JKW-KABUM-10-THA-001-001

From Khyentse Lineage - A Tsadra Foundation Project

‎‎

ཁ་ཆེའི་པཎ་ཆེན་ལུགས་ཀྱི་སྒྲོལ་དཀར་རྗེས་གནང་ལས་ཚོགས་དང་བཅས་པ་བདུད་རྩིའི་ཐིག་ལེ།
Wylie title kha che'i paN chen lugs kyi sgrol dkar rjes gnang las tshogs dang bcas pa bdud rtsi'i thig le JKW-KABUM-10-THA-001.pdf
Location mkhyen brtse'i bka' 'bum
Volume 10, sde tshan 1, Text 1, Pages 1-9 (Folios 1a to 5a1)
Author འཇམ་དབྱངས་མཁྱེན་བརྩེའི་དབང་པོ་
Less details More details
Associated People ཁ་ཆེ་པཎ་ཆེན་ཤཱཀྱ་ཤྲཱི་ (Śākyaśrībhadra)
Citation 'jam dbyangs mkhyen brtse'i dbang po. kha che'i paN chen lugs kyi sgrol dkar rjes gnang las tshogs dang bcas pa bdud rtsi'i thig le. In 'jam dbyangs mkhyen brtse'i dbang po'i bka' 'bum, Vol. 10: 1-9. Khams sde dge rdzong sar dgon: Rdzong sar blo gros phun tshogs, 2020.
Genre Activity Manual - las byang  ·  Permission to Invoke (anujñā) - rjes gnang  ·  Sadhanas - Evocation Ritual - sgrub thabs  ·  Activity Practices - las tshogs
Cycle སྒྲོལ་དཀར་ཁ་ཆེ་པཎ་ཆེན་ལུགས་ (sgrol dkar kha che pan chen lugs)
Deity sgrol ma dkar mo
Colophon

།ཅེས་པའང་གཞུང་རྙིང་པའི་དོན་སྙིང་པོར་དྲིལ་ཏེ་འཇམ་དབྱངས་མཁྱེན་བརྩེའི་དབང་པོས་བྲིས་པ་དགེ་ལེགས་སུ་གྱུར་ཅིག

ces pa'ang gzhung rnying pa'i don snying por dril te 'jam dbyangs mkhyen brtse'i dbang pos bris pa dge legs su gyur cig

[edit]
༄༅། །པཎ་ཆེན་ཤཱཀྱ་ཤྲཱིའི་ལུགས་ཀྱི་སྒྲོལ་མ་དཀར་མོའི་སྒྲུབ་ཐབས་རྗེས་གནང་ལས་ཚོགས་དང་བཅས་པ་བདུད་རྩིའི་ཐིག་ལེ་ཞེས་བྱ་བ་བཞུགས་སོ།། །། ཨོཾ་སྭསྟི། འཆི་མེད་གྲུབ་སྟེར་འཕགས་མ་ལ། །བཏུད་ནས་དེ་ཡི་སྒྲུབ་ཐབས་དང་། །རྗེས་གནང་ལས་ཚོགས་དང་བཅས་པ། །བདུད་རྩིའི་ཐིག་ལེ་ཅུང་ཟད་སྤྲོ། །འདི་ལ་གསུམ། སྒྲུབ་ཐབས། རྗེས་གནང་། ལས་ཚོགས་སོ། །དང་པོ་ནི། མདུན་གྱི་ནམ་མཁར་སྐྱབས་ཡུལ་རྣམས་མངོན་སུམ་བཞིན་དུ་བཞུགས་པའི་སྤྱན་སྔར། འགྲོ་རྣམས་བསྒྲལ་འདོད་བསམ་པ་ཡིས། །སངས་རྒྱས་ཆོས་དང་དགེ་འདུན་ལ། །བྱང་ཆུབ་སྙིང་པོར་མཆིས་ཀྱི་བར། །རྟག་པར་བདག་ནི་སྐྱབས་སུ་མཆི། །ཞེས་སྐྱབས་འགྲོ་དང་། ཤེས་རབ་སྙིང་བརྩེ་དང་བཅས་པའི། །བརྩོན་པས་སེམས་ཅན་དོན་དུ་བདག །སངས་རྒྱས་མདུན་དུ་གནས་བཅས་ཏེ། །རྫོགས་པའི་བྱང་ཆུབ་སེམས་བསྐྱེད་བགྱི། །ཞེས་སེམས་བསྐྱེད། ཨོཾ་སྭ་བྷཱ་ཝ་བི་ཤུདྡྷཿསརྦ་དྷརྨཱཿསྭ་བྷཱ་ཝ་བི་ཤུདྡྷོ྅ཧཾ། སྟོང་པའི་ངང་ལས་འོ་མའི་རྒྱ་མཚོའི་དབུས་སུ་པྃ་ལས་པདྨའི་སྡོང་པོ། དེའི་དབུས་སུ་པད་དཀར་འདབ་བརྒྱད་རབ་ཏུ་རྒྱས་པའི་ལྟེ་བར། ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཏཱྃ་ལས་རང་ཉིད་འཕགས་མ་སྒྲོལ་མ་སྐུ་མདོག་དཀར་མོ་ཞལ་གཅིག་ཕྱག་གཉིས་མ། འོད་དཔག་མེད་སྤྲུལ་སྐུའི་རྣམ་པའི་དབུ་རྒྱན་ཅན། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། ཕྱག་གཡས་མཆོག་སྦྱིན་གྱི་ཕྱག་རྒྱ་དང་། གཡོན་ཨུཏྤལ་དཀར་པོའི་ཡུ་བ་ཐུགས་ཀར་འཛིན་ཅིང་། འདབ་མ་སྙན་གྱི་ཐད་ཀར་ཁ་བྱེ་བ། བཅུ་དྲུག་ལོན་པའི་ན་ཚོད་ཅན། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། འོད་ཟེར་དཔག་ཏུ་མེད་པ་འཕྲོ་བའི་སྐུ་ཅན་དུ་གྱུར། འདབ་མ་བརྒྱད་ལ་ལུས་དང་གྲིབ་མའི་ཚུལ་དུ་རང་འདྲ་བའི་སྒྲོལ་མ་དཀར་མོ་བརྒྱད་ཞལ་ནང་དུ་བསྟན་པ་འཁོར་གྱི་ཚུལ་ཅན། རང་གི་ཐུགས་ཀར་ཨ་ལས་ཟླ་བ་ལ་ཏཱྃ་དཀར་པོ། དེ་ལས་འོད་ཟེར་འཕྲོས། ཡེ་ཤེས་སེམས་དཔའ་བཛྲ་ས་མཱ་ཛཿས་སྤྱན་དྲང་། ཛཿཧཱུྃ་བྃ་ཧོཿ གཉིས་སུ་མེད་པར་ཐིམ། ཐུགས་ཀའི་ས་བོན་གྱི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་འཕྲོས། །འཕགས་པ་མཆོད། སེམས་ཅན་གྱི་དོན་བྱས། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཐུགས་རྗེ་བྱིན་རླབས་ནུས་མཐུ་ཐམས་ཅད་དང་། ཁམས་གསུམ་གྱི་བརྟན་གཡོའི་དྭངས་བཅུད་མ་ལུས་པ་སྤྱན་དྲངས། སྤྱི་བོའི་རིགས་བདག་འོད་དཔག་མེད་པའི་ཕྱག་གི་ལྷུང་བཟེད་ཀྱི་ནང་དུ་སོང་། དེ་ལས་བདུད་རྩིའི་རྒྱུན་ལུད། རང་གི་ཚངས་པའི་བུ་ག་ནས་ཞུགས་པ་དང་ལྷན་ཅིག་ཏུ། སྙིང་གའི་སྔགས་ཕྲེང་ལས་ཀྱང་བདུད་རྩིའི་རྒྱུན་དཔག་ཏུ་མེད་པ་བབས་པས་ལུས་ཀྱི་ནང་གང་། དུས་མ་ཡིན་པའི་འཆི་བ་སྦྱངས། འཆི་མེད་ཚེའི་དངོས་གྲུབ་ཐོབ། འཁོར་གྱི་ལྷ་མོ་རྣམས་ཀྱིས་ཀྱང་སྔགས་ཀྱི་སྒྲ་དི་རི་རི་སྒྲོག་པར་གྱུར་པའི་མོས་པས། ཨོཾ་ཨ་མཱ་ར་ཎི་ཛཱི་བནྟི་ཡེ་སྭཱ་ཧཱ། ཞེས་ཚེ་འཛིན་ཅིང་གནས་པར་བྱེད་པའི་གསང་སྔགས་འདི་བཟླས་པའི་སྐྱོན་དང་བྲལ་བས་འབུམ་ཕྲག་བཅུ་གཅིག་སོགས་བཟླ་བ་ནི་བསྙེན་པ་ཡིན་ལ། ཐུན་བསྡུ་བའི་ཚེ། བཅོམ་ལྡན་འདས་མ་སྒྲོལ་མས་བདག་དང་སེམས་ཅན་ཐམས་ཅད་ཀྱི་ཚེའི་བར་ཆད་ཞི་བར་མཛད་དུ་གསོལ། ཚེ་དང་བསོད་ནམས་ཡེ་ཤེས་ཀྱི་ཚོགས་འཕེལ་བར་མཛད་དུ་གསོལ། ཞེས་གསོལ་བ་བཏབ། ལྷ་སྐུའི་གསལ་སྣང་འོད་གསལ་གྱི་དབྱིངས་སུ་ཐིམ་པར་བསམས་ལ་མཉམ་པར་བཞག །དེ་ལས་ལྡང་བ་ན། དགེ་བ་འདི་ཡིས་མྱུར་དུ་བདག །རྗེ་བཙུན་སྒྲོལ་མ་འགྲུབ་གྱུར་ནས། །ཞེས་སོགས་བསྔོ་སྨོན་བྱས་ཏེ་སྤྱོད་ལམ་ལ་འཇུག་གོ །གཉིས་པ་ནི། སྐྱབས་སེམས་ནས་བརྩམས་བདག་མདུན་བུམ་པ་སྒྲུབ་པའི་ཚུལ་དང་། རྗེས་གནང་གི་ཆིངས་རྣམས་ཁོ་བོས་བྱས་པའི་པཎ་ཆེན་ལུགས་ཀྱི་སྒྲོལ་མ་ལྗང་གུའི་ཡིག་ཆ་བདུད་རྩིའི་སྙེ་མ་གཞིར་བཞག་ལ། ལྷ་སྔགས་ཀྱི་འབྱིན་འཇུག་མ་འཁྲུལ་བར་སྦྱར། མཚམས་སྦྱོར་གྱི་ཁྱད་པར། དེ་ལ་འདིར་འཆི་མེད་ཚེ་དང་ཡེ་ཤེས་ཀྱི་དངོས་གྲུབ་སྟེར་བའི་ལྷག་པའི་ལྷ་ཁྱད་པར་ཅན་རྗེ་བཙུན་སྒྲོལ་མ་དཀར་མོའི་སྐོར་ལ་བཀའ་སྲོལ་གྱི་རིམ་པ་མང་དུ་བཞུགས་པ་ལས་སྐབས་སུ་བབས་པ་ནི། འཇམ་དཔལ་དཔའ་བོ་གྲུབ་པའི་རྒྱུད་ལས། སྔགས་ཀྱི་རྒྱལ་པོ་འདི་བཟླས་ན་ལས་ཐམས་ཅད་བྱེད་པར་འགྱུར་རོ། །ཞེས་སོགས་དང་། རྟག་ཏུ་བཟླས་བརྗོད་བྱས་ན་ཚེ་ལོ་བརྒྱ་ཐུབ་པར་འགྱུར་རོ། །ཞེས་སོགས་རྒྱ་ཆེར་བསྔགས་པའི་འཆི་བ་མེད་པ་སྲོག་གི་གཞི་འཛིན་པར་བྱེད་པའི་གསང་སྔགས་ཀྱི་རྒྱལ་པོ་དང་། འཕགས་མའི་བསམ་གཏན་ལ་བརྟེན་ནས་ཚེ་སྒྲུབ་པའི་རིམ་པ་མ་བྱོན་སངས་རྒྱས་རབ་གསལ་གྱི་རྣམ་འཕྲུལ་ཁ་ཆེའི་པཎྜི་ཏ་ཆེན་པོ་ཤཱཀྱ་ཤྲཱི་བྷཱ་དྲའི་ཐུགས་དམ་ཞལ་གཟིགས་ཀྱི་གདམས་པ་ཟབ་མོའི་རྗེས་སུ་གནང་བ་བསྒྲུབ་པ་ལ་སོགས་སྦྲེལ། ཡེ་ཤེས་པ་བསྟིམས་པའི་རྗེས། དེ་བརྟན་པར་བྱ་བའི་སླད་དུ་བུམ་པའི་ཆུས་ཀྱང་དབང་བསྐུར་བའི་མོས་པ་མཛོད། ཅེས་བརྡ་སྦྱར་ལ་སྔགས་ཀྱིས་དབང་བསྐུར་བ་ཙམ་ལས་རིགས་བདག་གི་རྒྱས་འདེབས་མི་དགོས། གཞན་འདྲའོ། །གསུམ་པ་ལ། བུམ་ཆོག་སྔགས་མདུད་འཁྲུལ་འཁོར་དང་། །སྦྱིན་སྲེག་བཅུད་ལེན་བསྒྲུབ་པའོ། །ཞེས་པ་ལྟར་ལྔ་ལས། དང་པོ་ནི། བུམ་རྫས་སྤྱི་དང་བཅུད་ལེན་གྱི་སྨན་ཅི་རིགས་པས་གཏམས་པའི་བུམ་པ་སྒྲུབ་ཚུལ་སྒྲོལ་མ་ལྗང་མོའི་སྐབས་སུ་སྨོས་པ་བཞིན་སྦྱར། དེ་ལྟ་བུའི་བུམ་ཆུ་ཁོང་དུ་བཏུང་བ་དང་། བཀྲུ་བྱབས་སོགས་བགྱིས་པས་ནད་ཞི་བ་དང་། ཚེ་བསྲིང་བ་དང་། སྲིའུ་གསོ་བ་སོགས་ལ་མཆོག་ཏུ་བསྔགས་ཤིང་། བུམ་པའི་ཆུས་རིལ་བུར་བགྱིས་པས་ཀྱང་རུང་ངོ་། གཉིས་པ་ནི། གཞོན་ནུ་མས་བཀལ་བའི་སྐུད་པའམ། དར་དཀར་པོ་ལ་རྡོ་རྗེའི་མདུད་པ་བྱ་ཞིང་སྔགས་མཆིལ་གྱིས་བཏབ་པ་བཅིངས་པས་ནད་གདོན་སྲུང་ཞིང་ཞི་བར་བྱེད་དོ། །གསུམ་པ་