གྲུབ་ཆེན་ཉི་མ་སྦས་པའི་ལུགས་ཀྱི་སྒྲོལ་མ་སྤྱི་སྒྲུབ་ཀྱི་མངོན་རྟོགས་རྣལ་འབྱོར་ཉེར་མཁོ།

🚧 This website is under continued development. We appreciate your patience!

Previous Text Back to Volume PageNext Text

Wylie title	grub chen nyi ma sbas pa'i lugs kyi sgrol ma spyi sgrub kyi mngon rtogs rnal 'byor nyer mkho
Location	mkhyen brtse'i bka' 'bum Volume 10, sde tshan 1, Text 12, Pages 116-123 (Folios 58b6 to 62a1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Source Author(s)	རྗེ་བཙུན་གྲགས་པ་རྒྱལ་མཚན་ (rje btsun grags pa rgyal mtshan)
Associated People	ཉི་མ་སྦས་པ་ (Sūryagupta)
Citation	'jam dbyangs mkhyen brtse'i dbang po. grub chen nyi ma sbas pa'i lugs kyi sgrol ma spyi sgrub kyi mngon rtogs rnal 'byor nyer mkho. In 'jam dbyangs mkhyen brtse'i dbang po'i bka' 'bum, Vol. 10: 116-123. Khams sde dge rdzong sar dgon: Rdzong sar blo gros phun tshogs, 2020.
Genre	Sadhanas - Evocation Ritual - sgrub thabs  ·  Contemplative Guide Books and Instructional Manuals - khrid yig
Cycle	ཉི་མ་སྦས་པའི་ལུགས་ཀྱི་སྒྲོལ་མ་ཉེར་གཅིག་ (nyi ma sbas pa'i lugs kyi sgrol ma nyer gcig)
Deity	sgrol ma, sgrol ma nyer gcig
Colophon	ཅེས་པའང་རྗེ་བཙུན་རྡོ་རྗེ་འཆང་གྲགས་པ་རྒྱལ་མཚན་གྱི་གསུང་རབ་ལ་གསལ་བྱེད་ཅུང་ཟད་དང་བཅས་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་པ་སརྦ་དཱ་སུ་ཤྲེ་ཡོ་བྷ་བ་ཏུ།།
	ces pa'ang rje btsun rdo rje 'chang grags pa rgyal mtshan gyi gsung rab la gsal byed cung zad dang bcas 'jam dbyangs bla ma dgyes pa'i 'bangs mkhyen brtse'i dbang pos bris pa sarba dA su shre yo b+ha ba tu

1 Texts in this Section (sde tshan or chos tshan)

12 116-123	གྲུབ་ཆེན་ཉི་མ་སྦས་པའི་ལུགས་ཀྱི་སྒྲོལ་མ་སྤྱི་སྒྲུབ་ཀྱི་མངོན་རྟོགས་རྣལ་འབྱོར་ཉེར་མཁོ། grub chen nyi ma sbas pa'i lugs kyi sgrol ma spyi sgrub kyi mngon rtogs rnal 'byor nyer mkho Sadhanas - Evocation Ritual - sgrub thabs   ·   Contemplative Guide Books and Instructional Manuals - khrid yig	