སྨོན་པར་བྱ་བའི་རྡོ་རྗེའི་ཐོལ་གླུ་པྲ་ཎི་གྲུབ་པའི་ཟློས་གར།

🚧 This website is under continued development. We appreciate your patience!

Previous Text Back to Volume PageNext Text

Wylie title	smon par bya ba'i rdo rje'i thol glu pra Ni grub pa'i zlos gar
Location	mkhyen brtse'i bka' 'bum Volume 22, sde tshan 12, Text 92, Pages 597-600 (Folios 127a3 to 128b3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. smon par bya ba'i rdo rje'i thol glu pra Ni grub pa'i zlos gar. In 'jam dbyangs mkhyen brtse'i dbang po'i bka' 'bum, Vol. 22: 597-600. Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

1 Texts in this Section (sde tshan or chos tshan)

92 597-600	སྨོན་པར་བྱ་བའི་རྡོ་རྗེའི་ཐོལ་གླུ་པྲ་ཎི་གྲུབ་པའི་ཟློས་གར། smon par bya ba'i rdo rje'i thol glu pra Ni grub pa'i zlos gar Vajra Songs - rdo rje'i glu	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

སྨོན་པར་བྱ་བའི་རྡོ་རྗེའི་ཐོལ་གླུ་པྲ་ཎི་དྷ་གྲུབ་པའི་ཟློས་གར་ཅེས་བྱ་བ། ཨེ་མ་ཧོ། ནང་གསལ་ཁྱད་ཆོས་དྲུག་ལྡན་གཉུག་མ་ཡི་ཀློང་ནས། །ཕྱིར་གསལ་ངེས་པ་ལྔ་ལྡན་ལྷུན་གྲུབ་ཀྱི་བཀོད་པ། །རང་གདངས་སྤྲུལ་པའི་དཀྱིལ་འཁོར་ལྷ་ཚོགས་སུ་བསྒྱུར་བའི། །སྐུ་གསུམ་དབྱེར་མེད་རྗེ་བཙུན་བླ་མ་ལ་འདུད་དོ། །དལ་བརྒྱད་འབྱོར་བཅུའི་མཛེས་པའི་རྙེད་དཀའ་ཡི་ལུས་རྟེན། །མྱུར་དུ་མི་རྟག་འཆི་བའི་ངེས་འབྱུང་གིས་བསྐུལ་ནས། །འཁོར་བའི་སྡུག་བསྔལ་བཟོད་མེད་སྐྱོ་ཤས་དང་བཅས་ཏེ། །རྒྱུ་འབྲས་སྤང་བླང་སྤྱོད་པའི་སྨོན་ལམ་ཞིག་ཞུའོ། །མཚན་ལྡན་བླ་མས་དགྱེས་བཞིན་དུས་ཀུན་ཏུ་བསྐྱངས་པས། །གསང་ཆེན་རྡོ་རྗེ་ཐེག་པའི་སྨིན་གྲོལ་ལ་རོལ་ཞིང་། །སངས་རྒྱས་དངོས་ལས་ལྷག་པའི་མོས་གུས་ཀྱི་སྲི་ཞུས། །ལུས་སྲོག་ཕོངས་མེད་བསྟེན་པའི་སྨོན་ལམ་ཞིག་ཞུའོ། །རང་རྒྱུད་རེངས་པའི་བསམ་སྦྱོར་དུས་ཀུན་ཏུ་སྤངས་པས། །འགྲོ་ཀུན་ཡོངས་སུ་དགའ་བའི་སྤྱོད་ཚུལ་དང་བཅས་ཏེ། །བཤེས་པ་ཙམ་ནས་མི་དགེ་རང་ཤུགས་ལ་འགོ་བའི། །སྡིག་པའི་གྲོགས་དང་འབྲལ་བའི་སྨོན་ལམ་ཞིག་ཞུའོ། །ཆོས་བརྒྱད་འཆིང་བ་བྲལ་བཞིན་དབེན་གནས་ཀྱི་ནགས་ཚལ། །དགེ་བའི་གྲོགས་ཀྱིས་བསྟེན་པར་བསམ་གཏན་ལ་གཞོལ་ཞིང་།། རྟག་ཏུ་དམན་ས་བཟུང་ནས་བག་ཡོད་དང་ཆོག་ཤེས། །གཞན་ཕན་ནོར་གྱིས་ཕྱུག་པའི་སྨོན་ལམ་ཞིག་ཞུའོ། །ངེས་འབྱུང་བསམ་པས་རབ་བླངས་སོ་ཐར་གྱི་ཚུལ་ཁྲིམས། །གཞན་ཕན་སྨོན་འཇུག་གཡེལ་མེད་བྱང་སེམས་ཀྱི་བསླབ་པ། །སྨིན་བྱེད་རྗེས་སུ་འབྲེལ་བའི་གསང་སྔགས་ཀྱི་དམ་ཚིག །སྡོམ་གསུམ་ཉམས་མེད་བསྲུང་བའི་སྨོན་ལམ་ཞིག་ཞུའོ། །ཕྱི་ནང་སྣོད་བཅུད་སྣང་སྟོང་ཟུང་འཇུག་གི་དཀྱིལ་འཁོར། །སྒྱུ་འཕྲུལ་དྲྭ་བའི་རོལ་གར་ཉག་གཅིག་ཏུ་གོམས་པས། །ཕུང་པོ་ཁམས་དང་སྐྱེ་མཆེད་གདན་གསུམ་གྱི་ངོ་བོར། །དག་རྫོགས་སྨིན་གསུམ་བརྙེས་པའི་སྨོན་ལམ་ཞིག་ཞུའོ། །འགྲོ་འོང་དྲི་ཡི་བཞོན་པ་དབུ་མ་རུ་བཅིལ་ནས། །འབར་འཛག་བདེ་སྟོང་དགའ་བཞིའི་ཏིང་འཛིན་ལ་རོལ་བས། །འཁྲུལ་པའི་རྩ་མདུད་ས་བཅུའི་དགའ་ཚལ་དུ་གྲོལ་ཏེ། །རྣམ་ཀུན་མཆོག་ལྡན་གྲུབ་པའི་སྨོན་ལམ་ཞིག་ཞུའོ། །བློ་འདས་རིག་སྟོང་རྗེན་པའི་གཤིས་ལུགས་ལ་བལྟས་པས། །སྤང་བླང་བཟོ་བཅོས་བྲལ་བའི་ངང་བཞག་དང་མཇལ་ནས། །འོད་གསལ་སྤྲོས་བྲལ་སྐུ་བཞི་དབྱེར་མེད་ཀྱི་ངོ་བོ། །གདོད་མའི་བཙན་ས་ཟིན་པའི་སྨོན་ལམ་ཞིག་ཞུའོ། །དབྱིངས་རིག་དབྱེར་མེད་འཇའ་ཟེར་ཐིག་ལེ་ཡི་སྦུབས་སུ། །གཞི་སྣང་གོང་འཕེལ་ཆོས་ཟད་ཆེན་པོ་ལ་རོལ་ཞིང་། །འཕོ་ཆེན་འཇའ་ལུས་འོད་གསལ་ཟུང་འཇུག་གི་གཟུགས་སྐུས། །འགྲོ་ཀུན་ཟད་པར་སྒྲོལ་བའི་སྨོན་ལམ་ཞིག་ཞུའོ། །གནས་སྐབས་ཕྱོགས་རྣམས་ཀུན་ཏུ་དུས་བཞི་ཡི་མགྲོན་པོས། །སྣོད་བཅུད་རྫོགས་ལྡན་གསར་བའི་དགའ་སྟོན་ལ་སྦྱར་བས། །འཇིགས་ཆེན་བརྒྱད་དང་བཅུ་དྲུག་རང་བཞིན་དུ་བཅིལ་ནས། །ཆོས་མཐུན་སྤྱོད་པས་འཚོ་བའི་སྨོན་ལམ་ཞིག་ཞུའོ། །མཐར་ཐུག་བདག་ཉིད་མཐོང་ཐོས་དྲན་རེག་གི་འགྲོ་ཀུན། །མངོན་པར་དགའ་སོགས་རང་བཞིན་སྤྲུལ་པ་ཡི་ཞིང་དུ། །པདྨོའི་སྦུབས་ལས་གྲོལ་བའི་བྱང་སེམས་སུ་གྱུར་ཏེ། །ཀུན་མཁྱེན་གོ་འཕང་བརྙེས་པའི་སྨོན་ལམ་ཞིག་ཞུའོ། །ཁྱད་པར་དུས་གསུམ་བསགས་དང་བསགས་འགྱུར་གྱི་དགེ་ཚོགས། །དཔལ་ལྡན་བླ་མ་མཉེས་པའི་མཆོད་སྤྲིན་དུ་གྱུར་ནས། །ཐུགས་ཀྱི་དགོངས་པ་ཡོངས་རྫོགས་འགྲོ་བ་ཡི་མོས་ངོར། །རྟག་པར་ཞབས་པད་བརྟན་པའི་སྨོན་ལམ་ཞིག་ཞུའོ། །དེ་ལྟར་རྒྱ་ཆེན་གསོལ་བཏབ་རྟེན་འབྱུང་གིས་བསྐུལ་ནས། །མཆོག་གསུམ་དབྱེར་མེད་དཔལ་ལྡན་བླ་མ་ཡི་བདེན་པས། །ཇི་སྐད་སྨོན་པའི་དོན་རྣམས་གེགས་མེད་དུ་འགྲུབ་སྟེ། །དོན་གཉིས་ཡོངས་སུ་སྨིན་པར་བྱིན་གྱིས་རང་རློབས་ཤིག །ཡུལ་སྣང་ཆོས་ཅན་བླ་མའི་གཟུགས་སྐུ་རུ་བལྟ་ཞིང་། །རང་རིག་ཆོས་ཉིད་འོད་གསལ་དད་པ་ཡིས་བསྐུལ་ཏེ། །སྣ་ཚོགས་སྨིན་པའི་རྡོ་རྗེའི་ཐོལ་གླུ་རུ་བླངས་སོ། །དགེ་བས་འགྲོ་ཁམས་རྒྱ་མཚོ་སྨིན་གྲོལ་དུ་ཤོག་ཅིག། །། ༈

