JKW-KABAB-17-TSA-011

Previous Text Back to Volume PageNext Text

གསང་བ་དོན་གྱི་ཕྲིན་ལས་ཁྲིགས་སུ་བསྡེབ་པ་ཡེ་ཤེས་ལམ་བཟང༌།

Wylie title	gsang ba don gyi phrin las khrigs su bsdeb pa ye shes lam bzang
Location	mkhyen brtse'i bka' babs Volume 17, Text 11, Pages 99-112 (Folios 1a to 7b3)
Author	ཨ་འཛོམས་འབྲུག་པ་འགྲོ་འདུལ་དཔའ་བོ་རྡོ་རྗེ་
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Citation	A 'dzoms 'brug pa 'gro 'dul dpa' bo rdo rje. gsang ba don gyi phrin las khrigs su bsdeb pa ye shes lam bzang. In Rdzong sar 'jam dbyangs mkhyen brtse'i dbang po'i bka' babs, Vol. 17: 99-112. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Activity Manual - las byang  ·  Ritual and Liturgical Texts - cho ga phyag len  ·  Contemplative Guide Books and Instructional Manuals - khrid yig
Cycle	ལྕེ་བཙུན་ཆེན་པོའི་བི་མ་ལའི་ཟབ་ཏིག་ (lce btsun chen po'i bi ma la'i zab tig)
Karchag page	JKW-KABAB-Volume-17-TSA-Karchag
Colophon	།ཅེས་གཏེར་ཆེན་རྡོ་རྗེ་འཆང་གི་ཞལ་སྔ་ནས་ཆོས་འདིའི་བདག་པོར་དབུགས་དབྱུང༌། ༢ རིག་འཛིན་སྣ་ཚོགས་རང་གྲོལ་ཞེས་མིང་གིས་ཅོད་པཎ་སྩལ། །ཁྲིད་ཡིག་དང་ཆ་ལག་རྣམས་ཆོག་ཁྲིགས་གྱིས་ཤིག་ཞེས་རྡོ་རྗེའི་བཀའ་ལུང་གནང་བ་ལྟར་བྲིས་པ་ལ་སླར་ཞུ་དག་ཕྲི་བསྣན་བཅས་བཀྲ་ཤིས་དུང་དཀར་འཁྱིལ་འདྲའི་རི་ཞོལ་རང་གནས་བསམ་གཏན་གྱི་ཁང་བུར་བླ་མ་ལ་གསོལ་བ་བཏབ་བཞིན་བྲིས་པའི་དགེ་བས་ལམ་འདིར་མོས་ཤིང་ཞུགས་པ་ཐམས་ཅད་ཚེ་འདིར་སྣང་བཞི་མཐར་ཕྱིན་ཏེ་དོན་གཉིས་ལྷུན་གྱིས་གྲུབ་པར་གྱུར་ཅིག། །དགེའོ། དགེའོ། དགེའོ།།
	ces gter chen rdo rje 'chang gi zhal snga nas chos 'di'i bdag por dbugs dbyung/__2_rig 'dzin sna tshogs rang grol zhes ming gis cod paN stsal/__/khrid yig dang cha lag rnams chog khrigs gyis shig zhes rdo rje'i bka' lung gnang ba ltar bris pa la slar zhu dag phri bsnan bcas bkra shis dung dkar 'khyil 'dra'i ri zhol rang gnas bsam gtan gyi khang bur bla ma la gsol ba btab bzhin bris pa'i dge bas lam 'dir mos shing zhugs pa thams cad tshe 'dir snang bzhi mthar phyin te don gnyis lhun gyis grub par gyur cig/__/dge'o/__dge'o/__dge'o/

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

༄༅། ། གུ ཧྱ ཨ རྠ ས མུ ཌ ཙ ར ལེ ཁ ཤཱ ཥ ཛྙཱ ནཾ སུ པ ཐཾ བི ཧ ར ཏི སྨ།།

༄༅། །གསང་བ་དོན་གྱི་ཕྲིན་ལས་ཁྲིགས་སུ་བསྡེབ་པ་ཡེ་ཤེས་ལམ་བཟང་ཞེས་བྱ་བ་བཞུགས་སོ།།

ན་མོ་བཛྲ་གུ་རུ་ཡེ། གདོད་མའི་མགོན་པོ་རྒྱལ་བ་འོད་མི་འགྱུར། །ཇི་སྙེད་གདུལ་བྱའི་མོས་ངོར་ཆུ་ཟླའི་གར། །རིགས་བདག་འོད་གསལ་སྤྲུལ་པའི་རྡོ་རྗེའི་ཞབས། །སྙིང་དབུས་མི་ཤིག་ཐིག་ལེར་རྟག་ཏུ་བསྙེན། །བཀའ་བབས་འཕགས་ནོར་གྲངས་ལྡན་ནམ་མཁའི་མཛོད། །དྲུག་པ་རྗེས་དྲན་ཡང་གསང་གདམས་པ་ཡི། །གསང་བ་དོན་གྱི་ཕྲིན་ལས་བཀླག་ཆོག་ཏུ། །ཆོ་ག་ཡེ་ཤེས་ལམ་བཟང་འདིར་གསལ་བྱ། །ཞེས་གཞུང་རྩ་བ་ལས། ཨེ་མ་ཨེ་མ་མ་འོངས་པ་ཕྱི་མ་ཕྱི་མའི་དུས་ཀྱི་ཚེ་སྙིང་ཏིག་སྙིང་པོའི་དོན་ལ་སྤྱོད་པའི་རྣལ་འབྱོར་པ་རྣམས་ཀྱིས་ཚེ་འདི་ཁོ་ན་ལ་གྲོལ་བར་འདོད་ན་ལྕེ་བཙུན་སིཾ་ཧེ་ཤྭ་ར་བདག་ཉིད་བསྒོམ་པར་བྱའོ༔ ཞེས་པའི་དོན་ཉམས་སུ་ལེན་པར་འདོད་པ་ལ། སྦྱོར་བ། དངོས་གཞི། རྗེས་ཀྱི་རིམ་པ་གསུམ་ལས། དང་པོ། །དབེན་ཞིང་ཉམས་དགའ་བའི་གནས་སུ་ལས་དང་པོ་པས་མདུན་དཀྱིལ་བླ་གཏོར་ཆུ་གཉིས་སྔོན་འགྲོའི་ཉེར་སྤྱོད་སྨན་རཀ་གཏོར་མ་སྔོན་གཏོར་དཀར་བགེགས་གཉིས་དང་ཐུན་མཚམས་ཀྱི་ཚོགས་མཆོད་སོགས་འདུ་བྱ། སྟན་བདེ་བ་ལ་བསམ་གཏན་གྱི་སྤྱོད་ལམ་དང་ལྡན་པས་འཁོད་དེ། སེམས་ཅན་ཐམས་ཅད་ཀྱི་དོན་དུ་གདན་ཐོག་འདི་ཉིད་ནས་སྣང་བཞི་མཐར་ཕྱིན་པར་བྱ་སྙམ་པའི་སེམས་བསྐྱེད་དང་ལྡན་པས། སྐྱབས་ཡུལ་བླ་མ་དང་བི་མ་ལ་དབྱེར་མེད་སྐྱབས་གནས་ཀུན་འདུས་ཀྱི་ངོ་བོར་བཞུགས་པར་མོས་པས། སྐྱབས་སུ་འགྲོ་བ་ནི། ཨཿ ཀ་དག་གཏིང་གསལ་ཆོས་ཀྱི་སྐུ༔ ལྷུན་གྲུབ་རིག་རྩལ་ལོངས་སྤྱོད་རྫོགས༔ དབྱེར་མེད་ཐུགས་རྗེ་སྤྲུལ་པའི་སྐུར༔ རང་ངོ་ཤེས་པས་སྐྱབས་སུ་མཆི༔ ལན་གསུམ། སེམས་བསྐྱེད་ནི། ཧོཿ གློ་བུར་འཁྲུལ་པའི་འགྲོ་བ་ཀུན༔ གདོད་ནས་རྣམ་དག་དབྱིངས་ཀྱི་ངང་༔ ཡེ་ཤེས་རིག་པས་རང་གྲོལ་ཕྱིར༔ ཅོག་བཞག་ཆེན་པོར་སེམས་བསྐྱེད་དོ༔ ལན་གསུམ། ཚོགས་བསགས་ནི། ཨ༔ སྣང་བཞི་མཐར་ཕྱིན་བླ་མ་ལ༔ འདུ་འབྲལ་མེད་པར་ཕྱག་འཚལ་ལོ༔ རླུང་སེམས་དག་པའི་མཆོད་སྤྲིན་འབུལ༔ སྡིག་ལྟུང་འདུས་མ་བྱས་པར་བཤགས༔ གཉིས་འཛིན་བྲལ་བས་རྗེས་ཡི་རང་༔ བརྗོད་མེད་ཆོས་འཁོར་བསྐོར་བཞིན་དུ༔ ཡོངས་གྲུབ་ཆེན་པོར་བཞུགས་གསོལ་འདེབས༔ དགེ་ཚོགས་འོད་གསལ་དབྱིངས་སུ་བསྔོ༔ ཚོགས་ཞིང་རང་ལ་བསྟིམ། སྒྲིབ་སྦྱོང་ནི། ཨཿ བདག་ཉིད་ཐ་མལ་ལུས་ཀྱི་སོགས། བསྲེག་སྦྱང་གི་དམིགས་གནད་དང་བཅས་ཡི་གེ་བརྒྱ་བ་དང༌། ཨོཾ་བཛྲ་ས་ཏྭ་ཨཱཿ ཅི་རིགས་བཟླས་ལ་མཐར་དམིགས་མེད་ཀྱི་ངང་དུ་དར་ཅིག་བཞག །སླར་ཚོགས་བསགས་ཀྱི་སླད་དུ། མཐར་ནི་ཡེ་ཤེས་སོགས། རྫོགས་སྦྱངས་སྨིན་གསུམ་དམིགས་གནད་བཅས་མཐར་མ་ཧཱ་སུ་ཁ་བཛྲ་ས་ཏྭ་ཨ་ཧྃ༔ བརྗོད་པའི་རྐྱེན་གྱིས་རང་རྡོ་རྗེ་སེམས་དཔར་གྱུར་པར་བསམ། དེ་ནས་གནས་འགྱུར་གྱི་ཚུལ་དུ། རང་ཉིད་སྐད་ཅིག་གི་དཔལ་ཆེ་མཆོག་ཧེ་རུ་ཀ་མཐིང་ནག་རྡོ་རྗེ་དང་དུང་ཁྲག་འཛིན་པ་ཡབ་ཡུམ་ཝལ་གྱིས་གསལ་ལ། དཀར་གཏོར་རྃ་ཡྃ་ཁྃ་གིས་བསང་སྦྱངས། བྷྲཱུྃ་ལས་རིན་པོ་ཆེའི་སྣོད་དུ་གཏོར་མ་བདུད་རྩིའི་རང་བཞིན་ཁ་དོག་དྲི་རོ་ནུས་པ་ཕུན་སུམ་ཚོགས་པར་གྱུར། ཨོཾ་ཨཱཿཧཱུྃ་ཧོཿ ལན་གསུམ་གྱིས་བརླབ། བྷུ་མི་པཱ་ཏི་ས་པ་རི་ཝ་ར་བཛྲ་ས་མཱ་ཛཿས་བཀུག །ཨ་ཀཱ་རོ་སོགས་ལན་གསུམ་གྱི་ཕྱག་རྒྱ་དང་བཅས་བསྔོས་ལ། གང་དག་འདིར་གནས་སོགས། མཆོད་སྦྱིན་གཏོར་མ་སོགས་ཕྲིན་ལས་བཅོལ་ལ་གཏོར་མ་ཕུལ། བགེགས་གཏོར་རྃ་ཡྃ་ཁྃ་གིས་བསང་སྦྱངས། ཨོཾ་ཨཱཿཧཱུྃ་ཧོཿས་བརླབ། ཨོཾ་སརྦ་བྷུ་ཏ་ཨ་ཀརྵ་ཡ་ཛཿས་མགྲོན་བཀུག །ཨོཾ་སརྦ་བིགྷྣཱན་བ་ལིཾ་ཏ་ཁཱ་ཧིཿ ལན་གསུམ་གྱིས་བསྔོས་ལ། ཨཿ ཡིད་བྱེད་ལྟར་སྣང་བགེགས་ཀྱི་ཚོགས༔ རང་བཞིན་བདེན་མེད་གཏོར་མ་ལོངས༔ འཁོར་ཡུག་འོད་གསལ་ཕྱག་རྒྱ་ལས༔ མི་འདའ་རྡོ་རྗེའི་མཚམས་བཅད་དོ༔ ཧཱུྃ་ཧཱུྃ་ཨཿ བགེགས་གཏོར་དོར། མཆོད་པ་བྱིན་བརླབ་ནི། ཨ༔ ཡེ་ཤེས་དབྱིངས་ལས་རིག་པའི་རྩལ༔ ལྷུན་གྲུབ་ཆེན་པོར་བྱིན་བརླབས་པས༔ སྣང་སྲིད་གཞིར་བཞེངས་མཆོད་པའི་སྤྲིན༔ འཕེལ་འགྲིབ་བྲལ་བའི་རྒྱན་དུ་ཤར༔ ཨོཾ་ཨཱཿཧཱུྃ༔ ཨ་ལ་ལ་ཧོཿ གཉིས་པ་ལྷ་བསྐྱེད་པ་ནི། ཀ་དག་གཏིང་གསལ་དེ་བཞིན་ཉིད༔ ལྷུན་གྲུབ་ཀུན་སྣང་རིག་པར་ཤར༔ ཟུང་འཇུག་རྡོ་རྗེ་ལུ་གུ་རྒྱུད༔ ཟག་མེད་ཡེ་ཤེས་འབྱུང་བའི་རྒྱུ༔ ཆོས་ཉིད་མངོན་སུམ་ཡུམ་ལྔའི་ཀློང་༔ ཉམས་སྣང་གོང་འཕེལ་གཞལ་ཡས་དབུས༔ རིག་པ་ཚད་ཕེབས་ཕྱག་རྒྱའི་གཟུགས༔ བློ་འདས་ཆོས་ཟད་ངོ་བོ་ཉིད༔ འཇའ་ལུས་འཕོ་ཆེན་རྡོ་རྗེའི་སྐུ༔ མ་འཁྲུལ་གདོད་མའི་ཧེ་རུ་ཀ༔ སིཾ་ཧེ་ཤྭ་ར་རྣལ་འབྱོར་དབང་༔ དམར་སྨུག་ཁྲོ་འཛུམ་སྒེག་པའི་ཉམས༔ རྡོ་རྗེའི་སྐྱིལ་ཀྲུང་མཉམ་གཞག་ཅན༔ འོད་གསལ་ལྟ་སྟངས་དབྱིངས་ལ་གཟིར༔ དར་དང་རིན་ཆེན་རུས་པའི་རྒྱན༔ བརྟུལ་ཞུགས་གྲུབ་པའི་ཕྱག་རྒྱས་སྤྲས༔ བ་སྤུའི་ཁུང་བུ་ཐམས་ཅད་ནས༔ འོད་གསལ་རྡོ་རྗེའི་མེ་འོད་དང་༔ རིག་རྩལ་ཁྲོ་ཆུང་སྐར་ལྟར་འཕྲོ༔ སྟེང་འོག་ཕྱོགས་མཚམས་ཐམས་ཅད་དུ༔ སྣང་སྲིད་འོད་ལྔར་འཁྲུགས་པའི་དབྱིངས༔ རྩ་རྒྱུད་བླ་མ་སྤྲིན་ལྟར་གཏིབས༔ ཡི་དམ་མཁའ་འགྲོ་བསམ་མི་ཁྱབ༔ རྡོ་རྗེའི་ཆོས་སྲུང་ལས་ལ་འདུ༔ སྨིན་མཚམས་ཆོས་ཀྱི་འབྱུང་གནས་དབུས༔ བདེ་ཆེན་ཐིག་ལེ་འོད་དུ་འབར༔ དེ་ཡི་ནམ་མཁར་ཐིག་ལེའི་ཀློང་༔ གདོད་མའི་མགོན་པོ་བི་མ་ལ༔ དཀར་གསལ་གཟི་བརྗིད་མཚུངས་པ་མེད༔ ཤངས་རྩེར་སྐྱེ་མེད་ཨ་ཡིས་མཚན༔ མཉམ་གཞག་ཐོད་པ་བཅུད་བཀང་བསྣམས༔ དར་སྔོན་སྟོད་གཡོགས་ཆོས་གོས་གསོལ༔ མངོན་སུམ་བྱིན་བརླབས་འོད་ཀྱི་སྐུ༔ འཁོར་འདས་ཐམས་ཅད་ཟིལ་གནོན་པ༔ རིག་པ་རང་བྱུང་དཀྱིལ་འཁོར་ལྷ༔ སྣང་སྟོང་ཟུང་འཇུག་ཆེན་པོའི་ངང་༔ མ་བཅོས་ཐིག་ལེ་གཅིག་ཏུ་འཁྱིལ༔ དབང་བསྐུར་རྒྱས་གདབ་ནི། ཨ༔ རྩ་རླུང་ཐིག་ལེའི་རྟོག་ཚོགས་ཀུན༔ རྡོ་རྗེ་གསུམ་དུ་རྒྱས་གདབ་ཅིང་༔ འོད་ལྔ་རྣམ་པར་དག་པའི་སྐུ༔ ཡེ་ཤེས་ལྔ་རུ་དབང་བསྐུར་རོ༔ ཨོཾ་ཨཱཿཧཱུྃཿ ཨོཾ་ཨཱཿཧཱུྃ་སྭཱ་ཧཱ༔ སྤྱན་འདྲེན་སྤཽས་རོལ་དབྱངས་དང་བཅས། ཨ༔ ངོ་བོ་ཆོས་སྐུའི་གཞལ་ཡས་ནས༔ ཀ་དག་བླ་མ་གཤེགས་སུ་གསོལ༔ རང་གྲོལ་ཆེན་པོར་བྱིན་ཕོབས་ལ༔ འཁྲུལ་པ་དག་པའི་དབང་མཆོག་སྐུར༔ རང་བཞིན་ལོངས་སྐུའི་ཞིང་ཁམས་ནས༔ ལྷུན་གྲུབ་བླ་མ་གཤེགས་སུ་གསོལ༔ རིག་རྩལ་ཆེན་པོར་བྱིན་ཕོབས་ལ༔ ཡེ་ཤེས་རྒྱས་པའི་དབང་མཆོག་སྐུར༔ ཐུགས་རྗེ་སྤྲུལ་པའི་དཀྱིལ་འཁོར་ནས༔ དབྱེར་མེད་བླ་མ་གཤེགས་སུ་གསོལ༔ སྣང་སྲིད་བཞིར་བཞེངས་བྱིན་ཕོབས་ལ༔ འཇའ་ལུས་རྡོ་རྗེའི་དབང་མཆོག་སྐུར༔ ཧཱུྃ་ཧཱུྃཿ ཡུལ་གྱི་མིང་ནི་བདེ་བ་ཆེ༔ མཁའ་འགྲོ་གསང་བའི་གནས་མཆོག་ནས༔ གདོད་མའི་མགོན་པོ་ཧེ་རུ་ཀ༔ སིཾ་ཧེ་ཤྭ་ར་གཤེགས་སུ་གསོལ༔ ཁྱེད་ཀྱི་རྗེས་སུ་བདག་སྒྲུབ་ན༔ བྱིན་གྱིས་བརླབ་ཕྱིར་གནས་འདིར་དགོངས༔ གློ་བུར་འཁྲུལ་པའི་བར་ཆད་སོལ༔ འདུ་འབྲལ་མེད་པར་དབང་སྐུར་ཅིག༔ ཨོཾ་ཨཱཿཧཱུྃ་གུ་རུ་བི་མ་ལ་མི་ཏྲ་ཧཱུྃ་ཧཱུྃ༔ ཞེས་སྤྱན་དྲངས། ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་གིས་བྱིན་བསྡུ། བཞུགས་གསོལ་ནི། ཨ༔ དབྱིངས་ནས་སྤྱན་དྲངས་ཡེ་ཤེས་པ༔ རིག་རྩལ་ལས་བྱུང་དམ་ཚིག་གི༔ ཕྱག་རྒྱའི་དཀྱིལ་འཁོར་ཆེན་པོ་འདིར༔ བྱང་ཆུབ་བར་དུ་བརྟན་པར་བཞུགས༔ ཛྙཱ་ན་ཏིཥྛ་ཨཿ ཕྱག་འཚལ་བ་ནི། ཨ༔ ནང་གསལ་གཞོན་ནུ་བུམ་སྐུ་ལས༔ རིག་པ་མི་འགྱུར་དཀྱིལ་འཁོར་ཤར༔ རང་ངོ་ཤེས་པའི་བརྡ་ཡི་ཕྱག༔ བླང་དོར་མེད་པའི་ངང་དུ་འཚལ༔ ཨ་ལ་ལ་ཧོཿ མདུན་གྱི་བི་མ་ལ་བླ་མ་དང་གཉིས་སུ་མེད་པར་མོས་ལ། མོས་གུས་གདུང་བས་དབྱངས་དང་བཅས། འོད་གསལ་སྣང་བཞི་སོགས། ཨོཾ་ཨཱཿཧཱུྃ་གུ་རུ་མི་མ་ལ་མི་ཏྲ་ཧཱུྃ་ཧཱུྃ༔ སྙིང་པོ་ཅི་རིགས་པར་བཟླས་བཞིན་དབང་བཞི་བླང་བའི་དམིགས་པ་ཡང་ཡང་བྱ། མཐར་སྤྲོ་ན་བརྒྱུད་པའི་གསོལ་འདེབས་ཀྱང་འདོན། གང་ལྟར་བླ་མའི་དཔྲལ་བའི་ཨོཾ་ལས་སོགས། སྐལ་བ་ཅན་དུ་བྱས་སོ་བརྗོད་ཅིང་བསམ་ལ། དེ་ནས་བླ་མ་འོད་དུ་ཞུ་ནས་སྨིན་མཚམས་ཀྱི་དགའ་བ་འཁྱིལ་བའི་དབུས་སུ་ཐིམ་པས་ཐིག་ལེ་དཀར་པོ་ཨ་ཡིག་གིས་མཚན་པ་སྲན་མ་ཙམ་དུ་གྱུར་པར་བསམ་ལ། ཕྱི་ནང་གི་མཆོད་པས་ཆོས་ཀྱི་དབྱིངས་གང་བར་མོས་ཏེ། ཨཿ ཡུལ་དང་དབང་པོའི་རྟོག་ཚོགས་ཀུན༔ མཆོད་པའི་ཕྱག་རྒྱ་ཆེན་པོར་རྫོགས༔ རིག་པ་རང་སྣང་རྣམ་འཕྲུལ་གྱིས༔ ཆོས་དབྱིངས་རྒྱས་པར་བཀང་སྟེ་འབུལ༔ ཨོཾ་ཨཱཿཧཱུྃ་ཛྙཱ་ན་དྷཱ་ཏུ་པཱུ་ཛ་ཧོ༔ ཨཿ སྣང་སྲིད་ཐམས་ཅད་ཀློང་ལྔའི་དབྱིངས༔ ཡེ་ཤེས་རང་གསལ་འདོད་ཡོན་ཚོགས༔ སྨན་གཏོར་རཀྟ་བྱང་ཆུབ་སེམས༔ གསལ་སྟོང་འདུས་མ་བྱས་པར་བཞེས༔ ཨོཾ་ཨཱཿཧཱུྃ༔ ཨཿ ཀ་དག་ངང་དུ་ཆོས་ཀུན་སྦྱོར༔ ལྷུན་གྲུབ་རིག་པས་གཟུང་འཛིན་བསྒྲལ༔ ཟུང་འཇུག་འོད་གསལ་རྫོགས་པ་ཆེ༔ སྤང་བླང་བསལ་བཞག་བྲལ་བར་མཆོད༔ ཨ་ཨ༔ བདག་མེད་རྡོ་རྗེ་གསུམ་གྱི་བདག་ཉིད་ཀྱི་ཡོན་ཏན་དྲན་པས་བསྟོད་པ་ནི། ཨོཾ༔ བརྟན་གཡོའི་གཟུགས་རྣམས་ཐམས་ཅད་ཀུན༔ སྣང་སྟོང་འདུས་མ་བྱས་པར་ཐིམ༔ ཟག་པ་ཟད་པའི་འོད་ཀྱི་ལུས༔ ཕྱག་འཚལ་ཡེ་ཤེས་སྐུ་མཆོག་ལ༔ ཨཱཿ ཕྱི་ནང་སྒྲ་སྐད་ཇི་སྙེད་པ༔ གྲགས་སྟོང་འགྲོ་འོང་བྲལ་བར་ཐིམ༔ འབྱུང་བ་རང་དྭངས་གཞོམ་མེད་སྐད༔ ཕྱག་འཚལ་རྡོ་རྗེའི་གསུང་མཆོག་ལ༔ ཧཱུྃ༔ གློ་བུར་གཟུང་འཛིན་རྟོག་པའི་ཚོགས༔ རིག་སྟོང་འོད་གསལ་དབྱིངས་སུ་ཐིམ༔ དྲན་པ་རང་གྲོལ་གཉུག་མའི་ཡིད༔ ཕྱག་འཚལ་གདོད་མའི་གནས་ལུགས་ལའོ༔ དེས་བྱིན་རླབས་འཇུག་པའི་ཐབས་ཁྱད་པར་ཅན་ཕྱི་གསོལ་འདེབས་ལམ་གྱི་དབང་གི་རིམ་པ་གྲུབ། ནང་རྣལ་འབྱོར་གསུམ་གྱི་རིམ་པ་ཉམས་སུུ་ལེན་པ་ལ། བདག་སིཾ་ཧེ་ཤྭ་ར་སྐུ་མདོག་ཕྱག་རྒྱ་བཞུགས་སྟངས་རྒྱན་ཆ་སོགས་རེ་རེ་བཞིན་གསལ་བ་ལ་སེམས་གཟུང༌། དེ་ལ་གོམ་པ་ན་སྐུ་སྤྱིའི་དབྱིབས་ལྷའི་གསལ་སྣང་འཇའ་ཚོན་ལྟ་བུ་ལ་ཡུན་རིང་དུ་མཉམ་པར་འཇོག །དེ་ནས་སྨིན་མཚམས་ཀྱི་ཆོས་འབྱུང་དགའ་བ་འཁྱིལ་བའི་དབུས་ཀྱི་ཐིག་ལེ་ཨས་མཚན་པ་ལ་སེམས་འཛིན་ལ་གསལ་བརྟན་གྱི་ཉམས་བྱུང་བ་ནི་སྐུ་ཕྱག་རྒྱ་ལྷའི་རྣལ་འབྱོར་རོ། །གསུང་བཟླས་པ་སྔགས་ཀྱི་རྣལ་འབྱོར་ནི། ཨ༔ ཨོཾ་ནི་ངོ་བོ་ཆོས་ཀྱི་སྐུ༔ ཨཱཿཡིག་རང་བཞིན་ལོངས་སྤྱོད་རྫོགས༔ ཧཱུྃ་ནི་ཐུགས་རྗེ་སྤྲུལ་པའི་སྐུ༔ བཛྲ་དབྱེར་མེད་ཀློང་འདས་དབྱིངས༔ གུ་རུ་ཡེ་ཤེས་བླ་མར་ཤར༔ སིཾ་ཧེ་ཤྭ་ར་འཇིགས་མེད་པ༔ དཀྱིལ་འཁོར་དབང་ཕྱུག་ཆེན་པོར་བཞེངས༔ སིདྡྷི་དབྱིངས་རིག་དངོས་གྲུབ་མཆོག༔ ཧཱུཾ་གིས་བདག་དང་གཉིས་སུ་མེད༔ ཕྱི་སྣོད་ཀློང་ལྔ་དབྱིངས་ཀྱི་དལ༔ ནང་བཅུད་ལྷུན་གྲུབ་རིག་པའི་ལྷ༔ སྒྲ་གྲགས་འགྲོ་འོང་བྱ་རྩོལ་བྲལ༔ དྲན་རྟོག་ཀ་དག་ཟང་ཐལ་ངང་༔ མི་གཡོ་མི་སྨྲ་བསམ་བརྗོད་བྲལ༔ ཁྱབ་བརྡལ་ཆེན་པོའི་ངང་ནས་བཟླ༔ ཞེས་དགོངས་པའི་སྲོག །བཟུང་ལ། ཨོཾ་ཨཱཿཧཱུྃ་བཛྲ་གུ་རུ་སིཾ་ཧེ་ཤྭ་ར་སིདྡྷི་ཧཱུྃ་ཧཱུྃ་ཧཱུྃ༔ དབྱངས་དང་བཅས་ཇི་རིགས་པར་བཟླ་བ་དང༌། རླུང་གི་འབྱིན་འཇུག་གནས་གསུམ་སྔགས་ཀྱི་སྒྲར་ཤེས་པ་དང༌། བར་རླུང་ཁ་སྦྱར་ཏེ་ཡིད་བཟླས་སམ་རྡོ་རྗེའི་བཟླས་པ་དལ་བུ་ལ་སེམས་འཛིན། སྐྱོ་ན་སྨིན་མཚམས་ཀྱི་ཐིག་ལེ་ལས་འོད་ཟེར་འཕྲོས༔ དག་པའི་ཞིང་རབ་འབྱམས་ཐམས་ཅད་དུ་ཁྱབ༔ དེ་དག་ན་གནས་པའི་སྐྱབས་གནས་དཀོན་མཆོག་རྒྱ་མཚོ་ཐམས་ཅད་དང་༔ ཁྱད་པར་དུ་འོད་གསལ་སྙིང་ཏིག་གི་བརྒྱུད་པའི་བླ་མ་རྣམས་ཀྱི་གསང་བ་གསུམ་གྱི་བྱིན་རླབས་ཐམས་ཅད་སྐུ་དང་ཡིག་འབྲུ་ཕྱག་མཚན་གྱི་རྣམ་པར་ཆར་དྲག་ཏུ་བབས་པ་ཙམ་དུ་སྤྱན་དྲངས་ནས་ཐིག་ལེ་ལ་ཐྀམ་པས་ལུས་ཐམས་ཅད་ཁྱབ་པར་བསམ༔ ཡང་འཕྲོས་མ་དག་པའི་ཞིང་ཁམས་རབ་འབྱམས་ཐམས་ཅད་ལ་ཁྱབ༔ བརྟན་གཡོ་སྣོད་བཅུད་ཐམས་ཅད་དག་པའི་ཞིང་ཁམས་རབ་འབྱམས་སུ་བསྒྱུར་བར་བསམ་ནས་འཕྲཽ་འདུའི་རྩལ་ཡང་ཡང་སྦྱོང་བ་ནི་གསུང་བཟླས་པ་སྔགས་ཀྱི་རྣལ་འབྱོར་རོ། །ཐུགས་འོད་གསལ་ཡེ་ཤེས་ཀྱི་ཉམས་ལེན་ནི། སྣོད་བཅུད་ཞིང་ཁམས་སུ་གསལ་བ་ཐམས་ཅད་རིལ་གྱིས་བསྡུས་ཏེ་རང་གི་ལུས་ལ་གཞུག༔ དེ་ཡང་འོད་དུ་ཡལ་ཏེ་སྨིན་མཚམས་ཀྱི་ཐིག་ལེ་ལ་ཐིམ་པས་ཤིན་ཏུ་འོད་གསལ་བར་བསམས་ལ་སེམས་ཡུན་རིང་དུ་འཇོག་པས་རྣམ་རྟོག་གི་རྦ་རླབས་ཞི་བའི་ཏིང་ངེ་འཛིན་མུ་མཐའ་མེད་པར་སྐྱེའོ༔ མཐར་དེ་ཡང་འཇའ་ཚོན་མཁའ་ལ་ཡལ་བ་ལྟར་དམིགས་སུ་མེད་པའི་ངང་དུ་མཉམ་པར་འཇོག་གོ༔ དེའི་ཚེ་འདི་ལྟར་ངེས་པར་བྱ་སྟེ༔ འདི་ལྟར་སྣང་བ་ཐམས་ཅད་བློས་བཀོད༔ བྱུང་ཚོར་དང་བཅས་པའི་བློ་ནི་མེད་པར་གསལ་བར་སྣང་༔ དེའི་དབྱིངས་ནི་བསམ་པའི་ཡུལ་ལས་འདས༔ སོ་སོ་རང་རིག་པའི་ཡེ་ཤེས་ཀྱི་མ་རྟེན་མེད་པར་མཐོང་བ་ནི་ཆོས་ཐམས་ཅད་ཀྱི་གནས་ལུགས་ཀ་དག་གཏིང་གསལ་འདུས་མ་བྱས་པའོ༔ དེ་ལྟར་ཁོང་དུ་ཆུད་པས་ནམ་མཁའི་རྣལ་འབྱོར་དུ་བྱ་སྟེ༔ མི་བསྒོམ་པའི་ཚུལ་གྱིས་དོན་དང་མི་འབྲལ་བ་ལ་བསླབ་བོ༔ ཚོགས་དྲུག་གི་སྣང་བ་བཀྲ་ལམ་གྱིས་ཤར་ན་དེ་ལ་མི་དཔྱོད་པར་ཆོས་ཉིད་རང་གི་ངོ་བོའི་ངང་དུ་རྩོལ་བ་གློད་ལ་ལས་ཟིན་པའི་སྐྱེས་བུ་ལྟར་སྤྱོད་དོ༔ དེའི་ཚེ་རླུང་སེམས་ཟིན་པའི་རྟགས་རྣམས་ཀྱང་རྩོལ་མེད་དུ་འབྱུང་ཞིང་འོད་གསལ་བའི་ལྷག་མཐོང་གྲུབ་པས་ཞི་བར་གནས་པ་ཉིད་དོ༔ ཞེས་གསུངས་པ་ལྟར་ཉམས་སུ་ལེན། ཐུན་མཚམས་སུ་སྤྲོས་མེད་ཚོགས་མཆོད་བྱ་བ་ནི། ཐབས་ཤེས་ཀྱི་རྫས་ཅི་འབྱོར་བཤམ་ལ། རྃ་ཡྃ་ཁྃ་གིས་བསང༌། ཨོཾ་ཨཱཿཧཱུྃ་ཧོཿས་བྱིན་གྱིས་བརླབ། ཚོགས་རྫས་རིམ་པ་གསུམ་དུ་བཀྲོལ་ལ། ཨ༔ ཆོས་ཉིད་མངོན་སུམ་བྷནྡྷ་རུ༔ ཉམས་སྣང་གོང་འཕེལ་ཚོགས་གཏོར་བཤམས༔ རིག་པ་ཚད་ཕེབས་འདོད་ཡོན་སྤྲིན༔ བློ་འདས་གདོད་མའི་ལྷ་ལ་འབུལ༔ མཆོད་པའི་ཕྱག་རྒྱ་ཆེན་པོར་བཞེས༔ ཡིད་བྱེད་མཚན་མའི་འཁྲུལ་པ་བཤགས༔ རླུང་སེམས་ཀ་དག་དབྱིངས་སུ་སྒྲོལ༔ རགས་ལུས་ལྷུན་གྲུབ་ཆེན་པོར་ཟློག༔ སྒོ་ཡུལ་རླུང་རིག་འོད་གསལ་ངང་༔ སྣང་བཞི་མཐར་ཕྱིན་དངོས་གྲུབ་སྩོལ༔ ཨོཾ་ཨཱཿཧཱུྃ་མ་ཧཱ་ཛྙཱ་ན་ག་ན་ཙཀྲ་པཱུ་ཛ་ཧོ༔ དང་པོའི་ཕུད་ལྷ་ལ་མཆོད། གཉིས་པ་དངོས་གྲུབ་ཏུ་རོལ་པ་ནི། རྡོ་རྗེ་ཕུང་པོའི་གྲོང་ཁྱེར་དུ༔ གདོད་ནས་དག་པའི་དཀྱིལ་འཁོར་པ༔ ཆོས་ཉིད་གསལ་ཁྱབ་ཆེན་པོ་ངང་༔ ཟག་མེད་བདེ་བའི་ཕྱག་རྒྱས་རོལ༔ ཨ་ལ་ལ་ཧོ༔ ལྷག་མ་ལ་བདུད་རྩི་བྲན་ལ། ཨོཾ་ཨཱཿཧཱུྃ་ཧོཿས་བརླབ། ཕེཾ་གྱིས་མགྲོན་བཀུག །ཨ་ཀཱ་རོས་བསྔོས་ཏེ། ཨ༔ དབྱིངས་ལས་ཡེ་ཤེས་རང་ཤར་བའི༔ ཨེ་ཀ་ཛ་ཊཱི་རལ་གཅྀག་མ༔ འོད་གསལ་རིགས་པ་ཟང་ཐལ་སྐུ༔ ཁྱབ་འཇུག་ཆེན་པོ་སྒྲ་གཅན་འཛིན༔ ཟུང་འཇུག་དྭངས་མའི་ཐིག་ལེ་འཛིན༔ རྡོ་རྗེ་དགྲ་འདུལ་ལེགས་པ་རྩལ༔ ཐུགས་རྗེའི་ཆོ་འཕྲུལ་བསམ་ཡས་པ༔ འབུམ་ཕྲག་དྲེགས་པའི་སྡེ་ཚོགས་ཀུན༔ དགོངས་བརྡ་སྙན་ནས་བརྒྱུད་པ་ཡི༔ རྒྱལ་བ་རིག་འཛིན་རྣལ་འབྱོར་དབང་༔ ཇི་སྙེད་འདུས་པའི་ཚོགས་ཆེན་དང་༔ འཁོར་འདས་ཟིལ་གནོན་ཧེ་རུ་ཀ༔ དཔལ་ཆེན་སིཾ་ཧེ་ཤྭ་ར་ཡིས༔ ཇི་ལྟར་བཀའ་བསྒོས་དམ་བཞག་བཞིན༔ དུར་ཁྲོད་རོལ་པའི་གནས་འདིར་བྱོན༔ ཁམས་ལྔ་དག་པའི་སྨན་ཕུད་དང་༔ འབྱུང་ལྔའི་དྭངས་མ་བ་ལིཾ་ཏ༔ དུག་ལྔ་བསྒྲལ་བའི་དམར་ཆེན་པོ༔ དཔལ་གྱི་ཕམ་ཕབ་ཆེན་པོར་བཞེས༔ ཚོགས་ལྷག་བཏེགས་ཏེ། ཐེག་མཆོག་ལམ་དུ་ཞུགས་པ་ལ༔ གློ་བུར་བདུད་བཞིའི་བར་ཆད་ཟློག༔ འཁོར་འདས་རུ་ཤན་དབྱེ་བའི་ཚེ༔ གཟུང་འཛིན་འཁྲུལ་པའི་ས་བོན་སྒྲོལ༔ རིག་པ་ཀ་དག་ལྟ་བ་ལ༔ ཡིད་བྱེད་མཚན་མའི་རྟོག་པ་སྲུངས༔ རིག་རྩལ་མངོན་སུམ་སྣང་བའི་ཚེ༔ རླུང་སེམས་འགྱུ་བ་དབྱིངས་སུ་ནོན༔ མཐར་ཐུག་གཞི་དབྱིངས་གཉུག་མའི་ཀློང་༔ གཞི་སྣང་རིག་པའི་ཕྲིན་ལས་སྒྲུབས༔ ས་མ་ཡ་ཧོ༔ ཞེས་ཕྱི་རོལ་དུ་མཆོད། གསུམ་པ་རྗེས་ཀྱི་རིམ་པ་ལ། མཆོད་སྟོད་རྒྱས་བསྡུས་སྐབས་བསྟུན་བྱ། དངོས་གྲུབ་བླང་བ་ནི། ཨ༔ མངོན་སུམ་ཡེ་ཤེས་ལས་བྱུང་བའི༔ ཉམས་སྣང་གོང་འཕེལ་ཕོ་བྲང་ནས༔ ཚད་ཕེབས་དོན་གྱི་ལྷ་ཚོགས་ཀྱིས༔ བློ་འདས་ཆོས་ཟད་དངོས་གྲུབ་སྩོལ༔ མ་ཧཱ་གུ་རུ་ཀ་ཡ་ཝཱཀྐ་ཙིཏྟ་སརྦ་སིདྡྷི་ཕ་ལ་ཧོ༔ ཞེས་བསྒྲུབ་རྫས་ཡོད་ན་དངོས་གྲུབ་ཏུ་རོལ། བཤགས་པ་ནི། ཨཿ གཟུང་འཛིན་རྣམ་རྟོག་ལས་བྱུང་བའི༔ ལས་དང་ཉོན་མོངས་སྡིག་སྒྲིབ་ཀུན༔ རང་བཞིན་སྐྱེ་མེད་ངང་ཉིད་དུ༔ འཁོར་གསུམ་མཚན་མ་བྲལ་བར་བཤགས༔ ཡེ་གེ་བརྒྱ་པ་བརྗོད། གནས་ལུགས་ཀྱི་ངང་དུ་ཅི་གནས་སུ་མཉམ་པར་བཞག །ཉེར་བསྡུ་ནི། ཨ༔ གཞི་སྣང་ཕྱག་རྒྱའི་དཀྱིལ་འཁོར་ལྷ༔ གཞི་དབྱིངས་གདོད་མའི་ཀློང་དུ་ཐིམ༔ སླར་ཡང་ཕྱིར་གསལ་གཟུགས་ཀྱི་སྐུ༔ དུས་གསུམ་དུས་མེད་རྟག་ཏུ་ཤར༔ ཨ་ཨ་ཨ༔ བསྔོ་བ་དང་སྨོན་ལམ་ནི། ལྷུན་གྱིས་གྲུབ་པའི་དགེ་ཚོགས་ཀུན༔ ཀ་དག་གཞོན་ནུ་བུམ་སྐུར་བསྔོ༔ ཟུང་འཇུག་ཁྱད་ཆོས་དྲུག་ལྡན་གྱི༔ ཡེ་ཤེས་ཆེན་པོར་རོ་གཅིག་ཤོག༔ བཀྲ་ཤིས་ནི། ཧོ༔ ལྟ་བ་ངང་བཞག་བློ་ལས་འདས༔ ཆོས་ཀྱི་སྐུ་ཡི་བཀྲ་ཤིས་ཤོག༔ སྒོམ་པ་མངོན་སུམ་ཚད་ལ་ཕེབས༔ ལོངས་སྤྱོད་རྫོགས་སྐུའི་བཀྲ་ཤིས་ཤོག༔ སྤྱོད་པ་དབྱིངས་རིག་འདུ་འབྲལ་མེད༔ སྤྲུལ་པའི་སྐུ་ཡི་བཀྲ་ཤིས་ཤོག༔ འབྲས་བུ་གཞི་སྣང་ཐིག་ལེ་ཆེར༔ དབྱེར་མེད་ཆེན་པོའི་བཀྲ་ཤིས་ཤོག༔ གཞན་ཡང་བཀྲ་ཤིས་ཅི་རིགས་བརྗོད་དོ། དེ་ལྟར་ལྕེ་བཙུན་སྙིག་ཏིག་གི་བླ་མའི་རྣལ་འབྱོར་ནང་ལྟར་བསྒྲུབ་པ་འདི་ཉིད་ཉམས་སུ་བླང་བའི་ཡོན་ཏན་ནི། གཞུང་རྩ་བ་ལས། རྣལ་འབྱོར་འདི་བདུན་ཕྲག་གཅིག་ཏུ་གཡེང་བ་ཐམས་ཅད་སྤང་ཏེ་བསྒོམས་པས་ཀྱང་དངོས་སམ་ཉམས་དང་རྨི་ལམ་དུ་གྲུབ་པ་ཆེན་པོའི་ཡེ་ཤེས་ཀྱི་སྐུ་བརྙེས་པའི་བི་མ་མི་དྲ་དང་༔ བདག་ཉིད་སིཾ་ཧེ་ཤྭ་རས་བྱིན་གྱིས་བརློབ་སྟེ༔ དེའི་ཚེ་སྔར་མ་ཤེས་པའི་ཟབ་མོའི་ཚིག་དོན་མང་དུ་ཤེས་པ་དང་༔ ཏིང་ངེ་འཛིན་གྱི་སྒོ་རྙེད་པར་གདོན་མི་འཚལ་ལོ༔ ཞེས་རྡོ་རྗེའི་ལུང་གིས་བསྔགས་པ་བཞིན་ཁོ་བོས་སྙོམ་ལས་ངང་དུ་བདུན་ཕྲག་གསུམ་དུ་ཉམས་སུ་བླང་བས་རང་སྐལ་དང་མཐུན་པའི་བྱིན་རླབས་ཀྱི་མཚན་མ་མངོན་སུམ་མཐོང་བ་ཡིན་ནོ། །གང་ཞིག་ཚེ་འདིར་གྲོལ་འདོད་སྐལ་ལྡན་གྱིས། །ལམ་བཟང་བཀླག་ཆོག་བཀོད་པའི་དགེ་བ་ཡིས། །འགྲོ་ཀུན་འབད་མེད་ཡེ་ཤེས་བླ་མའི་སར། །བདེ་ཀླག་ཉིད་དུ་བགྲོད་པའི་རྒྱུར་གྱུར་ཅིག །ཅེས་གཏེར་ཆེན་རྡོ་རྗེ་འཆང་གི་ཞལ་སྔ་ནས་ཆོས་འདིའི་བདག་པོར་དབུགས་དབྱུང༌། ༢ རིག་འཛིན་སྣ་ཚོགས་རང་གྲོལ་ཞེས་མིང་གིས་ཅོད་པཎ་སྩལ། །ཁྲིད་ཡིག་དང་ཆ་ལག་རྣམས་ཆོག་ཁྲིགས་གྱིས་ཤིག་ཞེས་རྡོ་རྗེའི་བཀའ་ལུང་གནང་བ་ལྟར་བྲིས་པ་ལ་སླར་ཞུ་དག་ཕྲི་བསྣན་བཅས་བཀྲ་ཤིས་དུང་དཀར་འཁྱིལ་འདྲའི་རི་ཞོལ་རང་གནས་བསམ་གཏན་གྱི་ཁང་བུར་བླ་མ་ལ་གསོལ་བ་བཏབ་བཞིན་བྲིས་པའི་དགེ་བས་ལམ་འདིར་མོས་ཤིང་ཞུགས་པ་ཐམས་ཅད་ཚེ་འདིར་སྣང་བཞི་མཐར་ཕྱིན་ཏེ་དོན་གཉིས་ལྷུན་གྱིས་གྲུབ་པར་གྱུར་ཅིག། །དགེའོ། དགེའོ། དགེའོ།། །།

[edit]

@#/__/_gu_h+ya_a_r+tha_sa_mu_Da_tsa_ra_le_kha_shA_Sha_dz+nyA_naM_su_pa_thaM_bi_ha_ra_ti_sma//___@#/___/gsang ba don gyi phrin las khrigs su bsdeb pa ye shes lam bzang zhes bya ba bzhugs so//__na mo badz+ra gu ru ye/__gdod ma'i mgon po rgyal ba 'od mi 'gyur/__/ji snyed gdul bya'i mos ngor chu zla'i gar/__/rigs bdag 'od gsal sprul pa'i rdo rje'i zhabs/__/snying dbus mi shig thig ler rtag tu bsnyen/__/bka' babs 'phags nor grangs ldan nam mkha'i mdzod/__/drug pa rjes dran yang gsang gdams pa yi/__/gsang ba don gyi phrin las bklag chog tu/__/cho ga ye shes lam bzang 'dir gsal bya/__/zhes gzhung rtsa ba las/__e ma e ma ma 'ongs pa phyi ma phyi ma'i dus kyi tshe snying tig snying po'i don la spyod pa'i rnal 'byor pa rnams kyis tshe 'di kho na la grol bar 'dod na lce btsun siM he shwa ra bdag nyid bsgom par bya'o:__zhes pa'i don nyams su len par 'dod pa la/__sbyor ba/__dngos gzhi/__rjes kyi rim pa gsum las/__dang po/__/dben zhing nyams dga' ba'i gnas su las dang po pas mdun dkyil bla gtor chu gnyis sngon 'gro'i nyer spyod sman raka gtor ma sngon gtor dkar bgegs gnyis dang thun mtshams kyi tshogs mchod sogs 'du bya/__stan bde ba la bsam gtan gyi spyod lam dang ldan pas 'khod de/__sems can thams cad kyi don du gdan thog 'di nyid nas snang bzhi mthar phyin par bya snyam pa'i sems bskyed dang ldan pas/__skyabs yul bla ma dang bi ma la dbyer med skyabs gnas kun 'dus kyi ngo bor bzhugs par mos pas/__skyabs su 'gro ba ni/__aH__ka dag gting gsal chos kyi sku:__lhun grub rig rtsal longs spyod rdzogs:__dbyer med thugs rje sprul pa'i skur:__rang ngo shes pas skyabs su mchi:__lan gsum/__sems bskyed ni/__hoH__glo bur 'khrul pa'i 'gro ba kun:__gdod nas rnam dag dbyings kyi ngang :__ye shes rig pas rang grol phyir:__cog bzhag chen por sems bskyed do:__lan gsum/__tshogs bsags ni/__a:__snang bzhi mthar phyin bla ma la:__'du 'bral med par phyag 'tshal lo:__rlung sems dag pa'i mchod sprin 'bul:__sdig ltung 'dus ma byas par bshags:__gnyis 'dzin bral bas rjes yi rang :__brjod med chos 'khor bskor bzhin du:__yongs grub chen por bzhugs gsol 'debs:__dge tshogs 'od gsal dbyings su bsngo:__tshogs zhing rang la bstim/__sgrib sbyong ni/__aH__bdag nyid tha mal lus kyi sogs/__bsreg sbyang gi dmigs gnad dang bcas yi ge brgya ba dang*/__oM badz+ra sa twa AH__ci rigs bzlas la mthar dmigs med kyi ngang du dar cig bzhag__/slar tshogs bsags kyi slad du/__mthar ni ye shes sogs/__rdzogs sbyangs smin gsum dmigs gnad bcas mthar ma hA su kha badz+ra sa twa a ha~M:__brjod pa'i rkyen gyis rang rdo rje sems dpar gyur par bsam/__de nas gnas 'gyur gyi tshul du/__rang nyid skad cig gi dpal che mchog he ru ka mthing nag rdo rje dang dung khrag 'dzin pa yab yum wal gyis gsal la/__dkar gtor ra~M ya~M kha~M gis bsang sbyangs/__b+h+rU~M las rin po che'i snod du gtor ma bdud rtsi'i rang bzhin kha dog dri ro nus pa phun sum tshogs par gyur/__oM AHhU~M hoH__lan gsum gyis brlab/__b+hu mi pA ti sa pa ri wa ra badz+ra sa mA dzaHsa bkug__/a kA ro sogs lan gsum gyi phyag rgya dang bcas bsngos la/__gang dag 'dir gnas sogs/__mchod sbyin gtor ma sogs phrin las bcol la gtor ma phul/__bgegs gtor ra~M ya~M kha~M gis bsang sbyangs/__oM AHhU~M hoHsa brlab/__oM sarba b+hu ta a kar+Sha ya dzaHsa mgron bkug__/oM sarba big+h+nAn ba liM ta khA hiH__lan gsum gyis bsngos la/__aH__yid byed ltar snang bgegs kyi tshogs:__rang bzhin bden med gtor ma longs:__'khor yug 'od gsal phyag rgya las:__mi 'da' rdo rje'i mtshams bcad do:__hU~M hU~M aH__bgegs gtor dor/__mchod pa byin brlab ni/__a:__ye shes dbyings las rig pa'i rtsal:__lhun grub chen por byin brlabs pas:__snang srid gzhir bzhengs mchod pa'i sprin:__'phel 'grib bral ba'i rgyan du shar:__oM AHhU~M:__a la la hoH__gnyis pa lha bskyed pa ni/__ka dag gting gsal de bzhin nyid:__lhun grub kun snang rig par shar:__zung 'jug rdo rje lu gu rgyud:__zag med ye shes 'byung ba'i rgyu:__chos nyid mngon sum yum lnga'i klong :__nyams snang gong 'phel gzhal yas dbus:__rig pa tshad phebs phyag rgya'i gzugs:__blo 'das chos zad ngo bo nyid:__'ja' lus 'pho chen rdo rje'i sku:__ma 'khrul gdod ma'i he ru ka:__siM he shwa ra rnal 'byor dbang :__dmar smug khro 'dzum sgeg pa'i nyams:__rdo rje'i skyil krung mnyam gzhag can:__'od gsal lta stangs dbyings la gzir:__dar dang rin chen rus pa'i rgyan:__brtul zhugs grub pa'i phyag rgyas spras:__ba spu'i khung bu thams cad nas:__'od gsal rdo rje'i me 'od dang :__rig rtsal khro chung skar