JKW-KABAB-13-PA-020

Previous Text Back to Volume PageNext Text

འཆི་མེད་འཕགས་མའི་སྙིང་ཏིག་ལས། སྨིན་བྱེད་རྩ་བའི་དབང་ཆོག་ཡེ་ཤེས་ཐིག་ལེ།

Wylie title	'chi med 'phags ma'i snying tig las smin byed rtsa ba'i dbang chog ye shes thig le
Location	mkhyen brtse'i bka' babs Volume 13, Text 20, Pages 173-195 (Folios 1a to 12a4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Citation	'jam dbyangs mkhyen brtse'i dbang po. 'chi med 'phags ma'i snying tig las smin byed rtsa ba'i dbang chog ye shes thig le. In Rdzong sar 'jam dbyangs mkhyen brtse'i dbang po'i bka' babs, Vol. 13: 173-195. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Revelations - gter ma  ·  Root Treasure - gter gzhung  ·  Empowerment Ritual - dbang chog - dbang skur
Cycle	འཆི་མེད་འཕགས་མའི་སྙིང་ཐིག་ ('chi med 'phags ma'i snying thig)
Deity	sgrol ma yid bzhin 'khor lo
Karchag page	JKW-KABAB-Volume-13-PA-Karchag
RTZ	In the Rinchen Terdzö: https://rtz.tsadra.org/index.php/Terdzo-CHI-012
Colophon	Treasure colophon: འཆི་མེད་འཕགས་མའི་སྔགས་ཀྱི་རྒྱུད༔ རབ་འབྱམས་རྡོ་རྗེ་ནཱ་དའི་གསུང་༔ རྡོ་རྗེ་ཆོས་ཀྱིས་བསྡུས་པའི་ལུང་༔ མན་ངག་ངེས་པས་བཤད་པ་འདི༔ རང་བྱུང་ཆེན་པོ་པདྨ་ཡིས༔ རིག་འཛིན་རྣམས་ཀྱི་བཞེད་པའི་མཐིལ༔ སྐལ་བཟང་སྣོད་ལྡན་སྨིན་བྱའི་ཕྱིར༔ ད་ལྟའི་མངའ་བདག་ཡབ་སྲས་ལ༔ དགོངས་བརྡས་མཚོན་ཞིང་སྙན་དུ་བརྒྱུད༔ མ་འོངས་དོན་དུ་བྱིན་བརླབས་ཏེ༔ འོད་གསལ་དབྱིངས་ཀྱི་ཐིག་ལེར་བསྟིམ༔ ཟུང་འཇུག་སྒྱུ་མའི་ཡེ་ཤེས་རྩལ༔ གདུལ་བྱའི་བསམ་པ་ཇི་བཞིན་དུ༔ སྲེད་ལེན་བྲལ་བའི་དགོངས་པའི་གཏེར༔ འདོད་པ་འཇོ་བའི་ཆོས་ཆར་གྱིས༔ དངོས་གྲུབ་རྣམ་གཉིས་རྒྱས་པར་འགྱུར༔ ས་མ་ཡ༔ རྒྱ་རྒྱ་རྒྱ༔ གུ་ཧྱ༔ བརྡ་ཐིམ༔ Revealer colophon: པདྨ་འོད་གསལ་མདོ་སྔགས་གླིང་པས་ཟབ་མོ་དགོངས་པའི་གཏེར་མཛོད་ནས་ཕྱུང་བའོ།། །།
	Treasure colophon: 'chi med 'phags ma'i sngags kyi rgyud:__rab 'byams rdo rje nA da'i gsung :__rdo rje chos kyis bsdus pa'i lung :__man ngag nges pas bshad pa 'di:__rang byung chen po pad+ma yis:__rig 'dzin rnams kyi bzhed pa'i mthil:__skal bzang snod ldan smin bya'i phyir:__da lta'i mnga' bdag yab sras la:__dgongs brdas mtshon zhing snyan du brgyud:__ma 'ongs don du byin brlabs te:__'od gsal dbyings kyi thig ler bstim:__zung 'jug sgyu ma'i ye shes rtsal:__gdul bya'i bsam pa ji bzhin du:__sred len bral ba'i dgongs pa'i gter:__'dod pa 'jo ba'i chos char gyis:__dngos grub rnam gnyis rgyas par 'gyur:__sa ma ya:__rgya rgya rgya:__gu h+ya:__brda thim: Revealer colophon: pad+ma 'od gsal mdo sngags gling pas zab mo dgongs pa'i gter mdzod nas phyung ba'o

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

དྷཱི༔ འཆི་མེད་འཕགས་མའི་སྙིང་ཏིག་ལས༔ སྨིན་བྱེད་རྩ་བའི་དབང་ཆོག་ཡེ་ཤེས་ཐིག་ལེ་བཞུགས༔ དྷཱི༔ བླ་མ་ཡིད་བཞིན་འཁོར་ལོར་འདུད༔ རྡོ་རྗེ་ཐེག་པའི་གསང་བ་ཆེའི༔ ལམ་གྱི་རྩ་བ་དབང་བསྐུར་ཏེ༔ སྲོག་ནི་དམ་ཚིག་སྡོམ་པས་བཟུང་༔ རིམ་པ་གཉིས་ཀྱིས་གསོས་བཏབ་པས༔ སྐུ་བཞིའི་འབྲས་བུ་མངོན་དུ་འགྱུར༔ ས་མ་ཡ༔ དེ་ལ་སྔོན་དུ་བསྙེན་པ་དང་༔ ས་གཞི་རུང་བར་བྱ་བ་དང་༔ ཡུལ་དང་ཡུལ་ཅན་ལྷག་གནས་དང་༔ འཇུག་ཅིང་སྨིན་པའི་རིམ་པ་སྟེ༔ རྣམ་པ་བཞིར་ནི་ཡང་དག་བཤད༔ དང་པོ་དབང་ཐོབ་དམ་ཚིག་ལྡན༔ སྔགས་དང་རྒྱུད་ཀྱི་སྦྱོར་ཤེས་པའི༔ རྡོ་རྗེ་སློབ་དཔོན་མཁས་པ་ཡིས༔ སྟོང་པ་ཉིད་ལ་བློ་བཞག་སྟེ༔ སྙིང་རྗེ་སྒྱུ་མའི་ཚུལ་རིག་པས༔ རྒྱུ་ཡི་ཏཱྃ་ལ་སེམས་བཟུང་སྟེ༔ ཡུལ་གསུམ་གསལ་བར་གྱུར་པ་ན༔ ཕྱག་རྒྱ་གཅིག་དང་སྤྲོས་བཅས་ཀྱི༔ ལྷར་སྣང་གོམས་པ་བརྟན་པོ་ཡིས༔ བསྙེན་སྒྲུབ་ལས་ཀྱི་གསང་བའི་སྔགས༔ ཇི་སྐད་བཤད་པའི་དུས་དང་ནི༔ གཙོ་མོའི་རིགས་པ་འབྲུ་འབུམ་དང་༔ གཞན་རྣམས་འབུམ་ཕྲག་བཞི་ལ་སོགས༔ གྲངས་དང་རྟགས་རྣམས་རྫོགས་པ་ན༔ སློབ་མ་རྗེས་སུ་གཟུང་བར་བྱ༔ དེ་ཡང་ལྷ་སྐུ་ཕྲ་རགས་ཀྱི༔ གསལ་སྣང་བརྟན་པོ་བསྙེན་པ་སྟེ༔ བཟླས་བརྗོད་རྣམ་གསུམ་ཉེ་བསྙེན་དང་༔ སྒྲུབ་དང་སྒྲུབ་པ་ཆེན་པོར་ཤེས༔ ས་མ་ཡ༔ གཉིས་པ་ས་གཞི་ལས་རུང་ཕྱིར༔ ལེགས་པར་བརྟགས་པའི་ཡིད་མཐུན་གནས༔ སྣང་བའི་བདག་པོར་རིན་གྱིས་བཙལ༔ མི་སྣང་ལྷ་དང་འབྱུང་པོ་ལ༔ གཏོར་མ་སྦྱིན་ཞིང་བཀའ་ཡང་བསྒོ༔ གནང་བའི་མཚན་མ་ཐོབ་པ་ན༔ བདེན་པ་གཉིས་ཀྱིས་རབ་སྦྱངས་ཤིང་༔ སྲུང་བའི་འཁོར་ལོས་ཕྱོགས་མཚམས་བཅིང་༔ དེ་ལ་ལེགས་བརྟག་བསྙེན་པ་སྟེ༔ སློང་བ་ཉེ་བར་བསྙེན་པའི་ཚུལ༔ སྒྲུབ་པས་སྦྱང་ཞིང་སྒྲུབ་པ་ཆེས༔ བར་ཆད་མཚན་མ་བསྲུང་བའོ༔ ས་མ་ཡ༔ གསུམ་པ་ལྷག་པར་གནས་པ་ལ༔ ཡུལ་ཅན་ལྷན་ཅིག་བྱེད་པའི་རྒྱུ༔ དཀྱིལ་འཁོར་པ་ལ་སྙན་གསན་དབབ༔ མདུན་དུ་མེ་ཏོག་ཚོམ་བུ་ཡིས༔ མཚོན་པའི་རྟེན་ལ་དམ་ཚིག་བསྐྱེད༔ ཡེ་ཤེས་བཅུག་ཅིང་མཆོད་བསྟོད་རྗེས༔ པུས་བཙུགས་ཐལ་མོ་སྦྱར་བྱས་ཏེ༔ སྤོས་དང་བཅས་པས་འདི་སྐད་གསོལ༔ ཨོཾ༔ སངས་རྒྱས་ཐམས་ཅད་སྐྱེད་པའི་ཡུམ༔ འཆི་མེད་སྒྲོལ་མའི་ལྷ་ཚོགས་རྣམས༔ སྔོན་གྱི་ཐུགས་དམ་ཆེན་པོ་ཡིས༔ བདག་ལ་དགོངས་པར་མཛད་དུ་གསོལ༔ རིག་པ་འཛིན་པ་བདག་གིས་ནི༔ ཡོ་བྱད་རྣམ་པ་ཐམས་ཅད་པས༔ བདེ་བའི་ལོངས་སྤྱོད་རབ་སྦྱར་ཏེ༔ ལྷ་རྣམས་ཡོངས་སུ་མཆོད་པ་དང་༔ སྣོད་ལྡན་རྣམས་ལ་ཕན་གདགས་ཕྱིར༔ སྔགས་ཀྱི་ཆོ་གའི་ཐབས་ཆེན་པོས༔ སྙིང་པོའི་དཀྱིལ་འཁོར་བསྒྲུབ་པ་དང་༔ རང་གཞན་དོན་ཀུན་བགྱིད་འཚལ་ན༔ ཡེ་ཤེས་སྙིང་རྗེ་ཆེན་པོ་ཡིས༔ བཟོད་པར་མཛད་དེ་གནང་ནས་ཀྱང་༔ སྣོད་བཅུད་འཆི་མེད་སྒྲོལ་མ་ཡི༔ རྡོ་རྗེ་གསུམ་དང་དབྱེར་མེད་པར༔ བྱིན་གྱིས་བརླབ་པར་མཛད་དུ་གསོལ༔ ཞེས་གསོལ་ལྷ་ཚོགས་རབ་དགྱེས་པས༔ གནང་བ་བྱིན་དང་ཆབས་ཅིག་པར༔ སྒྲུབ་པའི་གཞི་ལ་ཐིམ་པ་ཡིས༔ ཡེ་ཤེས་གཟི་བྱིན་འབར་བར་བསམ༔ བཅུད་དང་ཆས་ལྡན་བུམ་པ་བཟང་༔ ལྷ་ཡི་གྲངས་སམ་གཉིས་ཀྱང་རུང་༔ ཇི་ལྟར་རིགས་པའི་སྟེགས་ལ་བཤམ༔ རྣམ་པར་རྒྱལ་བའི་བུམ་པ་ནི༔ བསང་ཞིང་ཐ་མལ་རྟོག་པ་སྦྱང་༔ སྟོང་པའི་ངང་ལས་པད་ཟླའི་སྟེང་༔ ཁ་དོག་ལྔ་ལྡན་ཡི་གེ་བྷྲཱུྃ༔ ཡོངས་གྱུར་ཕྱི་ནི་རིན་པོ་ཆེའི༔ རང་བཞིན་བུམ་པ་བཟང་པོ་ཆེ༔ མཚན་ཉིད་ཡོངས་རྫོགས་འོད་དུ་འབར༔ ནང་ནི་ལྷ་ཚོགས་བཞུགས་པའི་གནས༔ རིན་ཆེན་གཞལ་མེད་ཁང་ཆེན་པོར༔ གཙོ་འཁོར་སྤྲུལ་པར་བཅས་པ་ཡི༔ དཀྱིལ་འཁོར་འཁོར་ལོ་གསལ་བཏབ་ལ༔ མཆོད་བསྟོད་ལས་རིམ་ཅི་རིགས་བྱ༔ རང་གི་ཐུགས་ནས་སྔགས་ཀྱི་ཕྲེང་༔ རྡོ་རྗེའི་གཟུངས་ཐག་ལས་བརྒྱུད་དེ༔ བུམ་ལྷའི་ཐུགས་དམ་རྒྱུད་བསྐུལ་བས༔ བདེ་སྟོང་རོལ་པའི་འོད་ཟེར་སྤྲིན༔ མཁའ་ཁྱབ་ཀུན་ཏུ་སྣང་བ་ཡིས༔ འཕགས་མཆོད་འགྲོ་བའི་དོན་ཀུན་བསྒྲུབས༔ ཚུར་འདུས་ཐུགས་ཀྱི་དཔལ་བེར་འཁྱིལ༔ སྐུ་དང་སྔགས་ལས་བདུད་རྩིའི་རྒྱུན༔ དཔག་མེད་བྱུང་ནས་བུམ་པའི་བཅུད༔ དངོས་གྲུབ་ཀུན་གྱི་སྙིང་པོར་བསམ༔ ཚུལ་བཞིན་བཟླས་ཤིང་ནུས་ལྡན་བསྒྲུབ༔ མཐར་ནི་འོད་ཞུ་བདུད་རྩིར་བསམ༔ ལས་བུམ་ནང་དུ་པད་ཉིའི་སྟེང་༔ པདྨ་རྟ་མགྲིན་སྐུ་མདོག་དམར༔ ཕྱག་གཉིས་པདྨ་དྲིལ་བུ་འཛིན༔ དུར་ཁྲོད་ཆས་རྫོགས་དོར་སྟབས་བཞུགས༔ སྐུ་ལས་རྡོ་རྗེའི་བདུད་རྩྀའི་རྒྱུན༔ བབས་པས་བུམ་པ་གང་བར་བསམ༔ ཨོཾ་ཧྲཱིཿ པདྨཱནྟ་ཀྲྀཏ་སརྦ་བིགྷྣཱན་ཧ་ན་ཧ་ན་ཧཱུྃ་ཕཊ༔ རྡོ་རྗེ་དྲིལ་བུ་བདུད་རྩི་སོགས༔ ཉེ་བར་མཁོ་བའི་ཡོ་བྱད་རྣམས༔ རྣམ་པར་དག་པའི་ཚུལ་ཆེན་པོས༔ རང་བཞིན་ཡེ་ཤེས་སྣང་བར་བརླབ༔ ཁྱད་པར་དད་དང་བརྩོན་འགྲུས་ལྡན༔ བརྟུལ་ཞུགས་ནུས་པའི་སློབ་མ་ནི༔ དམ་ཚིག་སྲུང་བར་ངེས་པ་རྣམས༔ དྲང་བའི་ཆོས་ཀྱིས་རྒྱུད་སྦྱངས་པས༔ འོས་སུ་གྱུར་པ་ཅི་རིགས་ཀུན༔ མཎྜལ་མེ་ཏོག་བཅས་པ་ཡིས༔ དཀྱིལ་འཁོར་ཁང་པའི་སྒོར་འཁོད་དེ༔ གུས་པས་གསོལ་བ་འདི་སྐད་གདབ༔ པདྨའི་ཡུམ་མཆོག་རྗེ་བཙུན་མ༔ རྡོ་རྗེའི་བླ་མ་དགོངས་སུ་གསོལ༔ བདག་ཅག་འཁོར་བ་ལས་བསྒྲལ་ཕྱིར༔ ཐུགས་རྗེ་ཆེན་པོས་རྗེས་བཟུང་འཚལ༔ བླ་མས་དེ་ལ་ལན་སྦྱིན་པ༔ བསམ་ཡས་ཐེག་པའི་འཇུག་སྒོ་ནི༔ བློ་དང་འཚམས་པར་སྣང་བ་ལས༔ མཐར་ཐུག་རྡོ་རྗེའི་དཀྱིལ་འཁོར་དུ༔ འཇུག་པའི་སྐལ་ལྡན་ཤིན་ཏུ་དཀོན༔ དད་དང་དམ་ཚིག་མཆོག་ལྡན་ཅིང་༔ རྡོ་རྗེ་འཛིན་པའི་བསླབ་པ་ལས༔ ནམ་ཡང་འདའ་བར་མི་བགྱིད་ན༔ སངས་རྒྱས་རྣམས་ནི་ཐམས་ཅད་ཀྱི༔ མངོན་པར་བྱང་ཆུབ་ལམ་གྱི་མཆོག༔ ཡང་དག་ངེས་པའི་གསང་བ་བཞིན༔ ཐར་པ་ཆེན་པོའི་གྲོང་ཁྱེར་དུ༔ བདག་གི་སྣོད་དུ་རུང་བའི་ཕྱིར༔ ལྷག་པར་གནས་པའི་ཆོ་ག་བྱ༔ ཞེས་གདམས་དེ་ཡིས་ལན་གསོལ་པ༔ བདག་ནི་གཙོ་བོ་ཁྱེད་ཉིད་ལས༔ སྐྱབས་གནས་གཞན་ན་མ་མཆིས་ཕྱིར༔ ཇི་ལྟར་བཀའ་སྩལ་བསྒྲུབ་བགྱིད་ན༔ ངེས་པར་དགོངས་ཏེ་གནང་དུ་གསོལ༔ ཞེས་ཞུ་སྐྱབས་སེམས་ཚོགས་བསག་དང་༔ ཁྱད་པར་སྡོམ་གསུམ་བཟུང་བ་ནི༔ པདྨའི་རིགས་མཆོག་བླ་མ་དང་༔ དཀྱིལ་འཁོར་ལྷ་ཚོགས་དགོངས་སུ་གསོལ༔ བདག་གིས་དུས་འདི་ནས་བཟུང་སྟེ༔ བྱང་ཆུབ་སྙིང་པོར་མཆིས་ཀྱི་བར༔ མཐའ་ཡས་འགྲོ་ཀུན་སྒྲོལ་བའི་ཕྱིར༔ གཞན་གནོད་གཞིར་བཅས་ཡོངས་སུ་སྤང་༔ གཞན་ཕན་བྱང་ཆུབ་སེམས་མཆོག་བསྐྱེད༔ གཉིས་ཀ་མཉམ་པ་ཆེན་པོ་ཡི༔ ཐབས་ཆེན་གསང་བ་སྔགས་ཀྱི་སྲོག༔ སྤྱི་དང་ཁྱད་པར་ལྷག་པ་ཡི༔ རིག་པ་འཛིན་པའི་དམ་ཚིག་དང་༔ སྡོམ་པ་མ་ལུས་ཡོངས་སུ་གཟུང་༔ ཚུལ་བཞིན་དུ་ནི་བསླབ་པར་བགྱི༔ ལན་གསུམ་རྗེས་སུ་ཟློས་པ་ཡིས༔ དབང་གི་སྣོད་དུ་རུང་བར་བྱ༔ གཞི་ལུས་ལྷར་བསྐྱེད་བྱིན་གྱིས་བརླབ༔ མངའ་དབུལ་སླད་དུ་མཆོད་པས་མཆོད༔ དེ་ནས་དངོས་གྲུབ་སྣོད་བརྟག་ཕྱིར༔ དྲི་ལྡན་མེ་ཏོག་ཅོད་པན་ཅན༔ བཅུ་གཉིས་སོར་ཚད་སོ་ཤིང་ནི༔ བྱིན་བརླབས་མཁའ་དབྱིངས་ཕྱག་རྒྱར་སྦྱིན༔ ཧ་ས་ཧ་ཞེས་བཞད་པའི་སྔགས༔ བརྗོད་པས་སོ་ཤིང་འོད་ཟེར་གྱིས༔ ལུས་གང་སྡིག་སྒྲིབ་སྦྱང་པར་བསམ༔ བ་བྱུང་བདུད་རྩིས་བསྒོས་པ་ཡི༔ མཎྜལ་དབུས་སུ་ལྟོས་མེད་དོར༔ ཕྱོགས་བཞིར་ཐུན་མོང་ལས་བཞི་སྟེ༔ རང་དང་བླ་མར་བསྟན་ན་མཆོག༔ མཚམས་སུ་རྩེ་བསྟན་ཕྲ་མོ་ཡི༔ དངོས་གྲུབ་སྐལ་བ་ཅི་རིགས་འགྱུར༔ རྨི་ལམ་བརྟག་པའི་སྔོན་འགྲོ་ནི༔ དྲི་ལྡན་ཁྱོར་ཆུ་ལས་སྔགས་ཀྱིས༔ བཏབ་པ་རྣམ་དག་སྔགས་འདིས་སྦྱིན༔ ཨོཾ་ཧྲཱིཿབི་ཤུདྡྷ་སརྦ་དྷརྨ་སརྦ་པཱ་པཾ་ནི་ཤྩ་སྱ་སཾ་ཤོ་དྷ་ཡ་སརྦ་བི་ཀལྤཱན་ཨ་པ་ན་ཡ་ཧཱུྃ༔ སྐུད་པ་དམར་པོ་སུམ་བསྒྲིལ་ལ༔ མདུད་པ་གསུམ་གྱིས་བཏབ་པ་ཉིད༔ ལས་ཀྱི་སྔགས་ཀྱིས་དཔུང་པར་བཅིང་༔ བཛྲ་རཀྵས་བརྟན་པར་བྱ༔ མ་ཉམས་ཀུ་ཤའི་ཕོན་པོ་ནི༔ དྷཱི་དང་ཧ་ལས་སྐྱེས་པར་བསམ༔ དྲི་མེད་ཡིད་འོང་དག་པའི་རྩྭ༔ བྱང་ཆུབ་མཆོག་གི་རྡོ་རྗེའི་སྟན༔ སྔས་དང་གདན་དུ་སྦྱིན་པ་ཡིས༔ རྨི་ལམ་ལྟས་ཀུན་གསལ་བར་ཤོག༔ དྷཱི་ཧ་བཛྲ་ཨཱ་ས་ན་ས་མ་ཡ་སྟྭྃ༔ མི་ལྡོག་ཕྱིར་དུ་ཟབ་མོའི་ཆོས༔ བཤད་ཅིང་སྤྲོ་བ་བསྐྱེད་པ་ནི༔ འཇིག་རྟེན་ཁམས་ནི་ཐམས་ཅད་དུ༔ འདྲེན་པ་སངས་རྒྱས་འབྱུང་བ་དང་༔ ཆོས་དང་འཕགས་པའི་ཚོགས་དཀོན་ཏེ༔ དེ་ལས་ཀྱང་ནི་རྡོ་རྗེའི་ཐེག༔ ཟབ་མོ་སྟོན་དང་སྒྲུབ་པ་ནི༔ མ་བྱུང་འབྱུང་བར་ཤིན་ཏུ་དཀའ༔ གསོད་ནམས་བློ་གྲོས་དྲི་མེད་པའི༔ སྣོད་དུ་གྱུར་པ་རྙེད་པ་གང་༔ ཚུལ་ཆེན་འདི་ལས་མི་འདའ་ན༔ དཀྱིལ་འཁོར་མཐོང་བ་ཙམ་གྱིས་ཀྱང་༔ བསྐལ་མང་སྡིག་སྒྲིབ་ཟད་བྱེད་ཕྱིར༔ ཚུལ་བཞིན་དབང་བླང་དམ་ཚིག་དང་༔ སྡོམ་པར་ལྡན་ན་སྨྲོས་ཅི་དགོས༔ དེ་བས་གཞན་དོན་སངས་རྒྱས་ཀྱི༔ གོ་འཕང་མཆོག་ཏུ་དོན་གཉེར་བས༔ རྡོ་རྗེའི་ལམ་འདི་བླང་བར་གྱིས༔ ཞེས་གདམས་སླར་ཡང་འདི་སྐད་དུ༔ བུ་ཀྱེ་ཀུ་ཤའི་སྔས་གདན་ལ༔ གཙང་ཞིང་དགེ་བའི་སེམས་ཀྱིས་ཉོལ༔ རྨི་ལམ་ཡུལ་དུ་གང་མཐོང་བ༔ ནངས་པར་སྨྲོས་ཤིག་ལུང་བསྟན་འགྱུར༔ དེས་ཀྱང་བཀའ་བཞིན་འཚལ་བ་ཡིས༔ ཐུན་གསུམ་ཐ་མའི་རྨི་ལམ་ཀུན༔ ནངས་པར་བླ་མ་ལ་ཞུས་ཏེ༔ བཟང་ངན་བྱེ་བྲག་བཤད་པ་དང་༔ རྟེན་འབྲེལ་དགེ་བའི་ཕྱོགས་སུ་བསྒྲིག༔ དེ་ལ་རྡོ་རྗེའི་དཀྱིལ་འཁོར་པར༔ གནང་བ་གསོལ་བས་བསྙེན་པ་སྟེ༔ བུམ་ཆུ་བདུད་རྩིར་བྱིན་བརླབས་པ༔ དབང་བསྐུར་ཕྱིར་དུ་ཉེ་བར་བསྙེན༔ སྔགས་ཀྱི་ཡོ་བྱད་བརྟག་པ་ནི༔ སྒྲུབ་པ་ཡིན་པར་ཤེས་པར་བྱ༔ སློབ་མ་སྣོད་རུང་ལྷག་གནས་པ༔ མཐར་ཐུག་སྒྲུབ་པ་ཆེན་པོའོ༔ ས་མ་ཡ༔ བཞི་པ་དངོས་གཞིའི་ཆོ་ག་ལ༔ དཀྱིལ་འཁོར་བྲི་དང་ཡོ་བྱད་དགྲམ༔ སྒྲུབ་ཅིང་མཆོད་པའི་ཆོ་ག་དང་༔ བདག་ཉིད་འཇུག་ཅིང་སློབ་མ་གཞུག༔ ཐོག་མར་ལེགས་སྙོམས་སྟེགས་བུའི་སྟེང་༔ བདུད་རྩི་ལྔ་ཡིས་ཆག་ཆག་གདབ༔ དཔའ་བོའི་རིན་གྱིས་བཙལ་བ་ཡིས༔ སྐུད་པ་ཁ་དོག་ལྔ་ལྡན་པ༔ དམ་ཚིག་ཡེ་ཤེས་མཉམ་སྦྱར་བས༔ རང་དང་རྡོ་རྗེའི་གཟུངས་མ་ནི༔ གར་གྱི་དབང་ཕྱུག་ཡབ་ཡུམ་གསལ༔ སྙོམས་པར་ཞུགས་པའི་བདེ་བའི་སྒྲས༔ སངས་རྒྱས་སྲས་བཅས་སད་བྱས་ཏེ༔ མཁའ་དང་ས་ལ་རྣམ་པར་ཐར༔ བརྒྱད་དང་ལྡན་པའི་ཐིག་གདབ་ཅིང་༔ བྱེ་བྲག་ཆ་དབྱེ་ལེགས་པར་བྱ༔ རིགས་ལྔའི་རང་བཞིན་ཚོན་སྣ་ཡིས༔ རྟེན་དང་བརྟེན་པ་ཇི་བཞིན་འབྲི༔ དབུས་སུ་བསྒྲུབས་པའི་བུམ་པ་དང་༔ ཤར་དུ་དབུ་རྒྱན་ལྷོར་རྡོ་རྗེ༔ ནུབ་ཏུ་དྲིལ་བུ་བྱང་གི་ཆར༔ རྡོ་རྗེ་དྲིལ་བུ་ལྷན་ཅིག་སྟེ༔ གཞན་ཡང་སྐུ་སྔགས་ཕྱག་མཚན་སོགས༔ ལྷ་གནས་མ་འཆོལ་ཚུལ་བཞིན་དགོད༔ ཉེར་སྤྱོད་འདོད་ཡོན་སྨན་གཏོར་རཀ༔ གདུགས་དང་རྒྱལ་མཚན་བ་དན་དང་༔ ཚོགས་ཀྱི་ཡོ་བྱད་ཁྱད་པར་ཅན༔ རོལ་མོའི་བྱེ་བྲག་ཇི་སྙེད་སོགས༔ བག་དྲོ་ཡིད་འོང་མཛེས་པར་བརྒྱན༔ ཡེ་ཤེས་ཆེན་པོའི་གཟི་བྱིན་ནི༔ བདག་གནས་ཡོ་བྱད་རྣམས་ལ་དབབ༔ དེ་ནས་སྒྲུབ་ཅིང་མཆོད་པ་ནི༔ བདག་དང་མདུན་རྟེན་དབྱེར་མེད་པར༔ ལྷག་པ་ཏིང་འཛིན་དཀྱིལ་འཁོར་གསལ༔ ཡེ་ཤེས་སྤྱན་དྲངས་དབྱེར་མེད་བསྟིམ༔ ཕྱག་མཆོད་བསྟོད་པས་དགྱེས་པ་བསྐྱེད༔ བདག་ལས་ཡེ་ཤེས་མདུན་བལྟས་ཏེ༔ བསྙེན་སྒྲུབ་ལས་ཀྱི་བཟླས་པ་བྱ༔ སྐབས་སུ་མཆོད་བསྟོད་ཚོགས་གཏོར་དབུལ༔ དངོས་གྲུབ་མཚན་མ་མཐོང་བའམ༔ བཟླས་བརྗོད་བསྙེན་པའི་གྲངས་ཐེམས་ན༔ བདག་དོན་དབང་བསྐུར་བླང་བ་ནི༔ རང་རིག་གདོད་ནས་དག་པ་དང་༔ བླ་མ་མཁོར་ལོའི་དབང་ཕྱུག་མ༔ དབྱེར་མེད་ཆེན་པོར་ཤེས་བྱས་ལ༔ གློ་བུར་རྣམ་ཤེས་རྣམ་སྨིན་རྟེན༔ སློབ་བུའི་ཚུལ་དུ་ཤར་སྒོར་འཁོད༔ འོག་ནས་འབྱུང་བའི་དབང་རྣམས་བླང་༔ ཡང་ན་ཏིང་འཛིན་གསལ་བརྟན་པས༔ དཀྱིལ་འཁོར་པ་རྣམས་སྐུ་གསུང་ཐུགས༔ ཡོན་ཏན་ཕྲིན་ལས་རྒྱན་འཁོར་ལོ༔ བསམ་མི་ཁྱབ་དང་རང་ཉིད་ཀྱི༔ སྒོ་གསུམ་བྱ་བྱེད་དང་བཅས་པ༔ དབྱེར་མེད་ཆེན་པོར་ཡོངས་ཤེས་པས༔ རང་བྱུང་རིག་པའི་མེ་ཏོག་དོར༔ སླར་ཡང་ཐལ་སྦྱར་མེ་ཏོག་བཅས༔ ཨོཾ༔ བླ་ན་མེད་པའི་ཡེ་ཤེས་ཀྱི༔ གོ་འཕང་ཆེན་པོའི་མཆོག་བསྒྲུབ་ཕྱིར༔ སྣོད་ལྡན་སློབ་མ་འཇུག་འཚལ་ན༔ ཐུགས་རྗེས་དགོངས་ཏེ་སྨིན་མཛད་གསོལ༔ ཞེས་གསོལ་དཀྱིལ་འཁོར་ལྷ་ཚོགས་ཀྱིས༔ དགྱེས་བཞིན་གནང་བ་སྩལ་བར་བསམ༔ དེ་ནས་ལྷག་པར་གནས་པ་ཡི༔ སློབ་མ་དག་པའི་ཁྲུས་ནས་དབྱུང་༔ བགེགས་བསལ་སྲུང་བའི་འཁོར་ལོས་བཅིང་༔ ངེས་ཤེས་བསྐྱེད་ཕྱིར་ལོ་རྒྱུས་བརྗོད༔ དེས་ཀྱང་ཅི་འབྱོར་མཎྜལ་འབུལ༔ གདོང་དགབ་མེ་ཏོག་ཕྲེང་བ་གཏད༔ པུས་བཙུགས་ཐལ་མོ་སྦྱར་བྱས་ཏེ༔ ཧོཿ བདེ་ཆེན་དགྱེས་པའི་ཡེ་ཤེས་སྐུ༔ རྡོ་རྗེ་འཛིན་པ་དགོངས་སུ་གསོལ༔ ཐར་པ་མཆོག་གི་གྲོང་ཁྱེར་དུ༔ སློབ་དཔོན་ཆེན་པོས་བདག་གཞུག་གསོལ༔ ལན་གསུམ་གསོལ་གདབ་སློབ་དཔོན་གྱིས༔ ཧོཿ གསང་བ་རྨད་བྱུང་དཀྱིལ་འཁོར་དུ༔ འཇུག་པར་དཀའ་ལ་ཕན་ཡོན་ཆེ༔ དམ་ཚིག་སྲོག་བཞིན་སྲུང་ནུས་ན༔ འཇུག་ཅིང་དབང་བསྐུར་སྨིན་པར་བྱ༔ ཞེས་གདམས་དེ་ལ་ལན་གསོལ་པ༔ ཧོཿ བདག་ནི་སེམས་ཅན་ཀུན་དོན་དུ༔ བླ་མེད་བྱང་ཆུབ་དོན་གཉེར་བས༔ རྡོ་རྗེའི་ལམ་མཆོག་བསྙེན་བགྱིད་ཕྱིར༔ དམ་ཚིག་སྡོམ་པ་སྲོག་བཞིན་བསྲུང་༔ ཟབ་མོའི་ཚུལ་ལ་འཇུག་པ་དང་༔ རྣམ་གྲོལ་འབྲས་བུ་འཚལ་ལགས་ན༔ ཐུགས་རྗེས་དགོངས་ཏེ་གནང་དུ་གསོལ༔ ཞེས་ཞུ་གནང་བ་སྦྱིན་པ་ནི༔ དེ་ལྟར་ཡིན་ན་བཅོམ་ལྡན་འདས༔ འཆི་མེད་སྒྲོལ་མའི་དཀྱིལ་འཁོར་དུ༔ གཞུག་ཅིང་ཡེ་ཤེས་བསྐྱེད་པར་བྱ༔ སྤྲོ་བ་བསྐྱེད་ལ་གུས་པར་གྱིས༔ ཞེས་བརྗོད་སྐྱབས་སེམས་ཚོགས་བསག་དང་༔ སྡོམ་པ་གསུམ་ལ་ལེགས་པར་བཀོད༔ གསང་སྔགས་ནང་གི་སེམས་བསྐྱེད་ནས༔ གསང་བའི་དེ་ཉིད་བསྒོ་བ་ནི༔ ཧོཿ ཚུལ་ཆེན་གསང་བ་སྔགས་ཀྱི་ལམ༔ ཐབས་མཁས་ངོ་མཚར་སྤྱོད་པ་ནི༔ གཞན་དུ་སྨྲས་ན་ཉམས་པར་འགྱུར༔ དེ་ཕྱིར་གཞན་ལ་མ་སྨྲ་ཞིག༔ ཅེས་གདམས་པྲ་བེ་ཤ་ཡ་ཡིས༔ སྒོ་དབྱེ་ཛཿཧཱུྃ་བྃ་ཧོཿའི་སྒྲས༔ ཚད་མེད་བཞི་ཡི་འཇུག་པ་ཡིས༔ སྒོ་བཞིར་བཅུག་ཅིང་ཕྱག་ཀྱང་བྱ༔ སླར་ཡང་ཤར་སྒོར་འཁོད་པ་ལ༔ ནན་ཏན་དམ་ཚིག་བསྒོ་བ་ནི༔ ཨོཾཿ དེ་རིང་འཆི་མེད་འཕགས་མ་ཡི༔ ཡེ་ཤེས་ཁྱེད་ལ་བསྐྱེད་པར་བྱ༔ གསང་བ་མཆོག་གི་དམ་ཚིག་ལས༔ བླ་མེད་འབྲས་བུ་ཐོབ་ཕྱིར་ཟུངས༔ ཛྙཱ་ན་བཛྲ་ས་མ་ཡ་ཧཱུྃ༔ ཨཱཿ འདི་ནི་དམ་ཚིག་རྡོ་རྗེ་སེམས༔ ཁྱོད་ཀྱི་སྙིང་ལ་དབྱེར་མེད་གནས༔ གལ་ཏེ་དམ་ལས་འདས་གྱུར་ན༔ དེ་མ་ཐག་ཏུ་བཀས་ཏེ་གཤེགས༔ ས་མ་ཡ་བཛྲ་ཧཱུྃ༔ ཧཱུྃ༔ འཐུངས་ཤིག་རྡོ་རྗེའི་བདུད་རྩིའི་ཆུ༔ ལྕེ་ལ་བཞག་ཀྱང་སྙིང་དཀྱིལ་ཐིམ༔ མ་བསྲུངས་འདོད་པའི་དངོས་གྲུབ་ཉམས༔ བསྲུངས་ན་ཡེ་ཤེས་ཚེ་འདིར་རྙེད༔ ས་མ་ཡ་ཨ་མྲྀ་ཏ་ཨུ་ད་ཀ་ཧཱུྃ༔ ཧོཿ དེ་རིང་ཕྱིན་ཅད་བུ་ཁྱོད་ཀྱི༔ འཆི་མེད་འཕགས་མ་ང་ཡིན་པས༔ ཇི་སྐད་བསྒོ་བའི་དམ་ཚིག་ལས༔ ནམ་ཡང་འདའ་བར་མ་བྱེད་ཅིག༔ མ་ཧཱ་ས་མ་ཡ་ཧཱུྃ༔ ཞེས་པས་དམ་བཞག་ཡེ་ཤེས་ཀྱི༔ གཟི་བྱིན་ལྷག་པར་དབབ་པའི་སླད༔ སློབ་མ་སྒོ་གསུམ་གནད་བཅུན་ལ༔ རྩེ་གཅིག་ཏིང་འཛིན་གསལ་ཞིང་བརྟན༔ སྣོད་ནི་པདྨ་བཀོད་པའི་ཞིང་༔ བཅུད་ཀྱི་རྟོག་པ་འཕགས་མའི་སྐུ༔ རང་འོད་ཡབ་དང་མཉམ་སྦྱོར་བའི༔ ཐུགས་སྲོག་ཏཱྃ་ལ་སེམས་འཛིན་ཞིང་༔ རྒྱུད་ལ་ནུས་པ་ཐོབ་པའི་སླད༔ སྙོམས་འཇུག་སྒྲ་དང་འོད་ཟེར་སྤྲིན༔ གདུང་བའི་གླུ་ཡིས་ཐུགས་དམ་བསྐུལ༔ སྐུ་གསུང་ཐུགས་ཀྱི་ཕྱག་རྒྱ་ནི༔ ཆར་ལྟར་བབས་ཏེ་དབྱེར་མེད་ཐིམ༔ ཡེ་ཤེས་ཆེན་པོའི་བྱིན་ཐོབ་བསམ༔ མ་གྲུབ་སྤོགས་པའི་ཆོ་ག་ནི༔ སྙིང་གར་རླུང་སེམས་དབྱེར་མེད་པའི༔ ངོ་བོ་དགའ་འཁྱིལ་དཀར་དམར་མདངས༔ དྲག་ཏུ་འཁོར་ལ་སེམས་གཏད་ནས༔ དབྱིངས་རིག་དབྱེར་མེད་ངང་ལ་བཞག༔ ཧཱུྃ་གི་གླུས་བསྐུལ་ངེས་པར་ཕེབས༔ ལུས་ངག་ཡིད་ལ་བདེ་ཆེན་ཉམས༔ སྐྱེས་ན་རྩོལ་མེད་བསྐྱངས་དུ་བཞུག༔ ཨོཾ་བཛྲ་ཛྙཱ་ན་ཏིཥྛ་བྷྲཱུྃ༔ ཞེས་དང་རྡོ་རྗེ་རྒྱ་གྲམ་གྱིས༔ སྤྱི་བོར་རེག་ཅིང་བརྟན་པར་བྱ༔ རིགས་ཀྱི་ངེས་པ་བརྟག་པའི་སླད༔ དཀྱིལ་འཁོར་པ་ལ་མེ་ཏོག་དབུལ༔ ཨོཾ༔ རིན་ཆེན་མེ་ཏོག་ཡིད་འོང་ཕྲེང་༔ རང་བྱུང་དཀྱིལ་འཁོར་ལྷ་ལ་འབུལ༔ ཚེ་རབས་འབྲེལ་བའི་རིགས་ཀྱི་ལྷས༔ ཐུགས་རྗེས་དགོངས་ཏེ་བཞེས་སུ་གསོལ༔ ཨོཾ་རཏྣ་པུཥྤེ་པྲ་ཏཱིཙྪ་ཧོ༔ དབུས་དང་ཕྱོགས་བཞིར་བབས་པ་ན༔ རིགས་ལྔའི་སྒྲོལ་མར་ངེས་བྱས་ཏེ༔ རྡོ་རྗེའི་མིང་གདགས་མེ་ཏོག་ཕྲེང་༔ ཅོད་པན་ཚུལ་དུ་སྤྱི་བོར་བཅིངས༔ ཧོཿ འདི་ནི་ཁྱོད་ཀྱི་བབས་པའི་ལྷ༔ དེང་ནས་བཟུང་སྟེ་བྱང་ཆུབ་བར༔ འབྲལ་མེད་བྱིན་གྱིས་རློབ་པའི་ཕྱིར༔ རིན་ཆེན་ཅོད་པན་ཚུལ་དུ་སྦྱིན༔ ཨོཾ་པྲ་ཏི་གྲྀཧྞ་ཨི་མཾ་ས་ཏྭ་མ་ཧཱ་བ་ལ་ཏིཥྛ་ཨོཾ༔ ཡེ་ཤེས་འོད་ཀྱི་ཐུར་མ་ཡིས༔ མ་རིག་ལིང་ཏོག་བསལ་བར་བྱ༔ ཨོཾ༔ འཆི་མེད་འཕགས་མའི་ཡེ་ཤེས་ཀྱི༔ སྣང་བས་མ་རིག་སྒྲིབ་བསལ་ནས་༔ རང་བཞིན་དཀྱིལ་འཁོར་དོན་དང་རྟགས༔ མངོན་སུམ་ཉིད་དུ་མཐོང་གྱུར་ཅིག༔ ཨོཾ་བཛྲ་ཛྙཱ་ན་ཙཀྵཱུ་པྲ་བེ་ཤ་ཡ་ཕཊ༔ མཐོང་བ་བསྟན་ཅིང་སྤྲོ་བ་བསྐྱེད༔ ཧོཿ གདོད་ནས་རྣམ་དག་རང་བཞིན་དབྱིངས༔ ཡེ་ཤེས་གཟུགས་བརྙན་ཚུལ་དུ་ཤར༔ མཚོན་བྱེད་རྟགས་ཀྱི་དཀྱིལ་འཁོར་ནི༔ ཏིང་འཛིན་མཆོག་གི་རོལ་མོ་ལས༔ ལྷག་པའི་ཆོ་འཕྲུལ་བསམ་ཡས་སྤྲོ༔ བྱང་ཆུབ་སེམས་དང་ཚོམ་བུ་ཚོགས༔ ཕྱི་ནང་གཞན་གསུམ་དབྱེར་མེད་པ༔ རྗེ་བཙུན་འཕགས་མའི་མཎྜ་ལ༔ འདིར་ཞུགས་འདི་ལྟོས་འདི་དོན་སྒོམས༔ མཐོང་བས་བསྐལ་མང་སྡིག་སྒྲིབ་དག༔ དབང་བསྐུར་ཡེ་ཤེས་རྒྱུད་ལ་སྨིན༔ བསྒོམས་པས་དངོས་གྲུབ་མྱུར་དུ་འགྲུབ༔ དེ་ཕྱིར་དད་བརྩོན་སྐལ་ལྡན་རྣམས༔ ལྷ་སྔགས་ཕྱག་རྒྱར་མཉམ་སྦྱར་ནས༔ རང་གཞན་དོན་གཉིས་བརྩོན་པར་གྱིས༔ ཞེས་གདམས་རྟེན་དང་བརྟེན་པ་ཡི༔ གཟུགས་བརྙན་གསལ་ཞིང་རྫོགས་པར་བསྟན༔ ལྷ་དང་སྐལ་བ་མཉམ་པ་ལ༔ གོ་འཕང་ཆེན་པོའི་མཆོག་སྦྱིན་ཕྱིར༔ དབང་བསྐུར་ཆེད་དུ་གསོལ་བ་གདབ༔ ཧོཿ རིགས་རྣམས་ཀུན་བདག་སློབ་དཔོན་གྱིས༔ ཐུགས་རྗེས་བརྩེ་བས་ཉེར་བཟུང་ནས༔ གོ་འཕང་མཆོག་ཏུ་དབུག་དབྱུང་ཕྱིར༔ ཡེ་ཤེས་དབང་བསྐུར་སྩལ་དུ་གསོལ༔ ལན་གསུམ་རྗེས་སུ་སློབ་དཔོན་གྱིས༔ དབང་ལྷ་སྤྱན་དྲང་མཆོད་བསྟོད་གསོལ༔ བགེགས་ཕྲལ་ཤིས་པའི་ཆོ་ག་བྱ༔ དེ་ནས་ཕྱི་ལྟར་རིག་པའི་དབང་༔ རྣམ་ལྔས་སློབ་མ་རྗེས་སུ་བཟུང་༔ སློབ་མ་རྡོ་རྗེ་སྒྲོལ་མར་གསལ༔ མི་བསྐྱོད་ཆུ་ཡི་དབང་བསྐུར་བྱ༔ ཧཱུྃ༔ རྣམ་ཤེས་ཞེ་སྡང་དག་བྱའི་ཕྱིར༔ རྡོ་རྗེ་སྒྲོལ་མའི་ངོ་བོ་ཉིད༔ མི་བསྐྱོད་ཆུ་ཡི་དབང་བསྐུར་བས༔ མེ་ལོང་ཡེ་ཤེས་མངོན་གྱུར་ཤོག༔ ཨོཾ་བཛྲ་ཏཱ་རཱ་ཨུ་ད་ཀ་ཨ་བྷི་ཥིཉྩ་ཧཱུྃ༔ དབང་བསྐུར་སྒྲིབ་དག་མི་བསྐྱོད་པས༔ རྒྱས་གདབ་མཆོད་ཅིང་བཀྲ་ཤིས་བརྗོད༔ རིན་ཆེན་སྒྲོལ་མར་དབུ་རྒྱན་སྦྱིན༔ ཏྲཱྃ༔ ཚོར་བ་ང་རྒྱལ་དག་བྱའི་ཕྱིར༔ རིན་ཆེན་སྒྲོལ་མའི་ངོ་བོ་ཉིད༔ ལོངས་སྤྱོད་དབུ་རྒྱན་དབང་བསྐུར་བས༔ མཉམ་ཉིད་ཡེ་ཤེས་མངོན་གྱུར་ཤོག༔ ཨོཾ་རཏྣ་ཏཱ་རཱ་མུ་ཀུ་ཊ་ཨ་བྷི་ཥིཉྩ་ཏྲཱྃ༔ པདྨའི་སྒྲོལ་མར་རྡོ་རྗེ་གཏོད༔ ཧྲཱིཿ འདུ་ཤེས་འདོད་ཆགས་དག་བྱའི་ཕྱིར༔ པདྨའི་སྒྲོལ་མའི་ངོ་བོ་ཉིད༔ ཐབས་ཀྱི་རྡོ་རྗེས་དབང་བསྐུར་བས༔ སོར་རྟོག་ཡེ་ཤེས་མངོན་གྱུར་ཤོག༔ ཨོཾ་པདྨ་ཏཱ་རཱ་བཛྲ་ཨ་བྷི་ཥིཉྩ་ཧྲཱིཿ ལས་ཀྱི་སྒྲོལ་མར་དྲིལ་བུ་སྦྱིན༔ ཨཱཿ འདུ་བྱེད་ཕྲག་དོག་དག་བྱའི་ཕྱིར༔ ལས་ཀྱི་སྒྲོལ་མའི་ངོ་བོ་ཉིད༔ ཤེས་རབ་དྲིལ་བུའི་དབང་བསྐུར་བས༔ བྱ་གྲུབ་ཡེ་ཤེས་མངོན་གྱུར་ཤོག༔ ཨོཾ་ཀརྨ་ཏཱ་རཱ་གཎྜེ་ཨ་བྷི་ཥིཉྩ་ཨཱཿ བདེ་གཤེགས་སྒྲོལ་མར་མིང་གདགས་བྱ༔ ཨོཾ༔ གཟུགས་སྣང་གཏི་མུག་དག་བྱའི་ཕྱིར༔ བདེ་གཤེགས་སྒྲོལ་མའི་ངོ་བོ་ཉིད༔ རྡོ་རྗེ་མིང་གི་དབང་བསྐུར་བས༔ ཆོས་དབྱིངས་ཡེ་ཤེས་མངོན་གྱུར་ཤོག༔ ཨོཾ་བུདྡྷ་ཏཱ་རཱ་བཛྲ་ནཱ་མ་ཨཱཿབྷི་ཥིཉྩ་ཨོཾ༔ དབུ་རྒྱན་དབང་སོགས་རེ་རེ་བཞིན༔ ཆུ་དབང་བསྐུར་ཞིང་ཕྱག་རྒྱས་གདབ༔ མཆོད་ཅིང་ཤིས་པ་བརྗོད་པས་བརྟན༔ ནང་ལྟར་ནུས་པ་འཇུག་པའི་ཕྱིར༔ སྤྱི་དང་བྱེ་བྲག་ཁྱད་པར་གྱིས༔ རྡོ་རྗེ་སློབ་དཔོན་བདག་པོ་ཆེར༔ དབུགས་དབྱུངས་ལས་དང་ཡེ་ཤེས་ཀྱི༔ དབང་བསྐུར་རིམ་བཞིན་བསྒྲུབ་པ་ལ༔ སློབ་མ་འཁོར་ལོའི་དབང་ཕྱུག་མར༔ རང་འོད་ཡབ་དང་མཉམ་སྦྱོར་བ༔ གསལ་སྣང་རྫོགས་པའི་གཟི་བྱིན་བསྐྱེད༔ དམ་ཚིག་གསུམ་གྱི་དེ་ཉིད་སྦྱིན༔ ཧཱུྃ༔ ཐོག་མཐའ་མེད་པའི་བྱང་ཆུབ་སེམས༔ དོན་གྱི་རྡོ་རྗེ་རབ་བཟུང་ནས༔ དཀྱིལ་འཁོར་ཀུན་གྱི་འོད་གསལ་ཐུགས༔ ཤིན་ཏུ་རྣམ་དག་རྟོགས་པར་གྱིས༔ ཨོཾ་མ་ཧཱ་བཛྲ་ཛྙཱ་ན་ཧཱུྃ༔ ཨཱཿ སྲིད་པའི་རླུང་བཅུ་རྣམ་དག་པ༔ གྲགས་སྟོང་ངེས་དོན་དྲིལ་བུའི་སྒྲ༔ མི་ཤིགས་ནཱ་དའི་གསུང་དབྱངས་ཀྱིས༔ འགྲོ་བ་ཐམས་ཅད་སད་པར་གྱིས༔ ཨོཾ་བཛྲ་གཎྜེ་ཛྙཱ་ན་ཨཱཿ ཧཱུྃ༔ ཕུང་ཁམས་སྐྱེ་མཆེད་གདོད་མ་ནས༔ སྣང་རིག་ཟུང་འཇུག་སྒྱུ་མའི་ཚུལ༔ བདེ་སྟོང་ཡེ་ཤེས་ཕྱག་རྒྱའི་སྐུས༔ ཁ་སྦྱོར་བདེ་བའི་ཏིང་འཛིན་སྒྲུབས༔ ཨོཾ་མ་ཧཱ་མུ་དྲ་ཛྙཱ་ན་ཨཱཏྨ་ཀོ྅ཧཾ༔ བཀྲ་ཤིས་བུམ་པའི་ཆུ་དབང་བསྐུར༔ ཨོཾ་ཨཱཿཧཱུྃ༔ དཀྱིལ་འཁོར་རབ་འབྱམས་ཐམས་ཅད་ཀྱི༔ ཡེ་ཤེས་བདུད་རྩིའི་བཅུད་ལྡན་པའི༔ བཀྲ་ཤིས་བུམ་པས་དབང་བསྐུར་བས༔ སྐུ་དང་ཡེ་ཤེས་ཡོངས་རྫོགས་ཤོག༔ བཛྲ་ཀ་ལ་ཤ་ཨ་བྷི་ཥིཉྩ་སུ་ར་ཏཱ་སྟྭཾ་ཨ་ཧཾ༔ ཆུ་ལྷག་གྱེན་དུ་འཁྱིལ་པ་ལས༔ རྡོ་རྗེ་སེམས་དཔས་དབུར་བརྒྱན་བསམ༔ དབང་ལ་བསྟིམ་ཞིང་རབ་ཏུ་གནས༔ མཆོད་པས་མངའ་དབུལ་ཤིས་པ་བརྗོད༔ བྱེ་བྲག་རྗེས་སུ་གནང་བའི་ཕྱིར༔ ལག་གཡས་དུང་དང་གཡོན་དྲིལ་བུ༔ བར་དུ་སྔགས་ཀྱི་གླེགས་བམ་དང་༔ རྐང་པའི་འོག་ཏུ་འཁོར་ལོ་སྦྱིན༔ སྤྱི་བོར་བཀྲ་ཤིས་གདུགས་བཟུང་ལ༔ ཧོཿ དེང་ནས་བརྩམས་ཏེ་རིགས་ཀྱི་བུ༔ ཁྱོད་ནི་སྒྲིབ་དག་ཡེ་ཤེས་བརྙེས༔ དཀྱིལ་འཁོར་ཀུན་གྱི་བདག་པོ་ཆེ༔ རྡོ་རྗེ་སློབ་དཔོན་མཆོག་ཏུ་གྱུར༔ ལྟ་སྤྱོད་དཀྱིལ་འཁོར་སྨིན་གྲོལ་དང་༔ ལས་ཀྱི་ཡན་ལག་ཐམས་ཅད་ལ༔ བདེ་ཆེན་སྒྱུ་མའི་རོལ་པས་སྒྲུབས༔ སྙིང་རྗེ་ཆེན་པོས་གཞན་དོན་གྱིས༔ འཁོར་བ་རྒྱུད་ལྔ་དྲང་བའི་ཕྱིར༔ བསྡུ་བ་རྣམ་བཞིའི་དུང་བུས་ལ༔ ཐེག་མཆོག་ཆོས་ཀྱི་དྲིལ་བུ་སྒྲོགས༔ རྡོ་རྗེའི་སྔགས་རྒྱུད་རབ་འབྱམས་ཀྱྀས༔ རིགས་ཅན་གསུམ་གྱི་གདུལ་བྱ་ཀུན༔ བྱང་ཆུབ་སྙིང་པོར་དབུགས་ཕྱུངས་ཤིག༔ ཨོཾ་བཛྲ་དྷརྨ་བྷཱ་ཥཱ་ཛྙཱ་ན་ས་མ་ཡ་ཧོ༔ ཁྱད་པར་བྱིན་རླབས་ནུས་ཐོབ་སླད༔ ལྷ་སྔགས་བསྟིམས་ཞིང་དོན་ངོ་སྤྲད༔ དེ་ལ་ཐོག་མར་ལྷ་བསྟིམ་ཕྱིར༔ སོ་སོའི་ཕྱག་རྒྱ་དབང་གནས་བཞག༔ ཧྲཱིཿ སོ་སོར་རྟོག་པའི་ཡེ་ཤེས་སྐུ༔ རིགས་བདག་ཚེ་དཔག་མེད་མགོན་གྱིས༔ རིགས་ཀྱི་བུ་ལ་དབང་བསྐུར་བས༔ རྡོ་རྗེའི་སྐུ་རུ་འགྲུབ་པར་ཤོག༔ ཨོཾ་ཨ་མཱ་ར་ཎི་ཛི་བནྟི་ཡེ་སྭཱ་ཧཱ༔ ཀཱ་ཡ་ཨ་བྷི་ཥིཉྩ་ཨོཾ༔ ཏཱཾ༔ པདྨའི་རིགས་མཆོག་གསུང་གི་ཡུམ༔ ཡིད་བཞིན་འཁོར་ལོ་ཡབ་ཡུམ་གྱིས༔ རིགས་ཀྱི་བུ་ལ་དབང་བསྐུར་བས༔ རྡོ་རྗེའི་གསུང་དུ་འགྲུབ་པར་ཤོག༔ ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ༔ ཀཱ་ཡ་ཨ་བྷི་ཥིཉྩ་ཨོཾ༔ བྷྲཱུྃ༔ བདེ་བཤེགས་འོད་གསལ་ཡེ་ཤེས་ཐུགས༔ གཙུག་ཏོར་ཆེན་མོའི་ཕྱག་རྒྱ་ཡིས༔ རིགས་ཀྱི་བུ་ལ་དབང་བསྐུར་བས༔ རྡོ་རྗེའི་ཐུགས་སུ་འགྲུབ་པར་ཤོག༔ ཨོཾ་ཨ་མྲྀ་ཏ་ཨཱ་ཡུརྡ་དེ་སྭཱ་ཧཱ༔ ཀཱ་ཡ་ཨ་བྷི་ཥིཉྩ་ཨོཾ༔ ཏཱྃ༔ ཆུ་ཁམས་རྣམ་དག་མཱ་མ་ཀཱི༔ བཅོམ་ལྡན་རྡོ་རྗེ་སྒྲོལ་མ་ཡིས༔ རིགས་ཀྱི་བུ་ལ་དབང་བསྐུར་བས༔ མེ་ལོང་ཡེ་ཤེས་རྟོགས་པར་ཤོག༔ ཨོཾ་ཏཱ་རེ་ཏཱྃ་སྭཱ་ཧཱ༔ ཀཱ་ཡ་ཨ་བྷི་ཥིཉྩ་ཨོཾ༔ བྷྲཱུྃ༔ ས་ཁམས་རྣམ་དག་སངས་རྒྱས་སྤྱན༔ བཅོམ་ལྡན་རིན་ཆེན་སྒྲོལ་མ་ཡིས༔ རིགས་ཀྱི་བུ་ལ་དབང་བསྐུར་བས༔ མཉམ་ཉིད་ཡེ་ཤེས་རྟོགས་པར་ཤོག༔ ཨོཾ་ཏཱ་རེ་བྷྲཱུྃ་སྭཱ་ཧཱ༔ ཀཱ་ཡ་ཨ་བྷི་ཥིཉྩ་ཨོཾ༔ ཧྲཱིཿ མེ་ཁམས་རྣམ་དག་གོས་དཀར་མོ༔ བཅོམ་ལྡན་པདྨའི་སྒྲོལ་མ་ཡིས༔ རིགས་ཀྱི་བུ་ལ་དབང་བསྐུར་བས༔ སོར་རྟོགས་ཡེ་ཤེས་རྟོགས་པར་ཤོག༔ ཨོཾ་ཏཱ་རེ་ཧྲཱིཿསྭཱ་ཧཱ༔ ཀཱ་ཡ་ཨ་བྷི་ཥིཉྩ་ཨོཾ༔ ཧཱུྃ༔ རླུང་ཁམས་རྣམ་དག་དམ་ཚིག་སྒྲོལ༔ བཅོམ་ལྡན་ལས་ཀྱི་སྒྲོལ་མ་ཡིས༔ རིགས་ཀྱི་བུ་ལ་དབང་བསྐུར་བས༔ བྱ་གྲུབ་ཡེ་ཤེས་རྟོགས་པར་ཤོག༔ ཨོཾ་ཏཱ་རེ་ཧཱུྃ་སྭཱ་ཧཱ༔ ཀཱ་ཡ་ཨ་བྷི་ཥིཉྩ་ཨོཾ༔ ཛཿ བྱམས་པ་ཚད་མེད་ངོ་བོ་ཉིད༔ བཅོམ་ལྡན་ལྕགས་ཀྱུ་སྒྲོལ་མ་ཡིས༔ རིགས་ཀྱི་བུ་ལ་དབང་བསྐུར་བས༔ ཞི་བའི་ཕྲིན་ལས་ཡོངས་རྫོགས་ཤོག༔ ཨོཾ་ཏཱ་རེ་ཏཱྃ་ཛཿཤིནྟཾ་ཀུ་རུ་སྭཱ་ཧཱ༔ ཀཱ་ཡ་ཨ་བྷི་ཥིཉྩ་ཨོཾ༔ ཧཱུྃ༔ སྙིང་རྗེ་ཚད་མེད་ངོ་བོ་ཉིད༔ བཅོམ་ལྡན་ཞགས་པ་སྒྲོལ་མ་ཡིས༔ རིགས་ཀྱྀ་བུ་ལ་དབང་བསྐུར་བས༔ རྒྱས་པའི་ཕྲིན་ལས་ཡོངས་རྫོགས་ཤོག༔ ཨོཾ་ཏཱ་རེ་བྷྲཱུྃ་ཧཱུྃ་པུཥྟིཾ་ཀུ་རུ་ཨོཾ༔ ཀཱ་ཡ་ཨ་བྷི་ཥིཉྩ་ཨོཾ༔ བྂ༔ དགའ་བ་ཚད་མེད་ངོ་བོ་ཉིད༔ བཅོམ་ལྡན་ལྕགས་སྒྲོག་སྒྲོལ་མ་ཡིས༔ རིགས་ཀྱི་བུ་ལ་དབང་བསྐུར་བས༔ དབང་གི་ཕྲིན་ལས་ཡོངས་རྫོགས་ཤོག༔ ཨོཾ་ཏཱ་རེ་ཧྲཱིཿབྃ་ཝ་ཤཾ་ཀུ་རུ་ཧོ༔ ཀཱ་ཡ་ཨ་བྷི་ཥིཉྩ་ཨོཾ༔ ཧོཿ བཏང་སྙོམས་ཚད་མེད་ངོ་བོ་ཉིད༔ བཅོམ་ལྡན་དྲིལ་བུའི་སྒྲོལ་མ་ཡིས༔ རིགས་ཀྱི་བུ་ལ་དབང་བསྐུར་བས༔ དྲག་པོའི་ཕྲིན་ལས་ཡོངས་རྫོགས་ཤོག༔ ཨོཾ་ཏཱ་རེ་ཧཱུྃ་ཧོཿ་མཱ་ར་ཡ་ཕཊ༔ ཀཱ་ཡ་ཨ་བྷི་ཥིཉྩ་ཨོཾ༔ བཟླས་པའི་ལུང་སྦྱིན་ཕྲེང་བ་གཏད༔ ཨཱཿ ཇི་སྙེད་བརྗོད་པ་ཐམས་ཅད་ཀུན༔ རྡོ་རྗེའི་སྔགས་སུ་རྣམ་པར་དག༔ ནུས་པ་སྐྱེད་པའི་དབང་བསྐུར་བས༔ དངོས་གྲུབ་རྣམ་གཉིས་མྱུར་འགྲུབ་ཤོག༔ ཨོཾ་སརྦ་མཎྜ་ལ་ཝ་ཀ་ཨ་བྷི་ཥིཉྩ་ཨཱཿ མེ་ལོང་བསྟན་ཅིང་དོན་ངོ་སྤྲད༔ ཧཱུྃ༔ གཟུང་དང་འཛིན་པའི་རྟོག་པ་ཀུན༔ གདོད་ནས་རང་བཞིན་འོད་གསལ་ངང་༔ ཡེ་ཤེས་རྟོགས་པའི་དབང་བསྐུར་བས༔ ཟུང་འཇུག་གནས་ལུགས་མངོན་གྱུར་ཤོག༔ ཨོཾ་སརྦ་མཎྜ་ལ་ཙིཏྟ་ཨ་བྷི་ཥིཉྩ་ཧཱུྃ༔ གསང་བ་ཟབ་མོའི་དབང་བསྐུར་ནི༔ སྦྱོར་བ་རྩ་ཁམས་རང་བྱིན་བརླབས༔ དངོས་གཞི་དཔེ་ཡི་ཡེ་ཤེས་བསྐྱེད༔ རྗེས་སུ་དོན་གྱི་ངོ་སྤྲོད་གདབ༔ འཕགས་ལམ་དགོངས་པ་མཚོན་པར་བྱ༔ དེ་ལ་ཐོག་མར་བླ་མ་དང་༔ ཤེས་རབ་མཉམ་སྦྱོར་བྱང་སེམས་སྦྱིན༔ ཨཱཿ དགའ་བ་མཆོག་གིས་དྲངས་པའི་བཅུད༔ བྱང་ཆུབ་སེམས་ཀྱི་དམ་ཚིག་གིས༔ རྩ་ཁམས་རླུང་ལ་དབང་བསྐུར་བས༔ གསལ་སྟོང་ཟུང་འཇུག་ཉམས་མྱོང་ཤོག༔ ཨོཾ་བོ་དྷི་ཙིཏྟ་ཨ་བྷི་ཥིཉྩ་ཨཱཿ རིག་མ་བྱིན་བརླབས་བརྟུལ་ཞུགས་སྦྱིན༔ ཧཱུྃ༔ རྣམ་པ་ཀུན་ལྡན་ཡེ་ཤེས་ནི༔ རིག་མའི་བརྟུལ་ཞུགས་བླ་ན་མེད༔ འདུ་ཤེས་གསུམ་གྱིས་མཉམ་སྦྱར་བས༔ དཔེ་ཡི་ལྷན་སྐྱེས་རྟོགས་པར་ཤོག༔ ཨོཾ་ཀརྨ་མུ་དྲ་ཛྙཱ་ན་ཨ་བྷི་ཥིཉྩ་ཧཱུྃ༔ སློབ་མ་གར་གྱི་དབང་ཕྱུག་དང་༔ ཕྱག་རྒྱ་འཆི་མེད་སྒྲོལ་མར་བསྐྱེད༔ མཁའ་གསང་རྡོ་རྗེ་པདྨར་བརླབ༔ བྱང་སེམས་འདོད་པ་མཉམ་ལྡན་པས༔ བརྡ་བཞིས་བསྣོལ་མར་བསྐུལ་བྱས་ལ༔ འཁྱུད་བསྡམ་གསོར་ཞིང་བསྐྱོད་པ་ཡིས༔ རྗེས་ཆགས་མེ་ཡིས་ཐིག་ལེ་དབབ༔ གནས་བཞིར་རྒྱུ་ཡི་དགའ་བཞི་སྐྱེས༔ སླར་ཡང་གྱེན་དུ་དྲངས་པ་ཡིས༔ མས་བརྟན་འབྲས་བུའི་དགའ་བཞི་དང་༔ སྟོང་བཞིའི་འོད་གསལ་མི་ཕྱེད་པའི༔ ལྷན་ཅིག་སྐྱེས་པ་མངོན་གྱུར་བྱ༔ དེ་དོན་བརྡ་ཡིས་མཚོན་བྱས་ཏེ༔ མཐར་ཐུག་བཞི་པའི་དབང་མཆོག་སྦྱིན༔ ཧོཿ དབྱིངས་ནི་རྣམ་དག་ཤེལ་ལྟ་བུ༔ རིག་པ་ཡེ་ཤེས་འཇའ་ལྟར་ཤར༔ ཟུང་འཇུག་འདུས་མ་བྱས་པའི་ངང་༔ དོན་གྱི་དགོངས་པ་མངོན་གྱུར་ཤོག༔ ཨོཾ་དྷརྨ་དྷཱ་ཏུ་ཛྙཱ་ན་ཨ་བྷི་ཥིཉྩ་ཧོ༔ ལྟ་སྒོམ་སྤྱོད་འབྲས་ངོ་སྤྲོད་གདབ༔ ཨཱཿ ལྟ་བ་བློ་འདས་གདོད་མའི་བབས༔ སྒོམ་པ་མ་བཅོས་ལྷུག་པར་བཞག༔ སྤྱོད་པ་རང་གྲོལ་གཉུག་མའི་ངང་༔ འབྲས་བུ་གཞི་སྣང་ཆེན་པོར་རྫོགས༔ ཨ་ཨ་ཨཿ དེ་ལྟར་སྨིན་བྱེད་དངོས་གཞི་ལ༔ བསྒྲུབ་གཞི་དཀྱིལ་འཁོར་སྒྲུབ་ཆོས་ཐབས༔ ཡེ་ཤེས་ལྷ་ཚོགས་བསྙེན་པ་སྟེ༔ བདག་ཉིད་ནུས་ལྡན་ཉེ་བར་བསྙེན༔ སློབ་མ་འཇུག་པ་སྒྲུབ་པ་སྟེ༔ དབང་བསྐུར་སྒྲུབ་པ་ཆེན་པོའོ༔ ས་མ་ཡ༔ དབང་མཆོག་ཟབ་མོས་རྒྱུད་སྨིན་ནས༔ སྤྱི་དང་ཁྱད་པར་ལྷག་པ་ཡི༔ དམ་ཚིག་བསྒྲག་ཅིང་བཟུང་བྱས་ལ༔ གཏང་རག་དབུལ་ཞིང་དགེ་བ་བསྔོ༔ དགའ་སྟོན་ཚོགས་ཀྱི་འཁོར་ལོ་དང་༔ རྡོ་རྗེའི་གླུ་དང་གར་སྦྱོར་བས༔ བདེ་བ་ཆེན་པོའི་ཡེ་ཤེས་སྤེལ༔ དུས་གསུམ་ཀུན་ཏུ་ཤིས་པར་བྱ༔ ས་མ་ཡ༔ འཆི་མེད་འཕགས་མའི་སྔགས་ཀྱི་རྒྱུད༔ རབ་འབྱམས་རྡོ་རྗེ་ནཱ་དའི་གསུང་༔ རྡོ་རྗེ་ཆོས་ཀྱིས་བསྡུས་པའི་ལུང་༔ མན་ངག་ངེས་པས་བཤད་པ་འདི༔ རང་བྱུང་ཆེན་པོ་པདྨ་ཡིས༔ རིག་འཛིན་རྣམས་ཀྱི་བཞེད་པའི་མཐིལ༔ སྐལ་བཟང་སྣོད་ལྡན་སྨིན་བྱའི་ཕྱིར༔ ད་ལྟའི་མངའ་བདག་ཡབ་སྲས་ལ༔ དགོངས་བརྡས་མཚོན་ཞིང་སྙན་དུ་བརྒྱུད༔ མ་འོངས་དོན་དུ་བྱིན་བརླབས་ཏེ༔ འོད་གསལ་དབྱིངས་ཀྱི་ཐིག་ལེར་བསྟིམ༔ ཟུང་འཇུག་སྒྱུ་མའི་ཡེ་ཤེས་རྩལ༔ གདུལ་བྱའི་བསམ་པ་ཇི་བཞིན་དུ༔ སྲེད་ལེན་བྲལ་བའི་དགོངས་པའི་གཏེར༔ འདོད་པ་འཇོ་བའི་ཆོས་ཆར་གྱིས༔ དངོས་གྲུབ་རྣམ་གཉིས་རྒྱས་པར་འགྱུར༔ ས་མ་ཡ༔ རྒྱ་རྒྱ་རྒྱ༔ གུ་ཧྱ༔ བརྡ་ཐིམ༔ པདྨ་འོད་གསལ་མདོ་སྔགས་གླིང་པས་ཟབ་མོ་དགོངས་པའི་གཏེར་མཛོད་ནས་ཕྱུང་བའོ།། །།

[edit]

d+hI:__'chi med 'phags ma'i snying tig las:__smin byed rtsa ba'i dbang chog ye shes thig le bzhugs:__d+hI:__bla ma yid bzhin 'khor lor 'dud:__rdo rje theg pa'i gsang ba che'i:__lam gyi rtsa ba dbang bskur te:__srog ni dam tshig sdom pas bzung :__rim pa gnyis kyis gsos btab pas:__sku bzhi'i 'bras bu mngon du 'gyur:__sa ma ya:__de la sngon du bsnyen pa dang :__sa gzhi rung bar bya ba dang :__yul dang yul can lhag gnas dang :__'jug cing smin pa'i rim pa ste:__rnam pa bzhir ni yang dag bshad:__dang po dbang thob dam tshig ldan:__sngags dang rgyud kyi sbyor shes pa'i:__rdo rje slob dpon mkhas pa yis:__stong pa nyid la blo bzhag ste:__snying rje sgyu ma'i tshul rig pas:__rgyu yi tA~M la sems bzung ste:__yul gsum gsal bar gyur pa na:__phyag rgya gcig dang spros bcas kyi:__lhar snang goms pa brtan po yis:__bsnyen sgrub las kyi gsang ba'i sngags:__ji skad bshad pa'i dus dang ni:__gtso mo'i rigs pa 'bru 'bum dang :__gzhan rnams 'bum phrag bzhi la sogs:__grangs dang rtags rnams rdzogs pa na:__slob ma rjes su gzung bar bya:__de yang lha sku phra rags kyi:__gsal snang brtan po bsnyen pa ste:__bzlas brjod rnam gsum nye bsnyen dang :__sgrub dang sgrub pa chen por shes:__sa ma ya:__gnyis pa sa gzhi las rung phyir:__legs par brtags pa'i yid mthun gnas:__snang ba'i bdag por rin gyis btsal:__mi snang lha dang 'byung po la:__gtor ma sbyin zhing bka' yang bsgo:__gnang ba'i mtshan ma thob pa na:__bden pa gnyis kyis rab sbyangs shing :__srung ba'i 'khor los phyogs mtshams bcing :__de la legs brtag bsnyen pa ste:__slong ba nye bar bsnyen pa'i tshul:__sgrub pas sbyang zhing sgrub pa ches:__bar chad mtshan ma bsrung ba'o:__sa ma ya:__gsum pa lhag par gnas pa la:__yul can lhan cig byed pa'i rgyu:__dkyil 'khor pa la snyan gsan dbab:__mdun du me tog tshom bu yis:__mtshon pa'i rten la dam tshig bskyed:__ye shes bcug cing mchod bstod rjes:__pus btsugs thal mo sbyar byas te:__spos dang bcas pas 'di skad gsol:__oM:__sangs rgyas thams cad skyed pa'i yum:__'chi med sgrol ma'i lha tshogs rnams:__sngon gyi thugs dam chen po yis:__bdag la dgongs par mdzad du gsol:__rig pa 'dzin pa bdag gis ni:__yo byad rnam pa thams cad pas:__bde ba'i longs spyod rab sbyar te:__lha rnams yongs su mchod pa dang :__snod ldan rnams la phan gdags phyir:__sngags kyi cho ga'i thabs chen pos:__snying po'i dkyil 'khor bsgrub pa dang :__rang gzhan don kun bgyid 'tshal na:__ye shes snying rje chen po yis:__bzod par mdzad de gnang nas kyang :__snod bcud 'chi med sgrol ma yi:__rdo rje gsum dang dbyer med par:__byin gyis brlab par mdzad du gsol:__zhes gsol lha tshogs rab dgyes pas:__gnang ba byin dang chabs cig par:__sgrub pa'i gzhi la thim pa yis:__ye shes gzi byin 'bar bar bsam:__bcud dang chas ldan bum pa bzang :__lha yi grangs sam gnyis kyang rung :__ji ltar rigs pa'i stegs la bsham:__rnam par rgyal ba'i bum pa ni:__bsang zhing tha mal rtog pa sbyang :__stong pa'i ngang las pad zla'i steng :__kha dog lnga ldan yi ge b+h+rU~M:__yongs gyur phyi ni rin po che'i:__rang bzhin bum pa bzang po che:__mtshan nyid yongs rdzogs 'od du 'bar:__nang ni lha tshogs bzhugs pa'i gnas:__rin chen gzhal med khang chen por:__gtso 'khor sprul par bcas pa yi:__dkyil 'khor 'khor lo gsal btab la:__mchod bstod las rim ci rigs bya:__rang gi thugs nas sngags kyi phreng :__rdo rje'i gzungs thag las brgyud de:__bum lha'i thugs dam rgyud bskul bas:__bde stong rol pa'i 'od zer sprin:__mkha' khyab kun tu snang ba yis:__'phags mchod 'gro ba'i don kun bsgrubs:__tshur 'dus thugs kyi dpal ber 'khyil:__sku dang sngags las bdud rtsi'i rgyun:__dpag med byung nas bum pa'i bcud:__dngos grub kun gyi snying por bsam:__tshul bzhin bzlas shing nus ldan bsgrub:__mthar ni 'od zhu bdud rtsir bsam:__las bum nang du pad nyi'i steng :__pad+ma rta mgrin sku mdog dmar:__phyag gnyis pad+ma dril bu 'dzin:__dur khrod chas rdzogs dor stabs bzhugs:__sku las rdo rje'i bdud rts-i'i rgyun:__babs pas bum pa gang bar bsam:__oM hrIH__pad+mAn+ta kr-ita sarba big+h+nAn ha na ha na hU~M phaT:__rdo rje dril bu bdud rtsi sogs:__nye bar mkho ba'i yo byad rnams:__rnam par dag pa'i tshul chen pos:__rang bzhin ye shes snang bar brlab:__khyad par dad dang brtson 'grus ldan:__brtul zhugs nus pa'i slob ma ni:__dam tshig srung bar nges pa rnams:__drang ba'i chos kyis rgyud sbyangs pas:__'os su gyur pa ci rigs kun:__maN+Dal me tog bcas pa yis:__dkyil 'khor khang pa'i sgor 'khod de:__gus pas gsol ba 'di skad gdab:__pad+ma'i yum mchog rje btsun ma:__rdo rje'i bla ma dgongs su gsol:__bdag cag 'khor ba las bsgral phyir:__thugs rje chen pos rjes bzung 'tshal:__bla mas de la lan sbyin pa:__bsam yas theg pa'i 'jug sgo ni:__blo dang 'tshams par snang ba las:__mthar thug rdo rje'i dkyil 'khor du:__'jug pa'i skal ldan shin tu dkon:__dad dang dam tshig mchog ldan cing :__rdo rje 'dzin pa'i bslab pa las:__nam yang 'da' bar mi bgyid na:__sangs rgyas rnams ni thams cad kyi:__mngon par byang chub lam gyi mchog:__yang dag nges pa'i gsang ba bzhin:__thar pa chen po'i grong khyer du:__bdag gi snod du rung ba'i phyir:__lhag par gnas pa'i cho ga bya:__zhes gdams de yis lan gsol pa:__bdag ni gtso bo khyed nyid las:__skyabs gnas gzhan na ma mchis phyir:__ji ltar bka' stsal bsgrub bgyid na:__nges par dgongs te gnang du gsol:__zhes zhu skyabs sems tshogs bsag dang :__khyad par sdom gsum bzung ba ni:__pad+ma'i rigs mchog bla ma dang :__dkyil 'khor lha tshogs dgongs su gsol:__bdag gis dus 'di nas bzung ste:__byang chub snying por mchis kyi bar:__mtha' yas 'gro kun sgrol ba'i phyir:__gzhan gnod gzhir bcas yongs su spang :__gzhan phan byang chub sems mchog bskyed:__gnyis ka mnyam pa chen po yi:__thabs chen gsang ba sngags kyi srog:__spyi dang khyad par lhag pa yi:__rig pa 'dzin pa'i dam tshig dang :__sdom pa ma lus yongs su gzung :__tshul bzhin du ni bslab par bgyi:__lan gsum rjes su zlos pa yis:__dbang gi snod du rung bar bya:__gzhi lus lhar bskyed byin gyis brlab:__mnga' dbul slad du mchod pas mchod:__de nas dngos grub snod brtag phyir:__dri ldan me tog cod pan can:__bcu gnyis sor tshad so shing ni:__byin brlabs mkha' dbyings phyag rgyar sbyin:__ha sa ha zhes bzhad pa'i sngags:__brjod pas so shing 'od zer gyis:__lus gang sdig sgrib sbyang par bsam:__ba byung bdud rtsis bsgos pa yi:__maN+Dal dbus su ltos med dor:__phyogs bzhir thun mong las bzhi ste:__rang dang bla mar bstan na mchog:__mtshams su rtse bstan phra mo yi:__dngos grub skal ba ci rigs 'gyur:__rmi lam brtag pa'i sngon 'gro ni:__dri ldan khyor chu las sngags kyis:__btab pa rnam dag sngags 'dis sbyin:__oM hrIHbi shud+d+ha sarba d+harma sarba pA paM ni sh+tsa s+ya saM sho d+ha ya sarba bi kalpAn a pa na ya hU~M:__skud pa dmar po sum bsgril la:__mdud pa gsum gyis btab pa nyid:__las kyi sngags kyis dpung par bcing :__badz+ra rak+Shas brtan par bya:__ma nyams ku sha'i phon po ni:__d+hI dang ha las skyes par bsam:__dri med yid 'ong dag pa'i rtswa:__byang chub mchog gi rdo rje'i stan:__sngas dang gdan du sbyin pa yis:__rmi lam ltas kun gsal bar shog:__d+hI ha badz+ra A sa na sa ma ya s+t+wa~M:__mi ldog phyir du zab mo'i chos:__bshad