རྫོགས་ཆེན་པ་རང་བྱུང་རྡོ་རྗེའི་དོན་གྱི་རྣམ་ཐར་དོ་ཧའི་རྒྱན།

Previous Text Back to Volume Page Next Text

Wylie title	rdzogs chen pa rang byung rdo rje'i don gyi rnam thar do ha'i rgyan
Location	'jigs gling bka' 'bum Volume 14, Text 3, Pages 55-68 (Folios to )
Author	འཇིགས་མེད་གླིང་པ་
Less details More details
Citation	'jigs med gling pa. Rdzogs chen pa rang byung rdo rje'i don gyi rnam thar do ha'i rgyan. In Kun mkhyen rig 'dzin 'jigs med gling pa'i gsung 'bum, Vol. 14: 55-68. New Delhi: Shechen Publications, 2025.
Genre	Biographies - Hagiography - rnam thar
Colophon	འདི་ནི་བླ་ཆེན་ས་སྐྱ་པའི། །གསུང་གིས་བསྐུལ་ནས་བྲིས་པ་ཡིན། །དགེ་བས་མཐོང་ཐོས་དྲན་རེག་ཀུན། །རྣམ་བྱང་དམ་པའི་རྒྱུར་གྱུར་ཅིག །སརྦ་མངྒ་ལཾ།།
Colophon	'di ni bla chen sa skya pa'i/_/gsung gis bskul nas bris pa yin/_/dge bas mthong thos dran reg kun/_/rnam byang dam pa'i rgyur gyur cig_/sarba mang+ga laM//

[edit]

༄༅། །རྫོགས་ཆེན་པ་རང་བྱུང་རྡོ་རྗེའི་དོན་གྱི་རྣམ་ཐར་དོ་ཧའི་རྒྱན་ཅེས་བྱ་བ་བཞུགས། །

༄༅། །སངས་རྒྱས་གཙོ་ལ་ཕྱག་འཚལ་ལོ། །ཟད་དང་མི་སྐྱེ་ཤེས་པ་ཡི། །ཆོས་ཉིད་མངོན་དུ་མ་བྱས་པར། །གཟུང་འཛིན་རྣམ་རྟོག་རྗེས་སོན་པའི། །འཁོར་བའི་རྣམ་ཐར་བརྗོད་མི་ལང་། །ཀུན་གཞི་ལུང་མ་བསྟན་གྱི་ཁམས། །དམིགས་པ་དང་ནི་མཚུངས་ལྡན་གྱིས། །ཟག་པ་བསྐྱེད་ཅིང་འཕེལ་བྱས་པ། །རྣམ་པར་ཤེས་པའི་ཚོགས་དག་དང་། །ཁམས་དང་སྐྱེ་མཆེད་འདུས་བྱས་ལ། །འཇིག་རྟེན་སྲིད་པའི་འཁོར་ལོར་གྲགས། །དེ་ལས་ད་རེས་འདོད་པའི་ཁམས། །ང་ཡིར་འཛིན་པའི་གནས་སྐབས་ཀྱི། །ཡུལ་ནི་ཤྲཱི་པྲྤ་ཏ། །རུས་ནི་ཆོས་རྗེ་རྒྱ་ཡགས་པ། །མངའ་རིས་ཅན་དུ་མ་སྐྱེས་པས། །གཞན་འབྱོར་ཚང་བའི་གེགས་མ་བྱས། །རྣམ་རིག་གཙང་བའི་བུར་སྐྱེས་པས། །རང་འབྱོར་ཡན་ལག་ཀྱང་མ་ཉམས། །བྱ་རོག་དཀྲོགས་མིན་གཞོན་ནུ་ལ། །སྡོམ་པ་སྐྱེ་བ་མ་ཡིན་ཀྱང་། །དྲུག་པའི་ལོ་ནས་གྲྭ་ཁྱུར་ཞུགས། །ཆོས་སྤྱོད་བསླབ་པའི་བརྡུང་འཐག་དང་། །འབད་རྩོལ་ཆུང་བའི་ཐོས་བསམ་སྒོམ། །རྒྱུ་འབྲས་འགལ་བ་ཅན་དུ་ཤར། །བཅོ་ལྔའི་ལོ་ལ་རབ་བྱུང་ཡང་། །རྩ་བ་བཞི་ཙམ་མ་ལགས་པའི། །བླང་འདས་ཤེས་པའང་ཡོད་མིན་ན། །ཁྲིམས་ཀྱི་བསླབ་པ་ག་ལ་ཆགས། །ལེགས་སྨོན་འབའ་ཞིག་དོན་གཉེར་ལ། །ཉེས་སྤྱོད་སྡོམ་པ་ཡིན་སྙམ་ནས། །དཀོར་ལ་རང་དགར་སྤྱོད་པ་ཡི། །བཙུན་གཟུགས་རྣམ་ཐར་སྤྱི་མཐུན་བསྐྱངས། །དེ་ལྟ་ན་ཡང་སྐྱོ་ཤས་དང་། །ངེས་འབྱུང་སྙིང་རྗེ་ཆེན་པོའི་བློ། །ཤུགས་འབྱུང་དྲན་ཙམ་ཉིད་ནས་ཡོད། །སྤྱོད་པ་བྱ་བྲལ་དག་ལ་སྨོན། །ལྟར་སྣང་རིག་པ་ཧུར་སྤྱོད་ཅན། །བྱིས་པའི་རྣམ་ཐར་བསྐྱངས་ཚེ་ཡང་། །བྱི་ལའི་བརྟུལ་ཞུགས་ངན་པ་ཡི། །རྣམ་ཐར་ཁོང་ན་ཡོད་མི་སྲིད། །ལུས་སེམས་གཉིས་ཀ་ནར་སོན་ཚེ། །མི་བྱེད་བསམས་ཀྱང་གཞན་རྐྱེན་དང་། །མཐུན་པར་འཆར་བའི་གྲྭ་ཚོགས་ཀྱི། །ཆགས་སྡང་གནས་ལ་སྐྱོ་བ་སྐྱེས། །གཅིག་པུར་སྡོད་ཚེ་དམ་ཆོས་དྲན། །ཨོ་རྒྱན་གྱི་སློབ་དཔོན་ཆེན་པོ་ཡི། །རྣམ་ཐར་དང་རྟེན་གསུམ་ལ་བརྟེན་ནས། །ས་ཚུགས་མེད་པའི་དད་སྟོབས་འབར། །དུས་ད་ལྟ་ཟངས་མདོག་དཔལ་གྱི་རིར། །སླེབ་ན་སྙམ་པའི་གདུང་བ་འཕེལ། །དེ་ཚེ་བདག་རྒྱུད་བྱིན་གྱིས་རློབས། །རྔོན་པས་རི་དྭགས་འདེད་པ་དང་། །འབྲོག་པས་ལུག་ཁྱུ་བདའ་བ་དང་། །ཁྲིམས་ཀྱིས་འཇིགས་པས་མནར་བ་གསུམ། །མཐོང་ན་ལྟ་ཅི་ཐོས་ན་ཡང་། །བཟོད་བླག་མེད་པའི་སྙིང་རྗེ་སྐྱེས། །ཉི་ཤུ་རྩ་ལྔ་ལོན་པའི་ཚེ། །འདུ་འཛིའི་ཉེས་དམིགས་འབའ་ཞིག་དྲན། །ཕྱོགས་མེད་དུ་ཆོས་ལ་བྲོས་ན་སྙམ། །གཅིག་པུར་ལུང་སྟོང་འགྲིམས་ན་སྙམ། །རང་ཡུལ་ལ་ཞེན་པ་གཅོད་འདོད་བློ། །རྒྱུན་ཆད་མེད་པ་ཡིད་ལ་ཤར། །སྣང་བ་དགྲ་རུ་མི་སྡང་བས། །བླ་མའི་མིང་དུ་ཆགས་པ་དང་། །སྒོམ་ཆེན་བྱ་བ་ཉུང་བ་དང་། །ཞི་དུལ་བསམ་པ་དགེ་བ་ཡི། །ཆོས་དང་གང་ཟག་ཐམས་ཅད་ལ། །རྟོག་དཔྱོད་མེད་པའི་རིམ་གྲོ་བསྐྱེད། །སྦྱངས་པའི་ཡོན་ཏན་བཅུ་གཉིས་ཀྱི། །དྲི་མས་གོས་པ་མ་ལགས་ཀྱང་། །ཁྱིམ་དང་བསམ་སྦྱོར་ཐ་དད་ཅིང་། །སྐྱོ་ཤས་ངེས་འབྱུང་ཚད་མེད་པས། །ཤེས་རྒྱུད་སོ་སོ་ཐར་པ་དང་། །ཆ་མཐུན་འབྱོར་བའི་གནས་སྐབས་དེར། །སྔགས་སྡོམ་གཟུགས་བརྙན་ཙམ་དང་བཅས། །ཤྲཱི་པྲྤ་ཏ་དང་ནི། །དཔལ་གྱི་བསམ་ཡས་མཆིམས་ཕུ་རུ། །ལོ་བདུན་བསྐྱེད་རྫོགས་རྩེ་གཅིག་སྒོམ། །ཀུན་ནས་ཉོན་མོངས་དབང་པོ་ལྔའི། །ཉེར་ལེན་རྣམ་བྱང་རྒྱུར་གྱུར་པས། །ཤེས་པ་ཉམས་འུར་བག་ཕེབས་ཤིང་། །སྟོང་ཉིད་སྙིང་རྗེ་གོང་ནས་གོང་། །འཕེལ་བས་ཆགས་སྡང་རེ་དོགས་ཀྱི། །རྣམ་རྟོག་རང་གྲོལ་ལམ་དུ་ལྷོངས། །རྩ་བ་གསུམ་གྱི་བྱིན་རླབས་དང་། །རྡོ་རྗེ་ལམ་གྱི་ཉེ་རྒྱུ་ལས། །རྣམ་བྱང་ཡོན་ཏན་ཀུན་གྱི་མཛོད། །སྐུ་གདུང་འབར་བ་མཁའ་འགྲོའི་བརྡའ། །སོ་སོ་ཡང་དག་རིག་པའི་གཏེར། །རྒྱལ་དབང་པདྨའི་ལུང་གིས་ཕྱེ། །རྩ་ཁམས་ཡི་གེའི་འཁོར་ལོའི་སྤྲིན། །དམ་པ་ཆོས་ཀྱི་རོལ་མོ་རུ། །འཁྲོལ་ལ་གནས་གསུམ་མཁའ་འགྲོ་དང་། །ཀུན་དུ་ཐོགས་མེད་སྤྱན་ལྡན་གྱིས། །དབང་གྱུར་མངོན་སུམ་ཚད་མའི་ཕྱིར། །རྟོག་གེའི་གནས་ལ་འཇིགས་པ་དང་། །གོར་མའི་སེར་ཀ་འབྲུ་བ་དང་། །ཆོས་བདག་རྐྱེན་ལ་རེ་བ་དང་། །རྟེན་འབྲེལ་རྫས་ལ་འཆོལ་བ་ཡི། །སྤང་བླང་དགག་བསྒྲུབ་དབྱིངས་སུ་སངས། །བདག་ཅག་ས་ལམ་མཐོན་པོ་རུ། །སོན་པའི་ཁས་ལེན་མི་འགྲུབ་ཀྱང་། །མདོ་སྡེ་དྲན་པ་ཉེར་གཞག་ནས། །ཆོས་གཏེར་ཆེན་པོ་བརྒྱད་གསུངས་པའི། །དོན་ལ་རྟོན་པ་གང་ཞིག་