[edit]

smon par bya ba'i rdo rje'i thol glu pra Ni grub pa'i zlos gar/__ smon par bya ba'i rdo rje'i thol glu pra Ni d+ha grub pa'i zlos gar ces bya ba/__e ma ho/__nang gsal khyad chos drug ldan gnyug ma yi klong nas/__/phyir gsal nges pa lnga ldan lhun grub kyi bkod pa/__/rang gdangs sprul pa'i dkyil 'khor lha tshogs su bsgyur ba'i/__/sku gsum dbyer med rje btsun bla ma la 'dud do/__/dal brgyad 'byor bcu'i mdzes pa'i rnyed dka' yi lus rten/__/myur du mi rtag 'chi ba'i nges 'byung gis bskul nas/__/'khor ba'i sdug bsngal bzod med skyo shas dang bcas te/__/rgyu 'bras spang blang spyod pa'i smon lam zhig zhu'o/__/mtshan ldan bla mas dgyes bzhin dus kun tu bskyangs pas/__/gsang chen rdo rje theg pa'i smin grol la rol zhing /__/sangs rgyas dngos las lhag pa'i mos gus kyi sri zhus/__/lus srog phongs med bsten pa'i smon lam zhig zhu'o/__/rang rgyud rengs pa'i bsam sbyor dus kun tu spangs pas/__/'gro kun yongs su dga' ba'i spyod tshul dang bcas te/__/bshes pa tsam nas mi dge rang shugs la 'go ba'i/__/sdig pa'i grogs dang 'bral ba'i smon lam zhig zhu'o/__/chos brgyad 'ching ba bral bzhin dben gnas kyi nags tshal/__/dge ba'i grogs kyis bsten par bsam gtan la gzhol zhing //_rtag tu dman sa bzung nas bag yod dang chog shes/__/gzhan phan nor gyis phyug pa'i smon lam zhig zhu'o/__/nges 'byung bsam pas rab blangs so thar gyi tshul khrims/__/gzhan phan smon 'jug g.yel med byang sems kyi bslab pa/__/smin byed rjes su 'brel ba'i gsang sngags kyi dam tshig__/sdom gsum nyams med bsrung ba'i smon lam zhig zhu'o/__/phyi nang snod bcud snang stong zung 'jug gi dkyil 'khor/__/sgyu 'phrul drwa ba'i rol gar nyag gcig tu goms pas/__/phung po khams dang skye mched gdan gsum gyi ngo bor/__/dag rdzogs smin gsum brnyes pa'i smon lam zhig zhu'o/__/'gro 'ong dri yi bzhon pa dbu ma ru bcil nas/__/'bar 'dzag bde stong dga' bzhi'i ting 'dzin la rol bas/_/'khrul pa'i rtsa mdud sa bcu'i dga' tshal du grol te/__/rnam kun mchog ldan grub pa'i smon lam zhig zhu'o/__/blo 'das rig stong rjen pa'i gshis lugs la bltas pas/__/spang blang bzo bcos bral ba'i ngang bzhag dang mjal nas/__/'od gsal spros bral sku bzhi dbyer med kyi ngo bo/__/gdod ma'i btsan sa zin pa'i smon lam zhig zhu'o/__/dbyings rig dbyer med 'ja' zer thig le yi sbubs su/__/gzhi snang gong 'phel chos zad chen po la rol zhing /__/'pho chen 'ja' lus 'od gsal zung 'jug gi gzugs skus/__/'gro kun zad par sgrol ba'i smon lam zhig zhu'o/__/gnas skabs phyogs rnams kun tu dus bzhi yi mgron pos/__/snod bcud rdzogs ldan gsar ba'i dga' ston la sbyar bas/__/'jigs chen brgyad dang bcu drug rang bzhin du bcil nas/__/chos mthun spyod pas 'tsho ba'i smon lam zhig zhu'o/__/mthar thug bdag nyid mthong thos dran reg gi 'gro kun/__/mngon par dga' sogs rang bzhin sprul pa yi zhing du/__/pad+mo'i sbubs las grol ba'i byang sems su gyur te/__/kun mkhyen go 'phang brnyes pa'i smon lam zhig zhu'o/__/khyad par dus gsum bsags dang bsags 'gyur gyi dge tshogs/__/dpal ldan bla ma mnyes pa'i mchod sprin du gyur nas/__/thugs kyi dgongs pa yongs rdzogs 'gro ba yi mos ngor/__/rtag par zhabs pad brtan pa'i smon lam zhig zhu'o/__/de ltar rgya chen gsol btab rten 'byung gis bskul nas/__/mchog gsum dbyer med dpal ldan bla ma yi bden pas/__/ji skad smon pa'i don rnams gegs med du 'grub ste/__/don gnyis yongs su smin par byin gyis rang rlobs shig__/yul snang chos can bla ma'i gzugs sku ru blta zhing /__/rang rig chos nyid 'od gsal dad pa yis bskul te/__/sna tshogs smin pa'i rdo rje'i thol glu ru blangs so/__/dge bas 'gro khams rgya mtsho smin grol du shog cig/__//__!_