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །གྲུབ་ཆེན་ཉི་མ་སྦས་པའི་ལུགས་ཀྱི་སྒྲོལ་མ་སྤྱི་སྒྲུབ་ཀྱི་མངོན་རྟོགས་རྣལ་འབྱོར་ཉེར་མཁོ་ཞེས་བྱ་བ་བཞུགས་སོ། །ཨོཾ་སྭ་སྟི། བླ་མ་མཆོག་དང་དབྱེར་མེད་པའི། །རྗེ་བཙུན་འཕགས་མར་གུས་བཏུད་ནས། །ཉི་མ་སྦས་པའི་མན་ངག་བཞིན། །སྒྲུབ་ཐབས་རྣལ་འབྱོར་ཉེར་མཁོ་བྲི། །འདི་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ལ་གཉིས། རྒྱུད་སྦྱང་བ་དང་། ཚོགས་བསག་པའོ། །དང་པོ་ནི། མདུན་གྱི་ནམ་མཁར་བླ་མ་དོན་ཡོད་གྲུབ་པས་དབུར་བརྒྱན་པའི་རྗེ་བཙུན་མ་སྐྱབས་གནས་ཀུན་འདུས་ཀྱི་ངོ་བོར་མངོན་སུམ་བཞིན་དུ་དམིགས་ལ་འདུན་པ་རྩེ་གཅིག་པས་སྐྱབས་སེམས་རྒྱས་བསྡུས་གང་རུང་སྤྱི་ལྟར་བྱའོ། །གཉིས་པ་ལ་གཉིས། བསོད་ནམས་ཀྱི་ཚོགས་བསག་པ་དང་། ཡེ་ཤེས་ཀྱི་ཚོགས་བསག་པའོ། །དང་པོ་ནི། རང་སྐད་ཅིག་གིས་རྗེ་བཙུན་མ་སྒྲོལ་མར་གསལ་བའི་སྙིང་གར་པདྨ་དང་ཟླ་བའི་སྟེང་དུ་ཏཱྃ་ལྗང་གུ། དེ་ལས་འོད་ཟེར་ཁ་དོག་སྣ་ཚོགས་འཕྲོས་པས་མདུན་གྱི་ནམ་མཁའི་གནས་སུ་བླ་མ་དང་རྗེ་བཙུན་མ་འཕགས་མ་སྒྲོལ་མ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་ཨོཾ་བཛྲ་ས་མཱ་ཛཿས་ཚོགས་ཞིང་སྤྱན་དྲངས། ན་མོ་གུ་རུ་བྷྱཿཞེས་པས་བླ་མ་དང་། ན་མཿཨཱཪྻཱ་ཏཱ་རཱ་ས་པ་རི་ཝཱ་རེ་བྷྱཿས་སྒྲོལ་མ་འཁོར་བཅས་ལ་ཕྱག་བྱ། སྙིང་གའི་འོད་ཟེར་ལས་མེ་ཏོག་སོགས་མཆོད་པའི་ཚོགས་ནམ་མཁའ་གང་བར་སྤྲོས་ཏེ་ཨོཾ་བཛྲ་པུཥྤེ་ཨཱཿཧཱུྃ་སོགས་ཀྱིས་མཆོད། དཀོན་མཆོག་གསུམ་ལ་བདག་སྐྱབས་མཆི་སོགས་ཀྱིས་བདུན་རྣམ་དག་བྱ། སེམས་ཅན་ཐམས་ཅད་བདེ་བ་དང་སོགས་བརྗོད་པས་ཚད་མེད་བཞི་བསྒོམ། གཉིས་པ་ནི། ཨོཾ་ཤཱུནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་པས་གཟུང་འཛིན་གྱི་ཆོས་ཐམས་ཅད་སྟོང་པར་བསམས་ལ་བློ་གཞག་གོ། །གཉིས་པ་དངོས་གཞི་ལ་གཉིས། ལྷ་བསྒོམ་པ་དང་། སྔགས་བཟླ་བའོ། །དང་པོ་ལ་བཞི་ལས། དང་པོ་དམ་ཚིག་པ་བསྐྱེད་པ་བསྙེན་པའི་ཡན་ལག་ནི། དེ་ནས་བྱང་ཆུབ་ཀྱི་སེམས་རྗེས་སུ་དྲན་པའི་སྟོབས་ཀྱིས་གཟུགས་ཀྱི་སྐུར་ལངས་ལ་སེམས་ཅན་གྱི་དོན་བྱའོ་བསམས་པས་མཚམས་སྦྱར་ཏེ། སྟོང་པའི་ངང་ལས་པྃ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཏཱྃ་ལྗང་གུ་ལས་ཨུཏྤལ་ཏཱྃ་གིས་མཚན་པ། དེ་ལས་འོད་ཟེར་འཕྲོས་པས་འཕགས་པ་མཆོད། སེམས་ཅན་གྱི་དོན་བྱས་ཚུར་འདུས་ནས་ཐིམ་པའི་སྐད་ཅིག་ལ་བདག་ཉིད་རྗེ་བཙུན་མ་སྒྲོལ་མ་སྐུ་མདོག་ལྗང་སྔོན། ཕྱག་གཡས་པས་མི་འཇིགས་པ་སྟེར་བའི་སྐྱབས་སྦྱིན། གཡོན་པས་ཨུཏྤལ་བཟུང་བའི་འདབ་མས་རྣ་བར་རེག་པ། སྐྲ་ཅུང་ཟད་ལི་བ་གཡས་སུ་ཅུང་ཟད་འཕྱང་བ། དར་གྱི་ན་བཟས་བཀླུབས་ཤིང་རིན་པོ་ཆེའི་རྒྱན་དུ་མས་བརྒྱན་པ། ལང་ཚོ་དར་ལ་བབས་པ། རབ་ཏུ་འཛུམ་པའི་སྐུར་གྱུར་པར་བསམ། གཉིས་པ་ཡན་ལག་དྲུག་དང་སྐུ་གསུང་ཐུགས་བྱིན་གྱིས་བརླབ་པ་ཉེ་བར་སྒྲུབ་པའི་ཡན་ལག་ནི། དེའི་མིག་ཏུ་ཨོཾ་ཏཱ་རེ་སྭཱ་ཧཱ་དཀར་པོ། རྣ་བར་ཨོཾ་ཏུཏྟཱ་རེ་སྭཱ་ཧཱ་སྔོན་པོ། སྣ་ལ་ཨོཾ་ཏུ་རེ་སྭཱ་ཧཱ་སེར་པོ། ལྕེ་ལ་ཨོཾ་ཏུ་སྭཱ་ཧཱ་དམར་པོ། སྙིང་གར་ཨོཾ་རེ་སྭཱ་ཧཱ་སྔོན་པོ། སྤྱི་བོར་ཨོཾ་ཏཱ་རེ་ཎི་སྭཱ་ཧཱ་ལྗང་གུ་སྟེ། དེ་ཐམས་ཅད་ཀྱང་ཟླ་བའི་གདན་ལ་གནས་པ། དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀའི་སྟོད་དུ་ཧཱུྃ་སྔོན་པོ། དབུས་སུ་པདྨ་དང་ཟླ་བ་ལ་གནས་པའི་ཏཱྃ་ལྗང་གུ། གསུམ་པ་ཡེ་ཤེས་པ་གཞུག་པ་སྒྲུབ་པའི་ཡན་ལག་ནི། དེ་ལས་འོད་ཟེར་འཕྲོས་པས་ལྷོ་ཕྱོགས་པོ་ཏ་ལ་ནས་རང་འདྲ་བའི་ཡེ་ཤེས་སེམས་མ་ཨོཾ་བཛྲ་ས་མཱ་ཛཿ ཛཿཧཱུྃ་བྃ་ཧོ། གཉིས་སུ་མེད་པར་ཐིམ། བཞི་པ་དབང་བསྐུར་ཞིང་རྒྱས་འདེབས་པ་སྒྲུབ་པ་ཆེན་པོའི་ཡན་ལག་ནི། སླར་ཡང་རང་གི་ཐུགས་ཀའི་ས་བོན་ལས་འོད་ཟེར་འཕྲོས་པས་དབང་གི་ལྷ་རིགས་ལྔ་འཁོར་དང་བཅས་པ་མདུན་གྱི་ནམ་མཁར་ཨོཾ་བཛྲ་ས་མཱ་ཛཿ ཨོཾ་བཛྲ་པུཥྤེ་ཨཱཿཧཱུྃ་སོགས་ཀྱིས་མཆོད། དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་བ་སྩལ་དུ་གསོལ། ཞེས་གསོལ་བ་བཏབ་པས། ཇི་ལྟར་བལྟམས་པ་སོགས་དང་། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ། ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་། དྲི་མ་དག །ཆུའི་ལྷག་མ་ཡར་ལུད་པ་ལས་དོན་ཡོད་གྲུབ་པས་དབུར་བརྒྱན་པར་བསམས་ལ། ལྷའི་སྐུ་སྣང་སྟོང་སྒྱུ་མ་ལྟ་བུ་ལ་སེམས་ཡུན་རིང་དུ་གཟུང་ངོ་། །གཉིས་པ་ནི། བསྒོམས་པས་དུབ་ན་ཐུགས་རྒྱུད་བསྐུལ་བའི་ཕྱིར་བསྙེན་པའི་རྣལ་འབྱོར་ནི། རང་གི་སྙིང་གར་ཏཱྃ་ཡིག་ལ་ཡི་གེ་བཅུ་པའི་སྔགས་ཀྱིས་བསྐོར་བ་ལ་སེམས་གཏད། གསལ་སྣང་སྐྱེས་པ་ན། དེ་ལས་སྐུ་དང་སྔགས་ཕྲེང་འོད་ཟེར་གྱི་ཚོགས་བསམ་གྱིས་མི་ཁྱབ་པ་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཁྱད་པར་དུ་རྗེ་བཙུན་མ་སྒྲོལ་མ་འཁོར་དང་བཅས་པའི་ཐུགས་རྒྱུད་བསྐུལ། ཐུགས་རྗེའི་བྱིན་རླབས་ནུས་མཐུ་ཐམས་ཅད་འོད་ཟེར་གྱི་རྣམ་པར་ཚུར་འདུས་ཏེ་སྙིང་གའི་ས་བོན་སྔགས་ཕྲེང་དང་བཅས་པ་ལ་ཐིམ་པས་རྒྱུད་བྱིན་གྱིས་བརླབས་པར་བསམས་ལ། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཞེས་ཡི་གེ་བཅུ་པའི་སྔགས་ཅི་ནུས་སུ་བཟླའོ། །གསུམ་པ་ནི། ཐུན་དེ་ལས་ལྡང་བ་ནི། བཅོམ་ལྡན་འདས་མས་བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཞེས་འདོད་དོན་གསོལ། རང་གི་སྙིང་ག་ནས་འོད་ཟེར་འཕྲོས་པས་གདན་འོད་ཟེར་གྱི་རྣམ་པར་གྱུར་ཏེ་རང་ལ་ཐིམ། དཔྲལ་བར་ཨོཾ་དཀར་པོ་སོགས་གནས་གསུམ་བསྲུང་། དགེ་བ་འདི་ཡིས་མྱུར་དུ་བདག །རྗེ་བཙུན་སྒྲོལ་མ་འགྲུབ་གྱུར་ནས་སོགས་བསྔོ་སྨོན་གྱིས་མཚམས་སྦྱར་ཏེ་སྤྱོད་ལམ་ལ་འཇུག །ཐུན་མཚམས་སུ་གཏོར་མ་བཏང་བར་འདོད་ན་ཅི་འབྱོར་པའི་གཏོར་མ་དང་ནང་མཆོད་བཅས་བཤམས་ལ་ཨ་མྲྀ་ཏས་བསང་། སྭ་བྷཱ་ཝས་སྦྱངས། སྟོང་པའི་ངང་ལས་ཨོཾ་ལས་བྱུང་བའི་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བའི་ནང་དུ་ཧཱུྃ་ཞུ་བ་ལས་བྱུང་བའི་གཏོར་མ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་ཧ་ཧོ་ཧྲཱིཿ རང་གི་སྙིང་ག་ནས་འོད་ཟེར་འཕྲོས། འཕགས་མ་སྒྲོལ་མའི་ལྷ་ཚོགས་ཐམས་ཅད་བཛྲ་ས་མཱ་ཛཿ པདྨ་ཀ་མ་ལཱ་ཡ་སྟྭཾ། ཡི་གེ་བཅུ་པའི་མཐར་ཨ་ཀཱ་རོ་བཏགས་པ་ལན་བདུན་གྱིས་དབུལ། ཨརྒྷཾ་ནས་ཤབྡའི་བར་གྱིས་ཕྱི་མཆོད། འབྲུ་གསུམ་གྱིས་ནང་མཆོད། ལྷ་དང་ལྷ་མིན་ཅོད་པན་གྱིས་སོགས་བསྟོད། མཆོད་སྦྱིན་གཏོར་མ་འདི་བཞེས་ལ་སོགས་འདོད་དོན་གསོལ་བ་གདབ། ཡི་གེ་བརྒྱ་པའི་མཐར། མ་འབྱོར་པ་དང་སོགས་བཟོད་གསོལ་དང་། རྟེན་ཡོད་ན་བརྟན་བཞུགས་བྱ། མེད་ན་བཛྲ་མུཿས་གཤེགས་སུ་གསོལ། ཞར་བྱུང་འཇིག་རྟེན་པའི་གཏོར་མ་གཏང་བར་འདོད་ན། གསེར་ལ་སོགས་པའི་སྣོད་གས་ཆག་མེད་པ་མཛེས་པའི་ནང་དུ། འོ་མ། མར། སྲན་ཆན། མེ་ཏོག །འབྲས་ཡོས། དྲི་ཞིམ་ཞིང་སྲོག་ཆགས་མེད་པའི་ཆུ། ཁུར་བ། ཤ་བཙོས། ཆང་ལ་སོགས་པ་བླུགས་ཏེ། མ་འབྱོར་ན་ནི་ཟན་དང་ཆུ་གཙང་ལ་སོགས་པ་ཅི་ཙམ་འབྱོར་པ་ལ་བྱའོ། །དེ་ནས་བདག་ཉིད་སྒྲོལ་མའི་ང་རྒྱལ་དང་ལྡན་པས་ཨོཾ་ཨཱཿཧཱུྃ་ཞེས་བརྗོད་པས་སྣོད་རྒྱ་ཆེ་བའི་འཇིག་རྟེན་གྱི་ཁམས་ཐམས་ཅད་གང་བ། བཅུད་བདུད་རྩིའི་ངོ་བོས་གང་བར་བསམ་ལ། ཨོཾ་ཨ་ཀཱ་རོའི་སྔགས་ལན་གསུམ་བརྗོད་ཅིང་སེ་གོལ་གསུམ་གཏོགས་པས་ཕྱོགས་སྐྱོང་བཅུས་གཙོ་བྱས་པའི་རིགས་དྲུག་ཐམས་ཅད་ཚིམ་པར་བསམ། མཆོད་སྦྱིན་གཏོར་མ་འདི་བཞེས་སོགས་ཀྱིས་ཕྲིན་ལས་གཞོལ། གཏོར་མ་དབེན་པའི་གནས་སུ་བཏང་བར་བྱའོ། །དེ་ལྟ་བུའི་རིམ་པས་ཐུན་བཞིའི་རྣལ་འབྱོར་ལ་བསླབ་ཅིང་། བསྙེན་པ་འབུམ་ཕྲག་བཅུ་གསུམ་བཟླས་པས་ལས་ཚོགས་རབ་འབྱམས་བསྒྲུབ་པ་ལ་དབང་བ་ཡིན་ནོ། །ཀླུ་སྒྲུབ་ཉི་མ་སྦས་པ་ཡི། །མན་ངག་འཕགས་མ་སྒྲུབ་པའི་ཐབས། །རྣལ་འབྱོར་ཉེར་མཁོའི་ཟིལ་དངར་གྱིས། །མཆོག་ཐུན་བཅུད་ལེན་འགྲུབ་གྱུར་ཅིག། །ཅེས་པའང་རྗེ་བཙུན་རྡོ་རྗེ་འཆང་གྲགས་པ་རྒྱལ་མཚན་གྱི་གསུང་རབ་ལ་གསལ་བྱེད་ཅུང་ཟད་དང་བཅས་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་པ་སརྦ་དཱ་སུ་ཤྲེ་ཡོ་བྷ་བ་ཏུ།། །། ༈

[edit]

grub chen nyi ma sbas pa'i lugs kyi sgrol ma spyi sgrub kyi mngon rtogs rnal 'byor nyer mkho/____ @#/_/grub chen nyi ma sbas pa'i lugs kyi sgrol ma spyi sgrub kyi mngon rtogs rnal 'byor nyer mkho zhes bya ba bzhugs so/__/oM swa sti/__bla ma mchog dang dbyer med pa'i/__/rje btsun 'phags mar gus btud nas/__/nyi ma sbas pa'i man ngag bzhin/__/sgrub thabs rnal 'byor nyer mkho bri/__/'di la gsum/__sbyor ba/__dngos gzhi/__rjes so/__/dang po la gnyis/_rgyud sbyang ba dang /__tshogs bsag pa'o/__/dang po ni/__mdun gyi nam mkhar bla ma don yod grub pas dbur brgyan pa'i rje btsun ma skyabs gnas kun 'dus kyi ngo bor mngon sum bzhin du dmigs la 'dun pa rtse gcig pas skyabs sems rgyas bsdus gang rung spyi ltar bya'o/__/gnyis pa la gnyis/__bsod nams kyi tshogs bsag pa dang /__ye shes kyi tshogs bsag pa'o/__/dang po ni/__rang skad cig gis rje btsun ma sgrol mar gsal ba'i snying gar pad+ma dang zla ba'i steng du tA~M ljang gu/__de las 'od zer kha dog sna tshogs 'phros pas mdun gyi nam mkha'i gnas su bla ma dang rje btsun ma 'phags ma sgrol ma la sangs rgyas dang byang chub sems dpa'i tshogs kyis bskor ba oM badz+ra sa mA dzaHsa tshogs zhing spyan drangs/__na mo gu ru b+h+yaHzhes pas bla ma dang /__na maHAR+YA tA rA sa pa ri wA re b+h+yaHsa sgrol ma 'khor bcas la phyag bya/__snying ga'i 'od zer las me tog sogs mchod pa'i tshogs nam mkha' gang bar spros te oM badz+ra puSh+pe AHhU~M sogs kyis mchod/__dkon mchog gsum la bdag skyabs mchi sogs kyis bdun rnam dag bya/__sems can thams cad bde ba dang sogs brjod pas tshad med bzhi bsgom/__gnyis pa ni/__oM shUn+ya tA dz+nyA na badz+ra swa b+hA wa At+ma ko\u0f85haM/__zhes pas gzung 'dzin gyi chos thams cad stong par bsams la blo gzhag go/__/gnyis pa dngos gzhi la gnyis/__lha bsgom pa dang /__sngags bzla ba'o/__/dang po la bzhi las/__dang po dam tshig pa bskyed pa bsnyen pa'i yan lag ni/__de nas byang chub kyi sems rjes su dran pa'i stobs kyis gzugs kyi skur langs la sems can gyi don bya'o bsams pas mtshams sbyar te/__stong pa'i ngang las pa~M las pad+ma dang a las zla ba'i dkyil 'khor gyi steng du tA~M ljang gu las ut+pal tA~M gis mtshan pa/__de las 'od zer 'phros pas 'phags pa mchod/__sems can gyi don byas tshur 'dus nas thim pa'i skad cig la bdag nyid rje btsun ma sgrol ma sku mdog ljang sngon/__phyag g.yas pas mi 'jigs pa ster ba'i skyabs sbyin/__g.yon pas ut+pal bzung ba'i 'dab mas rna bar reg pa/__skra cung zad li ba g.yas su cung zad 'phyang ba/__dar gyi na bzas bklubs shing rin po che'i rgyan du mas brgyan pa/__lang tsho dar la babs pa/__rab tu 'dzum pa'i skur gyur par bsam/__gnyis pa yan lag drug dang sku gsung thugs byin gyis brlab pa nye bar sgrub pa'i yan lag ni/__de'i mig tu oM tA re swA hA dkar po/__rna bar oM tut+tA re swA hA sngon po/__sna la oM tu re swA hA ser po/__lce la oM tu swA hA dmar po/__snying gar oM re swA hA sngon po/__spyi bor oM tA re Ni swA hA ljang gu ste/__de