cing spro ba bskyed pa ni:__'jig rten khams ni thams cad du:__'dren pa sangs rgyas 'byung ba dang :__chos dang 'phags pa'i tshogs dkon te:__de las kyang ni rdo rje'i theg:__zab mo ston dang sgrub pa ni:__ma byung 'byung bar shin tu dka':__gsod nams blo gros dri med pa'i:__snod du gyur pa rnyed pa gang :__tshul chen 'di las mi 'da' na:__dkyil 'khor mthong ba tsam gyis kyang :__bskal mang sdig sgrib zad byed phyir:__tshul bzhin dbang blang dam tshig dang :__sdom par ldan na smros ci dgos:__de bas gzhan don sangs rgyas kyi:__go 'phang mchog tu don gnyer bas:__rdo rje'i lam 'di blang bar gyis:__zhes gdams slar yang 'di skad du:__bu kye ku sha'i sngas gdan la:__gtsang zhing dge ba'i sems kyis nyol:__rmi lam yul du gang mthong ba:__nangs par smros shig lung bstan 'gyur:__des kyang bka' bzhin 'tshal ba yis:__thun gsum tha ma'i rmi lam kun:__nangs par bla ma la zhus te:__bzang ngan bye brag bshad pa dang :__rten 'brel dge ba'i phyogs su bsgrig:__de la rdo rje'i dkyil 'khor par:__gnang ba gsol bas bsnyen pa ste:__bum chu bdud rtsir byin brlabs pa:__dbang bskur phyir du nye bar bsnyen:__sngags kyi yo byad brtag pa ni:__sgrub pa yin par shes par bya:__slob ma snod rung lhag gnas pa:__mthar thug sgrub pa chen po'o:__sa ma ya:__bzhi pa dngos gzhi'i cho ga la:__dkyil 'khor bri dang yo byad dgram:__sgrub cing mchod pa'i cho ga dang :__bdag nyid 'jug cing slob ma gzhug:__thog mar legs snyoms stegs bu'i steng :__bdud rtsi lnga yis chag chag gdab:__dpa' bo'i rin gyis btsal ba yis:__skud pa kha dog lnga ldan pa:__dam tshig ye shes mnyam sbyar bas:__rang dang rdo rje'i gzungs ma ni:__gar gyi dbang phyug yab yum gsal:__snyoms par zhugs pa'i bde ba'i sgras:__sangs rgyas sras bcas sad byas te:__mkha' dang sa la rnam par thar:__brgyad dang ldan pa'i thig gdab cing :__bye brag cha dbye legs par bya:__rigs lnga'i rang bzhin tshon sna yis:__rten dang brten pa ji bzhin 'bri:__dbus su bsgrubs pa'i bum pa dang :__shar du dbu rgyan lhor rdo rje:__nub tu dril bu byang gi char:__rdo rje dril bu lhan cig ste:__gzhan yang sku sngags phyag mtshan sogs:__lha gnas ma 'chol tshul bzhin dgod:__nyer spyod 'dod yon sman gtor raka:__gdugs dang rgyal mtshan ba dan dang :__tshogs kyi yo byad khyad par can:__rol mo'i bye brag ji snyed sogs:__bag dro yid 'ong mdzes par brgyan:__ye shes chen po'i gzi byin ni:__bdag gnas yo byad rnams la dbab:__de nas sgrub cing mchod pa ni:__bdag dang mdun rten dbyer med par:__lhag pa ting 'dzin dkyil 'khor gsal:__ye shes spyan drangs dbyer med bstim:__phyag mchod bstod pas dgyes pa bskyed:__bdag las ye shes mdun bltas te:__bsnyen sgrub las kyi bzlas pa bya:__skabs su mchod bstod tshogs gtor dbul:__dngos grub mtshan ma mthong ba'am:__bzlas brjod bsnyen pa'i grangs thems na:__bdag don dbang bskur blang ba ni:__rang rig gdod nas dag pa dang :__bla ma mkhor lo'i dbang phyug ma:__dbyer med chen por shes byas la:__glo bur rnam shes rnam smin rten:__slob bu'i tshul du shar sgor 'khod:__'og nas 'byung ba'i dbang rnams blang :__yang na ting 'dzin gsal brtan pas:__dkyil 'khor pa rnams sku gsung thugs:__yon tan phrin las rgyan 'khor lo:__bsam mi khyab dang rang nyid kyi:__sgo gsum bya byed dang bcas pa:__dbyer med chen por yongs shes pas:__rang byung rig pa'i me tog dor:__slar yang thal sbyar me tog bcas:__oM:__bla na med pa'i ye shes kyi:__go 'phang chen po'i mchog bsgrub phyir:__snod ldan slob ma 'jug 'tshal na:__thugs rjes dgongs te smin mdzad gsol:__zhes gsol dkyil 'khor lha tshogs kyis:__dgyes bzhin gnang ba stsal bar bsam:__de nas lhag par gnas pa yi:__slob ma dag pa'i khrus nas dbyung :__bgegs bsal srung ba'i 'khor los bcing :__nges shes bskyed phyir lo rgyus brjod:__des kyang ci 'byor maN+Dal 'bul:__gdong dgab me tog phreng ba gtad:__pus btsugs thal mo sbyar byas te:__hoH__bde chen dgyes pa'i ye shes sku:__rdo rje 'dzin pa dgongs su gsol:__thar pa mchog gi grong khyer du:__slob dpon chen pos bdag gzhug gsol:__lan gsum gsol gdab slob dpon gyis:__hoH__gsang ba rmad byung dkyil 'khor du:__'jug par dka' la phan yon che:__dam tshig srog bzhin srung nus na:__'jug cing dbang bskur smin par bya:__zhes gdams de la lan gsol pa:__hoH__bdag ni sems can kun don du:___bla med byang chub don gnyer bas:__rdo rje'i lam mchog bsnyen bgyid phyir:__dam tshig sdom pa srog bzhin bsrung :__zab mo'i tshul la 'jug pa dang :__rnam grol 'bras bu 'tshal lags na:__thugs rjes dgongs te gnang du gsol:__zhes zhu gnang ba sbyin pa ni:__de ltar yin na bcom ldan 'das:__'chi med sgrol ma'i dkyil 'khor du:__gzhug cing ye shes bskyed par bya:__spro ba bskyed la gus par gyis:__zhes brjod skyabs sems tshogs bsag dang :__sdom pa gsum la legs par bkod:__gsang sngags nang gi sems bskyed nas:__gsang ba'i de nyid bsgo ba ni:__hoH__tshul chen gsang ba sngags kyi lam:__thabs mkhas ngo mtshar spyod pa ni:__gzhan du smras na nyams par 'gyur:__de phyir gzhan la ma smra zhig:__ces gdams pra be sha ya yis:__sgo dbye dzaHhU~M ba~M hoH'i sgras:__tshad med bzhi yi 'jug pa yis:__sgo bzhir bcug cing phyag kyang bya:__slar yang shar sgor 'khod pa la:__nan tan dam tshig bsgo ba ni:__oMH__de ring 'chi med 'phags ma yi:__ye shes khyed la bskyed par bya:__gsang ba mchog gi dam tshig las:__bla med 'bras bu thob phyir zungs:__dz+nyA na badz+ra sa ma ya hU~M:__AH__'di ni dam tshig rdo rje sems:__khyod kyi snying la dbyer med gnas:__gal te dam las 'das gyur na:__de ma thag tu bkas te gshegs:__sa ma ya badz+ra hU~M:__hU~M:__'thungs shig rdo rje'i bdud rtsi'i chu:__lce la bzhag kyang snying dkyil thim:__ma bsrungs 'dod pa'i dngos grub nyams:__bsrungs na ye shes tshe 'dir rnyed:__sa ma ya a mr-i ta u da ka hU~M:__hoH__de ring phyin cad bu khyod kyi:__'chi med 'phags ma nga yin pas:__ji skad bsgo ba'i dam tshig las:__nam yang 'da' bar ma byed cig:__ma hA sa ma ya hU~M:__zhes pas dam bzhag ye shes kyi:__gzi byin lhag par dbab pa'i slad:__slob ma sgo gsum gnad bcun la:__rtse gcig ting 'dzin gsal zhing brtan:__snod ni pad+ma bkod pa'i zhing :__bcud kyi rtog pa 'phags ma'i sku:__rang 'od