དཔལ་ཆེན་བཀའ་འདུས་རྒྱ་མཚོ་ལསཿ རྟ་མགྲིན་ཁམས་གསུམ་རོལ་པཿ

Previous Text Back to Volume Page Next Text

Wylie title	dpal chen bka' 'dus rgya mtsho las: rta mgrin khams gsum rol pa
Location	'jigs gling bka' 'bum Volume 10, Text 54, Pages 547-553 (Folios 1a1 to 4a5)
Author	འཇིགས་མེད་གླིང་པ་
Less details More details
Tertön	འཇིགས་མེད་གླིང་པ་ ('jigs med gling pa)
Citation	'jigs med gling pa. Dpal chen bka' 'dus rgya mtsho las rta mgrin khams gsum rol pa. In Kun mkhyen rig 'dzin 'jigs med gling pa'i gsung 'bum, Vol. 10: 547-553. New Delhi: Shechen Publications, 2025.
Genre	Sadhanas - Evocation Ritual - sgrub thabs
Cycle	རིག་འཛིན་ཐུགས་སྒྲུབ་དཔལ་ཆེན་འདུས་པ་ (rig 'dzin thugs sgrub dpal chen 'dus pa)
Parent Cycle	ཀློང་ཆེན་སྙིང་གི་ཐིག་ལེ་ (klong chen snying gi thig le)
Deity	rta mgrin

[edit]

འུྃཿ དཔལ་ཆེན་བཀའ་འདུས་རྒྱ་མཚོ་ལསཿ རྟ་མགྲིན་ཁམས་གསུམ་རོལ་པ་བཞུགསཿ

༄༅། །བརྗོད་པའི་སྒྲ་རྣམས་པདྨ་གསུངཿ བརྗོད་མེད་དོན་ལ་རབ་སྦྱོར་བཿ རྟ་མཆོག་རོལ་བའི་སྒོས་སྒྲུབ་ནིཿ དཀྱིལ་འཁོར་གཞུང་བཞིན་བཅས་པའམཿ ཙན་དན་ཕུར་པ་རྟ་ཞལ་གྱིསཿ མཚན་པར་ལེ་བརྒན་དར་གྱི་ངོསཿ པདྨ་ཅན་གྱི་རྡུལ་དང་་་་་རྟ་མཆོག་རོལ་པའི་རྒྱུད་ལསཿ་་་་་་པོསཿ ༈ རྡོ་རྗེ་དབྱིངསཿ གཽ་རཱི་མ་བརྒྱདཿ གོ་ལ་མ་དྲུགཿ ལོང་བ་སོ་གཉིསཿ ཁམ་རྒྱ་དྲུགཿ ཡུམ་བཞིཿ ཁྱི་བརྒྱདཿ སྤྱང་བརྒྱདཿ སོ་སོས་བསྐོར་བའི་སྒོས་སྒྲུབ་ཀྱང་བཤད་མོདཿ འདི་ནི་རང་གཞུང་རྩ་བའི་དཀྱིལ་འཁོར་ཀུན་འདུས་ཀྱི་དགོངས་པའོཿ གནས་ལྔར་ཡི་གེ་འབྲུ་ལྔ་ལཿ རྩ་སྔགས་ཀྱིས་བསྐོར་ཐད་ཀར་བཅིངསཿ བྷནྡྷ་རྟ་ཞལ་བྲིས་པའི་ནངཿ རྒྱབ་་་བརྟེན་པའི་ཚུལ་བཅུག་དར་དམར་དྲིལཿ ལྡིང་གུར་ཕུབ་ལ་མཆོད་པས་བསྐོརཿ དཔལ་ཆེན་འདུས་པའི་སྒྲུབ་གཞུང་གིཿ སྐྱེད་རིམ་བསྒྱུར་ཚུལ་འདི་ལྟའོཿ འོག་མིན་གསང་ཆེན་རོལ་པའི་ཕོ་བྲང་ཆེཿ རྩིབས་འཁོར་བཅུ་དྲུག་པད་འདབ་སོ་གཉིས་པའིཿ ལྟེ་བར་ཟླ་གམ་དམར་པོ་སྒོ་གཅིག་དབུསཿ པཾ་ལས་པདྨ་མཾ་ལས་ཉི་མའི་གདནཿ རུ་དང་ནཱ་ལས་ཀླུ་སྲིན་བསྣོལ་བའི་སྟེངཿ ཧཱུྃཿ རང་བྱུང་རྒྱུ་ཡི་ཧེ་རུ་ཀཿ ཡེ་ཤེས་དབྱིངས་ནས་གདན་ལ་བབསཿ མཉམ་སྦྱོར་བདེ་བ་ཆེན་པོའི་སྒྲསཿ འཕགས་པ་མཆོད་ཅིང་གཞན་དོན་བྱསཿ ཡོངས་གྱུར་འབྲས་བུའི་ཧེ་རུ་ཀཿ དཔལ་ཆེན་རྟ་མཆོག་རོལ་པ་ནིཿ སྐུ་མདོག་དུས་མཐའི་མེ་ལྟར་འབརཿ དབུ་ལྔ་ཕྱག་ནི་བཅུ་དྲུག་ལཿ ཁྱུང་གཤོགས་གདེངས་ཤིང་ཞབས་བརྒྱད་བགྲདཿ གཤོག་རྩེ་བྱ་ཁྱུང་ཉི་ཟླས་མཚནཿ དུར་ཁྲོད་དཔལ་གྱི་ཆས་རྣམས་རྫོགསཿ ཤར་ལྷོ་ནུབ་བྱང་གཟིགས་པའི་དབུསཿ དྲི་ཟ་གཤིན་རྗེ་ཀླུ་དབང་དངཿ གནོད་སྦྱིན་གདོན་ལ་མྱ་ངན་བསྐྱེདཿ གཡས་སྔོ་གཡོན་སེར་ལྷག་མ་དམརཿ སྟེང་ཞལ་རྔམ་པས་བདུད་བཞི་འདུལཿ ལྔ་ཀའང་རྟ་མགོ་ལྗང་ཞུར་འཚེརཿ རིགས་ལྔའི་རྒྱལ་ལ་གདན་གསུམ་རྫོགསཿ གཡས་པ་བརྒྱད་ཀྱི་དང་པོ་ནསཿ རྡོ་རྗེ་ཁ་ཊྭཱཾ་དྲིལ་བུ་དངཿ ལྕགས་ཀྱུ་སྦྲུལ་ཞགས་འཁོར་ལོའི་མཚོནཿ རལ་གྲི་རྡོ་རྗེ་ཕྲེང་བའོཿ གཡོན་བརྒྱད་ཐོད་ཁྲག་པདྨ་སྙིངཿ དབྱུག་པ་རྒྱ་གྲམ་བེ་ཅོན་མེཿ ཏྲི་ཤུ་ལ་དང་ཁྱུང་ཁྲ་འགྱེདཿ ཞབས་བརྒྱད་ཀླུ་བརྒྱད་རྒྱལ་བསེན་བརྫིསཿ ཡུམ་ཆེན་པདྨ་གཟི་ལྡན་སྔོཿ གཡས་པ་ཡིད་བཞིན་ནོར་འཛིན་འཁྱུདཿ གཡོན་ན་རིན་ཆེན་ཟ་མ་ཏོགཿ བརྡ་དང་བརྡ་ལེན་གྱིས་བསྐུལ་ནསཿ སྦྱོར་བའི་རོལ་མོའི་དགྱེས་སྤྲིན་ལསཿ ཆོས་སྐུ་འབྲས་བུར་སྨིན་པའི་ལྷཿ རྩིབས་འཁོར་བཅུ་དྲུག་ནང་ཁོངས་སུཿ མདུན་ནས་བརྩམས་ཏེ་གཡས་བསྐོར་དུཿ བྷྱོ་ལས་གོ་ལ་མ་དྲུག་ནིཿ མཛེས་པའི་རྒྱན་ཅན་ཏི་རས་་་གཡས་ཞིང་དབྱུག