ནི། གྲོ་ག་འམ་ཤོག་བུ་ལ་འཁོར་ལོ་རྩིབས་བརྒྱད་ལྟེ་བ་མུ་ཁྱུད་དང་བཅས་བྲིས་པའི་དབུས་སུ་ཏཱྃ། དེའི་མཐར། ཨོཾ་མ་མ་ཨཱ་ཡུར་པུཎྱེ་ཛྙཱ་ན་པུཥྟིཾ་ཀུ་རུ་སྭཱ་ཧཱ་ཞེས་པ་ལྟ་བུའི་སྤེལ་ཚིག་ཨོཾ་དང་སྭཱ་ཧཱའི་བར་དུ་ཆུད་པས་བསྐོར། རྩིབས་བརྒྱད་ལ་ཨ། མཱ། ར། ཎི། ཛཱི། བ། ནྟི། ཡེ། ཞེས་བྲི། མུ་ཁྱུད་ལ་སྒྲོལ་མའི་སྔགས་རིང་དང་དབྱངས་གསལ་རྟེན་སྙིང་གིས་བསྐོར། དེའི་རྒྱབ་ཏུ་རྡོ་ར་མེ་རི་སོགས་བྲིས་ཀྱང་རུང་། དྲི་ཞིམ་པའི་སྨན་གྱིས་བྱུགས་ལ་རབ་ཏུ་གནས་ཏེ་མགུལ་དུ་འཆང་བས་མ་བསྒྲུབས་ཀྱང་ལས་ཐམས་ཅད་འགྲུབ་པར་འགྱུར་རོ། །བཞི་པ་ནི། འཇམ་དཔལ་རྩ་རྒྱུད་ལས། རྩྭ་དཱུརྦའི་འཇག་མ་ལ་ཞོ་དང་སྦྲང་རྩི་མར་གྱིས་ངར་བཏགས་པ་སྟོང་རྩ་བརྒྱད་ཀྱིས་ནུབ་བཅུའི་བར་དུ་སྦྱིན་སྲེག་བྱས་ན་དུས་མ་ཡིན་པའི་འཆི་བ་རབ་ཏུ་ཞི་ཞིང་ཚེ་རིང་བར་འགྱུར་རོ། །ཞེས་གསུངས་པ་ལྟར་རྒྱས་པའི་སྦྱིན་སྲེག་གི་ཆིངས་རྒྱས་བསྡུས་གང་རུང་དང་སྦྱར་ནས། བསྲེག་རྫས་ཀྱི་གཙོ་བོ་གོང་དུ་སྨོས་པ་ལྟར་ཕུལ་བས་ཚེ་བསྲིང་བའི་མཆོག་ཏུ་གསུངས་སོ། །ལྔ་པ་ནི། བཅུད་ལེན་ཐམས་ཅད་ལའང་སྔགས་འདིས་གདབ་པར་གསུངས་པས། ཚུལ་བཞིན་བསྒྲུབས་པའི་བུམ་ཆུ་དང་། བཅུད་ལེན་གྱི་སྨན་གང་ཡང་རུང་བའམ། སྤྱིར་བཏང་དུ། འབྲས་བུ་གསུམ་དང་། ར་མོ་ཤག་བཅས་སྦྱར་བའི་རིལ་བུ་རིན་པོ་ཆེའི་སྣོད་དུ་བླུགས། བདག་བསྐྱེད་སྔོན་དུ་འགྲོ་བས། རིལ་བུའི་སྟེང་དུ་ཟླ་བ་ལ་སྔགས་ཀྱི་ཕྲེང་བས་མཚན་པ། དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཐུགས་རྗེ་བྱིན་རླབས་ནུས་མཐུ་ཐམས་ཅད་དང་། ཁམས་གསུམ་གྱི་བརྟན་གཡོའི་དྭངས་བཅུད་མ་ལུས་པ་བསྡུས་ཏེ་སྔགས་ཕྲེང་ལ་ཐིམ། དེ་ལས་བདུད་རྩིའི་རྒྱུན་བབས་པས་རིལ་བུ་ལ་ཐིམ་པར་གྱུར་པའི་མོས་པས་སྔགས་བཟླ། མཐར་སྔགས་ཕྲེང་གདན་དང་བཅས་པ་འོད་དུ་ཞུ་ནས་རིལ་བུ་ལ་ཐིམ་པས་བཅུད་ལེན་གྱི་རིལ་བུ་འོད་འབར་བའི་རྣམ་པར་བསམས་ལ་རྟེན་སྙིང་དང་ཤིས་བརྗོད་བཅས་མེ་ཏོག་འཐོར། དེ་ཉིད་ཚུལ་བཞིན་བསྟེན་པས་ཚེ་དང་ལུས་ཀྱི་བཅུད་ལེན་མཆོག་ཏུ་གྲུབ་པར་འགྱུར་རོ། །མན་ངག་ཆུ་གཏེར་བསྲུབས་པའི་ཕུལ། །གདམས་ཟབ་བདུད་རྩིའི་ཐིག་ལེ་ཡིས། །འགྲོ་ཀུན་ཚེ་དང་ཡེ་ཤེས་ཀྱི། །སྣང་བས་རྟག་ཏུ་མཛེས་གྱུར་ཅིག །ཅེས་པའང་གཞུང་རྙིང་པའི་དོན་སྙིང་པོར་དྲིལ་ཏེ་འཇམ་དབྱངས་མཁྱེན་བརྩེའི་དབང་པོས་བྲིས་པ་དགེ་ལེགས་སུ་གྱུར་ཅིག། ། ༈
[edit]

