ཕུར་པ་རྒྱུད་ལུགས་ལས་དམ་ཅན་ཉེ་བར་བསྙེན་པའི་ཕྲིན་ལས་སྨད་ལས་ཀྱི་སྲོག་ཤིང་།

Previous Text Back to Volume Page Next Text

Wylie title	phur pa rgyud lugs las dam can nye bar bsnyen pa'i phrin las smad las kyi srog shing
Location	'jigs gling bka' 'bum Volume 9, Text 20, Pages 551-556 (Folios 1a1 to 8b3)
Author	འཇིགས་མེད་གླིང་པ་
Less details More details
Citation	'jigs med gling pa. Phur pa rgyud lugs las dam can nye bar bsnyen pa'i phrin las smad las kyi srog shing. In Kun mkhyen rig 'dzin 'jigs med gling pa'i gsung 'bum, Vol. 9: 551-556. New Delhi: Shechen Publications, 2025.
Genre	Activity Manual - las byang · Recitation Manual - bsnyen yig
Cycle	ཕུར་པ་རྒྱུད་ལུགས་ (phur pa rgyud lugs)
Deity	dam can

[edit]

༄༅། །ཕུར་པ་རྒྱུད་ལུགས་ལས་དམ་ཅན་ཉེ་བར་བསྙེན་པའི་ཕྲིན་ལས་སྨད་ལས་ཀྱི་སྲོག་ཤིང་ཞེས་བྱ་བ་བཞུགས། །

༄༅། །དཔལ་ཆེན་བཛྲ་ཀུ་མཱ་ར་ལ་ནཱ་མ། འདིར་རྩ་བའི་ས་བཅད་གཉིས་པ་སྨད་ལས་ཀྱི་དང་པོ་དམ་ཅན་ཉེ་བར་བསྙེན་པ་ནི། རྒྱུད་ལས། བསྒྲུབས་ན་ཆགས་པའི་སྲུང་མ་ནི། །བཅུ་གཉིས་དག་ཏུ་ཤེས་པ་ལ། །ཤྭ་ན་མུ་ཁ་ལྕགས་སྤྱང་མོ། །ཤྭ་ན་མུ་ཁ་ལྕགས་ཁྱི་མོ། །སྲི་ལ་མུ་ཁ་ཟངས་འཕར་མ། །སྲི་ལ་མུ་ཁ་ཟངས་ཝ་མོ། །ས་བདག་བཞི་ནི་འགྲུབ་པར་ངེས། །བདག་ཉིད་བཞི་ནི་དཔྱིད་དབྱར་དང་། །སྟོན་དགུན་བཞི་ཡི་རྒྱལ་མོ་སྟེ། །བཞི་ཚན་གསུམ་པོ་དག་ཏུ་ནི། །བསྟན་ཅིང་བ་ལིན་སྦྱིན་པར་བྱ། །དེ་ལ་དངོས་གྲུབ་མྱུར་བར་འོང་། །ཞེས་པས་འདི་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། ཉམས་པ་བདུན་པོ་བསྒྲལ་བའི་ཕྱིར། །དྲག་པོའི་དུས་གཟུང་ཡོ་བྱད་གསོག །རྩ་བའི་མཎྜལ་ལྷོ་ནུབ་ཏུ། །བསེ་བྱང་སྦྲག་མའི་མཎྜལ་ནི། །དབུས་སུ་གྲུ་གསུམ་མཐུར་དུ་བྲུ། །ཕྱི་རིམ་ཟླ་གམ་མུ་ཁྱུད་བཅའ། །འཁོར་ལོ་དྲུག་ཏུ་ངེས་པའོ། །དེ་ཡི་ཕྱི་རོལ་གྲུ་ཆད་བཞིར། །གྲུ་གསུམ་མཐིང་ནག་རེ་རེ་བྱ། །ཞེས་དང་། དམ་ཅན་གནས་པའི་གྲུ་གསུམ་བཞི། །ཕྱོགས་བཞི་དག་ཏུ་ངེས་པ་ཡིན། །རེ་རེར་ཐོད་ཆེན་རེ་རེ་ལ། །ལིངྒ་བཅས་པ་ངེས་བཅུག་ལ། །རྫས་རྣམས་ངེས་པར་ཚོགས་པར་གསོག །ལྕགས་ཕུར་དབུས་སུ་དགོད་པར་བྱ། །མི་བཟད་ཕུར་པ་དྲུག་རྣམས་ནི། །གྲུ་གསུམ་དྲུག་ལ་ཤེས་པར་བྱ། །དམ་ཅན་མ་ལུས་ཕུར་པ་དང་། །མིང་པོ་གསུམ་འདུས་ཕུར་པ་གཅིག །ཕྱོགས་བཞི་དག་ཏུ་ལེགས་པར་དགོད། །ཅེས་པ་ལས་འཁོར་ལོ་དྲུག་ནི་རྩིབས་དྲུག་དང་། གྲུ་གསུམ་དྲུག་ནི་རྩིབས་མཆན་དུ་བྲི་བར་བྱ་ལ། དེ་ཡང་བྲུབ་ཁུང་ལ་བརྟེན་ནས་དམ་ཅན་ཉེ་བར་བསྙེན་པ་ནི་མཚན་མ་འབྱིན་པའི་ལས་ཡིན་པས་དམིགས་པའི་རྟེན་ལིངྒ་བཅའ་བའི་ཚུལ། ཤིང་ཤུན་རོ་རས་དག་ལ་ནི། །ལིངྒ་གསད་པའི་འཁོར་ལོ་ནི། །དུར་ཁྲོད་སྨྱུག་གུ་ཁྲག་ཆེན་གྱི། །ཞེ་སྡང་བཅས་པའི་སེམས་ཀྱིས་དྲིས། །འཁོར་ལོ་རྩིབས་དྲུག་བཅས་པ་ལ། །སྤྱི་བོར་ཨོཾ་དང་ཀཱི་ལ་ཡ། །སྙིང་གར་མིང་དང་དཔྲལ་བར་རུས། །གཡས་སུ་ཧཱུྃ་ལ་གཡོན་དུ་ཕཊ། །མཱ་ར་ཡ་ནི་འདོམས་སུ་སྟེ། །དྲུག་ལ་སྔགས་དྲུག་བཅས་པའོ། །སྲོག་ལ་འདྲེན་པའི་སྙིང་པོ་རྣམས། །མཚམས་ལ་འཕྱང་དྲུག་ངེས་པ་ཡིན། །ཐམས་ཅད་འདུས་པས་མཐའ་མ་བསྐོར། །ཞེས་པས་འཁོར་ལོ་རྩིབས་དྲུག་གི་ལྟེ་བར་ལིངྒ་དང་། རྩིབས་དྲུག་ལ་མགོ་ཐོག་ནས་བརྩམས་ཏེ་ཉ་ས་ཡ་ར་སོགས་གབ་པའི་སྔགས་དྲུག །རྩིབས་མཆན་དྲུག་ལ་གདགས་པའི་འཕྱོང་དྲུག །གནད་ཡིག་ཏུ་བསྟན་པའི་ཐམས་ཅད་འདུས་པའི་རི་རབ་ཀྱི་མཐའ་བསྐོར། ཟག་རྫས་ལ་སོགས་བྱུགས་པ་རབས་ཆད་ཀྱི་ཐོད་པར་སྩལ་ལ་དབུས་ཀྱི་བྲུབ་ཁུང་དུ་བཅུག་པའི་སྙིང་གར་བསྙེན་ཕུར་གཟུགས་ཅིང་ཁ་ཁྱེར་རྩང་གིས་བསྐོར། དེའི་སྟེང་དུ་སྐུ་གསུང་ཐུགས་ཀྱི་རྟེན་བཅས་ནས་གཟིར་བའི་ཚུལ། སྦ་མཁར་ཚིགས་གསུམ་དག་ལ་ཡང་། །བསེ་བྱང་སྙིང་པོ་བཅས་པ་གདགས། །བསེ་བྱང་ནག་པོ་སྙིང་པོར་བཅས། །དེ་འོག་གཉིས་ལ་གདགས་པར་བྱ། །བསེ་བྱང་དཀར་པོ་སྙིང་པོར་བཅས། །དེ་ཡི་འོག་ཏུ་ཤེས་པར་བྱ། །དེ་འོག་བསེ་མོ་ནག་མོ་དང་། །ཤྭ་ནའི་སྐུ་དང་སྙིང་པོར་བཅས། །སྦ་ཚོགས་བཞི་པ་དག་ལའོ། །ཐ་མར་ལིངྒ་སྐུད་པར་གདགས། །མཎྜལ་ནང་དུ་སྦ་མཁར་གྱིས། །ལིངྒ་འཁོར་ལོ་བཅས་ལ་གཟིར། །ཞེས་པ་ལྟར་སྐུའི་རྟེན་བསེའི་བྱང་བུ་ལ་ནལ་བུ་དང་། གཅན་གཟན་བཞི་དང་། ཆུ་སྲིན། ཉའི་པགས་པ་ལས་བྱས་པའི་བསེ་གྲུབ་ན་མཆོག་ཡིན་ནོ། །མ་མོ་བཅུ་གཉིས་ཀྱི་སྐུ་གཏོར་བཟློག་ཏུ་བསྟན་པའི་བསྐུལ་བྱང་གི་མངོན་རྟོགས་ལྟར་རམ། ཡང་ན། དམ་ཅན་མ་ནི་འདི་ལྟ་སྟེ། །ནག་མོ་ནག་ལ་བསེ་མོ་དམར། །ཤོ་ན་དཀར་ལྡེམ་མིང་པོ་སེར། །ཞལ་གཅིག་ཕྱག་གཉིས་ལྕགས་ཀྱུ་ཕུར། །རངས་པ་རྣམས་ལ་ཆིབས་མེད་དོ། །ཞེས་དང་། འཆིབས་སམ་ཡང་ན་རྐྱང་བ་སྟེ། །རང་རང་ཕྱག་མཚན་ཕུར་པ་བསྣམས། །ཞེས་པ་ལྟར་རོ། །མིང་པོ་གསུམ་ནི། རྒྱལ་པོ་དཀར་པོ་གིང་དཀར་ཕུར། །མ་ཧཱ་ཀཱ་ལ་མདོག་ནག་སྟེ། །བེ་ཅོན་ཕུར་བུ་རྒྱན་དང་ལྡན། །བསེ་ཡི་སྐྱེ་བུ་དམར་པོ་འཇིགས། །བསེ་མདའ་བསེ་གཞུ་ཕུར་པ་འདྲིལ། །ཆིབས་སམ་ཡང་ན་རྐྱང་པ་སྟེ། །ཞེས་པ་ལྟར་གྱི་རྒྱབ་ཏུ་སོ་སོའི་གསུང་གི་སྙིང་པོ་སྔགས་བྱང་དང་བཅས་པ་བྲིས་ནས་རབ་ཏུ་གནས་པ་ཐུགས་ཀྱི་རྟེན་སྦ་ལྕག་ཚིག་གསུམ་པའི་ལྷུ་དང་པོར་ཐབས་ཤེས་ཀྱི་དབང