thams cad kyang zla ba'i gdan la gnas pa/__dpral bar oM dkar po/__mgrin par AHdmar po/__thugs ka'i stod du hU~M sngon po/__dbus su pad+ma dang zla ba la gnas pa'i tA~M ljang gu/__gsum pa ye shes pa gzhug pa sgrub pa'i yan lag ni/__de las 'od zer 'phros pas lho phyogs po ta la nas rang 'dra ba'i ye shes sems ma oM badz+ra sa mA dzaH__dzaHhU~M ba~M ho/__gnyis su med par thim/__bzhi pa dbang bskur zhing rgyas 'debs pa sgrub pa chen po'i yan lag ni/__slar yang rang gi thugs ka'i sa bon las 'od zer 'phros pas dbang gi lha rigs lnga 'khor dang bcas pa mdun gyi nam mkhar oM badz+ra sa mA dzaH__oM badz+ra puSh+pe AHhU~M sogs kyis mchod/__de bzhin gshegs pa thams cad kyis bdag la mngon par dbang bskur ba stsal du gsol/__zhes gsol ba btab pas/__ji ltar bltams pa sogs dang /__oM sarba ta thA ga ta a b+hi She ka ta sa ma ya shri ye hU~M/__zhes gsung zhing bum pa'i chus spyi bo nas dbang bskur/__sku gang /__dri ma dag__/chu'i lhag ma yar lud pa las don yod grub pas dbur brgyan par bsams la/__lha'i sku snang stong sgyu ma lta bu la sems yun ring du gzung ngo /__/gnyis pa ni/__bsgoms pas dub na thugs rgyud bskul ba'i phyir bsnyen pa'i rnal 'byor ni/__rang gi snying gar tA~M yig la yi ge bcu pa'i sngags kyis bskor ba la sems gtad/__gsal snang skyes pa na/__de las sku dang sngags phreng 'od zer gyi tshogs bsam gyis mi khyab pa 'phros/__'phags pa mchod/__sems can gyi don byas/__khyad par du rje btsun ma sgrol ma 'khor dang bcas pa'i thugs rgyud bskul/__thugs rje'i byin rlabs nus mthu thams cad 'od zer gyi rnam par tshur 'dus te snying ga'i sa bon sngags phreng dang bcas pa la thim pas rgyud byin gyis brlabs par bsams la/__oM tA re tut+tA re tu re swA hA/__zhes yi ge bcu pa'i sngags ci nus su bzla'o/__/gsum pa ni/__thun de las ldang ba ni/__bcom ldan 'das mas bdag dang sems can thams cad la mchog dang thun mong gi dngos grub ma lus pa stsal du gsol/__zhes 'dod don gsol/__rang gi snying ga nas 'od zer 'phros pas gdan 'od zer gyi rnam par gyur te rang la thim/__dpral bar oM dkar po sogs gnas gsum bsrung /__dge ba 'di yis myur du bdag__/rje btsun sgrol ma 'grub gyur nas sogs bsngo smon gyis mtshams sbyar te