ltar 'phro:__steng 'og phyogs mtshams thams cad du:__snang srid 'od lngar 'khrugs pa'i dbyings:__rtsa rgyud bla ma sprin ltar gtibs:__yi dam mkha' 'gro bsam mi khyab:__rdo rje'i chos srung las la 'du:__smin mtshams chos kyi 'byung gnas dbus:__bde chen thig le 'od du 'bar:__de yi nam mkhar thig le'i klong :__gdod ma'i mgon po bi ma la:__dkar gsal gzi brjid mtshungs pa med:__shangs rtser skye med a yis mtshan:__mnyam gzhag thod pa bcud bkang bsnams:__dar sngon stod g.yogs chos gos gsol:__mngon sum byin brlabs 'od kyi sku:__'khor 'das thams cad zil gnon pa:__rig pa rang byung dkyil 'khor lha:__snang stong zung 'jug chen po'i ngang :__ma bcos thig le gcig tu 'khyil:__dbang bskur rgyas gdab ni/__a:__rtsa rlung thig le'i rtog tshogs kun:__rdo rje gsum du rgyas gdab cing :__'od lnga rnam par dag pa'i sku:__ye shes lnga ru dbang bskur ro:__oM AHhU~MH__oM AHhU~M swA hA:__spyan 'dren spaus rol dbyangs dang bcas/__a:__ngo bo chos sku'i gzhal yas nas:__ka dag bla ma gshegs su gsol:__rang grol chen por byin phobs la:__'khrul pa dag pa'i dbang mchog skur:__rang bzhin longs sku'i zhing khams nas:__lhun grub bla ma gshegs su gsol:__rig rtsal chen por byin phobs la:__ye shes rgyas pa'i dbang mchog skur:__thugs rje sprul pa'i dkyil 'khor nas:__dbyer med bla ma gshegs su gsol:__snang srid bzhir bzhengs byin phobs la:__'ja' lus rdo rje'i dbang mchog skur:__hU~M hU~MH__yul gyi ming ni bde ba che:__mkha' 'gro gsang ba'i gnas mchog nas:__gdod ma'i mgon po he ru ka:__siM he shwa ra gshegs su gsol:__khyed kyi rjes su bdag sgrub na:__byin gyis brlab phyir gnas 'dir dgongs:__glo bur 'khrul pa'i bar chad sol:__'du 'bral med par dbang skur cig:__oM AHhU~M gu ru bi ma la mi tra hU~M hU~M:__zhes spyan drangs/__hU~M hU~M hU~M hU~M hU~M gis byin bsdu/__bzhugs gsol ni/__a:__dbyings nas spyan drangs ye shes pa:__rig rtsal las byung dam tshig gi:__phyag rgya'i dkyil 'khor chen po 'dir:__byang chub bar du brtan par bzhugs:__dz+nyA na tiSh+Tha aH__phyag 'tshal ba ni/__a:__nang gsal gzhon nu bum sku las:__rig pa mi 'gyur dkyil 'khor shar:__rang ngo shes pa'i brda yi phyag:__blang dor med pa'i ngang du 'tshal:__a la la hoH__mdun gyi bi ma la bla ma dang gnyis su med par mos la/__mos gus gdung bas dbyangs dang bcas/__'od gsal snang bzhi sogs/__oM AHhU~M gu ru mi ma la mi tra hU~M hU~M:__snying po ci rigs par bzlas bzhin dbang bzhi blang ba'i dmigs pa yang yang bya/__mthar spro na brgyud pa'i gsol 'debs kyang 'don/__gang ltar bla ma'i dpral ba'i oM las sogs/__skal ba can du byas so brjod cing bsam la/__de nas bla ma 'od du zhu nas smin mtshams kyi dga' ba 'khyil ba'i dbus su thim pas thig le dkar po a yig gis mtshan pa sran ma tsam du gyur par bsam la/__phyi nang gi mchod pas chos kyi dbyings gang bar mos te/__aH__yul dang dbang po'i rtog tshogs kun:__mchod pa'i phyag rgya chen por rdzogs:__rig pa rang snang rnam 'phrul gyis:__chos dbyings rgyas par bkang ste 'bul:__oM AHhU~M dz+nyA na d+hA tu pU dza ho:__aH__snang srid thams cad klong lnga'i dbyings:__ye shes rang gsal 'dod yon tshogs:__sman gtor rak+ta byang chub sems:__gsal stong 'dus ma byas par bzhes:__oM AHhU~M:__aH__ka dag ngang du chos kun sbyor:__lhun grub rig pas gzung 'dzin bsgral:__zung 'jug 'od gsal rdzogs pa che:__spang blang bsal bzhag bral bar mchod:__a a:__bdag med rdo rje gsum gyi bdag nyid kyi yon tan dran pas bstod pa ni/__oM:__brtan g.yo'i gzugs rnams thams cad kun:__snang stong 'dus ma byas par thim:__zag pa zad pa'i 'od kyi lus:__phyag 'tshal ye shes sku mchog la:__AH__phyi nang sgra skad ji snyed pa:__grags stong 'gro 'ong bral bar thim:__'byung ba rang dwangs gzhom med skad:__phyag 'tshal rdo rje'i gsung mchog la:__hU~M:__glo bur gzung 'dzin rtog pa'i tshogs:__rig stong 'od gsal dbyings su thim:__dran pa rang grol gnyug ma'i yid:__phyag 'tshal gdod ma'i gnas lugs la'o:__des byin rlabs 'jug pa'i thabs khyad par can phyi gsol 'debs lam gyi dbang gi rim pa grub/__nang rnal 'byor gsum gyi rim pa nyams su+u