གེགས་སེལ་རྡོ་རྗེའི་ཐོལ་གླུ་རིན་པོ་ཆེའི་དྲྭ་བ།

🚧 This website is under continued development. We appreciate your patience!

Previous Text Back to Volume PageNext Text

Wylie title	gegs sel rdo rje'i thol glu rin po che'i drwa ba
Location	mkhyen brtse'i bka' 'bum Volume 22, sde tshan 12, Text 90, Pages 591-594 (Folios 124a1 to 125b4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. gegs sel rdo rje'i thol glu rin po che'i drwa ba. In 'jam dbyangs mkhyen brtse'i dbang po'i bka' 'bum, Vol. 22: 591-594. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

1 Texts in this Section (sde tshan or chos tshan)

90 591-594	གེགས་སེལ་རྡོ་རྗེའི་ཐོལ་གླུ་རིན་པོ་ཆེའི་དྲྭ་བ། gegs sel rdo rje'i thol glu rin po che'i drwa ba Vajra Songs - rdo rje'i glu	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

གེགས་སེལ་རྡོ་རྗེའི་ཐོལ་གླུ་རིན་པོ་ཆེའི་དྲྭ་བ་ཞེས་བྱ་བ། ཨ་ཧོ། གདོད་ནས་རྣམ་པར་དག་པའི་བློ་བྲལ་གྱི་ངོ་བོ། །བཏང་བཞག་ཆེད་འཛིན་ལས་འདས་གཉུག་མ་ཡི་སྦུབས་སུ། །སྒྲོ་འདོགས་སྐུར་འདེབས་འབད་རྩོལ་རང་གྲོལ་དུ་ཞིག་པའི། །སྐུ་གསུམ་ལྷུན་གྲུབ་ཆེན་པོའི་ངོ་བོ་ལ་འདུད་དོ། །གང་ཞིག་བརྗོད་པ་བྲལ་བའི་རང་བྱུང་གི་ཡེ་ཤེས། །འཁོར་ལོའི་མགོན་པོའི་ཐུགས་རྗེའི་རང་བཞིན་ལ་བརྟེན་ནས། །དད་དང་གུས་པའི་རྐྱེན་གྱིས་རང་ངོ་རུ་ཤར་བའི། །ཅེར་མཐོང་རིག་སྟོང་འོད་གསལ་རྫོགས་ཆེན་གྱི་ངོ་བོར། །གེགས་དང་གོལ་ཤོར་ནོར་བའི་ཐ་སྙད་ལས་འདས་ཀྱང་། །དེ་ལྟར་མ་རྟོགས་རིམ་སྐྱེས་མཉམ་རྗེས་ཀྱི་རོལ་པར། །འཛིན་བཅས་སེམས་ཀྱིས་བསླུས་པའི་ལྟ་སྒོམ་དང་སྤྱོད་འབྲས། །རྣལ་མའི་ལམ་དུ་སྒྲུབ་པའི་རྡོ་རྗེ་ཡི་ཐོལ་གླུས། །སྨིན་པའི་མོད་ལས་དགོས་འདོད་ལྷུན་གྲུབ་ཏུ་འབྱུང་ངོ་། །ཧོ་ཧོ། གདོད་ནས་དག་པའི་སྟོང་ཉིད་དེ། །མཚན་མའི་ཆོས་ལ་བརྟེན་པས་མིན། །མེད་དགག་བློ་ཡིས་དཔྱད་གྱུར་ན། །གཅེར་བུ་པ་ཡི་རྗེས་སུ་འགྲོ། །རྟོག་ཚོགས་སེམས་སུ་ཞི་བ་དེ། །རང་སར་དྭངས་གསལ་རྗེན་པ་ཡིན། །དྲན་མེད་ཧད་པོའི་སླད་ཞུགས་ན། །ལུང་མ་བསྟན་གྱི་རྗེས་སུ་འགྲོ། །གནས་འགྱུ་རང་ངོ་ཤེས་པ་དེ། །གསལ་རིག་འཛིན་མེད་ལྷག་མཐོང་ཡིན། །བརྟག་ཅིང་དཔྱད་པའི་རྗེས་འབྲངས་ན། །རྟོག་པའི་འཁོར་ལོ་སྤེལ་ཏེ་མཆི། །ཅེར་མཐོང་ཡེངས་མེད་མཉམ་བཞག་ངང་། །རང་ཤེས་སྤྲུལ་བསྒྱུར་རྗེས་ཐོབ་སྟེ། །སྣང་བའི་ཐག་པས་འཆིང་བ་དང་། །སྒྱུ་མར་སྟོང་ཉིད་རྒྱས་འདེབས་ནོར། །འཁྲུལ་འབྱམས་འོག་འགྱུ་ལས་འདས་པའི། །ཡང་དག་གཉུག་མར་ཡེངས་མེད་དེ། །ཡེངས་ཀྱིས་དོགས་པའི་བྱ་ཤོར་ན། །གཉིས་ཆོས་མཚན་མ་བརྒལ་བ་མེད། །བསལ་བཞག་ལས་འདས་རྗེན་པ་ལ། །ཐ་མལ་རིག་པ་ཞེས་བཤད་དེ། །འཇིག་རྟེན་འཁྲུལ་པའི་བློར་བཟུང་ན། །གཟུང་དང་འཛིན་པའི་དྲྭ་བར་འཐུམ། །ཞེན་འཛིན་དག་པའི་རང་སེམས་ལ། །ཁྱབ་གདལ་ངང་གནས་སྒོམ་མེད་དེ། །དྲན་པས་བཏང་བའི་ཐ་མལ་ནི། །འཇིག་རྟེན་པ་ཡི་འཁྲུལ་པ་ཡིན། །གང་ཤར་དགག་སྒྲུབ་མེད་པ་རུ། །ཤར་མཁན་རིག་ཐོག་ཀློད་པ་དེ། །རང་གར་འཁྲུལ་རྟོག་རྗེས་འབྲངས་ནས། །བརྟག་དཔྱད་རྟོག་པའི་དོ་རར་ལྷུང་། །ཁྱད་པར་བདེ་གསལ་མི་རྟོག་ཀྱང་། །ལམ་གྱི་འཆར་སྒོ་ཙམ་ཉིད་དེ། །དེ་ཡི་ངོ་བོར་ཞེན་གྱུར་ན། །འདོད་གཟུགས་གཟུགས་མེད་དག་ཏུ་གོལ། །ངོ་བོ་གདོད་ནས་དག་པ་ཡི། །ཀ་དག་ཕྱོགས་ཡན་མ་རྟོགས་བཞིན། །སྟོང་པ་ལོག་ནས་བསྒྲུབ་པ་ན། །གཤིས་ལ་ཤོར་བ་ཞེས་སུ་བཤད། །རང་རིག་ཟང་ཐལ་ཆེན་པོ་ལ། །རྒྱུ་འབྲས་ལྷུན་གྲུབ་མ་ཤེས་པར། །སྟོང་ཉིད་ལམ་ནས་འབྲས་བུ་གཞན། །བཙལ་བ་ལམ་དུ་ཤོར་བའོ། །སྤང་གཉེན་གཉིས་ལས་རབ་འདས་པའི། །སྦྲུལ་མདུད་ཞིག་ལྟར་ངང་གནས་ལས། །ཉམས