JKW-KABUM-07-JA-012

🚧 This website is under continued development. We appreciate your patience!

Previous Section Back to Volume PageNext Section

དཔལ་འཁོར་ལོ་བདེ་མཆོག་བོང་བུའི་ཞལ་ཅན་གྱི་བསྐྱེད་རྫོགས་ཀྱི་ཁྲིད་ཡིག་སྙིང་པོར་དྲིལ་བ་བདེ་ཆེན་ཐིག་ལེ།

Wylie title	dpal 'khor lo bde mchog bong bu'i zhal can gyi bskyed rdzogs kyi khrid yig snying por dril ba bde chen thig le
Location	mkhyen brtse'i bka' 'bum Volume 7, sde tshan 12, Pages 257-273 (Folios 1a to 9a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. dpal 'khor lo bde mchog bong bu'i zhal can gyi bskyed rdzogs kyi khrid yig snying por dril ba bde chen thig le. In 'jam dbyangs mkhyen brtse'i dbang po'i bka' 'bum, Vol. 7: 257-273. Khams sde dge rdzong sar dgon: Rdzong sar blo gros phun tshogs, 2020.
Genre	Contemplative Guide Books and Instructional Manuals - khrid yig  ·  Generation Stage - bskyed rim  ·  Completion Stage - rdzogs rim
Deity	'khor lo bde mchog
Colophon	།པཎ་ཆེན་གྲགས་པ་རྒྱལ་མཚན་གྱི་སྒྲུབ་ཐབས་དང་། འཇམ་མགོན་ཀུན་དགའ་གྲོལ་མཆོག་གི་རྫོགས་རིམ་ཞལ་ཤེས་ཀྱི་ཁྲིད་ཡིག་སོགས་ཀྱི་དགོངས་པ་ལྟར་བྱ་བྲལ་སྤོང་བ་པ་འཇམ་དབྱངས་མཁྱེན་བརྩེའི་དབང་པོས་དག་ཅིང་གསལ་བ་བྲིས་པ་དགེ་ལེགས་ཀྱི་སྣང་བས་ཕན་བདེའི་པདྨོ་དུས་རྟག་ཏུ་རྒྱས་པར་གྱུར་ཅིག། །།དགེའོ། །བཀྲ་ཤིས་སོ།།
	paN chen grags pa rgyal mtshan gyi sgrub thabs dang /__'jam mgon kun dga' grol mchog gi rdzogs rim zhal shes kyi khrid yig sogs kyi dgongs pa ltar bya bral spong ba pa 'jam dbyangs mkhyen brtse'i dbang pos dag cing gsal ba bris pa dge legs kyi snang bas phan bde'i pad+mo dus rtag tu rgyas par gyur cig/__//dge'o/__/bkra shis so

1 Texts in this Section (sde tshan or chos tshan)

257-273	དཔལ་འཁོར་ལོ་བདེ་མཆོག་བོང་བུའི་ཞལ་ཅན་གྱི་བསྐྱེད་རྫོགས་ཀྱི་ཁྲིད་ཡིག་སྙིང་པོར་དྲིལ་བ་བདེ་ཆེན་ཐིག་ལེ། dpal 'khor lo bde mchog bong bu'i zhal can gyi bskyed rdzogs kyi khrid yig snying por dril ba bde chen thig le Contemplative Guide Books and Instructional Manuals - khrid yig   ·   Generation Stage - bskyed rim   ·   Completion Stage - rdzogs rim	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །དཔལ་འཁོར་ལོ་བདེ་མཆོག་བོང་བུའི་ཞལ་ཅན་གྱི་བསྐྱེད་རྫོགས་ཀྱི་ཁྲིད་ཡིག་སྙིང་པོར་དྲིལ་བ་བདེ་ཆེན་ཐིག་ལེ་ཞེས་བྱ་བ་བཞུགས་སོ།།

ཨོཾ་སྭསྟི། བརྟན་གཡོའི་དངོས་ཀུན་ལྷན་སྐྱེས་དྲྭ་བ་རུ། །སྡོམ་མཛད་བླ་མ་ཧེ་རུ་ཀ་དཔལ་ལ། །བཏུད་ནས་བདེ་ཆེན་ཕྲ་མོའི་ཐིག་ལེ་ཡི། །མན་ངག་གྲུབ་པའི་ཞལ་ལུང་སྙིང་པོར་སྤེལ། །འདི་ལ་གཉིས། ལོ་རྒྱུས་དང་། གདམས་པ་དངོས་སོ། །དང་པོ་ནི། ཡང་དག་པར་རྫོགས་པའི་སངས་རྒྱས་རྡོ་རྗེ་འཆང་། རྗེ་བཙུན་རྡོ་རྗེ་རྣལ་འབྱོར་མ། དེས་མངོན་སུམ་དུ་རྗེས་སུ་བཟུང་བ་ནི་བལ་ཡུལ་ཡེ་རང་གི་པཎྜི་ཏ་སྐལ་ལྡན་བཟང་པོ་སྟེ། དེས་སྐྱེ་དགུ་ཀུན་དགའི་འཚོ་བ་བཟང་པོ་ལ་གནང་། དེས་གྲུབ་པའི་དབང་ཕྱུག་ཆེན་པོ་མ་ཧཱ་བོ་དྷི་ལ་གནང་། དེ་ལས་གྲུབ་ཆེན་བསམ་གཏན་འོད་ཟེར་གྱིས་གསན། དེ་ལས་རྗེ་རྡོ་རྗེ་འཆང་གི་ཐུགས་སྲས་གུ་གེ་པཎྜི་ཏ་གྲགས་པ་རྒྱལ་མཚན་གྱིས་གསན་པ་ཡིན་ཏེ། དེའང་ངོར་ཆེན་རྡོ་རྗེ་འཆང་ཀུན་དགའ་བཟང་པོ་མངའ་རིས་གློ་བོའི་ཕྱོགས་སུ་ལན་གསུམ་ཕེབས་པའི་རྗེས་མའི་སྐབས། གློ་བོའི་བར་ཚིགས་ལུང་ཐུར་གྱི་སྣེ་ཚེ་གྲུམ་ཟེར་བ་ན། བླ་མ་བསམ་གཏན་འོད་ཟེར་བ་ཞིག་བལ་པོའི་གྲུབ་ཆེན་མ་ཧཱ་བོ་དྷི་ལ་བོང་ཞལ་ཅན་གྱི་དབང་དང་གདམས་ངག་གསན་ནས། ལོ་ལྔ་བཅུ་རྩ་གསུམ་དུ་བསྐྱེད་རིམ་ཐུན་གཉིས་སུ་བསྒོམ་ཞིང་། རྫོགས་རིམ་ཞར་བྱུང་རྣམས་མ་ཆག་པར་མཛད། སྙིང་པོ་ཡི་གེ་བདུན་པ་དུང་ཕྱུར་གསུམ་ལྷག་དང་། འཇམ་དཔལ་མཚན་བརྗོད་རྒྱ་སྐད་འབའ་ཞིག་ཏུ་ཁྲི་ཚོ་བརྒྱད་གསུངས་པས་མཚོན་རིམ་གཉིས་ཟབ་མོའི་ཉམས་གཞེས་ལ་རྩེ་གཅིག་ཏུ་བརྩོན་པས་གྲུབ་པའི་གོ་འཕང་མཐོན་པོར་གཤེགས་ཀྱང་། འཕྲལ་སྣང་དུ་ཆང་ལ་འདེབས་པའི་ཕབས་འཚོང་བའི་རྣམ་པར་བཞུགས་པའི་སྦས་པའི་རྣལ་འབྱོར་པ་ཆེན་པོ་ཞིག་ཡོད་པ་རྗེ་རྡོ་རྗེ་འཆང་གིས་གསན་ཏེ། གློ་བོ་བྲག་དཀར་དུ་ཆེད་ཀྱིས་སྤྱན་དྲངས་ཏེ་དབང་གསན་པར་བརྩམ་ནའང་འབུལ་མ་ནུས་པར་སླར་རང་གནས་སུ་གཤེགས། དེའི་ཚེ་རྡོ་རྗེ་འཆང་གི་ཞལ་ནས་འདིའི་རྒྱུན་ཆད་དུ་རང་ཕོངས་པས་ངོས་ལ་བསྐུར་མི་ནུས་ནའང་། ངེད་ཀྱི་སློབ་མ་འདི་གསུམ་ལ་བསྐུར་གསུངས་ནས། བྱམས་གླིང་ཆོས་རྗེ་དཔལ་ལྡན་པ། གུ་གེ་པཎྜི་ཏ། བླ་མ་རྒྱལ་སྲས་པ་གསུམ་ལ་གནང་སྦྱིན་བཟང་པོ་བསམ་གྱིས་མི་ཁྱབ་པ་དང་བཅས་ཏེ་བརྫོང་བར་མཛད་པས། ཁོང་གིས་ཀྱང་དབང་དང་གདམས་ངག་ལེགས་པར་གསུངས། དེ་ལས་གུ་གེ་པཎྜི་ཏས་མངོན་དཀྱིལ་ཡི་གེར་བཀོད་ཅིང་། གློ་བོ་མཁན་ཆེན་བསོད་ནམས་ལྷུན་གྲུབ་དང་། ཆོས་རྗེ་ནམ་མཁའ་བརྟན་པ་སོགས་ལ་གནང་བ་ནས་བཟུང་ད་ལྟའི་བར་དུ་དབང་བཀའ་རྣམ་པར་དག་པའི་རྒྱུན་མ་ནུབ་པར་བྱུང་། གདམས་ངག་འཁྲིད་ཀྱི་རིམ་པ་ནི། གློ་བོ་མཁན་ཆེན་ལས་འཇམ་པའི་དབྱངས་ཀུན་དགའ་གྲོལ་མཆོག་གིས་གསན། དེ་ཡན་ཆད་སྙན་བརྒྱུད་དུ་བཞུགས་པ་ལ། རྗེ་འདིས་ཟིན་བྲིས་གསལ་བར་གནང་ཞིང་དེའི་སྙིང་པོ་བསྡུས་ཏེ་ཁྲིད་བརྒྱའི་གླེགས་བམ་དུའང་བཀོད་པས་ཁྲིད་ལུང་གི་བརྒྱུད་པ་བར་མ་ཆད་པར་བྱུང་བ་ཡིན་ནོ། །གཉིས་པ་གདམས་པ་དངོས་ལ་གཉིས། རྟེན་བསྐྱེད་རིམ་དང་། བརྟེན་པ་རྫོགས་པའི་རིམ་པའོ། །དང་པོ་ནི། དབང་གིས་སྨིན་ཅིང་དམ་ཚིག་དང་ལྡན་པས། གནས་དབེན་པར་བདེ་བའི་གདན་ལ་བསམ་གཏན་གྱི་སྤྱོད་ལམ་དང་ལྡན་པས་འཁོད་དེ། བསྐྱེད་རིམ་གྱི་མངོན་རྟོགས་རྒྱས་པར་པཎ་ཆེན་གྲགས་པ་རྒྱལ་མཚན་གྱིས་མཛད་པའི་སྒྲུབ་ཐབས་ཕྲིན་ལས་མཐའ་ཡས་ལྟར་བསྒོམ། བསྡུ་ན་སྐྱབས་སེམས་ཚད་མེད་བཞི་བསྒོམ་པས་བསོད་ནམས་དང་། ཆོས་ཐམས་ཅད་རང་གི་སེམས་ཙམ་དུ་ཤེས་པར་བྱས་ལ། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅་ཧཾ། སེམས་དེའང་གསལ་བ་དང་མ་བྲལ་བའི་སྟོང་པ་ཉིད་དུ་དམིགས་ལ། ཨོཾ་ཤཱུནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་བརྗོད་པས་ཡེ་ཤེས་ཀྱི་ཚོགས་བསག །སྟོང་པའི་ངང་ལས་ཁམས་གསུམ་དང་རང་གི་སེམས་ཉིད་ཧཱུྃ་སྔོན་པོའི་རྣམ་པས་ནམ་མཁའ་ལ་གནས་པར་གྱུར། རང་ཉིད་གང་དུ་གནས་པའི་གོ་སར་སྣ་ཚོགས་པདྨ་འདབ་མ་བརྒྱད་པའི་ཟེའུ་འབྲུར་ཉི་མའི་དཀྱིལ་འཁོར་གྱི་སྟེང་དུ་མཚན་བཟང་པོ་སུམ་ཅུ་རྩ་གཉིས་ཀྱི་ངོ་བོ་ཨཱ་ལི་ཕྲག་གཉིས་ཞུ་བ་ལས་ཟླ་བའི་དཀྱིལ་འཁོར་དཀར་པོ་མེ་ལོང་ལྟ་བུའི་ཡེ་ཤེས། དེའི་སྟེང་དུ་དཔེ་བྱད་བཟང་པོ་བརྒྱད་ཅུའི་ངོ་བོ། ཀཱ་ལི་དང་། ཡ་ར་ལ་ཝ་ཌ་ཌྷ་ཕྲག་གཉིས་ཞུ་བ་ལས་ཉི་མའི་དཀྱིལ་འཁོར་མཉམ་པ་ཉིད་ཀྱི་ཡེ་ཤེས། དེ་གཉིས་ཀྱི་བར་དུ་རྒྱུ་རྡོ་རྗེ་སེམས་དཔའི་བདག་ཉིད་ཧཱུྃ་ཡིག་དཀར་པོ་འོད་ཟེར་ལྔ་འཕྲོ་བ་སོ་སོར་རྟོག་པའི་ཡེ་ཤེས། སླར་ཡང་ནམ་མཁར་གནས་པའི་ཧཱུྃ་ཡིག་ནཱ་དའི་བར་དུ་འདུས་ཏེ། ནཱ་ད་དེ་ཉིད་རྒྱུའི་ཧཱུྃ་ཡིག་ལ་ཐིམ། ཐམས་ཅད་གཅིག་ཏུ་གྱུར་པ་བྱ་བ་ནན་ཏན་གྱི་ཡེ་ཤེས། དེ་ལས་སྐུ་ཡོངས་སུ་རྫོགས་པ་ཆོས་ཀྱི་དབྱིངས་ཀྱི་ཡེ་ཤེས་ཀྱི་ངོ་བོ་བདག་ཉིད་བཅོམ་ལྡན་འདས་དཔལ་ཧེ་རུ་ཀ་སྐུ་མདོག་ཨིནྡྲ་ནཱི་ལ་ལྟར་སྔོ་ཞིང་། ཉི་མ་འབུམ་གྱི་འོད་ཅན་མཚན་དཔེས་བརྒྱན་པ། ཞལ་གསུམ་ཕྱག་དྲུག་པ། རྩ་ཞལ་བོང་བུའི་གདོང་ཅན་སྔོན་པོ་ཁྲག་གིས་བྱུགས་ཤིང་འཇིགས་པར་མཛད་པ། གཡས་དཀར། གཡོན་དམར་བ། སྤྱན་གསུམ་གསུམ་དང་ལྡན་པ། ཞལ་མཆེ་བ་གཙིགས་ཤིང་རལ་པའི་ཐོར་ཅོག་ལ་ཡིད་བཞིན་གྱི་ནོར་བུ། གཡོན་ཕྱོགས་སུ་ཟླ་བ་ཕྱེད་པ་དང་། དཔྲལ་བར་སྣ་ཚོགས་རྡོ་རྗེས་མཛེས་པ། ཐོད་པ་སྐམ་པོ་ལྔ་ལྔས་དབུ་བརྒྱན་དང་། རློན་པ་ཁྲག་འཛག་པ་ལྔ་བཅུས་དོ་ཤལ་བྱས་པ། ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་ཅིང་། འོག་མ་གཉིས་ཀྱིས་མིའི་པགས་པ་འཛིན་ཅིང་གོས་སུ་གྱོན་པ། གཡས་འོག་མས་མདུང་རྩེ་གསུམ། གཡོན་འོག་མས་ཐོད་པ་དང་ཁ་ཊྭཱྃ་ག་འཛིན་པས་དགོས་འདོད་ཐམས་ཅད་སྩོལ་བ། ཞབས་གཡས་བརྐྱང་བས་དུས་མཚན་མ་དམར་མོ་དང་། གཡོན་བསྐུམ་པས་འཇིགས་བྱེད་ནག་པོ་མགོ་བོ་བལྟབ་ནས་མནན་པ། སྒེག་པ་དཔའ་བ་མི་སྡུག་པ་སྟེ་སྐུའི་ཉམས་གསུམ། རྒོད་ཅིང་དྲག་ཤུལ་འཇིགས་སུ་རུང་བ་སྟེ་གསུང་གི་ཉམས་གསུམ། སྙིང་རྗེ་རྔམས་དང་ཞི་བ་སྟེ་ཐུགས་ཀྱི་ཉམས་གསུམ་སྟེ་གར་གྱི་ཉམས་དགུ་དང་ལྡན་ཞིང་། རུས་པའི་རྒྱན་དྲུག་གིས་བརྒྱན་པ། སྟག་གི་པགས་པའི་ཤམ་ཐབས་རྣམ་པར་གྲོལ་བ། དེའི་པང་ན་ཡུམ་རྡོ་རྗེ་ཕག་མོ། སྐུ་མདོག་དམར་མོ་བོང་བུའི་ཞལ་ཅན། ཞལ་ནས་ཁྲག་འཛག་པ། ཕྱག་གཉིས་ཀྱིས་གཡས་རྩེ་གསུམ་འཕྱར་ཞིང་། གཡོན་ཐོད་ཁྲག་འཛིན་པ་ཡབ་ཀྱི་མགུལ་ནས་འཁྱུད་པ། གཅེར་བུ་སྐྲ་གྲོལ་ཞིང་། བྱིན་པ་གཉིས་ཀྱིས་བཅོམ་ལྡན་འདས་ལ་འཁྲིལ་བ། ཐོད་པ་སྐམ་པོ་ལྔའི་དབུ་རྒྱན་དང་། སྐམ་པོ་ལྔ་བཅུའི་དོ་ཤལ་ཅན། ཕྱག་རྒྱ་ལྔས་མཛེས་པ། ཡབ་ཡུམ་གཉིས་ཀའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀའི་སྟོད་དུ་ཧཱུྃ། དབུས་སུ་རང་འདྲ་བའི་ཡེ་ཤེས་སེམས་དཔའ། དེའི་ཐུགས་ཀར་ཏིང་ངེ་འཛིན་སེམས་དཔའ་ཡབ་ལ་ཧཱུྃ་སྔོན་པོ། ཡུམ་ལ་བྃ་དམར་པོ། ཡབ་ཀྱི་ཐུགས་ཀར་ཟླ་བ་ལ་གནས་པའི་ཨོཾ་ཧ་དཀར་པོ་རྡོ་རྗེ་སེམས་དཔའི་ངོ་བོ། གཞན་རྣམས་སུ་ཉི་མ་ལ་གནས་པའི་མགོ་བོར་ན་མ་ཧི་སེར་པོ་རྣམ་པར་སྣང་མཛད་ཀྱི་ངོ་བོ། སྤྱི་གཙུག་ཏུ་སྭཱ་ཧཱ་ཧུ་དམར་པོ་པདྨ་གར་དབང་གི་ངོ་བོ། ཕྲག་པ་གཉིས་སུ་བོ་ཥ྄ཊ་ཧེ་ནག་པོ་ཧེ་རུ་ཀའི་ངོ་བོ། མིག་གཉིས་སུ་ཧུཾ་ཧཱུྃ་ཧོ་དམར་སེར་རྡོ་རྗེ་ཉི་མའི་ངོ་བོ། ཡན་ལག་ཐམས་ཅད་དེ་ཚིག་ཆེན་བརྒྱད་དུ་ཕཊ་ཧྃ་ལྗང་གུ་རྟ་མཆོག་གི་ངོ་བོ། ཡུམ་གྱི་གནས་རྣམས་སུ་ཉི་མའི་དཀྱིལ་འཁོར་རེ་རེའི་སྟེང་དུ། ལྟེ་བར་ཨྃ་བྃ་དམར་མོ་ཕག་མོའི་ངོ་བོ། སྙིང་གར་ཧྃ་ཡྃ་སྔོན་མོ་གཤིན་རྗེ་མ། ཁར་ཧྲིཾ་མྃ་དཀར་མོ་རྨོངས་བྱེད་མ། མགོ་བོར་ཧྲིཾ་ཧྲཱིཾ་སེར་མོ་སྐྱོད་བྱེད་མ། སྤྱི་གཙུག་ཏུ་ཧུྃ་ཧཱུྃ་ལྗང་གུ་སྐྲག་བྱེད་མ། ཡན་ལག་ཐམས་ཅད་དེ་ཚིག་ཆེན་བརྒྱད་པོ་ལ་ཕཊ་ཕཊ་དུད་ཁ་ཙཎྜི་ཀའི་ངོ་བོ་རྣམས་སུ་གྱུར། འབར་བའི་ཕྱག་རྒྱ་དང་། ཕེཾ་ཞེས་པས་ཕྱོགས་བཅུའི་འཇིག་རྟེན་དང་། ཡུལ་ཉི་ཤུ་རྩ་བཞིར་བཞུགས་པའི་དཔའ་བོ་དང་རྣལ་འབྱོར་མ་ཐམས་ཅད་མདུན་གྱི་ནམ་མཁར་སྤྱན་དྲངས་པ་ལ། ཨོཾ་སརྦ་ཏ་ཐཱ་ག་ཏ་ཤྲཱི་ཙཀྲ་སམྦ་ར་མཎྜ་ལ་ཙཀྲ་སརྦ་བཱི་ར་ཡོ་གི་ནཱི་ས་པ་རི་ཝཱ་ར་ཨརྒྷཾ་ནས། ཤབྡའི་བར་གྱིས་མཆོད། ཛཿཧཱུྃ་བྃ་ཧོཿ ཞེས་པས་དམ་ཚིག་པ་དང་དབྱེར་མེད་དུ་དགུག་གཞུག་བཅིང་ཞིང་དགྱེས་པར་བསམ། དེའི་བདེ་བ་ལ་ཅུང་ཟད་མཉམ་པར་བཞག་ཅིང་། ཨོཾ་ཡོ་ག་ཤུདྡྷཿསརྦ་དྷརྨཱཿཡོ་ག་ཤུདྡྷོ྅་ཧཾ། ཆོས་ཐམས་ཅད་ཐབས་ཤེས་དབྱེར་མེད་ཀྱི་རྣལ་འབྱོར་དུ་དག་ལ་བདག་ཀྱང་དེའི་ངོ་བོར་དག་གོ་ཞེས་ང་རྒྱལ་བཟུང་། ལག་གཉིས་རྣམ་ལྔ་འདོད་བསྐོར་དང་འཁྱུད་རྒྱ་བྱ། སླར་ཡང་ཕེཾ་ཞེས་པས། དབང་གི་ལྷ་འཁོར་ལོ་བདེ་མཆོག་གི་དཀྱིལ་འཁོར་མདུན་གྱི་ནམ་མཁར་སྤྱན་དྲངས། དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་བ་སྩལ་དུ་གསོལ། ཞེས་གསོལ་བ་བཏབ་པས། དབང་གི་ལྷ་རྣམས་ཀྱིས། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲི་ཡེ་ཧཱུྃ། ཞེས་གསུངས་ཤིང་དབང་བསྐུར་བས། ལུས་ཐམས་ཅད་ཡེ་ཤེས་ཀྱི་བདུད་རྩིའི་ཆུ་རྒྱུན་གྱིས་གང་། བདེ་བ་ཆེན་པོའི་རང་བཞིན་དབང་ཐམས་ཅད་ཐོབ། དབང་ལྷ་རྣམས་ཀྱང་བདག་ལ་ཐིམ། ཆུ་ལྷག་མ་ཡར་ལུད་པ་ལས་ཡབ་ལ་མི་བསྐྱོད་པ་དང་། ཡུམ་ལ་རྣམ་པར་སྣང་མཛད་ཀྱིས་དབུར་བརྒྱན་པར་བསམ། དངོས་སུ་བཤམ་པའི་མཆོད་པ་ཡོད་ན་བྱིན་གྱིས་རླབས། གང་ལྟར་ཡང་། ཨོཾ་སརྦ་ཏ་ཐཱ་ག་ཏ་སོགས་སྔགས་དང་ཕྱག་རྒྱས་ཕྱི་མཆོད་འབུལ། ཨོཾ་ཨཱཿཧཱུྃ་གིས་བདུད་རྩི་མྱང་། ཡབ་ཡུམ་གྱི་རྐང་བརྒྱད་དམ། ཆོས་དབྱིངས་རྣམ་དག་ངང་ལས་མ་གཡོས་ཀྱང་། །ཐབས་ཀྱིས་ཁྲོ་བོའི་སྐུར་སྟོན་གདུག་པ་འདུལ། །ཆེ་བའི་ཆེ་མཆོག་ལྷ་ཡི་ལྷར་གྱུར་པ། །ཀུན་བཟང་ཧེ་རུ་ཀ་ལ་ཕྱག་འཚལ་ལོ། །དཔལ་ལྡན་རྡོ་རྗེ་མཁའ་འགྲོ་མ། །མཁའ་འགྲོ་མ་ཡི་འཁོར་ལོས་སྒྱུར། །ཡེ་ཤེས་ལྔ་དང་སྐུ་གསུམ་བརྙེས། །འགྲོ་བ་སྐྱོབ་ལ་ཕྱག་འཚལ་ལོ། །ཞེས་བསྟོད། དེ་ནས་ལྷའི་ང་རྒྱལ་དང་། རྣམ་པའི་གསལ་སྣང་ལ་སེམས་རྩེ་གཅིག་ཏུ་བཟུང་ཞིང་། སྣང་བ་ཐམས་ཅད་ལྷར་ཤར་བའི་གསལ་སྣང་ལ་ངེས་པ་བརྟན་པོ་མ་སྐྱེས་ཀྱི་བར་དུ་འབད་དེ་བསྒོམ། དེས་སྐྱོ་ན་བཟླས་པ་བྱ་བ་ནི། རང་གི་ཐུགས་ཀའི་ཧཱུྃ་གི་ནཱ་ད་ལས་སྔགས་ཀྱི་ཕྲེང་བ་བྱུང་། རྡོ་རྗེའི་ལམ་ནས་ཡུམ་གྱི་པདྨར་སོང་སྟེ། ཨ་བ་དྷཱུ་ཏིའི་ལམ་ནས་སྟེང་དུ་བྱུང་། ཡུམ་གྱི་ཞལ་ནས་ཐོན། རང་གི་ཞལ་དུ་ཞུགས། ནཱ་ད་ལ་ཐིམ་ཞིང་། སླར་ཡང་ནཱ་དཱ་ལས་བྱུང་སྟེ་རྒྱུན་མི་འཆད་པར་འཁོར་བ་ལས་བདེ་བ་ཆེན་པོའི་ཡེ་ཤེས་བརྟན་པར་བསམས་ལ། ཨོཾ་ཧྲཱིཿཧ་ཧ་ཧཱུྃ་ཧཱུྃ་ཕཊ། ཅེས་ཡི་གེ་བདུན་པ་ཁོ་ན་བཟླ། ཡང་རང་གི་ལྟེ་བར་ཟླ་བ་ལ་གནས་པའི་ཧཱུྃ་དམར་སྐྱའི་ནཱ་ད་ལས་རླུང་ཕྱིར་འབྱུང་བ་ཧཱུྃ་གི་རང་བཞིན་དུ་བྱུང་། དེ་ལས་དཔལ་ཧེ་རུ་ཀ་ཡབ་ཡུམ་དཔག་ཏུ་མེད་པ་སྤྲོས་ཏེ་འགྲོ་བའི་དོན་བྱས་ནང་དུ་འཇུག་པ་ཨོཾ་གྱི་རང་བཞིན་གྱིས་ཞུགས། ནཱ་ད་ལ་ཐིམ་གནས་པ་ཨཱཿའི་རང་བཞིན་དུ་བསྒོམ་ལ་ཅུང་ཟད་ཁ་སྦྱར་བའི་ཚུལ་དུ་བཟུང་ངོ་། །ཐུན་བསྡུ་བ་ནི། བཅོམ་ལྡན་འདས་བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཞེས་དངོས་གྲུབ་གསོལ། དག་དྲན་རྒྱས་པར་བྱ་བའམ། །ཤྲཱི་ཡིག་གཉིས་མེད་ཡེ་ཤེས་ཏེ། །ཧེ་ཞེས་རྒྱུ་སོགས་སྟོང་པ་ཉིད། །རུ་ཡིག་བཀོད་པ་དང་བྲལ་བ། །ཀ་ཞེས་གང་དུའང་མི་གནས་པའོ། །ཞེས་འོད་གསལ་བ་དང་། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་རྣམ་ཐར་གྱི་བདག་ཉིད་དཔལ་ཧེ་རུ་ཀའི་ངེས་དོན་གྱི་དག་པ་དྲན་པར་བྱ། སྤྲོ་ན་གཏོར་མ་འབུལ། སྤྱོད་ལམ་ལ་འཇུག་པ་ན། སྣོད་བཅུད་ཐམས་ཅད་དག་པའི་གཞལ་ཡས་ཁང་དང་ལྷར་བལྟས་ལ། སྣང་གྲགས་རྟོག་གསུམ་དཔལ་ཧེ་རུ་ཀའི་སྐུ་གསུང་ཐུགས་ཀྱི་ངོ་བོར་ལམ་དུ་ཁྱེར་བར་བྱའོ། །གཉིས་པ་ལ་གཉིས། གོ་དོན་མདོར་བསྟན་པ་དང་། བསྒོམ་དོན་རྒྱས་པ་བཤད་པའོ། །དང་པོ་ནི། དཔལ་འཁོར་ལོ་སྡོམ་པ་ངེས་པར་བརྗོད་པའི་རྒྱུད་ལས། དབང་པོ་གཡོ་བའི་རྟ་ཀུན་ནང་དུ་ངེས་སྦྱར་བའི། ཞེས་མིག་སོགས་སྒོ་ལྔ་ནས་ཕྱི་རོལ་དུ་རྣམ་རྟོག་སྐྱེ་བའི་རླུང་འགོག་པ་སྟེ་ངོ་བོ་སོར་སྡུད་ཡིན་ལ། ཡང་། ཡེ་ཤེས་རྒྱལ་བ་མ་ལུས་འདུས་པའི་སྣོད་གྱུར་པ། ཁམས་གསུམ་སྐྱེད་པར་བྱེད་པ་ཉིད་དུ་ཉེར་འགྲོ་བ། མཐོང་བ་མཁའ་དང་འདྲ་བ་དྲི་མེད་དཔལ་དུ་གྱུར། ཅེས་སྐྱེ་འགྱུར་གྱི་འཆར་སྒོ་གཉིས་མེད་ཡེ་ཤེས་དེ་ཉིད། སྨིག་རྒྱུ་ལ་སོགས་པའི་རྟགས་ཅན་ཡེ་ཤེས་ཀྱི་སྣང་བ་ཀུན་ཁྱབ་བསམ་གཏན་གྱི་ལམ་བསྟན་པ་ཡིན་ནོ། །གཉིས་པ་ལ་གསུམ། རྩ་བའི་དམིགས་པ། ཡན་ལག་གི་དམིགས་པ། དོན་བསྡུ་བའོ། །དང་པོ་ནི། གོང་དུ་ཇི་སྐད་བསྟན་པ་ལྟར་བསྐྱེད་རིམ་བཟླས་པའི་བར་སྔོན་དུ་བཏང་། དེ་ནས་རང་གི་སྙིང་གའི་ཧཱུྃ་ལས་འོད་འཕྲོས་པས་ཕྱིའི་སྣོད་བཅུད་ཐམས་ཅད་རང་གི་ལུས་ལ་བསྡུ། ཡུམ་ཡང་སྣའི་སྒོ་གཡོན་ནས་རང་གི་སྙིང་གར་བསྡུ། རང་ཉིད་ཕྱག་གཉིས་པར་བསྡུས་པའི་སྤྱི་བོར་བླ་མ་བསྒོམས་ལ། མོས་གུས་དྲག་ཏུ་བྱ་ཞིང་། བདག་གི་རྒྱུད་ལ་ཡང་དག་པའི་ཏིང་ངེ་འཛིན་བསྐྱེད་དུ་གསོལ། ཞེས་གསོལ་བ་བཏབ། དེ་ནས་སྙིང་གི་ནང་དུ་ཨ་ལས་ཟླ་བའི་དཀྱིལ་འཁོར་སྲན་མ་ཕྱེད་ཚལ་ཙམ་གྱི་སྟེང་དུ་རང་གི་ཤེས་པ་ཐིག་ལེ་དཀར་དམར་ཡུངས་འབྲུ་འབྲིང་པོ་ཙམ་ཞིག་ཏུ་བསམ་ལ་དེ་ལ་སེམས་བཟུང་། རིམ་གྱིས་རླུང་ཁ་སྦྱར་འཇམ་པོ་བྱ། གོམས་ནས་སེམས་ཟིན་པ་དང་ཡིད་གཞན་དུ་མི་འཕྲོ་ཞིང་སེམས་རྩེ་གཅིག་ཏུ་གནས་པ་དང་བདེ་གསལ་གྱི་ཏིང་ངེ་འཛིན་སྐྱེའོ། །གཉིས་པ་ལ་བདུན་ལས། དང་པོ་མིག་གི་རྣམ་ཤེས་ལ་དམིགས་ཤིང་བསྒོམ་པ་ནི། རྩ་བའི་དམིགས་པ་ལ་གསལ་སྣང་བརྟན་པོ་རྙེད་པ་ན། སྔོན་འགྲོ་སྔ་མ་ལྟར་བྱས་ལ། དངོས་གཞི་མིག་གི་འབྲས་བུ་གཉིས་ཀྱི་ནང་དུ་ཟླ་བ་ལ་གནས་པའི་ཐིག་ལེ་དཀར་པོ་ཤིན་ཏུ་ཕྲ་བ་རེ་བསྒོམས་ཏེ་མིག་བཙུམས་ལ་ཡིད་གཟུང་། ཅུང་ཟད་ཟིན་པ་དང་གཟུགས་སྣ་ཚོགས་ལ་བལྟ་ཞིང་། ཐིག་ལེ་ལ་ཡིད་གཏད་དེ་གཞན་དུ་སེམས་འཕྲོར་མི་གཞུག་གོ །དེ་གོམས་པས་ཐིག་ལེའི་རྣམ་པ་གསལ་ཞིང་གཟུགས་གང་མཐོང་བའི་སྟེང་དུ་ཏིང་ངེ་འཛིན་སྐྱེའོ། །དེ་ལ་བརྟན་པ་ཅུང་ཟད་ཐོབ་པ་དང་། ཐིག་ལེ་དེ་སྙིང་གར་བསྡུས་ལ་སྙིང་གའི་ཐིག་ལེ་དེ་སྔར་བས་ཀྱང་གསལ་ཞིང་འབར་བར་བསྒོམ། མཉམ་པར་བཞག་པས་ཏིང་ངེ་འཛིན་མཆོག་སྐྱེའོ། །གཉིས་པ་རྣ་བའི་རྣམ་ཤེས་ལ་དམིགས་ཤིང་བསྒོམ་པ་ནི། དེའི་རྗེས་ལ་རྣ་བར་སྤྲོ་སྟེ་སྔོན་འགྲོ་སྔར་ལྟར་བསྒོམས་ལ། དངོས་གཞི་རྣ་བ་གཉིས་ཀྱི་ནང་དུ་ཟླ་བ་ལ་གནས་པའི་ཐིག་ལེ་སྔོན་པོ་གཉིས་བསྒོམ་ལ་སྒྲ་མེད་པའི་ཕྱོགས་སུ་ཡིད་གཟུང་། ཅུང་ཟད་ཟིན་པ་དང་སྒྲ་སྣ་ཚོགས་མཉན་ཞིང་ཐིག་ལེ་ལ་ཡིད་གཏད་དེ། གཞན་དུ་སེམས་འཕྲོར་མི་གཞུག །དེ་གོམས་པས་ཐིག་ལེའི་དམིགས་པ་གསལ་ཞིང་སྒྲ་གང་ཐོས་པའི་སྟེང་དུ་ཏིང་ངེ་འཛིན་སྐྱེའོ། །དེ་ལ་བརྟན་པ་ཅུང་ཟད་ཐོབ་པ་དང་། ཐིག་ལེ་དེ་སྙིང་གའི་ཐིག་ལེ་ལ་བསྡུས་པས་ཐིག་ལེ་དེ་སྔར་བས་ཀྱང་གསལ་ཞིང་འབར་བར་བསྒོམ། མཉམ་པར་བཞག་པས་ཏིང་ངེ་འཛིན་མཆོག་སྐྱེའོ། །གསུམ་པ་སྣའི་རྣམ་ཤེས་ལ་དམིགས་ཤིང་བསྒོམ་པ་ནི། དེའི་རྗེས་ལ་སྣར་སྤྲོ་ཞིང་སྔོན་འགྲོ་སྔར་ལྟར་བསྒོམས་ལ་དངོས་གཞི་ལ་སྣ་བུག་སོ་སོའམ། བུ་གའི་འདོམས་སོའི་ནང་དུ་ཟླ་བའི་སྟེང་དུ་ཐིག་ལེ་སེར་པོར་བསྒོམ་ལ་དྲི་མི་བྲོ་བའི་སར་ཡིད་གཟུང་། ཅུང་ཟད་ཟིན་པ་དང་དྲི་སྣ་ཚོགས་བསྣམས་ཤིང་ཐིག་ལེ་ལ་ཡིད་གཏད་དེ་གཞན་དུ་སེམས་འཕྲོར་མི་གཞུག །དེ་ལ་གོམས་པས་ཐིག་ལེའི་དམིགས་པ་གསལ་ཞིང་དྲི་གང་ཚོར་གྱི་སྟེང་དུ་ཏིང་ངེ་འཛིན་སྐྱེའོ། །དེ་ལ་བརྟན་པ་ཅུང་ཟད་ཐོབ་པ་དང་། ཐིག་ལེ་དེ་ཉིད་སྙིང་གའི་ཐིག་ལེ་ལ་བསྡུས་པས། ཐིག་ལེ་དེ་སྔར་བས་ཀྱང་གསལ་ཞིང་འབར་བར་བསྒོམས་ལ་མཉམ་པར་བཞག་པས་ཏིང་ངེ་འཛིན་མཆོག་སྐྱེའོ། །བཞི་པ་ལྕེའི་རྣམ་ཤེས་ལ་དམིགས་ཤིང་བསྒོམ་པ་ནི། དེའི་རྗེས་ལ་ལྕེར་སྤྲོ་ཏེ། སྔོན་འགྲོ་སྔར་ལྟར་བསྒོམས་ལ་དངོས་གཞི་ལ་ལྕེའི་རྩ་བར་ཟླ་བའི་སྟེང་དུ་ཐིག་ལེ་དམར་པོ་བསྒོམས་ལ། རོ་མི་མྱང་བར་ཡིད་གཟུང་། ཅུང་ཟད་ཟིན་པ་དང་རོ་སྣ་ཚོགས་མྱོང་ཞིང་། ཐིག་ལེ་ལ་ཡིད་གཏད་དེ་གཞན་དུ་སེམས་འཕྲོར་མི་གཞུག །དེ་ལ་གོམས་པས་ཐིག་ལེའི་དམིགས་པ་གསལ་ཞིང་རོ་གང་མྱོང་བའི་སྟེང་དུ་ཏིང་ངེ་འཛིན་སྐྱེའོ། །དེ་ལ་བརྟན་པ་ཅུང་ཟད་ཐོབ་པ་དང་། ཐིག་ལེ་དེ་སྙིང་གའི་ཐིག་ལེ་ལ་བསྡུས་ལ། ཐིག་ལེ་དེ་སྔར་བས་ཀྱང་གསལ་ཞིང་འབར་བར་བསྒོམ་ནས་མཉམ་པར་བཞག་པས་ཏིང་ངེ་འཛིན་མཆོག་སྐྱེའོ། །ལྔ་པ་ལུས་ཀྱི་རྣམ་ཤེས་ལ་དམིགས་ཤིང་བསྒོམ་པ་ནི། དེའི་རྗེས་ལ་ལུས་ལ་སྤྲོ་ཏེ་སྔོན་འགྲོ་སྔར་ལྟར་བསྒོམ་ལ། དངོས་གཞི་ལ། གསང་གནས་ཀྱི་རྩའི་ནང་ངམ། དཔྲལ་བར་ཟླ་བའི་སྟེང་དུ་ཐིག་ལེ་ལྗང་གུ་བསྒོམ་ལ། གང་ལ་ཡང་མི་རེག་པར་ཡིད་གཟུང་། ཅུང་ཟད་ཟིན་པ་དང་རེག་བྱ་སྣ་ཚོགས་ལ་རེག་ཅིང་མྱང་ལ་ཐིག་ལེ་ལ་ཡིད་གཏད་དེ་གཞན་དུ་སེམས་འཕྲོར་མི་གཞུག །དེ་གོམས་པས་ཐིག་ལེའི་དམིགས་པ་གསལ་ཞིང་རེག་བྱ་གང་ལ་རེག་པའི་སྟེང་དུ་ཏིང་ངེ་འཛིན་སྐྱེའོ། །དེ་ལ་བརྟན་པ་ཅུང་ཟད་ཐོབ་པ་དང་། ཐིག་ལེ་དེ་སྙིང་གའི་ཐིག་ལེ་ལ་བསྡུས་པས། ཐིག་ལེ་དེ་སྔར་བས་ཀྱང་གསལ་ཞིང་འབར་བར་བསྒོམས་ནས་མཉམ་པར་བཞག་པས་ཏིང་ངེ་འཛིན་མཆོག་སྐྱེའོ། །དྲུག་པ་ཡིད་ཤེས་ལ་དམིགས་ཤིང་བསྒོམ་པ་ནི། དེའི་རྗེས་ལ་ཀུན་ཏུ་གཡོ་བའི་ཡིད་ལ་དམིགས་ཤིང་བསྒོམས་ཏེ། སྔོན་འགྲོ་སྔར་ལྟར་བསྒོམས་ལ། དངོས་གཞི་ལ་སྙིང་གའི་ཐིག་ལེ་དཀར་དམར་གྱི་སྟེང་དུ་དེ་ལས་ཕྲ་བའི་ཐིག་ལེ་དམར་སྐྱ་ཞིག་བསྒོམས་ལ་ཤིན་ཏུ་དབེན་པའི་གནས་སུ་ཡིད་བཟུང་ངོ་། །ཅུང་ཟད་ཟིན་པ་དང་འདུ་འཛི་དང་བཅས་པའི་གནས་སུ་བསྒོམས་ཤིང་། གང་ལ་ཡིད་འཕྲོ་བའི་ཡུལ་དང་རྣམ་རྟོག་དེ་ཉིད་ཐིག་ལེ་དམར་སྐྱ་དེ་ལ་བསྟིམ་ཞིང་ཡིད་གཟུང་ངོ་། །དེ་གོམས་པས་ཐིག་ལེའི་དམིགས་པ་གསལ་ཞིང་རྟོག་པ་མི་སྐྱེ་བའམ། ཅུང་ཟད་སྐྱེས་ཀྱང་རང་ཡལ་དུ་འགྱུར་རོ། །དེ་ལ་ཅུང་ཟད་བརྟན་པ་ཐོབ་པ་དང་། ཐིག་ལེ་དེ་འོག་གི་ཐིག་ལེ་དཀར་དམར་ལ་ཐིམ་པས། ཐིག་ལེ་དེ་སྔ་མ་དེ་བས་ཀྱང་གསལ་ཞིང་འབར་བར་གྱུར་པར་བསྒོམ་ལ་མཉམ་པར་བཞག་པས་ཞི་གནས་ཀྱི་ཏིང་ངེ་འཛིན་མཆོག་སྐྱེའོ། །བདུན་པ་ཉོན་ཡིད་ལ་དམིགས་ཤིང་བསྒོམ་པ་ནི། དེའི་རྗེས་ལ་ཉོན་མོངས་པ་དང་བཅས་པའི་ཡིད་ལ་དམིགས་ཤིང་བསྒོམ་སྟེ། སྔོན་འགྲོ་སྔར་ལྟར་བསྒོམས་ལ། དངོས་གཞི་ལ་སྙིང་གའི་ཐིག་ལེ་དཀར་དམར་གྱི་སྟེང་དུ་དམར་སྐྱ། དེའི་སྟེང་དུ་ཐིག་ལེ་སྔོན་པོ་ཞིག་བསྒོམས་ལ། ཤིན་ཏུ་དབེན་པའི་གནས་སུ་ཡིད་གཟུང་ངོ་། །ཅུང་ཟད་ཟིན་པ་དང་། ཉོན་མོངས་པ་སྣ་ཚོགས་སྐྱེ་བའི་ཡུལ་དང་བཅས་པའི་གནས་སུ་བསྒོམ་ཞིང་། འདོད་ཆགས་ལ་སོགས་པ་ཉོན་མོངས་པ་དང་སྐྱེ་བའི་ཡུལ་དང་། ཉོན་མོངས་པ་ཀུན་ཏུ་རྒྱུ་བ་ཉིད་ཐིག་ལེ་སྔོན་པོ་ལ་བསྟིམ་ཞིང་ཡིད་གཟུང་ངོ་། །དེ་གོམས་པས་ཐིག་ལེའི་དམིགས་པ་གསལ་ཞིང་། ཉོན་མོངས་པ་མི་སྐྱེ་བའམ། ཅུང་ཟད་སྐྱེས་ཀྱང་རང་ཡལ་དུ་འགྱུར་རོ། །དེ་ལ་ཅུང་ཟད་བརྟན་པ་ཐོབ་པ་དང་། །ཐིག་ལེ་དེ་འོག་གི་ཐིག་ལེ་དམར་སྐྱ་ལ་ཐིམ། དེ་ཡང་འོག་གི་ཐིག་ལེ་དཀར་དམར་ལ་ཐིམ། དེ་ཡང་ཟླ་བ་ལ་ཐིམ། ཟླ་བ་ཡང་ནམ་མཁའ་ལ་སྤྲིན་ཡལ་བ་ལྟར་ཡལ་ནས་སྟོང་པ་ལ་མཉམ་པར་བཞག་པས་ཞི་གནས་མཆོག་སྐྱེའོ། །མཐར་མཉམ་བཞག་ལས་ལྡང་བའི་ཚེ། སྐད་ཅིག་གིས་ཟླ་བ་དང་ཐིག་ལེ་རྣམས་རིམ་གྱིས་གྲུབ་པར་བལྟ་ཞིང་། རང་ཧེ་རུ་ཀ་དང་། ཕྱིའི་ཆོས་རྣམས་ཀྱང་སྣང་བཞིན་དུ་རང་བཞིན་མེད་པར་བལྟས་ལ་ལྡང་ངོ་། །དེ་ལྟར་སོ་སོའི་རྟགས་མ་བྱུང་གི་བར་དུ་བསྒོམ་ཞིང་། མཐར་ཕྱིན་པ་ན་སྟོང་པ་ཞི་གནས་དང་། བདེ་གསལ་ལྷག་མཐོང་གི་ཏིང་ངེ་འཛིན་སྐྱེས་ནས། ཏིང་ངེ་འཛིན་གྱི་རྒྱུན་དེས་མཐོང་ལམ་གྱི་ཡེ་ཤེས་སྐྱེ་བས་སངས་རྒྱས་ཉིད་འགྲུབ་པར་འགྱུར་རོ། །གསུམ་པ་དོན་བསྡུ་བ་ནི། མདོར་ན་སྦྱོང་བའི་ཚུལ་དབང་པོའི་སྒོ་རྣམས་ལ་སོར་སྡུད་ཀྱི་ཏིང་ངེ་འཛིན་རབ་བཀྲམས་སུ་སྦྱངས་ནས་དངོས་གཞི་མི་ཤིགས་པའི་ཐིག་ལེ་ཉིད་ལ་རྩལ་དུ་བཏོན་ནས་འཇོག་པ་སྟེ། རྟག་ཏུ་སྙིང་ལ་གནས་པ་ཡི། ཐིག་ལེ་གཅིག་པོ་ཡི་གེ་མེད། སྐྱེས་བུས་དེ་ནི་སྒོམ་གྱུར་ན། ཡེ་ཤེས་སྐྱེ་བར་འགྱུར་བའི་མཆོག །ཅེས་གསུངས་པའི་གནད་ཀྱི་དོན་ཡིན་པས་ན། གཙོ་བོར་དམིགས་པའི་སྤྲོས་པ་གཞན་སྤངས་ནས་སྙིང་གའི་མི་ཤིགས་པའི་ཐིག་ལེ་ལ་རྩེ་གཅིག་ཏུ་མཉམ་པར་བཞག་མཐར་ལྟེ་བར་གནས་པའི་རྩ་བོང་གདོང་འཁྱིལ་པ་འདྲ་བ་ལས་གཏུམ་མོའི་མེ་ལྕེ་སྦྲུལ་གྱི་ལྕེ་ལྟར་འཁྱུགས་པ་བྱུང་། རྩ་དབུ་མའི་ནང་ཐམས་ཅད་གང་ཞིང་ཁྱབ་པར་བསམ་ལ་རླུང་བུམ་པ་ཅན་ཁ་སྦྱར་ལ་གནད་དུ་བསྣུན། རྗེས་ཐོབ་ཀུན་ཏུའང་ཚོགས་དྲུག་གི་སྣང་བར་གང་ཤར་ཐམས་ཅད་དངོས་གཞིའི་ཉམས་མྱོང་གི་རྩིས་ཟིན་པར་བྱས་ཏེ་ལམ་དུ་ཁྱེར་བ་ལ་འབད་པར་བྱའོ། །རྒྱུད་ལས་ལེགས་གསུངས་གྲུབ་པའི་མྱོང་བས་བརྒྱན། །ཚིག་ཉུང་དོན་ཟབ་དཔལ་ལྡན་བདེ་བ་མཆོག །བོང་བུའི་ཞལ་ཅན་བསྐྱེད་རྫོགས་ལ་བརྟེན་ནས། །འགྲོ་ཀུན་ཧེ་རུ་ཀ་དཔལ་ཉིད་གྱུར་ཅིག །པཎ་ཆེན་གྲགས་པ་རྒྱལ་མཚན་གྱི་སྒྲུབ་ཐབས་དང་། འཇམ་མགོན་ཀུན་དགའ་གྲོལ་མཆོག་གི་རྫོགས་རིམ་ཞལ་ཤེས་ཀྱི་ཁྲིད་ཡིག་སོགས་ཀྱི་དགོངས་པ་ལྟར་བྱ་བྲལ་སྤོང་བ་པ་འཇམ་དབྱངས་མཁྱེན་བརྩེའི་དབང་པོས་དག་ཅིང་གསལ་བ་བྲིས་པ་དགེ་ལེགས་ཀྱི་སྣང་བས་ཕན་བདེའི་པདྨོ་དུས་རྟག་ཏུ་རྒྱས་པར་གྱུར་ཅིག། །།དགེའོ། །བཀྲ་ཤིས་སོ།།

[edit]

dpal 'khor lo bde mchog bong bu'i zhal can gyi bskyed rdzogs kyi khrid yig snying por dril ba bde chen thig le/ @#/__/dpal 'khor lo bde mchog bong bu'i zhal can gyi bskyed rdzogs kyi khrid yig snying por dril ba bde chen thig le zhes bya ba bzhugs so// oM swasti/__brtan g.yo'i dngos kun lhan skyes drwa ba ru/__/sdom mdzad bla ma he ru ka dpal la/__/btud nas bde chen phra mo'i thig le yi/__/man ngag grub pa'i zhal lung snying por spel/__/'di la gnyis/__lo rgyus dang /__gdams pa dngos so/__/dang po ni/__yang dag par rdzogs pa'i sangs rgyas rdo rje 'chang /__rje btsun rdo rje rnal 'byor ma/__des mngon sum du rjes su bzung ba ni bal yul ye rang gi paN+Di ta skal ldan bzang po ste/__des skye dgu kun dga'i 'tsho ba bzang po la gnang /__des grub pa'i dbang