JKW-KABUM-22-ZA-012-091

From Khyentse Lineage - A Tsadra Foundation Project

བསྐྱེད་རྫོགས་བོགས་འདོན་རྡོ་རྗེའི་ཐོལ་གླུ་གྲུབ་གཉིས་རོལ་མོ།
Wylie title bskyed rdzogs bogs 'don rdo rje'i thol glu grub gnyis rol mo JKW-KABUM-22-ZA-012.pdf
Location mkhyen brtse'i bka' 'bum
Volume 22, sde tshan 12, Text 91, Pages 594-597 (Folios 125b4 to 127a3)
Author འཇམ་དབྱངས་མཁྱེན་བརྩེའི་དབང་པོ་
Less details More details
Citation 'jam dbyangs mkhyen brtse'i dbang po. bskyed rdzogs bogs 'don rdo rje'i thol glu grub gnyis rol mo. In 'jam dbyangs mkhyen brtse'i dbang po'i bka' 'bum, Vol. 22: 594-597. Khams sde dge rdzong sar dgon: Rdzong sar blo gros phun tshogs, 2020.
Genre Generation Stage - bskyed rim  ·  Completion Stage - rdzogs rim  ·  Vajra Songs - rdo rje'i glu

":Property:textsubnumber|textsubnumber" can not be assigned to a declared number type with value 1.