ནི། །ལས་དང་དངོས་གྲུབ་བསྒྲུབ་པ་ལ། །བསླུ་བ་མེད་པའི་ཁྱད་ཆོས་ཡིན། །ཁྱད་པར་སྔོན་གྱི་སྨོན་ལམ་མཐུས། །ཀུན་མཁྱེན་ཆེན་པོའི་མན་ངག་ལ། །བརྟེན་ནས་སེམས་ཀྱི་གནས་ལུགས་ཤེས། །མཆིམས་ཕུའི་དགེའུ་འོག་མ་རུ། །དངོས་ཞལ་མཇལ་ནས་བདེན་པ་མཐོང་། །གྲུབ་མཐའ་རྒྱ་མཚོ་སྨོས་ཅི་དགོས། །དལ་འབྱོར་བཅོ་བརྒྱད་གྲངས་ངེས་དང་། །སྐྱེས་བུ་གསུམ་གྱི་སྐྱབས་འགྲོ་ཡན། །འདི་ལ་བརྟེན་ནས་ཤེས་པའི་ཕྱིར། །རྒྱལ་བ་བདེན་པར་སྨྲ་བ་དེས། །གང་ལས་ཆོས་ནི་རྣམ་ཤེས་པས། །དེ་ལ་གུས་པས་ཕྱག་བྱ་སྟེ། །བྲམ་ཟེ་གཙང་མས་མེ་ལ་བཞིན། །ཞེས་པའི་དོན་ལ་རབ་སྦྱར་བས། །བསྟན་པ་ཀུན་གྱི་དེ་ཉིད་དང་། །རྫོགས་པ་ཆེན་པོའི་ཁྱད་ཆོས་རྟོགས། །དངོས་ཉམས་རྨི་ལམ་ཐམས་ཅད་དུ། །རྒྱལ་བ་དགྱེས་པའི་ལུང་བསྟན་ཐོབ། །ཆོས་དང་གཟུགས་བརྙན་མི་ཕྱེད་ཅིང་། །བློ་གྲོས་བདུད་སྡེས་བཅོམ་པ་དག །དགེ་སྦྱོང་གོ་འུ་ཏ་མ་ནི། །མུ་སྟེགས་ཅན་གྱི་དཀའ་ཐུབ་ལས། །ཉམས་པའི་སྡིག་ཏོ་ཅན་ནོ་ཞེས། །འཁུ་ཞིང་གཤུང་བའི་རྣམ་ཐར་བསྐྱང་། །ཨེ་མ་མ་ལ་སྙིང་རེ་རྗེ། །སྔོན་ཚེ་འོད་སྲུངས་རྒྱལ་བ་ལས། །སེམས་ཀྱི་དམ་པ་ཐོབ་པ་ནས། །བདེ་གཤེགས་སྙིང་པོའི་མཐོང་སྒོམ་གྱི། །སྒྲིབ་གཉིས་སྤངས་པའི་རྒྱལ་བ་ཅན། །བྱང་ཆུབ་ཤིང་དྲུང་གཤེགས་ཀྱི་བར། །རྒྱལ་སྲས་སྤྱོད་པ་མི་ཉམས་ཤིང་། །སོ་སོའི་སྐྱེ་བོའི་གཞན་དབང་ལ། །ལྟོས་པ་མེད་པའི་མངོན་རྟོགས་ནི། །རང་བྱུང་རྡོ་རྗེར་ལྷུན་གྱིས་གྲུབ། །དེ་ལྟ་ན་ཡང་བློ་གྲོས་ནི། །ཤིན་ཏུ་གཟུ་བོར་གྱུར་པའི་ཕྱིར། །ཆོས་དང་ཆོས་ཀྱི་གང་ཟག་གི །གཟུགས་བརྙན་ཙམ་ལའང་མི་སྐུར་ན། །འབྲེལ་བ་ཅན་ལ་སྨོས་ཅི་དགོས། །རྒྱ་བོད་ཀུན་ན་དབང་རྣོན་གྱི། །གང་ཟག་ཆོས་ཀྱི་རྗེས་འབྲང་བའི། །མཚན་ཉིད་རྨོངས་པས་ག་ལ་རིག །སྲིད་རྩེའི་སེམས་དང་བརྗོད་མེད་བདག །རྣམ་འབྱེད་ཤེས་རབ་ཀྱིས་ལྡོག་པས། །དཔའ་བོའི་ཞབས་དང་ཕྱོགས་གླང་སོགས། །བསྟན་པའི་ཉིན་བྱེད་ཆེན་པོ་རུ། །གྱུར་པའང་རྒྱལ་བའི་ཕྲིན་ལས་ཡིན། །བསྟན་པ་ཀུན་ལ་དད་གྱུར་ཀྱང་། །བྱང་ཆུབ་སེམས་དཔའི་སྡེ་སྣོད་ནི། །སྔགས་ཀྱི་གཞི་མ་ལྟར་མཐོང་ནས། །ཇོ་བོ་ཤཱཀྱ་མུ་ནེའི་དྲུང་། །བྱང་སྡོམ་ཞུ་བར་ཆེད་ཀྱིས་ཕྱིན། །རིགས་ལས་སད་པའི་སྨོན་འཇུག་བླངས། །སྔ་འགྱུར་རང་ལུགས་ཉམས་དམས་པར། །མཐོང་ནས་རྒྱུད་འབུམ་གླེགས་བམ་བཞེངས། །ལུང་མཉན་ཆོས་འབྱུང་དཀར་ཆག་བརྩམས། །ལོག་རྟོག་བསལ་བའི་ཐལ་འགྱུར་བཀོད། །དཔེ་ལུང་གཉིས་ཀའི་རྒྱུན་འཕེལ་བའི། །རྟེན་འབྲེལ་མངོན་སུམ་གནས་ལ་སྦྱར། །མདོ་སྒྱུ་སེམས་དང་སྙིང་ཏིག་བཞིའི། །དོན་ལ་མི་རྟོན་གྱ་ཚོམ་གྱིས། །སྔགས་གཞུང་རྙོག་མར་གྱུར་པ་ལ། །མཁས་པ་གཞན་གྱིས་གཤུང་བའི་ཚེ། །སྨིན་གྲོལ་ཆོ་ག་མ་འཁྲུགས་ཤིང་། །རྒྱུད་དང་མན་ངག་མི་འགལ་ལ། །སྦྱང་གཞི་སྦྱོང་བྱེད་གནད་ཚང་བས། །སྐུ་ལྔའི་འབྲས་བུ་འབྱིན་ནུས་པ། །གང་དག་རྣམས་དང་བཀའ་མའི་གཞུང་། །སངས་རྒྱས་མཉམ་སྦྱོར་ཡང་ཕུར་དང་། །དོང་སྤྲུགས་བཀའ་བརྒྱད་གཤིན་རྗེ་སོགས། །ཉན་ནས་བཤད་སྒྲུབ་ཅི་ནུས་བགྱིས། །སློབ་དཔོན་ཤྲཱི་སིངྷ་ཡི། །བྱིན་བརླབས་དབང་གི་ཉེ་བརྒྱུད་ལ། །བརྟེན་ནས་ཕུར་པ་རྒྱུད་ལུགས་ཀྱི། །བཀའ་ཡི་བསྡུ་བ་གསར་དུ་བྱས། །གངས་རིའི་ཁྲོད་ཀྱི་རིང་ལུགས་པ། །ཅི་ཡང་རུང་སྟེ་སངས་རྒྱས་པའི། །གྲུབ་མཐའ་འཛིན་པ་ཡིན་ཕྱིན་ཆད། །དེ་ཡི་བསྟན་པ་མདོ་སྔགས་ཀྱི། །སྡེ་སྣོད་ལེགས་པར་ཤེས་དགོས་ན། །རྒྱལ་བའི་གསུང་དང་དཀོན་ཅོག་འགྲེལ། །ཤིང་རྟ་གསུམ་དང་མཛོད་བདུན་གྱི། །རྗེས་སུ་འབྲངས་ལ་བཀའ་བསྟན་གྱི། །ལུང་གསར་མང་པོའི་རྒྱན་དང་བཅས། །ཡོན་ཏན་རིན་པོ་ཆེ་ཡི་མཛོད། །འགྲེལ་པ་བདེན་རྣམ་ཤིང་རྟ་གཉིས། །གསར་དུ་བརྩམས་ནས་རང་སྡེ་ཡི། །གྲུབ་མཐའི་གཞུང་ལམ་གསལ་བར་བྱས། །དམ་ཆོས་མངོན་པའི་སྡེ་སྣོད་ཀྱི། །རྣམ་ཤེས་ཁམས་རྣམས་ལེགས་ཕྱེད་པས། །སྐྱེ་འགག་སྟོང་པར་སྒོམ་པའི་ལུགས། །དོར་ནས་འཕགས་ལམ་རྫོགས་ཆེན་གྱི། །ཡེ་ཤེས་སྒོམ་སྟོབས་ཀྱིས་ཐོབ་ལ། །དོན་དམ་བྱང་ཆུབ་སེམས་སུ་གྲགས། །ཀུན་རྫོབ་སྨོན་འཇུག་རྣམ་གཉིས་ནི། །བསྐྱེད་ལས་སྐྱེས་པ་གཙོ་ཆེ་བའི། །བསླབ་བྱ་གོང་དུ་འཕེལ་བའི་ཕྱིར། །ཕྱུགས་ལུག་བརྒྱ་ཕྲག་གཉིས་ཙམ་དང་། །སྲོག་ཆགས་ཕྲ་མོ་གྲངས་མེད་ལ། །འཇུངས་པ་མེད་པའི་སྲོག་སྦྱིན་བྱས། །དད་གཤིན་རྫས་རྣམས་ལོག་འཚོ་རུ། །སྦྱར་ནས་གཟི་བྱིན་མ་བསྒྲུབས་པར། །སྡེ་སྣོད་བཞུགས་པའི་གཙུག་ལག་ཁང་། །པདྨ་འོད་ཀྱི་གླིང་བསྐྲུན་ཅིང་། །བདག་སྦྱར་སྒོམ་གྲྭ་འཛུགས་པ་དང་། །སྟོང་དངུལ་ཐལ་བའི་རྒྱུ་ཚོགས་ལས། །དཀོན་མཆོག་རྟེན་གསུམ་བཞེངས་པ་དང་། །མེས་དབོན་གནས་ལ་ཁྲི་མཆོད་དང་། །བཀའ་འགྱུར་ཡོན་གྱིས་བསླུ་སྒྲོགས་སོགས། །སྦྱིན་པའི་ཕ་རོལ་ཕྱིན་ལ་བསླབས། །རྩ་རླུང་ཁམས་གསུམ་ལས་རུང་ནས། །རྡོ་རྗེ་ཐེག་པའི་འདུལ་བ་དང་། །སྔགས་ཀྱི་ཚུལ་ཁྲིམས་དང་དུ་བླངས། །གླེན་པ་རྣམས་ཀྱིས་སྒྲོ་སྐུར་ལ། །ཉམ་ང་མེད་པའི་གདེང་ཐོབ་ཅིང་། །ཟབ་མོའི་དོན་ལ་བཟོད་པ་ཡི། །རྣམ་ཐར་ངོ་ལྐོག་མེད་པར་བསྐྱངས། །བྱ་བ་ལས་ཀྱི་འཁོར་ལོ་དང་། །འཇུག་པའི་སྤྱོད་པ་མཐའ་དག་གི །གྲོགས་སུ་བརྩོན་འགྲུས་ཕ་རོལ་ཕྱིན། །དྲངས་པས་བར་མ་དོར་མ་འཁྱམས། །བསྐྱེད་རྫོགས་སྤྲོས་པ་རང་ཞིག་ནས། །བསམ་གཏན་ངང་དུ་ཡིད་བསྡུད་ཀྱང་། །ཤེས་རབ་ཕ་རོལ་ཕྱིན་པ་ནི། །ལྷག་མཐོང་རྫོགས་པ་ཆེན་པོར་སོང་། །དེ་ལྟས་རྙེད་དང་མི་རྙེད་སོགས། །ལོ་ཀའི་ཆོས་བརྒྱད་ལ་ཐལ་བའི། །ཆེན་པོ་བསྙེན་ལ་མི་མཁས་ན། །རྒྱལ་པོའི་བླ་མཆོད་ཕྲག་དོག་ཅིང་། །རྒ་དང་ནད་ཀྱི་བར་ཆད་ལའང་། །དཔྱད་ནས་ས་སྐྱོང་སྡེ་དགེ་ཡི། །སྤྱན་འདྲེན་ལན་དུ་སྤྲིང་ཡིག་བྱས། །ཆོས་རྗེ་དཔལ་ལྡན་ས་སྐྱ་པའི། །སྤྱན་འདྲེན་ནན་ཏན་ཆེ་བའི་སྟེང་། །མགོན་པོ་ཞལ་གྱི་བརྡའ་དོན་ལ། །ཡང་སྲིད་སྔ་ཕྱིའི་རྟེན་འབྲེལ་མཐོང་། །ཤུལ་རིང་ལམ་ཐོག་ཁེལ་བ་ཡི། །རྟེན་གསུམ་མཇལ་ཞིང་བསྟི་སྟང་བྱས། །ལྷ་ཁང་ཆེན་པོར་མཇལ་འཛོམ་ནས། །བཟུང་སྟེ་དགུན་ཟླ་གསུམ་གྱི་བར། །རྟེན་གསུམ་སྤྱི་ལ་རབ་གནས་དང་། །བྱེ་བྲག་སྐྱེས་བུའི་ལྷག་གནས་ནི། །གསར་རྙིང་རྒྱུད་ལུང་དབང་ཆེན་བརྒྱད། །རྗེས་གནང་སྲུང་མའི་སྲོག་གཏད་དང་། །བྱང་སྡོམ་ཐུགས་བསྐྱེད་ཆེན་མོ་དང་། །འབྲེལ་བར་འཁྲིད་ཚུལ་ནན་ཏན་གྱིས། །ཐུགས་རྒྱུད་བྱང་ཆུབ་སེམས་གཉིས་སུ། །སྨིན་པའི་ཐབས་ལ་ནན་ཏན་བྱས། །ཆེན་པོ་དག་གི་ཆོས་རྒྱུན་ནི། །བླ་ལ་དྲང་བའི་རྟེན་འབྱུང་ཕྱིར། །འོག་མའི་སྣོད་དུ་འབབ་དཀའ་ཡང་། །རྒྱལ་ཁམས་ཡོངས་ཀྱི་བླ་མ་རུ། །བསྐུར་བའི་ཐུགས་རྒྱུད་ཐེག་ཆེན་དང་། །ཆོས་ཉིད་དོན་ལ་རབ་སྦྱར་ནས། །འདྲེན་པའི་དེད་དཔོན་དོན་མཐུན་དུ། །འགྱུར་བའི་སྨོན་ལམ་བཟང་པོ་བཏབ། །དམན་པ་རྣམས་ལ་ཆེ་འགྱིང་དང་། །ནོར་ལྡན་རྗེས་སུ་འཛིན་པ་ཡི། །ལྷག་བསམ་ཟོལ་མ་སྤངས་བྱས་ཏེ། །བསྡུ་དངོས་བཞི་ལ་སེམས་བསྐྱེད་ནས། །ཚོགས་བཤད་མོས་སློབ་ཙམ་མིན་པར། །བརྒྱ་ཕྲག་གཉིས་ཐལ་ཁྲིད་ན་ཡང་། །ད་ནི་སྒྲུབ་པའི་དུས་ཀྱི་མཐར། །ངེས་འབྱུང་ར་རིས་རྒྱུད་བསྐུལ་ནས། །ཆོས་དོན་གཉེར་བ་ཕལ་མོ་ཆེ། །སྙིགས་མ་ལྔ་ཡི་གདོན་ཆེན་གྱིས། །ཤེས་རྒྱུད་ཟིལ་གྱིས་ནོན་ཆེས་པས། །ལོ་ཟླ་དུས་ཀྱི་སྒྲུབ་ཚུགས་ལ། །དཔག་པའི་ཡོན་ཏན་སྐྱེས་ནས་ཀྱང་། །སླར་ལ་ཐུར་དུ་ལྷུང་བའི་ཕྱིར། །ལམ་དུ་འགྲོ་བ་ཤིན་ཏུ་དཀོན། །དེ་ལྟས་བདག་ཉིད་དབེན་པ་ལ། །ཆེ་ཐང་བྱེད་པའི་རྒྱུ་ཡང་འདི། །ཁྱད་པར་སྔགས་ཀྱི་སྡེ་སྣོད་ནི། །ལམ་སྟོན་བྱེད་པ་ཕལ་ལ་ཡང་། །ལྷོངས་སུ་གྱུར་པའི་གནས་ཉུང་ནས། །རྫིང་ན་མ་མཆིས་ཝ་ནང་དུ། །འདྲོང་བ་རྒྱུ་འབྲས་འགལ་བ་ཅན། །དེ་ཕྱིར