len pa la/__bdag siM he shwa ra sku mdog phyag rgya bzhugs stangs rgyan cha sogs re re bzhin gsal ba la sems gzung*/__de la gom pa na sku spyi'i dbyibs lha'i gsal snang 'ja' tshon lta bu la yun ring du mnyam par 'jog__/de nas smin mtshams kyi chos 'byung dga' ba 'khyil ba'i dbus kyi thig le as mtshan pa la sems 'dzin la gsal brtan gyi nyams byung ba ni sku phyag rgya lha'i rnal 'byor ro/__/gsung bzlas pa sngags kyi rnal 'byor ni/__a:__oM ni ngo bo chos kyi sku:__AHyig rang bzhin longs spyod rdzogs:__hU~M ni thugs rje sprul pa'i sku:__badz+ra dbyer med klong 'das dbyings:__gu ru ye shes bla mar shar:__siM he shwa ra 'jigs med pa:__dkyil 'khor dbang phyug chen por bzhengs:__sid+d+hi dbyings rig dngos grub mchog:__hUM gis bdag dang gnyis su med:__phyi snod klong lnga dbyings kyi dal:__nang bcud lhun grub rig pa'i lha:__sgra grags 'gro 'ong bya rtsol bral:__dran rtog ka dag zang thal ngang :__mi g.yo mi smra bsam brjod bral:__khyab brdal chen po'i ngang nas bzla:__zhes dgongs pa'i srog__/bzung la/__oM AHhU~M badz+ra gu ru siM he shwa ra sid+d+hi hU~M hU~M hU~M:__dbyangs dang bcas ji rigs par bzla ba dang*/__rlung gi 'byin 'jug gnas gsum sngags kyi sgrar shes pa dang*/__bar rlung kha sbyar te yid bzlas sam rdo rje'i bzlas pa dal bu la sems 'dzin/__skyo na smin mtshams kyi thig le las 'od zer 'phros:__dag pa'i zhing rab 'byams thams cad du khyab:__de dag na gnas pa'i skyabs gnas dkon mchog rgya mtsho thams cad dang :__khyad par du 'od gsal snying tig gi brgyud pa'i bla ma rnams kyi gsang ba gsum gyi byin rlabs thams cad sku dang yig 'bru phyag mtshan gyi rnam par char drag tu babs pa tsam du spyan drangs nas thig le la th-im pas lus thams cad khyab par bsam:__yang 'phros ma dag pa'i zhing khams rab 'byams thams cad la khyab:__brtan g.yo snod bcud thams cad dag pa'i zhing khams rab 'byams su bsgyur bar bsam nas 'phrau 'du'i rtsal yang yang sbyong ba ni gsung bzlas pa sngags kyi rnal 'byor ro/__/thugs 'od gsal ye shes kyi nyams len ni/__snod bcud zhing khams su gsal ba thams cad ril gyis bsdus te rang gi lus la gzhug:__de yang 'od du yal te smin mtshams kyi thig le la thim pas shin tu 'od gsal bar bsams la sems yun ring du 'jog pas rnam rtog gi rba rlabs zhi ba'i ting nge 'dzin mu mtha' med par skye'o:__mthar de yang 'ja' tshon mkha' la yal ba ltar dmigs su med pa'i ngang du mnyam par 'jog go:__de'i tshe 'di ltar nges par bya ste:__'di ltar snang ba thams cad blos bkod:__byung tshor dang bcas pa'i blo ni med par gsal bar snang :__de'i dbyings ni bsam pa'i yul las 'das:__so so rang rig pa'i ye shes kyi ma rten med par mthong ba ni chos thams cad kyi gnas lugs ka dag gting gsal 'dus ma byas pa'o:__de ltar khong du chud pas nam mkha'i rnal 'byor du bya ste:__mi bsgom pa'i tshul gyis don dang mi 'bral ba la bslab bo:__tshogs drug gi snang ba bkra lam gyis shar na de la mi dpyod par chos nyid rang gi ngo bo'i ngang du rtsol ba glod la las zin pa'i skyes bu ltar spyod do:__de'i tshe rlung sems zin pa'i rtags rnams kyang rtsol med du 'byung zhing 'od gsal ba'i lhag mthong grub pas zhi bar gnas pa nyid do:__zhes gsungs pa ltar nyams su len/__thun mtshams su spros med tshogs mchod bya ba ni/__thabs shes kyi rdzas ci 'byor bsham la/__ra~M ya~M kha~M gis bsang*/__oM AHhU~M hoHsa byin gyis brlab/__tshogs rdzas rim pa gsum du bkrol la/__a:__chos nyid mngon sum b+han+d+ha ru:__nyams snang gong 'phel tshogs gtor bshams:__rig pa tshad phebs 'dod yon sprin:__blo 'das gdod ma'i lha la 'bul:__mchod pa'i phyag rgya chen por bzhes:__yid byed mtshan ma'i 'khrul pa bshags:__rlung sems ka dag dbyings su sgrol:__rags lus lhun grub chen por zlog:__sgo yul rlung rig 'od gsal ngang :__snang bzhi mthar phyin dngos grub stsol:__oM AHhU~M ma hA dz+nyA na ga na tsakra pU dza ho:__dang po'i phud lha la mchod/__gnyis pa dngos grub tu rol pa ni/__rdo rje phung po'i grong khyer du:__gdod nas dag pa'i dkyil 'khor pa:__chos nyid gsal khyab chen po ngang :__zag med bde ba'i phyag rgyas