ཕུར་པ་རྒྱུད་ལུགས་ལས། ཕུར་སྲུང་ལྕམ་དྲལ་གྱི་གནད་ཡིག་དམ་ཅན་བླ་ཆགས།

Previous Text Back to Volume Page Next Text

Wylie title	phur pa rgyud lugs las/ phur srung lcam dral gyi gnad yig dam can bla chags/
Location	'jigs gling bka' 'bum Volume 9, Text 19, Pages 531-550 (Folios 1a1 to 10b6)
Author	འཇིགས་མེད་གླིང་པ་
Less details More details
Citation	'jigs med gling pa. Phur pa rgyud lugs las phur srung lcam dral gyi gnad yig dam can bla chags. In Kun mkhyen rig 'dzin 'jigs med gling pa'i gsung 'bum, Vol. 9: 531-550. New Delhi: Shechen Publications, 2025.
Genre	Key Points - gnad yig
Cycle	ཕུར་པ་རྒྱུད་ལུགས་ (phur pa rgyud lugs)
Deity	phur srung lcam dral

[edit]

༄༅། །ཕུར་པ་རྒྱུད་ལུགས་ལས། ཕུར་སྲུང་ལྕམ་དྲལ་གྱི་གནད་ཡིག་དམ་ཅན་བླ་ཆགས་ཞེས་བྱ་བ་བཞུགས། །

༄༅། །དཔལ་ཆེན་བཛྲ་ཀུ་མཱ་ར་ལ་ནཱ་མ། ཕུར་སྲུང་ལྕམ་དྲལ་གྱི་གནད་ཡིག་ལ་གསུམ། སྐྱེ་རྒྱུད་བཤད་པ་དང་། སྲོག་སྔགས་ཀྱི་རྣམ་དབྱེ་དང་། བསྒྲུབ་པའི་ཚུལ་ལོ། །དང་པོ་ནི། རྣལ་འབྱོར་ཆེན་པོ་ལས། འཇིག་རྟེན་གྱི་ཁམས་འདི་ན་དྲེགས་པ་ཅན་གནས་པ་ནི་འདི་ལྟ་སྟེ། བདུད་ནག་པོ་ཡབ་ཡུམ་རོལ་པའི་སྲས། ལྷ་མོ་ནག་མོ་རེ་མ་ཏི་མཆེད་བཞི་དང་། དེའི་མིང་པོ་མ་ཧཱ་ཀཱ་ལ་སྟེ། དེ་དག་རི་རབ་ཀྱི་བྱང་ཤར་ན་མཚོ་མུ་ལེ་ཏིང་གི་ནང་ནས་ལྕགས་མཁར་ནག་པོའི་ནང་དུ་དུག་ལྔའི་རྟེན་ཅན་ཤིན་ཏུ་དྲེགས་པར་གནས་སོ། །གནོད་སྦྱིན་ཟངས་མདོག་རྒྱལ་པོ་ཡབ་ཡུམ་རོལ་པའི་སྲས་བསེ་མོ་བཞི་དང་། མིང་པོ་བསེའི་སྐྱེས་བུ་གདུག་པ་ཅན་བཞི་ནི་རི་རབ་ཀྱི་ལྷོ་ནུབ་མཚོན་བསེ་མཚོ་མེར་བའི་དབུས་ན་བསེ་མཁར་སྨུག་པོའི་དུག་ལྔའི་རྟེན་ཅན་ན་ཡོད་དོ། །སྲིད་པའི་ཕྱ་ཧེ་ལེ་ཡབ་ཡུམ། བཤོས་པའི་སྲས་ཤྭ་ན་མུ་ཁ་མཆེད་བཞི། མིང་པོ་ཤེལ་གིང་དཀར་པོ་སྟེ་རི་རབ་ན་དུག་མཚོ་མེར་བ་དང་། དུང་མཁར་དཀར་པོའི་ནང་ན་དུག་ལྔའི་རྟེན་ཅན་ཡོད་པ་དེ་ན་དྲེགས་པ་ཡང་དག་པར་གནས་སོ། །གཞན་ཡང་འཇིག་རྟེན་གྱི་མ་བདུན་དང་། སྲིང་མོ་བཞི་དང་། དྲེགས་པ་ཅན་ཆེན་པོ་དྲུག་དང་། འཇིག་རྟེན་པ་མང་པོ་གཞན་གྱི་སྲོག་འཕྲོག་ཅིང་དྲེགས་པའི་དོན་དང་ལྡན་པར་གནས་སོ། །ཞེས་དང་། དོན་དེ་ལྟ་བུ་གཟིགས་ནས་བཅོམ་ལྡན་འདས་ཀྱིས་དམ་ཅན་གནད་ལ་འབེབས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ཉོན་ཅིག་ཀརྨཱ་ཧེ་རུ་ཀ །དྲེགས་པ་ཚོ་གསུམ་མིང་སྲིང་འདི། །རབ་ཏུ་ཐུགས་རྗེས་གདུལ་བར་བྱ། །མ་བཏུལ་དྲེགས་པ་དམྱལ་བར་འགྲོ། །བཏུལ་ན་སངས་རྒྱས་བསྟན་པ་ནི། །རབ་ཏུ་བསྲུང་བྱ་ལས་བྱེད་གཞུག །ཅེས་གསུངས་ཏེ་ཉིད་ཀྱི་ཐུགས་ཀ་ནས་སྲས་མཆོག་ཞལ་གཅིག་ཕྱག་གཉིས་པ་ཕྱག་ན་མཚོན་ཆ་སྣ་ཚོགས་པ་ཐོགས་པ་མང་པོ་སྤྲོས་ཏེ། དེས་དྲེགས་པ་ཅན་མང་པོ་རང་དབང་མེད་པར་བཀུག་སྟེ་བཅོམ་ལྡན་འདས་ཀྱི་སྤྱན་སྔར་འོངས་པ་དང་། ཐམས་ཅད་ཞབས་འོག་ཏུ་བཅུག །སྔགས་ཀྱིས་གཟིར་བས་ཤིན་ཏུ་ཉམ་ཐག་པའི་སྒྲ་ཕྱུང་སྟེ། ཨེ་མ་དཔའ་བོ་ཐུགས་རྗེ་ཅན། །ཐུགས་རྗེ་ཆུང་བས་བདག་ཅག་གཟིར། །རང་རང་ཟས་སྐལ་སྲོག་གཅོད་ལགས། །དེ་རིང་ཕན་ཆད་ཁྱེད་ཉིད་ཀྱིས། །འབངས་མཆི་བདག་ཅག་རྣམས་ལ་ནི། །དཔའ་བོས་འབངས་རྣམས་ཡང་དག་སྩོལ། །ཞེས་ཞུས་པས། དམ་ཚིག་གི་ཕྱག་རྒྱ་དང་། ཟིལ་གྱིས་གནོན་པའི་ཕྱག་རྒྱ་བསྟན། བདུད་རྩི་ལྕེ་ལ་བྱིན། རྡོ་རྗེ་ཕུར་བུ་ལག་ཏུ་གཏད། མིང་སོ་སོར་བཏགས་ཏེ་གསང་བའི་དབང་བསྐུར། ངན་སོང་གི་ཆོས་ལས་ལྡོག་པའི་དོན་བསྟན། ཆོས་ཉིད་ཡང་དག་པའི་ཡེ་ཤེས་བསྟན་ཏེ། དེ་རྣམས་ཀྱིས་རིག་པའི་མེ་ཏོག་ཏུ་སྲོག་སྙིང་ཕུལ་བ་ནི་འདི་ལྟ་སྟེ། ནག་མོས། མ་ཐ་མ་ཐ་བཛྲ། ཏྲཀ་རཀྴ་རེ་མ་ཏི་ཧེ་དུན་བྷྱོ། མ་ཧཱ་ཡཀྴ་ནག་མོ་ཧེ་དུན་བྷྱོ། ཞེས་དང་། གཞན་ཡང་རང་རང་གི་སྔགས་མང་པོ་ཕུལ་ལོ། །བསེ་མོས། ཀ་ཏཾ་ཀ་ཏེ། ཛ་ཡ་བི་ཛ་ཡེ། ཨ་ཛི་ཏི་ཨ་པ་ར་ཙིཏྟ་སུ་ཀི་བྷ་ཡ་བྷ་ར་ཙིཏྟ་ཏྲཾ་ཡོ་གཱི་ཤྭ་རི་ཡ་མ་ཙིཏྟ་ཧཱུྃ་ཕཊ། ཅེས་དང་། གཞན་ཡང་མང་པོ་ཕུལ་ལོ། །ཤྭ་ན་མས། ཛྭ་ལ་ཛྭ་ལ་བཛྲ། མ་མ་མུཀྟ་ལ་ཡེ། ཛ་ཡ་དུ་མན་དྷཱི་ཤྭ་རི་ནཱི་ལ་སུ་ཙི་ཧཱུྃ་བྷྱོ་ཧཱུྃ་བྷྱོ། ཞེས་དང་། གཞན་ཡང་མང་པོ་ཕུལ་ལོ། །མགོན་པོས་ཕུལ་བ། ཀཱ་ལ་མ་ཏྲཾ། མ་ཧཱ་ཀཱ་ལ་ར་ཏྲི་ཡེ་ཀཱ་ལ་རཱུ་པ་ཧཱུྃ་ཕཊ། ཅེས་དང་། གཞན་ཡང་མང་པོ་ཕུལ་ལོ། །བསེའི་སྐྱེས་བུས། མ་ར་ས་ནི། རག་ནི་ར་ཤ་བྷེ་ཀུ་ལན་ཤུ་ལན་ཧཱུྃ་ཕཊ། ཅེས་དང་། གཞན་ཡང་མང་པོ་ཕུལ་ལོ། །རྒྱལ་པོས། ཀཱ་ར་མ་ཀཱ་ར་ཡ། ཏྲི་ཙ་པ་ལ་ཏྲི་ལ་ཐུན། ཅེས་དང་། གཞན་ཡང་མང་པོ་ཕུལ་ལོ། །མ་བདུན་སྲིང་བཞིས། ཧཱུྃ་མ་མ་པ་ཤི་ཀུ་རུ་མ་ཏཾ་ཉ་ཀ་ར་ཨི་ནན། ཅེས་དང་། འཇིག་རྟེན་པ་དྲུག་ལ་སོགས་པ་མང་པོས། དྷ་ཏི་མ་མ་ཤི་ཀྲཾ་ཀརྨ་ཀ་ཏྱེ་ཡ། པྲ་མརྟ་ནི་ཧཱུྃ་ཕཊ། །ཅེས་སོ། །ཡང་མདུང་རྩི་དམར་པོའི་རྒྱུད་ལས་དེ་དག་སྒོང་སྐྱེས་སུ་བཤད་ནས། ཤྭ་ན་མས་སུ་རུ་སུ་དུ་བཛྲ། བདག་ཉིད་མས་མུ་རུ། ཡ་བྱིན་གྱིས་ཀ་ཏང་། དེ་བྱིན་གྱིས་ཛ་ཡེ། ཕག་བྱིན་གྱིས་ཨ་པ་ར། བསེ་བྱིན་གྱིས་ཨ་ཛི་ཏེ། མ་བདུན་གྱིས་མ་མ་པ་ཤཾ་ཀུ་རུ་མ་ཏཾ་ཉ་ཀ་ར་ཨི་ནན། སྲིང་བཞིའི་མ་ར་སེ་ན་པྲ་མརྟ་ན་ཡེ་ཧཱུྃ་ཕཊ། དང་། སྲུང་མ་ཐམས་ཅད་ཀྱིས་དྷ་ཏི་མ་མ་ཤི་ཀྲཾ་ཀ་རེ་ཡ། ཞེས་ཕུལ་ལོ། །གསང་རྒྱུད་ལས་ནི། བདག་ཉིད་ཆེན་མོས་མ་མ་པ་ཤི། ས་བདག་ཆེན་མོས་ཨ་ཙིཏྟ་ཨ་པ་ར་སོགས། ཤྭ་ན་མས་ཛྭ་ལ་དང་། སུ་རུ་དང་། མུ་རུ་དང་། མ་ཐ་སྦྱར་བ་དང་། སྒོས་སྒྲུབ་ཤྭ་ན་དཀར་ནག་གི་རྒྱུད་ལས། སྲི་ལ་དང་། ཤྭ་ན་དང་། སིངྷ་དང་། ཀྲི་ཏ་བཞི་ལ་མུ་ཁའི་མཐའ་རྟེན་རྦད་སྔགས་དང་བཅས་པ་དང་། བསེ་སྒྲོམ་དམར་པོ་ལས། ད་རེའི་མཐའ་ཅན་གྱི་ཀངྐ་དང་། ཀུ་མ་དང་། ཙ་མུན་དང་། ཤུ་ལ་བཞི་ཕུལ་ལོ། །གཉིས་པ་སྔགས་ཀྱི་དེ་ཁོ་ན་ཉིད་བསྟན་པ་ནི། རྣལ་འབྱོར་ཆེན་པོ་ལེའུ་བཅོ་ལྔ་པ་ལས་དམ་ཅན་སྡེ་གསུམ་མིང་པོ་དང་བཅས་པའི་དྲིལ་བསྒྲུབ་ལས་སྤྱིའི་སྲོག་སྙིང་ཡི་གེ་ལྔ་བཅུ་ང་གསུམ། བསེའི་དགུ་བཅུ་གོ་དྲུག །བདག་ཉིད་མའི་བརྒྱད་ཅུ་གྱ་དྲུག །ཤྭ་ན་མའི་ལྔ་བཅུ་རྩ་དྲུག །ཤེལ་གིང་གི་བདུན་ཅུ་དོན་བརྒྱད། མགོན་པོའི་དགུ་བཅུ་གོ་ལྔ། ས་བདག་མའི་བདུན་ཅུ་རྩ་བདུན། དེ་དག་གི་གནན་བསྲེག་འཕང་བའི་སྔགས་དང་བཅས་བསྟན་ཅིང་། ཁྱད་པར་སྲོག་སྙིང་རྣམས་ལ་ནི། །ཡང་ན་སྤྱི་རུ་ཤེས་པར་བྱ། །ཞེས་པས་ངེས་དོན་ལ་ཡེ་ཤེས་ཀྱི་ལྷའི་རྩལ་སྣང་གཅིག་ལས་མི་འདའ་བའི་ཕྱིར། འདི་ནི་རང་ལ་དྲིལ་བ་སྟེ། །རྩ་བ་གང་ལ་བྱིན་མེད་ན། །འདི་ནི་སྤོགས་པའི་ཁ་བསྐངས་ཡིན། །ཞེས་པ་ལ་སོགས་སྒོས་སྔགས་སྤྱི་ལ་འགྲོ་བ་དང་། སྤྱི་སྔགས་སྒོས་ལ་འཇུག་པ་རྡོ་རྗེ་ཕུར་པའི་རང་ལུགས་ཡིན་ན་རྣལ་འབྱོར་ཆེན་པོའི་ལེའུ་དགུ་པ་ལས། བཟླས་པ་དཔའ་བོ་གཅིག་པའི་སྔགས། །དང་པོ་བཅོམ་ལྡན་ཕུར་པའི་རྫས། །ཐམས་ཅད་འདུས་དང་རི་རབ་དང་། །མནན་པ་ཁྲོ་བོ་འདུས་པ་དང་། །གོང་བཞིན་དམ་ཅན་འདུས་པ་དང་། །ཐབས་དང་ཤེས་རབ་གིང་མཆོག་དང་། །རྟོག་པ་ལས་ཀྱི་སྔགས་བཅས་པ། །རྣམ་བཞི་ཚང་བ་བཞི་སྙིང་སྟེ། །དཔའ་བོ་གཅིག་ལ་ངལ་བ་མེད་པར་བཟླས། །ཞེས་པ་ལས། ཐམས་ཅད་འདུས་པའམ་རི་རབ་ནི་སྨད་ལས་ཀྱི་ངོ་བོ་སྟོང་ཉིད་སྙིང་རྗེ་ཟུང་དུ་འཇུག་པའི་སྒྲོལ་བ་ཡིན་པས་དེའི་བྱེད་ལས་ནི་ཁྲུས་ལུང་དང་། ཟིལ་གནོན་གྱི་བདག་ཉིད་ཅན་དུ་སྔགས་དོན་གྱི་གཏན་ལ་དབབ་པའི་ཚུལ་ལེའུ་སུམ་ཅུ་པ་ལས། ཨོཾ་ལཾ་ཧཱུྃ་ལཾ་ཡབ་དང་ཡུམ། །ཀི་ལི་གིང་དང་ཧཱུྃ་ཀཱ་ར། །གདུག་པ་འཁོར་བཅས་སྔགས་སུ་བཤད། །ཀི་ལི་འོག་མ་བིག་དང་བཅས། །གདུག་བྱེད་སྲས་མཆོག་སྔགས་སུ་བཤད། །སྟྭམ་བྷ་ཐབས་དང་ཤེས་རབ་སྔགས། །གཉིས་མེད་སྦྱོར་བས་ཉོན་མོངས་སྦྱོངས། །དྲག་པོ་ཡབ་ཡུམ་སྒྲོལ་བར་བཤད། །མོ་ཧ་མིང་ལ་གྷ་ཡ་རུས། །རྟེན་ལ་དབབ་པའི་ལས་སུ་བཤད། །ཛཿཧཱུྃ་བཾ་ཧོཿའི་ཕྱག་རྒྱ་བཞིས། །རྟེན་དང་གཉིས་སུ་མེད་པར་བཤད། །ཨོཾ་དང་ཧཱུྃ་གིས་བསྡུས་པའི་སྔགས། །ཉོན་མོངས་རང་དབང་མེད་པར་བཤད། །བྷ་ག་ཝཱན་ནི་བཅོམ་ལྡན་འདས། །སྒྲོལ་བའི་གཙོ་བོ་ཡིན་པར་བཤད། །ཤི་ཀྲི་ཡབ་དང་བི་ཀྲི་ཡུམ། །གཉིས་མེད་ཡབ་ཡུམ་བྱང་དུ་བཤད། །བཛྲ་ཧཱུྃ་དང་ཨར་བཅས་པ། །ཡང་དག་དོན་གྱི་འབྲས་བུ་སྟེ། །སྟོང་པ་ཆེན་པོས་སྒྲོལ་བར་བཤད། །རང་རང་འཛིན་པ་ཀུན་བཅོམ་ནས། །དངོས་མེད་ནམ་མཁའི་རང་བཞིན་གནས། །ཞེས་པ་ལ་རྟོགས་པས་བདག་བསྒྲལ་ནས་ཐུགས་རྗེས་གཞན་སྒྲོལ་བའི་མངོན་སྤྱོད་ཀྱི་ལུས་ཡོངས་སུ་རྫོགས་ཤིང་