kha che'i paN chen lugs kyi sgrol dkar rjes gnang las tshogs dang bcas pa bdud rtsi'i thig le/__ @#/__/paN chen shAkya shrI'i lugs kyi sgrol ma dkar mo'i sgrub thabs rjes gnang las tshogs dang bcas pa bdud rtsi'i thig le zhes bya ba bzhugs so//__// oM swasti/__'chi med grub ster 'phags ma la/__/btud nas de yi sgrub thabs dang /__/rjes gnang las tshogs dang bcas pa/__/bdud rtsi'i thig le cung zad spro/__/'di la gsum/__sgrub thabs/__rjes gnang /__las tshogs so/__/dang po ni/__mdun gyi nam mkhar skyabs yul rnams mngon sum bzhin du bzhugs pa'i spyan sngar/__'gro rnams bsgral 'dod bsam pa yis/__/sangs rgyas chos dang dge 'dun la/__/byang chub snying por mchis kyi bar/__/rtag par bdag ni skyabs su mchi/__/zhes skyabs 'gro dang /__shes rab snying brtse dang bcas pa'i/__/brtson pas sems can don du bdag__/sangs rgyas mdun du gnas bcas te/__/rdzogs pa'i byang chub sems bskyed bgyi/__/zhes sems bskyed/__oM swa b+hA wa bi shud+d+haHsarba d+harmAHswa b+hA wa bi shud+d+ho\u0f85haM/__stong pa'i ngang las 'o ma'i rgya mtsho'i dbus su pa~M las pad+ma'i sdong po/__de'i dbus su pad dkar 'dab brgyad rab tu rgyas pa'i lte bar/__a las zla ba'i dkyil 'khor gyi steng du tA~M las rang nyid 'phags ma sgrol ma sku mdog dkar mo zhal gcig phyag gnyis ma/__'od dpag med sprul sku'i rnam pa'i dbu rgyan can/__zhabs rdo rje'i skyil mo krung gis bzhugs pa/__phyag g.yas mchog sbyin gyi phyag rgya dang /__g.yon ut+pal dkar po'i yu ba thugs kar 'dzin cing /__'dab ma snyan gyi thad kar kha bye ba/__bcu drug lon pa'i na tshod can/__dar dang rin po che'i rgyan thams cad kyis brgyan pa/__'od zer dpag tu med pa 'phro ba'i sku can du gyur/__'dab ma brgyad la lus dang grib ma'i tshul du rang 'dra ba'i sgrol ma dkar mo brgyad zhal nang du bstan pa 'khor gyi tshul can/__rang gi thugs kar a las zla ba la tA~M dkar po/__de las 'od zer 'phros/__ye shes sems dpa' badz+ra sa mA dzaHsa spyan drang /__dzaHhU~M ba~M hoH__gnyis su med par thim/__thugs ka'i sa bon gyi mthar sngags kyi phreng bas bskor ba las 'od zer 'phros/__/'phags pa mchod/__sems can gyi don byas/__sangs rgyas dang byang chub sems dpa' rnams kyi thugs rje byin rlabs nus mthu thams cad dang /__khams gsum gyi brtan g.yo'i dwangs bcud ma lus pa spyan drangs/__spyi bo'i rigs bdag 'od dpag med pa'i phyag gi lhung bzed kyi nang du song /__de las bdud rtsi'i rgyun lud/__rang gi tshangs pa'i bu ga nas zhugs pa dang lhan cig tu/__snying ga'i sngags phreng las kyang bdud rtsi'i rgyun dpag tu med pa babs pas lus kyi nang gang /__dus ma yin pa'i 'chi ba sbyangs/__'chi med tshe'i dngos grub thob/__'khor gyi lha mo rnams kyis kyang sngags kyi sgra di ri ri sgrog par gyur pa'i mos pas/__oM a mA ra Ni dzI ban+ti ye swA hA/__zhes tshe 'dzin cing gnas par byed pa'i gsang sngags 'di bzlas pa'i skyon dang bral bas 'bum phrag bcu gcig sogs bzla ba ni bsnyen pa yin la/__thun bsdu ba'i tshe/__bcom ldan 'das ma sgrol mas bdag dang sems can thams cad kyi tshe'i bar chad zhi bar mdzad du gsol/__tshe dang bsod nams ye shes kyi tshogs 'phel bar mdzad du gsol/__zhes gsol ba btab/__lha sku'i gsal snang 'od gsal gyi dbyings su thim par bsams la mnyam par bzhag__/de las ldang ba na/__dge ba 'di yis myur du bdag__/rje btsun sgrol ma 'grub gyur nas/__/zhes sogs bsngo smon byas te spyod lam la 'jug go__/gnyis pa ni/__skyabs sems nas brtsams bdag mdun bum pa sgrub pa'i tshul dang /__rjes gnang gi chings rnams kho bos byas pa'i paN chen lugs kyi sgrol ma ljang gu'i yig cha bdud rtsi'i snye ma gzhir bzhag la/__lha sngags kyi 'byin 'jug ma 'khrul bar sbyar/__mtshams sbyor gyi khyad par/__de la 'dir 'chi med tshe dang ye shes kyi dngos grub ster ba'i lhag pa'i lha khyad par can rje btsun sgrol ma dkar mo'i skor la bka' srol gyi rim pa mang du bzhugs pa las skabs