yab dang mnyam sbyor ba'i:__thugs srog tA~M la sems 'dzin zhing :__rgyud la nus pa thob pa'i slad:__snyoms 'jug sgra dang 'od zer sprin:__gdung ba'i glu yis thugs dam bskul:__sku gsung thugs kyi phyag rgya ni:__char ltar babs te dbyer med thim:__ye shes chen po'i byin thob bsam:__ma grub spogs pa'i cho ga ni:__snying gar rlung sems dbyer med pa'i:__ngo bo dga' 'khyil dkar dmar mdangs:__drag tu 'khor la sems gtad nas:__dbyings rig dbyer med ngang la bzhag:__hU~M gi glus bskul nges par phebs:__lus ngag yid la bde chen nyams:__skyes na rtsol med bskyangs du bzhug:__oM badz+ra dz+nyA na tiSh+Tha b+h+rU~M:__zhes dang rdo rje rgya gram gyis:__spyi bor reg cing brtan par bya:__rigs kyi nges pa brtag pa'i slad:__dkyil 'khor pa la me tog dbul:__oM:__rin chen me tog yid 'ong phreng :__rang byung dkyil 'khor lha la 'bul:__tshe rabs 'brel ba'i rigs kyi lhas:__thugs rjes dgongs te bzhes su gsol:__oM rat+na puSh+pe pra tIts+tsha ho:__dbus dang phyogs bzhir babs pa na:__rigs lnga'i sgrol mar nges byas te:__rdo rje'i ming gdags me tog phreng :___cod pan tshul du spyi bor bcings:__hoH__'di ni khyod kyi babs pa'i lha:__deng nas bzung ste byang chub bar:__'bral med byin gyis rlob pa'i phyir:__rin chen cod pan tshul du sbyin:__oM pra ti gr-ih+Na i maM sa twa ma hA ba la tiSh+Tha oM:__ye shes 'od kyi thur ma yis:__ma rig ling tog bsal bar bya:__oM:__'chi med 'phags ma'i ye shes kyi:__snang bas ma rig sgrib bsal nas :__rang bzhin dkyil 'khor don dang rtags:__mngon sum nyid du mthong gyur cig:__oM badz+ra dz+nyA na tsak+ShU pra be sha ya phaT:__mthong ba bstan cing spro ba bskyed:__hoH__gdod nas rnam dag rang bzhin dbyings:__ye shes gzugs brnyan tshul du shar:__mtshon byed rtags kyi dkyil 'khor ni:__ting 'dzin mchog gi rol mo las:__lhag pa'i cho 'phrul bsam yas spro:__byang chub sems dang tshom bu tshogs:__phyi nang gzhan gsum dbyer med pa:__rje btsun 'phags ma'i maN+Da la:__'dir zhugs 'di ltos 'di don sgoms:__mthong bas bskal mang sdig sgrib dag:__dbang bskur ye shes rgyud la smin:__bsgoms pas dngos grub myur du 'grub:__de phyir dad brtson skal ldan rnams:__lha sngags phyag rgyar mnyam sbyar nas:__rang gzhan don gnyis brtson par gyis:__zhes gdams rten dang brten pa yi:__gzugs brnyan gsal zhing rdzogs par bstan:__lha dang skal ba mnyam pa la:__go 'phang chen po'i mchog sbyin phyir:__dbang bskur ched du gsol ba gdab:__hoH__rigs rnams kun bdag slob dpon gyis:__thugs rjes brtse bas nyer bzung nas:__go 'phang mchog tu dbug dbyung phyir:__ye shes dbang bskur stsal du gsol:__lan gsum rjes su slob dpon gyis:__dbang lha spyan drang mchod bstod gsol:__bgegs phral shis pa'i cho ga bya:__de nas phyi ltar rig pa'i dbang :__rnam lngas slob ma rjes su bzung :__slob ma rdo rje sgrol mar gsal:__mi bskyod chu yi dbang bskur bya:__hU~M:__rnam shes zhe sdang dag bya'i phyir:__rdo rje sgrol ma'i ngo bo nyid:__mi bskyod chu yi dbang bskur bas:__me long ye shes mngon gyur shog:__oM badz+ra tA rA u da ka a b+hi Shiny+tsa hU~M:__dbang bskur sgrib dag mi bskyod pas:__rgyas gdab mchod cing bkra shis brjod:__rin chen sgrol mar dbu rgyan sbyin:__trA~M:__tshor ba nga rgyal dag bya'i phyir:__rin chen sgrol ma'i ngo bo nyid:__longs spyod dbu rgyan dbang bskur bas:__mnyam nyid ye shes mngon gyur shog:__oM rat+na tA rA mu ku Ta a b+hi Shiny+tsa trA~M:__pad+ma'i sgrol mar rdo rje gtod:__hrIH__'du shes 'dod chags dag bya'i phyir:__pad+ma'i sgrol ma'i ngo bo nyid:__thabs kyi rdo rjes dbang bskur bas:__sor rtog ye shes mngon gyur shog:__oM pad+ma tA rA badz+ra a b+hi Shiny+tsa hrIH__las kyi sgrol mar dril bu sbyin:__AH__'du byed phrag dog dag bya'i phyir:__las kyi sgrol ma'i ngo bo nyid:__shes rab dril bu'i dbang bskur bas:__bya grub ye shes mngon gyur shog:__oM karma tA rA gaN+De a b+hi Shiny+tsa AH__bde gshegs sgrol mar ming gdags bya:__oM:__gzugs snang gti mug dag bya'i phyir:__bde gshegs sgrol ma'i ngo bo nyid:__rdo rje ming gi dbang bskur bas:__chos dbyings ye shes mngon gyur shog:__oM bud+d+ha tA rA badz+ra nA ma AHb+hi Shiny+tsa oM:__dbu rgyan dbang sogs re re bzhin:__chu dbang bskur zhing phyag rgyas gdab:__mchod cing shis pa brjod pas brtan:__nang ltar nus pa 'jug pa'i phyir:__spyi dang bye brag khyad par gyis:__rdo rje slob dpon bdag po cher:__dbugs dbyungs las dang ye shes kyi:__dbang bskur rim bzhin bsgrub pa la:__slob ma 'khor lo'i dbang phyug mar:__rang 'od yab dang mnyam sbyor ba:__gsal snang rdzogs pa'i gzi byin bskyed:__dam tshig gsum gyi de nyid sbyin:__hU~M:__thog mtha' med pa'i byang chub sems:__don gyi rdo rje rab bzung nas:__dkyil 'khor kun gyi 'od gsal thugs:__shin tu rnam dag rtogs par gyis:__oM ma hA badz+ra dz+nyA na hU~M:__AH__srid pa'i rlung bcu rnam dag pa:__grags stong nges don dril bu'i sgra:__mi shigs nA da'i gsung dbyangs kyis:__'gro ba thams cad sad par gyis:__oM badz+ra gaN+De dz+nyA na AH__hU~M:__phung khams skye mched gdod ma nas:__snang rig zung 'jug sgyu ma'i tshul:__bde stong ye shes phyag rgya'i skus:__kha sbyor bde ba'i ting 'dzin sgrubs:__oM ma hA mu dra dz+nyA na At+ma ko\u0f85haM:__bkra shis bum pa'i chu dbang bskur:__oM AHhU~M:__dkyil 'khor rab 'byams thams cad kyi:__ye shes bdud rtsi'i bcud ldan pa'i:__bkra shis bum pas dbang bskur bas:__sku dang ye shes yongs rdzogs shog:__badz+ra ka la sha a b+hi Shiny+tsa su ra tA s+t+waM a haM:__chu lhag gyen du 'khyil pa las:__rdo rje sems dpas dbur brgyan bsam:__dbang la bstim zhing rab tu gnas:__mchod pas mnga' dbul shis pa brjod:__bye brag rjes su gnang ba'i phyir:__lag g.yas dung dang g.yon dril bu:__bar du sngags kyi glegs bam dang :__rkang pa'i 'og tu 'khor lo sbyin:__spyi bor bkra shis gdugs bzung la:__hoH__deng nas brtsams te rigs kyi bu:__khyod ni sgrib dag ye shes brnyes:__dkyil 'khor kun gyi bdag po che:__rdo rje slob dpon mchog tu gyur:__lta spyod dkyil 'khor smin grol dang :__las kyi yan lag thams cad la:__bde chen sgyu ma'i rol pas sgrubs:__snying rje chen pos gzhan don gyis:__'khor ba rgyud lnga drang ba'i phyir:__bsdu ba rnam bzhi'i dung bus la:__theg mchog