JKW-KABAB-06-CHA-030

🚧 This website is under continued development. We appreciate your patience!

Previous Text"CHA" is not a number. Back to Volume Page"CHA" is not a number.Next Text "CHA" is not a number.

Wylie title
Location	mkhyen brtse'i bka' babs Volume , Text 30, Pages (Folios to )
Author	[[ | ]]
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Citation
Genre	Revelations - gter ma
Karchag page	JKW-KABAB-Volume-02-KHA-Karchag"CHA" is not a number.

"CHA" is not a number.

Tibetan Text

Wylie

[edit]

མཁའ་འགྲོ་གསང་བ་ཀུན་འདུས་ལས༔ རྡོ་རྗེ་ཕག་མོའི་ནོར་སྒྲུབ་བཞུགས༔ རྡོ་རྗེ་ཕག་མོ་ལ་ཕྱག་འཚལ་ལོ༔ མཁའ་འགྲོ་འདུས་པའི་ནོར་སྒྲུབ་ཀྱི་གདམས་པ་ལ་གསུམ་སྟེ༔ ཕྱི་རྟེན་དང་བསྐྱེད་བཟླས་ཀྱིས་ཐུན་མོང་གི་ནོར་སྤེལ་བ༔ ནང་རླུང་གི་ལྕགས་ཀྱུས་ཁྱད་པར་གྱི་ནོར་དགུག་པ༔ གསང་བ་དགོངས་པ་མི་འགྱུར་བའི་ཡེ་ཤེས་ཀྱིས་དོན་གྱི་འདོད་རྒུ་སྨིན་པར་བྱེད་པའོ༔ དང་པོ་ལ་གཉིས༔ རྟེན་དང་༔ སྒྲུབ་ཐབས་སོ༔ དང་པོ་ལ་གཉིས་ཏེ༔ གཏོར་མ་ལ་བརྟེན་པ་ནི། ཕྱག་གཡང་ཆགས་ཤིང་དམ་ཚིག་སོགས་ཀྱི་སེལ་མེད་པའི་ལག་ནས་བྱུང་བའི་རིན་ཆེན་འབྲུ་སྨན་དཔལ་ཅན་གྱི་རྫས་སྙིང་པོ་ལྔ་རྣམས་ཞུན་མར་དང་མ་ད་ན་བཟང་པོས་སྦྲུས་པའི་གཏོར་མ་རིན་པོ་ཆེ་འབར་བའི་དབྱིབས་ཅན་གྱི་ནང་དུ་སྔགས་གསོལ་བྱང་དང་བཅས་པ་གཞུག༔ མཐའ་ནོར་བུ་མིག་གསུམ་པ་མང་པོས་བསྐོར༔ རྟེན་འབྲེལ་ཕུན་སུམ་ཚོགས་པའི་རྒྱན་བཀོད་དར་སེར་པོའི་གདུགས་དང་བཅས་ཏེ་མ་རྡལ་གྱི་དབུས་སུ་བཞག༔ གཞན་ཡང་ཕྱྭ་གཡང་གི་རྟེན་རྫས་ཅི་རིགས་པ་དང་མཆོད་ཚོགས་བཟང་དུ་བཤམ་མོ༔ ཐོད་པ་ལ་བརྟེན་པ་ནི༔ ཐོད་པ་དུམ་བུ་གཅིག་པའམ་གསུམ་པ་མར་ཁུ་དྭངས་པའི་མདོག་ཅན༔ ཆེ་ཞིང་ལྗིད་པ་དང་ལྡན་པ༔ མཐོང་བ་ཡིད་འཕྲོག་བ༔ མི་ས་དང་ནོར་ས་མཐུག་པ༔ སྲོག་གི་ཀ་བ་ཚུགས་པ༔ མར་ཁུའི་ཐིག་ལེས་བརྒྱན་པ༔ དགོས་འབྱུང་གཤོངས་དང་ཤིང་ལོ་འབྲས་བུ་དང་བཅས་པ་རང་སར་དུད་པ༔ ཁྱད་པར་རང་གི་ལག་ཏུ་འབྱོར་བའི་རྟེན་འབྲེལ་ལེགས་པར་འགྲིགས་པ་ཞིག་དྲི་བཟང་གི་ཆུས་བཀྲུ༔ ནང་དུ་སྨན་སྣ་ལྔ་དང་བདུད་རྩི་ཆེན་པོས་བྱུག༔ ཕྱྭ་གཡང་གི་རྫས་ཀྱིས་ཕྱུར་བུར་གཏམས༔ ཁྱད་པར་ཐོད་པའི་འཁོར་ལོ་གཞུག༔ དེ་ལ་འཁོར་ལོ་ནི་ལྟེ་བར་མུ་ཁྱུད་དང་བཅས་པའི་དབུས་སུ་རི༔ དེའི་མཐར་རྩ་སྔགས༔ གོང་རས་ལ༔ ཀ་པཱ་ལ་མ་ཎི་རཏྣ་སརྦ་སིདྡྷི་སིདྡྷི་ཀུ་རུ་ཧཱུྃ༔ མུ་ཁྱུད་དང་པོ་ལ་འདབ་མ་བཞི་ལ་ཐོད་པའི་སྒྲུབ་པའི་སྔགས་ཚན་བཞི༔ གཉིས་པར་ནོར་ལྷ་སྤྱིའི་སྔགས་ཇི་ལྟར་འཐད་པ༔ གསུམ་པར་དབྱངས་གསལ་གྱི་མཐར༔ མིའི་ནོར་བུ་ཐོད་པ་རིན་ཆེན་འབར་བ་ལ་བརྟེན་ནས་ཡེ་ཤེས་ཀྱི་མཁའ་འགྲོའི་ལྷ་ཚོགས་རྣམས་ཀྱིས་བདག་ལ་ཟས་ནོར་ལོངས་སྤྱོད་ཆོས་དང་སྲིད་ཀྱི་འདོད་རྒུའི་དངོས་གྲུབ་མ་ལུས་པ་སྩལ་དུ་གསོལ༔ ཞེས་པ་དང་རྟེན་འབྲེལ་སྙིང་པོས་མཐའ་བསྐོར༔ མཐའ་ནོར་བུའི་པ་ཏྲས་མཛེས་པར་བྱ༔ དཔལ་ཅན་གྱི་རྫས་དང་བདུད་རྩི་ཆེན་པོས་བྱུགས་ལ་གཞུག༔ མཎྜལ་གྱི་སྙིང་པོར་གཞུག༔ དེ་ནི་རྟེན་བཅའ་བའོ༔ གཉིས་པ་སྒྲུབ་པའི་ཐབས་ནི༔ ར་བ་བཞི་གང་ཡང་རུང་བའི་ཡར་ངོའི་གཟའ་སྐར་ཚེས་གྲངས་བཟང་པོ་ནས་འཇུག་སྟེ༔ སྒྲུབ་པ་པོ་ཆས་གོས་བཟང་པོས་བརྒྱན༔ རོལ་མོའི་ཆ་བྱད་དང་༔ དྲི་ཞིམ་པོའི་བདུག་སྤོས་སྦྱར༔ མཁའ་འགྲོ་འདུས་པའི་ཕྲིན་ལས་ཀྱི་གཞུང་བསྲང་༔ བཟླས་བརྗོད་ཇི་ལྟར་འོས་པ་བྱའོ༔ དེ་ནས་མདུན་རྟེན་ལ་བསང་ཆུས་ཁྲུས་གསོལ་ཞིང་༔ ཧཱུྃ༔ ནོར་ལྷ་འདུས་པའི་རྟེན་མཆོག་ལ༔ དག་ཅིང་དྲི་མ་མེད་པ་ཡི༔ བདུད་རྩི་ཆུ་ཡི་ཁྲུས་གསོལ་བས༔ མི་གཙང་ཉམས་གྲིབ་དག་གྱུར་ཅིག༔ ཅེས་དང་༔ རྣམ་འཇོམས་སྨེ་བརྩེགས་འབྱུང་བ་ལྔའི་གྲིབ་སེལ་གྱི་སྔགས་དང་བཅས་པས་བཀྲུ་ཞིང་བསང་གཏོར་བྱས་ལ་ལྷ་གསལ་བ་ནི༔ ཧཱུྃ༔ སྟོང་པའི་ངང་ལས་མདུན་གྱི་རྟེན༔ འཁོར་འདས་དཔལ་ཀུན་འདུས་པའི་གཏེར༔ རིན་ཆེན་གཞལ་མེད་ཉམས་དགའ་བ༔ བཀོད་པ་ཁྱད་པར་འཕགས་པའི་དབུས༔ ལྷ་དང་མི་ཡི་ལོངས་སྤྱོད་དང་༔ བྱང་ཆུབ་སེམས་དཔའི་ཏིང་འཛིན་གྱིས༔ རྣམ་པར་འཕྲུལ་པའི་འདོད་རྒུའི་ཚོགས༔ མི་ཟད་སྤྲིན་ལྟར་གཏིབས་པའི་གཞིར༔ པད་ཉི་བམ་རོའི་གདན་སྟེང་དུ༔ མཉམ་ཉིད་ཡེ་ཤེས་ཐིག་ལེའི་སྤྲིན༔ རིཿཡིག་སེར་པོའི་འཕྲོ་འདུ་ལས༔ ནོར་ལྷ་བྱེ་བའི་རིགས་ཀྱི་ཡུམ༔ དོན་ཀུན་གྲུབ་མཛད་དྷཱ་ཀི་ནཱི༔ སྐུ་མདོག་གཙོ་མ་གསེར་གྱི་མདོག༔ ཡེ་ཤེས་འོད་ཟེར་གཟི་བརྗིད་འབར༔ སྒེག་འཛུམ་ཆགས་དང་ཁྲོ་བའི་ཉམས༔ ཞལ་གཅིག་ཕྱག་གཉིས་སྤྱན་གསུམ་མ༔ ཕྱག་གཡས་རིན་ཆེན་གྲི་གུག་གིས༔ སྲིད་དང་ཞི་བའི་དཔལ་འབྱོར་འགུགས༔ གཡོན་པས་ནོར་བུའི་ཐོད་པ་ཡིས༔ སྒྲུབ་ལ་འདོད་རྒུའི་ཆར་ཆེན་འབེབས༔ གྲུ་མོར་རྡོ་རྗེའི་ཁ་ཊྭཱཾ་ག༔ རིགས་ཀྱི་ཡབ་དང་གཉིས་སུ་མེད༔ རྣ་ལྟག་ཕག་ཞལ་ངུར་སྒྲ་ཡིས༔ འཁོར་འདས་ཐམས་ཅད་དབང་དུ་སྡུད༔ དར་དང་རིན་ཆེན་རུས་པས་བརྒྱན༔ དབུ་སྐྲ་སྣུམ་འབོལ་གྱེན་དུ་བརྫེས༔ རྩ་གསུམ་ནོར་ལྷ་རབ་འབྱམས་དང་༔ འབུམ་ཕྲག་རིན་ཆེན་དྷཱ་ཀིའི་དབུས༔ དགྱེས་པ་ཆེན་པོའི་གར་གྱིས་རོལ༔ གནས་གསུམ་རྡོ་རྗེའི་ཡི་གེས་མཚན༔ སྐུ་གསུང་ཐུགས་ལྡན་རིགས་མཆོག་ལྔས༔ ཁ་སྦྱོར་བདེ་བའི་དབང་བསྐུར་རྫོགས༔ ཨོཾ་ཨཱཿཧཱུྃ༔ ཏྲཱྃ་ཨོཾ་ཧཱུྃ་ཧྲཱིཿཨཱཿ ཨ་བྷི་ཥིཉྩ་ས་མ་ཡ་སྟྭཱཾ༔ ཞེས་གསལ་བར་བསྒོམས་ལ་ལྷ་སྐུའི་གསལ་སྣང་ལ་སེམས་བཟུང༌། གསལ་སྣང་བརྟན་པ་ན༔ སླར་ཡང་བདག་མདུན་གྱི་ཐུགས་སྲོག་ས་བོན་ལས་བྱུང་བའི་འོད་ཟེར་གྱིས་དོན་གྲུབ་རིན་ཆེན་མཁའ་འགྲོ་རྩ་གསུམ་ནོར་ལྷ་བྱེ་བའི་ཚོགས་ཀྱིས་བསྐོར་བ་སྤྱན་དྲངས་པར་བསམས་ལ༔ ཧཱུྃ༔ སངས་རྒྱས་རྣམས་ནི་ཐམས་ཅད་ཀྱི༔ འདོད་འབྱུང་མཉམ་ཉིད་ཡེ་ཤེས་དབྱིངས༔ རིན་ཆེན་མཁའ་འགྲོའི་སྐུར་བཞེངས་ལ༔ རྩ་གསུམ་ནོར་ལྷའི་ཚོགས་དང་བཅས༔ ཐུགས་རྗེའི་དབང་གིས་གནས་འདིར་གཤེགས༔ དཔལ་འབྱོར་ལོངས་སྤྱོད་བྱིན་ཆེན་ཕོབ༔ ཚེ་དང་བསོད་ནམས་རྒྱས་པ་དང་༔ འདོད་རྒུའི་དངོས་གྲུབ་སྩལ་དུ་གསོལ༔ ཨོཾ་ཨཱཿཧཱུྃ་སརྦ་རཏྣ་དྷཱ་ཀི་ནཱི་ས་པ་རི་བཱ་ར་བཛྲ་ས་མ་ཡ་ཛཿ ས་མ་ཡ་ཧོཿ ས་མ་ཡ་སྟྭཾ༔ ཞེས་སྤྱན་དྲང་༔ ཧཱུྃ༔ བཀྲ་ཤིས་ཡིད་འོང་གནས་མཆོག་འདིར༔ རིན་ཆེན་གཞལ་མེད་ཁང་ཆེན་དབུས༔ དམ་ཚིག་ཡེ་ཤེས་དབྱེར་མེད་པར༔ ཕྲིན་ལས་མཛད་ཕྱིར་བརྟན་པར་བཞུགས༔ ཛྙཱ་ན་ས་མ་ཡ་ཏིཥྛ་ལྷན༔ ཞེས་བཞུགས་སུ་གསོལ༔ དེ་ནས་ཕྱག་མཆོད་བསྟོད་པ་འབུལ་བ་ནི༔ ཧོཿ ཆོས་ཀུན་མཉམ་པ་ཉིད་ཀྱི་དབྱིངས༔ ཡེ་ཤེས་སྒྱུ་མའི་སྐུར་སྣང་བ༔ རིན་ཆེན་མཁའ་འགྲོའི་ལྷ་ཚོགས་ལ༔ གུས་པའི་བློ་ཡིས་ཕྱག་འཚལ་ལོ༔ ཨ་ཏི་པུ་ཧོ༔ པྲ་ཏཱིཙྪ་ཧོ༔ ཨོཾ་ཨཱཿཧཱུྃ༔ འདོད་འབྱུང་མཁའ་འགྲོའི་ལྷ་ཚོགས་ལ༔ དགྱེས་པའི་མཆོད་པ་འབུལ་བ་ནི༔ ཡིད་འཕྲོག་ནོར་བུའི་ཁང་བཟང་ཆེར༔ ཉེར་སྤྱོད་འདོད་ཡོན་སྤྲིན་ལྟར་གཏིབས༔ ལྷ་མིའི་ལོངས་སྤྱོད་བསམ་མི་ཁྱབ༔ སངས་རྒྱས་བྱང་ཆུབ་སེམས་དཔའ་ཡི༔ ཏིང་འཛིན་སྒྱུ་འཕྲུལ་ལས་བྱུང་བའི༔ ནམ་མཁའ་མཛོད་ཀྱི་མཆོད་པའི་སྤྲིན༔ མཁའ་ཁྱབ་འཁོར་ལོར་འཆར་བ་འདི༔ བདེ་ཆེན་ཡེ་ཤེས་དྷཱ་ཀི་ནཱི༔ རྩ་གསུམ་ནོར་ལྷའི་ཚོགས་བཅས་ལ༔ རབ་དྭངས་གུས་པའི་ཡིད་ཀྱིས་འབུལ༔ དགྱེས་པ་ཆེན་པོས་བཞེས་ནས་ཀྱང་༔ དཔལ་འབྱོར་འདོད་རྒུའི་དངོས་གྲུབ་སྩོལ༔ ཨོཾ་ཨཱཿཧཱུྃ་རཏྣ་དྷཱ་ཀི་ནཱི་ས་པ་རི་བཱ་ར་བཛྲ་ཨརྒྷཾ་པཱ་དྱཾ་པུཥྤེ་དྷཱུ་པེ་ཨ་ལོ་ཀེ་གནྡྷེ་ནཻ་བིདྱཱ་ཤཔྡ་སརྦ་པཱུ་ཛ་ཧོ༔ ཧཱུྃ༔ མཉམ་ཉིད་ཡེ་ཤེས་ཁྱབ་གདལ་ཆེན་པོའི་དབྱིངས༔ སྒྱུ་མའི་སྐུ་སྣང་དོན་གྲུབ་མཁའ་འགྲོ་མ༔ རྩ་གསུམ་ནོར་ལྷ་འདུས་པའི་དཀྱིལ་འཁོར་ལྷར༔ གུས་པས་བསྟོད་དོ་དབང་བཅུའི་དངོས་གྲུབ་སྩོལ༔ ཞེས་བསྟོད་ཅིང་འདོད་དོན་གསོལ༔ མདུན་གྱི་ལྷ་སྐུའི་གསལ་སྣང་ལ་རྩེ་གཅིག་ཏུ་སེམས་བཟུང་༔ མཁའ་འགྲོའི་དཀྱིལ་འཁོར་དངོས་ཡིན་སྙམ་དུ་དག་སྣང་གི་ང་རྒྱལ་བསྐྱེད་ཅིང་༔ ཡིད་ཀྱིས་གསོལ་བ་བཏབ་པ་ལས་སྐུ་དང་སྔགས་ཕྲེང་ཕྱག་མཚན་གྱི་ཚོགས་དཔག་ཏུ་མེད་པ་མཁའ་ཁྱབ་ཏུ་འཕྲོས༔ རྩ་གསུམ་རྒྱལ་བ་རབ་འབྱམས་ལ་བདེ་ཆེན་གྱི་མཆོད་པ་འབུལ༔ འགྲོ་བ་ཀུན་གྱི་སེར་སྣའི་རྒྱུ་འབྲས་དྲུང་ནས་ཕྱུང་སྟེ་རིན་ཆེན་མཁའ་འགྲོ་མའི་གོ་འཕང་ལ་བཀོད༔ འོད་ཟེར་གསེར་མདོག་བརྗིད་ཅིང་ལྷུན་ཆགས་པ་ནམ་མཁར་སྤྲིན་ལྟར་དཀྲིགས༔ དེ་ལས་འདོད་རྒུའི་ལོངས་སྤྱོད་ཟད་མི་ཤེས་པའི་ཆར་ཆེན་པོ་ཕབ་པས་རང་གཞན་ཐམས་ཅད་དབང་བཅུའི་དཔལ་འབྱོར་ལ་སྤྱོད་པར་བསམ་མོ༔ དེ་ནི་བསྐྱེད་པའི་གསལ་སྣང་ལ་བརྟེན་ནས་ནོར་སྤེལ་བའི་རིམ་པའོ༔ དེ་ནས་བཟླས་པ་བྱ་བ་ནི༔ མདུན་བསྐྱེད་མཁའ་འགྲོའི་ཐུགས་ཀ་རུ༔ རིན་ཆེན་ཟུར་བརྒྱད་སེར་པོའི་དབུས༔ རིཿཡིག་གསེར་མདོག་སྔགས་ཀྱིས་བསྐོར༔ འོད་ཟེར་གཟི་བརྗིད་དཔལ་དུ་འབར༔ བདག་གི་ཐུགས་ནས་འོད་འཕྲོས་པས༔ ལྷ་ཚོགས་འཁོར་བཅས་ཐུགས་རྒྱུད་བསྐུལ༔ དཔག་ཡས་བདེ་ཆེན་འོད་ཟེར་དང་༔ ལས་བྱེད་ཕོ་ཉས་འཁོར་འདས་ཁྱབ༔ སྲིད་ཞིའི་དཔལ་འབྱོར་ཡེ་ཤེས་ཀུན༔ བཀྲ་ཤིས་རྫས་རྟགས་རྒྱལ་སྲིད་བདུན༔ འདོད་འབྱུང་རིན་ཆེན་སྣ་ཚོགས་ཀྱི༔ རྣམ་པར་སྤྱན་དྲངས་རྟེན་ལ་ཐིམ༔ འདོད་རྒུ་འབྱུང་བའི་གཏེར་དུ་བསམ༔ ཨོཾ་ཨཱཿཧཱུྃ་རི་རཏྣ་དྷཱ་ཀི་ནཱི་སརྦ་བ་སུ་སིདྡྷི་སྭཱ་ཧཱ༔ ཞེས་རྩེ་གཅིག་ཏུ་བཟླ༔ གཞན་ཡང་༔ ཏདྱ་ཐཱ༔ ཨོཾ་རཏྣ་ཨུཥྞཱི་ཥཱ་ཡ་དྷ་ར་དྷ་ར༔ དྷི་རི་དྷི་རི༔ ཛྙཱ་ན་སིདྡྷི༔ ལོ་ཀ་སིདྡྷི༔ བཱ་སུ་སིདྡྷི་ནཱ་ནཱ་ཁ་དྷེ་སིདྡྷི༔ ཏེ་ཛོ་བ་སུ་སིདྡྷི༔ སརྦ་ཨརྠ་སིདྡྷི་ཕ་ལ་པུཥྟིཾ་ཀུ་རུ་སྭཱ་ཧཱ༔ ཞེས་ལས་སྒྲུབ་པའི་སྔགས་ཀྱང་ཅི་རིགས་པར་བཟླའོ༔ ཐོད་པའི་རྟེན་ཡོན་ན་ཁྱད་པར་དུ་བྱིན་དབབ་པ་ནི༔ ཧཱུྃ༔ དངོས་གྲུབ་འབྱུང་བའི་ཡིད་བཞིན་ནོར༔ འདོད་འབྱུང་མཚན་ལྡན་ཀ་པཱ་ལ༔ ཕྱི་ལྟར་རིན་ཆེན་གཞལ་མེད་ཁང་༔ ནང་ལྟར་ཡེ་ཤེས་མཁའ་འགྲོའི་དལ༔ གསང་བ་མཉམ་པ་ཉིད་ཀྱི་དབྱིངས༔ དབྱེར་མེད་དགོས་འདོད་འབྱུང་བའི་གཏེར༔ སྒྲུབ་པའི་རྫས་མཆོག་འདི་ལགས་པས༔ རྩ་གསུམ་ནོར་ལྷ་རབ་འབྱམས་ཀྱིས༔ རྡོ་རྗེའི་སྐུ་ཡི་བྱིན་ཆེན་ཕོབ༔ གཟི་བརྗིད་འབར་བའི་རྟགས་མཚན་ཕྱུང་༔ ནུས་མཐུ་སྔགས་ཀྱི་བྱིན་ཆེན་ཕོབ༔ ཡིད་བཞིན་འདོད་འཇོའི་ཆོ་འཕྲུལ་སྟོན༔ གཉིས་མེད་དགོངས་པའི་བྱིན་ཆེན་ཕོབ༔ ཡེ་ཤེས་མཆོག་གི་དངོས་གྲུབ་སྩོལ༔ མ་གཡེལ་མ་གཡེལ་དྷཱ་ཀིའི་ཚོགས༔ ཐུགས་རྗེ་ཐུགས་དམ་དུས་ལ་བབ༔ རྣལ་འབྱོར་བདག་ལ་བརྩེར་དགོངས་ནས༔ སྒྲུབ་པའི་ལས་འབྲས་མཆིས་པར་མཛོད༔ ཨོཾ་ཨཱཿ་ཧཱུྃ་གུ་རུ་དྷེ་བ་རི་རཏྣ་དྷཱ་ཀི་ནཱི་སརྦ་མཎྜ་ལ་ཛྙཱ་ན་ཨ་བེ་ཤ་ཡ་ཧྲཱིཾ་ཧྲཱིཾ་ཕེཾ་ཕེཾ༔ རཏྣ་ཀ་པཱ་ལ་སརྦ་སིདྡྷི་ཧཱུྃ་ཧཱུྃ་ཧཱུྃ༔ ཛཿཧཱུྃ་བྃ་ཧོ༔ ཞེས་སྤོས་རོལ་དབྱངས་དང་བཅས་པས་བྱིན་དབབ་ཅིང་གཟི་བྱིན་བསྐྱེད་ལ༔ སྔགས་ཀྱི་མཐར༔ ཀ་པཱ་ལ་མ་ཎི་རཏྣ་སརྦ་སིདྡྷི་སིདྡྷི་ཀུ་རུ་ཧཱུྃ༔ ཞེས་བཏགས་པ་གཙོ་བོར་བཟླ་ཞིང་༔ རཏྣ་པུཎྱེ་སིདྡྷི་སིདྡྷི་ཧཱུྃ༔ དྷ་ན་མེ་དྷཱིཿསིདྡྷི་སིདྡྷི་ཧཱུྃ༔ ནཱ་ནཱ་ཁ་དྷེ་སིདྡྷི་སིདྡྷི་ཧཱུྃ༔ དྷཱ་ན་སཾ་བྷོ་སིདྡྷི་སིདྡྷི་ཧཱུྃ༔ ཞེས་ལས་སྒྲུབ་པའི་སྔགས་ཀྱང་ཅི་རིགས་པར་བཟླ༔ དེ་ནི་སྔགས་ཀྱི་བཟླས་བརྗོད་ལ་བརྟེན་པའི་ནོར་སྤེལ་བའོ༔ ཐུན་མཐར་དབྱངས་གསལ་རྟེན་སྙིང་གིས་ནུས་པ་བརྟན༔ གཏོར་མ་ནོར་བུའི་དབྱིབས་ཅན་རིན་ཆེན་འབྲུ་སྨན་དར་ཟབ་ཁ་ཟས་བཟང་རྒུས་བསྐོར་བ་ལ་བསང་ཆུས་བྲན༔ རྃ་ཡྃ་ཁྃ༔ སྟོང་པའི་ངང་ལས་ནོར་བུའི་སྣོད༔ འོད་འབར་རབ་ཏུ་ཡངས་པའི་ནང་༔ གཏོར་མ་ཟག་མེད་བདུད་རྩིའི་བཅུད༔ འདོད་རྒུའི་སྤྲིན་ཕུང་འཕྲོ་བར་གྱུར༔ ནམ་མཁའ་མཛོད་ཀྱི་སྔགས་དང་ཕྱག་རྒྱས་བྱིན་གྱིས་བརླབས་ནས་འབུལ་བ་ནི༔ ཧཱུྃ༔ སྣོད་ཀྱི་འཇིག་རྟེན་རིན་ཆེན་གཏོར་གཞོང་དུ༔ བཅུད་ཀྱི་འབྱོར་པ་འདོད་འབྱུང་གཏོར་མར་བཤམས༔ ནོར་བུའི་བ་གམ་བརྗིད་དང་ལྡན་པ་ནི༔ རི་རབ་ལྷུན་པོ་བས་ཀྱང་དཔངས་རེ་མཐོ༔ མཁའ་འགྲོའི་གཏེར་མ་རྒྱན་གྱིས་སྤྲས་པ་ནི༔ གསེར་གྱི་རི་བདུན་བས་ཀྱང་བརྗིད་རེ་ཆེ༔ ཟག་མེད་བདུད་རྩིའི་ཕུད་ཀྱིས་བྲན་པ་ནི༔ རོལ་པའི་མཚོ་བདུན་ལས་ཀྱང་འཇིངས་རེ་ཟབ༔ བཟའ་བཅའ་བཏུང་བའི་ཚོགས་ཀྱིས་བསྐོར་བ་ནི༔ གླིང་བཞི་གླིང་ཕྲན་ལས་ཀྱང་བཀོད་རེ་ལེགས༔ དར་ཟབ་སྣ་ཚོགས་དཀོར་ཆས་གཏམས་པ་ནི༔ ལྕགས་རི་མུ་ཁྱུད་ལས་ཀྱང་ལྷུན་རེ་སྟུག༔ ནམ་མཁའི་མཐའ་དང་རྒྱ་མཚོའི་གཏིང་མཉམ་པའི༔ འདོད་རྒུ་ཀུན་འབྱུང་གཏོར་མའི་ལོངས་སྤྱོད་ཆེ༔ རོ་བཅུད་ནུས་པ་ཁ་དོག་ཕུན་སུམ་ཚོགས༔ གཟུགས་སྒྲ་དྲི་རོ་རེག་བྱ་བསམ་མི་ཁྱབ༔ ཏིང་འཛིན་དགོངས་བརྒྱུད་དག་པའི་རིག་རྩལ་གྱིས༔ སྲིད་ཞིའི་འབྱོར་ཚོགས་ནམ་མཁའ་མཛོད་ཀྱི་སྒོ༔ གཏན་པ་མེད་པའི་མཆོད་སྤྲིན་ཆེན་པོ་འདི༔ རྩ་བརྒྱུད་བླ་མའི་ཚོགས་ལ་མཆོད་པར་འབུལ༔ མཁའ་འགྲོ་ནོར་ལྷ་རབ་འབྱམས་ཐུགས་དམ་བསྐང་༔ འབུམ་ཕྲག་ཡངས་པའི་འཁོར་ཚོགས་དགྱེས་གྱུར་ནས༔ ནད་གདོན་སྡིག་སྒྲིབ་དབུལ་ཕོངས་ཞི་བར་མཛོད༔ ཚེ་བསོད་དཔལ་འབྱོར་ལེགས་ཚོགས་རྒྱས་པར་མཛོད༔ སྙན་གྲགས་གཟི་བརྗིད་ནུས་སྟོབས་ཆེ་བར་མཛོད༔ འཁོར་འདས་ཕྱྭ་གཡང་དབང་དུ་འདུ་བར་མཛོད༔ མི་མཐུན་འགལ་རྐྱེན་བར་ཆོད་ཚར་བཅད་ནས་༔ མཆོག་དང་ཐུན་མོང་དངོས་གྲུབ་རབ་འབྱམས་ཀྱིས༔ དབང་བཅུའི་མངའ་ཐང་འཕེལ་བའི་ཕྲིན་ལས་མཛོད༔ ཨོཾ་ཨཱཿཧཱུྃ་གུ་རུ་དྷེ་བ་རཏྣ་དྷ་ཀི་ནཱི་མཎྜ་ལ་ས་པ་རི་བཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི༔ སརྦ་ཀརྨ་སིདྡྷི་ཀུ་རུ་ཧཱུྃ༔ ཞེས་ལན་མང་དུ་འབུལ༔ གཞན་ཡང་མཆོད་སྐོང་གི་རིམ་པ་ཇི་ལྟར་རིགས་པར་བྱ༔ ཐུགས་དམ་སྐུལ་བ་ནི༔ རང་གི་ཐུགས་ཀ་ནས་འོད་ཟེར་འཕྲོས༔ འདུན་བསྐྱེད་ཀྱི་ལྷ་ཚོགས་རྣམས་ཀྱི་ཐུགས་རྒྱུད་བསྐུལ༔ དགྱེས་པ་ཆེན་པོའི་གཟི་བྱིན་མཆོག་ཏུ་འབར༔ འོད་ཟེར་དང་ཕོ་ཉའི་ཚོགས་ཀྱིས་འཁོར་འདས་ཀྱི་ཁམས་ཐམས་ཅད་ལ་ཁྱབ༔ སྲིད་ཞིའི་ཕྱྭ་གཡང་ལོངས་སྤྱོད་ཐམས་ཅད་བཀུག་སྟེ་བདག་དང་རྟེན་རྫས་ལ་ཐིམ་པས་འདོད་རྒུ་འབྱུང་བའི་ནུས་པ་དང་ལྡན་པར་བྱས༔ གནས་ཁང་ཡུལ་འཁོར་ཐམས་ཅད་འདོད་རྒུའི་དཔལ་གྱི་འབྱོར་པ་ཟད་མི་ཤེས་པས་ཡོངས་སུ་གང་བར་བསམས་ལ་མདའ་དར་གཡབ༔ སྤོས་ཀྱི་དུད་སྤྲིན་འཐུལ༔ དབྱངས་དང་རོལ་མོའི་སྒྲ་སྙན་པར་སྦྱར་ཏེ༔ ཧཱུྃ་ཧྲཱིཿ རིག་འཛིན་བླ་མ་ཡི་དམ་དཀྱིལ་འཁོར་ལྷ༔ མཁའ་འགྲོ་ནོར་ལྷ་རབ་འབྱམས་ཚོགས་རྣམས་ཀུན༔ རྩེ་གཅིག་མོས་པའི་གདུང་བས་རྒྱུད་བསྐུལ་ན༔ ཡེ་ཤེས་མཆོག་གི་ཐུགས་དམ་དུས་ལ་བབ༔ ཧཱུྃ༔ རིན་ཆེན་བདེ་གཤེགས་མཁའ་འགྲོ་རབ་འབྱམས་ཀྱིས༔ དབུས་ཕྱོགས་འཁོར་འདས་བརྟན་གཡོའི་དྭངས་བཅུད་དང་༔ ཕྱྭ་གཡང་ལོངས་སྤྱོད་འདོད་རྒུའི་དཔལ་འབྱོར་རྣམས༔ བར་སྣང་ཁམས་ཀྱི་ཆར་བཞིན་གནས་འདིར་ཕོབ༔ འཆི་མེད་ཚེ་ཡི་ཕྱྭ་གཡང་ལོངས་སྤྱོད་ཁུག༔ རྒས་མེད་སྟོབས་ཀྱི་ཕྱྭ་གཡང་ལོངས་སྤྱོད་ཁུག༔ ནད་མེད་རྩལ་གྱི་ཕྱྭ་གཡང་ལོངས་སྤྱོད་ཁུག༔ བཅུད་ཅན་ཟས་ཀྱི་ཕྱྭ༴ བརྗིད་ལྡན་གོས་ཀྱི་ཕྱྭ༴ དཔལ་ཅན་ནོར་གྱི་ཕྱྭ༴ བང་མཛོད་འབྲུ་ཡི༴ རྟ་ཕྱུགས་རྐང་བཞིའི༴ གོ་མཚོན་དབྱིག་གི༴ རིགས་བརྒྱུད་འཁོར་སློབ༴ སྙན་གྲགས་ནུས་མཐུའི༴ བསོད་ནམས་དཔལ་གྱི༴ དབང་ཐང་ཀླུང་རྟའི༴ འདོད་རྒུའི་འབྱོར་པའི༴ ཡེ་ཤེས་ཆེན་པོའི༴ ཕྱྭ་ཁུག་གཡང་སྐྱོབས་མཆོག་ཐུན་དངོས་གྲུབ་སྩོལ༔ ཧཱུྃ༔ རིན་ཆེན་རྡོ་རྗེའི་མཁའ་འགྲོ་རབ་འབྱམས་ཀྱིས༔ ཤར་ཕྱོགས་འཁོར་འདས་བརྟན་གཡོའི་དྭངས་བཅུད་དང་༔ ཕྱྭ་གཡང་ལོངས་སྤྱོད་འདོད་རྒུའི་དཔལ་འབྱོར་རྣམས༔ ཉི་ཟླ་བཞིན་དུ་གནས་འདིར་འཆར་བར་མཛོད༔ འཆི་མེད་སོགས༴ ཧཱུྃ༔ རིན་ཆེན་འདོད་འབྱུང་མཁའ་འགྲོ་རབ་འབྱམས་ཀྱིས༔ ལྷོ་ཕྱོགས་འཁོར་འདས་བརྟན་གཡོའི་དྭངས་བཅུད་དང་༔ ཕྱྭ་གཡང་ལོངས་སྤྱོད་འདོད་རྒུའི་དཔལ་འབྱོར་རྣམས༔ སྤྲིན་ཕུང་བཞིན་དུ་གནས་འདིར་གཏིབས་པར་མཛོད༔ འཆི་མེད་སོགས༴ ཧཱུྃ༔ རིན་ཆེན་པདྨའི་མཁའ་འགྲོ་རབ་འབྱམས་ཀྱིས༔ ནུབ་ཕྱོགས་འཁོར་འདས་བརྟན་གཡོའི་དྭངས་བཅུད་དང་༔ ཕྱྭ་གཡང་ལོངས་སྤྱོད་འདོད་རྒུའི་དཔལ་འབྱོར་རྣམས༔ ཆུ་བོའི་རྒྱུན་བཞིན་གནས་འདིར་འདུ་བར་མཛོད༔ འཆི་མེད་སོགས༴ ཧཱུྃ༔ རིན་ཆེན་ལས་ཀྱི་མཁའ་འགྲོ་རབ་འབྱམས་ཀྱིས༔ བྱང་ཕྱོགས་འཁོར་འདས་བརྟན་གཡོའི་དྭངས་བཅུད་དང་༔ ཕྱྭ་གཡང་ལོངས་སྤྱོད་འདོད་རྒུའི་དཔལ་འབྱོར་རྣམས༔ སྐྱི་སེར་བཞིན་དུ་གནས་འདིར་འདྲིལ་བར་མཛོད༔ འཆི་མེད་སོགས༴ ཧཱུྃ༔ རིན་ཆེན་དམ་ཚིག་མཁའ་འགྲོ་རབ་འབྱམས་ཀྱིས༔ མཚམས་བཞིའི་འཁོར་འདས་བརྟན་གཡོའི་དྭངས་བཅུད་དང་༔ ཕྱྭ་གཡང་ལོངས་སྤྱོད་འདོད་རྒུའི་དཔལ་འབྱོར་རྣམས༔ བར་སྣང་རླུང་བཞིན་གནས་འདིར་གཡོ་བར་མཛོད༔ འཆི་མེད་སོགས༴ ཧཱུྃ༔ རིན་ཆེན་ཕོ་ཉའི་མཁའ་འགྲོ་རབ་འབྱམས་ཀྱིས༔ སྟེང་འོག་འཁོར་འདས་བརྟན་གཡོའི་དྭངས་བཅུད་དང་༔ ཕྱྭ་གཡང་ལོངས་སྤྱོད་འདོད་རྒུའི་དཔལ་འབྱོར་རྣམས༔ ལོ་ཏོག་བཞིན་དུ་གནས་འདིར་སྨིན་པར་མཛོད༔ འཆི་མེད་སོགས༴ ཧཱུྃ་ཧྲཱི༔ གཡང་ཁང་བཀྲ་ཤིས་ཕོ་བྲང་ཉམས་རེ་དགའ༔ གཡང་རྫས་འདོད་རྒུའི་དཔལ་འབྱོར་བརྗིད་རེ་ཆེ༔ གཡང་རྟེན་ནོར་བུའི་བ་གམ་བཀོད་རེ་ལེགས༔ གཡང་བཤོས་ཉི་ཟླ་ནོར་བུ་བཀྲག་རེ་ཆེ༔ འཇིག་རྟེན་སྣོད་བཅུད་སྲིད་པའི་ཕྱྭ་དང་གཡང་༔ རབ་འབྱམས་དག་པའི་ཞིང་གི་དཔལ་དང་སྟོབས༔ འཁོར་འདས་ཀུན་གྱི་བཅུད་དང་དྭངས་མ་ཀུན༔ སྒྲུབ་པའི་རྫས་མཆོག་འདི་ལ་དབྱེར་མེད་སྟིམས༔ སྒྲུབ་མཆོག་རྣལ་འབྱོར་རྒྱུད་ལ་བྱིན་ཆེན་ཕོབ༔ གྲུབ་པའི་རྟགས་དང་མཚན་མ་མྱུར་དུ་ཕྱུངས༔ འདོད་རྒུའི་དངོས་གྲུབ་མ་ལུས་ཆར་ལྟར་ཕོབ༔ མཆོག་ཐུན་བཀྲ་ཤིས་བདེ་ལེགས་སྩལ་དུ་གསོལ༔ ཞེས་གྱེར་ཞིང་རྩ་བའི་སྔགས་དང་ལས་སྒྲུབ་པའི་སྔགས་མང་དུ་བཟླ༔ དེ་ལྟར་ཡང་ཡང་བསྐྱར་བས་གནས་ཁང་ཉམས་དགའ༔ སྒྲུབ་རྫས་བྱིན་ཆགས༔ རྣལ་འབྱོར་པའི་ལུས་ངག་ཡིད་གསུམ་ལ་བདེ་སྟོང་གི་ཉམས་འཆར་བ་སོགས་བྱུང་ན་ཚེ་གཡང་ཁུག་པའི་རྟགས་སུ་ངེས་པར་བྱས་ནས་རྟེན་འབྲེལ་སྙིང་པོའི་སྔགས་བཟླ་ཞིང་མེ་ཏོག་འཐོར་བས་ཀྱང་བརྟན་པར་བྱའོ༔ རྗེས་སུ་མཆོད་ཅྀང་བསྟོད་ལ་དངོས་གྲུབ་གསོལ་བ་ནི༔ ཚོགས་ཀྱི་དགའ་སྟོན་ལ་ལོངས་སྤྱད༔ ལྷག་མ་བཏང་༔ མཆོད་བསྟོད་རྒྱས་བསྡུས་གང་རུང་བྱ༔ རྟེན་རྫས་ཐོགས་ལ༔ ཧཱུྃ༔ བདེ་མཆོག་མཉམ་ཉིད་ཡེ་ཤེས་དཀྱིལ་འཁོར་ནས༔ གང་འདུལ་འདོད་རྒུའི་གར་སྒྱུར་འཕྲུལ་མོ་ཆེ༔ སྒྲུབ་ལ་དངོས་གྲུབ་སྩོལ་བའི་ཐུགས་དམ་ཅན༔ རིན་ཆེན་མཁའ་འགྲོ་རྩ་གསུམ་ནོར་ལྷའི་ཚོགས༔ ཆོས་ཀྱི་དབྱིངས་ནས་གནས་འདིར་བརྩེར་དགོངས་ལ༔ བྱིན་རླབས་ནུས་རྩལ་གཟི་བྱིན་བསྐྱེད་དུ་གསོལ༔ འགྱུར་མེད་སྐུ་ཡི་དངོས་གྲུབ་ལུས་ལ་སྩོལ༔ འགག་མེད་གསུང་གི་དངོས་གྲུབ་ངག་ལ་སྩོལ༔ འཁྲུལ་མེད་ཐུགས་ཀྱི་དངོས་གྲུབ་ཡིད་ལ་སྩོལ༔ དབྱེར་མེད་ཡེ་ཤེས་དངོས་གྲུབ་རྒྱུད་ལ་སྩོལ༔ འཆི་མེད་ཚེ་ཡི་དངོས་གྲུབ་སྩལ་དུ་གསོལ༔ འཛད་མེད་ནོར་གྱི་དངོས་གྲུབ་སྩལ་དུ་གསོལ༔ བཅུད་ལྡན་ཟས་ཀྱི་དངོས་གྲུབ་སྩལ་དུ་གསོལ༔ བཀྲག་ཅན་གོས་ཀྱི་དངོས་གྲུབ་སྩལ་དུ་གསོལ༔ འཁོར་སློབ་རིགས་བརྒྱུད་དངོས་གྲུབ་སྩལ་དུ་གསོལ༔ སྙན་གྲགས་སྟོབས་རྩལ་དངོས་གྲུབ་སྩལ་དུ་གསོལ༔ དཔལ་འབྱོར་ལོངས་སྤྱོད་དངོས་གྲུབ་སྩལ་དུ་གསོལ༔ ཡིད་བཞིན་འདོད་རྒུའི༴ རིན་ཆེན་གཏེར་ཀྱི་དངོས་གྲུབ༴ མཆོག་ཐུན་དངོས་གྲུབ་མ་ལུས་དེང་འདིར་སྩོལ༔ ཞེས་ཐུགས་དམ་བསྐུལ་ཞིང་༔ སྔགས་ཀྱི་མཐར༔ ཀཱ་ཡ་སིདྡྷི་ཨོཾ༔ ཝཱ་ཀ་སིདྡྷི་ཨཱཿ ཙིཏྟ་སིདྡྷི་ཧཱུྃ༔ ཛྙཱ་ན་སིདྡྷི་ཧྲཱི༔ ལོ་ཀ་སིདྡྷི་ཨཱཿ སརྦ་སིདྡྷི་ཕ་ལ་ཧཱུྃ་ཧཱུྃ༔ ཞེས་བརྗོད་ཅིང་རང་གི་གནས་ལྔར་རེག་པས་མཆོག་ཐུན་གྱི་དངོས་གྲུབ་མ་ལུས་པ་ཐོབ༔ ཡེ་ཤེས་ཀྱི་མཁའ་འགྲོ་མ་དང་སྐལ་བ་མཉམ་པར་བྱས༔ དངོས་གྲུབ་ཀྱི་རྫས་ལ་རོལ་པས་ཀྱང་འདོད་རྒུའི་ནུས་པའི་གཟི་བྱིན་གོང་ནས་གོང་དུ་འཕེལ་ཞིང་བརྟན་པར་བསམ་མོ༔ དེ་རྣམས་ནི་ཕྱྭའི་ཕྲིན་ལས་ལ་བརྟེན་ནས་གཡང་སྤེལ་བའི་རིམ་པའོ༔ དེ་ནས་སླར་ཡང་མཆོད་ཅིང་བསྟོད༔ ནོངས་པ་བཤགས༔ ཡེ་ཤེས་པ་བརྟན་པར་བཞུགས༔ བདག་ཉིད་ལྷར་གསལ་བ་ཆོས་ཀྱི་དབྱིངས་སུ་བསྡུ་ཞིང་ཐུན་མཚམས་ཀྱི་ལྷར་ལྡང་༔ བསྔོ་སྨོན་བཀྲ་ཤིས་རྒྱས་པར་བྱའོ༔ དེ་ལྟ་བུའི་ཚུལ་གྱིས་རྩེ་གཅིག་ཏུ་བརྩོན་པས་དངོས་སུ་ཟས་ནོར་ལོངས་སྤྱོད་འདུ་བ་དང་༔ ཉམས་ཀྱི་སྣང་ཆར་བུད་མེད་དང་སྐྱེ་བོའི་ཚོགས་མང་པོས་བདག་ཉིད་ལ་འདུད་བསྟོད་བྱེད་པ༔ ལོངས་སྤྱོད་འབུལ་བ༔ རྨི་ལམ་དུ་ཉི་ཟླ་ཤར་བ༔ ཆར་བཟང་པོ་འབབས་པ༔ རྩི་ཤིང་ལོ་ཏོག་ཆུ་བོ་རྒྱས་པ་སོགས་བྱུང་ན་གྲུབ་པའི་རྟགས་སུ་ཤེས་པར་བྱས་ནས་དངོས་གྲུབ་བླངས་བས་ཚེ་རིང་བ་དང་༔ ནད་མེད་པ་དང་༔ དཔལ་འབྱོར་ལོངས་སྤྱོད་རྒྱས་པ་དང་༔ འདོད་རྒུའི་བསམ་པ་འགྲུབ་པ་དང་༔ མཐར་ཐུག་བདེ་ཆེན་གྱི་ཡེ་ཤེས་འཕེལ་བས་མཆོག་གི་དངོས་གྲུབ་ཐོབ་པར་འགྱུར་རོ༔ སྒྲུབ་རྫས་རྣམས་མཛོད་ཀྱི་ཕུག་ཏུ་བཀུར་སྟི་དང་བཅས་ཏེ་བཞག༔ ཟས་གོས་ནོར་སྣའི་ཕུད་ཀྱིས་མཆོད༔ མི་ལ་མི་སྨྲ་བར་སྐབས་སུ་སྒྲུབ་པ་བསྐྱར༔ སྒྲུབ་རྫས་དམན་པ་རྣམས་ཀྱང་ནང་འཁོར་ཁོ་ནས་ལོངས་སྤྱོད་པ་མ་གཏོགས་ཕྱིར་མི་གཏོང་བ་དམ་ཚིག་ཡིན་ནོ༔ དེ་ལྟར་ན་དེ་རྣམས་ནི་ཕྱི་རྟེན་དང་བསྐྱེད་བཟླས་ཀྱིས་ཐུན་མོང་གི་ནོར་སྤེལ་བའི་གདམས་པའོ༔ ས་མ་ཡ༔ གཉིས་པ་ནང་རླུང་གི་ལྕགས་ཀྱུས་ཁྱད་པར་གྱི་ནོར་དགུག་པ་ནི༔ རྣལ་འབྱོར་དང་ལྡན་པས་ལུས་གནད་བསྲང་༔ རླུང་རོ་བསལ༔ དགའ་ཞིང་དང་བའི་བསམ་པས་རང་སྐད་ཅིག་གིས་རིན་ཆེན་མཁའ་འགྲོ་མར་བསྐྱེད༔ རྩའི་སྟོང་ར་གསལ་གདབ༔ རྩ་ཁམས་ཐམས་ཅད་དཔའ་བོ་མཁའ་འགྲོའི་རང་བཞིན་དུ་བསམ༔ ཁྱད་པར་ལྟེ་འོག་རྩ་གསུམ་སྦུབས་གཅིག་པའི་དབུས་རིན་ཆེན་ཟུར་བརྒྱད་ཀྱི་ལྟེ་བར་གཏུམ་མོའི་མེ་དང་དབྱེར་མེད་པའི་ལས་བྱེད་ཀྱི་དྷཱ་ཀི་དམར་སེར་རིན་པོ་ཆེའི་ལྕགས་ཀྱུ་དང་ནོར་བུའི་ཐོད་པ་བསྣམས་པ་བདེ་དྲོད་ཀྱི་གཟི་བྱིན་ཉི་མ་ལྟར་འབར་བར་བསམ༔ ཐུགས་ཀ་ནས་འོད་ཟེར་ལྕགས་ཀྱུ་ལྟ་བུ་རོ་མའི་རླུང་དང་ལྷན་ཅིག་ཕྱིར་སོང་༔ འཁོར་འདས་བརྟན་གཡོའི་ཁམས་ཐམས་ཅད་ལ་ཁྱབ༔ སྲིད་ཞིའི་ཕྱྭ་གཡང་ལོངས་སྤྱོད་ཀྱི་དཔལ་དང་བཅུད་ཀྱི་དྭངས་མ་ཐམས་ཅད་འོད་སེར་པོའི་རྣམ་པར་བསྡུས༔ སྣ་གཡོན་ནས་རྐྱང་མའི་ལམ་བརྒྱུད༔ ལྟེ་བའི་མཁའ་འགྲོ་མ་ལ་ཐིམ་པས་གཟི་བརྗིད་ལྷག་པར་རྒྱས༔ བདེ་ཆེན་གྱི་ཉམས་འབར་བར་བསམས་ལ་བུམ་ཅན་ཁ་སྦྱོར་དུ་བཟུང་༔ དེ་ལྟ་བུ་ལན་གྲངས་མང་དུ་བྱ༔ མཐར་ལས་ཀྱི་ཕོ་ཉ་ལས་གཏུམ་མོའི་མེ་ཆོས་བཞི་ལྡན་དུ་འབར༔ དབུ་མའི་ནང་ནས་ཐལ་གྱིས་སོང་༔ འཁོར་ལོ་བཞིའི་ལྷ་ཚོགས་རྣམས་མཆོད༔ བདེ་དྲོད་ཀྱི་ཡེ་ཤེས་བསྐུལ་༔ སྤྱི་བོའི་ཧྃ་ལ་རེག་པས་བདུད་རྩི་པདྨའི་སྣལ་མ་ལྟ་བུ་ནར་གྱིས་འབབས༔ འཁོར་ལོ་བཞི་གང་༔ གནས་སྐབས་བཞིའི་བག་ཆགས་དག༔ ཁྱད་པར་དེས་བསྐྱེད་པའི་ཉོན་མོངས་པ་སེར་སྣའི་རྒྱུ་དང་དབུལ་བའི་འབྲས་བུའི་ཉེར་ལེན་ལྷག་མེད་དུ་སྦྱངས༔ ཡེ་ཤེས་བཞིའི་དངོས་གྲུབ་ཐོབ་པར་བསམ༔ སོ་སོར་བུམ་ཅན་གྱིས་བརྟན༔ དེ་ལྟར་ཉམས་སུ་བླངས་པའི་མཐར་སྲིད་ཞིའི་དྭངས་བཅུད་ལྟེ་བའི་མཁའ་འགྲོ་མར་འདུས༔ དེ་གདན་དང་བཅས་པ་ཐིག་ལེ་སེར་པོར་གྱུར༔ ཡར་བྱུང་སྙིང་གའི་ས་བོན་རིཿཡིག་དང་དབྱེར་མེད་དུ་འདྲེས༔ དེ་ཉིད་ཀྱང་རང་རིག་པའི་ཀློང་དུ་ཐིམ་པས་རང་ཉིད་ཡེ་ཤེས་ཀྱི་མཁའ་འགྲོ་རཏྣ་དྷཱ་ཀི་ནཱི་དང་དབྱེར་མེད་པའི་གོ་འཕང་བརྙེས་པར་བསམས་ལ་འཇམ་རླུང་བཟུང་ཞིང་༔ སྟོང་གསལ་མཉམ་པ་ཉིད་ཀྱི་ངང་དུ་མཉམ་པར་བཞག་གོ༔ དེ་ལྟ་བུ་རྩེ་གཅིག་ཏུ་ཉམས་སུ་བླངས་པས་གནས་སྐབས་ལུས་གཟི་བརྗིད་ལྡན༔ ངག་ནུས་པ་འབར༔ ཡིད་རྟོགས་པ་ཐོབ་པས་སྣང་བ་དབང་དུ་འདུས་པའི་རྟེན་འབྲེལ་ལ་བརྟེན་ནས་འདོད་རྒུའི་འབྱོར་པ་ཆར་བཞིན་དུ་འབབས༔ བསམ་དོན་ཐམས་ཅད་འགྲུབ༔ ཚེ་རིང་༔ ནད་ཉུང་༔ གང་དུ་གནས་པར་བཀྲ་ཤིས་ཤིང་བྱིན་ཆགས་པ་སོགས་ཕན་ཡོན་བསམ་གྱིས་མི་ཁྱབ༔ མཐར་ཐུག་ཡེ་ཤེས་དྲི་མ་མེད་པ་མངོན་དུ་འགྱུར་བ་ཡིན་ནོ༔ དེ་ནི་ནང་རླུང་གི་ལྕགས་ཀྱུས་ཁྱད་པར་གྱི་ནོར་དགུག་པའི་རིམ་པ་ཟབ་མོའོ༔ ས་མ་ཡ༔ གསུམ་པ་གསང་བ་དགོངས་པ་མི་འགྱུར་བའི་ཡེ་ཤེས་ཀྱིས་དོན་གྱི་འདོད་རྒུ་སྨིན་པར་བྱེད་པ་ནི༔ བསྐྱེད་བཟླས་རླུང་གི་རྣལ་འབྱོར་ལ་ཅི་རིགས་པར་གོམས་པའམ༔ དབང་པོ་རྣོན་པོ་གཅིག་ཅར་བའི་རིགས་ཅན་རྣམས་ཀྱིས་འདི་ལྟར་ཉམས་སུ་བླངས་ཏེ༔ དུས་དང་རྒྱུན་གྱི་སྐབས་རྣམས་སུ་ལུས་བསྲང་ཞིང་ཁོང་ཀློད་༔ རླུང་འགྲོ་འོང་རང་བབས་སུ་བཞག༔ སེམས་དུས་གསུམ་གྱི་སྤྲོས་པ་བཅད༔ ཕྱི་རོལ་པའི་སྣང་བ་འཁོར་བ་དང་མྱ་ངན་ལས་འདས་པའི་ཕྱྭ་གཡང་ལོངས་སྤྱོད་དྭངས་བཅུད་དགེ་མཚན་དུ་བཏགས་པ་ཐམས་ཅད་རང་གི་སེམས་ཀྱི་སྣང་ཆ་རྟེན་འབྲེལ་གྱི་རོལ་པར་ཐག་བཅད༔ སེམས་འདས་པའི་རྟོག་པ་འགགས༔ མ་འོངས་པ་མ་སྐྱེས༔ ད་ལྟའི་ཤེས་པ་སྐད་ཅིག་མ་དུས་གསུམ་མཉམ་ཉིད༔ སྲིད་ཞི་མཉམ་ཉིད༔ སྤྲོས་པའི་མཐའ་ཐམས་ཅད་མཉམ་པ་ཉིད་དུ་ངེས་ཤེས་བསྐྱེད༔ དེའི་ངང་བསྐྱང་༔ བར་རླུང་ཐད་ཀར་བཟུང་༔ རླུང་སེམས་རིག་པ་དྲིལ་ཏེ་ཀ་དག་ཟང་ཐལ་རྗེན་པར་བསྐྱང་བ་ལ་བརྟན་པ་ཐོབ་པས་སྣང་པས་ཤེས་པ་མ་བསླུས་པས་སྣང་བ་དབང་དུ་འདུས༔ ཤེས་པས་རིག་པ་མ་བསླད་པས་རིག་པ་རང་སོ་ཟིན༔ རིག་གདངས་རླུང་སེམས་དང་འདྲེས་པས་རླུང་རིག་དྭངས་མར་སྨིན༔ དྭངས་མ་ཡེ་ཤེས་སུ་ཤར་བས་འཁོར་འདས་བརྟན་གཡོ་ཀུན་ལ་དབང་བསྒྱུར་བས་ནམ་མཁའ་མཛོད་ཀྱི་ཏིང་ངེ་འཛིན་མངོན་དུ་འགྱུར་བ་ཡིན་ནོ༔ དེ་ནི་གསང་བ་དགོངས་པ་མི་འགྱུར་བའི་གཟེར་གྱིས་དོན་གྱི་འདོད་རྒུ་སྨིན་པར་བྱེད་པའི་རིམ་པ་མཐར་ཐུག་པའོ༔ ས་མ་ཡ༔ ཞར་བྱུང་དངོས་གྲུབ་བླང་བའམ༔ སློབ་མ་ལ་དབང་བསྐུར་ན་མཎྜལ་ཕུལ༔ རྣལ་འབྱོར་མ་དང་དབྱེར་མེད་པའི༔ རྡོ་རྗེ་སློབ་དཔོན་དགོངས་སུ་གསོལ༔ བདག་ལ་རིན་ཆེན་མཁའ་འགྲོ་མའི༔ དངོས་གྲུབ་མཆོག་གི་དབང་བསྐུར་སྩོལ༔ ཞེས་ལན་གསུམ་གྱིས་གསོལ་བ་གདབ༔ རྒྱུད་སྦྱང་༔ ཡེ་ཤེས་དབབ་བརྟན་བྱ༔ ཐུགས་དམ་བསྐུལ༔ གཏོར་མ་རིན་ཆེན་མཁའ་འགྲོ་མ་རྩ་གསུམ་ནོར་ལྷ་རབ་འབྱམས་མཁའ་འགྲོ་འབུམ་གྱིས་བསྐོར་བ་མངོན་སུམ་དུ་གསལ་བ་སྤྱི་བོར་བྱོན༔ བདེ་བ་ཆེན་པོའི་གཟི་བརྗིད་འབར༔ ཡེ་ཤེས་ཀྱི་འོད་ཟེར་མཁའ་ཁྱབ་ཏུ་འཕྲོས༔ འཁོར་འདས་བརྟན་གཡོའི་ཕྱྭ་གཡང་ལོངས་སྤྱོད་དྭངས་བཅུད་ཐམས་ཅད་ཆར་བཞིན་དུ་བབས་ནས་འདོད་རྒུའི་འབྱོར་བ་ཟད་མི་ཤེས་པ་ལ་དབང་བསྒྱུར་བར་བསམས་ལ་གཏོར་མ་སྤྱི་བོར་བཞག༔ ཨོཾ་གཏོར་སྣོད་རིན་ཆེན་གཞལ་མེད་ཁང་༔ གཏོར་མ་ལྷ་ཡི་ངོ་བོར་བཞུགས༔ སྐལ་ལྡན་བུ་ལ་དབང་བསྐུར་བས༔ འདོད་དགུའི་དཔལ་འབྱོར་རྒྱས་པར་ཤོག༔ ཨོཾ་ཨཱཿཧཱུྃ་རི་རཏྣ་དྷཱ་ཀི་ནཱི་སརྦ་བ་སུ་སིདྡྷི་སྭཱ་ཧཱ༔ ཀཱ་ཡ་སིདྡྷི་ཨ་བྷི་ཥིཉྩ་ཨོཾ༔ མཐར་གཏོར་མའི་ལྷ་འོད་དུ་ཞུ་ནས་དབྱེར་མེད་དུ་ཐིམ་པས་རིན་ཆེན་མཁའ་འགྲོ་མ་འཁོར་དང་བཅས་པའི་ཡེ་ཤེས་རྒྱུད་ལ་ཞུགས་པར་བསམ༔ བདུད་རྩིའི་སྣོད་ཐོགས་ལ༔ སྲིད་ཞིའི་དྭངས་བཅུད་བདུད་རྩིའི་རྒྱུན་མགྲིན་པར་བཞག་ཅིང་མྱངས་བས་རྩ་ཁམས་ཐམས་ཅད་གང་༔ ཉོན་མོངས་པའི་རྟོག་པ་འགགས༔ རླུང་སེམས་ལ་དབང་བསྒྱུར་བས་འཁོར་འདས་བདེ་ཆེན་གྱི་ཐིག་ལེར་དག་པར་བསམ༔ ཨཱཿ རྩ་རླུང་ཐིག་ལེའི་སྣོད་མཆོག་ཏུ༔ སྲིད་ཞིའི་དྭངས་བཅུད་ཐིག་ལེར་འཁྱིལ༔ སྐལ་ལྡན་བུ་ལ་དབང་བསྐུར་བས༔ བདེ་ཆེན་འདོད་རྒུ་རྒྱས་པར་ཤོག༔ ཝཱ་ཀ་སིདྡྷི་ཨ་བྷི་ཥིཉྩ་ཨཱཿ ཞེས་བརྗོད་ཅིང་བདུད་རྩི་སྤྱིན༔ ཐོད་པའི་རྟེན་སྙིང་གར་བཞག་ལ༔ དབྱིངས་རིག་མཚོན་པའི་ཐོད་པ་སྣོད་བཅུད་ཡོངས་རྫོགས་རིན་ཆེན་མཁའ་འགྲོ་མའི་རང་བཞིན་དུ་བཞུགས་པ་སྙིང་གར་བཞག་པས་མཉམ་ཉིད་ཁྱབ་གདལ་ཆེན་པོའི་རྟོགས་པ་བསྐྱེད་ཅིང་༔ ནམ་མཁའ་མཛོད་ཀྱི་ཏིང་ངེ་འཛིན་ལ་དབང་བསྒྱུར་བར་བསམས་ལ༔ ཧཱུྃ༔ མཉམ་ཉིད་ཁྱབ་གདལ་ཀ་པཱ་ལར༔ ཡེ་ཤེས་ཆེན་པོའི་བཅུད་ཀྱིས་གཏམས༔ སྐལ་ལྡན་བུ་ལ་དབང་བསྐུར་བས༔ རིག་རྩལ་ཏིང་འཛིན་རྒྱས་པར་ཤོག༔ ཙིཏྟ་ཨ་བྷི་ཥིཉྩ་ཧཱུྃ༔ ཞེས་བརྗོད༔ མཐར་མེ་ཏོག་འཐོར་བ་དང་བཅས༔ ཨོཾ༔ རྩ་གསུམ་ནོར་ལྷ་རབ་འབྱམས་བདེན་སྟོབས་ཀྱིས༔ འཁོར་འདས་ཕྱྭ་གཡང་འདོད་རྒུའི་དཔལ་འབྱོར་རྒྱས༔ རླུང་སེམས་དབང་འདུས་དགོངས་པའི་རྩལ་ཆེན་རྫོགས༔ བསམ་དོན་ལྷུན་གྱིས་གྲུབ་པའི་བཀྲ་ཤིས་ཤོག༔ ཅེས་དང་རྟེན་འབྲེལ་སྙིང་པོས་བརྟན་པར་བྱའོ༔ དངོས་གྲུབ་དང་ཚོགས་ཀྱི་དགའ་སྟོན་ལ་ལོངས་སྤྱད་དོ༔ དེ་ལྟར་བྱས་པས་ཡེ་ཤེས་མཁའ་འགྲོ་མའི་བྱིན་རླབས་ཞུགས༔ འཇིག་རྟེན་གྱི་མཁའ་འགྲོ་མ་རྣམས་དབང་དུ་འདུ༔ ལས་ཀྱི་མཁའ་འགྲོ་མ་རྣམས་ཀྱིས་བཀའ་ཉན་ཅིང་གནས་སྐབས་སུ་འདོད་རྒུའི་དཔལ་འབྱོར་རྒྱས༔ ཅི་བསམ་འགྲུབ༔ མཐར་ཐུག་ཕོ་ཉས་གྲོགས་མཛད་དེ་བདེ་ཆེན་གྱི་སྐུ་འགྲུབ་པར་འགྱུར་རོ༔ ས་མ་ཡ༔ མཁའ་འགྲོ་འདུས་པའི་ནོར་སྒྲུབ་ཀྱི་མན་ངག་གཞན་ལས་ཁྱད་པར་དུ་འཕགས་པ་ཨོ་རྒྱན་བདག་གིས་རྒྱུད་དང་མན་ངག་ལས་བཏུས་ཏེ་རྡོ་རྗེའི་གཟུངས་མ་མཁར་ཆེན་བཟའ་ལ་གདམས༔ མ་འོངས་ཕྱི་མ་ཕྱི་མའི་དོན་དུ་གཏད་པ་སྩཽགས་སྩཽགས་སྩཽགས༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གུ་ཧྱ་ས་མ་ཡ༔ ཡེ་ཤེས་ཀྱི་མཁའ་འགྲོ་ཇོ་མོ་སྨན་མོའི་ཟབ་ཆོས་སྤྲུལ་པའི་གཏེར་ཆེན་པདྨ་འོད་གསལ་མདོ་སྔགས་གླིང་པ་ལ་ཡང་གཏེར་དུ་བཀའ་བབས་ཏེ་གཏན་ལ་ཕབ་པའི་ཡི་གེ་པ་ནི་པདྨ་གར་དབང་བློ་གྲོས་མཐའ་ཡས་ཀྱིས་གུས་པས་བགྱིས་པ་དགེ་ལེགས་འཕེལ།། །།

[edit]

mkha' 'gro gsang ba kun 'dus las:__rdo rje phag mo'i nor sgrub bzhugs:__rdo rje phag mo la phyag 'tshal lo:__mkha' 'gro 'dus pa'i nor sgrub kyi gdams pa la gsum ste:__phyi rten dang bskyed bzlas kyis thun mong gi nor spel ba:__nang rlung gi lcags kyus khyad par gyi nor dgug pa:__gsang ba dgongs pa mi 'gyur ba'i ye shes kyis don gyi 'dod rgu smin par byed pa'o:__dang po la gnyis:__rten dang :__sgrub thabs so:__dang po la gnyis te:__gtor ma la brten pa ni/__phyag g.yang chags shing dam tshig sogs kyi sel med pa'i lag nas byung ba'i rin chen 'bru sman dpal can gyi rdzas snying po lnga rnams zhun mar dang ma da na bzang pos sbrus pa'i gtor ma rin po che 'bar ba'i dbyibs can gyi nang du sngags gsol byang dang bcas pa gzhug:__mtha' nor bu mig gsum pa mang pos bskor:__rten 'brel phun sum tshogs pa'i rgyan bkod dar ser po'i gdugs dang bcas te ma rdal gyi dbus su bzhag:__gzhan yang phywa g.yang gi rten rdzas ci rigs pa dang mchod tshogs bzang du bsham mo:__thod pa la brten pa ni:__thod pa dum bu gcig pa'am gsum pa mar khu dwangs pa'i mdog can:__che zhing ljid pa dang ldan pa:__mthong ba yid 'phrog ba:__mi sa dang nor sa mthug pa:__srog gi ka ba tshugs pa:__mar khu'i thig les brgyan pa:__dgos 'byung gshongs dang shing lo 'bras bu dang bcas pa rang sar dud pa:__khyad par rang gi lag tu 'byor ba'i rten 'brel legs par 'grigs pa zhig dri bzang gi chus bkru:__nang du sman sna lnga dang bdud rtsi chen pos byug:__phywa g.yang gi rdzas kyis phyur bur gtams:__khyad par thod pa'i 'khor lo gzhug:__de la 'khor lo ni lte bar mu khyud dang bcas pa'i dbus su ri:__de'i mthar rtsa sngags:__gong ras la:__ka pA la ma Ni rat+na sarba sid+d+hi sid+d+hi ku ru hU~M:__mu khyud dang po la 'dab ma bzhi la thod pa'i sgrub pa'i sngags tshan bzhi:__gnyis par nor lha spyi'i sngags ji ltar 'thad pa:__gsum par dbyangs gsal gyi mthar:__mi'i nor bu thod pa rin chen 'bar ba la brten nas ye shes kyi mkha' 'gro'i lha