JKW-KABAB-19-DZA-009

Previous Text Back to Volume PageNext Text

རྟ་མཆོག་རོལ་པའི་སྙིང་ཏིག །སློབ་དཔོན་ནཱ་གརྫུ་ནའི་དགོངས་པའོ།

Wylie title	rta mchog rol pa'i snying tig slob dpon nA gardzu na'i dgongs pa'o
Location	mkhyen brtse'i bka' babs Volume 19, Text 9, Pages 203-219 (Folios 1a to 9a4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Associated People	སློབ་དཔོན་ཆེན་པོ་ནཱ་གརྫུ་ན་ (Nāgārjuna)
Citation	'jam dbyangs mkhyen brtse'i dbang po. rta mchog rol pa'i snying tig slob dpon nA gardzu na'i dgongs pa'o. In Rdzong sar 'jam dbyangs mkhyen brtse'i dbang po'i bka' babs, Vol. 19: 203-219. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Revelations - gter ma  ·  Root Treasure - gter gzhung
Cycle	རྟ་མཆོག་རོལ་པའི་སྙིང་ཏིག་ (rta mchog rol pa'i snying tig)
Deity	rta mgrin
Karchag page	JKW-KABAB-Volume-19-DZA-Karchag
RTZ	In the Rinchen Terdzö: https://rtz.tsadra.org/index.php/Terdzo-LA-026
Colophon	ཞེས་པའང༌། སློབ་དཔོན་ཆེན་པོ་ནཱ་གརྫུ་ནས་བྱིན་གྱིས་བརླབས་ཤིང༌། གུ་རུ་པདྨ་རྒྱལ་པོས་རྗེས་སུ་གདམས་པ་ལྟར། རྡོ་རྗེའི་ལུང་གིས་བསྔགས་པའི་སྐྱེས་བུ་མཆོག་རྣམས་ཀྱི་གཙོས་ལས་ལྡན་གྱི་སློབ་མ་རྣམས་ལ་ཕན་པའི་བསམ་པས། སྦས་ཡུལ་ཆེན་པོ་ཨ་ཏ་རོང་གནས་ཀྱི་སྙིང་པོ་བཀྲ་ཤིས་དཔལ་གྱི་རི་བོའི་གནས་ཞལ་གསར་དུ་སྣང་བར་མཛད་པའི་སྐབས། གཏེར་ཆེན་བླ་མ་འགྲོ་འདུལ་མཆོག་གྱུར་བདེ་ཆེན་ཞིག་པོ་གླིང་པ་སྟོན་འཁོར་རྣམས་ཀྱི་སྤྱན་སྔར་རས་དཀར་གྱི་གུར་ཁྱིམ་ལ་བརྟེན་པའི་སྨན་ལྗོངས་ཉམས་དགའ་བར་པདྨ་འོད་གསལ་མདོ་སྔགས་གླིང་པས་སྐད་ཅིག་གིས་གཏན་ལ་ཕབས་པའི་ལེགས་བྱས་ཀྱིས་བསྟན་འཛིན་མཆོག་རྣམས་ཞབས་པད་བརྟན་ཅིང༌། བསྟན་འགྲོའི་ཕན་བདེའི་དགེ་མཚན་ལྷུན་གྱིས་གྲུབ་པའི་རྒྱུར་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ།།
	zhes pa'ang/__slob dpon chen po nA gardzu nas byin gyis brlabs shing/__gu ru pad+ma rgyal pos rjes su gdams pa ltar/__rdo rje'i lung gis bsngags pa'i skyes bu mchog rnams kyi gtsos las ldan gyi slob ma rnams la phan pa'i bsam pas/__sbas yul chen po a ta rong gnas kyi snying po bkra shis dpal gyi ri bo'i gnas zhal gsar du snang bar mdzad pa'i skabs/__gter chen bla ma 'gro 'dul mchog gyur bde chen zhig po gling pa ston 'khor rnams kyi spyan sngar ras dkar gyi gur khyim la brten pa'i sman ljongs nyams dga' bar pad+ma 'od gsal mdo sngags gling pas skad cig gis gtan la phabs pa'i legs byas kyis bstan 'dzin mchog rnams zhabs pad brtan cing/___bstan 'gro'i phan bde'i dge mtshan lhun gyis grub pa'i rgyur gyur cig__/sarba dA ka l+yA NaM b+ha ba tu

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

༁ྃ༔ རྟ་མཆོག་རོལ་པའི་སྙིང་ཏིག་བཞུགས༔སློབ་དཔོན་ནཱ་གརྫུ་ནའི་དགོངས་པའོ།

༁ྃ༔ རྡོ་རྗེ་རྟ་ཡི་རྒྱལ་པོར་འདུད༔ གནས་ལུགས་རྟ་ཡི་མགྲིན་པ་ཅན༔ ཐབས་གྲོལ་ལམ་གྱི་མཆོག་ཏུ་སྣང་༔ འབྲས་བུ་མཐར་ཕྱིན་རོལ་པ་ཡིས༔ འགྲོ་འདུལ་ཕྲིན་ལས་ལྷུན་གྱིས་གྲུབ༔ ས་མ་ཡ༔ དེ་ཉིད་ཉམས་སུ་བླང་བའི་སླད༔ པདྨ་དབང་གི་སྤྱི་བོ་ནས༔ མྱུར་མགྱོགས་ཤུགས་ལྡན་གདོང་པ་ཡིས༔ ཨི་ཧིའི་རྟ་དབྱངས་མཚེར་བ་ལས༔ དང་པོར་གནས་ལུགས་སྟོང་པ་ཉིད༔ ལྟ་བ་གཏན་ལ་འབེབས་པའི་ཕྱིར༔ ངེས་འབྱུང་དང་ནི་སྙིང་རྗེ་བསྐྱེད༔ སྐྱབས་སོང་བྱང་ཆུབ་སེམས་བསྐྱེད་ནས༔ སྣོད་དུ་རུང་བའི་སློབ་མ་ལ༔ རིམ་པ་དབང་གིས་སྨིན་པའི་ཕྱིར༔ དཀྱིལ་འཁོར་དམར་ནག་མཚན་རྫོགས་བཞེངས༔ བརྡ་ཡི་དབང་རྫས་ཐམས་ཅད་དགྲམ༔ ཁྱད་པར་རྟ་ཞལ་སྔགས་མཚན་པ༔ དལ་གྱི་དབུས་སུ་བརྟན་པར་བཞུགས༔ བདག་མདུན་བསྐྱེད་བཟླས་ནུས་ལྡན་བྱ༔ བདག་ཉིད་འཇུག་ཅིང་སློབ་མ་རྣམས༔ དག་པ་བདུད་རྩིའི་ཁྲུས་ནས་དབྱུང་༔ བྱུར་དང་མི་ཤིས་བསལ་བའི་ཕྱིར༔ འབྲས་ཟན་ཆང་བུ་ཏིང་ལོ་བཅས༔ ནམ་མཁའ་མཛོད་ཀྱི་སྔགས་རྒྱས་བརླབ༔ བསྔོ་ཞིང་བཀའ་བསྒོ་བྱ་བ་ནི༔ ཧཱུྃ༔ ཁམས་གསུམ་འདི་ན་སུ་ཡང་རུང་༔ གསང་བ་སྒྲུབ་ལ་བར་ཆད་བགེགས༔ གཏོར་མ་འདོད་ཡོན་རྒྱ་མཚོ་ལོངས༔ རང་རང་གནས་སུ་མྱུར་དུ་དེངས༔ སླར་ཡང་ནག་ཕྱོགས་གདུག་པ་ཅན༔ དྲག་པོ་རྡོ་རྗེའི་སྔགས་ཀྱིས་བསྐྲད༔ ཧྲཱིཿ ཕྱི་སྣོད་ཐམས་ཅད་རྡོ་རྗེའི་གུར༔ ནང་བཅུད་ཁྲག་འཐུང་རོལ་པའི་ལྷ༔ སེམས་ཉིད་གདོད་ནས་སྐྱེ་མེད་དབྱིངས༔ གཟུང་འཛིན་བགེགས་ཚོགས་མཚམས་བཅད་དོ༔ ཨོཾ་བཛྲ་ཛྙཱ་ན་རཀྵ་རཀྵ་བྷྲཱུྃ༔ ཞེས་པའི་སྲུང་འཁོར་གསལ་བརྟན་བསྒོམ༔ ངེས་འབྱུང་བློ་བཅོས་མཎྜལ་བཅས༔ ཐལ་མོ་སྦྱར་ཏེ་གསོལ་བ་གདབ༔ ཧོ༔ པདྨ་གཟི་ལྡན་དགྱེས་རོལ་པའི༔ བླ་མ་དབང་མཆོག་ཧེ་རུ་ཀས༔ བདག་ཅག་སྐལ་ལྡན་སློབ་མ་ལ༔ ཡེ་ཤེས་མཆོག་གི་དབང་བསྐུར་སྩོལ༔ ལན་གསུམ་རྗེས་སུ་སྐྱབས་སེམས་དང་༔ རྒྱུད་སྦྱང་ཚོགས་བསག་སྡོམ་པ་བཟུང་༔ ཡེ་ཤེས་དབབ་ཅིང་བརྟན་པར་བྱ༔ བུམ་པའི་བདུད་རྩིས་གཏོར་ཞིང་བཀྲུ༔ ཨོཾ༔ བཀྲ་ཤིས་བུམ་པའི་བདུད་རྩིའི་ཆུས༔ གཏོར་ཞིང་བླུགས་པའི་དབང་བསྐུར་བས༔ ཉོན་མོངས་ལྔ་ཡི་སྒྲིབ་དག་པ༔ ཡེ་ཤེས་ལྔ་རུ་ལྷུན་རྫོགས་ཤོག༔ ཧྲཱིཿཨོཾ་ཏྲཱྃ་ཧཱུྃ་ཨཱཿ ཀ་ལ་ཤ་ཨ་བྷི་ཥིཉྩ་ཧཱུྃ༔ རྗེས་འབྲེལ་གསང་གསུམ་ཕྱག་རྒྱ་བསྟིམ༔ ཧྲཱིཿ སྐུ་ནི་སྣང་སྟོང་གཟུང་འཛིན་བྲལ༔ གསུང་དབྱངས་རྡོ་རྗེའི་སྔགས་སུ་འཚེར༔ ཐུགས་ནི་བདེ་སྟོང་ཉམས་དང་ལྡན༔ ཡེ་ཤེས་སྐུ་ཡི་དབང་བསྐུར་རོ༔ ཀཱ་ཡ་ཛྙཱ་ན་ཨ་བྷིཥིཉྩ་ཨོཾ༔ བཟླས་པའི་ལུང་སྦྱིན་བརྟན་པར་བྱ༔ ཧྲཱི༔ སྲིད་པའི་འབྱུང་བ་ལས་ཀྱི་རླུང་༔ དབུ་མའི་དབྱིངས་སུ་ཐིམ་པ་ལས༔ གནད་ནས་སྐུལ་བའི་སྔགས་ཀྱི་སྒོ༔ གྲགས་སྟོང་ཆེན་པོར་དབང་བསྐུར་རོ༔ ཝཱ་ཀ་ཛྙཱ་ན་ཨ་བྷི་ཥིཉྩ་ཧཱུྃ༔ ཧྲཱིཿ དབྱིངས་ནི་རྡོ་རྗེ་རྟ་ཡི་ཞལ༔ རིག་པ་འགགས་མེད་ཡི་གེའི་སྤྲིན༔ ཟུང་འཇུག་གནས་ལུགས་གཉུག་མའི་བབས༔ འོད་གསལ་ཐུགས་སུ་དབང་བསྐུར་རོ༔ ཙིཏྟ་ཛྙཱ་ན་ཨ་བྷི་ཥིཉྩ་ཧཱུྃ༔ བླ་མ་ཡབ་ཡུམ་བྱང་སེམས་སྦྱིན༔ ཨཱཿ བྱང་ཆུབ་སེམས་ཀྱི་ཡི་གེ་ནི༔ ཧྲཱི༔ཡིག་ཞུན་མར་འཁྱིལ་བའི་བཅུད༔ རྩ་ཁམས་རླུང་ལ་བསྟིམ་པ་ལས༔ གསལ་སྟོང་ཟུང་འཇུག་མངོན་གྱུར་ཤོག༔ ཧྲཱིཿཧྲཱིཿཧྲཱིཿབོ་དྷི་ཙིཏྟ་ཛྙཱ་ན་ཨ་བྷི་ཥིཉྩ་ཧཱུྃ༔ མཚན་ལྡན་གཟུངས་མར་སྦྱོར་དུ་གཞུག༔ ཧཱུྃ༔ འདི་ནི་ཆོས་ཀུན་འབྱུང་བའི་གནས༔ པདྨ་གཟི་ལྡན་ཆེན་པོ་སྟེ༔ རོལ་ཅིག་རྡོ་རྗེ་རྟ་ཡི་མགྲིན༔ བཅུ་དྲུག་དགའ་བའི་ངང་ནས་རོལ༔ ཀརྨ་མུ་དྲ་ཛྙཱ་ན་ཨ་བྷི་ཥིཉྩ་ཧཱུྃ༔ དེ་ཉིད་རྟེན་བྱས་བརྟེན་པ་ནི༔ རྡོ་རྗེའི་དབྱངས་ཀྱིས་ངོ་སྤྲོད་གདབ༔ ཧཱི་ཧཱི་ཧཱི༔ རྡོ་རྗེའི་རྟ་སྐད་མཚེར་བའི་དབྱངས༔ གསལ་ཞིང་བརྗིད་པའི་གདངས་ཆེན་པོ༔ རང་བྱུང་ནམ་མཁའི་དཀྱིལ་ནས་བསྒྲགས༔ བདེ་སྟོང་ཉམས་ཀྱི་ངོ་བོར་ལྟོས༔ དེ་ལ་རྩེ་གཅིག་མཉམ་བཞག་པས༔ དང་པོ་སྐྱེ་མེད་སྟོང་སང་ངེ་༔ བར་དུ་གནས་མེད་ཟང་ཐལ་ལེ༔ ཐ་མ་འགགས་མེད་རྗེན་ཅེ་རེ༔ རང་བཞིན་ཡོངས་ཤེས་དྲན་པའི་ངང་༔ ཡིད་མིག་རླུང་གསུམ་དབྱེར་མེད་འཇོག༔ འདི་དོན་རྟོགས་ན་དོན་གྱི་དབང་༔ པདྨ་དབང་ཆེན་ཚེ་འདིར་འགྲུབ༔ དྷཱ་ཏུ་ཛྙཱ་ན་ཨ་བྷི་ཥིཉྩ་ཧཱུྃ༔ གཏོར་མ་ལྷར་གསལ་སྤྱི་བོར་བཞག༔ ཧྲཱིཿ དང་པོར་ལྷ་ཡི་ངོ་བོར་བསྒྲུབས༔ བར་དུ་ཡེ་ཤེས་གཟི་བྱིན་འབར༔ ཐ་མར་དངོས་གྲུབ་དབྱིག་ཏུ་འཁྱིལ༔ ཡོངས་རྫོགས་གཏོར་མའི་དབང་བསྐུར་རོ༔ སརྦ་བ་ལིཾ་ཏ་ཨ་བྷི་ཥིཉྩ་ཧཱུྃ༔ ཤིས་པ་བརྗོད་ཅིང་མེ་ཏོག་འཐོར༔ རྡོ་རྗེའི་གླུ་བླང་ཚོགས་འཁོར་བྱ༔ ས་མ་ཡ༔ དེ་ལྟར་དབང་གིས་རྒྱུད་སྨིན་ནས༔ ཐོག་མར་གནས་ལུགས་གཏན་ལ་ཕབ༔ ཕྱི་རོལ་སྣང་བ་ཇི་སྙེད་ཀུན༔ རང་སྣང་ཡིན་ཏེ་རྨི་ལམ་འདྲ༔ སྣང་བ་མ་འགགས་སྒྱུ་མ་འདྲ༔ རང་བཞིན་བདེན་མེད་ཆུ་ཟླ་འདྲ༔ སྣང་མཁན་སེམས་ལ་ཚུར་དཔྱད་པས༔ ཆེས་ཕྲའི་ཡེ་ཤེས་ནང་དུ་གསལ༔ སྟོང་ཉིད་རྡོ་རྗེ་ནམ་མཁའི་དཀྱིལ༔ རྡུལ་བྲལ་འདུས་མ་བྱས་པ་སྟེ༔ རང་གི་རང་བཞིན་དེ་ཁོ་ན༔ འདི་ནི་གསལ་བ་འཁོར་བ་སྟེ༔ འདི་ནི་རང་བཞིན་མྱ་ངན་འདས༔ འཁོར་འདས་དབྱེར་མེད་དོན་རྟོགས་ན༔ གང་བལྟས་པདྨ་དབང་གི་ལྷ༔ ཅི་སྤྱོད་གཟི་ལྡན་རོལ་པའི་ཡུམ༔ དེ་ཁོ་ན་ཉིད་མངོན་དུ་འགྱུར༔ ས་མ་ཡ༔ ལྟ་བ་རྟོགས་ནས་ཐབས་གྲོལ་ལམ༔ ཟབ་མོའི་ཏིང་འཛིན་བསྒོམ་པ་ནི༔ འདི་ལྟར་སྣང་བ་ཐམས་ཅད་ཀུན༔ སྣང་ཙམ་ཉིད་ལས་འགའ་མེད་ཀྱང་༔ དེ་ལ་ཞེན་པས་འཁོར་བར་འཆིང་༔ དེ་ཕྱིར་དེ་ཉིད་སྦྱང་བའི་ཕྱིར༔ ཐོག་མར་བསྐྱེད་པའི་རིམ་པ་བསྒོམ༔ མཚན་ཉིད་ཚང་བའི་བྲིས་སྐུ་དཀྲམ༔ སྟོང་པའི་བབས་སུ་ཡུན་རིང་བཞག༔ གསལ་བའི་གདངས་ལ་ཅེ་རེ་བལྟ༔ འགགས་མེད་ཧྲཱིཿཡིག་ཝལ་གྱིས་བསྒོམ༔ དེ་ལ་རྩེ་གཅིག་སེམས་བཟུང་ནས༔ ཡུལ་གསུམ་གསལ་བར་གྱུར་པ་ན༔ རྟེན་དང་བརྟེན་པའི་ལྷ་སྐུ་བསྒོམ༔ སྤྱི་དང་བྱེ་བྲག་གསལ་སྣང་ལ༔ རྩེ་གཅིག་སེམས་བཟུང་གསལ་སྣང་བསྒྲུབ༔ ང་རྒྱལ་བརྟན་པོ་ཉེ་བར་བཞག༔ གཞི་ལམ་འབྲས་གསུམ་དབྱེར་མེད་པའི༔ དག་པ་དྲན་པས་ལམ་དུ་ཁྱེར༔ སྲོག་རྩོལ་བཟླས་པ་སྔགས་ཀྱིས་སྦྱང་༔ སྟོང་པ་བཞི་ཡི་སྡུད་རིམ་དང་༔ དབྱེར་མེད་འོད་གསལ་ངང་དུ་འཇོག༔ རེས་འགའ་ལྷ་སྔགས་ལམ་དུ་སློང་༔ རེས་འགའ་རླུང་གི་སྦྱོར་བ་དང་༔ རེས་འགའ་སེམས་དང་རོ་མཉམ་བལྟ༔ དེ་ལྟར་ཡང་ཡང་གོམས་པ་ལས༔ སྣང་བ་ལྷ་སྐུར་རང་ཤར་ན༔ ཞོན་པའི་རྟ་ནི་རླུང་ཡིན་པས༔ རླུང་གི་སྲོག་རྩོལ་དབུ་མར་བཅད༔ ལུས་གནད་བསྲང་ཞིང་རླུང་རོ་བསལ༔ བྱེད་པ་བཅིང་ཕྱིར་ལྟ་སྟངས་གཟིར༔ སྡོད་པའི་གཟུགས་བརྙན་ཅིར་ཡང་འཆར༔ རྡོ་རྗེའི་བཟླས་པས་ལམ་སྦྱངས་ཏེ༔ བུམ་པ་ཅན་གྱི་སྦྱོར་བས་བརྟན༔ ཞུ་བདེའི་རྣལ་འབྱོར་རྗེས་དྲན་པས༔ མི་འགྱུར་བདེ་བའི་ཏིང་འཛིན་བསྒྲུབ༔ དེ་ལས་ཡེ་ཤེས་རིས་མེད་པ༔ སྐུ་གསུང་ཐུགས་ཀྱི་རྡོ་རྗེ་ཅན༔ ཚེ་འདི་ཉིད་ལ་འགྲུབ་པར་འགྱུར༔ ས་མ་ཡ༔ ཕྲིན་ལས་བྱང་བུ་བསྟན་པ་ནི༔ སྐྱབས་སེམས་ཚོགས་བསགས་བགེགས་བསྐྲད་བསྲུང་༔ བྱིན་དབབ་མཆོད་པ་བྱིན་གྱིས་བརླབ༔ ཨ༔ རྟ་མགྲིན་རྒྱལ་པོ་དེ་བཞིན་ཉིད༔ མ་བཅོས་མ་བསླད་གཉུག་མའི་གཤིས༔ དམིགས་མེད་སྙིང་རྗེ་མཆོག་གི་གདངས༔ འགགས་མེད་ཟང་ཐལ་ཀུན་ཏུ་ཤར༔ རོལ་པ་ཆེན་པོའི་ཆོ་འཕྲུལ་ལས༔ རྒྱུ་ཡི་ས་བོན་ཧྲཱིཿདམར་པོ༔ སྔགས་ཀྱི་སྒྲ་གདངས་དང་བཅས་པས༔ ཁམས་གསུམ་སྟོང་ཞིང་དབྱིངས་སུ་ཐིམ༔ རྒྱུ་ལས་ཨེ་ཡྃ་བྃ་ལྃ་སུྃ༔ འཕྲོས་པས་འབྱུང་བ་རིམ་བརྩེགས་སྟེང་༔ རི་རབ་སྟེང་དུ་སྲུང་འཁོར་དབུས༔ དབང་ཆེན་གཞལ་ཡས་མཚན་ཉིད་རྫོགས༔ དེ་དབུས་ཟླ་གམ་འབར་བའི་དཀྱིལ༔ པདྨ་ཉི་ཟླ་ཀླུ་སྲིན་སྟེང་༔ ཧྲཱིཿལས་རྟ་མཆོག་རོལ་པ་ནི༔ སྒེག་དཔའ་འཇིགས་སུ་རུང་བའི་སྐུ༔ ཡེ་ཤེས་ལྔ་ཡི་ཞལ་དང་ལྡན༔ རྡོ་རྗེ་རྟ་ཡི་གདོང་པས་མཚན༔ སྟོང་ཉིད་བཅུ་དྲུག་རོལ་པའི་ཕྱག༔ པདྨ་རིན་ཆེན་རལ་གྲི་དང་༔ ལྕགས་ཀྱུ་ཞགས་པ་དབྱུག་ཏོ་གདེངས༔ སྦྲུལ་དང་སྙིང་ཕྲེང་གཡས་ན་བསྣམས༔ ཐོད་ཁྲག་འཁོར་ལོ་གཏུན་ཤིང་དང་༔ ལྕགས་སྒྲོག་དྲིལ་བུ་མདའ་དང་གཞུ༔ སྟོང་གི་འཇིག་རྟེན་གཡོན་ན་བརྗིད༔ དཔལ་དང་དུར་ཁྲོད་ཆས་ཀུན་རྫོགས༔ ཡུམ་ནི་པདྨ་གཟི་ལྡན་མ༔ དམར་སྨུག་པདྨ་ཐོད་ཁྲག་འཛིན༔ མཉམ་སྦྱོར་བརྐྱང་བསྐུམ་དོར་སྟབས་ཀྱིས༔ ཡེ་ཤེས་མེ་ཕུང་ཀློང་ན་འགྱིངས༔ ཚོགས་དྲུག་སུམ་ཅུ་རྩ་གཉིས་ཁམས༔ ཉོན་མོངས་བཅུ་དྲུག་མཐའ་བཞིའི་ལྟ༔ རྣམ་དག་ཁམ་རྒྱ་དམུས་ལོང་དང་༔ ཁྱི་སྤྱང་སྒོ་མའི་ཚོགས་དང་བཅས༔ དཔལ་ཆེན་སྐུ་ཡི་དབྱིངས་སུ་རྫོགས༔ སྤྲུལ་པ་སྣ་ཚོགས་སྤྲོ་ཞིང་སྡུད༔ དགོད་གཤེ་དྲག་ཤུལ་གསུང་མཆོག་གིས༔ འཇིག་རྟེན་གསུམ་པོ་འདར་ཞིང་གཡོ༔ སྙིང་རྗེ་རྔམས་དང་ཞི་བའི་ཐུགས༔ མཁའ་ལ་ཉི་གསལ་འོད་བཞིན་ཁྱབ༔ སྤྱི་མགྲིན་སྙིང་གར་ཨོཾ་ཨཱཿཧཱུྃ༔ རྡོ་རྗེ་གསུམ་གྱི་ངོ་བོར་རྫོགས༔ བྱང་ཆུབ་སེམས་ཀྱི་བདུད་རྩིའི་ཆུས༔ སྐུ་ལྔ་ཡོངས་རྫོགས་མཆོག་དབང་བསྐུར༔ ཨོཾ་ཨཱཿཧཱུྃ༔ ཧྲཱིཿཨོཾ་ཏྲཱྃ་ཧཱུྃ་ཨཱཿ ཧྲཱིཿ མགོན་པོ་ཀུན་གཤེགས་སྙིང་རྗེའི་བདག༔ རྟ་མཆོག་རྣམ་པར་རོལ་པའི་ལྷ༔ གཙོ་འཁོར་སྤྲུལ་པ་ཡང་སྤྲུལ་བཅས༔ ཐུགས་རྗེའི་དབང་གིས་གནས་འདིར་བྱོན༔ ཧྲཱིཿཧ་ཡ་གྲཱི་ཝ་ཨེ་ཨཱ་རལླི་ཛ༔ ཧོཿ བྱམས་པའི་ལྕགས་ཀྱུས་ཐུགས་རྒྱུད་བསྐུལ༔ སྙིང་རྗེའི་ཞགས་པས་རྟེན་དང་བསྲེ༔ དགའ་བའི་སྒྲོག་གིས་རོ་མཉམ་བཅིང་༔ བཏང་སྙོམས་དྲིལ་བུས་ཡེ་ཤེས་བསྐྱེད༔ ཛཿཧཱུྃ་བྃ་ཧོཿས་མ་ཡ་སྟྭྃ༔ ཧོཿ རྡོ་རྗེའི་ལོངས་སྤྱོད་ཆེན་པོ་ནི༔ ཕྱི་ནང་གསང་བ་བླ་ན་མེད༔ ཀུན་ཏུ་བཟང་པོའི་མཆོད་པའི་སྤྲིན༔ ཡུལ་དང་དབང་པོ་གཉིས་མེད་རོལ༔ ཨོཾ་ཤྲཱི་བཛྲ་རཱ་ག་སརྦ་པཱུ་ཛ་མེ་གྷ་ཨཱཿཧཱུྃ༔ མ་ཧཱ་པཉྩ་ཨ་མྲི་ཏ་རཀྟ་བ་ལིཾ་ཏ་ཁཱ་ཧི༔ ཧཱུྃ༔ ཐབས་མཆོག་བདེ་ཆེན་རྡོ་རྗེ་རྟ་མགྲིན་རྒྱལ༔ ཤེས་རབ་པདྨ་གཟི་ལྡན་ཡུམ་དང་སྦྱོར༔ གཉིས་མེད་སྤྲུལ་པ་རྒྱ་མཚོའི་སྤྲིན་ཕུང་འཕྲོ༔ དབང་ཆེན་ཡོངས་རྫོགས་ལྷ་ལ་ཕྱག་འཚལ་བསྟོད༔ རང་བྱུང་འོད་གསལ་ཐུགས་ཀྱི་དབྱིངས༔ ཡེ་ཤེས་སེམས་དཔའ་གཟི་ལྡན་ཡུམ༔ རྒྱན་དང་ཕྱག་མཚན་སྤངས་པའི་སྐུ༔ དྭངས་གསལ་འོད་ཀྱི་རང་བཞིན་ཅན༔ དེ་ཡི་ཙིཏྟའི་གུར་ཁང་དུ༔ ཉི་སྟེང་ཧྲཱིཿལ་སྔགས་ཀྱིས་བསྐོར༔ འོད་ཟེར་མཆོད་པའི་སྤྲིན་དུ་འཕྲོས༔ རྒྱལ་བ་མཉེས་མཆོད་འགྲོ་ཀུན་གྱི༔ སྒྲིབ་གཉིས་བག་ཆགས་བཅས་པ་སྦྱངས༔ སྣོད་བཅུད་མ་ལུས་དབང་དུ་བསྡུས༔ འོད་དམར་གཟི་བརྗིད་འབར་བར་བསྒོམ༔ ཨོཾ་ཧུ་ལུ་ཧུ་ལུ་ཨེ་ཨཱ་རལླི་ཧྲཱིཿཛ༔ བསྒོམ་དང་བཟླས་པས་དངོས་གྲུབ་ཐོབ༔ ཐུན་མཚམས་ཚོགས་ཀྱི་མཆོད་པ་བྱ༔ རྗེས་སུ་མཆོད་བསྟོད་དངོས་གྲུབ་གསོལ༔ ནོངས་པ་བཤགས་ཤིང་ཡེ་ཤེས་ལྷ༔ འོད་གསལ་གཉུག་མའི་དབྱིངས་སུ་བསྡུ༔ རིག་པ་རང་སྣང་རོལ་པའི་སྤྲིན༔ ཡུལ་ཀུན་རྡོ་རྗེ་རྟ་ཡི་མགྲིན༔ ཡུལ་ཅན་བདེ་སྟོང་ཕྱག་རྒྱས་གདབ༔ དགེ་བ་བསྔོ་ཞིང་སྨོན་ལམ་དང་༔ ཤིས་པ་བརྗོད་པས་མཐར་དབྱུང་ངོ་༔ ས་མ་ཡ༔ གནས་སྐབས་ཕྲིན་ལས་རྣམ་པ་བཞི༔ རྡོ་རྗེ་བྲོ་ཡི་ཆོ་གས་བསྒྲུབ༔ ཚོགས་ཀྱི་དཀྱིལ་འཁོར་ཆེན་པོ་རུ༔ ལུ་གུ་རྒྱུད་དུ་སྦྲེལ་བསྡམས་ནས༔ སོ་སོའི་ལས་ཀྱི་དབྱིབས་མཐུན་པའི༔ བྲོ་ར་བཅའ་ཞིང་སྔགས་ཚིག་བསྐུལ༔ རྐང་པའི་སྟབས་ཀྱིས་གར་བསྒྱུར་བས༔ ལས་ཀུན་འགྲུབ་ཅིང་ཕྱིར་མི་ལྡོག༔ ཨོཾ༔ ཨེ་ཡི་ཚོགས་ཀྱི་དཀྱིལ་འཁོར་དུ༔ རྡོ་རྗེ་རྟ་མཆོག་ང་རྒྱལ་གྱིས༔ མེ་ལོང་ཡེ་ཤེས་བྲོ་བརྡུངས་པས༔ ནད་གདོན་འཇིགས་བརྒྱད་ཞི་བར་ཤོག༔ ཨོཾ་ཤཱནྟིཾ་ཀུ་རུ་སྭཱ་ཧཱ༔ བྷྲཱུྃ༔ ཝྃ་གི་ཚོགས་ཀྱི་དཀྱིལ་འཁོར་དུ༔ རཏྣ་རྟ་མཆོག་ང་རྒྱལ་གྱིས༔ མཉམ་ཉིད་ཡེ་ཤེས་བྲོ་བརྡུངས་པས༔ ཚེ་བསོད་དཔལ་འབྱོར་རྒྱས་པར་ཤོག༔ བྷྲཱུྃ་པུཥྟི་ཀུ་རུ་ཨོཾ༔ ཧྲཱིཿ མ་ཡི་ཚོགས་ཀྱི་དཀྱིལ་འཁོར་དུ༔ པདྨ་རྟ་མཆོག་ང་རྒྱལ་གྱིས༔ སོར་རྟོག་ཡེ་ཤེས་བྲོ་བརྡུངས་པས༔ ཁམས་གསུམ་དབང་དུ་འདུ་བར་ཤོག༔ ཧྲཱིཿཝཱ་ཤཾ་ཀུ་རུ་ཧོ༔ ཧཱུྃ༔ ཡ་ཡི་ཚོགས་ཀྱི་དཀྱིལ་འཁོར་དུ༔ ཀརྨ་རྟ་མཆོག་ང་རྒྱལ་གྱིས༔ བྱ་གྲུབ་ཡེ་ཤེས་བྲོ་བརྡུངས་པས༔ མི་མཐུན་ཕྱོགས་ཀུན་ཚར་གཅད་ཤོག༔ ཧཱུྃ་མཱ་ར་ཡ་ཕཊཿ ཐལ་མོ་སྤྲུལ་པའི་འོད་ཟེར་སྤྲིན༔ ལས་མཐུན་འཇིག་རྟེན་ཁམས་ཀུན་ཁྱབ༔ ཞི་རྒྱས་དབང་དང་མངོན་སྤྱོད་ཀྱི༔ ཕྲིན་ལས་མཐའ་དག་ལྷུན་གྲུབ་བསམ༔ ས་མ་ཡ༔ མཐར་ཐུག་འབྲས་བུ་འགྲུབ་བྱེད་ནི༔ རིམ་པ་དབང་གིས་རྒྱུད་སྨིན་ནས༔ དམ་ཚིག་རྣམ་པར་དག་པ་ཡིས༔ གཞི་དོན་ལྟ་བ་གཏན་ལ་ཕབ༔ བསྐྱེད་པའི་རིམ་ལ་ལེགས་གནས་པས༔ སྔགས་ཀྱི་ཚོགས་ལམ་ཡོངས་སུ་བགྲོད༔ རླུང་སེམས་ལས་རུང་དྲོད་དང་རྩེ༔ ཐིག་ལེ་ཟག་མེད་བདེ་རྫོགས་པས༔ བཟོད་པ་ཆོས་མཆོག་མངོན་བྱས་ཏེ༔ དོན་གྱི་ལྷན་སྐྱེས་མཐོང་བའི་ལམ༔ དེ་ལས་སློབ་དང་མི་སློབ་པའི༔ ཟུང་འཇུག་ཡེ་ཤེས་མངོན་གྱུར་ཏེ༔ འཁོར་འདས་གཉིས་མེད་ཀུན་གྱི་སྲོག༔ མཉམ་པ་ཉིད་ལས་མ་གཡོས་བཞིན༔ གང་འདུལ་སྒྱུ་འཕྲུལ་དྲྭ་བའི་སྤྲིན༔ རྟ་མཆོག་རོལ་པ་ཚེ་འདིར་འགྲུབ༔ ས་མ་ཡ༔ ཐུན་མོང་བཀྲ་ཤིས་ཚེ་ཡི་ལུང་༔ ཟབ་རྒྱས་གཞན་ལས་ཁྱད་འཕགས་པ༔ རྟ་མཆོག་ཆེན་པོའི་ཏིང་ངེ་འཛིན༔ མི་ཤིགས་སྙིང་པོའི་བཅུད་ལེན་ནི༔ ཚེ་བཅའ་བྱིན་བསྐྱེད་ལྷ་གསལ་ཞིང་༔ སྔགས་བཟླ་ཚེ་འགུགས་ཚེ་བཅིངས་ནས༔ ཚེ་དབང་དངོས་གྲུབ་བླང་བར་བྱ༔ སྙིང་པོ་ལྔ་ཡི་ཕྱེ་མ་དང་༔ གལ་གྱི་མཐུན་བསྡེབ་འབྲང་རྒྱས་ནི༔ རྟ་མཆོག་ཞལ་གྱི་ཕྱག་རྒྱར་ལྡན༔ དངོས་གྲུབ་ཡ་མཚན་རྫས་རྣམས་བཤམ༔ ཧཱུྃ༔ མི་མངོན་རང་བྱུང་དབྱིངས་ཀྱི་ཕོ་བྲང་ནས༔ རིག་པའི་རྩལ་ལས་ཤར་བའི་དཀྱིལ་འཁོར་ལ༔ པདྨ་དབང་ཆེན་ཚེ་ཡི་ལྷ་ཚོགས་རྣམས༔ འདིར་གཤེགས་འདིར་བཞུགས་བྱིན་ཕོབས་དབང་མཆོག་བསྐུར༔ འཁོར་འདས་དྭངས་བཅུད་ཐིག་ལེ་གཅིག་ཏུ་བསྐྱིལ༔ དྭངས་མ་ཡེ་ཤེས་གཟི་བྱིན་ཕྱོགས་བཅུར་སྤྲོས༔ སྒྲུབ་པའི་རྫས་ལ་ནུས་པའི་བཅུད་ལེན་ཕོབས༔ འཆི་མེད་ཡེ་ཤེས་ཚེ་ཡི་དངོས་གྲུབ་སྩོལ༔ ཨོཾ་ཧ་ཡ་གྲཱི་ཝ་ཨཱ་ཡུརྫྙཱ་ན་ཨ་ཝེ་ཤ་ཡ་ཧྲིང་ཧྲིང་ཕེཾ་ཕེཾ་ཧཱུྃ་ཧཱུྃ་ཧཱུྃ༔ བདག་མདུན་དབང་ཆེན་རྟ་མཆོག་དཔལ༔ ཉི་མ་འཆར་ཁའི་མདངས་འོད་ཅན༔ ཞལ་གསུམ་ཕྱག་དྲུག་ཞབས་བཞི་བསྒྲད༔ པདྨ་ལྕགས་ཀྱུ་ཞགས་པ་གཡས༔ ཚེ་བུམ་ལྕགས་སྒྲོག་དྲིལ་བུ་གསིལ༔ གཟི་ལྡན་ལྕགས་ཀྱུ་ཐོད་པ་འཛིན༔ དཔལ་དང་དུར་ཁྲོད་རོལ་པའི་ཆས༔ སྤྱི་གཙུག་རྟ་མགོ་ལྗང་ཞུར་ལས༔ ཧི་ཧིའི་དབྱངས་སུ་རབ་འཚེར་བས༔ འཁོར་འདས་དྭངས་བཅུད་དབང་མེད་སྡུད༔ པད་ཉི་དྲེགས་པ་ལྷ་ཆེན་སྟེང་༔ ཡེ་ཤེས་མེ་དབུས་འགྱིང་ཞིང་རོལ༔ གར་དགུས་བརྗིད་པའི་སྐུ་མཆོག་ལས༔ ཁམ་རྒྱ་དམུས་ལོང་ལྕེ་སྤྱང་སོགས༔ ཕོ་ཉ་དྲེགས་པའི་འཕྲོ་འདུ་ཡིས༔ ཚེ་བཀུག་བྱིན་བསྐྱེད་སྲིད་དང་ཞིའི༔ དངོས་གྲུབ་མ་ལུས་སྩོལ་བར་བསམ༔ བྱིན་བརླབ་དབང་བསྐུར་སྤྱན་འདྲེན་སོགས༔ ལས་ཀྱི་རིམ་པ་ཅི་རིགས་བྱ༔ ཐུགས་ཀར་ཉི་ཟླ་ཁ་སྦྱོར་དབུས༔ ཧཱུྃ་ནྲྀ་ཨ་ཡི་ཚེ་རྟེན་ལ༔ འཆི་མེད་རྡོ་རྗེའི་སྔགས་ཀྱི་ཕྲེང་༔ ལུ་གུ་རྒྱུད་དུ་བསྐོར་བ་ལས༔ འོད་འཕྲོས་ཕོ་ཉའི་ཐུགས་དམ་བསྐུལ༔ སྤྲུལ་པ་ཡང་སྤྲུལ་བཀའ་ཉན་བཅས༔ ནམ་མཁའི་ཁམས་ནས་གློག་ལྟར་འཁྱུགས༔ བར་སྣང་ཁམས་ནས་སྤྲིན་ལྟར་གཡོས༔ ས་གཞིའི་ཁམས་ནས་རླུང་ལྟར་བརྡོལ༔ ཁམས་གསུམ་ཐམས་ཅད་ཤིག་ཤིག་གཡོས༔ སྲིད་གསུམ་དྲེགས་པ་འདར་ཞིང་བསྔངས༔ བརྟན་གཡོའི་དྭངས་བཅུད་དབང་མེད་འཕྲོགས༔ འཆི་མེད་ཚེ་ཡི་བདུད་རྩི་ནི༔ ཉི་མ་འཆར་ཁའི་འོད་ལྟ་བུ༔ སྙིང་དབུས་ཚེ་རྟེན་ལ་ཐིམ་པས༔ རྡོ་རྗེ་ཚེ་ཡི་མཆོག་ཐོབ་བསམ༔ སྔགས་མཐར་ཚེ་ཡི་རིག་པ་གདགས༔ ཨཱ་ཡུརྫྙཱ་ན་སརྦ་སིདྡྷི་ཧྲཱིཿཛ་བྷྲཱུྃ༔ སྐབས་སུ་ཐུགས་དམ་བསྐུལ་བ་ནི༔ ཧྲཱིཿ སོ་སོར་རྟོག་པའི་ཡེ་ཤེས་ཀྱི༔ རིག་པ་རང་ཤར་རྟ་མཆོག་དཔལ༔ གཙོ་འཁོར་སྤྲུལ་པ་ཡང་སྤྲུལ་བཅས༔ ཐུགས་དམ་བསྐུལ་ལོ་གཟི་བྱིན་སྐྱེད༔ རྡོ་རྗེ་སྐུ་ཡི་དཀྱིལ་འཁོར་ནས༔ དམར་ལ་འཚེར་བའི་འོད་ཟེར་དང་༔ ཕོ་ཉའི་ཚོགས་ཀྱི་འཕྲོ་འདུ་ཡིས༔ བརྟན་པ་སྣོད་ཀྱི་དྭངས་མ་ཁུག༔ པདྨ་གསུང་གི་དཀྱིལ་འཁོར་ནས༔ དམར་ལ་འདྲིལ་བའི་འོད་ཟེར་དང་༔ ཕོ་ཉའི་ཚོགས་ཀྱི་འཕྲོ་འདུ་ཡིས༔ སྲིད་པ་བཅུད་ཀྱི་ཚེ་དཔལ་ཁུག༔ འོད་གསལ་ཐུགས་ཀྱི་དཀྱིལ་འཁོར་ནས༔ མཐིང་ལ་འཚེར་བའི་འོད་ཟེར་དང་༔ ཕོ་ཉའི་ཚོགས་ཀྱི་འཕྲོ་འདུ་ཡིས༔ དབྱིངས་དང་ཡེ་ཤེས་ཡོན་ཏན་ཁུག༔ རྣལ་འབྱོར་ལུས་ངག་ཡིད་ལ་བསྟིམ༔ འཆི་མེད་སྒྲུབ་པའི་རྫས་ལ་ཁུག༔ མི་འགྱུར་མི་ཤིགས་རྟག་པའི་ཚེ༔ དབང་ཆེན་རོལ་པའི་དངོས་གྲུབ་སྩོལ༔ ཞེས་བཀུག་སྒྲུབ་པའི་རྫས་དང་ནི༔ ཚེ་ཡི་རྟེན་ལ་གཉིས་མེད་བསྟིམ༔ ཡབ་ཡུམ་སྙོམས་ཞུགས་རྗེས་ཆགས་ཀྱི༔ བདེ་བ་མི་ཕྱེད་རྡོ་རྗེའི་སྲོག༔ འོད་དམར་པདྨ་རཱ་གའི་ཕྲེང་༔ ལུ་གུ་རྒྱུད་ཀྱི་ཐག་པ་ཡིས༔ སྐུ་བཅིང་རླུང་རྣམས་དབུ་མར་བཅུག༔ ཐིག་ལེ་ཚེ་རྟེན་དྲྭ་བར་བསྡམ༔ ཅིས་ཀྱང་མི་ཆོད་མི་ཤིགས་པའི༔ རྡོ་རྗེ་གསུམ་གྱི་སྲོག་ལྡན་བསམ༔ ཨོཾ་ཨཱཿཧཱུྃ་བཛྲ་ཀཱ་བཱ་ཙི་རཀྵ་རཀྵ་ཧཱུྃ༔ ཁྱད་པར་རྡོར་བཟླས་བུམ་ཅན་གྱི༔ རྣལ་འབྱོར་ཟབ་མོས་བརྟན་པར་བྱ༔ རྟགས་མཐོང་ཚེ་བུམ་སྤྱི་བོར་བླང་༔ ཨོཾ༔ ཇི་སྙེད་སངས་རྒྱས་ཐམས་ཅད་དང་༔ འཇིག་རྟེན་ཁམས་ནི་རབ་འབྱམས་ཀྱི༔ སྣང་བའི་དངོས་པོའི་རྡོ་རྗེའི་ཚེ༔ མི་འགྱུར་རྟག་པའི་དངོས་གྲུབ་སྩོལ༔ ཀཱ་ཡ་ཨ་ཡུརྫྙཱ་ན་སརྦ་སིདྡྷི་ཧྲཱིཿཛཿབྷྲཱུྃ༔ བདུད་རྩི་མགྲིན་པར་བཞག་ཅིང་མྱང་༔ ཨཱཿ ཇི་སྙེད་སངས་རྒྱས་ཐམས་ཅད་དང་༔ འཇིག་རྟེན་ཁམས་ནི་རབ་འབྱམས་ཀྱི༔ གྲགས་པའི་དངོས་པོ་པདྨའི་ཚེ༔ མི་ཤིགས་དབྱངས་ཀྱི་དངོས་གྲུབ་སྩོལ༔ ཝཱ་ཀ་ཨཱ་ཡུརྫྙཱ་ན་སརྦ་སིདྡྷི་ཧྲཱིཿཛཿབྷྲཱུྃ༔ ཧཱུྃ༔ ཇི་སྙེད་སངས་རྒྱས་ཐམས་ཅད་དང་༔ འཇིག་རྟེན་ཁམས་ནི་རབ་འབྱམས་ཀྱི༔ རིག་པའི་རང་བཞིན་འོད་གསལ་ཚེ༔ འཕོ་མེད་མཆོག་གི་དངོས་གྲུབ་སྩོལ༔ ཙིཏྟ་ཨཱ་ཡུརྫྙཱ་ན་སརྦ་སིདྡྷི་ཧྲཱིཿཛཿབྷྲཱུྃ༔ ཨ༔ སྤྲོས་པས་འཁོར་འདས་ཁྱབ་པའི་འོད༔ བསྡུས་པས་གོང་བུ་གཅིག་ཏུ་འདྲིལ༔ སྙིང་དབུས་མི་ཤིགས་ཐིག་ལེའི་དབུས༔ དབང་ཆེན་རོལ་པའི་རྒྱས་གདབ་བོ༔ ཨ་ཨ་ཨ༔ མཐའ་རྒྱས་སྲོག་བསླུ་ཉེའུ་འདོན༔ ཚོགས་གཏོར་བསོད་ནམས་རྒྱ་ཆེར་བསགས༔ དེས་ནི་ཚེ་ཡི་བར་ཆད་ཞི༔ མཐར་ཐུག་འཆི་མེད་མཆོག་འགྲུབ་བོ༔ ས་མ་ཡ༔ པདྨ་དབང་ཆེན་ཏནྟྲ་ནི༔ མཁའ་ལྟར་ཟབ་ཅིང་རྒྱ་ཆེའི་དོན༔ ནཱ་ག་རྫུ་ནའི་དགོངས་པའི་གདེང་༔ བདག་ཉིད་པདྨ་རྒྱལ་པོ་ཡིས༔ གདམས་པ་ཟབ་ཅིང་འདྲིལ་བ་འདི༔ མ་འོངས་རིགས་སད་སྐྱེས་བུའི་དོན༔ འཕེལ་བའི་ཐིག་ལེའི་ཡི་གེ་ནི༔ དྭངས་མ་མི་ཤིགས་སྲོག་ཏུ་བཟུང་༔ དུས་སུ་བབས་ཚེ་སྣོད་ལྡན་ལ༔ སྙན་བརྒྱུད་ཚུལ་དུ་གདམས་པ་སྟེ༔ སྔོན་ཆད་གཞན་དུ་མ་བསྟན་པའི༔ སྙིང་པོའི་སྙིང་པོ་འདི་ཁོ་ན༔ ས་མ་ཡ༔ འདི་ནི་མ་འོངས་སྙིགས་མའི་དུས༔ ཚེ་ཐུང་ནད་མང་ལོངས་སྤྱོད་དབུལ༔ ཁྱད་པར་བསྟན་འཛིན་སྐྱེས་བུ་རྣམས༔ གློ་བུར་བར་ཆད་སྣ་ཚོགས་པས༔ ཕྲིན་ལས་གཞན་དབང་བསྒྱུར་བ་དང་༔ བོད་ཁམས་ཐུགས་རྗེའི་གདུལ་ཞིང་འདིར༔ སངས་རྒྱས་བསྟན་པ་དར་ལ་སྨིན༔ རྫོགས་པའི་དུས་སུ་སླེབ་པ་ན༔ བོད་ཁམས་ཀླ་ཀློའི་དཔུང་མང་པོས༔ འཇིགས་པ་ཆེན་པོ་སྟོན་པ་ན༔ དབང་ཆེན་པདྨའི་གདུང་འཚོབ་པ༔ འགྲོ་འདུལ་སྤྲུལ་པ་རྣམ་གཉིས་དང་༔ མཁྱེན་རབ་ཡེ་ཤེས་གར་གྱི་དབང་༔ སྙིང་པོའི་བསྟན་པ་སྤེལ་བ་དང་༔ འཛིན་པའི་སྐྱེས་བུ་ཟུང་བཞི་ཡི༔ དོན་དུ་གདམས་པ་རྫོགས་པར་སྟོན༔ འཆི་བ་མེད་པའི་སྲོག་འགྲུབ་ཅིང་༔ བར་ཆད་སྤྱི་དང་ཁྱད་པར་དུ༔ གཞན་དབང་མང་པོ་ཟིལ་མནན་ནས༔ བསྟན་དང་འགྲོ་ལ་ཕན་པ་དང་༔ སྒྲུབ་པའི་ལམ་མཆོག་ཡུན་རིང་གནས༔ འབྲེལ་ཚད་དོན་དང་ལྡན་པར་འགྱུར༔ ས་མ་ཡ༔ རྒྱ་རྒྱ་རྒྱ༔ གུ་ཧྱ༔ དྷ་ཐིམ༔ ཨ་ཏི་གུ་ཧྱ་མ་ཧཱ་མནྟྲ་ས་མ་ཡ་རཀྵནྟུ༔ ཞེས་པའང༌། སློབ་དཔོན་ཆེན་པོ་ནཱ་གརྫུ་ནས་བྱིན་གྱིས་བརླབས་ཤིང༌། གུ་རུ་པདྨ་རྒྱལ་པོས་རྗེས་སུ་གདམས་པ་ལྟར། རྡོ་རྗེའི་ལུང་གིས་བསྔགས་པའི་སྐྱེས་བུ་མཆོག་རྣམས་ཀྱི་གཙོས་ལས་ལྡན་གྱི་སློབ་མ་རྣམས་ལ་ཕན་པའི་བསམ་པས། སྦས་ཡུལ་ཆེན་པོ་ཨ་ཏ་རོང་གནས་ཀྱི་སྙིང་པོ་བཀྲ་ཤིས་དཔལ་གྱི་རི་བོའི་གནས་ཞལ་གསར་དུ་སྣང་བར་མཛད་པའི་སྐབས། གཏེར་ཆེན་བླ་མ་འགྲོ་འདུལ་མཆོག་གྱུར་བདེ་ཆེན་ཞིག་པོ་གླིང་པ་སྟོན་འཁོར་རྣམས་ཀྱི་སྤྱན་སྔར་རས་དཀར་གྱི་གུར་ཁྱིམ་ལ་བརྟེན་པའི་སྨན་ལྗོངས་ཉམས་དགའ་བར་པདྨ་འོད་གསལ་མདོ་སྔགས་གླིང་པས་སྐད་ཅིག་གིས་གཏན་ལ་ཕབས་པའི་ལེགས་བྱས་ཀྱིས་བསྟན་འཛིན་མཆོག་རྣམས་ཞབས་པད་བརྟན་ཅིང༌། བསྟན་འགྲོའི་ཕན་བདེའི་དགེ་མཚན་ལྷུན་གྱིས་གྲུབ་པའི་རྒྱུར་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ།།

[edit]

\u0f01\u0f83:__rta mchog rol pa'i snying tig bzhugs:slob dpon nA gardzu na'i dgongs pa'o/ \u0f01\u0f83:__rdo rje rta yi rgyal por 'dud:__gnas lugs rta yi mgrin pa can:__thabs grol lam gyi mchog tu snang :__'bras bu mthar phyin rol pa yis:__'gro 'dul phrin las lhun gyis grub:__sa ma ya:__de nyid nyams su blang ba'i slad:__pad+ma dbang gi spyi bo nas:__myur mgyogs shugs ldan gdong pa yis:__i hi'i rta dbyangs mtsher ba las:__dang por gnas lugs stong pa nyid:__lta ba gtan la 'bebs pa'i phyir:__nges 'byung dang ni snying rje bskyed:__skyabs song byang chub sems bskyed nas:__snod du rung ba'i slob ma la:__rim pa dbang gis smin pa'i phyir:__dkyil 'khor dmar nag mtshan rdzogs bzhengs:__brda yi dbang rdzas thams cad dgram:__khyad par rta zhal sngags mtshan pa:__dal gyi dbus su brtan par bzhugs:__bdag mdun bskyed bzlas nus ldan bya:__bdag nyid 'jug cing slob ma rnams:__dag pa bdud rtsi'i khrus nas dbyung :__byur dang mi shis bsal ba'i phyir:__'bras zan chang bu ting lo bcas:__nam mkha' mdzod kyi sngags rgyas brlab:__bsngo zhing bka' bsgo bya ba ni:__hU~M:__khams gsum 'di na su yang rung :__gsang ba sgrub la bar chad bgegs:__gtor ma 'dod yon rgya mtsho longs:__rang rang gnas su myur du dengs:__slar yang nag phyogs gdug pa can:__drag po rdo rje'i sngags kyis bskrad:__hrIH__phyi snod thams cad rdo rje'i gur:__nang bcud khrag 'thung rol pa'i lha:__sems nyid gdod nas skye med dbyings:__gzung 'dzin bgegs tshogs mtshams bcad do:__oM badz+ra dz+nyA na rak+Sha rak+Sha b+h+rU~M:__zhes pa'i srung 'khor gsal brtan bsgom:__nges 'byung blo bcos maN+Dal bcas:__thal mo sbyar te gsol ba gdab:__ho:__pad+ma gzi ldan dgyes rol pa'i:__bla ma dbang mchog he ru kas:__bdag cag skal ldan slob ma la:__ye shes mchog gi dbang bskur stsol:__lan gsum rjes su skyabs sems dang :__rgyud sbyang tshogs bsag sdom pa bzung :__ye shes dbab cing brtan par bya:__bum pa'i bdud rtsis gtor zhing bkru:__oM:__bkra shis bum pa'i bdud rtsi'i chus:__gtor zhing blugs pa'i dbang bskur bas:__nyon mongs lnga yi sgrib dag pa:__ye shes lnga ru lhun rdzogs shog:__hrIHoM trA~M hU~M AH__ka la sha a b+hi Shiny+tsa hU~M:__rjes 'brel gsang gsum phyag rgya bstim:__hrIH__sku ni snang stong gzung 'dzin bral:__gsung dbyangs rdo rje'i sngags su 'tsher:__thugs ni bde stong nyams dang ldan:__ye shes sku yi dbang bskur ro:__kA ya dz+nyA na a b+hiShiny+tsa oM:__bzlas pa'i lung sbyin brtan par bya:__hrI:__srid pa'i 'byung ba las kyi rlung :__dbu ma'i dbyings su thim pa las:__gnad nas skul ba'i sngags kyi sgo:__grags stong chen por dbang bskur ro:__wA ka dz+nyA na a b+hi Shiny+tsa hU~M:__hrIH__dbyings ni rdo rje rta yi zhal:__rig pa 'gags med yi ge'i sprin:__zung 'jug gnas lugs gnyug ma'i babs:__'od gsal thugs su dbang bskur ro:__tsit+ta dz+nyA na a b+hi Shiny+tsa hU~M:__bla ma yab yum byang sems sbyin:__AH__byang chub sems kyi yi ge ni:__hrI:yig zhun mar 'khyil ba'i bcud:__rtsa khams rlung la bstim pa las:__gsal stong zung 'jug mngon gyur shog:__hrIHhrIHhrIHbo d+hi tsit+ta dz+nyA na a b+hi Shiny+tsa hU~M:__mtshan ldan gzungs mar sbyor du gzhug:__hU~M:__'di ni chos kun 'byung ba'i gnas:__pad+ma gzi ldan chen po ste:__rol cig rdo rje rta yi mgrin:__bcu drug dga' ba'i ngang nas rol:__karma mu dra dz+nyA na a b+hi Shiny+tsa hU~M:__de nyid rten byas brten pa ni:__rdo rje'i dbyangs kyis ngo sprod gdab:__hI hI hI:__rdo rje'i rta skad mtsher ba'i dbyangs:__gsal zhing brjid pa'i gdangs chen po:__rang byung nam mkha'i dkyil nas bsgrags:__bde stong nyams kyi ngo bor ltos:__de la rtse gcig mnyam bzhag pas:__dang po skye med stong sang nge :__bar du gnas med zang thal le:__tha ma 'gags med rjen ce re:__rang bzhin yongs shes dran pa'i ngang :__yid mig rlung gsum dbyer med 'jog:__'di don rtogs na don gyi dbang :__pad+ma dbang chen tshe 'dir 'grub:__d+hA tu dz+nyA na a b+hi Shiny+tsa hU~M:__gtor ma lhar gsal spyi bor bzhag:__hrIH__dang por lha yi ngo bor bsgrubs:__bar du ye shes gzi byin 'bar:__tha mar dngos grub dbyig tu 'khyil:__yongs rdzogs gtor ma'i dbang bskur ro:__sarba ba liM ta a b+hi Shiny+tsa hU~M:__shis pa brjod cing me tog 'thor:__rdo rje'i glu blang tshogs 'khor bya:__sa ma ya:__de ltar dbang gis rgyud smin nas:__thog mar gnas lugs gtan la phab:__phyi rol snang ba ji snyed kun:__rang snang yin te rmi lam 'dra:__snang ba ma 'gags sgyu ma 'dra:__rang bzhin bden med chu zla 'dra:__snang mkhan sems la tshur dpyad pas:__ches phra'i ye shes nang du gsal:__stong nyid rdo rje nam mkha'i dkyil:__rdul bral 'dus ma byas pa ste:__rang gi rang bzhin de kho na:__'di ni gsal ba 'khor ba ste:__'di ni rang bzhin mya ngan 'das:__'khor 'das dbyer med don rtogs na:__gang bltas pad+ma dbang gi lha:__ci spyod gzi ldan rol pa'i yum:__de kho na nyid mngon du 'gyur:__sa ma ya:__lta ba rtogs nas thabs grol lam:__zab mo'i ting 'dzin bsgom pa ni:__'di ltar snang ba thams cad kun:__snang tsam nyid las 'ga' med kyang :__de la zhen pas 'khor bar 'ching :__de phyir de nyid sbyang ba'i phyir:__thog mar bskyed pa'i rim pa bsgom:__mtshan nyid tshang ba'i bris sku dkram:__stong pa'i babs su yun ring bzhag:__gsal ba'i gdangs la ce re blta:__'gags med hrIHyig wal gyis bsgom:__de la rtse gcig sems bzung nas:__yul gsum gsal bar gyur pa na:__rten dang brten pa'i lha sku bsgom:__spyi dang bye brag gsal snang la:__rtse gcig sems bzung gsal snang bsgrub:__nga rgyal brtan po nye bar bzhag:__gzhi lam 'bras gsum dbyer med pa'i:__dag pa dran pas lam du khyer:__srog rtsol bzlas pa sngags kyis sbyang :__stong pa bzhi yi sdud rim dang :__dbyer med 'od gsal ngang du 'jog:__res 'ga' lha sngags lam du slong :__res 'ga' rlung gi sbyor ba dang :__res 'ga' sems dang ro mnyam blta:__de ltar yang yang goms pa las:__snang ba lha skur rang shar na:__zhon pa'i rta ni rlung yin pas:__rlung gi srog rtsol dbu mar bcad:__lus gnad bsrang zhing rlung ro bsal:__byed pa bcing phyir lta stangs gzir:__sdod pa'i gzugs brnyan cir yang 'char:__rdo rje'i bzlas pas lam sbyangs te:__bum pa can gyi sbyor bas brtan:__zhu bde'i rnal 'byor rjes dran pas:__mi 'gyur bde ba'i ting 'dzin bsgrub:__de las ye shes ris med pa:__sku gsung thugs kyi rdo rje can:__tshe 'di nyid la 'grub par 'gyur:__sa ma ya:__phrin las byang bu bstan pa ni:__skyabs sems tshogs bsags bgegs bskrad bsrung :__byin dbab mchod pa byin gyis brlab:__a:__rta mgrin rgyal po de bzhin nyid:__ma bcos ma bslad gnyug ma'i gshis:__dmigs med snying rje mchog gi gdangs:__'gags med zang thal kun tu shar:__rol pa chen po'i cho 'phrul las:__rgyu yi sa bon hrIHdmar po:__sngags kyi sgra gdangs dang bcas pas:__khams gsum stong zhing dbyings su thim:__rgyu las e ya~M ba~M la~M su~M:__'phros pas 'byung ba rim brtsegs steng :__ri rab steng du srung 'khor dbus:__dbang chen gzhal yas mtshan nyid rdzogs:__de dbus zla gam 'bar ba'i dkyil:__pad+ma nyi zla klu srin steng :__hrIHlas rta mchog rol pa ni:__sgeg dpa' 'jigs su rung ba'i sku:__ye shes lnga yi zhal dang ldan:__rdo rje rta yi gdong pas mtshan:__stong nyid bcu drug rol pa'i phyag:__pad+ma rin chen ral gri dang :__lcags kyu zhags pa dbyug to gdengs:__sbrul dang snying phreng g.yas na bsnams:__thod khrag 'khor lo gtun shing dang :__lcags sgrog dril bu mda' dang gzhu:__stong gi 'jig rten g.yon na brjid:__dpal dang dur khrod chas kun rdzogs:__yum ni pad+ma gzi ldan ma:__dmar smug pad+ma thod khrag 'dzin:__mnyam sbyor brkyang bskum dor stabs kyis:__ye shes me phung klong na 'gyings:__tshogs drug sum cu rtsa gnyis khams:__nyon mongs bcu drug mtha' bzhi'i lta:__rnam dag kham rgya dmus long dang :__khyi spyang sgo ma'i tshogs dang bcas:__dpal chen sku yi dbyings su rdzogs:__sprul pa sna tshogs spro zhing sdud:__dgod gshe drag shul gsung mchog gis:__'jig rten gsum po 'dar zhing g.yo:__snying rje rngams dang zhi ba'i thugs:__mkha' la nyi gsal 'od bzhin khyab:__spyi mgrin snying gar oM AHhU~M:__rdo rje gsum gyi ngo bor rdzogs:__byang chub sems kyi bdud rtsi'i chus:__sku lnga yongs rdzogs mchog dbang bskur:__oM AHhU~M:__hrIHoM trA~M hU~M AH__hrIH__mgon po kun gshegs snying rje'i bdag:__rta mchog rnam par rol pa'i lha:__gtso 'khor sprul pa yang sprul bcas:__thugs rje'i dbang gis gnas 'dir byon:__hrIHha ya grI wa e A ral+li dza:__hoH__byams pa'i lcags kyus thugs rgyud bskul:__snying rje'i zhags pas rten dang bsre:__dga' ba'i sgrog gis ro mnyam bcing :__btang snyoms dril bus ye shes bskyed:__dzaHhU~M ba~M hoHsa ma ya s+t+wa~M:__hoH__rdo rje'i longs spyod chen po ni:__phyi nang gsang ba bla na med:__kun tu bzang po'i mchod pa'i sprin:__yul dang dbang po gnyis med rol:__oM shrI badz+ra rA ga sarba pU dza me g+ha AHhU~M:__ma hA pany+tsa a mri ta rak+ta ba liM ta khA hi:__hU~M:__thabs mchog bde chen rdo rje rta mgrin rgyal:__shes rab pad+ma gzi ldan yum dang sbyor:__gnyis med sprul pa rgya mtsho'i sprin phung 'phro:__dbang chen yongs rdzogs lha la phyag 'tshal bstod:__rang byung 'od gsal thugs kyi dbyings:__ye shes sems dpa' gzi ldan yum:__rgyan dang phyag mtshan spangs pa'i sku:__dwangs gsal 'od kyi rang bzhin can:__de yi tsit+ta'i gur khang du:__nyi steng hrIHla sngags kyis bskor:__'od zer mchod pa'i sprin du 'phros:__rgyal ba mnyes mchod 'gro kun gyi:__sgrib gnyis bag chags bcas pa sbyangs:__snod bcud ma lus dbang du bsdus:__'od dmar gzi brjid 'bar bar bsgom:__oM hu lu hu lu e A ral+li hrIHdza:__bsgom