ཞི་ཁྲོ་ངན་སོང་སྦྱོང་བའི་ཆོག་སྒྲིགས་ཁྲོམ་དཀྲུགས་གསལ་བའི་རྒྱན་ཞེས་བྱ་བ་བཀླག་ཆོག་མར་བཀོད་པ།

Previous Text Back to Volume PageNext Text

Wylie title	zhi khro ngan song sbyong ba'i chog sgrigs khrom dkrugs gsal ba'i rgyan zhes bya ba bklag chog mar bkod pa
Location	'jigs gling bka' 'bum Volume 11, Text 25, Pages 407-468 (Folios 1a1 to 31b3)
Author	འཇིགས་མེད་གླིང་པ་
Less details More details
Tertön	འཇིགས་མེད་གླིང་པ་ ('jigs med gling pa)
Citation	'jigs med gling pa. Zhi khro ngan song sbyong ba'i chog sgrigs khrom dkrugs gsal ba'i rgyan zhes bya ba bklag chog mar bkod pa. In Kun mkhyen rig 'dzin 'jigs med gling pa'i gsung 'bum, Vol. 11: 407-468. New Delhi: Shechen Publications, 2025.
Genre	Confessions - bshags pa  ·  Mending Rituals - bskang chog  ·  Ritual and Liturgical Texts - cho ga phyag len
Cycle	ཞི་ཁྲོ་ངན་སོང་སྦྱོང་བ་ (zhi khro ngan song sbyong ba)
Parent Cycle	ཀློང་ཆེན་སྙིང་གི་ཐིག་ལེ་ (klong chen snying gi thig le)
Deity	zhi khro
Colophon	ཅེས་པའང་རང་བྱུང་རྡོ་རྗེས་སོཿ
	ces pa'ang rang byung rdo rjes so:

Tibetan Text

[edit]

༄༅། །ཞི་ཁྲོ་ངན་སོང་སྦྱོང་བའི་ཆོག་སྒྲིགས་ཁྲོམ་དཀྲུགས་གསལ་བའི་རྒྱན་ཞེས་བྱ་བ་བཀླག་ཆོག་མར་བཀོད་པ་བཞུགས།

༄༅། །བཅོམ་ལྡན་འདས་རྒྱལ་བ་ཞི་ཁྲོའི་ལྷ་ཚོགས་ལ་ཕྱག་འཚལ་ལོ། །བཀའ་གཏེར་ཟུང་དུ་འཇུག་པའི་ཞི་ཁྲོའི་སྐོང་བཤགས་འདི་ལ་སྔོན་འགྲོ་དངོས་གཞི། རྗེས་གསུམ་གྱི། དང་པོ་ལའང་བཞི་ལས། དང་པོ་ཕྱི་རོལ་པ་བསྐྲད་པ་ནི། སྔོན་གཏོར་ཨ་ཀཱ་རོས་བརླབས་ལ། ཧཱུྃ། ཉོན་ཅིག་བགེགས་དང་ལོག་འདྲེན་ཚོགས། །ལུས་ངག་ཡིད་ལ་གནོད་པའི་བགེགས། །བར་ཆད་འབྱུང་པོ་ཐམས་ཅད་ཀུན། །འདི་རུ་མ་འདུག་གཞན་དུ་དེངས། །ང་ནི་དཔལ་ཆེན་རྟ་མགྲིན་རྒྱལ། །རྡོ་རྗེ་འཛིན་བྱེད་འབར་བའི་སྐུ། །ང་ཡི་བཀའ་ལས་འདས་གྱུར་ན། །ཐལ་བའི་རྡུལ་བཞིན་བརླག་པར་འགྱུར། །ཨོཾ་ཤྲཱི་བཛྲ་ཧྱ་གྷྲི་ཝ་རཱ་ཙ་ཧྲི་ཡ་ཧ་རི་ནི་ས་རཀྵ་ཨུ་ཙ་ཏ་ཡ་ཕཊཿ བགེགས་རྣམས་རྒྱ་མཚོའི་ཕ་མཐར་བྱེར་ནས་ཡེ་ཤེས་ཀྱི་མེ་དཔུང་གཅིག་ཏུ་འབར་བར་གྱུར། གཉིས་པ་མཆོད་རྫས་རྣམས་ལ་བསང་ཆུས་འཐོར་ཞིང་། ཨོཾ་བཛྲ་ཀྲོ་དྷ་ཧྱ་གྷྲྀ་ཝ་ཧུ་ལུ་ཧུ་ལུ་ཧཱུྃ་ཕཊཿ ཨརྒྷཾ་ པཱ་དྱཾ་ པུཥྤེ་ དྷུ་པེ་ ཨཱ་ལོ་ཀེ་ གྷནྡྷེ་ ནཻ་ཝི་དྱཱ་ ཤབྟ་ཨོཾ་ཨཱཿཧཱུྃ། ཡོངས་སུ་གྱུར་པ་ལས་ཕྱི་ནང་གི་མཆོད་པ་རྣམས་དངས་ཤིང་ཐོགས་པ་མེད་པ་ས་དང་བར་སྣང་ཀུན་ཏུ་བཟང་པོའི་མཆོད་སྤྲིན་གྱིས་གང་བར་གྱུར། སྨན་གཏོར་རཀྟའི་སྔགས་ཀྱང་བརྗོད། གསུམ་པ་སྐྱབས་འགྲོ་ནི། ཕ་མས་ཐོག་དྲངས་པའི་སེམས་ཅན་ཐམས་ཅད་བླ་མ་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །བཅོམ་ལྡན་འདས་རྒྱལ་བ་ཞི་ཁྲོ་རབ་འབྱམས་ཀྱི་ལྷ་ཚོགས་འཁོར་དང་བཅས་པ་རྣམས་ལ་སྐྱབས་སུ་མཆིའོ། །བཞི་པ་སེམས་བསྐྱེད་ནི། ཆོས་ཐམས་ཅད་སྟོང་ཞིང་བདག་མེད་པ་ཡིན་པ་ལ། དེ་ལྟར་མ་རྟོགས་པའི་སེམས་ཅན་ཐམས་ཅད་སྙིང་རེ་རྗེ། དེ་ཐམས་ཅད་རྫོགས་པའི་སངས་རྒྱས་ཀྱི་ས་ལ་འགོད་པར་བྱ། དེའི་ཆེད་དུ་བཅོམ་ལྡན་འདས་ཞི་ཁྲོ་རབ་འབྱམས་ཀྱི་དཀྱིལ་འཁོར་ཆེན་པོ་སྒོམ། ལན་གསུམ། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ཕྲད་པར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །དགའ་བ་ཆེན་པོ་དེ་དང་དུས་རྟག་ཏུ་མི་འབྲལ་བར་གྱུར་ཅིག །བདེ་སྡུག་གི་རྒྱུ་ཉེ་རིང་ཆགས་སྡང་དང་བྲལ་བའི་བཏང་སྙོམས་ཆེན་པོ་ལ་གནས་པར་གྱུར་ཅིག །ལན་གསུམ། གཉིས་པ་དངོས་གཞི་ལ་བདག་མདུན་གཉིས་ལས། དང་པོ་བདག་བསྐྱེད་ནི། ཨོཾ་མ་ཧཱ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་སྟོང་ཞིང་བདག་མེད་པ་མཐའ་དབུས་ལས་འདས་པའི་དག་ཆེན་ཡེ་ཤེས་ཀྱི་ཀློང་ཆེན་པོར་འོག་མིན་ལྷུན་གྱིས་གྲུབ་པའི་གཞལ་མེད་ཁང་ཤིན་ཏུ་ཉམས་དགའ་བ་ཕྱི་མཆོད་རྟེན་གྱི་རང་བཞིན་རྩེ་ལྔ་པ་ནང་རང་བྱུང་རྡོ་རྗེའི་གཞལ་ཡས་ཁང་། མནན་ན་ནེམ་ཞིང་། བཏེག་ན་འཕར་བ། ཕྱི་གསལ་ནང་གསལ། ཡེ་ཤེས་རིན་པོ་ཆེའི་ངོ་བོ་ལས་གྲུབ་པ། རྒྱ་ཁྱོན་དང་བཀོད་པ་བསམ་གྱིས་མི་ཁྱབ་པའི་མཐའ་བསྐོར་དུ་མཆོད་རྟེན་ཤིང་མེ་ཆུ་སྤྲིན་གྲུབ་པའི་རིག་འཛིན་ཞིང་སྐྱོང་གི་མཁའ་འགྲོ་མ་ལ་སོགས་པ་རྣམ་པ་བརྒྱད་ཀྱིས་མཚན་པའི་དུར་ཁྲོད་ཆེན་པོ་བརྒྱད་ཀྱི་རང་བཞིན་འཇིགས་སུ་རུང་ཞིང་སྐྱི་གཡའ་བ། དེའི་མཐའ་བསྐོར་རྡོ་རྗེའི་རྭ་བ་དང་ཡེ་ཤེས་ཀྱི་མེ་དཔུང་ཆེན་པོ་འཁྲིགས་པའི་གཞལ་མེད་ཁང་ཆེན་པོ་དེའི་དབུས་སུ། རང་བཞིན་གཞིའི་ཀུན་ཏུ་བཟང་པོ་སྐུ་མདོག་མཐིང་ཁ་ཡབ་ཡུམ་མཉམ་སྦྱོར་རྡོ་རྗེ་སྐྱིལ་ཀྲུང་མཉམ་གཞག་གིས་མཚན་པའི་ཐུགས་ཡེ་ཤེས་ཆེན་པོའི་ཀློང་དུ། མི་འཇིགས་སེང་གེའི་ཁྲི་སྟེང་པད་ཟླའི་གདན་ལ་བཅོམ་ལྡན་འདས་ཀུན་རིག་རྣམ་པར་སྣང་མཛད་སྐུ་མདོག་དཀར་པོ། ཞལ་བཞིའི་རྩ་ཞལ་དཀར་པོ། གཡས་ཞལ་སེར་བ། གཡོན་ཞལ་དམར་བ། རྒྱབ་ཞལ་ལྗང་ཁུ། འཁོར་ལོ་འཛིན་པའི་ཕྱག་གཉིས་མཉམ་པར་བཞག་ཅིང་སྐྱིལ་ཀྲུང་དུ་བཞུགས་པའི་ཤར་དུ་གླང་པོ་ཆེ། ལྷོར་རྟ་མཆོག །ནུབ་ཏུ་རྨ་བྱ། བྱང་དུ་ཤང་ཤང་གི་ཁྲི་སྟེགས་རྣམས་སུ་པདྨ་དང་ཟླ་བའི་དབུས་སུ་དེ་བཞིན་གཤེགས་པ་རིགས་བཞི་ཞལ་གཅིག་ཕྱག་གཉིས་གཡས་སོ་སོའི་རིགས་ཀྱིས་ཡུ་བ་བྱས་པའི་རྡོ་རྗེ་དང་། གཡོན་རྣམས་དྲིལ་བུ་འཛིན་པ། ལྔ་ཀའང་དར་དང་རིན་པོ་ཆེའི་རྒྱན་གྱིས་མཛེས་ཤིང་གྲི་ཐོད་འཛིན་པའི་རང་འོད་ཀྱི་ཡུམ་དང་འཁྲིལ་བ། དེ་དག་གི་ཕྱི་ནང་གི་གྲྭ་ཟུར་བཞིར་ནམ་མཁའི་སྙིང་པོ་ལ་སོགས་པ་ཕྱི་ནང་གི་སེམས་དཔའ་བརྒྱད་ལ་རྡོ་རྗེ་སྒེག་མོ་མ་ལ་སོགས་པའི་ཕྱི་ནང་གི་སེམས་མ་བརྒྱད་ཀྱིས་འཁྲིལ་བ་ཀུན་ཀྱང་སེམས་དཔའི་སྐྱིལ་མོ་ཀྲུང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པའོ། །དེ་དག་གི་ཐུགས་རྗེའི་རྩལ་ལས་ཕྱོག་པ་བཞིའི་སྣམ་བུ་དང་སྟེང་འོག་གཉིས་སུ་ཐག་བཟངས་རིས་ལ་སོགས་པའི་སྤྲུལ་སྐུ་ཐུབ་པ་དྲུག་འགྲོ་བའི་དོན་ལ་གཤེགས་པའི་བརྡར་འགྲེང་བུར་བཞུགས་པ། སྒོ་བཞིར་སྒོ་བ་ཡབ་ཡུམ་རྣམས་ཁྲོ་བོ་ཆེན་པོའི་སྟངས་སྟབས་ཀྱིས་རོལ་ཞིང་མེ་དཔུང་འབར་བའི་ཀློང་ན་བཞུགས་པའོ། །དེ་དག་གི་སྐུའི་གསལ་སྣང་ལས་སྟེང་གི་ཆར་ཡེ་ཤེས་བསྐལ་པའི་མེ་དཔུང་རབ་ཏུ་འཁྲུགས་པའི་ཀློང་ན་ཁྲག་འཐུང་ལྔ་བཅུ་རྩ་བརྒྱད་ཀྱི་ཚོམ་བུའི་དཀྱིལ་འཁོར་ཤིན་ཏུ་འཇིགས་སུ་རུང་བ། ཐམས་ཅད་ཀྱང་སྐུ་མདོག་དང་ཕྱག་མཚན་གཅིག་ཏུ་མ་ངེས་ཤིང་སྣང་ལ་རང་བཞིན་མེད་པ་མེ་ལོང་གི་གཟུགས་བརྙན་ལྟར་སྐད་ཅིག་དྲན་རྫོགས་སུ་གསལ་བར་གྱུར། ཅེས་པས་གསལ་གདབ་བོ། །གལ་ཏེ་སློབ་མ་རྗེས་འཛིན་ནམ། ཚེ་འདས་ཀྱི་སྦྱོང་བ་ལ་སོགས་པའི་དོན་དུ་ཡིན་ན་དབང་དོན་བུམ་པའི་དཀྱིལ་འཁོར་སྤྲུལ་པའང་ཆོ་ག་གཅིག་པོ་དེའི་སྒྲོམ་ནས་བསྐྱེད་པའི་ཚུལ་ཁོང་དུ་ཆུད་པར་བྱའོ། །གཉིས་པ་ཚོགས་བསག་པའི་སླད་དུ་མདུན་བསྐྱེད་བསྒྲུབ་པ་ལ་སྦྱོར་བ་སེམས་བསྐྱེད་དང་། དངོས་གཞིའི་རིམ་པ་གཉིས་ལས། དང་པོ་ལ་ཀུན་རྫོབ་པ་ནི། བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་མོད་ཀྱང་། །རྟོག་པའི་དབང་གིས་འཁོར་བ་ལས། །བྱང་ཆུབ་མཆོག་ཏུ་སེམས་བསྐྱེད་དོ། །དོན་དམ་ནི། ཨེ་མ་འོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །ཨེ་མ་འོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགག་པ་མེད་ལས་ཐམས་ཅད་འགགས། །འགགས་པ་ཉིད་ན་འགགས་པ་མེད། །ཨེ་མ་འོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །གནས་པ་མེད་ལས་ཐམས་ཅད་གནས། །གནས་པ་ཉིད་ན་གནས་པ་མེད། །ཨེ་མ་འོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །དམིགས་པ་མེད་ལས་ཐམས་ཅད་དམིགས། །དམིགས་པ་ཉིད་ན་དམིགས་པ་མེད། ཨེ་མ་འོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགྲོ་འོང་མེད་ལས་འགྲོ་དང་འོང་། །འགྲོ་འོང་ཉིད་ན་འགྲོ་འོང་མེད། །གཉིས་པ་ལ་ཏིང་འཛིན་རྣམ་གསུམ། རྟེན་གཞལ་ཡས། བརྟེན་པ་ལྷ་བསྒོམ་པ། ཚོགས་བསག་པ་དང་བཞིའི། དང་པོ་ལའང་གསུམ་ལས། དེ་བཞིན་ཉིད་ནི། དངོས་རྣམས་ཉིད་ན་དངོས་མེད་པ། །རྟོག་པའི་སྨྲ་བསམ་ཡུལ་ལས་འདས། །དེ་བཞིན་ཉིད་དབྱིངས་ཡེ་ཤེས་ཏེ། །དེ་ཕྱིར་དངོས་པོ་མེད་པའོ། །ཀུན་སྣང་ནི། དེ་བཞིན་ཉིད་ནི་སྤྲོས་མེད་ཀྱང་། །རང་བཞིན་ཀུན་ཏུ་སྣང་བའི་དབྱིངས། །སེམས་ཅན་ཀུན་ལ་སྙིང་བརྩེའི་ཕྱིར། །ནམ་མཁའ་ལ་ནི་ནམ་མཁའ་བསྒོམ། །རྒྱུའི་ཏིང་འཛིན་ནི། དངོས་པོ་མེད་ལས་དངོས་པོའི་སྤྲིན། །སྣ་ཚོགས་རྣམ་པར་འབྱུང་ཞིང་འགྱུར། །གཞི་རྩ་མེད་པའི་སེམས་ཉིད་ནི། །ཆོས་རྣམས་ཀུན་གྱི་རྩ་བ་ཡིན། །སེམས་ཉིད་ཡི་གེའི་རང་བཞིན་ཏེ། །ཡི་གི་ཡིད་བཞིན་རིན་ཆེན་སྤྲིན། །ཡི་གེ་མཆོག་ནི་བསྒོམ་པར་བྱ། །གཉིས་པ་རྟེན་གཞལ་ཡས་ཁང་བསྒོམ་པ་ནི། སེམས་ཉིད་ཨ་དཀར་པོ་དྲི་མ་མེད་པར་གསལ་བ་ལས། ཨེ་ཡཾ་ཝཾ་ལཾ་སུཾ་རཾ་རྣམས་ཆད། སྥ་ར་ཎ་ཕཊཿ སཾ་ཧ་ར་ཎ་ཧཱུྃ། འཕྲོས་འདུས་ཡོངས་སུ་གྱུར་པ་ལས། །ནམ་མཁའ་ཡིད་ཀྱི་ནམ་མཁའ་ལ། །འབྱུང་ཆེན་བརྩེགས་པར་ལྷུན་གྱིས་གྲུབ། །དེ་སྟེང་རིན་ཆེན་སྣ་བཞི་ལས། །ལྷུན་གྱིས་གྲུབ་པ་ཚད་དཔག་མེད། །དེ་ལ་བརྟེན་པའི་ས་གཞི་ནི། །རིན་ཆེན་སྣ་ཚོགས་གཅལ་དུ་བཀྲམ། །མནན་ནེམ་བཏེག་འཕར་མཛེས་པའི་གཞི། །དེ་ལ་ཕོ་བྲང་གཞལ་ཡས་ཁང་། །གྲུ་བཞི་ལྷམ་པ་མཛེས་པར་སྣང་། །རིན་ཆེན་སྣ་བཞིའི་རྒྱུ་ལས་གྲུབ། །གློ་འབུར་བཞི་ཡང་འཁར་ཐབས་ཚུལ། །རིན་ཆེན་བཞི་ལས་གྲུབ་པའོ། །བུམ་པའི་རྩེ་མོ་ཆོས་ཀྱི་ཏོག །རྨ་བྱའི་མདོངས་ལྟར་བཀྲ་བའོ། །སྒོ་བཞི་སྒོ་ཁྱུད་རྣམས་ཀྱིས་བརྒྱན། །རྟ་བབས་བརྒྱད་དང་ཡང་དག་ལྡན། །དབུས་ན་འཁོར་ལོ་རྩིབས་བཞི་པ། །ལྟེ་བར་བཅས་ཤིང་རྩིབས་རྟེན་ལྡན། །གྲུ་ཆད་བར་ཁྱམས་མཛེས་པར་འབར། །རིན་ཆེན་འོད་ཟེར་འབར་བས་འཁྱིལ། །སེམས་ཅན་པདྨ་ཉི་ཟླ་དང་། །རིན་ཆེན་འབར་བའི་གདན་མཆོག་དང་། །རིན་ཆེན་ཁྲི་རྐང་རྣམ་བརྟེན་མཛེས། །ཕོ་བྲང་དེ་ཡི་རྒྱན་མཆོག་ཀྱང་། །ཉི་ཟླ་ནོར་བུ་རིན་ཆེན་འབར། །བླ་རེ་རྒྱལ་མཚན་ན་བཟའ་གདུགས། །དར་དང་དོ་ཤལ་མུ་ཏིག་ཕྲེང་། །དྲིལ་བུ་དང་ནི་རྔ་ཡབ་ཚོགས། །རོལ་མོའི་ཆ་བྱད་སྣ་ཚོགས་བརྒྱན། །འཇིག་རྟེན་ལྷ་ཚོགས་མཛེས་པ་དང་། །དེ་ལ་སོགས་ཏེ་རྒྱན་རྣམས་དང་། །བསམ་གྱིས་མི་ཁྱབ་མཐའ་ཡས་མཆོག །གཞལ་ཡས་དེ་ཡི་སྒོ་བཞི་ན། །གླང་ཆེན་རྣམས་ཀྱིས་མཛེས་པར་བྱས། །རྟ་བབས་རྣམས་ཀྱིས་ཙོང་ཙོང་ལ། །གསེར་གྱི་དྲིལ་བུ་འབར་བ་དང་། །དཀོན་མཆོག་གསུམ་གྱི་མཚན་ཡང་སྒྲོག །སྒོ་དྲུང་དེ་དག་རེ་རེ་ན། །ཏཱ་ལའི་སྐྱེ་ཤིང་ཙོང་ཙོང་བྲེས། །དྲི་དང་གཟུགས་དང་འོད་དུ་ལྡན། །ཏཱ་ལའི་སྐྱེ་ཤིང་དེ་དག་ལ། །ཁུ་བྱུག་ལ་སོགས་བཀྲ་ཤིས་པའི། །བྱ་རྣམས་སྙན་པའི་སྐད་ཀྱང་སྒྲོག །སྒོ་དྲུང་དེ་དག་རེ་རེ་ན། །ཁྲུས་ཀྱི་རྫིང་བུ་དབྱིབས་ལེགས་པ། །བྲོ་མཆོག་ཡན་ལག་བརྒྱད་ལྡན་ཆུ། །གྲངས་མེད་དེ་དག་རེ་རེ་ན། །ལྷ་དང་ལྷ་མོ་བསམ་མི་ཁྱབ། །ཕྱི་རོལ་ཁོ་ར་ཁོར་ཡུག་ན། །རྩེ་ས་འཆགས་ས་བརྗོད་མི་ལོང་། །དེ་ལ་སོགས་ཏེ་བསམ་ཡས་མཆོག །མ་བཙལ་ཡེ་ནས་ལྷུན་གྱིས་གྲུབ། །དེ་ལྟའི་གཞལ་མེད་ཁང་ཆེན་དབུས། །སེང་གེ་བརྒྱད་ཀྱིས་རྣམ་བཏེག་ཅིང་། །ཤར་ལྷོ་ནུབ་བྱང་གླང་ཆེན་རྟ། །ཁྱུང་དང་མཁའ་ལྡིང་གིས་བཏེག་པའི། །རིན་ཆེན་ཁྲི་རྐང་མཛེས་པའི་སྟེང་། པཾ་པདྨ་མཎྜ་ལ། མ་སཱུརྱ་མཎྜ་ལ། ཨ་ཙཎྜ་མཎྜ་ལ། གཙོ་བོ་ལྔ་ལ་ལྔ་བརྩེགས་གདན། །བྱ་བྱེད་གཉིས་ལ་བཞི་བརྩེགས་དང་། །སེམས་དཔའ་སུམ་བརྩེགས་ཉི་རྐྱང་སྒོ། །ཐུབ་པ་དྲུག་ལ་པད་རྐྱང་ངོ་། །གསུམ་པ་བརྟེན་པ་ལྷའི་འཁོར་ལོ་སྒྲུབ་པའི་རིམ་པ་བཅུ་གསུམ་ལས། དང་པོ་མངོན་རྟོགས་སྒོམ་པ་ནི། རང་གི་སེམས་ཉིད་ཨ་དཀར་པོ་དྲི་མ་མེད་པ་ལས་རིགས་བརྒྱའི་རང་བཞིན་ཡི་གེའི་སྤྲིན་བྱུང་ནས་མདུན་བསྐྱེད་ཀྱི་གཙོ་བོའི་གནས་པདྨའི་ལྟེ་བ་ལ་ཡིག་འབྲུ་དང་པོ་གཉིས་གནས་ཤིང་། དེའི་ཕྱི་རོལ་ནས་པདྨ་འདབ་བཞི། འདབ་བརྒྱད། བཅུ་དྲུག །སུམ་ཅུ་རྩ་གཉིས། བཞི་བཅུ་པ་རྣམས་ལ་ཤར་ནས་རིམ་པས་གཡས་བསྐོར་གྱིས། ཨོཾ། བ། ཛྲ། ས། ཏྭ། ས། མ། ཡ། མ། ནུ། པཱ། ལ། ཡ། བ། ཛྲ། ས། ཏྭ། ཏྭེ། ནོ། པ། ཏིཥ། ཋ། དྲྀ། ཌྷོ། མེ། བྷ། ཝ། སུ། པོ། ཥྱོ། མེ། བྷ། ཝ། ཨ། ནུ། རཀ། ཏོ། མེ། བྷ། ཝ། སར། བ། སིད། དྷི། མྨེ། པྲ། ཡཙ། ཚ། སར། བ། ཀར། མ། སུ། ཙ། མེ། ཙིཏ། ཏཾ། ཤྲེ། ཡ། ཀུ། རུ། ཧཱུྃ། ཧ། ཧ། ཧ། ཧ། ཧོ། བྷ། ག། ཝཱན། སར། བ། ཏ། ཐཱ། ག། ཏ། བ། ཛྲ། མཱ། མེ། མུན། ཙ། བ། ཛྲཱི། བྷ། ཝ། མ། ཧཱ། ས། མ། ཡ། ས། ཏྭ། ཨཱ། ཧཱུྃ། ཕཊ། ཅེས་མུ་ཏིག་གི་ཕྲེང་བ་ལྟ་བུར་གསལ་བར་གྱུར་པ་ལ། ཨ་ཞེས་བརྗོད་པས་གཞིའི་ཨ་དེ་འོད་དུ་ཞུ་ནས་ཡིག་འབྲུ་རྣམས་ལ་ཁྱབ་པར་ཐིམ་པས་ཤིན་ཏུ་གསལ་ཞིང་འབར་བར་གྱུར། སྥ་ར་ཎ་ཕཊ། ཡིག་འབྲུ་རྣམས་ལས་འོད་ཟེར་འཕྲོས་སངས་རྒྱས་ཀྱི་མཛད་པ་བསྒྲུབས། སཾ་ཧ་ར་ཎ་ཧཱུྃ། སླར་འདུས་ནས་ཡིག་འབྲུ་རྣམས་ལ་ཐིམ་པ་འོད་དུ་ཞུ་བ་ལས་ཞི་ཁྲོ་རིགས་བརྒྱའི་དཀྱིལ་འཁོར་གྱི་འཁོར་ལོར་གྱུར་པ་ནི། ཧཱུྃ་བཛྲ་སཏྭ། རང་ཉིད་དཀྱིལ་འཁོར་གྱི་དབུས་སུ་བཅོམ་ལྡན་འདས་དཔལ་རྡོ་རྗེ་སེམས་དཔའ་སྐུ་མདོག་མཐིང་ག་མཐིང་དཀར་དམར་བའི་ཞལ་གསུམ་ཕྱག་དྲུག་གི་གཡས་དང་པོ་རྡོ་རྗེ་ཐུགས་ཀར་འཛིན་ཅིང་། གཡོན་དང་པོ་དྲིལ་བུ་དཀུར་བརྟེན་པས་ཡུམ་ལ་འཁྱུད་པ། བར་པ་གཉིས་འཁོར་ལོ་དང་རིན་པོ་ཆེ། ཐ་མ་གཉིས་ཀྱིས་པདྨ་དང་རལ་གྲི་འཛིན་པ། དབུ་སྐྲ་རལ་པའི་ཐོར་ཚུགས་ཅན། ཞབས་གཉིས་རྫོགས་པའི་སྐྱིལ་མོ་ཀྲུང་གིས་བཞུགས་པའོ། །མཱུཾ་དྷཱ་ཏྭེ་ཤྭ་རཱི། ཡབ་ཀྱི་གཡོན་ཕྱོགས་ཉེ་བའི་འཕང་དུ་ཡུམ་རྡོ་རྗེ་དབྱིངས་ཕྱུག་མ་སྔོན་མོ་ཕྱག་གཡས་དྲིལ་བུ་འཛིན་པས་ཡབ་ལ་འཁྱུད་ཅིང་གཡོན་རྡོ་རྗེ་ཐུགས་ཀར་འཛིན་པ། བརྟུལ་ཞུགས་ཀྱི་སྐྱིལ་མོ་ཀྲུང་གིས་འཁྲིལ་བ། གཉིས་ཀའང་ལྷ་རྫས་ཀྱི་དར་དཀར་པོ་གསེར་གྱི་ངང་རིས་ཅན་གྱི་སྟོད་གཡོགས་དང་། ཚི་གུའི་སྨད་དཀྲིས། ཁ་དོག་སྣ་ཚོགས་པའི་ཅོད་པན་ཟི་ལྡིར། གར་གྱི་ཕུ་དུང་སྟེ་དར་གྱི་ཆས་གོས་ལྔ་དང་། རིན་པོ་ཆེའི་དབུ་རྒྱན། སྙན་ཆ། མགུལ་རྒྱན། སེ་མོ་དོ། དོ་ཤལ། སྐ་རགས། ཕྱག་ཞབས་ཀྱི་གདུ་བུ་སྟེ་རིན་པོ་ཆེའི་རྒྱན་བརྒྱད་ཀྱིས་མཛེས་པར་སྤྲས་པ། མཉེན་ལྕུག་འཁྲིལ་ལྡེམ་གཞོན་ཚུལ་ཅན། གསལ་འཚེར་ལྷུན་སྡུག་གཟི་བྱིན་ལྡན་པ་སྟེ་ཞི་བའི་ཉམས་དགུས་བརྒྱན་པ། སངས་རྒྱས་ཀྱི་སྤྲིན་ཕུང་མཐའ་ཡས་པར་འཆར་པའི་འོད་ཟེར་ཁ་དོག་དྲུག་གི་སྣང་བ་རེ་རེ་ཡང་བྱེ་བ་ཕྲག་དྲུག་དྲུག་ཏུ་འཕྲོ་ཞིང་འབར་བའི་ཀློང་ན་བདེ་སྟོང་གཉིས་སུ་མེད་པའི་ངོ་བོར་བཞུགས་པའོ། །དེའི་ཕྱི་རོལ་གྱི་འདབ་མ་བཞི་ལ། ཧཱུྃ་བཛྲ་དྷྲིཀ ཤར་དུ་མི་བསྐྱོད་པ་སྔོན་པོ་གཡས་རྡོ་རྗེ་ཐུགས་ཀར་འཛིན་ཅིང་། གཡོན་དྲིལ་བུ་དཀུར་བརྟེན་པ། མུཾ་དྷཱ་ཏྭེ་ཤྭ་རཱི། ལྷོར་རྡོ་རྗེ་དབྱིངས་ཀྱི་དབང་ཕྱུག་མ་སྔོན་མོ་གཡས་དྲིལ་བུ་དཀུར་བརྟེན་ཅིང་གཡོན་རྡོ་རྗེ་ཐུགས་ཀར་འཛིན་པ། ཧཱུྃ་ཧཱུྃ་ཧཱུྃ་བཛྲ་ཙིཏྟ་ཨོཾ། ནུབ་ཏུ་ཀུན་ཏུ་བཟང་པོ་མཐིང་ག་མཉམ་གཞག་གི་ཕྱག་རྒྱ་ཅན། ཨ་ཨ་ཨ་བཛྲི་བྷ་དྲ་ས་མནྟ་ཨཾ། བྱང་དུ་ཀུན་ཏུ་བཟང་མོ་མཐིང་ག་ཐལ་མོ་ཐུགས་ཀར་སྦྱར་བའོ། །དེའི་ཕྱི་རོལ་གྱི་འདབ་མ་བརྒྱད་ལ་ཤར་ནས་རིམ་པ་བཞིན། ཨོཾ་ཛི་ན་ཛིཀ །རྣམ་སྣང་དཀར་པོ་གཡས་འཁོར་ལོ་ཐུགས་ཀར་འཛིན་ཅིང་གཡོན་དྲིལ་བུ་དཀུར་བརྟེན་པ། ལྭཾ་དེ་ཥ་ར་ཏི། སྤྱན་མ་དཀར་མོ་གཡས་དྲིལ་བུ་དཀུར་བརྟེན་ཅིང་། གཡོན་འཁོར་ལོ་ཐུགས་ཀར་འཛིན་པ། སྭཱཾ་རཏྣ་དྷྲིཀ །རིན་འབྱུང་སེར་པོ་གཡས་རིན་པོ་ཆེ་ཐུགས་ཀར་འཛིན་ཅིང་གཡོན་དྲིལ་བུ་དཀུར་བརྟེན་པ། མྭཾ་མོ་ཧ་ར་ཏི། མཱ་མ་ཀཱི་སེར་མོ་གཡས་དྲིལ་བུ་དཀུར་བརྟེན་ཅིང་། གཡོན་རིན་པོ་ཆེ་ཐུགས་ཀར་འཛིན་པ། ཨཱཾ་ཨ་རོ་ལྀ་ཀ །སྣང་མཐའ་དམར་པོ་གཡས་པདྨ་ཐུགས་ཀར་འཛིན་ཅིང་གཡོན་དྲིལ་བུ་དཀུར་བརྟེན་པ། པཱཾ་རཱ་ག་ར་ཏི། གོས་དཀར་མོ་དམར་མོ་གཡས་དྲིལ་བུ་དཀུར་བརྟེན་ཅིང་། གཡོན་པདྨ་ཐུགས་ཀར་འཛིན་པ། ཧཱཾ་པྲ་ཛྙཱ་དྷི་ཀ །དོན་གྲུབ་ལྗང་གུ་གཡས་རྒྱ་གྲམ་ཐུགས་ཀར་འཛིན་ཅིང་། གཡོན་དྲིལ་བུ་དཀུར་བརྟེན་པ། ཏཱཾ་བཛྲ་ར་ཏི། དམ་ཚིག་སྒྲོལ་མ་ལྗང་གུ་གཡས་དྲིལ་བུ་དཀུར་བརྟེན་ཅིང་། གཡོན་རྒྱ་གྲམ་ཐུགས་ཀར་འཛིན་པ། རིགས་ལྔ་ཡབ་རྣམས་རྫོགས་པའི་སྐྱིལ་མོ་ཀྲུང་དང་། ཡུམ་རྣམས་བརྟུལ་ཞུགས་ཀྱི་སྐྱིལ་མོ་ཀྲུང་ཀུན་ཏུ་བཟང་པོ་རྡོ་རྗེའི་སྐྱིལ་ཀྲུང་དང་བཟང་མོ་པདྨའི་སྐྱིལ་ཀྲུང་གིས་བཞུགས་པ། ཐམས་ཅད་ཀྱང་རྒྱན་དང་ཆ་ལུགས་གཙོ་བོ་དང་མཚུངས་པའོ། །དེའི་ཕྱི་རོལ་གྱི་འདབ་མ་བཅུ་དྲུག་ལ། ཀྵིཾ་ཧི་རཱ་ཛ་ཡ། ས་སྙིང་དཀར་པོ་གཡས་རིན་པོ་ཆེའི་མྱུ་གུ་དང་། གཡོན་དྲིལ་བུ་འཛིན་པ། ཧཱུྃ་ལཱ་སྱེ་ས་མ་ཡ་སྟྭཾ། སྒེག་མོ་དཀར་མོ་ཁུ་ཚུར་གྱི་རྒྱས་མེ་ལོང་བསྣམས་པ། ཏྲཱཾ་ཨཱ་གརྦྷ་ཡ། ནམ་སྙིང་སེར་པོ་གཡས་རལ་གྲི་དང་གཡོན་དྲིལ་བུ་འཛིན་པ། ཏྲཱཾ་མཱ་ལྱེ་ས་མ་ཡ་ཧོ། ཕྲེང་བ་མ་སེར་མོ་རིན་པོ་ཆེའི་ཕྲེང་བ་བསྣམས་པ། ཧྲཱིཿཧཱ་ཧཱུྃ་པདྨ་པྲ་དམ། སྤྱན་རས་གཟིགས་དམར་པོ་གཡས་པདྨ་དང་གཡོན་དྲིལ་བུ་འཛིན་པ། ཧྲཱིཾ་གཱི་ཏི་རཱ་གོ྅་ཧཾ། གླུ་མ་དམར་མོ་པི་ཝཾ་བསྣམས་པ། ཛྲིཾ་ཀུ་རུ་པཱ་ཎི། ཕྱག་རྡོར་མཐིང་ག་གཡས་རྒྱ་གྲམ་དང་གཡོན་དྲིལ་བུ་འཛིན་པ། ཨཱཾ་ནིརྟི་རཱ་ག་ཡ་མེ། གར་མ་ལྗང་གུ་གར་རྒྱ་མཛད་པ། མཻ་དྷཱ་ར་ནི་སྭཱ་ཧཱ། བྱམས་པ་དཀར་སེར་གཡས་ཀླུ་ཤིང་དང་གཡོན་དྲིལ་བུ་འཛིན་པ། ཛཿདྷུ་པེ་པྲ་བེ་ཤ །སྤོས་མ་དཀར་སེར་སྤོས་ཁང་བསྣམས་པ། ཐིཾལྷ་ནིསྶ་རཾ་བྷ་ཡ་སྭཱ་ཧཱ། སྒྲིབ་སེལ་དམར་སེར་གཡས་གླེགས་བམ་དང་གཡོན་དྲིལ་བུ་འཛིན་པ། ཧཱུྃ་པུཥྤེ་ཨཱ་བེ་ཤ། མེ་ཏོག་མ་དམར་སེར་མེ་ཏོག་གི་ཕྲེང་བ་བསྣམས་པ། ཧཱུྃ་སྭཱ་རཱ་ཛ་ཡ་སྭཱ་ཧཱ། ཀུན་བཟང་དམར་ལྗང་གཡས་རིན་པོ་ཆེའི་སྙེ་མ་དང་གཡོན་དྲིལ་བུ་འཛིན་པ། བཾ་དཱི་པ་སུ་ཀི་རཱི། མར་མེ་མ་དམར་ལྗང་མར་མེ་བསྣམས་པ། མཱུཾ་ཤྲཱི་ཨཾ་རཱ་ག་སྭཱ་ཧཱ། འཇམ་དཔལ་དཀར་ལྗང་གཡས་ཨུཏྤལ་དང་གཡོན་དྲིལ་བུ་འཛིན་པ། ཧོཿགནྡྷེ་ཙིཏྟ། དྲི་ཆབ་མ་ལྗང་དཀར་དྲིའི་དུང་ཕོར་བསྣམས་པ་སྟེ་ཡབ་རྣམས་གཡས་བརྐྱངས་པའི་ཕྱེད་སྐྱིལ་དང་། ཡུམ་རྣམས་གཡོན་བརྐྱངས་པའི་ཕྱེད་སྐྱིལ་གྱིས་བཞུགས་པ། ཐམས་ཅད་ཀྱང་དར་གྱི་ན་བཟའ་དང་རིན་པོ་ཆེའི་རྒྱན་གྱིས་བརྒྱན་པའོ། །དེའི་ཕྱི་རོལ་གྱི་འདབ་མ་སོ་གཉིས་ལ། ཧཱུྃ་ཡ་མཱནྟ་ཀྲིཏ་ཕཊ། གཤིན་རྗེ་གཤེད་སྨུག་ནག་ྈྈ་ནྲྀ་མགོ་གདེངས་པ་འཛིན་པ། ཨོཾ་མ་ཧཱ་བཛྲ་དྷ་ར་མ་ཧཱ་ཀྲོ་དྷི་ཤྭ་རཱི་ཛྭ་ལ་ནི་ཧཱུྃ་ཕཊ། ལྕགས་ཀྱུ་མ་སྨུག་ནག་ལྕགས་ཀྱུ་འཛིན་པ། ཧཱུྃ་པྲ་ཛྙཱནྟ་ཀྲིཏ་ཕཊ། སྟོབས་པོ་ཆེ་སེར་ནག་རྡོ་རྗེ་འཛིན་པ། ཨོཾ་མ་ཧཱ་རཏྣ་དྷ་ར་ཕཊ། ཞགས་པ་མ་སེར་ནག་ཞགས་པ་འཛིན་པ། ཧཱུྃ་པདྨནྟ་ཀྲིཏ་ཕཊ། རྟ་མགྲིན་དམར་ནག་ཐོད་དབྱུག་སྦྲུལ་གྱིས་དཀྲིས་པ་འཛིན་པ། ཨོཾ་མ་ཧཱ་པདྨ་དྷ་ར་ཕཊ། ལྕགས་སྒྲོག་མ་དམར་ནག་ལྕགས་སྒྲོག་འཛིན་པ། ཧཱུྃ་བིགྷྣནྟ་ཀྲིཏ་ཕཊ། བདུད་རྩི་འཁྱིལ་པ་ལྗང་ནག་རྒྱ་གྲམ་འཛིན་པ། ཨོཾ་མ་ཧཱ་ཀརྨ་ཏ་ཀྲིཏ་ཕཊ། དྲིལ་བུ་མ་ལྗང་ནག་དྲིལ་བུ་འཛིན་པ། ཐམས་ཅད་ཀྱང་ཁྲོ་གཏུམ་མི་བཟད་པའི་ཉམས་ཅན་གྱད་ཀྱི་འདོར་སྟབས་སུ་བཞུགས་པའོ། །ཨོཾ་མུ་ནེ་ཀྲེཾ་སྭཱ་ཧཱ། ལྷའི་ཐུབ་པ་དཀར་པོ་པི་ཝཾ་འཛིན་པ། ཨོཾ་མུ་ནེ་ཧཱུྃ་ཏྲུཾ་སྭཱ་ཧཱ། ལྷ་མིན་གྱི་ཐུབ་པ་མཐིང་ག་གོ་ཆ་འཛིན་པ། ཨོཾ་མུ་ནེ་སྲུཾ་སྭཱ་ཧཱ། མིའི་ཐུབ་པ་སེར་པོ་གསེག་པར་འཛིན་པ། ཨོཾ་མུ་ནེ་བྲཾ་སྭཱ་ཧཱ། བྱོལ་སོང་གི་ཐུབ་པ་དམར་ནག་པུ་སྟི་འཛིན་པ། ཨོཾ་མུ་ནེ་ཀྵཾ་སྭཱ་ཧཱ། ཡི་དྭགས་ཀྱི་ཐུབ་པ་སེར་ནག་རིན་པོ་ཆེའི་སྒྲོམ་བུ་འཛིན་པ། ཨོཾ་མུ་ནེ་ཡེ་སྭཱ་ཧཱ། དམྱལ་བའི་ཐུབ་པ་དུད་ཁ་མེ་ཆུ་འཛིན་པ། ཐམས་ཅད་ཀྱང་མཆོག་གི་སྤྲུལ་སྐུའི་ཆ་བྱད་ཅན་འགྲོ་བའི་དོན་ལ་བཞེངས་སྟབས་ཀྱིས་གནས་པའོ། །ཨོཾ་བཛྲ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚནྟ་ཀ་ཧ་ན་ད་ཧ་པ་ཙ་ཧཾ་ཧཱུྃ་ཧཱུྃ་ཕཊ། རྡོ་རྗེ་ཁྲག་འཐུང་མཐིང་ནག་མཐིང་དཀར་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རྡོ་རྗེ་རྩེ་དགུ་དང་དྲིལ་བུ། ལྷག་མ་གཡས་གཉིས་རྩེ་ལྔ་དང་ཏི་ར། གཡོན་གཉིས་དུང་དམར་དང་འཇིག་རྟེན། ཞབས་གཉིས་རུ་ཏྲ་ཕོ་མོའི་གདན་ལ་རོལ་པ། ཨོཾ་མ་ཧཱ་བཛྲ་དྷ་ར་མ་ཧཱ་ཀྲོ་དྷི་ཤྭ་རཱི་ཛྭ་ལ་ནི་ཧཱུྃ་ཕཊ། རྡོ་རྗེ་ཁྲག་འཐུང་མ་སྔོན་མོ་གཡས་དྲིལ་བུ་དང་གཡོན་དུང་དམར་སྟོབ་པ། ཨོཾ་སརྦ་ཏ་ཐཱ་ག་ཏ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚནྟ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ། སངས་རྒྱས་ཁྲག་འཐུང་སྨུག་ནག་སྨུག་ལྗང་སེར་བའི་ཞལ་གསུམ་ཕྱག་དྲུག་གི་དང་པོ་གཉིས་འཁོར་ལོ་དང་དྲིལ་བུ། ལྷག་མ་གཡས་གཉིས་རྡོ་རྗེ་དང་ཏི་ར། གཡོན་གཉིས་དུང་དམར་དང་ཁ་ཊྭཱཾ་ཀ །ཞབས་བཞི་དྲི་ཟ་ཕོ་མོའི་གདན་ལ་རོལ་པ། ཨོཾ་སརྦ་ཏ་ཐཱ་ག་ཏ་མ་ཧཱ་ཀྲོ་ཏི་ཤྭ་རཱི་སརྦ་དུཥྚན་ཧཱུྃ་ཕཊ། སངས་རྒྱས་ཁྲག་འཐུང་མ་སྨུག་ནག་གཡས་དྲིལ་བུ་དང་། གཡོན་དུང་དམར་སྟོབ་པ། ཨོཾ་རཏྣ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚནྟ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ། རིན་ཆེན་ཁྲག་འཐུང་སེང་ནག་སེར་སྨུག་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་རིན་པོ་ཆེ་དང་དྲིལ་བུ། ལྷག་མ་གཡས་གཉིས་རྡོ་རྗེ་དང་ཏི་ར། གཡོན་གཉིས་དུང་དམར་དང་དགྲ་སྟྭ། ཞབས་བཞི་གཤིན་རྗེ་ཕོ་མོའི་གདན་ལ་རོལ་པ། ཨོཾ་མ་ཧཱ་སཱུརྱ་རཏྣ་མ་ཧཱ་ཀྲོ་དྷི་ཤྭ་རཱི་བི་ད་མ་ཧཱུྃ་ཕཊ། རིན་ཆེན་ཁྲག་འཐུང་མ་སེར་ནག་གཡས་དྲིལ་བུ་དང་གཡོན་དུང་དམར་སྟོབ་པ། ཨོཾ་པདྨ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚནྟ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ། པདྨ་ཁྲག་འཐུང་མ་དམར་ནག་དམར་སེར་ལྗང་བའི་ཞལ་གསུམ་ཕྱག་དྲུག་གི་དང་པོ་གཉིས་པདྨ་དང་དྲིལ་བུ། ལྷག་མ་གཡས་གཉིས་རྡོ་རྗེ་དང་ཏི་ར། གཡོན་གཉིས་དུང་དམར་དང་རྔེའུ་ཆུང་། ཞབས་བཞི་ཀླུ་དབང་ཕོ་མོའི་གདན་ལ་རོལ་པ། ཨོཾ་ཧྲཱི་ཧུ་ཏ་ས་མ་ཏ་པདྨ་མ་ཧཱ་ཀྲོ་དྷི་ཤྭ་རཱི་ཁཱ་ཧི་ཧཱུྃ་ཕཊ། པདྨ་ཁྲག་འཐུང་མ་དམར་ནག་གཡས་དྲིལ་བུ་དང་གཡོན་དུང་དམར་སྟོབ་པ། ཨོཾ་ཀརྨ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚནྟ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ། ལས་ཀྱི་ཁྲག་འཐུང་ལྗང་ནག་ལྗང་དམར་སྨུག་པའི་ཞལ་གསུམ་ཕྱག་དྲུག་གི་དང་པོ་གཉིས་རྒྱ་གྲམ་དང་དྲིལ་བུ། ལྷག་མ་གཡས་གཉིས་རྡོ་རྗེ་དང་ཏི་ར་གཡོན་གཉིས་དུང་དམར་དང་ཐོང་གཤོལ། ཞབས་བཞི་གནོད་སྦྱིན་ཕོ་མོའི་གདན་ལ་རོལ་པ། ཨོཾ་སརྦ་ཨ་མོ་གྷ་མ་ཧཱ་ཀྲོ་དྷི་ཤྭ་རཱི་བི་ཤྭ་ཧཱུྃ་ཕཊ། ལས་ཀྱི་ཁྲག་འཐུང་མ་ལྗང་ནག་གཡས་དྲིལ་བུ་དང་གཡོན་དུང་དམར་སྟོབ་པ། ཡབ་རྣམས་ཞབས་གཡས་བརྐྱངས་དང་ཡུམ་རྣམས་གཡོན་བརྐྱངས་པའི་དོར་སྟབས་ཀྱི་ཚུལ་ཅན། ཐམས་ཅད་ཀྱང་གར་དགུའི་རོས་སྒེག་ཅིང་དུར་ཁྲོད་རོལ་པའི་ཆས་ཀྱིས་བརྒྱན་པའོ། །ཨོཾ་བཛྲ་གཽ་རཱི་ཧ། གཽ་རཱི་སྔོན་མོ་གཡས་ཞིང་དབྱུག་དང་གཡོན་བྷན་དམར་འཛིན་པ། ཨོཾ་བཛྲ་ཙཽ་རཱི་ཧ། ཙཽ་རཱི་མ་སེར་མོ་མདའ་གཞུ་འགེངས་པ། ཨོཾ་བཛྲ་པྲ་མོ་ཧེ་ཧ། པྲ་མོ་དམར་མོ་ཆུ་སྲིན་གྱི་རྒྱལ་མཚན་ཕྱར་བ། ཨོཾ་བཛྲ་བཻ་ཏ་ལཱི་ཧ། བེ་ཏ་ལི་ནག་མོ་རྡོ་རྗེ་དང་ཞིང་ཆུང་འཛིན་པ། ཨོཾ་བཛྲ་པུཀྐ་སཱི་ཧ། པུཀྐ་སཱི་དམར་སེར་ཞིང་ཆུང་གི་རྒྱུ་མ་འདྲེན་པ། ཨོཾ་བཛྲ་གྷསྨ་རཱི་ཧ། གྷསྨ་རཱི་ལྗང་གུ་གཡོན་དུང་ཁྲག་གཡས་པའི་རྡོ་རྗེས་དཀྲུགས་པ། ཨོཾ་བཛྲ་སྨེ་ཤ་ནཱི་ཧ། སྨེ་ཤ་མཐིང་ནག་བྱིས་པའི་རོ་བཟུང་ནས་སྙིང་ཟ་བ། ཨོཾ་བཛྲ་ཙཎྜ་ལཱི་ཧ། ཙཎྜ་ལཱི་སེར་སྐྱ་ཞིང་ཆུང་གི་མགོ་ལུས་འདྲལ་བ། ཐམས་ཅད་ཀྱང་གཅེར་བུ་ལང་ཚོས་སྒེག་ཅིང་ཁྲོ་འཛུམ་བཞད་པ་དུར་ཁྲོད་རོལ་པའི་ཆས་ཅན་གཡོན་བརྐྱངས་པའི་སྟབས་ཀྱིས་གནས་པའོ། །དེའི་ཕྱི་རོལ་གྱི་འདབ་མ་བཞི་བཅུ་ལ། ཨོཾ་བཛྲ་སིདྷ་མུ་ཁཱི་ཧེ། སེང་གདོང་མ་སེར་མོ་རོ་ཟ་ཞིང་ལག་གཉིས་ཐུགས་ཀར་བསྣོལ་བ། ཨོཾ་བཛྲ་བྱ་གྷྲི་མུ་ཁཱི་ཧེ། སྟག་གདོང་མ་དམར་མོ་ལག་གཉིས་ཐུར་དུ་བསྣོལ་བས་རོ་བཟུང་བ། ཨོཾ་བཛྲ་ཤྲཱི་གཱ་ལ་མུ་ཁཱི་ཧེ། ཝ་གདོང་མ་ནག་མོ་ཞིང་ཆུང་ལྕེས་ལྡག་པ། ཨོཾ་བཛྲ་ཤྭ་ན་མུ་ཁཱི་ཧེ། སྤྱང་གདོང་མ་དམར་ནག་ཞིང་ཆུང་གི་ཁོག་པ་འདྲལ་བ་སྟེ། མཆེ་བ་ཅན་བཞི། ཨོཾ་བཛྲ་གྲྀ་ཌྷ་མུ་ཁཱི་ཧེ། རྒོད་གདོང་མ་དམར་མོ་ཞིང་གི་རྒྱུ་མ་འདྲེན་པ། ཨོཾ་བཛྲ་ཀངྐ་མུ་ཁཱི་ཧེ། ཀངྐའི་གདོང་མ་དམར་སྐྱ་བམ་རོ་ཕྲག་པར་ཁུར་བ། ཨོཾ་བཛྲ་ཀཱ་ཀ་མུ་ཁཱི་ཧེ། བྱ་རོག་གདོང་ཅན་ནག་མོ་རལ་གྲི་དང་བྷན་དམར་འཛིན་པ། ཨོཾ་བཛྲ་ཨུ་ལུ་ཀ་མུ་ཁཱི་ཧེ། འུག་གདོང་མ་མཐིང་ནག་རྡོ་རྗེའི་དབྱུག་པ་འཛིན་པ་སྟེ་གཤོག་པ་ཅན་བཞིའོ། །ཨོཾ་བཛྲ་ཨཱརྱ་ཏེ་ཛ་ཏེ་ང་ཛ། རྟ་གདོང་མ་སྔོན་མོ་ལྕགས་ཀྱུ་འཛིན་པ། ཨོཾ་བཛྲ་ཨ་མུ་ཁེ་ཧཱུྃ། ཕག་གདོང་མ་ནག་མོ་ཞགས་པ་འཛིན་པ། ཨོཾ་བཛྲ་ལོ་ཀ་བཾ། སེང་གདོང་མ་དམར་མོ་ལྕགས་སྒྲོག་འཛིན་པ། ཨོཾ་བཛྲ་བྷསྨི་བཱ་ལ་ཡ་བ་ཏུ་ཧོ། སྤྱང་གདོང་མ་ལྗང་གུ་དྲིལ་བུ་འཛིན་པ། ཐམས་ཅད་ཀྱང་གཅེར་བུ་རང་དང་ཁྲོས་པའི་ཞལ་ཅན་དུར་ཁྲོད་འབར་པའི་ཆས་དང་ལྡན་པའོ། །མ་ནུ་རཀྵ་སཱི་བྷྱོ། བྲཧྨ་ཎཱི་བྷྱོ། རཽ་ཏྲི་བྷྱོ། ཀུ་མ་རཱི་བྷྱོ། བེཥྞ་བཻ་བྷྱོ། ཨིནྡྲ་ཎི་བྷྱོ། སྲིན་མོ་དམར་སེར་གཡག་གདོང་ཏྲི་ཤུལ་འཛིན་པ། ཚངས་པ་དམར་སྐྱ་སྦྲུལ་གདོང་རྡོ་རྗེ་རྩེ་ལྔ་འཛིན་པ། འཁྲུག་མོ་སེར་ནག་གཟིག་གདོང་དབྱུག་ཏོ་དང་སྡིག་མཛུབ། བརྒྱ་བྱིན་མ་དཀར་དམར་སྲེ་མོང་མགོ་ཅན་དུང་དམར་འཛིན་པ། ཁྱབ་འཇུག་མ་སེར་མོ་ཕ་ཝང་མགོ་ཅན་འཁོར་ལོ་འཛིན་པ། དབང་མོ་དམར་སྐྱ་དྲེད་གདོང་བམ་དབྱུག་འཛིན་པའོ། །ཨོཾ་བཛྲ་པིངྒ་ལཾ་བྷྱོ། ཨ་མྲྀ་ཏ་བྷྱོ། སཽ་མྱ་བྷྱོ། དཎྜ་དམ་བྷྱོ། རཀྵ་སཱི་བྷྱོ། བྷཀྵ་སཱི་བྷྱོ། ཞི་བ་དམར་མོ་དོམ་མགོ་ཅན་རྒྱུ་ཞགས་འཛིན་པ། བདུད་རྩི་མ་སྔོན་མོ་ཆུ་སྲིན་མགོ་ཅན་བུམ་པ་འཛིན་པ། ཞི་བ་མ་སྔོ་སྐྱ་སྡིགས་པའི་མགོ་ཅན་པུཎྜ་རི་ཀ་འཛིན་པ། བེ་ཅོན་མ་ནག་མོ་ཁྲ་མགོ་ཅན་ཐོད་རློན་འཛིན་པ། སྲིན་མོ་དམར་ནག་ཝ་གདོང་རྒྱུ་ཞགས་འཛིན་པ། ཟ་བྱེད་ནག་མོ་སྟག་མགོ་བམ་ཆེན་འཛིན་པའོ། །ར་ཏི་བཛྲ་བྷྱོ། རུ་དྷི་ར་མཱཏྟ་བྷྱོ། ཨེ་ཀ་ཙ་རི་ཎི་བྷྱོ། མ་ནོ་ཧ་ར་མ་བྷྱོ། སིདྡྷིི་ཀ་མ་བྷྱོ། ཝ་ཡ་ཝི་བྷྱོ། དགའ་བྱེད་དམར་མོ་རྒོད་གདོང་ཁོག་ཆེན་འཛིན་པ། ཁྲག་འཐུང་མ་དམར་ནག་རྟ་གདོང་རྡོ་རྗེའི་དབྱུག་པ་འཛིན་པ། གཅིག་སྤྱོད་མ་དཀར་དམར་ཁྱུང་གདོང་བྷན་དམར་འཛིན་པ། འདོད་པ་དམར་སེར་ཁྱི་གདོང་བྱིས་བམ་འཛིན་པ། ནོར་སྲུང་དཀར་དམར་པུ་ཤུད་མགོ་ཅན་པདྨ་འཛིན་པ། རླུང་མོ་དམར་སྐྱ་ཤ་བའི་མགོ་ཅན་བ་དན་འཛིན་པའོ། །མ་ཧཱ་མ་ར་ཎ་བཛྲ་བྷྱོ། ཨགྣེ་བྷྱོ། ཝ་ར་ཧི་བྷྱོ། ཙ་མུཎྜི་བྷྱོ། སུ་ཏ་ནི་བྷྱོ། ཝ་རུ་ཎི་བྷྱོ། གསོད་བྱེད་མ་ལྗང་ནག་སྤྱང་གདོང་རྔེའུ་ཆུང་འཛིན་པ། མེ་མོ་དམར་སེར་སྐྱིན་གདོང་མེ་སྒྲོན་འཛིན་པ། ཕག་མོ་ལྗང་སེར་ཕག་གདོང་མཆེ་བ་འཛིན་པ། རྒན་བྱེད་ལྗང་སྔོན་ཁྭ་ཏའི་མགོ་ཅན་དུང་ཁྲག་འཛིན་པ། སྣ་ཆེན་ལྗང་དམར་བ་ལང་མགོ་ཅན་བམ་ཆེན་འཛིན་པ། ཆུ་ལྷ་མ་ལྗང་ནག་སྦྲུལ་གདོང་བདུད་རྩིའི་ཐོད་པ་འཛིན་པའོ། །བཛྲ་མ་ཧཱ་ཀཱ་ལི་བྷྱོ། བཛྲ་ཙ་ཀཱ་ལ་བྷྱོ། བཛྲ་ཀུམྦྷ་ཀརྞ་བྷྱོ། བཛྲ་ལམྦྷོ་དྷ་ར་བྷྱོ། ནག་མོ་ཆེན་པོ་ཁུ་བྱུག