་བསྟན་པའི་འཕེལ་འགྲིབ་ཀྱང་། །ཆོས་ཀྱི་དེ་ཉིད་རིག་པ་དང་། །ཆོས་བཞིན་སྤྱོད་པ་ཡོད་མིན་ལ། །དགོངས་ཀྱིས་གང་ཟག་མང་ཉུང་དང་། །རིགས་གཟུགས་དབང་ཕྱུག་ཆེ་ཆུང་ལ། །འཛིན་པ་རྨོངས་པའི་འཁྲུལ་སྣང་ཙམ། །རྒྱན་དྲུག་དབང་ཕྱུག་བརྒྱད་ཅུ་དང་། །རྒྱ་གར་དམ་པ་སངས་རྒྱས་དང་། །དགེ་བཤེས་ཁ་རག་སྒོམ་ཆུང་དང་། །རྒྱལ་བ་ཀློང་ཆེན་རབ་འབྱམས་ལའང་། །ཁྱིམ་ཆུང་སྤང་བའི་ཁྱིམ་ཆེན་གྱི། །དགོན་གནས་སྡིག་པས་འཛིན་པ་དང་། །ཆགས་སྡང་ཆོས་སུ་སྒོམ་པ་ཡི། །གྲྭ་སློབ་རྒྱུན་ཆགས་མ་མཆིས་པས། །རྟེན་གསུམ་རྣམས་ལ་བསྟི་སྟང་དང་། །ཆོས་ལ་གུས་པའི་ཉམས་ལེན་མཛོད། །འབྲེལ་ཚད་དགེ་ལ་འགྱུར་བ་ཡི། །སྨོན་ལམ་བཟང་པོ་བཏབ་ནས་ཡོད། །ཁོ་བོའི་རྒྱུད་ནི་ངེས་འབྱུང་དང་། །དྲན་སྣང་ཡེ་ཤེས་རྣམ་པ་གཉིས། །མཉམ་རྗེས་ཅན་དུ་འཆར་བའི་ཕྱིར། །ང་དང་ང་ཡིར་འཛིན་པའི་སེམས། །ཆོས་ཉིད་དོན་ལ་ཡོད་མིན་ན། །མངོན་དང་ལྷག་པའི་ང་རྒྱལ་དང་། །ཕྱོགས་རིས་བདག་བསྟོད་གཞན་སྨོད་དང་། །ཁེངས་དང་བརྟུན་ངས་ཆོས་ལས་འདས། །རིགས་གཟུགས་དབང་ཕྱུག་གྲགས་པ་ཡི། །ཆེ་དང་མངོན་རློམ་ཅན་དག་ལ། །སྨོན་དང་ཞུམ་བཅས་རེ་དོགས་ཀྱི། །གནས་ལས་ཀྱང་ནི་གྲོལ་བའི་ཕྱིར། །ཀུན་ནས་མཐོང་བ་ཐ་དད་པ། །སྐྱེས་བུ་སོ་སོའི་ལས་སྣང་དང་། །གནས་སྐབས་རྟེན་ཅིང་འབྲེལ་འབྱུང་ཡིན། །གང་ཞིག་ཐེག་པ་ཆེན་པོ་ཡིས། །བྱིན་གྱིས་བརླབས་པའི་གང་ཟག་ནི། །གང་ལ་ཕན་པའི་མཐུ་མེད་ཀྱང་། །དེ་ཡི་བསམ་པ་རྟག་ཏུ་བྱ། །གང་ལ་བསམ་པ་དེ་ཡོད་ན། །དེ་ནི་དེ་ལ་དོན་གྱིས་ཞུགས། །ཞེས་པས་གསེར་འགྱུར་རྩི་ལྟ་བུའི། །རིན་ཆེན་སེམས་ལ་རྟག་གུས་པས། །མི་ཚེའི་ལྷག་མའང་དོན་ཡོད་འགྱུར། །འདི་ནི་བླ་ཆེན་ས་སྐྱ་པའི། །གསུང་གིས་བསྐུལ་ནས་བྲིས་པ་ཡིན། །དགེ་བས་མཐོང་ཐོས་དྲན་རེག་ཀུན། །རྣམ་བྱང་དམ་པའི་རྒྱུར་གྱུར་ཅིག །སརྦ་མངྒ་ལཾ།། །།