ན་མོ་མ་ཧཱ་ཀ་རུ་ཎི་ཀ་ཡེ། གྲངས་མེད་སོགས། ན་མོ་གུ་རུ་བུདྡྷ་བོ་དྷི་སཏྭ་ཡེ། ཆོས་དབྱིངས་སོགས། ༑ ན་མོ་གུ་རུ་བུདྡྷ་བོ་དྷི་སཏྭ་ཡེ། ཀུན་ཕན་ཐུགས་བསྐྱེད་སོགས། ༑ སྐྱབས་ཡུལ་རྒྱ་མཚོ་མངོན་སྤྱོད་ཀྱི་ལས་ལ་སྨོན་བསྐུལ་རབ་འབར་ཉི་མའི་ཟེར་རྣོ།

🚧 This website is under continued development. We appreciate your patience!

Previous Text Back to Volume PageNext Text

Wylie title	na mo ma hA ka ru Ni ka ye/ grangs med sogs/ na mo gu ru bud+d+ha bo d+hi satwa ye/ chos dbyings sogs/ na mo gu ru bud+d+ha bo d+hi satwa ye/ kun phan thugs bskyed sogs/ skyabs yul rgya mtsho mngon spyod kyi las la smon bskul rab 'bar nyi ma'i zer rno
Location	dil mgo mkhyen brtse bka' 'bum Volume 23, Text 5, Pages 227-242 (Folios 1a1 to 8b3)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Citation	Khyentse, Dilgo. Na mo ma hA ka ru Ni ka ye/ grangs med sogs/ na mo gu ru bud+d+ha bo d+hi satwa ye/ chos dbyings sogs/ na mo gu ru bud+d+ha bo d+hi satwa ye/ kun phan thugs bskyed sogs/ skyabs yul rgya mtsho mngon spyod kyi las la smon bskul rab 'bar nyi ma'i zer rno. In Skyabs rje dil mgo mkhyen brtse rin po che'i bka' 'bum, Vol. 23: 227-242. Delhi: Shechen Publications, 1994.
Genre	Prayers - smon lam

Tibetan Text

Wylie

[edit]

༄༅། ན་མོ་མ་ཧཱ་ཀ་རུ་ཎི་ཀ་ཡེ། གྲངས་མེད་བསྐལ་པར་གཞན་ཕན་ཤིང་རྟ་ཡིས། །དྲངས་པས་འགྲོ་ཀུན་བུ་ལྟར་བརྩེ་བའི་ཐུགས། །བསོད་ནམས་ཡེ་ཤེས་ནོར་བུ་ལྕི་བའི་མཐུས། །འགྲོ་ཀུན་ཕན་མཛད་སྲས་བཅས་རྒྱལ་བ་མཁྱེན། །ཁྱད་པར་ལྔ་བརྒྱའི་གདུལ་བྱ་རྗེས་འཛིན་ལ། །སྙིང་རྗེའི་གོ་ཆ་ལྷུར་བཞེས་ཤཱཀྱའི་ཏོག །སྤྱན་རས་གཟིགས་དང་པད་འབྱུང་སྒྲོལ་མ་སོགས། །གངས་ཅན་མགོན་གྱུར་ཐམས་ཅད་དགོངས་སུ་གསོལ། །བདག་ཡིད་ཆུ་གཏེར་ཉོན་མོངས་རྦ་རླབས་ཀྱིས། །དཀྲུགས་པའི་རྙོགས་པ་སེལ་མཆོག་ཀེ་ཏ་ཀས། །བགྲུངས་ནས་ཕན་བདེའི་འདོད་རྒུ་ལྷུན་གྲུབ་པས། །འགྲོ་ཀུན་སྙིང་རྗེའི་ལྕགས་ཀྱུས་འཛིན་ནུས་ཤོག །རང་ལ་ལོག་སྒྲུབ་སྡུག་བསྔལ་བསྐྱེད་པའི་འགྲོ། །རང་བྱས་ལས་ཀྱི་འབྲས་བུར་ངོ་ཤེས་ནས། །རང་དོན་གཅེས་སེམས་སྤངས་པའི་གཏོང་སེམས་ཀྱིས། །རང་གཞན་བདེ་ནས་བདེ་བའི་རྒྱུར་གྱུར་ཅིག །བསགས་པའི་ནོར་ཀུན་སྟོབས་ཀྱིས་འཕྲོག་པ་འདིས། །ཚེ་རབས་ལན་ཆགས་བུ་ལོན་ཀུན་བྱང་ནས། །ཇི་ལྟར་འདོད་པའི་དོན་ཀུན་ཕ་རོལ་པོས། །གྲུབ་པས་ཡིད་ཀྱི་རེ་བ་རྫོགས་གྱུར་ཅིག །རང་ལ་ཆགས་དང་སེར་སྣའི་བློ་མི་སྐྱེ། །གཞན་ལ་ལན་དང་རྣམ་སྨིན་འབྲས་མི་མྱོང༌། །དགའ་བཞིན་ཕ་མས་བུ་ལ་ཟས་སྟེར་ལྟར། །གྱུར་ནས་དོན་གཉིས་ལྷུན་གྱིས་གྲུབ་པར་ཤོག །ནོར་འཕྲོག་སེར་སྣའི་མདུད་བཀྲོལ་མཁན་པོ་ཀུན། །བྱང་ཆུབ་གྲོགས་སུ་ཤེས་པས་དྲིན་གཟོའི་ཕྱིར། །གཏོང་བའི་བློ་ཡིས་ཚོགས་གཉིས་ཡོངས་རྫོགས་པའི། །བསོད་ནམས་བསགས་པའི་རྟེན་མཆོག་མཐོང་བར་ཤོག །ད་ལྟ་འདིས་མཚོན་ཡིད་འོང་དངོས་པོ་ཀུན། །ཁྱོད་དང་ཁྱོད་མཚུངས་ཀུན་ལ་གུས་འབུལ་ཞིང༌། །དགའ་བའི་སེམས་ཀྱིས་ཡང་ཡང་ཚིམ་བྱེད་ལ། འཁྲུག་དང་སེར་སྣ་ནམ་ཡང་མི་བགྱིད་ཤོག །བདག་ལ་བརྟེན་ནས་བསགས་པའི་ལས་ཀྱི་མཐའ། །རྣམ་དཀར་བྱང་ཆུབ་སྤྱོད་པའི་བཤེས་གཉེན་དུ། །བྱམས་དང་སྙིང་རྗེས་འཕེན་པ་ངེས་གྱུར་ནས། །རང་གཞན་སྡིག་པའི་རྣམ་སྨིན་མི་མྱོང་ཤོག །འདི་སྤྱོད་དཀོན་མཆོག་དཀོར་དང་ལོག་འཚོ་ཡིས། །ནམ་ཡང་མི་གོས་ལོངས་སྤྱོད་ལ་བརྟེན་ནས། །ཚོགས་ཆེན་རྫོགས་དང་སྦྱིན་པའི་ཕ་རོལ་ཏུ། །སོན་ནས་སྒྲིབ་བྲལ་ཡེ་ཤེས་མཐོང་ནུས་ཤོག །སྦྱིན་ཡུལ་ཀུན་ཀྱང་སངས་རྒྱས་སྙིང་པོ་ཅན། །གནས་ལུགས་གདན་གསུམ་དཀྱིལ་འཁོར་ལྷའི་རོལ་མོ། །ཞེན་མེད་ཚོགས་ཀྱི་མཆོད་པས་དངོས་གྲུབ་ཐོབ། །ཀུན་བཟང་རྡོ་རྗེའི་ལོངས་སྤྱོད་རྒྱུར་གྱུར་ཅིག །ལོག་སྒྲུབ་མཁན་ཀུན་སྔོན་གྱི་ཕ་མ་དངོས། །སྣང་ཚུལ་ཙམ་དུ་ཚོགས་གཉིས་བསགས་པའི་རྟེན། །བྱས་པ་ཤེས་པས་དགའ་མགུར་སྟོབ་པ་ཡིས། །ཚེ་རབས་ཀུན་ཏུ་འདི་ཡི་གཡོག་བགྱིད་ཤོག །ཡིད་ཅན་འདི་དག་ལ་བརྟེན་བདག་ཚོགས་རྫོགས། །འདི་དག་སྐྱེ་ཀུན་བདག་གི་གདུལ་བྱར་གྱུར། །གནོད་པ་ལ་བརྟེན་ཕན་ལན་བདེ་སྟེར་བའི། །བྱང་ཆུབ་སེམས་མཆོག་བདག་གི་རྒྱུད་སྐྱེས་ཤོག །བདག་ཅག་སྟོན་པས་སློབ་པ་ལམ་གྱི་སྐབས། །བཟང་ངན་འབྲེལ་ཀུན་མངོན་པར་སངས་རྒྱས་ཚེ། །འདུས་པ་དང་པོ་ལྟ་བུ་འདི་དག་ཀུན། །གྱུར་ནས་འཁོར་གྱི་ཐོག་མར་སོན་གྱུར་ཅིག །སྡང་སེམས་དགྲ་དང་རང་ཉིད་ལྟར་སྣང་བ། །གཉིས་མེད་ཆོས་ཉིད་གཅིག་གི་ངོ་བོ་རུ། །ཆགས་སྡང་འཛིན་རྟོགས་རང་གྲོལ་དོན་དམ་གྱི། །ལྷག་པའི་སེམས་ཀྱིས་སྙིགས་འགྲོ་ཀུན་སྐྱོབ་ཤོག །སྲིད་དང་ཞི་བའི་ཕན་བདེ་བདུད་རྩི་ཡིས། །ཀུན་དུ་སིམ་སྟེར་བྱང་ཆུབ་སྤྱོད་པའི་མཚོར། །རང་གཞན་ཀུན་གྱིས་རྟག་ཏུ་རོལ་པ་ལས། །དགེ་ལེགས་ནོར་བུའི་དཔལ་གྱིས་ཁེངས་གྱུར་ཅིག །བླ་མ་དཀོན་མཆོག་གསུམ་གྱི་མཁྱེན་བརྩེའི་མཐུ། །བདག་གི་གཞན་ཕན་ལྷགས་བསམ་བདེན་ནུས་ཀྱིས། །ཀུན་ཀྱང་བླ་མེད་ཐེག་ཆེན་དགའ་ཚལ་དུ། །འཇུག་པའི་སྐལ་བཟང་རྟེན་འདིར་མངོན་གྱུར་ཤོག །མ་ལུས་འགྲོ་ཀུན་བྱང་ཆུབ་སྤྱོད་པའི་ལམ། །དངོས་བརྒྱུད་ཀུན་ནས་འཇུག་པའི་དགེ་མཚན་གྱིས། །སྙིགས་མའི་སྡུག་བསྔལ་མཐའ་དག་རྒྱུན་ཆད་ནས། །ཀུན་མཁྱེན་གླིང་དུ་ཕྱམ་གཅིག་མྱུར་འཇུག་ཤོག །ས་གསུམ་ཀུན་ཏུ་བདེ་དཔལ་འབྱུང་བའི་གནས། །བསྟན་དང་བསྟན་འཛིན་ལུང་རྟོགས་ཕྲིན་ལས་དར། །རྣམ་དཀར་སྣང་བས་འགྲོ་ཀུན་ངལ་འཚོ་བའི། །དོན་གཉིས་ཡོན་ཏན་ལྷུན་གྱིས་འགྲུབ་གྱུར་ཅིག །ཆོས་ཉིད་བདག་གཞན་མཉམ་པ་ཉིད་ཀྱི་མཐུས། །ཆོས་ཅན་གཞན་ཕན་སྙིང་རྗེ་བདེན་པའི་ཚིག །གདུལ་དཀའ་དམུ་རྒོད་འགྲོ་བས་མངོན་སུམ་དུ། །གྲུབ་ནས་རྒྱལ་སྲས་སྤྱོད་པ་ཡོངས་རྫོགས་ཤོག །འགྲོ་ཀུན་བུ་གཅིག་ལྟར་བརྩེ་སྲས་བཅས་རྒྱལ། །དད་པའི་མདུན་སར་བཀོད་དེ་སྨོན་པ་བཞིན། །མངོན་གྱུར་འབྲེལ་ཚད་ཀུན་མཁྱེན་གོ་འཕང་གི །བདུད་རྩིས་དབུགས་དབྱུང་མྱུར་དུ་སྟེར་ནུས་ཤོག །རྨད་བྱུང་བྱང་ཆུབ་སེམས་ཀྱི་ཡིད་བཞིན་ནོར། །བདག་གི་སྙིང་ལ་རྟག་ཏུ་བཞུགས་པ་ཡིས། །མ་ལུས་ཡིད་ཅན་བདེ་དགའ་མི་ཟད་པའི། །དགའ་སྟོན་བདག་ཉིད་ཁོ་ནས་འགྱེད་ནུས་ཤོག །གང་དུ་སྡུག་བསྔལ་ཅན་དང་གདུལ་དཀའ་བའི། །ཡིད་ཅན་དེ་ཀུན་བདག་དང་ལྷན་ཅིག་འགྲོགས། །ཐབས་མཁས་སྙིང་རྗེའི་སྟོབས་ཀྱིས་དེ་ཐམས་ཅད། །བྱང་ཆུབ་གནས་སུ་བདག་གིས་འགོད་པར་ཤོག །རྙོགས་པ་ལྔས་དཀྲུགས་རྩོད་པ་རྒྱས་པའི་འགྲོ། །རྗེས་སུ་འཛིན་ལ་ཤཱཀྱའི་དབང་པོ་དང༌། །པད་འབྱུང་སྤྱན་རས་གཟིགས་དང་སྒྲོལ་མ་བཞིན། །གྱུར་ནས་དོན་གཉིས་ལྷུན་གྱིས་གྲུབ་པར་མཛོད། །རྩེ་གཅིག་གཞན་ཕན་བློ་ཡིས་སྨོན་པའི་མཐུས། །བདག་གཞན་ཀུན་གྱི་ཉོན་མོངས་སྡུག་བསྔལ་ཞི། །རྣམ་དཀར་སྐྱ་རེང་གིས་བསུས་རྒྱལ་བའི་བསྟན། །ལུང་རྟོགས་དཔལ་འབྱོར་གཡར་མཚོ་ལྟར་རྒྱས་ཤོག །ཅེས་པའང་རང་གཞན་ལས་དང་ཉོན་མོངས་པའི་རྦ་ཀློང་འཁྲུག་པ་སྲིད་པའི་རྒྱ་མཚོར་གཡེངས་ཤིང་མཐའ་མིས་ལོག་སྤྱོད་ནད་མུག་མཚོན་གྱི་བསྐལ་ངན་ཆུ་སྲིན་གྱི་མཆེ་བས་གཟིར་བའི་སྐབས་བྱང་ཆུབ་སེམས་ཀྱི་མངའ་བདག་རྣམ་འདྲེན་རྣམས་ཀྱི་ཐུགས་རྗེའི་ཟླ་ཟེར་སྙིང་ལ་རེག་པའི་བཀའ་དྲིན་འབའ་ཞིག་གི་རྐྱེན་སྣང་ལམ་དུ་ཁྱེར་བའི་སྨོན་ལམ་འདི་ཡང་བཅོས་མིན་གྱི་ལྷག་བསམ་སེམས་ལས་ཤར་བ་བཞིན་རྒྱལ་སྲས་བློ་གྲོས་དྲི་མེད་གཟི་བརྗིད་རབ་ཏུ་དགའ་བའི་དཔལ་ཞེས་བརྡར་བཏགས་པའི་ཀུ་སཱ་ལིས་སྟོན་པའི་ཞལ་སྐྱིན་ཤཱཀྱ་མུ་ནེའི་སྤྱན་སྔར་དཔང་གཙུགས་ཏེ་གསོལ་བ་བཏབ་པ་ཡི་གེའི་རིས་སུ་བཀོད་པའི་འཆར་གཞིའོ། །དགེ་ལེགས་འཕེལ།། ན་མོ་གུ་རུ་བུདྡྷ་བོ་དྷི་སཏྭ་ཡེ། ཆོས་དབྱིངས་ཞི་བའི་ཐུགས་ནི་སྙིང་རྗེས་འཛུམས། །ཡང་ཡང་མ་རྒན་ཉམས་ཐག་འགྲོ་བ་ལ། །འཁྲུགས་པ་མེད་པའི་རྒྱལ་བ་སྲས་དང་བཅས། །དཔལ་མགོན་བླ་མར་ངེས་པའི་ཕྱག་གིས་འདུད། །ཁྱོད་ཀྱི་བྱིན་རླབས་རིན་ཆེན་གསེར་འགྱུར་རྩིས། །བདག་རྒྱུད་ལས་ཉོན་ལྕགས་ཁམས་ལ་ཐེབས་པས། །ཐམས་ཅད་མཁྱེན་པའི་ཡོན་ཏན་འབྱུང་བའི་གནས། །བྱང་ཆུབ་སེམས་ཀྱི་གསེར་སྦྱངས་ཁམས་སུ་བསྒྱུར། །འདི་ནི་དཔག་མེད་ཡོན་ཏན་རིན་ཐང་ཅན། །ནམ་ཡང་ཉེས་པའི་དྲི་མས་མ་ནོངས་པ། །སྲིད་ཞིའི་ཁྱོན་གྱི་ལེགས་ཚོགས་ཀུན་འབྱུང་བའི། །ངོ་མཚར་དཔལ་འདི་སྲས་བཅས་རྒྱལ་བས་བསྔགས། །གང་ལས་ངོ་མཚར་དགེ་ལེགས་ཀུན་འབྱུང་བའི། །ཆ་ཤས་ཀྱིས་ཀྱང་རིན་ཆེན་རྡུལ་བཞིན་དུ། །དཔལ་དང་ཡོན་ཏན་དགའ་སྟོན་མི་ཟད་པ། །སྙིགས་མའི་ཡིད་ཅན་ཀུན་ལ་འཆར་གྱུར་ཅིག །ཁྱད་པར་འདོད་སྲེད་ཆུར་བྱིངས་བསྐམ་ཆགས་ཅན། །ཞེ་སྡང་མེ་ཡིས་རྟག་ཏུ་རྒྱུད་འཚིག་དང༌། །གཏི་མུག་མུན་པས་བསྒྲིབས་ཀྱང་མི་ཤེས་འཁྱམ། །ཕྲག་དོག་རླུང་གིས་བག་མི་ཕེབས་བྱས་འགྲོ། །ང་རྒྱལ་ལྕགས་ཀྱི་གོང་བུ་མཁྲེགས་པ་ཡི། །རྒྱུ་འབྲས་གནས་ལ་སྤྱོད་པའི་ཡིད་ཅན་ཀུན། །བྱང་ཆུབ་སེམས་ནི་རྡོ་རྗེ་ལྟ་བུའི་ཁམས། །ཆགས་བྲལ་ཉི་ཟླ་ལྟར་མཛེས་ཞི་བསིལ་དཔལ། །ཡེ་ཤེས་སྣང་བ་འདོད་དགུའི་དྲྭ་བ་ཅན། །རྟག་ཏུ་མི་འཁྲུགས་རབ་བརྟན་མཉེན་ལྕུག་གིས། །མངོན་མཐོ་ངེས་ལེགས་ལམ་རྣམས་ཀུན་ལ་འཇུག །ཟག་མེད་འཕགས་པའི་སྤང་རྟོགས་བྱེ་བ་སྙེམས། །ཇི་ཙམ་འགལ་རྐྱེན་ཤུགས་ཀྱིས་མནར་བཞིན་དུ། །དེ་ཙམ་ལེགས་ཚོགས་མཐུ་ཡིས་རབ་དཔའ་བའི། །ལམ་འདི་བདག་གིས་མ་ནོར་རྙེད་པའི་མཐུས། །ཁམས་གསུམ་འགྲོ་བའི་འདྲེན་པ་གཅིག་གྱུར་ཅིག །གྲུབ་པ་མཆོག་གི་བདུད་རྩིས་རེག་པ་བཞིན། །མཐོང་ཐོས་དྲན་རེག་མིང་ཙམ་ཐོས་ཚུན་ཆད། །བདེ་ནས་བདེ་བར་རིན་ཆེན་གྲུ་གཟིངས་ཀྱིས། །སྲིད་པའི་རྒྱ་མཚོའི་ཕ་མཐར་བརྒལ་གྱུར་ཅིག །དེར་ནི་རྒྱལ་བའི་སྲས་ཀྱི་དེད་དཔོན་གྱིས། །ལེགས་ཟིན་རྒྱལ་ཀུན་དགྱེས་པའི་ངང་ཚུལ་ལས། །མི་འདའ་རྒྱལ་སྲས་སྤྱོད་པའི་ནོར་བུའི་ཚོགས། །བདག་གིར་བགྱིས་པས་སྲིད་ཞིའི་ཉེས་སྐྱོབས་ཤིག །ཁྱད་པར་རྒྱལ་ཀུན་གཤེགས་དང་འབྱོན་པའི་ལམ། །བླ་མེད་ཐེག་ཆེན་ཆོས་ཀྱི་དགའ་སྟོན་གྱིས། །འགྲོ་ཀུན་ལེགས་སྐྱོང་མཁའ་ཁྱབ་ཡིད་ཅན་ཀུན། །ལམ་དེར་འདྲེན་པའི་ཁ་ལོར་བདག་གྱུར་ཅིག །སྲས་བཅས་འདྲེན་པའི་ཕ་ནོར་ཐེག་ཆེན་གྱི། །སྡེ་སྣོད་མཐའ་དག་འཛིན་འཆང་སྤེལ་བ་ཡིས། །ཆོས་ཀྱི་རྒྱལ་བུ་འཇམ་པའི་དཔལ་བཞིན་དུ། །རྒྱལ་བ་ཀུན་གྱི་སྲས་གཅིག་བདག་གྱུར་ཅིག །བདག་ཀྱང་རང་དོན་སྲེད་པའི་འཆིང་བཅད་དེ། །གཞན་ཕྱིར་སྲོག་ཀྱང་གཏོང་ལ་མི་ངལ་ཞིང༌། །ཚེ་རབས་ཀུན་ཏུ་མ་རྒན་འགྲོ་བའི་གཡོག །བདག་ཉིད་གཅིག་པུས་ངལ་མེད་བྱེད་གྱུར་ཅིག །བདག་ལ་དགའ་ཞིང་ཆགས་པའི་རིགས་ཐམས་ཅད། །བདག་དང་མི་འབྲལ་བདག་གི་ཡིད་མཐུན་པས། །བྱང་ཆུབ་སྤྱོད་པ་རྒྱ་མཚོ་མཉམ་སྤྱད་པ། །བསྐལ་བཟང་སངས་རྒྱས་སྟོང་བཞིན་མཆེད་གྱུར་ཅིག །བདག་ལ་ཁྲོ་དང་གཤུང་བ་དེ་དག་ཀྱང༌། །འཁོན་དང་གནོད་པས་འཚེ་བ་མེད་པ་ཡིས། །སྙིང་རྗེ་བྱང་ཆུབ་སེམས་ཀྱི་གྲོགས་གྱུར་ནས། །ངན་འབྲེལ་འཁོར་གྱི་ཐོག་མ་ཉིད་གྱུར་ཅིག །བརྩེ་བའི་སྙིང་རྗེ་འཕགས་པ་སྤྱན་རས་གཟིགས། །མཁྱེན་པའི་ཡེ་ཤེས་རྗེ་བཙུན་འཇམ་པའི་དབྱངས། །ནུས་པའི་ཕྲིན་ལས་གསང་བདག་དངོས་ཇི་བཞིན། །སྨོན་ལམ་ཀུན་ཏུ་བཟང་དང་མཉམ་གྱུར་ཅིག །དག་པའི་ཚུལ་ཁྲིམས་རྒྱལ་ཚབ་མ་ཕམ་པ། །བསོད་ནམས་མཐུ་དཔལ་རྒྱལ་སྲས་ས་ཡི་སྙིང༌། །མཉམ་ཉིད་ཐུགས་མཆོག་ནམ་སྙིང་ཉེས་ཀུན་འཇོམས། །སྒྲིབ་པ་རྣམ་སེལ་མཛད་དང་གཉིས་མེད་ཤོག །རྩོད་དུས་གདུལ་དཀའ་འདུལ་ལ་ཤཱཀྱའི་ཏོག །རྒྱལ་ཀུན་རྣམ་ཐར་གཅིག་བསྡུས་པདྨ་འབྱུང༌། །དབྱེར་མེད་དཔལ་མགོན་བླ་མའི་གསང་གསུམ་གྱི། །རྣམ་ཐར་ཕྲིན་ལས་གཉིས་སུ་མེད་གྱུར་ཅིག །མངྒ་ལས་སོ། ༈ ན་མོ་གུ་རུ་བུདྡྷ་བོ་དྷི་སཏྭ་ཡེ། ཀུན་ཕན་ཐུགས་བསྐྱེད་བཏང་སྙོམས་ཡངས་པའི་མཁར། །ཀུན་ཁྱབ་སྙིང་རྗེའི་ཆུ་ཁུར་འཁྲིགས་པ་ལས། །ཀུན་གཟིགས་བྱམས་པའི་སྤྲིན་གྱི་མེ་ཏོག་གིས། །ཀུན་དགའི་དཔལ་སྐྱེད་མགོན་པོ་སྲས་བཅས་དགོངས། །དད་པས་ཉེར་དྲངས་སྒོ་གསུམ་དྭངས་བས་བཏུད། །ཕྱག་འཚལ་མཆོད་འབུལ་ཉེས་པ་ཀུན་མཐོལ་ཞིང༌། །དགེ་ལ་ཡི་རང་ཆོས་འཁོར་བསྐོར་བཞིན་བཞུགས། །རྣམ་དཀར་མཐའ་དག་བྱང་ཆུབ་སྙིང་པོར་བསྔོ། །བདག་ལ་དང་པོ་རྟེན་བཟང་ལུས་སྲོག་བསྐྱེད། །བར་དུ་མཐོ་རིས་བདེ་དགའི་བསྙེན་བཀུར་སྦྱིན། །ཐ་མར་རྟག་ཏུ་ཕན་པ་ལྷུར་ལེན་པའི། །བཀའ་དྲིན་འཁོར་མཐའ་མེད་པའི་མ་དང་ཕ། །ཚེ་རབས་ཀུན་ཏུ་ཆོས་ཀྱིས་དྲིན་གཟོའི་ཕྱིར། །ཡང་དག་དགེ་བའི་བཤེས་དང་འཕྲད་བགྱིད་ཅིང༌། །རྣམ་དཀར་སྤྱོད་པས་བདེ་ནས་བདེ་བའི་སར། །འཁྲུགས་པ་མེད་པའི་སེམས་ཀྱིས་སྦྱོར་བར་ཤོག །ལུས་ཀྱི་དྭངས་མས་བསྐྱེད་བཞིན་བདག་གིས་མར། །གཞན་ཕན་བྱང་ཆུབ་སེམས་ཀྱི་ས་བོན་བསྐྲུན། །བྱམས་སྡུག་བརྩེ་དགས་གནོད་པ་ཀུན་བཟོད་ལྟར། །མ་རྒན་ཕྱིར་དུ་ངན་སོང་འཁོར་བར་རྒྱུ། །ཐབས་མཁས་ལག་པས་སྲིད་ཞིའི་ཉེས་པ་ལས། །སྐྱོབ་པའི་བསྙེན་བཀུར་སྐྱོ་ངལ་མེད་པས་བསྟེན། །ཟས་གོས་ལོངས་སྤྱོད་འདོད་ཡོན་ཀུན་སྟེར་ལྟར། །མ་ཕྱིར་དགེ་ལེགས་ཡོན་ཏན་མཐའ་དག་སྦྱིན། །སྙིང་ནས་བརྩེ་བའི་གཡར་དམ་མི་ལྷོད་པས། །བྱང་ཆུབ་སྤྱོད་པའི་གྲོགས་སུ་བདག་གྱུར་ཅིག །རྩ་བའི་ཕ་མ་བཞིན་དུ་སྙིང་རྗེའི་སེམས། །མཁའ་ཁྱབ་འགྲོ་ལ་ཕྱོགས་རིས་མེད་པར་འཇུག །རྟག་ཏུ་གཞན་ཕན་གོ་ཆ་མི་རལ་བའི། །ལྷག་བསམ་བྱང་ཆུབ་སེམས་ཀྱི་གཞི་བརྟན་ཤོག །སྲིད་དང་ཞི་བའི་བདེ་དཔལ་ཡོན་ཏན་མཐུ། །ཀུན་ཀྱང་གཞན་ལ་དགའ་བས་སྟེར་བ་དང༌། །འགྲོ་བ་ཕ་མར་གྱུར་པའི་སྡུག་བསྔལ་དང༌། །སྡིག་པའི་རྣམ་སྨིན་བདག་གི་ཁུར་སྨིན་ཤོག །སྡུག་བསྔལ་ཅན་གྱི་འགྲོ་བ་མཐོང་དང་ཐོས། །དེ་ཡི་མོད་ལ་མ་བཞིན་རབ་དགའ་བས། །ཉམ་ངའི་གནས་སྐྱོབ་བདེ་བར་དབུགས་འབྱིན་ལ། །རང་གི་ལུས་དང་སྲོག་ཀྱང་ཕངས་མེད་ཤོག །ཐོག་མར་བྱང་ཆུབ་སྤྱོད་པའི་འཇུག་སྒོ་སྟོན། །བར་དུ་རྒྱལ་སྲས་སྤྱོད་པ་ལྷན་ཅིག་སྤྱད། །མཐར་ཐུག་ཀུན་མཁྱེན་གླིང་དུ་དབུགས་འབྱིན་མཐུ། །དཔེ་ཟླ་མེད་པའི་སེམས་བསྐྱེད་འཛིན་ནུས་ཤོག །ཇི་ལྟར་བདག་ཅག་སྟོན་པས་སུམ་རྩེན་གནས། །སྒྱུ་འཕྲུལ་ལྷ་མོར་བདུད་རྩིའི་མཐུ་བསྩལ་བཞིན། །བདག་གིས་ཕ་མ་འབྲེལ་ཐོགས་ཡིད་ཅན་ཀུན། །བདེ་ནས་བདེར་སྦྱོར་སྤྱོད་པས་འདུལ་བར་ཤོག །ཕྱོགས་བཅུར་དག་པའི་ཞིང་དུ་སངས་རྒྱས་དང༌། །རྒྱས་སྲས་དབུས་ན་བདག་གིས་མ་རྒན་ཁྲིད། །ཟབ་རྒྱས་ཆོས་ཀྱི་རྒྱུད་སྦྱངས་ལམ་བགྲོད་ནས། །ངེས་པར་སྐུ་བཞིའི་རྒྱལ་སར་སྦྱོར་གྱུར་ཅིག །བདག་གཞན་མཉམ་ཉིད་དོན་དམ་སེམས་ཀྱི་དབྱིངས། །རྨད་བྱུང་སྙིང་རྗེས་གཞན་ཕན་ཀུན་རྫོབ་སེམས། །ཟུང་འཇུག་བསྒོམས་པས་ཇི་ལྟར་སྨོན་པ་བཞིན། །རྟེན་འདིར་མངོན་སུམ་འགྲུབ་པའི་མཐུ་ཐོབ་ཤོག །ཅེས་འདི་དགེ་སྦྱོང་རྒྱལ་མཚན་དང༌། །པདྨ་ཙནྡྲ་ནས་བསྐུལ་ལྟར། །ཀུན་མཁྱེན་བླ་མས་འགྲོ་བ་ཀུན། །ཐེག་མཆོག་ལམ་གྱིས་ཐརྃ་པྃའི་སར། །ཁྲིད་པའི་གླིངྃ་དེར་གནས་འབྲེལ་སྐབས། །མཁྱེན་བརྩེའི་འོད་ཟེར་སྒྲོ་བཏགས་པས། །ས་ཟླའི་ཚེས་༡༠ལ་སྨོན་པ་བཞིན། །གྲུབ་ནས་འབྲེལ་ཐོགས་ཡིད་ཅན་ཀུན། །རྣམ་གྲོལ་ས་ལ་སྦྱོར་གྱུར་ཅིག ༈ སྐྱབས་ཡུལ་རྒྱ་མཚོ་མངོན་སྤྱོད་ཀྱི་ལས་ལ་སྨོན་བསྐུལ་རབ་འབར་ཉི་མའི་ཟེར་རྣོན་བཞུགས། ཨེ་མ་ཧོ། སྣང་སྲིད་ཟིལ་གནོན་རྡོ་རྗེའི་བཀའ་རྟགས་ཀྱིས། །འཁོར་འདས་ཆོས་ཀུན་རྒྱས་བཏབ་པདྨ་འབྱུང༌། །དབང་དྲག་དམར་ནག་དུས་མཐའི་མེ་ཕྲེང་གིས། །རྡོ་རྗེའི་ཚིག་འདིའི་བརྗོད་དོན་ལྕི་བར་མཛོད། །ཡེ་ཤེས་ལྟ་སྟངས་གྲུབ་པས་ནགས་ཚལ་བསྲེགས། །སྡིག་མཛུབ་ཙམ་གྱིས་བྲག་གཏོར་མཚོ་སྐེམ་པའི། །འཕགས་བོད་རྗེ་འབངས་རིག་པ་འཛིན་རྣམས་ཀྱིས། །ཕས་རྒོལ་ཆམས་ལ་འབེབས་པའི་དུས་ལ་བབ། །ཆོས་དབྱིངས་ཞི་བ་རྡོ་རྗེ་དབྱིངས་ཀྱི་ཀློང༌། །བདེ་ཆེན་ལྷུན་གྲུབ་གཏུམ་རྔམ་དྲག་ཤུལ་རོལ། །སྲིད་ཞིའི་སྤྱི་དཔལ་ཆེ་དེས་རྡོ་རྗེའི་མཐུ། །ལྷ་མིན་གཡུལ་ངོར་བཤམས་པས་ཕམ་པར་མཛོད། །རབ་འབར་རྔམ་པའི་སྣང་མཛད་སྐུ་ཡི་དབྱིངས། །རྡོ་རྗེའི་ཉི་མ་འབུམ་ལྟར་དཔའ་བའི་གར། །གདུག་པའི་གདུལ་བྱའི་གཉའ་བར་རབ་བསྒྱུར་བའི། །བསྡུས་དངོས་བཞི་ཡི་ཆོ་འཕྲུལ་རྟག་པར་ཕོབ། །འབྲུག་སྟོང་ལྟར་བརྗིད་དྲག་ཤུལ་གསུང་གི་གདངས། །འཇིགས་པའི་གད་མོ་རི་རབ་འབུམ་བསྙིལ་སྒྲ། །ཟག་མེད་བཞི་ལྡན་གསུང་གི་ཧེ་རུ་ཀས། །བསྒྲགས་པས་རྒོལ་ངན་ཀླད་པ་འགེམས་པར་མཛོད། །རྟག་ཏུ་མི་གཡོ་ཞི་བ་ཆོས་སྐུའི་ཐུགས། །སྙིང་རྗེས་མྱོས་པའི་གདུལ་དཀར་ཡུས་པའི་རྩལ། །ཚད་མེད་བཞིའི་གཟུགས་ཡང་དག་ཧེ་རུ་ཀས། །རྡོ་རྗེ་ཁྲོས་པའི་སྟོབས་ཤུགས་ད་ཕྱུངས་ཤིག །ལས་ཉོན་ཆུ་བོས་ཟག་མེད་རྣམ་མཁྱེན་གྱི། །གྲུ་གཟིངས་བཤིག་ལ་བྲལ་སྨིན་ཡོན་ཏན་གྱི། །ཆེ་མཆོག་འདུས་པ་རྣམ་ཐར་སྒོ་བཞི་ཡིས། །དབུགས་འབྱིན་སྒྲིབ་པའི་འཁྲི་ཤིང་གཅོད་པར་མཛོད། །སྒོ་གསུམ་བྱ་བྱེད་སྡིག་སྡུག་དུག་སྦྲུལ་གྱིས། །ཁམས་གསུམ་སྐྱེ་དགུར་འཁྱུད་པའི་སྐལ་ངན་ལ། །དྲན་པ་ཉེར་གཞག་ཕྲིན་ལས་དཀྱིལ་འཁོར་བཞིས། །ཐར་པའི་བདུད་རྩིའི་བཅུད་ལེན་ཀུན་སྩོལ་ཅིག །ཅིས་ཀྱང་མི་ཚུགས་ཆོས་དབྱིངས་སྟོང་ཆེན་གཟུགས། །འཁོར་འདས་མཁའ་ཀློང་སྡུད་པའི་མཐུ་བོ་ཆེའི། །ཐུགས་རྗེ་ཆགས་པའི་ཟིལ་གྱིས་བསྟན་དགྲའི་དཔུང༌། །མྱོས་ཤིང་དྲན་མེད་གཟིར་བའི་མཐུ་བསྐྱེད་མཛོད། །ཡེ་ཤེས་མཚོན་གྱིས་སྲིད་རྩ་དཔྱིས་འབྱིན་པས། །དྲག་ཤུལ་རྔམ་པའི་ཕྲིན་ལས་གནམ་ལྕགས་མདས། །ཆོས་ཀྱི་རྒྱལ་ཐབས་སྲུང་བའི་དཔའ་བོ་ཡིས། །ཐོགས་མེད་མཐུ་ནུས་རླུང་ཤུགས་བསྐྱེད་པར་མཛོད། །ནག་པོའི་མུན་པས་ཕྱོགས་ཀྱི་གོ་སྐབས་འཕྲོག །རྣམ་དཀར་སྣང་བ་བསྒྲིབས་དང་ཆབས་ཅིག་པར། །མཆོག་གསུམ་དབུ་འཕང་སྨད་པ་འདི་གཟིགས་ནས། །ཕྱོགས་ལས་རྣམ་རྒྱལ་ལྷ་ཡི་རྔ་གསང་སྒྲོགས། །དུས་མཐའི་ཟུག་རྔུའི་རྩ་རྩེ་ལྟར་བསྐྱོད་ཀྱང༌། །བསམ་སྦྱོར་ལུས་མེད་རྗེས་འབྲང་ཡིད་ཅན་ཀུན། །མངོན་སྤྱོད་ཕྲིན་ལས་ཧོམ་དུ་སྦྱོར་བ་ཡིས། །བསྟན་དགྲ་མཐའ་དག་སྒྲོལ་བའི་ལས་མཛོད་ཅིག །བསྟན་ལ་འཁུ་སེམས་ཡིད་ཀུན་མྱོས་རྨུགས་བརྒྱལ། །ལུས་ངག་ལོག་སྦྱོར་བརྩམས་ཀུན་ཆད་པས་གཟིར། །དབང་ཐང་བསོད་ནམས་ནམ་གཞུག་སྦྲང་བུ་ལྟར། །ཆོམས་ལ་ཐེག་མཆོག་རྒྱལ་རྔ་རྟག་ཏུ་སྒྲོགས། །བསྟན་པ་མཆོག་ལ་སྐྱོང་མཛད་སྐྱེས་བུ་ཀུན། །ཉེས་པས་མི་ཚུགས་རྡོ་རྗེའི་མཁར་དུ་ཚུད། །ལེགས་པའི་བསམ་སྦྱོར་དཔལ་ཀུན་ལྷུན་གྲུབ་པས། །ལུང་རྟོགས་དཔལ་འབྱོར་རྒྱས་ཤིང་བརྟན་པར་མཛོད། །རྩ་གསུམ་རྒྱལ་བ་སྲས་བཅས་བྱིན་ནུས་ཀྱིས། །འགྲོ་ཀུན་བདེ་སྐྱིད་ཕན་བདེའི་དཔལ་འབྱོར་རྒྱས། །རྒྱལ་བསྟན་བཤད་སྒྲུབ་ལས་ཀུན་མི་ཉམས་པའི། །བཀྲ་ཤིས་ཉི་ཟླའི་འོད་ཟེར་ཀུན་ཁྱབ་ཤོག །ཅེས་འདི་ཡར་མོ་ལུང་གི་དབུས། །ཤེལ་བྲག་པདྨ་བརྩེགས་པའི་མདུན། །གཡོ་རུ་ཁྲ་འབྲུག་གཙུག་ལག་ཏུ། །པདྨའི་ཐུགས་ཏིག་བཀའ་འདུས་ཀྱི། །ཚོགས་མཆོད་འབུམ་ཕྲག་ཕུལ་བའི་ཚེ། །པདྨའི་ཞལ་སྐྱིན་རིག་འཛིན་གྱིས། །རྗེས་བཟུང་མདོ་སྔགས་བསྟན་འགྲོ་ལ། །སྨན་པའི་ལྷག་བསམ་ཟླ་འོད་ལས། །བྱུང་བའི་ཚིག་གི་ཕྲེང་འདིས་ཀྱང༌། །ཇི་ལྟར་སྨོན་བཞིན་མྱུར་འགྲུབ་ནས། །ཐུབ་བསྟན་གླིང་བཞིའི་འཁོར་ཡུག་ཏུ། །རབ་རྒྱས་དོན་གཉིས་ལྷུན་གྲུབ་ཤོག། །།

[edit]

