DKR-KABUM-22-ZA-015

🚧 This website is under continued development. We appreciate your patience!

Previous Text Back to Volume PageNext Text

Wylie title	'
Location	dil mgo mkhyen brtse bka' 'bum Volume 22, Text 15, Pages (Folios 1a to )
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་ (Khyentse, Dilgo)
Citation	Khyentse, Dilgo. '. In Skyabs rje dil mgo mkhyen brtse rin po che'i bka' 'bum, Vol. 22: . Delhi: Shechen Publications, 1994.
Genre	Sadhanas - Evocation Ritual - sgrub thabs
Cycle	ཡུམ་བཀའ་ཌཱ་ཀིའི་སྲོག་ཏིག་ (yum bka' da ki'i srog tig)
Parent Cycle	བཀའ་བརྒྱད་བདེ་གཤེགས་ཀུན་འདུས་ (bka' brgyad bde gshegs kun 'dus)
Deity	nam mkha'i dbyings kyi dbang phyug ma

Tibetan Text

Wylie

[edit]

སྐྱ ཞིང་སྐྱོང་དུར་ཁྲོད་མ་མོའི་གསོལ་མཆོད་ཕྲིན་ལས་གློག་ཕྲེང་བཞུགས༔ སྐྱ ལྷན་སྐྱེས་དོན་གྱི་ཕག་མོར་འདུད༔ དེ་ཡི་ཡང་སྤྲུལ་མ་མོ་ཆེ༔ མཆོད་ཅིང་བསྟོད་པའི་ཕྲིན་ལས་ནི༔ མྱུར་མགྱོགས་གློག་གི་ཕྲེང་བ་བསྟན༔ ས་མ་ཡ༔ དུར་ཁྲོད་ལ་སོགས་དབེན་པའི་གནས༔ དམ་ཚིག་རྟེན་བཤམས་མཆོད་གཏོར་དང༔ མཐུན་རྫས་འདུ་བྱ་བྱིན་བརླབས་ཏེ༔ རང་ཉིད་ཁྲོས་མའི་ང་རྒྱལ་གྱིས༔ ཧཱུྃ་བྷྱོཿ ཆོས་དབྱིངས་འགྱུར་མེད་མུན་པ་ཅན་གྲགས་པའི༔ ལྷོ་ནུབ་འཇིགས་སུ་རུང་བའི་དུར་ཁྲོད་ཆེ༔ ཤ་ཟ་གཅན་སྤྱང་དུར་བྱ་འཁྲིགས་པའི་ཁྲོད༔ དམར་ནག་རཀྟའི་རྒྱ་མཚོ་འཁྲུགས་པའི་ཀློང༔ གྭ་དམར་བོང་བུ་ཞོན་པའི་ཞིང་སྐྱོང་མ༔ མི་སྡུག་སྲིན་མོ་ཁྲོས་པའི་གདོང་པ་ཅན༔ སྐེམ་རིད་གཟུགས་འཆང་སྤྱན་གསུམ་སྡང་མིག་གཡོ༔ མི་རོ་ཁར་བཅུག་མཆེ་གཙིགས་ཕཻཾ་སྒྲ་སྒྲོགས༔ ཁམ་ནག་རལ་པ་གྱེན་བརྫེས་སྤྱི་བོའི་གཙུག༔ ཟླ་ཚེས་རྨ་བྱའི་མདངས་ཀྱི་སྒྲོ་ཕོད་འཕྱོ༔ སྙན་ལ་སེང་གེ་འགྱིངས་ཤིང་སྦྲུལ་ནག་འཁྱུག༔ ཞིང་གི་སྟོད་གཡོགས་རེ་ལྡེའི་སྨད་གཡོགས་ཅན༔ བ་གླང་ལྤགས་པས་སྐེད་དཀྲིས་ཁྲོམས་ཤིང་གཟིར༔ ལྟེ་བར་ཉི་འཆར་ཞབས་ལ་ལྕགས་སྒྲོག་གསོལ༔ ཕྱག་གཡས་རལ་གྲི་གཡོན་པས་བྷན་དམར་འཐུང༔ སྔ་ཤ་ནད་རྐྱལ་ཕྱི་ཤ་ཚོན་གྲུ་དང༔ ཤྭ་དྷིལ་དཀར་ནག་བདུད་ཀྱི་བྱང་དཀར་འཕྱང༔ མེ་རླུང་དུད་སྤྲིན་འཁྲིགས་པའི་དབུས་ན་རྒྱུག༔ སྣང་སྲིད་མ་མོ་འབུམ་ཕྲག་ཡངས་པའི་ཚོགས༔ ཡེ་ཤེས་ལས་དང་འཇིག་རྟེན་རྣམ་པར་སྟོན༔ མ་གཅིག་མདུན་དུ་ཉི་ཟླའི་ཟེར་སྤྲིན་དབུས༔ མཛེས་སྡུག་མཚུངས་མེད་འཕྲུལ་གྱི་ལྷ་མོ་ནི༔ དཀར་གསལ་མདའ་དར་པྲ་ཡི་མེ་ལོང་འཛིན༔ དར་དང་རིན་ཆེན་ནོར་བུ་མེ་ཏོག་བརྒྱན༔ རང་འདྲ་འབུམ་དང་བཅས་ཏེ་བྲོ་གར་འཁྲབ༔ གཡས་སུ་གནོད་སྦྱིན་མཛེས་ལྡན་ངན་ནེ་མ༔ དམར་གསལ་མཛེས་བརྗིད་དར་སེར་གསང་གོས་ཀླུབ༔ གཡས་སུ་ནོར་བུ་གཡོན་པས་བྷནྡྷ་ཐོགས༔ རིན་ཆེན་རིགས་ཀྱི་མཁའ་འགྲོ་འབུམ་གྱིས་བསྐོར༔ རྒྱབ་ཏུ་ཤ་ཟ་དམར་གཏུམ་ཆགས་པའི་ཉམས༔ གཅེར་བུ་ཨུཏྤལ་ལྕགས་ཀྱུ་ཞགས་པ་དང༔ མེ་ཏོག་ཕྲེང་འཕྱང་སྒེག་འཛུམ་ཟུར་མིག་བཅས༔ གཡོན་ཅན་སླུ་བྱེད་འབུམ་གྱི་འཁོར་དང་བཅས༔ གཡོན་དུ་བམ་རོའི་སྙིང་འབྱིན་དྲེད་མོའི་སྟེང༔ འདྲེ་མོ་དམར་ནག་མཆེ་བ་སྙིང་ཀར་སླེབ༔ ཁ་གདང་རལ་གསིག་དགྲ་ལ་འོད་དོད་འབོད༔ ཞིང་དབྱུག་མཁར་ཕྱར་དོན་སྙིང་ཀྲུམ་ཀྲུམ་ཟ༔ དེ་ཡི་ཕྱི་རིམ་ཕྱོགས་བཞི་མཚམས་རྣམས་སུ༔ རྡོ་རྗེ་ཕོ་ཉ་དཀར་མོ་ལྕགས་ཀྱུ་སྙིང༔ རྡོ་རྗེ་རོ་ལངས་སེར་ནག་མི་སྙིང་འདྲེན༔ རྡོ་རྗེ་དྲག་རྩལ་རལ་གྲི་སྙིང་དང་བཅས༔ ཀཱ་ལི་ནག་མོ་མེ་ལོང་ཙིཏྟ་ཅན༔ ནག་མོ་ལག་རིང་སྨུག་ནག་ཞིང་དབྱུག་སྙིང༔ ཤ་ཟན་ནག་མོ་བམ་རོ་སྙིང་ནས་ཟ༔ བྱི་ཏོ་ཏ་མ་ལྗང་ནག་ནད་རྐྱལ་སྙིང༔ ལས་བྱེད་སྔོན་མོ་སྙིང་དང་ཞགས་པ་ཅན༔ ཀུན་ཀྱང་གཅེར་བུ་ཞིང་ལྤགས་རུས་རྒྱན་ཅན༔ སྟག་ཤམ་འཕྱང་ཞིང་ཞབས་གཉིས་གར་སྟབས་ཀྱིས༔ པད་ཉི་རོ་སྟེང་སྒེག་ཅིང་གར་དང་བཅས༔ དྲག་རྩལ་འཇིགས་པའི་མི་སྲུན་ཆོ་འཕྲུལ་སྟོན༔ མེ་རླུང་དབུས་རྒྱུག་མིག་གིས་ཕྱོགས་མཚམས་ཉུལ༔ ཧཱུྃ་བྷྱོ་ཧྲཱིཾ་ཕཻཾ་འོ་དོད་དགྲ་ལ་འབོད༔ རྔམ་པའི་གད་རྒྱངས་ཀུ་ཅོའི་སྒྲ་ཡང་སྒྲོགས༔ དཀར་སེར་དམར་ལྗང་ནག་སྨུག་འབུམ་འབུམ་སྤྲོ༔ དེའི་ཕྱིར་ཤར་དུ་ལྷ་མོ་ངན་ནེ་དམར༔ དར་ནག་གོ་ཟུ་ལྕགས་ཀྱུ་མེ་ལོང་འཛིན༔ ཤར་ལྷོར་དྲལ་པོ་མི་རིང་སྐྱེས་དམར་པོ༔ གཅེར་བུ་སྐྲ་གཡོབ་ལག་པས་བཟེད་ཅིང་རྒྱུག༔ ལྷོ་རུ་ཀླུ་མོ་ངན་ནེ་ལྕགས་ཀྱུ་གདེང༔ ཕུར་བུ་དགྲ་ལ་འདེབས་ཤིང་སྨུག་ནག་མདོག༔ སྦྲུལ་གྱི་རལ་འཁྱུག་ཁྲོ་གཏུམ་གཟི་བརྗིད་འབར༔ ལྷོ་ནུབ་ཤན་དམར་བསེ་མདུང་བཙན་ཞགས་འཕེན༔ ནུབ་ཏུ་གནོད་སྦྱིན་ངན་ནེ་ནོར་ལ་རྔམས༔ ལྕགས་ཀྱུ་བུམ་པས་ནོར་འགུགས་འདོད་དགུ་སྩོལ༔ ནུབ་བྱང་ཤན་པ་ར་མགོ་གྲི་ཞགས་ཅན༔ དམར་ནག་མཆེ་གཙིགས་རྔམས་པས་དགྲ་ལ་བལྟ༔ བྱང་དུ་འདྲེ་མོ་ངན་ནེ་རོ་ལངས་ཞོན༔ མི་ལྤགས་གདེངས་ཤིང་ཟས་གཞོང་པང་དུ་ལེན༔ བྱང་ཤར་ཟུ་ར་ར་སྐྱེས་མི་རྟ་ནག༔ དར་ནག་རུ་མཚོན་ཕྱར་ཞིང་རལ་གྲི་གདེངས༔ རང་འདྲ་ལས་བྱེད་ཕོ་ཉ་བྱེ་བ་འབུམ༔ མཁའ་ལ་སྤྲིན་ལྟར་འཁྲིགས་ཤིང་ཉི་ཟླ་ཞོན༔ བར་སྣང་ཕྱོགས་མཚམས་རླུང་དམར་བཞིན་འཕྱོ་བས༔ ཉམས་པ་རྩད་གཅོད་སྒྲུབ་ལ་བྱ་ར་མཛད༔ ས་འོག་རྒྱ་མཚོའི་གཏིང་དུ་ཉ་ལྟར་རྒྱུག༔ ལས་ཀུན་ལྷུན་གྲུབ་བྱེད་ལ་རིངས་པའི་ཚུལ༔ ཀུན་ཀྱང་ཁྲོ་ཚུལ་མི་བཟད་འཇིགས་རྔམས་སྟོན༔ སྒྲུབ་པོར་ཡིད་གདུང་གནས་གསུམ་འོད་ཟེར་གྱིས༔ གར་བཞུགས་གནས་ནས་སྐད་ཅིག་ཡུད་ཙམ་ལ༔ སྤྲིན་ཆེན་རླུང་གིས་བཏེགས་བཞིན་སྤྱན་དྲངས་བསམ༔ བྷྱོཿ ཞིང་བཅུ་སྙིང་རྗེས་སྒྲོལ་བའི་དུར་ཁྲོད་ཀྱི༔ ལྷོ་ནུབ་མུན་པ་ཅན་སོགས་གནས་ཡུལ་ནས༔ ངོ་བོ་དབྱིངས་ཀྱི་མ་གཅིག་ཡུམ་ཆེན་མོ༔ རྣམ་པ་བསྟན་སྲུང་ཞིང་སྐྱོང་ཌཱ་ཀིའི་རྒྱལ༔ མ་གཅིག་དུར་ཁྲོད་ལྷ་མོ་གཤེགས་སུ་གསོལ༔ སྐྱེ་མེད་དབྱིངས་སུ་གཤེགས་བཞུགས་ལས་འདས་ཀྱང༔ འགག་མེད་ཐུགས་རྗེའི་རོལ་གར་སྲིད་ཞིར་བརྡལ༔ གང་འདུལ་ཕྲིན་ལས་རོལ་མོ་བསམ་ཡས་པས༔ བསྟན་དང་དེ་འཛིན་སྐྱོང་ཕྱིར་གཤེགས་སུ་གསོལ༔ སྔོན་ཚེ་སྟོན་པའི་སྤྱན་སྔར་ཞལ་བཞེས་བཞིན༔ དུས་མཐའི་རྣལ་འབྱོར་སྐྱོང་བར་དམ་བཅས་པས༔ བུ་གཅིག་མ་ལ་འབོད་བཞིན་ཁྱོད་བསྐུལ་ན༔ འདོད་པའི་ལས་ལ་མ་གཡེལ་གཤེགས་སུ་གསོལ༔ འཁོར་འདས་དབང་བསྒྱུར་རྡོ་རྗེ་ཁྲོས་མ་ཡིས༔ བཀའ་བསྒོས་ཐ་ཚིག་ཕོག་པ་མ་བསྙེལ་བར༔ མེ་རླུང་ཁྲག་མཚོ་འཁྱིལ་བའི་གནས་མཆོག་ནས༔ སྐད་ཅིག་ཡུད་ལ་གནས་འདིར་གཤེགས་སུ་གསོལ༔ ཨོཾ་རཱ་ལི་པྲ་མ་ཡ༔ སི་ལི་མ་ནི་ཛཿཛཿ ཞེས་འབོད་སྔགས་བཟླས་པས་སྤྱན་དྲངས་ལ༔ བྷྱོཿ ཁོར་ཡུག་རཀྟའི་རྦ་ཀློང་མི་རོས་གང༔ མེ་རླུང་འཁྲུགས་དབུས་གློག་དང་ཐོག་སེར་འབེབས༔ ཕྱོགས་ཀུན་ཤ་ཟ་གཅན་གཟན་འཁྲུགས་པའི་གནས༔ དགྱེས་ཤིང་བརྟན་པས་མི་གཡོ་བཞུགས་སུ་གསོལ༔ ས་མ་ཡ་ཏིཥྛནྟུཿ བྷྱོཿ ཆོས་ཉིད་དབྱིངས་སུ་སྲིད་ཞི་མཉམ་བྲལ་ཡང༔ ཆོས་ཅན་མ་འགག་རང་རྩལ་བསྟན་སྲུང་ཚོགས༔ རྡོ་རྗེ་བཙུན་མོ་དགྱེས་མའི་ཐ་ཚིག་ལས༔ མ་འདའ་ཐོགས་མེད་ཕྲིན་ལས་ཀུན་མཛོད་ཅིག༔ ས་མ་ཡ་ཧོཿ བྷྱོཿ མ་གཅིག་ཁྱོད་ལ་གདུང་བས་གུས་བཏུད་ནས༔ དགྱེས་པའི་མཐུན་རྫས་རྨད་བྱུང་བསམ་ཡས་པ༔ ཆོས་དབྱིངས་དང་མཉམ་སྤྲུལ་ཏེ་འབུལ་ལགས་ན༔ འདོད་པའི་ཕྲིན་ལས་སྒྲུབ་ལ་མ་གཡེལ་ཅིག༔ ཨོཾ་བཛྲ་མ་ཧཱ་པཱུ་ཛ་པཉྩ་ཀཱ་མ་གུ་ཎ་མ་ཧཱ་ཨ་མྲྀ་ཏ་རཀྟ་མཱྃ་ས་རཀྟ་གོ་རོ་ཙ་ན་བ་སུ་ཏ་བ་ལིཾ་ཏ་ཁ་ཁ་ཁཱ་ཧི་ཁཱ་ཧིཿ བྷྱོཿ རྡོ་རྗེ་དབྱིངས་ཀྱི་བཙུན་མོ་དགྱེས་མ་མོ༔ རང་བྱུང་རྒྱལ་མོ་བདེ་ཆེན་སྐྱེད་པའི་ཡུམ༔ ཆོས་དབྱིངས་བརྡལ་བའི་དཀྱིལ་འཁོར་རྣམ་ཐར་གསུམ༔ རང་ཤར་ལྷུན་གྱིས་གྲུབ་པའི་མ་མོར་བསྟོད༔ ཆོས་ཉིད་དབྱིངས་ཀྱི་མ་མོ་མུ་ཁ་ལེ༔ སྣང་སྲིད་བདེ་བ་ཆེན་པོའི་མཁར་སྡུད་པ༔ སྤྲོས་མཚན་བློ་ལས་འདས་པའི་ཡེ་ཤེས་ཀློང༔ རྟག་ཏུ་འདུ་འབྲལ་མ་མཆིས་སིམ་ལ་བསྟོད༔ རྣམ་རོལ་མི་སྲུན་དུར་ཁྲོད་མ་མོའི་ཚུལ༔ ནོར་དང་དཀོར་གྱི་བདག་མོ་ངན་ནེ་མ༔ གཙུག་ལག་ཁང་དང་ཆོས་ནོར་མེལ་ཚེས་སྐྱོང༔ ཚར་གཅོད་རྗེས་འཛིན་ཕྲིན་ལས་མྱུར་ལ་བསྟོད༔ རྣོ་མྱུར་ཐོགས་མེད་གནས་ཡུལ་ཞིང་ཀུན་སྐྱོང༔ ལྷ་ཀླུ་ཤ་ཟ་གནོད་སྦྱིན་མཁའ་འགྲོ་མའི༔ ཆོ་འཕྲུལ་ཅིར་ཡང་སྟོན་པས་སྒྲུབ་མཆོག་སྐྱོང༔ ལས་ཀྱི་གཉེར་འཛིན་མ་གཅིག་ཁྱོད་ལ་བསྟོད༔ ཞི་མཛད་དབྱིངས་ཀྱི་མ་གཅིག་བྱམས་སྡུག་བརྩེ༔ རྒྱས་པའི་ཕྲིན་ལས་སྒྲུབ་ལ་གནོད་སྦྱིན་མོ༔ དབང་གི་ལས་མྱུར་པདྨ་ཌཱ་ཀི་མ༔ གདུགས་ཅན་སྒྲོལ་བའི་སྲིན་མོའི་ཚུལ་ཅན་བསྟོད༔ ནང་དུ་རྡོ་རྗེའི་ལུས་ལ་རྩ་ཐིག་རླུང༔ ཐུགས་གསུང་སྐུ་ཡི་གྲོང་ཁྱེར་རྣམ་གསུམ་དུ༔ ཁམས་གསུམ་སྐུ་གསུམ་རྫོགས་པའི་མཁའ་འགྲོ་མ༔ རྟག་པའི་རྒྱལ་མོའི་ཚུལ་དུ་བཞུགས་ལ་བསྟོད༔ གཞན་དུ་རྡོ་རྗེ་ནམ་མཁའི་ཡེ་ཤེས་དཀྱིལ༔ མཚན་རྟོག་འཁྲུལ་མེད་གཞི་ལ་དག་པ་ཡི༔ འཁོར་འདས་ཆོས་རྣམས་ཀུན་གྱི་སྲོག་གི་སྙིང༔ སྨྲ་བསམ་བརྗོད་བྲལ་དབྱིངས་སུ་བཞུགས་ལ་བསྟོད༔ བཟླས་པས་ཐུགས་རྒྱུད་བསྐུལ་བ་ནི༔ མདུན་གྱི་མ་མོ་གཙོ་འཁོར་ཐུགས་ཀར་བྷྱོ༔ རང་མདོག་སྔགས་ཀྱིས་བསྐོར་བར་གསལ་བ་ལ༔ བདག་ཐུགས་འོད་ཟེར་སྔོ་དམར་རེག་པའི་མོད༔ སྔོན་གྱི་གཡར་དམ་རྗེས་དྲན་ལས་མཛད་གྱུར༔ ཨོཾ་མ་མ་རཱ་ལི་པྲ་མ་ཡ་ཀཱ་ལི་ཡེ་ཛཿཛཿ སྔགས་ཀྱིས་བསྐུལ་ལས་མ་མོའི་ཚོགས༔ གནས་ཡུལ་དུར་ཁྲོད་གར་བཞུགས་ནས༔ བྱ་རྒོད་ཤ་ལ་རུབ་པ་བཞིན༔ མདུན་དུ་བྱོན་ནས་བཞུགས་པར་བསམ༔ ཧཱུྃ་རཱ་ལི་པྲ་མ་ཡ༔ སི་ལི་མ་ནི་ཛཿཛཿ མ་མོ་འདུ་བའི་རྟགས་བྱུང་ཚེ༔ རང་ཉིད་ཧེ་རུ་ཀ་ཡི་ཟིལ༔ མ་མོ་རྣམས་ཀྱིས་མ་བཟོད་ནས༔ གུས་ཤིང་གདུང་བས་ཕྲིན་ལས་ཀུན༔ སྒྲུབ་ལ་རིངས་བཞིན་ཁས་བླང་བསམ༔ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ མ་མ་ཀྲོ་དྷཱི་ཀཱ་ལི་ཧཱུྃ༔ ཤྨ་ཤཱ་ན་དེ་ཝི་ཛཿཛཿ བྷྱོ་ཕཻཾ་ཨ་ར་ལི་ཧཱུྃ་ཕཊ྄༔ ཅེས་བཟླ་ལས་བཞིའི་དམིགས་པ་བཅས༔ སྔགས་ལ་ཤམ་བུ་སོ་སོར་སྦྱརཿ ཤཱནྟིཾ་ཀུ་རུ་ཧཱུྃ༔ པུཥྚིཾ་ཀུ་རུ་ཨོཾ༔ ཝཱ་ཤཾ་ཀུ་རུ་ཧོཿ མཱ་ར་ཡ་ཕཊ྄༔ སྐབས་བསྟུན་བཟླས་པས་ལས་བྱེད་འགྱུར༔ ས་མ་ཡ༔ ཐུན་མཚམས་གཏོར་མ་འོ་ཆང་གིས༔ བྲན་པ་འབུལ་ཞིང་ཕྲིན་ལས་བཅོལ༔ ཧཱུྃ་བྷྱོཿ ལྷོ་ནུབ་མུན་པ་ཅན་གྱི་གནས༔ འཇིགས་སུ་རུང་བའི་དུར་ཁྲོད་ནས༔ མ་གཅིག་ལྷ་མོ་ངན་ནེ་མ༔ ལྕམ་དྲལ་མིང་སྲིང་རྣམ་པ་བརྒྱད༔ ཞི་རྒྱས་དབང་དྲག་ཕྲིན་ལས་ཅན༔ ཕྱོགས་བཅུའི་གནས་ཡུལ་དུར་ཁྲོད་ནས༔ ཞིང་ཁམས་ཉུལ་ཞིང་བསྟན་པ་སྐྱོང༔ མ་གཡེལ་མ་གཡེལ་ད་ཚུར་བྱོན༔ རིག་འཛིན་བདག་གིས་བོས་པའི་ཚེ༔ རྫུ་འཕྲུལ་སྙན་གྱིས་གསོན་ལ་སྤྱོན༔ ཞིང་གི་གཡབ་མོས་བསྐུལ་བའི་ཚེ༔ ལས་ལ་མ་འགྱང་མྱུར་དུ་རྒྱུགས༔ ཚིལ་གསུར་གདུག་པ་སྤྲིན་ལྟར་གཏིབས༔ རོ་རས་དར་ནག་རུ་མཚོན་བསྒྲེངས༔ རྐང་གླིང་བཤུག་གླུས་བསྐུལ་བཞིན་དུ༔ ཤ་ཁྲག་གཏོར་མ་འདི་བཞེས་ལ༔ ཇི་ལྟར་འདོད་པའི་ལས་འདི་མཛོད༔ གཏའ་རུ་ཐུན་གྱི་གཏོར་མ་ནི༔ ཤ་ཁྲག་ཟས་སྣས་བརྒྱན་པ་བཞེས༔ དཀར་དམར་འོ་ཆོལ་ཆང་གིས་བྲན༔ གདུང་བས་འབོད་ལ་དགོངས་མཛོད་ཀྱཻ༔ མ་ལ་གདུང་བས་ཡིད་འཕྲེང་ནས༔ བུ་ཡིས་འབོད་པ་གསན་མཛོད་ལ༔ བྱམས་བརྩེའི་ཡིད་གདུང་མི་འབྲལ་བས༔ འདོད་པའི་ལས་ཀུན་སྒྲུབ་པར་མཛོད༔ སྔོན་ཚེ་བཅོམ་ལྡན་དགྱེས་མའི་བཀའ༔ བར་དུ་ཨོ་རྒྱན་པདྨའི་གསུང༔ ཐ་མ་རིག་འཛིན་བརྒྱུད་པ་ཡི༔ ཐ་ཚིག་ཕོག་པ་མ་གཡེལ་བར༔ ལས་ཀུན་སྒྲུབ་པའི་གྲོགས་མཛོད་ཅིག༔ མ་ཁྱོད་སྣང་སྲིད་མཁའ་འགྲོའི་རྗེ༔ ལས་ལ་མྱུར་ཞིང་བསྟན་པ་སྲུང༔ དུས་མཐར་རྣལ་འབྱོར་ཕྲིན་ལས་ཀུན༔ སྒྲུབ་པའི་ཐ་ཚིག་མ་བསྙེལ་བར༔ གཏོར་མ་གསེར་སྐྱེམས་བདུད་རྩིའི་ཕུད༔ བཞེས་ལ་བསྟན་འགྲོ་མེལ་ཚེས་སྐྱོངས༔ བསྟན་འཛིན་སྐྱེས་བུའི་དབུ་འཕང་བསྟོད༔ རྒྱལ་བསྟན་ཕྲིན་ལས་ཕྱོགས་མཐར་སྤེལ༔ བསྟན་པའི་སྦྱིན་བདག་མངའ་ཐང་སྐྱེད༔ འགྲོ་ཀུན་མོས་པ་ཆོས་ལ་སྒྱུར༔ ཕབ་འཕྲོ།

[edit]

skya__zhing skyong dur khrod ma mo'i gsol mchod phrin las glog phreng bzhugs:_skya_lhan skyes don gyi phag mor 'dud:_de yi yang sprul ma mo che:_mchod cing bstod pa'i phrin las ni:_myur mgyogs glog gi phreng ba bstan:_sa ma ya:_dur khrod la sogs dben pa'i gnas:_dam tshig rten bshams mchod gtor dang:_mthun rdzas 'du bya byin brlabs te:_rang nyid khros ma'i nga rgyal gyis:_hU~M