རིག་འཛིན་འཇིགས་མེད་གླིང་པའི་འཁྲུངས་རབས་རྣམ་ཐར་ཉུང་བསྡུས།

Previous Text Back to Volume Page Next Text

Wylie title	rig 'dzin 'jigs med gling pa'i 'khrungs rabs rnam thar nyung bsdus
Location	'jigs gling bka' 'bum Volume 14, Text 2, Pages 45-54 (Folios 1a1 to 5b6)
Author	འཇིགས་མེད་གླིང་པ་
Less details More details
Citation	'jigs med gling pa. Rig 'dzin 'jigs med gling pa'i 'khrungs rabs rnam thar nyung bsdus. In Kun mkhyen rig 'dzin 'jigs med gling pa'i gsung 'bum, Vol. 14: 45-54. New Delhi: Shechen Publications, 2025.
Genre	Biographies - Hagiography - rnam thar

[edit]

༄༅། །རིག་འཛིན་འཇིགས་མེད་གླིང་པའི་འཁྲུངས་རབས་རྣམ་ཐར་ཉུང་བསྡུས་བཞུགས། །

༄༅། །དེ་ལ་བདག་ཅག་གི་བླ་མ་དམ་པ་འདི་ཐུགས་རྗེ་ཡས་སྤྲུལ་གྱི་རྣམ་པས་བསྟན་པ་དང་སེམས་ཅན་གྱི་དོན་དུ་བྱོན་པ་སྟེ། མན་ངག་རྫོགས་པ་ཆེན་པོས་གདུལ་བའི་དུས་ལ་བབ་པ་ན། མགོན་པོ་འཇིག་རྟེན་དབང་ཕྱུག་གི་ཐུགས་བསྐྱེད་ལས་རྒྱལ་པོ་དྷརྨ་ཨ་ཤྭའི་སྲས་མོ་མི་ལས་འདས་པའི་དགེ་སློང་མ་ཞིག་ལ་ཤེལ་གྱི་སྐྱེས་བུ་བཀྲག་དང་ལྡན་པ་ཞིག་གིས་དབང་བསྐུར་བས་སྐྱེས་བུ་མཚན་དང་ལྡན་པ་ཅིག་འཁྲུངས། ཕ་མེད་ཀྱི་བུར་གྱུར་པས་ཐལ་ཁུང་དུ་བོར། ཞག་གསུམ་ནའང་མ་ཉམས་པར་འདུག་པས་སྤྲུལ་པའི་སྐུར་ཡིད་ཆེས། ལོ་བདུན་ན་པཎྜི་ཏ་དང་ཆོས་གཏམ་བྱས་པས་སུས་ཀྱང་མ་ཐུབ་སྟེ་ཞབས་སྤྱི་བོར་བླངས། ཡབ་དགྱེས་པས་དགའ་རབ་རྡོ་རྗེར་བཏགས། ཉི་མ་སྣང་བྱེད་ཀྱི་རི་ལ་ལོ་སུམ་ཅུ་རྩ་གཉིས་སུ་བསམ་གཏན་ལ་གཞོལ། སྐུ་ཉི་ཞུར་ལྟ་བུར་གྱུར་ཅིང་། ནམ་མཁའ་ལ་གཤེགས་བཞུད་མཛད། རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞི་གདོད་ནས་ཐུགས་