su babs pa ni/__'jam dpal dpa' bo grub pa'i rgyud las/__sngags kyi rgyal po 'di bzlas na las thams cad byed par 'gyur ro/__/zhes sogs dang /__rtag tu bzlas brjod byas na tshe lo brgya thub par 'gyur ro/__/zhes sogs rgya cher bsngags pa'i 'chi ba med pa srog gi gzhi 'dzin par byed pa'i gsang sngags kyi rgyal po dang /__'phags ma'i bsam gtan la brten nas tshe sgrub pa'i rim pa ma byon sangs rgyas rab gsal gyi rnam 'phrul kha che'i paN+Di ta chen po shAkya shrI b+hA dra'i thugs dam zhal gzigs kyi gdams pa zab mo'i rjes su gnang ba bsgrub pa la sogs sbrel/__ye shes pa bstims pa'i rjes/__de brtan par bya ba'i slad du bum pa'i chus kyang dbang bskur ba'i mos pa mdzod/__ces brda sbyar la sngags kyis dbang bskur ba tsam las rigs bdag gi rgyas 'debs mi dgos/__gzhan 'dra'o/__/gsum pa la/__bum chog sngags mdud 'khrul 'khor dang /__/sbyin sreg bcud len bsgrub pa'o/__/zhes pa ltar lnga las/__dang po ni/__bum rdzas spyi dang bcud len gyi sman ci rigs pas gtams pa'i bum pa sgrub tshul sgrol ma ljang mo'i skabs su smos pa bzhin sbyar/__de lta bu'i bum chu khong du btung ba dang /__bkru byabs sogs bgyis pas nad zhi ba dang /__tshe bsring ba dang /__sri'u gso ba sogs la mchog tu bsngags shing /__bum pa'i chus ril bur bgyis pas kyang rung ngo /__gnyis pa ni/__gzhon nu mas bkal ba'i skud pa'am/__dar dkar po la rdo rje'i mdud pa bya zhing sngags mchil gyis btab pa bcings pas nad gdon srung zhing zhi bar byed do/__/gsum pa ni/__gro ga 'am shog bu la 'khor lo rtsibs brgyad lte ba mu khyud dang bcas bris pa'i dbus su tA~M/__de'i mthar/__oM ma ma A yur puN+ye dz+nyA na puSh+tiM ku ru swA hA zhes pa lta bu'i spel tshig oM dang swA hA'i bar du chud pas bskor/__rtsibs brgyad la a/__mA/__ra/__Ni/__dzI/__ba/__n+ti/__ye/__zhes bri/__mu khyud la sgrol ma'i sngags ring dang dbyangs gsal rten snying gis bskor/__de'i rgyab tu rdo