཡེ་ཤེས་རྡོ་རྗེའི་དབྱིངས་ནི་རྒྱུད་ལས། མཆོག་གི་དང་པོ་སྐུ་གསུམ་འཆང༌། །སངས་རྒྱས་ཏེ་སྐུ་ལྔའི་བདག་ཉིད་ཅན། །ཁྱབ་བདག་ཡེ་ཤེས་ལྔ་ཡི་བདག །སངས་རྒྱས་ལྔ་བདག་ཅོད་པན་ཅན། །ཞེས་གསུངས་པ་ལྟར་སྐུ་དང་ཡེ་ཤེས་ལྔ་ལྡན་དབྱེར་མེད་པའི་སངས་རྒྱས་ཀྱི་སའི་ཡོན་ཏན་མཐའ་དག་བསྡུས་ཤིང༌། དེའི་གསང་བ་ཐམས་ཅད་གཅིག་ཏུ་འདུས་པའི་ཚུལ་གྱིས་འཇམ་དཔལ་དབྱངས་ལ་བསྟོད་པ་ནི་བསྟོད་པ་གླུར་བླང་གི་རྒྱུད་ཀྱི་བརྗོད་བྱ་ཡོངས་སུ་རྫོགས་པའི་དོན་མདོར་བསྟན་ཕྱིར་ཨོཾ་ཞེས་མཆོག་སྟེར་བའི་སྔགས་ཀྱིས་མགོ་འདྲེན་པ་ནི་མདོར་བསྟན་ནོ། །གཉིས་པ་རྒྱས་པར་བཤད་པ་ལྔ་ལས། ཐོག་མར་མངོན་པར་བྱང་ཆུབ་པའི་སྐུ་མཉམ་ཉིད་ཡེ་ཤེས་ཀྱི་དཔལ་ལ་བསྟོད་པས་མཆོག་གསུམ་ཀུན་འདུས་སུ་ངེས་ཤེས་བསྐྱེད་པ་ནི། སྤྱིར་ནང་པ་སངས་རྒྱས་པའི་ཆོས་ཐམས་ཅད་སྒོ་འབྱེད་ནི་སྐྱབས་སུ་འགྲོ་བ་སྟེ། སྐྱབས་འགྲོའི་མཚན་ཉིད་པ་ཉམས་སུ་ལེན་པ་ལ་མཆོག་གསུམ་གྱི་ཡོན་ཏན་ཤེས་པས་དད་པ་བསྐྱེད་དགོས་པའི་ཕྱིར་དཀོན་མཆོག་གསུམ་གྱི་ཡོན་ཏན་བརྗོད་ཅིང༌། དེ་ཉིད་ཀྱང་རྗེ་བཙུན་འཇམ་དཔལ་དབྱངས་གཅིག་ལ་འདུས་པར་བསྟན་པ་ནི། ཆོས་ཤེས་བཀྲ་ཤིས་བཀྲ་ཤིས་འབྱུང༌། བཀྲ་ཤིས་ཀུན་གྱི་བཀྲ་ཤིས་པ། གྲགས་པའི་བཀྲ་ཤིས་སྙན་གྲགས་དགེ། །དབུགས་འབྱིན་ཆེན་པོ་དགའ་སྟོན་ཆེ། །ཞེས་གསུངས་པ་ལྟར་ཤེས་བྱའི་ཆོས་ཐམས་ཅད་མཁྱེན་པ་གཉིས་ལྡན་གྱི་ཡེ་ཤེས་ཀྱིས་མ་ནོར་བ་རང་གིས་མཁྱེན་ཞིང་གཞན་ལ་སྟོན་ནུས་པ་ནི་སངས་རྒྱས་སྟེ་དེ་ནི་འཇིག་རྟེན་དགེ་ལེགས་སུ་བྱེད་པའི་བཀྲ་ཤིས་དང་པོ་སྟེ། དེ་ལས་ཆོས་དང་དགེ་འདུན་གྱི་བཀྲ་ཤིས་ཐམས་ཅད་འབྱུང་བས་སོ། །སངས་རྒྱས་དེའི་གསུངས་པའི་ཆོས་མི་མཐུན་པའི་ཕྱོགས་མཐའ་དག་ཞི་བར་བྱེད་ཅིང་ལེགས་ཚོགས་ཀྱི་དཔལ་ཀུན་ངེས་པར་སྟེར་ནུས་པས་ཕན་བདེའི་བཀྲ་ཤིས་ཀྱི་དཔལ་ཀུན་གྱི་འབྱུང་གནས་འགོག་ལམ་གྱི་བདག་ཉིད་ནི་བསིལ་བའི་རང་བཞིན་ཅན་གྱི་ལུང་རྟོགས་ཀྱི་ཆོས་ནི་བཀྲ་ཤིས་གཉིས་པ་ཡིན་ལ། དེའི་རྒྱུན་འཛིན་པའི་དགེ་འདུན་ཚོགས་ཀྱི་ཞིང་གི་མཆོག་ཏུ་གྲགས་ཤིང་རིག་གྲོལ་གྱི་ཡོན་ཏན་ཕུན་སུམ་ཚོགས་པའི་ཐེག་པ་ཆེ་ཆུང་གི་དགེ་འདུན་ནི་བཀྲ་ཤིས་གསུམ་པ་སྟེ། དེ་ནི་སྲིད་ཞིའི་དགེ་ལེགས་ཐམས་ཅད་ཀྱི་འབྱུང་གནས་སུ་གྱུར་པ་དོན་དང་ལྡན་པའི་སྙན་གྲགས་ཀྱིས་མཛེས་པའི་རྒྱུ་མཚན་འཁོར་བ་དང་ངན་སོང་གི་གནས་ལས་དབུགས་འབྱིན་ཞིང་མངོན་མཐོ་ངེས་ལེགས་ཀྱི་དཔལ་ཡོན་ཆེན་པོའི་དགའ་སྟོན་སྟེར་ནུས་པས་ཡིན་ལ། དེས་ན་བཀྲ་ཤིས་མཆོག་གསུམ་གྱི་ཡོན་ཏན་ནི་བསོད་ནམས་ཐམས་ཅད་བསྐྱེད་པའི་གཞི། འགྲོ་བ་ཐམས་ཅད་ལ་མཉེས་གཤིས་པའི་སྐྱབས་སུ་གྱུར་ཅིང༌། བདུད་དང་མུ་སྟེགས་ཀྱི་རྒོལ་བས་མི་ཚུགས་ཤིང༌། ཁ་ན་མ་ཐོ་བ་མེད་པས་ནམ་ཡང་སྒྲིབ་པ་དང་སྐྱོན་ཅན་དུ་མི་འགྱུར་བས་རཏྣ་ཞེས་པའི་སྒྲ་ལས་དྲངས་ན་ཆོས་མཚུངས་དྲུག་གིས་ནོར་བུ་རིན་པོ་ཆེ་དང་མཉམ་པ་ལས་ལྷག་པའི་དཀོན་མཆོག་གསུམ་སྟེ། དེ་དག་ཀྱང་བསྟོད་པ་གླུར་བླང་གི་རྒྱུད་ཕྱི་མ་ལས། འཇམ་དཔལ་འདི་ནི་དཔལ་གྱུར་རྫོགས་པའི་སྐུ། ཐུན་མོང་མ་ཡིན་གཉིས་མེད་ཁྱབ་པའི་ཆོས། །དུས་གསུམ་མཉམ་རྫོགས་རྒྱལ་བ་ཀུན་གྱི་ཡབ། །ཆོས་དབྱིངས་ཡུམ་ཉིད་སེམས་དཔའ་སྲས་མཆོག་སྟོན། །ཞེས་གསུངས་པ་ལྟར་སྒྲིབ་པ་སྤང་བའི་སེམས་བསྐྱེད་མཐར་ཐུག་ནི་སྟོང་ཉིད་སྙིང་རྗེའི་སྙིང་པོ་ཅན་གྱི་མཁྱེན་བརྩེའི་ཆོས་ཉིད་ཡིན་ལ། དེ་ལ་འཇམ་དཔལ་ཡེ་ཤེས་སེམས་དཔའ་གྲགས་པས་ངེས་པའི་དོན་དུ་སངས་རྒྱས་ཐམས་ཅད་བསྐྱེད་པའི་ཡབ་ཏུ་གྱུར་པ་དང༌། ཆོས་དབྱིངས་ཤེས་རབ་ཕར་ཕྱིན་གྱི་སྟོང་ཆས་འཕགས་བཞིའི་འབྱུང་གནས་ཡུམ་ཆེན་མོ། །རྒྱལ་བ་ཀུན་གྱི་དབང་ཕྱུག་ཏུ་གྲགས་པས་ཆོས་ཀྱི་ཕུང་པོ་མཐའ་དག་སྤྲོ་བསྡུའི་བྱེད་པོ། རྣམ་པ་རྒྱལ་སྲས་ཡོངས་ཀྱི་ཐུ་བོ་ས་བཅུའི་དབང་ཕྱུག་བྱང་ཆུབ་སེམས་དཔའ་སེམས་དཔའ་ཆེན་པོའི་ཞིང་ཀུན་ཏུ་བཞུགས་པར་གསུངས་པས་ན་འཇམ་དཔལ་གང་ལས་དཀོན་མཆོག་གསུམ་ཀ་འབྱུང་ཞིང༌། དེ་ཐམས་ཅད་འཇམ་དཔལ་དབྱངས་གཅིག་གི་ཡེ་ཤེས་སྒྱུ་འཕྲུལ་དྲྭ་བའི་རོལ་པ་ལས་འབྱུང་ཞིང་འགྲོ་བའི་གནས་སུ་གྱུར་པ་སྟེ། གཙོ་བོ་དཀོན་མཆོག་གསུམ་འཛིན་པ། །ཐེག་པ་མཆོག་གསུམ་སྟོན་པ་པོ། །ཞེས་གསུངས་པ་ལྟར། འཇིག་རྟེན་ན་ཡོངས་སུ་གྲགས་པའི་སྐྱབས་ཐམས་ཅད་ཀྱི་ནང་ནས་ཁྱད་པར་དུ་འཕགས་པས་གཙོ་བོར་གྱུར་པའམ་སྐྱབས་དམ་པ་དཀོན་མཆོག་གསུམ་སྟེ། རྒྱལ་ཚབ་མ་ཕམ་པས། འཚེ་བ་དག་ནི་ཐམས་ཅད་དང༌། །ངན་སོང་དང་ནི་ཐབས་མིན་དང༌། །འཇིགས་ཚོགས་ཐེག་པ་དམན་དག་ལས། །སྐྱོབས་ཕྱིར་སྐྱབས་ཀྱི་དམ་པའོ། །ཞེས་གསུངས། དེས་ན་སྲིད་ཞིའི་རྒུད་པ་ཐམས་ཅད་ལས་སྐྱོབས་ནུས་པ་དཀོན་མཆོག་གསུམ་ལས་གཞན་མ་མཆིས་པས་དེ་ནི་ངེས་པར་སྐྱབས་སུ་བསྟེན་པར་འོས་པ་ཡིན་ལ། སྐྱབས་སུ་འགྲོ་བ་ལའང་སྐྱབས་ཡུལ་གྱི་ཡོན་ཏན་ཤེས་དགོས་པས། མཆོག་གསུམ་དེའི་ཡོན་ཏན་ལ་སྒྲིབ་བྱེད་སྤང་བྱ་མཐའ་དག་བྲལ་བས་འཇམ་མཉེན་གྱི་ཡོན་ཏན་དང་ལྡན་ཞིང༌། ཐོབ་བྱའི་འབྲས་བུ་ཐམས་ཅད་མངོན་གྱུར་དུ་སད་པས་གསང་བ་གསུམ་ལ་དཔལ་གྱི་ཡོན་ཏན་གྱིས་བརྒྱན་པས་མཆོག་གསུམ་ཀུན་འདུས་ཀྱི་བདག་ཉིད་རྗེ་བཙུན་འཇམ་དཔལ་དབྱངས་ཞེས་བྱ་སྟེ། རིག་པ་རང་ཤར་གྱི་རྒྱུད་ལས། འཇམ་དཔལ་ཡང་དག་བདེ་བའི་སྐུ། །ཡང་དག་ཡེ་ཤེས་འོད་ལྔ་ལྡན། །ཆོས་སྐུ་ཁ་དོག་མ་འདྲེས་འཇམ། །དཀྱིལ་འཁོར་འདུ་འབྲལ་མེད་ཕྱིར་དཔལ། །ཞེས་སོ། །དེས་ན་ཆོས་དབྱིངས་ཤིན་ཏུ་རྣམ་པར་དག་པ་སྤྲོས་པ་ཐམས་ཅད་ཉེ་བར་ཞི་བའི་དག་པ་གཉིས་ལྡན་མི་འགྱུར་རྡོ་རྗེའི་སྐུའི་ཡོན་ཏན་ཆོས་ཀུན་མཉམ་པ་ཉིད་ཀྱི་ཡེ་ཤེས་ཀྱི་དཔལ་དང་ལྡན་པའི་ཚུལ་ལ་བསྟོད་པ་ནི་མཐར་ཐུག་གི་སྐྱབས་སངས་རྒྱས་གཅིག་ཏུ་བསྡུ་བའི་དོན་གྱིས་མཆོག་ཅེས་བསྔགས་པའོ། །འཇམ་དཔལ་བསྟོད་སྒྲུབ་ཅེས་བྱིན་རླབས་ཤིན་ཏུ་ཆེ་བ་ཡོངས་སུ་གྲགས་པ་ལྟར་སྐབས་འདིར་ཡང་ཚིག་རྐང་དང་པོའི་ལམ་གྱི་སྒོ་འབྱེད་སྐྱབས་འགྲོའི་དོན་ཚང་བར་སྟོན་པས་ན་སྐྱབས་ཡུལ་གྱི་ཡོན་ཏན་ཤེས་པས་དྭངས་འདོད་ཡིད་ཆེས་ཕྱིར་མི་ལྡོག་པའི་དད་པ་བསྐྱེད་པས་སྐྱབས་སུ་འགྲོ་བའི་དམིགས་གནད་དང་སྦྱར་བས་ཉམས་སུ་ལེན་པར་བྱ་དགོས་སོ། །གཉིས་པ་སྤྲུལ་པའི་སྐུའི་བྱ་གྲུབ་ཡེ་ཤེས་ཀྱི་ཚུལ་ལ་བསྟོད་པས་འཇམ་དཔལ་དབྱངས་ཀྱི་བྱང་ཆུབ་ཀྱི་སྤྱོད་པ་རྒྱ་མཚོའི་རྗེས་སུ་མཚོན་པ་ནི། རྗེ་བཙུན་འཇམ་དཔལ་དབྱངས་ཡིན། ད་ལྟ་མི་མཇེད་འཇིག་རྟེན་འདིའི་བྱང་ཕྱོགས་ཀྱི་ཞིང་དུ་མངོན་པར་སངས་རྒྱས་ཏེ་སངས་རྒྱས་མོས་པ་རབ་ཏུ་དགའ་བའི་སྙིང་པོ་ཞེས་སུ་འཚོ་ཞིང་བཞེས་ནས་ཆོས་ཀྱང་སྟོན་པར་གསུངས་པ་དང༌། བསྐལ་པ་གྲངས་མེད་མང་པོ་འདས་པའི་སྔོན་དུ་བདེ་གཤེགས་འཇམ་པའི་ཏོག་ཏུ་སངས་རྒྱས་ནས་ཆོས་བསྟན། མྱ་ངན་ལས་འདས་པར་སྟོན་པ་དང༌། མ་འོངས་པར་བྱང་ཕྱོགས་ཀྱི་ཞིང་དུ་དེ་བཞིན་གཤེགས་པ་མགོན་པོ་ཀུན་ཏུ་གཟིགས་ཞེས་པར་སངས་རྒྱས་ཏེ་ཞིང་དེའི་ཚད་དང་ཡོན་ཏན་བསམ་གྱིས་མི་ཁྱབ་པ་དཔེར་ན་ནུབ་ཕྱོགས་བདེ་བ་ཅན་གྱི་ཞིང་གི་ཡོན་ཏན་བགྲང་ལས་འདས་པས་འཇམ་དཔལ་གྱི་བྱང་ཆུབ་ཤིང་གི་ལོ་མ་གཅིག་གི་ཡོན་ཏན་མཚོན་མི་ནུས་པར་གསུངས་ཤིང༌། ད་ལྟ་མི་མཇེད་ཀྱི་ཞིང་འདི་ཡང་ཞིང་དེའི་ནང་དུ་ཆུད་པར་བསྟན་པ་སོགས་ཕྱོགས་བཅུ་དང་དུས་གསུམ་གྱི་ཁྱོན་ན་སངས་རྒྱས་དང༌། ད་ལྟ་མཚན་ཡོངས་སུ་གྲགས་པའི་འཇམ་དཔལ་དབྱངས་ནི་ས་བཅུའི་བྱང་ཆུབ་སེམས་དཔའ་རྒྱལ་བ་ཐམས་ཅད་ཀྱི་སྲས་ཀྱི་དབང་ཕྱུག་ཏུ་སྟོན་པས་ཕྱོགས་བཅུའི་ཞིང་གི་སངས་རྒྱས་ཐམས་ཅད་ཀྱི་སྤྱན་སྔར་བཞུགས་ནས་ཆོས་གསུང་བར་བསྐུལ། གདུལ་བྱ་འདུལ་བ་སོགས་བྱང་ཆུབ་ཀྱི་སྤྱོད་པ་རྒྱ་མཚོ་ལ་འཇུག་པས་འགྲོ་བའི་དོན་མཛད་པ། རྒྱུད་ལས་སེམས་ཅན་ཀུན་གྱི་ཡིད་རིག་པ། །སེམས་ཅན་ཀུན་གྱི་ཡིད་ལ་གནས། །དེ་དག་སེམས་དང་མཐུན་པར་བྱེད། སེམས་ཅན་ཀུན་ཡིད་ཚིམ་པར་བྱེད། །ཞེས་དང༌། ཡང་འཇམ་དཔལ་ཞིང་གི་ཡོན་ཏན་བཀོད་པའི་མདོ་ལས། གང་གིས་སངས་རྒྱས་བྱེ་བ་ཁྲག་ཁྲིག་འབུམ་གྱི་མཚན་བརྗོད་པ་བས་ནི་འཇམ་དཔལ་གཞོན་ནུར་གྱུར་པའི་མིང་བརྗོད་ན་འདི་ནི་དེ་བས་ཆེས་བསོད་ནམས་མང་དུ་བསྐྱེད་དེ་འཇམ་དཔལ་གྱིས་བསྐལ་པ་རེ་རེར་སེམས་ཅན་གྱི་དོན་བྱས་པ་དེ་སྙེད་དེ་བཞིན་གཤེགས་པ་དེ་སྙེད་ཀྱིས་མ་མཛད་པར་གསུངས་པ་ལྟར་བྱང་ཆུབ་སེམས་དཔའི་སྤྱོད་པ་མཐའ་དག་ཉམས་འོག་ཏུ་ཆུད་པས་རྒྱལ་དང་རྒྱལ་སྲས་ཐམས་ཅད་ཀྱི་རྣམ་ཐར་གཅིག་ཏུ་བསྡུས་པ་བཞིན་བསམ་གྱིས་མི་ཁྱབ་པར་གསུངས་པས་དཔེར་ན་ཞིང་འདིར་ཡང་བྱང་ཆུབ་སེམས་དཔའི་ཚུལ་གྱིས་དེ་བཞིན་གཤེགས་པ་ཤཱཀྱ་ཐུབ་པ་ཐོག་མར་ཁབ་ནས་ངེས་པར་འབྱུང་བའི་རྐྱེན་འཇམ་དཔལ་དགེ་སློང་གི་རྣམ་པ་བསྟན་པས་བསྐུལ་བ་དང༌། སངས་རྒྱས་པའི་ཚེ་འཁོར་གྱི་རྣམ་པས་ཟབ་མོའི་མདོ་རྒྱུད་ཐམས་ཅད་ཀྱི་གླེང་བསླང་བ་དང༌། རྒྱལ་པོ་མ་སྐྱེས་དགྲའི་འགྱོད་པ་བསལ་བ་དང༌། གནས་བསྟན་འོད་སྲུང་ཆེན་པོའི་གནས་དབྱུང་བ་ལྟར་སྤྱོད་པས་ངོ་མཚར་གྱི་ཆོ་འཕྲུལ་ཆེན་པོ་བསྟན་པ་སོགས་མདོ་སྡེ་དུ་མ་ནས་འབྱུང་བ་ལྟར་བསྐལ་བཟང་སངས་རྒྱས་ཐམས་ཅད་ལ་མཛད་པར་གསུངས་པ་དང༌། སྟོན་པ་ཐུབ་པའི་དབང་པོའི་ཉན་ཐོས་ཤེས་རབ་ཅན་གྱི་མཆོག་ཤཱ་རིའི་བུ་ངེས་དོན་དུ་འཇམ་དཔལ་ཡིན་པ་སྔགས་རྒྱུད་དུ་མ་ནས་འབྱུང་བ་སོགས་ཉན་ཐོས་དང༌། འཕགས་པ་ཀླུ་སྒྲུབ་སོགས་རྒྱན་དྲུག་ཕལ་ཆེར་དང༌། འཇམ་དཔལ་བཤེས་གཉེན། བི་མ་མི་ཏྲ་དང༌། ཨོ་རྒྱན་སངས་རྒྱས་གཉིས་པ་སོགས་རྒྱ་གར་གྱི་པཎྜི་ཏ་དང༌། བོད་དུ་གནུབས་ཆེན་སངས་རྒྱས་ཡེ་ཤེས། ལོ་ཆེན་བཻ་རོ། ས་སྐྱ་པཎྜི་ཏ་ཆེན་པོ། རྗེ་རིན་པོ་ཆེ། ཀུན་མཁྱེན་རོང་ཀློང་གཉིས་དང༌། འཇམ་མགོན་བསྟན་པའི་ཉིན་བྱེད་སོགས་གསར་རྙིང་གི་སྐྱེས་བུ་དམ་པ། ཆོས་རྒྱལ་ཁྲི་སྲོང་སོགས་རྒྱལ་པོ། ཐུ་མི་སོགས་བློན་པོའི་ཚུལ་བསྟན་པ་ཡོངས་སུ་གྲགས་པས་མཚོན་གདུལ་བྱ་སོ་སོའི་ལས་དང་སྐལ་པ་མཆོག་དམན་གྱི་སྣང་བ་དང་ཁམས་མོས་བསམ་པ་དབང་པོའི་ཁྱད་པར་དང་མཐུན་པར་སྐུ་དང་མཛད་པའི་ཆོ་འཕྲུལ་དེ་བཞིན་དུ་སྟོན་པའི་བཀོད་པ་རྒྱ་མཚོ་མིག་འཕྲུལ་དང་སྒྱུ་མའི་ཟློས་གར་བཞིན་སྐད་ཅིག་རེ་རེ་ལའང་འདུ་མཛད་པས་སྲིད་ཞི་ཉེར་འཚོའི་དཔལ་དུ་གྱུར་པ་སྟེ་རྒྱུད་ལས། མཁས་པ་སྒྱུ་འཕྲུལ་ཆེན་པོ་འཆང༌། །སྒྱུ་འཕྲུལ་ཆེན་པོ་དོན་སྒྲུབ་པ། །སྒྱུ་འཕྲུལ་ཆེན་པོའི་དགའ་བས་དགའ། །སྒྱུ་འཕྲུལ་ཆེན་པོ་མིག་འཕྲུལ་ཅན། །ཞེས་གསུངས། དེ་ལྟར་སྲིད་ཞི་ཀུན་ལ་ཁྱབ་པའི་ཐབས་མཁས་ཀྱི་མཛད་པའི་སྒྱུ་འཕྲུལ་ཆེན་པོ་ཕྱོགས་དུས་མུ་མཐའ་མེད་པར་སྟོན་པས་དོན་གཉིས་ལྷུན་གྱིས་གྲུབ་པའི་འགྲོ་ཀུན་ཉེར་འཚོའི་གཞི་རྩ་གཅིག་པུ་རུ་གྱུར་བའི་ཐུགས་བསྐྱེད་ཀྱི་གཡར་དམ་འཆང་བར་མཛད་ཀྱང༌། རང་ངོར་སྲིད་ཞི་གང་དུ་མི་གནས་པའི་ཆོས་དབྱིངས་མཉམ་པ་ཆེན་པོའི་གནས་ལས་ནམ་ཡང་ཉམས་པ་མེད་པའི་སྒྱུ་འཕྲུལ་གྱི་གསང་བ་ཆེན་པོའི་དགའ་བའམ་མཆོག་ཏུ་མི་འགྱུར་བའི་བདེ་བ་ཆེས་ཆེན་པོའི་དགྱེས་དགུར་ཐུགས་གསུང་སྐུ་ཡི་དཔལ་ལ་ཁྱབ་ཅིང་སིམ་པས་དགའ་བ་སྟེ། གཉིས་མེད་གཉིས་སུ་སྣང་བའི་སྒྱུ་འཕྲུལ་གྱི་རོལ་པ་ཡང་ཆེད་དུ་རྩོལ་བ་དང་རྟོག་དཔྱོད་མ་དགོས་པ་རང་བྱུང་ལྷུན་གྱིས་གྲུབ་པ་མིག་འཕྲུལ་ལྟར་སྟོན། མདོར་ན་སངས་རྒྱས་ཀུན་གྱི་ཕྲིན་ལས་རྗེས་སུ་སྒྲུབ་པའི་ཕྱིར་སྤྲུལ་པའི་སྐུའི་ཡོན་ཏན་ལ་གཙོ་བོར་བསྔགས་པ་སྟེ། གཞན་དོན་འབའ་ཞིག་གི་ཕྱིར་ཐབས་མཁས་དང་སྙིང་རྗེའི་རྣམ་འཕྲུལ་ཚད་མེད་པའི་རྗེས་སུ་སློབ་པ་ནི་ཀུན་རྫོབ་སྨོན་འཇུག་གི་བྱང་ཆུབ་ཀྱི་སེམས་ཀྱི་དོན་སྟོན་པའོ། །གསུམ་པ་ཆོས་ཀྱི་སྐུའི་ཆོས་དབྱིངས་ཡེ་ཤེས་ཀྱི་ཚུལ་ལ་བསྟོད་པས་ཟབ་མོ་གསང་བ་རྡོ་རྗེའི་དབྱིངས་ཀྱི་དམ་པ་ལ་བསྟོད་པ་ནི། རྣམ་མེད་ཡེ་ཤེས་ཀྱི་གསང་བ་ཟབ་མོའི་ངེས་པ་དོན་གྱི་འཇམ་དཔལ་དབྱངས་ནི་རྒྱུད་ལས། ནམ་མཁའ་ལས་བྱུང་རང་བྱུང་བ། །ཤེས་རབ་ཡེ་ཤེས་མེ་བོ་ཆེ། །འོད་ཆེན་རྣམ་པར་སྣང་བར་བྱེད། །ཡེ་ཤེས་སྣང་བ་ལམ་མེ་བ། །ཞེས་དང༌། རིག་པ་རང་ཤར་གྱི་རྒྱུད་ལས། །འཇམ་དཔལ་ཡང་དག་བདེ་བའི་སྐུ། །ཡང་དག་ཡེ་ཤེས་འོད་ལྔ་ལྡན། །ཆོས་སྐུ་ཁ་དོག་མ་འདྲེས་འཇམ། །དཀྱིལ་འཁོར་འདུ་འབྲལ་མེད་ཕྱིར་དཔལ། །ཞེས་སོགས་གསུངས་པ་ལྟར་སོ་སྐྱེའི་བློ་ཡི་འཇུག་པས་ཇི་ལྟར་བརྟགས་ཀྱང་དངོས་མཚན་ཀུན་རྫོབ་ཀྱི་མཚན་མའི་འཇུག་པ་ཐམས་ཅད་ཉེ་བར་ཞི་བའི་དབྱིངས་ཡིན་པས་ན་གང་གི་ཡེ་ཤེས་ལས་མཆོག་གསུམ་དེ་དག་བྱུང་ཞིང༌། ཡེ་ཤེས་སྒྱུ་འཕྲུལ་དྲྭ་བའི་རོལ་པ་ལས་ཐ་མི་དད་པའི་བདག་ཉིད་དུ་འགྲོ་བ་ལྟར་སྣང་བའི་དབང་གིས་སྟེ་སྡུད་པ་ལས། སངས་རྒྱས་སྲས་དང་ཉན་ཐོས་རང་རྒྱལ་ལྷ་རྣམས་དང༌། འགྲོ་བ་ཀུན་གྱི་བདེ་སྐྱིད་ཆོས་རྣམས་ཇི་སྙེད་པ། །དེ་ཀུན་ཤེས་རབ་ཕ་རོལ་ཕྱིན་པ་མཆོག་ལས་བྱུང༌། །ཤེས་རབ་ནམ་ཡང་ཟད་པ་མེད་ཅིང་འཕེལ་བ་མེད། །འཕྲོ་ཅན་ལགས།

[edit]

@#/_rje btsun 'jam dpal dbyangs kyi bstod pa bkra shis mi 'gyur ba'i dgongs don rnam par bshad pa kun mkhyen dgongs pa'i srol 'byed ces bya ba bzhugs// na mo gu ru a dzi ta many+dzu g+ho Sha ye/_de yang rgyud kyi rgyal po 'jam dpal sgyu 'phrul drwa ba'i rgyud las/_de bzhin gshegs pa thams cad kyi ye shes kyi sku 'jam dpal yongs su dag par bzung bar bya'o/__/zhes gsungs pa ltar sras dang bcas pa'i rgyal ba ma lus pa'i rnam thar dang phrin las thams cad gcig tu rdzogs pa rje btsun 'jam dpal dbyangs kyi sku gsung thugs yon tan phrin las kyi gsang ba zab mo'i don thams cad ston pa'i bstod pa glur blangs pa'i rgyud kyi rgyal po'i gsang ba mtha' dag 'jam dpal grub pa'i slob dpon chen po mkhas shing dngos grub brnyes pa'i rje btsun bla ma mi pham 'jam dbyangs rnam rgyal rgya mtsho la 'jam dpal dbyangs kyis zhal bstan pa'i tshe tshangs pa'i dbyangs kyi rang sgrar byung ba'i bstod pa/_tshig gi tshogs nyung yang don shin tu zab la rgya che ba bkra shis mi 'gyur du grags pa'i dgongs don bshad pa la/_bstod pa'i thog drangs pa'i sngags don gyis mdor bstan/_bstod pa dngos rgyas par bshad pa dang*/_che ba brjod pa don bsdu ba'o/__/dang po ni/_oM zhes de bzhin gshegs pa rnams kyi sku rdo rje rjes su mtshon pa'i sngags don/_sangs rgyas kyi sku'i gsang ba'i khyab bdag ni 'jam dpal dbyangs nyid du grags shing de'i don rgyud las/_bcom ldan 'das kyi ye shes sku/_/gtsug tor chen po tshig gi bdag_/ye shes sku ste rang byung ba/_/'jam dpal ye shes sems dpa' yi/_/ming ni yang dag brjod pa'i mchog_/don zab don ni rgya che zhing*/_/don chen mtshungs med rab zhi ba/_/thog ma bar dang mthar dge ba/_/zhes gsungs pa ltar sgrib bral ye shes kyi sku ni las kyi bskyod pa dang zag pas bsdus pa'i phung po lnga lta bu ma yin pas snang stong mkha' khyab nam mkha'i rdo rje'i sku zhes/_dngos po'i chos thams cad las 'das pa/_dwangs ma ye shes kyi mtshan dpe gzhon nu me tog thod can gyi rol pa phyogs dus kyi zhing dang khyon kun na snang zhing grags pa/_sku re re'i ba spu'i khung bu gcig la yang sangs rgyas kyi zhing gi rten brten pa thams cad rdzogs par ston nus pa/_zhing de dag re re bzhin sku dang mtshan gyi bkod pa bsam las 'das par ston pa'i tshul