DKR-KABUM-05-CA-016

🚧 This website is under continued development. We appreciate your patience!

Previous Text Back to Volume PageNext Text

Wylie title	'
Location	dil mgo mkhyen brtse bka' 'bum Volume 5, Text 16, Pages (Folios 1a to )
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Citation	Khyentse, Dilgo. '. In Skyabs rje dil mgo mkhyen brtse rin po che'i bka' 'bum, Vol. 5: . Delhi: Shechen Publications, 1994.
Genre	Sadhanas - Evocation Ritual - sgrub thabs

Tibetan Text

Wylie

[edit]

༄༅། དག་སྣང་བཀའ་བརྒྱད་རིག་འཛིན་ཞལ་ལུང་ལས། འཇམ་དཔལ་གཤིན་རྗེ་ཚེ་བདག་གི་དབང་བསྐུར་བཀླག་ཆོག་ཏུ་བཀོད་པ་ཟིལ་གནོན་ཐུགས་ཀྱི་ཐིག་ལེ་ཞེས་བྱ་བ་བཞུགས།

༄༅། །སྒྲིབ་བྲལ་ཡེ་ཤེས་སྐུ་ཅན་མཉྫུ་ཤྲཱི། །སྲིད་ཞི་ཕྱག་རྒྱ་ཟིལ་གནོན་ཁྲོ་བོའི་རྗེ། །བདུད་དང་མུ་སྟེགས་མཐར་བྱེད་དེར་བཏུད་ནས། །དེ་སྒྲུབ་དབང་གི་ཆོ་ག་འདིར་གསལ་བྱ། །སྐུ་དེ་བཞིན་གཤེགས་རིགས་འཇམ་དཔལ་ཁྲག་འཐུང་ཕྱག་རྒྱ་ཟིལ་གནོན་གྱི་དབང་བྱ་བར་འདོད་པས། རྒྱས་པར་སྤྲོ་ན་སྟ་གོན་གསུམ་དང༌། དངོས་གཞི་ལ་ཐུན་མོང་རིགས་དབང་ལྔ་བཅས་བཀའ་བརྒྱད་ཀྱི་དབང་ཆོག་ལྟར་སྦྱར་ཞིང༌། འདིར་གཤིན་རྗེ་རང་གི་དབང་དངོས་འཆད་པ་ལ། གང་དུ་བྱ་བའི་གནས་སུ་གཞུང་མཐུན་གྱི་དཀྱིལ་འཁོར་དབུས་སུ་རྣམ་རྒྱལ་བུམ་པ། གཤིན་རྗེའི་ལྷ་ཙཀ་ཡོངས་རྫོགས། སྔགས་བྱང༌། ཕྱག་མཚན། མངའ་གསོལ་གྱི་ཆས། དུར་ཁྲོད་དཔལ་ཆས། གསང་ཐོད་བདུད་རྩི། རིག་ཙཀ །ཤེལ་རྡོ། མིག་དར། མིག་ཐུར། མེ་ཏོག །དོ་ར། ཕྱག་ཤིང༌། ཟན་ལ་མངར་གསུམ་ཆོས་སྨན་སྦྱར་བས་བམ་ཆེན་ཙོག་པུར་སྡོད་པའི་ལག་པ་བསྣོལ་བ་ལ་སྨན་རཀ །སྤྱི་གཙུག་ཏུ་གཏོར་མ། མར་ཐག་དཀར་དམར་གྱིས་རྐང་ལག་བཅིངས་པ། མཆོད་རྟེན། བཀའ་སྲུང་ལས་གཤིན་གྱི་དམར་གཏོར་ནང་དུ་འཁོར་བཞི། དེ་རྒྱབ་བཅུ་གཉིས་ཀྱིས་བསྐོར། བར་དུ་མཐེབ་ཀྱུས་གཏམས། མེ་རི་ཤ་ཁྲག་གིས་བརྒྱན་པ་ལ། དར་གདུགས་ལས་གཤིན་གྱི་ཙཀ་ལིས་བརྒྱན། ཉེར་སྤྱོད་མཆོད་པས་བསྐོར་ཞིང་སྨན་རཀ་གཏོར་མ། ཚོགས་དཀར་བགེགས་ཆད་བརྟན་སོགས་སྤྱི་ལྟར་འདུ་བྱ་ཞིང༌། སློབ་དཔོན་གྱི་མདུན་དུ་ལས་བུམ། ཐུན་བཟེད། འབྲུ་ཕོར། ཌཱ་རུ། རྡོར་དྲིལ་བཅས་བཀོད་ལ་དངོས་གཞིའི་དབང་སྒྲུབ་ཁྲོ་བོ་སྤྱི་ཡི་ལས་བྱང་གི་ཆིངས་ལྟར་སྐྱབས་སེམས་ནས་གཞལ་ཡས་ཁང་བསྐྱེད་པ། ཐོད་པའི་ར་བ་ཅན། ཕྱི་རོལ་འཁོར་ལོ་རྩིབས་བཞི་བརྒྱད་བཅུ་གཉིས། མགོན་བོ་རློན་པའི་སོགས་ནས་དཀྱུས་ལ་འཇུག །གདན་བསྐྱེད་ཀྱི། །བམ་ལས་རཱུ་ཏྲ་ཕོ་མོ་བསྣོལ་བ་ཡི། །ཞེས་པའི་མཚམས་སུ། གདན་སྟེང་རྒྱུ་ཡིག་ཧཱུྃ་མཐིང་ལས། །དྲུག་པ་རྡོ་རྗེ་འཆང་ཆེན་པོ། །རྒྱལ་བ་ཀུན་གྱི་སྤྱི་གཟུགས་ཅན། །མཐིང་ནག་ཟིལ་གནོན་དྲེགས་པ་འདུལ། །དབུ་གསུམ་ཕྱག་དྲུག་ཞབས་བཞི་བགྲད། །གཡས་དཀར་གཡོན་དམར་དབུས་མཐིང་ཞལ། །འཁོར་ལོ་རལ་གྲི་རྡོ་རྗེ་གཡས། །བེ་ཅོན་གཏུན་ཤིང་སྡིགས་མཛུབ་གཡོན། །རིགས་ལྔའི་ཁྲོ་བོས་དབུ་ལ་བརྒྱན། །དཔལ་གྱི་ཆས་རྫོགས་དུར་ཁྲོད་བརྒྱན། །ཡུམ་ནི་དམིགས་མེད་ཆོས་ཀྱི་དབྱིངས། །མཐིང་ནག་ཙིཏྟ་བྷན་དམར་སྟོབ། །ཡེ་ཤེས་བཞི་ཡི་སྤྲུལ་པ་ཡི། །ཐུགས་ཀར་ཡ་མ་རཱ་ཛ་ནི། །སྨུག་ནག་འཁོར་ལོ་ཙིཏྟ་འཛིན། །ཡ་མའི་ཐུགས་ཀར་དྲེགས་པའི་བདག །ལྗང་ནག་རྡོ་རྗེ་སྙིང་ཕྲེང་འཛིན། །དྲེགས་པའི་ཐུགས་ཀར་ཁྱམས་ཁང་སྟེང༌། །འཇིགས་བྱེད་ཆེན་པོ་ཐུར་དུ་བལྟས། །ལྟོ་བ་སྲིད་གསུམ་ཚེ་སྲོག་འཚང༌། །སྤྱི་གཙུག་མཁའ་ལྡིང་སྤྲུལ་པ་འདུལ། །དཀར་པོ་ཟིལ་གནོན་རོ་ཉེ་ཟ། །ཕྲག་གོང་སྨུག་ནག་འཇིགས་པའི་ཁྱུང༌། །སོག་ཁར་སྟག་མོ་རོ་ལ་རྔམས། །ནུ་ཁར་སེང་གེ་རལ་པ་སྤྲུགས། །རི་རབ་ལྟ་བུར་བརྗིད་པ་ཡི། །སྐུ་ལ་ཁྲོ་རྒྱལ་བཅུ་པོ་རྫོགས། །ཟླ་གམ་གསུམ་ལ་སྤྲུལ་པ་གསུམ། །སྐུ་སྤྲུལ་འཆི་བདག་བྱེ་བ་སྔོ། །གསུང་སྤྲུལ་སྲོག་བདག་དམར་པོ་བརྗིད། །ཐུགས་སྤྲུལ་ཚེ་བདག་མགོ་དགུ་པ། །ཕྱི་རིམ་ཐོད་པའི་མཁར་བཞི་ལ། །གཤེད་པོ་ཡ་མ་རཱ་ཛ་དང༌། །སྲིན་པོ་མྱོས་བྱེད་འབར་བ་དང༌། །ཀླུ་བདུད་ཨརྻ་མེ་རུ་དང༌། །གནོད་སྦྱིན་རལ་པ་ཚར་དགུ་དང༌། །དེ་ཡི་ཕྱི་རིམ་རྩིབས་བརྒྱད་ལ། །ཕྱོགས་བཞི་ལ་ནི་མོན་པ་བཞི། །མཚམས་བཞི་ལ་ནི་བདུད་བཞི་སྟེ། །དེ་དག་ཡུམ་དང་བཅས་པའོ། །ཕྱི་རིམ་ལྕགས་མཁར་བཅུ་གཉིས་ལ། །ལས་ཀྱི་འཆི་བདག་བཅུ་གཉིས་གནས། །དེ་ཡི་ཕྱི་རིམ་བར་ཁྱམས་ལ། །ཕོ་གཤེད་མོ་གཤེད་ལ་སོགས་པའི། །ཤ་ཟ་ཀིང་ཀང་མ་མོའི་ཚོགས། །སྒོ་བཞི་རུ་ནི་རྒྱལ་པོ་དང༌། །མགོན་པོ་བདུད་དང་གནོད་སྦྱིན་བཞི། །ཕྱི་རོལ་འོབས་ཆེན་བཅུ་དྲུག་ལ། །འོབས་སྲུང་ཆེན་པོ་བཅུ་དྲུག་གནས། །དེ་ལྟར་དེ་དག་ཐམས་ཅད་ཀུན། །སེམས་ཉིད་སྟོང་པའི་ཆོ་འཕྲུལ་ཏེ། །ཆོས་ཉིད་དབྱིངས་ལས་ཤར་བས་ན། །བར་སྣང་ཁམས་ཀྱི་འཇའ་ཚོན་ནམ། །མེ་ལོང་ནང་གི་གཟུགས་བརྙན་བཞིན། །སྣང་ལ་རང་བཞིན་མེད་པར་གྱུར། །ཞེས་པའི་མཚམས་དབང་བསྐུར་རྒྱས་བཏབ། སྤྱན་འདྲེན་ནས་བརྩམས། ཧཱུྃ། རང་བྱུང་དཀྱིལ་འཁོར་གཤིན་རྗེ་ཡི། ཞེས་བསྒྱུར། བསྙེན་པ། ཨོཾ་ཨཱཿཧཱུྃ་ཨ་ཀྲོ་ཏེ་ཀ་ཡ་མཱནྟ་ཀ་ཧ་ན་མ་ཐ་བྷཉྫ་ཧཱུྃ་ཕཊ། ཞེས་ཇི་ལྟར་འོས་པ་བཟླ། བུམ་པ་བསྐྱེད་བཟླས་ནི། བུམ་པ་རང་བྱུང་གི་གཞལ་མེད་ཁང་དུ་ལྷ་རྣམས་དྭངས་པའི་མཚོ་ལ་གཟའ་སྐར་ཤར་བ་ལྟར་སྐད་ཅིག་གིས་གསལ་བར་གྱུར། རང་སྲོག་སྔགས་ཀྱི་འོད་ཟེར་གཟུངས་ཐག་ལ། །འཁྲིལ་ཏེ་བུམ་པའི་ལྷ་ཚོགས་ཐུགས་ཀར་ཞུགས། །དེ་དག་སྐུ་ལས་བྱང་སེམས་བདུད་རྩིའི་རྒྱུན། །བབས་པས་བུམ་ཆུར་དབྱེར་མེད་རོ་གཅིག་གྱུར། །གཟུངས་ཐག་བླངས་ཏེ་བཟླས་པ་དང༌། མཐར་མཆོད་བསྟོད་འོད་ཞུ་བྱ། ལས་ཐམས་ཅད་ཀྱི་བུམ་པར། པད་ཉི་དྲེགས་པའི་གདན་གྱི་སྟེང་དུ་ཁྲོ་བོ་བདུད་རྩི་འཁྱིལ་བ་ལྗང་ནག་རྒྱ་གྲམ་དང་གཡོན་དྲིལ་བུ་འཛིན་པ་ཁྲོ་བོའི་ཆས་ཐམས་ཅད་ཀྱིས་བརྒྱན་པ་རིགས་ཀྱི་བདག་པོ་ཨོ་རྒྱན་ཟ་ཧོར་མའི་ཚུལ་དུ་བཞུགས་པའི་སྐུར་གྱུར། རང་འདྲའི་ཡེ་ཤེས་པ་བཛྲ་ས་མ་ཛཿས་སྤྱན་དྲངས། ཛཿཧཱུྃ་བཾ་ཧོཿས་དབྱེར་མེད་དུ་ཐིམ་པར་བསམ། ཨོཾ་བཛྲ་པུཥྤེ་ནས་ཤཔྟ་པྲ་ཏཱིཙྪ་སྭཱ་ཧཱའི་བར་གྱིས་མཆོད། དུས་གསུམ་སངས་རྒྱས་ཐམས་ཅད་ཀྱི། །མངགས་གཞུག་ཕོ་ཉའི་ལས་མཛད་པ། །ཁྲོ་རྒྱལ་བདུད་རྩི་འཁྱིལ་བ་ཡིས། །བགེགས་ཀྱི་སྦྱོར་བ་རྒྱུན་ཆོད་ཅིག །ཨོཾ་བཛྲ་ཀྲོ་དྷ་ཨ་མྲྀ་ཏ་ཀུཎྜ་ལཱི་ཧཱུྃ་ཕཊ། ཅེས་ཅི་ནུས་བཟླས་མཐར། ཨོཾ་ཨཱཿཧཱུྃ་གིས་མཆོད་ཡོན་ཕུལ་ལ་འོད་ཞུ་བྱ། བདག་འཇུག་གམ་རིག་པའི་མེ་ཏོག་དོར་བ་ནི། ཨོཾ་བཛྲ་ས་མ་ཡ་ཨོཾ། ཨཱཿབཛྲ་ས་མ་ཡ་ཨཱཿ ཧཱུྃ་བཛྲ་ས་མ་ཡ་ཧཱུྃ། སྭཱ་བཛྲ་ས་མ་ཡ་སྭཱ། ཧཱ་བཛྲ་ས་མ་ཡ་ཧཱ། ཞེས་དང༌། ཨོཾ་བཛྲ་ཀྲོ་དྷཱ་ས་མ་ཡ་སྟྭཾ། ཞེས་རིག་པའི་མེ་ཏོག་དོར་བས། བདག་དང་དཀྱིལ་འཁོར་པའི་སྐུ་གསུང་ཐུགས་ཕྲིན་ལས་རྣམས་གཉིས་སུ་མེད་པར་གྱུར་བར་བསམ་ལ། ཨོཾ། ཡེ་ཤེས་རྒྱལ་པོ་སྐུ་གསུང་ཐུགས། །ཡོན་ཏན་ཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱོར་བའི། །ཕྱག་རྒྱ་ཆེན་པོ་བདག་སྦྱོར་ཅིག །ཨོཾ་བཛྲ་ས་མ་ཡ་ཧཱུྃ། ཨོཾ་བཛྲ་ས་མ་ཡ་སྟྭཾ། ཨོཾ་ཛྲ་ས་མ་ཡ་ཧོཿ ཞེས་དང༌། ཨོཾ། ཁྲོ་ལ་ཁྲོས་པས་ཞི་མཛད་པ། །ཐུགས་རྗེ་ཁྲོ་དཔལ་རྔམས་པའི་ཚོགས། །འབར་བའི་བྱིན་རླབས་རྨད་པོ་ཆེ། །ད་ལྟ་ཉིད་དུ་བདག་ལ་སྩོལ། །ཨོཾ་བཛྲ་ཀྲོ་དྷ་ས་མ་ཡ་སྟྭཾ། ཨོཾ་བཛྲ་ཀྲོ་དྷ་ས་མ་ཡ་ཕཊ། ཨོཾ་བཛྲ་ཀྲོ་དྷ་ས་མ་ཡ་ཧོཿ ཞེས་དངོས་གྲུབ་བསྐུལ་ཞིང་བསྟིམ་མོ། ཐལ་མོ་སྦྱར་བས་བཏུད་དེ། ཨོཾ་རྡོ་རྗེའི་ཡེ་ཤེས་ཐོབ་བྱེད་པའི། །དེ་བཞིན་གཤེགས་པ་ཐམས་ཅད་ཀྱི། །སྙིང་པོའི་དཀྱིལ་འཁོར་ཆེན་པོ་འདིར། །བདག་གི་སློབ་མ་འཇུག་པར་འཚལ། ཞེས་གསོལ་ནས་སློབ་མ་གཞུག་པར་གནང་བར་ཞུ། ཟུར་གསལ་ལྟར་ལས་གཤིན་གཏོར་ཆོག་སྦྱར། སློབ་མ་ཁྲུས་བྱ། བགེགས་བསྐྲད། སྲུང་འཁོར་བསྒོམ་པ་སྔོན་འགྲོས། ལོ་རྒྱུས་ཀྱི་ཁྱད་པར། བདེ་གཤེགས་སྒྲུབ་པ་བཀའ་བརྒྱད་ལ་འཇིག་རྟེན་ལས་འདས་པའི་སྒྲུབ་སྡེ་ལྔ། འཇིག་རྟེན་པའི་སྒྲུབ་ཚུལ་གཉིས། སོ་མཚམས་ཀྱི་སྒྲུབ་པ་གཅིག་སྟེ་སྡེ་བརྒྱད་དུ་ཕྱེ་བ་ལས། འདི་ནི་འཇིག་རྟེན་ལས་འདས་པའི་སྒྲུབ་ཚུལ་ལྔ་ཡི་ཐོག་མ་སྐུ་དེ་བཞིན་གཤེགས་པའི་རིགས་ཀྱི་ཁྲོ་བོ་བཅོམ་ལྡན་འདས་འཇམ་དཔལ་གཤིན་རྗེ་གཤེད་ཀྱི་སྐོར་ཏེ། དེ་ལ་རྩ་བཤད་མན་ངག་གི་རྒྱུད་དང༌། སྒྲུབ་བརྙེས་སློབ་དཔོན་སོ་སོས་བཀྲལ་བའི་བཀའ་བབ་ཀྱི་ལམ་སྲོལ་མཐའ་ཡས་པས་གངས་ཅན་འདིར་ཡང་སྔ་འགྱུར་རྙིང་མ་ལ་གཤེད་སྐོར་རིགས་ལྔ། ཡེ་ཤེས་ལས་དང་འཇིག་རྟེན་གྱི་གཤིན་རྗེ། ཕྲིན་ལས་ཀྱི་བྱེ་བྲག་རྣ་ཆ་བརྒྱད་དང༌། གསར་མ་ལ་དམར་ནག་འཇིགས་གསུམ་ནང་གསེས་བཅས་བྱོན་པ་ལས། ཡེ་ཤེས་ཀྱི་གཤིན་རྗེ་འཇམ་དཔལ་ཞི་བ་བླ་མེད་ལུགས་ཀྱི་དྲག་སྒྲུབ། འཇམ་དཔལ་སྐུ་ཡི་བཀའ་བབ་སློབ་དཔོན་ཆེན་པོ་འཇམ་དཔལ་བཤེས་གཉེན་དང༌། སློབ་དཔོན་ཆེན་པོ་པདྨ་འབྱུང་གནས། རྒྱ་གར་ཁྲག་འཐུང་ནག་པོ། དྲག་སྔགས་ཀྱི་རིག་འཛིན་ཤཱནྟིཾ་གྷརྦྷ། སློབ་དཔོན་བ་སུ་དྷ་ར་སོགས་བཀའ་སྲོལ་ཟབ་ཅིང་རྒྱ་ཆེ་བ་ཐམས་ཅད་ཀྱི་སྙིང་པོ། རྩ་རྒྱུད་ཟླ་གསང་ནག་པོ་དང༌། །སྡིག་པ་སྙིང་འཛིན་སོགས་ཀྱི་རྒྱུད་དོན་ལག་ལེན་དུ་བསྡེབས་པ་སངས་རྒྱས་གཉིས་པ་པདྨ་འབྱུང་གནས་དང༌། གནུབས་ཆེན་སངས་རྒྱས་ཡེ་ཤེས་ཡབ་སྲས་ལས་བརྒྱུད་དེ་ལྕགས་འདྲ་དང་ལྕགས་སྡིག་སོགས་ཀྱི་མན་ངག་འབྲི་བྱང་གི་ཤིང་རྟ་གཉིས་ལ་ཡོངས་སུ་གྲགས་པ་ལས། སྐབས་སུ་བབ་པ་ཡབ་གཅིག་འཇམ་དབྱངས་དངོས་ཚངས་པ་ལྷ་ཡི་མེ་ཏོག་གིས་ཕྲིན་ལས་ཀྱི་ཕྱག་རྒྱ་གངས་ཅན་འགྲོ་བའི་དཔལ་དུ་བྱོན་པའི་སྔགས་སྨྱོན་ཟིལ་གནོན་བཞད་པ་རྩལ་གྱི་དག་ཆེན་ཆོས་རྒྱུན་གྱི་ཏིང་ངེ་འཛིན་གྱི་རོལ་མོ་མཐའ་ཀླས་ལས་བྱོན་པའི་འཇམ་དཔལ་གཤིན་རྗེ་གཤེད་ཀྱི་དངོས་གཞིའི་དབང་བསྐུར་བའི་ཐོག་མ་ཕྱི་ནང་གི་འཇུག་པའི་ཆོས་རྣམས་ཞུ་བའི་ཡོན་དུ་མཎྜལ་ཕུལ། སློབ་དཔོན་དང་དཀྱིལ་འཁོར་གཙོ་བོ་དབྱེར་མི་ཕྱེད་པ་ལ་དད་མོས་དྲག་པོས་ཐལ་སྦྱར་མེ་ཏོག་དང་བཅས་པས་གསོལ་བ་འདེབས་པ་འདི་ཡི་རྗེས་ཟློས་མཛོད། །བླ་མ་སངས་རྒྱས་ཀུན་དང་མཉམ། །སློབ་དཔོན་ལ་ནི་སྐྱབས་སུ་མཆི། །སྒྲུབ་པ་བཀའ་བརྒྱད་འཁོར་དང་བཅས། །ལྷ་རྣམས་ལ་ཡང་ཕྱག་འཚལ་ལོ། །མྱ་ངན་འདས་པའི་གྲོང་ཁྱེར་དུ། །སློབ་དཔོན་གྱིས་ཀྱང་བདག་གཞུག་གསོལ། །ལན་གསུམ་བརྗོད་ནས་གདོང་གཡོགས་ནི། ཨ་ཁཾ་བི་ར་ཧཱུྃ། མེ་ཏོག་ཕྲེང་བ་ནི། ཨོཾ་པུཥྤེ་རཏྣ་མ་ལྱ་ཏྲཾ་གྱིས་སྦྱིན། ཚོགས་ཞིང་མཁའ་ཁྱབ་ཏུ་སད་པས་སྐྱབས་སུ་འགྲོ་བ་འདིའི་རྗེས་ཟློས་མཛོད། །བླ་མ་དཀོན་མཆོག་དགོངས་སུ་གསོལ། །བདག་ནི་དུས་འདི་ནས་བཟུང་ནས། །ཇི་སྲིད་བྱང་ཆུབ་མ་ཐོབ་པར། །སྐྱོབ་པ་ཁྱེད་ལ་སྐྱབས་སུ་མཆི། ལན་གསུམ། ཐེག་པ་ཆེན་པོའི་ལམ་གྱི་རྩ་བ་སྨོན་པ་སེམས་བསྐྱེད་པ་འདིའི་རྗེས་ཟློས་མཛོད། ཧཱུྃ། དུར་ཁྲོད་གསང་བ་མཆོག་གི་དཀྱིལ་འཁོར་དུ། །བླ་མེད་བྱང་ཆུབ་གནས་སུ་སྒྲུབ་པ་དང༌། །བདེ་བར་གཤེགས་པའི་དངོས་གྲུབ་ཐོབ་བྱའི་ཕྱིར། །ཡང་དག་བྱང་ཆུབ་མཆོག་ཏུ་སེམས་བསྐྱེད་ཅིག །བོ་དྷི་ཙིཏྟ་ཨུ་པ་ཏ་ཡ་མི། ལན་གསུམ། འཇུག་པ་བྱང་ཆུབ་མཆོག་ཏུ་སེམས་བསྐྱེད་པས་གཞན་དོན་ཁས་བླང་བ་འདི་ཡི་རྗེས་ཟློས་མཛོད། །ཇི་ལྟར་དུས་གསུམ་མགོན་པོ་རྣམས། །ཡང་དག་བྱང་ཆུབ་ངེས་མཛད་པ། །དེ་ཕྱིར་བླ་མེད་བྱང་ཆུབ་སེམས། །དམ་པ་བདག་གིས་བསྐྱེད་པར་བགྱི། ལན་གསུམ་བརྗོད། སྨིན་བྱེད་ཀྱི་སྲོག་དང་རྩ་བར་གྱུར་པ་སྤྱི་དང་ཁྱད་པར་གྱིས་བསྡུས་པའི་སྡོམ་པ་དང་དམ་ཚིག་མཐའ་དག་ལེགས་པར་བླངས་ནས་ཚུལ་བཞིན་བསྲུང་སྙམ་པས་འདི་ཡི་རྗེས་ཟློས་མཛོད། །སྡོམ་པ་ཡི་ནི་ཚུལ་ཁྲིམས་དང༌། །དགེ་བའི་ཆོས་ནི་སྡུད་པ་དང༌། །སེམས་ཅན་དོན་བྱེད་ཚུལ་ཁྲིམས་གསུམ། །ནམ་ཡང་བདག་ནི་མི་སྤང་ངོ༌། །རྡོ་རྗེ་དྲིལ་བུའི་ཕྱག་རྒྱ་ཡང༌། །ཡང་དག་ཉིད་དུ་གཟུང་བར་བགྱི། །སློབ་དཔོན་བདག་ཀྱང་གཟུང་བར་བགྱི། །ཉིན་རེ་བཞིན་ནི་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ནི་མ་ལུས་གཟུང༌། །སྡོམ་པ་རྣམ་བཞི་རྟག་ཏུ་གཟུང༌། །བདག་ནི་སྡོམ་པ་མ་ལུས་གཟུང༌། ལན་གསུམ་བརྗོད། ནང་དུ་གཞུག་ཅིང་ཕྱག་བྱ་བ་ནི། སློབ་དཔོན་གྱི་ཕྱག་གི་རྡོ་རྗེ་ལ་འཇུས་ཏེ། ཛཿཧཱུྃ་བྃ་ཧོཿ ཞེས་དཀྱིལ་འཁོར་གྱི་ཤར་སྒོའི་ནང་དུ་ཁྲིད་པར་མོས་ལ། །དུས་གསུམ་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་བདག་ཉིད་མཆོག །བདེ་གཤེགས་རྒྱལ་བ་འཁོར་བཅས་ལ། །ལུས་ངག་ཡིད་ཀྱིས་ཕྱག་འཚལ་ལོ། །ཞེས་བརྗོད་དེ་ཤར་སྒོ་ནས་ཕྱག་བྱས་པར་མོས། དེ་བཞིན་དུ་ཕྱོགས་གཞན་གསུམ་ནས་ཕྱག་བྱས་པར་མོས་ཏེ་མཐར་ཤར་སྒོའི་ནང་དུ་དབང་སྟེགས་ལ། གཙོ་བོ་ཞལ་གཅིག་ཕྱག་གཉིས་པའི་ང་རྒྱལ་ལ་གནས་པར་བསམ་ལ། དམ་བཞག་བཞི་ཡོད་པ་ལས་ཕན་ཡོན་གྱི་སྒོ་ནས་དམ་ལ་བཞག་པ་ནི། རྡོ་རྗེ་མགོར་བཞག་ལ། །རིགས་ཀྱི་བུ་མཆོག་ཚུར་ཉོན་ཅིག །དེང་ཁྱོད་བདེ་གཤེགས་འཁོར་བཅས་ཀྱིས། །ནང་དུ་ཁྲིད་ཀྱིས་ཞུགས་པ་ཡིན། །སློབ་དཔོན་ལུང་བསྟན་ངས་ཀྱང་ནི། །བཅོམ་ལྡན་འཇམ་དཔལ་གཤིན་རྗེ་ཡི། །ཡེ་ཤེས་ཁྱེད་ལ་བསྐྱེད་པར་བྱ། །རྣལ་འབྱོར་བུ་མཆོག་ཁྱེད་ཀྱིས་ཀྱང༌། །དེ་བཞིན་གཤེགས་པའི་དཀྱིལ་འཁོར་གྱི། དངོས་གྲུབ་དམ་པ་ཐོབ་པར་འགྱུར། །དངོས་གྲུབ་གཞན་ལྟ་སྨོས་ཅི་དགོས། །ཁྱེད་ཀྱིས་དཀྱིལ་འཁོར་མ་མཐོང་བའི། །དྲུང་དུ་སྨྲ་བར་མ་བྱེད་ཅིག །གལ་ཏེ་སྨྲས་པར་གྱུར་ན་ནི། །དམ་ཚིག་ཉམས་ཏེ་དམྱལ་བར་འགྲོ། །དམ་ཚིག་མ་སྲུང་བའི་ཉེས་དམིགས་བསྒྲགས་པས་དམ་བཞག་པ་ནི། རྡོ་རྗེ་སྙིང་གར་གཏུགས་ཏེ། །བཅོམ་ལྡན་སྒྲུབ་པ་འཇམ་དཔལ་གཤིན་རྗེ་ནི། །ཁྱེད་ཀྱི་སྙིང་ལ་གཞུག་པས་ན། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། ཞེས་བརྗོད། དམ་ཚིག་བསྲུང་བའི་དཔང་པོ་བདུད་རྩི་བྱིན་པས་དམ་ལ་བཞག་པ་ནི། །འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་ཉམས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་ཐོབ། །རྡོ་རྗེ་བདུད་རྩིའི་ཆུ་འདིས་འགྲུབ། །ཨོཾ་བཛྲ་པཉྩ་ཨ་མྲྀ་ཏ་ཧ་ན་ཧ་ན་ཨུ་ད་ཀ་ཧཱུྃ་ཕཊ། བླ་མའི་བཀའ་ཉན་པའི་ཚུལ་གྱིས་དམ་ལ་བཞག་པ་ནི། རྡོ་རྗེ་མགོ་བོར་བཞག་ལ། དེང་ནས་བརྩམས་ཏེ་ཐམས་ཅད་དུ། །ཧེ་རུ་ཀ་དཔལ་ང་ཡིན་གྱི། །ང་ཡིས་སྨྲས་པ་བུ་ཡིས་གྱིས། །ང་ལ་བརྙས་པར་བྱས་ན་ནི། །ཁྱོད་ནི་སྡུག་བསྔལ་མ་བྲལ་བར། །ཚེ་ཡི་འདུ་བྱེད་བྱས་ནས་ནི། །སེམས་ཅན་དམྱལ་བ་ཆེན་པོར་ལྷུང༌། ཞེས་བརྗོད། དབང་གི་གཞི་ཡེ་ཤེས་དབབ་པ་ལ་གསོལ་བ་གདབ་པ་འདི་ཡི་རྗེས་ཟློས་མཛོད། ཧཱུྃ། བླ་མ་ཡི་དམ་དགོངས་སུ་གསོལ། །འཇམ་དཔལ་གཤིན་རྗེའི་དཀྱིལ་འཁོར་འདིར། །དེ་རིང་བདག་སོགས་མཆེད་ལྕམ་ལ། །བྱིན་ཆེན་དབབ་ལ་དབང་ཆེན་བསྐུར། །ཞེས་ལན་གསུམ་གྱིས་གསོལ་བ་གདབ། སློབ་མ་རྣམས་ལུས་གནད་ཆོས་བདུན་བཅས། ངག་གནད་བུམ་ཅན་ནམ་རླུང་རང་སོར་བཞག །སེམས་ཀྱི་རྟོག་པ་སྐད་ཅིག་ཀྱང་མ་ཡེངས་པར་དམིགས་པ་འདི་ལྟར་བསྒོམ་པར་ཞུ། ཨོཾ་བཛྲ་ཨ་མྲྀ་ཏས་བགེགས་བསང༌། སྟོང་པའི་ངང་ལས་གྲུ་གསུམ་མཐིང་ནག་ཟླ་གམ་དམར་པོ་གསུམ་ལྡན་གྱི་ལྟེ་བར་ཨེ་ཀློང་ཆོས་དབྱིངས་རྡོ་རྗེ་བཙུན་མོའི་མཁའ་ལ་ཀླུ་འབུམ་གཉན་ཁྲི་ས་བདག་སྟོང་སྡེ་བརྒྱད་ཕྱོགས་སྐྱོང་རུ་དྲ་ཕོ་མོ་མ་ཧེ་གླང་རྒོད་བརྒྱད་པད་ཉིའི་སྟེང་དུ་རྒྱལ་ཀུན་སྤྱི་གཟུགས་སྐུ་རྡོ་རྗེ་འཇམ་དབྱངས་དྲག་པོར་ཁྲོས་པ་ཟིལ་གནོན་ཕྱག་རྒྱ་ཆེན་པོ་གཡས་དཀར་ཀླུ་འབུམ་མཐོང་བའི་དུག་ཅན་སྦྲུལ་འབུམ། གཡོན་དམར་གཉན་རྭ་ཡི་དུག་ཅན་ལྕང་མོ་ཁྲི། དབུས་ཞལ་མཐིང་ནག་ས་བདག་མཆེ་བའི་དུག་ཅན་སྦལ་པ་མགོ་སྟོང་རྣམས་ཟ་བ། །གཡས་གསུམ་རྡོ་རྗེ་འཁོར་ལོ་རལ་གྲི། གཡོན་གསུམ་བེ་ཅོན་གཏུན་ཤིང་སྡིགས་མཛུབ་ཅན། ཞབས་བརྐྱང་བསྐུམ་དུ་བགྲད་པས་དྲེགས་པ་ཅན་ཐམས་ཅད་མནན་པ། དཔལ་དང་དུར་ཁྲོད་ཀྱི་ཆས་ཀྱིས་བརྒྱན་ཅིང༌། ཁྲོ་གཏུམ་གར་དགུའི་གཟི་བྱིན་འབར་བ། །ཡུམ་བཻ་ཏ་ལི་སྙིང་དང་གྲི་ཐོད་འཛིན་པ་གཉིས་མེད་དུ་སྦྱོར་བ། གཙོ་བོའི་ཐུགས་ཀར་ཡ་མ་རཱ་ཛ་འཁོར་ལོ་དང་ཙིཏྟ། དེའི་ཐུགས་ཀར་དྲེགས་པ་ཕྱག་ན་རྡོ་རྗེ་རྡོ་རྗེ་དང་སྙིང་ཕྲེང༌། དེའི་ཐུགས་ཀར་རུས་སྦལ་རྔམ་པ་མི་ཟན། སྤྱི་བོར་ཤེལ་གྱི་བྱ་ཁྱུང༌། ཕྲག་གོང་དུ་ཁྱུང་མོ་སྔོ་ནག་གཉིས། དཔུང་པར་སྟག་མོ་མི་ཟན། ནུ་མར་སེང་གེ །སྟ་ཟུར་དུག་སྦྲུལ་དང་ལྕེ་སྤྱང་སྟེ་རྒྱན་གྱི་ལྷ་བརྒྱད་ཁྲོ་བཅུའི་གོ་ཆ་དང་བཅས་གསལ་བའི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་མཐིང་གས་མཚན་པ། སངས་རྒྱས་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་རང་བཞིན་དུ་བྱིན་གྱིས་བརླབས་པ་དང་སློབ་དཔོན་དང་དཀྱིལ་འཁོར་གྱི་ལྷ་ཚོགས་ལ་མོས་གུས་ཤུགས་དྲག་ཏུ་བསྐྱེད་པའི་རྐྱེན་གྱིས། སློབ་དཔོན་དང་དཀྱིལ་འཁོར་གྱི་ལྷ་དབྱེར་མེད་པའི་ཐུགས་ཀའི་འོད་དང་སྙོམས་འཇུག་བདེ་བའི་སྒྲས་བསྐུལ་ཏེ། མཁའ་ཁྱབ་ཀྱི་རྩ་གསུམ་རྒྱལ་བ་སྲས་དང་བཅས་པ། སྐུ་ཕྱག་རྒྱ། གསུང་ཡིག་འབྲུ། ཐུགས་ཕྱག་མཚན་གྱི་རྣམ་པ་ཁ་ཆར་བུ་ཡུག་འཚུབ་པ་བཞིན་བྱོན་ནས་སློབ་མའི་སྒོ་གསུམ་ལ་སིབ་སིབ་ཐིམ་པར་བསམ་ལ་སློབ་དཔོན་གྱིས་དགོངས་པའི་གདིང་བསྐྱེད། འབེབས་པའི་རྫས་བདུན་རོལ་མོ་དབྱངས་དང་བཅས་པས། ཨ་ལ་ལ་ཧོཿ ས་མ་ཡ་ཧོཿ ས་མ་ཡ་སྟྭཾ༔ འཕགས་མཆོག་ཐུགས་རྗེ་སོགས་དང༌། ཨོཾ་ཨཱཿཧཱུྃ་ཨ་ཀྲོ་ཏེ་ཀ་ཡ་མཱནྟ་ཀ་ཧ་ན་མ་ཐ་བྷཉྫ་ཧཱུྃ་ཕཊ། ཛྙཱ་ན་ཨ་བེ་ཤ་ཡཿ སྟྭཾ་བྷ་ཡ་སྟྭཾ་བྷ་ཡ༔ ར་ར་ར་ར། ཙ་ལ་ཡ་ཙ་ལ་ཡ༔ ཧཱུྃ་ཨ་ཧེ་ཛྷེཾ༔ ཞེས་དྲག་ཏུ་བཟླས་ལ་དབབ། ཡེ་ཤེས་པའི་བྱིན་རླབས་ཀྱི་རྒྱུན་བྱང་ཆུབ་མ་ཐོབ་ཀྱི་བར་དུ་སྒོ་གསུམ་ལ་བརྟན་པར་བྱས་མོས་ཤིག༔ ཏིཥྛ་བཛྲ། ཞེས་རྡོ་རྗེ་མགོ་བོར་རྒྱ་གྲམ་དུ་བཞག །ཁྱེད་རྣམས་ཀྱི་སྤྱན་མིག་དར་གྱིས་བཀབ་སྟེ་དཀྱིལ་འཁོར་ལ་ལྟོས་དང་ཁ་དོག་གང་མཐོང་བ་བདག་ལ་སྨྲོས་ཤིག །སློབ་མ་རྣམས་ཀྱིས་གང་མཐོང་བ་ཞུས་པས། སློབ་དཔོན་གྱིས་ལས་བཞིའི་ཁ་དོག་གང་མཐོང་བ་དེ་རིགས་དང་དངོས་གྲུབ་འགྲུབ་པར་ལུང་བསྟན། འགྲིམ་དཀྱིལ་བསྟར་ལ། །སྔར་བྱིན་པའི་མེ་ཏོག་ཅོད་པན་དེ་ཉིད་རང་རང་གི་ཚེ་རབས་སྔོན་ནས་འབྲེལ་བའི་རིགས་ཀྱི་ལྷ་གང་ཡིན་པ་ལ་ཕོག་པར་ཤོག་ཅིག་སྙམ་པས་དཀྱིལ་འཁོར་ཆེན་པོར་དོར་བའི་མོས་པས་ཚིག་འདི་རྗེས་ཟློས་དང་བཅས་ཏེ་དོར་བར་ཞུ། དཀྱིལ་འཁོར་ལྷ་ཚོགས་དྲུང་དུ་བདག་མཆི་ཡིས། །དཔལ་ཆེན་གཤིན་རྗེའི་དཀྱིལ་འཁོར་ཆེན་པོ་རུ། །དངོས་གྲུབ་ཐོབ་ཕྱིར་དབུས་སུ་མེ་ཏོག་དོར། །སྔོན་སྦྱངས་ལས་འཕྲོ་གང་ཡོད་དེར་བབ་ཤོག །པྲ་ཏཱིཙྪ་ཧོཿ དེ་ལྟར་ཕུལ་བ་ཉིད་ལྷག་པའི་ལྷས་བཞེས་ཏེ་སླར་ཡང་དབང་རྟགས་ཅོད་པན་གྱི་ཚུལ་དུ་སྤྱི་བོར་བཅིངས་པ་དང་ལྷན་ཅིག་དཔལ་ཆེན་པོ་ཡེ་ཤེས་ཀྱི་ཕྱག་རྒྱ་གཉིས་པ་འཕྲོས་ཏེ་སྤྱི་བོར་ཐིམ་པར་མོས་ཤིག །སྐབས་འདིར་སྤྲོ་ན་མེ་ཏོག་གང་དུ་བབ་པའི་རིགས་དང་མཐུན་པའི་དབང་མིང་གདགས། ཧཱུྃ། ཅོད་པན་འདི་ནི་དཔའ་བའི་རྟགས། །སྨོན་ལམ་མཐུན་པའི་ལྷས་བྱིན་བརླབས། །བར་ཆད་ཀུན་གྱིས་མི་ཚུགས་ཤིང༌། །འཁོར་བའི་སྐྱོན་གྱིས་མི་གོས་ཤོག །པུཥྤེ་ཨབྷི་ཥིཉྩ་མཾ༔ སློབ་དཔོན་གྱི་ཐུགས་ཀ་ནས་ཡེ་ཤེས་ཀྱི་འོད་ཟེར་གསེར་གྱི་ཐུར་མ་ལྟ་བུ་བྱུང༌། །ཁྱེད་རང་རྣམས་ཀྱི་མ་རིག་པའི་སྒྲིབ་གཡོགས་མིག་དར་དང་ལྷན་ཅིག་སངས་ཀྱིས་གསལ་བར་མོས་ཤིག །རྡོ་རྗེས་མིག་འབྱེད་པའི་ཚུལ་བྱས། །སྐལ་བཟང་ཁྱེད་ལ་གཞལ་ཡས་ངས་བསྟན་ཕྱིར། །རབ་ཏུ་དགའ་བར་བསྐྱེད་ལ་གུས་པར་གྱིས། །མ་རིག་མུན་སེལ་ཡེ་ཤེས་མིག་དབྱེ་ཡི། །གསལ་ཞིང་དྭངས་པས་སེམས་ཅན་དོན་ལ་ལྟོས། །ཨོཾ་བཛྲ་པྲ་བེ་ཤ་ཡ་ཕཊ། ཅེས་བརྗོད་ཅིང་མིག་དར་བསལ། དཀྱིལ་འཁོར་བལྟ་བར་བསྐུལ་བ་ནི། དཀྱིལ་འཁོར་བཟང་པོ་ཉིད་ལ་ལྟོས། །ཤེས་རབ་རྣམ་གསུམ་རབ་ཏུ་བསྐྱེད། བདེ་བར་གཤེགས་པའི་བྱིན་གྱིས་བརླབས། །དངོས་གྲུབ་ཐམས་ཅད་མངོན་དུ་འགྱུར། འགྲོ་བ་རིགས་དྲུག་ཐམས་ཅད་ལ། །བུ་བཞིན་སྙིང་རྗེ་ཀུན་ལ་སྐྱེད། །གསང་བའི་ཆོས་ལ་དད་པར་གྱིས། །ཞེས་བརྗོད་ནས་རྟེན་བརྟེན་པའི་དཀྱིལ་འཁོར་རྣམས་རྒྱས་པར་བསྟན། དག་པ་ཡེ་ཤེས་ཀྱི་སྤྱན་ཐོབ་པའི་མཚོན་བྱེད་ལྷག་པ་གཟུགས་བརྙན་གྱི་དཀྱིལ་འཁོར་རྟེན་དང་བརྟེན་པ་བུམ་པ་ལ་སོགས་པའི་རྫས་རྣམས་བཀྲ་ལམ་མེ་མཇལ་བ་ལ་བརྟེན་ནས་མཚོན་བྱ་དོན་གྱི་དཀྱིལ་འཁོར་ལྷག་པ་ཏིང་ངེ་འཛིན་གྱིས་སྤྲུལ་པའི་གཞལ་མེད་ཁང་རྡོ་རྗེའི་རྭ་གུར་མེ་དཔུང་གི་དབུས་གྲུ་གསུམ་མཐིང་ནག་ཟླ་གམ་དམར་པོ་གསུམ་ལྡན་གྱི་ལྟེ་བར་ཨེ་ཀློང་ཆོས་དབྱིངས་རྡོ་རྗེ་བཙུན་མོའི་མཁའ་ལ་ཀླུ་འབུམ་གཉན་ཁྲི་ས་བདག་སྟོང་སྡེ་བརྒྱད་ཕྱོགས་སྐྱོང་རུ་ཏྲ་ཕོ་མོ་མ་ཧེ་གླང་རྒོད་བརྒྱད་པད་ཉིའི་སྟེང་དུ་རྒྱལ་ཀུན་སྤྱི་གཟུགས་སྐུ་རྡོ་རྗེ་འཇམ་དཔལ་དབྱངས་དྲག་པོར་ཁྲོས་པ་སོགས་ནས་རྒྱན་གྱི་ལྷ་བརྒྱད་ཁྲོ་བཅུའི་གོ་ཆ་དང་བཅས་པའི་བར་བྱིན་འབེབས་ལྟར་ལ། ལྷག་པའི་བདེ་ཆེན་ཡེ་ཤེས་བཞིའི་ཐོད་མཁར་གྱི་གློ་འབུར་བཞི་ལ་ཤར་དུ་ཡ་མ་རཱ་ཛ། ལྷོར་ཡ་བ་ཏི། ནུབ་ཏུ་ཨ་བ་གླང་མགོ །བྱང་དུ་རལ་པ་ཚར་དགུ་སྟེ་ཡེ་ཤེས་ལྔའི་རང་བཞིན་རྩ་བའི་ལྷ་ལྔ། ཚད་མེད་བཞིའི་བདག་ཉིད་གྲུ་ཆད་བཞི་རུ་ཕྱལ་པ། ཏིལ་པ། འཕྱར་ཀ་གྭ་དམར། མ་རུ་རྩེ་ལྔ་ལ་གཤེད་ཆེན་བཅུ་གཉིས་ཀྱིས་བསྐོར་བ། དེའི་ཕྱི་སྐྱེ་མཆེད་བཅུ་གཉིས་དག་པའི་ལྕགས་མཁར་དུ་ཟླ་གཤེད་འཆི་བདག་བཅུ་གཉིས། འོབས་ཆེན་བཅུ་དྲུག་ཏུ་ཞག་གཤེད་སོ་གཉིས། ཕྲིན་ལས་བཞིའི་ཁམས་ལ་ཕོ་གཤེད་མོ་གཤེད་བདུད་དང་མོན་པ་ཀིང་ཀང་མ་མོའི་འཁོར་ཚོགས། བདག་ཏུ་ལྟ་བ་དག་པའི་ལྷ་མགོན་བདུད་དང་གནོད་སྦྱིན་གྱི་སྒོ་བ་བཞི་སྟེ་གཙོ་དང་འཁོར་དུ་སྣང་བ་དེ་དག་ཀྱང་རྣམ་འགྱུར་སྲིད་ཞི་དབྱིངས་སུ་ཟ་བའི་དུས་ཀྱི་དགྲ་ཆེན་པོ་ཁམས་གསུམ་སྐྱེ་འཆི་སྲོག་གི་བདག་པོ་འཇིགས་བྱེད་གཤིན་རྗེ་རོལ་པའི་ཆོ་འཕྲུལ་དུ་རྔམས་པར་སྟོན་ཀྱང་དོན་ལ་འཇམ་དཔལ་ཡེ་ཤེས་སེམས་དཔའ་གཅིག་གི་ཡེ་ཤེས་སྒྱུ་མའི་རྣམ་རོལ་གཞི་ལམ་འབྲས་བུའི་ཡོན་ཏན་མ་ལུས་པ་ལྷུན་གྱིས་རྫོགས་པའི་བདག་ཉིད་ཆེན་པོ་གང༌། ཕྱི་རས་བྲིས་ཀྱི་དཀྱིལ་འཁོར་འདི་ནི་དཔེས་མཚོན་པ་ཡིན་གྱི་དོན་ཕུང་ཁམས་སྐྱེ་མཆེད་ཐམས་ཅད་ལྷའི་ངོ་བོར་ལྷུན་གྲུབ་ཏུ་གནས་ཏེ་ཕྱི་ནང་གཞན་གསུམ་དབྱེར་མེད་ངོ་བོ་གཅིག་ཏུ་རྫོགས་པའི་དོན་རྟོགས་པར་མོས་མཛོད། ཞུགས་པ་ལ་མངོན་པར་དབང་བསྐུར་བའི་དོན་དུ་མཎྜལ་ཕུལ། གསོལ་བ་གདབ་པ་འདིའི་རྗེས་ཟློས་མཛོད། ཕྱག་རྡོར་བདུད་སྡེ་ཕྱེར་འཐག་དབང་ལ། ཧོ། བླ་མ་གསང་བའི་བདག་པོ་ལ། །དེང་ནས་བྱང་ཆུབ་མ་ཐོབ་བར། །སྙིང་ནས་གུས་པས་གསོལ་བ་འདེབས། །དངོས་གྲུབ་ཟབ་མོ་བསྩལ་དུ་གསོལ། ཞེས་བསྒྱུར་དགོས། མཆན རྡོ་རྗེ་འཛིན་པ་དགོངས་སུ་གསོལ། །འཇམ་དཔལ་གཤིན་རྗེའི་དཀྱིལ་འཁོར་དུ། །བུམ་པའི་དབང་བསྐུར་བསྩལ་དུ་གསོལ། །ཞེས་གསོལ་བ་བཏབ་པས་སྒོས་བཀའ་སོ་སོ་ལ་ཐུན་མོང་རིགས་པའི་དབང་ལྔ་སྦྱོར་ན་འདི་ན་བཀའ་བརྒྱད་རིག་འཛིན་ཞལ་ལུང་གི་དབང་ལྟར་ཤེས་པར་བྱའོ། མཆན་ དེ་བཞིན་གཤེགས་པ་རྣམས་ཀྱིས་དབང་བསྐུར་བའི་དགོངས་པ་མཛད། བྱང་ཆུབ་སེམས་དཔའ་རྣམས་ཀྱིས་བཀྲ་ཤིས་བརྗོད། སེམས་མ་རྣམས་ཀྱིས་རྡོ་རྗེའི་གླུ་ལེན། ཁྲོ་བོ་ཁྲོ་མོ་རྣམས་ཀྱིས་བགེགས་བསྐྲད། རིག་པའི་ལྷ་མོ་རྣམས་དང་སློབ་དཔོན་ལྷན་ཅིག་པས་རྣམ་པར་རྒྱལ་བའི་བུམ་པས་དབང་བསྐུར་བར་མོས་ཤིག །བུམ་པ་སྤྱི་བོར་བཞག་ལ། ཧཱུྃ། ཁྲག་འཐུང་འཇམ་དཔལ་གཤིན་རྗེ་གཤེད། །གསང་བ་གསུམ་ལས་བྱུང་བ་ཡི། །བུམ་པའི་དབང་བསྐུར་ཆེན་པོ་འདི། །སྐལ་ལྡན་བུ་ལ་སྦྱིན་པར་བྱ། ཨོཾ་ཨཱཿཧཱུྃ་ཨ་ཀྲོ་ཏེ་ཀ་ཡ་མཱནྟ་ཀ་ཧ་ན་མ་ཐ་བྷཉྫ་ཧཱུྃ་ཕཊ། ཡ་མ་རཱ་ཛ་ཀ་ལ་ཤ་ཨ་བྷི་ཥིཉྩ་མཾ། དེ་ལྟར་རྣམ་རྒྱལ་བུམ་པའི་དབང་བསྐུར་བས་སྣོད་བཅུད་ལྷ་དང་གཞལ་ཡས། ཕུང་པོ་ཁམས་དང་སྐྱེ་མཆེད། ལྷ་དང་ལྷ་མོར་གནས་དག་སྟེ་ཉོན་མོངས་པ་དུག་ལྔ་སྦྱངས༌། རིགས་ལྔ་ཡེ་ཤེས་མངོན་དུ་གྱུར་ནས་ནམ་མཁར་བཞུགས་པའི་དབང་ལྷ་རྣམས་ཀྱང་འོད་ཕུང་གི་རྣམ་པས་ཁྱེད་རང་ལ་ཐིམ་པར་མོས་ཤིག །དེ་དག་གིས་ཕྱི་དབང་རྫས་ལ་བརྟེན་ནས་བསྐུར་བའི་རྗེས་སུ། ནང་ནུས་པ་འཇུག་པའི་དབང་གི་སླད་དུ་དཀྱིལ་འཁོར་གྱི་ལྷ་ཚོགས་རྣམས་ལས་མར་མེ་གཅིག་ལས་གཉིས་མཆེད་ཀྱི་ཚུལ་དུ་ལྷ་སྐུ་ཕྱག་རྒྱའི་རྣམ་པ་སྤྱི་བོ་ནས་བྱོན་ཏེ་དབང་བསྐུར་བར་མོས་ཤིག །ཧཱུྃ༔ བསྐལ་པ་མེ་ལྟར་འབར་བའི་དཀྱིལ་འཁོར་དུ། །ལྷ་ཡི་ལྷར་གྱུར་བཅོམ་ལྡན་གཤིན་རྗེའི་གཤེད། །སྲིད་གསུམ་སྒྲོལ་བའི་དབུ་གསུམ་ཞལ་ནི་རྔམ། །རྒྱུད་དྲུག་སྒྲོལ་མཛད་ཕྱག་མཚན་མེ་ལྟར་འབར། །སྡེ་བརྒྱད་འདུལ་བའི་དཔའ་བོའི་ཆས་བརྒྱད་བརྒྱན། །དྲེགས་པའི་གཤེད་མཛད་ཟིལ་གནོན་དབང་ཐོབ་ཤོག །ཨེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ་ཨ་བྷི་ཥིཉྩ་ཧཱུྃ། ཧཱུྃ༔ མི་འགྱུར་མཐིང་ནག་མ་མོ་ཀུན་གྱི་གཙོ། །ཁམས་གསུམ་དབང་སྡུད་ཁྲག་མཚོ་ཞལ་དུ་གསོལ། །ཞིང་བཅུ་སྒྲོལ་མཛད་ཙིཏྟ་ཡབ་ལ་འཁྱུད། །སྒྲོལ་བྱེད་ནག་མོ་ཡུམ་གྱི་དབང་ཐོབ་ཤོག །ཨེ་ཀ་ཡ་མ་ཏྲ་ཀ་རཀྴ་ཀྲོ་དྷི་ཨ་བྷི་ཥིཉྩ་ཧཱུྃ། ཧཱུྃ། སྨུག་ནག་འཇིགས་པ་དྲེགས་པ་ཀུན་གྱི་གཤེད། །ལོག་ལྟའི་སྦོར་བ་མ་ལུས་སྟོབས་ཀྱིས་གདོན། །འཁོར་ལོ་ཙིཏྟ་ཕྲེང་བ་ཕྱག་ན་བསྣམས། །གསོད་བྱེད་ཡ་མ་རཱ་ཛའི་དབང་ཐོབ་ཤོག །ཨེ་ཀ་ཧེ་དུ་ན་ཡ་མ་རཱ་ཛ་ཨ་བྷི་ཥིཉྩ་ཧཱུྃ། ཧཱུྃ། དྲེགས་པ་ཕྱག་ན་རྡོ་རྗེ་ནི། །མཐུ་སྟོབས་རྡོ་རྗེ་སྡིགས་མཛུབ་བགྲད། །ལྗང་ནག་ཀླུ་གཉན་གནོད་སྦྱིན་གཟིར། །རྡོ་རྗེ་ཁྲོས་པའི་དབང་ཐོབ་ཤོག །ཨོཾ་བཛྲ་པཱ་ཎི་ཨ་བྷི་ཥིཉྩ་ཧཱུྃ། ཧཱུྃ། རུས་སྦལ་རྔམ་པ་མི་ཟན་ནི། །རང་བྱུང་མཆོད་རྟེན་ལུས་ལ་བརྒྱན། །སྲིད་པའི་འཁོར་ལོ་ལྟོ་ན་གནས། །ཚེ་སྲོག་ཁྱམས་དང་དབང་ཐོབ་ཤོག །ཨེ་ཀ་མ་ཧཱ་བྷེ་ར་ཀ་ཨ་བྷི་ཥིཉྩ་ཧཱུྃ། ཧཱུྃ། མཁའ་ལྡིང་རྒྱལ་པོ་ག་རུ་ཊ། །གཤོག་སྤུ་མཚོན་ཆའི་འཁོར་ལོས་གཏམས། །ཀླུ་གཤེད་དཔའ་བོ་གདུག་པ་གཟིར། །བྱ་ཁྱུང་རྒྱལ་པོའི་དབང་ཐོབ་ཤོག །ཨེ་ཀ་མ་ཧཱ་ག་རུ་ཊ་ཨ་བྷི་ཥིཉྩ་ཧཱུྃ། ཧཱུྃ། ཁྱུང་མོ་སྨུག་ནག་ཀླུ་གཉན་ས་བདག་འདུལ། །སྟག་མོ་རོ་ཟན་བཙན་དང་ས་བདག་འདུལ། །སེང་གེ་དཀར་མོས་རིག་འཛིན་ལས་ལ་འཛུད། །དུག་སྦྲུལ་ནག་པོས་ཕས་ཀྱི་རྦོད་གཏོང་ཟློག །སྤྲུལ་པ་གྱད་གནོན་དབང་མཆོག་ཐོབ་པར་ཤོག །ཨེ་ཀ་མ་ཧཱ་ག་རུ་ཊ་བྱཱ་གྷྲྀ་ཙཎྜ་སེཾ་ཧ་རོ་ཉེ་ཧ་ལ་ཨ་བྷི་ཥིཉྩ་ཧཱུྃ། ཧཱུྃ། སྐུ་ཡི་ཕྱག་རྒྱ་རོལ་པ་ལས། །བདུད་པོ་བྱེ་བ་དགུ་ཁྲི་ནི། །སྔོ་ནག་ལྕགས་ཆས་ཆུ་གླང་ཆིབས། །འཆི་བདག་ནག་པོའི་དབང་ཐོབ་ཤོག །ཨེ་ཀ་ཡ་མ་ཧེ་དུན་ཀི་ཤན་ཀཱ་ལ་བདུད་ཀྲཾ་ནཱ་ག་རཀྴ་ཨ་བྷི་ཥིཉྩ་ཧཱུྃ། ཧཱུྃ། གསུང་གི་ཕྱག་རྒྱ་རོལ་པ་ལས། །སྒྲོལ་གིང་སྲོག་བདག་དམར་པོ་ནི། །དམར་ནག་བསེ་ཆས་རྟ་ལ་ཆིབས། །སྲོག་བདག་དམར་པོའི་དབང་ཐོབ་ཤོག །ཨེ་ཀ་ཡ་མ་རཀྴ་ཡ་མ་རཱ་ཛ་ཨ་བྷི་ཥིཉྩ་ཧཱུྃ། ཧཱུྃ། ཐུགས་ཀྱི་ཕྱག་རྒྱ་རོལ་པ་ལས། །ཡ་མ་གཏུམ་པོ་མགོ་དགུ་པ། །མཐིང་ནག་དུར་ཁྲོད་ཆས་ཀྱིས་བརྒྱན། །ཚེ་བདག་ནག་པོའི་དབང་ཐོབ་ཤོག །ཡ་མ་ཀྲོ་དྷ་ཀཱ་ལ་ཨེ་ཀ་ཧེ་དུན་ཡ་མ་རཀྴ་ཏྲི་ཤུ་ཙིཏྟ་ཨ་བྷི་ཥིཉྩ་ཧཱུྃ། ཧཱུྃ། སྨུག་ནག་ཡ་མ་རཱ་ཛ་ནི། །སྐུ་ལ་དུར་ཁྲོད་ཆས་ཀྱི་བརྒྱན། །མ་ཏྲཾ་རོ་དབྱུག་འཁོར་ལོ་བསྐོར། །ཡབ་ཡུམ་བཅས་པའི་དབང་ཐོབ་ཤོག །ཡ་མ་རཱ་ཛ་ས་དོ་མེ་ཡ་ཨ་བྷི་ཥིཉྩ་ཧཱུྃ། ཧཱུྃ། སེར་ནག་སྨྱོས་བྱེད་འབར་བ་ནི། །སྐུ་ལ་དུར་ཁྲོད་ཆས་ཀྱིས་བརྒྱན། །མ་ཏྲཾ་རོ་དབྱུག་འཁོར་ལོ་བསྐོར། ཡབ་ཡུམ་བཅས་པའི་དབང་ཐོབ་ཤོག །ཡ་མེ་དོ་རུ་ཎ་ཡོ་ད་ཡ་ཨ་བྷི་ཥིཉྩ་ཧཱུྃ། ཧཱུྃ། དམར་ནག་ཨརྻ་དམར་པོ་ནི། །སྐུ་ལ་དུར་ཁྲོད་ཆས་ཀྱིས་བརྒྱན། །མ་ཏྲཾ་རོ་དབྱུག་འཁོར་ལོ་བསྐོར། །ཡབ་ཡུམ་བཅས་པའི་དབང་ཐོབ་ཤོག །ཡ་ད་ཡོ་ནི་ར་ཡཀྵེ་ཡ་ཨ་བྷི་ཥིཉྩ་ཧཱུྃ། །ཧཱུྃ། ལྗང་ནག་རལ་པ་ཚར་དགུ་ནི། །སྐུ་ལ་དུར་ཁྲོད་ཆས་ཀྱིས་བརྒྱན། །མ་ཏྲཾ་རོ་དབྱུག་འཁོར་ལོ་བསྐོར། །ཡབ་ཡུམ་བཅས་པའི་དབང་ཐོབ་ཤོག །ཡཀྵེ་ཡ་ཙ་ནི་ར་མ་ཡ་ཨ་བྷི་ཥིཉྩ་ཧཱུྃ། ཧཱུྃ། དུང་གི་མོན་པ་དྲེགས་ཆེན་སེང་གེའི་གདོང༌། །དུང་གི་མོན་མོ་བླ་རྐུན་རྔམ་པའི་གདོང༌། །བསྐུལ་ན་དགྲ་བགེགས་བླ་སེམས་ཡིད་གསུམ་འགུགས། །ཤར་ཕྱོགས་མོན་པ་ཡབ་ཡུམ་དབང་ཐོབ་ཤོག །ཨེ་ཀ་ཡ་མ་མོནྟ་ཨ་བྷི་ཥིཉྩ་ཧཱུྃ། ཧཱུྃ། །ལྕགས་ཀྱི་མོན་པ་གསོད་བྱེད་སྟག་གི་གདོང༌། །མོན་མོ་ནག་མོ་གཡུ་ཡི་རལ་པ་ཅན། །བསྐུལ་ན་དགྲ་བགེགས་བླ་སེམས་ཡིད་གསུམ་འགུགས། །ལྷོ་ཕྱོགས་མོན་པ་ཡབ་ཡུམ་དབང་ཐོབ་ཤོག །ཨེ་ཀ་ཡ་མ་མོནྟ་ཨ་བྷི་ཥིཉྩ་ཧཱུྃ། ཧཱུྃ། །བསེ་ཡི་མོན་པ་གཏུམ་ཆེན་དྲེད་ཀྱི་མགོ །མོན་མོ་ཚེ་འཕྲོག་ཁྲག་གི་རལ་པ་ཅན། །བསྐུལ་ན་དགྲ་བགེགས་བླ་སེམས་ཡིད་གསུམ་འགུགས། །ནུབ་ཕྱོགས་མོན་པ་ཡབ་ཡུམ་དབང་ཐོབ་ཤོག །ཨེ་ཀ་ཡ་མ་མོནྟ་ཨ་བྷི་ཥིཉྩ་ཧཱུྃ། ཧཱུྃ། གསེར་གྱི་མོན་པ་སྲོག་གཤེད་ཁྱུང་གི་མགོ །མོན་མོ་བླ་རྐུན་སྙིང་ལ་གཟེར་འདེབས་མ། །བསྐུལ་ན་དགྲ་བགེགས་བླ་སེམས་ཡིད་གསུམ་འགུགས། །བྱང་ཕྱོགས་མོན་པ་ཡབ་ཡུམ་དབང་ཐོབ་ཤོག །ཨེ་ཀ་ཡ་མ་མོནྟ་ཨ་བྷི་ཥིཉྩ་ཧཱུྃ། །ཧཱུྃ། །ཧེ་ལེ་ཁྱབ་པ་ཤར་གྱི་བདུད། །ནག་མོ་མི་ཟན་སྙིང་རྐུན་མ། །སྲོག་གཅོད་བདུད་པོ་ཡབ་ཡུམ་དབང༌། །སྐལ་ལྡན་འདི་ཡིས་ཐོབ་པར་ཤོག །ཨེ་ཀ་ཡ་མ་བདུད་ཏྲཾ་ཀཱ་ལ་ཨ་བྷི་ཥིཉྩ་ཧཱུྃ། ཧཱུྃ། ནག་པོ་འཛུམ་མེད་ལྷོ་ཡི་བདུད། །ནག་མོ་མེ་ཐོགས་སྙིང་འབྱིན་མ། །སྲོག་གཅོད་བདུད་པོ་ཡབ་ཡུམ་དབང༌། །སྐལ་ལྡན་འདི་ཡིས་ཐོབ་པར་ཤོག །ཨེ་ཀ་ཡ་མ་བདུད་ཏྲཾ་ཀཱ་ལ་ཨ་བྷི་ཥིཉྩ་ཧཱུྃ། །ཧཱུྃ། སོ་བདར་འཁྲིགས་པ་ནུབ་ཀྱི་བདུད། །ནག་མོ་ཁྲག་སྐྱུག་སྙིང་གཟེར་མ། །སྲོག་གཅོད་བདུད་པོ་ཡབ་ཡུམ་དབང༌། །སྐལ་ལྡན་འདི་ཡིས་ཐོབ་པར་ཤོག །ཨེ་ཀ་ཡ་མ་བདུད་ཏྲཾ་ཀཱ་ལ་ཨ་བྷི་ཥིཉྩ་ཧཱུྃ། ཧཱུྃ། རལ་པ་སྤྱིར་བཅིངས་བྱང་གི་བདུད། །ནག་མོ་སྨྱོས་བྱེད་དབུགས་སྡུད་མ། །སྲོག་གཅོད་བདུད་པོ་ཡབ་ཡུམ་དབང༌། །སྐལ་ལྡན་འདི་ཡིས་ཐོབ་པར་ཤོག །ཨེ་ཀ་ཡ་མ་བདུད་ཏྲཾ་ཀཱ་ལ་ཨ་བྷི་ཥིཉྩ་ཧཱུྃ། །གཉིས་པ་གསུང་ནུས་པ་སྟེར་བར་བྱེད་པ་སྔགས་ཀྱི་དབང་ནི། དཔོན་སློབ་གཉིས་ཀ་ལྷར་གསལ་བའི་ཐུགས་ཀའི་ས་བོན་ལས་སྔགས་ཀྱི་ཕྲེང་བ་མར་མེ་གཅིག་ལས་གཉིས་མཆེད་ལྟར་བླ་མའི་ཞལ་ནས་བྱུང་སྟེ་སློབ་མའི་མགྲིན་པའི་ལམ་དུ་བརྒྱུད་སྙིང་གའི་ས་བོན་མཐར་འཁོད་པས་གསུང་གི་བྱིན་རླབས་མ་ལུས་པ་རྒྱུད་ལ་ཞུགས་པར་མོས་ལ། སྔགས་འདིའི་རྗེས་ཟློས་མཛོད། ཨོཾ་ཨཱཿཧཱུྃ་ཨ་ཀྲོ་ཏེ་ཀ་ཡ་མཱནྟ་ཀ་ཧ་ན་མ་ཐ་བྷཉྫ་ཧཱུྃ་ཕཊ། ལན་གསུམ་བཟླ། །གསུམ་པ་ཐུགས་ཕྱག་མཚན་གྱི་དབང་ནི། སློབ་དཔོན་གྱི་ཐུགས་ཀའི་འོད་ཀྱི་ཡེ་ཤེས་ཀྱི་ལྷ་ཚོགས་རྣམས་ཀྱི་ཐུགས་རྒྱུད་བསྐུལ། སངས་རྒྱས་ཐམས་ཅད་ཐུགས་ཕྱག་མཚན་གྱི་རྣམ་པ་བསམ་གྱིས་མི་ཁྱབ་པར་འདུས། དེ་ཉིད་སློབ་མའི་སྙིང་གར་ཐིམ་པར་བསམ་ལ། ཧཱུྃ། འཁོར་བ་དྲལ་བྱེད་འཁོར་ལོ་དང༌། །ཉོན་མོངས་གཅོད་བྱེད་རལ་གྲི་དང༌། །ཆོས་དབྱིངས་སྐྱེ་མེད་རྡོ་རྗེ་ཡིས། །སྐུ་གསུམ་མཉམ་པའི་དབང་ཐོབ་ཤོག །ཨེ་ཀ་ཡ་མ་ཙཀྲ་ཁངྒ་བཛྲ་ཨ་བྷི་ཥིཉྩ་ཧོཿ བམ་ཆེན་ཙིཏྟ་གྲུ་གསུམ་གྱི་གདན་དུ་འཇམ་དཔལ་ཕྱག་རྒྱ་ཟིལ་གནོན་རྩ་བའི་ལྷ་དྲུག་རྒྱན་ལྷ་བརྒྱད། སྤྲུལ་པ་གསུམ། གཤེད་ཆེན་བཞི། མོན་བདུད་ཡབ་ཡུམ། འཆི་བདག་བཅུ་གཉིས། འོབས་སྲུང་ཤ་ཟ་ཀིང་ཀང་སྟེ་དཀྱིལ་འཁོར་ཡོངས་རྫོགས་གསལ་བར་བྱིན་གྱིས་བརླབས་པས་ཡོན་ཏན་གྱི་དབང་དང་དངོས་གྲུབ་མ་ལུས་པ་ཐོབ་པར་མོས་ཤིག །ཧཱུྃ། །དཔའ་བརྟུལ་སྔགས་ཀྱིས་བྱིན་བསྐྱེད་པའི། །བམ་ཆེན་རོ་ལ་མཉམ་པར་རོལ། །རྡོ་རྗེ་འཛིན་པའི་དབང་ཐོབ་ནས། །བདེ་ཆེན་མཉམ་ཉིད་རྟོགས་པར་ཤོག །ཨེ་ཀ་ཡ་མ་མ་ཧཱ་མཱཾ་ས་ཨ་དྷི་པ་ཏ་སིདྡྷི་ཨ་བྷི་ཥིཉྩ་ཧོཿ བམ་གྱི་ཕྱི་རྒྱུད་ཀྱི་ལྷ་ཐམས་ཅད་ཙིཏྟའི་དཀྱིལ་འཁོར་ལ་འདུས། དེ་ཡང་དྭངས་མ་ལྔའི་ཐིག་ལེ་ལ་འདུས། དེ་སློབ་མའི་སྙིང་གར་འུབ་ཀྱིས་ཐིམ་པར་གྱུར་པར་བསམ་ལ། བམ་དེ་ཡེ་ཤེས་ལྔའི་ངོ་བོར་བྱིན་རླབས་དང་དངོས་གྲུབ་དཔག་ཏུ་མེད་པར་བསམ་ལ་དུམ་བུར་བགོས་ཏེ་གདོང་པ། ཁ་མིག །མགོ་བོ། ལུས་ཀྱི་ཆ་ཤས་ཏེ་དམེ་བ་ལྔ་པོ་ཅུང་ཟད་རེ་འཇོག་ལ་གསང་དབང་སྐབས་དབང་རྫས་ལ་བསྲེ། འཕྲོས་ཐམས་ཅད་སློབ་མར་སྟེར་ལ། དེས་བམ་ཆེན་གསང་བའི་དབང་བསྐུར་བ་ཐོབ། འཇམ་དཔལ་གཤིན་རྗེ་གཤེད་པོའི་ལས་དང་དངོས་གྲུབ་མཐའ་དག་སྒྲུབ་པ་ལ་དབང་བ་ཡིན་པས། དེང་ནས་བརྩམས་ཏེ་ཕྲིན་ལས་བཞི་དང་གྲུབ་པ་ཆེན་པོ་བརྒྱད། ཁྱད་པར་ཟིལ་གནོན་ཕྱག་རྒྱ་ཆེན་པོ་མཆོག་གི་དངོས་གྲུབ་མངོན་དུ་བྱས་ནས་སེམས་ཅན་རྣམས་ལ་གནས་སྐབས་དང་མཐར་ཐུག་གི་ཕན་བདེའི་དཔལ་ཡོན་སྟེར་བ་ལ་བརྩོན་པར་གྱིས་ཤིག །ལྔ་པ་དཀྱིལ་འཁོར་ཡོངས་སུ་རྫོགས་པ་སྲུང་བ་སྟོབས་ཆེན་པུ་རིའི་དབང་བསྐུར་བས་ཕྲིན་ལས་ཀྱི་དབང་དང་བྱིན་རླབས་ཐོབ་པར་མོས་ཤིག །ཆོས་སྐུ་འགྱུར་མེད་མཆོད་རྟེན་འདི། །ལོངས་སྐུ་བདེ་ཆེན་ཟིལ་གནོན་བཞུགས། །སྤྲུལ་སྐུ་འཁོར་ཚོགས་བསམ་མི་ཁྱབ། །སྐལ་ལྡན་ཁྱོད་ལ་དབང་བསྐུར་བས། །རྡོ་རྗེའི་མཁར་དུ་བསྲུང་བ་དང༌། །ནམ་མཁའི་མཐོངས་སུ་བཤིག་པ་དང༌། །རི་རབ་རྩེ་ལ་བསད་པ་དང༌། །རི་ཐང་མཚམས་སུ་བཟློག་པ་དང༌། །རྒྱ་མཚོའི་གཏིང་དུ་མནན་པ་དང༌། །དྲེག་པ་ཙིཏྟ་དཀྲུགས་པ་སྟེ། །ལས་དྲུག་འཁོར་ལོ་བསྐོར་བ་ཡི། །དབང་རྣམས་ཁྱེད་ཀྱིས་ཐོབ་པར་ཤོག །ཨོཾ་སརྦ་ཏ་ཐཱ་ག་ཏ་ཀཱ་ནི་ཀཱ་ཡ་ཨ་བྷི་ཥིཉྩ་ཧཱུྃ། མཆོད་རྟེན་སྤྱི་བོར་བཞག །དེས་བཀའ་རྫོགས་མཆོད་རྟེན་གྱི་དབང་བསྐུར་བ་ཐོབ། །གཤིན་རྗེ་གཤེད་པོའི་ཕྲིན་ལས་ཀྱི་འཁོར་ལོ་ཕྱོགས་མེད་དུ་བསྐོར་བ་ལ་དབང་བ་ཡིན་པས། སྲུང་བ་དང་ཞི་བའི་ལས་ཀྱིས་རྗེས་སུ་འཛིན་པ་དང༌། ཟློག་བསད་མནན་དཀྲུགས་དབྱེ་བསྐྲད་རེངས་རྨོངས་ལ་སོགས་པས་གདུག་པ་ཅན་ཚར་གཅོད་པའི་ཕྲིན་ལས་རྟག་ཏུ་སྒྲུབ་པར་གྱིས་ཤིག །ལྔ་པ་མཐའ་རྟེན་དབང་ལ་གཉིས་སུ་ཡོད་པ་ལས། དང་པོ་བསྟན་སྲུང་མཐུའི་དབང་གི་དོན་དུ་དམིགས་པ་འདི་ལྟར་མཛོད། རང་ཉིད་འཇམ་དཔལ་གཤིན་རྗེའི་གཤེད་དུ་གསལ་བའི་མདུན་དུ་གཤིན་རྗེའི་ཞིང་ཁམས་འཇིགས་སུ་རུང་བའི་དབུས་སུ་ཐོད་མཁར་སྲིད་པའི་རྩེ་མོར་སླེབས་པ། ཁྲག་ཞག་འབབ་པའི་ནང་དུ་དབུས་སུ་འཁོར་ལོ་རྩིབས་བརྒྱད་པ་ལྟེ་བར་པད་ཉིའི་སྟེང་དུ་དགྲ་བོ་གན་རྐྱལ་ཁ་སྦུབ་ཏུ་བརྫིས་པས་མ་ཧེའི་སྟེང་དུ་ཡཿལས་གཤིན་རྗེ་བྷེ་བ་སཏྭ་ནག་པོ་ཤིན་ཏུ་ཁྲོས་ཤིང་སྤྱན་གསུམ་པ་ཞལ་གདངས་པ་ལས་མེ་འབར་ཞིང་ཁ་ནས་ཁྲག་འཛག་པ། མཆེ་བ་གཙིགས་ཤིང་ལྗགས་གློག་ལྟར་འཁྱུགས་པ་དབུ་སྐྲ་སྨིན་མ་སྨ་ར་དམར་སེར་འབར་བ། གཡས་བེ་ཅོན་འཕྱར་ཞིང་གཡོན་གནམ་ལྕགས་ཀྱི་འཁོར་ལོ་བསྐོར་བ། མི་ལྤགས་ཀྱི་སྟོད་གཡོག་དང་སྟག་ལྤགས་ཀྱི་ཤམ་ཐབས་ཅན། རུས་པའི་རྒྱན་དྲུག །རྒྱུ་མ། དུག་སྦྲུལ། ཁྲག་གི་ཐིག་ལེས་བརྒྱན་པ། ཞབས་གཉིས་མ་ཧེ་ལ་ཞོན་ནས་སྟོང་གསུམ་ཉུལ་བ། གཡོན་དུ་བྷྱོཿལས་ཡུམ་གཏུམ་མོ་དུག་ཧྲུལ་མ་ནག་མོ་ཤིན་ཏུ་ཁྲོས་ཤིང་གྲི་གུག་དང་ཐོད་ཁྲག་འཛིན་པ་ལས་ཀྱི་རླུང་དམར་ལ་ཞོན་པ། གཉིས་ཀའང་མེ་འབར་བའི་དབུས་ན་བཞུགས་པ། དེའི་ཕྱི་རོལ་དུ་གཤེད་ཆེན་སྡེ་བཞི་འཆི་བདག་བཅུ་གཉིས་དྲེགས་པའི་དམག་ཚོགས་ཀྱིས་བསྐོར་བ། དེ་ཐམས་ཅད་ཀྱི་སྤྱི་བོར་ཨོཾ། མགྲིན་པར་ཨཱཿ སྙིང་གར་ཧཱུྃ། ཧཱུྃ་ལས་འོད་ཟེར་རྣོན་པོ་ལྕགས་ཀྱུ་ལྟ་བུ་འཕྲོས་པས། ལྷོ་ཕྱོགས་རིམ་པ་བདུན་གྱི་ས་འོག་ནས་འཆི་བདག་གཤིན་རྗེའི་རྒྱལ་པོ་འཁོར་དང་བཅས་པ་སྐད་ཅིག་གིས་ལྷགས་པར་གྱུར་བར་བསམ་ཞིང༌། སྤྱན་དྲངས་པ་ནི། ཧཱུྃ། ལྷོ་ཕྱོགས་གཤིན་རྗེའི་འཇིག་རྟེན་གྱི༔ འཇིགས་སུ་རུང་བ་མུན་པའི་ཀློང༔ དྲེགས་པ་ཀུན་གྱི་ཤན་ཁང་ནས༔ ལས་བྱེད་གཤིན་རྗེའི་འཁོར་དང་བཅས༔ བདག་གིས་དད་པས་སྤྱན་འདྲེན་ན༔ སྔོན་གྱི་ཁས་བླངས་དམ་བཅའ་བཞིན༔ མ་ཐོགས་རིངས་པའི་ཚུལ་གྱིས་ནི༔ དགྲ་བགེགས་འདུལ་ཕྱིར་གཤེགས་སུ་གསོལ༔ ཨེ་ཡ་མ་རཱ་ཛ་ས་པ་རི་ཝ་ར་བཛྲ་ས་མཱ་ཛ་ཛཿཧཱུྃ་བྃ་ཧོཿ ཞེས་པས་སྤྱན་དྲངས་ལ། དམ་བཞག་ནི་རྡོ་རྗེ་སྤྱི་བོར་བཞག་དམ་ཆུ་ལྗགས་ལ་བྱིན་པར་མོས་ཏེ། ཧཱུྃ། སྔོན་ཚེ་འཇམ་དཔལ་གཤིན་རྗེ་ཡི༔ སྤྱན་སྔར་ཞལ་བཞེས་དམ་བཅས་ལྟར༔ བཅོལ་བའི་ལས་རྣམས་སྒྲུབ་པར་མཛོད༔ གལ་ཏེ་དམ་ལས་འདས་པ་ན༔ དུས་གསུམ་རྒྱལ་བའི་བཀའི་ཆད་པས༔ ཁྱོད་ཀྱང་ཉམས་པར་གདོན་མི་ཟ༔ ཨོཾ་ཡ་མ་རཱ་ཛ་ས་མ་ཡ་རཀྴ་ཧཱུྃ་ཞེས་དམ་ལ་བཞག །མཆོད་གཏོར་འབུལ་བ་ནི། ཧཱུྃ། ལས་མཛད་གཤིན་རྗེ་འཁོར་བཅས་ལ༔ གདུག་པའི་དགྲ་བགེགས་བསྒྲལ་བ་ཡི༔ དམར་ཆེན་ཁྲག་དང་དབང་པོ་ལྔ༔ ཚིལ་ཆེན་གསུར་དུད་ཞུན་ཆེན་མེ༔ མཁྲིས་ཆེན་བདུད་རྩི་སྨན་གྱི་བཅུད༔ ཤ་ཁྲག་དམར་གྱི་གཏོར་མ་སོགས༔ འདོད་ཡོན་ལོངས་སྤྱོད་བསམ་མི་ཁྱབ༔ བདག་ཅག་དད་པས་འབུལ་ལགས་ན༔ བསྟན་པ་སྲུང་ཕྱིར་བཞེས་སུ་གསོལ༔ ཨོཾ་ཡ་མ་རཱ་ཛ་ས་པ་རི་ཝཱ་ར་ཨརྒྷཾནས་ཤཔྟའི་བར་དང༌། མ་ཧཱ་པཉྩ་ཨ་མྲྀ་ཏ་ཁཱ་ཧི། མ་ཧཱ་རཀྟ་པཱུ་ཛ་ཁཱ་ཧི། ཞེས་འབུལ། བསྟོད་པ་ནི། ཧཱུྃ། ཁྲག་འཐུང་གཤིན་རྗེ་གཤེད་པོ་ཡི༔ བཀའ་ཉན་འཇིགས་བྱེད་མ་རུངས་པ༔ ཁམས་གསུམ་སྐྱེ་འགྲོའི་སྲོག་གི་བདག༔ རྫུ་འཕྲུལ་ཆེ་ཞིང་མཐུ་དང་ལྡན༔ བསྟན་པ་སྲུང་མཛད་དམ་ཚིག་ཅན༔ ཉམས་པ་སྒྲོལ་བའི་གཤེད་པོ་ཆེ༔ དགེ་སྡིག་ཤན་འབྱེད་དཔའ་བོ་མཛད༔ རྡོ་རྗེ་འཛིན་པའི་ཕོ་ཉ་བ༔ ལས་མཛད་ནག་པོ་ཁྱོད་ལ་བསྟོད༔ གཏུམ་དྲག་བཟོད་པར་དཀའ་བའི་གཟུགས༔ དབྱུག་པ་ཕྱར་ཞིང་ཐོད་ཁྲག་འཛིན༔ དུར་ཁྲོད་འཇིགས་པའི་ཆས་ཀྱིས་བརྒྱན༔ དྲག་ཤུལ་ཆེན་པོའི་གར་སྟབས་ཀྱིས༔ སྲིན་གྱི་མ་ཧེ་ཁྲོས་པ་བརྫིས༔ ཡུམ་ཆེན་གཏུམ་མོ་དུག་ཧྲུལ་མ༔ བཀའ་ཉན་ཕོ་བརྒྱད་མོ་བརྒྱད་སོགས༔ ལས་བྱེད་གཤིན་རྗེའི་ཚོགས་ཀྱིས་བསྐོར༔ ས་གསུམ་ཀུན་ལ་མངའ་མཛད་པའི༔ དྲག་ཤུལ་ཆེན་པོ་ཁྱོད་ལ་བསྟོད༔ དེ་ནས་སློབ་དཔོན་གཤིན་རྗེ་གཤེད་དུ་གསལ་བ་ལ་གུས་འདུད་དུད་པ་བྱས་པས། དེའི་ཐུགས་ཀའི་འོད་ཀྱིས་མདུན་བསྐྱེད་ཀྱི་ཐུགས་རྒྱུད་བསྐུལ་ཏེ། སྲུང་མ་འཁོར་དང་བཅས་པ་ལ་གཉེར་གཏད་པར་མོས་ཤིག །གཏོར་མ་ལག་ཏུ་གཏད་དེ། ཧོ། འཆི་བདག་གཤིན་རྗེའི་རྒྱལ་པོ་འཁོར་བཅས་ཚོགས། །སློབ་མ་འདི་ཡི་བྲན་དུ་གཏོང་བྱེད་ན། །འཇམ་དཔལ་ཁྲོ་བོའི་དམ་ཚིག་གཉན་པོ་རྣམས། །དྲན་པར་མཛོད་ལ་བཅོལ་བའི་ལས་ཀུན་སྒྲུབས། །ཁྱད་པར་བསད་མནན་གཏད་སེལ་སྨྱོ་རེངས་རྨོངས། །བྱེད་དཀྲུགས་སྡེབ་གཤོར་ཧོམ་ཟོར་རླུང་འཁོར་སོགས། །གནག་པའི་མཐར་ཐུག་མངོན་སྤྱོད་དྲག་པོའི་ལས། །ཐོགས་པ་མེད་པར་འགྲུབ་པའི་ཕྲིན་ལས་མཛོད། །ཡ་མ་མེ་ད་ཀྵེ་རཱ་ཛ་ས་དོ་རུ་ཎ་ཡོ་ནི་ར་ཡ་ཙ་ནི་ཧཱུྃ་ཕཊ། ཨ་བྷི་ཥིཉྩ་ཨཱཿ ཞེས་བརྗོད། ཁྲག་འཐུང་འཇམ་དཔལ་གཤིན་རྗེ་བཀའ་ཡི་ཕོ་ཉ་ཆེན་པོ་འཆི་བདག་ལས་ཀྱི་གཤིན་རྗེ་ཡུམ་གཏུམ་མོ་དུག་ཧྲུལ་ནག་མོ་འཁོར་གྱི་གཤིན་རྗེ་སྡེ་དཔོན་བརྒྱད། ལོ་ཟླ་ཞག་གཤེད་ལ་སོགས་པ་མ་རུངས་པའི་དམག་ཚོགས་འཁོར་དང་བཅས་པ་རྣམས་ཀྱིས། ཆོས་སྐུ་ཀུན་ཏུ་བཟང་པོ། ལོངས་སྐུ་འཇམ་དཔལ་ཞི་ཁྲོ། སློབ་དཔོན་འཇམ་དཔལ་བཤེས་གཉེན། སྤྲུལ་སྐུ་པདྨ་ཐོད་ཕྲེང༌། ཕུང་བྱེད་ཤཱནྟིཾ་གརྦྷ། བལ་པོ་བ་སུ་དྷ་ར། གནུབས་ཆེན་སངས་རྒྱས་ཡེ་ཤེས། མཁའ་འགྲོ་ཡེ་ཤེས་མཚོ་རྒྱལ། ལོ་ཆེན་བཻ་རོ་ཙཱ་ན། ཁྲག་འཐུང་ཟིལ་གནོན་བཞད་པ་རྩལ་ནས་བདག་ཅག་གི་དཔལ་ལྡན་བླ་མ་དམ་པའི་བར་དུ་བྱོན་པ་རྣམས་ཀྱི་བཀའ་དང་དམ་ལས་མ་འདའ་བར། སྤྱིར་སངས་རྒྱས་ཀྱི་བསྟན་པ་སྲུངས། དཀོན་མཆོག་གི་དབུ་འཕང་བསྟོད། དགེ་འདུན་དང་ཆོས་ཀྱི་རྒྱལ་སྲིད་སྐྱོངས། སྣོད་ཀྱི་དགེ་བཅུ་སྒྲུབས། བཅུད་ཀྱི་ཕན་བདེ་སྤེལ། གདུག་པ་ཅན་གྱི་གཉའ་ནོན། དམ་ཚིག་ཅན་གྱི་སྡོང་གྲོགས་མཛོད། ཐར་འདོད་ཀྱི་རེ་བ་སྐོངས། ཕན་སེམས་ཅན་གྱི་ཕྲིན་ལས་སྒྲུབས། ཁྱད་པར་རྡོ་རྗེའི་སློབ་མའམ་རིགས་ཀྱི་བུ་འདིའི་སྡང་བའི་དགྲ་ཐུལ། གནོད་པའི་བགེགས་ཆོམས། ནད་དང་ཉེར་འཚེ་སེལ། ཚེ་དང་བསོད་ནམས་སྤེལ། དཔལ་དང་གྲགས་པ་སྒྲུབས། དབང་ཕྱུག་དང་གཟི་བརྗིད་བསྐྱེད། ཆོས་ནོར་དང་ལོངས་སྤྱོད་སྤེལ། མངའ་རིས་དང་ཆོས་སྲིད་སྐྱོངས། དངོས་གྲུབ་ཀྱི་བསམ་པ་སྒྲུབས། ཕྲིན་ལས་ཀྱི་རེ་བ་སྐོངས། མདོར་ན་བྱང་ཆུབ་མ་ཐོབ་ཀྱི་བར་དུ་ལུས་དང་གྲིབ་བཞིན་དུ་འགྲོགས་ཏེ་ཕུན་སུམ་ཚོགས་པའི་བསམ་སྦྱོར་ཐམས་ཅད་ཡིད་བཞིན་དུ་འགྲུབ་པའི་ཕྲིན་ལས་གཡེལ་མེད་དུ་སྒྲུབ་པར་མཛོད་ཅིག །ཅེས་བྱས་ལ་གཏོར་མའི་ལྷ་སློབ་མ་ལ་བསྟིམས་ནས་གཉིས་མེད་ཀྱི་དགོངས་པ་བསྐྱང་དུ་བཅུག །སྤྱི་བོར་རྡོ་རྗེ་བཞག་ལྕེར་བདུད་རྩི་བླུད་དེ། སརྦ་པཉྩ་ཨ་མྲྀ་ཏ་བརྗོད་ཅིང་གཏོར་མ་ལའང་བྲན་ནས་དམ་བསྲེའོ། །གོང་དུ་ཐུན་མོང་རིགས་དབང་ལྔ་སྦྱར་ན་འདིར་རྡོ་རྗེ་སློབ་དཔོན་གྱི་དབང་བཀའ་བརྒྱད་ལྟར་སྦྱར་དགོས་སོ། །གཉིས་པ་གསང་བའི་དབང་གི་དོན་དུ་མཎྜལ་ཕུལ། གསོལ་བ་འདེབས་པ་འདི་ཡི་རྗེས་ཟློས་མཛོད། ཧོཿ །བླ་མ་ཡབ་ཡུམ་གསང་བའི་བདག །གསང་བའི་དཀྱིལ་འཁོར་བདག་ལ་སྟོན། །བདེ་བ་ཆེན་པོའི་དངོས་གྲུབ་ནོད། །གསང་བའི་དབང་ཆེན་བསྐུར་དུ་གསོལ། །ལན་གསུམ་གསོལ་བ་གདབ། འབྲུ་གསུམ་བརྗོད་ཅིང་གདོང་གཡོགས་བཅིངས། སློབ་དཔོན་འཇམ་དཔལ་གཤིན་རྗེ་གཤེད་དུ་ རྟ་མགྲིན་ལ། རྟ་མགྲིན་དུ་ མཆན། གསལ་བའི་གསང་གནས་ཧཱུྃ་ལས་རྡོ་རྗེ་ཧཱུྃ་གིས་མཚན་པ་ནོར་བུའི་རྩ་བར་ཨོཾ། རྩེ་མོར་ཕཊཿདང་བཅས་པ། ཕྱག་རྒྱ་ཡུམ་གཟི་ལྡན་མར་བྷེ་ཏ་ལི་གསལ་བའི་མཁའ་ཨཱཿལས་པདྨ་ཨཱཿས་མཚན་པ། ཨོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ། འཇམ་དཔལ་ཡ་མནྟ་ཀ་ཡབ་ཡུམ་སྙོམ་པར་ཞུགས་པའི་དགའ་བའི་སྒྲས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྤྱན་དྲངས་ཞལ་དུ་ཞུགས། ཐུགས་རྗེས་སུ་ཆགས་པའི་མེས་འོད་དུ་ཞུ། ཡུམ་གྱི་མཁར་བབས་པ་ཐོད་ཆང་བདུད་རྩི་སྦྱར་བ་དང་བསྲེས་ནས་སློབ་མར་བྱིན་ཏེ། །བླ་མ་ལྷ་ཚོགས་ཡབ་ཡུམ་རྣམས། གཉིས་མེད་སྦྱོར་བའི་བྱང་ཆུབ་སེམས། །སྐལ་ལྡན་ངག་ལ་དབང་བསྐུར་བས། །བདེ་ཆེན་གསང་བའི་དབང་ཐོབ་ཤོག །ཨོཾ་སརྦ་པཉྩ་ཨ་མྲྀ་ཏ་མ་ཧཱ་སུ་ཁ་ཨ་བྷི་ཥིཉྩ་ཨ་བེ་ཤ་ཡ་ཨ་ཨཿ ཞེས་བྱིན་པས་སློབ་མས་ཀྱང༌། ཨ་ཧོ་མ་ཧཱ་སུ་ཁ། །ད་ནི་སངས་རྒྱས་ཀུན་དང་མཉམ། །བདག་ནི་བསོད་ནམས་སྐལ་པ་ཆེ། །ཡོན་ཏན་ཀུན་གྱིས་བདག་བརྒྱན་ཏེ། །བཛྲ་ཧེ་རུའི་བདག་ཉིད་དོ། །ཞེས་བརྗོད་པས་མྱང༌། དེས་ལུས་གང་བས་ངག་གི་ཉེས་པ་དག་ནས་གསུང་རྡོ་རྗེར་གྱུར་པར་བསམ་ལ། མིག་དར་བཀྲོལ། ཡུམ་གྱི་བྷ་ག་ནས་གསང་བའི་དབང་ཐོབ་པས་རང་བྱིན་གྱིས་བརླབས་པ་སྒོམ་པ་ལ་དབང་ཞིང༌། ལམ་ལྔ་ལས་མཐོང་བའི་ལམ་ས་དང་པོའི་རྟོགས་པ་སྐྱེ་བའི་མཐུ་དང་ལྡན་པར་བྱས་ལ། དེས་ངག་གི་དྲི་མ་དག་སྟེ་ལོངས་སྤྱོད་རྫོགས་པའི་སྐུ་འགྲུབ་པའི་རྟེན་འབྲེལ་འགྲིག་གོ །གསུམ་པ་ཤེས་རབ་ཀྱི་དབང་ལ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས་མཛོད། །གཉིས་མེད་ཡེ་ཤེས་བདེ་ཆེན་པོ། །མཁའ་འགྲོ་སྒྱུ་མ་བདེ་མཆོག་བདེ། །བརྟེན་ན་གཉིས་མེད་བདེ་བ་བསྐྱེད། །འཁོར་ལོ་གནས་བཞིར་དབབ་བཟུང་བཞི། །བདེ་ཆེན་ཆོས་ཉིད་རྟོགས་པར་ཤོག །ཅེས་ཕྱག་རྒྱའི་དཀྱིལ་འཁོར་མ་མཐོང་བ་རྣམས་ཀྱིས་མིག་དར་བཅིངས་ལ། ཨོཾ་ཨཱཿཧཱུྃཿ ཨ་ཧོ་སུ་ཁ་བྷཉྫ་མོ་ཀྵ་ཧོ། ཞེས་གཟུངས་མ་སློབ་མར་གཏད་དེ། སློབ་མ་འཇམ་དཔལ་ཡ་མཱནྟ་ཀ་ རྟ་མགྲིན་དུ་ མཆན། གསལ་བའི་གསང་གནས་ཧཱུྃ་ལས་རྡོ་རྗེ་ཧཱུྃ་གིས་མཚན་པ་ནོར་བུའི་རྩ་བར་ཨོཾ། ཕྱག་རྒྱ་ཡུམ་བྷེ་ཏ་ལི་གཟི་ལྡན་མར་གསལ་བའི་མཁའ་གསང་ཨཱཿ་ལས་པདྨ་ཨཱཿས་མཚན་པ། ཡབ་ཀྱི་རྡོ་རྗེ་ནོར་བུའི་རྩ་བར་རྩ་གསུམ་འདུས་པའི་རྩ་གཡས་ལ་ཨོཾ་དཀར་པོ། གཡོན་ལ་ཨཱཿ་དམར། དབུས་སུ་ཧཱུྃ་མཐིང་ཀ་རྩེ་མོར་ཕཊ་ཡིག་སེར་པོར་བསྒོམ། སྙོམས་པར་ཞུགས་པས་ཁམས་ཀྱི་དྭངས་མ་རྣམས་འཁོར་ལོ་བཞིར་རིམ་པ་བཞིན་དགའ་བ། མཆོག་དགའ། ཁྱད་དགའ། ལྷན་སྐྱེས་ཀྱི་དགའ་བ་རྣམས་རྒྱུད་ལ་སྐྱེས་ནས་སླར་ཡང་རླུང་འཕོ་མེད་དམ་པའི་མས་བརྟེན་གྱི་དགའ་བ་བཞི་ངོ་སྤྲད་དེ་ལུས་དཀྱིལ་མཐོང་བའི་བརྡར་གདོང་གཡོགས་བཀྲོལ། དེ་ལྟར་ཕྱག་རྒྱ་བརྟེན་ནས་བདེ་སྟོང་གི་ཡེ་ཤེས་སྐྱེས་པས་ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར་དུ་ཤེས་རབ་དང་ཡེ་ཤེས་གཉིས་ཀྱི་དབང་དཀྱིལ་འཁོར་ལོ་བསྒོམ་པ་ལ་དབང༌། ལམ་ལྔ་ལས་རྒྱུ་ཡི་ཐེག་པའི་མཐར་ཕྱིན་ལམ་ཀུན་ཏུ་འོད་ཀྱི་རྟོགས་པ་སྐྱེ་བའི་མཐུ་དང་ལྡན་པར་བྱས། དེས་ཡིད་ཀྱི་དྲི་མ་དག་སྟེ་ཆོས་སྐུ་འགྲུབ་པའི་རྟེན་འབྲེལ་འགྲིག་གོ །བཞི་པ་རིག་པའི་ཡེ་ཤེས་བདེ་ཆེན་ལྟ་བ་སྤྱི་འབྱམས་ཚིག་གི་དབང་བསྐུར་བ་ལ་མཎྜལ་ཕུལ། གསོལ་བ་གདབ་པ་འདིའི་རྗེས་ཟློས་མཛོད། ཧོཿ །གསང་ཆེན་རོལ་པའི་གཞལ་ཡས་འདིར། །བཀའ་དྲིན་བསམ་འདས་བླ་མ་ལ། །སྒྱུ་སོགས་རབ་སྤངས་མེ་ཏོག་འབུལ། །ཡང་དག་སྙིང་པོ་བསྟན་དུ་གསོལ། །ལན་གསུམ་གསོལ་བ་གདབ། དབང་གསུམ་པའི་དཔེ་ལས་བྱུང་བའི་ཡེ་ཤེས་ཀྱིས་མཚོན་བྱེད་བྱས་ནས་དོན་གྱི་འོད་གསལ་ངོ་སྤྲད་པའི་ཕྱིར་བདེ་སྟོང་གཉིས་མེད་མཚོན་པའི་རྡོར་དྲིལ་ལག་ཏུ་གཏད། སྟོང་གསལ་རིག་པའི་ཡེ་ཤེས་མན་ཤེལ་མིག་ཏུ་བསྟན་ཏེ་བརྡ་མཚོན་ནས་ངོ་སྤྲད་པ་ནི། ཧཱུྃ། །སེམས་ཉིད་ཀ་དག་ལྷུན་རྫོགས་དོན། །སྣང་སྟོང་ཟུང་འཇུག་སྒྱུ་མའི་སྐུ། །གཉིས་མེད་འཛིན་གྲོལ་སྤྲུལ་པའི་སྐུ། །ཡང་དག་ངེས་དོན་རྟོགས་པར་བགྱི། ཛྙཱ་ན་པཉྩ་དྷརྨ་ཀཱ་ཡ་ཨ་བྷི་ཥིཉྩ་ཨ་ཨཿ ཁྱོད་ཀྱིས་དབང་བཞི་པ་རིག་པའི་ཡེ་ཤེས་ཚིག་གི་བརྡ་སྤྲད་པ་ལ་བརྟེན་ནས་ཐོབ་པའི་ལམ་རང་བྱུང་གི་ཡེ་ཤེས་ཕྱག་རྒྱ་ཆེན་པོ་སྒོམ་པ་ལ་དབང་ཞིང་ལམ་ལྔ་ལས་འབྲས་བུའི་ཐེག་པས་མཐར་ཕྱིན་ལམ། བཅུ་གསུམ་རྡོ་རྗེ་འཛིན་པའི་ཐེག་པའི་རྟོགས་པ་སྐྱེ་བའི་མཐུ་དང་ལྡན་པར་བྱས་ལ། དེས་ལུས་ངག་ཡིད་གསུམ་གྱི་དྲི་མ་བག་ཆགས་དང་བཅས་པ་ཐམས་ཅད་དག་སྟེ། ངོ་བོ་ཉིད་སྐུ་ཐོབ་པའི་རྟེན་འབྲེལ་འགྲིག་གོ །ཅེས་བརྗོད། བཏང་རག་གི་མཎྜལ་ཕུལ། རྗེས་ཆོག་ནི། ལྷག་མ། ཆད་ཐོ། བརྟན་སྐྱོང༌། དཀྱུས་བཞིན་བྱ། དཀྱིལ་འཁོར་གྱི་ལྷ་ལ་མཆོད་བསྟོད་ནོངས་པ་བཟོད་པར་གསོལ། རྟེན་ལ་བརྟན་བཞུགས་བྱ། སྨོན་ལམ་ཤིས་བརྗོད་སོགས་རྒྱས་པར་བྱའོ། །འཕོ་བཅས་སྲིད་པའི་རྒྱུ་འབྲས་ལྟར་སྣང་ལ། །འགྱུརྃ་མེདྃ་ཡེ་ཤེས་ཕྱག་རྒྱས་ཟིལ་མནན་པས། །ཚེ་འཆི་སྲོག་གི་བདུད་བཅོམ་ཐེགྃ་མཆོྃག་གི །བསྟནྃ་པའིྃ་སྨིན་བྱེད་རྒྱལྃ་མཚནྃ་ཛ་ཡནྟུ། འཇམ་དཔལ་གཤིན་རྗེ་ཚེ་བདག་གི་སྒྲུབ་ཐབས་དབང་དང་བཅས་པའི་ལེའུ་ཚན་ནོ།། །།

[edit]

@#/_dag snang bka' brgyad rig 'dzin zhal lung las/_'jam dpal gshin rje tshe bdag gi dbang bskur bklag chog tu bkod pa zil gnon thugs kyi thig le zhes bya ba bzhugs/

@#/_/sgrib bral ye shes sku can many+dzu shrI/_/srid zhi phyag rgya zil gnon khro bo'i rje/_/bdud dang mu stegs mthar byed der btud nas/_/de sgrub dbang gi cho ga 'dir gsal bya/_/sku de bzhin gshegs rigs 'jam dpal khrag 'thung phyag rgya zil gnon gyi dbang bya bar 'dod pas/_rgyas par spro na sta gon gsum dang*/_dngos gzhi la thun mong rigs dbang lnga bcas bka' brgyad kyi dbang chog ltar sbyar zhing*/_'dir gshin rje rang gi dbang dngos 'chad pa la/_gang du bya ba'i gnas su gzhung mthun gyi dkyil 'khor dbus su rnam rgyal bum pa/_gshin rje'i lha tsaka yongs rdzogs/_sngags byang*/_phyag mtshan/_mnga' gsol gyi chas/_dur khrod dpal chas/_gsang thod bdud rtsi/_rig tsaka_/shel rdo/_mig dar/_mig thur/_me tog_/do ra/_phyag shing*/_zan la mngar gsum chos sman sbyar bas bam chen tsog pur sdod pa'i lag pa bsnol ba la sman raka_/spyi gtsug tu gtor ma/_mar thag dkar dmar gyis rkang lag bcings pa/_mchod rten/_bka' srung las gshin gyi dmar gtor nang du 'khor bzhi/_de rgyab bcu gnyis kyis bskor/_bar du mtheb kyus gtams/_me ri sha khrag gis brgyan pa la/_dar gdugs las gshin gyi tsaka lis brgyan/_nyer spyod mchod pas bskor zhing sman raka gtor ma/_tshogs dkar bgegs chad brtan sogs spyi ltar 'du bya zhing*/_slob dpon gyi mdun du las bum/_thun bzed/_'bru phor/_DA ru/_rdor dril bcas bkod la dngos gzhi'i dbang sgrub khro bo spyi yi las byang gi chings ltar skyabs sems nas gzhal yas khang bskyed pa/_thod pa'i ra ba can/_phyi rol 'khor lo rtsibs bzhi brgyad bcu gnyis/_mgon bo rlon pa'i sogs nas dkyus la 'jug_/gdan bskyed kyi/_/bam las rU tra pho mo bsnol ba yi/_/zhes pa'i mtshams su/_gdan steng rgyu yig hU~M mthing las/_/drug pa rdo rje 'chang chen po/_/rgyal ba kun gyi spyi gzugs can/_/mthing nag zil gnon dregs pa 'dul/_/dbu gsum phyag drug zhabs bzhi bgrad/_/g.yas dkar g.yon dmar dbus mthing zhal/_/'khor lo ral gri rdo rje g.yas/_/be con gtun shing sdigs mdzub g.yon/_/rigs lnga'i khro bos dbu la brgyan/_/dpal gyi chas rdzogs dur khrod brgyan/_/yum ni dmigs med chos kyi dbyings/_/mthing nag tsit+ta b+han dmar stob/_/ye shes bzhi yi sprul pa yi/_/thugs kar ya ma rA dza ni/_/smug nag 'khor lo tsit+ta 'dzin/_/ya ma'i thugs kar dregs pa'i bdag_/ljang nag rdo rje snying phreng 'dzin/_/dregs pa'i thugs kar khyams khang steng*/_/'jigs byed chen po thur du bltas/_/lto ba srid gsum tshe srog 'tshang*/_/spyi gtsug mkha' lding sprul pa 'dul/_/dkar po zil gnon ro nye za/_/phrag gong smug nag 'jigs pa'i khyung*/_/sog khar stag mo ro la rngams/_/nu khar seng ge ral pa sprugs/_/ri rab lta bur brjid pa yi/_/sku la khro rgyal bcu po rdzogs/_/zla gam gsum la sprul pa gsum/_/sku sprul 'chi bdag bye ba sngo/_/gsung sprul srog bdag dmar po brjid/_/thugs sprul tshe bdag mgo dgu pa/_/phyi rim thod pa'i mkhar bzhi la/_/gshed po ya ma rA dza dang*/_/srin po myos byed 'bar ba dang*/_/klu bdud ar+Ya me ru dang*/_/gnod sbyin ral pa tshar dgu dang*/_/de yi phyi rim rtsibs brgyad la/_/phyogs bzhi la ni mon pa bzhi/_/mtshams bzhi la ni bdud bzhi ste/_/de dag yum dang bcas pa'o/_/phyi rim lcags mkhar bcu gnyis la/_/las kyi 'chi bdag bcu gnyis gnas/_/de yi phyi rim bar khyams la/_/pho gshed mo gshed la sogs pa'i/_/sha za king kang ma mo'i tshogs/_/sgo bzhi ru ni rgyal po dang*/_/mgon po bdud dang gnod sbyin bzhi/_/phyi rol 'obs chen bcu drug la/_/'obs srung chen po bcu drug gnas/_/de ltar de dag thams cad kun/_/sems nyid stong pa'i cho 'phrul te/_/chos nyid dbyings las shar bas na/_/bar snang khams kyi 'ja' tshon nam/_/me long nang gi gzugs brnyan bzhin/_/snang la rang bzhin med par gyur/_/zhes pa'i mtshams dbang bskur rgyas btab/_spyan 'dren nas brtsams/_hU~M/_rang byung dkyil 'khor gshin rje yi/_zhes bsgyur/_bsnyen pa/_oM AHhU~M a kro te ka ya mAn+ta ka ha na ma tha b+hany+dza hU~M phaT/_zhes ji ltar 'os pa bzla/_bum pa bskyed bzlas ni/_bum pa rang byung gi gzhal med khang du lha rnams dwangs pa'i mtsho la gza' skar shar ba ltar skad cig gis gsal bar gyur/_rang srog sngags kyi 'od zer gzungs thag la/_/'khril te bum pa'i lha tshogs thugs kar zhugs/_/de dag sku las byang sems bdud rtsi'i rgyun/_/babs pas bum chur dbyer med ro gcig gyur/_/gzungs thag blangs te bzlas pa dang*/_mthar mchod bstod 'od zhu bya/_las thams cad kyi bum par/_pad nyi dregs pa'i gdan gyi steng du khro bo bdud rtsi 'khyil ba ljang nag rgya gram dang g.yon dril bu 'dzin pa khro bo'i chas thams cad kyis brgyan pa rigs kyi bdag po o rgyan za hor ma'i tshul du bzhugs pa'i skur gyur/_rang 'dra'i ye shes pa badz+ra sa ma dzaHsa spyan drangs/_dzaHhU~M baM hoHsa dbyer med du thim par bsam/_oM badz+ra puSh+pe nas shap+ta pra tIts+tsha swA hA'i bar gyis mchod/_dus gsum sangs rgyas thams cad kyi/_/mngags gzhug pho nya'i las mdzad pa/_/khro rgyal bdud rtsi 'khyil ba yis/_/bgegs kyi sbyor ba rgyun chod cig_/oM badz+ra kro d+ha a mr-i ta kuN+Da lI hU~M phaT/_ces ci nus bzlas mthar/_oM AHhU~M gis mchod yon phul la 'od zhu bya/_bdag 'jug gam rig pa'i me tog dor ba ni/_oM badz+ra sa ma ya oM/_AHbadz+ra sa ma ya AH_hU~M badz+ra sa ma ya hU~M/_swA badz+ra sa ma ya swA/_hA badz+ra sa ma ya hA/_zhes dang*/_oM badz+ra kro d+hA sa ma ya s+t+waM/_zhes rig pa'i me tog dor bas/_bdag dang dkyil 'khor pa'i sku gsung thugs phrin las rnams gnyis su med par gyur bar bsam la/_oM/_ye shes rgyal po sku gsung thugs/_/yon tan phrin las rmad po che/_/de nyid du ni mnyam sbyor ba'i/_/phyag rgya chen po bdag sbyor cig_/oM badz+ra sa ma ya hU~M/_oM badz+ra sa ma ya s+t+waM/_oM dz+ra sa ma ya hoH_zhes dang*/_oM/_khro la khros pas zhi mdzad pa/_/thugs rje khro dpal rngams pa'i tshogs/_/'bar ba'i byin rlabs rmad po che/_/da lta nyid du bdag la stsol/_/oM badz+ra kro d+ha sa ma ya s+t+waM/_oM badz+ra kro d+ha sa ma ya phaT/_oM badz+ra kro d+ha sa ma ya hoH_zhes dngos grub bskul zhing bstim mo/_thal mo sbyar bas btud de/_oM rdo rje'i ye shes thob byed pa'i/_/de bzhin gshegs pa thams cad kyi/_/snying po'i dkyil 'khor chen po 'dir/_/bdag gi slob ma 'jug par 'tshal/_zhes gsol nas slob ma gzhug par gnang bar zhu/_zur gsal ltar las gshin gtor chog sbyar/_slob ma khrus bya/_bgegs bskrad/_srung 'khor bsgom pa sngon 'gros/_lo rgyus kyi khyad par/_bde gshegs sgrub pa bka' brgyad la 'jig rten las 'das pa'i sgrub sde lnga/_'jig rten pa'i sgrub tshul gnyis/_so mtshams kyi sgrub pa gcig ste sde brgyad du phye ba las/_'di ni 'jig rten las 'das pa'i sgrub tshul lnga yi thog ma sku de bzhin gshegs pa'i rigs kyi khro bo bcom ldan 'das 'jam dpal gshin rje gshed kyi skor te/_de la rtsa bshad man ngag gi rgyud dang*/_sgrub brnyes slob dpon so sos bkral ba'i bka' bab kyi lam srol mtha' yas pas gangs can 'dir yang snga 'gyur rnying ma la gshed skor rigs lnga/_ye shes las dang 'jig rten gyi gshin rje/_phrin las kyi bye brag rna cha brgyad dang*/_gsar ma la dmar nag 'jigs gsum nang gses bcas byon pa las/_ye shes kyi gshin rje 'jam dpal zhi ba bla med lugs kyi drag sgrub/_'jam dpal sku yi bka' bab slob dpon chen po 'jam dpal bshes gnyen dang*/_slob dpon chen po pad+ma 'byung gnas/_rgya gar khrag 'thung nag po/_drag sngags kyi rig 'dzin shAn+tiM g+har+b+ha/_slob dpon ba su d+ha ra sogs bka' srol zab cing rgya che ba thams cad kyi snying po/_rtsa rgyud zla gsang nag po dang*/_/sdig pa snying 'dzin sogs kyi rgyud don lag len du bsdebs pa sangs rgyas gnyis pa pad+ma 'byung gnas dang*/_gnubs chen sangs rgyas ye shes yab sras las brgyud de lcags 'dra dang lcags sdig sogs kyi man ngag 'bri byang gi shing rta gnyis la yongs su grags pa las/_skabs su bab pa yab gcig 'jam dbyangs dngos tshangs pa lha yi me tog gis phrin las kyi phyag rgya gangs can 'gro ba'i dpal du byon pa'i sngags smyon zil gnon bzhad pa rtsal gyi dag chen chos rgyun gyi ting nge 'dzin gyi rol mo mtha' klas las byon pa'i 'jam dpal gshin rje gshed kyi dngos gzhi'i dbang bskur ba'i thog ma phyi nang gi 'jug pa'i chos rnams zhu ba'i yon du maN+Dal phul/_slob dpon dang dkyil 'khor gtso bo dbyer mi phyed pa la dad mos drag pos thal sbyar me tog dang bcas pas gsol ba 'debs pa 'di yi rjes zlos mdzod/_/bla ma sangs rgyas kun dang mnyam/_/slob dpon la ni skyabs su mchi/_/sgrub pa bka' brgyad 'khor dang bcas/_/lha rnams la yang phyag 'tshal lo/_/mya ngan 'das pa'i grong khyer du/_/slob dpon gyis kyang bdag gzhug gsol/_/lan gsum brjod nas gdong g.yogs ni/_a khaM bi ra hU~M/_me tog phreng ba ni/_oM puSh+pe rat+na ma l+ya traM gyis sbyin/_tshogs zhing mkha' khyab tu sad pas skyabs su 'gro ba 'di'i rjes zlos mdzod/_/bla ma dkon mchog dgongs su gsol/_/bdag ni dus 'di nas bzung nas/_/ji srid byang chub ma thob par/_/skyob pa khyed la skyabs su mchi/_lan gsum/_theg pa chen po'i lam gyi rtsa ba smon pa sems bskyed pa 'di'i rjes zlos mdzod/_hU~M/_dur khrod gsang ba mchog gi dkyil 'khor du/_/bla med byang chub gnas su sgrub pa dang*/_/bde bar gshegs pa'i dngos grub thob bya'i phyir/_/yang dag byang chub mchog tu sems bskyed cig_/bo d+hi tsit+ta u pa ta ya mi/_lan gsum/_'jug pa byang chub mchog tu sems bskyed pas gzhan don khas blang ba 'di yi rjes zlos mdzod/_/ji ltar dus gsum mgon po rnams/_/yang dag byang chub nges mdzad pa/_/de phyir bla med byang chub sems/_/dam pa bdag gis bskyed par bgyi/_lan gsum brjod/_smin byed kyi srog dang rtsa bar gyur pa spyi dang khyad par gyis bsdus pa'i sdom pa dang dam tshig mtha' dag legs par blangs nas tshul bzhin bsrung snyam pas 'di yi rjes zlos mdzod/_/sdom pa yi ni tshul khrims dang*/_/dge ba'i chos ni sdud pa dang*/_/sems can don byed tshul khrims gsum/_/nam yang bdag ni mi spang ngo*/_/rdo rje dril bu'i phyag rgya yang*/_/yang dag nyid du gzung bar bgyi/_/slob dpon bdag kyang gzung bar bgyi/_/nyin re bzhin ni dus drug tu/_/sbyin pa rnam bzhi rtag tu sbyin/_/phyi nang gsang ba'i theg pa gsum/_/dam pa'i chos ni ma lus gzung*/_/sdom pa rnam bzhi rtag tu gzung*/_/bdag ni sdom pa ma lus gzung*/_lan gsum brjod/_nang du gzhug cing phyag bya ba ni/_slob dpon gyi phyag gi rdo rje la 'jus te/_dzaHhU~M ba~M hoH_zhes dkyil 'khor gyi shar sgo'i nang du khrid par mos la/_/dus gsum sangs rgyas thams cad kyi/_/sku gsung thugs kyi bdag nyid mchog_/bde gshegs rgyal ba 'khor bcas la/_/lus ngag yid kyis phyag 'tshal lo/_/zhes brjod de shar sgo nas phyag byas par mos/_de bzhin du phyogs gzhan gsum nas phyag byas par mos te mthar shar sgo'i nang du dbang stegs la/_gtso bo zhal gcig phyag gnyis pa'i nga rgyal la gnas par bsam la/_dam bzhag bzhi yod pa las phan yon gyi sgo nas dam la bzhag pa ni/_rdo rje mgor bzhag la/_/rigs kyi bu mchog tshur nyon cig_/deng khyod bde gshegs 'khor bcas kyis/_/nang du khrid kyis zhugs pa yin/_/slob dpon lung bstan ngas kyang ni/_/bcom ldan 'jam dpal gshin rje yi/_/ye shes khyed la bskyed par bya/_/rnal 'byor bu mchog khyed kyis kyang*/_/de bzhin gshegs pa'i dkyil 'khor gyi/_dngos grub dam pa thob par 'gyur/_/dngos grub gzhan lta smos ci dgos/_/khyed kyis dkyil 'khor ma mthong ba'i/_/drung du smra bar ma byed cig_/gal te smras par gyur na ni/_/dam tshig nyams te dmyal bar 'gro/_/dam tshig ma srung ba'i nyes dmigs bsgrags pas dam bzhag pa ni/_rdo rje snying gar gtugs te/_/bcom ldan sgrub pa 'jam dpal gshin rje ni/_/khyed kyi snying la gzhug pas na/_/gal te tshul 'di smras na ni/_/de ma thag tu dral te gshegs/_zhes brjod/_dam tshig bsrung ba'i dpang po bdud rtsi byin pas dam la bzhag pa ni/_/'di ni khyod kyi dmyal ba'i chu/_/dam tshig nyams na sreg par byed/_/dam tshig bsrungs na dngos grub thob/_/rdo rje bdud rtsi'i chu 'dis 'grub/_/oM badz+ra pany+tsa a mr-i ta ha na ha na u da ka hU~M phaT/_bla ma'i bka' nyan pa'i tshul gyis dam la bzhag pa ni/_rdo rje mgo bor bzhag la/_deng nas brtsams te thams cad du/_/he ru ka dpal nga yin gyi/_/nga yis smras pa bu yis gyis/_/nga la brnyas par byas na ni/_/khyod ni sdug bsngal ma bral bar/_/tshe yi 'du byed byas nas ni/_/sems can dmyal ba chen por lhung*/_zhes brjod/_dbang gi gzhi ye shes dbab pa la gsol ba gdab pa 'di yi