JKCL-KABUM-11-DA-032

🚧 This website is under continued development. We appreciate your patience!

Previous Text"DA" is not a number. Back to Volume Page"DA" is not a number.Next Text "DA" is not a number.

Wylie title
Location	chos kyi blo gros bka' 'bum Volume , Text 32, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation
Genre	"DA" is not a number.

1 Texts in this Section (sde tshan or chos tshan)

155-157	ཁྱུང་ཆེན་དཔལ་རྫོང་གི་གནས་གཏེར་སྲུངས་མའི་མཆོད་བྱང་༔ khyung chen dpal rdzong gi gnas gter srungs ma'i mchod byang Protector Rituals - gsol mchod	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

"DA" is not a number.

Tibetan Text

Wylie

[edit]

ཁྱུང་ཆེན་དཔལ་རྫོང་གི་གནས་གཏེར་སྲུངས་མའི་མཆོད་བྱང་བཞུགས༔ གནས་གཏེར་སྲུངས་མ་གཉན་པོ་ནི༔ མཆོད་པར་འདོད་པས་གཏོར་མ་དང་༔ སྐྱེམས་ཕུད་གཙང་མ་བཤམས་བྱས་ལ༔ བདག་ཉིད་ལྷ་ཡི་ས་མ་ཏིར༔ གནས་པས་རོལ་མོ་དབྱངས་དང་བཅས༔ ཨོཾ་ཨཱཿཧཱུྃ༔ གཏོར་མ་འདོད་རྒུའི་གཏེར་ཆེན་པོ༔ ཟད་མི་ཤེས་པའི་གཏེར་དུ་གྱུར༔ ནམ་མཁའ་མཛོད་ཀྱིས་སྔགས་རྒྱས་བརླབ༔ ཧཱུྃ་ཧྲཱི༔ སྔོན་ཚེ་ཀ་དག་རྡོ་རྗེའི་ཞིང་༔ འོག་མིན་གསང་མཆོག་ཕོ་བྲང་ཆེར༔ ཀུན་བཟང་ཆེ་མཆོག་ཧེ་རུ་ཀས༔ དྲེགས་པའི་ཁྱུང་ཆེན་བཏུལ་པ་ན༔ དམ་ལ་བཏགས་ཤིང་སྲུངས་མར་བསྐོས༔ བཀའ་རྟགས་རྡོ་རྗེ་གཙུག་ཏུ་འཆང་༔ དམ་ཚིག་རྡོ་རྗེའི་ཆུ་ནན་ནི༔ ལྕེ་ལ་བཞག་ཅིང་སྙིང་ལ་བསྟིམ༔ ཡེ་ཤེས་སེམས་དཔར་བྱིན་བརླབ་པས༔ དཔལ་ཆེན་པོ་དང་གཉིས་མེད་བསྒྲུབས༔ རྡོ་རྗེ་སྲིན་པོ་མ་ནིང་ནག༔ ཞིང་སྐྱོང་མགོན་པོ་ཨ་སྒོ་ར༔ དཔལ་ལྡན་རྡོ་རྗེ་ནམ་གྲུ་མ༔ ལས་ཀྱི་ཕོ་ཉ་གཤོག་རྒོད་མ༔ དྲང་སྲོང་ཆེན་པོ་ར་ཧཱུ་ལ༔ གནས་སྲུང་རྡོ་རྗེ་ཐིག་ལེ་རྩལ༔ ཀླུ་སྨན་རྒྱལ་མོ་མཆེད་ལྔ་དང་༔ སྨན་བཙུན་རྡོ་རྗེ་གཡུ་སྒྲོན་མ༔ སྐྱེས་བུ་གནམ་ཐེལ་དཀར་པོ་སོགས༔ རང་རང་སྲས་ཡུམ་བྲན་གཡོག་རྣམས༔ འདིར་གཤེགས་དགྱེས་པའི་གདན་ལ་བཞུགས༔ གཙང་སྦྱར་གསེར་སྐྱེམས་བདུད་རྩི་དང་༔ རོ་ལྡན་སྦྱར་བའི་གཏོར་མ་ཆེ༔ ཉམ་པའི་ཤ་ཁྲག་རུས་གསུམ་གྱི༔ གཏོར་མ་ཟག་མེད་བདུད་རྩི་ཡི༔ མ་མགོན་ལྕམ་དྲལ་འཁོར་བཅས་མཆོད༔ དཀར་མངར་གཏོར་མ་འོ་བསྐོལ་སོགས༔ གཙང་སྦྱར་འདོད་ཡོན་མཆོད་པ་ཆེས༔ ཀླུ་སྨན་རྒྱལ་མོ་སྤུན་ལྔ་དང་༔ སྨན་བཙུན་ཆེན་མོ་འཁོར་བཅས་མཆོད༔ བསང་ཕྱི་འབྲས་ཀྱི་བཤོས་བུ་དང་༔ སྦ་གླིང་རྔ་རོལ་དུང་ཆེན་དང་༔ སྟག་གཟིག་གོས་དར་གོས་ཁྲབ་སོགས༔ འདོད་ཡོན་སྤྱན་གཟིགས་སྣ་ཚོགས་པས༔ གནམ་ཐེལ་དཀར་པོ་འཁོར་བཅས་མཆོད༔ ཁྱེད་རྣམས་དགྱེས་པ་བསྐྱེད་པའི་རྫས༔ འཇིག་རྟེན་འདི་ན་ཅི་མཆིས་པ༔ ལྷ་མིའི་ལོངས་སྤྱོད་མཐའ་ཡས་ཀྱིས༔ དབང་པོ་དྲུག་ལ་དགྱེས་རྒུར་སྟོབས༔ ཐུགས་དང་འགལ་བའི་ཉེས་པ་ཀུན༔ མཐོལ་ལོ་བཤགས་སོ་བཟོད་པར་བཞེས༔ ཐུགས་དམ་གཉན་པོ་དགྱེས་པར་བསྐང་༔ བསྐང་ངོ་གནས་གཏེར་སྲུང་མའི་ཚོགས༔ རང་རང་མཐུན་པའི་དམ་རྫས་དང་༔ རྟེན་བསྐང་སྒྲུབ་པའི་རྫས་དག་གི༔ ཁྱུང་ཆེན་དཔལ་གྱི་རྫོངས་ཕུག་ཏུ༔ པདྨ་འབྱུང་གནས་བཀའ་བསྒོས་པའི༔ རྒྱུད་གསུམ་དམ་ཅན་དྲེགས་ཚོགས་ཀྱིས༔ བཞེས་ཤིག་རོལ་ཅིག་ཁ་རཾ་ཁཱ་ཧི༔ རྣལ་འབྱོར་བདག་ཅག་འཁོར་བཅས་ཀྱི༔ ཇི་ལྟར་བཅོལ་པའི་ལས་སྒྲུབ་ཤིག༔ གཞི་བྱེས་ཉིན་དང་མཚན་མོ་རུ༔ སྲུངས་སྐྱོབས་སྡོང་གྲོགས་མི་གཡེལ་བར༔ ཟབ་གཏེར་བསྟན་པ་རྒྱས་པ་དང་༔ དུས་བབ་ཆོས་བདག་སྐྱེས་བུ་ཡི༔ ཕྱག་ཏུ་སྤྲོད་ཅིང་དམ་མེད་ལ༔ མ་ཤོར་གཉེར་དུ་གཏད་པ་ཡི༔ ཐ་ཚིག་བསྒོ་བ་དྲན་པར་མཛོད༔ བསྟན་ལ་ལོག་པར་ཞུགས་པ་ཡི༔ ལྟ་སྤྱོད་ངན་འཆང་དབང་པོ་བསྣུབ༔ དམ་ལྡན་བུ་བཞིན་བསྐྱངས་བ་དང་༔ འཇིག་རྟེན་བདེ་བའི་ཕྲིན་ལས་མཛོད༔ ཀླ་ཀློའི་སྡེ་རིས་ཀུན་བཅོམ་ཞིང་༔ ཕྱོགས་ལས་རྣམ་རྒྱལ་བ་དན་སྒྲེངས༔ རྒྱལ་བསྟན་སྤྱི་དང་པདྨ་ཡི༔ རིང་ལུགས་ཕྱོགས་བརྒྱར་འཕེལ་བར་མཛོད༔ ནད་གདོན་ཀུན་ཞི་ཚེ་བསོད་རྒྱས༔ ཁམས་གསུམ་འགྲོ་བ་དབང་དུ་བསྡུས༔ དྲག་པོའི་ལས་ཆེན་མཐར་ཕྱིན་ཏེ༔ མཆོག་དངོས་འགྲུབ་པའི་ཕྲིན་ལས་མཛོད༔ ཅེས་བརྗོད་མཆོད་གཏོར་གཙང་སར་གཤེགས༔ དེ་ལྟར་བརྩོན་པས་སྲུང་མ་འགོ༔ བདུད་དགྲ་ཐལ་བར་བརླག་པ་དང་༔ རྣལ་འབྱོར་བུ་བཞིན་སྲུངས་ཤིང་སྐྱོབས༔ ཅི་བསམ་དོན་རྣམས་འགྲུབ་པར་འགྱུར༔ ས་མ་ཡ༔ ཁྱུང་ཆེན་དཔལ་རྫོང་གི་སྲུངས་མའི་མཆོད་བྱང་འདིའང་བླ་མ་ཚེ་དབང་རྡོ་རྗེ། འཚོ་བྱེད་ཚེ་རིང་ཕུན་ཚོགས། ཚེ་བརྟན་རྣམས་ཀྱིས་བསྐུལ་ངོར་པདྨ་ཡེ་ཤེས་རྡོ་རྗེས་རིག་དབྱིངས་ནས་གང་ཤར་ཐོན་པ་སུག་བྲིས་སུ་སྤེལ་བ་དགེའོ༔ བཀྲ་ཤིས་སོ།། །།

[edit]

khyung chen dpal rdzong gi gnas gter srungs ma'i mchod byang bzhugs:__gnas gter srungs ma gnyan po ni:__mchod par 'dod pas gtor ma dang :__skyems phud gtsang ma bshams byas la:__bdag nyid lha yi sa ma tir:__gnas pas rol mo dbyangs dang bcas:__oM AHhU~M:__gtor ma 'dod rgu'i gter chen po:__zad mi shes pa'i gter du gyur:__nam mkha' mdzod kyis sngags rgyas brlab:__hU~M hrI:__sngon tshe ka dag rdo rje'i zhing :__'og min gsang mchog pho brang cher:__kun bzang che mchog he ru kas:__dregs pa'i khyung chen btul pa na:__dam la btags shing srungs mar bskos:__bka' rtags rdo rje gtsug tu 'chang :__dam tshig rdo rje'i chu nan ni:__lce la bzhag cing snying la bstim:__ye shes sems dpar byin brlab pas:__dpal chen po dang gnyis med bsgrubs:__rdo rje srin po ma ning nag:__zhing skyong mgon po a sgo ra:__dpal ldan rdo rje nam gru ma:__las kyi pho nya gshog rgod ma:__drang srong chen po ra hU la:__gnas srung rdo rje thig le rtsal:__klu sman rgyal mo mched lnga dang :__sman btsun rdo rje g.yu sgron ma:__skyes bu gnam thel dkar po sogs:__rang rang sras yum bran g.yog rnams:__'dir gshegs dgyes pa'i gdan la bzhugs:__gtsang sbyar gser skyems bdud rtsi dang :__ro ldan sbyar ba'i gtor ma che:__nyam pa'i sha khrag rus gsum gyi:__gtor ma zag med bdud rtsi yi:__ma mgon lcam dral 'khor bcas mchod:__dkar mngar gtor ma 'o bskol sogs:__gtsang sbyar 'dod yon mchod pa ches:__klu sman rgyal mo spun lnga dang :__sman btsun chen mo 'khor bcas mchod:__bsang phyi 'bras kyi bshos bu dang :__sba gling rnga rol dung chen dang :__stag gzig gos dar gos khrab sogs:__'dod yon spyan gzigs sna tshogs pas:__gnam thel dkar po 'khor bcas mchod:__khyed rnams dgyes pa bskyed pa'i rdzas:__'jig rten 'di na ci mchis pa:__lha mi'i longs spyod mtha' yas kyis:__dbang po drug la dgyes rgur stobs:__thugs dang 'gal ba'i nyes pa kun:__mthol lo bshags so bzod par bzhes:__thugs dam gnyan po dgyes par bskang :__bskang ngo gnas gter srung ma'i tshogs:__rang rang mthun pa'i dam rdzas dang :__rten bskang sgrub pa'i rdzas dag gi:__khyung chen dpal gyi rdzongs phug tu:__pad+ma 'byung gnas bka' bsgos pa'i:__rgyud gsum dam can dregs tshogs kyis:__bzhes shig rol cig kha raM khA hi:__rnal 'byor bdag cag 'khor bcas kyi:__ji ltar bcol pa'i las sgrub shig:__gzhi byes nyin dang mtshan mo ru:__srungs skyobs sdong grogs mi g.yel bar:__zab gter bstan pa rgyas pa dang :__dus bab chos bdag skyes bu yi:__phyag tu sprod cing dam med la:__ma shor gnyer du gtad pa yi:__tha tshig bsgo ba dran par mdzod:__bstan la log par zhugs pa yi:__lta spyod ngan 'chang dbang po bsnub:__dam ldan bu bzhin bskyangs ba dang :__'jig rten bde ba'i phrin las mdzod:__kla klo'i sde ris kun bcom zhing :__phyogs las rnam rgyal ba dan sgrengs:__rgyal bstan spyi dang pad+ma yi:__ring lugs phyogs brgyar 'phel bar mdzod:__nad gdon kun zhi tshe bsod rgyas:__khams gsum 'gro ba dbang du bsdus:__drag po'i las chen mthar phyin te:__mchog dngos 'grub pa'i phrin las mdzod:__ces brjod mchod gtor gtsang sar gshegs:__de ltar brtson pas srung ma 'go:__bdud dgra thal bar brlag pa dang :__rnal 'byor bu bzhin srungs shing skyobs:__ci bsam don rnams 'grub par 'gyur:__sa ma ya:__khyung chen dpal rdzong gi srungs ma'i mchod byang 'di'ang bla ma tshe dbang rdo rje/__'tsho byed tshe ring phun tshogs/__tshe brtan rnams kyis bskul ngor pad+ma ye shes rdo rjes rig dbyings nas gang shar thon pa sug bris su spel ba dge'o:__bkra shis so//__//