རྗེ་བཙུན་དམ་པ་སངས་རྒྱས་ཀྱི་བླ་མའི་རྣལ་འབྱོར་བྱིན་རླབས་སྤྲིན་མཛེས།

🚧 This website is under continued development. We appreciate your patience!

Previous Text Back to Volume PageNext Text

Wylie title	rje btsun dam pa sangs rgyas kyi bla ma'i rnal 'byor byin rlabs sprin mdzes
Location	dil mgo mkhyen brtse bka' 'bum Volume 2, Text 33, Pages 158-161 (Folios 1a1 to 4b2)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Associated People	ཕ་དམ་པ་སངས་རྒྱས་ (pha dam pa sangs rgyas)
Citation	Khyentse, Dilgo. Rje btsun dam pa sangs rgyas kyi bla ma'i rnal 'byor byin rlabs sprin mdzes. In Skyabs rje dil mgo mkhyen brtse rin po che'i bka' 'bum, Vol. 2: 158-161. Delhi: Shechen Publications, 1994.
Genre	Guru Yoga Texts - bla ma'i rnal 'byor
Colophon	།ཞེས་མེ་སྦྲུལ་དབོ་ཟླའི་ཚེས་སྐོར་ཐུབ་བསྟན་ཆོས་གླིང་དུ་གདམས་མཛོད་སྤྲུལ་པའི་གླེགས་བམ་གྱི་སྨིན་གྲོལ་འབོག་པའི་ཚེ་སྐྱབས་རྗེའི་ཞལ་སློབ་བསླབ་ལྡན་དགེ་སློང་ངག་དབང་ཚུལ་ཁྲིམས་རྒྱལ་མཚན་ནས་བསྐུལ་བ་བཞིན་གྲུབ་པ་མཆོག་གི་དེད་དཔོན་ཆེན་པོའི་རྡོ་རྗེའི་གསུང་བཞིན་མངྒ་ལ་ཤྲཱི་བྷཱུ་ཏིས་ཤོད་རོང་རི་ཁྲོད་ཐུབ་བསྟན་ཆོས་གླིང་ནས་བྲིས་པ་ཆོས་ཉིད་ཟབ་མོའི་རྟོགས་པ་རྒྱུད་ལ་སྐྱེ་བའི་རྒྱུར་གྱུར་ཅིག
	/zhes me sbrul dbo zla'i tshes skor thub bstan chos gling du gdams mdzod sprul pa'i glegs bam gyi smin grol 'bog pa'i tshe skyabs rje'i zhal slob bslab ldan dge slong ngag dbang tshul khrims rgyal mtshan nas bskul ba bzhin grub pa mchog gi ded dpon chen po'i rdo rje'i gsung bzhin mang+ga la shrI b+hU tis shod rong ri khrod thub bstan chos gling nas bris pa chos nyid zab mo'i rtogs pa rgyud la skye ba'i rgyur gyur cig

Tibetan Text

Wylie

[edit]

༄༅། རྗེ་བཙུན་དམ་པ་སངས་རྒྱས་ཀྱི་བླ་མའི་རྣལ་འབྱོར་བྱིན་རླབས་སྤྲིན་མཛེས་བཞུགས། ན་མོ་གུ་ར་ཝེ། རྗེ་བཙུན་དམ་པ་སངས་རྒྱས་ཀྱི་བླ་མའི་རྣལ་འབྱོར་ཉམས་ལེན་བྱ་བར་འདོད་པས། ཐོག་མར་སྐྱབས་སེམས་ནི། འགྲོ་རྣམས་བསྒྲལ་འདོད་བསམ་པ་ཡིས། །སངས་རྒྱས་ཆོས་དང་དགེ་འདུན་ལ། །བྱང་ཆུབ་སྙིང་པོར་མཆིས་ཀྱི་བར། །རྟག་པར་བདག་ནི་སྐྱབས་སུ་མཆི། །ལན་གསུམ། ཤེས་རབ་སྙིང་བརྩེ་དང་བཅས་པས། །བརྩོན་པས་སེམས་ཅན་དོན་དུ་བདག །སངས་རྒྱས་མདུན་དུ་གནས་བགྱིས་ནས། །བྱང་ཆུབ་མཆོག་ཏུ་སེམས་བསྐྱེད་བགྱི། ལན་གསུམ་བྱ། བླ་མ་མཆོད་པ་དགོས་ན་གནས་ཁང་དང་མཆོད་རྫས་བྱིན་རླབས་བྱ། བླ་མའི་རྣལ་འབྱོར་ཁོ་ནའི་སྐབས་མི་དགོས། གཉིས་པ་དངོས་གཞི་ནི། ཨོཾ་མ་ཧཱ་ཤཱུ་ནྱ་ཏ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། སྣོད་བཅུད་ཀྱི་ཆོས་ཐམས་ཅད་མི་དམིགས་པ་སྟོང་པའི་རང་རྩལ་སྣོད་བཅུད་དག་པ་ཆེན་པོའི་འོག་མིན་སྟུག་པོ་བཀོད་པའི་ཞིང་གི་དབུས་སུ་ཐར་པ་ཆེན་པོའི་གཞལ་མེད་ཁང་ཕུན་སུམ་ཚོགས་པའི་དབུས་སུ་པད་ཉི་རོ་ཡི་གདན་ལ་གཞི་ལུས་ཨོཾ་ལས་རྗེ་བཙུན་རྡོ་རྗེ་བདག་མེད་མ་སྐུ་མདོག་ནག་མོ་ཞལ་གཅིག་ཕྱག་གཉིས་མ་སྤྱན་གསུམ་མཆེ་བའི་མྱུ་གུ་གཙིགས་ཤིང་ཁྲོ་འཛུམ་བཞད་ཉམས་ཅན། དབུ་སྐྲ་སེར་པོ་གྱེན་དུ་བརྫེས་པ། གཡས་གྲི་གུག་འཕྱར་ཞིང་གཡོན་ཐོད་ཁྲག་ཐུགས་ཀར་བརྟེན་པ། གཅེར་བུ་ཕྱག་རྒྱ་ལྔ་དང་ཐོད་སྐམ་གྱི་ཕྲེང་བ་སོགས་ལྷ་མོའི་ཆ་བྱད་ཅན། གཡས་བསྐུམ་གཡོན་བརྐྱང་གིས་མེ་ཕུང་གི་དབུས་ན་བཞུགས་པའི་མདུན་དུ་རབ་འབྱམས་མཆོད་པའི་སྤྲིན་ཕུང་འཁྲིགས་པའི་དབུས་སུ་མི་འཇིགས་སེངྒེས་བཏེགས་པའི་རིན་པོ་ཆེའི་ཁྲི་སྟེང་དུ་མ་ཆགས་པདྨའི་གདན། ཐུགས་རྗེ་ཉི་ཟླའི་གདན། བྱང་སེམས་ཀྲྀ་ཎ་ས་རའི་པགས་པའི་སྟེང་དུ་རང་གི་རྩ་བའི་བླ་མ་དང་དབྱེར་མེད་པའི་རྗེ་བཙུན་དམ་པ་རྒྱ་གར་པ་སྐུ་མདོག་སྨུག་ལ་དམར་བའི་མདངས་ཆགས་པ། སྤྱན་དམར་པོ་སྐྲའི་ལྭ་བ་ཅན། གཅེར་བུ་མཆོག་ཏུ་འབར་བའི་གཟི་བྱིན་ཅན། སྐུ་སྨད་དུ་བལ་ཐུལ་དཀར་པོ་དང༌། རས་ཀྱི་ཨང་རག་གསོལ་ཞིང་རུས་པའི་རྒྱན་གྱིས་བརྒྱན་པ། ཕྱག་གཡས་སྐྱབས་སྦྱིན་དང༌། གཡོན་རྟེན་འབྲེལ་གྱི་པར་བུ་ཐུགས་ཀར་འཛིན་པ། འཁོར་འདས་ཟིལ་གྱིས་གནོན་པའི་ལྟ་སྟངས་མཛད་པ། གང་འདུལ་སྐུ་གསུམ་གྱི་རོལ་པ་མ་འགག་པར་སྟོན་པ་སྒྱུ་མའི་སྐུ་ཅན་དུ་གསལ་བའི་མདུན་དུ་ས་ར་ཧ་སོགས་ཕྱག་ཆེན་བརྡ་ཡི་བླ་མ་བཅུ་གཅིག །གཡས་སུ་སངས་རྒྱས་གསང་བ་སོགས་ཕ་རྒྱུད་གཡོ་བ་རླུང་གི་བླ་མ་བཅུ་གཅིག །གཡོན་དུ་མཚོ་སྐྱེས་རྡོ་རྗེ་སོགས་མ་རྒྱུད་བདེ་བ་ཉམས་ཀྱི་བླ་མ་བཅུ་གཅིག །རྒྱབ་ཏུ་ཀླུ་སྒྲུབ་སྙིང་པོ་སོགས་མཚན་ཉིད་སྒྲ་རིག་གི་བླ་མ་བཅུ་གཅིག །མཚམས་རྣམས་སུ་མཁའ་འགྲོ་མ་སུ་ཁ་སིདྡྷི་སོགས་རིག་པ་ངོ་སྤྲོད་ཀྱི་བླ་མ་བཅུ། སྟེང་དུ་ངོ་མཚར་མཁའ་སྤྱོད་ཀྱི་བླ་མ་སུམ་ཅུ་རྩ་དྲུག །དེའི་སྟེང་དུ་བྱིན་རླབས་མཁའ་འགྲོའི་བླ་མ་ཉེར་བཞི། དེའི་སྟེང་ཐུགས་དམ་བདེ་གཤེགས་བཅུ་གཉིས་ཀྱི་བླ་མ། དེའི་སྟེང་དུ་སངས་རྒྱས་སྐུ་བཞིའི་བླ་མ་བཞུགས་པ། དམ་པ་རིན་པོ་ཆེའི་མདུན་ཕྱོགས་སུ་མ་གཅིག་ལབ་ཀྱི་སྒྲོན་མ། མཐའ་སྐོར་དུ་དམ་པ་ཕྱར་ཆེན། བཛྲ་ཀྲོ་དྷ། དམ་པ་ཕྱར་ཆུང༌། བྱང་སེམས་ཀུན་དགའ། ཁ་ཆེ་གུ་ཧྱ་ཛྙཱ་ན། རྨ་ཆོས་ཀྱི་ཤེས་རབ། སོ་དགེ་འདུན་འབར། སྐམ་ཡེ་ཤེས་རྒྱལ་མཚན། པ་ཚབ་སྒོམ་པ། རྒྱལ་བ་ཏེ་ནེ། རོག་ཤེས་རབ་འོད། ཞིག་པོ་ཉི་སེང༌། སྙེ་མདོ་སྨྲ་བའི་སེང་གེ་སོགས་ཞི་བྱེད་སྔ་ཕྱི་བར་གསུམ་གྱི་བརྒྱུད་པའི་བླ་མ་རྣམས་དང༌། སྲས་རྒྱལ་བ་དོན་འགྲུབ། ཐོད་སྨྱོན་བསམ་འགྲུབ། ཁུ་སྒོམ་ཆོས་སེང་སོགས་ཟབ་མོ་བདུད་ཀྱི་གཅོད་ཡུལ་གྱི་བཀའ་བབས་བུ་ཆེན་བཅུ་དྲུག་དང༌། ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ། ཡེ་ཤེས་ཀྱི་མགོན་པོ་ཨ་གྷོ་ར་སོགས་དམ་ཅན་ཆོས་སྐྱོང་བཅས་སྤྲིན་གཏིབས་པ་ལྟར་བྱིན་ཐིབས་སེ་བཞུགས་པར་མོས་ལ། ཧོ། ངོ་བོ་ཆོས་སྐུའི་བླ་མ་རོ་གཅིག་ཀྱང༌། །གང་འདུལ་དེར་སྟོན་སྣ་ཚོགས་རོལ་པའི་གཟུགས། །སངས་རྒྱས་སྲས་བཅས་མཁའ་འགྲོ་ཆོས་སྐྱོང་ཚོགས། །ཆོ་འཕྲུལ་དུ་མས་རོལ་ཅིང་གཤེགས་སུ་གསོལ། །ཨོཾ་གུ་རུ་ཀ་མ་ལ་ཤཱི་ལ་དེ་བ་ཌཱ་ཀི་ནཱི་ས་པ་རི་ཝ་ར་ཨེ་ཧྱེ་ཧི། ས་མ་ཡ་ཧོ། ས་མ་ཡ་སྟྭཾ། ཛཿཧཱུྃ་བཾ་ཧོཿས་སྤྱན་དྲངས་པ་ཚོགས་རྟེན་དང་དབྱེར་མེད་དུ་བཞུགས་པར་མོས། བསགས་སྦྱང་ནི་བླ་མ་མཆོད་པ་གཙོར་བཏོན་པའི་སྐབས་ཕྱག་འཚལ་དང༌། མཆོད་བཤགས་སོགས་ཡན་ལག་བདུན་པ་རྣམས་ཚིག་ཚོགས་རྒྱས་པར་སྤྲོ་ན་ཞི་གཅོད་ཀྱི་བླ་མཆོད་བཀྲ་ཤིས་གྲགས་པའི་སྙིང་པོ་ལྟར་སྦྱར་ན་ལེགས་ཤིང༌། དཀྱུས་ཙམ་དུ། དམིགས་བཅས་དམིགས་མེད་གཉིས་སུ་མེད་པ་ཡི། །རང་རིག་བླ་མའི་སྐུ་ལ་ཕྱག་འཚལ་ལོ། །མཆོད་བྱ་མཆོད་བྱེད་དབྱེར་མེད་ཟུང་འཇུག་དངོས། །རྣམ་དག་ཆོས་ཀྱི་སྐུ་ལ་མཆོད་པ་འབུལ། །ཉོན་མོངས་ཡེ་ཤེས་བླང་དོར་མེད་པ་ཡི། རིག་པ་དྲི་མེད་ངང་དུ་སྡིག་ཀུན་བཤགས། །ཡེ་ནས་སངས་རྒྱས་བློ་ཡིས་མ་བཅོས་པ། །བཅིངས་གྲོལ་མེད་པར་སྐྱོང་ལ་ཡི་རང་ངོ༌། །སེམས་ཉིད་གདོད་ནས་དག་པ་ཆོས་སྐུའི་ཀློང༌། །རྩོལ་མེད་ཡང་དག་དྲན་པའི་ཆོས་འཁོར་བསྐོར། །བདེ་སྡུག་ལ་སོགས་རྐྱེན་དང་འཕྲད་པའི་ཚེ། །སྒོམ་པ་མྱ་ངན་མི་འདའ་བཞུགས་སུ་གསོལ། །དགེ་བ་འཁོར་གསུམ་དམིགས་མེད་དག་པ་ཡིས། །མཚན་འཛིན་མེད་པར་བྱང་ཆུབ་ཆེན་པོར་བསྔོ། །བྱ་བྱེད་མེད་པར་བྱ་བ་ཀུན་རྫོགས་པའི། །ཆོས་ཉིད་སྤྲོས་བྲལ་རྒྱུན་དུ་སྐྱོང་བར་ཤོག །ལན་གསུམ་སོགས་བྱ། གསོལ་འདེབས་གང་འོས་དང༌། འཇམ་དཔལ་སྨྲ་བའི་སེང་གེས་བྱིན་བརླབས་ཤིང༌། །ཨཱ་ལི་ཀཱ་ལིའི་སྒྲ་དོན་རྟོགས་པ་ཡིས། །མདོ་རྒྱུད་ཀུན་གྱི་དགོངས་པ་ཐུགས་ལ་ཤར། །བརྒྱུད་པའི་གདམས་པ་མ་ལུས་འཛིན་མཛད་པའི། །ཀ་མ་ཤཱི་ལའི་ཞབས་ལ་གསོལ་བ་འདེབས། ཞེས་ཞལ་གསུང་གསོལ་འདེབས་དང༌། ཨོཾ་ཨཱཿཧཱུྃ་ཧྲཱིཿགུ་རུ་ཀ་མ་ལ་ཤཱི་ལ་དྷརྨ་སཏྟ་བྷོ་ནིརྨ་ཀཱ་ཡ་སིདྡྷི་ཛྙཱ་ན་ཨ་བཻ་ཤ་ཡ་ཧྲཱིཾ་བྃ་སྭཱ་ཧཱ། ཞེས་མཚན་སྔགས་རེ་ལྟོས་ལིང་སྐྱུར་གྱིས་མོས་གུས་དྲག་པོས་ཅི་ནུས་བཟླ། ཚོགས་མཆོད་བྱེད་པར་འདོད་ན། ཚོགས་རྫས་རྣམས་བསངས་སྦྱངས། སྟོང་པའི་ངང་ལས་ཨ་ལས་ཀ་པཱ་ལའི་སྣོད་དུ་ཨོཾ་ལས་ཤ་ལྔ་དང་བཟའ་བཅའ་བཏུང་བའི་བྱེ་བྲག་རྣམས་ཞུ་ཞིང་འདྲེས་པའི་ཚོགས་རྫས་ཀྱིས་གང་བ་ལ་ཡེ་ཤེས་ཀྱི་བདུད་རྩི་བཀུག་སྟེ་བསྟིམས་པས་ཚོགས་མཆོད་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ། མང་དུ་བརྗོད། ཚོགས་ཞིང་རྣམས་བཛྲ་ས་མ་ཡ་ཛཿས་སྤྱན་དྲངས། ཕྱོགས་བཅུ་དུས་གསུམ་གྱི་བླ་མ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ངོ་བོར་གྱུར་པ་རྩ་བརྒྱུད་ཀྱི་བླ་མ་དམ་པ་རྣམས་ཀྱི་ཞལ་དུ་ག་ཎ་ཙཀྲ་པཱུ་ཛ་ཁཱ་ཧི། བཅོམ་ལྡན་འདས་རྡོ་རྗེ་བདག་མེད་མ་དང་ཐུགས་དམ་བདེ་གཤེགས་བཅུ་གཉིས་སོགས་ཡི་དམ་དཀྱིལ་འཁོར་གྱི་ལྷ་ཚོགས་རྣམས་ཀྱི་ཞལ་དུ་ག་ཎ་ཙཀྲ་པཱུ་ཛ་ཁཱ་ཧི། ཡེ་ཤེས་ཀྱི་མགོན་པོ་ཨ་གྷོ་ར་སོགས་ནག་པོ་ཆེན་པོ་ལྕམ་དྲལ་འཁོར་དང་བཅས་པའི་ཞལ་དུ་ག་ཎ་ཙཀྲ་པཱུ་ཛ་ཁཱ་ཧི། མཁའ་འགྲོ་སྡེ་བཞི་ཞིང་སྐྱོང་ཀུན་ཏུ་རི་ཀ་སོགས་སྲུང་མ་ཐུགས་དམ་ཅན་རྣམས་ཀྱི་ཞལ་དུ་ག་ཎ་ཙཀྲ་པཱུ་ཛ་ཁཱ་ཧི། རིགས་དྲུག་གི་སེམས་ཅན་དཀྱིལ་འཁོར་འཁོར་ལོའི་ངོ་བོར་རྣམ་པར་དག་པ་རྣམས་ཀྱི་ཞལ་དུ་ག་ཎ་ཙཀྲ་པཱུ་ཛ་ཁཱ་ཧི། ཚོགས་ཕུད་ཕུལ། བར་པ་དམ་ཚིག་གི་རྫས་ལ་ལོངས་སྤྱོད། ལྷག་མ་རྣམས་བསྡུས་ཏེ། ཨོཾ་ཨུཙྪིཥཊ་བ་ལིཾ་ཏ་ཁཱ་ཧིས་བསྔོ། ཨོཾ་ཨཱཿཧཱུྃ་ཧྲཱིཿགུ་རུ་སིདྡྷི་ཧཱུྃ། ཞེས་སྔགས་བཟླས་པས་གསོལ་བ་བཏབ་པས། བླ་མ་དམ་པ་རིན་པོ་ཆེ་ལ་འཁོར་རྣམས་ཐིམ། སྐུ་གཟི་བྱིན་རྒྱས་པས་སྤྱི་བོར་བྱོན། གནས་བཞི་ལས་ཚད་མེད་པའི་ཐུགས་རྗེ་དང་བྱིན་རླབས་ཆེན་པོས་འོད་ཟེར་དཀར་དམར་མཐིང་ག་སྣ་ཚོགས་པའི་རྣམ་པར་བྱུང་སྟེ་རང་གི་གནས་བཞིར་ཆུ་ལ་ཆུ་བཞག་པ་ལྟར་ཐིམ་པས་སྒོ་གསུམ་ཆ་མཉམ་དང་བཅས་པའི་སྒྲིབ་པ་དག །སྐུ་གསུང་ཐུགས་སྣང་སྟོང་གྲགས་སྟོང་དྲན་སྟོང་གཉིས་སུ་མེད་པའི་བྱིན་རླབས་ཞུགས་ནས་ཉམས་དང་རྟོགས་པ་འུ་རུ་རུ་འབར། མཐར་བླ་མ་སངས་རྒྱས་འོད་དུ་ཞུ་ནས་རང་ལ་ཐིམ་པས་བླ་མའི་རྡོ་རྗེ་གསུམ་དང་རང་གི་ལུས་ངག་ཡིད་གསུམ་དབྱེར་མི་ཕྱེད་པར་གྱུར་པར་མོས་ལ་མཉམ་པར་བཞག །ཐུན་ལས་ལྡང་བ་ན་སྨོན་ལམ་ནི། ན་མོ། བདག་དང་བདག་གི་རིགས་བདག་ལ་སོགས་པ། །མཐའ་ཡས་རྒྱུད་ཀྱིས་བསྡུས་པའི་འགྲོ་བ་རྣམས། །འདི་ནས་ཚེ་འཕོས་རིན་ཆེན་ཅན་གྱི་ཞིང༌། །བྱང་སེམས་སྨོན་ལམ་གྲུབ་པས་དཀྲིགས་པ་དེར། །རྒྱན་གྱི་འཁོར་ལོ་ཕོ་བྲང་རྣམ་མཛེས་པ། །ཡོངས་དག་གཞལ་མེད་ཁང་དུ་སྐྱེ་བར་ཤོག །ཅེས་སྨོན་ལམ་རྡོ་རྗེའི་ཚིག་དྲུག་མས་རྒྱས་འདེབས་པར་བྱའོ། །ཞེས་མེ་སྦྲུལ་དབོ་ཟླའི་ཚེས་སྐོར་ཐུབ་བསྟན་ཆོས་གླིང་དུ་གདམས་མཛོད་སྤྲུལ་པའི་གླེགས་བམ་གྱི་སྨིན་གྲོལ་འབོག་པའི་ཚེ་སྐྱབས་རྗེའི་ཞལ་སློབ་བསླབ་ལྡན་དགེ་སློང་ངག་དབང་ཚུལ་ཁྲིམས་རྒྱལ་མཚན་ནས་བསྐུལ་བ་བཞིན་གྲུབ་པ་མཆོག་གི་དེད་དཔོན་ཆེན་པོའི་རྡོ་རྗེའི་གསུང་བཞིན་མངྒ་ལ་ཤྲཱི་བྷཱུ་ཏིས་ཤོད་རོང་རི་ཁྲོད་ཐུབ་བསྟན་ཆོས་གླིང་ནས་བྲིས་པ་ཆོས་ཉིད་ཟབ་མོའི་རྟོགས་པ་རྒྱུད་ལ་སྐྱེ་བའི་རྒྱུར་གྱུར་ཅིག །། །།

[edit]

@#/____rje btsun dam pa sangs rgyas kyi bla ma'i rnal 'byor byin rlabs sprin mdzes bzhugs/__na mo gu ra we/__rje btsun dam pa sangs rgyas kyi bla ma'i rnal 'byor nyams len bya bar 'dod pas/__thog mar skyabs sems ni/__'gro rnams bsgral 'dod bsam pa yis/__/sangs rgyas chos dang dge 'dun la/__/byang chub snying por mchis kyi bar/__/rtag par bdag ni skyabs su mchi/__/lan gsum/__shes rab snying brtse dang bcas pas/__/brtson pas sems can don du bdag__/sangs rgyas mdun du gnas bgyis nas/__/byang chub mchog tu sems bskyed bgyi/__lan gsum bya/__bla ma mchod pa dgos na gnas khang dang mchod rdzas byin rlabs bya/__bla ma'i rnal 'byor kho na'i skabs mi dgos/__gnyis pa dngos gzhi ni/__oM ma hA shU n+ya ta dz+nyA na badz+ra swa b+hA wa at+ma ko\u0f85 haM/__snod bcud kyi chos thams cad mi dmigs pa stong pa'i rang rtsal snod bcud dag pa chen po'i 'og min stug po bkod pa'i zhing gi dbus su thar pa chen po'i gzhal med khang phun sum tshogs pa'i dbus su pad nyi ro yi gdan la gzhi lus oM las rje btsun rdo rje bdag med ma sku mdog nag mo zhal gcig phyag gnyis ma spyan gsum mche ba'i myu gu gtsigs shing khro 'dzum bzhad nyams can/__dbu skra ser po gyen du brdzes pa/__g.yas gri gug 'phyar zhing g.yon thod khrag thugs kar brten pa/__gcer bu phyag rgya lnga dang thod skam gyi phreng ba sogs lha mo'i cha byad can/__g.yas bskum g.yon brkyang gis me phung gi dbus na bzhugs pa'i mdun du rab 'byams mchod pa'i sprin phung 'khrigs pa'i dbus su mi 'jigs seng+ges btegs pa'i rin po che'i khri steng du ma chags pad+ma'i gdan/__thugs rje nyi zla'i gdan/__byang sems kr-i Na sa ra'i pags pa'i steng du rang gi rtsa ba'i bla ma dang dbyer med pa'i rje btsun dam pa rgya gar pa sku mdog smug la dmar ba'i mdangs chags pa/__spyan dmar po skra'i l+wa ba can/__gcer bu mchog tu 'bar ba'i gzi byin can/__sku smad du bal thul dkar po dang*/__ras kyi ang rag gsol zhing rus pa'i rgyan gyis brgyan pa/__phyag g.yas skyabs sbyin dang*/__g.yon rten 'brel gyi par bu thugs kar 'dzin pa/__'khor 'das zil gyis gnon pa'i lta stangs mdzad pa/__gang 'dul sku gsum gyi rol pa ma 'gag par ston pa sgyu ma'i sku can du gsal ba'i mdun du sa ra ha sogs phyag chen brda yi bla ma bcu gcig__/g.yas su sangs rgyas gsang ba sogs pha rgyud g.yo ba rlung gi bla ma bcu gcig__/g.yon du mtsho skyes rdo rje sogs ma rgyud bde ba nyams kyi bla ma bcu gcig__/rgyab tu klu sgrub snying po sogs mtshan nyid sgra rig gi bla ma bcu gcig__/mtshams rnams su mkha' 'gro ma su kha sid+d+hi sogs rig pa ngo sprod kyi bla ma bcu/__steng du ngo mtshar mkha' spyod kyi bla ma sum cu rtsa drug__/de'i steng du byin rlabs mkha' 'gro'i bla ma nyer bzhi/__de'i steng thugs dam bde gshegs bcu gnyis kyi bla ma/__de'i steng du sangs rgyas sku bzhi'i bla ma bzhugs pa/__dam pa rin po che'i mdun phyogs su ma gcig lab kyi sgron ma/__mtha' skor du dam pa phyar chen/__badz+ra kro d+ha/__dam pa phyar chung*/__byang sems kun dga'/__kha che gu h+ya dz+nyA na/__rma chos kyi shes rab/__so dge 'dun 'bar/__skam ye shes rgyal mtshan/__pa tshab sgom pa/__rgyal ba te ne/__rog shes rab 'od/__zhig po nyi seng*/__snye mdo smra ba'i seng ge sogs zhi byed snga phyi bar gsum gyi brgyud pa'i bla ma rnams dang*/__sras rgyal ba don 'grub/__thod smyon bsam 'grub/__khu sgom chos seng sogs zab mo bdud kyi gcod yul gyi bka' babs bu chen bcu drug dang*/__yi dam sangs rgyas byang sems dpa' bo mkha' 'gro/__ye shes kyi mgon po a g+ho ra sogs dam can chos skyong bcas sprin gtibs pa ltar byin thibs se bzhugs par mos la/__ho/__ngo bo chos sku'i bla ma ro gcig kyang*/__/gang 'dul der ston sna tshogs rol pa'i gzugs/__/sangs rgyas sras bcas mkha' 'gro chos skyong tshogs/__/cho 'phrul du mas rol cing gshegs su gsol/__/oM gu ru ka ma la shi+A la de ba DA ki ni+A sa pa ri wa ra e h+ye hi/__sa ma ya ho/__sa ma ya s+t+waM/__dzaHhU~M baM hoHsa spyan drangs pa tshogs rten dang dbyer med du bzhugs par mos/__bsags sbyang ni bla ma mchod pa gtsor bton pa'i skabs phyag 'tshal dang*/__mchod bshags sogs yan lag bdun pa rnams tshig tshogs rgyas