་མྱོང་སྟེང་དུ་གཉེན་པོ་གཞན། །བསྒོམ་པ་གཉེན་པོར་ཤོར་བའོ། །གསལ་སྟོང་ལྷུན་གྲུབ་མ་རྟོགས་བཞིན། །བློ་དང་རྣམ་རྟོག་རྗེས་འབྲངས་ནས། །རྒྱུ་འབྲས་མེད་པར་སྐུར་འདེབས་པ། །འདི་ནི་རྒྱས་འདེབས་སྟོང་ལྟའོ། །ཆེད་དུ་འཛིན་པ་ཞུགས་པ་ནི། །གོལ་ཤོར་ནོར་ས་ཀུན་གྱི་གཞི། །དེས་ན་གང་ལའང་མཆོག་འཛིན་གྱི། །ཞེན་པ་མི་བྱ་རང་སར་ཀློད། །ཁྱད་པར་ཚངས་བ་འི་དཀྱིལ་འཁོར་དུ། །པད་དཀར་ཟླ་སྟེང་རྡོ་རྗེ་འཆང་། །དཔལ་ལྡན་བླ་མ་རྟག་བསྒོམ་ནས། །དབང་བཞི་བླང་ཞིང་ཐུགས་ཡིད་བསྲེ། །ཁྱེད་ཤེས་དད་པས་རྒྱུད་བསྐུལ་ནས། །སྒྲུབ་པས་མཉེས་པའི་མཎྜལ་འབུལ། །ལྟེམ་རྐྱང་མེད་པར་སངས་རྒྱས་ལས། །ལྷག་བའི་བཀའ་དྲིན་དྲན་པར་བྱ། །ལུས་ནི་དབེན་པའི་སྒྲུབ་ཁང་ལ། །ཚོགས་དྲུག་རང་ཤར་རང་གྲོལ་དོན། །སེམས་ཉིད་རིག་སྟོང་མཚམས་བསྡམས་ཏེ། །མ་ཡེངས་དྲན་པའི་བཟླས་བརྗོད་འབུངས། །སྒོམ་མེད་ཡེངས་མེད་སྒྲུབ་པ་ཐེམ། །འཁོར་འདས་མཐའ་ཀུན་རིག་ངོར་ཞིག །སྡུག་བཙིར་ཞེ་ཡུས་དབྱིངས་སུ་ཡལ། །བཟང་ངན་ཆོས་བརྒྱད་མགོ་བོ་བཅོམ། །རྗེས་ཐོབ་དེ་ལྟར་མ་རྟོགས་པའི། །སེམས་ཅན་ཀུན་ལ་སྙིང་རྗེ་དང་། །དམིགས་པ་མེད་པའི་སེམས་བསྐྱེད་ཀྱིས། །མཚམས་སྦྱར་སྨོན་ལམ་རྣམ་དག་གདབ། །ཚོགས་གཉིས་རྫོགས་པའི་ཐབས་འབད་ཅིང་། །རྒྱུ་འབྲས་བླང་དོར་ཞིབ་པར་སྤྱོད། །དེ་དག་ཀུན་ཀྱང་སྒྱུ་མ་དང་། །རྨི་ལམ་ལྟ་བུར་ཞེན་མེད་བྱ། །ཚུལ་འདིར་འབད་པས་ཚེ་གཅིག་གམ། །བརྒྱུད་ནས་རིང་པོར་མི་ཐོགས་པར། །མཆོག་གི་དངོས་གྲུབ་མངོན་བྱས་ཏེ། །སེམས་ཅན་སྒྲོལ་བའི་མཐུ་ཐོབ་འགྱུར། །དེ་སྐད་གང་ཤར་རྡོ་རྗེའི་གླུ། །སྔོན་བྱོན་མཁས་དང་གྲུབ་བརྙེས་པའི། །སྙིང་ཏིག་བསྟན་འཛིན་རྣམས་ཀྱི་རྗེས། །ཞུགས་པར་འདོད་དེ་ཀུན་ཏུ་སྨྲས། །དགེ་བ་ཅུང་ཟད་མཆིས་གང་དེས། །རང་གཞན་མོས་པའི་འགྲོ་རྣམས་ཀུན། །འཁོར་ལོའི་མགོན་པོས་རྗེས་བཟུང་ནས། །ཟབ་དོན་གྲུབ་མཐའ་རྙོག་པར་ཤོག །

