JKCL-KABUM-02-KHA-064

Previous Text"KHA" is not a number. Back to Volume Page"KHA" is not a number.Next Text "KHA" is not a number.

Wylie title
Location	chos kyi blo gros bka' 'bum Volume , Text 64, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation
Genre	"KHA" is not a number.

<ul><li>":Property:textsubnumber|textsubnumber" can not be assigned to a declared number type with value 1.</li> <!--br--><li>"KHA" is not a number.</li></ul>

Tibetan Text

Wylie

[edit]

ཤྲཱི་ཧེ་རུ་ཀ་ལྷ་བཙུན་ཆེན་པོ་ནམ་མཁའ་འཇིགས་མེད་ལ་བསྟོད་པ་རྡོ་རྗེ་སྒྲ་མའི་དབྱངས་སྙན་ཞེས་བྱ་བ་བཞུགས་སོ། །ཨོཾ་སྭསྟི། དཔལ་གྱི་སྐུ་ནི་དཔལ་གྱི་དབང་ཕྱུག་ཆེ། །དཔལ་གྱི་ཡོན་ཏན་དཔལ་ཆེན་ཧེ་རུ་ཀ། དཔལ་འབྱོར་ཕྲིན་ལས་འཛད་མེད་ཤུགས་འཆང་བའི། །དཔལ་གྱིས་འཛིན་མའི་ཁྱོན་ཀུན་ཁྱབ་ལ་བསྔགས། །བདེ་ཆེན་ལྷན་སྐྱེས་ཡེ་ཤེས་སྦྲང་རྩིས་མྱོས། །ཀུན་ཏུ་དགའ་བའི་འཇོ་སྒེག་མིག་འཕྲུལ་ལྟར། །རྣལ་འབྱོར་དབང་ཕྱུག་ཚོགས་དང་ལྷན་ཅིག་རྩེན། །བདེ་མཆོག་བདེ་བའི་དབང་ཕྱུག་ཞབས་ལ་བསྟོད། །བསྐལ་མང་གོང་ནས་ཡེ་གྲོལ་གཞི་རིགས་སད། །བྱང་ཆུབ་ཐུགས་བསྐྱེད་རྩ་བ་རབ་བརྟན་པས། །མཆོག་དམན་བར་མའི་སྤྲུལ་བསྒྱུར་བསམ་ཡས་ཀྱིས། །རྣམ་མང་བསྟན་འགྲོའི་དོན་ཆེན་སྒྲུབ་ལ་བསྟོད། །འོད་གསལ་ལྷ་རིགས་ཐིག་ལེའི་གོང་བུ་ནི། །བསིལ་ལྡན་ལྗོངས་ཀྱི་བསོད་ནམས་མགྲོན་དུ་བབས། །རིམ་བརྒྱུད་རྒྱལ་སྲས་ཌཱ་ཀིའི་མིང་པོ་ཆེ། །མཁའ་ལས་ཐོག་བབས་ཚུལ་དུ་འཁྲུངས་ལ་བསྟོད། །གཞོན་ནུ་དུས་ནས་ཡོན་ཏན་འབད་མེད་རྫོགས། །མཁས་དང་གྲུབ་པའི་ཐུགས་ཀྱི་བཅུད་ཐོབ་ཅིང་། །རྡོ་རྗེའི་གནས་སུ་རྡོ་རྗེའི་མཁའ་ལྡིང་དབང་། །གྲུབ་པའི་གཤོག་རྩལ་ཅིར་ཡང་ངོམ་ལ་བསྟོད། །རྡོ་རྗེའི་སྐུ་ཡི་དཀྱིལ་འཁོར་རྣམ་བཞི་ལ། །སྐུ་བཞིའི་ས་བོན་དབང་བཞིའི་ཆུ་བོས་བསྐྱེད། །རིག་འཛིན་བཞི་ཡི་གོ་འཕང་རྩེ་མོར་སོན། །མཆོག་དངོས་གྲུབ་པའི་རྒྱལ་པོ་ཁྱེད་ལ་བསྟོད། །ཟབ་ཡངས་ཆོས་འཁོར་ཆེན་པོ་ཉེས་རྡུལ་ལས། །སྐྱོབ་པའི་ཐུགས་བསྐྱེད་རྔ་ཡབ་དཀར་པོ་ཡིས། །དྲི་མ་རབ་སེལ་ལྷ་མིའི་མཆོད་སྡོང་དུ། །ངོ་མཚར་ལྟ་བས་མི་ངོམས་བསྐྲུན་ལ་བསྟོད། །འབྲས་ལྗོངས་པདྨ་འོད་ཀྱི་ཕོ་བྲང་ཆེར། །རྫུ་འཕྲུལ་ཅང་ཤེས་གོམ་སྟབས་བགྲོད་པ་དང་། །ཧི་ཧིའི་སྒྲ་ཡིས་རྣལ་འབྱོར་ཚོགས་རྣམས་སྡུད། །སྦས་པའི་རི་ཆེན་སྒོ་བཞི་འབྱེད་ལ་བསྟོད། །ས་འཛིན་པདྨ་སྤུངས་པའི་ལྟེ་བ་རུ། །མཚོ་སྐྱེས་ཡབ་ཡུམ་བཞད་པའི་གླིང་བུའི་སྒྲས། །ཇི་ལྟར་བསྐུལ་ཞིང་བཀྲ་ཤིས་ལྡིང་གུར་དུ། །རྩ་གསུམ་དཀྱིལ་འཁོར་བཀྲག་གསལ་གཟིགས་ལ་བསྟོད། །ཀུན་མཁྱེན་འཇམ་དབྱངས་བླ་མའི་འཛུམ་ཟེར་གྱིས། །ཐུགས་དབུས་པདྨོ་དགོད་དང་ལྷན་ཅིག་ཏུ། །པད་འབྱུང་བི་མ་ཡེ་ཤེས་དྷཱ་ཀི་ཡི། །དག་སྣང་གསང་བའི་མཛོད་ཆེན་འབྱེད་ལ་བསྟོད། །རིག་འཛིན་བླ་མའི་སྲོག་གི་སྒྲུབ་པ་དང་། །འོད་གསལ་རྡོ་རྗེ་སྙིང་པོ་ནོར་བུའི་སྤྲིན། །མཁའ་དབྱིངས་ཁྱབ་པར་བྲེས་པའི་ཐོལ་གླུ་ཡིས། །ཐེག་མཆོག་རྩེ་མོའི་བསྟན་པ་གསལ་ལ་བསྟོད། །ཟབ་རྒྱས་ཆོས་ཀྱི་དགའ་ཚལ་ལྷ་དབང་གི། རྩེ་འཆག་མདུན་སར་སྐལ་བཟང་བུང་བ་སྡུད། །སྨིན་གྲོལ་འཆི་མེད་བདུད་རྩིས་བསྐྱེད་བསྲིངས་པས། །འཇའ་ལུས་འོད་སྐུར་སྨིན་པར་མཛད་ལ་བསྟོད། །རང་སྣང་དག་པ་མཁའ་སྤྱོད་འཇའ་འོད་ཞིང་། །མ་ཚོགས་མཁའ་འགྲོ་བྱེ་བའི་ཚོགས་དཔོན་དུ། །བདེ་མཆོག་གར་གྱི་ཉམས་བརྒྱས་རབ་རྩེན་ཏེ། །རིགས་རྣམས་སྤྲོ་དང་བསྡུ་བའི་བྱེད་པོར་བསྟོད། །དེ་ལྟར་བསྟོད་བསྔགས་རྒྱུད་མངས་ཤས་ཙམ་ཞིག །སྒྲོགས་པའི་མཐུ་ལས་ནམ་མཁའི་རྣལ་འབྱོར་ཆེ། །སྙིང་དང་སྤྱི་བོའི་འཁོར་ལོར་རྟག་བཞུགས་ནས། །བར་ཆད་ཀུན་སེལ་བྱིན་རླབས་དངོས་གྲུབ་སྩོལ། །སྒྱུ་མའི་རྣལ་འབྱོར་ཡེ་ཤེས་སྐུ་ཅན་གྱིས། །སྙིགས་མར་སྐྱེས་པའི་སྒྱུ་ལུས་སྡུག་བདེན་འདི། །སྐྱིད་སྡུག་ལེགས་ཉེས་སྒྱུ་མ་ཅི་སྣང་ཡང་། །སྒྱུ་མ་ཧར་སངས་རྡོ་རྗེར་སྒྲུབ་མཛོད་ཀྱེ། །ཞེས་པའང་དད་པའི་པདྨོ་བཞད་པ་ལས་འཇིགས་མེད་ནམ་མཁའི་རྡོ་རྗེས་མེ་བྱ་སྤྲེལ་ཟླའི་ཚེས་གཅིག་ལ་འབྲས་ལྗོངས་སྒང་ཐོག་བཀྲ་ཤིས་དགེ་འཕེལ་དུ་གསོལ་བ་བཏབ་པའོ། །དགེ་ཞིང་བཀྲ་ཤིས་པར་གྱུར་ཅིག ། །།

[edit]

shrI he ru ka lha btsun chen po nam mkha' 'jigs med la bstod pa rdo rje sgra ma'i dbyangs snyan zhes bya ba bzhugs so/____/oM swasti/__dpal gyi sku ni dpal gyi dbang phyug che/____/dpal gyi yon tan dpal chen he ru ka/__dpal 'byor phrin las 'dzad med shugs 'chang ba'i/____/dpal gyis 'dzin ma'i khyon kun khyab la bsngags/____/bde chen lhan skyes ye shes sbrang rtsis myos/____/kun tu dga' ba'i 'jo sgeg mig 'phrul ltar/____/rnal 'byor dbang phyug tshogs dang lhan cig rtsen/____/bde mchog bde ba'i dbang phyug zhabs la bstod/____/bskal mang gong nas ye grol gzhi rigs sad/____/byang chub thugs bskyed rtsa ba rab brtan pas/____/mchog dman bar ma'i sprul bsgyur bsam yas kyis/____/rnam mang bstan 'gro'i don chen sgrub la bstod/____/'od gsal lha rigs thig le'i gong bu ni/____/bsil ldan ljongs kyi bsod nams mgron du babs/____/rim brgyud rgyal sras DA ki'i ming po che/____/mkha' las thog babs tshul du 'khrungs la bstod/____/gzhon nu dus nas yon tan 'bad med rdzogs/____/mkhas dang grub pa'i thugs kyi bcud thob cing /____/rdo rje'i gnas su rdo rje'i mkha' lding dbang /____/grub pa'i gshog rtsal cir yang ngom la bstod/____/rdo rje'i sku yi dkyil 'khor rnam bzhi la/____/sku bzhi'i sa bon dbang bzhi'i chu bos bskyed/____/rig 'dzin bzhi yi go 'phang rtse mor son/____/mchog dngos grub pa'i rgyal po khyed la bstod/____/zab yangs chos 'khor chen po nyes rdul las/____/skyob pa'i thugs bskyed rnga yab dkar po yis/____/dri ma rab sel lha mi'i mchod sdong du/____/ngo mtshar lta bas mi ngoms bskrun la bstod/____/'bras ljongs pad+ma 'od kyi pho brang cher/____/rdzu 'phrul cang shes gom stabs bgrod pa dang /____/hi hi'i sgra yis rnal 'byor tshogs rnams sdud/____/sbas pa'i ri chen sgo bzhi 'byed la bstod/____/sa 'dzin pad+ma spungs pa'i lte ba ru/____/mtsho skyes yab yum bzhad pa'i gling bu'i sgras/____/ji ltar bskul zhing bkra shis lding gur du/____/rtsa gsum dkyil 'khor bkrag gsal gzigs la bstod/____/kun mkhyen 'jam dbyangs bla ma'i 'dzum zer gyis/____/thugs dbus pad+mo dgod dang lhan cig tu/____/pad 'byung bi ma ye shes d+hA ki yi/____/dag snang gsang ba'i mdzod chen 'byed la bstod/____/rig 'dzin bla ma'i srog gi sgrub pa dang /____/'od gsal rdo rje snying po nor bu'i sprin/____/mkha' dbyings khyab par bres pa'i thol glu yis/____/theg mchog rtse mo'i bstan pa gsal la bstod/____/zab rgyas chos kyi dga' tshal lha dbang gi/__rtse 'chag mdun sar skal bzang bung ba sdud/____/smin grol 'chi med bdud rtsis bskyed bsrings pas/____/'ja' lus 'od skur smin par mdzad la bstod/____/rang snang dag pa mkha' spyod 'ja' 'od zhing /____/ma tshogs mkha' 'gro bye ba'i tshogs dpon du/____/bde mchog gar gyi nyams brgyas rab rtsen te/____/rigs rnams spro dang bsdu ba'i byed por bstod/____/de ltar bstod bsngags rgyud mangs shas tsam zhig__/sgrogs pa'i mthu las nam mkha'i rnal 'byor che/____/snying dang spyi bo'i 'khor lor rtag bzhugs nas/____/bar chad kun sel byin rlabs dngos grub stsol/____/sgyu ma'i rnal 'byor ye shes sku can gyis/____/snyigs mar skyes pa'i sgyu lus sdug bden 'di/____/skyid sdug legs nyes sgyu ma ci snang yang /____/sgyu ma har sangs rdo rjer sgrub mdzod kye/____/zhes pa'ang dad pa'i pad+mo bzhad pa las 'jigs med nam mkha'i rdo rjes me bya sprel zla'i tshes gcig la 'bras ljongs sgang thog bkra shis dge 'phel du gsol ba btab pa'o/____/dge zhing bkra shis par gyur cig__/__//_