can ste/_sku dang gsung dang thugs yon tan phrin las kyi bkod pa'ang rnam pa thams cad pa'i ye shes gcig pu'i nyams kyi du ma'i gzugs su ro mnyam rdo rje'i gar mdzad pa las tha dad du mi dmigs pas rdo rje gsum ka gnyis med mnyam pa nyid kyi thig le gcig gi don mtshon phyir sku zhes thog mar smos pas gzhan dag kyang mtshon nus la/_des na gsang gsum dbyer med ye shes rdo rje'i dbyings ni rgyud las/_mchog gi dang po sku gsum 'chang*/_/sangs rgyas te sku lnga'i bdag nyid can/_/khyab bdag ye shes lnga yi bdag_/sangs rgyas lnga bdag cod pan can/_/zhes gsungs pa ltar sku dang ye shes lnga ldan dbyer med pa'i sangs rgyas kyi sa'i yon tan mtha' dag bsdus shing*/_de'i gsang ba thams cad gcig tu 'dus pa'i tshul gyis 'jam dpal dbyangs la bstod pa ni bstod pa glur blang gi rgyud kyi brjod bya yongs su rdzogs pa'i don mdor bstan phyir oM zhes mchog ster ba'i sngags kyis mgo 'dren pa ni mdor bstan no/__/gnyis pa rgyas par bshad pa lnga las/_thog mar mngon par byang chub pa'i sku mnyam nyid ye shes kyi dpal la bstod pas mchog gsum kun 'dus su nges shes bskyed pa ni/_spyir nang pa sangs rgyas pa'i chos thams cad sgo 'byed ni skyabs su 'gro ba ste/_skyabs 'gro'i mtshan nyid pa nyams su len pa la mchog gsum gyi yon tan shes pas dad pa bskyed dgos pa'i phyir dkon mchog gsum gyi yon tan brjod cing*/_de nyid kyang rje btsun 'jam dpal dbyangs gcig la 'dus par bstan pa ni/_chos shes bkra shis bkra shis 'byung*/_bkra shis kun gyi bkra shis pa/_grags pa'i bkra shis snyan grags dge/_/dbugs 'byin chen po dga' ston che/_/zhes gsungs pa ltar shes bya'i chos thams cad mkhyen pa gnyis ldan gyi ye shes kyis ma nor ba rang gis mkhyen zhing gzhan la ston nus pa ni sangs rgyas ste de ni 'jig rten dge legs su byed pa'i bkra shis dang po ste/_de las chos dang dge 'dun gyi bkra shis thams cad 'byung bas so/__/sangs rgyas de'i gsungs pa'i chos mi mthun pa'i phyogs mtha' dag zhi bar byed cing legs tshogs kyi dpal kun nges par ster nus pas phan bde'i bkra shis kyi dpal kun gyi 'byung gnas 'gog lam gyi bdag nyid ni bsil ba'i rang bzhin can gyi lung rtogs kyi chos ni bkra shis gnyis pa yin la/_de'i rgyun 'dzin pa'i dge 'dun tshogs kyi zhing gi mchog tu grags shing rig grol gyi yon tan phun sum tshogs pa'i theg pa che chung gi dge 'dun ni bkra shis gsum pa ste/_de ni srid zhi'i dge legs thams cad kyi 'byung gnas su gyur pa don dang ldan pa'i snyan grags kyis mdzes pa'i rgyu mtshan 'khor ba dang ngan song gi gnas las dbugs 'byin zhing mngon mtho nges legs kyi dpal yon chen po'i dga' ston ster nus pas yin la/_des na bkra shis mchog gsum gyi yon tan ni bsod nams thams cad bskyed pa'i gzhi/_'gro ba thams cad la mnyes gshis pa'i skyabs su gyur cing*/_bdud dang mu stegs kyi rgol bas mi tshugs shing*/_kha na ma tho ba med pas nam yang sgrib pa dang skyon can du mi 'gyur bas rat+na zhes pa'i sgra las drangs na chos