་མགོ་ཅན་ལྕགས་ཀྱུ་འཛིན་པ། རྡོ་རྗེ་སྔོན་མོ་ར་གདོང་རྒྱུ་ཞགས་འཛིན་པ། བུམ་རྣམ་དམར་མོ་སེང་གདོང་ལྕགས་སྒྲོག་འཛིན་པ། གསུས་འཛིན་མ་ལྗང་ནག་སྐྱེ་ཀའི་མགོ་ཅན་དྲིལ་བུ་འཛིན་པ། ཐམས་ཅད་ཀྱང་དྲག་མོའི་གཟུགས་ཅན་དུར་ཁྲོད་འབར་བའི་ཆས་ཀྱིས་བརྒྱན་ཏེ་ཞིང་གི་གདན་ལ་རོལ་པའོ། །གཞན་ཡང་དཀྱིལ་འཁོར་ཆེན་པོའི་ཕྱིའི་ཁོར་ཡུག་ལ་སྤྲུལ་པ་དང་ཡང་སྤྲུལ་བཀའ་སྡོད་དམ་ཅན་རྒྱ་མཚོའི་ཚོགས་དང་བཅས་པ་རྣམས་ཀྱང་རང་རང་གི་རྒྱན་དང་ཆ་ལུགས་དང་ལྡན་ཞིང་སོ་སོའི་འཁོར་གྱིས་བསྐོར་བའི་དཀྱིལ་འཁོར་གྱི་འཁོར་ལོ་ཉི་མ་དང་འོད་ཟེར་གྱི་ཚུལ་དུ་མངོན་པར་སྣང་བའི་སྒྱུ་འཕྲུལ་གྱི་རོལ་མོ་བསམ་གྱིས་མི་ཁྱབ་པ་དམ་ཚིག་གི་འཁོར་ལོར་རྫོགས་པར་གྱུར། དེ་ལྟར་དུ་གསལ་བའི་ལྷ་ཚོགས་རྣམས་ཀྱི་སྲོག་གི་་་གོར་རང་དང་རྣམ་པ་མཐུན་པའི་ཡེ་ཤེས་སེམས་དཔའ་རྒྱན་དང་ཕྱག་མཚན་སྤངས་པ་རེ་རེའི་ཐུགས་ཀར་སོ་སོའི་ས་བོན་གྱིས་མཚན་པར་གྱུར། གཉིས་པ་བྱིན་གྱིས་བརླབ་པ་ནི། ལྷ་རྣམས་སོ་སོའི་སྤྱི་བོར་ཟླ་བ་ལ་གནས་པའི་ཨོཾ་དཀར་པོ། མགྲིན་པར་པདྨ་ལ་གནས་པའི་ཨཱཿདམར་པོ། སྙིང་གར་ཉི་མ་ལ་གནས་པའི་ཧཱུྃ་སྔོན་པོ་སོ་སོའི་འོད་ཟེར་གྱིས་རྒྱལ་བ་རབ་འབྱམས་ཀྱི་ཐུགས་རྒྱུད་བསྐུལ་རྡོ་རྗེ་གསུམ་གྱི་ལྷ་ཚོགས་ནམ་མཁའ་གང་བར་བྱོན། ཡི་གེ་གསུམ་ལ་ཐིམ་པ་ཡོངས་སུ་གྱུར་པ་ལས་སྤྱི་བོར་རྣམ་སྣང་དཀར་པོ་འཁོར་ལོ་འཛིན་པ། མགྲིན་པར་སྣང་མཐའ་དམར་པོ་པདྨ་འཛིན་པ། སྙིང་ཁར་མི་བསྐྱོད་པ་སྔོན་པོ་རྡོ་རྗེ་འཛིན་པ་རྣམས་ཀྱིས་རྒྱས་བཏབ་པས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་གསུམ་དང་གཉིས་སུ་མེད་པར་གྱུར། རྡོ་རྗེ་རྩེ་ལྔ་པའི་ཕྱག་རྒྱ་གནས་སོ་སོར་གཏུགས་པ་དང་བསྟུན་ནས། ཨོཾ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཱདྨ་ཀོ྅་ཧཾ། མགྲིན་པ་ལ་ཀཱ་ཡའི་གནས་སུ་ཝཱཀྐ་དང་སྙིང་ཁར་ཙིཏྟ་སྦྱར་རོ། །གསུམ་པ་དབང་བསྐུར་བ་ནི། ལྷ་ཚོགས་དེ་རྣམས་སོ་སོའི་ཐུགས་ཀའི་ས་བོན་ལས་འོད་ཟེར་འཕྲོས་ཕྱོགས་བཅུ་དུས་བཞིའི་རྒྱལ་བ་རབ་འབྱམས་ཐམས་ཅད་གདན་གསུམ་ཚང་བའི་དཀྱིལ་འཁོར་གྱི་ལྷའི་རྣམ་པར་བཛྲ་ས་མཱ་ཛཿས་སྤྱན་དྲངས། ཨོཾ་སརྦ་ཏ་ཐཱ་ག་ཏ་མ་ཧཱ་རཱ་ག་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བསྐུལ་བས་དེ་རྣམས་གཉིས་མེད་དུ་མཉམ་པར་རོལ། རྗེས་ཆགས་ཀྱིས་མེས་ཞུ་བས་ཡེ་ཤེས་ལྔའི་ཆུ་རྒྱུན་ལྷ་སོ་སོའི་དབུའི་གནས་ལྔར་བབས་ཏེ་དབང་བསྐུར་བར་གྱུར། རྡོ་རྗེ་སྤྱི་བསྡམས་ལས་གུང་མོ་གཉིས་བརྐྱངས་པ་སྤྱི་བོར་བཞག་སྟེ། ཨོཾ་མ་ཧཱ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། དེ་བཞིན་དུ་མཛུབ་མོ་བརྐྱངས་པ་དཔྲལ་བར། ཨོཾ་མ་ཧཱ་ཨ་དརྴ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། སྲིན་ལག་བརྐྱངས་པ་རྣ་ལྟག་གཡས་པར། ཨོཾ་མ་ཧཱ་ས་མ་ཏ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། མཐེ་བོང་བརྐྱངས་པ་ལྟག་པར། ཨོཾ་མ་ཧཱ་པྲ་ཏྱ་བེ་ཀྵ་ཎ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། མཐེའུ་ཆུང་བརྐྱངས་པ་རྣ་ལྟག་གཡོན་པར། ཨོཾ་མ་ཧཱ་ཀྲྀ་ཏྱཱ་ནུཥྛ་ན་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་དབང་བསྐུར་བས་ཉོན་མོངས་པ་ལྔའི་དྲི་མ་སྦྱངས། ཕུང་པོ་ལྔ་རིགས་ལྔའི་སངས་རྒྱས་སུ་གནས་བསྒྱུར། ཆུ་ལྷག་མ་སྤྱི་བོར་བརྟེན་པ་ཡོངས་སུ་གྱུར་པ་ལས་མི་བསྐྱོད་པ་བདག་པོར་གྱུར་པའི་རིགས་ལྔ་སྤྲུལ་སྐུའི་ཆ་བྱད་ཅན་གྱིས་དབུ་བརྒྱན་པར་གྱུར། བཞི་པ་སྤྱན་འདྲེན་ནི། ཨོཾ། མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །བཛྲ་ས་མ་ཡ་ཛཿ ལྔ་པ་བཞུགས་གསོལ་ནི། ཨཱཿ ཡེ་ཤེས་སྤྲུལ་པའི་རང་བཞིན་དཀྱིལ་འཁོར་ནི། །ཟླ་རྒྱས་བཞིན་དུ་སྤྲོས་པ་མི་མངའ་ཡང་། །ཐུགས་རྗེའི་ཉི་གསལ་འོད་བཞིན་སྙོམས་མཛད་པ། །འདིར་གཤེགས་བདག་ལ་དགོངས་བཞིན་བཞུགས་སུ་གསོལ། །ས་མ་ཡ་ཏིཥྛ་ལྷན། དྲུག་པ་ཕྱག་འཚལ་བ་ནི། ཧཱུྃ། བརྗོད་མེད་ཤེས་རབ་མི་གཡོ་ཆོས་ཀྱི་སྐུ། །བདེ་ཆེན་ལོངས་སྤྱོད་རྫོགས་སྐུ་རིགས་ལྔའི་གཙོ། །ཐུགས་རྗེ་ཐབས་མཁས་རྒྱ་ཆེན་རོལ་པ་ཡི། །ཞི་ཁྲོ་སྤྲུལ་པའི་སྐུ་ལ་ཕྱག་འཚལ་ལོ། །ཨ་ཏི་པཱུ་ཧོ། པྲ་ཏཱིཙྪ་ཧོ། བདུན་པ་སྣང་བ་ཡབ་ཀྱི་མཆོད་སྤྲིན་ནི། ཨོཾ་དངོས་སུ་འབྱོར་དང་ཡིད་ཀྱིས་རྣམ་སྤྲུལ་པའི། །ཀུན་ཏུ་བཟང་པོ་བླ་མེད་མཆོད་སྤྲིན་གྱིས། །མཁའ་དབྱིངས་རྣམ་དག་རྒྱ་ཆེན་ཡོངས་བཀོད་དེ། །ཕྱི་ནང་གསང་བའི་མཆོད་པ་རྒྱ་མཚོས་མཆོད། །ཨོཾ་བཛྲ་ཨརྒྷཾ་སོགས་ནས་རཱུ་པ་ཤབྟ་གྷནྡྷེ་རཱ་ས་པརྴེ་ཨཱཿཧཱུྃ། སརྦ་པཉྩ་ཨ་མྲྀ་ཏ་མ་ཧཱ་རཀྟ་བྷ་ལིང་ཏ་པཱུ་ཙ་ཨཱཿཧཱུྃཿ བརྒྱད་པ་སྟོང་པ་ཡུམ་གྱི་མཆོད་པ་ནི། ཨཱཿ ཀུན་ཏུ་བཟང་མོ་གསང་བའི་བྷ་ག་ལ། །རྒྱལ་བའི་དཀྱིལ་འཁོར་རབ་འབྱམས་མ་ལུས་ཀུན། །འདུ་འབྲལ་མེད་པའི་ངང་དུ་རོ་གཅིག་པས། །གཉིས་མེད་བྱང་ཆུབ་སེམས་ཀྱིས་མཉེས་གྱུར་ཅིག །ཛཿཧཱུྃ་བཾ་ཧོཿ མ་ཧཱ་སུ་ཁ་ཨ་ནུ་རཱ་ག་ཡ་མི། དགུ་པ་ཟུང་འཇུག་ཆོས་སྐུའི་མཆོད་པ་ནི། ཧཱུྃ། སེམས་ཀྱི་རང་བཞིན་ཆོས་དབྱིངས་ནམ་མཁའ་ཆེ། །ཆོས་རྣམས་རྣམ་དག་ཡེ་ནས་འོད་གསལ་ཞིང་། །རྣལ་འབྱོར་ཉིད་དབྱིངས་སྨྲ་བསམ་བརྗོད་ལས་འདས། །མཉམ་ཉིད་བྱང་ཆུབ་སེམས་ལ་རྟག་ཏུ་འདུད། །བོ་དྷི་ཙིཏྟ་ཨ་ལ་ལ་ཧོ། བཅུ་པ་བསྟོད་པ་ནི། ཧཱུྃ། ཆོས་དབྱིངས་ཡེ་ཤེས་མཉམ་པའི་ངང་། །རང་བཞིན་ཡོན་ཏན་ལྷུན་གྱིས་གྲུབ། །ཐུགས་རྗེ་ཡིད་བཞིན་ནོར་བུ་འདྲ། །ཕྱག་འཚལ་གདོད་མའི་མགོན་པོ་ལ། །ཡེ་ཤེས་ལྔ་ཡི་ངོ་བོ་ཉིད། །ཉོན་མོངས་དུག་ལྔ་རྣམ་སྦྱོང་ཞིང་། །འབྱུང་ལྔའི་ཁམས་ནི་རྣམ་དག་པ། །ཕྱག་འཚལ་རྒྱལ་བ་རིགས་ལྔ་ལ། །བཅུ་དྲུག་ཡེ་ཤེས་ངོ་བོ་ཉིད། །གཟུང་འཛིན་དྲི་མ་རྣམ་སྦྱོང་ཞིང་། །རྣམ་ཤེས་ཚོགས་བརྒྱད་གནས་དག་པ། །ཕྱག་འཚལ་སེམས་དཔའ་ཡབ་ཡུམ་ལ། །ཚད་མེད་ཡེ་ཤེས་ངོ་བོ་ཉིད། །སྐྱེ་གནས་དྲི་མ་རྣམ་སྦྱོང་ཞིང་། །འབྱུང་ལྔའི་ཁམས་ནི་རྣམ་དག་པ། །ཕྱག་འཚལ་སྒོ་བ་ཡབ་ཡུམ་ལ། །ཕ་རོལ་ཕྱིན་དྲུག་ངོ་བོ་ཉིད། །ཁམས་དྲུག་དྲི་མ་རྣམ་སྦྱོང་ཞིང་། །ཚོགས་དྲུག་རྣམ་ཤེས་རྣམ་པར་དག །ཕྱག་འཚལ་ཐུབ་པ་དྲུག་ལའོ། །ཞི་ལས་ཡེ་ཤེས་རྣམ་འཕྲོས་པས། །འཇིགས་གཟུགས་ཁྲོ་བོའི་དཀྱིལ་འཁོར་ནི། །ལྔ་བཅུ་རྩ་བརྒྱད་འབར་བའི་སྐུ། །ཕྱག་འཚལ་དབྱིངས་ཀྱི་དཀྱིལ་འཁོར་ལ། །ས་དང་ཡེ་ཤེས་ཞིང་ཁམས་ལ། །འཇིག་རྟེན་འདས་དང་མ་འདས་ཚུལ། །དུར་ཁྲོད་ཆེན་པོའི་གནས་བརྒྱད་ན། །བཞུགས་པའི་འགྲོ་བ་ཀུན་ལ་འདུད། །བཅུ་གཅིག་པ་ཛབ་ལ་བདག་མདུན་བུམ་གསུམ་ལས། དང་པོ་ནི། རྣམ་སྣང་ཐུགས་ཀྱི་དཀྱིལ་འཁོར་དུ། །གསེར་གྱི་རྡོ་རྗེ་རྩེ་ལྔ་པའི། །ལྟེ་བར་ཉི་ཟླ་ཁ་སྦྱོར་དབུས། །སྲོག་གི་སྙིང་པོ་ཡི་གེ་ཨོཾ། །དེ་མཐར་སྔགས་ཕྲེང་གཡས་སུ་འཁོར། །འོད་ཟེར་འཕྲོས་པས་འཕགས་པ་མཆོད། །རིགས་དྲུག་སྡུག་བསྔལ་གཏན་ནས་སྦྱངས། །སྣོད་བཅུད་འོག་མིན་ཞིང་དུ་བསྒྱུར། །ཚུར་འདུས་བདག་ལ་ཐིམ་པ་ཡིས། །མཆོག་ཐུན་དངོས་གྲུབ་ཐོབ་པར་དམིགས། །ཨོཾ་བོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱརྟུ་ཨཱཿཧཱུྃ། ཞི་པ་ཡོངས་རྫོགས་སྙིང་པོ་སྟེ། །བསྙེན་པའི་ཚུལ་དུ་བཟླས་པ་བྱ། །འབུམ་ཕྲག་བཅོ་ལྔ་ཐོན་རྗེས་སུ། །དྲག་པོར་སྒྲུབ་པ་འདི་ལྟ་སྟེ། །ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊ། རུ་ལུ་བཟླ་སྐབས་རྣམ་སྣང་སྔགས། །རྡོ་རྗེ་རྩེ་གསུམ་དམར་པོ་ཡི། །ལྟེ་བར་ཨཱཿདམར་རུ་ལུས་བསྐོར། །དེ་ལས་འོད་འཕྲོས་སྟེང་ཕྱོགས་ཀྱི། །ཁྲོ་བོའི་དཀྱིལ་འཁོར་གསལ་བར་བྱས། །དེ་དག་ཐུགས་དམ་རྒྱུད་བསྐུལ་ཏེ། །རུ་ལུ་གྲགས་སྟོང་སྐྱེ་མེད་སྒྲ། །འབྲུག་སྟོང་བཞིན་དུ་སྒྲོགས་པར་བསམ། །བྱེ་བ་གསུམ་དུ་བཟླས་གྱུར་ན། །བྲིས་སྐུ་བཞད་ཅིང་བདུད་རྩི་ཁོལ། །སྣང་བ་ཞི་ཁྲོའི་སྐུ་རུ་འཆར། །གྲགས་པ་གསུང་དུ་ལྷང་གིས་འགྱུར། །རིག་པ་ཆོས་ཉིད་དོན་དང་མཇལ། །མཆོག་ཐུན་དངོས་གྲུབ་འབད་མེད་འབྱུང་། །དེ་ནས་ལས་ལ་སྦྱོར་བ་ནི། །སྦྱང་གཞི་ང་རུ་འཛིན་པའི་བདུད། །ལས་ངན་སྒྲིབ་པའི་ཕུང་པོ་ལ། །སྦྱོང་བྱེད་རྩ་རིག་ཟབ་མོ་ནི། །ཨོཾ་ན་མོ་་་་ཕྱག་འཚལ་ལོ། བྷ་ག་ཝ་ཏེ་་་་བཅོམ་ལྡན་འདས་སརྦ་དུརྒ་ཏེ་་་་ངན་སོང་ཐམས་ཅད། པཱ་རི་ཤྭ་དྷ་ནི་རཱ་ཛ་ཡ།་་་ཡོངས་སུ་སྦྱོང་བའི་རྒྱལ་པོ། ཏ་ཐཱ་ག་ཏ་ཡ།་་་དེ་བཞིན་གཤེགས་པ། ཨརྷ་ཏེ།་་་དགྲ་བཅོམ་པ། སཾ་མྱཀ་སཾ་བུདྡྷ་ཡ།་་་་ཡང་དག་པར་རྫོགས་པའི་སངས་རྒྱས། ཏདྱ་ཐཱ།་་་འདི་ལྟ་སྟེ། ཨོཾ་ཤྭ་་་སྦྱོང་དྷ་ནེ་སྦྱོང་ཤྭ་དྷ་ནེ། སརྦ་་་ལས་སྒྲིབ་ཐམས་ཅད་རྣམ་པར་སྦྱོང་་་པཱ་པཾ་བི་ཤྭ་དྷ་ན་སྭཱ་ཧཱ། བཟླས་དམིགས་ཐུགས་ཀར་སྔགས་ཕྲེང་འཁོར་བ་ལས་འོད་ཟེར་བུན་བུན་འཕྲོས། ཞལ་ཕྱོགས་བཞིར་གཟིགས་པའི་སྨིན་མཚམས་ལས་ཐོན། ངན་སོང་ན་གནས་པ་དང་དམིགས་བྱའི་དོན་བྱས། སྡིག་སྒྲིབ་ཐམས་ཅད་སྦྱངས། དེ་དག་གི་རྣམ་ཤེས་འོད་ཀྱི་རྣམ་པར་གྱུར་པ་དང་། ལྷན་ཅིག་ཐུགས་ཀར་བསྡུས་ཏེ་མཉམ་པར་འཇོག་པ་མན་ངག་ཡིན། འབུམ་ཕྲག་གཅིག་ནི་སུས་བཟླས་པ། །མཚམས་མེད་ལྔ་ཡི་ལས་ཀྱང་བྱང་། །བླ་མེད་ཐེག་པའི་སྤྱི་ཁྲུས་དང་། །ཡོ་ག་ངན་སོང་སྦྱོང་བའི་བཅུད། །གཉིས་མེད་ཟུང་འཇུག་མན་ངག་སྟེ། །ཡེ་ཤེས་ལྷ་ལ་རང་རྒྱུད་དང་། །ཐེག་པ་མཐོ་དམན་རྩིས་གདབ་མེད། །བདེ་གཤེགས་གཅིག་སྒྲུབ་ཀུན་གྱི་ངང་། །འདི་ནི་ངེས་གསང་ཐེག་པ་ཡི། །ཁྱད་ཆོས་བླ་ན་མེད་པའོ། །ས་མ་ཡ། གཉིས་པ་ནི། དབང་དོན་བུམ་པའི་དཀྱིལ་འཁོར་སྤྲུལ་པ་ཡིན་ན་གཟུངས་ཐག་ལ་འཇུས་ནས། བདག་གི་ཐུགས་ཁ་ནས་སྤྲོས་པའི་འོད་ཟེར་གཟུངས་ཐག་ལ་འཁྲིལ་ཏེ་སོང་། རྣམ་རྒྱལ་བུམ་པ་མཚན་ཉིད་ཚང་བའི་ནང་གཞལ་མེད་ཁང་གི་རྣམ་པར་རྫོགས་པའི་བརྟེན་པའི་ལྷ་ཚོགས་ཐམས་ཅད་ཀྱི་ཐུགས་རྒྱུད་བསྐུལ། སོ་སོའི་ཐུགས་ཀར་ཨཱཿཡིག་རེ་རེ་དང་། གཙོ་བོ་རྣམ་སྣང་གི་ཐུགས་ཀར་ཟླ་གདན་ལ་ཨཱ་ལི་ཀཱ་ལིའི་ཕྲེང་བ་གཡས་སུ་འཁོར་བ་ལས་འཕྲོས་པའི་འོད་ཟེར་གྱིས་དམིགས་བྱའི་སྡིག་སྒྲིབ་སྦྱངས་པར་བསམ་ལ། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨ། ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ་ཤ་ཥ་ས་ཧ་ཀྵ། སརྦ་པཱ་པཾ་ཤཱནྟིཾ་ཀུ་རུ་སྭཱ་ཧཱ། ཞེས་བཏགས་པ་བཟླས་མཐར་ཨོཾ་ཨཱཿཧཱུྃ་གིས་དུང་ཆོས་ཀྱི་མཆོད་ཡོན་ཕུལ་ལ་ལྷ་འོད་ཞུ་བྱ། གསུམ་པ་མདུན་བསྐྱེད་ཀྱི་བཟླས་པ་ནི། མདུན་བསྐྱེད་ཀྱི་གཙོ་བོ་རྡོ་རྗེ་སེམས་དཔའ་ཡབ་ཡུམ་དང་བཅས་པའི་དམ་པ་རིགས་བརྒྱ་ཐམས་ཅད་ཀྱང་རང་འདྲའི་ཡེ་ཤེས་སེམས་དཔའ་དང་ལྡན་པའི་ཐུགས་ཀར་རང་རང་གི་ཏིང་འཛིན་སེམས་དཔའི་ངོ་བོ་ཡི་གེ་བརྒྱ་པའི་ཡིག་འབྲུ་རེ་རེ་གསལ་བ་ལས་བདག་གི་ཐུགས་ཀའི་འོད་ཟེར་གྱིས་བསྐུལ། སྥ་ར་ཎ་ཕཊ། ཅེས་བརྗོད་པས་ཡིག་འབྲུ་སོ་སོ་ལས་འོད་ཟེར་དཔག་ཏུ་མེད་པ་འཕྲོས། རྒྱལ་བ་སྲས་དང་བཅས་པའི་ཐུགས་རྒྱུད་བསྐུལ། བདེ་སྟོང་གི་མཆོད་པས་དགྱེས་པ་བསྐྱེད། སཾ་ཧ་ར་ཎ་ཧཱུྃ། ཞེས་བརྗོད་པས་བྱིན་རླབས་དང་དངོས་གྲུབ་ཐམས་ཅད་འོད་ཟེར་གྱི་རྣམ་པར་བསྡུས། མདུན་བསྐྱེད་ཀྱི་ལྷ་ཚོགས་རྣམས་ལ་ཐིམ་པས་གསལ་བརྟན་གྱི་གཟི་བྱིན་འབར། ལྷ་ཚོགས་རྣམས་ཀྱི་ཞལ་ནས་གསང་སྔགས་ཀྱི་སྒྲ་དང་། ཐུགས་ལས་འོད་ཟེར་འཕྲོས་པས་ཁམས་གསུམ་ཐམས་ཅད་སྣང་བར་བྱས། ངན་སོང་དང་འཁོར་བའི་སྡུག་བསྔལ་གྱི་རྒྱུ་དང་འབྲས་བུར་བཅས་པ་ཐམས་ཅད་སྦྱངས། མ་དག་པའི་བརྟན་གཡོ་དག་པའི་སྣོད་བཅུད་དུ་གནས་བསྒྱུར། དམིགས་ཡུལ་གཙོ་བོར་གྱུར་པའི་ལམ་ལྔའི་རྒྱུད་ལྡན་གྱི་སེམས་ཅན་ཐམས་ཅད་ཀྱི་གློ་བུར་གྱི་དྲི་མ་ཆ་དང་བཅས་པ་སྐད་ཅིག་ལ་སྦྱངས་ནས་བདེ་ཆེན་གྱི་ས་ལ་བཀོད་པར་བསམ་ལ། ཨོཾ་བཛྲ་ས་ཏྭ་ས་མ་ཡ། མ་ནུ་པཱ་ལ་ཡ། བཛྲ་ས་ཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་ཝ། སུ་ཏྭ་ཥྱོ་མེ་བྷ་ཝ། སུ་པོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཾ་ཀུ་རུ་ཧཱུྃ། ཧ་ཧ་ཧ་ཧ་ཧོཿ བྷ་ག་ཝཱན། སརྦ་ཏ་ཐཱ་ག་ཏ། བཛྲ་མཱ་མེ་མུཉྩཿ བཛྲཱི་བྷ་ཝ། མ་ཧཱ་ས་མ་ཡ་ས་ཏྭ་ཨཱཿཧཱུྃ་ཕཊ། ཅི་ནུས་བཟླས། བཅུ་གཉིས་པ་རྡོ་རྗེ་ལྷ་མོ་བཅུ་དྲུག་གི་མཆོད་ཕྲེང་དྲི་ཟའི་རྒྱུད་མངས་ནི། པདྨ་རྒྱས་པ་ལྟ་བུའི་ལང་ཚོ་ཅན། །རེག་ན་བདེ་བའི་མཆོག་སྟེར་ཨུཏྤལ་མིག །གཟུགས་ཀྱི་རྣམ་འགྱུར་ངོམ་པའི་ཡིད་འཕྲོག་མ། །རྡོ་རྗེ་སྒེག་མོ་མ་ཡིས་མཉེས་གྱུར་ཅིག །གུ་རུ་སརྦ་ཏ་ཐཱ་ག་ཏ་ས་པཱ་རི་ཝཱ་ར་བཛྲ་ལཱ་སྱེ་ཧཱུྃ་པྲ་ཏཱིཙྪ་ཧོ། །སྲིད་ན་རྣམ་པར་མཛེས་པའི་ཟླ་བས་ཀྱང་། །བལྟ་ན་སྡུག་པའི་གཟུགས་ཀྱི་ཆར་མི་ཉེ། །ནོར་བུའི་དོ་ཤལ་འཛིན་པའི་ཡིད་འོང་མ། །རྡོ་རྗེ་ཕྲེང་བ་མ་ཡིས་མཉེས་གྱུར་ཅིག གུ་རུ༴ བཛྲ་མཱ་ལྱེ་ཏྲཱཾ། འཇམ་མཉེན་པུནྡྷ་རི་ཀའི་ལང་ཚོ་ལ། །རེག་འཇམ་དབང་པོའི་གཞུ་ཡི་འཁྲི་ཤིང་ཅན། །སྐད་སྙན་འགྱུར་ཁུག་སྟོང་གི་གླུ་ལེན་མ། །རྡོ་རྗེ་གླུ་མའི་ཚོགས་ཀྱིས་མཉེས་གྱུར་ཅིག །བཛྲ་གིརྟི་ཧྲཱིཿ བུང་བ་པདྨའི་ཚལ་ན་གཡོ་བ་བཞིན། །ཕྱག་ཞབས་གསེར་གཡུའི་གདུ་བུས་མཛེས་པའི་གར། །མིག་འཕྲུལ་ལྟ་བུར་སྒྱུར་བའི་གཡོ་ལྡན་མ། །རྡོ་རྗེ་གར་མའི་ཚོགས་ཀྱིས་མཉེས་གྱུར་ཅིག །བཛྲ་ནཱིརྟི་ཨཱཿ བཅུ་དྲུག་ལང་ཚོས་མྱོས་པའི་རྣམ་འགྱུར་དེས། །སྙིང་ལ་དགའ་བའི་ཡ་མཚན་ཅིར་ཡང་སྟེར། །དྲི་ཞིམ་སྤོས་ཕོར་ཐོགས་པའི་སྨིན་ལེགས་མ། །རྡོ་རྗེ་བདུག་སྤོས་མ་ཡིས་མཉེས་གྱུར་ཅིག །བཛྲ་དྷཱུ་པེ་ཧཱུྃཿ ཚངས་དབང་འཆི་མེད་བུ་མོའི་འཇོ་སྒེག་ཀྱང་། །ཤིན་ཏུ་མཛེས་པའི་ལང་ཚོས་བརྟན་པ་འཕྲོག །ཨུ་དུམ་ཝཱ་རའི་ཆུན་འཕྱང་ཡིད་འཕྲོག་མ། །རྡོ་རྗེ་མེ་ཏོག་མ་ཡིས་མཉེས་གྱུར་ཅིག །བཛྲ་པུཥྤེ་ཏྲཱཾ། ཡིད་འོང་བལྟ་ན་སྡུག་པའི་མཁུར་ཚོས་ལ། །ལི་ཁྲིའི་ཐིག་ལེས་བསྐུས་པའི་རི་དྭགས་མིག །ཉི་ཟླའི་སྒྲོན་མེ་ཐོགས་པའི་བཞིན་བཟང་མ། །རྡོ་རྗེ་སྣང་གསལ་མ་ཡིས་མཉེས་གྱུར་ཅིག །བཛྲ་ཨ་ལོ་ཀེ་ཧྲཱིཿ འཆི་མེད་བུ་མོའི་དཔལ་འཛིན་སྨིན་ལེགས་གཟུགས། །ཞལ་ནས་ཨུཏྤ་ལ་ཡི་དྲི་འཐུལ་ཞིང་། །བཟང་དྲུག་སྨན་གྱི་བྱུག་པས་དགྱེས་པ་སྐོང་། །རྡོ་རྗེ་དྲི་ཆབ་མ་ཡིས་མཉེས་གྱུར་ཅིག །བཛྲ་གྷནྡྷེ་ཨཱཿ ལང་ཚོའི་ཆ་ཤས་རྫོགས་པའི་པདྨ་དང་། །རྣམ་འགྱུར་ཅིར་ཡང་འཆར་བའི་ཨ་དརྴ། །ཕན་ཚུན་འགྲན་པ་ལྟ་བུའི་གཟུགས་མཛེས་མ། །རྡོ་རྗེ་མེ་ལོང་མ་ཡིས་མཉེས་གྱུར་ཅིག །བཛྲ་རཱུ་པ་ཨོཾཿ ཏིང་འཛིན་རི་མོ་མཁན་གྱིས་བྲིས་པའི་གཟུགས། །བཞིན་མཛེས་མནྡ་ར་བའི་ཐོད་བཅིངས་ཅན། །ཟླུམ་པོའི་རྔ་ལས་བདེ་སྟོང་སྒྲ་འབྱིན་མ། །རྡོ་རྗེ་རྔ་ཟླུམ་མ་ཡིས་མཉེས་གྱུར་ཅིག །བཛྲ་མྲྀ་ཏཾ་གི་ཧྲཱིཿ །རཏྣའི་སོར་གདུབ་འཁྲོལ་བའི་ཁུ་ཚུར་གྱིས། །དྲི་ཟའི་བུ་མོར་འགྲན་པའི་ཏཾ་བུ་ར། །རྣ་བའི་དཔྱིད་དུ་སྦྲེངས་པའི་ཡིད་འཕྲོག་མ། །རྡོ་རྗེ་པི་ཝཾ་མ་ཡིས་མཉེས་གྱུར་ཅིག །བཛྲ་ཝི་ནི་ཧཱུྃཿ དགའ་བ་བཅུ་དྲུག་རླུང་གི་རྟར་བསྐྱོན་ནས། །ཐིག་ལེ་བཅུ་དྲུག་གནས་སུ་དག་པ་ལས། །སྟོང་ཉིད་བཅུ་དྲུག་གླིང་བུའི་སྒྲར་སྟོན་པའི། །རྡོ་རྗེ་གླིང་བུ་མ་ཡིས་མཉེས་གྱུར་ཅིག །བཛྲ་ཝཾ་སེ་ཏྲཱཾཿ ཟླ་གཞོན་པད་དཀར་ལྟ་བུའི་ལང་ཚོའི་དཔལ། །མིག་གི་བདུད་རྩིར་སྦྱིན་དང་ཆབས་གཅིག་པར། །སྙན་འགྱུར་རྫ་རྔའི་སྒྲ་སྒྲོགས་ན་ཆུང་མ། །རྡོ་རྗེ་རྫ་རྔ་མ་ཡིས་མཉེས་གྱུར་ཅིག །བཛྲ་མུ་རཉྫེ་ཨཱཿ སྟོང་ཉིད་ནམ་མཁའི་རྒྱན་གྱུར་ལྷ་ཡི་གོས། །རིན་ཐང་བརྗོད་དུ་མེད་པའི་པཉྩ་ལི། །འཕྲུལ་ལྡན་སོར་རྩེས་སྒྲོན་པའི་མཛའ་ན་མོ། །རྡོ་རྗེ་རེག་བྱ་མ་ཡིས་མཉེས་གྱུར་ཅིག །བཛྲ་པརྴེ་ཏྲཱཾཿ ཆགས་མེད་ཆགས་པ་ཆེན་པོའི་ཟུར་མིག་གིས། །དཔའ་བོའི་ཡིད་ལ་མྱོས་པའི་ཆོམ་རྐུན་འཇུག །ལག་ན་རོ་བརྒྱའི་དཔལ་འཛིན་ཞལ་ཟས་ཐོགས། །རྡོ་རྗེ་རོ་མའི་ཚོགས་ཀྱིས་མཉེས་གྱུར་ཅིག །བཛྲ་རཱ་ས་ཧྲཱིཿ བདེ་བས་བདེ་བའི་མཐར་སོན་སྟོང་པ་ཉིད། །བདེ་ཆེན་ཆོས་ཀྱི་འབྱུང་གནས་མངལ་ཁུར་ཅན། །བདེ་སྟོང་ངང་ལས་རྒྱལ་ཀུན་བསྐྱེད་པའི་ཡུམ། །ཆོས་ཀྱི་རྡོ་རྗེ་མ་ཡིས་མཉེས་གྱུར་ཅིག །གུ་རུ་སརྦ་ཏ་ཐཱ་ག་ཏ་ས་པ་རི་ཝཱ་ར་བཛྲ་དྷརྨཱ་དྷཱརྟུ་ཨཱཿཔྲ་ཏཱིཙྪ་ཧོཿ བཅུ་གསུམ་པ་བསྟོད་པ་ནི། བརྗོད་མེད་ཤེས་རབ་མི་གཡོ་ཆོས་ཀྱི་སྐུ། །བདེ་ཆེན་ལོངས་སྤྱོད་རྫོགས་སྐུ་རིགས་ལྔའི་གཙོ། །ཐུགས་རྗེ་ཐབས་མཁས་རྒྱ་ཆེན་རོལ་པ་ཡི། །ཞི་ཁྲོ་སྤྲུལ་པའི་སྐུ་ལ་ཕྱག་འཚལ་བསྟོད། །བཞི་པ་ཚོགས་བསགས་པ་ལ་གཉིས། སྒྲིབ་པ་སྦྱོང་བ་དང་། སྐོང་གི་རིམ་པའོ། །དང་པོའི་ལས་རིམ་ནི། གཞུང་ལས། དེ་ནས་དམ་སྐོང་དོང་སྤྲུགས་ཀྱི། །གཞུང་ལ་འཇུག་པའི་དང་པོ་ནི། །ལུས་ཀྱི་མ་ལྔ་ས་ལ་བརྡེབ། །གདུང་ཤུགས་དྲག་པོས་བརྐྱངས་ཕྱག་འཚལ། །ཨ་ལ་ལ་ཧོཿ ཆོས་རྣམས་རྣམ་དག་ཡེ་ནས་ལྷུན་གྲུབ་ཅིང་ཿ བྱ་བ་བྱེད་དང་ཡིད་ཆོས་རྣམ་པར་དགཿ ཀུན་བཟང་ཡབ་ཡུམ་གཉིས་ལ་ཕྱག་འཚལ་ལོཿ ཆོས་སྐུ་ནམ་མཁའ་བཞིན་དུ་དབྱེར་མེད་ཀྱངཿ གཟུགས་སྐུ་འཇའ་ཚོན་བཞིན་དུ་སོ་སོར་གསལཿ ཐབས་དང་ཤེས་རབ་མཆོག་ལ་མངའ་བརྙེས་པའིཿ རིགས་ལྔ་བདེ་བར་གཤེགས་ལ་ཕྱག་འཚལ་ལོཿ ངོ་མཚར་ཕོ་བྲང་བདེ་བར་གཤེགས་པའི་ཡུམཿ དུས་གསུམ་རྒྱལ་བ་ཐམས་ཅད་བསྐྱེད་མཛད་མཿ རིགས་ཀྱི་ཡུམ་གྱུར་རྣམས་ལ་ཕྱག་འཚལ་ལོཿ རྣམ་ཤེས་དབང་པོ་དག་པ་སྐུ་གསུང་ཐུགསཿ བདེ་བར་གཤེགས་པ་རྣམས་ཀྱི་སྲས་མཆོག་སྟེཿ སེམས་དཔའ་ཆེན་པོ་བརྒྱད་ལ་ཕྱག་འཚལ་ལོཿ སྒེག་མོ་ཕྲེང་ཐོགས་རིན་ཆེན་གླུ་གར་ཅནཿ ནམ་མཁའ་མཉམ་པའི་མཆོད་པས་རྒྱལ་བ་མཆོདཿ བྱང་ཆུབ་ལྷ་མོའི་ཚོགས་ལ་ཕྱག་འཚལ་ལོཿ བདུག་པ་མེ་ཏོག་མར་མེ་དྲི་ཆབ་མཿ རྒྱལ་བ་རྒྱ་མཚོ་རྣམས་ལ་མཆོད་འབུལ་མཿ མཆོད་པའི་ལྷ་མོ་རྣམས་ལ་ཕྱག་འཚལ་ལོཿ དྲག་ཤུལ་ཐབས་ཀྱིས་འགྲོ་བ་འདུལ་མཛད་པཿ ཚད་མེད་བཞི་ལྡན་སྒོ་བཞི་ཐུབ་པར་སྲུངཿ ཏ་ཀྲིཏ་སྒོ་བ་བཞི་ལ་ཕྱག་འཚལ་ལོཿ རྟག་ཆད་མཐར་ཕྱིན་གསང་བ་ཡུམ་གྱི་ངངཿ ལྕགས་ཀྱུ་ཞགས་པ་ལྕགས་སྒྲོག་དྲིལ་འཁྲོལ་མཿ སྒོ་མ་ཆེན་མོ་བཞི་ལ་ཕྱག་འཚལ་ལོཿ སྟེང་འོག་ཕྱོགས་བཞི་འཇིག་རྟེན་འདུལ་མཛད་གཙོཿ ཉོན་མོངས་དྲུག་འཇོམས་རྒྱུད་དྲུག་དག་པར་སྦྱོང་ཿ བཅོམ་ལྡན་ཐུབ་པ་དྲུག་ལ་ཕྱག་འཚལ་ལོཿ འཇིགས་བྱེད་འདས་པའི་དུས་ན་མངོན་བྱུང་པཿ གདུག་པ་འདུལ་ཕྱིར་དུས་ལས་མི་འདའ་བའིཿ དཔལ་ཆེན་ཧེ་རུ་ཀ་ལ་ཕྱག་འཚལ་ལོཿ ཁྲོ་མོ་དབང་ཕྱུག་སྐུ་ལ་འཁྲིལ་མཛད་ཅིངཿ མཁའ་འགྲོ་མི་བཟད་འབར་བའི་སྤྲིན་འཕྲོ་མཿ གདུག་པ་འདུལ་མཛད་ཡུམ་ལ་ཕྱག་འཚལ་ལོཿ བསྐལ་པ་མེ་ལྟར་འབར་བའི་ཀློང་དཀྱིལ་ནསཿ ཡེ་ཤེས་སྐུ་མཆོག་འཇིགས་བྱེད་རྒྱན་གྱིས་བཞུགསཿ ཁྲོ་མོ་ཆེན་མོ་བརྒྱད་ལ་ཕྱག་འཚལ་ལོཿ ནམ་མཁའི་ལུས་ཅན་གར་ཡང་ཐོགས་མེད་ཅིང་ཿ འདོད་དགུར་བསྒྱུར་བའི་གཟུགས་ཅན་འཕྲུལ་མོ་ཆེཿ ཕྲ་མེན་ཆེན་མོ་བརྒྱད་ལ་ཕྱག་འཚལ་ལོཿ རྡོ་རྗེ་གདོང་མོ་ཕོ་ཉ་མགྱོགས་མ་བཞིཿ ཤར་ལྷོ་ནུབ་བྱང་སྒོ་བཞི་ཐུབ་པར་སྲུངཿ སྒོ་སྐྱོང་ཁྲོ་མོ་བཞི་ལ་ཕྱག་འཚལ་ལོཿ དཔལ་གྱི་འཁོར་ཚོགས་བཛྲ་ཨ་ར་ལིཿ མཁའ་ལ་ཤུགས་འགྲོ་མ་ཚོགས་དབང་ཕྱུག་མཿ རྣལ་འབྱོར་ཉི་ཤུ་བརྒྱད་ལ་ཕྱག་འཚལ་ལོཿ ཕྱོགས་བཅུའི་དྲེགས་པ་བསྣོལ་བའི་གདན་སྟེངས་སུཿ ཡེ་ཤེས་བསྐལ་པའི་མེ་དཔུང་འབར་བའི་སྐུཿ བདུད་འདུལ་ཡབ་ཡུམ་རྣམས་ལ་ཕྱག་འཚལ་ལོཿ དམིགས་མེད་ཆོས་ཀྱི་སྐུ་ལ་ཕྱག་འཚལ་ལོཿ ལོངས་སྤྱོད་རྫོགས་པའི་སྐུ་ལ་ཕྱག་འཚལ་ལོཿ ཅིར་ཡང་སྤྲུལ་པའི་སྐུ་ལ་ཕྱག་འཚལ་ལོཿ མི་འགྱུར་རྡོ་རྗེའི་སྐུ་ལ་ཕྱག་འཚལ་ལོཿ མངོན་པར་བྱང་ཆུབ་སྐུ་ལ་ཕྱག་འཚལ་ལོཿ དུས་གསུམ་རྒྱལ་བ་ཀུན་གྱིས་བསྒྲུབས་པ་ཡིཿ ཚོགས་གཉིས་རྫོགས་པའི་ཡོན་ཏན་མཐར་ཕྱིན་པཿ སྐུ་དང་ཡེ་ཤེས་ཚོགས་ལ་ཕྱག་འཚལ་ལོཿ ཞེས་བརྗོད་མཚན་དོན་ཡིད་ལ་བསམཿ དེས་ནི་ལུས་ཀྱི་སྡིག་སྒྲིབ་དགཿ སྐུ་ཡི་དམ་ཚིག་ཉམས་པ་བསྐངཿ གཉིས་པ་རྡོ་རྗེ་སེམས་དཔའ་བསྒོམཿ ཨཱཿ བདག་ཉིད་ཐ་མལ་སྤྱི་བོ་རུཿ པད་དཀར་ཟླ་བའི་གདན་གྱི་དབུསཿ ཧཱུྃ་ལས་བླ་མ་རྡོ་རྗེ་སེམསཿ དཀར་གསལ་ལོངས་སྤྱོད་རྫོགས་པའི་སྐུཿ རྡོ་རྗེ་དྲིལ་འཛིན་སྙེམས་མ་འཁྲིལཿ ཁྱོད་ལ་སྐྱབས་གསོལ་སྡིག་པ་སྦྱོངཿ འགྱོད་སེམས་དྲག་པོས་མཐོལ་ལོ་བཤགསཿ ཕྱིན་ཆད་སྲོག་ལ་བབ་ཀྱང་སྡོམཿ ཁྱོད་ཐུགས་ཟླ་བ་རྒྱས་པའི་སྟེངཿ ཧཱུྃ་ཡིག་མཐའ་མར་སྔགས་ཀྱིས་བསྐོརཿ བཟླས་པ་སྔགས་ཀྱིས་རྒྱུད་བསྐུལ་བསཿ ཡབ་ཡུམ་བདེ་རོལ་སྦྱོར་མཚམས་ནསཿ བདུད་རྩི་བྱང་ཆུབ་སེམས་ཀྱི་སྤྲིནཿ ག་བུར་རྡུལ་ལྟར་འཛགས་པ་ཡིསཿ བདག་དང་ཁམས་གསུམ་སེམས་ཅན་གྱིཿ ལས་དང་ཉོན་མོངས་སྡུག་བསྔལ་རྒྱུཿ ནད་གདོན་སྡིག་སྒྲིབ་ཉེས་ལྟུང་གྲིབཿ མ་ལུས་བྱང་བར་མཛད་དུ་གསོལཿ ཨོཾ་བཛྲ་སཏྭ་ས་མ་ཡ་སོགས། ཡི་གེ་བརྒྱ་པ་དུས་གཅིག་ལཿ བརྒྱ་རྩ་བརྒྱད་དུ་བཟླས་པ་ཡིསཿ ངག་གི་སྒྲིབ་པ་རྣམ་སྦྱོང་ཞིངཿ གསུང་གི་དམ་ཚིག་ཉམས་པ་བསྐངཿ དེ་རྗེས་རྡོ་རྗེ་སེམས་དཔའ་ལཿ མོས་གུས་གདུང་ཞིང་མཆི་མ་སློངཿ རཱུ་ཏྲའི་སྨྲེ་སྔགས་འདི་ཡིས་བཤགསཿ ཧོཿ ཐུགས་རྗེ་ཆེན་པོ་བཅོམ་ལྡན་རྡོ་རྗེ་སེམསཿ དྲི་མེད་དུང་མདོག་མཆོག་ཏུ་གཟུགས་བཟང་བཿ རྣམ་དག་འོད་གསལ་ཉི་ཟླ་འབུམ་བརྡལ་ཞིངཿ དཔའ་བོ་འོད་ཟེར་སྟོང་ཁམས་ལམ་མེ་བཿ སྲིད་པ་གསུམ་གྱི་ས་མཁན་སྟོན་པར་གྲགསཿ ཁམས་གསུམ་འགྲོ་བ་ཀུན་གྱི་གཉེན་གཅིག་པུཿ བྱམས་མགོན་ཐུགས་རྗེའི་ལྷ་ཁྱོད་དགོངས་སུ་གསོལཿ བདག་ནི་ཐོག་མ་མེད་པའི་དུས་མཐའ་ནསཿ ལམ་ལོག་ལམ་སྟོར་སྲིད་པའི་གོ་རར་འཁྱམསཿ སྔོན་ཚེ་ལམ་ལོག་སྡིག་པ་བྱས་པས་ནོངསཿ སྡིག་པའི་ལས་རྣམས་ཅི་སྤྱད་གནོང་ཞིང་འགྱོདཿ དར་ཅིག་དྲག་པོའི་ལས་དབང་དེ་བཙན་པསཿ འཁོར་བ་སྡུག་བསྔལ་རྒྱ་མཚོར་བྱིང་གྱུར་ཏེཿ ཞེ་སྡང་འབར་བའི་མེས་ནི་རང་རྒྱུད་བསྲེགསཿ གཏི་མུག་མུན་པ་འཐིབས་པས་ཤེས་རབ་རྨོངསཿ འདོད་ཆགས་རྒྱ་མཚོའི་འགྲམ་དུ་རྣམ་ཤེས་བྱིང་ཿ ང་རྒྱལ་དྲག་པོའི་རི་བོས་ངན་འགྲོར་མནནཿ ཕྲག་དོག་རླུང་དམར་འཚུབས་པས་འཁོར་བར་བྱིང་ཿ བདག་ཏུ་ལྟ་བའི་མདུད་པ་དམ་པོས་བཅིངསཿ འདོད་པ་མེ་དོང་འདྲ་བའི་འོབས་སུ་ལྷུངཿ སྡུག་བསྔལ་མི་བཟོད་དྲག་པོ་ཆར་ལྟར་བབཿ འདི་འདྲའི་སྡུག་བསྔལ་ཤིན་ཏུ་མི་བཟོད་ཅིངཿ སྡིག་པའི་ལས་དབང་དྲག་པོ་མེ་འབར་བསཿ རྣམ་ཤེས་དབང་པོའི་མྱུ་གུ་གདུངས་གྱུར་ཏེཿ ཕུང་པོ་སྒྱུ་མའི་ལུས་ཀྱིས་མི་བཟོད་ནཿ བྱམས་མགོན་ཐུགས་རྗེ་ཅན་གྱིས་བཟོད་ལགས་སམཿ བདག་ནི་བླུན་རྨོངས་ལས་ངན་སྡིག་པོ་ཆེཿ ལས་ཀྱི་དབང་གིས་ཁམས་གསུམ་འཁོར་བར་སྐྱེསཿ སྐྱེས་པས་འགྱོད་དེ་ལས་ལ་ཡི་རེ་ཆདཿ ཡི་ཆད་འགྱོད་ཀྱང་ལས་ལ་བཅོས་སུ་མེདཿ ལས་ཀྱི་ཤུགས་ནི་ཆུ་བོའི་གཞུང་དང་འདྲཿ ལས་དབང་ཆུ་ཀླུང་འཕྲལ་དུ་ག་ལ་ཟློགཿ རྣམ་སྨིན་ཐམས་ཅད་རང་གི་ལས་ལས་བྱུངཿ ལས་ཀྱི་རླུང་དམར་དྲག་པོ་དེས་བདས་པསཿ བདག་ནི་སྔོན་དུས་བསྐལ་པ་གྲངས་མེད་དུཿ འཁོར་བའི་བཙོན་ར་མུན་པར་འཁྱམས་པ་ལཿ བྱམས་མགོན་ཁྱོད་ཀྱི་ཐུགས་རྗེའི་བྱིན་རླབས་ཀྱིསཿ ལས་དང་ཉོན་མོངས་སྒྲིབ་པ་ཀུན་སྦྱངས་ནསཿ མ་ལྟར་བྱམས་པའི་ཞབས་དྲུང་ད་ལྟ་འཁོདཿ ཉི་ལྟར་འོད་འབར་ཟླ་ལྟར་མདངས་གསལ་བའིཿ ཐུགས་རྗེའི་ཞལ་ཉིད་བལྟ་བས་མི་ངོམས་པཿ ཐོག་མ་མེད་ནས་མ་རིག་ལིང་རྟོག་གིསཿ ལྡོངས་ཏེ་ཆུ་བུར་མིག་གིས་མ་མཐོང་ནཿ འགྲོ་བའི་མགོན་ཁྱོད་ད་ལྟ་གང་ན་བཞུགསཿ ལས་ངན་དྲག་པོ་ཤིན་ཏུ་མི་བཟོད་པསཿ ཤིན་ཏུ་སྐྲག་ཅིང་སྐྱི་གཡའ་རབ་འཇིགས་ནསཿ དུང་དུང་གདུང་བའི་སྨྲེ་སྔགས་འདི་འདོན་ཞིངཿ ཉམ་ཐག་ཕོངས་པའི་ང་རོ་འདོན་ལགས་ནཿ བྱམས་མགོན་ཐུགས་རྗེས་དུས་འདིར་མི་དགོངས་སམཿ ནམ་ཞིག་འཆི་འཕོས་ལུས་སེམས་འབྲལ་བའི་ཚེཿ མཛའ་བཤེས་གྲོགས་དང་བྲལ་ནས་གཤིན་རྗེས་ཁྲིདཿ དེ་ཚེ་འཇིག་རྟེན་ཉེ་དུས་མི་བསྟོངས་ཏེཿ ལས་ཀྱི་དབང་གིས་བདག་ཉིད་གཅིག་པོར་ཁྲིདཿ དུས་དེར་བདག་ལ་མགོན་སྐྱབས་མ་མཆིས་ཀྱིཿ གང་གིས་ཕྱི་བཤོལ་དུས་ལ་མ་བཞེས་པརཿ ད་ལྟ་ཉིད་དུ་ཐུགས་རྗེའི་སྤྱན་གྱིས་གཟིགསཿ ལས་ཀྱིས་མནར་བའི་སྐྱེ་བོ་བདག་འདྲ་བཿ ཐོག་མ་མེད་པའི་དུས་ནས་ལོག་བརྟགས་པསཿ ཁམས་གསུམ་འཁོར་བའི་གནས་ལས་མ་ཐར་སྟེཿ བསྐལ་པ་གྲངས་མེད་སྐྱེ་བ་ཇི་སྙེད་དུཿ རྡོས་བཅས་ལུས་ནི་གྲངས་མེད་ཞིག་གྱུར་སྟེཿ ཤ་རུས་བསགས་ན་འཇིག་རྟེན་གཏོས་དང་མཉམཿ རྣག་ཁྲག་བསགས་ན་རྒྱ་མཚོ་ཆེན་པོ་ཙམཿ ལས་འཕྲོ་བསགས་ན་བསམ་འདས་བརྗོད་མི་ལང་ཿ ཁམས་གསུམ་བསྒྲངས་ཤིང་སྐྱེ་ཤིའི་ཁ་རྒྱུད་ཀྱངཿ བྱས་པའི་ལས་རྣམས་དོན་མེད་ཆུད་རེ་ཟོསཿ སྐྱེ་བ་གྲངས་མེད་ཇི་སྙེད་དེ་ཙམ་ལཿ སྐྱེ་བ་གཅིག་གཅིག་ཁོ་ན་ཙམ་གྱི་ལསཿ བླ་མེད་བྱང་ཆུབ་དོན་དུ་རབ་སྤྱད་ནཿ དེ་ཙམ་བྱས་པའི་ལས་ལ་དོན་ཡོད་པསཿ དོན་གྱི་ཡོང་ཡེ་མྱ་ངན་འདས་ཟིན་ནཿ ལས་ཀྱི་དབང་བཙན་ཉོན་མོངས་སྟོབས་ཆེ་བསཿ ཤ་ཁྲག་དྲ་བའི་ལུས་བླངས་འཁོར་བར་འཁྱམསཿ སྡུག་བསྔལ་བཟོད་དཀའ་སྲིད་པའི་བཙོན་རར་ཚུདཿ མི་བཟོད་དྲག་པོའི་སྡུག་བསྔལ་འདི་ལྟ་བུཿ ཉེས་བྱས་ཐམས་ཅད་རང་གི་ལས་ལས་བྱུངཿ ཐུགས་རྗེ་ཆེན་པོས་ལས་ཀྱི་རྒྱུན་བཅད་དོཿ ཉོན་མོངས་ལས་ཀྱི་རླུང་ནི་བཟློག་ཏུ་གསོལཿ མ་རིག་ལོག་པའི་ལས་འདི་དབང་བཙན་ནསཿ མི་ཤེས་མུན་པའི་ནང་དུ་གཏན་འཁྱམས་ནཿ ཡེ་ཤེས་སྒྲོན་མེའི་ཟེར་གྱིས་མི་གཏོང་ངམཿ ཉེས་བྱས་ལས་ཀྱི་རྣམ་སྨིན་མི་བཟོད་ནཿ ཐུགས་རྗེ་ཆེན་པོས་ཕྲིན་ལས་མི་མཛད་དམཿ ཕྱིན་ཅི་ལོག་གི་གཡང་སར་ལྟུང་ལགས་ནཿ ཐུགས་རྗེས་མྱུར་མགྱོགས་ཕྱག་གིས་མི་འཛིན་ནམཿ དུག་གསུམ་བཟོད་དཀའི་ནད་ཀྱིས་གདུངས་ལགས་ནཿ ཐབས་མཁས་ཐུགས་རྗེའི་སྨན་གྱིས་མི་གསོ་འམཿ ལས་ཀྱི་རྣམ་སྨིན་སྡུག་བསྔལ་མེ་འབར་ནཿ ཐུགས་རྗེ་བསིལ་བའི་ཆར་རྒྱུན་མི་འབེབས་སམཿ སྡུག་བསྔལ་འཁོར་བའི་འདམ་དུ་བྱིང་གྱུར་ནཿ ཐབས་མཁས་ཐུགས་རྗེའི་ལྕགས་ཀྱུས་མི་འདྲེན་ནམཿ ཁམས་གསུམ་འཁོར་བའི་གནས་སུ་སྦྱངས་བྱས་ནསཿ ནམ་ཞིག་རང་གི་འབྲས་བུ་ཐོབ་པའི་ཚེཿ འཕགས་པའི་ཐུགས་རྗེ་ཅི་འཚལ་དོན་མ་མཆིསཿ བདག་ཉིད་ལས་འཕྲོ་དབང་བཙན་བཞག་ན་ལྟཿ ཐུགས་རྗེ་ཆེ་ཞེས་སུ་ལ་ཅི་ཞིག་བགྱིཿ དཔའ་བོ་ཁྱེད་ལ་ཐུགས་རྗེའི་སྟོབས་མངའ་ཞིང་ཿ སྔོན་བྱུང་འབྲེལ་བའི་ལས་ཀྱི་འཕྲོ་བཙན་ནཿ ཡལ་ཡོལ་བཏང་སྙོམས་ལེ་ལོ་མ་མཛད་པརཿ སྙིང་ནས་ད་གཟིགས་ཐུགས་རྗེ་རྒྱལ་བའི་ལྷཿ ཞེས་བརྗོད་རྡོ་རྗེ་སེམས་དཔའ་ཡིསཿ ཚངས་པར་སྩོལ་བ་ཞལ་བཞེས་ནསཿ བདག་དང་རོ་གཅིག་འདྲེས་པའི་ངངཿ མཉམ་པར་གཞག་པ་སྒྲིབ་སྦྱོང་གནདཿ འདིས་ནི་ཉེས་ཚོགས་རྣམ་དག་ཅིང་ཿ མཚམས་མེད་ལས་ཀྱང་དོང་ནས་དཀྲུགསཿ ས་མ་ཡཿ གསུམ་པ་ལྟ་བའི་ཀློང་བཤགས་སྒོམཿ ཨཱཿ འཁོར་འདས་བྱེད་པོ་བྱང་ཆུབ་སེམསཿ གཞི་མེད་རྩ་བྲལ་རྫོགས་ཆེན་དོནཿ བརྗོད་བྲལ་བློ་འདས་ཆེན་པོ་ལཿ ཉམས་དང་བཤགས་པའི་མཁན་པོ་མེདཿ ཡེ་བསྲུངས་ཐིག་ལེ་ཉག་གཅིག་པུཿ སྤང་བླང་ཡོངས་གྲོལ་ཕྱལ་བ་ཆེཿ རང་ཤར་ལྷུན་གྲུབ་ཆོས་ཀྱི་སྐུཿ དེ་ལྟར་རྟོགས་ན་བཤགས་པའི་རྒྱལཿ ཞེས་བརྗོད་དགོངས་པ་དབྱིངས་ལ་གཏདཿ འ་ཨ་ཧ་ཤ་ས་མཿ སྟོང་ཉིད་ངང་ནས་ཡིག་དྲུག་བཟླཿ ཉེས་རྣམས་མ་ལུས་ཀུན་རྫོབ་ཕྱིརཿ མེ་ལོང་བག་རྡུལ་ཕྱིས་བཞིན་བྱཿ ཡིད་སྒྲིབ་དག་ཅིང་ཐུགས་དམ་བསྐངཿ ས་མ་ཡཿ བཞི་པ་དོང་སྤྲུགས་སྤྱི་བཤགས་ནིཿ ཧོཿ དགོངས་ཤིག་སྟོན་པ་རྡོ་རྗེ་འཆངཿ གཟིགས་ཤིག་རིགས་ལྔ་བདེ་བར་གཤེགསཿ སྒྱུ་འཕྲུལ་ཞི་ཁྲོ་རབ་འབྱམས་ལྷཿ བདག་ལ་གསན་ཅིང་དགོངས་སུ་གསོལཿ བདག་ཅག་གསང་སྔགས་སྒོར་ཞུགས་ཀྱངཿ ལས་དང་ཉོན་མོངས་སྟོབས་ཆེ་བསཿ ལྟ་སྒོམ་གདེངས་སུ་མ་གྱུར་ཅིངཿ མཛད་སྤྱོད་ཀླུངས་སུ་མ་ཆུད་པསཿ གསང་སྔགས་ཟབ་མོ་སྤྱད་ཉེས་ཏེཿ རྩ་བ་ཡན་ལག་དམ་ཚིག་རྣམསཿ ཉམས་འགལ་རལ་དང་འདས་པ་སོགསཿ རྒྱལ་བ་ཞི་ཁྲོའི་སྤྱན་སྔར་བཤགསཿ དངོས་གྲུབ་ཀུན་གྱི་འབྱུང་གནས་ཆེཿ རྡོ་རྗེ་སློབ་དཔོན་མི་རུ་བཟུངཿ སྐུ་མཆོག་བརྙས་ཤིང་བཀའ་གསང་བརྐུསཿ གཤེ་སྐུར་བཏབ་ཅིང་ཡ་བོ་བཟུངཿ སྐུ་ལ་བརྡོ་བའི་སྔགས་བཟློག་བྱསཿ གཟུངས་མ་སྲས་ལ་ཆགས་སྡང་ཤོརཿ ཐུགས་དཀྲུགས་ཐུགས་སུན་ཕྱུང་བའི་ལསཿ རྒྱལ་བ་ཞི་ཁྲོའི་སྤྱན་སྔར་བཤགསཿ ལྷ་དང་སྔགས་ཀྱི་དེ་ཉིད་སོགསཿ བཀའ་དྲིན་ནོད་ཀྱང་དོན་ལ་གཡེལཿ ཏིང་འཛིན་མ་བསྒོམས་བཟླས་བརྗོད་ཆགཿ བསྙེན་སྒྲུབ་གཡེལ་ཞིང་ཚོགས་མཆོད་ཆུང་ཿ དུས་མཆོད་ཆག་དང་ལོ་ཟླར་འདསཿ ཟབ་མོའི་ལྟ་སྤྱོད་མངོན་དུ་ཕྱུངཿ སྤྱིར་གསང་བཞི་དང་བར་གསང་བཞིཿ གསང་བར་འོས་དང་གཉེར་གཏད་པའིཿ གསང་སྒོ་ཡལ་བར་འདོར་བ་སོགསཿ སྐུ་གསུང་ཐུགས་ཀྱི་དམ་ཉམས་པསཿ མནར་མེད་དམྱལ་བའི་རྒྱུ་བསགས་པཿ རྒྱལ་བ་ཞི་ཁྲོའི་སྤྱན་སྔར་བཤགསཿ གཞན་ཡང་བདུད་ཀྱི་དབང་གྱུར་ནསཿ རང་ལ་དབང་མེད་བླ་མའི་སཿ བཟུང་ནས་ཟབ་མོའི་དབང་ཟོས་ཤིངཿ བཀའ་ལ་གཟུ་ལུམས་རས་ཆོད་བྱསཿ གབ་པའི་གསང་བ་མ་རྟོགས་པརཿ སྦས་པའི་གསང་བར་མངོན་འཆེལ་ཏེཿ གསང་སྔགས་ཟབ་མོའི་སྤྱོད་པ་རྣམསཿ བབ་ཆོལ་རུ་ཏྲ་ལྟ་བུར་སྤྱདཿ སྤྱི་སྒོས་ཉེ་བའི་མཆེད་རྣམས་དངཿ ཁྱད་པར་རྡོ་རྗེའི་སྤུན་གྲོགས་ལཿ ངན་སེམས་དཔྱ་སེམས་བརྐུ་འཕྲོག་དང་ཿ རྡེག་བཙོག་ངན་སྨྲས་གནོད་པ་ཤོརཿ འདོད་ལ་སྲེད་ཅིང་བརྐམ་པ་ཡིསཿ དཀོན་མཆོག་གསུམ་གྱི་དཀོར་འཕྲོགས་ཤིངཿ སྒྲུབ་མཆོད་ཚོགས་ཀྱི་སྤྱང་ཀི་བྱསཿ གཙང་སྦྲ་ཉམས་དང་དམ་ཉམས་འདྲེསཿ ཕ་མ་དབུལ་ཕོངས་ནད་པའི་ཟསཿ དཀའ་ཐུབ་དབེན་པའི་སྒྲུབ་རྒྱགས་ལཿ ཚོད་ཡོད་པྲེ་ཏའི་རྒྱུ་བསགས་པཿ རྒྱལ་བ་ཞི་ཁྲོའི་སྤྱན་སྔར་བཤགསཿ ཡན་ལག་དམ་ཚིག་ཉི་ཤུ་ལྔའིཿ སྤྱད་པར་བྱ་བའི་དམ་ཚིག་ནིཿ ཞིང་བཅུ་སྒྲོལ་དང་བདེ་སྟོང་སྦྱོརཿ འཇུར་གེགས་ཅན་གྱི་ཟས་དང་ནོརཿ མཆོད་སྦྱིན་སླད་དུ་མ་བྱིན་བླངཿ ཟབ་མོ་གསང་ཕྱིར་རྫུན་དུ་སྨྲཿ དོན་ཆེན་སྒྲུབ་པའི་ངག་འཁྱལ་རྣམསཿ བརྟུལ་ཞུགས་ཆུང་བས་ལམ་མ་ལོངསཿ སྤྱོད་པ་རྩིངས་པས་ཐ་མལ་གོལཿ དེ་ཡང་ཞི་ཁྲོའི་སྤྱན་སྔར་བཤགསཿ མི་སྤང་བ་ཡི་དམ་ཚིག་ལྔཿ འདོད་ཆགས་ཞེ་སྡང་གཏི་མུག་དངཿ ང་རྒྱལ་ཕྲག་དོག་རྣམ་པ་ལྔཿ ཡེ་ཤེས་རིགས་ལྔའི་རང་བཞིན་ལཿ ཐེག་དམན་བློ་ཡིས་སྤངས་པ་དངཿ ངོ་བོར་མ་གྲོལ་རང་རྒྱུད་ཤོརཿ དེ་ཡང་ཞི་ཁྲོའི་སྤྱན་སྔར་བ་ཤགསཿ དང་དུ་བླང་བའི་དམ་ཚིག་ལྔཿ དྲི་ཆེན་དྲི་ཆུ་མཱཾ་ས་དངཿ རཀྟ་རྡོ་རྗེའི་ཟིལ་པ་ལྔཿ དངོས་གྲུབ་ཆེན་པོ་སྒྲུབ་པའི་རྫསཿ ཡེ་ནས་བདུད་རྩིའི་རང་བཞིན་ལཿ གཙང་དམེའི་བློ་ཡིས་བྲམ་ཟེར་གོལཿ ཡང་ན་བག་མེད་སྨྱོ་ཐབས་སྤྱདཿ ཆོས་ཉིད་མཉམ་པར་མ་རྟོགས་པཿ དེ་ཡང་ཞི་ཁྲོའི་སྤྱན་སྔར་བཤགསཿ ཤེས་པར་བྱ་བའི་དམ་ཚིག་ལྔཿ ཕུང་པོ་རྒྱལ་བ་ལྔར་མ་ཤེསཿ འབྱུང་ལྔ་རིགས་ཀྱི་ཡུམ་ལྔ་དངཿ དབང་ཡུལ་སེམས་དཔའ་སེམས་མ་སོགསཿ གནས་འགྱུར་རང་བཞིན་མ་ཤེས་པསཿ རང་གར་བལྟས་ཤིང་བརྙས་པ་ཤོརཿ དེ་ཡང་ཞི་ཁྲོའི་སྤྱན་སྔར་བཤགསཿ བསྒྲུབ་པར་བྱ་བའི་དམ་ཚིག་ལྔཿ རྡོ་རྗེ་རིན་ཆེན་པདྨ་དངཿ ཕྲིན་ལས་དེ་བཞིན་གཤེགས་པའི་རིགསཿ སྣོད་བཅུད་ཆེན་པོར་ཡེ་སངས་རྒྱསཿ ཀུན་གཞིའི་དབྱིངས་ལ་དངོས་གྲུབ་རྒྱུནཿ བཞུགས་ཀྱང་སྒྲུབ་པ་རྔོ་མ་ཐོགསཿ ཀློང་དུ་མ་གྱུར་རྩལ་ཤུགས་ཆུངཿ དེ་ཡང་ཞི་ཁྲོའི་སྤྱན་སྔར་བཤགསཿ གཞན་ཡང་ངེས་གསང་ཐེག་པ་ཡིཿ ཁྱད་པར་དམ་ཚིག་ཉི་ཤུ་དངཿ སྤྱོད་པ་རྒྱུན་གྱི་དམ་ཚིག་བཞིཿ རང་བཞིན་ལྟ་བའི་དམ་ཚིག་བཞིཿ གལ་མདོ་ངེས་པའི་དམ་ཚིག་གསུམཿ ལྷག་པའི་དམ་ཚིག་ཉམས་པ་སོགསཿ གསང་སྔགས་སྤྱི་ཡི་དམ་ཚིག་དངཿ མདོར་ན་ཁ་ན་མ་ཐོའི་ལསཿ འཇིག་རྟེན་ཁྲེལ་དང་ངོ་ཚ་ཉམསཿ ཉན་ཐོས་རང་རྒྱལ་བྱང་སེམས་ཀྱིཿ བཅས་དང་རང་བཞིན་ལས་ཉམས་པསཿ ངན་སོང་འཁོར་བའི་རྒྱུ་བསགས་པཿ མ་ལུས་མཐོལ་ཞིང་བཤགས་ལགས་ནཿ འཕགས་པ་ལགས་པས་གནང་བར་མཛོདཿ སེམས་ཅན་ལགས་པས་ནོར་འཁྲུལ་མཆིསཿ སྒྱུ་མ་ལགས་པས་ཚངས་པར་སྩོལཿ ཐབས་ལ་མཁས་པས་བྱང་བར་མཛོདཿ ཧོཿ དམ་ཚིག་ཉམས་པའི་ཆད་པ་མི་བཟོད་པསཿ རྡོ་རྗེ་མཁའ་འགྲོས་སྙིང་ཁྲག་འཐུངས་པ་དངཿ ཚེ་ཐུང་ནད་མང་ནོར་ཡལ་དགྲས་འཇིགས་དངཿ མནར་མེད་དམྱལ་བ་ཤིན་ཏུ་སྐྱི་གཡའ་བརཿ སྡུག་བསྔལ་མི་བཟོད་ཡུན་རིང་གནས་པ་རྣམསཿ བདག་གི་དམ་ཚིག་བཤགས་པར་བགྱིས་པ་ཡིསཿ ཉམས་ཤིང་ཆགས་པ་ཐམས་ཅད་སོར་ཆུད་དེཿ གོ་འཕང་ཆེན་པོའི་འབྲས་བུ་ཐོབ་པར་ཤོགཿ གཉིས་པ་སྐོང་ལ་རྣམ་གྲངས་བདུནཿ དང་པོ་ཀུན་བཟང་མཆོད་སྤྲིན་ནིཿ ཧོཿ སྣང་སྲིད་ཡོངས་རྫོགས་དམ་པ་རིགས་བརྒྱའི་ལྷཿ སྣོད་བཅུད་མ་ལུས་འདོད་ཡོན་རོལ་པའི་རྒྱནཿ ཀུན་བཟང་མཆོད་པའི་སྤྲིན་ཕུང་འབྱམས་ཀླས་པཿ ཆོས་ཉིད་མངོན་སུམ་དོན་གྱི་ལྷ་ལ་འབུལཿ ཉམས་སྣང་གོང་འཕེལ་ངང་དུ་བཞེས་ནས་ཀྱངཿ རིག་པ་ཚད་ཕེབས་ཀློང་དུ་ཚོགས་རྫོགས་ཤིངཿ ཆོས་ཟད་བློ་འདས་ཆེན་པོར་སངས་རྒྱས་ཏེཿ འཁོར་བ་དོང་ནས་སྤྲུགས་པའི་དངོས་གྲུབ་སྩོལཿ ནམ་མཁའ་མཛོད་ཀྱི་སྔགས་རྒྱ་བརྗོདཿ གཉིས་པ་སྦྱོར་བ་སྨན་གྱི་སྐོངཿ མཐེབ་སྲིན་ཉི་ཟླའི་གའུས་འབུལཿ ཧཱུྃཿ བདེ་ཆེན་འཁོར་ལོའི་བྷནྡྷ་རུཿ ཧཾ་ཡིག་རང་བྱུང་བདུད་རྩིར་བསྐྱིལཿ སྲོག་འཛིན་ཡེ་ཤེས་ཐིག་ལེ་འདིསཿ སྤྲུལ་སྐུའི་ལྷ་ཚོགས་ཐུགས་དམ་སྐོངཿ བསྐངས་གྱུར་དབང་དང་དངོས་གྲུབ་སྩོལཿ ལོངས་སྤྱོད་འཁོར་ལོའི་བྷནྡྷ་རུཿ བཟའ་བཏུང་ལྷུན་གྲུབ་བདུད་རྩིར་བསྐྱིལཿ རྩ་མདུད་རང་གྲོལ་ཐིག་ལེ་འདིསཿ ལོངས་སྐུའི་ལྷ་ཚོགས་ཐུགས་དམ་སྐོངཿ བསྐངས་གྱུར་དབང་དང་དངོས་གྲུབ་སྩོལཿ སྤྲུལ་པའི་འཁོར་ལོའི་བྷནྡྷ་རུཿ འབར་འཛག་བཅུད་ཀྱི་བདུད་རྩིར་བསྐྱིལཿ བདེ་བ་ཆེན་པོའི་ཐིག་ལེ་འདིསཿ མི་འགྱུར་རྡོ་རྗེའི་ཐུགས་དམ་སྐོངཿ བསྐངས་གྱུར་དབང་དང་དངོས་གྲུབ་སྩོལཿ བདེ་སྐྱོང་འཁོར་ལོའི་བྷནྡྷ་རུཿ བྱང་ཆུབ་སེམས་མཆོག་བདུད་རྩིར་བསྐྱིལཿ དགའ་བཞི་དབྱིངས་གྲོལ་ཐིག་ལེ་འདིསཿ མངོན་པར་བྱང་ཆུབ་ཐུགས་དམ་སྐོངཿ བསྐངས་གྱུར་དབང་དང་དངོས་གྲུབ་སྩོལཿ གསུམ་པ་སྒྲོལ་བ་རཀྟའི་སྐོངཿ ཧཱུྃཿ ཀློང་ལྔ་དབྱིངས་ཀྱི་ཀ་པཱ་ལརཿ སྣང་སྲིད་ཡུམ་གྱི་རཀྟར་བསྐྱིལཿ ཀུན་ཏུ་བཟང་པོའི་རྫས་མཆོག་འདིསཿ ཞི་ཁྲོའི་ལྷ་ཚོགས་ཐུགས་དམ་སྐོངཿ བསྐངས་གྱུར་དབང་དང་དངོས་གྲུབ་སྩོལཿ སྟོང་ཆེན་ཡུམ་གྱི་ཀ་པཱ་ལརཿ སྣང་སྲིད་བཅུད་ཀྱི་རཀྟར་བསྐྱིལཿ གཙང་དམེ་བྲལ་བའི་རྫས་མཆོག་འདིསཿ ཞི་ཁྲོའི་ལྷ་ཚོགས་ཐུགས་དམ་སྐོངཿ བསྐངས་གྱུར་དབང་དང་དངོས་གྲུབ་སྩོལཿ ཨེ་དབྱིངས་ཆོས་འབྱུང་ཀ་པཱ་ལརཿ ཞིང་བཅུའི་སྙིང་ཁྲག་རཀྟར་བསྐྱིལཿ འཁོར་བ་ལུགས་ལྡོག་རྫས་མཆོག་འདིསཿ ཞི་ཁྲོའི་ལྷ་ཚོགས་ཐུགས་དམ་སྐོངཿ བསྐངས་གྱུར་དབང་དང་དངོས་གྲུབ་སྩོལཿ ཨེ་དབྱིངས་ཆོས་འབྱུང་ཀ་པཱ་ལརཿ ཞིང་བཅུའི་སྙིང་ཁྲག་རཀྟར་བསྐྱིལཿ འཁོར་བ་ལུགས་ལྡོག་རྫས་མཆོག་འདིསཿ ཞི་ཁྲོའི་ལྷ་ཚོགས་ཐུགས་དམ་སྐོངཿ བསྐངས་གྱུར་དབང་དང་དངོས་གྲུབ་སྩོལཿ དབུ་མ་རྩ་ཡི་ཀ་པཱ་ལརཿ དུག་གསུམ་རྣམ་རྟོག་རཀྟར་བསྐྱིལཿ རྒྱུད་དྲུག་ཀུན་གྲོལ་རྫས་མཆོག་འདིསཿ ཞི་ཁྲོའི་ལྷ་ཚོགས་ཐུགས་དམ་སྐོངཿ བསྐངས་གྱུར་དབང་དང་དངོས་གྲུབ་སྩོལཿ སྒྲ་གཅན་རླུང་གི་ཀ་པཱ་ལརཿ ཙནྜ་ལཱི་ཡི་རཀྟར་བསྐྱིལཿ དགའ་བཞི་བདེ་སྟོང་རྫས་མཆོག་འདིསཿ ཞི་ཁྲོའི་ལྷ་ཚོགས་ཐུགས་དམ་སྐོངཿ བསྐངས་གྱུར་དབང་དང་དངོས་གྲུབ་སྩོལཿ བཞི་པ་ཟུང་འཇུག་གཏོར་མའི་སྐོངཿ ཧཱུྃ་ཧྲཱིཿ མ་བཅོས་ཀློང་ཡངས་གཏོར་གཞོང་དུཿ སྣང་སྲིད་ཡོངས་གྲོལ་གཏོར་མར་བཤམསཿ དངོས་འཛིན་བྲལ་བའི་དམ་རྫས་འདིསཿ རང་སྣང་ཞི་ཁྲོའི་ཐུགས་དམ་སྐོངཿ བསྐངས་གྱུར་དབང་དང་དངོས་གྲུབ་སྩོལཿ བདེན་མེད་སྒྱུ་མའི་གཏོར་གཞོང་དུཿ གཏད་མེད་ཆོས་སྐུའི་གཏོར་མར་བཤམསཿ ཚོགས་དྲུག་རང་ཡན་དམ་རྫས་འདིསཿ རང་སྣང་ཞི་ཁྲོའི་ཐུགས་དམ་སྐོངཿ བསྐངས་གྱུར་དབང་དང་དངོས་གྲུབ་སྩོལཿ ལྷུན་གྲུབ་ཕུང་པོའི་གཏོར་གཞོང་དུཿ དོན་སྣོད་རང་བྱུང་གཏོར་མར་བཤམསཿ ཁྱད་པར་རྨད་བྱུང་དམ་རྫས་འདིསཿ རང་སྣང་ཞི་ཁྲོའི་ཐུགས་དམ་སྐོངཿ བསྐངས་གྱུར་དབང་དང་དངོས་གྲུབ་སྩོལཿ ལྔ་ཕུང་སྒྱུ་མའི་གཏོར་གཞོང་དུཿ བདུད་རྩི་ལྔ་ཡི་གཏོར་མར་བཤམསཿ རིགས་ལྔ་བཅུད་ཀྱི་དམ་རྫས་འདིསཿ རང་སྣང་ཞི་ཁྲོའི་ཐུགས་དམ་སྐོངཿ བསྐངས་གྱུར་དབང་དང་དངོས་གྲུབ་སྩོལཿ བྷ་ག་དབྱིངས་ཀྱི་གཏོར་གཞོང་དུཿ ལིང་ག་རིག་པའི་གཏོར་མར་བཤམསཿ ཟུང་འཇུག་བདེ་ཆེན་དམ་རྫས་འདིསཿ རང་སྣང་ཞི་ཁྲོའི་ཐུགས་དམ་སྐོངཿ བསྐངས་གྱུར་དབང་དང་དངོས་གྲུབ་སྩོལཿ ལྔ་པ་སྦྱོར་སྒྲོལ་ཚོགས་ཀྱི་སྐོངཿ དང་པོ་བྱིན་གྱིས་བརླབ་པ་ནིཿ ཧཱུྃཿ བདག་ཉིད་ཐུགས་ལས་རཾ་ཡཾ་ཁཾཿ འཕྲོས་པས་ཚོགས་ཀྱི་ཉེས་སྐྱོན་སྦྱངསཿ ཨོཾ་ཨཱཿཧཱུྃ་གིས་བདུད་རྩིར་བསྒྱུརཿ འདོད་ཡོན་ནམ་མཁའ་མཉམ་པར་སྤེལཿ རཾ་ཡཾ་ཁཾཿ ཨོཾ་ཨཱཿཧཱུྃཿ གཉིས་པ་ཚོགས་ཞིང་སྤྱན་འདྲེན་ནིཿ ཧཱུྃཿ འོག་མིན་བདེ་ཆེན་ཞིང་ཁམས་དངཿ ནུབ་ཕྱོགས་ཨུ་རྒྱན་སྤྲུལ་པའི་གླིངཿ ཁྱད་པར་རྔ་ཡབ་དཔལ་གྱི་རིཿ གནས་ཡུལ་དུར་ཁྲོད་བརྒྱད་སོགས་ནསཿ རིག་འཛིན་འདུས་པའི་ལྷ་ཚོགས་རྣམསཿ ཚོགས་ལ་སྤྱན་འདྲེན་གཤེགས་སུ་གསོལཿ དུར་ཁྲོད་ཚོགས་ཁང་ཉམས་རེ་དགའཿ མཁའ་འགྲོའི་འདུ་བ་བག་རེ་བྲོཿ རྣལ་འབྱོར་ཕོ་མོ་དམ་རེ་གཙངཿ འདོད་ཡོན་ཚོགས་མཆོད་མདངས་དང་ལྡནཿ འདིར་གཤེགས་ཚོགས་ལ་བྱིན་ཆེན་ཕོབཿ མཆོག་དང་ཐུན་མོང་དངོས་གྲུབ་སྩོལཿ གསུམ་པ་ཚོགས་ཕུད་ཕུལ་བ་ནིཿ ཧཱུྃཿ རྩ་གསུམ་རིག་འཛིན་རྒྱ་མཚོ་དངཿ ཌཱཀྐི་ཆོས་སྲུང་དམ་ཅན་ལཿ འདོད་ཡོན་ལོངས་སྤྱོད་ཚོགས་མཆོད་འབུལཿ མཆོག་དང་ཐུན་མོང་དངོས་གྲུབ་སྩོལཿ གྷ་ན་ཙཀྲ་པཱུ་ཙ་ཁཱ་ཧིཿ བཞི་པ་བར་པ་བཤགས་པ་ནིཿ ཧཱུྃ་བདག་གིས་ཚེ་རབས་ཐོག་མེད་ནསཿ གསང་སྔགས་ཐེག་ཆེན་སྒོར་ཞུགས་ཏེཿ རྩ་བ་ཡན་ལག་དམ་ཉམས་པཿ འདོད་ཡོན་ཚོགས་ཀྱི་མཆོད་པས་བཤགསཿ བཛྲ་ས་མ་ཡ་ཨཱཿ ལྔ་པ་བསྒྲལ་ཞིང་བསྟབ་པ་ནིཿ ཧཱུྃཿ མ་རིག་ལས་ཉོན་གཟུང་འཛིན་གྱིསཿ བསྐྱེད་པའི་བདག་འཛིན་རཱུ་ཏྲ་ཀུནཿ གཟུགས་ལ་ཕོབ་ཅིག་ྈྈ་ནྲྀ་ཏྲི་ཛཿ རྣམ་ཤེས་ཆོས་དབྱིངས་ཀློང་དུ་ཕཊཿ གཟུགས་ཕུང་ཚོགས་ཀྱི་འཁོར་ལོར་རོལཿ རཱུ་ཏྲ་སརྦ་ཧ་ལ་པཉྩ་པཱུ་ཙ་ཁཱ་ཧིཿ དྲུག་པ་ལྷག་མ་བསྔོ་བ་ནིཿ ཧཱུྃཿ དཀྱིལ་འཁོར་ཆེན་པོའི་མུ་རན་ལཿ གནས་པའི་དབང་ཕྱུག་གིང་ལངྐཿ ལྷག་མའི་གཏོར་མ་འདི་བཞེས་ལཿ རྣལ་འབྱོར་སྒྲུབ་པའི་བར་ཆད་སྲུངསཿ ཨུཥ་ཙི་ྈྈཊ་བྷ་ལིངྟ་ཁཱ་ཧིཿ བདུན་པ་སྣང་གསལ་མར་མེའི་སྐོངཿ ཨཱཿ ཀུན་གཞི་རང་བྱུང་ཀོང་བུ་རུཿ རྣམ་ཤེས་རྣམ་དག་སྡོང་བུ་བཙུགསཿ ཆོས་དབྱིངས་ཡེ་ཤེས་མར་ཁུས་གཏམསཿ རིག་པ་རང་གསལ་སྒྲོན་མེ་སྤརཿ ཀ་དག་གཞི་ཡི་སྣང་བ་འདིསཿ མི་བསྐྱོད་རིགས་མཆོག་ཐུགས་དམ་སྐོངཿ བསྐངས་གྱུར་དབང་དང་དངོས་གྲུབ་སྩོལཿ དབྱིངས་རིག་སྟོང་པའི་ཀོང་བུ་རུཿ ལྷུན་གྲུབ་གཟུགས་སྣང་སྡོང་བུ་བཙུགསཿ མེ་ལོང་ཡེ་ཤེས་མར་ཁུས་གཏམསཿ ཤེས་རབ་རང་བྱུང་སྒྲོན་མེ་སྦརཿ ཆོས་ཉིད་མངོན་སུམ་སྣང་བ་འདིསཿ རྣམ་སྣང་རིགས་མཆོག་ཐུགས་དམ་སྐོངཿ བསྐངས་གྱུར་དབང་དང་དངོས་གྲུབ་སྩོལཿ ཀ་ཏི་ཤེལ་གྱི་ཀོང་བུ་རུཿ ཚོར་བ་རྣམ་དག་སྡོང་བུ་བཙུགསཿ མཉམ་ཉིད་ཡེ་ཤེས་མར་ཁུས་གཏམསཿ རྒྱངས་ཞགས་འོད་གསལ་སྒྲོན་མེ་སྦརཿ ཉམས་སྣང་གོང་འཕེལ་སྣང་བ་འདིསཿ རིན་ཆེན་རིགས་མཆོག་ཐུགས་དམ་སྐོངཿ བསྐངས་གྱུར་དབང་དང་དངོས་གྲུབ་སྩོལཿ འཇའ་ཟེར་ཐིག་ལེའི་ཀོང་བུ་རུཿ འདུ་ཤེས་རྣམ་དག་སྡོང་བུ་བཙུགསཿ སོར་རྟོག་ཡེ་ཤེས་མར་ཁུས་གཏམསཿ དག་པ་དབྱིངས་ཀྱི་སྒྲོན་མེ་སྦརཿ རིག་པ་ཚད་ཕེབས་སྣང་བ་འདིསཿ སྣང་མཐའི་རིགས་མཆོག་ཐུགས་དམ་སྐོངཿ བསྐངས་གྱུར་དབང་དང་དངོས་གྲུབ་སྩོལཿ གཞོན་ནུ་བུམ་སྐུའི་ཀོང་བུ་རུཿ འདུ་བྱེད་རྣམ་དག་སྡོང་བུ་བཙུགསཿ བྱ་གྲུབ་ཡེ་ཤེས་མར་ཁུས་གཏམསཿ ཐིག་ལེ་སྟོང་པའི་སྒྲོན་མེ་སྦརཿ བློ་བྲལ་ཆོས་ཟད་སྣང་བ་འདིསཿ དོན་གྲུབ་རིགས་མཆོག་ཐུགས་དམ་སྐོངཿ བསྐངས་གྱུར་དབང་དང་དངོས་གྲུབ་སྩོལཿ མར་མེའི་སྨོན་ལམ་ནིཿ ཧཱུྃཿ རིག་པ་བྱང་ཆུབ་སེམས་ཀྱི་དཀྱིལ་འཁོར་དུཿ རིག་གདངས་སློབ་དཔོན་གཉེན་གྱིས་དབུ་བཟུང་ནསཿ རིག་རྩལ་ལུ་གུ་རྒྱུད་ཀྱི་མཆེད་ལྕམ་རྣམསཿ རིག་སྟོང་རྗེན་པའི་གཤིས་ལ་མི་འདའ་ཤོགཿ ནམ་ཞིག་གདོད་མའི་ལྷུམས་སུ་ཞུགས་པའི་ཚེཿ མ་རིག་འཁྲུལ་པའི་གཡང་སར་མི་བཏང་ཞིངཿ འཁོར་བ་ལུ་གུ་རྒྱུད་དུ་མི་ལྷུང་བརཿ འཁོར་བ་ཀ་ནས་དག་པ་གཞི་དབྱིངས་ཆེརཿ གཞི་སྣང་གཞོན་ནུ་བུམ་སྐུར་གྲོལ་བར་ཤོགཿ གལ་ཏེ་གདོད་མའི་ས་ལ་མ་གྲོལ་ནཿ ལྷུན་གྲུབ་ཞི་ཁྲོའི་སྣང་བ་འཆར་བའི་ཚེཿ རང་སྣང་ཡེ་ཤེས་ཆེན་པོར་ངོ་འཕྲོད་ནསཿ བར་དོ་ལོངས་སྤྱོད་རྫོགས་སྐུར་གྲོལ་བར་ཤོགཿ ཡེ་གདངས་གསལ་སྟོང་དག་པ་གཉིས་ལྡན་ཆེཿ སྟོང་གཟུགས་དྭངས་མ་ལྔ་ལྡན་རིགས་ལྔའི་ཞིངཿ རང་སྣང་རྣམ་དག་ལོངས་སྐུའི་ཞིང་ཁམས་སུཿ དག་པ་གསུམ་གྱི་འཁོར་ལ་ཆོས་སྟོན་ཤོགཿ གལ་ཏེ་ལོངས་སྐུའི་ཞིང་དུ་མ་གྲོལ་ནཿ རང་བཞིན་སྤྲུལ་སྐུའི་ཞིང་ཁམས་ལྔ་ཚོམ་དངཿ རིགས་འདུས་རྔ་ཡབ་དཔལ་རིའི་ཕོ་བྲང་ཆེརཿ སྐད་ཅིག་ཉིད་ལ་བརྫུས་ཏེ་སྐྱེས་ནས་ཀྱངཿ རིག་འཛིན་རྣམ་བཞིའི་གྲལ་དུ་སྨིན་པར་ཤོགཿ ཐེག་པ་རིམ་དགུའི་ཡངས་རྩེ་ཡོ་ག་གསུམཿ དེ་ལས་རྣམ་པར་འདས་པ་མན་ངག་སྡེའིཿ དགོངས་ཀློང་བྱ་རྩོལ་བྲལ་བའི་གཤིས་ལུགས་སུཿ བློས་བྱས་བདེན་ཞེན་དྲི་མ་དག་པར་ཤོགཿ རང་རིག་གདོད་ནས་དག་པའི་རང་མདངས་སུཿ རང་རྩལ་དམ་པ་རིགས་བརྒྱ་ཞི་ཁྲོའི་སྐུཿ སྣང་ལ་རང་བཞིན་མེད་པའི་དལ་བཀྲམ་སྟེཿ ཡེ་ཤེས་མཐོང་བ་དག་པའི་མར་མེ་འབུལཿ ཉོན་མོངས་འཁོར་བའི་ཆོས་ཀྱི་མུན་པ་སངསཿ བཟང་ཞེན་ཤེས་བྱའི་སྨག་རུམ་བསལ་ནས་ཀྱངཿ བརྗོད་མེད་ལྷག་མཐོང་ཡེ་ཤེས་ཆེན་པོའི་ཀློངཿ ཉམས་རྟོགས་རིག་པའི་རྩལ་ཆེན་རྫོགས་པར་ཤོགཿ ཕུང་པོ་ལྔ་དག་རིགས་ལྔའི་ཞིང་དུ་གྲོཿ འབྱུང་ལྔ་གནས་དག་རིགས་ཀྱི་ཡུམ་ལྔར་སྨིནཿ རྣམ་ཤེས་དབང་དག་སེམས་དཔའ་བརྒྱད་དུ་གྲོལཿ སྣང་བཞི་ཟད་ནས་འཇའ་ལུས་འགྲུབ་པར་ཤོགཿ དྲན་རིག་འོད་གསལ་ཆེན་པོའི་མར་མེ་འདིཿ རྒྱུན་ཆད་མེད་པར་སྦར་བའི་བསོད་ནམས་མཐུསཿ ལས་རླུང་བག་ཆགས་མུན་པ་དྲུངས་ཕྱུང་ནསཿ ཀུན་བཟང་དགོངས་ཀློང་ཆམ་གཅིག་གྲོལ་བར་ཤོགཿ བདུན་པ་དབྱིངས་གྲོལ་ལྟ་བའི་སྐོངཿ ཧོཿ མཆོད་དུ་མེད་དེ་ལྟ་བའི་ཀློངཿ རྟག་ལྟ་ཆོས་སྐུའི་ཀློང་དུ་བསྐངཿ བསྐང་དུ་མེད་དེ་སྒོམ་པའི་ངངཿ ཆད་ལྟ་གཟུགས་སྐུའི་ཀློང་དུ་བསྐངཿ སྤྱོད་དུ་མེད་དེ་ཆོས་ཉིད་གཤིསཿ མ་བཅོས་རྫོགས་པ་ཆེན་པོར་བསྐངཿ སྦྱོར་དུ་མེད་དེ་ཟུང་འཇུག་ཀློངཿ སྡུག་བསྔལ་བདེ་བ་ཆེན་པོར་བསྐངཿ བསྒྲལ་དུ་མེད་དེ་མཉམ་ཉིད་དབྱིངསཿ ཡེ་སྒྲོལ་ཡེ་སྦྱོར་ཆེན་པོར་བསྐངཿ མདོར་ན་ཉམས་ཆག་ཉེས་ལྟུང་དངཿ ཁམས་གསུམ་རྒྱུད་དྲུག་སྡུག་བསྔལ་གྱིཿ རྒྱུ་དང་འབྲས་བུར་བཅས་པ་རྣམསཿ ཀུན་བཟང་ཡངས་པ་ཆེན་པོའི་ཀློངཿ བྱང་ཞིང་དག་ནས་སོར་ཆུད་དེཿ བདེ་བ་ཆེན་པོའི་ཀློང་དུ་ཨཱཿ གསུམ་པ་རྗེས་ཀྱི་རིམ་པ་ལ་དགུ་ལསཿ དང་པོ་ཐུགས་དམ་བསྐུལ་བ་ནིཿ ཧཱུྃ་བཞེངས་ཤིག་རིག་འཛིན་འདུས་པའི་ལྷཿ ཆོས་ཀྱི་དབྱིངས་ནས་སྐུར་བཞེངས་ལཿ བྱང་ཆུབ་སྒྲུབ་པའི་བར་ཆད་ཐུལཿ སྣོད་བཅུད་འབྱུང་བའི་རྒུད་པ་སོལཿ རྩ་རླུང་དབང་ཐང་ཉམས་པ་གསོསཿ སྒྲུབ་པའི་འབྲས་བུ་མཆིས་པར་མཛོདཿ གཉིས་པ་ཆད་ཐོ་བྱ་བ་ནིཿ ཧཱུྃཿ སྔོན་ཚེ་འོག་མིན་བདེ་ཆེན་ཞིངཿ ལྷ་གནས་གསུམ་སོགས་ཉམས་དགའ་བརཿ གསང་ཆེན་རྒྱུད་སྡེའི་གནས་བསྟན་ཚེཿ རྡོ་རྗེ་ཐེག་པའི་བཀའ་སྲུང་རྣམསཿ དམ་ཚིག་གཉན་པོའི་གྲལ་དུ་བཞགཿ བར་དུ་གངས་ཅན་བོད་ཀྱི་ཡུལཿ ཨོ་རྒྱན་པདྨ་ཐོད་ཕྲེང་གིསཿ གསང་སྔགས་ཆོས་འཁོར་བསྐོར་བའི་ཚེཿ སྲིད་པའི་ལྷ་འདྲེ་ཆེ་དགུ་ཡིསཿ སྲོག་སྙིང་ཕུལ་ཏེ་རྩིས་སུ་ཕབཿ ཐ་མ་འོད་གསལ་དག་པའི་ཞིངཿ བདེ་བ་ཆེན་པོའི་ཕོ་བྲང་དུཿ རིག་འཛིན་པདྨ་དབང་ཆེན་ལཿ པད་འབྱུང་དྲི་མེད་འོད་ཟེར་གྱིསཿ ཀློང་ཆེན་ཟབ་རྒྱའི་དབུགས་དབྱུང་ཞིངཿ ཡེ་ཤེས་དབྱིངས་ཀྱི་མཁའ་འགྲོ་མསཿ ཀློང་གསལ་བརྡ་རིས་སྤྲད་པའི་ཚེཿ གཟའ་རྒོད་སྲོག་གི་སྤུ་གྲི་སོགསཿ བཀའ་སྲུང་གཉན་པོས་ཁས་བླངས་བཞིནཿ མཆོད་གཏོར་རྒྱན་ལྡན་འདི་བཞེས་ལཿ ལས་བཞིའི་ཕྲིན་ལས་སྒྲུབ་པར་མཛོདཿ གསུམ་པ་བསྟན་མ་སྐྱོང་བ་ནིཿ ཧཱུྃཿ དཔལ་གྱི་བཀའ་ཉན་བོད་ཁམས་སྐྱོངཿ མ་སྲིང་བསྟན་མ་བཅུ་གཉིས་རྣམསཿ འདིར་བྱོན་གཏོར་མའི་བཤལ་ཆུ་བཞེསཿ བཅོལ་བའི་ཕྲིན་ལས་གྲུབ་པར་མཛོདཿ མ་མ་ཧྲིཾ་ཧྲིཾ་བྷ་ལིངྟ་ཁཱ་ཧིཿ བཞི་པ་རྟ་བྲོ་བྱ་བ་ནིཿ ཧཱུྃཿ རིག་འཛིན་རྒྱལ་བའི་དཀྱིལ་འཁོར་འདིརཿ ལོག་པར་འདྲེན་པའི་དམ་སྲི་ཀུནཿ མནན་ནོ་ཐེག་པ་རིམ་དགུའི་རྒྱཿ ནམ་ཡང་ལྡང་བར་མ་གྱུར་ཅིགཿ སྟྭཾ་བྷ་ཡ་ནནཿ ལྔ་པ་དངོས་གྲུབ་བླང་བ་ནིཿ ཧོཿ རིག་འཛིན་དཀྱིལ་འཁོར་ལྷ་ཚོགས་རྣམསཿ བསྙེན་ཅིང་སྒྲུབ་པའི་དམ་ཚིག་ཐེམསཿ རྡོ་རྗེ་སྲིན་པོའི་ནམ་ཡང་ལངསཿ དངོས་གྲུབ་སྩོལ་བའི་དུས་ལ་བབཿ སྐུ་གསུང་ཐུགས་ཀྱི་དཀྱིལ་འཁོར་ནསཿ མི་གནས་ཡེ་ཤེས་གསང་བ་མཆོགཿ རྡོ་རྗེ་གསུམ་གྱིས་བྱིན་རློབས་ལཿ མཆོག་དང་ཐུན་མོང་དངོས་གྲུབ་ཀུནཿ ད་ལྟ་ཉིད་དུ་ཐོབ་པར་སྩོལཿ ཨོཾ་བོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱརྟུ་ཨཱཿཧཱུྃཿ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊཿ ཀཱ་ཡ་ཝཱཀྐ་ཙིཏྟ་ཨ་ལ་ལཿ སིདྡྷི་ཕ་ལ་ཧཱུྃཿ དྲུག་པ་ནོངས་པ་བཤགས་པ་ནིཿ ཧཱུྃཿ རིག་འཛིན་འདུས་པའི་དཀྱིལ་འཁོར་དུཿ མཆོད་རྫས་མ་ཚང་སྒྲུབ་པ་གཡེལཿ ཏིང་འཛིན་བྱིང་རྨུགས་འཐིབས་པ་སོགསཿ འགལ་འཁྲུལ་ནོངས་པ་བཟོད་པར་གསོལཿ ཨོཾ་བཛྲ་སཏྭ་སོགས་བརྗོདཿ བདུན་པ་རྫོགས་རིམ་བསྡུ་བ་ནིཿ ཧོཿ ཆུ་ལས་ཆུ་བུར་ཐིམ་བཞིན་དུཿ རང་ལས་སྤྲུལ་པའི་དཀྱིལ་འཁོར་ལྷཿ ཡེ་ཤེས་དབྱིངས་སུ་བཛྲ་མུཿ རྗེས་ཐོབ་སྒྱུ་མའི་ལྷ་སྐུར་ལྡངཿ བརྒྱད་པ་བསྔོ་སྨོན་མཚམས་སྦྱོར་ནིཿ ཧོཿ དུས་གསུམ་བསགས་པའི་དགེ་རྩ་ཀུནཿ རྣམ་མཁྱེན་གདོད་མའི་རྒྱུ་རུ་བསྔོཿ བདག་སོགས་འདུས་པར་བཅས་པ་རྣམསཿ ཚོམ་བུ་གཅིག་ཏུ་སངས་རྒྱས་ཤོགཿ དགུ་པ་བཀྲ་ཤིས་བརྗོད་པ་ནིཿ ཧོཿ རིག་འཛིན་བརྒྱུད་པའི་བྱིན་རླབས་དངཿ དཀོན་མཆོག་གསུམ་གྱི་བདེན་པ་དངཿ གསང་སྔགས་ཟབ་མོའི་རྟེན་འབྲེལ་གྱིསཿ འཇིགས་བརྒྱད་ཞི་བའི་བཀྲ་ཤིས་ཤོགཿ ཚེ་བསོད་རྒྱས་པའི་བཀྲ་ཤིས་ཤོགཿ སྣང་བ་དབང་འདུས་བཀྲ་ཤིས་ཤོགཿ ལོག་འདྲེན་ཚར་གཅོད་བཀྲ་ཤིས་ཤོགཿ སྣང་ཞེན་ལྷ་སྐུའི་ཕྱག་རྒྱར་རྫོགསཿ སྒྲར་གྲགས་བདེ་ཆེན་སྔགས་སུ་དགཿ དྲན་རྟོགས་འོད་གསལ་ཆོས་སྐུར་སྨིནཿ འཇའ་ལུས་ཟང་ཐལ་བཀྲ་ཤིས་ཤོགཿ བི་མ་ལ་དང་གསང་ཞབས་སོགསཿ པཎ་གྲུབ་རྣམས་ལ་གྲགས་པ་ཡིཿ ཞི་ཁྲོ་ཁྲོམ་དཀྲུགས་ཞེས་བྱ་བའིཿ སྔ་འགྱུར་བཀའ་མའི་གཞུང་བཟང་པོཿ དངོས་ལ་མིང་བཏགས་མཐུ་ཆེ་བསཿ ནུབ་ལ་ཉེ་བ་མ་བཟོད་དེཿ ན་རག་གདོང་སྤྲུགས་གང་ཡིན་པའིཿ དངོས་དོན་འཁྲུལ་པ་མེད་པར་བསྡེབསཿ བཀའ་གཏེར་ཟུང་དུ་འཇུག་པ་ལཿ པདྨའི་རིང་ལུགས་ཞེས་སུ་གྲགསཿ འགྲོ་ཀུན་ཆོས་ཀྱི་མིག་ལྡན་པསཿ ཡང་དག་ལམ་ལ་འཇུག་པར་ཤོགཿ ཅེས་པའང་རང་བྱུང་རྡོ་རྗེས་སོཿ ཿ