b+h+yoH_chos dbyings 'gyur med mun pa can grags pa'i:_lho nub 'jigs su rung ba'i dur khrod che:_sha za gcan spyang dur bya 'khrigs pa'i khrod:_dmar nag rak+ta'i rgya mtsho 'khrugs pa'i klong:_gwa dmar bong bu zhon pa'i zhing skyong ma:_mi sdug srin mo khros pa'i gdong pa can:_skem rid gzugs 'chang spyan gsum sdang mig g.yo:_mi ro khar bcug mche gtsigs phaiM sgra sgrogs:_kham nag ral pa gyen brdzes spyi bo'i gtsug:_zla tshes rma bya'i mdangs kyi sgro phod 'phyo:_snyan la seng ge 'gyings shing sbrul nag 'khyug:_zhing gi stod g.yogs re lde'i smad g.yogs can:_ba glang lpags pas sked dkris khroms shing gzir:_lte bar nyi 'char zhabs la lcags sgrog gsol:_phyag g.yas ral gri g.yon pas b+han dmar 'thung:_snga sha nad rkyal phyi sha tshon gru dang:_shwa d+hil dkar nag bdud kyi byang dkar 'phyang:_me rlung dud sprin 'khrigs pa'i dbus na rgyug:_snang srid ma mo 'bum phrag yangs pa'i tshogs:_ye shes las dang 'jig rten rnam par ston:_ma gcig mdun du nyi zla'i zer sprin dbus:_mdzes sdug mtshungs med 'phrul gyi lha mo ni:_dkar gsal mda' dar pra yi me long 'dzin:_dar dang rin chen nor bu me tog brgyan:_rang 'dra 'bum dang bcas te bro gar 'khrab:_g.yas su gnod sbyin mdzes ldan ngan ne ma:_dmar gsal mdzes brjid dar ser gsang gos klub:_g.yas su nor bu g.yon pas b+han+d+ha thogs:_rin chen rigs kyi mkha' 'gro 'bum gyis bskor:_rgyab tu sha za dmar gtum chags pa'i nyams:_gcer bu ut+pal lcags kyu zhags pa dang:_me tog phreng 'phyang sgeg 'dzum zur mig bcas:_g.yon can slu byed 'bum gyi 'khor dang bcas:_g.yon du bam ro'i snying 'byin dred mo'i steng:_'dre mo dmar nag mche ba snying kar sleb:_kha gdang ral gsig dgra la 'od dod 'bod:_zhing dbyug mkhar phyar don snying krum krum za:_de yi phyi rim phyogs bzhi mtshams rnams su:_rdo rje pho nya dkar mo lcags kyu snying:_rdo rje ro langs ser nag mi snying 'dren:_rdo rje drag rtsal ral gri snying dang bcas:_kA li nag mo me long tsit+ta can:_nag mo lag ring smug nag zhing dbyug snying:_sha zan nag mo bam ro snying nas za:_byi to ta ma ljang nag nad rkyal snying:_las byed sngon mo snying dang zhags pa can:_kun kyang gcer bu zhing lpags rus rgyan can:_stag sham 'phyang zhing zhabs gnyis gar stabs kyis:_pad nyi ro steng sgeg cing gar dang bcas:_drag rtsal 'jigs pa'i mi srun cho 'phrul ston:_me rlung dbus rgyug mig gis phyogs mtshams nyul:_hU~M b+h+yo hrIM phaiM 'o dod dgra la 'bod:_rngam pa'i gad rgyangs ku co'i sgra yang sgrogs:_dkar ser dmar ljang nag smug 'bum 'bum spro:_de'i phyir shar du lha mo ngan ne dmar:_dar nag go zu lcags kyu me long 'dzin:_shar lhor dral po mi ring skyes dmar po:_gcer bu skra g.yob lag pas bzed cing rgyug:_lho ru klu mo ngan ne lcags kyu gdeng:_phur bu dgra la 'debs shing smug nag mdog:_sbrul gyi ral 'khyug khro gtum gzi brjid 'bar:_lho nub shan dmar bse mdung btsan zhags 'phen:_nub tu gnod sbyin ngan ne nor la rngams:_lcags kyu bum pas nor 'gugs 'dod dgu stsol:_nub byang shan pa ra mgo gri zhags can:_dmar nag mche gtsigs rngams pas dgra la blta:_byang du 'dre mo ngan ne ro langs zhon:_mi lpags gdengs shing zas gzhong pang du len:_byang shar zu ra ra skyes mi rta nag:_dar nag ru mtshon phyar zhing ral gri gdengs:_rang 'dra las byed pho nya bye ba 'bum:_mkha' la sprin ltar 'khrigs shing nyi zla zhon:_bar snang phyogs mtshams rlung dmar bzhin 'phyo bas:_nyams pa rtsad gcod sgrub la bya ra mdzad:_sa 'og rgya mtsho'i gting du nya ltar rgyug:_las kun lhun grub byed la rings pa'i tshul:_kun kyang khro tshul mi bzad 'jigs rngams ston:_sgrub por yid gdung gnas gsum 'od zer gyis:_gar bzhugs gnas nas skad cig yud tsam la:_sprin chen rlung gis btegs bzhin spyan drangs bsam:_b+h+yoH_zhing bcu snying rjes sgrol ba'i dur khrod kyi:_lho nub mun pa can sogs gnas yul nas:_ngo bo dbyings kyi ma gcig yum chen mo:_rnam pa bstan srung zhing skyong DA ki'i rgyal:_ma gcig dur khrod lha mo gshegs su gsol:_skye med dbyings su gshegs bzhugs las 'das kyang:_'gag med thugs rje'i rol gar srid zhir brdal:_gang 'dul phrin las rol mo bsam yas pas:_bstan dang de 'dzin skyong phyir gshegs su gsol:_sngon tshe ston pa'i spyan sngar zhal bzhes bzhin:_dus mtha'i rnal 'byor skyong bar dam bcas pas:_bu gcig ma la 'bod bzhin khyod bskul na:_'dod pa'i las la ma g.yel gshegs su gsol:_'khor 'das dbang bsgyur rdo rje khros ma yis:_bka' bsgos tha tshig phog pa ma bsnyel bar:_me rlung khrag mtsho 'khyil ba'i gnas mchog nas:_skad cig yud la gnas 'dir gshegs su gsol:_oM rA li pra ma ya:_si li ma ni dzaHdzaH_zhes 'bod sngags bzlas pas spyan