@#/_na mo ma hA ka ru Ni ka ye/_grangs med bskal par gzhan phan shing rta yis/_/drangs pas 'gro kun bu ltar brtse ba'i thugs/_/bsod nams ye shes nor bu lci ba'i mthus/_/'gro kun phan mdzad sras bcas rgyal ba mkhyen/_/khyad par lnga brgya'i gdul bya rjes 'dzin la/_/snying rje'i go cha lhur bzhes shAkya'i tog_/spyan ras gzigs dang pad 'byung sgrol ma sogs/_/gangs can mgon gyur thams cad dgongs su gsol/_/bdag yid chu gter nyon mongs rba rlabs kyis/_/dkrugs pa'i rnyogs pa sel mchog ke ta kas/_/bgrungs nas phan bde'i 'dod rgu lhun grub pas/_/'gro kun snying rje'i lcags kyus 'dzin nus shog_/rang la log sgrub sdug bsngal bskyed pa'i 'gro/_/rang byas las kyi 'bras bur ngo shes nas/_/rang don gces sems spangs pa'i gtong sems kyis/_/rang gzhan bde nas bde ba'i rgyur gyur cig_/bsags pa'i nor kun stobs kyis 'phrog pa 'dis/_/tshe rabs lan chags bu lon kun byang nas/_/ji ltar 'dod pa'i don kun pha rol pos/_/grub pas yid kyi re ba rdzogs gyur cig_/rang la chags dang ser sna'i blo mi skye/_/gzhan la lan dang rnam smin 'bras mi myong*/_/dga' bzhin pha mas bu la zas ster ltar/_/gyur nas don gnyis lhun gyis grub par shog_/nor 'phrog ser sna'i mdud bkrol mkhan po kun/_/byang chub grogs su shes pas drin gzo'i phyir/_/gtong ba'i blo yis tshogs gnyis yongs rdzogs pa'i/_/bsod nams bsags pa'i rten mchog mthong bar shog_/da lta 'dis mtshon yid 'ong dngos po kun/_/khyod dang khyod mtshungs kun la gus 'bul zhing*/_/dga' ba'i sems kyis yang yang tshim byed la/_'khrug dang ser sna nam yang mi bgyid shog_/bdag la brten nas bsags pa'i las kyi mtha'/_/rnam dkar byang chub spyod pa'i bshes gnyen du/_/byams dang snying rjes 'phen pa nges gyur nas/_/rang gzhan sdig pa'i rnam smin mi myong shog_/'di spyod dkon mchog dkor dang log 'tsho yis/_/nam yang mi gos longs spyod la brten nas/_/tshogs chen rdzogs dang sbyin pa'i pha rol tu/_/son nas sgrib bral ye shes mthong nus shog_/sbyin yul kun kyang sangs rgyas snying po can/_/gnas lugs gdan gsum dkyil 'khor lha'i rol mo/_/zhen med tshogs kyi mchod pas dngos grub thob/_/kun bzang rdo rje'i longs spyod rgyur gyur cig_/log sgrub mkhan kun sngon gyi pha ma dngos/_/snang tshul tsam du tshogs gnyis bsags pa'i rten/_/byas pa shes pas dga' mgur stob pa yis/_/tshe rabs kun tu 'di yi g.yog bgyid shog_/yid can 'di dag la brten bdag tshogs rdzogs/_/'di dag skye kun bdag gi gdul byar gyur/_/gnod pa la brten phan lan bde ster ba'i/_/byang chub sems mchog bdag gi rgyud skyes shog_/bdag cag ston pas slob pa lam gyi skabs/_/bzang ngan 'brel kun mngon par sangs rgyas tshe/_/'dus pa dang po lta bu 'di dag kun/_/gyur nas 'khor gyi thog mar son gyur cig_/sdang sems dgra dang rang nyid ltar snang ba/_/gnyis med chos nyid gcig gi ngo bo ru/_/chags sdang 'dzin rtogs rang grol don dam gyi/_/lhag pa'i sems kyis snyigs 'gro kun skyob shog_/srid dang zhi ba'i phan bde bdud rtsi yis/_/kun du sim ster byang chub spyod pa'i mtshor/_/rang gzhan kun gyis rtag tu rol pa las/_/dge legs nor bu'i dpal gyis khengs gyur cig_/bla ma dkon mchog gsum gyi mkhyen brtse'i mthu/_/bdag gi gzhan phan lhags bsam bden nus kyis/_/kun kyang bla med theg chen dga' tshal du/_/'jug pa'i skal bzang rten 'dir mngon gyur shog_/ma lus 'gro kun byang chub spyod pa'i lam/_/dngos brgyud kun nas 'jug pa'i dge mtshan gyis/_/snyigs ma'i sdug bsngal mtha' dag rgyun chad nas/_/kun mkhyen gling du phyam gcig myur 'jug shog_/sa gsum kun tu bde dpal 'byung ba'i gnas/_/bstan dang bstan 'dzin lung rtogs phrin las dar/_/rnam dkar snang bas 'gro kun ngal 'tsho ba'i/_/don gnyis yon tan lhun gyis 'grub gyur cig_/chos nyid bdag gzhan mnyam pa nyid kyi mthus/_/chos can gzhan phan snying rje bden pa'i tshig_/gdul dka' dmu rgod 'gro bas mngon sum du/_/grub nas rgyal sras spyod pa yongs rdzogs shog_/'gro kun bu gcig ltar brtse sras bcas rgyal/_/dad pa'i mdun sar bkod de smon pa bzhin/_/mngon gyur 'brel tshad kun mkhyen go 'phang gi_/bdud rtsis dbugs dbyung myur du ster nus shog_/rmad byung byang chub sems kyi yid bzhin nor/_/bdag gi snying la rtag tu bzhugs pa yis/_/ma lus yid can bde dga' mi zad pa'i/_/dga' ston bdag nyid kho nas 'gyed nus shog_/gang du sdug bsngal can dang gdul dka' ba'i/_/yid