ཡུལ་ལྷོ་རྒྱུད་དུ་བྱུང་བའི་རྫོགས་ཆེན་པ་རང་བྱུང་རྡོ་རྗེ་མཁྱེན་བརྩེའི་འོད་ཟེར་གྱི་རྣམ་པར་ཐར་པ་ལེགས་བྱས་ཡོངས་འདུའི་སྙེ་མ།

Previous Text Back to Volume Page Next Text

Wylie title	yul lho rgyud du byung ba'i rdzogs chen pa rang byung rdo rje mkhyen brtse'i 'od zer gyi rnam par thar pa legs byas yongs 'du'i snye ma
Location	'jigs gling bka' 'bum Volume 14, Text 4, Pages 69-120 (Folios 1a1 to 26b3)
Author	འཇིགས་མེད་གླིང་པ་
Less details More details
Citation	'jigs med gling pa. Yul lho rgyud du byung ba'i rdzogs chen pa rang byung rdo rje mkhyen brtse'i 'od zer gyi rnam par thar pa legs byas yongs 'du'i snye ma. In Kun mkhyen rig 'dzin 'jigs med gling pa'i gsung 'bum, Vol. 14: 69-120. New Delhi: Shechen Publications, 2025.
Genre	Biographies - Hagiography - rnam thar

[edit]

༄༅། །སུ ཀྲྀ ཏཾ པཱ རི ཨཱ ཏྲ སྱ མ ཉྫ རི དེ ཤ ད ཀྵི ཎ བ ཨ ཏི མ ཧཱ སྭ ཡཾ བྷུ བོ བ ཛྲ ཛྙཱ ན ཀྲྀ པཱ ར སྨ ཡོ བི མོ ཀྵ ནཱ མ བི ཧ ར ཏི སྨ།། །།

༄༅། །ཡུལ་ལྷོ་རྒྱུད་དུ་བྱུང་བའི་རྫོགས་ཆེན་པ་རང་བྱུང་རྡོ་རྗེ་མཁྱེན་བརྩེའི་འོད་ཟེར་གྱི་རྣམ་པར་ཐར་པ་ལེགས་བྱས་ཡོངས་འདུའི་སྙེ་མ་ཞེས་བྱ་བ་བཞུགས།། །།

༄༅། ཨཱ དྱ བྷཱ པ ཤཱ ནྟ ད རྴ ནོ ན གོ ཙ ར སྶ མ པྲ སཱ ཎ མཱ ར།། །།

༄༅། །གདོད་ནས་སྲིད་ཞི་མཉམ་པར་བརྡལ་ཡང་ཚུ་རོལ་མཐོང་བའི་ཡུལ་མིན་ལ། །

༄༅། བྷོ ག ཀཱ ཡ མཱུ ལ དྷ རྨ ཀོ ཏྟ རཱ ནྱ ཡ ཏྶ ནཱ ཡ ཀྵ རྱ བཻ ཙ། །

༄༅། །ལྷུན་གྱིས་གྲུབ་པའི་སྐུ་དང་ཡེ་ཤེས་ཆོས་མཆོག་གཞན་དུ་མི་འགྱུར་བ། །

༄༅། བི དྱ སོ ག ཏ ཧྲི ད ཡྻ ས རྦ བྷཱ བ ཙ སྭ བྷཱ བ མཱུ ལ ས དྡྷ།

༄༅། །རིག་པ་བདེ་གཤེགས་སྙིང་པོའི་ངོ་བོ་ཚོགས་ཀྱི་དམ་པ་ཀུན་གྱི་དངོས། །

༄༅། ཏྲཱི ན ཀཱ ལ ཀཱ ལ བཻ ས མ ནྟ བྷ དྲ ཀཱ ཤ པྲྀ ཏྱ བཻ ཛ ཡ ནྟུ། །

༄༅། །དུས་གསུམ་དུས་མེད་ཀུན་ཏུ་བཟང་པོ་གསལ་འགྲིབ་མེད་པར་རྒྱལ་གྱུར་ཅིག །

༄༅། །དེ་ལ་སྲིད་ཞི་མ་ལུས་པའི་མགོན་པོ། ཁྱབ་གདལ་ཡོངས་གྲུབ་ཆེན་པོ་ཆོས་ཉིད་ཀུན་ཏུ་འགྲོ་བའི་རྣམ་ཐར་བཟང་པོ་འཕེལ་བ་དང་འགྲིབ་པའི་གནས་ཡོངས་སུ་སྤངས་པ་གང་། རྣམ་པར་བྱང་བའི་ཁམས་ལ་ནི་རྟག་ཏུ་མཉམ་པར་གཞག་གོ་སྙམ་པའམ། ངས་འགྲོ་བའི་གནས་རིགས་འདི་ལྟ་བུར་སྤྲུལ་པ་འདི་ལྟ་བུ་བཀྱེ་བར་བྱའོ། །སེམས་ཅན་འདི་ལྟ་བུ་སྨིན་པར་བྱེད་དོ་སྙམ་བྱེད་ཀྱི་རྟོག་པ་རང་མཚན་པ་ཞིག་མ་གྲུབ་མོད་ཀྱི། རྒྱུ་སྐར་གྱི་བདག་པོ་ལ་གཟུགས་བརྙན་ཀུན་ཏུ་འགྲོ་བའི་རྣམ་རྟོག་གི་བྱ་བ་དང་བྱེད་པ་པོས་སྟོངས་བཞིན་དུ་ཆུ་སྣོད་ཐ་དད་པའི་རྗེས་སུ་འཇུག་པ་ལྟར། ནང་པ་སངས་རྒྱས་པའི་ཆོས་ཁམས་རྒྱ་མཚོའི་སྙིང་པོ་དངོས་པོ་མེད་པའི་ངོ་བོ་ཉིད་ཀྱི་རང་བཞིན་ལས་ཕྱི་རོལ་ཏུ་མ་གྱུར་པའི་བྱང་ཆུབ་ཀྱི་སེམས་ཆོས་དབྱིངས་དྲི་མ་མེད་པའི་སྙིང་པོ་ཅན་གྱི་རྟེན་ཅིང་འབྲེལ་བར་འབྱུང་བའི་རིགས་ཡོངས་སུ་སད་པ་ན། བསོད་ནམས་དང་བཅས་པའི་སེམས་ཅན་གྱི་ཁམས་ལ་རང་བཞིན་གྱི་ཕན་རླབས་པོ་ཆེ་རྣམ་པ་ཅིར་ཡང་ཤར་ནས་ཐོགས་པ་ཤ་སྟག་གོ །དེ་ལས་བདག་དང་བཅས་པའི་སེམས་ཅན་གྱི་ཁམས་ནི་འདི་ཙམ་ནས་འཁྲུལ་དང་། འདི་ཙམ་ནས་མ་འཁྲུལ་དང་། འདི་ཙམ་ནས་གྲོལ་གྱི་གཏན་ཚིགས་བརྗོད་དུ་མི་སྣང་སྟེ། གདོད་མའི་ཡེ་ཤེས་དེ་དང་གློ་བུར་དུ་མཛའ་བར་བྱས་པའི་སྲིད་པའི་བདག་པོ་ཀུན་གཞིའི་རྣམ་པར་ཤེས་པ་བག་ལ་ཉལ་ལམ། གཉིས་སུ་སྣང་བའི་རྟོག་པ་བཀོད་པ་ཙམ་ནས་ཚོར་བ་སྣ་ཚོགས་པ། ཐ་དད་པའི་འདུ་ཤེས་ཅན་རྣམ་པར་ཤེས་པའི་ཚོགས། འདུ་བྱེད་ཀྱི་རླབས་ཕྲེང་དང་བཅས་པས་འཁོར་བའི་ཐོག་མ་བཀོད་ཅིང་། སྲིད་པའི་ཉེས་དམིགས་དེ་དག་གི་དབུས་ན་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི་རང་ངོ་མ་ཉམས་པར་ཡོད་པས། དེ་བཞིན་གཤེགས་ཉིད་དེ་ཡི་ཕྱིར། །འགྲོ་ཀུན་དེ་ཡི་སྙིང་པོ་ཅན། །ཅེས་སོ། །གང་ཚེ་སྒྲ་གཅན་འཛིན་གྱིས་ཡུམ་ལ་བསྟོད་པ་ལྟར་སྨྲ་བསམ་བརྗོད་དུ་མེད་པ་ལ་སོགས་ཆོས་ཉིད་བསམ་གྱིས་མི་ཁྱབ་པའི་དབྱིངས་སུ་སྤྲོས་པ་ཉེ་བར་ཞི་བ་ན་མྱ་ངན་ལས་འདས་པ་ཞེས་རྣམ་འགྱུར་གཉིས་སུ་མིང་གི་གྲུབ་པ་ཡང་། འཁྲུལ་གྲོལ་གྱི་བྱ་བ་རྫོགས་པའི་སྐད་ཅིག་ལ་སྣང་བ་རྗེས་ལ་ཐོབ་པའི་ཤེས་རབ་ཀྱི་མཚང་རིག་པ་ཞིག་ཡིན་ནོ། །མཚན་ཉིད་དེ་ལྟ་བུས་ཐོག་མཐའ་མི་འཚལ་བའི་འཁོར་བ་ལ་ཇི་ལྟར་བརྒྱུད་པའི་རབས་འགོད་དུ་ག་ལ་ཞིག །སེམས་དང་བཅས་པའི་མ་རིག་པའི་བཞོན་པ་ཅན་དག་གིས་སྔོན་རབས་དྲན་པའི་ལམ་ནས་བརྗོད་ཟེར་བ་ནི་ལས་ཀྱི་སྒྲིབ་པ་མཆོག་ཏུ་ལྕི་བའང་ཤེས་སོ། །འོན་ཏང་གནས་ལུགས་འདི་བསམ་གྱིས་མི་ཁྱབ་པའི་ངང་ལ་བཞག་བདོ་བའི་ཚེ་ད་ལྟར་བའི་སྣང་བ་མངོན་སུམ་པར་གདགས་པ་འདི་ཡང་གདགས་གཞི་རང་གི་སྟེང་ན་ཡོད་མེད་གཉིས་ཆར་ལས་མ་གྲུབ་ཀྱང་རྗེས་ལ་ཐོབ་པའི་སྣང་ཆ་ལ་སྲོག་དང་བྲལ་བའི་སེང་གེ་བཞིན་རྨི་ལམ་དང་དོད་མཉམ་པའི་མཚང་ཕུགས་ནས་རིག་པས། འདི་ནི་མངོན་སུམ་པའི་སྣང་བའོ་ཞེས་བདེན་བདེན་པོར་བལྟ་བའི་བྱིས་པ་སོ་སོ་སྐྱེ་བོས་རྣམ་པར་རྟོག་པའི་ཉེར་ལེན་ཅན་གྱིས་རྗེས་སུ་འབྲངས་ནས་ཉིང་འཁྲུལ་གྱི་བཀོད་པ་ལ་གསལ་བ་འགའ་ཞིག་གསང་བ་ཆེན་པོ་ཉམས་སྣང་གི་རྟོགས་བརྗོད་དུ་བཀོད་པ་དེ་ཀར་གདའ། དེ་ལ་ད་རེས་ཀྱི་སྲིད་པ་འདི་ནི་རྣལ་འབྱོར་དབང་ཕྱུག་མི་ལ་བཞད་པ་རྡོ་རྗེའི་ཐུགས་བསྐྱེད་ལས་ཆོས་རྗེ་འབྲུག་པ་ཞེས་རྒྱལ་ཁམས་ཀུ་སུ་ལུ་པའི་བརྟུལ་ཞུགས་ཀྱིས་གྲོལ་བར་མཛད་པའི་སློབ་བརྒྱུད་ལ། དང་པོར་ཆེ་བ་སྤ་རྐྱང་གཉིས། བར་དུ་ཆེ་བ་རྒྱ་འབྲས་གཉིས། ཐ་མར་ཆེ་བ་ལོ་རྒོད་གཉིས། གཞན་རས་པ་གསུམ། རྣལ་འབྱོར་པ་གསུམ། ཞིག་པོ་གསུམ་སོགས་དབུ་ཆེ་གདུགས་ཐོག་པ་ཉིས་སྟོང་བརྒྱད་བརྒྱ་བྱུང་བར་གྲགས་པའི་ནང་ཚན་རྒྱལ་བའི་དབང་པོ་ཀློང་ཆེན་ཞབས་དང་ཆོ་འབྲང་གཅིག་ཅིང་། དེ་ཉིད་སྐུ་བལྟམས་པའི་གནས་གཡོ་རུ་གྲའི་ཕུ་སྟོད་གྲོང་ཞེས་པ་དང་ཧ་ཅང་མི་རིང་བའི་གནས་ཟར་པོ་ཆོས་རྗེ་རྒྱ་ཡགས་པའི་ཁྱིམ་དུ་བདག་གི་མེས་པོ་ཆོས་རྗེ་སྨོན་ལམ་བཟང་པོ་དེ་བྱུང་བར་གདའ། ཆོས་རྗེ་དེ་ནི་རང་བཞིན་བཟང་ལ། མ་བཅོས་པའི་ངང་ཚུལ། ཆོས་སྤྱོད་དང་བཟླས་བརྗོད་སྨྲ་ཞིང་། ཚེའི་བཅུད་ལེན་གྲུབ་པ་ལྟ་བུ་ཞིག་ཡོད། ཁོང་གཞོན་ནུའི་དུས་གཏེར་བདག་གླིང་པ་མཛད་པ་ཕྲིན་ལས་རྒྱས་པའི་སྐབས་ཡིན་པ་ནས་རིགས་རུས་སོགས་ལ་གཟིགས་ཏེ། རྫོགས་ཆེན་པ་འོད་གསལ་ཀློང་ཡངས་དང་། ཌཱཀྐི་རས་ཆེན་གྱི་གདན་ས་མིག་བཞི་དཔལ་གྱི་དགོན་པ་དང་། འོད་གསལ་གླིང་། གཞན་ཡང་སྙན་ཆ། སྐལ་ལྡན། དཔལ་འབྱོར་ཆོས་སྡིངས། བྱར་གྱི་ཅང་མོ་དགོན་སོགས་ཀྱི་བླ་མར་བསྐོ་འཇའ་མཛད། རེ་ཞིག་ན་མ་སངས་སྤུན་དགུའི་རྒྱུད་ལས་བྱུང་བའི་སྐེད་མེད་མ་དང་འདུས་པ་ལས་བདག་གི་ཕ་དེ་བཙས་པར་གདའ། དེ་ལ་མེས་པོ་ཚུན་ཆད་རིགས་རུས་ཀྱི་ཆོས་ཚུགས་མ་ཞིག་པ་ཞིག་ཡིན། མ་ནི་རྒྱལ་པོ་གྲི་གུམ་བཙན་པོའི་བློན་པོ་ལོ་ངམ་ཏ་ཟིག་ལས་ཆད་པ་མདོ་སྲིབས་སྟེང་ཁང་པའི་རིགས་དང་ཆོ་འབྲང་གནུབས་ཀྱི་བརྒྱུད་པ་མ་ཉམས་པ་མདོང་ཆུང་རྙིང་མའི་ཁུངས་ཏེ་ཕྱི་མོ་དང་མེས་པོ་སོགས་ཕྲུགས་ཀྱི་བདུན་པ་ཚུན་ཆད་ཀྱི་ཉེ་དུ་ངེད་ཀྱི་ཡང་མེས་ཀྱི་ཆར་གཏོགས་པ་ལའང་དགེ་སློང་གྲགས་དབང་དང་། ལྗང་ཕྲེང་བ་ལྷུན་གྲུབ་རྣམ་རོལ་སོགས་དགེ་བའི་བཤེས་གཉེན་འགའ་རེ་བྱུང་བར་གདའ། ལར་བོད་ན་དེང་སང་རིགས་བཞིའི་བྱེ་བྲག་རྟོག་དཔྱོད་བྱེད་པ་མེད་མོད། དམངས་རྗེའི་ཁྱད་པར་འཇིག་རྟེན་གྱི་འབྱོར་རྒུད་ཁོ་ནས་དབྱེ་བ་ལས་རིགས་རུས་ཀྱི་གཏན་ཚིགས་དགོས་པའི་གནས་ཅང་མེད། ཆོས་ཀྱི་ངོ་ན་ནི་གང་ཟག་རང་གི་ཤེས་རྒྱུད་དང་བྱེད་ལས་གཙོ་ཆེ་བ་དོན་ལ་གནས་པ་དེ་ཀར་གདའ་སྟེ་རླངས་ཀྱི་པོ་ཏི་བསེ་རུར། ལར་སྐྱེས་པའི་མིས་རང་གི་སྐྱེ་རྒྱུད་མ་ཤེས་ན་ནགས་ཁུང་གི་སྤྲེའུ་དང་འདྲ། ཞེས་པའི་རྗེས་སུ་འབྲངས་ཏེ་གནས་ཚུལ་ཙམ་མོ། །དེ་ལ་བཙས་པའི་ཡུལ་ནི། དཔལ་ཨོ་རྒྱན་ཆོས་ཀྱི་རྒྱལ་པོས། འཕྱོང་རྒྱས་ནང་དུ་ང་སྤྲུལ་དོན་བྱེད་འོང་། །སུ་ཡིན་མི་ཤེས་ཅིག་ཅར་སྨྲ་བ་འབྱུང་། །འཕྱིང་དབར་མདོའམ་བང་སོ་དམར་པོའི་ལྷོར། །ལྷ་བབ་མཆོད་རྟེན་དགོན་སྡེ་འཆའ་ཡང་སྲིད། །ཅེས་གསུངས་པ་ལྟར་འཕྱིང་དབར་བང་སོ་དམར་པོའི་ལྷོ་ཕྱོགས། རི་བྲག་དང་བཅས་པའི་གྲོང་རྡལ་གྱི་སྟོད་ན་རྡོ་རྗེ་སྙིང་པོའི་རིང་ལུགས་འཛིན་པའི་འདུས་སྡེ། སྨད་ན་དཔལ་ལྷ་ལས་བབ་པའི་མཆོད་རྟེན་ངོ་མཚར་གྱི་བཀོད་པ་ཅན་གྱི་ཡོངས་སུ་བརྟེན་པའི་གནས་སུ་ཞི་བ་ཞེས་པ་ས་མོ་བྱའི་ལོ་རྒྱལ་གྱི་ཟླ་བའི་ཚེས་བཅོ་བརྒྱད་དེ་རྒྱལ་བའི་དབང་པོ་པདྨ་ལས་གྲོལ་ཞི་བ་ཆེན་པོའི་གྲོང་ཁྱེར་དུ་མནལ་བའི་དུས་ཚེས་བཟང་པོའི་སྔ་དྲོའི་ཆ་ན་མངལ་གྱི་པདྨོ་ལས་གྲོལ་བར་འདུག །དེ་ལ་འདི་སྙམ་དུ། སྔོན་གྱི་ཚེ་དཀོན་མཆོག་གསུམ་ལ་བླ་མར་བྱས་ཤིང་། སྨོན་ལམ་དག་པའི་ལས་ཀྱི་འཕྲོ་འགའ་ཙམ་མཆིས་པ་འདྲ་སྟེ། འདི་ལྟར་འཇིག་རྟེན་ན་དཔལ་དང་སྟོབས་ཀྱིས་མངོན་པར་མཐོ་བའི་གནས་རྣམས་སུ་ཉིང་མཚམས་སྦྱར་ན་དེ་དག་གི་རང་བཞིན་ཕལ་མོ་ཆེ་རྣམས་ནི་ཚེ་རབས་སྔ་མར་ཐབས་ཀྱིས་མ་ཟིན་པའི་དགེ་བ་སྤྱད་པས་ཚེ་འདིར་ལྟར་སྣང་གི་བསོད་ནམས་དང་མངའ་ཐང་ཇི་ཙམ་ཆེ་བ་དེ་སྲིད་དུ་སྲོག་གཅོད་པ་དང་། འབངས་མནར་བ་ལ་སོགས་ཕྱི་མར་ངན་འགྲོ་རླབས་པོ་ཆེ་བསྒྲུབ་པའི་རྒྱུར་འདུག་པ་རིག་པས་ཤེས་ཤིང་དཔལ་མགོན་ཆེན་པོ་ཀླུ་སྒྲུབ་ཞབས་ཀྱིས་སྨོན་ལམ་དུའང་བཏབ་པའི་ཕྱིར་རོ། །ཤིན་ཏུ་གུད་པར་གྱུར་པ་རྣམས་ནི་མྱང་བྱ་མི་བཟད་པས་སྙིང་ཤིན་ཏུ་རྗེ་བའི་གནས་སུ་ཉམ་ཐག་ཅིང་ཆོས་དང་མཇལ་བའི་རྒྱུ་རྐྱེན་རྟེན་འབྲེལ་ཙམ་ཡང་ཚོགས་པ་ཤིན་ཏུ་དཀའ་བར་སྣང་ངོ་། །དེའི་ཕྱིར་མཐའ་གཉིས་སུ་མ་ལྷུང་བར་ཆོས་ཀྱི་བྱ་བ་བསྒྲུབ་པ་ལ་བར་ཆད་ཀྱི་སྒོ་མེད་པའི་ཁྱིམ་དུ་སྐྱེས་ཤིང་། དེའང་ལེགས་སྨོན་དང་བཅས་པས་བསྟན་པའི་སྒོར་འཇུག་པ་ཕལ་གྱི་དོན་དུ་གཉེར་བྱ་སྡེ་ཆེ་ལ་བཟའ་བཏུང་མོད་པ་ཉིད་དང་། གཞན་ཡང་ཞང་པོ་དང་ཕུ་བོ་ལ་སོགས་པའི་གྲྭ་རྒྱུན་དང་སྟབས་གཅིག་པའི་དབང་དུ་རི་བོ་བདེ་ཆེན་དུ་ཆོས་སྒོར་འཇུག་པའི་རྣམ་ཆ་ཤར་བ་ན་ཤྲཱི་པརྦ་ཏའི་གླིང་དུ་ཁམས་པ་རྫ་ཡུལ་བའི་གྲྭ་རྒྱུན་འཆོས་རྒྱུ་མི་བཅུ་ཐམ་པ་འོངས་པ་ནས་གཅིག་ལམ་བར་དུ་འདས་པའི་སྟེས་དབང་གིས། གྲྭ་གསར་དགུ་སྟབས་གཅིག་ཏུ་འཆོས་པ་རྟེན་འབྲེལ་ལམ་བཏུབ་ཟེར་སྣེ་མོ་བ་དག་ནས་སྣང་བ་བློ་རྡེག་ཏུ་བསྒྱུར་བའི་བརྡའ་བསྐུལ་དང་། ཁོ་བོ་ཅག་མནོ་ཤེས་མི་ཤེས་ཙམ་ནས་རབ་ཏུ་བྱུང་བའི་རྟགས་ཅན་མཐོང་ན་དེར་སྨོན་ཞིང་རིངས་པའི་སྐྲ་འདབ་ཕལ་མོ་ཆེ་མཛུབ་མོ་ལ་བཀོན་ཏེ་ཕྱུང་བའི་ངང་ཐུང་གཉིས་རྟེན་འབྲེལ་འགྲིག་པའི་རྒྱུ་རྐྱེན་ལས་རང་ལོ་དྲུག་པའི་ཚེ། གསང་མཆོག་དཔལ་གྱི་རི་འོད་གསལ་ཐེག་པ་ཆེན་པོའི་གླིང་དུ་དངོས་དང་བཅས་པའི་གསར་བུ་བ་མི་བཅུ་ཐམ་པ་ཆོས་སྒོར་ཞུགས། སྤྲུལ་པའི་སྐུ་ངག་དབང་བློ་བཟང་པདྨ་ལས་གཙུག་ཕུད་ཕྱུང་སྟེ་རབ་ཏུ་བྱུང་བའི་རྟགས་མ་ཡིན་པ་དོར། དགེ་ཚོགས་རིན་པོ་ཆེ་མཐའ་ཡས་པའི་རྟེན་གཞི་དགེ་བསྙེན་གྱི་སྡོམ་པ་ཡང་དག་པར་ནོད། སངས་རྒྱས་ཀྱི་བསྟན་པ་རྟགས་ཀྱིས་ཆེ་ཞིང་། འཇིག་རྟེན་གསུམ་དུ་ཐོབ་པར་དཀའ་བའི་གནས་ངུར་སྨྲིག་གི་རྒྱལ་མཚན་དྲང་སྲོང་གི་ཆ་ལུགས་དག་གིས་བརྒྱན་པར་བྱས་སོ། །སྐྱེས་མ་ཐག་ཏུ་དམ་པའི་ཆོས་དང་མཇལ་ཟེར་བ་དེ་བྱུང་འདུག་ནའང་། དངོས་གནས་ལ་བྱིས་པ་མནོ་མི་ཤེས་པའི་ཁྲོད་དུ་ལོ་བཅུ་གསུམ་ཙམ་ལོན་ལོན་དུ་ཐལ་རྩེད་འབའ་ཞིག་ལ་གཡེངས་ཤིང་། ཧ་ཅང་བྱིས་པའི་རྣམ་ཐར་བསྐྱངས་དྲགས་པས་རྒན་པ་འདྲས་འདི་ཡང་ན་དང་ཡང་ན་གཅིག་ཡོང་ཟེར་བ་ཐོས། དེ་ཚེ་གྲུབ་མཐའི་ཕྱོགས་སྔ་སོགས་གང་ཡང་མི་ཤེས་མོད་ཀྱི་རྡོ་རྗེ་ཐེག་པ་སྔ་འགྱུར་གྱི་རིང་ལུགས་སུ་ཞུགས་པ་ལ་སྤྲོ་བ་ཆེན་པོ་བརྟས་པ་དང་། སྤྱིར་དཀོན་མཆོག་གསུམ་གྱི་སྣང་བརྙན་ལ་མཆོག་ཏུ་དད་ཅིང་། ཁྱད་པར་སློབ་དཔོན་ཆེན་པོའི་སྣང་བརྙན་མཐོང་བའམ། མཚན་ཐོས་པའམ། ཡིད་ལ་དྲན་པ་ཙམ་ནས་དད་མོས་ཤིན་ཏུ་འཕེལ་བ་དང་། མཚན་མོའི་རྨི་ལམ་ན་འཇིག་རྟེན་གྱི་ཁམས་མ་ལུས་ཤིང་ལུས་པ་མེད་པ་ཐམས་ཅད་ལ་རིམ་བཞིན་མེ་ཤོར་ནས་རང་གི་བྱང་དྲངས་འགྲོ་བ་འགའ་ཞིག་དང་བཅས་མེ་ལས་རྒྱང་གྲགས་ཙམ་གྱི་ཕ་རོལ་ཏུ་འབྲོས་པའི་རྨི་ལམ་སྔ་མ་ཇི་ལྟ་བ་ལོ་ཉི་ཤུ་མ་ལོན་ཚུན་ལོ་རེ་ལ་ཐེངས་གཉིས་གཉིས་སྟར་ཆགས་འོང་བ་དང་། ཁྱད་པར་ཆུང་ངུའི་དུས་སེམས་ཞེས་པ་འདི་ཇི་འདྲ་ཞིག་ཡོད་འོང་སྙམ་པའི་སྣང་བ་འགོལ་སར་རྟག་ཏུ་ཤར་ནས་རང་གིས་རྟོག་དཔྱོད་བྱས་པའི་ཚེ་རང་སར་ཧ་ཕྱད་དེ་ལུས། དེས་མ་ཚིམ་ནས་རྒན་པ་འདྲ་ལ་དྲི་བ་བྱས་ཙམ་ན་ཁོག་པའི་ནང་ན་རང་ཉིད་ཇི་ལྟ་བ་ཡོད་ཟེར། ཡོད་ཟེར་བ་དེ་ལ་རྟོག་དཔྱོད་ཞུགས་ཙ་ན་དེ་ཡང་སྒྲ་ཇི་བཞིན་མ་ཡིན་པའི་མཚང་རིག་ནས་རྣམ་པ་ཀུན་ཏུ་དེ་ཀ་འཚོལ་བ་དང་། ཐོ་རེངས་སམ། སྔ་ཞོགས་སོགས་གཉིད་སྲབ་མོའམ། སད་མ་ཐག་པའི་གནས་སྐབས་ན་ཚོགས་དུང་གི་སྒྲ་ཐོས་པས་རྐྱེན་བྱས་དུང་གསོན་མ་དང་། རྒྱ་མཚོ་ཆེན་པོའི་སྣང་བ་མུ་མཐའ་མེད་པར་ཤར་ནས་སྣང་བ་མཆོག་ཏུ་འགྱུར་བ་དང་། ཆོས་སྤྱོད་བསླབ་པའི་ཚེ་སྔོན་གྱི་ལས་དབང་ལས་དགེ་རྒན་གྱི་རིགས་ཇི་སྙེད་པ་དྲག་ཤུལ་ཅན་འབའ་ཞིག་དང་ཐུག་པས་བརྡུང་འཐག་གི་རྣམ་པ་ཉི་མ་རེ་ཙམ་མེད་པ་མ་བྱུང་ནའང་ནུབ་མོ་ཉལ་བའི་ཚེ་སེམས་དགའ་ཡལ་ལེ་ཡོང་བས་གཞོན་ནུའི་དུས་སྐྱིད་བསམ་པ་མ་དྲན། སྡིག་པ་དག་པའི་རྟགས་མང་པོ་བྱུང་། རྐྱེན་དེ་དག་གིས་བྱིས་པ་བསྲན་མི་བཟོད་པའི་སྣང་བ་སྐྱོ་ཤས་དང་སྡུག་བསྔལ་གྱི་རྣམ་ཆར་ཤར་ནས། གདོང་བརྩིགས་སྡུག་ལ་བསྟན་འདུ་ཤེས་གང་ཡང་མེད་པའི་སྐྱོར་སྦྱངས་ལ་ཡོད་པའི་ཚེ། ད་ལྟའི་སྣང་བ་རྨི་ལམ་ལྟར་ནུབ་ནས་སྲིད་པ་སྔ་མའི་བག་ཆགས་འཛམ་བུའི་གླིང་གི་རྡོ་རྗེར་ཡང་ནས་ཡང་དུ་གསལ་ཞིང་། སྐབས་ཤིག་ཆུ་ཀླུང་ཆེན་པོའི་འགྲམ་ཕ་ཝང་ཁང་པ་ཙམ་གྱི་སྟེང་ན་རྒྱ་བན་རྣམས་ཀྱི་ཆས་ལ་འོང་བའི་སྟོད་ལེ་སེར་པོ་དེ་འདྲ་མནབས་ནས་ཉམས་འུར་བའི་སྤྱོད་པ་བྱུང་རྒྱལ་དུ་བསྐྱངས་པའང་དྲན། བསྟན་པ་བྱེར་ཟུག་སྐབས་སུ་ངའི་སྤྲུལ་པ། །ཟ་ཧོར་རྒྱལ་པོ་གཙུག་ལག་འཛིན་རྗེས་བཟུང་། །སེམས་ཅན་གང་གི་དོན་བྱེད་མ་འོངས་དུས། །དེ་ཝ་ཨ་ཀར་ཙནྡྲ་རི་རྒྱལ་གླིང་། །དེ་ནས་ཚེ་འཕོས་ཡིད་གཉིས་ཆ་མ་མཆིས། །ཕྱི་རབས་འབྱུང་འགྱུར་སངས་རྒྱས་བླ་མ་སྟེ། །དེ་ནས་ཚེ་འཕོས་རྒྱ་ཡི་ལོ་ཙཱ་ཞེས། །དེ་ནས་ཉི་མ་སེང་གེ་སྟོད་གཏེར་དབང་། །གཤེད་མ་བརྒྱ་ཡིས་བསྐོར་ཀྱང་ཉམ་མི་ང་། །གཏེར་སྟོན་རྐྱང་པའི་སྐྱེ་བ་བཅུ་གསུམ་ལེན། །ཞེས་པའི་སྐབས་སུ་སྣང་། གཞན་ཡང་བསྐྱེད་རྫོགས་ཟབ་མོའི་བརྗོད་པ་གླེང་བའམ། ཆོ་ག་དང་བཟླས་བརྗོད་སོགས་བྱེད་པ་ལ་ཤིན་ཏུ་སྤྲོ་ཞིང་གཞན་དག་བྱེད་པ་མཐོང་ན་ཡང་སྣང་བ་གཏིང་ནས་འགྱུར་བ་དང་། ཁྱད་པར་སེམས་ཅན་གྱི་སྲོག་གཅོད་པ་མཐོང་ཞིང་ཐོས་པའམ། ཁྱི་ར་བ་སོགས་ཀྱི་བྱེད་སྤྱོད་ཡིད་ལ་དྲན་པ་ཙམ་ནས་རང་ཡང་ཤིན་ཏུ་སྡུག་བསྔལ་ཞིང་། སེམས་ཅན་འདི་དག་སྡུག་བསྔལ་འདི་ལས་ད་ལྟ་ཉིད་དུ་ཐར་ན་སྙམ་པ་དང་། འདི་ཐམས་ཅད་ཀྱི་སྲོག་བསྐྱབ་པའི་གཉེར་ཁ་ང་ལ་ཡོད་ན་སྙམ་པ་དང་། སེམས་ཅན་གསོད་པའི་ནམ་ཟླ་ཤར་བ་ཙམ་ནས་རྣམ་པ་ཀུན་ཏུ་གནས་སྐབས་འདི་ན་མི་བཟད་པའི་ལས་འདི་ལྟ་བུ་ཞིག་ཡོད་འོང་སྙམ་ནས་སྙིང་རྗེའི་བློ་བཅོས་མིན་དུ་སྐྱེ་བ་འདི་ད་ལྟའི་བར་དུ་ཡོད་པས་ཚད་མེད་བཞིའི་བློ་སྦྱོང་གི་ཚིག་ཙམ་འབུམ་ཐེར་གསོག་པ་པོ་ལས་བཅོས་མིན་གྱི་སྙིང་རྗེ་ཤུགས་དྲག་སྐྱེ་བ་འདི་དོན་གྱི་ཆོད་ཆེ་བར་འགྱུར་གྲང་སྙམ་པ་འདི་བདག་གི་རྣམ་ཐར་བཟང་ཤོས་ཡིན། གཞན་དུ་ནི་བསྟན་པའི་སྒོར་ཞུགས་པ་སྐལ་བ་ནི་བཟང་མོད་དེ། དུས་ཀྱི་དབང་ལས་འདུས་པའི་སྡེ་རྣམས་སུའང་། དགེ་བའི་བཤེས་གཉེན་ནི་ཉུང་། སྡིག་པའི་གྲོགས་པོ་ནི་མོད། རྟག་པར་བྱིས་དང་འདུ་འཛིའི་ཉེས་དམིགས་དང་འགྲོགས་བརྟག་པས། དེ་དག་གི་རང་བཞིན་རྨོངས་པའི་གོས་ཀྱིས་ནི་གཡོགས། ཉོན་མོངས་པའི་འདམ་དུ་ནི་བྱིང་། སྲེད་པའི་ལྕགས་སྒྲོག་གིས་འཁྱུད། བདག་ལྟའི་རི་བོ་དང་འགྲོགས་པ་ཅན་ཤ་སྟག་ཡིན་པས། དེ་ལས་བྱུང་བའི་རང་གཞན་གྱི་རྣམ་ཐར་ཡ་མ་ཟུང་བརྗོད་ལས་འདས་པས་ཡིད་འབྱུང་ནས་རྣམ་པ་ཀུན་ཏུ་བྱ་བྲལ་ཀུན་སྤངས་ཀྱི་སྤྱོད་པ་ཅན་ལ་སྨོན་ནའང་། ཁྲིམས་ནི་རྒྱུ་དང་མི་རྒྱུའི་ས་བཞིན་དུ། །ཡོན་ཏན་ཀུན་གྱི་གཞི་རྟེན་ལགས་པར་གསུངས། །ཞེས་བསྟན་པའི་གཞི་བརྟན་པ་ལ་ཚུལ་ཁྲིམས་ཀྱི་བསླབ་པ་གཅེས་ཤིང་། རྡོ་རྗེ་ཐེག་པའི་ལམ་གྱི་འཇུག་ངོགས་སམ། འབབ་སྟེགས་ཀྱང་ངེས་པར་ཡིན་པས་ཁ་ཆེའི་བསོད་སྙོམས་པ་ཆེན་པོ་པཎ་ཆེན་ཤཱཀྱ་ཤྲཱིའི་སྡོམ་རྒྱུན་ལས། གནས་གསར་བ་ཨ་ནནྟའི་ཞལ་སྔ་ནས་ཀྱི་མཁན་པོ། གཞན་དམ་པའི་ཆོས་འདུལ་བའི་ལས་ཆོག་ལས་ཇི་ལྟར་བསྟན་པའི་ངེས་པ་ལས་བསླབ་ཕྱིར། སློབ་དཔོན། དུས་བསྒོ་བ། གྲོགས་དན་པ་ཁྲིམས་ལྡན་གྱི་ལས་གྲལ་དང་བཅས་པའི་དབུས་སུ། ཐུར་གྲིབ་ཀྱིས་ལེགས་པར་བཙལ་བའི་ཉི་མའི་བཞི་ཆ་འཆར་བའི་སྐྱེས་བུ་གཅིག་དང་། རྐང་པ་གཉིས་ཀྱི་ཚེ་ན་དགེ་ཚུལ་གྱི་སྡོམ་པ་ཡང་དག་པ་ནོད། དེ་ཡང་དཔལ་མགོན་དབྱིག་གཉེན་གྱིས། ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། །ཅེས་ཁ་ན་མ་ཐོ་བ་མེད་པ་ཚུལ་ཁྲིམས་ཀྱི་བསླབ་པས་རྟེན་ཕུན་སུམ་ཚོགས་པར་བྱས་ནས། བསྟན་པ་རང་གི་ངོ་བོ་ལུང་དང་རྟོགས་པའི་བདག་ཉིད་ལ་འདྲིས་ཤིང་བྱང་ཆུབ་པས་ཐར་པ་དོན་དང་ལྡན་པར་བྱ་བའི་སླད་དུ་ཤེས་རབ་གསུམ་གྱི་གནས་གང་ཡིན་པ་ལ་རིག་པའི་སྒོ་ཀུན་ནས་འཇུག་དགོས་པ་དེ་ལྟ་ནའང་། བདག་ཅག་ནི་རྣམ་པར་ཤེས་པའི་ཁམས་ལ་སྒྱིད་པ་བསྐྱུར་སྒྲིབ་བྱེད་དང་བཅས་ལོ་ཉི་ཤུ་རྩ་ལྔ་ལོན་ལོན་ཆོས་དང་མཐུན་པའི་བྱ་བར་གཏོགས་པ་ཆོས་སྤྱོད་བློ་འཛིན་དང་ཟ་ཆོག་ཉི་ཚེ་བའི་བསླབ་གཉེར་སྤྱི་མཐུན་ཙམ་ལས་གཞུང་ལུགས་ལ་ཐོས་བསམ་བྱེད་པ་སོགས་བཏང་སྙོམས་ཀྱི་ཕ་རོལ་ཏུ་ཕྱིན་པ་དེ་ཀར་གདའ། ཤཱཀྱ་ཐུབ་པ་ཐུགས་རྗེའི་མངའ་བདག་དེའི་གྲིབ་བསིལ་ལ་ལེགས་སྨོན་དང་བཅས་པའི་བླ་གོས་ཐུན་མཚམས་གསར་བའི་འཇོ་སྒེག་ལ་ཀུན་གྱིས་བཀུར་བས་ཕྱིན་ཆད་དཀོར་གྱི་ལ་གཡོགས་མ་དོར་ན་ངེད་དང་འདྲ་བའི་བསྟན་པའི་སྒོར་ཞུགས་པ་ཚོ་གནས་སྐབས་སུ་སྐྱིད་པོ་ཡིན། རིས་འགྲེ་མཉམ་པོའི་ནང་ནས་དངོས་ཅག་གིས་ཚོང་དང་། སོ་ནམ། ཁྱིམ་གྱི་འཚོ་འཛིན་ལ་སོགས་ཆོས་དང་འགལ་བའི་བྱ་བ་རླབས་པོ་ཆེ་ནི་རྨི་ལམ་ཙམ་དུའང་མ་དྲན་པས། དགེ་སྦྱོང་ཤཱཀྱའི་ནང་ན་ཡོད། །ཀུན་ཏུ་རྒྱུ་ལ་དགེ་སྦྱོང་མེད། །ཅེས་པའི་གྲས་སུ་ཚུད་པ་ཙམ་སྣང་། སྐབས་དེ་དག་ཏུ་སློབ་དཔོན་ནི་མེད། སྦྱངས་ཤིང་ཁར་ཡིག་དཔེ་ལ་བལྟས་པའི་སུག་བྲིས་ཀྱི་འབྲས་བུ་འདི་ཙམ་དུ་ཟད། ཟླ་བ་གཟས་འཛིན་ལ་ངོ་མཚར་སྐྱེས་ནས་ས་རིས་བསླབས་པས་ཞག་བདུན་ལ་ལེའུ་ཐོ་སྦྱོར་དགྲོལ་ཐེབས་པ་ཤེས། འགྱང་ཙམ་ནས་ལེགས་ལྡན་གཟའ་ལྔ་ཉིན་ཞག་མའི་དལ་མྱུར་དང་། དུས་སྦྱོར་གྱི་ཏཱརྐལ་ལའི་འགྲོ་ལུགས་ཀྱང་འབད་པ་ཆུང་ངུས་རིག །འདི་དག་གི་ཚེ་ཉིན་མོ་གཎྜ་ལ་བསྒྱུར་དགོད་བྱས་པའི་བག་ཆགས་རྨི་ལམ་ལ་འཐས་ཆེས་པའི་རྐྱེན་གྱིས་རས་དཀར་གྱི་ཝས་གྱོན་པའི་གཞོན་ནུ་ཞིག་གིས་ཐུར་ཤིང་བརྟུགས་ནས་དུས་སྦྱོར་གྱི་སྲང་ཚད་བསླབ་པ་བྱུང་། ཞག་གསུམ་གྱི་རྣམ་པར་གཞག་པ་དཔེར་བརྗོད་གཏན་ཚིགས་ལ་བརྟེན་ནས་བརྒྱབ་པས་རི་མོའི་འགྲོ་ལུགས་དགའ་མོས་ཤེས། ཉི་ཟླ་གཟས་འཛིན་ལ་སྒོ་ཡིག་ལན་ཁ་ཡར་བྱས་ཤིང་ཉི་འཛིན་འདི་ཟླ་འཛིན་ལས་རི་མོའི་འགྲོ་ལུགས་ཀྱང་ཅུང་དོགས་པར་མ་ཚད་མན་ངག་གི་ཡི་གེ་དང་། གཏན་ཚིགས་རྙིང་པའི་སྒོ་ནས་ཆ་རྒྱུས་འཚོལ་བ་ལ་སོགས་རྟོག་པ་ཞིབ་མོ་དགོས་ཏེ་ཕུ་མི་ལོན་པའི་ཡོན་ཏན་དུ་མི་སྣང་། སྨན་དཔེ་དུམ་བུ་གསུམ་བཟུང་ཡང་ལག་ལེན་ལ་སྦྱོར་བ་མ་བྱུང་། སློབ་དཔོན་དབྱུག་པ་ཅན་གྱི་གཞུང་སྙན་དངགས་མེ་ལོང་གི་དཔེ་ཆ་ཞིག་སྟེར་མཁན་བྱུང་བ་དྲུང་དམ་ཆོས་པ་ལ། ཁྱོད་ཀྱི་ཞལ་ནི་ཁྱོད་ཉིད་ལས། །མཐོང་ཞིང་ཟླ་བ་མཁའ་ལ་མཐོང་། །ཞེས་ཤོ་ལོ་ཀ་གཅིག་པོའི་རྒྱན་གྱི་ངེས་བརྗོད་དྲི་བརྩད་བྱས་པས་བོད་ཀྱི་སྙན་དངགས་རྩིང་རལ་ཅན་རྣམས་ཀྱི་ལད་མོ་ཤོ་བ་ལ་དཀའ་ཚེགས་མ་བྱུང་། སྔར་ལོ་བཅུ་ཙམ་འགྲོ་བའི་ཚེ་སློབ་དཔོན་བོན་བཙན་པས་བློ་གསལ་གསར་བུ་བ་འདྲ་ལ་མཚམས་སྦྱོར་ལྔ་པ་འཁྲིད་པ་མཐོང་བས། རྒྱ་གར་སྐད་དུ། ཀཱ་ལ་པ་སཱུ་ཏྲ། བོད་སྐད་དུ། ཀཱ་ལ་པའི་མདོ། གཉིས་སུ་མེད་པར་གསུང་བ། སངས་རྒྱས་ལ་ཕྱག་འཚལ་ལོ། །གྲུབ་པའི་ཡི་གེ་ཡང་དག་པའི་མན་ངག་གོ །ཞེས་པའི་ཚིག་རིགས་འདི་མཐོང་ཞིང་ཐོས་པ་ཙམ་ནས་གཞུང་འདི་ལ་སྤྲོ་བ་ཆེན་པོ་ཞིག་ཡོད་དེ་ཧ་ཅང་ན་གཞོན་པས་གོ་བ་ཆགས་པོ་མི་འདུག །ཕྱིས་སློབ་དཔོན་ནི་མེད། འདི་སྐོར་ལ་ཤེས་ཟེར་བ་འདྲར་དཔེ་ཆའི་ཁ་བྱང་བསྒྲུབ་བཅུག་པས་མཁར་གོང་ཁྲིགས་དེ་འདྲ་བས་ནི་གཞུང་མ་མོའི་ཀྱང་དམའ་དབབ་པར་འདུག །སྐད་དོད་ལ་སྐྱབས་བཅོལ། བྱིངས་རྐྱེན་རྣམ་དབྱེའི་ཕྲད་ཀྱི་བྱ་བ་བྱེད་པའི་གནས་ལ་ཧ་ཅང་འཇུག་པ་དོག་པ་ཡོད་དུ་མི་སེམས་ཏེ། རྗོད་བྱེད་གང་ཡིན་པ་དེའི་བརྗོད་དོན་དབྱིངས་འཇལ་མ་ཤེས་ན་སྐད་དོད་འདྲ་ཆོས་སུ་སྡེབ་པས་དོན་རླབས་པོ་ཆེ་འཆོལ་བའི་མཚང་ཤེས་དགོས་པར་གདའ། ལར་བར་སྐབས་ཀྱི་ལོ་ཙཱ་བ་དག་གིས་རྒྱ་དཔེའི་ཚིག་གི་རིམ་པ་ཙམ་དུ་བཀྲལ་ནས་བསྟན་པ་སྔ་དར་གྱི་ཚེ་ན་བྱོན་པའི་སྤྲུལ་པའི་ལོ་པཎ་ཆེན་པོ་རིག་པའི་གནས་ལྔ་ལ་མཁས་ཤིང་དོན་འགྱུར་སྒྲ་ཇི་བཞིན་པས་གསུང་རབ་ཆུད་མི་གསན་པ་རྣམས་ལ་བསྟིང་ཚིག་ཏུ་སྨྲ་མོད་ཀྱི། ལོ་ཙཱ་བ་ཆེན་པོ་བློ་ལྡན་ཤེས་རབ་ལྟ་བུས་ཀྱང་རྒྱན་ལ་གཞི་འགྱུར་མཛད་པས། སྦྱིན་པའི་ཕར་ཕྱིན་ལ། སྐྱེ་མེད་ཀྱི་ཡི་གེས་འགོ་དྲངས་པའི་རཀྟའི་སྒྲ་ལན་གསུམ་བསྒྱུར་བའི་སྐབས་མ་རྙེད། སྐ་བ་དཔལ་བརྩེགས་ཀྱིས་སྔ་འགྱུར་ལ་མ་ཆགས་མི་ཆགས་ཆགས་པ་མེད་པའི་རང་བཞིན་སྦྱིན་པའི་ཕར་ཕྱིན་ལ་སྦྱར་བ་སོགས་དོན་འགྱུར་གྱི་ཁྱད་པར་གཟིགས་ཤིང་། བཻ་རོ་ཙཱ་ནས་བྱེ་བྲག་བཤད་མཛོད་ཆེན་མོའི་གཞུང་དུམ་བུ་བསྒྱུར་བ་སོགས་ཀྱི་ངོ་མཚར་ལ་རྩ་བ་མེད་པའི་མོས་གུས་འཁྲུངས་ནས། བཻ་རོ་ཙཱ་ན་ནམ་མཁའི་མཐའ་དང་མཉམ། །སྐ་ཅོག་གཉིས་ནི་ཉི་ཟླ་ཟུང་འབྲེལ་ཡིན། །རིན་ཆེན་བཟང་པོ་ཐོ་རངས་སྐར་ཆེན་འདྲ། ཁོ་བོ་ཡང་ནི་སྲིན་བུ་མེ་ཁྱེར་ཙམ། །ཞེས་གཟུ་བོའི་ཐུགས་ཀྱིས་བསྔགས་པ་མཛད་པའི་ཕྱིར། གསུང་རབ་ཀྱི་དགོངས་པ་ཚུལ་བཞིན་དུ་མི་ཁྲོལ་བའི་ལེགས་སྦྱར་མཁན་པོས་དེ་བཞིན་གཤེགས་པས་ལེགས་པར་གསུངས་པ་ཆུད་གསན་པ་མངོན་དུ་སྣང་བའི་ཕྱིར་རིག་པའི་གནས་འདི་གཏིང་རིང་བ་ཞིག་ཏུ་ཤེས་སོ། །ལར་ཁོ་བོ་ཅག་གིས་ནི་ཡི་གེའི་བརྡའ་སྤྲོད་པ་ནས་བརྩམས་ཏེ། རྒྱལ་བའི་བཀའ་དང་། དགོངས་འགྲེལ་བསྟན་བཅོས། ཐ་སྙད་ཀྱི་གཞུང་། ཡིན་ལུགས་ཀྱི་མན་ངག་སོགས་རྡོ་རྗེའི་གནས་ཇི་སྙེད་པ་མཐོང་བ་དེ་དག་གུས་པས་ཉེ་བར་བླངས་ཏེ་ཉིན་མོའི་སྣང་བ་དང་སྒྲོན་མའི་འོད་ལ་མཇལ་བར་སྤྲོ་བའི་བག་ཆགས་བཟང་བ་ཙམ་ལས་དགེ་བའི་བཤེས་གཉེན་དང་ཉིན་གཅིག་ཀྱང་འགྲོགས་ནས་སྦྱངས་སྟོབས་ཀྱི་བློ་གྲོས་འཕེལ་བའི་གནས་སུ་མ་གྱུར་མོད། དཔལ་གྱི་བསམ་ཡས་མཆིམས་ཕུར་རྒྱལ་བ་ཀློང་ཆེན་པའི་ཡེ་ཤེས་ཀྱི་སྐུ་དང་ལན་གསུམ་དུ་མཇལ་ཞིང་བརྡའ་ཐབས་རྟེན་འབྲེལ་དུ་མས་བྱིན་གྱིས་བརླབས་པ་ལ་བརྟེན་ནས་ཁོ་བོའི་ལས་འབྲེལ་རྫོགས་པ་ཆེན་པོ་ནས་སད་པ་ཡིན་ནོ། །དྲན་མི་དྲན་ཙམ་ན་གནས་བརྟན་ཀུན་བཟང་འོད་ཟེར་གྱི་ཐུགས་རྗེ་ཆེན་པོ་པདྨའི་དབང་ཕྱུག་དང་། རྟ་མགྲིན་དྲེགས་པ་ཀུན་འདུལ། ཚེ་དཔག་མེད་སྐུ་གསུམ་འདུས་པ་ལ་སོགས་པའི་དཀྱིལ་འཁོར་དུ་སྨིན་པར་མཛད་ཅིང་། གཞན་ཡང་སྔ་ཕྱིར་རྒྱལ་བ་ཀློང་ཆེན་པའི་སེམས་ཉིད་ངལ་གསོ་རྩ་འགྲེལ། བླ་མ་དགོངས་འདུས། ཕྱག་རྡོར་དྲེགས་འདུལ། བྱང་གཏེར་ཐུགས་སྒྲུབ། རྡོ་རྗེ་གཤོག་རྒོད་ལ་སོགས་དྲན་པ་དང་མི་དྲན་པའི་དབང་ལུང་མང་པོ་ནོད་པས་རྟེན་འབྲེལ་གྱི་སྒོ་བཟང་པོ་འགྲིག །ལོ་བཅུ་གསུམ་ལོན་དུས་བླ་མ་གྲུབ་དབང་རིན་པོ་ཆེ་ཐུགས་མཆོག་རྡོ་རྗེ་དང་མཇལ། ངེད་གཞོན་ནུའི་ཚེ་ནས་སྣང་བ་མི་དག་པ་དེ་མ་ཡིན་པས་བླ་མར་མཚན་བཏགས་པའམ། སྒོམ་ཆེན་ཀུན་སྤངས་པ། མདོར་ན་ཆོས་པ་ཞི་དུལ་གྱི་རྣམ་པ་ཅན་ཚུན་ཆད་ལ་དག་སྣང་དང་དད་པ་འཕེལ་བ་ཞིག་ཡིན་ཏེ། སྔོན་གྱི་སྨོན་ལམ་དབང་ལས་རྗེ་འདི་པ་ལ་མཇལ་བ་ཙམ་གྱིས་སྣང་བ་འགྱུར་བའི་དད་པ་ཡོང་། རྒྱུན་གཏན་བླ་མ་རྒྱལ་ཁམས་ངེས་མེད་ལ་གཤེགས་པས་ཡང་ཡང་མི་མཇལ། རེས་འགའ་ཐག་ཉེར་ཕེབས་པ་ནའང་དེ་དུས་ཀྱི་རྒན་པོ་བྱིས་པའི་བློ་ཅན་རྣམས་དགེ་སློང་སྐར་བཟང་གི་བརྟུལ་ཞུགས་འཛིན་པ་མང་བས་གཅིག་ལ་གཉིས་བརྟེན་གྱིས་སྡིག་པའི་གྲོགས་པོའི་གཞན་དབང་གིས་མཇལ་མི་མཇལ་སྣ་ཚོགས་འོང་། ཕྱིས་ཕྲིན་ལས་དགའ་མོས་རྒྱས་པས་ལོག་སྲེད་ཅན་ཡང་བལྟར་སྣང་འཇམ་དུ་སོང་དུས་དཔལ་གྱི་རི་བོའི་མཆོད་ཁང་ཆེན་མོར་རྟེན་བཞེངས་དང་བཅས་རྒྱང་རིང་ཙམ་བཞུགས་པའི་སྐབས། དཀྱིལ་འཁོར་དང་མཆོད་རྟེན་གྱི་ཐིག་རྩ་ཕྱག་འཁྲིད་དུ་སྩལ། ཕྱག་རྒྱ་ཆེན་པོ་ཡེ་ཤེས་མཐོང་གྲོལ་གྱི་རྩ་དབང་དང་། བསམ་པ་ལྷུན་གྲུབ་མ་སོགས་སྨིན་བྱེད་དང་འབྲེལ་བར་གྲོལ་བྱེད་ཀྱི་གདམས་པ་ཆིག་རྫོགས་སུ་བཏབ་ནས་རྒྱུད་བྱིན་གྱིས་བརླབས་པའི་བཀའ་དྲིན་སྩལ། མཆོད་ཁང་ཆེན་མོའི་གྱང་ལོགས་ལ་བཞུགས་པའི་ཐུབ་དབང་གི་སྐུ་ཁྲུ་ཚད་ཁྲི་རྒྱབ་དང་བཅས་པ་འདི་ལ་ལི་ཏ་བགྲེས་སོང་གིས་རོགས་མཛད་དེ་ངེད་ཁོ་ནས་བཏབ། ཧ་ཅང་ལྗིད་ཆེས་པས་ལས་ཐབས་དང་ལུས་ཤེས་གཉིས་ཆར་ལ་བརྟེན་དགོས་པ་བརྩོན་པ་ཤིན་ཏུ་ཆེ་བས་ཉིན་གཅིག་ལ་བརྒྱ་མ་ཟིན་ཙམ་ཐེབས། ཕྱིས་སུས་ཀྱང་དེ་ཙམ་འདེབས་མ་ཐུབ་པས་རྟོག་དཔྱོད་ཅན་རྣམས་ཡ་མཚན་དུ་བྱེད། དེ་ནུབ་ལུས་ཤིན་ཏུ་དུབ་པ་བྱུང་སྟེ་སྒྲིབ་པ་དག་པའི་རྟགས་གསལ་པོ་བྱུང་། བླ་མ་དམ་པ་འདི་ངེད་ལ་དགོངས་པ་གཏད་པ་ཡོད་པས་སྐུ་གཤེགས་ནས་ཀྱང་ཡེ་ཤེས་སྒྱུ་མའི་སྐུ་དང་མཇལ། རྡོ་ཁྲི་ཆེན་པོ་ཞིག་གི་སྟེང་ནས་ཁྲིད་གསུང་བ་ན། ངོས་ཀྱི་བྱང་ཆུབ་སེམས་ཀྱི་རང་བཞིན་ཐིག་ལེ་དཀར་པོར་འདུག་ཞུས་པས། འཛུམ་དམུལ་ལེ་བ་ལས་ཅང་མི་གསུང་བས་ལན་བཏབ། དེའི་བྱིན་རླབས་ཀྱིས་བརྗོད་མེད་ཀྱི་ཉམས་ཤར། ཆུང་ངུའི་དུས་དྲུང་དམ་ཆོས་བློ་གསལ་དབང་པོས། རྒྱུད་རྒྱལ་གསང་བ་སྙིང་པོ་དང་། མཁས་གྲུབ་ཆེན་པོ་རོང་ཟོམ་ཆོས་ཀྱི་བཟང་པོའི་དཀོན་མཆོག་འགྲེལ་ཞིག་བྱིན་ནས་འདི་ཁྱེད་རང་རྙིང་མ་པའི་ཆོས་ཀྱི་དྲག་ཤོས་ཤིག་ཡིན་གསུངས། བལྟས་པས་གོ་རྒྱུ་དང་ཤེས་རྒྱུ་ཅང་མ་བྱུང་། ཅུང་ཟད་ནར་སོན་ནས་བློ་གྲོས་གསལ་དུ་སོང་བ་དང་། སྔ་འགྱུར་རྡོ་རྗེ་ཐེག་པའི་ཆོས་ཀྱི་རྩ་བ་མ་ནོར་བ་དེ་རྒྱུད་སྡེ་བཀའ་མ་ཡིན་པར་ཤེས། དེ་དང་འབྲེལ་པར་གཡུང་འགྲེལ་གསལ་བྱེད་མེ་ལོང་ཞིག་བྱུང་བ་གཉིས་ཀ་ངེད་ལ་རྟེན་འབྲེལ་བཟང་བར་འདུག །དཔའ་བོ་མཁའ་འགྲོའི་བྱིན་རླབས་ཁོ་ནས་སྩལ་བ་ཡིན་སྙམ་པ་བྱུང་། ཟུར་མེས་དབོན་རྣམ་གསུམ་གྱི་རྣམ་ཐར་ལ་ཤིན་ཏུ་དད་ནས་དེའི་རིང་ལུགས་ལ་བསླབ་གཉེར་ཞིག་བྱེད་སྙམ་སྟེ་འདི་སྐོར་ལ་འབག་འབུག་མི་གདའ། རང་གི་ཁུ་བོ་དགེ་སློང་རབ་རྒྱས་དེ་གསང་སྙིང་འགྲེལ་གསར་ཚོར་བློ་གྲོས་རྣོ་བ་ཡོད་འདུག་སྟེ། གཞོན་ནུ་དོན་གྲུབ་འཚང་རྒྱ་ཙ་ན་དྲང་སྲོང་ཉོན་མོངས་མེད་མི་བཞུགས་པར་གདའ་བས་གངས་རི་ཐོད་དཀར་དུ་ལོ་གསུམ་གྱི་ཐོག་ཏུ་གཤེགས། ཕྱིས་གྲུབ་དབང་ཤྲཱི་ནཱ་ཐ་ལས་ཉིད་ཀྱི་དགོངས་པས་ཇི་ཙམ་བརྟོལ་བའི་དཀའ་བའི་གནས་ལ་དྲི་བརྩད་བྱས་པས་གློ་བ་ཁེངས་པར་བྱུང་། གཏེར་ཆོས་ཚད་མ་འདི་བློ་རྨོངས་ཀྱི་སེམས་ཅན་ལ་ཉམས་སུ་ལེན་བདེ་བའི་མན་ངག་ཏུ་མཐོང་ནས་གནས་དུས་དེར་ཆོས་རྗེ་གླིང་པ་དང་། རིན་པོ་ཆེ་དེ་ཉིད་ཀྱི་རིང་ལུགས་ལ་བློ་འཇུག་པར་བྱུང་བས་བརྒྱུད་འཛིན་ལ་སུ་བཟང་དྲིས་པས། གུ་རུ་རྒྱ་མཚོ་དང་། ཐེག་ཆེན་གླིང་པ་གདམ་ང་ཅན་ཡིན་ཟེར། ལས་འབྲེལ་ཕྱི་མ་ལ་ཡོད་པས་སྐུ་དྲུང་དུ་གཏུགས། ཆོས་གླིང་གི་ཚེ་དག་གཉིས། རིན་པོ་ཆེ་ཉིད་ཀྱི་རྟ་ཕུར། ནཱ་ག་རཀྴ་སོགས་ཞུས། དེ་སྐབས་བླ་མ་རིན་པོ་ཆེ་འགྲོ་དོན་རྒྱས་པའི་སྐབས་མ་ཡིན་པས་གྲོང་པའི་ཕ་ཇོར་བརྩི་ཡང་རང་སྣང་དག་པ་རྩིས་སུ་བཏང་ནས་ཞག་གསུམ་ལ་གནས་འགྱུ་རིག་གསུམ་གྱི་དྲི་བརྩད་ལ་བརྟེན་པའི་ཞི་གནས་ཀྱི་འཇོག་ཚུལ་ཞུས་པས་སྣང་བ་འགྱུར་ཞིང་། སེམས་ལ་ཕན་པ་ཞིག་བྱུང་། ད་དུང་རྫོགས་པ་ཆེན་པོའི་ཡིན་ལུགས་གཏིང་ཕྱིན་པའི་ཕ་མཐའ་ལ་ནི་མ་རེག །རིགས་ཞང་སྒོམ་ཆེན་དམ་པ་ལས་སྤྱོད་འཇུག་དང་འབྲེལ་པར་བྱང་སྡོམ། ཇོ་བོ་རིན་པོ་ཆེའི་ལམ་སྒྲོན། རྒྱལ་སྲས་ཐོགས་མེད་པའི་བཀའ་འབུམ། བདེ་མཆོག་ལུ་ཡི་པ། འདུས་པ་འཕགས་ལུགས། འཇིགས་བྱེད་ར་ལུགས་སོགས། སྔ་ཕྱིར་གསར་རྙིང་གི་དབང་རྗེས་གནང་། བཀའ་ལུང་མང་པོ་ནོད། ལར་གནས་སྐབས་འདི་དག་ཏུ་སྐྱོ་ཤས་དང་ངེས་འབྱུང་དཔག་ཏུ་མེད་པ་ཡོད། བསྒྲུབ་པ་འབའ་ཞིག་ལས་གཞན་བྱ་བ་གང་གིས་ཀྱང་འཆི་ཙ་ན་ཕན་མི་ཐོགས་སྙམ་པ་བྱིས་པ་མནོ་ཤེས་མི་ཤེས་ཙམ་ནས་ཡོད། ཡོད་བཞིན་དུ་ལོ་ཉི་ཤུ་རྩ་ལྔ་ལོན་ལོན་ཆོས་ཞུས་ལོ་དང་ཐོས་ལོའི་ངང་དུ་བཏང་སྙོམས་ཐ་མལ་དུ་ལུས་པ་འདི་བདུད་ཀྱིས་མངོན་སུམ་དུ་བསླུས་འདུག །ཉི་ཟླ་ཁ་སྦྱོར་ལས། ཚེ་འདི་མི་རྟག་འགྲོན་པོ་འདྲ། །འགྲོན་པོ་རྟག་ཏུ་བསྡད་པ་མེད། །ཅེས་གསུངས་པ་ལྟར། ལུས་ཀྱི་ཚོང་འདུས་སུ་སེམས་ཀྱི་འགྲོན་པོ་ཚོགས་པ་འདི་སང་ནང་པར་ཚུན་ཆད་ནའང་མི་གྱེས་པའི་ངེས་པ་མེད་པས་ནམ་འཆི་ཆ་མེད་ཡིན། མ་ཚོར་བ་དེ་ཀའི་ངང་ལ་མི་ཚེ་ཕལ་ཆེར་སོང་གདའ། ང་ཕྱི་ཐལ་ཆེས་སྙམ་པའི་སྙིང་ལས་སྲིད་པ་མགོ་མཇུག་སློག་པའི་ཐལ་སོང་བྱས་པ་ཙམ་རྒྱུན་དུ་སྐྱེས། ཇོ་བོ་བྱང་ཆུབ་ཆེན་པོ་ཞལ་གྱི་དཀྱིལ་འཁོར་ཅིར་ཡང་འགྱུར་པའི་རྣམ་པ་ཞིག་མཇལ་བས་མཆི་མ་རང་དབང་མེད་པར་ཤོར། དཔལ་ཨོ་རྒྱན་ཆོས་ཀྱི་རྒྱལ་པོ་དེ་རང་དྲན། དེའི་རྣམ་ཐར་དང་སྒྲུབ་གནས་རྣམས་མཐོང་བས་དྲན་དུ་སོང་། ལྷོ་ནུབ་སྲིན་པོའི་ཡུལ་ལ་ཁ་བསྟན་ནས་ཡང་ཡང་ངུ་ཤོར། ངུས་པས་ཅི་ཕན་ཕྱི་མ་ཟངས་མདོག་དཔལ་རིར་ཟང་ཐལ་དུ་བགྲོད་པའི་དགེ་སྦྱོར་ཞིག་བྱེད་དགོས་སྙམ་བསྒྲུབ་པ་བཙན་ཐབས་སུ་བྱེད་པའི་ཞེ་དམ་བཅས། མེས་དབོན་རྣམ་གསུམ་གྱི་གཙུག་ལག་ཁང་ཀུན་ཏུ་ཚེ་འདིའམ་ཕྱི་མའི་གནས་སྐབས་ཀུན་ཏུ་ཕུན་སུམ་ཚོགས་པའི་གནས་ཡིད་ལ་བྱེད་པའི་ཕྱིན་ཅི་ལོག་མ་ཡིན་པའི་སྨོན་ལམ་བྱང་ཆུབ་སེམས་དཔའ་ཀུན་ཏུ་བཟང་པོའི་རྗེས་སུ་འབྲངས་ནས་བཏབ། སྡེ་དང་བཅས་པའི་ལམ་ཁ་ཞིག་ན་བཙུན་ཆུང་ལོ་བརྒྱད་ཙམ་འགྲོ་བ་ཞིག་དགེ་རྒན་གྱིས་བརྡུངས་འཐག་བཏང་ཟེར། ལུས་ལ་བརྡེག་བཙོག་གི་རྗེས་དང་བཅས་གཅེར་བུ་རྣལ་མ་ཙམ་ཡང་མེད་པར་ཕུད་པ་ཁོ་རང་མྱ་ངན་གྱི་ཁུང་བུར་ཚུད། ཕྱུགས་སྐྱོང་བའི་བུ་དང་བུ་མོ་ཆུང་ངུ་འདྲས་དེའི་སེམས་གསོ་ཞིང་སྙིང་རྗེ་བའི་གནས་སུ་བྱེད་པ་མཐོང་བས་རང་ཉིད་ཀྱང་མཆི་མ་ཤོར། སྙིང་རྗེ་དཔག་ཏུ་མེད་པ་སྐྱེས། ཕ་མ་ཡོད་དམ་བྱས་པས། གཉིས་ཀ་ཤི་ནས་མེད་ཟེར། དྭ་ཕྲུག་ལ་འདི་འདྲ་ཕོད་པ་སྙམ་འཁོར་བའི་རང་བཞིན་སྡུག་བསྔལ་དུ་སྟོན་པའི་སློབ་དཔོན་དུ་བྱུང་། སྟོད་གོས་ལེགས་པོ་ཞིག་ཡོད་པ་ཕུད་ནས་གཡོགས། བྱིས་པ་རྣམས་ལ་བརྡའ་སྦྱོར་ཚུལ་བསླབས་ནས་བཞག །ཐེག་པ་ཆེན་པོའི་ལམ་དུ་འཇུག་པ་ལ་བྱང་ཆུབ་ཆེན་པོར་སེམས་བསྐྱེད་པ་འདི་རྒྱལ་བའི་སྲས་ཀྱི་བསླབ་པར་བྱ་བའི་གནས་གཙོ་ཆེ་ཤོས་ཤིག་ཡིན། དེའི་སྔོན་དུ་ཚད་མེད་བཞིས་བློ་འཆོས་པའི་རྟེན་འབྲེལ་མ་ལུས་པ་དེར་འགྲིགས་གདའ། རང་ལོ་ཉེར་བརྒྱད་པ་མེ་མོ་གླང་གི་ལོ་ཆོ་འཕྲུལ་ཆེན་མོའི་དུས་ཆེན་འཆར་བར་བརྩམས་པ་ན་ཤྲཱི་པརྦ་ཏའི་གླིང་དུ་ལོ་གསུམ་གྱི་དམ་བཅའི་རི་མོ་སྙིང་ལ་བྲིས་ཏེ་བག་ཕབ། དགོངས་པ་ཁྱབ་གདལ་དུ་མ་གྲོལ་བར་གེགས་ཀྱི་འཇུག་པས་སྒོ་གང་ས་ནས་ཀྱང་གླགས་ལྟ་བ་ལས་བཟློག་ཕྱིར། ལོ་བདུན་གྱི་བར་ས་ཁྱིམ་དང་འདུ་འཛིའི་ཐེམ་པ་མི་འདའ་བ་དང་གཅིག་སྡོད་ས་སྡེ་ཁྲོད་ཡིན་པས་མཚམས་འོག་ལ་མཇལ་ཕྲད་མི་མང་ཞིང་ཆགས་སྡང་གི་ཚོགས་འགོ་མི་གནོན་པ་དང་གཉིས། ཕྱི་གཏམ་ནང་དུ་མི་ལོན་ནང་གཏམ་ཕྱི་རུ་མི་སྒྲོག་པས་བུག་སྒོར་ཉེ་རིང་སུ་ལའང་ངག་མི་གཏང་པ་དང་གསུམ། ལྟོགས་ལྷ་མགྲོན་དུ་བརྟེན་ནས་ཡོན་ཏན་ཟོང་དུ་མི་འཚོང་བ་དང་བཞི། ནང་དུ་ཆོས་སྤྱོད་བཅུར་མི་གཏོགས་པའི་ལག་ལས་རྣམ་པར་མི་གཡེངས་པ་དང་ལྔ། འཚོ་བ་གྱི་ནར་བརྟེན་པ་ལས་དཀོར་ཟས་བྱུང་རྒྱལ་དུ་མི་སྤྱོད་པ་དང་དྲུག །གྲོལ་བ་འབའ་ཞིག་དོན་དུ་གཉེར་བ་ལས་ཕྲིན་ལས་རྣམ་པ་བཞིའི་ལས་ཐབས་མི་བསྒྲུབ་པ་དང་བདུན་གྱི་དམ་བཅའ་སྤྱོད་འཇུག་ལས། སངས་རྒྱས་བྱང་ཆུབ་སེམས་དཔའ་དག །ཀུན་ཏུ་ཐོགས་མེད་གཟིགས་པར་ལྡན། །དེ་དག་ཐམས་ཅད་སྤྱན་སྔ་ན། །རྟག་པར་བདག་ནི་གནས་སོ་ཞེས། །དེ་ལྟར་བསམས་ནས་ངོ་ཚ་དང་། །གུས་དང་འཇིགས་ལྡན་དེ་བཞིན་མནོས། །ཞེས་པ་ལྟར་བཟུང་ཞིང་། དེ་ལྟར་བཟུང་ནས་ཀྱང་། བཟླས་བརྗོད་དང་ནི་དཀའ་ཐུབ་ཀུན། །ཡུན་རིང་དུས་སུ་སྤྱད་བྱས་ཀྱང་། །སེམས་གཞན་གཡེངས་པས་བྱས་པ་ནི། །དེ་ཉིད་རིག་པས་དོན་མེད་གསུངས། །གང་གི་ཆོས་ཀྱི་གཙོ་བོ་མཆོག །སེམས་ཀྱི་གསང་འདི་མ་ཤེས་ན། །བདེ་ཐོབ་སྡུག་བསྔལ་གཞོམ་འདོད་ཀྱང་། །དེ་དག་དོན་མེད་གྱི་ནར་འཁྱམ། །དེ་ལྟས་བདག་གི་སེམས་འདི་ནི། །ལེགས་གཟུང་ལེགས་པར་བསྲུང་བར་བྱ། །ཞེས་པ་འདི་ལ་ངེས་ཤེས་རྙེད། ཉིན་རེ་བཞིན་སེ་གོལ་གཏོགས་པའི་ཡུན་ལའང་ཡེངས་མ་ལམ་དུ་སོང་མ་སོང་ནང་ནུབ་རེ་བཞིན་ལྟ་རྟོག་བཅུག་ནས་བསྒོམ། དགོས་མེད་ཀྱི་ཞེན་ལོག །སྐྱོ་ཤས་དང་ངེས་འབྱུང་། བཅོས་མིན་གྱི་དད་པ། སེམས་ཅན་ལ་སྙིང་རྗེ་སོགས་ལམ་རྟགས་དང་པོའི་ཡོན་ཏན་ཀྱང་ཇེ་ཆེར་འཕེལ། ཞི་གནས་ཀྱི་ཉམས་རྣམ་པ་སྣ་ཚོགས་པ་སྟེས་དབང་ཅན་དུ་འཆར་གྱི་ཡོད་པའི་ཚེ་རིགས་ཞང་སྒོམ་ཆེན་དམ་པས་རྒོད་ཚང་པ་སྣ་ཚོགས་རང་གྲོལ་གྱི་སྒོམ་དོན་གསུང་བགྲོས་འགའ་ཞིག་བསྐུར་བར་མཛད་པས་འདི་རེས་ཀྱི་གེགས་མང་པོ་གྲོལ། ལས་དང་པོ་པ་ལ་ཤིན་ཏུ་ཕན་པར་གདའ། ལར་མ་བཅོས་པ་གཤིས་ཀྱི་ཐོག་ཏུ་ངོ་སྤྲོད་པ་དང་། བྱུང་ཚོར་གནས་ཉམས་ལ་ངོ་སྤྲོད་པ་གཉིས་ལམ་ཁྱད་ལ་གནམ་ས་ལྟ་བུར་འདུག །ཁོ་བོས་རྫོགས་པ་ཆེན་པོའི་གྲུབ་མཐའི་ངོས་འཛིན་ཐུན་མོང་མ་ཡིན་པ་དང་། དཀའ་བའི་གནས་མ་ལུས་པ་མཛོད་ཆེན་བདུན་ལས་རྙེད་པ་ཡིན། འཛམ་བུའི་གླིང་གི་རྒྱན་དྲུག་མཆོག་གཉིས་དང་བཅས་པ་ཚོ་མངོན་སུམ་པར་བྱོན་ཀྱང་རྒོལ་བ་མི་འཇུག་པའི་གྲུབ་པའི་མཐའ་ཆེན་པོ་འདིའི་དགོངས་པ་ལེན་མི་ཤེས་ན་གཞན་ལྟ་བ་སུ་མཐོ་ཟེར་ཡང་ཀུན་འབྱུང་གིས་གཡོགས་པ་ཅན་དུ་གོ །ཟླ་བ་གསུམ་ཙམ་ལོན་པའི་ཚེ་རང་ལུས་ཞུགས་ལ་སྦྱངས་པ་དང་། ནམ་མཁའ་ལ་སྐྱིལ་མོ་ཀྲུང་བཅས་པ་སོགས་ཀྱི་སྣང་བ་ཡང་ནས་ཡང་དུ་བྱུང་། ལུས་ཀྱི་སྲིན་བུ་རྣམས་དེ་ནས་དག །སྤྱིར་དུས་བཟང་པོ་ལ་སོགས་པའི་ཚེ་ཉམས་འུར་ནས་སྒྲུབ་ཁང་དུ་བྲོ་འཁྲབ་སྙིང་འདོད་པ་དང་། སྣང་བ་བདེན་མེད་སྒྱུ་མ་ལྟ་བུར་འགྲོ་བ་ཡང་ཡང་དུ་ཡོང་བས་མདོ་ཏིང་ངེ་འཛིན་རྒྱལ་པོ་དང་། སྒྱུ་མ་ངལ་གསོའི་མན་ངག་ཉམས་འོག་ཏུ་ཆུད། སྤྱིར་སྲིད་པ་འདི་ལ་མེ་ཏོག་ཕོག་པའི་ཆོས་སྐལ་ཡང་ཡིན། ཆོས་ཀྱི་རང་ངོས་ནས་ཀྱང་རིག་འཛིན་པདྨའི་ཞལ་གདམས་རྩ་གསུམ་དགོངས་པ་རང་གྲོལ་འདི་ལ་རྒྱུད་སྡེ་ཆེན་པོའི་སྤྱི་ཆིངས། མན་ངག་ཟབ་མོའི་གནད་བསྡུས་སོགས་དཔག་པར་དཀའ་བའི་ཡོན་ཏན་དུ་མ་འདུག་པ་གནས་སྐབས་འདི་ཙམ་ན་ཤེས། དབང་ལུང་གི་བརྒྱུད་པ་ཆད་དུ་ཕོངས་པ་ན་རྨི་ལམ་དུ། ཆུ་ཀླུང་ཆེན་པོ་ཞིག་ན་གར་མཁན་ཞིག་སྐམ་ལ་འཐོན་དུ་ཉེ། བཀྲ་ཤིས་པའི་རྫས་སྐྱེ་བ་ལྔ་པའི་རྟགས་དང་ལྡན་པ་ཞིག་ངོས་ཀྱི་ཁུ་ཚུར་ན་བཅངས་པ་ལས་ཕུན་སུམ་ཚོགས་པའི་སྒྲ་མང་པོ་བསྒྲགས་ཏེ་ཆུ་ཀླུང་ཆེན་པོར་དོར་ནས་རྒྱ་མཚོའི་རུམ་དུ་སོང་བ་རྨིས། རྟེན་འབྲེལ་དེའི་དོན་ལ་བརྡ་མང་པོ་ཤེས། དགེ་སློང་ས་མནྟ་བྷ་དྲ་བགྲེས་པོ་མཚམས་ནང་དུ་སྤྱན་དྲངས། ཁོང་པ་ཐུགས་བསྐྱེད་བཟང་། དྲང་པོ་མ་བཅོས་པའི་ངང་ཚུལ་ཅན་དག་སྣང་འགྲོ་བར་ཡོད། ཆོས་གསུང་པ་ལ་འཇུག་པ་མི་བདེ་ཡང་བརྒྱུད་པ་ཁུངས་བཙུན་སེལ་མེད་ཡིན། དབང་རྫས་ངེད་རང་གིས་སྐབས་ཐོག་དཔྱད་ནས་ཕྱག་ཏུ་འབུལ་བཞིན་ཞུས། ལུང་མཛད་པ་ལ་ཞག་དགུ་ཙམ་འཐོགས། ཞར་ལ་ཆོས་རྒྱལ་འབྲི་གུང་པའི་གཏེར་ཆོས་ཀྱང་ཉན། དེས་གསང་སྔགས་རང་ཉིད་ལེན་པའི་ཉེས་པ་བསལ་ཏེ། སླར་བདག་འཇུག་ལན་མང་པོར་ནོད་ནས་ལམ་བསྡུས་པའི་བསྐྱེད་རྫོགས་ལ་ཉམས་ལེན་གནད་དུ་བསྣུན་པས་བྱིན་རླབས་ཉེ་བརྒྱུད་རྒྱལ་དབང་པདྨས་སྩལ། ཡིད་ཆེས་པའི་ངེས་ཤེས་རྙེད་པ་ལས་ལོ་གསུམ་འདིའི་རིང་ཐོ་རངས་བྱ་སྐད་སྒྲོགས་པ་ཕྱི་མཐར་བྱས་པའི་ནམ་སད་པ་ནས་ཉི་མ་ཚ་རྟིང་ཁ་སྟེང་དུས་སྦྱོར་བཞིའི་འཕོ་བ་མ་རྫོགས་རིང་ཡི་གེ་མེད་པའི་སྙན་བརྒྱུད་ལ་རྩལ་བཏོན་བུམ་ཅན་གྱི་ཐུན་རྟག་པ་ཀུན་ཏུ་བཟུང་བས་དྷཱུ་ཏིར་ཞུགས་གནས་ཐིམ་གསུམ་གྱི་རྟགས་ཕལ་ཆེར་ཤར། རྩ་ཁམས་ཡི་གེའི་རྣམ་པར་གྲོལ་བས་མགྲིན་པ་རྡོ་རྗེ་གླུའི་དཀོར་མཛོད་དུ་སོང་། ཆོས་ཐམས་ཅད་བལྟས་པ་ཙམ་གྱིས་ཤེས་སྙམ་པའི་སྒོམ་བྱུང་གི་ཤེས་རབ་ཀློང་བརྡོལ་ནས་བླ་མ་དགོངས་འདུས་ལ་རྣམ་ངེས་འོད་ཟེར་བརྒྱ་པ་བྱིས་པའི་བློ་གྲོས་ཀྱིས་བརྩམས། སྲོག་ཐུར་འདྲེས་པ་ལས་ལྟེ་བ་སྤྲུལ་པའི་འཁོར་ལོ་