སུ་ཡོད་པ་ཞལ་འདོན་དུ་མཛད་ཅིང་། མཁའ་འགྲོ་མས་བཀའི་བསྡུ་བ་བྱས་ནས་ཡི་གེར་བཀོད། ཁྱབ་འཇུག་གི་བུ་མོ་གཅེར་བུ་ལ་ཆིབས་ཏེ་དུར་ཁྲོད་བསིལ་ཚལ་དུ་བྱོན་ནས་མཁའ་འགྲོ་རྣམས་ལ་ཆོས་སྟོན། མཐར་ཆུ་བོ་དན་ཏིག་གི་འགོར་འོད་ཕུང་དུ་ཡལ། སངས་རྒྱས་འོད་སྲུངས་ཀྱི་དྲུང་དུ་རྒྱལ་པོ་ཀྲྀ་ཀིའི་སྲས་སུ་གྱུར་ནས་བྱང་ཆུབ་ཏུ་སེམས་བསྐྱེད། འོད་སྲུངས་ཀྱི་མཆོད་སྡོང་ལ་གདུགས་ཕུབ་པས། སྟོབས་ཀྱི་འཁོར་ལོས་སྒྱུར་བའི་ལུང་བསྟན་ཐོབ། ཤཱཀྱ་ཐུབ་པའི་དུས་སུ་སྐུའི་མཆེད་དུ་གྱུར་པས་གཅུང་དགའ་བོར་གྲགས། སྟོན་པས་ཐབས་ལ་མཁས་པའི་འདུལ་བས་དགྲ་བཅོམ་པའི་གོ་འཕང་མངོན་དུ་མཛད། སྔོན་སངས་རྒྱས་འོད་སྲུངས་ལ་བྱུག་པ་ཕུལ་བས་པགས་པ་གསེར་གྱི་མདོག་ཏུ་སྣང་བ་དང་། གཙུག་ཏོར་གྱི་རྣམ་པ་སོགས་མཚན་གྱི་མེ་ཏོག་ཅན་དུ་གྱུར། སྲོང་བཙན་སྒམ་པོའི་དུས་ན་རྒྱལ་པོ་ཉིད་ཀྱི་མཛོད་སྤུ་ལས་སྤྲུལ་པའི་དགེ་སློང་ཨ་ཀར་མ་ཏིར་གྲགས། ཙན་དན་གོརྴི་ཤ་ལེན་ཕྱིར་འཕགས་པའི་ཡུལ་དུ་བྱོན་ནས་རང་བྱོན་འཕགས་པའི་སྐུ་སྤྱན་དྲངས། དྲི་མེད་ཀུན་ལྡན་གྱི་དུས་ནོར་བུ་ཕ་རོལ་དཔུང་འཇོམས་གྱིས་གཙོས་ལོངས་སྤྱོད་གཅེས་ནོར། བུ་དང་བུ་མོ། རང་གི་མིག་ལ་སོགས་པ་བཏང་སྟེ། གཏོང་བ་དང་། གཏོང་བ་ཆེན་པོ་དང་། ཤིན་ཏུ་གཏོང་བས་སྦྱིན་པའི་ཕ་རོལ་ཏུ་ཕྱིན་པ་རྫོགས་པར་མཛད། བསྟན་པ་སྔ་དར་གྱི་དུས་ཆོས་ཀྱི་རྒྱལ་པོ་ཁྲི་སྲོང་ལྡེའུ་བཙན་དུ་གྱུར་ནས་དཔལ་གྱི་བསམ་ཡས་བཞེངས། མཁན་སློབ་ཆོས་གསུམ་ལ་སོགས་པའི་སྤྲུལ་པའི་ལོ་པཎ་མང་པོ་སྤྱན་དྲངས། བོད་དུ་སངས་རྒྱས་ཀྱི་བསྟན་པ་ཉི་མ་ཤར་བ་ལྟ་བུར་མཛད། སྤྲུལ་པའི་དམག་གིས་རྒྱ་གར་ཆུ་བོ་གངྒཱ་ཚུན་ཆད་དབང་དུ་བསྡུས་ནས་དགེ་བཅུའི་ཁྲིམས་ལ་བཀོད། ཉིད་དང་ཐུགས་རྒྱུད་གཅིག་པ་ལྷ་ལྕམ་པདྨ་གསལ་གྱི་ཐུགས་བསྐྱེད་ལས་མན་ངག་མཁའ་འགྲོའི་སྙིང་ཏིག་ཆོས་སྐལ་དུ་ཐོབ་ནས་དངོས་སྤྲུལ་ཡང་སྤྲུལ་དུ་མས་ལས་ཅན་གྱི་གདུལ་བྱ་མང་པོ་སྨིན་གྲོལ་ལ་བཀོད། འཕགས་པའི་ཡུལ་དུ་རྣལ་འབྱོར་གྱི་དབང་ཕྱུག་བིྲཝ་པར་གྱུར་ནས་ཀྱེའི་རྡོ་རྗེའི་ལམ་འབྲས་བུ་དང་བཅས་པའི་སྨིན་གྲོལ་བསྟན། མངའ་བདག་རལ་པ་ཅན་གྱི་དུས་གཙུག་ལག་འཛིན་གྱི་སྐྱེ་བ་རྒྱལ་སྲས་ལྷ་རྗེར་གྱུར་ནས་སློབ་དཔོན་ཆེན་པོ་ལས་གཡུ་རུའི་ཁྲ་འབྲུག་ཏུ་བཀའ་འདུས་ཆོས་ཀྱི་རྒྱ་མཚོ་ནོས་ཤིང་གཏེར་སྟོན་རྐྱང་པའི་སྐྱེ་བ་བཅུ་གསུམ་བླངས་ནས་ཕྲིན་ལས་རླབས་ཆེན་འགྲུབ་པའི་ལུང་བསྟན་ཐོབ། སྐྱེ་བ་བདུན་པ་ཡིན་པས་སྐུ་ཤའི་ཆ་ཤས་ཙམ་གྱིས་ཀྱང་སེམས་ཅན་གྱི་དོན་རླབས་པོ་ཆེ་བསྒྲུབས། དེའི་སྐྱེ་བ་ཕྱི་མ་ལ་ཡར་རྗེ་ཨོ་རྒྱན་གླིང་པར་གྱུར་ནས་ཤེལ་བྲག་ནས་བཀའ་འདུས་ཆོས་ཀྱི་རྒྱ་མཚོ་གླེགས་བམ་བརྒྱ་ཕྲག་ཏུ་ལོངས་པའི་གཏེར་སྨྱོན་དང་། ཐང་ཡིག་སོགས་སྤྱན་དྲངས། དེ་བཞིན་དུ་བསམ་གཏན་གླིང་པའི་དུས་ཨ་ཏིའི་ཆོས་སྐོར་རྨད་དུ་བྱུང་བ་གདན་དྲངས་ནས་འགྲོ་བ་མང་པོའི་དོན་མཛད། དྭགས་པོ་ཟླ་འོད་གཞོན་ནུའི་ཚེ་དགེ་བའི་བཤེས་གཉེན་སྙུག་རུམ་པ་སོགས་ལས་བཀའ་གདམས་དང་། རྣལ་འབྱོར་དབང་ཕྱུག་མི་ལ་ལས་ནཱ་རོའི་ཆོས་དྲུག་ཕྱག་ཆེན་ལ་སོགས་པ་ནོས་ཤིང་ཀློང་དུ་གྱུར་ནས་དཔལ་སྒམ་པོ་པ་ཞེས་པའི་སྙན་གྲགས་ཀྱིས་འཇིག་རྟེན་ཕལ་ཆེར་བཀབ་ཅིང་གྲུབ་ཐོབ་ཀྱི་ས་བོན་བཏབ། དཔལ་ས་སྐྱའི་དཀར་པོ་རྣམ་གསུམ་ལས་རྗེ་བཙུན་གྲགས་པ་རྒྱལ་མཚན་ཞེས་མཁས་པ་དང་གྲུབ་པའི་རྣམ་དཔྱོད་ཀྱིས་གསར་རྙིང་གཉིས་ཀའི་བསྟན་པའི་བདག་པོ་མཛད། ཁ་ཆེ་པཎ་ཆེན་དང་མཇལ་འཛོམ་བཤེས་པར་མཛད་ཅིང་དབོན་པོ་ས་པཎ་གྱི་རྡོ་རྗེ་སློབ་དཔོན་མཛད། ཁྱད་པར་དུ་པཎ་ཆེན་བི་མ་ལ་བོད་ཡུལ་དུ་བྱོན་པ་དཔལ་བསམ་ཡས་པ་ཀུན་མཁྱེན་ངག་གི་དབང་པོར་གྱུར་ནས་འཛམ་བུའི་གླིང་གི་རྒྱན་དྲུག་མཆོག་གཉིས་ཐམས་ཅད་ཀྱི་སྤངས་རྟོགས་