spyod lam la 'jug__/thun mtshams su gtor ma btang bar 'dod na ci 'byor pa'i gtor ma dang nang mchod bcas bshams la a mr-i tas bsang /__swa b+hA was sbyangs/__stong pa'i ngang las oM las byung ba'i rin po che las grub pa'i snod yangs shing rgya che ba'i nang du hU~M zhu ba las byung ba'i gtor ma bdud rtsi'i rgya mtsho chen por gyur/__oM AHhU~M ha ho hrIH__rang gi snying ga nas 'od zer 'phros/__'phags ma sgrol ma'i lha tshogs thams cad badz+ra sa mA dzaH__pad+ma ka ma lA ya s+t+waM/__yi ge bcu pa'i mthar a kA ro btags pa lan bdun gyis dbul/__ar+g+haM nas shab+da'i bar gyis phyi mchod/__'bru gsum gyis nang mchod/__lha dang lha min cod pan gyis sogs bstod/__mchod sbyin gtor ma 'di bzhes la sogs 'dod don gsol ba gdab/__yi ge brgya pa'i mthar/__ma 'byor pa dang sogs bzod gsol dang /__rten yod na brtan bzhugs bya/__med na badz+ra muHsa gshegs su gsol/__zhar byung 'jig rten pa'i gtor ma gtang bar 'dod na/__gser la sogs pa'i snod gas chag med pa mdzes pa'i nang du/__'o ma/__mar/__sran chan/__me tog__/'bras yos/__dri zhim zhing srog chags med pa'i chu/__khur ba/__sha btsos/__chang la sogs pa blugs te/__ma 'byor na ni zan dang chu gtsang la sogs pa ci tsam 'byor pa la bya'o/__/de nas bdag nyid sgrol ma'i nga rgyal dang ldan pas oM AHhU~M zhes brjod pas snod rgya che ba'i 'jig rten gyi khams thams cad gang ba/__bcud bdud rtsi'i ngo bos gang bar bsam la/__oM a kA ro'i sngags lan gsum brjod cing se gol gsum gtogs pas phyogs skyong bcus gtso byas pa'i rigs drug thams cad tshim par bsam/__mchod sbyin gtor ma 'di bzhes sogs kyis phrin las gzhol/__gtor ma dben pa'i gnas su btang bar bya'o/__/de lta bu'i rim pas thun bzhi'i rnal 'byor la bslab cing /__bsnyen pa 'bum phrag bcu gsum bzlas pas las tshogs rab 'byams bsgrub pa la dbang ba yin no/__/klu sgrub nyi ma sbas pa yi/__/man ngag 'phags ma sgrub pa'i thabs/__/rnal 'byor nyer mkho'i zil dngar gyis/__/mchog thun bcud len 'grub gyur cig/__/ces pa'ang rje btsun rdo rje 'chang grags pa rgyal mtshan gyi gsung rab la gsal byed cung zad dang bcas 'jam dbyangs bla ma dgyes pa'i 'bangs mkhyen brtse'i dbang pos bris pa sarba dA su shre yo b+ha ba tu//___//__!