drangs la:_b+h+yoH_khor yug rak+ta'i rba klong mi ros gang:_me rlung 'khrugs dbus glog dang thog ser 'bebs:_phyogs kun sha za gcan gzan 'khrugs pa'i gnas:_dgyes shing brtan pas mi g.yo bzhugs su gsol:_sa ma ya tiSh+Than+tuH_b+h+yoH_chos nyid dbyings su srid zhi mnyam bral yang:_chos can ma 'gag rang rtsal bstan srung tshogs:_rdo rje btsun mo dgyes ma'i tha tshig las:_ma 'da' thogs med phrin las kun mdzod cig:_sa ma ya hoH_b+h+yoH_ma gcig khyod la gdung bas gus btud nas:_dgyes pa'i mthun rdzas rmad byung bsam yas pa:_chos dbyings dang mnyam sprul te 'bul lags na:_'dod pa'i phrin las sgrub la ma g.yel cig:_oM badz+ra ma hA pU dza pany+tsa kA ma gu Na ma hA a mr-i ta rak+ta mA~M sa rak+ta go ro tsa na ba su ta ba liM ta kha kha khA hi khA hiH_b+h+yoH_rdo rje dbyings kyi btsun mo dgyes ma mo:_rang byung rgyal mo bde chen skyed pa'i yum:_chos dbyings brdal ba'i dkyil 'khor rnam thar gsum:_rang shar lhun gyis grub pa'i ma mor bstod:_chos nyid dbyings kyi ma mo mu kha le:_snang srid bde ba chen po'i mkhar sdud pa:_spros mtshan blo las 'das pa'i ye shes klong:_rtag tu 'du 'bral ma mchis sim la bstod:_rnam rol mi srun dur khrod ma mo'i tshul:_nor dang dkor gyi bdag mo ngan ne ma:_gtsug lag khang dang chos nor mel tshes skyong:_tshar gcod rjes 'dzin phrin las myur la bstod:_rno myur thogs med gnas yul zhing kun skyong:_lha klu sha za gnod sbyin mkha' 'gro ma'i:_cho 'phrul cir yang ston pas sgrub mchog skyong:_las kyi gnyer 'dzin ma gcig khyod la bstod:_zhi mdzad dbyings kyi ma gcig byams sdug brtse:_rgyas pa'i phrin las sgrub la gnod sbyin mo:_dbang gi las myur pad+ma DA ki ma:_gdugs can sgrol ba'i srin mo'i tshul can bstod:_nang du rdo rje'i lus la rtsa thig rlung:_thugs gsung sku yi grong khyer rnam gsum du:_khams gsum sku gsum rdzogs pa'i mkha' 'gro ma:_rtag pa'i rgyal mo'i tshul du bzhugs la bstod:_gzhan du rdo rje nam mkha'i ye shes dkyil:_mtshan rtog 'khrul med gzhi la dag pa yi:_'khor 'das chos rnams kun gyi srog gi snying:_smra bsam brjod bral dbyings su bzhugs la bstod:_bzlas pas thugs rgyud bskul ba ni:_mdun gyi ma mo gtso 'khor thugs kar b+h+yo:_rang mdog sngags kyis bskor bar gsal ba la:_bdag thugs 'od zer sngo dmar reg pa'i mod:_sngon gyi g.yar dam rjes dran las mdzad gyur:_oM ma ma rA li pra ma ya kA li ye dzaHdzaH_sngags kyis bskul las ma mo'i tshogs:_gnas yul dur khrod gar bzhugs nas:_bya rgod sha la rub pa bzhin:_mdun du byon nas bzhugs par bsam:_hU~M rA li pra ma ya:_si li ma ni dzaHdzaH_ma mo 'du ba'i rtags byung tshe:_rang nyid he ru ka yi zil:_ma mo rnams kyis ma bzod nas:_gus shing gdung bas phrin las kun:_sgrub la rings bzhin khas blang bsam:_oM ru lu ru lu hU~M b+h+yo hU~M:_ma ma kro d+hI kA li hU~M:_sh+ma shA na de wi dzaHdzaH_b+h+yo phaiM a ra li hU~M phaTa?:_ces bzla las bzhi'i dmigs pa bcas:_sngags la sham bu so sor sbyaraH_shAn+tiM ku ru hU~M:_puSh+TiM ku ru oM:_wA shaM ku ru hoH_mA ra ya phaTa?:_skabs bstun bzlas pas las byed 'gyur:_sa ma ya:_thun mtshams gtor ma 'o chang gis:_bran pa 'bul zhing phrin las bcol:_hU~M b+h+yoH_lho nub mun pa can gyi gnas:_'jigs su rung ba'i dur khrod nas:_ma gcig lha mo ngan ne ma:_lcam dral ming sring rnam pa brgyad:_zhi rgyas dbang drag phrin las can:_phyogs bcu'i gnas yul dur khrod nas:_zhing khams nyul zhing bstan pa skyong:_ma g.yel ma g.yel da tshur byon:_rig 'dzin bdag gis bos pa'i tshe:_rdzu 'phrul snyan gyis gson la spyon:_zhing gi g.yab mos bskul ba'i tshe:_las la ma 'gyang myur du rgyugs:_tshil gsur gdug pa sprin ltar gtibs:_ro ras dar nag ru mtshon bsgrengs:_rkang gling bshug glus bskul bzhin du:_sha khrag gtor ma 'di bzhes la:_ji ltar 'dod pa'i las 'di mdzod:_gta' ru thun gyi gtor ma ni:_sha khrag zas snas brgyan pa bzhes:_dkar dmar 'o chol chang gis bran:_gdung bas 'bod la dgongs mdzod kyai:_ma la gdung bas yid 'phreng nas:_bu yis 'bod pa gsan mdzod la:_byams brtse'i yid gdung mi 'bral bas:_'dod pa'i las kun sgrub par mdzod:_sngon tshe bcom ldan dgyes ma'i bka':_bar du o rgyan pad+ma'i gsung:_tha ma rig 'dzin brgyud pa yi:_tha tshig phog pa ma g.yel bar:_las kun sgrub pa'i grogs mdzod cig:_ma khyod snang srid mkha' 'gro'i rje:_las la myur zhing bstan pa srung:_dus mthar rnal 'byor phrin las kun:_sgrub pa'i tha tshig ma bsnyel bar:_gtor ma gser skyems bdud rtsi'i phud:_bzhes la bstan 'gro mel tshes skyongs:_bstan 'dzin skyes bu'i dbu 'phang bstod:_rgyal bstan phrin las phyogs mthar spel:_bstan pa'i sbyin bdag mnga' thang skyed:_'gro kun mos pa chos la sgyur:_phab 'phro/