dang bzlas pas dngos grub thob:__thun mtshams tshogs kyi mchod pa bya:__rjes su mchod bstod dngos grub gsol:__nongs pa bshags shing ye shes lha:__'od gsal gnyug ma'i dbyings su bsdu:__rig pa rang snang rol pa'i sprin:__yul kun rdo rje rta yi mgrin:__yul can bde stong phyag rgyas gdab:__dge ba bsngo zhing smon lam dang :__shis pa brjod pas mthar dbyung ngo :__sa ma ya:__gnas skabs phrin las rnam pa bzhi:__rdo rje bro yi cho gas bsgrub:__tshogs kyi dkyil 'khor chen po ru:__lu gu rgyud du sbrel bsdams nas:__so so'i las kyi dbyibs mthun pa'i:__bro ra bca' zhing sngags tshig bskul:__rkang pa'i stabs kyis gar bsgyur bas:__las kun 'grub cing phyir mi ldog:__oM:__e yi tshogs kyi dkyil 'khor du:__rdo rje rta mchog nga rgyal gyis:__me long ye shes bro brdungs pas:__nad gdon 'jigs brgyad zhi bar shog:__oM shAn+tiM ku ru swA hA:__b+h+rU~M:__wa~M gi tshogs kyi dkyil 'khor du:__rat+na rta mchog nga rgyal gyis:__mnyam nyid ye shes bro brdungs pas:__tshe bsod dpal 'byor rgyas par shog:__b+h+rU~M puSh+ti ku ru oM:__hrIH__ma yi tshogs kyi dkyil 'khor du:__pad+ma rta mchog nga rgyal gyis:__sor rtog ye shes bro brdungs pas:__khams gsum dbang du 'du bar shog:__hrIHwA shaM ku ru ho:__hU~M:__ya yi tshogs kyi dkyil 'khor du:__karma rta mchog nga rgyal gyis:__bya grub ye shes bro brdungs pas:__mi mthun phyogs kun tshar gcad shog:__hU~M mA ra ya phaTaH__thal mo sprul pa'i 'od zer sprin:__las mthun 'jig rten khams kun khyab:__zhi rgyas dbang dang mngon spyod kyi:__phrin las mtha' dag lhun grub bsam:__sa ma ya:__mthar thug 'bras bu 'grub byed ni:__rim pa dbang gis rgyud smin nas:__dam tshig rnam par dag pa yis:__gzhi don lta ba gtan la phab:__bskyed pa'i rim la legs gnas pas:__sngags kyi tshogs lam yongs su bgrod:__rlung sems las rung drod dang rtse:__thig le zag med bde rdzogs pas:__bzod pa chos mchog mngon byas te:__don gyi lhan skyes mthong ba'i lam:__de las slob dang mi slob pa'i:__zung 'jug ye shes mngon gyur te:__'khor 'das gnyis med kun gyi srog:__mnyam pa nyid las ma g.yos bzhin:__gang 'dul sgyu 'phrul drwa ba'i sprin:__rta mchog rol pa tshe 'dir 'grub:__sa ma ya:__thun mong bkra shis tshe yi lung :__zab rgyas gzhan las khyad 'phags pa:__rta mchog chen po'i ting nge 'dzin:__mi shigs snying po'i bcud len ni:__tshe bca' byin bskyed lha gsal zhing :__sngags bzla tshe 'gugs tshe bcings nas:__tshe dbang dngos grub blang bar bya:__snying po lnga yi phye ma dang :__gal gyi mthun bsdeb 'brang rgyas ni:__rta mchog zhal gyi phyag rgyar ldan:__dngos grub ya mtshan rdzas rnams bsham:__hU~M:__mi mngon rang byung dbyings kyi pho brang nas:__rig pa'i rtsal las shar ba'i dkyil 'khor la:__pad+ma dbang chen tshe yi lha tshogs rnams:__'dir gshegs 'dir bzhugs byin phobs dbang mchog bskur:__'khor 'das dwangs bcud thig le gcig tu bskyil:__dwangs ma ye shes gzi byin phyogs bcur spros:__sgrub pa'i rdzas la nus pa'i bcud len phobs:__'chi med ye shes tshe yi dngos grub stsol:__oM ha ya grI wa A yur+dz+nyA na a we sha ya hring hring pheM pheM hU~M hU~M hU~M:__bdag mdun dbang chen rta mchog dpal:__nyi ma 'char kha'i mdangs 'od can:__zhal gsum phyag drug zhabs bzhi bsgrad:__pad+ma lcags kyu zhags pa g.yas:__tshe bum lcags sgrog dril bu gsil:__gzi ldan lcags kyu thod pa 'dzin:__dpal dang dur khrod rol pa'i chas:__spyi gtsug rta mgo ljang zhur las:__hi hi'i dbyangs su rab 'tsher bas:__'khor 'das dwangs bcud dbang med sdud:__pad nyi dregs pa lha chen steng :__ye shes me dbus 'gying zhing rol:__gar dgus brjid pa'i sku mchog las:__kham rgya dmus long lce spyang sogs:__pho nya dregs pa'i 'phro 'du yis:__tshe bkug byin bskyed srid dang zhi'i:__dngos grub ma lus stsol bar bsam:__byin brlab dbang bskur spyan 'dren sogs:__las kyi rim pa ci rigs bya:__thugs kar nyi zla kha sbyor dbus:__hU~M nr-i a yi tshe rten la:__'chi med rdo rje'i sngags kyi phreng :__lu gu rgyud du bskor ba las:__'od 'phros pho nya'i thugs dam bskul:__sprul pa yang sprul bka' nyan bcas:__nam mkha'i khams nas glog ltar 'khyugs:__bar snang khams nas sprin ltar g.yos:__sa gzhi'i khams nas rlung ltar brdol:__khams gsum thams cad shig shig g.yos:__srid gsum dregs pa 'dar zhing bsngangs:__brtan g.yo'i dwangs bcud dbang med 'phrogs:__'chi med tshe yi bdud rtsi ni:__nyi ma 'char kha'i 'od lta bu:__snying dbus tshe rten la thim pas:__rdo rje tshe yi mchog thob bsam:__sngags mthar tshe yi rig pa gdags:__A yur+dz+nyA na sarba sid+d+hi hrIHdza