[edit]
བསྐྱེད་རྫོགས་བོགས་འདོན་རྡོ་རྗེའི་ཐོལ་གླུ་གྲུབ་གཉིས་རོལ་མོ་ཞེས་བྱ་བ། ཨ་ཧོ། ཆོས་ཅན་གྱི་སྤྲོས་པ་མ་ལུས་ཀུན། །ཆོས་ཉིད་ཀྱི་ངང་དུ་ཐིམ་ཙ་ན། །གང་དུའང་མིང་བཏགས་ཟད་པ་ཡི། །ཁྱབ་བདག་རྡོ་རྗེ་སེམས་དཔར་འདུད། །རིག་སྟོང་གཉུག་མ་སྐྱོང་ཙ་ན། །བློས་བྱས་འཛིན་པས་གྲོལ་བ་མིན། །ངང་བཞག་འདུ་འབྲལ་སྤངས་པའི་དབྱིངས། །མ་ཡེངས་ཙམ་དུ་རང་སར་སྐྱོང་། །སྣང་སྟོང་བསྐྱེད་རིམ་གསལ་ཙ་ན། །ཀུན་བརྟགས་ཞེན་པས་གྲོལ་བ་མིན། །བརྡ་རྟགས་མཚན་ཉིད་རྫོགས་པའི་ངང་། །དག་པ་རབ་འབྱམས་ཆེན་པོར་བསྒོམ། །གསང་སྔགས་བཟླས་བརྗོད་འབུངས་ཙ་ན། །སྒྲ་ཚིག་འདུ་འཕྲོས་གྲོལ་བ་མིན། །ཞེན་མེད་ལམ་ཁྱེར་ཆེན་པོའི་ངང་། །རིག་པ་མཁའ་དབྱིངས་ཨར་ལ་གཏད། །མཐའ་བརྒྱད་སྤྲོས་བྲལ་ལྟ་བ་དེ། །རྟོག་གེའི་ཚིག་གིས་གཞལ་བ་མིན། །རིག་པ་རྗེན་པ་ཅར་ཕོག་ཏུ། །ངོ་སྤྲད་ལྷན་སྐྱེས་ཡེ་ཤེས་ཡིན། །བདེ་སྟོང་དགའ་བཞི་བསྐྱེད་ཙ་ན། །ཉོན་མོངས་རང་གསལ་གྲོལ་བ་མིན། །ཐབས་ལྡན་གསང་སྔགས་ལམ་ཁྱེར་གྱིས། །ཞེན་མེད་འཛིན་མེད་ངང་དུ་སྤྱོད། །ཚོགས་གཉིས་མྱུར་རྫོགས་འབད་ཙ་ན། །ཐབས་ཤེས་ཡ་བྲལ་ལམ་གྱིས་མིན། །སོ་སོ་འགལ་མེད་སྤྱོད་བྱས་ཏེ། །མཆོག་འཛིན་སྤངས་པའི་བརྟུལ་ཞུགས་བཟུང་། །ཐེག་ཆེན་ལམ་ལ་འཇུག་ཙ་ན། །སྟོང་ཉིད་སྙིང་རྗེ་བྲལ་བས་མིན། །ངོ་བོ་གདོད་ནས་རྣམ་དག་པའི། །རང་གདངས་སྙིང་རྗེ་ཆེན་པོར་སྦྱངས། །སོ་སོར་ཐར་པར་བསླབ་ཙ་ན། །འཇིགས་སྐྱོབས་ལེགས་སྨོན་བློ་ཡིས་མིན། །ངེས་པར་འབྱུང་བའི་བསམ་པ་ཡིས། །ཚུལ་ཁྲིམས་དོན་ལྡན་གནས་ལ་སྦྱོར། །གསང་བ་སྔགས་ལ་འཇུག་ཙ་ན། །དབང་བཞིའི་ལམ་དང་བྲལ་བས་མིན། །མཚན་ཉིད་ལྡན་པའི་བླ་མ་ལ། །མོས་གུས་བརྟན་པོས་དེ་ཉིད་བླངས། །བསྐྱེད་རྫོགས་དོན་ལ་བསྒོམ་ཙ་ན། །དམ་ཚིག་སྲོག་དང་བྲལ་བས་མིན། །རྩ་བ་ཡན་ལག་མཉམ་རྗེས་དང་། །བཟའ་བཅའ་སྲུང་བའི་ལམ་ལ་བསླབས། །བརྟུལ་ཞུགས་སྤྱོད་པས་བསྐྱང་ཙ་ན། །ཚུལ་འཆོས་མཚན་མས་གྲོལ་བ་མིན། །འཁོར་འདས་རོ་སྙོམས་ཆེན་པོའི་ངང་། །རེ་དོགས་ཟིལ་གནོན་དགོངས་པར་སྦྱོར། །ཞལ་གཟིགས་ལུང་བསྟན་བྱུང་ཙ་ན། །དགའ་བྲོད་རྟོག་པས་གྲོལ་བ་མིན། །བདེན་མེད་སྒྱུ་མ་ལྟ་བུའི་ངང་། །སྤྲོས་བྲལ་དགོངས་པའི་རྒྱ་ཡིས་བཏབ། །ནད་གདོན་རྐྱེན་བགེགས་བྱུང་ཙ་ན། །འཁུ་འཁྲིགས་ཐབས་ཀྱིས་གྲོལ་བ་མིན། །རེ་དོགས་གཉིས་མེད་ཐོག་བརྫིས་ཀྱིས། །སྣ་ཚོགས་རྟོག་པའི་རྫུན་ཕུག་བརྡིབ། །རྩེ་གཅིག་ཏིང་འཛིན་བསྒོམ་ཙ་ན། །སྡུག་བཙིར་ཡུས་ཀྱིས་གྲོལ་བ་མིན། །ངེས་འབྱུང་སྙིང་རྗེ་ཆེན་པོ་ཡིས། །སྐྱོ་དུབ་མེད་པར་ཉམས་སུ་བླངས། །དབེན་གནས་ནགས་ཁྲོད་རྙོགས་ཙ་ན། །རང་འདོད་ཚུལ་འཆོས་བཅས་པས་མིན། བཅོས་མིན་སྙིང་རྗེ་ཆེན་པོ་ཡིས། །མཚམས་སྦྱོར་ཀུན་ལ་སྙོམས་པར་བྱ། །སྣ་ཚོགས་ཕྲིན་ལས་བསྒྲུབ་ཙ་ན། །རང་རྒྱུད་ཁེངས་པས་གྲོལ་བ་མིན། །སེམས་ཅན་ཀུན་ལ་ཕན་འདོད་པས། །ཡང་དག་ཉིད་དུ་ཉམས་སུ་བླངས། །མདོར་ན་ཐབས་དང་ཤེས་རབ་དང་། །སྟོང་ཉིད་སྙིང་རྗེ་སྣང་སྟོང་སོགས། །ཡ་བྲལ་ལམ་གྱིས་གྲོལ་མིན་ཕྱིར། །ཟུང་འཇུག་དགོངས་པ་རྒྱུད་ལ་སྦྱོར། །བསྐྱེད་རིམ་བོགས་མེད་རྫོགས་རིམ་དང་། །དེ་བཞིན་རྫོགས་པར་བསྐྱེད་རིམ་སོགས། །ཕན་ཚུན་ལྟོས་གྲུབ་རྟེན་འབྱུང་གིས། །འགལ་མེད་གྲོགས་སུ་སྤེལ་བྱས་ན། །མྱུར་དུ་འཁོར་ལོའི་མགོན་པོ་ཡིས། །རྗེས་སུ་གདམས་པའི་དོན་རྟོགས་ཏེ། །ཟུང་འཇུག་སྐུ་གཉིས་དབྱེར་མེད་པའི། །གོ་འཕང་མཆོག་ལ་སྦྱོར་འགྱུར་བ། །སྔོན་བྱོན་མཆོག་གི་དོན་གཟིགས་དང་། །མདོ་རྒྱུད་བསྟན་བཅོས་ཀུན་མཐུན་པར། །བླ་མེད་འདྲེན་པས་གསལ་བར་བསྟན། །འདིར་ཡང་དེ་དག་རྗེས་ཞུགས་ཏེ། །གང་ཤར་རྡོ་རྗེའི་ཐོལ་གླུ་རུ། །བརྗོད་པའི་དགེ་བས་བདག་དང་གཞན། །ཟག་མེད་བདེ་ཆེན་མཆོག་བརྙེས་ཤོག། །། ༈
[edit]