can de kun bdag dang lhan cig 'grogs/_/thabs mkhas snying rje'i stobs kyis de thams cad/_/byang chub gnas su bdag gis 'god par shog_/rnyogs pa lngas dkrugs rtsod pa rgyas pa'i 'gro/_/rjes su 'dzin la shAkya'i dbang po dang*/_/pad 'byung spyan ras gzigs dang sgrol ma bzhin/_/gyur nas don gnyis lhun gyis grub par mdzod/_/rtse gcig gzhan phan blo yis smon pa'i mthus/_/bdag gzhan kun gyi nyon mongs sdug bsngal zhi/_/rnam dkar skya reng gis bsus rgyal ba'i bstan/_/lung rtogs dpal 'byor g.yar mtsho ltar rgyas shog_/ces pa'ang rang gzhan las dang nyon mongs pa'i rba klong 'khrug pa srid pa'i rgya mtshor g.yengs shing mtha' mis log spyod nad mug mtshon gyi bskal ngan chu srin gyi mche bas gzir ba'i skabs byang chub sems kyi mnga' bdag rnam 'dren rnams kyi thugs rje'i zla zer snying la reg pa'i bka' drin 'ba' zhig gi rkyen snang lam du khyer ba'i smon lam 'di yang bcos min gyi lhag bsam sems las shar ba bzhin rgyal sras blo gros dri med gzi brjid rab tu dga' ba'i dpal zhes brdar btags pa'i ku sA lis ston pa'i zhal skyin shAkya mu ne'i spyan sngar dpang gtsugs te gsol ba btab pa yi ge'i ris su bkod pa'i 'char gzhi'o/_/dge legs 'phel//__na mo gu ru bud+d+ha bo d+hi satwa ye/_chos dbyings zhi ba'i thugs ni snying rjes 'dzums/_/yang yang ma rgan nyams thag 'gro ba la/_/'khrugs pa med pa'i rgyal ba sras dang bcas/_/dpal mgon bla mar nges pa'i phyag gis 'dud/_/khyod kyi byin rlabs rin chen gser 'gyur rtsis/_/bdag rgyud las nyon lcags khams la thebs pas/_/thams cad mkhyen pa'i yon tan 'byung ba'i gnas/_/byang chub sems kyi gser sbyangs khams su bsgyur/_/'di ni dpag med yon tan rin thang can/_/nam yang nyes pa'i dri mas ma nongs pa/_/srid zhi'i khyon gyi legs tshogs kun 'byung ba'i/_/ngo mtshar dpal 'di sras bcas rgyal bas bsngags/_/gang las ngo mtshar dge legs kun 'byung ba'i/_/cha shas kyis kyang rin chen rdul bzhin du/_/dpal dang yon tan dga' ston mi zad pa/_/snyigs ma'i yid can kun la 'char gyur cig_/khyad par 'dod sred chur byings bskam chags can/_/zhe sdang me yis rtag tu rgyud 'tshig dang*/_/gti mug mun pas bsgribs kyang mi shes 'khyam/_/phrag dog rlung gis bag mi phebs byas 'gro/_/nga rgyal lcags kyi gong bu mkhregs pa yi/_/rgyu 'bras gnas la spyod pa'i yid can kun/_/byang chub sems ni rdo rje lta bu'i khams/_/chags bral nyi zla ltar mdzes zhi bsil dpal/_/ye shes snang ba 'dod dgu'i drwa ba can/_/rtag tu mi 'khrugs rab brtan mnyen lcug gis/_/mngon mtho nges legs lam rnams kun la 'jug_/zag med 'phags pa'i spang rtogs bye ba snyems/_/ji tsam 'gal rkyen shugs kyis mnar bzhin du/_/de tsam legs tshogs mthu yis rab dpa' ba'i/_/lam 'di bdag gis ma nor rnyed pa'i mthus/_/khams gsum 'gro ba'i 'dren pa gcig gyur cig_/grub pa mchog gi bdud rtsis reg pa bzhin/_/mthong thos dran reg ming tsam thos tshun chad/_/bde nas bde bar rin chen gru gzings kyis/_/srid pa'i rgya mtsho'i pha mthar brgal gyur cig_/der ni rgyal ba'i sras kyi ded dpon gyis/_/legs zin rgyal kun dgyes pa'i ngang tshul las/_/mi 'da' rgyal sras spyod pa'i nor bu'i tshogs/_/bdag gir bgyis pas srid zhi'i nyes skyobs shig_/khyad par rgyal kun gshegs dang 'byon pa'i lam/_/bla med theg chen chos kyi dga' ston gyis/_/'gro kun legs skyong mkha' khyab yid can kun/_/lam der 'dren pa'i kha lor bdag gyur cig_/sras bcas 'dren pa'i pha nor theg chen gyi/_/sde snod mtha' dag 'dzin 'chang spel ba yis/_/chos kyi rgyal bu 'jam pa'i dpal bzhin du/_/rgyal ba kun gyi sras gcig bdag gyur cig_/bdag kyang rang don sred pa'i 'ching bcad de/_/gzhan phyir srog kyang gtong la mi ngal zhing*/_/tshe rabs kun tu ma rgan 'gro ba'i g.yog_/bdag nyid gcig pus ngal med byed gyur cig_/bdag la dga' zhing chags