b+h+rU~M:__skabs su thugs dam bskul ba ni:__hrIH__so sor rtog pa'i ye shes kyi:__rig pa rang shar rta mchog dpal:__gtso 'khor sprul pa yang sprul bcas:__thugs dam bskul lo gzi byin skyed:__rdo rje sku yi dkyil 'khor nas:__dmar la 'tsher ba'i 'od zer dang :__pho nya'i tshogs kyi 'phro 'du yis:__brtan pa snod kyi dwangs ma khug:__pad+ma gsung gi dkyil 'khor nas:__dmar la 'dril ba'i 'od zer dang :__pho nya'i tshogs kyi 'phro 'du yis:__srid pa bcud kyi tshe dpal khug:__'od gsal thugs kyi dkyil 'khor nas:__mthing la 'tsher ba'i 'od zer dang :__pho nya'i tshogs kyi 'phro 'du yis:__dbyings dang ye shes yon tan khug:__rnal 'byor lus ngag yid la bstim:__'chi med sgrub pa'i rdzas la khug:__mi 'gyur mi shigs rtag pa'i tshe:__dbang chen rol pa'i dngos grub stsol:__zhes bkug sgrub pa'i rdzas dang ni:__tshe yi rten la gnyis med bstim:__yab yum snyoms zhugs rjes chags kyi:__bde ba mi phyed rdo rje'i srog:__'od dmar pad+ma rA ga'i phreng :__lu gu rgyud kyi thag pa yis:__sku bcing rlung rnams dbu mar bcug:__thig le tshe rten drwa bar bsdam:__cis kyang mi chod mi shigs pa'i:__rdo rje gsum gyi srog ldan bsam:__oM AHhU~M badz+ra kA bA tsi rak+Sha rak+Sha hU~M:__khyad par rdor bzlas bum can gyi:__rnal 'byor zab mos brtan par bya:__rtags mthong tshe bum spyi bor blang :__oM:__ji snyed sangs rgyas thams cad dang :__'jig rten khams ni rab 'byams kyi:__snang ba'i dngos po'i rdo rje'i tshe:__mi 'gyur rtag pa'i dngos grub stsol:__kA ya a yur+dz+nyA na sarba sid+d+hi hrIHdzaHb+h+rU~M:__bdud rtsi mgrin par bzhag cing myang :__AH__ji snyed sangs rgyas thams cad dang :__'jig rten khams ni rab 'byams kyi:__grags pa'i dngos po pad+ma'i tshe:__mi shigs dbyangs kyi dngos grub stsol:__wA ka A yur+dz+nyA na sarba sid+d+hi hrIHdzaHb+h+rU~M:__hU~M:__ji snyed sangs rgyas thams cad dang :__'jig rten khams ni rab 'byams kyi:__rig pa'i rang bzhin 'od gsal tshe:__'pho med mchog gi dngos grub stsol:__tsit+ta A yur+dz+nyA na sarba sid+d+hi hrIHdzaHb+h+rU~M:__a:__spros pas 'khor 'das khyab pa'i 'od:__bsdus pas gong bu gcig tu 'dril:__snying dbus mi shigs thig le'i dbus:__dbang chen rol pa'i rgyas gdab bo:__a a a:__mtha' rgyas srog bslu nye'u 'don:__tshogs gtor bsod nams rgya cher bsags:__des ni tshe yi bar chad zhi:__mthar thug 'chi med mchog 'grub bo:__sa ma ya:__pad+ma dbang chen tan+t+ra ni:__mkha' ltar zab cing rgya che'i don:__nA ga rdzu na'i dgongs pa'i gdeng :__bdag nyid pad+ma rgyal po yis:__gdams pa zab cing 'dril ba 'di:__ma 'ongs rigs sad skyes bu'i don:__'phel ba'i thig le'i yi ge ni:__dwangs ma mi shigs srog tu bzung :__dus su babs tshe snod ldan la:__snyan brgyud tshul du gdams pa ste:__sngon chad gzhan du ma bstan pa'i:__snying po'i snying po 'di kho na:__sa ma ya:__'di ni ma 'ongs snyigs ma'i dus:__tshe thung nad mang longs spyod dbul:__khyad par bstan 'dzin skyes bu rnams:__glo bur bar chad sna tshogs pas:__phrin las gzhan dbang bsgyur ba dang :__bod khams thugs rje'i gdul zhing 'dir:__sangs rgyas bstan pa dar la smin:__rdzogs pa'i dus su sleb pa na:__bod khams kla klo'i dpung mang pos:__'jigs pa chen po ston pa na:__dbang chen pad+ma'i gdung 'tshob pa:__'gro 'dul sprul pa rnam gnyis dang :__mkhyen rab ye shes gar gyi dbang :__snying po'i bstan pa spel ba dang :__'dzin pa'i skyes bu zung bzhi yi:__don du gdams pa rdzogs par ston:__'chi ba med pa'i srog 'grub cing :__bar chad spyi dang khyad par du:__gzhan dbang mang po zil mnan nas:__bstan dang 'gro la phan pa dang :__sgrub pa'i lam mchog yun ring gnas:__'brel tshad don dang ldan par 'gyur:__sa ma ya:__rgya rgya rgya:__gu h+ya:__d+ha thim:__a ti gu h+ya ma hA man+t+ra sa ma ya rak+Shan+tu:__zhes pa'ang*/__slob dpon chen po nA gardzu nas byin gyis brlabs shing*/__gu ru pad+ma rgyal pos rjes su gdams pa ltar/__rdo rje'i lung gis bsngags pa'i skyes bu mchog rnams kyi gtsos las ldan gyi slob ma rnams la phan pa'i bsam pas/__sbas yul chen po a ta rong gnas kyi snying po bkra shis dpal gyi ri bo'i gnas zhal gsar du snang bar mdzad pa'i skabs/__gter chen bla ma 'gro 'dul mchog gyur bde chen zhig po gling pa ston 'khor rnams kyi spyan sngar ras dkar gyi gur khyim la brten pa'i sman ljongs nyams dga' bar pad+ma 'od gsal mdo sngags gling pas skad cig gis gtan la phabs pa'i legs byas kyis bstan 'dzin mchog rnams zhabs pad brtan cing*/___bstan 'gro'i phan bde'i dge mtshan lhun gyis grub pa'i rgyur gyur cig__/sarba dA ka l+yA NaM b+ha ba tu//