tshogs rnams kyis bdag la zas nor longs spyod chos dang srid kyi 'dod rgu'i dngos grub ma lus pa stsal du gsol:__zhes pa dang rten 'brel snying pos mtha' bskor:__mtha' nor bu'i pa tras mdzes par bya:__dpal can gyi rdzas dang bdud rtsi chen pos byugs la gzhug:__maN+Dal gyi snying por gzhug:__de ni rten bca' ba'o:__gnyis pa sgrub pa'i thabs ni:__ra ba bzhi gang yang rung ba'i yar ngo'i gza' skar tshes grangs bzang po nas 'jug ste:__sgrub pa po chas gos bzang pos brgyan:__rol mo'i cha byad dang :__dri zhim po'i bdug spos sbyar:__mkha' 'gro 'dus pa'i phrin las kyi gzhung bsrang :__bzlas brjod ji ltar 'os pa bya'o:__de nas mdun rten la bsang chus khrus gsol zhing :__hU~M:__nor lha 'dus pa'i rten mchog la:__dag cing dri ma med pa yi:__bdud rtsi chu yi khrus gsol bas:__mi gtsang nyams grib dag gyur cig:__ces dang :__rnam 'joms sme brtsegs 'byung ba lnga'i grib sel gyi sngags dang bcas pas bkru zhing bsang gtor byas la lha gsal ba ni:__hU~M:__stong pa'i ngang las mdun gyi rten:__'khor 'das dpal kun 'dus pa'i gter:__rin chen gzhal med nyams dga' ba:__bkod pa khyad par 'phags pa'i dbus:__lha dang mi yi longs spyod dang :__byang chub sems dpa'i ting 'dzin gyis:__rnam par 'phrul pa'i 'dod rgu'i tshogs:__mi zad sprin ltar gtibs pa'i gzhir:__pad nyi bam ro'i gdan steng du:__mnyam nyid ye shes thig le'i sprin:__riHyig ser po'i 'phro 'du las:__nor lha bye ba'i rigs kyi yum:__don kun grub mdzad d+hA ki nI:__sku mdog gtso ma gser gyi mdog:__ye shes 'od zer gzi brjid 'bar:__sgeg 'dzum chags dang khro ba'i nyams:__zhal gcig phyag gnyis spyan gsum ma:___phyag g.yas rin chen gri gug gis:__srid dang zhi ba'i dpal 'byor 'gugs:__g.yon pas nor bu'i thod pa yis:__sgrub la 'dod rgu'i char chen 'bebs:__gru mor rdo rje'i kha T+wAM ga:__rigs kyi yab dang gnyis su med:__rna ltag phag zhal ngur sgra yis:__'khor 'das thams cad dbang du sdud:__dar dang rin chen rus pas brgyan:__dbu skra snum 'bol gyen du brdzes:__rtsa gsum nor lha rab 'byams dang :__'bum phrag rin chen d+hA ki'i dbus:__dgyes pa chen po'i gar gyis rol:__gnas gsum rdo rje'i yi ges mtshan:__sku gsung thugs ldan rigs mchog lngas:__kha sbyor bde ba'i dbang bskur rdzogs:__oM AHhU~M:__trA~M oM hU~M hrIHAH__a b+hi Shiny+tsa sa ma ya s+t+wAM:__zhes gsal bar bsgoms la lha sku'i gsal snang la sems bzung*/__gsal snang brtan pa na:__slar yang bdag mdun gyi thugs srog sa bon las byung ba'i 'od zer gyis don grub rin chen mkha' 'gro rtsa gsum nor lha bye ba'i tshogs kyis bskor ba spyan drangs par bsams la:__hU~M:__sangs rgyas rnams ni thams cad kyi:__'dod 'byung mnyam nyid ye shes dbyings:__rin chen mkha' 'gro'i skur bzhengs la:__rtsa gsum nor lha'i tshogs dang bcas:__thugs rje'i dbang gis gnas 'dir gshegs:__dpal 'byor longs spyod byin chen phob:__tshe dang bsod nams rgyas pa dang :__'dod rgu'i dngos grub stsal du gsol:__oM AHhU~M sarba rat+na d+hA ki nI sa pa ri bA ra badz+ra sa ma ya dzaH__sa ma ya hoH__sa ma ya s+t+waM:__zhes spyan drang :__hU~M:__bkra shis yid 'ong gnas mchog 'dir:__rin chen gzhal med khang chen dbus:__dam tshig ye shes dbyer med par:__phrin las mdzad phyir brtan par bzhugs:__dz+nyA na sa ma ya tiSh+Tha lhan:__zhes bzhugs su gsol:__de nas phyag mchod bstod pa 'bul ba ni:__hoH__chos kun mnyam pa nyid kyi dbyings:__ye shes sgyu ma'i skur snang ba:__rin chen mkha' 'gro'i lha tshogs la:__gus pa'i blo yis phyag 'tshal lo:__a ti pu ho:__pra tIts+tsha ho:__oM AHhU~M:__'dod 'byung mkha' 'gro'i lha tshogs la:__dgyes pa'i mchod pa 'bul ba ni:__yid 'phrog nor bu'i khang bzang cher:__nyer spyod 'dod yon sprin ltar gtibs:__lha mi'i longs spyod bsam mi khyab:__sangs rgyas byang chub sems dpa' yi:__ting 'dzin sgyu 'phrul las byung ba'i:__nam mkha' mdzod kyi mchod pa'i sprin:__mkha' khyab 'khor lor 'char ba 'di:__bde chen ye shes d+hA ki nI:__rtsa gsum nor lha'i tshogs bcas la:__rab dwangs gus pa'i yid kyis 'bul:__dgyes pa chen pos bzhes nas kyang :__dpal 'byor 'dod rgu'i dngos grub stsol:__oM AHhU~M rat+na d+hA ki nI sa pa ri bA ra badz+ra ar+g+haM pA d+yaM puSh+pe d+hU pe a lo ke gan+d+he nai bid+yA shap+da sarba pU dza ho:__hU~M:__mnyam nyid ye shes khyab gdal chen po'i dbyings:__sgyu ma'i sku snang don grub mkha' 'gro ma:__rtsa gsum nor lha 'dus pa'i dkyil 'khor lhar:__gus pas bstod do dbang bcu'i dngos grub stsol:__zhes bstod cing 'dod don gsol:__mdun gyi lha sku'i gsal snang la rtse gcig tu sems bzung :__mkha' 'gro'i dkyil 'khor dngos yin snyam du dag snang gi nga rgyal bskyed cing :__yid kyis gsol ba btab pa las sku dang sngags phreng phyag mtshan gyi tshogs dpag tu med pa mkha' khyab tu 'phros:__rtsa gsum rgyal ba rab 'byams la bde chen gyi mchod pa 'bul:__'gro ba kun gyi ser sna'i rgyu 'bras drung nas phyung ste rin chen mkha' 'gro ma'i go 'phang la bkod:__'od zer gser mdog brjid cing lhun chags pa nam mkhar sprin ltar dkrigs:__de las 'dod rgu'i longs spyod zad mi shes pa'i char chen po phab pas rang gzhan thams cad dbang bcu'i dpal 'byor la spyod par bsam mo:__de ni bskyed pa'i gsal snang la brten nas nor spel ba'i rim pa'o:___de nas bzlas pa bya ba ni:___mdun bskyed mkha' 'gro'i thugs ka ru:__rin chen zur brgyad ser po'i dbus:__riHyig gser mdog sngags kyis bskor:__'od zer gzi brjid dpal du 'bar:__bdag gi thugs nas 'od 'phros pas:__lha tshogs 'khor bcas thugs rgyud bskul:__dpag yas bde chen 'od zer dang :__las byed pho nyas 'khor 'das khyab:__srid zhi'i dpal 'byor ye shes kun:__bkra shis rdzas rtags rgyal srid bdun:__'dod 'byung rin chen sna tshogs kyi:__rnam par spyan drangs rten la thim:__'dod rgu 'byung ba'i gter du bsam:__oM AHhU~M ri rat+na d+hA ki nI sarba ba su sid+d+hi swA hA:__zhes rtse gcig tu bzla:__gzhan yang :__tad+ya thA:__oM rat+na uSh+NI ShA ya d+ha ra d+ha ra:__d+hi ri d+hi ri:__dz+nyA na sid+d+hi:__lo ka sid+d+hi:__bA su sid+d+hi nA nA kha d+he sid+d+hi:___te dzo ba su sid+d+hi:__sarba ar+tha sid+d+hi pha la puSh+tiM ku ru swA hA:__zhes las sgrub pa'i sngags kyang ci rigs par bzla'o:__thod pa'i rten yon na khyad par du byin dbab pa ni:__hU~M:__dngos grub 'byung ba'i yid bzhin nor:__'dod 'byung mtshan ldan ka pA la:__phyi ltar rin chen gzhal med khang :__nang ltar ye shes mkha' 'gro'i dal:__gsang ba mnyam pa nyid kyi dbyings:__dbyer med dgos 'dod 'byung ba'i gter:__sgrub pa'i rdzas mchog 'di lags pas:__rtsa gsum nor lha rab 'byams kyis:__rdo rje'i sku yi byin chen phob:__gzi brjid 'bar ba'i rtags mtshan phyung :__nus mthu sngags kyi byin chen phob:__yid bzhin 'dod 'jo'i cho 'phrul ston:__gnyis med dgongs pa'i byin chen phob:__ye shes mchog gi dngos grub stsol:__ma g.yel ma g.yel d+hA ki'i tshogs:__thugs rje thugs dam dus la bab:__rnal 'byor bdag la brtser dgongs nas:__sgrub pa'i las 'bras mchis par mdzod:___oM AH hU~M gu ru d+he ba ri rat+na d+hA ki nI sarba maN+Da la dz+nyA na a be sha ya hrIM hrIM pheM pheM:__rat+na ka pA la sarba sid+d+hi hU~M hU~M hU~M:__dzaHhU~M ba~M ho:__zhes spos rol dbyangs dang bcas pas byin dbab cing gzi byin bskyed la:__sngags kyi mthar:__ka pA la ma Ni rat+na sarba sid+d+hi sid+d+hi ku ru hU~M:__zhes btags pa gtso bor bzla zhing :__rat+na puN+ye sid+d+hi sid+d+hi hU~M:__d+ha na me d+hIHsid+d+hi sid+d+hi hU~M:__nA nA kha d+he sid+d+hi sid+d+hi hU~M:__d+hA na saM b+ho sid+d+hi sid+d+hi hU~M:__zhes las sgrub pa'i sngags kyang ci rigs par bzla:__de ni sngags kyi bzlas brjod la brten pa'i nor spel ba'o:__thun mthar dbyangs gsal rten snying gis nus pa brtan:__gtor ma nor bu'i dbyibs can rin chen 'bru sman dar zab kha zas bzang rgus bskor ba la bsang chus bran:__ra~M ya~M kha~M:__stong pa'i ngang las nor bu'i snod:__'od 'bar rab tu yangs pa'i nang :__gtor ma zag med bdud rtsi'i bcud:__'dod rgu'i sprin phung 'phro bar gyur:__nam mkha' mdzod kyi sngags dang phyag rgyas byin gyis brlabs nas 'bul ba ni:__hU~M:__snod kyi 'jig rten rin chen gtor gzhong du:__bcud kyi 'byor pa 'dod 'byung gtor mar bshams:__nor bu'i ba gam brjid dang ldan pa ni:__ri rab lhun po bas kyang dpangs re mtho:__mkha' 'gro'i gter ma rgyan gyis spras pa ni:__gser gyi ri bdun bas kyang brjid re che:__zag med bdud rtsi'i phud kyis bran pa ni:__rol pa'i mtsho bdun las kyang 'jings re zab:__bza' bca' btung ba'i tshogs kyis bskor ba ni:__gling bzhi gling phran las kyang bkod re legs:__dar zab sna tshogs dkor chas gtams pa ni:__lcags ri mu khyud las kyang lhun re stug:__nam mkha'i mtha' dang rgya mtsho'i gting mnyam pa'i:__'dod rgu kun 'byung gtor ma'i longs spyod che:__ro bcud nus pa kha dog phun sum tshogs:__gzugs sgra dri ro reg bya bsam mi khyab:__ting 'dzin dgongs brgyud dag pa'i rig rtsal gyis:__srid zhi'i 'byor tshogs nam mkha' mdzod kyi sgo:__gtan pa med pa'i mchod sprin chen po 'di:__rtsa brgyud bla ma'i tshogs la mchod par 'bul:__mkha' 'gro nor lha rab 'byams thugs dam bskang :__'bum phrag yangs pa'i 'khor tshogs dgyes gyur nas:__nad gdon sdig sgrib dbul phongs zhi bar mdzod:__tshe bsod dpal 'byor legs tshogs rgyas par mdzod:__snyan grags gzi brjid nus stobs che bar mdzod:__'khor 'das phywa g.yang dbang du 'du bar mdzod:__mi mthun 'gal rkyen bar chod tshar bcad nas :__mchog dang thun mong dngos grub rab 'byams kyis:__dbang bcu'i mnga' thang 'phel ba'i phrin las mdzod:__oM AHhU~M gu ru d+he ba rat+na d+ha ki nI maN+Da la sa pa ri bA ra i daM ba liM ta kha kha khA hi khA hi:___sarba karma sid+d+hi ku ru hU~M:__zhes lan mang du 'bul:__gzhan yang mchod skong gi rim pa ji ltar rigs par bya:___thugs dam skul ba ni:__rang gi thugs ka nas 'od zer 'phros:__'dun bskyed kyi lha tshogs rnams kyi thugs rgyud bskul:__dgyes pa chen po'i gzi byin mchog tu 'bar:__'od zer dang pho nya'i tshogs kyis 'khor 'das kyi khams thams cad la khyab:__srid zhi'i phywa g.yang longs spyod thams cad bkug ste bdag dang rten rdzas la thim pas 'dod rgu 'byung ba'i nus pa dang ldan par byas:__gnas khang yul 'khor thams cad 'dod rgu'i dpal gyi 'byor pa zad mi shes pas yongs su gang bar bsams la mda' dar g.yab:__spos kyi dud sprin 'thul:__dbyangs dang rol mo'i sgra snyan par sbyar te:__hU~M hrIH__rig 'dzin bla ma yi dam dkyil 'khor lha:__mkha' 'gro nor lha rab 'byams tshogs rnams kun:__rtse gcig mos pa'i gdung bas rgyud bskul na:__ye shes mchog gi thugs dam dus la bab:__hU~M:__rin chen bde gshegs mkha' 'gro rab 'byams kyis:__dbus phyogs 'khor 'das brtan g.yo'i dwangs bcud dang :__phywa g.yang longs spyod 'dod rgu'i dpal 'byor rnams:__bar snang khams kyi char bzhin gnas 'dir phob:__'chi med tshe yi phywa g.yang longs spyod khug:__rgas med stobs kyi phywa g.yang longs spyod khug:__nad med rtsal gyi phywa g.yang longs spyod khug:__bcud can zas kyi phywa=__brjid ldan gos kyi phywa=__dpal can nor gyi phywa=__bang mdzod 'bru yi=__rta phyugs rkang bzhi'i=__go mtshon dbyig gi=__rigs brgyud 'khor slob=__snyan grags nus mthu'i=__bsod nams dpal gyi=__dbang thang klung rta'i=__'dod rgu'i 'byor pa'i=__ye shes chen po'i=__phywa khug g.yang skyobs mchog thun dngos grub stsol:__hU~M:__rin chen rdo rje'i mkha' 'gro rab 'byams kyis:__shar phyogs 'khor 'das brtan g.yo'i dwangs bcud dang :__phywa g.yang longs spyod 'dod rgu'i dpal 'byor rnams:__nyi zla bzhin du gnas 'dir 'char bar mdzod:__'chi med sogs=__hU~M:__rin chen 'dod 'byung mkha' 'gro rab 'byams kyis:__lho phyogs 'khor 'das brtan g.yo'i dwangs bcud dang :__phywa g.yang longs spyod 'dod rgu'i dpal 'byor rnams:__sprin phung bzhin du gnas 'dir gtibs par mdzod:__'chi med sogs=__hU~M:__rin chen pad+ma'i mkha' 'gro rab 'byams kyis:__nub phyogs 'khor 'das brtan g.yo'i dwangs bcud dang :__phywa g.yang longs spyod 'dod rgu'i dpal 'byor rnams:__chu bo'i rgyun bzhin gnas 'dir 'du bar