phyug chen po ma hA bo d+hi la gnang /__de las grub chen bsam gtan 'od zer gyis gsan/__de las rje rdo rje 'chang gi thugs sras gu ge paN+Di ta grags pa rgyal mtshan gyis gsan pa yin te/__de'ang ngor chen rdo rje 'chang kun dga' bzang po mnga' ris glo bo'i phyogs su lan gsum phebs pa'i rjes ma'i skabs/__glo bo'i bar tshigs lung thur gyi sne tshe grum zer ba na/__bla ma bsam gtan 'od zer ba zhig bal po'i grub chen ma hA bo d+hi la bong zhal can gyi dbang dang gdams ngag gsan nas/_lo lnga bcu rtsa gsum du bskyed rim thun gnyis su bsgom zhing /__rdzogs rim zhar byung rnams ma chag par mdzad/__snying po yi ge bdun pa dung phyur gsum lhag dang /__'jam dpal mtshan brjod rgya skad 'ba' zhig tu khri tsho brgyad gsungs pas mtshon rim gnyis zab mo'i nyams gzhes la rtse gcig tu brtson pas grub pa'i go 'phang mthon por gshegs kyang /__'phral snang du chang la 'debs pa'i phabs 'tshong ba'i rnam par bzhugs pa'i sbas pa'i rnal 'byor pa chen po zhig yod pa rje rdo rje 'chang gis gsan te/__glo bo brag dkar du ched kyis spyan drangs te dbang gsan par brtsam na'ang 'bul ma nus par slar rang gnas su gshegs/__de'i tshe rdo rje 'chang gi zhal nas 'di'i rgyun chad du rang phongs pas ngos la bskur mi nus na'ang /__nged kyi slob ma 'di gsum la bskur gsungs nas/__byams gling chos rje dpal ldan pa/__gu ge paN+Di ta/__bla ma rgyal sras pa gsum la gnang sbyin bzang po bsam gyis mi khyab pa dang bcas te brdzong bar mdzad pas/__khong gis kyang dbang dang gdams ngag legs par gsungs/__de las gu ge paN+Di tas mngon dkyil yi ger bkod cing /__glo bo mkhan chen bsod nams lhun grub dang /__chos rje nam mkha' brtan pa sogs la gnang ba nas bzung da lta'i bar du dbang bka' rnam par dag pa'i rgyun ma nub par byung /__gdams ngag 'khrid kyi rim pa ni/__glo bo mkhan chen las 'jam pa'i dbyangs kun dga' grol mchog gis gsan/__de yan chad snyan brgyud du bzhugs pa la/__rje 'dis zin bris gsal bar gnang zhing de'i snying po bsdus te khrid brgya'i glegs bam du'ang bkod pas khrid lung gi brgyud pa bar ma chad par byung ba yin no/__/gnyis pa gdams pa dngos la gnyis/__rten bskyed rim dang /__brten pa rdzogs pa'i rim pa'o/__/dang po ni/__dbang gis smin cing dam tshig dang ldan pas/__gnas dben par bde ba'i gdan la bsam gtan gyi spyod lam dang ldan pas 'khod de/__bskyed rim gyi mngon rtogs rgyas par paN chen grags pa rgyal mtshan gyis mdzad pa'i sgrub thabs phrin las mtha' yas ltar bsgom/__bsdu na skyabs sems tshad med bzhi bsgom pas bsod nams dang /__chos thams cad rang gi sems tsam du shes par byas la/__oM swa b+hA wa shud+d+haHsarba d+harmAHswa b+hA wa shud+d+ho\u0f85 haM/__sems de'ang gsal ba dang ma bral ba'i stong pa nyid du dmigs la/__oM shUn+ya tA dz+nyA na badz+ra swa b+hA wa At+ma ko\u0f85 haM/__zhes brjod pas ye shes kyi tshogs bsag__/stong pa'i ngang las khams gsum dang rang gi sems nyid hU~M sngon po'i rnam pas nam mkha' la gnas par gyur/__rang nyid gang du gnas pa'i go sar sna tshogs pad+ma 'dab ma brgyad pa'i ze'u 'brur nyi ma'i dkyil 'khor gyi steng du mtshan bzang po sum cu rtsa gnyis kyi ngo bo A li phrag gnyis zhu ba las zla ba'i dkyil 'khor dkar po me long lta bu'i ye shes/__de'i steng du dpe byad bzang po brgyad cu'i ngo bo/__kA li dang /__ya ra la wa Da D+ha phrag gnyis zhu ba las nyi ma'i dkyil 'khor mnyam pa nyid kyi ye shes/__de gnyis kyi bar du rgyu rdo rje sems dpa'i bdag nyid hU~M yig dkar po 'od zer lnga 'phro ba so sor rtog pa'i ye shes/__slar yang nam mkhar gnas pa'i hU~M yig nA da'i bar du 'dus te/__nA da de nyid rgyu'i hU~M yig la thim/__thams cad gcig tu gyur pa bya ba nan tan gyi ye shes/__de las sku yongs su rdzogs pa chos kyi dbyings kyi ye shes kyi ngo bo bdag nyid bcom ldan 'das dpal he ru ka sku mdog in+d+ra nI la ltar sngo zhing /__nyi ma 'bum gyi 'od can mtshan dpes brgyan pa/__zhal gsum phyag drug pa/__rtsa zhal bong bu'i gdong can sngon po khrag gis byugs shing 'jigs par mdzad pa/__g.yas dkar/__g.yon dmar ba/__spyan gsum gsum dang ldan pa/__zhal mche ba gtsigs shing ral pa'i thor cog la yid bzhin gyi nor bu/__g.yon phyogs su zla ba phyed pa dang /__dpral bar sna tshogs rdo rjes mdzes pa/__thod pa skam po lnga lngas dbu brgyan dang /__rlon pa khrag 'dzag pa lnga bcus do shal byas pa/__phyag dang po gnyis kyis rdo rje dang dril bu 'dzin pas yum la 'khyud cing /__'og ma gnyis kyis mi'i pags pa 'dzin cing gos su gyon pa/__g.yas 'og mas mdung rtse gsum/__g.yon 'og mas thod pa dang kha T+wA~M ga 'dzin pas dgos 'dod thams cad stsol ba/__zhabs g.yas brkyang bas dus mtshan ma dmar mo dang /__g.yon bskum pas 'jigs byed nag po mgo bo bltab nas mnan pa/__sgeg pa dpa' ba mi sdug pa ste sku'i nyams gsum/__rgod cing drag shul 'jigs su rung ba ste gsung gi nyams gsum/__snying rje rngams dang zhi ba ste thugs kyi nyams gsum ste gar gyi nyams dgu dang ldan zhing /__rus pa'i rgyan drug gis brgyan pa/__stag gi pags pa'i sham thabs rnam par grol ba/__de'i pang na yum rdo rje phag mo/__sku mdog dmar mo bong bu'i zhal can/__zhal nas khrag 'dzag pa/__phyag gnyis kyis g.yas rtse gsum 'phyar zhing /__g.yon thod khrag 'dzin pa yab kyi mgul nas 'khyud pa/__gcer bu skra grol zhing /__byin pa gnyis kyis bcom ldan 'das la 'khril ba/__thod pa skam po lnga'i dbu rgyan dang /__skam po lnga bcu'i do shal can/__phyag rgya lngas mdzes pa/__yab yum gnyis ka'i spyi bor oM/__mgrin par AH__thugs ka'i stod du hU~M/__dbus su rang 'dra ba'i ye shes sems dpa'/__de'i thugs kar ting nge 'dzin sems dpa' yab la hU~M sngon po/__yum la ba~M dmar po/__yab kyi thugs kar zla ba la gnas pa'i oM ha dkar po rdo rje sems dpa'i ngo bo/__gzhan rnams su nyi ma la gnas pa'i mgo bor na ma hi ser po rnam par snang mdzad kyi ngo bo/__spyi gtsug tu swA hA hu dmar po pad+ma gar dbang gi ngo bo/__phrag pa gnyis su bo Sha?T he nag po he ru ka'i ngo bo/__mig gnyis su huM hU~M ho dmar ser rdo rje nyi ma'i ngo bo/__yan lag thams cad de tshig chen brgyad du phaT ha~M ljang gu rta mchog gi ngo bo/__yum gyi gnas rnams su nyi ma'i dkyil 'khor re re'i steng du/__lte bar a~M ba~M dmar mo phag mo'i ngo bo/__snying gar ha~M ya~M sngon mo gshin rje ma/__khar hriM ma~M dkar mo rmongs byed ma/__mgo bor hriM hrIM ser mo skyod byed ma/__spyi gtsug tu hu~M hU~M ljang gu skrag byed ma/__yan lag thams cad de tshig chen brgyad po la phaT phaT dud kha tsaN+Di ka'i ngo bo rnams su gyur/__'bar ba'i phyag rgya dang /__pheM zhes pas phyogs bcu'i 'jig rten dang /__yul nyi shu rtsa bzhir bzhugs pa'i dpa' bo dang rnal 'byor ma thams cad mdun gyi nam mkhar spyan drangs pa la/__oM sarba ta thA ga ta shrI tsakra sam+ba ra maN+Da la tsakra sarba bI ra yo gi nI sa pa ri wA ra ar+g+haM nas/__shab+da'i bar gyis mchod/__dzaHhU~M ba~M hoH__zhes pas dam tshig pa dang dbyer med du dgug gzhug bcing zhing dgyes par bsam/__de'i bde ba la cung zad mnyam par bzhag cing /__oM yo ga shud+d+haHsarba d+harmAHyo ga shud+d+ho\u0f85 haM/__chos thams cad thabs shes dbyer med kyi rnal 'byor du dag la bdag kyang de'i ngo bor dag go zhes nga rgyal bzung /__lag gnyis rnam lnga 'dod bskor dang 'khyud rgya bya/__slar yang pheM zhes pas/__dbang gi lha 'khor lo bde mchog gi dkyil 'khor mdun gyi nam mkhar spyan drangs/__de bzhin gshegs pa thams cad kyis bdag la mngon par dbang bskur ba stsal du gsol/__zhes gsol ba btab pas/__dbang gi lha rnams kyis/__oM sarba ta thA ga ta a b+hi She ka te sa ma ya shri ye hU~M/__zhes gsungs shing dbang bskur bas/__lus thams cad ye shes kyi bdud rtsi'i chu rgyun gyis gang /__bde ba chen po'i rang bzhin dbang thams cad thob/__dbang lha rnams kyang bdag la thim/__chu lhag ma yar lud pa las yab la mi bskyod pa dang /__yum la rnam par snang mdzad kyis dbur brgyan par bsam/__dngos su bsham pa'i mchod pa yod na byin gyis rlabs/__gang ltar yang /__oM sarba ta thA ga ta sogs sngags dang phyag rgyas phyi mchod 'bul/__oM AHhU~M gis bdud rtsi myang /__yab yum gyi rkang brgyad dam/__chos dbyings rnam dag ngang las ma g.yos kyang /__/thabs kyis khro bo'i skur ston gdug pa 'dul/__/che ba'i che mchog lha yi lhar gyur pa/__/kun bzang he ru ka la phyag 'tshal lo/__/dpal ldan rdo rje mkha' 'gro ma/__/mkha' 'gro ma yi 'khor los sgyur/__/ye shes lnga dang sku gsum brnyes/__/'gro ba skyob la phyag 'tshal lo/__/zhes bstod/__de nas lha'i nga rgyal dang /__rnam pa'i gsal snang la sems rtse gcig tu bzung zhing /__snang ba thams cad lhar shar ba'i gsal snang la nges pa brtan po ma skyes kyi bar du 'bad de bsgom/__des skyo na bzlas pa bya ba ni/__rang gi thugs ka'i hU~M gi nA da las sngags kyi phreng ba byung /__rdo rje'i lam nas yum gyi pad+mar song ste/__a ba d+hU ti'i lam nas steng du byung /__yum gyi zhal nas thon/__rang gi zhal du zhugs/__nA da la thim zhing /__slar yang nA dA las byung ste rgyun mi 'chad par 'khor ba las bde ba chen po'i ye shes brtan par bsams la/__oM hrIHha ha hU~M hU~M phaT/__ces yi ge bdun pa kho na bzla/__yang rang gi lte bar zla ba la gnas pa'i hU~M dmar skya'i nA da las rlung phyir 'byung ba hU~M gi rang bzhin du byung /__de las dpal he ru ka yab yum dpag tu med pa spros te 'gro ba'i don byas nang du 'jug pa oM gyi rang bzhin gyis zhugs/__nA da la thim gnas pa AH'i rang bzhin du bsgom la cung zad kha sbyar ba'i tshul du bzung ngo /__/thun