ra me ri sogs bris kyang rung /__dri zhim pa'i sman gyis byugs la rab tu gnas te mgul du 'chang bas ma bsgrubs kyang las thams cad 'grub par 'gyur ro/__/bzhi pa ni/__'jam dpal rtsa rgyud las/__rtswa dUrba'i 'jag ma la zho dang sbrang rtsi mar gyis ngar btags pa stong rtsa brgyad kyis nub bcu'i bar du sbyin sreg byas na dus ma yin pa'i 'chi ba rab tu zhi zhing tshe ring bar 'gyur ro/__/zhes gsungs pa ltar rgyas pa'i sbyin sreg gi chings rgyas bsdus gang rung dang sbyar nas/__bsreg rdzas kyi gtso bo gong du smos pa ltar phul bas tshe bsring ba'i mchog tu gsungs so/__/lnga pa ni/__bcud len thams cad la'ang sngags 'dis gdab par gsungs pas/__tshul bzhin bsgrubs pa'i bum chu dang /__bcud len gyi sman gang yang rung ba'am/__spyir btang du/__'bras bu gsum dang /__ra mo shag bcas sbyar ba'i ril bu rin po che'i snod du blugs/__bdag bskyed sngon du 'gro bas/__ril bu'i steng du zla ba la sngags kyi phreng bas mtshan pa/__de las 'od zer 'phros/__'phags pa mchod/__sems can gyi don byas/__sangs rgyas dang byang chub sems dpa' rnams kyi thugs rje byin rlabs nus mthu thams cad dang /__khams gsum gyi brtan g.yo'i dwangs bcud ma lus pa bsdus te sngags phreng la thim/__de las bdud rtsi'i rgyun babs pas ril bu la thim par gyur pa'i mos pas sngags bzla/__mthar sngags phreng gdan dang bcas pa 'od du zhu nas ril bu la thim pas bcud len gyi ril bu 'od 'bar ba'i rnam par bsams la rten snying dang shis brjod bcas me tog 'thor/__de nyid tshul bzhin bsten pas tshe dang lus kyi bcud len mchog tu grub par 'gyur ro/__/man ngag chu gter bsrubs pa'i phul/__/gdams zab bdud rtsi'i thig le yis/__/'gro kun tshe dang ye shes kyi/__/snang bas rtag tu mdzes gyur cig__/ces pa'ang gzhung rnying pa'i don snying por dril te 'jam dbyangs mkhyen brtse'i dbang pos bris pa dge legs su gyur cig/___/_!_

Footnotes[edit]

Other Information[edit]