་ལས་བསེའི་སྐྱེས་བུ། གཉིས་པར་ལྕགས་ཀྱི་སྐྱེས་བུ། གསུམ་པར་དུང་གི་སྐྱེས་བུ། །བཞི་པར་མ་མོ་བཅུ་གཉིས་པོ་གདགས་པ་བྲུབ་ཁུང་གི་སྟེང་དུ་བཙུགས་པ་ལིངྒ་དང་སྲད་བུས་སྦྲེལ། ཐོད་པ་མཚན་ངན་བཞིའི་ནང་དུ་མིང་རུས་དང་ལྡན་པའི་ཉ་བོ་རེ་བཅུག་ལ་དམ་ཅན་གསུམ་དང་མིང་པོ་གསུམ་འདུས་ཀྱི་ཕུར་པ་གཟིར་བ་སོ་སོའི་ལྷ་གནས་སུ་བཀོད། དམ་ཅན་རྣམ་གསུམ་མཐུན་པའི་རྫས། །ཐོད་པ་བཅུ་གཉིས་ཡང་ན་གསུམ། །དེ་རུ་ཐུན་གྱི་སྦྱོར་བ་བྱ། །གཏོར་མ་ལ་སོགས་ངེས་པར་བསག །ཅེས་དང་། དྲག་པོའི་དམ་རྫས་མང་པོ་རྣམས། །ཐོད་པ་ཚལ་བུའི་ནང་དུ་བསོག །ཅེས་པ་ལྟར་སོ་སོའི་ཐུན་རྫས་གནད་ཡིག་ལྟར་དང་། མཐུན་པའི་རྫས་ནི། བསེ་ཡི་ལྷ་མོའི་རྫས་རྣམས་ནི། །འོ་མ་ཞག་དང་མར་ཁུ་དང་། །སྦྲང་ཙི་དང་ནི་ཆང་རྣམས་སོ།།སྣོད་བ་མན་གྱི་རྭའོ། །དེ་བཞིན་ཤོ་ན་མུ་ཁའི་ཡང་། །ཁྱི་ཐོད་ཝ་ཐོད་སྤྱང་ཐོད་དང་། །འཕར་བའི་ཐོད་པ་དེ་བཞིན་ཏེ། །དེ་ཡི་ནང་དུ་རྫས་བསགས་པ། །ཁྲག་སྣ་སྟོང་དང་ཤ་སྣ་སྟོང་། །སྙིང་སྣ་སྟོང་དང་རྐང་སྣ་སྟོང་། །ཤོ་ན་ལ་སོགས་རྫས་སུ་བཞག །རེ་མ་ཏི་ཡི་རྫས་རྣམས་ཀྱང་། །ནལ་བུའི་ཤ་ལ་སོགས་པ་སྟེ། །དུ་མ་ཉིད་དུ་བསག་པར་བྱ། །རྐང་ཆེན་དུང་དང་ཞིང་ཆེན་དང་། །བྷནྡྷ་རཀྟ་ཙིཏྟ་དང་། །མཚོན་ཆ་དྲུག་ཀྱང་བསག་པར་བྱ། །ཞེས་དང་། མིང་པོའི་མཐུན་རྫས་ནི། བསེ་མཁར། སེ་ཕུར། སེ་མདའ། བསེ་ཕོར། ཁྱ་ིདམ་སྙིང་། ཟངས་ཁབ། མི་ཐོད་དང་བསེ་ཕོར་ནང་དུ། ཁྲག་སྣ་ཚོགས་བསེའི་སྐྱེས་བུ་ལའོ། །དྲེལ་ནག་ཐོད་པ། ལུག་ནག་སྙིང་། རྟ་ནག་གི་རྨིག་པ་གཡས། མདའ་ནག །དར་ནག །གཏོར་མ་དང་། ཕུར་པ་ནག་པོ་མགོན་པོ་ལའོ། །ཐོད་པ་བམ་རིལ། ལུག་དཀར་སྙིང་། སྙུག་རྒོད། བཤོས་བུ་དཀར་པོ། ཕུར་པ་དཀར་པོ་ལ་སོགས་པ་རྒྱལ་པོའམ་དུང་མི་སྐྱེས་བུའི་མཐུན་རྫས་སོ། །དེ་བཞིན་དུ་སྨན་རཀ་གཏོར་གསུམ། ཐུགས་དམ་བསྐང་བའི་དམ་རྫས་རྣམས་སྒོ་ཐམས་ཅད་ནས་ཚོགས་པར་བྱའོ། །གཉིས་པ་ལ་གཉིས་ལས། དང་པོར་རྩ་བའི་ལྷ་གསུམ་ནི། གཞུང་བཞིན་ལེགས་པར་བསྐྱེད་པ་ཡིན། །དབང་བསྐུར་བྱིན་དབབ་སྤྱན་དྲང་བྱ། །མཆོད་ཅིང་བསྟོད་དེ་སྨོན་ལམ་གདབ། །ཅེས་ཐོག་མར་ཡི་དམ་གྱི་མངོན་རྟོགས་བཟླས་པའི་བར་བྱའོ། །གཉིས་པ་དམ་ཅན་ཉེ་བར་བསྙེན་པ་ལ་གསུམ། བཞི་སྙིང་དྲིལ་ནས་འབོད་པ་བསྙེན་པ། གནད་ལ་དབབ་ནས་རྦད་པ་བསྒྲུབ་པ། ཐུན་དུ་བསྒྲུབ་ནས་གསད་པ་ལས་སྦྱོར་ལས། དང་པོའི་དོན་དུ་འཛབ་ཁང་དབྱེ་བ་ནི། ཧཱུྃ་སྙིང་རྗེས་བསྒྲལ་བའི་དམ་ཚིག་ནི། །གསད་ཅིང་མནན་པ་མ་ཡིན་ཏེ། །ཕུང་པོ་རྡོ་རྗེར་གཏམ་བྱས་ནས། །རྣམ་པར་ཤེས་པ་རྡོ་རྗེར་བསྒོམ། །ཞེས་བརྗོད་པས། སྐུ་གསུང་ཐུགས་ཀྱི་རྟེན་རྣམས་དམ་ཅན་དངོས་ཀྱི་སྣང་ཆར་གསལ་བ་སྟེ། ཨོཾ་བཛྲ་ཀཱི་ལི་ཀཱི་ལ་ཡ་ཛཿཧཱུྃ་བཾ་ཧོཿ ཀ་ཏཾ་ཀ་ཡེ་ཛ་ཡེ་བི་ཛ་ཡེ་ཨ་ཙི་ཏེ་ཨ་པ་ར་ཙི་ཏེ། མ་ར་སེ་ན་པྲ་མརྟ་ན་ཡེ་སརྦ་བིག་ནན་བཾ་ཧཱུྃ་ཕཊ། ཅེས་བཟླ་ཞིང་། བདག་ཉིད་ཡི་དམ་དུ་གསལ་བའི་ཐུགས་ཀའི་འོད་ཟེར་གྱིས་དམ་ཅན་རྣམས་ཀྱི་སྲོག་སྙིང་འཕྲོག་པས་ཅི་བཅོལ་བའི་ལས་ཉན་པར་བསམ་མོ། །དེ་ཡང་། བར་བར་མཆོད་བསྟོད་གནད་ལ་དབབ། །རང་རང་དམ་རྫས་ལེགས་པར་བཏབ། །ཅེས་པས། གཏོར་འབུལ་ཟུར་བཀོལ་ལྟར་རམ། ཡང་ན། ཨོཾ་བཛྲ་ཀྲོ་དྷ་ཙིཏྟ་མ་ཧཱ་ལཱི་ཤུ་ར་ཤུ་ར། ཁྱིར་ཁིང་གྷ་དྷ་ར་ནི། ཤུ་ལ་ཙི་པཱ་ར་ཤུ་པ་ར་ནི། ཡོ་ག་ཤུདྡྷ་ཙིཏྟ་མ་ར་ལི། ཀྲོ་དྷ་ཡོ་གི་ནི་བཛྲ། ཛྭ་ལན་དྷ་རི། ཤ་ཥ་ཎི་ཛཿཛཿཨི་དཾ་བ་ལིཾ་ཏ་པུ་ཙ་ཁཱ་ཧི་ཁཱ་ཧི། ཞེས་ལན་བདུན་གྱིས་བསྔོ་ཞིང་ཡང་བཟླས་པ་ལ་འཇུག །ཐུན་བསྡུ་བ་ན། དངོས་གྲུབ་བར་ཆད་བྱེད་པའི་བགེགས། །གདུག་ཅིང་ལྡང་སེམས་ལྡན་པ་རྣམས། །ལྷའམ་འོན་ཏེ་བདུད་ཀྱང་རུང་། །ང་ལ་བར་ཆད་བྱེད་པ་རྣམས། །མཐུ་དང་རྫུ་འཕྲུལ་མེད་པར་གྱིས། །ཞེས་ཕྲིན་ལས་བཅོལ། རྟེན་ལ་འོད་ཟེར་གྱིས་དྲ་བས་བཅིང་། ཐུན་མཐར་ཚོགས་ཀྱི་མཆོད་པ་དང་བསྐང་བ་ཅི་ནུས་བྱ། ཆོ་གའི་རྗེས་ཆོག་གི་མཐར་ཉལ་བའི་རྣལ་འབྱོར་ལ་འཇུག །རྟགས་མཚན་བྱུང་ན་དངོས་གྲུབ་ནི། །རབ་ཏུ་བླང་བར་ཤེས་པར་བྱ། །ཞེས་པ་ལས། བསྙེན་ཚད་གྲངས་ངེས་མ་བཤད་ཅིང་། །རྟགས་ནི། རབ་ཀྱིས་ཕུར་པ་འཕྱང་བར་འགྱུར། །གཉིས་པ་འབྲིང་ལ་མེ་སྟག་འཕྲོ། །ཐ་མ་ཉམས་དང་རྟགས་སུ་བཤད། །ཅེས་པས། རྟགས་མཚན་ཐ་མ་དང་ཉམས་རྨི་ལམ་གསུམ་དུ་གནད་ཡིག་ལྟར་གྱི་དོན་འདུ་བའི་རྟགས་མཐོང་བའམ། བཟླས་པ་འབུམ་ཕྲག་གཅིག་ལ་ལས་རུང་དུ་བྱས་པ་ལ་འབོད་རྦད་གསད་གསུམ་གྱི་དང་པོའི་ཕུར་པ་རང་སྐད་ལ་དྲིལ་ཏེ་བཟླས་པའི་བསྙེན་པ་ཞེས་བྱའོ། །གཉིས་པ་རྦད་པའི་ལས་སམ་བསྒྲུབ་པ་ནི། ལས་སྔགས་ཁོང་ཁྲར་སྡེབ་པའི་མན་ངག་ལ་བརྟེན་ནས་དམ་ཅན་ལས་ལ་བཀོལ་བས་དགྲ་བོའི་བླ་འགུགས་པ་སྟེ། དྲག་སྔགས་དྲུག་པ་དམ་ཅན་དང་། །ལས་སྔགས་ཐམས་ཅད་གོང་གི་བར། །མན་ངག་རིམ་པ་ཤེས་པ་ཡིན། །གཉིས་པ་རྦད་པའི་ལས་སམ་བསྒྲུབ་པ་ནི། ལས་སྔགས་ཁོང་ཁྲར་སྡེབ་པའི་མན་ངག་ལ་བརྟེན་ནས་དམ་ཅན་ལས་ལ་བཀོལ་བས་དགྲ་བོའི་བླ་འགུགས་པ་སྟེ། དྲག་སྔགས་དྲུག་པ་དམ་ཅན་དང་། །ལས་སྔགས་ཐམས་ཅད་གོང་གི་བར། །མན་ངག་རིམ་པ་ཤེས་པ་ཡི། །བཟླས་པ་བྱས་པས་བླ་ཁུགས་འགྱུར། །ཞེས་དང་། དམར་ཆེན་སྦྲེང་ལ་དམ་ཅན་བསྐུལ། །གབ་པའི་སྔགས་ཀྱིས་རབ་བྱས་ལ། །དམ་ཅན་མང་པོས་དགྲ་བོ་དབུག །མིང་པོའི་བླ་འགུགས་སྔགས་ཀྱིས་སོ། །ཤེས་པ་བསྟིམ་པ་ཡང་ཡང་ངོ་། །ཞེས་པས་གཏོར་མ་ལ་དམར་ཆེན་སྦྲེངས་ཤིང་དམ་ཅན་གྱི་བསྐུལ་བ་རྒྱས་པའམ། མ་ནུས་ན། ཧཱུྃ། བསྟན་པར་དགྲ་འདྲེ་བྱུང་བའི་ཚེ། །ཤྭ་ན་མུ་ཁའི་དུས་ལ་བབ། །བདག་ཉིད་ཆེན་མོའི་དུས་ལ་བབ། །ས་བདག་ཆེན་མོའི་དུས་ལ་བབ། །དྲེགས་པ་མང་པོའི་དུས་ལ་བབ། །ཁྱེད་ཀྱི་མཐུ་རྩལ་རབ་ཏུ་དབྱུང་། །སངས་རྒྱས་བསྟན་པ་བཤིག་པ་དང་། །དཀོན་མཆོག་སྐུ་དགྲ་དབེན་རྩ་འཇོམས། །ཆོས་ཁྲིམས་འདྲལ་དང་སློབ་དཔོན་དགྲ། །རྣལ་འབྱོར་འཇོམས་པ་ལ་སོགས་པ། །གསད་དང་དབབ་དང་ནད་ངན་གྱིས། །ཇི་ནས་བརླག་པར་ཁྱོད་ཀྱིས་གྱིས། །ང་ནི་ཁྲག་འཐུང་ཧེ་རུ་ཀ །ཁྱོད་ཀྱི་སྙིང་ཁྲག་ང་ལ་ཡོད། །རྡོ་རྗེ་གསང་བའི་བཀའ་ལས་ནི། །ཁྱོད་ཀྱི་འདས་པར་གྱུར་ན་ནི། །ཁྲོ་བོ་སྟོབས་ཆེན་ཧེ་རུ་ཀས། །མགོ་བོ་རྡོ་རྗེས་ཚལ་པར་འགས། །དེ་བས་བཀའ་ལས་མ་འདའ་ཞིག །ཅེས་བསྐུལ། བཀའ་ཤིན་ཏུ་གཉན་ནོ། །བཟླ་བྱའི་སྔགས་ནི། ཉིན་མོ་གཏོར་ལ་ནུབ་མོ་དྲིལ། །གང་བབ་དུས་སུ་ཤེས་པར་བྱ། །ཞེས་པས་ཉིན་མོ་གཏོར་ཏེ་བཟླས་པ་ནི། ཐུན་བཞིའི་དང་པོ་ལ་ཤོ་ན་མ་རྦད་པ་ནི། ཨོཾ་བཛྲ་ཀཱི་ལི་ཀཱི་ལ་ཡ་ཛཿཧཱུྃ་བཾ་ཧོཿ ཀ་ཏཾ་ཀ་ཡེ་ཆེ་གེ་མོ་ལ་བྷྱོ་བྷྱོ། སརྦ་བིག་ནན་བཾ་ཧཱུྃ་ཕཊ། གཉིས་པ་ལ་བསེ་མོ་རྦད་པ། ཨོཾ་བཛྲ་ཀཱི་ལི་ཀཱི་ལ་ཡ་ཛཿཧཱུྃ་བཾ་ཧོཿ ཛ་ཡེ་བི་ཛ་ཡེ་ཆེ་གེ་མོ་ལ་བྷྱོ་བྷྱོ། སརྦ་བིག་ནན་བཾ་ཧཱུྃ་ཕཊ། གསུམ་པ་ལ་རེ་མ་ཏི། ཨོཾ་བཛྲ་ཀཱི་ལི་ཀཱི་ལ་ཡ་ཛཿཧཱུྃ་བཾ་ཧོཿ ཨ་ཙི་ཏེ་ཨ་པ་ར་ཙིཏྟ་ཆེ་གེ་མོ་ལ་བྷྱོ་བྷྱོ། སརྦ་བིག་ནན་བཾ་ཧཱུྃ་ཕཊ། བཞི་པ་ལ་གིང་། ཨོཾ་བཛྲ་ཀཱི་ལི་ཀཱི་ལ་ཡ་ཛཿཧཱུྃ་བཾ་ཧོཿ མཱ་ར་སེ་ན་པྲ་མརྟ་ན་ཡེ་ཆེ་གེ་མོ་ལ་བྷྱོ་བྷྱོ། སརྦ་བིག་ནན་བཾ་ཧཱུྃ་ཕཊ། བཟླའོ། །ནུབ་མོ་དྲིལ་ཏེ་བཟླ་བ་ནི། ཨོཾ་བཛྲ་ཀཱི་ལི་ཀཱི་ལ་ཡ་ཛཿཧཱུྃ་བཾ་ཧོཿ། ཀ་ཏཾ་ཀ་ཡེ་ཛ་ཡེ་བི་ཛ་ཡེ་ཨ་ཙི་ཏེ་ཨ་པ་ར་ཙི་ཏ། མ་ར་ས་ན་པྲ་མརྟ་ན་ཡེ་ཆེ་གེ་མོ་མཱ་ར་ཡ་སརྦ་བིག་ནན་བཾ་ཧཱུྃ་ཕཊ། ཅེས་བཟླས་ཉིན་ནུབ་གང་ལའང་བར་བར་དུ་དམ་ཅན་གྱི་བསྐུལ་བྱ། དམིགས་པ་ནི། ཐོད་པ་ལྕགས་མཁར་སྒོ་མེད་དུ། །དགྲ་བོ་ངེས་པར་གསལ་མིང་གསལ། །ཞེས་དང་། དེ་ཡི་ཤེས་པ་དགུག་པ་དང་། །དྲག་སྔགས་བཞི་ཡི་སྦྱོར་བ་བྱ། །ཕོ་ཉ་སྔགས་དང་ཏིང་འཛིན་གསུམ། །བྲན་དང་ཕོ་ཉ་བཀའ་ཉན་གྱིས། །ཤེས་པ་ངེས་པར་དགུག་པར་བྱ། །མིང་པོ་སྲིང་མོའི་དགུག་སྔགས་སམ། །ཡང་ན་མིང་པོའི་དྲག་སྔགས་སོ། །ཏིང་འཛིན་རི་དྭགས་ཤ་བཀྱེ་བཞིན། །མ་ཁུག་བར་དུ་ངེས་པར་སྦྱར། །ཁུགས་ནས་གདབ་པའི་ལས་བྱའོ། །ཞེས་དང་། ཉམས་པར་གྱུར་བའི་དགྲ་བོ་དེ། །གང་དུ་བྲོས་པའི་གནས་ནས་དགུག །སྤྲུལ་པ་མང་པོའི་ཚོགས་ཆེན་གྱིས། །ཤིག་ཤིག་གུལ་གུལ་གནས་པ་ནི། །དཔེར་ན་གྲོག་ཚང་སྦྲུལ་ཚང་བཞིན། །གནས་པ་ཞབས་ཀྱི་ཕུར་པ་ཡིས། །སྡོང་པོ་བསྒྱུར་བཞིན་ཞབས་འོག་ན། །མདངས་བྲལ་གནས་པའི་སྦྱོར་བ་བྱ། །ཞེས་པ་ལྟར་བྱའོ། །གསུམ་པ་གསད་པའི་ཐུན་གྱི་ལས་སྦྱོར་ལ་གསུམ། ཐུན་བཅའ་བ་དང་། ཐུན་བསྒྲུབ་པ་དང་། ཐུན་གྱི་གསད་པའོ། །དང་པོ་ནི། ཐུན་རྫས་མང་པོ་ཐོད་པར་བསག །ཐོད་ཆེན་བཞི་རུ་ཐུན་ཁྲག་གོ །ཞེས་པས། རབས་ཆད་དང་། མཛེ་ཐོད་དང་། སྣེལ་གྲི་དང་། ཁྱི་སྤྱང་ལ་སོགས་པའི་ཐོད་པར་དམ་ཅན་སོ་སོའི་ཐུན་རྫས་གནད་ཡིག་ལྟར་འདུ་བྱ་ཞིང་། དེ་ཡང་ཐུན་སྔགས་བྲིས་པའི་དར་ནག་གིས་གཡོགས་ལ་ཁྲིའུའི་ཁར་བཞག་གོ །གཉིས་པ་ཐུན་བསྒྲུབ་པ་ནི། །ཐམས་ཅད་འདུས་པ་གནད་ལ་དབབ། །དཔའ་བོ་གཅིག་པས་དགྲ་འཇབ་བྱ། །མ་མོ་འདུས་པ་དམ་ཅན་ལ། །གཅུན་ལ་དབབ་པ་ཤེས་པར་བྱ། །ཞེས་པའི་དོན་ནི་བཞི་སྙིང་ལ་མ་མོའི་ཐུན་སྔགས་སྡེབ་པ་ཡིན་ལ། དེ་ཡང་། ལས་ཀྱི་ཐུན་དྲུག་སྔགས་ལ་ཡང་། །ཉིན་མོ་གཏོར་ལ་ནུབ་མོ་དྲིལ། །གང་བབ་དུས་སུ་ཤེས་པར་བྱ། །རྟགས་མྱུར་སྲོག་བཅད་ལ་སོགས་སོ། །ཞེས་པས་ཉིན་མོ་གཏོར་ཏེ་བཟླ་བ་ནི། ཐུན་དང་པོ་ཤོ་ན་མའི་ངོ་བོར་བསྒྲུབ་པ། ཨོཾ་བཛྲ་ཀཱི་ལི་ཀཱི་ལ་ཡ་ཛཿཧཱུྃ་བཾ་ཧོཿ ཀ་ཏཾ་ཀ་ཡི་ཧཱུྃ་མ་མ་པ་ཤི་ཀུ་རུ་མ་ཏཾ་ཉ་ཆེ་གེ་མོ་བླ་ལ་ཐུན། སརྦ་བིག་ནན་བཾ་ཧཱུྃ་ཕཊ། ཅེས་བཟླས་པས། ཐུན་རྫས་ཤོ་ན་མ་བཞིའི་ངོ་བོར་གྱུར་པ་ལས་ནད་མཚོན་ཁྲོ་ཆུང་གི་ཚྭ་ཚྭ་འཕྲོས། གཟས་པོའི་སྙིང་ག་ནས་བཏབ་བླ་གསད་མདངས་འཕྲོག་ནས་ཉ་བོ་ལ་བསྟིམ་པ་ནི་འོག་མ་རྣམས་ལའང་འགྲེ་སྟེ། ཁྲག་དུག་ནད་དུ་གྱུར་པ་ཡིས། །དགྲ་བོ་རིམས་ནད་ཐེབས་པ་བཞིན། །མདངས་དང་ཕྲལ་བར་རབ་ཏུ་བསམ། །དྲག་པོའི་དམ་རྫས་ཐུན་ཕབ་པས། ཁྲོ་བོར་བྱུར་པས་གསད་པར་བསམ། །དེ་ཡང་བར་པར་ཕྱག་རྒྱ་ཅན། །འཕྲོས་པས་དགུག་པའི་ལས་བྱའོ། །ཞེས་སོ། །ཐུན་གཉིས་པ་ལ། ཨོཾ་བཛྲ་ཀཱི་ལི་ཀཱི་ལ་ཡ་ཛཿཧཱུྃ་བཾ་ཧོཿ། ཛ་ཡེ་གི་ཛ་ཡེ་ཀ་ར་ཨི་ནན་ཆེ་གེ་མོ་བླ་ལ་ཐུན། སརྦ་བིག་ནན་བཾ་ཧཱུྃ་ཕཊ། ཐུན་གསུམ་པ་ལ། ཨོཾ་བཛྲ་ཀཱི་ལི་ཀཱི་ལ་ཡ་ཛཿཧཱུྃ་བཾ་ཧོཿ ཨ་ཙི་ཏེ་ཨ་པ་ར་ཙིཏྟ་དྷ་ཏི་མ་མ་ཀརྨ་ཆེ་གེ་མོ་བླ་ལ་ཐུན། སརྦ་བིག་ནན་བཾ་ཧཱུྃ་ཕཊ། ཐུན་བཞི་པ་ལ། ཨོཾ་བཛྲ་ཀཱི་ལི་ཀཱི་ལ་ཡ་ཛཿཧཱུྃ་བཾ་ཧོཿ། མ་ར་སྱ་ན་པྲ་མ་རྟ་ན་ཡེ་ཤི་ཀྲཾ་ཀ་ར་མཱ་ར་ཡཆེ་གེ་མོ་བླ་ལ་ཐུན། སརྦ་བིག་ནན་བཾ་ཧཱུྃ་ཕཊ། ནུབ་མོ་དྲིལ་བ་ནི། ཨོཾ་བཛྲ་ཀཱི་ལི་ཀཱི་ལ་ཡ་ཛཿཧཱུྃ་བཾ་ཧོཿ། ཀ་ཏཾ་ཀ་ཡེ་ཧཱུྃ་མ་མ་པ་ཤཾ་ཀུ་རུ་མ་ཏཾ་ཉ་ཛ་ཡེ་བི་ཛ་ཡེ་ཀ་ར་ཨི་ནན། ཨ་ཙི་ཏེ་ཨ་པ་ར་ཙིཏྟ་དྷ་ཏི་མ་མ་ཀརྨ་མ་ར་སྱ་ན་པྲ་མ་རྟ་ན་ཡ་ཤེས་ཀྲི་ཀ་ར་མཱ་ར་ཡ་ཐུན། སརྦ་བིག་ནན་བཾ་ཧཱུྃ་ཕཊ། རྟགས་ནི་ཐུན་འཚག་པ་དང་། ཁོལ་བ་དང་། མེ་སྟག་དང་། རླངས་པ་བྱུང་ན་རབ། དམག་དྲང་བ་དང་། མཚོན་ཆ་འཕེན་པ་རྨི་བ་འབྲིང་། ཐ་མ་གྲངས་བསྙེན་འབུམ་ཕྲག་གཅིག་བཟླའོ། །ཐུན་མཚམས་སུ། བདག་ཅག་རྣལ་འབྱོར་སྒྲུབ་པ་པོས། །བྱང་ཆུབ་མཆོག་ཏུ་སེམས་བསྐྱེད་ཅིང་། །དུས་གསུམ་རྒྱལ་བའི་གདུང་གསོབ་པའི། །རིག་འཛིན་བདག་ཅག་རྣམས་ལ་ནི། །གནོད་ཅིང་གདུག་པའི་དགྲ་དང་བགེགས། །བདུད་དང་བར་དུ་གཅོད་པ་དང་། །དངོས་གྲུབ་འཕྲོག་ཅིང་འཚེ་བ་རྣམས། །ཁྲོ་བོ་ཆེན་པོའི་བྱིན་རླབས་ཀྱིས། །ཡུད་ཙམ་གྱིས་ནི་འདིར་ཁུག་ལ། །མངོན་སྤྱོད་ཚུལ་བཞིན་བསྒྲལ་བ་དང་། །ལུས་ངག་རྡུལ་དུ་བཤིག་ནས་ཀྱང་། །སྡུག་བསྔལ་ཉམས་སུ་མྱོང་བར་མཛོད། །ཅེས་པས་འཛབ་མཇུག་བསྡུའོ། །གསུམ་པ་གསད་པའམ་བསྒྲུབ་པ་ཆེན་པོ་ནི། ངན་སྔགས་ཉེ་བར་བསྙེན་པ་གཞུང་བསྲང་ལ་དེའི་ཁོང་ཁྲར་གཏོང་བ་བལ་གྱིས་མི་རིག་པའི་མན་ངག་ཡིན་ཏེ། གབ་སྔགས་མིང་རུས་ཐབས་སྔགས་ཆེན། །ངན་སྔགས་འདུས་པས་བསྒྲུབ་ཆེན་པོས། །གསད་པར་བྱ་བའི་རིམ་པ་ཡིན། །ཞེས་པས་ཐུན་གྱི་བསྒྲུབ་པ་རྫོགས་རྗེས་ལྷ་དང་བྲལ་བ་ནས་སྨྱོ་རུ་གཞུག་པའི་བར་ངན་སྔགས་ཉེ་བར་བསྙེན་པ་བཞིན་ལ། ཕུར་གདབ་དང་བསད་གྲིས་གཏུབ། རྗེས་སུ་ཐུན་གྱིས་ཤ་སད་པའི་སྔགས་ཁོང་ཁྲར་བཏང་སྟེ། གསད་པ་ཐུན་གྱི་དམོད་མོ་ཡིན། །གབ་སྔགས་ཐབས་དང་ཤེས་རབ་དང་། །ཐུན་དང་ངན་སྔགས་ཁོང་ཁྲར་བཏང་། །ཞེས་པས་གསལ་ལོ། །དེ་ཡང་སྔགས་ཀྱི་མཚོན་ཆ་ནི་ཐུན་གྱི་ལས་ཡིན་པས་ན། གབ་སྔགས་ཐེམ་པར་བཅས་པ་ལ། །མཱ་ར་ཡ་བཅུག་བཟླས་པ་བྱ། །ལྕགས་ཀྱི་འཁོར་ལོ་རབ་བསྐོར་བས། །དགྲ་བོའི་སྲོག་རྩ་གཅད་པར་བསམ། །ཞེས་པས། ཨོཾ་བཛྲ་ཀཱི་ལི་ཀཱི་ལ་ཡ་ཛཿཧཱུྃ་བཾ་ཧོཿཀ་ཏཾ་ཀ་ཡེ་མ་མ་པ་ཤཾ་ཀུ་རུ་མ་ཏཾ་ཉ་ཛ་ཡེ་བི་ཛ་ཡེ་ཀ་ར་ཨི་ནན། ཨ་ཙི་ཏེ་ཨ་པ་ར་ཙི་ཏེ་དྷ་ཏི་མ་མ་ཀརྨ་མ་ར་སྱ་ན་པྲ་མརྟ་ན་ཡེ། ཤྲི་ཀྲཾ་ཀ་ར་ཆེ་གེ་མོ་མཱ་ར་ཡ་སརྦ་བིག་ནན་བཾ་ཧཱུྃ་ཕཊ། དམིགས་པ་ནི། ལྷ་རྣམས་དྲག་པོར་ངེས་བསམ་ལ། །ཡང་སྤྲུལ་སུམ་སྤྲུལ་མང་པོ་ཡིས། །ཤེས་པ་ལིངྒ་ལ་ཞུགས་བསད། །བར་པར་ཐལ་མོ་དམོད་པ་བྱ། །ཞེས་དང་། བར་དུ་ཐུན་རྣམས་བྲབ་པས་ཡང་། །ཐོད་ཆེན་ནང་དུ་ངེས་པ་སྟེ། །ལས་ཀྱི་ཐུན་དྲུག་སྔགས་ཀྱིས་བཏབ། །དམ་ཅན་མང་པོས་གསད་པར་བསམ། །གཏོད་ཅིང་སྟོབ་ཅིང་ཟ་བར་བརྟག །ཅེས་སོ། །དེ་ལྟར་ནང་ན་སྔགས་ཉེ་བར་བསྙེན་པའི་དུས་ན་ཕུང་པོ་མཐར་བྱེད་ཐུན་གྱི་ལས་ཡོད་ན་འདིའི་དགོས་པ་ཅི་ཡིན་སྙམ་ན། འདི་དམ་ཅན་ཉེ་བར་བསྙེན་པ་དང་འབྲེལ་བའི་གསད་པ་ཐུན་མོང་མ་ཡིན་པ་ཁོང་ཁྲར་སྡེབ་པའི་ཚུལ། ལས་ཀྱི་ཐུན་སྔགས་གསད་པ་དང་། །རྟགས་འབྱིན་ལྷག་པ་ལྷ་ཡི་དམོད། །སྲོག་གི་ཆད་པ་ཐུན་གྱི་སྔགས། །སྔགས་དྲུག་ཕྱིན་ཡོད་བྱ་བའི་ཕྱིར། །ཁོང་ཁྲར་བཏང་བས་ལས་མྱུར་བཤད། །ཅེས་པའི་མན་ངག་ཡིན་ནོ། །དེ་ལྟར་བསྒྲུབ་པའི་ཐུན་གྱི་ལྷག་མ་ཁྲག་སྣ་དང་བསྲེས་ནས་ཟོར་དུ་འཕེན་པའང་། འཕར་བའི་ཐོད་པར་དམ་རྫས་དང་། །ཁྲག་བཅས་གནས་ལ་ཟོར་དུ་འཕང་། །ཞེས་དང་། ཝ་ཐོད་ནང་དུ་བསེ་བྱང་ནི། །དམར་པོ་བཅུག་ལ་ཕུར་པས་མནན། །ཁྱི་ཐོད་ཁ་ལ་མེ་འབར་ཏེ། །རྫས་རྣམས་སྦྱིན་བསྲེག་བྱ་བ་ཡང་། །ཀློང་ཡངས་འཁྱིལ་པའི་ཧོམ་ཁུང་དུ། །སྤྱང་ཐོད་ཁ་ལ་ལིངྒ་དང་། །གཏོར་མ་ལྷ་ལ་བསྟབ་པ་བྱ། །མནན་པ་ལུང་གསུམ་མདོ་རུ་ངེས། །དེ་ལྟར་རབ་ཏུ་བྱས་པ་ཡིས། །རྡོ་རྗེའི་ཕྲག་ཀྱང་འཇིག་གྱུར་ན། །གཟུགས་ཅན་རྣམས་ལ་སྨོས་ཅི་དགོས། །ཞེས་དམ་ཅན་སྤྱི་དྲིལ་གྱི་སྒྲུབ་ཐབས་ལས་བཤད་དོ། །སྤྱིར། གཤིན་རྗེ་གྲུབ་ནས་འཁོར་ལོ་བསྐོར། །མ་མོ་གྲུབ་ནས་ཟོར་ཐུན་འཕང་། །རྒྱལ་པོ་གྲུབ་ནས་གནན་པ་བྱ། །ཕུར་པ་གྲུབ་ནས་གདབ་ལས་བྱ། །ཟེར་ཡང་། དེའི་དོན་བསྟན་པ་དང་སེམས་ཅན་བསྲུང་བའི་དོན་དུ་ཉམས་པ་བདུན་ལ་དམིགས་པ་ལས་གཞན་དུ་མ་གནང་བའི་ཚུལ། དཔྱང་ཐག་ཆད་པ་ཐུགས་རྗེ་ཡི། །གཟུང་ན་ངེས་པར་བསྟན་པ་ཡིན། །ཉམས་པ་བདུན་ལས་གཞན་དུ་མིན། །ཞེས་གསུངས་ན་རང་དགར་ལས་སྦྱོར་དང་མཐུ་གཏད་ལ་དགའ་བ་ནི་རང་རྒྱུད་ཀྱི་སྡོམ་པ་འཇིག་ཅིང་བསོད་ནམས་ཉམས་པའི་རྒྱུར་འགྱུར་བས་ཐོག་མར་འབྲས་བུ་ལ་བར་དུ་གཅོད་པའི་རྒྱུའི་རཱུ་ཏྲ་ཚར་བཅད་ནས། གདོད་མའི་ལམ་གྱི་རཱུ་ཏྲ་ཚར་གཅོད་པའི་ཐབས་ལ་མཁས་པ་དགོས་ཏེ། རྒྱུ་ཡི་རཱུ་ཏྲས་འབྲས་བུ་དང་། །ལམ་གྱི་རཱུ་ཏྲས་བདག་ཉིད་ཕུང་། །དུག་ལྔའི་ངེས་པ་ཤ་ཤེས་བྱ། །ལམ་གྱི་རཱུ་ཏྲ་བརྣག་པ་ནི། །སྐྱེ་བོ་ཉམས་པ་ཅན་དེ་སྤྱིར། །ཞེས་སོ། །ཐབས་ལ་མཁས་པའི་རྒྱུ་ཡི་གཙོ་བོ་ཡང་། གཞི་ནི་སྙིང་རྗེ་བཟུང་བ་དང་། །རྩ་བ་བྱང་སེམས་རྟོགས་པ་དང་། །ཐག་ནི་ལྟ་བས་བཅད་པ་དང་། །ལ་ནི་སྤྱོད་ངག་དོར་བ་དང་། །དབང་ནི་དམ་ཚིག་སྒྲོལ་བས་ཏེ། །ངོ་བོ་ངེས་ཚིག་དབྱེ་ཤེས་ན། །གང་བྱས་སངས་རྒྱས་འགྲུབ་པར་ངེས། །ཞེས་སོ། །དེ་བས་ན་ཕུར་པའི་ངོ་བོ་བྱང་ཆུབ་ཀྱི་སེམས་རིན་པོ་ཆེ་ཡིན་པས་དེ་མངོན་དུ་བྱེད་པའི་ཐབས་སྟོད་ལས་བྱང་ཆུབ་བསྒྲུབ་པའི་ལམ་ཡིན་ན་ལྷ་བསྙེན་ཐེམ་ཚད་ཀྱི་སྨད་ལས་ངེས་པར་བསྒྲུབ་མི་དགོས་ཀྱང་བྱང་ཆུབ་བསྒྲུབ་པའི་ལམ་གྱི་བར་གཅོད་ཞི་བ་ལ་དམིགས་ནས་དམ་ཅན་ཉེ་བར་བསྙེན་པར་འདོད་ན་བྲུབ་ཁུང་ལ་སོགས་པའི་བཅས་རྣམས་བོར་ལ། གཏོར་མ་དང་མཐུན་རྫས་ལ་བརྟེན་ནས་བཞི་སྙིང་དྲིལ་བའི་བཟླས་པ་བདུན་ཕྲག་ལ་སོགས་པའི་མཐར་ཚོགས་ཐ་མ་དང་འབྲེལ་བར་ཟན་ལིང་ལ་གདབ་ཁ་དྲུག་གི་ལས་ཐུན་མོང་བ་བཏབ་པ་དང་བཅས་པས་དོན་འགྲུབ་སྟེ། བལ་མོ་ལ་སོགས་རྟགས་བྱུང་ནས། །དངོས་གྲུབ་བླངས་པས་ནུས་པ་ཐོབ། །ཅེས་གསུངས་པས་སོ།། །།