གཅིག་ཏུ་སྤུངས་པ་ལྟ་བུ་སྔ་ན་མེད་པའི་བསྟན་པའི་ཆོས་འཁོར་མཛོད་ཆེན་བདུན་དང་ཤིང་རྟ་རྣམ་གསུམ་རྩ་འགྲེལ་སོགས་གསུང་རབ་ཀྱི་སྣང་བས་འཇིག་རྟེན་གྱི་མུན་པ་བསལ་བར་མཛད་ཅིང་ཕྱོགས་རེས་མིག་ཅན་རྣམས་ཐེག་པའི་ཡང་རྩེ་གཤུང་བར་མི་ནུས་པའི་དམ་བཅའ་ལ་བཀོད་ཅིང་། ལྷ་དང་མི་དང་མཁའ་འགྲོའི་འདུ་བ་ལ་ཆོས་ཀྱི་སྒོ་རྒྱ་ཆེན་པོ་བསྟན། མངའ་རིས་གློ་བོ་བ་པདྨ་དབང་རྒྱལ་གྱི་ཚེ་སྟེང་ཁང་སྙིང་མཛོད་ནས་བཀའ་འདུས་ཕྱི་མ་རིག་འཛིན་ཡོངས་འདུས་སྤྱན་དྲངས་ཤིང་། མངའ་བདག་ཉང་གི་བག་ཆགས་སད་པས་བདེ་གཤེགས་བསྒྲུབ་པ་བཀའ་བརྒྱད་ཀྱི་བསྟན་པ་ལ་བྱ་བ་རྒྱ་ཆེན་པོ་དང་། མདོར་ན་གསར་རྙིང་བཀའ་གཏེར་གྱི་ཆོས་ལ་མི་མཁྱེན་བྱ་བ་དང་། ཐུགས་ཉམས་སུ་མ་བཞེས་པ་མེད་པ་ལྟ་བུས་བསྟན་པ་དང་སེམས་ཅན་གྱི་དོན་མཛད། རིན་ཆེན་ཕུན་ཚོགས་ཀྱི་རྡོ་རྗེའི་སློབ་དཔོན་དུ་གྱུར་པའི་རྟེན་འབྲེལ་དེ་ཉིད་ཀྱི་སྲས་ཆོས་རྒྱལ་ཕུན་ཚོགས་སུ་འཁྲུངས་ནས་རང་གི་ཡབ་རྗེ་དང་། རྗེ་བཙུན་པྲཛྙཱའི་ཞབས་ལ་དམ་པའི་བདུད་རྩི་ནོད་ནས། འབྲི་གུང་པའི་ཆོས་སྲིད་ཀྱི་སྡེ་ལ་ཕན་པ་རྒྱ་ཆེན་པོ་བསྒྲུབས། བྱང་བདག་བཀྲ་ཤིས་སྟོབས་རྒྱལ་གྱི་ཚེ་བཀའ་གཏེར་གྱི་གདམས་པའི་གསང་མཛོད་དུ་གྱུར་ཅིང་། ཟབ་མོའི་གཏེར་ཁ་ཕྱེ་ནས་དབུས་གཙང་ཁམས་གསུམ། རྒྱ་ནག་གི་ཡུལ་གྲུའི་ཆ་ལ་ཐུག་པར་ཕྲིན་ལས་རླབས་ཆེན་པོས་རྒྱལ་དབང་པདྨའི་བསྟན་པ་ལ་ཞབས་ཏོག་རྒྱ་ཆེན་པོ་བསྒྲུབས། དེ་ནས་ཀོང་ཡུལ་བདུད་རི་ནག་པོ་བྱ་རོག་སྒྲ་ཅན་གྱི་འདབས་སུ་རིག་འཛིན་འཛམ་གླིང་རྡོ་རྗེར་འཁྲུངས་ཏེ་བདུད་མཚོའི་ཀློང་ནས་ཁྲོམ་གཏེར་སྤྱན་དྲངས་ཤིང་མཐའ་འཁོབ་སྤོ་བོ་ལ་སོགས་པའི་གདུལ་བྱ་རྣམས་ཆོས་ཀྱི་སྣོད་དུ་མཛད། དེ་ནས་ད་རེས་སེམས་ཅན་གྱི་དོན་དུ་སྤྲུལ་པའི་སྐུར་བཟུང་ཚུལ་ནི། ཡུལ་དབུས་གཡོ་རུའི་སའི་ཆ་བཀྲ་ཤིས་སྲོང་བཙན་བང་སོ་དང་ཉེ་བའི་གནས་སུ་རིགས་རུས་ཆོ་འབྲང་གིས་བཙུན་པར་སྐུ་འཁྲུངས། དགུང་ལོ་དྲུག་པ་ནས་བསྟན་པའི་སྒོར་ཞུགས་ཤིང་། ཆུང་ངུ་ནས་ཤེས་རབ་ཀྱི་སྤོབས་པ་དང་སྙིང་རྗེ་ཆེན་པོ་བློ་བཅོས་མིན་དུ་ཤར། སྐྱོ་ཤས་དང་ངེས་འབྱུང་ལྷག་པར་ཆེ་བས་ཉི་ཤུ་རྩ་ལྔ་པ་ནས་སུམ་ཅུ་རྩ་ལྔའི་བར་ཐེམ་མི་འདའ་བའི་དམ་བཅའ་དང་། དབེན་པར་བཅད་རྒྱ་འབའ་ཞིག་མཛད། སྔོན་གྱི་བག་ཆགས་སད་པས་དགེ་བའི་བཤེས་གཉེན་མཁས་པ་བསྟེན་པ་དང་། བསླབ་གཉེར་སོགས་ལ་ཅུང་ཟད་ཀྱང་མ་ལྟོས་པར་མགྲིན་པའི་རྩ་མདུད་གྲོལ་བས་གསུང་རབ་ཀྱི་དོན་བདེ་བླག་ཏུ་མཁྱེན་པའི་རྟོགས་པའི་ཀློང་བརྡོལ། མཆིམས་ཕུར་རྒྱལ་བ་ཀློང་ཆེན་པའི་ཡེ་ཤེས་ཀྱི་སྐུ་དང་མི་དང་མི་འཕྲད་པ་ལྟ་བུས་ལན་གསུམ་མཇལ་ནས་བྱིན་རླབས་རྗེས་གནང་ཐོབ་པས་མདོ་རྒྱུད་ཐམས་ཅད་ལ་སྤོབས་པའི་གཏེར་མཛོད་གྲོལ། མཁའ་འགྲོའི་ཀློང་བྱང་གི་བརྡ་རིས་གཏད་པས་རྫོགས་པ་ཆེན་པོ་ཀློང་ཆེན་སྙིང་ཏིག་དང་། ཡོན་ཏན་མཛོད་རྩ་འགྲེལ་ལ་སོགས་པ་དགོངས་གཏེར་བསྟན་བཅོས་པོད་ཆེན་བཅུ་སྐོར་མཛད། དབུས་གཙང་ཁམས་གསུམ། མོན་ཁ་སྣ་བཞི་ལ་སོགས་པ་ནས་སློབ་མ་སྐད་རིགས་མི་གཅིག་པ་ཅན་རྟག་ཏུ་འདུ་བས་ཆོས་ཀྱི་འཁོར་ལོ་ལ་རྒྱུན་ཆད་མེད། དབང་བཅུ་རྗེས་མཐུན་པ་ཐོབ་པས་སྐུ་ཚེ་རིང་པོར་བཞུགས་ཤིང་ས་སྐྱོང་སྡེ་དགེས་གཙོས་པའི་ཟང་ཟིང་གི་འབུལ་ནོད་གྱ་ནོམ་པ་འབྱོར་ཡང་གནས་མིན་དུ་གོད་ཟགས་མ་མཛད་པར་བཀའ་འགྱུར་ཀློག་པ་དང་། རྙིང་མ་རྒྱུད་འབུམ་ཆ་ཚང་། རྣམ་ཐར་ཤེལ་བྲག་མ་སོགས་ཀྱི་བྲིས་ཐང་སྤུས་དག་དྲུག་ཅུ་སྐོར་བཞེངས་པ། མེས་དབོན་རྣམ་གསུམ་གྱི་གཙུག་ལག་ཁང་ལ་ཁྲི་མཆོད་མང་པོ་དང་མཆོད་རྫས་ཡོ་བྱད་སྣ་ཚོགས་སྦྱར་བ། བསམ་ཡས་སུ་སྟོང་དངུལ་གཉིས་ཙམ་གྱི་རྒྱུ་འགྲོའི་ཆོས་ལོངས་སྤྲུལ་གསུམ་དང་འཁོར་ལོ་རིན་པོ་ཆེ་གསེར་སྲང་བརྒྱ་ལས་གྲུབ་པ་སོགས་ཀྱིས་མཚོན་རྟེན་བཞེངས་མང་པོ་མཛད། སེམས་ཅན་ལ་སྙིང་རྗེ་ཆེན་པོ་རྒྱུན་མི་འཆད་པས་ཕོངས་པ་དང་སྡུག་བསྔལ་བ་ལ་བརྩེ་ཞིང་ཟང་ཟིང་གི་སྦྱིན་པ་དང་། ཕྱུགས་ལུག་སྟོང་ཕྲག་ཏུ་ལྡང་བ་ཉེའུ་འདོན་པ། ལོ་ལྟར་སྦྲང་ཚང་བསླུ་བ་སོགས་སྲོག་ཆགས་དུང་ཕྱུར་མང་པོ་ལ་མི་འཇིགས་པའི་སྐྱབས་སྦྱིན་མཛད། ཆེན་པོར་རློམ་པ་དང་། སྟོབས་འབྱོར་གྱིས་དྲེགས་པ་ཅན་སུ་ལའང་ཅི་མི་སྙམ་པར་བཞུགས་ཀྱང་། གཞན་ལ་ངན་སྨྲས་དང་། ཕྲག་དོག་དང་མཚང་འདྲུ་བའི་ཐུགས་བསམ་ངན་པ་གཏན་ནས་མི་འཆར། གནོད་པ་ཅན་དག་ལའང་འཁོན་འཛིན་མི་མཛད། བོད་གངས་ཅན་ཙམ་ན་ཐམས་ཅད་ཀྱིས་འདྲེན་པར་བཀུར་བ་ས་སྐྱ་པ་ཆེན་པོས་དབུ་བླར་མཛད་ཅིང་། སྐུ་ཞབས་རྒྱལ་བ་ཡབ་སྲས་ཀྱིས་གཙོས་ཀརྨ་པ་དང་། འབྲི་གུང་པ་སོགས་ཀྱིས་དངོས་དང་ཆབ་ཤོག་གི་ལམ་ནས་གཟེངས་བསྟོད་པས་མཚོན་འཇིག་རྟེན་གྱི་ཕྱོགས་ནས་བླ་སྤྲུལ་ཆེ་བར་གྲགས་པ་དང་། གྲྭ་ས་ཆེན་པོ་སེར་འབྲས་དགེ་གསུམ་གྱི་དགེ་བཤེས་གཟུ་བོའི་བློ་ལྡན་རྣམས་ཀྱིས་ཆོས་ཉན་པ་དང་བསྟི་སྟངས་མཛད་ཀྱང་དྲེགས་བསྙེམས་དང་། ཆོས་བརྒྱད་ཀྱིས་གཟི་བྱིན་མི་རྔམ་པར་འཁྲུལ་ཞིག་ཆེན་པོར་བཞུགས་ཤིང་། ཁྱད་པར་དུ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ལ་རང་བྱན་ཚུད་པས་དབུ་སྐྲ་དང་། སེན་མོ་དང་། ཚེམས་ཕྲེང་སོགས་ལ་དད་ཅན་གྱི་གའུར་རིང་བསྲེལ་མངོན་སུམ་དུ་སྐྱེས་ཤིང་འཕེལ་བ་སོགས་འབྲེལ་ཚད་དོན་ལྡན་གྱི་སྐྱེས་བུ་དམ་པ་ཡིན་ལ། དེ་ལྟ་བུ་ལས་བརྒྱུད་པའི་གདམས་པ་འདེབས་པར་བྱེད་པ་ལ་སོགས་མཚམས་སྦྱར་རོ། །སངས་རྒྱས་ཉིད་ཀྱང་རང་བསྟོད་གསུང་པ་ལ། །བསྙེམས་པ་བཏང་ན་ལོག་ཤེས་ཅན་དག་གིས། །མཐོང་ཐོས་བྱུང་དོགས་སྐྲག་པ་སྐྱེས་ན་ཡང་། །ཁམས་བླའི་ཨུ་ཚུགས་མ་ལྡོག་དབང་མེད་དུ། །བྲིས་འདི་བདེན་པ་མ་ཡིན་རྫུན་པའང་མིན། །མོས་པ་ཐོབ་ཚད་བདག་གི་གདུལ་བྱར་ཤོག། །།མངྒ་ལཾ།།