rjes zlos mdzod/_hU~M/_bla ma yi dam dgongs su gsol/_/'jam dpal gshin rje'i dkyil 'khor 'dir/_/de ring bdag sogs mched lcam la/_/byin chen dbab la dbang chen bskur/_/zhes lan gsum gyis gsol ba gdab/_slob ma rnams lus gnad chos bdun bcas/_ngag gnad bum can nam rlung rang sor bzhag_/sems kyi rtog pa skad cig kyang ma yengs par dmigs pa 'di ltar bsgom par zhu/_oM badz+ra a mr-i tas bgegs bsang*/_stong pa'i ngang las gru gsum mthing nag zla gam dmar po gsum ldan gyi lte bar e klong chos dbyings rdo rje btsun mo'i mkha' la klu 'bum gnyan khri sa bdag stong sde brgyad phyogs skyong ru dra pho mo ma he glang rgod brgyad pad nyi'i steng du rgyal kun spyi gzugs sku rdo rje 'jam dbyangs drag por khros pa zil gnon phyag rgya chen po g.yas dkar klu 'bum mthong ba'i dug can sbrul 'bum/_g.yon dmar gnyan rwa yi dug can lcang mo khri/_dbus zhal mthing nag sa bdag mche ba'i dug can sbal pa mgo stong rnams za ba/_/g.yas gsum rdo rje 'khor lo ral gri/_g.yon gsum be con gtun shing sdigs mdzub can/_zhabs brkyang bskum du bgrad pas dregs pa can thams cad mnan pa/_dpal dang dur khrod kyi chas kyis brgyan cing*/_khro gtum gar dgu'i gzi byin 'bar ba/_/yum bai ta li snying dang gri thod 'dzin pa gnyis med du sbyor ba/_gtso bo'i thugs kar ya ma rA dza 'khor lo dang tsit+ta/_de'i thugs kar dregs pa phyag na rdo rje rdo rje dang snying phreng*/_de'i thugs kar rus sbal rngam pa mi zan/_spyi bor shel gyi bya khyung*/_phrag gong du khyung mo sngo nag gnyis/_dpung par stag mo mi zan/_nu mar seng ge_/sta zur dug sbrul dang lce spyang ste rgyan gyi lha brgyad khro bcu'i go cha dang bcas gsal ba'i dpral bar oM dkar po/_mgrin par AHdmar po/_thugs kar hU~M mthing gas mtshan pa/_sangs rgyas thams cad kyi sku gsung thugs rdo rje'i rang bzhin du byin gyis brlabs pa dang slob dpon dang dkyil 'khor gyi lha tshogs la mos gus shugs drag tu bskyed pa'i rkyen gyis/_slob dpon dang dkyil 'khor gyi lha dbyer med pa'i thugs ka'i 'od dang snyoms 'jug bde ba'i sgras bskul te/_mkha' khyab kyi rtsa gsum rgyal ba sras dang bcas pa/_sku phyag rgya/_gsung yig 'bru/_thugs phyag mtshan gyi rnam pa kha char bu yug 'tshub pa bzhin byon nas slob ma'i sgo gsum la sib sib thim par bsam la slob dpon gyis dgongs pa'i gding bskyed/_'bebs pa'i rdzas bdun rol mo dbyangs dang bcas pas/_a la la hoH_sa ma ya hoH_sa ma ya s+t+waM:_'phags mchog thugs rje sogs dang*/_oM AHhU~M a kro te ka ya mAn+ta ka ha na ma tha b+hany+dza hU~M phaT/_dz+nyA na a be sha yaH_s+t+waM b+ha ya s+t+waM b+ha ya:_ra ra ra ra/_tsa la ya tsa la ya:_hU~M a he dz+heM:_zhes drag tu bzlas la dbab/_ye shes pa'i byin rlabs kyi rgyun byang chub ma thob kyi bar du sgo gsum la brtan par byas mos shig:_tiSh+Tha badz+ra/_zhes rdo rje mgo bor rgya gram du bzhag_/khyed rnams kyi spyan mig dar gyis bkab ste dkyil 'khor la ltos dang kha dog gang mthong ba bdag la smros shig_/slob ma rnams kyis gang mthong ba zhus pas/_slob dpon gyis las bzhi'i kha dog gang mthong ba de rigs dang dngos grub 'grub par lung bstan/_'grim dkyil bstar la/_/sngar byin pa'i me tog cod pan de nyid rang rang gi tshe rabs sngon nas 'brel ba'i rigs kyi lha gang yin pa la phog par shog cig snyam pas dkyil 'khor chen por dor ba'i mos pas tshig 'di rjes zlos dang bcas te dor bar zhu/_dkyil 'khor lha tshogs drung du bdag mchi yis/_/dpal chen gshin rje'i dkyil 'khor chen po ru/_/dngos grub thob phyir dbus su me tog dor/_/sngon sbyangs las 'phro gang yod der bab shog_/pra tIts+tsha hoH_de ltar phul ba nyid lhag pa'i lhas bzhes te slar yang dbang rtags cod pan gyi tshul du spyi bor bcings pa dang lhan cig dpal chen po ye shes kyi phyag rgya gnyis pa 'phros te spyi bor thim par mos shig_/skabs 'dir spro na me tog gang du bab pa'i rigs dang mthun pa'i dbang ming gdags/_hU~M/_cod pan 'di ni dpa' ba'i rtags/_/smon lam mthun pa'i lhas byin brlabs/_/bar chad kun gyis mi tshugs shing*/_/'khor ba'i skyon gyis mi gos shog_/puSh+pe ab+hi Shiny+tsa maM:_slob dpon gyi thugs ka nas ye shes kyi 'od zer gser gyi thur ma lta bu byung*/_/khyed rang rnams kyi ma rig pa'i sgrib g.yogs mig dar dang lhan cig sangs kyis gsal bar mos shig_/rdo rjes mig 'byed pa'i tshul byas/_/skal bzang khyed la gzhal yas ngas bstan phyir/_/rab tu dga' bar bskyed la gus par gyis/_/ma rig mun sel ye shes mig dbye yi/_/gsal zhing dwangs pas sems can don la ltos/_/oM badz+ra pra be sha ya phaT/_ces brjod cing mig dar bsal/_dkyil 'khor blta bar bskul ba ni/_dkyil 'khor bzang po nyid la ltos/_/shes rab rnam gsum rab tu bskyed/_bde bar gshegs pa'i byin gyis brlabs/_/dngos grub thams cad mngon du 'gyur/_'gro ba rigs drug thams cad la/_/bu bzhin snying rje kun la skyed/_/gsang ba'i chos la dad par gyis/_/zhes brjod nas rten brten pa'i dkyil 'khor rnams rgyas par bstan/_dag pa ye shes kyi spyan thob pa'i mtshon byed lhag pa gzugs brnyan gyi dkyil 'khor rten dang brten pa bum pa la sogs pa'i rdzas rnams bkra lam me mjal ba la brten nas mtshon bya don gyi dkyil 'khor lhag pa ting nge 'dzin gyis sprul pa'i gzhal med khang rdo rje'i rwa gur me dpung gi dbus gru gsum mthing nag zla gam dmar po gsum ldan gyi lte bar e klong chos dbyings rdo rje btsun mo'i mkha' la klu 'bum gnyan khri sa bdag stong sde brgyad phyogs skyong ru tra pho mo ma he glang rgod brgyad pad nyi'i steng du rgyal kun spyi gzugs sku rdo rje 'jam dpal dbyangs drag por khros pa sogs nas rgyan gyi lha brgyad khro bcu'i go cha dang bcas pa'i bar byin 'bebs ltar la/_lhag pa'i bde chen ye shes bzhi'i thod mkhar gyi glo 'bur bzhi la shar du ya ma rA dza/_lhor ya ba ti/_nub tu a ba glang mgo_/byang du ral pa tshar dgu ste ye shes lnga'i rang bzhin rtsa ba'i lha lnga/_tshad med bzhi'i bdag nyid gru chad bzhi ru phyal pa/_til pa/_'phyar ka gwa dmar/_ma ru rtse lnga la gshed chen bcu gnyis kyis bskor ba/_de'i phyi skye mched bcu gnyis dag pa'i lcags mkhar du zla gshed 'chi bdag bcu gnyis/_'obs chen bcu drug tu zhag gshed so gnyis/_phrin las bzhi'i khams la pho gshed mo gshed bdud dang mon pa king kang ma mo'i 'khor tshogs/_bdag tu lta ba dag pa'i lha mgon bdud dang gnod sbyin gyi sgo ba bzhi ste gtso dang 'khor du snang ba de dag kyang rnam 'gyur srid zhi dbyings su za ba'i dus kyi dgra chen po khams gsum skye 'chi srog gi bdag po 'jigs byed gshin rje rol pa'i cho 'phrul du rngams par ston kyang don la 'jam dpal ye shes sems dpa' gcig gi ye shes sgyu ma'i rnam rol gzhi lam 'bras bu'i yon tan ma lus pa lhun gyis rdzogs pa'i bdag nyid chen po gang*/_phyi ras bris kyi dkyil 'khor 'di ni dpes mtshon pa yin gyi don phung khams skye mched thams cad lha'i ngo bor lhun grub tu gnas te phyi nang gzhan gsum dbyer med ngo bo gcig tu rdzogs pa'i don rtogs par mos mdzod/_zhugs pa la mngon par dbang bskur ba'i don du maN+Dal phul/_gsol ba gdab pa 'di'i rjes zlos mdzod/_phyag rdor bdud sde phyer 'thag dbang la/_ho/_bla ma gsang ba'i bdag po la/_/deng nas byang chub ma thob bar/_/snying nas gus pas gsol ba 'debs/_/dngos grub zab mo bstsal du gsol/_zhes bsgyur dgos/_mchan_rdo rje 'dzin pa dgongs su gsol/_/'jam dpal gshin rje'i dkyil 'khor du/_/bum pa'i dbang bskur bstsal du gsol/_/zhes gsol ba btab pas sgos bka' so so la thun mong rigs pa'i dbang lnga sbyor na 'di na bka' brgyad rig 'dzin zhal lung gi dbang ltar shes par bya'o/_mchan _de bzhin gshegs pa rnams kyis dbang bskur ba'i dgongs pa mdzad/_byang chub sems dpa' rnams kyis bkra shis brjod/_sems ma rnams kyis rdo rje'i glu len/_khro bo khro mo rnams kyis bgegs bskrad/_rig pa'i lha mo rnams dang slob dpon lhan cig pas rnam par rgyal ba'i bum pas dbang bskur bar mos shig_/bum pa spyi bor bzhag la/_hU~M/_khrag 'thung 'jam dpal gshin rje gshed/_/gsang ba gsum las byung ba yi/_/bum pa'i dbang bskur chen po 'di/_/skal ldan bu la sbyin par bya/_oM AHhU~M a kro te ka ya mAn+ta ka ha na ma tha b+hany+dza hU~M phaT/_ya ma rA dza ka la sha a b+hi Shiny+tsa maM/_de ltar rnam rgyal bum pa'i dbang bskur bas snod bcud lha dang gzhal yas/_phung po khams dang skye mched/_lha dang lha mor gnas dag ste nyon mongs pa dug lnga sbyangs*/_rigs lnga ye shes mngon du gyur nas nam mkhar bzhugs pa'i dbang lha rnams kyang 'od phung gi rnam pas khyed rang la thim par mos shig_/de dag gis phyi dbang rdzas la brten nas bskur ba'i rjes su/_nang nus pa 'jug pa'i dbang gi slad du dkyil 'khor gyi lha tshogs rnams las mar me gcig las gnyis mched kyi tshul du lha sku phyag rgya'i rnam pa spyi bo nas byon te dbang bskur bar mos shig_/hU~M:_bskal pa me ltar 'bar ba'i dkyil 'khor du/_/lha yi lhar gyur bcom ldan gshin rje'i gshed/_/srid gsum sgrol ba'i dbu gsum zhal ni rngam/_/rgyud drug sgrol mdzad phyag mtshan me ltar 'bar/_/sde brgyad 'dul ba'i dpa' bo'i chas brgyad brgyan/_/dregs pa'i gshed mdzad zil gnon dbang thob shog_/e ka he dun ya ma snying khrag ra ma tsa ya a b+hi Shiny+tsa hU~M/_hU~M:_mi 'gyur mthing nag ma mo kun gyi gtso/_/khams gsum dbang sdud khrag mtsho zhal du gsol/_/zhing bcu sgrol mdzad tsit+ta yab la 'khyud/_/sgrol byed nag mo yum gyi dbang thob shog_/e ka ya ma tra ka rak+sha kro d+hi a b+hi Shiny+tsa hU~M/_hU~M/_smug nag 'jigs pa dregs pa kun gyi gshed/_/log lta'i sbor ba ma lus stobs kyis gdon/_/'khor lo tsit+ta phreng ba phyag na bsnams/_/gsod byed ya ma rA dza'i dbang thob shog_/e ka he du na ya ma rA dza a b+hi Shiny+tsa hU~M/_hU~M/_dregs pa phyag na rdo rje ni/_/mthu stobs rdo rje sdigs mdzub bgrad/_/ljang nag klu gnyan gnod sbyin gzir/_/rdo rje khros pa'i dbang thob shog_/oM badz+ra pA Ni a b+hi Shiny+tsa hU~M/_hU~M/_rus sbal rngam pa mi zan ni/_/rang byung mchod rten lus la brgyan/_/srid pa'i 'khor lo lto na gnas/_/tshe srog khyams dang dbang thob shog_/e ka ma hA b+he ra ka a b+hi Shiny+tsa hU~M/_hU~M/_mkha' lding rgyal po ga ru Ta/_/gshog spu mtshon cha'i 'khor los gtams/_/klu gshed dpa' bo gdug pa gzir/_/bya khyung rgyal po'i dbang thob shog_/e ka ma hA ga ru Ta a b+hi Shiny+tsa hU~M/_hU~M/_khyung mo smug nag klu gnyan sa bdag 'dul/_/stag mo ro zan btsan dang sa bdag 'dul/_/seng ge dkar mos rig 'dzin las la 'dzud/_/dug sbrul nag pos phas kyi rbod gtong zlog_/sprul pa gyad gnon dbang mchog thob par shog_/e ka ma hA ga ru Ta byA g+hr-i tsaN+Da seM ha ro nye ha la a b+hi Shiny+tsa hU~M/_hU~M/_sku yi phyag rgya rol pa las/_/bdud po bye ba dgu khri ni/_/sngo nag lcags chas chu glang chibs/_/'chi bdag nag po'i dbang thob shog_/e ka ya ma he dun ki shan kA la bdud kraM nA ga rak+sha a b+hi Shiny+tsa hU~M/_hU~M/_gsung gi phyag rgya rol pa las/_/sgrol ging srog bdag dmar po ni/_/dmar nag bse chas rta la chibs/_/srog bdag dmar po'i dbang thob shog_/e ka ya ma rak+sha ya ma rA dza a b+hi Shiny+tsa hU~M/_hU~M/_thugs kyi phyag rgya rol pa las/_/ya ma gtum po mgo dgu pa/_/mthing nag dur khrod chas kyis brgyan/_/tshe bdag nag po'i dbang thob shog_/ya ma kro d+ha kA la e ka he dun ya ma rak+sha tri shu tsit+ta a b+hi Shiny+tsa hU~M/_hU~M/_smug nag ya ma rA dza ni/_/sku la dur khrod chas kyi brgyan/_/ma traM ro dbyug 'khor lo bskor/_/yab yum bcas pa'i dbang thob shog_/ya ma rA dza sa do me ya a b+hi Shiny+tsa hU~M/_hU~M/_ser nag smyos byed 'bar ba ni/_/sku la dur khrod chas kyis brgyan/_/ma traM ro dbyug 'khor lo bskor/_yab yum bcas pa'i dbang thob shog_/ya me do ru Na yo da ya a b+hi Shiny+tsa hU~M/_hU~M/_dmar nag ar+Ya dmar po ni/_/sku la dur khrod chas kyis brgyan/_/ma traM ro dbyug 'khor lo bskor/_/yab yum bcas pa'i dbang thob shog_/ya da yo ni ra yak+She ya a b+hi Shiny+tsa hU~M/_/hU~M/_ljang nag ral pa tshar dgu ni/_/sku la dur khrod chas kyis brgyan/_/ma traM ro dbyug 'khor lo bskor/_/yab yum bcas pa'i dbang thob shog_/yak+She ya tsa ni ra ma ya a b+hi Shiny+tsa hU~M/_hU~M/_dung gi mon pa dregs chen seng ge'i gdong*/_/dung gi mon mo bla rkun rngam pa'i gdong*/_/bskul na dgra bgegs bla sems yid gsum 'gugs/_/shar phyogs mon pa yab yum dbang thob shog_/e ka ya ma mon+ta a b+hi Shiny+tsa hU~M/_hU~M/_/lcags kyi mon pa gsod byed stag gi gdong*/_/mon mo nag mo g.yu yi ral pa can/_/bskul na dgra bgegs bla sems yid gsum 'gugs/_/lho phyogs mon pa yab yum dbang thob shog_/e ka ya ma mon+ta a b+hi Shiny+tsa hU~M/_hU~M/_/bse yi mon pa gtum chen dred kyi mgo_/mon mo tshe 'phrog khrag gi ral pa can/_/bskul na dgra bgegs bla sems yid gsum 'gugs/_/nub phyogs mon pa yab yum dbang thob shog_/e ka ya ma mon+ta a b+hi Shiny+tsa hU~M/_hU~M/_gser gyi mon pa srog gshed khyung gi mgo_/mon mo bla rkun snying la gzer 'debs ma/_/bskul na dgra bgegs bla sems yid gsum 'gugs/_/byang phyogs mon pa yab yum dbang thob shog_/e ka ya ma mon+ta a b+hi Shiny+tsa hU~M/_/hU~M/_/he le khyab pa shar gyi bdud/_/nag mo mi zan snying rkun ma/_/srog gcod bdud po yab yum dbang*/_/skal ldan 'di yis thob par shog_/e ka ya ma bdud traM kA la a b+hi Shiny+tsa hU~M/_hU~M/_nag po 'dzum med lho yi bdud/_/nag mo me thogs snying 'byin ma/_/srog gcod bdud po yab yum dbang*/_/skal ldan 'di yis thob par shog_/e ka ya ma bdud traM kA la a b+hi Shiny+tsa hU~M/_/hU~M/_so bdar 'khrigs pa nub kyi bdud/_/nag mo khrag skyug snying gzer ma/_/srog gcod bdud po yab yum dbang*/_/skal ldan 'di yis thob par shog_/e ka ya ma bdud traM kA la a b+hi Shiny+tsa hU~M/_hU~M/_ral pa spyir bcings byang gi bdud/_/nag mo smyos byed dbugs sdud ma/_/srog gcod bdud po yab yum dbang*/_/skal ldan 'di yis thob par shog_/e ka ya ma bdud traM kA la a b+hi Shiny+tsa hU~M/_/gnyis pa gsung nus pa ster bar byed pa sngags kyi dbang ni/_dpon slob gnyis ka lhar gsal ba'i thugs ka'i sa bon las sngags kyi phreng ba mar me gcig las gnyis mched ltar bla ma'i zhal nas byung ste slob ma'i mgrin pa'i lam du brgyud snying ga'i sa bon mthar 'khod pas gsung gi byin rlabs ma lus pa rgyud la zhugs par mos la/_sngags 'di'i rjes zlos mdzod/_oM AHhU~M a kro te ka ya mAn+ta ka ha na ma tha b+hany+dza hU~M phaT/_lan gsum bzla/_/gsum pa thugs phyag mtshan gyi dbang ni/_slob dpon gyi thugs ka'i 'od kyi ye shes kyi lha tshogs rnams kyi thugs rgyud bskul/_sangs rgyas thams cad thugs phyag mtshan gyi rnam pa bsam gyis mi khyab par 'dus/_de nyid slob ma'i snying gar thim par bsam la/_hU~M/_'khor ba dral byed 'khor lo dang*/_/nyon mongs gcod byed ral gri dang*/_/chos dbyings skye med rdo rje yis/_/sku gsum mnyam pa'i dbang thob shog_/e ka ya ma tsakra khang+ga badz+ra a b+hi Shiny+tsa hoH_bam chen tsit+ta gru gsum gyi gdan du 'jam dpal phyag rgya zil gnon rtsa ba'i lha drug rgyan lha brgyad/_sprul pa gsum/_gshed chen bzhi/_mon bdud yab yum/_'chi bdag bcu gnyis/_'obs srung sha za king kang ste dkyil 'khor yongs rdzogs gsal bar byin gyis brlabs pas yon tan gyi dbang dang dngos grub ma lus pa thob par mos shig_/hU~M/_/dpa' brtul sngags kyis byin bskyed pa'i/_/bam chen ro la mnyam par rol/_/rdo rje 'dzin pa'i dbang thob nas/_/bde chen mnyam nyid rtogs par shog_/e ka ya ma ma hA mAM sa a d+hi pa ta sid+d+hi a b+hi Shiny+tsa hoH_bam gyi phyi rgyud kyi lha thams cad tsit+ta'i dkyil 'khor la 'dus/_de yang dwangs ma lnga'i thig le la 'dus/_de slob ma'i snying gar 'ub kyis thim par gyur par bsam la/_bam de ye shes lnga'i ngo bor byin rlabs dang dngos grub dpag tu med par bsam la dum bur bgos te gdong pa/_kha mig_/mgo bo/_lus kyi cha shas te dme ba lnga po cung zad re 'jog la gsang dbang skabs dbang rdzas la bsre/_'phros thams cad slob mar ster la/_des bam chen gsang ba'i dbang bskur ba thob/_'jam dpal gshin rje gshed po'i las dang dngos grub mtha' dag sgrub pa la dbang ba yin pas/_deng nas brtsams te phrin las bzhi dang grub pa chen po brgyad/_khyad par zil gnon phyag rgya chen po mchog gi dngos grub mngon du byas nas sems can rnams la gnas skabs dang mthar thug gi phan bde'i dpal yon ster ba la brtson par gyis shig_/lnga pa dkyil 'khor yongs su rdzogs pa srung ba stobs chen pu ri'i dbang bskur bas phrin las kyi dbang dang byin rlabs thob par mos shig_/chos sku 'gyur med mchod rten 'di/_/longs sku bde chen zil gnon bzhugs/_/sprul sku 'khor tshogs bsam mi khyab/_/skal ldan khyod la dbang bskur bas/_/rdo rje'i mkhar du bsrung ba dang*/_/nam mkha'i mthongs su bshig pa dang*/_/ri rab rtse la bsad pa dang*/_/ri thang mtshams su bzlog pa dang*/_/rgya mtsho'i gting du mnan pa dang*/_/dreg pa tsit+ta dkrugs pa ste/_/las drug 'khor lo bskor ba yi/_/dbang rnams khyed kyis thob par shog_/oM sarba ta thA ga ta kA ni kA ya a b+hi Shiny+tsa hU~M/_mchod rten spyi bor bzhag_/des bka' rdzogs mchod rten gyi dbang bskur ba thob/_/gshin rje gshed po'i phrin las kyi 'khor lo phyogs med du bskor ba la dbang ba yin pas/_srung ba dang zhi ba'i las kyis rjes su 'dzin pa dang*/_zlog bsad mnan dkrugs dbye bskrad rengs rmongs la sogs pas gdug pa can tshar gcod pa'i phrin las rtag tu sgrub par gyis shig_/lnga pa mtha' rten dbang la gnyis su yod pa las/_dang po bstan srung mthu'i dbang gi don du dmigs pa 'di ltar mdzod/_rang nyid 'jam dpal gshin rje'i gshed du gsal ba'i mdun du gshin rje'i zhing khams 'jigs su rung ba'i dbus su thod mkhar srid pa'i rtse mor slebs pa/_khrag zhag 'bab pa'i nang du dbus su 'khor lo rtsibs brgyad pa lte bar pad nyi'i steng du dgra bo gan rkyal kha sbub tu brdzis pas ma he'i steng du yaHlas gshin rje b+he ba satwa nag po shin tu khros shing spyan gsum pa zhal gdangs pa las me 'bar zhing kha nas khrag 'dzag pa/_mche ba gtsigs shing ljags glog ltar 'khyugs pa dbu skra smin ma sma ra dmar ser 'bar ba/_g.yas be con 'phyar zhing g.yon gnam lcags kyi 'khor lo bskor ba/_mi lpags kyi stod g.yog dang stag lpags kyi sham thabs can/_rus pa'i rgyan drug_/rgyu ma/_dug sbrul/_khrag gi thig les brgyan pa/_zhabs gnyis ma he la zhon nas stong gsum nyul ba/_g.yon du b+h+yoHlas yum gtum mo dug hrul ma nag mo shin tu khros shing gri gug dang thod khrag 'dzin pa las kyi rlung dmar la zhon pa/_gnyis ka'ang me 'bar ba'i dbus na bzhugs pa/_de'i phyi rol du gshed chen sde bzhi 'chi bdag bcu gnyis dregs pa'i dmag tshogs kyis bskor ba/_de thams cad kyi spyi bor oM/_mgrin par AH_snying gar hU~M/_hU~M las 'od zer rnon po lcags kyu lta bu 'phros pas/_lho phyogs rim pa bdun gyi sa 'og nas 'chi bdag gshin rje'i rgyal po 'khor dang bcas pa skad cig gis lhags par gyur bar bsam zhing*/_spyan drangs pa ni/_hU~M/_lho phyogs gshin rje'i 'jig rten gyi:_'jigs su rung ba mun pa'i klong:_dregs pa kun gyi shan khang nas:_las byed gshin rje'i 'khor dang bcas:_bdag gis dad pas spyan 'dren na:_sngon gyi khas blangs dam bca' bzhin:_ma thogs