སྔགས་ཀྱི་དེ་ཁོ་ན་ཉིད་ཚང་བས་ཐམས་ཅད་འདུས་པ་དང་། སྲིད་པ་སྤྱི་ནས་གནོན་པས་རི་རབ་ཀྱི་སྒྲ་ཞུགས་པ་སྟེ། སྟོང་པ་ཉིད་ཀྱི་ཡི་གེ་སྟེ། །འཛིན་པ་སྟོང་པར་སྒྲོལ་བར་བཤད། །དེ་ཡིས་ཡང་དག་དོན་རྟོགས་འགྱུར། །དངོས་པོར་འཛིན་པ་རང་རང་སྔགས། །སྟོང་པར་སྒྲོལ་བ་དེ་ཉིད་དོ། །ཞེས་སོ། །མནན་པ་ཁྲོ་བོ་འདུས་པའི་དོན་ནི་ཐ་མལ་གྱི་སྣང་ཞེན་ཡེ་ཤེས་ལྷའི་སྐུ་གསུང་ཐུགས་སུ་བྱས་ནས་རང་གི་ལུས་ངག་ཡིད་གསུམ་རྡོ་རྗེ་གསུམ་གྱི་རང་བཞིན་དུ་ཚགས་སུ་འཛུད་པ་སྟོད་ལས་བྱང་ཆུབ་ལ་དམིགས་པས་འཁོར་བ་ཆོས་ཉིད་དུ་གནོན་པ་ལྟར་འདིར་ཡང་དེས་མནན་པ་ནི། གོང་གནོན་བསྙེན་པ་དང་། ཁྲོ་འདུས་ནི་མཇུག་སྡུད་བསྒྲུབ་སྔགས་ཏེ། སྤྱི་དཔལ་ཆེན་པོའི་སྙིང་པོ་ནི། །བསྙེན་པ་ཡིན་པར་ང་ཡིས་བསྟན། །དེ་ལ་ཁྲོ་བོ་འདུས་པ་ནི། །སྒྲུབ་པ་ཡིན་པར་ང་ཡིས་བསྟན། །ཅེས་པའི་དོན་ཏོ། །དེ་ལ་དམ་ཅན་འདུས་པས་ཁོང་ཁྲར་བཏང་བས་བཞི་སྙིང་གཅིག་ཏུ་དྲིལ་བ་ཞེས་བྱ་སྟེ། དང་པོ་གཙོ་བོའི་གསང་སྔགས་དང་། །ཕྱག་རྒྱ་བཞི་དང་མིང་རུས་དང་། །མ་མོ་འདུས་དང་ཐམས་ཅད་འདུས། །བཞི་སྙིང་དྲིལ་བ་དྲག་ཏུ་བཟླས། །ཞེས་པའི་དོན་སྔོན་ཆད་ངོས་ཟིན་པ་ཉུང་ངོ་། །དེ་ལྟར་བཞི་སྙིང་གཅིག་ཏུ་དྲིལ་བས་ཕུར་པ་བསྒྲུབ་དཀའ་བ་ལ་ངང་ཐུང་ཅན་བསྒྲུབ་ཐག་ཉེ་བར་སྟོན་པ་རྩ་རྒྱུད་རྡོ་རྗེ་ཁྲོས་པའི་དོན་སློབ་དཔོན་ཆེན་པོ་པདྨའི་མན་ངག་ཏུ་གཙོ་བོར་བྱེད་པ་ཡིན་ལ། དེ་ལའང་དྷ་ཏི་འདུས་པ་བསྡུ་ཡིག་གསུམ། །ངན་སྔགས་ཡིན་པར་ང་ཡིས་བསྟན། །ཞེས་པས། གསང་བ་བསྡུ་ཡིག་ལ་བརྟེན་ནས་དམ་ཅན་ཉེ་བར་བསྙེན་ཅིང་འབོད་པ། ནང་འདུས་པ་ལ་བརྟེན་ནས་སོ་སོའི་སྲོག་ནས་དྲངས་ཤིང་ལས་ལ་རྦད་པ། སྤྱི་ཐུན་སྔགས་ལ་བརྟེན་ནས་བསད་པའི་ལས་བྱ་བ་གསུམ་ལས། དང་པོ་ནི། རྣལ་འབྱོར་ཆེན་པོ་ལས་སྲས་མཆོག་ལ་དམིགས་པ་དང་། དམ་ཅན་ལ་དམིགས་པའི་བསྡུ་ཡིག་གཉིས་ལས་ཕྱི་མའི་དོན། ཀ་ནི་སྐུ་ཡི་སྙིང་པོ་སྟེ། །གཟུགས་ཅན་བསྒྲལ་བའི་དྲག་སྔགས་ཡིན། །ཛ་ནི་གསུང་གི་སྙིང་པོ་སྟེ། །དག་ནི་སྒྲོལ་བའི་དྲག་སྔགས་ཡིན། །ཨ་ནི་ཐུགས་ཀྱི་སྙིང་པོ་སྟེ། །ཡིད་ནི་སྒྲོལ་བའི་དྲག་སྔགས་ཡིན། །མ་ནི་མུ་ཀ་ཧེ་ཞེས་བྱ། །ཤྭ་ན་མ་ཡི་དྲག་སྔགས་ཡིན། །ར་ནི་རཀྴ་སྲིན་མོ་སྟེ། །བདག་ཉིད་མ་ཡི་དྲག་སྔགས་ཡིན། །ས་ནི་བདུད་ཀྱི་བུ་མོ་ཡིན། །ན་ནི་བཙན་གྱི་བུ་མོ་ཡིན། །བྲ་ནི་གཟའ་ཡི་བུ་མོ་ཡིན། །མར་ནི་ཀླུ་ཡི་བུ་མོ་ཡིན། །ཏ་ནི་མིང་པོ་དག་ཡིན་ཏེ། །སྨད་ཀྱི་སྟོད་ཀྱི་དྲག་སྔགས་དང་། །སྟོད་ཀྱི་བར་གྱི་དྲག་སྔགས་ལ། །སྒྲ་ཡི་ཡི་གེ་བཅུ་གཅིག་གིས། །བསྐུལ་བའི་ལས་ཀྱི་དྲག་སྔགས་སྦྱར། །ཞེས་སོ། །དེ་ལྟར་བཞི་སྙིང་དྲིལ་བ་ལ་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཚང་བའི་ཚུལ། སྤྱི་རུ་བསྟན་པ་འདི་