par spro na zhi gcod kyi bla mchod bkra shis grags pa'i snying po ltar sbyar na legs shing*/__dkyus tsam du/__dmigs bcas dmigs med gnyis su med pa yi/__/rang rig bla ma'i sku la phyag 'tshal lo/__/mchod bya mchod byed dbyer med zung 'jug dngos/__/rnam dag chos kyi sku la mchod pa 'bul/__/nyon mongs ye shes blang dor med pa yi/__rig pa dri med ngang du sdig kun bshags/__/ye nas sangs rgyas blo yis ma bcos pa/__/bcings grol med par skyong la yi rang ngo*/__/sems nyid gdod nas dag pa chos sku'i klong*/__/rtsol med yang dag dran pa'i chos 'khor bskor/__/bde sdug la sogs rkyen dang 'phrad pa'i tshe/__/sgom pa mya ngan mi 'da' bzhugs su gsol/__/dge ba 'khor gsum dmigs med dag pa yis/__/mtshan 'dzin med par byang chub chen por bsngo/__/bya byed med par bya ba kun rdzogs pa'i/__/chos nyid spros bral rgyun du skyong bar shog__/lan gsum sogs bya/__gsol 'debs gang 'os dang*/__'jam dpal smra ba'i seng ges byin brlabs shing*/__/A li kA li'i sgra don rtogs pa yis/__/mdo rgyud kun gyi dgongs pa thugs la shar/__/brgyud pa'i gdams pa ma lus 'dzin mdzad pa'i/__/ka ma shi+A la'i zhabs la gsol ba 'debs/__zhes zhal gsung gsol 'debs dang*/__oM AHhU~M hrIHgu ru ka ma la shI la d+harma sat+ta b+ho nirma kA ya sid+d+hi dz+nyA na a bai sha ya hrIM ba~M swA hA/__zhes mtshan sngags re ltos ling skyur gyis mos gus drag pos ci nus bzla/__tshogs mchod byed par 'dod na/__tshogs rdzas rnams bsangs sbyangs/__stong pa'i ngang las a las ka pA la'i snod du oM las sha lnga dang bza' bca' btung ba'i bye brag rnams zhu zhing 'dres pa'i tshogs rdzas kyis gang ba la ye shes kyi bdud rtsi bkug ste bstims pas tshogs mchod ye shes kyi bdud rtsi'i rgya mtsho chen por gyur/__oM AHhU~M/__mang du brjod/__tshogs zhing rnams badz+ra sa ma ya dzaHsa spyan drangs/__phyogs bcu dus gsum gyi bla ma sangs rgyas dang byang chub sems dpa' thams cad kyi ngo bor gyur pa rtsa brgyud kyi bla ma dam pa rnams kyi zhal du ga Na tsakra pU dza khA hi/__bcom ldan 'das rdo rje bdag med ma dang thugs dam bde gshegs bcu gnyis sogs yi dam dkyil 'khor gyi lha