རིལ་བ་ཞབས་ཚགས་ཅན་དུ་སོང་། འོག་རླུང་ལ་དྲི་ང་བས་བཞོན་པར་མི་ནུས་ཤིང་། ཁམས་ལ་མི་འཕྲོད་པའི་ཟས་ཀྱི་རྣམ་པ་ཅི་ལྟ་བུ་ཁོང་དུ་སོང་ཡང་ཉམས་བརྟས་པར་གྱུར་ནས་ངོ་བོ་མ་འགྱུར་བ་ཐོན། དྲི་ཆུ་བསུང་བ་དང་། འདུ་བའི་ཁ་དོག་གིས་མ་གོས་པར་འབབ་པ་སོགས་ཐུན་མོང་གི་རྟགས་མང་པོ་དང་། བྱང་ཆུབ་ཀྱི་སེམས་རིན་པོ་ཆེ་རྡོ་རྗེ་ནོར་བུར་བརྟན་པས་བདེ་སྟོང་གི་ཡོན་ཏན་དཔག་ཏུ་མེད་པ་སྐྱེས། དགེ་སྦྱོར་ནར་སོན་པས་ལོ་བར་པ་ལ་ལུས་རུས་སྦལ་འཁར་གཞོང་དུ་བཅུག་པ་ལྟ་བུ་སོགས་རྫོགས་པ་ཆེན་པོ་ཆོས་ཉིད་མངོན་སུམ་པའི་ལམ་རྟགས་སྒྲ་ཇི་བཞིན་པའི་སྲོལ་དུ་ཆུད་པ་བྱུང་། དེ་ཀའི་མུར་ལྕེ་བཙུན་སེང་གེ་དབང་ཕྱུག་གི་རྣམ་ཐར་འཁྱོངས་ན་འཇའ་ལུས་སུ་དེངས་པ་ལ་དཀའ་ཚེགས་མེད་པའི་ངེས་ཤེས་རྙེད་ནའང་། སྤྱིར་དུས་ཀྱི་རྒུད་པ་དང་། ཁྱད་པར་དངོས་ལ་འཕོ་བ་ཆེན་པོའི་གྲུབ་མཐའ་སྙོགས་པའི་ལས་འབྲེལ་གྱིས་ཕོངས་པས་གྲོང་ཡུལ་དང་བཅས་པའི་རི་ཁྲོད་དུ་འདུ་བྱེད་ཕུང་པོའི་གྲོང་ཁྱེར་ཟོ་མདོག་བདེ་བ་ཉིད་དུ་ལུས་པར་གྱུར་ཏོ། །དཔག་ཚད་བརྒྱད་ཁྲིའི་སྐྱོན་ཡང་བལྟར་མི་མངོན་པར་སྦས། ཁུ་ཚུར་ཙམ་གྱི་ཡོན་ཏན་ལྷུན་པོར་འགྲན་པ་བཞིན། །གཟུང་འཛིན་ལག་པ་ཆེན་པོས་ཀུན་ནས་ཀུན་ཏུ་འཁྱུད། །རྣམ་རྟོག་ལག་ན་གཞོང་ཐོགས་དལ་རྟེན་མིན་གྱིས་དོགས། །དབང་ཤེས་རི་རྩེ་སྐན་པ་གླིང་བཞིའི་ལྟད་མོས་གཡེངས། །ཡུལ་ལྔ་རྟ་གདོང་རྒོད་མས་ཁོ་ར་ཁོར་ཡུག་བཅིངས། །བདག་ལྟ་ཡོངས་འདུའི་ལྗོན་པ་ཡལ་འདབ་བསྐྱོད་ལ་བརྩོན། །ཕུང་པོ་ལྔ་ཡི་བྱེད་པོའི་རྣམ་པར་ཐར་པ་ལགས། །ཞི་གནས་བསིལ་ཟེར་དབང་པོ་འཕེལ་འགྲིབ་རེས་འཇོག་ཅན། །ལྷག་མཐོང་འོད་ཟེར་བརྒྱ་པ་མ་རིག་སྤྲིན་གྱིས་གཡོགས། །རྣམ་གཡེངས་རྒྱ་མཚོའི་རླབས་ཀྱིས་མཉམ་རྗེས་བར་ལག་ཕྲལ། །ཚོགས་བརྒྱད་དབང་པོའི་གཞུ་ཡི་ཞགས་པས་བཅིངས་པ་ལགས། །རིག་པ་མ་བཅོས་སྤྲོས་བྲལ་དང་པོའི་སངས་རྒྱས་ལ། །ཤེས་སྒྲིབ་ཕ་ཚན་རགས་པས་སྒོམ་གོ་ཆོད་མ་ནུས། །མུ་བཞི་བློ་ཡིས་ཕྲལ་བའི་རྟོག་དཔྱོད་བསམ་གཏན་ལ། །མཐའ་བརྒྱད་སྤྲོས་བྲལ་རེ་བའི་སྟོན་ཆེན་ལྷམ་རྡོལ་ལགས། །བློ་བྲལ་རང་བྱུང་རིག་པ་རྫོགས་སྤྱོད་རྫོགས་པའི་ངང་། །ལྷན་སྐྱེས་མུན་པ་སྟུག་པོས་རང་ཞལ་ཐད་ཀར་བསྒྲིབས། །དྲན་པས་ཆེད་འཛིན་བྱས་པས་དར་གདངས་སོ་མ་ལ། །སྒོམ་གྱི་དངོས་གཞིར་འཁྲུལ་པའི་སྒོམ་ཆེན་གཏན་རྡོལ་ལགས། །རྟོག་ཚོགས་བྱ་ལམ་རྗེས་མེད་རོལ་རྩལ་སྤྲུལ་སྐུ་དངོས། །ཀུན་བརྟགས་བློ་ཤོ་རྒོད་པས་འཛིན་ཞེན་བྲལ་མ་ནུས། །ལྷག་མཐོང་གཤིས་ལ་འབྱམས་པའི་རི་དྭགས་རྒྱ་ཤོར་ལ། །རྣམ་རྟོག་ཆོས་སྐུར་འདོད་པའི་གྲུབ་ཐོབ་སྨྱོན་པ་ལགས། །སྐུ་གསུམ་འདུ་འབྲལ་མེད་པའི་ཀློང་ན་གྲོལ་མ་ནུས། །རེས་འཇོག་ཡ་བྲལ་ཅན་ལ་རྟོགས་པའི་ལས་འབྲེལ་ཉུང་། །སྣང་ཚད་ལམ་ཁྱེར་ཚིག་གི་ལམ་དུ་ཟད་པ་ཡི། །རྒྱས་འདེབས་གོ་ཡུལ་མཁན་ཞིག་དངོས་ཀྱང་ཡིན་གྱི་དོགས། །མཉམ་གཞག་ནམ་མཁར་གྲགས་ནས་སྟོང་པ་བློ་ཡིས་བསྒྲུབས། །རྗེས་ཐོབ་སྒྱུ་མའི་སྒྲ་ཡིས་དངོས་འཛིན་མཚན་མས་ཞིག །མཉམ་རྗེས་དབྱེར་མེད་ཟེར་ནས་ཐ་མལ་རང་དགར་ལུས། །བདོག་པ་ཅི་ཡང་དགོས་པའི་གྲུབ་མཐའ་ཟིན་པ་ལགས། །ཉེ་འཁོན་མེད་པའི་ཐུགས་རྗེ་འདོད་པའི་ཕྱོགས་སུ་ལྷུང་། །ལོག་པར་སྒྲུབ་པའི་ཕྱོགས་ལ་བཟོད་པ་བསྲན་མི་ནུས། །རྙེད་དང་བཀུར་སྟིའི་སླད་དུ་དབང་པོ་སྡོམ་པའི་ཚུལ། །སྙིང་རྗེ་སྐམ་ཐག་ཆོད་པའི་བྱང་ཆུབ་སེམས་དཔའ་ལགས། །ཅུང་ཟད་རྙེད་པའི་ཚེ་ན་རྒྱགས་དང་དྲེགས་པའི་ནང་དུ་འཕེལ། །སྤངས་རྟོགས་ཡོན་ཏན་མི་སྨོན་གྲགས་སྐམ་དགེ་བའི་ཆོམ་རྐུན་གཉེར། །ཆོས་ལྟར་བཅོས་པ་ཀུན་དང་མཐུན་པའི་རྣམ་པར་ཐར་པའི་ཚུལ། །ཧ་ཅང་སྦས་དྲགས་རྒྱལ་རྣམས་ཐུགས་ཀྱིས་ཁྲེལ་དགས་འདིར་བརྗོད་དོ། །དེ་ལས་གཞན་དུ་ཐུན་མོང་མ་ཡིན་པ། །ཅི་ཡང་མེད་མོད་གལ་ཏེ་ཡོད་སྲིད་ན། །མོས་པ་བརྟན་པའི་རྒྱུན་ལས་གནས་སྐབས་འདིར། །ཆ་ཙམ་སྐྱེས་པའི་རང་རྒྱུས་མིག་འཕྲུལ་ནི། །གང་ཚེ་སྒོ་གསུམ་མི་འདར་བསྡོམས་པ་ནས། །སྟན་ཐོག་འདིར་ནི་ལུས་གནད་མ་ཞིག་ཅིང་། །སེ་གོལ་གཏོགས་པ་ཙམ་ལའང་ཡེངས་མ་ཡེངས། །ནང་ནུབ་དེ་བཞིན་ལྟ་རྟོག་བཅུག་ནས་བསྒོམ། །དེ་ཡི་འབྲས་བུ་ནམ་ཡང་མི་བསླུ་བས། །ཟླ་བ་གསུམ་ན་ཞི་གནས་རྩེ་གཅིག་པའི། །གནས་ཉམས་ཉིན་མཚན་བར་མཚམས་མེད་དུ་ཤར། །གཉིད་ཀྱང་མར་མེ་སྦར་བ་ཇི་བཞིན་ནོ། །ད་ཀོ་སང་དང་འཇིག་རྟེན་ཕྱི་མའི་ལམ། །ངེས་པར་སྔོན་ལ་གང་ཡོད་མི་ཤེས་པའི། །ཤུགས་རིང་དབུགས་འབྱིན་ཆེན་པོའི་འབབ་སྟེགས་ཀྱང་། །ཁ་རག་སྒོམ་ཆུང་རྗེས་སུ་འགྲོ་བ་སྙམ། །ཚེ་འདིའི་འཚོ་རྩིས་ཆགས་སྡང་གཡོ་འཁྲུག་གི། །རི་དབང་འཇོམས་ལ་གནམ་ལྕགས་ཐོག་ལྟ་བུ། །འཆི་བ་སྙིང་དྲན་ཉིད་ལས་གཞན་མེད་པར། །རྒྱལ་བས་གསུངས་པའི་བདེན་པ་རྒྱུད་ལ་སྨིན། །བྱིན་རྒྱུད་རྟོགས་པ་འཕོ་བའི་བྱེད་པ་པོ། །སུ་ཡང་མ་ཡིན་རང་གི་མོས་གུས་ལ། །རག་པ་དེ་ཕྱིར་དད་པའི་གདུང་ཤུགས་ཀྱང་། །མཆི་མ་འཁྲུག་པའི་བྱེད་པོས་རྟག་ཏུ་བོས། །ཐེག་ཆེན་ལམ་གྱི་ཡོན་ཏན་ཕལ་མོ་ཆེ། །མགྲོན་པོར་འབོད་ལ་སྙིང་རྗེ་ཆས་པ་བཞིན། །དགྲ་མི་ཤ་བོར་མཚོན་རྣོན་ཐོགས་པ་ལའང་། །འཁུན་པ་མེད་པར་སྲོག་འདི་སྟེར་ཕོད་སྐྱེས། །འཁོར་བ་ཤིན་ཏུ་མི་བདེ་སྡུག་བསྔལ་བའི། །རུམ་ན་སེམས་ཅན་ཀུན་གྱི་མཚང་བཅས་དེའི། །གནས་ལ་བཟོད་ཐབས་མེད་པའི་སྨྲེ་སྔགས་དང་། །ཤུགས་རིང་མཆི་མར་བཅས་པ་རྟག་ཏུ་འདྲེན། །ངེས་པར་འབྱུང་དང་སྐྱོ་ཤས་དྲག་པོ་དང་། །སྙིང་རྗེ་ཚད་མེད་མོས་གུས་རླབས་པོ་ཆེས། །ལོ་ཟླའི་དམ་བཅའ་བརྟན་པོ་མ་ལུས་པ། །སྐྱོ་ངལ་མེད་པའི་ངང་དུ་ཟད་པ་བྱུང་། །གང་ལས་བྱུང་བའི་ཡོན་ཏན་ཅི་སྙེད་ན། །མ་ཡེངས་ལམ་དུ་སློང་བའི་ཆོས་དྲུག་གིས། །དྲན་པའི་ངོ་བོ་རང་གྲོལ་ཆེན་པོའི་ཀློང་། །རྐུན་པོའི་རྣམ་རྟོག་ཡིབས་པའི་འཕྲོ་བཅད་དོ། །དེ་ལའང་ཡིད་ཆེས་ཉམས་ཀྱི་འཛིན་སྟངས་དང་། །སྒོམ་འཛིན་ཤེས་བྱའི་དྲི་མ་ཕལ་མོ་ཆེ། །བརྗོད་མེད་བློ་བྲལ་ཆེན་པོའི་གཤིས་སུ་དག །བཏང་སྙོམས་ལུང་མ་བསྟན་ལས་འདས་པའོ། །བསྒོམ་དང་མི་བསྒོམ་མཐའ་ལས་རྣམ་གྲོལ་ཞིང་། །ལྷག་མཐོང་གཤིས་ལ་འབྱམས་པའི་གཞི་རྩ་ཆོད། །ཆོད་དང་མ་ཆོད་འདི་ཡང་བླ་བཏགས་ཙམ། །བརྡལ་བ་ཆེན་པོ་ཆོས་སྐུའི་བཞུགས་ཚུལ་ལོ། །སྐྱེ་མེད་ངེས་བཟུང་མཉམ་གཞག་ཡོན་ཏན་སྐྱེ། །འགག་མེད་ལམ་ཁྱེར་རྗེས་ཐོབ་རང་ངོར་གྲོལ། །སྣང་བའི་སྟེང་དུ་སྟོང་པའི་རང་ཞལ་མཐོང་། །རྣམ་པ་ཐམས་ཅད་མཆོག་ལྡན་ཉིད་དུ་གྲོལ། །དེ་ཉིད་མ་རིག་སྲིད་པའི་ཁུང་བུ་ཅན། །རྟེན་འབྲེལ་བཅུ་གཉིས་རྒྱུན་ལ་རྟག་ཏུ་འཁོར། །བསྒོམ་འདོད་བློ་ནི་ཆགས་དང་སྤོང་འདོད་སྡང་། །ཆགས་སྡང་བཅོས་མའི་བློ་ཡིས་འཁོར་བར་འཕེན། །དེ་ཕྱིར་ཡེ་གྲོལ་ཆེན་པོའི་ངང་བསྒོམས་དང་། །ཀུན་བརྟགས་ཕྲ་མོའི་དཔྱད་པ་ཁྱད་ཆེ་བའི། །རང་བཞིན་ཤེས་ནས་དེ་ཀར་ལུས་པ་ལས། །འཁྲུལ་པའི་དེ་ཉིད་རིག་པའི་ཀློང་དུ་ཡལ། །ཐེག་དམན་ལམ་གྱི་སྐལ་བར་མི་གྲོལ་བའི། །གཟུང་འཛིན་སེམས་ཉིད་གྱ་གྱུའི་རང་བཞིན་ཅན། །ཡུད་ལ་གྲོལ་བ་རྡོ་རྗེ་སྙིང་པོའི་དྲིན། །དོན་གྱི་རྟོགས་པ་བརྗོད་པ་དེ་ལ་རུང་། །ལར་ལོ་གསུམ་འདིའི་རིང་ལ། རྡོ་རྗེའི་རིགས་དང་། རིན་པོ་ཆེ་དང་། པདྨ་དང་། ལས་དང་། དེ་བཞིན་གཤེགས་པ་ལ་སོགས་ཏེ་ཡི་དམ་རིགས་ཐ་དད་པའི་བསྙེན་སྒྲུབ་ཀྱིས་སྒོ་གསུམ་རྡོ་རྗེ་གསུམ་དུ་གོ་འཕྲོ་བའི་གནད་དང་། དེའི་རང་བཞིན་མཉམ་གཞག་ཆེན་པོར་བསྲེ་བ་ལ་གོམས་པར་བསླབས་པས་བསོད་ནམས་དང་ཡེ་ཤེས་ཀྱི་ཚོགས་ཟུང་འབྲེལ་ཉིད་དུ་རྫོགས་པ་ནི་རྒྱུ་འབྲས་མི་བསླུ་བའི་འབྲས་བུ་ཡིན་པ་སྨོས་མ་དགོས་ལ། གནས་སྐབས་སུའང་རྣམ་པར་སྨིན་པའི་རིག་འཛིན་གྱི་ལྡང་ཚད་ཇི་ལྟ་བར་གདགས་སུ་རུང་བའི་བསྐྱེད་རིམ་གསལ་བརྟན་གྱི་ངེས་བརྗོད་རྫོགས་པའང་འགའ་ཙམ་སྣང་བས་ཕྲིན་ལས་རྣམ་པ་བཞི་ལ་རང་བྱན་ཆུབ་པའི་རྟེན་འབྲེལ་འགྲིག་ཅིང་། གདོན་བགེགས་ཀྱིས་མནར་བའི་འགྲོ་བ་གང་ཞིག་ལ་རིག་པ་གཏད་པ་ཙམ་གྱིས་མངོན་གྱུར་དུ་ཕན་པའང་འགའ་ཙམ་བྱུང་ལ། གང་ཞིག་སྙིང་རྗེ་ཆེན་པོའི་བློ་ཤུགས་འབྱུང་དུ་སྐྱེས་པ་དེའི་ཚེ་དེའི་དུས་ན་རང་གཞན་བརྗེ་བར་ནུས་སོ་སྙམ་པའི་ཀུན་སློང་བཟང་པོ་རྒྱལ་པོ་བྱམས་པའི་སྟོབས་ལ་སྨོན་པར་ནུས་པ་ཙམ་དུ་སྐྱེས་པ་ལས། འཇིག་རྟེན་ན་སྐྱེ་བ་ནས་སྐྱེ་བར་རབས་སུ་བརྒྱུད་པ་དང་། གདུང་འཛིན་ལ་སོགས་པ་གྲགས་པའི་ལྕགས་ཀྱུས་མཐོན་པོའི་གནས་ལ་དཔྱང་དུ་མེད་པའི་ཀུ་སུ་ལུ་སྲན་མ་ལྟ་བུར་ཟླུམ་པའང་། ལས་འཕྲོ་དག་པས་རང་བཞིན་གྱི་བླ་མར་བྱ་བ་དང་། རི་མོར་བྱ་བ་དང་། བསྟི་སྟང་དུ་བྱ་བའི་འོས་སུ་མཐོང་ཞིང་དེ་དག་ཆོས་ཀྱི་སྒོ་ནས་ཡང་དག་པའི་ལམ་ལ་བཀྲི་བར་ནུས་པའང་སྟོང་ཉིད་སྙིང་རྗེའི་སྙིང་པོ་ཅན་གྱི་གཞན་དབང་ཁོ་ན་ལས་བདག་ཉིད་ཐབས་ལ་མཁས་པའི་སྤྱོད་པས་མ་ཡིན་ནོ། །གང་གི་ཚེ་མོས་གུས་ཆེན་པོའི་རླབས་ཕྲེང་གཡོ་བའི་མོད་ལ། མིག་ནས་མཆི་མའི་ཆར་རྒྱུན་དྲག་ཏུ་འབབ་པ་དང་ཆབ་གཅིག །གདུང་བ་དྲག་པོའི་བློ་སྲོག་ལ་མི་ཕོངས་པ་ཙམ་དུ་སྐྱེས། དེའི་རྗེས་འབྲེལ་དུ་སྔ་ན་མེད་པའི་རྟོགས་པ་བརྗོད་དུ་མེད་པ་རེ་སྐྱེས་ནས་སྔ་མ་སྔ་མའི་ལྟ་བ་ཕྱི་ཤུན་ལྟ་བུར་འགྲོ་ཞིང་། དེ་ལ་སོགས་པའི་ཡུལ་རྐྱེན་ཐ་དད་པས་མགྲིན་པ་ལོངས་སྤྱོད་ཀྱི་འཁོར་ལོའི་གྲོང་ཁྱེར་ཆེན་པོ་ན་གནས་པའི་རྩ་ཁམས་ཀྱི་ཡི་གེ་རྟེན་དང་བརྟེན་པར་བཅས་པ་གསང་བ་ཡེ་ཤེས་ཆེན་པོའི་རླུང་གིས་རྡོ་རྗེའི་རོལ་མོར་དཀྲོལ་བ་ལས། བཛྲ་ག་མ་ཀཿསྟེ་གླུའི་རིམ་པའང་ཇི་སྙེད་ཅིག་བྱུང་སྟེ། དེ་ལ་ཆེད་དུ་འཛིན་པ་མ་ཞུགས་པས་ཟིན་བྲིས་ལ་ལ་གྱར། ལ་ལ་གཞན་དུ་འཁོད་པ་སོགས་ཡོད་པས་འདིར་མ་བྲིས། དེ་ལྟ་ནའང་ཆོས་ཡང་དག་པར་སྡུད་པའི་མདོ་ལས། བཅོམ་ལྡན་འདས་བསམ་པ་ཕུན་སུམ་ཚོགས་པ་ནི་ཆོས་ཐམས་ཅད་ཀྱི་རྩ་བ་སྟེ། བཅོམ་ལྡན་འདས་བསམ་པ་ཕུན་སུམ་ཚོགས་པ་ལ་ནི་གལ་ཏེ་སངས་རྒྱས་མི་བཞུགས་ནའང་། ནམ་མཁའི་དཀྱིལ་དང་། རྩིག་པ་དང་། ཤིང་ལྗོན་པ་རྣམས་ལས་ཆོས་ཀྱི་སྒྲ་འབྱུང་ངོ་། །བྱང་ཆུབ་སེམས་དཔའ་བསམ་པ་དག་པ་ལ་ནི་རང་གི་ཡིད་ཀྱིས་སྤྱོད་པ་ཉིད་ལས་གདམས་ངག་དང་རྗེས་སུ་བསྟན་པ་ཐམས་ཅད་འབྱུང་ངོ་། །དེ་བས་ན་བྱང་ཆུབ་སེམས་དཔའ་བསམ་པ་ཕུན་སུམ་ཚོགས་པར་བགྱིའོ། །ཞེས་གསུངས་པ་ལྟར་གནས་སྐབས་དེར་བློ་ལས་སུ་རུང་བའི་ཉེ་བར་ལེན་པ་དང་། སྣང་བའི་ཆོས་ཉིད་སྒྱུ་མ་ལྟ་བུར་རྟོགས་པའི་རྟེན་ཅིང་འབྲེལ་བར་འབྱུང་བས་མཚམས་སྦྱར་ཏེ། བཀའ་འདུས་རྫོགས་པ་ཆེན་པོ་ཀློང་ཆེན་སྙིང་ཐིག་གི་ཀློང་བྱང་ཐུགས་ཀྱི་སྒྲོམ་བུ་བརྡའ་བསྒྱུར་གསང་བའི་གལ་མདོ་བབས་ཤིང་དེ་ཉིད་འབྱུང་བའི་སྔོན་འགྲོར་སྣང་བ་དཔེ་ཆར་ཤར་བའི་བརྡ་ལས་བློ་ལྡན་བྷྲ་མ་རའི་གཏམ་དུ་གྲགས་པ་ཇ་ཞལ་གསུམ་འཐུང་བའི་ཡུན་ལ་བྲིས་མི་ཚར་བ་ཙམ་དུ་བབས་པ་བློས་བཀོད་པའི་ཡི་གེ་མ་ཡིན་པས་དོན་བཟང་ལ་ཚིག་གཏད་པ་མེད་པར་སྣང་ངོ་། །སྒྲུབ་ཁང་ཡང་འོག་མིན་དག་པའི་ཞིང་། །འདུ་ཁང་དང་ཚོགས་འདུ་དྲན་དོན་མེད། །དེ་དྲན་ན་ཆགས་སྡང་མེ་ལྟར་འབར། །བྱང་ཆུབ་ལ་གསོན་བསྲེག་གཏང་ཉེན་ཡོད། །ཅོག་པུ་ནི་རང་བཞིན་སྤྲུལ་པའི་གནས། །འདུ་འཛི་དང་རྒྱལ་ཁབ་མ་གཤགས་ཤིག །དེ་གཤགས་ན་སྒྲུབ་འབྲས་ཟོང་ལ་འཚོང་། །མ་མཁའ་འགྲོའི་བྱིན་རླབས་ཡལ་གྱིས་དོགས། །གཅོད་ཌཾ་གྱིས་ལྷ་འདྲེའི་ཡིད་རྩ་འཁོལ། །རྔ་ཆོལ་དང་རོལ་མོ་མ་དྲན་ཅིག །གཏོར་རྒྱག་གི་འགྲོ་དོན་སླེབས་ནས་ཡོང་། །ལམ་རྟགས་ཀྱི་ཡོན་ཏན་འགྲིབ་ཉེན་ཡོད། །མི་རྐང་དང་གླིང་བུ་གདངས་འགྱུར་སྙན། །དུང་སྒྲ་དང་རྒྱ་གླིང་མ་དྲན་ཅིག །རི་དྭགས་ཀྱིས་སྨིག་རྒྱུ་མཐོང་བ་ལྟར། །སྟོང་གསོབ་ལ་མི་ཚེ་བསྐྱལ་ཉེན་ཡོད། །གནས་ཡུལ་གྱི་བཀོད་པ་ལུས་ལ་ཚང་། །རྐང་པ་ལ་འཕང་ལོ་མ་སྐོར་ཅིག །ཚར་ལྷངས་གཉིས་མལ་སར་འགྲིག་གིན་གདའ། །སྤྲང་སྙོགས་ཀྱི་མཐར་ཐུག་ཅིག་བྱས་ཉེན་ཡོད། །མཚམས་འོག་ལ་མཇལ་ཕྲད་མ་མང་ཞིག །དགེ་བའི་གྲོགས་པོ་གསེར་ལས་དཀོན། །སྡིག་གྲོགས་ཀྱིས་དགེ་སྦྱོར་རླུང་ལ་བསྐུར། །སེམས་སྣང་སྟོང་ལ་བུམ་པའི་དབང་བསྐུར་ཞུས། །ཐུན་མཚམས་སུ་ཁ་སྡུར་མ་བཏང་ཞིག །ཕྱི་གཏམ་ནང་བསྐྱེལ་འདི་རྣམ་རྟོག་རྒོད། །ཁ་བཙུམ་ན་རྟོག་བྲལ་གྱི་ཡོན་ཏན་འཆར། །སེམས་གསལ་སྟོང་ལ་གསང་དབང་གི་ཉམས་ལེན་མཛོད། །སྒོམ་འདོད་ཚོ་ཤེས་བྱ་མ་སློབས་ཤིག །དེ་ཤེས་ན་སྲུང་འཁོར་གྱིས་མི་ཐུབ་པའི། །གེགས་ཆེན་དེ་རང་ལ་ཚང་ནས་གདའ། །མི་ཤེས་དང་མི་ཡོང་སྐུ་དྲིན་ཆེ། །སེམས་བདེ་སྟོང་ལ་ཤེར་དབང་གི་ལམ་ཁྱེར་མཛོད། །འུམ་འུམ་དང་ཡིག་ཕྲིན་བྱ་བ་མང་། །ཆོས་བརྒྱད་ཀྱི་རྟོག་ཚོགས་གསར་རེ་སྒུག །བུག་སྒོ་ལ་རྡོ་བརྩིགས་ཐོང་ལ་ཞོག །རིག་སྟོང་ལ་ཚིག་དབང་གི་ལམ་ཁྱེར་ཚང་། །གཡོ་མེད་དུ་བརྟན་པ་ལུས་ཀྱི་ཚུགས། །སྒྱུ་ལུས་ཀྱང་དྲན་པ་ཉེ་བར་གཞག །རྣམ་རྟོག་ལ་འགྲོ་དང་འོང་བ་མེད། །སེམས་ཉིད་ཀྱང་དྲན་པ་ཉེ་བར་གཞག །ཚོགས་དྲུག་གི་ཡུལ་ལ་བྱ་མ་ཤོར། །ཚོར་བ་ཡང་དྲན་པ་ཉེ་བར་གཞག །གཤིས་ཐོག་ལ་བཅས་བཅོས་མ་དགོས་པ། །ཆོས་ཉིད་ལ་དྲན་པ་ཉེར་གཞག་གོ །མཉམ་གཞག་ལ་སྡིག་པའི་ཀུན་སློང་མེད། །མི་དགེ་བ་ཡང་དག་སྤོང་བ་ལགས། །ཆོས་ཉིད་ནི་མུ་བཞིའི་སྤྲོས་དང་བྲལ། །གཟུང་འཛིན་ཀྱང་ཡང་དག་སྤོང་བ་ལགས། །སྣང་བ་ལ་མ་ཞེན་ཆོས་སྐུར་དག །རྣམ་རྟོག་ཀྱང་ཡང་དག་སྤོང་བ་ལགས། །འཁོར་འདས་ལ་རང་བཞིན་མ་གྲུབ་པས། །གཉིས་འཛིན་ཀྱང་ཡང་དག་སྤོང་བའོ། །ཉིན་མཚན་དུ་མཉམ་པར་གཞག་ལ་བརྩོན། །འདུན་པའི་རྫུ་འཕྲུལ་རྐང་པ་ཡིན། །ལྷག་མཐོང་གིས་དེ་ཡི་ཆོས་ལ་འགྲོགས། །སྤྱོད་པའི་རྫུ་འཕྲུལ་རྐང་པ་ཡིན། །ཞི་ལྷག་ཀྱང་དོན་ལ་རོ་གཅིག་གནས། །སེམས་ཀྱི་རྫུ་འཕྲུལ་རྐང་པ་ཡིན། །དེ་ཡི་ངོ་བོ་གསལ་དྭངས་ཕྱེད། །ཤེས་རབ་ཀྱི་རྫུ་འཕྲུལ་རྐང་པ་ཡིན། །བློ་འདས་ལ་ཡོན་ཏན་མ་ལུས་འཆར། །དགེ་ཆོས་མ་བསྐྱེད་པ་བསྐྱེད་པར་བྱེད། །མཉམ་རྗེས་ལ་རིས་མེད་རྩལ་སྦྱོང་བས། །སྐྱེས་པའང་གོང་དུ་སྤེལ་བར་བྱེད། །རྟོག་པའི་གཞི་རྩ་རང་སར་ཆོད། །ཕྱི་ནས་མི་དགེ་མི་སྐྱེར་བྱེད། །ཤར་བ་དང་གྲོལ་བ་དུས་མཉམ་ན། །སྐྱེས་པའང་རང་སར་སྤོང་བར་བྱེད། །ཡང་དག་གི་དོན་ལ་ངེས་ཤེས་སྐྱེ། །དད་པའི་དབང་པོ་དེ་ལས་གང་། །བསྒོམས་དང་མ་བསྒོམས་གང་དུའང་དྲན། །དྲན་པའི་དབང་པོ་དེ་ཉིད་དོ། །ཆུ་བོ་བཞིན་དུ་རྒྱུན་འཆད་མེད། །ཏིང་ངེ་འཛིན་གྱི་དབང་པོའོ། །དེ་ལ་བསལ་བཞག་བྱ་བ་མེད། །བརྩོན་འགྲུས་ཆེན་པོའི་དབང་པོའོ། །གཏིང་མཐའ་མེད་པའི་མཚང་ཤེས་པ། །ཤེས་རབ་ཀྱི་དབང་པོ་ཁྱད་པར་ཅན། །སྣང་བ་ནི་དག་པ་རབ་འབྱམས་ཞིང་། །ཁྱབ་གདལ་ཆེན་པོ་དད་པའི་སྟོབས། །དུས་གསུམ་ཀྱང་དུ་མ་རོ་གཅིག་ངང་། །སྐྱེ་འགག་གནས་མེད་དྲན་པའི་སྟོབས། །ཡོད་མེད་ཀྱི་མཐའ་ལ་སྤྲོས་བྲལ་ཤར། །དབུ་མར་གནས་པའི་ཏིང་འཛིན་སྟོབས། །སྒོམ་པའི་ངོ་བོ་བྲི་གང་མེད། །ལེ་ལོ་དང་བྲལ་བརྩོན་འགྲུས་སྟོབས། །ལྷན་སྐྱེས་ཀྱི་ངོ་བོ་བརྗོད་པ་བྲལ། །རང་བྱུང་ཡེ་ཤེས་ཆེན་པོའི་སྟོབས། །ཚོགས་དང་སྦྱོར་བའི་ལམ་ཆེན་པོར། །ཡོན་ཏན་གྱི་རྣམ་པ་ཅིར་བསྟན་པ། །རིས་མེད་མཉམ་པ་ཆེན་པོར་འགྱེལ། །སྤྲོས་བྲལ་གྱི་ཡེ་ཤེས་རྣམ་མི་རྟོག །ཏིང་འཛིན་གྱི་བྱང་ཆུབ་ཡན་ལག་ཉིད། །མཐའ་དང་བྲལ་བ་ཁྱད་པར་གྱི་ཆོས། །ཡང་དག་གི་བྱང་ཆུབ་ཡན་ལག་ཉིད། །ལུས་སེམས་དང་བཅས་པའི་ཚོགས་པ་ཀུན། །ཤིན་ཏུ་སྦྱངས་པའི་བྱང་ཆུབ་ཉིད། །སྤོང་ལེན་ལས་གྲོལ་བ་གང་ཞིག་ནི། །བརྩོན་འགྲུས་ཀྱི་བྱང་ཆུབ་ཡན་ལག་གོ །ས་ལམ་གྱི་རྣམ་པར་དཔྱད་དུ་བཟོད། །རྣམ་འབྱེད་ཀྱི་བྱང་ཆུབ་ཡན་ལག་ཡིན། །རྒྱ་ཆད་དང་ཕྱོགས་སུ་ལྷུང་མ་མྱོང་། །བཏང་སྙོམས་ཀྱི་བྱང་ཆུབ་ཡན་ལག་ཉིད། །འདར་བ་དང་འཕྲིགས་པའི་ཆོས་ཅན་མིན། །དྲན་པ་འདི་བྱང་ཆུབ་ཡན་ལག་གོ །གར་ཡང་ཕྱིན་པ་མེད་པ་ལ། །ཅི་ཡང་མ་མཐོང་མཐོང་བའི་ལམ། །དབྱིངས་ཀྱི་ངང་ལ་རྩོལ་རྟོག་མེད། །ཡང་དག་འདི་ལྟ་བའི་རྩེ་མོར་འདུག །རང་ངོའི་ཡེ་ཤེས་བསྒྲིབ་པ་མེད། །ཡང་དག་འདི་རྟོགས་པའི་རྩེ་མོར་སོང་། །ཅ་ཅོ་དང་ག་ཞས་བསླུ་བ་མིན། །ཡང་དག་འདི་ངག་གི་རྩེ་མོ་ལགས། །སྤངས་པ་དང་རྟོགས་པ་ལྷུན་རྫོགས་ཉིད། །ཡང་དག་འདི་རྩོལ་བའི་རྩེ་མོར་ཕྱིན། །མཆོག་ཏུ་མི་འགྱུར་བདེ་བའི་དངོས། །ཡང་དག་འདི་འཚོ་བའི་རྩེ་མོ་ལགས། །མཉམ་གཞག་དང་རྗེས་ཐོབ་ཤུགས་ལ་འདྲེས། །ཡང་དག་འདི་ཏིང་ངེ་འཛིན་གྱི་རྩེ། །རང་གསལ་ལ་སྒོམ་པས་ཕན་མ་བཏགས། །ཡང་དག་འདི་དྲན་པའི་རྩེ་མོའོ། །རེ་དོགས་ཀྱི་གཉིས་སྣང་རང་སར་ཞིག །ཡང་དག་འདི་ལས་མཐའི་རྩེ་མོ་ཉིད། །འཕགས་པའི་ལམ་གྱི་ཡན་ལག་བརྒྱད། །བསྒོམ་པའི་ངོ་བོར་རང་གྲོལ་ནས། །ལམ་ལྔ་ས་བཅུའི་འབབ་སྟེགས་ལ། །མི་སློབ་ལམ་གྱི་རྟོགས་པའི་ཆོས། །མངོན་གྱུར་དག་པ་གཉིས་ལྡན་ཞེས། །གྲགས་པ་ཕ་རོལ་ཕྱིན་པའི་ལུགས། །མཐར་ཐུག་སྔགས་ཀྱི་མྱུར་ལམ་ལ། །མ་བརྟེན་ས་ནས་སར་འཕགས་པ། །ངེས་པར་སྐས་ཀྱི་གདང་བུ་བཞིན། །འགྲོ་བར་འདོད་པའི་རྣམ་རྟོག་ཅན། །དེ་ལ་བྱང་ཆུབ་ཡོད་མ་ཡིན། །ཅེར་གྲོལ་རིག་པ་སྐད་ཅིག་མའི། །སྟེང་དུ་བྱང་ཆུབ་ཕྱོགས་ཀྱི་ཆོས། །སུམ་ཅུ་རྩ་བདུན་མ་ལུས་པ། །སྤངས་ཐོབ་བྲལ་བར་རྫོགས་པ་འདི། །རྣལ་འབྱོར་བདག་གི་ཉམས་ལེན་ལགས། །དམ་བཅའ་རྫོགས་པ་ན་བསྙེན་སྒྲུབ་ཀྱི་ཁ་སྐོང་ལ་སྒྲུབ་ཆེན་བདེ་གཤེགས་འདུས་པའི་སྒོ་ནས་ཕྲིན་ལས་བཞི་དང་མཆོག་ལ་བརྟེན་པའི་ཧོ་མའི་ལས་སྦྱོར་བརྩམས། མཆེད་ཟླ་སྐྱེས་ཐོབ་ཀྱི་རྩེ་མོར་སོན་ལ། ཐོས་བསམ་ལ་རིག་པ་རྣོ་བ་ཞིག་ཡོད། བསླབ་གཉེར་རྒྱུད་ཐོག་ཏུ་མི་འགེལ་བ་ནི་དགེ་བཤེས་མཚན་ཉིད་པའི་གཞུང་ལམ་ཆེན་མོར་མེད་དམ་སྙམ། དབུ་མ་ཆེན་པོའི་ལུགས་ལ་ཞི་གནས་ཁྱད་པར་བ་ཐོབ་པ་དེས། མདུན་ན་ཟན་ཟ་བ་པོའི་ཁམ་རྡོག་ལའང་གྲངས་ཀྱི་ནོན་པ་ཙམ་དུ་མི་ཡེངས་པ་ཡོད་ཟེར་བ་ཐོས། ཁྱེད་རྫོགས་པ་ཆེན་པོའི་ལྟ་བ་ཧར་སངས་ཟེར་བ་འདི་ཧྭ་ཤང་གི་གྲུབ་མཐའ་དང་གཅིག་པ་ཡིན་པར་བྱེད་ཀྱང་། འཇའ་ལུས་གྲུབ་པ་དང་། གྲོལ་བ་ཐོབ་པ་མངོན་གྱུར་དུ་བྱུང་ལུགས་འདི་ལ་དཔགས་ན་ལྟ་བའི་ངོ་བོ་ནི་ཟབ་མོ་རང་ཞིག་ཡོད་པར་འདུག་སྐད། མ་ཡེངས་པ་ཟེར་བའི་ཚིག་དེ་ཁ་གཅིག་པོས་འཚང་རྒྱ་ན་ཀུན་ནས་ཉོན་མོངས་པའི་ཕྱུགས་རྫི་རྒན་པོས་ཀྱང་ཆེད་འཛིན་གྱི་ངང་དུ་དྲན་པ་བཞག་པའི་ཚེ། སྟོང་ཕྲག་ཁྲི་ཕྲག་ཏུ་ལོངས་པའི་ཕྱུགས་ཀྱི་ངོ་བོ་རྩི་བར་ནུས་པ་རིག་པས་གྲུབ། རྫོགས་པའི་སངས་རྒྱས་ཀྱི་ལྟ་བ་ལ་སྤྲོས་བྲལ་གྱི་མིང་གདགས་དོན་མེད། མཐའ་གཉིས་ལ་མི་གནས་པའི་དབུ་མར་བློས་བཞག་པའང་དྲན་པས་བཟུང་བའི་ཡོད་མཐའ་ལ་ལྟུང་གིས་དོགས། སངས་རྒྱས་ཀྱི་ལྟ་བ་ཟབ་མོ་སྟོན་པ་ལ་ཀླུ་སྒྲུབ་ལུང་བསྟན། རྒྱ་གར་ན་དགོངས་འགྲེལ་ཚད་མ་ཟླ་བ་གྲགས་པ་ཡིན། རྣམ་པའི་གཞུང་ལུགས་ལ་སྨྲ་བསམ་བརྗོད་མེད་གཉིད་འཐུག་པོ་དང་གཅིག་པའི་ཕྱོགས་ཕུལ་བཀོད་པའང་འདུག །དེ་ཀ་ཡིན་ན་རྫོགས་པ་ཆེན་པོ་ཧྭ་ཤང་དང་མཐུན་པ་ལོང་དུ་མ་སོང་། རྒྱལ་བའི་ཡུམ་ལའང་སྒྲ་གཅན་འཛིན་གྱིས་བསྔགས་པ་དེ་ལས་བརྗོད་མ་ཤེས་པའི་ཕྱིར་དང་། ཡང་སྐབས་ཤིག་ཏུ་ངེས་པའི་ཤེས་པ་དང་། ཡུལ་གྱི་འཛིན་སྟངས་ཞིག་པ་ལྟ་བ་ལ་དཔྱད་པ་རྫོགས་པའི་ཚད་དུ་ཁས་བླངས་པ་དེ་ཁ་ཐུགས་རྒྱུད་ལ་ཁེལ་གྱིན་ཡོད་ན་ནི། སྔ་མའི་ཁས་ལེན་དང་དངོས་འགལ་ལ་སོང་ཡང་གོ་བཅད། རྫོགས་པ་ཆེན་པོའང་ཕྱོགས་གང་དུ་འཕུལ། གསར་རྙིང་གང་གི་ཐད་དུའང་འདྲ་མིན་མང་པོ་ཡོད་པ་ནི་ཀུན་ན་གསལ། བོད་ན་རྒྱན་དྲུག་མཆོག་གཉིས་ཀྱི་གཞུང་སྟེགས་སུ་བཅས་ནས་རྫོགས་པ་ཆེན་པོའི་གྲུབ་མཐའ་རང་སར་སློང་ནུས་པ་དེ་རྒྱལ་བ་ཀློང་ཆེན་པ་ཡིན། དེའི་དགོངས་པ་ལ་རྟག་ཆད་ཀྱི་རྒོལ་བ་འཇུག་པ་འདུག་ན་རྣལ་འབྱོར་པ་ང་ཡང་ཐོར་ཚུགས་འདྲེག་པ་ལ་སྤྲོ་བ་ཡིན། བྱས་པས་ཁོང་མགུ་སོང་། སྔར་གོ་བ་ང་ཆེ་བ་ཡིན་ཏེ་སྒོམ་བྱུང་གི་ཤེས་རབ་ཁྱད་པར་འཕགས། ཁྱོད་བསླབ་གཉེར་ནི་མ་བྱས་སྐད། ཁོང་གི་དེ་དྲི་བ་ལྷག་བསམ་ནས་ངེད་ལ་འགྲོ་བརྩི་བར་འདུག་སྟེ་ཤེས་བྱ་གཤིས་ཐོག་ཏུ་གྲོལ་བ་ལ་རྒྱུ་མཚན་འདི་ཡོད། བདེ་གཤེགས་སྙིང་པོ་ནང་ནས་གསལ་བ་ལ། །ཕྱི་ནས་དྲན་པས་འཛིན་པ་བཙལ་མ་དགོས། །ཡུལ་ལ་ཆེད་དུ་དམིགས་པའང་རྣམ་དག་པ། །ཟབ་ཅིང་སྤྲོས་བྲལ་ཀློང་ལ་ཕྱག་བགྱིའོ། །བཅིངས་གྲོལ་ལས་འདས་པ་ཀ་དག་གི་རིག་པ། །རྒྱས་འདེབས་ཀྱིས་མ་བསླད་ལྷུན་གྲུབ་ཏུ་རང་ཤར། །བྱར་མེད་ལ་རྩོལ་བྱས་ཀྱི་ལྷན་ཐབས་ཀྱང་མི་འདེབས་སོ། །རྟག་ཆད་ཀྱིས་མ་བསླུས་བློ་བྲལ་གྱི་རིག་པ། །དབུ་མ་ལ་མ་བཙིར་སེམས་འཛིན་ལས་འདས་སོང་། །རང་གྲོལ་ལ་བསྐྱར་གྲོལ་གྱི་མཐུན་འཇུག་ཀྱང་མི་བྱེད། །དྲན་པས་ཀྱང་མ་བཟུང་རང་བབ་ཀྱི་རིག་པ། །འཆར་སྒོས་ཀྱང་མ་གཡེལ་ཐད་ཀ་རུ་རང་ཡན། །ཅེར་གྲོལ་ལ་གཉེན་པོའི་བསལ་བཞག་ཀྱང་མ་དགོས་སོ། །སྟོང་གསལ་གྱི་རིག་པ་སྨྲ་བསམ་དང་བརྗོད་མེད། །ཆེད་འཛིན་ཀྱང་མ་བྱས་རྒྱ་ཡན་དུ་མ་འབྱམས། །བློ་བྲལ་ལ་འཐད་ལེགས་ཀྱིས་གཟབས་མཆོར་ཀྱང་མ་དགོས་སོ། །ཡིད་དཔྱོད་ལས་འདས་པ་མཉམ་ཉིད་ཀྱི་ངང་སྒོམ། །བཅོས་སླད་ཀྱིས་མ་གོས་རང་ས་ན་ཐལ་ཐལ། །དབྱིངས་གྲོལ་ལ་གོ་ཉམས་དང་ཕོ་ཚོད་ཀྱིས་མི་རེག་གོ །གནས་འགྱུ་དང་མཉམ་རྗེས་ཞི་ལྷག་གི་འབྲེལ་མཚམས། །ཐ་དད་དུ་དབྱེ་བའི་རྣམ་གྲངས་ཀྱང་ཞིག་པ། །བཟུང་དྲན་གྱི་གདོན་ཆེན་སངས་པ་ལས་བྱུང་ངོ་། །དྲན་པ་ལ་དྲན་ལུགས་རྣམ་དྲུག་ཏུ་ཡོད་པ། །མ་རྟོགས་མཐར་འཛིན་གྱི་གཡང་སར་ལྷུང་ན། །སྒོམ་ཆེན་དང་གནས་ལུགས་མཁོན་པ་ཞིག་འབྱུང་བས། །ལྟ་བ་ལ་མཐོ་དམན་བརྗོད་ས་རང་མ་རྙེད་དོ། །ཞེས་སོ། །ལྟ་བའི་ཡིན་ལུགས་རྗེན་པར་མཐོང་བ་དང་། །སྒྲིབ་པ་སྤངས་ཐོབ་བྲལ་བ་ངོ་མཚར་ཆེ། །སྐྱིད་སྡུག་གཉིས་ལ་འདམ་ཀ་ད་རུང་འདུག །རོ་སྙོམས་ལམ་དུ་ལོངས་པར་བྱིན་གྱིས་རློབས། །ངེས་འབྱུང་དྲག་པོ་རྒྱུད་ལ་སྐྱེས་པ་དང་། །ཚེ་འདིའི་འཁྲི་བ་ཆོད་པ་ངོ་མཚར་ཆེ། །སྣང་ཡུལ་རྐྱེན་ཁར་འཆོར་ཉེན་ད་རུང་འདུག །གནས་ལ་ངེས་པ་མེད་པར་བྱིན་གྱིས་རློབས། །རང་གྲོལ་ཆེན་པོ་སེམས་ལ་ཤར་བ་དང་། །ཤེས་སྒྲིབ་བག་ལ་ཞ་བ་ངོ་མཚར་ཆེ། །ཡེངས་མ་ལམ་གྱི་ཆོམ་རྐུན་ད་རུང་འདུག །རྟོགས་པའི་ལོ་ཏོག་སྨིན་པར་བྱིན་གྱིས་རློབས། །འཆི་བར་འཇིགས་པ་མེད་ཚེ་མཐོང་ཙ་ན། །སྙིང་རྗེ་རྩོལ་མེད་སྐྱེ་བ་ངོ་མཚར་ཆེ། །ངག་འཁྱལ་དབུས་ན་ཚིག་རྩུབ་བརྗོད་མི་ལང་། །སྡིག་པའི་གྲོགས་དང་མི་ཕྲད་བྱིན་གྱིས་རློབས། །ཀློག་པ་ཐོས་བསམ་དང་འབྲེལ་བའི་སྐོར་ཏེ་སྐབས་དང་པོའོ།། །།