rol:__a la la ho:__lhag ma la bdud rtsi bran la/__oM AHhU~M hoHsa brlab/__pheM gyis mgron bkug__/a kA ros bsngos te/__a:__dbyings las ye shes rang shar ba'i:__e ka dza TI ral gc-ig ma:__'od gsal rigs pa zang thal sku:__khyab 'jug chen po sgra gcan 'dzin:__zung 'jug dwangs ma'i thig le 'dzin:__rdo rje dgra 'dul legs pa rtsal:__thugs rje'i cho 'phrul bsam yas pa:__'bum phrag dregs pa'i sde tshogs kun:__dgongs brda snyan nas brgyud pa yi:__rgyal ba rig 'dzin rnal 'byor dbang :__ji snyed 'dus pa'i tshogs chen dang :__'khor 'das zil gnon he ru ka:__dpal chen siM he shwa ra yis:__ji ltar bka' bsgos dam bzhag bzhin:__dur khrod rol pa'i gnas 'dir byon:__khams lnga dag pa'i sman phud dang :__'byung lnga'i dwangs ma ba liM ta:__dug lnga bsgral ba'i dmar chen po:__dpal gyi pham phab chen por bzhes:__tshogs lhag btegs te/__theg mchog lam du zhugs pa la:__glo bur bdud bzhi'i bar chad zlog:__'khor 'das ru shan dbye ba'i tshe:__gzung 'dzin 'khrul pa'i sa bon sgrol:__rig pa ka dag lta ba la:__yid byed mtshan ma'i rtog pa srungs:__rig rtsal mngon sum snang ba'i tshe:__rlung sems 'gyu ba dbyings su non:__mthar thug gzhi dbyings gnyug ma'i klong :__gzhi snang rig pa'i phrin las sgrubs:__sa ma ya ho:__zhes phyi rol du mchod/__gsum pa rjes kyi rim pa la/__mchod stod rgyas bsdus skabs bstun bya/__dngos grub blang ba ni/__a:__mngon sum ye shes las byung ba'i:__nyams snang gong 'phel pho brang nas:__tshad phebs don gyi lha tshogs kyis:__blo 'das chos zad dngos grub stsol:__ma hA gu ru ka ya wAk+ka tsit+ta sarba sid+d+hi pha la ho:__zhes bsgrub rdzas yod na dngos grub tu rol/__bshags pa ni/__aH__gzung 'dzin rnam rtog las byung ba'i:__las dang nyon mongs sdig sgrib kun:__rang bzhin skye med ngang nyid du:__'khor gsum mtshan ma bral bar bshags:__ye ge brgya pa brjod/__gnas lugs kyi ngang du ci gnas su mnyam par bzhag__/nyer bsdu ni/__a:__gzhi snang phyag rgya'i dkyil 'khor lha:__gzhi dbyings gdod ma'i klong du thim:__slar yang phyir gsal gzugs kyi sku:__dus gsum dus med rtag tu shar:__a a a:__bsngo ba dang smon lam ni/__lhun gyis grub pa'i dge tshogs kun:__ka dag gzhon nu bum skur bsngo:__zung 'jug khyad chos drug ldan gyi:__ye shes chen por ro gcig shog:__bkra shis ni/__ho:__lta ba ngang bzhag blo las 'das:__chos kyi sku yi bkra shis shog:__sgom pa mngon sum tshad la phebs:__longs spyod rdzogs sku'i bkra shis shog:__spyod pa dbyings rig 'du 'bral med:__sprul pa'i sku yi bkra shis shog:__'bras bu gzhi snang thig le cher:__dbyer med chen po'i bkra shis shog:__gzhan yang bkra shis ci rigs brjod do/__de ltar lce btsun snyig tig gi bla ma'i rnal 'byor nang ltar bsgrub pa 'di nyid nyams su blang ba'i yon tan ni/__gzhung rtsa ba las/__rnal 'byor 'di bdun phrag gcig tu g.yeng ba thams cad spang te bsgoms pas kyang dngos sam nyams dang rmi lam du grub pa chen po'i ye shes kyi sku brnyes pa'i bi ma mi dra dang :__bdag nyid siM he shwa ras byin gyis brlob ste:__de'i tshe sngar ma shes pa'i zab mo'i tshig don mang du shes pa dang :__ting nge 'dzin gyi sgo rnyed par gdon mi 'tshal lo:__zhes rdo rje'i lung gis bsngags pa bzhin kho bos snyom las ngang du bdun phrag gsum du nyams su blang bas rang skal dang mthun pa'i byin rlabs kyi mtshan ma mngon sum mthong ba yin no/__/gang zhig tshe 'dir grol 'dod skal ldan gyis/__/lam bzang bklag chog bkod pa'i dge ba yis/__/'gro kun 'bad med ye shes bla ma'i sar/__/bde klag nyid du bgrod pa'i rgyur gyur cig__/ces gter chen rdo rje 'chang gi zhal snga nas chos 'di'i bdag por dbugs dbyung*/__2_rig 'dzin sna tshogs rang grol zhes ming gis cod paN stsal/__/khrid yig dang cha lag rnams chog khrigs gyis shig zhes rdo rje'i bka' lung gnang ba ltar bris pa la slar zhu dag phri bsnan bcas bkra shis dung dkar 'khyil 'dra'i ri zhol rang gnas bsam gtan gyi khang bur bla ma la gsol ba btab bzhin bris pa'i dge bas lam 'dir mos shing zhugs pa thams cad tshe 'dir snang bzhi mthar phyin te don gnyis lhun gyis grub par gyur cig/__/dge'o/__dge'o/__dge'o//__//