pa'i rigs thams cad/_/bdag dang mi 'bral bdag gi yid mthun pas/_/byang chub spyod pa rgya mtsho mnyam spyad pa/_/bskal bzang sangs rgyas stong bzhin mched gyur cig_/bdag la khro dang gshung ba de dag kyang*/_/'khon dang gnod pas 'tshe ba med pa yis/_/snying rje byang chub sems kyi grogs gyur nas/_/ngan 'brel 'khor gyi thog ma nyid gyur cig_/brtse ba'i snying rje 'phags pa spyan ras gzigs/_/mkhyen pa'i ye shes rje btsun 'jam pa'i dbyangs/_/nus pa'i phrin las gsang bdag dngos ji bzhin/_/smon lam kun tu bzang dang mnyam gyur cig_/dag pa'i tshul khrims rgyal tshab ma pham pa/_/bsod nams mthu dpal rgyal sras sa yi snying*/_/mnyam nyid thugs mchog nam snying nyes kun 'joms/_/sgrib pa rnam sel mdzad dang gnyis med shog_/rtsod dus gdul dka' 'dul la shAkya'i tog_/rgyal kun rnam thar gcig bsdus pad+ma 'byung*/_/dbyer med dpal mgon bla ma'i gsang gsum gyi/_/rnam thar phrin las gnyis su med gyur cig_/mang+ga las so/__!__na mo gu ru bud+d+ha bo d+hi satwa ye/_kun phan thugs bskyed btang snyoms yangs pa'i mkhar/_/kun khyab snying rje'i chu khur 'khrigs pa las/_/kun gzigs byams pa'i sprin gyi me tog gis/_/kun dga'i dpal skyed mgon po sras bcas dgongs/_/dad pas nyer drangs sgo gsum dwangs bas btud/_/phyag 'tshal mchod 'bul nyes pa kun mthol zhing*/_/dge la yi rang chos 'khor bskor bzhin bzhugs/_/rnam dkar mtha' dag byang chub snying por bsngo/_/bdag la dang po rten bzang lus srog bskyed/_/bar du mtho ris bde dga'i bsnyen bkur sbyin/_/tha mar rtag tu phan pa lhur len pa'i/_/bka' drin 'khor mtha' med pa'i ma dang pha/_/tshe rabs kun tu chos kyis drin gzo'i phyir/_/yang dag dge ba'i bshes dang 'phrad bgyid cing*/_/rnam dkar spyod pas bde nas bde ba'i sar/_/'khrugs pa med pa'i sems kyis sbyor bar shog_/lus kyi dwangs mas bskyed bzhin bdag gis mar/_/gzhan phan byang chub sems kyi sa bon bskrun/_/byams sdug brtse dgas gnod pa kun bzod ltar/_/ma rgan phyir du ngan song 'khor bar rgyu/_/thabs mkhas lag pas srid zhi'i nyes pa las/_/skyob pa'i bsnyen bkur skyo ngal med pas bsten/_/zas gos longs spyod 'dod yon kun ster ltar/_/ma phyir dge legs yon tan mtha' dag sbyin/_/snying nas brtse ba'i g.yar dam mi lhod pas/_/byang chub spyod pa'i grogs su bdag gyur cig_/rtsa ba'i pha ma bzhin du snying rje'i sems/_/mkha' khyab 'gro la phyogs ris med par 'jug_/rtag tu gzhan phan go cha mi ral ba'i/_/lhag bsam byang chub sems kyi gzhi brtan shog_/srid dang zhi ba'i bde dpal yon tan mthu/_/kun kyang gzhan la dga' bas ster ba dang*/_/'gro ba pha mar gyur pa'i sdug bsngal dang*/_/sdig pa'i rnam smin bdag gi khur smin shog_/sdug bsngal can gyi 'gro ba mthong dang thos/_/de yi mod la ma bzhin rab dga' bas/_/nyam nga'i gnas skyob bde bar dbugs 'byin la/_/rang gi lus dang srog kyang phangs med shog_/thog mar byang chub spyod pa'i 'jug sgo ston/_/bar du rgyal sras spyod pa lhan cig spyad/_/mthar thug kun mkhyen gling du dbugs 'byin mthu/_/dpe zla med pa'i sems bskyed 'dzin nus shog_/ji ltar bdag cag ston pas sum rtsen gnas/_/sgyu 'phrul lha mor bdud rtsi'i mthu bstsal bzhin/_/bdag gis pha ma 'brel thogs yid can kun/_/bde nas bder sbyor spyod pas 'dul bar shog_/phyogs bcur dag pa'i zhing du sangs rgyas dang*/_/rgyas sras dbus na bdag gis ma rgan khrid/_/zab rgyas chos kyi rgyud sbyangs lam bgrod nas/_/nges par sku bzhi'i rgyal sar sbyor gyur cig_/bdag gzhan mnyam nyid don dam sems kyi dbyings/_/rmad byung snying rjes gzhan phan kun rdzob sems/_/zung 'jug bsgoms pas ji ltar smon pa bzhin/_/rten 'dir mngon sum 'grub pa'i mthu thob shog_/ces 'di dge sbyong rgyal mtshan dang*/_/pad+ma tsan+d+ra nas bskul ltar/_/kun mkhyen bla mas 'gro ba kun/_/theg mchog lam gyis thara~M pa~M'i sar/_/khrid pa'i glinga~M der gnas 'brel skabs/_/mkhyen brtse'i 'od zer sgro btags pas/_/sa zla'i tshes 10la smon pa bzhin/_/grub nas 'brel thogs yid can kun/_/rnam grol sa la sbyor gyur cig__!