བཅོམ་ལྡན་འདས་རྡོ་རྗེ་ཕུར་པ་རྒྱུད་ལུགས་ཀྱི་སྨད་ལས་དམ་ཅན་ཉེ་བར་བསྙེན་པའི་མན་ངག་མ་མོ་མཁའ་འགྲོའི་ཞལ་ལུང་ཞེས་བྱ་བ་གསང་བའི་རྒྱ་ཅན།

Previous Text Back to Volume Page Next Text

Wylie title	bcom ldan 'das rdo rje phur pa rgyud lugs kyi smad las dam can nye bar bsnyen pa'i man ngag ma mo mkha' 'gro'i zhal lung zhes bya ba gsang ba'i rgya can
Location	'jigs gling bka' 'bum Volume 9, Text 22, Pages 569-581 (Folios 1a1 to 7a2)
Author	འཇིགས་མེད་གླིང་པ་
Less details More details
Citation	'jigs med gling pa. Bcom ldan 'das rdo rje phur pa rgyud lugs kyi smad las dam can nye bar bsnyen pa'i man ngag ma mo mkha' 'gro'i zhal lung zhes bya ba gsang ba'i rgya can. In Kun mkhyen rig 'dzin 'jigs med gling pa'i gsung 'bum, Vol. 9: 569-581. New Delhi: Shechen Publications, 2025.
Genre	Activity Practices - las tshogs · Pith Instructions - man ngag · Recitation Manual - bsnyen yig
Cycle	ཕུར་པ་རྒྱུད་ལུགས་ (phur pa rgyud lugs)
Deity	dam can

[edit]

༄༅། །བཅོམ་ལྡན་འདས་རྡོ་རྗེ་ཕུར་པ་རྒྱུད་ལུགས་ཀྱི་སྨད་ལས་དམ་ཅན་ཉེ་བར་བསྙེན་པའི་མན་ངག་མ་མོ་མཁའ་འགྲོའི་ཞལ་ལུང་ཞེས་བྱ་བ་གསང་བའི་རྒྱ་ཅན་བཞུགས། །

༄༅། །བཅོམ་ལྡན་འདས་དཔལ་རྡོ་རྗེ་གཞོན་ནུ་ལ་ཕྱག་འཚལ་ལོ། །སྤྱི་དོན་གཉིས་པ་སྨད་ལས་དགྲ་བགེགས་སྒྲོལ་བའི་ས་བཅད་ལ་དམ་ཅན་ཉེ་བར་བསྙེན་པ་དང་། ངན་སྔགས་ཉེ་བར་བསྙེན་པའོ། །དང་པོ་ནི་རྣལ་འབྱོར་ཆེན་པོའི་རྒྱུད་ལས། ཡལ་ག་མེད་པའི་བྷན་དྷ་་་བཾ་རིལ་་་ནི། །ཐོད་པ་་་རབས་ཆད་་་་་རབ་ཏུ་ལེགས་པ་ལ། །ཡུགས་ས་མོ་ཡི་མངལ་ཁྲག་གིས། །གྲུ་གསུམ་མེ་འོད་འབར་བ་ལ། །ཕྲིན་ལས་བཞི་ཡི་དབྱིབས་བྱའོ། །དེ་ལ་དགྲ་བགེགས་མིང་བྱང་གཞུག །བསྙེན་པའི་ཕུར་པས་གཟིར་ལ་བཞག །གཏོར་མ་སྨན་དང་རཀྟར་བཅས། །ཞེས་པས་རྩ་བའི་དཀྱིལ་འཁོར་ལས་ཆེས་དམའ་བའི་ལྷོ་ནུབ་མཚམས་སུ་སྲུང་མའི་སྟེགས་བུ་གྲུ་གསུམ་ནག་པོའི་ལྟོ་བའང་གྲུ་གསུམ་དུ་བྲུས་པའི་ཐོད་པ་ལ། རེ་ཁཱ་གྲུ་གསུམ་མཐིང་ནག་ཟླ་གམ་དམར་པོ། གྲུ་ཆད་ལྗང་གུ། སྒོ་རྣམས་དུར་ཁྲོད་མི་རོས་སྤུངས་པའི་མཐར་ལྕགས་རི་ནག་པོ་མེ་རི་དང་བཅས་བྲིས་པའམ། ཡང་ན་སྒོ་སྣམ་སྤངས་པའི་ནང་དུ་གདབ་པ་དྲུག་གི་ལས་དང་འབྲེལ་ན་སྔ་མ་ལས། ཁྲག་དང་དུག་དང་སྣ་ཚོགས་བྱུག །དྲི་མ་དག་ལས་ལིངྒ་ནི། །ཐོད་པའི་ནང་དུ་བསྐྱེད་པར་བྱ། །ལྕགས་སྣ་ལྔ་ཚང་སྲས་མཆོག་གཅིག །སྔགས་བྲིས་དབང་བསྐུར་བྱིན་རླབས་གཟུག །ཅེས་པས་རྫས་ཀྱི་བཅའ་གཅན་བཞག་ཅིང་དམ་ཅན་ཉེ་བསྙེན་ཙམ་ལ་ཟན་ལིང་ལ་ཕུང་པ་གཟུག །མཐའ་སྐོར་དུ་སྨན་རཀ་གཏོར་གསུམ། མདའ་དར་དང་དར་ནག །སྦ་མཁར་ཚིགས་གསུམ་ལ་བསེ་བྱང་དཀར་ནག་སྐུ་དང་སྙིང་པོས་མཚན་པ་དང་། དྲེའུ་ནག་པོ་དང་། ལུག་དཀར་ནག་གི་ཐོད་པ། རི་བོང་དང་། བོང་བུ་དང་། བྱ་ལུག་གི་སྙིང་། ཁྲག་ཞག །མི་རྟ་མྱུར་དུ་བསད་པའི་ཁྲག་དང་། འོ་མ་དང་། མར་གྱི་མཚོ་ལ་སོགས་པའི་མཐུན་རྫས་ཀྱང་བཤམ། ལྷ་བསྙེན་གཞུང་བསྲང་པ་ནས་བཟླས་པའི་བར་རྫོགས་པར་བྱས་རྗེས། གཞན་ཡང་ཐོད་པའི་གཞལ་ཡས་སུ། །སྲས་བཅས་དམ་ཅན་བཅས་པ་བསྐྱེད། །ཅེས་པས། བསྙེན་ཕུར་ནི་མཚན་མ་རྫས་ཀྱི་ཕུར་པ་དཀྱིལ་འཁོར་ཡོངས་རྫོགས་ཀྱི་བདག་ཉིད་དྲེགས་པ་དབང་དུ་སྡུད་པའི་གཉེན་པོ་ཡིན་པས། ལྕུམ་གཞོགས་ལྡིར་བའི་ནང་དུ་གཞལ་མེད་ཁང་རྫོགས་པ་ལ་གཙོ་བོ་ཡབ་ཡུམ་དང་ལྕུམ་གཞོགས་བརྒྱད་ལ་ཕྱོགས་མཚམས་ཀྱི་ཁྲོ་བོ་ཡབ་ཡུམ་མགོ་བརྙན་དང་བཅས་པ། རྒྱ་མདུད་གོང་འོག་ནང་ཧཱུྃ་དཀར་སྟོབས་ཆེན་ཡབ་ཡུམ། ལོག་བཞིར་སྒོ་བ་བཞི། དབལ་གྱི་དམ་ལ་ཕུར་སྲུང་བཅུ་གཉིས། མིང་པོ་ལས་མཁན་དང་བཅས་པ་རྫོགས་པར་བསྐྱེད་ནས་སྤྱན་དྲང་བ་ནི། བྷྱོ། སྟོང་གསུམ་འདི་ན་དྲེགས་པ་ཅན། །སུས་ཀྱང་དམ་ལ་མ་ཆུད་པ། །རྡོ་རྗེ་གཞོན་ནུའི་བཀའ་ལ་སྡོད། །མ་མོ་མཁའ་འགྲོ་ཡོངས་ཀྱི་གཙོ། །དམ་ཅན་མ་མོ་བཅུ་གཉིས་དང་། །རང་རང་རིགས་ཀྱི་མིང་པོ་ནི། །ཁམས་གསུམ་སྲོག་ལ་དབང་ཟ་ཞིང་། །གློ་བུར་ཡེ་འདྲོག་བདག་པོ་སྟེ། །སྲིད་པ་སྐོས་འདེབས་རྒྱལ་པོ་དང་། །ཨེ་ཀ་ཛ་ཊི་བཤོས་པའི་སྲས། །ཤྭ་ན་སྤྱན་གཅིག་མཆེད་བཞི་དང་། །མིང་པོ་ཤེལ་གིང་དཀར་པོར་བཅས། །རི་རྒྱལ་ལྷུན་པོའི་སྟེང་ཤེད་ན། །དུག་མཚོ་མེར་བའི་ནང་ཤེད་ན། །དུང་མཁར་དཀར་པོའི་ནང་ནས་གཤེགས། །བདུད་དག་ཡབ་ཡུམ་རོལ་པའི་སྲས། །ལངྐ་མགྲིན་བཅུའི་ཆུང་མའི་ཚུལ། །ནག་མོ་རེ་ཏི་མཆེད་བཞི་དང་། །མིང་པོ་མ་ཧཱ་ཀཱ་ལ་བཅས། །རི་རབ་ཆེན་པོའི་བྱང་ཤར་མཚམས། །མུ་ལེ་མཐིང་གི་མཚོ་ནང་གི། །ལྕགས་མཁར་ནག་པོའི་ནང་ནས་གཤེགས། །གནོད་སྦྱིན་ཟངས་མདོག་རྒྱལ་པོ་དང་། །ཡུམ་གཅིག་ཟངས་མགྲིན་ལྡེམ་པའི་སྲས། །བསེ་ཡི་ལྷ་མོ་མཆེད་བཞི་དང་། །མིང་པོ་བསེ་ཡི་སྐྱེས་བུར་བཅས། །རི་རབ་ཆེན་པོའི་ལྷོ་ནུབ་མཚམས། །བསེ་མཚོ་མེར་བའི་དབུས་ཤེད་ན། །བསེ་མཁར་སྨུག་པོའི་ནང་ནས་གཤེགས། །རེ་ཏི་ནག་ལ་བསེ་མོ་དམར། །ཤྭ་ན་དཀར་ལྡེམ་མིང་པོ་སེར། །ཀུན་ཀྱང་ཞལ་གཅིག་ཕྱག་གཉིས་ལ། །ལེགས་ཉེས་སྟང་འཛིན་བདག་པོ་སྟེ། །ལྕགས་ཀྱུས་འགུགས་ཤིང་ཕུར་བུས་སྒྲོལ། །བཞོན་པ་ཅན་དང་རྐྱང་པའི་ཚུལ། །རྣམ་འགྱུར་མ་ངེས་ཅིར་ཡང་སྟོན། །མ་མོ་བདུན་དང་སྲིང་མོ་བཞི། །དྲེགས་པ་ཆེན་པོ་དྲུག་ལ་སོགས། །སྤྲུལ་པ་ཡང་སྤྲུལ་བསམ་མི་ཁྱབ། །ཁྱེད་རྣམས་སྲོག་སྙིང་ང་ལ་ཡོད། །སྔོན་ཚེ་དཔལ་ཆེན་ཁྲག་འཐུང་གིས། །ཇི་ལྟར་དམ་ལ་བཞག་པ་བཞིན། །སངས་རྒྱས་བསྟན་པ་བསྲུང་བ་དང་། །དཀོན་མཆོག་དབུ་འཕང་བསྟོད་པ་དང་། །ཉམས་པ་བདུན་པོ་བསྒྲལ་བའི་ཕྱིར། །དམ་ཅན་མ་གཡེལ་དམ་ལ་འདུས། །གང་ལ་དམིགས་པ་ཁྱོད་ཀྱིས་ཤེས། །རླུང་ལས་མྱུར་བའི་སྟབས་ཀྱིས་གཤེགས། །ཨོཾ་བཛྲ་ཀྲོ་དྷ་ཙིཏྟ་མ་ཧཱ་ལི་ཤུ་ར་ཤུ་ར། ཁྱི་ར་ཁྱི་ར། གྷ་དྷ་ར་ནི། ཤུ་ལ་ཙི་པཱ་ར་ཤུ་པ་ར་ནི། ཡོ་ག་ཤུདྡྷ་ཙིཏྟ་མ་ར་ལི། ཀྲོ་དྷ་ཡོ་གཱི་ནི་བཛྲ། ཛྭ་ལན་དྷ་ར་ནི། ཤ་ཥ་ཎི་ཛ་ཛཿ དམ་བཞག་ནི། བྷྱོ། བམ་རིལ་ཐོད་པའི་གཞལ་ཡས་ནང་། །མཐུན་རྫས་སྤྱན་གཟིགས་ཚང་ཞིང་མཛེས། །དམ་ཅན་བཞུགས་ཤིང་ཆགས་པའི་གནས། །དམ་ཚིག་ཉིད་ལས་གཞན་མ་ཡིན། །ཐམས་ཅད་དམ་ཚིག་ཆོས་ཤེས་ན། །ཡེ་ཤེས་ལྷ་དང་མཉམ་པར་འགྱུར། །ས་མ་ཡ་མཱ་མ་ཏཾ་ན་རཀྐན། ཞེས་བདུད་རྩི་བླུད་ལ་དམ་བསྲེ་བྱ། དེ་ནས་གཏོར་མ་འབུལ་བ་ནི། ཨོཾ་ཨཱཿཧཱུྃ་གིས་བརླབས་ལ། དམར་གྱི་གཏོར་མ་ཆེན་པོ་རང་རང་འདོད་པའི་ལོངས་སྤྱོད་ཀྱི་སྤྲིན་དུ་འཆར་བ་འདི་ཉིད་བསྔོ་བའི་གནས་སུ་གྱུར་པ་ནི་བཅོམ་ལྡན་འདས་རྡོ་རྗེ་ཕུར་པའི་བཀའ་སྡོད་དམ་ཅན་མ་མོ་བཅུ་གཉིས་མིང་པོ་སྤྲུལ་འཁོར་དང་བཅས་པ་རྣམས་ལ་འབུལ་ལོ། །ལྕགས་ཀྱི་སྤྱང་མོ་དང་ལྕགས་ཀྱི་ཁྱི་མོ་ལ་ཞོན་པའི་ཤྭ་ན་མ་གཉིས། གསེར་གྱི་འཕར་བ་དང་། ཟངས་ཀྱི་ཝ་མོ་ལ་ཞོན་པའི་སྲི་ལ་མ་གཉིས་ཏེ་མུ་ཁ་ཆེན་མོ་མཆེད་བཞིའི་ཞལ་དུ་འབུལ་ལོ། །ཛྭ་ལ་ཛྭ་ལ་བཛྲ་མ་མ་མུཀྟ་ལ་ཡེ་ཛ་ཡ་དུ་མན་དྷི་ཤྭ་རི་ནཱི་ལ་བུ་ཙི་ཧཱུྃ་བྷྱོ་ཧཱུྃ་ཨི་དམ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཕྱི་ནམ་ཟླ་དུས་བཞི་ལ་དབང་བྱེད་པའི་བདག་ཉིད་ཆེན་མོ་བཞིའི་ཞལ་དུ་འབུལ་ལོ། །མ་ཐ་མ་ཐ་བཛྲ། ཏྲག་རཀྴ་མ་ཏི་ཧི་དུ་ན་བྷྱོ། མ་ཧཱ་ཡཀྴ་ནག་མོ་ཧེ་དུ་ན་བྷྱོ། ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། བསེ་མོ་ཉིས་བརྒྱ་ལྔ་བཅུའི་དབང་མོ་ས་བདག་མ་བཞིའི་ཞལ་དུ་འབུལ་ལོ། །ཀ་ཏཾ་ཀ་ཏེ་ཛ་ཡེ་བི་ཛ་ཡེ་ཨ་ཛི་ཏེ་ཨ་པ་ར་ཙི་ཏ་སུ་ཀི་བྷ་ཡ་བྷ་ར་ཙིཏྟཾ་ཡོ་གཱི་ཤྭ་རི་ཡ་ཙིཏྟ་ཧཱུྃ་ཕཊ་ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། དཔལ་ལྡན་མགོན་པོ་ཆེན་པོའི་ཞལ་དུ་འབུལ་ལོ། །ཀཱ་ལ་མ་ཏྲཾ་མ་ཧཱ་ཀཱ་ལ་ར་ཏི