[edit]

gegs sel rdo rje'i thol glu rin po che'i drwa ba/__ gegs sel rdo rje'i thol glu rin po che'i drwa ba zhes bya ba/__a ho/__gdod nas rnam par dag pa'i blo bral gyi ngo bo/__/btang bzhag ched 'dzin las 'das gnyug ma yi sbubs su/__/sgro 'dogs skur 'debs 'bad rtsol rang grol du zhig pa'i/__/sku gsum lhun grub chen po'i ngo bo la 'dud do/__/gang zhig brjod pa bral ba'i rang byung gi ye shes/__/'khor lo'i mgon po'i thugs rje'i rang bzhin la brten nas/__/dad dang gus pa'i rkyen gyis rang ngo ru shar ba'i/__/cer mthong rig stong 'od gsal rdzogs chen gyi ngo bor/__/gegs dang gol shor nor ba'i tha snyad las 'das kyang /__/de ltar ma rtogs rim skyes mnyam rjes kyi rol par/__/'dzin bcas sems kyis bslus pa'i lta sgom dang spyod 'bras/__/rnal ma'i lam du sgrub pa'i rdo rje yi thol glus/__/smin pa'i mod las dgos 'dod lhun grub tu 'byung ngo /__/ho ho/__gdod nas dag pa'i stong nyid de/__/mtshan ma'i chos la brten pas min/__/med dgag blo yis dpyad gyur na/__/gcer bu pa yi rjes su 'gro/__/rtog tshogs sems su zhi ba de/__/rang sar dwangs gsal rjen pa yin/__/dran med had po'i slad zhugs na/__/lung ma bstan gyi rjes su 'gro/__/gnas 'gyu rang ngo shes pa de/__/gsal rig 'dzin med lhag mthong yin/__/brtag cing dpyad pa'i rjes 'brangs na/__/rtog pa'i 'khor lo spel te mchi/__/cer mthong yengs med mnyam bzhag ngang /__/rang shes sprul bsgyur rjes thob ste/__/snang ba'i thag pas 'ching ba dang /__/sgyu mar stong nyid rgyas 'debs nor/__/'khrul 'byams 'og 'gyu las 'das pa'i/__/yang dag gnyug mar yengs med de/__/yengs kyis dogs pa'i bya shor na/__/gnyis chos mtshan ma brgal ba med/__/bsal bzhag las 'das rjen pa la/__/tha mal rig pa zhes bshad de/__/'jig rten 'khrul pa'i blor bzung na/__/gzung dang 'dzin pa'i drwa bar 'thum/__/zhen 'dzin dag pa'i rang sems la/__/khyab gdal ngang gnas sgom med de/__/dran pas btang ba'i tha mal ni/__/'jig rten pa yi 'khrul pa yin/__/gang shar dgag sgrub med pa ru/__/shar mkhan rig thog klod pa de/__/rang gar 'khrul rtog rjes 'brangs nas/__/brtag dpyad rtog pa'i do rar lhung /__/khyad par bde gsal mi rtog kyang /__/lam gyi 'char sgo tsam nyid de/__/de yi ngo bor zhen gyur na/__/'dod gzugs gzugs med dag tu gol/__/ngo bo gdod nas dag pa yi/__/ka dag phyogs yan ma rtogs bzhin/__/stong pa log nas bsgrub pa na/__/gshis la shor ba zhes su bshad/__/rang rig zang thal chen po la/__/rgyu 'bras lhun grub ma shes par/__/stong nyid lam nas 'bras bu gzhan/__/btsal ba lam du shor ba'o/__/spang gnyen gnyis las rab 'das pa'i/__/sbrul mdud zhig ltar ngang gnas las/__/nyams myong steng du gnyen po gzhan/__/bsgom pa gnyen por shor ba'o/__/gsal stong lhun grub ma rtogs bzhin/__/blo dang rnam rtog rjes 'brangs nas/__/rgyu 'bras med par skur 'debs pa/__/'di ni rgyas 'debs stong lta'o/__/ched du 'dzin pa zhugs pa ni/__/gol shor nor sa kun gyi gzhi/__/des na gang la'ang mchog 'dzin gyi/__/zhen pa mi bya rang sar klod/__/khyad par tshangs ba 'i dkyil 'khor du/__/pad dkar zla steng rdo rje 'chang /__/dpal ldan bla ma rtag bsgom nas/__/dbang bzhi blang zhing thugs yid bsre/__/khyed shes dad pas rgyud bskul nas/__/sgrub pas mnyes pa'i maN+Dal 'bul/__/ltem rkyang med par sangs rgyas las/__/lhag ba'i bka' drin dran par bya/__/lus ni dben pa'i sgrub khang la/__/tshogs drug rang shar rang grol don/__/sems nyid rig stong mtshams bsdams te/__/ma yengs dran pa'i bzlas brjod 'bungs/__/sgom med yengs med sgrub pa them/__/'khor 'das mtha' kun rig ngor zhig__/sdug btsir zhe yus dbyings su yal/__/bzang ngan chos brgyad mgo bo bcom/__/rjes thob de ltar ma rtogs pa'i/__/sems can kun la snying rje dang /__/dmigs pa med pa'i sems bskyed kyis/_/mtshams sbyar smon lam rnam dag gdab/__/tshogs gnyis rdzogs pa'i thabs 'bad cing /__/rgyu 'bras blang dor zhib par spyod/__/de dag kun kyang sgyu ma dang /__/rmi lam lta bur zhen med bya/__/tshul 'dir 'bad pas tshe gcig gam/__/brgyud nas ring por mi thogs par/___/mchog gi dngos grub mngon byas te/__/sems can sgrol ba'i mthu thob 'gyur/__/de skad gang shar rdo rje'i glu/__/sngon byon mkhas dang grub brnyes pa'i/__/snying tig bstan 'dzin rnams kyi rjes/__/zhugs par 'dod de kun tu smras/__/dge ba cung zad mchis gang des/__/rang gzhan mos pa'i 'gro rnams kun/__/'khor lo'i mgon pos rjes bzung nas/__/zab don grub mtha' rnyog par shog__/