ལྟ་སྟེ། །ཡེ་ཤེས་ལྷ་ཡི་སྔགས་ཉིད་ནི། །ཐམས་ཅད་ཀུན་གྱི་སྐུ་རུ་བཤད། །རང་རང་རྩ་བའི་སྙིང་པོ་འདི། །ཐམས་ཅད་ཀུན་གྱི་ཐུགས་སུ་བཤད། །རང་རང་སྙིང་པོ་འབྲུ་རེ་ནི། །ཐམས་ཅད་ཀུན་གྱི་གསུང་དུ་བཤད། །རང་རང་ཕྱི་སྐྱོར་སྙིང་པོ་ནི། །ཐམས་ཅད་ཀུན་གྱི་ཡོན་ཏན་སྔགས། །དམ་ཅན་བསེ་མོའི་ལས་སྔགས་ནི། །ཐམས་ཅད་ཕྲིན་ལས་སྔགས་སུ་བཤད། །དེ་ནི་དྲིལ་བའི་སྙིང་པོ་ཡིན། །ཞེས་སོ། །གལ་ཏེ་རྒྱུད་ལས་དངོས་བསྟན་གྱི་སྐུ་གསུང་ཐུགས་སྔགས་དམིགས་བསལ་སྦྱོར་ན། སྒྲུབ་ཐབས་ནང་ལྟར། ཨོཾ་བུདྡྷ་ཀཱི་ལི་ཀཱི་ལ་ཡ་ཀཱ་ཡ་བཛྲ་ནན། ཛྭ་ལ་ཛྭ་ལ་པྲ་ཛྭ་ལ། སྥུ་ཊ་སྥུ་ཊ་སརྦ་ན་ས་པ་ན་ཡེ་ཧཱུྃ་ཕཊ། སོགས་མགོར་སྦྱར་ནས་སོ་སོའི་སྲོག་སྔགས་སམ། བསྡུ་ཡིག་ལྟར་འདྲེན་པ་མན་ངག་ཡིན་ཏེ། ཧཱུྃ་ཀཱ་ར་ཡེ་ཡི་གེ་བདུན། །ཐམས་ཅད་སྦྲགས་པ་གསུང་གི་སྔགས། །བདག་ཉིད་གཙོ་བོའི་ཡི་གེ་སྔགས། །གཟུགས་སུ་བསྐྱེད་པ་སྐུ་ཡི་སྔགས། །བདུད་རྩི་འཁྱིལ་བའི་ཡི་གེ་དྲུག །དྲན་པར་སྣང་བ་ཐུགས་ཀྱི་སྔགས། །དེ་རྣམས་གོང་གི་བར་དུའོ། །སྐུ་གསུང་ཐུགས་ལ་གཙོ་བོར་བྱ། །ཞེས་པའི་དོན་ཏོ། །གཉིས་པ་ནང་འདུས་པ་ལྟར་རྦད་པ་ནི། ཡང་ན་བསྐྱེད་པ་མེད་པར་རོ། །བསྙེན་པ་མི་བྱ་རངས་པ་དྲིལ། །དང་པོ་བདག་ཉིད་འབྲུ་བདུན་དང་། །དེ་འོག་ཕྱག་རྒྱ་མནན་ཡིག་གསུམ། །མིང་རུས་ཡི་གེ་གཟས་པར་བཤད། །ཤྭ་ནའི་ཡི་གེ་བཅུ་དྲུག་དང་། །རེ་མ་ཏི་ཡི་རྩ་སྔགས་དང་། །བསེ་མོའི་སྙིང་པོ་བཅུ་བདུན་དང་། །འཁོར་བ་རྩད་གཅོད་ཡི་གེ་དགུ། །ཐམས་ཅད་ཚང་བའི་ཡི་གེ་བདུན། །དྲིལ་ཏེ་རབ་ཏུ་བཟླས་པ་ཡི། །མདངས་དང་བྲལ་བར་རབ་ཏུ་ངེས། །ཞེས་པས། ཨོཾ་བཛྲ་ཀཱི་ལི་ཀཱི་ལ་ཡ་ཛཿཧཱུྃ་བཾ་ཧོཿཨོཾ་ལཾ་ཧཱུྃ་མོ་ཧ་གྷ་ཡ་སྲི་ལ་མུ་ཁ་ཛཿ ཤྭ་ན་མུ་ཁ་ཛཿ སིངྷ་མུ་ཁ་ཛཿ ཀྲྀ་ཏ་མུ་ཁ་ཛཿ མ་ཐ་མ་ཐ་བཛྲ། །ཏྲག་རཀྴ་མ་ཧེ་ཧེ་དུན་བྷྱོ། མ་ཧཱ་ཡཀྴ་ནག་མོ་ཧེ་དུན་བྷྱོ། ཀ་ཏཾ་ཀ་ཡེ། ཛ་ཡེ་བི་ཛ་ཡེ། ཨ་ཛི་ཏེ། ཨ་པ་ར་ཛི་ཏེ། མ་ར་ས་ན་པྲ་མ་རྟ་ན་ཡེ། སརྦ་བིག་ནན་བྃ་ཧཱུྃ་ཕཊ། འདི་ནི་ཡང་དག་མན་དག་སྟེ། །མགོ་མཇུག་དྲིལ་བའི་ངན་སྔགས་ཡིན། །འདི་ནི་ཉམས་པ་གདོན་མི་ཟ། །ཐུགས་རྗེས་བཟུངས་ལ་གནས་སྤར་རོ། །ཞེས་སོ། །གསུམ་པ་ནི། །གསང་སྔགས་དང་པོ་གཙོ་བོ་དང་། །མིང་རུས་དངོས་དང་འདུས་པ་དང་། །མིང་པོའི་སྔགས་བཅས་བཟླས་པར་བྱ། །དམ་ཅན་ལ་སོགས་ལྷ་རྣམས་ཀྱིས། །རྣམ་པར་གསད་པའི་དགོངས་པ་བྱ། །སྐབས་སུ་ཐུན་སྔགས་བཅུ་གཉིས་ཀྱིས། །ཐུན་ཕབ་ངེས་པར་གསད་པར་བསམ། །ཞེས་པས་བཤད་མ་ཐག་པའི་ཁོང་ཁྲ་འབྱིན་འཇུག་བྱས་ལ། སརྦ་བིག་ནན་གྱི་གོང་དུ་མིང་པོའི་སྔགས་དངོས་བསྟན་གཅུན་ཀྱང་རུང་སྟེ། རྩ་རྒྱུད་ལས་དྷ་ཏིའི་མིང་དངོས་སུ་སྨོས་པས་མདུང་རྩེ་དམར་པོའི་དགོངས་པ་ལྟར་མ་མ་པ་ཤཾ་ཀུ་རུ་སོགས་དང་། དྷ་ཏི་མ་མ་སོགས་ཁོང་ཁྲ་འཇུག་པ་བདེ་བ་ཉིད་པདྨའི་བཞེད་པ་ཡིན་ནོ། །ཐུན་སྔགས་བཅུ་གཉིས་ཀྱི་ངོས་འཛིན་ནི་རྣལ་འབྱོར་ཆེན་པོའི་ལེའུ་བཅོ་ལྔ་པ་ལས་གཞན་དུ་ངོ་འཕྲོད་པ་མི་སྣང་ཞིང་། དེའི་ནང་ཚུན་ནས་ཤུ་ཤུ་རཀྴ་ཚལ་པ་ལ་སོགས་པའི་དུམ་བུ་འདྲ་མིན་རེ་སྔར་གྱི་ཡི་གེ་རྙིང་པ་ཚོར་སླེབ་ཀྱང་ཡིད་བརྟན་རུང་བ་དཀའ་ཞིང་རྒྱུད་ལ་བཤད་པའང་དུས་ཐོག་ཧ་ཅང་རྙིང་པའི་ཡིག་སྐྱོན་ཆེ་བས་རེ་ཞིག་བཏང་སྙོམས་སོ། །གསུམ་པ་སྒྲུབ་པ་དངོས་ལ་གཉིས། སྒོས་བསྒྲུབ་དང་། སྤྱི་བསྒྲུབ་བོ། །དང་པོ་ནི་རྣལ་འབྱོར་ཆེན་པོའི་ལེའུ་བཅུ་བཞི་པ་ལས། དང་པོ་ནག་མོ་བསྒྲུབ་བྱ་བ། །ཁ་སྐོང་མི་བསྐང་ཤེས་པར་བྱ། །རྣལ་འབྱོར་ཡོན་ཏན་ལྡན་པ་དང་། །ཕུར་པའི་དོན་རྣམས་ཤེས་པ་ཡིས། །རབ་ཏུ་དབེན་པར་ལེགས་བསྒྲུབ་པོ། །འཁོར་ལོ་རྩིབས་བཞི་ལྡན་པ་ཡི། །དབུས་སུ་བསྙེན་ཕུར་ཕྱོགས་བཞིར་ཕུར། །ནག་མོ་བཞི་ཡི་ཕུར་པ་དགོད། །ཐོད་པ་བཞི་ལ་ཐུན་དང་བཅས། །ཁྱི་ཡི་ལྟེ་ཁྲག་ནལ་བུའི་ཤ། །བུད་མེད་མངལ་ཁྲག་སྦལ་པའི་མགོ །རིམས་ཀྱི་ཕྱི་མོ་རྡོ་སོལ་དང་། །ཁྲག་ཆེན་མུ་ཟི་གཏོར་མ་སྨན། །གཞན་ཡང་རྫས་རྣམས་མང་པོ་གསོག །རྡོ་རྗེ་ཁྲོས་པ་ལ་སོགས་པས། །དབུས་སུ་བདག་ཉིད་དཔལ་ཆེན་བསྐྱེད། །འཁོར་ལོ་བཞི་ལ་སྤུན་བཞི་སྟེ། །རེ་མ་ཏི་དང་རེ་མ་དུ། །རེ་མ་ཛ་དང་རེ་མ་ཛུ། །སྐུ་མདོག་རང་རང་རིགས་དང་བསྟུན། །ཆིབས་དང་ཡང་ན་རྐྱང་པ་སྟེ། །རང་རང་ཕྱག་མཚན་ཕུར་བུ་བསྣམས། །རྒྱན་དང་ལྡན་པ་རབ་ཏུ་བསྐྱེད། །རང་བཞིན་སྤྱན་དྲངས་མཆོད་པ་འབུལ། །བསྟོད་དང་སྨོན་ལམ་ལེགས་པར་བྱ། །དེ་ནས་བདག་ཉིད་སྔགས་དང་ནི། །མཆེད་བཞི་གསང་སྔགས་སྭཱ་ཧཱ་ཅན། །བར་བཅུག་བར་བཟླས་སྲོག་སྙིང་དབྲོབ། །ནུས་པ་དག་དང་ལྡན་པར་བྱ། །བར་བར་མཆོད་བསྟོད་གནད་ལ་དབབ། །རང་རང་དམ་རྫས་ལེགས་པར་བསྟབ། །དེ་ལ་རྟགས་རྣམས་ངེས་པ་ནི། །བུད་མེད་ནག་མོས་དབང་བསྐུར་དང་། །བདག་ལ་ཕྱག་བྱེད་མར་འོངས་པ། །འདི་ནི་གྲུབ་སྟེ་དངོས་གྲུབ་བླངས། །དེ་ནས་གསད་པའི་ལས་བྱ་བ། །བྲུབ་ཁུང་ལྔ་རུ་ངེས་པར་བྱ། །དེ་ནས་ཐོད་པ་ལིངྒ་དང་། །དྲག་པོའི་རྫས་རྣམས་ལེགས་པར་བྱ། །གབ་པའི་སྔགས་ཀྱི་ལས་བྱའོ། །མིང་པོས་དགུག་སྔགས་ཤེས་པར་བྱ། །རབ་བསྐྱེད་མཐིང་ནག་འབར་བ་ཡིས། །ཉམས་པ་དགུག་པའི་ལས་རྣམས་བྱ། །སྔགས་ལ་གསད་པའི་སྔགས་གདགས་སོ། །གསད་པ་ལ་སོགས་དགོངས་པ་ཡིས། །ཉམས་པ་ངེས་པར་གསད་པར་བྱ། །དང་པོ་དུས་ལ་བབ་དུག་དང་། །དེ་འོག་བཅུ་གཅིག་དམོད་པ་ཡི། །རྡོ་རྗེའི་ཚིག་བཞིའི་གནད་ལ་དབབ། །ཐུན་ལ་སོགས་པའི་སྦྱོར་བ་བྱ། །རྟགས་བྱུང་ཕུར་གདབ་བསྲེག་འཕང་གནན། །མ་གྲུབ་དུས་ན་ཤི་ས་བསྟན། །འདི་ནི་མིང་པོའི་ལས་ཡིན་ཏེ། །ཉམས་པ་གསད་པའི་མཆོག་ཡིན་ནོ། །ཁ་སྐོང་ལས་ནི་མཆོག་སྒྲུབ་པ། །གཞན་དུ་གསུངས་པ་ངེས་པ་ཡིན། ༈ །ཤྭ་ན་མུ་ཁའི་བསྒྲུབ་པ་ནི། །གོང་བཞིན་ཡོན་ཏན་ལྡན་པར་བྱ། །ཤཱ་ན་བསྒྲུབ་པའི་གནས་སུ་ངེས། །དཀྱིལ་འཁོར་མཆེད་བཞིའི་ཚུལ་དུ་ལ། །གྲུ་གསུམ་བཅས་པ་ལེགས་པར་བྲི། །བསྙེན་ཕུར་ཤྭ་ནའི་ཕུར་པ་ནི། །དབུས་ལ་སོགས་པར་རབ་ཏུ་དགོད། །ཐོད་ཆེན་འཕར་སྤྱང་ཝ་ཁྱི་ལྔ་རྣམས་བསག །རང་རང་སྙིང་དང་ཁྲག་ཆེན་དང་། །ལྕགས་ཕྱེ་ཟངས་ཕྱེ་གསེར་ཕྱེ་དང་། །རྡོ་ཕྱེ་གཏོར་མ་ལྔ་རྣམས་དགྲམ། །དེ་ནས་གོང་བཞིན་བསྐྱེད་པ་ཡང་། །ལྕགས་སྤྱང་འཕར་བ་ཝ་མོ་དང་། །ཁྱི་མོ་རང་རང་གང་རིགས་བྱ། །མཆེ་བ་ཅན་ནི་བཞི་ངེས་པར། །ཆིབས་སམ་ཡང་ན་རྐྱང་པ་སྟེ། །རང་རང་ཅོད་པན་ཕུར་པ་བསྣམས། །ཁྲོས་པའི་ཚུལ་དུ་རབ་ཏུ་བརྟག །སྤྱན་དྲངས་ལ་སོགས་གོང་བཞིན་ནོ། །གསང་སྔགས་གོང་བཞིན་བཅས་པ་ལ། །རབ་ཏུ་ཤྭ་ནའི་སྔགས་བཅས་པ། །ལེགས་པར་བཟླས་ལ་གོང་བཞིན་བྱ། །དེ་ལ་རྟགས་རྣམས་ངེས་པ་ནི། །འཕར་སྤྱང་མང་པོ་འདུས་པ་དང་། །མགོ་བརྙན་ཚོགས་ལ་དབང་བྱེད་པའོ། །ནུས་ཐོབ་དངོས་གྲུབ་བླང་བར་བྱ། །དེ་ནས་གསད་པའི་ལས་བྱ་བ། །གོང་བཞིན་འབྲུབ་ཁུང་བཅས་པའོ། །ལིངྒ་ལེགས་བཅའ་ལས་རྣམས་བྱ། །ཤྭ་ནའི་ཏིང་འཛིན་མང་པོ་ཡིས། །འགུགས་པ་དག་ཏུ་ངེས་པ་ཡིན། །མིང་པོས་ཡང་ནི་དེ་བཞིན་ནོ། །གསང་སྔགས་མཱ་ར་ཡ་བཅས་སམ། །བཟླས་པ་ཤྭ་ནའི་ཚོགས་བཅས་པས། །གཏོད་ཅིང་ཟ་བའི་ཏིང་འཛིན་བྱ། །བར་བར་ཐུན་རྣམས་བྲབ་པ་ཡིས། །རྫས་རྣམས་སྤྲུལ་པ་ཡང་སྤྲུལ་གྱིས། །ངེས་པར་གསོད་པའི་ཏིང་འཛིན་བྱ། །སྨད་སྟོད་དཀྱུས་ཚིག་ལྔ་བཅས་པ། །དེ་འོག་བཅུ་གཅིག་མཐའ་བསྒྱུར་རོ། །སྟོད་སྨད་ཐ་མའི་བཞི་བཅས་པས། །ཐུགས་དམ་གནད་ལ་དབབ་པར་བྱ། །སེམས་ཅན་གསོད་པའི་རྟགས་བྱུང་ན། །རྩ་བ་ཕུར་གདབ་བསྲེག་དང་འཕང་། །མནན་པའི་ལས་རྣམས་བྱས་པ་ཡི། །ཉམས་པ་ངེས་པར་འཆི་བ་ཡིན། །ཁ་སྐོང་གཞན་དུ་ངེས་པར་གསུངས། །ས་བདག་ཆེན་མོའི་བསྒྲུབ་པ་ནི། །གོང་བཞིན་ཡོན་ཏན་ལྡན་པ་ཡིས། །བསེ་མོ་བསྒྲུབ་པའི་གནས་སུ་བྱ། །མཎྜལ་ཟླ་གམ་བཅུ་དྲུག་གམ། །ཡང་ན་བཞིའམ་འབྲུབ་ཁུང་བཅས། །རང་རང་རིགས་དང་མཐུན་ནམ་གཅིག །ཝ་ཐོད་བཞི་ལ་རྩ་སྔགས་བཅས། །མཆོག་ཕུར་ལྕགས་ཕུར་ལྔ་རྣམས་སོ། །མར་ཁུ་ཞག་དང་སྦྲང་རྩི་རྣམས། །འོ་མ་ལ་སོགས་སྐྱོགས་བཞིའོ། །ཉུང་དཀར་ཉུང་ནག་ཟི་ར་དང་། །སྐྱེ་ཚེ་ལ་སོགས་ཐུན་རྫས་བསག །གཞན་ཡང་སྨན་རག་གཏོར་མ་ལྔ། །མཁས་པས་ལེགས་པར་གསོག་པ་ཡིན། །དེ་ནས་ཏིང་འཛིན་བཅས་པ་ཡིས། །དཔའ་བོ་དཔའ་མོ་བསམ་པ་སྟེ། །རང་རང་རིགས་མཐུན་སྐུ་མདོག་ལ། །བསེ་ཁྲབ་རྒྱན་བཅས་ཕྱག་མཚན་ཡང་། །ཞགས་པ་ཕུར་བུ་བསྣམས་པ་ནི། །ཆིབས་སམ་ཡང་ན་རྐྱང་པ་སྟེ། །བློན་མོ་ཡང་བློན་བཅས་པ་བསྐྱེད། །སྤྱན་དྲངས་ལ་སོགས་གོང་བཞིན་ནོ། །དཔའ་བོའི་གསང་སྔགས་བཅས་པ་དང་། །བར་དུ་བསེ་སྔགས་སྭཱ་ཧཱ་བཅས། །བཟླས་ལ་གོང་བཞིན་ནུས་པ་དཔྲོག །བར་དུ་མཆོད་བསྟོད་གནད་ལ་དབབ། །བལ་མོ་ལ་སོགས་རྟགས་བྱུང་ནས། །དངོས་གྲུབ་བླངས་པས་ནུས་པ་ཐོབ། །དེ་ནས་གསད་པའི་ལས་བྱ་བ། །བྲུབ་ཁུང་ལིངྒར་བཅས་པའོ། །ཁྲོས་པས་ལས་བྱ་བསེ་མོ་དགུག །དེ་ཡང་མིང་པོའི་བླ་འགུགས་སྔགས། །དེས་ནི་ངེས་པར་ཁུགས་པ་ཡིན། །གསང་སྔགས་མཱ་ར་ཡ་བཅས་ལ། །བཟླས་པས་ཡང་སྤྲུལ་སུམ་སྤྲུལ་གྱིས། །ངེས་པར་གསད་པའི་ཏིང་འཛིན་བྱས། །གོང་བཞིན་དྲུག་དང་བཅུ་གཅིག་དང་། །བཞི་བཅས་གནད་ལ་དབབ་པར་བྱ། །ཐུན་བབ་དགོངས་པ་གོང་བཞིན་ནོ། །ཕུར་གདབ་བསྲེག་འཕང་གནན་བྱས་ན། །ཉམས་པ་འཆི་འགྱུར་མཱ་ར་ཡ། །སྤོགས་དང་ཤི་སའི་མན་ངག་ནི། །མ་བྱུང་མཁས་པས་རབ་ཏུ་སྦྱར། །ཁ་སྐོང་མན་ངག་གཞན་དུ་གསུངས། །འདི་ནི་མན་ངག་ནང་ན་མཆོག །ཕུར་བུའི་སྲུང་མ་མཐུ་ཆེན་ཡིན། །ཞེས་སོ། །ཚུལ་དེས་སྒོས་བསྒྲུབ་ཀྱི་ས་དཔྱད་ལེགས་པར་ཤེས་ཤིང་། མིང་སྲིང་སོ་སོའི་སྙིང་པོ་སྐྱེ་རྒྱུད་དང་། སྔགས་ཀྱི་དེ་ཁོ་ན་ཉིད་བཤད་མ་ཐག་པས་སྟོན་པར་འགྱུར་ལ། དེའང་དམ་ཅན་སོ་སོའི་བསྙེན་པ་ཐེམ་ནས་གསད་པའི་ལས་ལ་འཇུག་ན། གབ་པའི་སྔགས་ཀྱིས་ལས་བྱའོ། །ཞེས་པ་ལ་སོགས་པས་ཁ་འཕང་བ་ལྟར་ངན་སྔགས་ཉེ་བར་བསྙེན་པ་དང་འབྲེལ་དགོས་པས་དེའི་བཅའ་གཞི་རྣམས་ཚང་བར་བྱས་ལ། དམ་ཅན་མ་རང་རང་གི་མིང་པོའི་སྔགས་དང་སྦྲེལ་ནས་བླ་འགུགས་ཀྱི་དམིགས་པ་གཙོ་བོར་འདོན་པ་ལ་བསྒྲུབ་པ་ཆེན་པོ་ཞེས་བྱ་སྟེ། མ་མོ་རྣམ་གསུམ་འདུས་པ་ནི། །བསྒྲུབ་པ་ཆེན་པོ་མཆོག་ཡིན་ཏེ། །དགྲ་བོའི་བླ་འགུགས་ཤེས་པར་བྱ། །གབ་སྔགས་མིང་རུས་ཐབས་སྔགས་ཆེན། །ངན་སྔགས་འདུས་པས་བསྒྲུབ་ཆེན་པོ། །གསད་པར་བྱ་བའི་རིམ་པ་ཡིན། །ཞེས་བསྒྲུབ་པ་ཆེན་པོའི་ཡང་ཆེན་པོར་ངན་སྔགས་ཉེ་བར་བསྙེན་པ་བསྟན་པ་ཡིན་ནོ། །དེ་ཡང་མིང་སྲིང་སོ་སོའི་སྒོས་བསྒྲུབ་ནི་དམ་རྫས་ཚོགས་པར་དཀའ་ཞིང་། རྩ་སྔགས་ཀྱང་རྣམ་གྲངས་མང་བས་འཛིངས་ཆེ་ལ་བསྒྲུབ་དཀའ། མ་མོ་གྲུབ་ཀྱང་ལས་མི་འདོད་པ་ལ་ཤིས་བསྟན་པ་དང་། གིང་འགྲུབ་ཀྱང་འཁུ་ལྡོག་ཆེ་བ་ལ་ལོག་གནོན་གྱི་མན་ངག་དང་། ཡི་གེ་འབྲུ་བཤག་གི་སྡེབ་ལ་སོགས་པ་ནི། ཏིང་འཛིན་ལས་སུ་མི་རུང་བས་འཆུན་དཀའ་ལ་རྩུབ་ཅིང་བཀའ་གཉན་པས། ཕྱི་སྒྲུབ་ལག་ལེན་ལ་འདེབས་སླ་ཞིང་། བཀྲ་ཤིས་པ་ཡིན་པས་ལོགས་སུ་བསྟན་པར་བྱའོ། །གལ་ཏེ་མིང་པོའི་སྒོས་བསྒྲུབ་ཀྱི་ཁུངས་འདོད་ན་རྣལ་འབྱོར་ཆེན་པོའི་ལེའུ་བཅོ་ལྔ་པ་ལས་རྟོགས་པར་བྱ་ཞིང་། དེ་བཞིན་དུ་སྤོགས་པའི་ཆོ་གའང་ལེའུ་བཅུ་དྲུག་པས་གསལ་བར་བསྟན་ཀྱང་། ལག་ལེན་ལ་འདེབས་ནུས་པའི་གང་ཟག་འཇིག་རྟེན་ན་དཀོན་པས་ཁྱབ་གདལ་དུ་སྤེལ་བའི་གནས་མ་ཡིན་ནོ། །བདག་ཉིད་འདུན་པ་ལྷོད་པ་མངོན་སྤྱོད་ཀྱང་། །དོན་གཉེར་ཆེས་མང་རྒྱུད་དོན་ནུབ་ལ་སྐྱོ། །བསྟན་དོན་ལ་དམིགས་གསང་པོར་སྨྲས་ནའང་། །ལྡོང་བའི་ཀུན་དཀྲིས་ཅན་ལ་དམ་དུ་སྦོས།། །།