bsdu ba ni/__bcom ldan 'das bdag dang sems can thams cad la mchog dang thun mong gi dngos grub ma lus pa stsal du gsol/__zhes dngos grub gsol/__dag dran rgyas par bya ba'am/__/shrI yig gnyis med ye shes te/__/he zhes rgyu sogs stong pa nyid/__/ru yig bkod pa dang bral ba/__/ka zhes gang du'ang mi gnas pa'o/__/zhes 'od gsal ba dang /__stong pa nyid dang /__mtshan ma med pa dang /__smon pa med pa'i rnam thar gyi bdag nyid dpal he ru ka'i nges don gyi dag pa dran par bya/__spro na gtor ma 'bul/__spyod lam la 'jug pa na/__snod bcud thams cad dag pa'i gzhal yas khang dang lhar bltas la/__snang grags rtog gsum dpal he ru ka'i sku gsung thugs kyi ngo bor lam du khyer bar bya'o/__/gnyis pa la gnyis/__go don mdor bstan pa dang /__bsgom don rgyas pa bshad pa'o/__/dang po ni/__dpal 'khor lo sdom pa nges par brjod pa'i rgyud las/__dbang po g.yo ba'i rta kun nang du nges sbyar ba'i/__zhes mig sogs sgo lnga nas phyi rol du rnam rtog skye ba'i rlung 'gog pa ste ngo bo sor sdud yin la/__yang /__ye shes rgyal ba ma lus 'dus pa'i snod gyur pa/__khams gsum skyed par byed pa nyid du nyer 'gro ba/__mthong ba mkha' dang 'dra ba dri med dpal du gyur/__ces skye 'gyur gyi 'char sgo gnyis med ye shes de nyid/__smig rgyu la sogs pa'i rtags can ye shes kyi snang ba kun khyab bsam gtan gyi lam bstan pa yin no/__/gnyis pa la gsum/__rtsa ba'i dmigs pa/__yan lag gi dmigs pa/__don bsdu ba'o/__/dang po ni/__gong du ji skad bstan pa ltar bskyed rim bzlas pa'i bar sngon du btang /__de nas rang gi snying ga'i hU~M las 'od 'phros pas phyi'i snod bcud thams cad rang gi lus la bsdu/__yum yang sna'i sgo g.yon nas rang gi snying gar bsdu/__rang nyid phyag gnyis par bsdus pa'i spyi bor bla ma bsgoms la/__mos gus drag tu bya zhing /__bdag gi rgyud la yang dag pa'i ting nge 'dzin bskyed du gsol/__zhes gsol ba btab/__de nas snying gi nang du a las zla ba'i dkyil 'khor sran ma phyed tshal tsam gyi steng du rang gi shes pa thig le dkar dmar yungs 'bru 'bring po tsam zhig tu bsam la de la sems bzung /__rim gyis rlung kha sbyar 'jam po bya/__goms nas sems zin pa dang yid gzhan du mi 'phro zhing sems rtse gcig tu gnas pa dang bde gsal gyi ting nge 'dzin skye'o/__/gnyis pa la bdun las/__dang po mig gi rnam shes la dmigs shing bsgom pa ni/__rtsa ba'i dmigs pa la gsal snang brtan po rnyed pa na/__sngon 'gro snga ma ltar byas la/__dngos gzhi mig gi 'bras bu gnyis kyi nang du zla ba la gnas pa'i thig le dkar po shin tu phra ba re bsgoms te mig btsums la yid gzung /__cung zad zin pa dang gzugs sna tshogs la blta zhing /__thig le la yid gtad de gzhan du sems 'phror mi gzhug go__/de goms pas thig le'i rnam pa gsal zhing gzugs gang mthong ba'i steng du ting nge 'dzin skye'o/__/de la brtan pa cung zad thob pa dang /__thig le de snying gar bsdus la snying ga'i thig le de sngar bas kyang gsal zhing 'bar bar bsgom/__mnyam par bzhag pas ting nge 'dzin mchog skye'o/__/gnyis pa rna ba'i rnam shes la dmigs shing bsgom pa ni/__de'i rjes la rna bar spro ste sngon 'gro sngar ltar bsgoms la/__dngos gzhi rna ba gnyis kyi nang du zla ba la gnas pa'i thig le sngon po gnyis bsgom la sgra med pa'i phyogs su yid gzung /__cung zad zin pa dang sgra sna tshogs mnyan zhing thig le la yid gtad de/__gzhan du sems 'phror mi gzhug__/de goms pas thig le'i dmigs pa gsal zhing sgra gang thos pa'i steng du ting nge 'dzin skye'o/__/de la brtan pa cung zad thob pa dang /__thig le de snying ga'i thig le la bsdus pas thig le de sngar bas kyang gsal zhing 'bar bar bsgom/__mnyam par bzhag pas ting nge 'dzin mchog skye'o/__/gsum pa sna'i rnam shes la dmigs shing bsgom pa ni/__de'i rjes la snar spro zhing sngon 'gro sngar ltar bsgoms la dngos gzhi la sna bug so so'am/__bu ga'i 'doms so'i nang du zla ba'i steng du thig le ser por bsgom la dri mi bro ba'i sar yid gzung /__cung zad zin pa dang dri sna tshogs bsnams shing thig le la yid gtad de gzhan du sems 'phror mi gzhug__/de la goms pas thig le'i dmigs pa gsal zhing dri gang tshor gyi steng du ting nge 'dzin skye'o/__/de la brtan pa cung zad thob pa dang /__thig le de nyid snying ga'i thig le la bsdus pas/__thig le de sngar bas kyang gsal zhing 'bar bar bsgoms la mnyam par bzhag pas ting nge 'dzin mchog skye'o/__/bzhi pa lce'i rnam shes la dmigs shing bsgom pa ni/__de'i rjes la lcer spro te/__sngon 'gro sngar ltar bsgoms la dngos gzhi la lce'i rtsa bar zla ba'i steng du thig le dmar po bsgoms la/__ro mi myang bar yid gzung /__cung zad zin pa dang ro sna tshogs myong zhing /__thig le la yid gtad de gzhan du sems 'phror mi gzhug__/de la goms pas thig le'i dmigs pa gsal zhing ro gang myong ba'i steng du ting nge 'dzin skye'o/__/de la brtan pa cung zad thob pa dang /__thig le de snying ga'i thig le la bsdus la/__thig le de sngar bas kyang gsal zhing 'bar bar bsgom nas mnyam par bzhag pas ting nge 'dzin mchog skye'o/__/lnga pa lus kyi rnam shes la dmigs shing bsgom pa ni/__de'i rjes la lus la spro te sngon 'gro sngar ltar bsgom la/__dngos gzhi la/__gsang gnas kyi rtsa'i nang ngam/__dpral bar zla ba'i steng du thig le ljang gu bsgom la/__gang la yang mi reg par yid gzung /__cung zad zin pa dang reg bya sna tshogs la reg cing myang la thig le la yid gtad de gzhan du sems 'phror mi gzhug__/de goms pas thig le'i dmigs pa gsal zhing reg bya gang la reg pa'i steng du ting nge 'dzin skye'o/__/de la brtan pa cung zad thob pa dang /__thig le de snying ga'i thig le la bsdus pas/__thig le de sngar bas kyang gsal zhing 'bar bar bsgoms nas mnyam par bzhag pas ting nge 'dzin mchog skye'o/__/drug pa yid shes la dmigs shing bsgom pa ni/__de'i rjes la kun tu g.yo ba'i yid la dmigs shing bsgoms te/__sngon 'gro sngar ltar bsgoms la/__dngos gzhi la snying ga'i thig le dkar dmar gyi steng du de las phra ba'i thig le dmar skya zhig bsgoms la shin tu dben pa'i gnas su yid bzung ngo /__/cung zad zin pa dang 'du 'dzi dang bcas pa'i gnas su bsgoms shing /__gang la yid 'phro ba'i yul dang rnam rtog de nyid thig le dmar skya de la bstim zhing yid gzung ngo /__/de goms pas thig le'i dmigs pa gsal zhing rtog pa mi skye ba'am/__cung zad skyes kyang rang yal du 'gyur ro/__/de la cung zad brtan pa thob pa dang /__thig le de 'og gi thig le dkar dmar la thim pas/__thig le de snga ma de bas kyang gsal zhing 'bar bar gyur par bsgom la mnyam par bzhag pas zhi gnas kyi ting nge 'dzin mchog skye'o/__/bdun pa nyon yid la dmigs shing bsgom pa ni/__de'i rjes la nyon mongs pa dang bcas pa'i yid la dmigs shing bsgom ste/__sngon 'gro sngar ltar bsgoms la/__dngos gzhi la snying ga'i thig le dkar dmar gyi steng du dmar skya/__de'i steng du thig le sngon po zhig bsgoms la/__shin tu dben pa'i gnas su yid gzung ngo /__/cung zad zin pa dang /__nyon mongs pa sna tshogs skye ba'i yul dang bcas pa'i gnas su bsgom zhing /__'dod chags la sogs pa nyon mongs pa dang skye ba'i yul dang /__nyon mongs pa kun tu rgyu ba nyid thig le sngon po la bstim zhing yid gzung ngo /__/de goms pas thig le'i dmigs pa gsal zhing /__nyon mongs pa mi skye ba'am/__cung zad skyes kyang rang yal du 'gyur ro/__/de la cung zad brtan pa thob pa dang /__/thig le de 'og gi thig le dmar skya la thim/__de yang 'og gi thig le dkar dmar la thim/__de yang zla ba la thim/__zla ba yang nam mkha' la sprin yal ba ltar yal nas stong pa la mnyam par bzhag pas zhi gnas mchog skye'o/__/mthar mnyam bzhag las ldang ba'i tshe/__skad cig gis zla ba dang thig le rnams rim gyis grub par blta zhing /__rang he ru ka dang /__phyi'i chos rnams kyang snang bzhin du rang bzhin med par bltas la ldang ngo /__/de ltar so so'i rtags ma byung gi bar du bsgom zhing /__mthar phyin pa na stong pa zhi gnas dang /__bde gsal lhag mthong gi ting nge 'dzin skyes nas/__ting nge 'dzin gyi rgyun des mthong lam gyi ye shes skye bas sangs rgyas nyid 'grub par 'gyur ro/__/gsum pa don bsdu ba ni/__mdor na sbyong ba'i tshul dbang po'i sgo rnams la sor sdud kyi ting nge 'dzin rab bkrams su sbyangs nas dngos gzhi mi shigs pa'i thig le nyid la rtsal du bton nas 'jog pa ste/__rtag tu snying la gnas pa yi/__thig le gcig po yi ge med/__skyes bus de ni sgom gyur na/__ye shes skye bar 'gyur ba'i mchog__/ces gsungs pa'i gnad kyi don yin pas na/__gtso bor dmigs pa'i spros pa gzhan spangs nas snying ga'i mi shigs pa'i thig le la rtse gcig tu mnyam par bzhag mthar lte bar gnas pa'i rtsa bong gdong 'khyil pa 'dra ba las gtum mo'i me lce sbrul gyi lce ltar 'khyugs pa byung /__rtsa dbu ma'i nang thams cad gang zhing khyab par bsam la rlung bum pa can kha sbyar la gnad du bsnun/__rjes thob kun tu'ang tshogs drug gi snang bar gang shar thams cad dngos gzhi'i nyams myong gi rtsis zin par byas te lam du khyer ba la 'bad par bya'o/__/rgyud las legs gsungs grub pa'i myong bas brgyan/__/tshig nyung don zab dpal ldan bde ba mchog__/bong bu'i zhal can bskyed rdzogs la brten nas/__/'gro kun he ru ka dpal nyid gyur cig__/paN chen grags pa rgyal mtshan gyi sgrub thabs dang /__'jam mgon kun dga' grol mchog gi rdzogs rim zhal shes kyi khrid yig sogs kyi dgongs pa ltar bya bral spong ba pa 'jam dbyangs mkhyen brtse'i dbang pos dag cing gsal ba bris pa dge legs kyi snang bas phan bde'i pad+mo dus rtag tu rgyas par gyur cig/__//dge'o/__/bkra shis so//