mtshungs drug gis nor bu rin po che dang mnyam pa las lhag pa'i dkon mchog gsum ste/_de dag kyang bstod pa glur blang gi rgyud phyi ma las/_'jam dpal 'di ni dpal gyur rdzogs pa'i sku/_thun mong ma yin gnyis med khyab pa'i chos/_/dus gsum mnyam rdzogs rgyal ba kun gyi yab/_/chos dbyings yum nyid sems dpa' sras mchog ston/_/zhes gsungs pa ltar sgrib pa spang ba'i sems bskyed mthar thug ni stong nyid snying rje'i snying po can gyi mkhyen brtse'i chos nyid yin la/_de la 'jam dpal ye shes sems dpa' grags pas nges pa'i don du sangs rgyas thams cad bskyed pa'i yab tu gyur pa dang*/_chos dbyings shes rab phar phyin gyi stong chas 'phags bzhi'i 'byung gnas yum chen mo/__/rgyal ba kun gyi dbang phyug tu grags pas chos kyi phung po mtha' dag spro bsdu'i byed po/_rnam pa rgyal sras yongs kyi thu bo sa bcu'i dbang phyug byang chub sems dpa' sems dpa' chen po'i zhing kun tu bzhugs par gsungs pas na 'jam dpal gang las dkon mchog gsum ka 'byung zhing*/_de thams cad 'jam dpal dbyangs gcig gi ye shes sgyu 'phrul drwa ba'i rol pa las 'byung zhing 'gro ba'i gnas su gyur pa ste/_gtso bo dkon mchog gsum 'dzin pa/_/theg pa mchog gsum ston pa po/_/zhes gsungs pa ltar/_'jig rten na yongs su grags pa'i skyabs thams cad kyi nang nas khyad par du 'phags pas gtso bor gyur pa'am skyabs dam pa dkon mchog gsum ste/_rgyal tshab ma pham pas/_'tshe ba dag ni thams cad dang*/_/ngan song dang ni thabs min dang*/_/'jigs tshogs theg pa dman dag las/_/skyobs phyir skyabs kyi dam pa'o/_/zhes gsungs/_des na srid zhi'i rgud pa thams cad las skyobs nus pa dkon mchog gsum las gzhan ma mchis pas de ni nges par skyabs su bsten par 'os pa yin la/_skyabs su 'gro ba la'ang skyabs yul gyi yon tan shes dgos pas/_mchog gsum de'i yon tan la sgrib byed spang bya mtha' dag bral bas 'jam mnyen gyi yon tan dang ldan zhing*/_thob bya'i 'bras bu thams cad mngon gyur du sad pas gsang ba gsum la dpal gyi yon tan gyis brgyan pas mchog gsum kun 'dus kyi bdag nyid rje btsun 'jam dpal dbyangs zhes bya ste/_rig pa rang shar gyi rgyud las/_'jam dpal yang dag bde ba'i sku/_/yang dag ye shes 'od lnga ldan/_/chos sku kha dog ma 'dres 'jam/_/dkyil 'khor 'du 'bral med phyir dpal/_/zhes so/__/des na chos dbyings shin tu rnam par dag pa spros pa thams cad nye bar zhi ba'i dag pa gnyis ldan mi 'gyur rdo rje'i sku'i yon tan chos kun mnyam pa nyid kyi ye shes kyi dpal dang ldan pa'i tshul la bstod pa ni mthar thug gi skyabs sangs rgyas gcig tu bsdu ba'i don gyis mchog ces bsngags pa'o/__/'jam dpal bstod sgrub ces byin rlabs shin tu che ba yongs su grags pa ltar skabs 'dir yang tshig rkang dang po'i lam gyi sgo 'byed skyabs 'gro'i don tshang bar ston pas na skyabs yul gyi yon tan shes pas dwangs 'dod yid ches phyir mi ldog pa'i dad pa bskyed pas skyabs su 'gro ba'i dmigs gnad dang sbyar bas nyams su len par bya dgos so/__/gnyis pa sprul pa'i