__skyabs yul rgya mtsho mngon spyod kyi las la smon bskul rab 'bar nyi ma'i zer rnon bzhugs/__e ma ho/_snang srid zil gnon rdo rje'i bka' rtags kyis/_/'khor 'das chos kun rgyas btab pad+ma 'byung*/_/dbang drag dmar nag dus mtha'i me phreng gis/_/rdo rje'i tshig 'di'i brjod don lci bar mdzod/_/ye shes lta stangs grub pas nags tshal bsregs/_/sdig mdzub tsam gyis brag gtor mtsho skem pa'i/_/'phags bod rje 'bangs rig pa 'dzin rnams kyis/_/phas rgol chams la 'bebs pa'i dus la bab/_/chos dbyings zhi ba rdo rje dbyings kyi klong*/_/bde chen lhun grub gtum rngam drag shul rol/_/srid zhi'i spyi dpal che des rdo rje'i mthu/_/lha min g.yul ngor bshams pas pham par mdzod/_/rab 'bar rngam pa'i snang mdzad sku yi dbyings/_/rdo rje'i nyi ma 'bum ltar dpa' ba'i gar/_/gdug pa'i gdul bya'i gnya' bar rab bsgyur ba'i/_/bsdus dngos bzhi yi cho 'phrul rtag par phob/_/'brug stong ltar brjid drag shul gsung gi gdangs/_/'jigs pa'i gad mo ri rab 'bum bsnyil sgra/_/zag med bzhi ldan gsung gi he ru kas/_/bsgrags pas rgol ngan klad pa 'gems par mdzod/_/rtag tu mi g.yo zhi ba chos sku'i thugs/_/snying rjes myos pa'i gdul dkar yus pa'i rtsal/_/tshad med bzhi'i gzugs yang dag he ru kas/_/rdo rje khros pa'i stobs shugs da phyungs shig_/las nyon chu bos zag med rnam mkhyen gyi/_/gru gzings bshig la bral smin yon tan gyi/_/che mchog 'dus pa rnam thar sgo bzhi yis/_/dbugs 'byin sgrib pa'i 'khri shing gcod par mdzod/_/sgo gsum bya byed sdig sdug dug sbrul gyis/_/khams gsum skye dgur 'khyud pa'i skal ngan la/_/dran pa nyer gzhag phrin las dkyil 'khor bzhis/_/thar pa'i bdud rtsi'i bcud len kun stsol cig_/cis kyang mi tshugs chos dbyings stong chen gzugs/_/'khor 'das mkha' klong sdud pa'i mthu bo che'i/_/thugs rje chags pa'i zil gyis bstan dgra'i dpung*/_/myos shing dran med gzir ba'i mthu bskyed mdzod/_/ye shes mtshon gyis srid rtsa dpyis 'byin pas/_/drag shul rngam pa'i phrin las gnam lcags mdas/_/chos kyi rgyal thabs srung ba'i dpa' bo yis/_/thogs med mthu nus rlung shugs bskyed par mdzod/_/nag po'i mun pas phyogs kyi go skabs 'phrog_/rnam dkar snang ba bsgribs dang chabs cig par/_/mchog gsum dbu 'phang smad pa 'di gzigs nas/_/phyogs las rnam rgyal lha yi rnga gsang sgrogs/_/dus mtha'i zug rngu'i rtsa rtse ltar bskyod kyang*/_/bsam sbyor lus med rjes 'brang yid can kun/_/mngon spyod phrin las hom du sbyor ba yis/_/bstan dgra mtha' dag sgrol ba'i las mdzod cig_/bstan la 'khu sems yid kun myos rmugs brgyal/_/lus ngag log sbyor brtsams kun chad pas gzir/_/dbang thang bsod nams nam gzhug sbrang bu ltar/_/choms la theg mchog rgyal rnga rtag tu sgrogs/_/bstan pa mchog la skyong mdzad skyes bu kun/_/nyes pas mi tshugs rdo rje'i mkhar du tshud/_/legs pa'i bsam sbyor dpal kun lhun grub pas/_/lung rtogs dpal 'byor rgyas shing brtan par mdzod/_/rtsa gsum rgyal ba sras bcas byin nus kyis/_/'gro kun bde skyid phan bde'i dpal 'byor rgyas/_/rgyal bstan bshad sgrub las kun mi nyams pa'i/_/bkra shis nyi zla'i 'od zer kun khyab shog_/ces 'di yar mo lung gi dbus/_/shel brag pad+ma brtsegs pa'i mdun/_/g.yo ru khra 'brug gtsug lag tu/_/pad+ma'i thugs tig bka' 'dus kyi/_/tshogs mchod 'bum phrag phul ba'i tshe/_/pad+ma'i zhal skyin rig 'dzin gyis/_/rjes bzung mdo sngags bstan 'gro la/_/sman pa'i lhag bsam zla 'od las/_/byung ba'i tshig gi phreng 'dis kyang*/_/ji ltar smon bzhin myur 'grub nas/_/thub bstan gling bzhi'i 'khor yug tu/_/rab rgyas don gnyis lhun grub shog/_//