mdzod:__'chi med sogs=__hU~M:__rin chen las kyi mkha' 'gro rab 'byams kyis:__byang phyogs 'khor 'das brtan g.yo'i dwangs bcud dang :__phywa g.yang longs spyod 'dod rgu'i dpal 'byor rnams:__skyi ser bzhin du gnas 'dir 'dril bar mdzod:__'chi med sogs=__hU~M:__rin chen dam tshig mkha' 'gro rab 'byams kyis:__mtshams bzhi'i 'khor 'das brtan g.yo'i dwangs bcud dang :__phywa g.yang longs spyod 'dod rgu'i dpal 'byor rnams:__bar snang rlung bzhin gnas 'dir g.yo bar mdzod:__'chi med sogs=__hU~M:__rin chen pho nya'i mkha' 'gro rab 'byams kyis:__steng 'og 'khor 'das brtan g.yo'i dwangs bcud dang :__phywa g.yang longs spyod 'dod rgu'i dpal 'byor rnams:__lo tog bzhin du gnas 'dir smin par mdzod:__'chi med sogs=__hU~M hrI:__g.yang khang bkra shis pho brang nyams re dga':__g.yang rdzas 'dod rgu'i dpal 'byor brjid re che:__g.yang rten nor bu'i ba gam bkod re legs:__g.yang bshos nyi zla nor bu bkrag re che:__'jig rten snod bcud srid pa'i phywa dang g.yang :__rab 'byams dag pa'i zhing gi dpal dang stobs:__'khor 'das kun gyi bcud dang dwangs ma kun:__sgrub pa'i rdzas mchog 'di la dbyer med stims:__sgrub mchog rnal 'byor rgyud la byin chen phob:__grub pa'i rtags dang mtshan ma myur du phyungs:__'dod rgu'i dngos grub ma lus char ltar phob:__mchog thun bkra shis bde legs stsal du gsol:__zhes gyer zhing rtsa ba'i sngags dang las sgrub pa'i sngags mang du bzla:__de ltar yang yang bskyar bas gnas khang nyams dga':__sgrub rdzas byin chags:__rnal 'byor pa'i lus ngag yid gsum la bde stong gi nyams 'char ba sogs byung na tshe g.yang khug pa'i rtags su nges par byas nas rten 'brel snying po'i sngags bzla zhing me tog 'thor bas kyang brtan par bya'o:__rjes su mchod c-ing bstod la dngos grub gsol ba ni:__tshogs kyi dga' ston la longs spyad:__lhag ma btang :__mchod bstod rgyas bsdus gang rung bya:__rten rdzas thogs la:__hU~M:__bde mchog mnyam nyid ye shes dkyil 'khor nas:__gang 'dul 'dod rgu'i gar sgyur 'phrul mo che:__sgrub la dngos grub stsol ba'i thugs dam can:__rin chen mkha' 'gro rtsa gsum nor lha'i tshogs:__chos kyi dbyings nas gnas 'dir brtser dgongs la:__byin rlabs nus rtsal gzi byin bskyed du gsol:__'gyur med sku yi dngos grub lus la stsol:__'gag med gsung gi dngos grub ngag la stsol:__'khrul med thugs kyi dngos grub yid la stsol:__dbyer med ye shes dngos grub rgyud la stsol:__'chi med tshe yi dngos grub stsal du gsol:__'dzad med nor gyi dngos grub stsal du gsol:__bcud ldan zas kyi dngos grub stsal du gsol:__bkrag can gos kyi dngos grub stsal du gsol:__'khor slob rigs brgyud dngos grub stsal du gsol:__snyan grags stobs rtsal dngos grub stsal du gsol:__dpal 'byor longs spyod dngos grub stsal du gsol:__yid bzhin 'dod rgu'i=__rin chen gter kyi dngos grub=__mchog thun dngos grub ma lus deng 'dir stsol:__zhes thugs dam bskul zhing :__sngags kyi mthar:__kA ya sid+d+hi oM:__wA ka sid+d+hi AH__tsit+ta sid+d+hi hU~M:__dz+nyA na sid+d+hi hrI:__lo ka sid+d+hi AH__sarba sid+d+hi pha la hU~M hU~M:__zhes brjod cing rang gi gnas lngar reg pas mchog thun gyi dngos grub ma lus pa thob:__ye shes kyi mkha' 'gro ma dang skal ba mnyam par byas:__dngos grub kyi rdzas la rol pas kyang 'dod rgu'i nus pa'i gzi byin gong nas gong du 'phel zhing brtan par bsam mo:__de rnams ni phywa'i phrin las la brten nas g.yang spel ba'i rim pa'o:__de nas slar yang mchod cing bstod:__nongs pa bshags:__ye shes pa brtan par bzhugs:__bdag nyid lhar gsal ba chos kyi dbyings su bsdu zhing thun mtshams kyi lhar ldang :__bsngo smon bkra shis rgyas par bya'o:__de lta bu'i tshul gyis rtse gcig tu brtson pas dngos su zas nor longs spyod 'du ba dang :__nyams kyi snang char bud med dang skye bo'i tshogs mang pos bdag nyid la 'dud bstod byed pa:__longs spyod 'bul ba:__rmi lam du nyi zla shar ba:__char bzang po 'babs pa:__rtsi shing lo tog chu bo rgyas pa sogs byung na grub pa'i rtags su shes par byas nas dngos grub blangs bas tshe ring ba dang :__nad med pa dang :__dpal 'byor longs spyod rgyas pa dang :__'dod rgu'i bsam pa 'grub pa dang :__mthar thug bde chen gyi ye shes 'phel bas mchog gi dngos grub thob par 'gyur ro:__sgrub rdzas rnams mdzod kyi phug tu bkur sti dang bcas te bzhag:__zas gos nor sna'i phud kyis mchod:__mi la mi smra bar skabs su sgrub pa bskyar:__sgrub rdzas dman pa rnams kyang nang 'khor kho nas longs spyod pa ma gtogs phyir mi gtong ba dam tshig yin no:__de ltar na de rnams ni phyi rten dang bskyed bzlas kyis thun mong gi nor spel ba'i gdams pa'o:__sa ma ya:__gnyis pa nang rlung gi lcags kyus khyad par gyi nor dgug pa ni:__rnal 'byor dang ldan pas lus gnad bsrang :__rlung ro bsal:__dga' zhing dang ba'i bsam pas rang skad cig gis rin chen mkha' 'gro mar bskyed:__rtsa'i stong ra gsal gdab:__rtsa khams thams cad dpa' bo mkha' 'gro'i rang bzhin du bsam:__khyad par lte 'og rtsa gsum sbubs gcig pa'i dbus rin chen zur brgyad kyi lte bar gtum mo'i me dang dbyer med pa'i las byed kyi d+hA ki dmar ser rin po che'i lcags kyu dang nor bu'i thod pa bsnams pa bde drod kyi gzi byin nyi ma ltar 'bar bar bsam:__thugs ka nas 'od zer lcags kyu lta bu ro ma'i rlung dang lhan cig phyir song :__'khor 'das brtan g.yo'i khams thams cad la khyab:__srid zhi'i phywa g.yang longs spyod kyi dpal dang bcud kyi dwangs ma thams cad 'od ser po'i rnam par bsdus:__sna g.yon nas rkyang ma'i lam brgyud:__lte ba'i mkha' 'gro ma la thim pas gzi brjid lhag par rgyas:__bde chen gyi nyams 'bar bar bsams la bum can kha sbyor du bzung :__de lta bu lan grangs mang du bya:__mthar las kyi pho nya las gtum mo'i me chos bzhi ldan du 'bar:__dbu ma'i nang nas thal gyis song :__'khor lo bzhi'i lha tshogs rnams mchod:__bde drod kyi ye shes bskul :__spyi bo'i ha~M la reg pas bdud rtsi pad+ma'i snal ma lta bu nar gyis 'babs:__'khor lo bzhi gang :__gnas skabs bzhi'i bag