sku'i bya grub ye shes kyi tshul la bstod pas 'jam dpal dbyangs kyi byang chub kyi spyod pa rgya mtsho'i rjes su mtshon pa ni/_rje btsun 'jam dpal dbyangs yin/_da lta mi mjed 'jig rten 'di'i byang phyogs kyi zhing du mngon par sangs rgyas te sangs rgyas mos pa rab tu dga' ba'i snying po zhes su 'tsho zhing bzhes nas chos kyang ston par gsungs pa dang*/_bskal pa grangs med mang po 'das pa'i sngon du bde gshegs 'jam pa'i tog tu sangs rgyas nas chos bstan/_mya ngan las 'das par ston pa dang*/_ma 'ongs par byang phyogs kyi zhing du de bzhin gshegs pa mgon po kun tu gzigs zhes par sangs rgyas te zhing de'i tshad dang yon tan bsam gyis mi khyab pa dper na nub phyogs bde ba can gyi zhing gi yon tan bgrang las 'das pas 'jam dpal gyi byang chub shing gi lo ma gcig gi yon tan mtshon mi nus par gsungs shing*/_da lta mi mjed kyi zhing 'di yang zhing de'i nang du chud par bstan pa sogs phyogs bcu dang dus gsum gyi khyon na sangs rgyas dang*/_da lta mtshan yongs su grags pa'i 'jam dpal dbyangs ni sa bcu'i byang chub sems dpa' rgyal ba thams cad kyi sras kyi dbang phyug tu ston pas phyogs bcu'i zhing gi sangs rgyas thams cad kyi spyan sngar bzhugs nas chos gsung bar bskul/_gdul bya 'dul ba sogs byang chub kyi spyod pa rgya mtsho la 'jug pas 'gro ba'i don mdzad pa/_rgyud las sems can kun gyi yid rig pa/_/sems can kun gyi yid la gnas/_/de dag sems dang mthun par byed/_sems can kun yid tshim par byed/_/zhes dang*/_yang 'jam dpal zhing gi yon tan bkod pa'i mdo las/_gang gis sangs rgyas bye ba khrag khrig 'bum gyi mtshan brjod pa bas ni 'jam dpal gzhon nur gyur pa'i ming brjod na 'di ni de bas ches bsod nams mang du bskyed de 'jam dpal gyis bskal pa re rer sems can gyi don byas pa de snyed de bzhin gshegs pa de snyed kyis ma mdzad par gsungs pa ltar byang chub sems dpa'i spyod pa mtha' dag nyams 'og tu chud pas rgyal dang rgyal sras thams cad kyi rnam thar gcig tu bsdus pa bzhin bsam gyis mi khyab par gsungs pas dper na zhing 'dir yang byang chub sems dpa'i tshul gyis de bzhin gshegs pa shAkya thub pa thog mar khab nas nges par 'byung ba'i rkyen 'jam dpal dge slong gi rnam pa bstan pas bskul ba dang*/_sangs rgyas pa'i tshe 'khor gyi rnam pas zab mo'i mdo rgyud thams cad kyi gleng bslang ba dang*/_rgyal po ma skyes dgra'i 'gyod pa bsal ba dang*/_gnas bstan 'od srung chen po'i gnas dbyung ba ltar spyod pas ngo mtshar gyi cho 'phrul chen po bstan pa sogs mdo sde du ma nas 'byung ba ltar bskal bzang sangs rgyas thams cad la mdzad par gsungs pa dang*/_ston pa thub pa'i dbang po'i nyan thos shes rab can gyi mchog shA ri'i bu nges don du 'jam dpal yin pa sngags rgyud du ma nas 'byung ba sogs nyan thos dang*/_'phags pa klu sgrub sogs rgyan drug phal cher dang*/_'jam dpal bshes gnyen/_bi ma mi tra dang*/_o rgyan sangs rgyas gnyis pa sogs rgya gar gyi paN+Di ta dang*/_bod du gnubs chen sangs