གཡོན་ཐོད་ཁྲག་་་མཚནཿ མ་ལས་གསང་བའི་ཡུམ་ཆེན་ནིཿ དྲྭ་བ་མོ་དང་གློག་འགྱུ་མཿ སྡེར་མོ་ཅན་དང་མཆེ་གཤོག་ཅནཿ དཀར་སེར་དམརལྗང་གཡས་རང་རྟགསཿ གཡོན་པ་དུང་དམར་བརྐྱང་བསྐུམས་ཚུལཿ ཕཊ་དྲུག་ལས་ནི་ཁམ་རྒྱ་མོཿ སྐུ་སྤྲུལ་དཀར་མོ་འཁོར་ལོ་དངཿ གསུང་སྤྲུལ་དམར་མོ་པདྨ་འཛིནཿ ཐུགས་སྤྲུལ་ནག་མོ་རྡོ་རྗེ་དངཿ ཡོན་ཏན་སེར་མོ་དྲིལ་བུ་ལཿ ལས་ཀྱི་ལྗང་གུ་རལ་གྲི་འཛིནཿ སྣ་ཚོགས་མདོག་ཅན་ཁ་ཊྭཱཾ་གཿ ཀུན་ཀྱང་གཡོན་པ་བྷནྡྷ་དམརཿ པད་འདབ་རྣམས་ལ་ལི་ཛ་ལསཿ མཁའ་འགྲོ་སུམ་ཅུ་རྩ་གཉིས་ཀྱིཿ སྤྲུལ་པ་ལོང་བ་རྒྱབ་འབྲེལ་ནིཿ སྒྲ་མེད་ཁོང་ནས་འབྲུག་སྟོང་ལྡིརཿ སྙིང་མེད་དབྱིངས་ནས་ཡེ་ཤེས་གསལཿ སྙན་མེད་ཆོས་ཉིད་རང་སྒྲ་སྒྲོགཿ མིག་མེད་ཡེ་ཤེས་སྤྱན་གྱིས་གཟིགསཿ སྣ་མེད་འཕགས་པའི་ཚུལ་ཁྲིམས་མྱོངཿ ཁ་མེད་བདེ་བའི་རོ་མྱོང་ཅནཿ ཐོད་སྐྱའི་མགོ་ལ་གྱད་ཀྱི་ལུསཿ གཟའ་རྒོད་མིག་དམར་ཆར་དུ་འབེབསཿ ཕྱོགས་བཞིར་བརྒྱད་ཚན་རེ་རེ་ཡིཿ ཞོན་པ་སྟག་དང་ཆུ་སྲིན་གླངཿ ཁྱུང་ཆེན་བརྒྱད་བརྒྱད་ལ་ཆིབས་ཤིངཿ ཤར་ནས་རིམ་བཞིན་གཡས་ཀྱི་ཕྱགཿ ཤེལ་གསེར་བྱེ་རུ་གཡུའི་དནྜཿ གཡོན་རྣམས་ཐོད་པ་ཁྲག་བཀང་ཐོགསཿ གྲུ་ཆད་ཕྱི་ནང་གཉིས་པ་ལཿ ཀུ་ཛ་ལས་ནི་ཁྱི་བརྒྱད་དངཿ སྤྱང་བརྒྱད་གཉིས་ཀའི་ཕྱོགས་བཞི་པོཿ དུང་དང་གསེར་དང་ཟངས་དང་གཡུཿ མཚམས་བཞིར་རང་རང་ཕྱེད་གཟུགས་མདོགཿ མཆེ་བ་བཞི་གཙིགས་རྐན་སྒྲ་གཏོགསཿ མཇུག་མ་སོག་ལེ་བ་སྤུ་རྩངཿ བྱེ་རུ་དམར་པོའི་ཨ་ལུང་དཔྱངསཿ རྔམ་པའི་སྒྲ་སྒྲོག་ཀུན་ཏུ་རྒྱུགཿ བར་ཁྱམས་བྷྱོ་ལས་ཕོ་ཉ་མོཿ སུམ་བརྒྱ་དྲུག་ཅུ་གློག་ལྟར་འཁྱུགསཿ སྒོ་བཞིར་པདྨ་ཞིང་ཆུང་སྟེངཿ ཧཱུྃ་ལས་ཤར་ནས་རིམ་བཞིན་དུཿ མགོ་དགུ་བདུན་ལྔ་སུམ་བརྩེགས་ལཿ རྐང་པ་གཅིག་པའི་ཁྲོ་བོ་ནིཿ གཡས་རྣམས་འགུགས་འཆིང་སྡོམ་མྱོས་དངཿ གཡོན་པ་ཐོ་ཆེན་འབར་བ་བསྣམསཿ སྤྲུལ་པ་ཡང་སྤྲུལ་བསམ་མི་ཁྱབཿ མ་འདྲེས་ཡོངས་རྫོགས་ཆེན་པོར་གསལཿ ཧཱུྃཿ རང་ལས་ཤར་བའི་དཔལ་ཆེན་ལྷཿ ཞེས་སོགས་དཔལ་ཆེན་གཞུང་ལྟར་་་ཤཱུ་ནྱ་ཏ་དང་པྲཱ་ཏྱ་བེཀྵ་བརྗེས་པའི་རིགས་བདག་སྣང་མཐའཿ་་་ལཿ སྤྱན་འདྲེན་གྱི་ནི་མལ་དག་ཏུཿ ཧཱུྃཿ ཐུགས་རྗེའི་ལྕགས་ཀྱུས་ཐུགས་དམ་རྒྱུད་བསྐུལ་ཞིང་ཿ བྱམས་པའི་ཞགས་པས་གནས་ནས་སྤྱན་འདྲེན་ནོཿ ལྕགས་སྒྲོག་བཀའ་ཡི་ཕོ་ཉས་གནས་བསྐྱོད་ལཿ བདེ་གཤེགས་བཞུགས་ཤིང་རྣམ་གྲོལ་དགྱེས་པ་བསྐྱེདཿ བཛྲ་ས་མ་ཡ་ཛཿཛཿ ཏིཥྛ་ལྷནཿ ཕྱག་འཚལ་ལ་སོགས་གཞུང་ལྟར་ལཿ མི་སྡུག་སྲིན་པོའི་བརྡ་བསྟོད་རྗེསཿ བཻཌཱུར་སྔོན་པོའི་རིན་ཆེན་རི་རབ་ལཿ ཉི་མ་སྟོང་གི་འོད་ཟེར་འབར་བ་ལྟརཿ སེམས་དཔའ་སྔོན་པོ་འོད་ཀྱི་དཀྱིལ་འཁོར་ཅནཿ དཔལ་དང་གཟི་བརྗིད་འབར་ལ་ཕྱག་འཚལ་བསྟོདཿ འོད་ཕུང་སྟུག་པོ་སྤྲིན་ལྟར་འཐིབས་པ་ཡིཿ འཇིགས་བྱེད་རྔམ་སྟབས་བརྐྱང་བསྐུམས་ཚུལ་དུ་བཞུགསཿ ཟ་བྱེད་བསྐལ་པའི་མེ་ལྟར་འབར་བ་ཡིསཿ གདུག་པ་ཞལ་དུ་འདྲེན་ལ་ཕྱག་འཚལ་བསྟོདཿ མི་བཟད་མཆེ་བས་བརྒྱན་པའི་ཞལ་གདངས་ཤིངཿ ཁམས་གསུམ་ཟ་བར་བྱེད་པའི་རྐན་སྒྲ་ཅནཿ ཉི་ཟླ་འབར་བའི་སྤྱན་གྱི་སྡང་མིག་གིསཿ བགེགས་དཔུང་བསྲེག་པར་མཛད་ལ་ཕྱག་འཚལ་བསྟོདཿ དེ་ནས་འཛབ་ཀྱི་དགོངས་པ་ནིཿ ཐུགས་ཀར་རྒྱལ་བ་ཀུན་གྱི་ཡུམཿ པདྨ་གཟི་ལྡན་ཞི་མ་ཁྲོཿ ཕྱག་མཚན་མེད་དེ་འཛིན་འཛིན་འདྲའིཿ སྙིང་ག་རིན་ཆེན་ཟུར་བརྒྱད་སྟེངཿ ཉི་མའི་གདན་ལ་ཧྲཱིཿཡིག་མཐརཿ ཨོཾ་ནི་པདྨ་ཧེ་རུ་ཀཿ ཧུ་ལུ་ཧུ་ལུ་ཡུམ་ཆེན་བཞིཿ ཕཊཿནི་ཁམ་རྒྱ་མ་དྲུག་གོཿ ཨེ་དང་ཨ་ནི་ལོང་བ་སྟེཿ ར་དང་ལི་ནི་དམུས་ལོང་ངོཿ ཧཱུྃ་ནི་ཁྲོ་བོ་མགོ་བརྩེགས་བཞིཿ ཧྲཱིཿནི་ཟ་བྱེད་སྤྱང་ཀི་བརྒྱདཿ ཛཿནི་ཁྱི་བརྒྱད་རྔམས་པའི་ཚོགསཿ རྒྱུད་ཀྱི་ཁོང་སྙིང་ཕྱུང་བ་སྟེཿ རྗེས་ཀྱེི་ལས་རིམ་གཞུང་ལྟར་བྱཿ ས་མ་ཡཿ རྒྱ་རྒྱ་རྒྱཿ