tshogs rnams kyi zhal du ga Na tsakra pU dza khA hi/__ye shes kyi mgon po a g+ho ra sogs nag po chen po lcam dral 'khor dang bcas pa'i zhal du ga Na tsakra pU dza khA hi/__mkha' 'gro sde bzhi zhing skyong kun tu ri ka sogs srung ma thugs dam can rnams kyi zhal du ga Na tsakra pU dza khA hi/__rigs drug gi sems can dkyil 'khor 'khor lo'i ngo bor rnam par dag pa rnams kyi zhal du ga Na tsakra pU dza khA hi/__tshogs phud phul/__bar pa dam tshig gi rdzas la longs spyod/__lhag ma rnams bsdus te/__oM uts+tshiShaT ba liM ta khA his bsngo/__oM AHhU~M hrIHgu ru sid+d+hi hU~M/__zhes sngags bzlas pas gsol ba btab pas/__bla ma dam pa rin po che la 'khor rnams thim/__sku gzi byin rgyas pas spyi bor byon/__gnas bzhi las tshad med pa'i thugs rje dang byin rlabs chen pos 'od zer dkar dmar mthing ga sna tshogs pa'i rnam par byung ste rang gi gnas bzhir chu la chu bzhag pa ltar thim pas sgo gsum cha mnyam dang bcas pa'i sgrib pa dag__/sku gsung thugs snang stong grags stong dran stong gnyis su med pa'i byin rlabs zhugs nas nyams dang rtogs pa 'u ru ru 'bar/__mthar bla ma sangs rgyas 'od du zhu nas rang la thim pas bla ma'i rdo rje gsum dang rang gi lus ngag yid gsum dbyer mi phyed par gyur par mos la mnyam par bzhag__/thun las ldang ba na smon lam ni/__na mo/__bdag dang bdag gi rigs bdag la sogs pa/__/mtha' yas rgyud kyis bsdus pa'i 'gro ba rnams/__/'di nas tshe 'phos rin chen can gyi zhing*/__/byang sems smon lam grub pas dkrigs pa der/__/rgyan gyi 'khor lo pho brang rnam mdzes pa/__/yongs dag gzhal med khang du skye bar shog__/ces smon lam rdo rje'i tshig drug mas rgyas 'debs par bya'o/___/zhes me sbrul dbo zla'i tshes skor thub bstan chos gling du gdams mdzod sprul pa'i glegs bam gyi smin grol 'bog pa'i tshe skyabs rje'i zhal slob bslab ldan dge slong ngag dbang tshul khrims rgyal mtshan nas bskul ba bzhin grub pa mchog gi ded dpon chen po'i rdo rje'i gsung bzhin mang+ga la shrI b+hU tis shod rong ri khrod thub bstan chos gling nas bris pa chos nyid zab mo'i rtogs pa rgyud la skye ba'i rgyur gyur cig__//__//