་ཡེ་ཀཱ་ལ་རཱུ་པ་ཧཱུྃ་ཕཊ། ཨི་དམ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། བསེའི་སྐྱེས་བུའི་ཞལ་དུ་འབུལ་ལོ། །མཱ་ར་ས་ནི་ར་ཤ་ནི་ར་ཤ་བྷི་ཀུན་ལན་ཤུ་ལན་ཧཱུྃ་ཕཊ། ཨི་དཾ་བྷ་ལིང་ཏ་ཁ་ཁ་ཁཱ་ཧི་ཁཱ་ཧི། རྒྱལ་པོ་ཤེལ་གིང་གི་ཞལ་དུ་འབུལ་ལོ། །ཀཱ་ར་མ་ཀཱ་ར་ཡ། ཙི་ཏྲ་པ་ལ་ཏྲི་ལ་ཐུན་ཨི་དཾ་བྷ་ལིང་ཏ་ཁ་ཁ་ཁཱ་ཧི་ཁཱ་ཧི། མ་བདུན་སྲིང་བཞིའི་ཞལ་དུ་འབུལ་ལོ། །ཧཱུྃ་མ་མ་པ་ཤཾ་ཀུ་རུ་མ་ཏ་ད་ཉ་ཀ་ར་ཨི་ནན། ཨི་དཾ་བྷ་ལིང་ཏ་ཁ་ཁ་ཁཱ་ཧི་ཁཱ་ཧི། དྲེགས་པ་སྡེ་དྲུག་གི་ཞལ་དུ་འབུལ་ལོ། །དྷ་དྷི་མ་མ་ཤི་ཀྲཾ་ཀརྨ་ཀ་ཏྱེ་ཡ། པྲ་མ་རྟ་ནི་ཧཱུྃ་ཕཊ། ཨི་དཾ་བྷ་ལིང་ཏ་ཁ་ཁ་ཁཱ་ཧི་ཁཱ་ཧི། །བཞེས་ནས་སངས་རྒྱས་ཀྱི་བསྟན་པ་སྲུངས། དཀོན་མཆོག་གི་དབུ་འཕང་བསྟོད། རྣལ་འབྱོར་པའི་གྲོགས་དན་མཛོད། ཕྲིན་ལས་རྣམ་པ་བཞི་སྒྲུབས། འཇིག་རྟེན་གྱི་རྒུད་པ་སོལ། །དམག་འཁྲུགས་དང་ནད་དལ་བཟློག །ཁྱད་པར་དུ་ཡང་བལ་ཡུལ་ཡང་ལེ་ཤོད་དུ་རིག་འཛིན་ཆེན་པོ་པདྨ་འབྱུང་གནས་ཀྱི་བཀའ་དང་དམ་ལ་བཞག །རྡོ་རྗེ་ཕུར་པའི་སྲུང་མར་དབང་བསྐུར། སྲོག་སྙིང་མདོངས་གསོལ་དུ་ཕུལ་ནས་ཇི་ལྟར་ཁས་བླངས་པའི་དམ་ཚིག་གཉེན་པོ་དྲན་པར་མཛོད། རྡོ་རྗེ་ཐེག་པའི་བསྟན་པ་དང་དེ་འཛིན་གྱི་སྐྱེས་བུ་དམ་པ་རྣམས་ལ་ལོག་པར་བལྟ་ཞིང་ཉམས་པ་བདུན་དང་བཅས་པའི་དགྲ་བགེགས་རྣམས་ལྟས་དང་ཆོ་འཕྲུལ་སྣ་ཚོགས་པས་སྤ་བཀོང་ལ། དྲག་ཤུལ་གྱི་ལས་ལ་མངོན་དུ་སྤྱོད་པས་ཐལ་བའི་རྡུལ་ཕྲན་བཞིན་དུ་བརླག་པར་མཛོད་ཅིག །ཅེས་དམ་ཚིག་བསྒྲགས་ཤིང་ཕྲིན་ལས་བཅོལ་བ་ནི། བྷྱོ། རྒྱ་བལ་གཉིས་ཀྱི་མཚམས་ཤེད་ན། །དགུན་ཡང་མེ་ཏོག་པདྨ་སྐྱེ། །ཆུ་ཡང་བྱང་ཆུབ་བདུད་རྩིའི་ཆུ། །ཡང་ལེ་ཤོད་ཀྱི་བྲག་ཕུག་ཏུ། །ཕུར་པ་གྲུབ་པའི་རིག་འཛིན་གྱིས། །བཀའ་དང་དམ་ལ་བཞག་པ་ནི། །དམ་ཅན་ལྷ་མོ་བཅུ་གཉིས་ཏེ། །དངོས་གཅིག་ལ་ཡང་མཚན་སྟོང་མ། །འཇིག་རྟེན་འདས་ཀྱང་འཁོར་བ་ན། །ཤྭ་ན་མུ་ཁ་མཆེད་བཞིར་སྟོན། །ལྕགས་ཀྱི་སྤྱང་མོ་མགོ་དགུ་དང་། །ལྕགས་ཀྱི་ཁྱི་མོ་མཚལ་མིག་ཅན། །ཟངས་ཀྱི་ཝ་མོ་རྐང་གསུམ་དང་། །གསེར་གྱི་འཕར་བ་ལྕེ་བརྒྱད་སྟེང་། །མི་མོའི་ལུས་ལ་ཕྲ་མེན་གདོང་། །སྤྲུལ་པ་ཡང་སྤྲུལ་བསམ་མི་ཁྱབ། །འདས་དང་མ་འདས་མཚམས་ཤེད་ནས། །བདག་ཉིད་ཆེན་མོ་མཆེད་བཞིར་སྟོན། །རེ་མ་ཏི་དང་རེ་མ་དུ། །རེ་མ་ཛ་དང་རེ་མ་ཛུ། །ཁྱུང་དྲེལ་ཤ་བ་ཆུ་གླང་ཞོན། །བར་སྣང་ཀུན་ལ་དབང་བསྒྱུར་ནས། །ནམ་ཟླ་དུས་བཞིའི་བདག་པོ་མཛད། །རང་རྒྱུད་ཅན་དུ་སྟོན་པ་ནི། །ས་བདག་བསེ་ཡི་ལྷ་མོ་སྟེ། །ཚ་བ་རོང་ན་བཞུགས་པའི་ཚེ། །དེ་ཕྱིན་གཟའ་ཡི་བུ་མོ་སེར། །ཞག་གི་མཚོ་ལ་མངའ་དབང་མཛད། །ཆིབས་ནི་གཟའ་རྟ་ཞུར་པོ་ཆིབས། །ཤུ་ལན་དྷ་རི་སྲོག་གི་སྙིང་། །མང་ཡུལ་སོ་ན་བཞུགས་པ་ནི། །རཀྟའི་མཚོ་ལ་མངའ་དབང་མཛད། །བསེ་བྱིན་བཙན་གྱི་བུ་མོ་དམར། །ཆིབས་སུ་བཙན་རྟ་དམར་པོ་ཆིབས། །ཙ་མུན་ད་རི་སྲོག་གི་སྙིང་། །སྙེ་ནམ་ཡུལ་ན་བཞུགས་པ་ནི། །ཕག་བྱིན་ཀླུ་ཡི་བུ་མོ་ལྗང་། །ཆིབས་སུ་ཀླུ་རྟ་ལྗང་གུ་ཆིབས། །ཀིང་ཀང་ད་རི་སྲོག་གི་སྙིང་། །བལ་ཡུལ་མཐིལ་ན་བཞུགས་པ་ནི། །ཡ་བྱིན་བདུད་ཀྱི་བུ་མོ་མཐིང་། །མར་ཁུའི་མཚོ་ལ་མངའ་དབང་མཛད། །ཆིབས་སུ་བདུད་རྟ་མཐིང་ནག་ཆིབས། །ཀུ་མ་ད་ར་སྲོག་གི་སྙིང་། །ཀུན་ཀྱང་རང་མདོག་བེར་ཆེན་གསོལ། །རལ་པ་ཕུར་པའི་ལན་ཚར་ཅན། །མིང་པོའི་ཚོགས་ལ་ཕྱག་འཚལ་བསྟོད། །ཕྲིན་བཅོལ་ནི་རྒྱུད་ལས། བྲན་དང་ཕོ་ཉ་བཀའ་ཉན་ཚོགས། །ཁྱེད་ཀྱི་ཐུགས་དམ་དུས་ལ་བབ། །ང་ཡིས་སྤྱན་སྔར་ཁས་བླངས་བཞིན། །ཕྱི་རབས་རྣལ་འབྱོར་ཕྲིན་ལས་ཀྱི། །བསྟན་པར་དགྲ་འདྲེ་བྱུང་བའི་ཚེ། །ཤྭ་ན་མུ་ཁའི་དུས་ལ་བབ། །བདག་ཉིད་ཆེན་མོའི་དུས་ལ་བབ། །ས་བདག་ཆེན་མོའི་དུས་ལ་བབ། །དྲེགས་པ་མང་པོའི་དུས་ལ་བབ། །ཁྱེད་ཀྱི་མཐུ་རྩལ་རབ་ཏུ་དབྱུང་། །སངས་རྒྱས་བསྟན་པ་བཤིག་པ་དང་། །དཀོན་ཅོག་སྐུ་དགྲ་དབེན་རྩ་འཇོམས། །ཆོས་ཁྲིམས་འདྲལ་དང་སློབ་དཔོན་དགྲ། །རྣལ་འབྱོར་འཇོམས་པ་ལ་སོགས་པ། །གསད་དང་དབབ་དང་ནད་ངན་གྱིས། །ཇི་ནས་བརླག་པར་ཁྱེད་ཀྱི་གྱིས། །དེ་ནས་བཞི་སྙིང་གཅིག་ཏུ་དྲིལ་བའི་བཟླས་པ་ནི་མི་མཐུན་པ་མང་དུ་སྣང་ཡང་རྣལ་འབྱོར་ཆེན་པོའི་ལེའུ་དགུ་པ་ལས། བཟླས་པ་དཔའ་བོ་གཅིག་པའི་སྔགས། །དང་པོ་བཅོམ་ལྡན་ཕུར་པའི་རྫས། །ཐམས་ཅད་འདུས་དང་རི་རབ་དང་། །མནན་པ་ཁྲོ་བོ་འདུས་པ་དང་། །གོང་བཞིན་དམ་ཅན་འདུས་པ་དང་། །ཐབས་དང་ཤེས་རབ་གིང་མཆོག་དང་། །རྟོག་པ་ལས་ཀྱི་སྔགས་བཅས་པ། །རྣམ་བཞི་ཚང་བ་བཞི་སྙིང་སྟེ། །དཔའ་བོ་གཅིག་ལ་ངལ་བ་མེད་པར་བཟླས། །ཞེས་པས་དོན་ལེའུ་བཅུ་གསུམ་པ་ནས་གསལ་བར་བསྟན་པ་ནི། དང་པོ་བདག་ཉིད་འབྲུ་བདུན་དང་། །དེ་འོག་ཕྱག་རྒྱ་མནན་ཡིག་གསུམ། །མིང་རུས་ཡི་གེ་གཟས་པར་བཤད། །ཤྭ་ནའི་ཡི་གེ་བཅུ་དྲུག་དང་། །རེ་མ་ཏི་ཡི་རྩ་སྔགས་དང་། །བསེ་མོའི་སྙིང་པོ་བཅུ་བདུན་དང་། །འཁོར་བ་རྩད་གཅོད་ཡི་གེ་དགུ། །ཐམས་ཅད་ཚང་བའི་ཡི་གེ་བདུན། །དྲིལ་ཏེ་རབ་ཏུ་བཟླས་པ་ཡིས། །མདངས་དང་བྲལ་བར་རབ་ཏུ་ངེས། །ཞེས་སོ། །ཨོཾ་བཛྲ་ཀཱི་ལི་ཀཱི་ལ་ཡ་ཛྭ་ལ་ནཾ། ཛཿཧཱུྃ་བཾ་ཧོཿ། སུ་རུ་སུ་རུ། མུ་རུ་མུ་རུ། ཛྭ་ལ་ཛྭ་ལ། མ་ཐཱ་མ་ཐཱ། དྷ་ཏི་མ་མ་ཀརྨ་ཨི་དཾ་མ་ཏཾ་ཉ་ཀ་ར་ཛ་ཡེ་བི་ཛ་ཡ་ཨ་ཙི་ཏེ་ཨ་པ་ར་ཙི་ཏེ་ཀ་ཏཾ་ཀ་ཏེ་མ་ར་སྱ་ན་པྲ་མརྟ་ན་ཡེ་སརྦ་བིགྣཾ་བཾ་ཧཱུྃ་སློབ་དཔོན་རྣམ་གསུམ་གྱི་དགོངས་པ་དང་འབུམ་འགྲེལ་ལྟར་ཡིན། ཕཊ། ཅེས་ཡེ་ཤེས་ཀྱི་ལྷ་དང་སྲུངས་མ་ཐམས་ཅད་ཀྱི་སྲོག་སྙིང་འདུས་པའི་དྷ་ཏི་འབྲིང་པོ་སྤུ་གྲི་དང་དབྱེ་བ་ལེགས་པར་ཆོད་པ་འདི་དམིགས་གནད་དང་ལྡན་པར་ཆིག་སྒྲིལ་དུ་བཟླས་པས་སྲོག་ཆགས་མང་པོ་གསད་པ་དང་། བྱ་སྐད་འཚེར་བ་སོགས་སྤྱིའི་རྟགས་དང་དགོས་རྟགས་སུ་གཅན་གཟན་གྱི་ཚོགས་རྨི་ན་ཤྭ་ན་མ་ཉེ། མོ་བཙུན་དང་ནག་མོ་དང་བྱ་ནག་དྲེའུ་རྟ་སོ་བྱ་ལ་སོགས་བྱུང་ན་བདག་ཉིད་མ་ཉེ། ཨ་ཙ་ར་དང་། མོན་མོ་དང་། བུད་མེད་ནག་མོ་དང་། ཉ་སྦྲུལ་བྱུང་ན་བསེ་མོ་ཉེ། མི་རེངས་དཀར་དམར་དང་། རྟ་པའི་ཚོགས་རྨི་ན་སྐྱེས་བུ་གིང་ཉེ་བས་ཉེ་བ་ལ་མཐིལ་གཏད། དེ་ནི་ཕྱི་དྷ་ཏི་ལྟར་བསྒྲུབ་པ་སྟེ། གཞན་དུ་ན་རྩ་རྒྱུད་ལས། །དྷ་ཏི་འདུས་པ་བསྡུ་ཡིག་གསུམ། །ངན་སྔགས་ཡིན་པར་ང་ཡིས་བཤད། །ཅེས་པས་ཕྱི་དྷ་ཏི། ནང་འདུས་པ། གསང་བ་བསྡུ་ཡིག་ལྟར་བསྒྲུབ་པའི་ཚུལ་སློབ་དཔོན་ནམ་གསུམ་གྱི་མན་ངག་ཏུ་ཤེས་པར་བྱའོ། །རྣལ་འབྱོར་ཆེན་པོའི་རྒྱུད་ལས། ལྷ་ལ་བསྟོད་ཅིང་སྲུང་མ་བསྐུལ། །དེ་ནས་བསྙེན་པའི་དུས་སུ་སྟེ། །རྟགས་ཚང་གཉིས་མེད་དངོས་གྲུབ་བླང་། །ཞེས་པས་དམ་ཅན་བོད་པའི་རྟགས་ཚངས་ནས་བསྐུལ་བ་ནི་གཏོར་མ་བཟང་པོ་བཤམས་ལ། རྒྱུད་ལས། ཧཱུྃ་དཔལ་གྱི་ཕོ་ཉའི་དུས་ལ་བབ། །སོགས་ནས། བཅོལ་བའི་ཕྲིན་ལས་གྲུབ་པར་མཛོད། །ཅེས་བསྐུལ་མཐར་ཚོགས་ཐ་མ་དང་འབྲེལ་བར་ལིངྒ་བསྟབ་པ་བྱ། ལྷག་མ་བཏང་ལ་དངོས་གྲུབ་ལྷ་ལ་བླང་བའི་ཚུལ་གཞུང་བཞིན་ནམ། རྒྱས་པར་རང་གཞུང་གི་ཚེའི་ཆོ་ག་དང་འབྲེལ་པར་བླང་པ་ཉིད་ཟབ་བོ། །གཉིས་པ་ངན་སྔགས་ཉེ་བར་བསྙེན་པ་ནི། རྣལ་འབྱོར་ཆེན་པོ་ལས། དྲག་པོ་གསད་པའི་ལས་བྱ་བ། །ཉི་ནག་མར་གྱི་ངོ་ལ་ནི། །དྲག་པོ་ལས་ཀྱི་རིམ་པ་བྱ། །གདབ་སྔགས་དྲུག་གི་ལས་བྱས་ལ། །དམ་ཅན་སྔགས་དང་བཅས་པ་དང་། །གཞི་སྙིང་སྔགས་ལ་མིང་བཏགས་ལ། །བཟླས་ཚད་ཚེ་ལུང་ཁྲུས་ལུང་གིས། །ཕུར་བདབ་རྡུལ་དུ་བརླག་པར་བྱ། །ཞལ་དུ་བསྟབ་ཅིང་གཏོར་མ་གཏང་། །ལས་གསུམ་ངེས་པས་ལས་མཐའ་བརྟུལ། །དེ་ལ་རྟགས་མཚན་མེད་པ་ན། །ཡི་དམ་ནར་མ་གཞུང་དུ་བྱའོ། །ལས་ཀྱི་རིམ་པ་རྫོགས་བྱས་པས། །གང་ལ་དམིགས་པ་གདོན་མི་ཟ། །ཞེས་པས་ཕུར་པ་གྲུབ་ན་གདབ་ལས་བྱ་བའི་དོན་གཞན་དུ་ཤེས་པར་བྱ་ཞིང་། དངོས་གྲུབ་དགྲ་ལས་བླང་པའི་མན་ངག་ཉམས་སུ་བསྟར་རོ། །འདི་ནི་རྒྱུད་ལ་མན་ངག་ལྷན་ཐབས་སུ་བསྣན་པའི་ལུགས་སུ་ཤེས་པར་བྱའོ།། །།མངྒ་ལཾ།། །།