chos kyi dril bu sgrogs:__rdo rje'i sngags rgyud rab 'byams ky-is:__rigs can gsum gyi gdul bya kun:__byang chub snying por dbugs phyungs shig:__oM badz+ra d+harma b+hA ShA dz+nyA na sa ma ya ho:__khyad par byin rlabs nus thob slad:__lha sngags bstims zhing don ngo sprad:__de la thog mar lha bstim phyir:__so so'i phyag rgya dbang gnas bzhag:__hrIH__so sor rtog pa'i ye shes sku:__rigs bdag tshe dpag med mgon gyis:___rigs kyi bu la dbang bskur bas:__rdo rje'i sku ru 'grub par shog:__oM a mA ra Ni dzi ban+ti ye swA hA:__kA ya a b+hi Shiny+tsa oM:__tAM:__pad+ma'i rigs mchog gsung gi yum:__yid bzhin 'khor lo yab yum gyis:__rigs kyi bu la dbang bskur bas:__rdo rje'i gsung du 'grub par shog:__oM tA re tut+tA re tu re swA hA:__kA ya a b+hi Shiny+tsa oM:__b+h+rU~M:__bde bshegs 'od gsal ye shes thugs:__gtsug tor chen mo'i phyag rgya yis:__rigs kyi bu la dbang bskur bas:__rdo rje'i thugs su 'grub par shog:__oM a mr-i ta A yurda de swA hA:__kA ya a b+hi Shiny+tsa oM:__tA~M:__chu khams rnam dag mA ma kI:__bcom ldan rdo rje sgrol ma yis:__rigs kyi bu la dbang bskur bas:__me long ye shes rtogs par shog:__oM tA re tA~M swA hA:__kA ya a b+hi Shiny+tsa oM:__b+h+rU~M:__sa khams rnam dag sangs rgyas spyan:__bcom ldan rin chen sgrol ma yis:__rigs kyi bu la dbang bskur bas:__mnyam nyid ye shes rtogs par shog:__oM tA re b+h+rU~M swA hA:__kA ya a b+hi Shiny+tsa oM:__hrIH__me khams rnam dag gos dkar mo:__bcom ldan pad+ma'i sgrol ma yis:__rigs kyi bu la dbang bskur bas:__sor rtogs ye shes rtogs par shog:__oM tA re hrIHswA hA:__kA ya a b+hi Shiny+tsa oM:__hU~M:__rlung khams rnam dag dam tshig sgrol:__bcom ldan las kyi sgrol ma yis:__rigs kyi bu la dbang bskur bas:__bya grub ye shes rtogs par shog:__oM tA re hU~M swA hA:__kA ya a b+hi Shiny+tsa oM:__dzaH__byams pa tshad med ngo bo nyid:__bcom ldan lcags kyu sgrol ma yis:__rigs kyi bu la dbang bskur bas:__zhi ba'i phrin las yongs rdzogs shog:__oM tA re tA~M dzaHshin+taM ku ru swA hA:__kA ya a b+hi Shiny+tsa oM:__hU~M:__snying rje tshad med ngo bo nyid:__bcom ldan zhags pa sgrol ma yis:__rigs ky-i bu la dbang bskur bas:__rgyas pa'i phrin las yongs rdzogs shog:__oM tA re b+h+rU~M hU~M puSh+tiM ku ru oM:__kA ya a b+hi Shiny+tsa oM:__ba~M`:__dga' ba tshad med ngo bo nyid:__bcom ldan lcags sgrog sgrol ma yis:__rigs kyi bu la dbang bskur bas:__dbang gi phrin las yongs rdzogs shog:__oM tA re hrIHba~M wa shaM ku ru ho:__kA ya a b+hi Shiny+tsa oM:__hoH__btang snyoms tshad med ngo bo nyid:__bcom ldan dril bu'i sgrol ma yis:__rigs kyi bu la dbang bskur bas:__drag po'i phrin las yongs rdzogs shog:__oM tA re hU~M hoH mA ra ya phaT:__kA ya a b+hi Shiny+tsa oM:__bzlas pa'i lung sbyin phreng ba gtad:__AH__ji snyed brjod pa thams cad kun:__rdo rje'i sngags su rnam par dag:__nus pa skyed pa'i dbang bskur bas:__dngos grub rnam gnyis myur 'grub shog:__oM sarba maN+Da la wa ka a b+hi Shiny+tsa AH__me long bstan cing don ngo sprad:__hU~M:__gzung dang 'dzin pa'i rtog pa kun:__gdod nas rang bzhin 'od gsal ngang :__ye shes rtogs pa'i dbang bskur bas:__zung 'jug gnas lugs mngon gyur shog:__oM sarba maN+Da la tsit+ta a b+hi Shiny+tsa hU~M:__gsang ba zab mo'i dbang bskur ni:__sbyor ba rtsa khams rang byin brlabs:__dngos gzhi dpe yi ye shes bskyed:__rjes su don gyi ngo sprod gdab:__'phags lam dgongs pa mtshon par bya:__de la thog mar bla ma dang :__shes rab mnyam sbyor byang sems sbyin:__AH__dga' ba mchog gis drangs pa'i bcud:__byang chub sems kyi dam tshig gis:__rtsa khams rlung la dbang bskur bas:__gsal stong zung 'jug nyams myong shog:__oM bo d+hi tsit+ta a b+hi Shiny+tsa AH__rig ma byin brlabs brtul zhugs sbyin:__hU~M:__rnam pa kun ldan ye shes ni:__rig ma'i brtul zhugs bla na med:__'du shes gsum gyis mnyam sbyar bas:__dpe yi lhan skyes rtogs par shog:__oM karma mu dra dz+nyA na a b+hi Shiny+tsa hU~M:__slob ma gar gyi dbang phyug dang :__phyag rgya 'chi med sgrol mar bskyed:__mkha' gsang rdo rje pad+mar brlab:__byang sems 'dod pa mnyam ldan pas:__brda bzhis bsnol mar bskul byas la:__'khyud bsdam gsor zhing bskyod pa yis:__rjes chags me yis thig le dbab:__gnas bzhir rgyu yi dga' bzhi skyes:__slar yang gyen du drangs pa yis:__mas brtan 'bras bu'i dga' bzhi dang :__stong bzhi'i 'od gsal mi phyed pa'i:__lhan cig skyes pa mngon gyur bya:__de don brda yis mtshon byas te:__mthar thug bzhi pa'i dbang mchog sbyin:__hoH__dbyings ni rnam dag shel lta bu:__rig pa ye shes 'ja' ltar shar:__zung 'jug 'dus ma byas pa'i ngang :__don gyi dgongs pa mngon gyur shog:__oM d+harma d+hA tu dz+nyA na a b+hi Shiny+tsa ho:__lta sgom spyod 'bras ngo sprod gdab:__AH__lta ba blo 'das gdod ma'i babs:__sgom pa ma bcos lhug par bzhag:__spyod pa rang grol gnyug ma'i ngang :__'bras bu gzhi snang chen por rdzogs:__a a aH__de ltar smin byed dngos gzhi la:__bsgrub gzhi dkyil 'khor sgrub chos thabs:__ye shes lha tshogs bsnyen pa ste:__bdag nyid nus ldan nye bar bsnyen:__slob ma 'jug pa sgrub pa ste:__dbang bskur sgrub pa chen po'o:__sa ma ya:__dbang mchog zab mos rgyud smin nas:__spyi dang khyad par lhag pa yi:__dam tshig bsgrag cing bzung byas la:__gtang rag dbul zhing dge ba bsngo:__dga' ston tshogs kyi 'khor lo dang :__rdo rje'i glu dang gar sbyor bas:__bde ba chen po'i ye shes spel:__dus gsum kun tu shis par bya:__sa ma ya:__'chi med 'phags ma'i sngags kyi rgyud:__rab 'byams rdo rje nA da'i gsung :__rdo rje chos kyis bsdus pa'i lung :__man ngag nges pas bshad pa 'di:__rang byung chen po pad+ma yis:__rig 'dzin rnams kyi bzhed pa'i mthil:__skal bzang snod ldan smin bya'i phyir:__da lta'i mnga' bdag yab sras la:__dgongs brdas mtshon zhing snyan du brgyud:__ma 'ongs don du byin brlabs te:__'od gsal dbyings kyi thig ler bstim:__zung 'jug sgyu ma'i ye shes rtsal:__gdul bya'i bsam pa ji bzhin du:__sred len bral ba'i dgongs pa'i gter:__'dod pa 'jo ba'i chos char gyis:__dngos grub rnam gnyis rgyas par 'gyur:__sa ma ya:__rgya rgya rgya:__gu h+ya:__brda thim:__pad+ma 'od gsal mdo sngags gling pas zab mo dgongs pa'i gter mdzod nas phyung ba'o//__//