rgyas ye shes/_lo chen bai ro/_sa skya paN+Di ta chen po/_rje rin po che/_kun mkhyen rong klong gnyis dang*/_'jam mgon bstan pa'i nyin byed sogs gsar rnying gi skyes bu dam pa/_chos rgyal khri srong sogs rgyal po/_thu mi sogs blon po'i tshul bstan pa yongs su grags pas mtshon gdul bya so so'i las dang skal pa mchog dman gyi snang ba dang khams mos bsam pa dbang po'i khyad par dang mthun par sku dang mdzad pa'i cho 'phrul de bzhin du ston pa'i bkod pa rgya mtsho mig 'phrul dang sgyu ma'i zlos gar bzhin skad cig re re la'ang 'du mdzad pas srid zhi nyer 'tsho'i dpal du gyur pa ste rgyud las/_mkhas pa sgyu 'phrul chen po 'chang*/_/sgyu 'phrul chen po don sgrub pa/_/sgyu 'phrul chen po'i dga' bas dga'/_/sgyu 'phrul chen po mig 'phrul can/_/zhes gsungs/_de ltar srid zhi kun la khyab pa'i thabs mkhas kyi mdzad pa'i sgyu 'phrul chen po phyogs dus mu mtha' med par ston pas don gnyis lhun gyis grub pa'i 'gro kun nyer 'tsho'i gzhi rtsa gcig pu ru gyur ba'i thugs bskyed kyi g.yar dam 'chang bar mdzad kyang*/_rang ngor srid zhi gang du mi gnas pa'i chos dbyings mnyam pa chen po'i gnas las nam yang nyams pa med pa'i sgyu 'phrul gyi gsang ba chen po'i dga' ba'am mchog tu mi 'gyur ba'i bde ba ches chen po'i dgyes dgur thugs gsung sku yi dpal la khyab cing sim pas dga' ba ste/_gnyis med gnyis su snang ba'i sgyu 'phrul gyi rol pa yang ched du rtsol ba dang rtog dpyod ma dgos pa rang byung lhun gyis grub pa mig 'phrul ltar ston/_mdor na sangs rgyas kun gyi phrin las rjes su sgrub pa'i phyir sprul pa'i sku'i yon tan la gtso bor bsngags pa ste/_gzhan don 'ba' zhig gi phyir thabs mkhas dang snying rje'i rnam 'phrul tshad med pa'i rjes su slob pa ni kun rdzob smon 'jug gi byang chub kyi sems kyi don ston pa'o/__/gsum pa chos kyi sku'i chos dbyings ye shes kyi tshul la bstod pas zab mo gsang ba rdo rje'i dbyings kyi dam pa la bstod pa ni/_rnam med ye shes kyi gsang ba zab mo'i nges pa don gyi 'jam dpal dbyangs ni rgyud las/_nam mkha' las byung rang byung ba/_/shes rab ye shes me bo che/_/'od chen rnam par snang bar byed/_/ye shes snang ba lam me ba/_/zhes dang*/_rig pa rang shar gyi rgyud las/_/'jam dpal yang dag bde ba'i sku/_/yang dag ye shes 'od lnga ldan/_/chos sku kha dog ma 'dres 'jam/_/dkyil 'khor 'du 'bral med phyir dpal/_/zhes sogs gsungs pa ltar so skye'i blo yi 'jug pas ji ltar brtags kyang dngos mtshan kun rdzob kyi mtshan ma'i 'jug pa thams cad nye bar zhi ba'i dbyings yin pas na gang gi ye shes las mchog gsum de dag byung zhing*/_ye shes sgyu 'phrul drwa ba'i rol pa las tha mi dad pa'i bdag nyid du 'gro ba ltar snang ba'i dbang gis ste sdud pa las/_sangs rgyas sras dang nyan thos rang rgyal lha rnams dang*/_'gro ba kun gyi bde skyid chos rnams ji snyed pa/_/de kun shes rab pha rol phyin pa mchog las byung*/_/shes rab nam yang zad pa med cing 'phel ba med/__/'phro can lags/