rings pa'i tshul gyis ni:_dgra bgegs 'dul phyir gshegs su gsol:_e ya ma rA dza sa pa ri wa ra badz+ra sa mA dza dzaHhU~M ba~M hoH_zhes pas spyan drangs la/_dam bzhag ni rdo rje spyi bor bzhag dam chu ljags la byin par mos te/_hU~M/_sngon tshe 'jam dpal gshin rje yi:_spyan sngar zhal bzhes dam bcas ltar:_bcol ba'i las rnams sgrub par mdzod:_gal te dam las 'das pa na:_dus gsum rgyal ba'i bka'i chad pas:_khyod kyang nyams par gdon mi za:_oM ya ma rA dza sa ma ya rak+sha hU~M zhes dam la bzhag_/mchod gtor 'bul ba ni/_hU~M/_las mdzad gshin rje 'khor bcas la:_gdug pa'i dgra bgegs bsgral ba yi:_dmar chen khrag dang dbang po lnga:_tshil chen gsur dud zhun chen me:_mkhris chen bdud rtsi sman gyi bcud:_sha khrag dmar gyi gtor ma sogs:_'dod yon longs spyod bsam mi khyab:_bdag cag dad pas 'bul lags na:_bstan pa srung phyir bzhes su gsol:_oM ya ma rA dza sa pa ri wA ra ar+g+haMnas shap+ta'i bar dang*/_ma hA pany+tsa a mr-i ta khA hi/_ma hA rak+ta pU dza khA hi/_zhes 'bul/_bstod pa ni/_hU~M/_khrag 'thung gshin rje gshed po yi:_bka' nyan 'jigs byed ma rungs pa:_khams gsum skye 'gro'i srog gi bdag:_rdzu 'phrul che zhing mthu dang ldan:_bstan pa srung mdzad dam tshig can:_nyams pa sgrol ba'i gshed po che:_dge sdig shan 'byed dpa' bo mdzad:_rdo rje 'dzin pa'i pho nya ba:_las mdzad nag po khyod la bstod:_gtum drag bzod par dka' ba'i gzugs:_dbyug pa phyar zhing thod khrag 'dzin:_dur khrod 'jigs pa'i chas kyis brgyan:_drag shul chen po'i gar stabs kyis:_srin gyi ma he khros pa brdzis:_yum chen gtum mo dug hrul ma:_bka' nyan pho brgyad mo brgyad sogs:_las byed gshin rje'i tshogs kyis bskor:_sa gsum kun la mnga' mdzad pa'i:_drag shul chen po khyod la bstod:_de nas slob dpon gshin rje gshed du gsal ba la gus 'dud dud pa byas pas/_de'i thugs ka'i 'od kyis mdun bskyed kyi thugs rgyud bskul te/_srung ma 'khor dang bcas pa la gnyer gtad par mos shig_/gtor ma lag tu gtad de/_ho/_'chi bdag gshin rje'i rgyal po 'khor bcas tshogs/_/slob ma 'di yi bran du gtong byed na/_/'jam dpal khro bo'i dam tshig gnyan po rnams/_/dran par mdzod la bcol ba'i las kun sgrubs/_/khyad par bsad mnan gtad sel smyo rengs rmongs/_/byed dkrugs sdeb gshor hom zor rlung 'khor sogs/_/gnag pa'i mthar thug mngon spyod drag po'i las/_/thogs pa med par 'grub pa'i phrin las mdzod/_/ya ma me da k+She rA dza sa do ru Na yo ni ra ya tsa ni hU~M phaT/_a b+hi Shiny+tsa AH_zhes brjod/_khrag 'thung 'jam dpal gshin rje bka' yi pho nya chen po 'chi bdag las kyi gshin rje yum gtum mo dug hrul nag mo 'khor gyi gshin rje sde dpon brgyad/_lo zla zhag gshed la sogs pa ma rungs pa'i dmag tshogs 'khor dang bcas pa rnams kyis/_chos sku kun tu bzang po/_longs sku 'jam dpal zhi khro/_slob dpon 'jam dpal bshes gnyen/_sprul sku pad+ma thod phreng*/_phung byed shAn+tiM gar+b+ha/_bal po ba su d+ha ra/_gnubs chen sangs rgyas ye shes/_mkha' 'gro ye shes mtsho rgyal/_lo chen bai ro tsA na/_khrag 'thung zil gnon bzhad pa rtsal nas bdag cag gi dpal ldan bla ma dam pa'i bar du byon pa rnams kyi bka' dang dam las ma 'da' bar/_spyir sangs rgyas kyi bstan pa srungs/_dkon mchog gi dbu 'phang bstod/_dge 'dun dang chos kyi rgyal srid skyongs/_snod kyi dge bcu sgrubs/_bcud kyi phan bde spel/_gdug pa can gyi gnya' non/_dam tshig can gyi sdong grogs mdzod/_thar 'dod kyi re ba skongs/_phan sems can gyi phrin las sgrubs/_khyad par rdo rje'i slob ma'am rigs kyi bu 'di'i sdang ba'i dgra thul/_gnod pa'i bgegs choms/_nad dang nyer 'tshe sel/_tshe dang bsod nams spel/_dpal dang grags pa sgrubs/_dbang phyug dang gzi brjid bskyed/_chos nor dang longs spyod spel/_mnga' ris dang chos srid skyongs/_dngos grub kyi bsam pa sgrubs/_phrin las kyi re ba skongs/_mdor na byang chub ma thob kyi bar du lus dang grib bzhin du 'grogs te phun sum tshogs pa'i bsam sbyor thams cad yid bzhin du 'grub pa'i phrin las g.yel med du sgrub par mdzod cig_/ces byas la gtor ma'i lha slob ma la bstims nas gnyis med kyi dgongs pa bskyang du bcug_/spyi bor rdo rje bzhag lcer bdud rtsi blud de/_sarba pany+tsa a mr-i ta brjod cing gtor ma la'ang bran nas dam bsre'o/__/gong du thun mong rigs dbang lnga sbyar na 'dir rdo rje slob dpon gyi dbang bka' brgyad ltar sbyar dgos so/__/gnyis pa gsang ba'i dbang gi don du maN+Dal phul/_gsol ba 'debs pa 'di yi rjes zlos mdzod/_hoH_/bla ma yab yum gsang ba'i bdag_/gsang ba'i dkyil 'khor bdag la ston/_/bde ba chen po'i dngos grub nod/_/gsang ba'i dbang chen bskur du gsol/_/lan gsum gsol ba gdab/_'bru gsum brjod cing gdong g.yogs bcings/_slob dpon 'jam dpal gshin rje gshed du _rta mgrin la/_rta mgrin du _mchan/_gsal ba'i gsang gnas hU~M las rdo rje hU~M gis mtshan pa nor bu'i rtsa bar oM/_rtse mor phaTaHdang bcas pa/_phyag rgya yum gzi ldan mar b+he ta li gsal ba'i mkha' AHlas pad+ma AHsa mtshan pa/_oM sarba ta thA ga ta ma hA a nu rA ga na badz+ra swa b+hA wa at+ma ko\u0f85 haM/_'jam dpal ya man+ta ka yab yum snyom par zhugs pa'i dga' ba'i sgras phyogs bcu'i sangs rgyas dang byang chub sems dpa' thams cad spyan drangs zhal du zhugs/_thugs rjes su chags pa'i mes 'od du zhu/_yum gyi mkhar babs pa thod chang bdud rtsi sbyar ba dang bsres nas slob mar byin te/_/bla ma lha tshogs yab yum rnams/_gnyis med sbyor ba'i byang chub sems/_/skal ldan ngag la dbang bskur bas/_/bde chen gsang ba'i dbang thob shog_/oM sarba pany+tsa a mr-i ta ma hA su kha a b+hi Shiny+tsa a be sha ya a aH_zhes byin pas slob mas kyang*/_a ho ma hA su kha/_/da ni sangs rgyas kun dang mnyam/_/bdag ni bsod nams skal pa che/_/yon tan kun gyis bdag brgyan te/_/badz+ra he ru'i bdag nyid do/__/zhes brjod pas myang*/_des lus gang bas ngag gi nyes pa dag nas gsung rdo rjer gyur par bsam la/_mig dar bkrol/_yum gyi b+ha ga nas gsang ba'i dbang thob pas rang byin gyis brlabs pa sgom pa la dbang zhing*/_lam lnga las mthong ba'i lam sa dang po'i rtogs pa skye ba'i mthu dang ldan par byas la/_des ngag gi dri ma dag ste longs spyod rdzogs pa'i sku 'grub pa'i rten 'brel 'grig go_/gsum pa shes rab kyi dbang la maN+Dal phul/_gsol ba 'debs pa 'di'i rjes zlos mdzod/_/gnyis med ye shes bde chen po/_/mkha' 'gro sgyu ma bde mchog bde/_/brten na gnyis med bde ba bskyed/_/'khor lo gnas bzhir dbab bzung bzhi/_/bde chen chos nyid rtogs par shog_/ces phyag rgya'i dkyil 'khor ma mthong ba rnams kyis mig dar bcings la/_oM AHhU~MH_a ho su kha b+hany+dza mo k+Sha ho/_zhes gzungs ma slob mar gtad de/_slob ma 'jam dpal ya mAn+ta ka _rta mgrin du _mchan/_gsal ba'i gsang gnas hU~M las rdo rje hU~M gis mtshan pa nor bu'i rtsa bar oM/_phyag rgya yum b+he ta li gzi ldan mar gsal ba'i mkha' gsang AH las pad+ma AHsa mtshan pa/_yab kyi rdo rje nor bu'i rtsa bar rtsa gsum 'dus pa'i rtsa g.yas la oM dkar po/_g.yon la AH dmar/_dbus su hU~M mthing ka rtse mor phaT yig ser por bsgom/_snyoms par zhugs pas khams kyi dwangs ma rnams 'khor lo bzhir rim pa bzhin dga' ba/_mchog dga'/_khyad dga'/_lhan skyes kyi dga' ba rnams rgyud la skyes nas slar yang rlung 'pho med dam pa'i mas brten gyi dga' ba bzhi ngo sprad de lus dkyil mthong ba'i brdar gdong g.yogs bkrol/_de ltar phyag rgya brten nas bde stong gi ye shes skyes pas kun rdzob byang chub sems kyi dkyil 'khor du shes rab dang ye shes gnyis kyi dbang dkyil 'khor lo bsgom pa la dbang*/_lam lnga las rgyu yi theg pa'i mthar phyin lam kun tu 'od kyi rtogs pa skye ba'i mthu dang ldan par byas/_des yid kyi dri ma dag ste chos sku 'grub pa'i rten 'brel 'grig go_/bzhi pa rig pa'i ye shes bde chen lta ba spyi 'byams tshig gi dbang bskur ba la maN+Dal phul/_gsol ba gdab pa 'di'i rjes zlos mdzod/_hoH_/gsang chen rol pa'i gzhal yas 'dir/_/bka' drin bsam 'das bla ma la/_/sgyu sogs rab spangs me tog 'bul/_/yang dag snying po bstan du gsol/_/lan gsum gsol ba gdab/_dbang gsum pa'i dpe las byung ba'i ye shes kyis mtshon byed byas nas don gyi 'od gsal ngo sprad pa'i phyir bde stong gnyis med mtshon pa'i rdor dril lag tu gtad/_stong gsal rig pa'i ye shes man shel mig tu bstan te brda mtshon nas ngo sprad pa ni/_hU~M/_/sems nyid ka dag lhun rdzogs don/_/snang stong zung 'jug sgyu ma'i sku/_/gnyis med 'dzin grol sprul pa'i sku/_/yang dag nges don rtogs par bgyi/_dz+nyA na pany+tsa d+harma kA ya a b+hi Shiny+tsa a aH_khyod kyis dbang bzhi pa rig pa'i ye shes tshig gi brda sprad pa la brten nas thob pa'i lam rang byung gi ye shes phyag rgya chen po sgom pa la dbang zhing lam lnga las 'bras bu'i theg pas mthar phyin lam/_bcu gsum rdo rje 'dzin pa'i theg pa'i rtogs pa skye ba'i mthu dang ldan par byas la/_des lus ngag yid gsum gyi dri ma bag chags dang bcas pa thams cad dag ste/_ngo bo nyid sku thob pa'i rten 'brel 'grig go__/ces brjod/_btang rag gi maN+Dal phul/_rjes chog ni/_lhag ma/_chad tho/_brtan skyong*/_dkyus bzhin bya/_dkyil 'khor gyi lha la mchod bstod nongs pa bzod par gsol/_rten la brtan bzhugs bya/_smon lam shis brjod sogs rgyas par bya'o/__/'pho bcas srid pa'i rgyu 'bras ltar snang la/_/'gyura~M meda~M ye shes phyag rgyas zil mnan pas/_/tshe 'chi srog gi bdud bcom thega~M mcho~Mg gi_/bstana~M pa'i~M smin byed rgyala~M mtshana~M dza yan+tu/_'jam dpal gshin rje tshe bdag gi sgrub thabs dbang dang bcas pa'i le'u tshan no//__//