chags dag:__khyad par des bskyed pa'i nyon mongs pa ser sna'i rgyu dang dbul ba'i 'bras bu'i nyer len lhag med du sbyangs:__ye shes bzhi'i dngos grub thob par bsam:__so sor bum can gyis brtan:__de ltar nyams su blangs pa'i mthar srid zhi'i dwangs bcud lte ba'i mkha' 'gro mar 'dus:__de gdan dang bcas pa thig le ser por gyur:__yar byung snying ga'i sa bon riHyig dang dbyer med du 'dres:__de nyid kyang rang rig pa'i klong du thim pas rang nyid ye shes kyi mkha' 'gro rat+na d+hA ki nI dang dbyer med pa'i go 'phang brnyes par bsams la 'jam rlung bzung zhing :__stong gsal mnyam pa nyid kyi ngang du mnyam par bzhag go:__de lta bu rtse gcig tu nyams su blangs pas gnas skabs lus gzi brjid ldan:__ngag nus pa 'bar:__yid rtogs pa thob pas snang ba dbang du 'dus pa'i rten 'brel la brten nas 'dod rgu'i 'byor pa char bzhin du 'babs:__bsam don thams cad 'grub:__tshe ring :__nad nyung :__gang du gnas par bkra shis shing byin chags pa sogs phan yon bsam gyis mi khyab:__mthar thug ye shes dri ma med pa mngon du 'gyur ba yin no:__de ni nang rlung gi lcags kyus khyad par gyi nor dgug pa'i rim pa zab mo'o:__sa ma ya:__gsum pa gsang ba dgongs pa mi 'gyur ba'i ye shes kyis don gyi 'dod rgu smin par byed pa ni:__bskyed bzlas rlung gi rnal 'byor la ci rigs par goms pa'am:__dbang po rnon po gcig car ba'i rigs can rnams kyis 'di ltar nyams su blangs te:__dus dang rgyun gyi skabs rnams su lus bsrang zhing khong klod :__rlung 'gro 'ong rang babs su bzhag:__sems dus gsum gyi spros pa bcad:__phyi rol pa'i snang ba 'khor ba dang mya ngan las 'das pa'i phywa g.yang longs spyod dwangs bcud dge mtshan du btags pa thams cad rang gi sems kyi snang cha rten 'brel gyi rol par thag bcad:__sems 'das pa'i rtog pa 'gags:__ma 'ongs pa ma skyes:__da lta'i shes pa skad cig ma dus gsum mnyam nyid:__srid zhi mnyam nyid:__spros pa'i mtha' thams cad mnyam pa nyid du nges shes bskyed:__de'i ngang bskyang :__bar rlung thad kar bzung :__rlung sems rig pa dril te ka dag zang thal rjen par bskyang ba la brtan pa thob pas snang pas shes pa ma bslus pas snang ba dbang du 'dus:__shes pas rig pa ma bslad pas rig pa rang so zin:__rig gdangs rlung sems dang 'dres pas rlung rig dwangs mar smin:__dwangs ma ye shes su shar bas 'khor 'das brtan g.yo kun la dbang bsgyur bas nam mkha' mdzod kyi ting nge 'dzin mngon du 'gyur ba yin no:__de ni gsang ba dgongs pa mi 'gyur ba'i gzer gyis don gyi 'dod rgu smin par byed pa'i rim pa mthar thug pa'o:__sa ma ya:__zhar byung dngos grub blang ba'am:__slob ma la dbang bskur na maN+Dal phul:__rnal 'byor ma dang dbyer med pa'i:__rdo rje slob dpon dgongs su gsol:__bdag la rin chen mkha' 'gro ma'i:__dngos grub mchog gi dbang bskur stsol:__zhes lan gsum gyis gsol ba gdab:__rgyud sbyang :__ye shes dbab brtan bya:__thugs dam bskul:__gtor ma rin chen mkha' 'gro ma rtsa gsum nor lha rab 'byams mkha' 'gro 'bum gyis bskor ba mngon sum du gsal ba spyi bor byon:__bde ba chen po'i gzi brjid 'bar:__ye shes kyi 'od zer mkha' khyab tu 'phros:__'khor 'das brtan g.yo'i phywa g.yang longs spyod dwangs bcud thams cad char bzhin du babs nas 'dod rgu'i 'byor ba zad mi shes pa la dbang bsgyur bar bsams la gtor ma spyi bor bzhag:__oM gtor snod rin chen gzhal med khang :__gtor ma lha yi ngo bor bzhugs:__skal ldan bu la dbang bskur bas:__'dod dgu'i dpal 'byor rgyas par shog:__oM AHhU~M ri rat+na d+hA ki nI sarba ba su sid+d+hi swA hA:__kA ya sid+d+hi a b+hi Shiny+tsa oM:__mthar gtor ma'i lha 'od du zhu nas dbyer med du thim pas rin chen mkha' 'gro ma 'khor dang bcas pa'i ye shes rgyud la zhugs par bsam:__bdud rtsi'i snod thogs la:__srid zhi'i dwangs bcud bdud rtsi'i rgyun mgrin par bzhag cing myangs bas rtsa khams thams cad gang :__nyon mongs pa'i rtog pa 'gags:___rlung sems la dbang bsgyur bas 'khor 'das bde chen gyi thig ler dag par bsam:__AH__rtsa rlung thig le'i snod mchog tu:__srid zhi'i dwangs bcud thig ler 'khyil:__skal ldan bu la dbang bskur bas:__bde chen 'dod rgu rgyas par shog:__wA ka sid+d+hi a b+hi Shiny+tsa AH__zhes brjod cing bdud rtsi spyin:__thod pa'i rten snying gar bzhag la:__dbyings rig mtshon pa'i thod pa snod bcud yongs rdzogs rin chen mkha' 'gro ma'i rang bzhin du bzhugs pa snying gar bzhag pas mnyam nyid khyab gdal chen po'i rtogs pa bskyed cing :__nam mkha' mdzod kyi ting nge 'dzin la dbang bsgyur bar bsams la:__hU~M:__mnyam nyid khyab gdal ka pA lar:__ye shes chen po'i bcud kyis gtams:__skal ldan bu la dbang bskur bas:__rig rtsal ting 'dzin rgyas par shog:__tsit+ta a b+hi Shiny+tsa hU~M:__zhes brjod:__mthar me tog 'thor ba dang bcas:__oM:__rtsa gsum nor lha rab 'byams bden stobs kyis:__'khor 'das phywa g.yang 'dod rgu'i dpal 'byor rgyas:__rlung sems dbang 'dus dgongs pa'i rtsal chen rdzogs:__bsam don lhun gyis grub pa'i bkra shis shog:__ces dang rten 'brel snying pos brtan par bya'o:__dngos grub dang tshogs kyi dga' ston la longs spyad do:__de ltar byas pas ye shes mkha' 'gro ma'i byin rlabs zhugs:__'jig rten gyi mkha' 'gro ma rnams dbang du 'du:__las kyi mkha' 'gro ma rnams kyis bka' nyan cing gnas skabs su 'dod rgu'i dpal 'byor rgyas:__ci bsam 'grub:__mthar thug pho nyas grogs mdzad de bde chen gyi sku 'grub par 'gyur ro:__sa ma ya:__mkha' 'gro 'dus pa'i nor sgrub kyi man ngag gzhan las khyad par du 'phags pa o rgyan bdag gis rgyud dang man ngag las btus te rdo rje'i gzungs ma mkhar chen bza' la gdams:__ma 'ongs phyi ma phyi ma'i don du gtad pa stsaugs stsaugs stsaugs:__sa ma ya:__rgya rgya rgya:__gter rgya:__sbas rgya:__zab rgya:__gu h+ya sa ma ya:__ye shes kyi mkha' 'gro jo mo sman mo'i zab chos sprul pa'i gter chen pad+ma 'od gsal mdo sngags gling pa la yang gter du bka' babs te gtan la phab pa'i yi ge pa ni pad+ma gar dbang blo gros mtha' yas kyis gus pas bgyis pa dge legs 'phel//___//