bskyed rdzogs bogs 'don rdo rje'i thol glu grub gnyis rol mo/__ bskyed rdzogs bogs 'don rdo rje'i thol glu grub gnyis rol mo zhes bya ba/__a ho/__chos can gyi spros pa ma lus kun/__/chos nyid kyi ngang du thim tsa na/__/gang du'ang ming btags zad pa yi/__/khyab bdag rdo rje sems dpar 'dud/__/rig stong gnyug ma skyong tsa na/__/blos byas 'dzin pas grol ba min/__/ngang bzhag 'du 'bral spangs pa'i dbyings/__/ma yengs tsam du rang sar skyong /__/snang stong bskyed rim gsal tsa na/__/kun brtags zhen pas grol ba min/__/brda rtags mtshan nyid rdzogs pa'i ngang /__/dag pa rab 'byams chen por bsgom/__/gsang sngags bzlas brjod 'bungs tsa na/__/sgra tshig 'du 'phros grol ba min/__/zhen med lam khyer chen po'i ngang /__/rig pa mkha' dbyings ar la gtad/__/mtha' brgyad spros bral lta ba de/__/rtog ge'i tshig gis gzhal ba min/__/rig pa rjen pa car phog tu/__/ngo sprad lhan skyes ye shes yin/__/bde stong dga' bzhi bskyed tsa na/__/nyon mongs rang gsal grol ba min/__/thabs ldan gsang sngags lam khyer gyis/__/zhen med 'dzin med ngang du spyod/__/tshogs gnyis myur rdzogs 'bad tsa na/__/thabs shes ya bral lam gyis min/__/so so 'gal med spyod byas te/__/mchog 'dzin spangs pa'i brtul zhugs bzung /__/theg chen lam la 'jug tsa na/__/stong nyid snying rje bral bas min/__/ngo bo gdod nas rnam dag pa'i/__/rang gdangs snying rje chen por sbyangs/__/so sor thar par bslab tsa na/__/'jigs skyobs legs smon blo yis min/__/nges par 'byung ba'i bsam pa yis/__/tshul khrims don ldan gnas la sbyor/__/gsang ba sngags la 'jug tsa na/__/dbang bzhi'i lam dang bral bas min/__/mtshan nyid ldan pa'i bla ma la/__/mos gus brtan pos de nyid blangs/__/bskyed rdzogs don la bsgom tsa na/__/dam tshig srog dang bral bas min/__/rtsa ba yan lag mnyam rjes dang /__/bza' bca' srung ba'i lam la bslabs/__/brtul zhugs spyod pas bskyang tsa na/__/tshul 'chos mtshan mas grol ba min/__/'khor 'das ro snyoms chen po'i ngang /__/re dogs zil gnon dgongs par sbyor/__/zhal gzigs lung bstan byung tsa na/__/dga' brod rtog pas grol ba min/__/bden med sgyu ma lta bu'i ngang /__/spros bral dgongs pa'i rgya yis btab/__/nad gdon rkyen bgegs byung tsa na/__/'khu 'khrigs thabs kyis grol ba min/__/re dogs gnyis med thog brdzis kyis/__/sna tshogs rtog pa'i rdzun phug brdib/__/rtse gcig ting 'dzin bsgom tsa na/__/sdug btsir yus kyis grol ba min/__/nges 'byung snying rje chen po yis/__/skyo dub med par nyams su blangs/__/dben gnas nags khrod rnyogs tsa na/__/rang 'dod tshul 'chos bcas pas min/__bcos min snying rje chen po yis/__/mtshams sbyor kun la snyoms par bya/__/sna tshogs phrin las bsgrub tsa na/__/rang rgyud khengs pas grol ba min/__/sems can kun la phan 'dod pas/__/yang dag nyid du nyams su blangs/__/mdor na thabs dang shes rab dang /__/stong nyid snying rje snang stong sogs/__/ya bral lam gyis grol min phyir/__/zung 'jug dgongs pa rgyud la sbyor/__/bskyed rim bogs med rdzogs rim dang /__/de bzhin rdzogs par bskyed rim sogs/__/phan tshun ltos grub rten 'byung gis/__/'gal med grogs su spel byas na/__/myur du 'khor lo'i mgon po yis/__/rjes su gdams pa'i don rtogs te/__/zung 'jug sku gnyis dbyer med pa'i/__/go 'phang mchog la sbyor 'gyur ba/__/sngon byon mchog gi don gzigs dang /__/mdo rgyud bstan bcos kun mthun par/__/bla med 'dren pas gsal bar bstan/__/'dir yang de dag rjes zhugs te/__/gang shar rdo rje'i thol glu ru/__/brjod pa'i dge bas bdag dang gzhan/__/zag med bde chen mchog brnyes shog/__//__!_

Footnotes

Other Information