JKW-KABUM-10-THA-004-024

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 10, sde tshan 4, Text 24, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 10: 240-. Khams sde dge rdzong sar dgon: Rdzong sar blo gros phun tshogs, 2020.
Genre
Deity	'jam dpal dbyangs

1 Texts in this Section (sde tshan or chos tshan)

24 353-358	དབྱངས་ཅན་དམར་མོའི་གསང་སྒྲུབ་ཉམས་ལེན་བློ་གྲོས་ཨུཏྤལ་རྒྱས་པའི་ཉིན་བྱེད། dbyangs can dmar mo'i gsang sgrub nyams len blo gros ut+pal rgyas pa'i nyin byed Activity Manual - las byang   ·   Sadhanas - Evocation Ritual - sgrub thabs	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

དབྱངས་ཅན་དམར་མོའི་གསང་སྒྲུབ་ཉམས་ལེན་བློ་གྲོས་ཨུཏྤལ་རྒྱས་པའི་ཉིན་བྱེད། ༄༅། །དབྱངས་ཅན་མ་དམར་མོ་གསང་སྒྲུབ་ཀྱི་ཉམས་སུ་ལེན་ཚུལ་མདོར་བསྡུས་པ་བློ་གྲོས་ཨུཏྤལ་རྒྱས་པའི་ཉིན་བྱེད་ཅེས་བྱ་བ་བཞུགས་སོ། །ན་མཿཤྲཱི་མཱཾ་གུ་རུ་སྭ་ར་སྭ་ཏྱེ། དེ་ལ་འདིར་ཤིན་ཏུ་ཟབ་པའི་དབྱངས་ཅན་མ་དམར་མོ་གསང་སྒྲུབ་ལ་བརྟེན་ནས་སོ་སོར་རྟོག་པའི་ཤེས་རབ་ཀྱི་སྣང་བ་མཆོག་ཏུ་རྒྱས་པར་འདོད་པས། རྗེས་སུ་གནང་བ་ལེགས་པར་མནོས་ཏེ། སྟན་བདེ་བ་ལ་སེམས་དཔའི་སྐྱིལ་མོ་ཀྲུང་གིས་འཁོད་ནས། ཁྲུས་དང་གཙང་སྦྲ་སྔོན་དུ་འགྲོ་བས་སྐྱབས་སེམས་ནི། བདག་སོགས་འགྲོ་ཀུན་བྱང་ཆུབ་སྙིང་པོའི་བར། །བླ་མ་དཀོན་མཆོག་གསུམ་ལ་སྐྱབས་སུ་མཆི། །ཡིད་ཅན་སྲིད་པའི་མཚོ་ལས་བསྒྲལ་བའི་ཕྱིར། །རྡོ་རྗེ་སྒྲ་དབྱངས་ལྷ་མོ་བསྒོམ་པར་བགྱི། །ལན་གསུམ། ཕྱོགས་དུས་རྒྱལ་བ་སྲས་དང་བཅས་པ་ཀུན། །མདུན་གྱི་ནམ་མཁར་བཛྲ་ས་མཱ་ཛཿ དངོས་སུ་འབྱོར་དང་ཡིད་ལས་བྱུང་བ་ཡི། །ཀུན་བཟང་རྣམ་འཕྲུལ་མཆོད་སྤྲིན་རྒྱ་མཚོས་མཆོད། །ཨོཾ་བཛྲ་ཨརྒྷཾ་ཨཱཿཧཱུྃ་ནས། ཤབྷ་ཨཱཿཧཱུྃ་གི་བར་གྱིས་མཆོད། དཀོན་མཆོག་གསུམ་ལ་བདག་སྐྱབས་མཆི། །ཞེས་སོགས་ལན་གསུམ་གྱིས་ཡན་ལག་བདུན་པ་དང་། སེམས་ཅན་ཐམས་ཅད་བདེ་བ་དང་སོགས་ཀྱིས་ཚད་མེད་བཞི་བསྒོམ། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། ཆོས་རྣམས་མི་དམིགས་སྟོང་པའི་ངང་ཉིད་ལས། །པྃ་ཡིག་ལས་འཁྲུངས་པད་དཀར་འདབ་བརྒྱད་དང་། །ཨ་ལས་དྲི་མེད་ཟླ་བའི་དཀྱིལ་འཁོར་སྟེང་། །རང་སེམས་ངོ་བོ་ཧྲཱིཾཿཡིག་དམར་པོ་ལས། །འོད་འཕྲོས་འཕགས་མཆོད་འགྲོ་ཀུན་སྒྲིབ་གཉིས་སྦྱངས། །ཚུར་འདུས་ཡེ་ཤེས་མེ་ལོང་ཅིག་ཏུ་གྱུར། །དེ་ཉིད་ཡོངས་གྱུར་སྒྲ་དབྱངས་ལྷ་མོ་ནི། །སྐུ་མདོག་བྱེ་རུའི་རྡུལ་བརྩེགས་ལྷུན་པོ་ལ། །ཉི་གཞོན་སྟོང་གིས་འཁྱུད་པའི་གཟི་བྱིན་འབར། །རབ་མཛེས་ཞི་འཛུམ་བརྒྱད་གཉིས་ལང་ཚོས་སྒེག །ཕྱག་གཡས་འདོད་འབྱུང་ཡིད་བཞིན་ནོར་བུ་དང་། །གཡོན་པས་དྭངས་གསལ་ཡེ་ཤེས་མེ་ལོང་བསྣམས། །ཞབས་གཉིས་གཡས་བརྐྱངས་གཡོན་བསྐུམས་པད་ཟླར་རོལ། །ཡིད་འཕྲོག་དར་དང་རིན་ཆེན་རྒྱན་གྱིས་མཛེས། །སྣང་སྟོང་ཟུང་འཇུག་ཆུ་ཟླའི་གཟུགས་བརྙན་ལྟར། །གསལ་བའི་གནས་གསུམ་ཡི་གེ་འབྲུ་གསུམ་དང་། །ཐུགས་དབུས་ཧྲཱིཾཿལས་བྱུང་བའི་འཛུམ་ཟེར་གྱིས། །ལྷོ་ཕྱོགས་རིག་འཛིན་དགྱེས་པའི་དགའ་ཚལ་ནས། །ཡེ་ཤེས་སྤྱན་དྲངས་གཉིས་སུ་མེད་པར་ཐིམ། །ཨོཾ་ཤྲཱི་སྭ་ར་སྭ་ཏྱཻ་བཛྲ་ས་མཱ་ཛཿ ཨོཾ་བཛྲ་ཨརྒྷཾ་སོགས་ནས། ཤབྡའི་བར་དང་། ཛཿཧཱུྃ་བྃ་ཧོཿ ཐུགས་ཀར་ཟླ་སྟེང་ཧྲཱིཾཿཡིག་དམར་པོའི་མཐར། །སྔགས་ཕྲེང་གཡོན་དུ་འཁོར་བའི་འོད་ཟེར་གྱིས། །སྡིག་སྒྲིབ་ཀུན་སྦྱངས་ཤེས་བྱ་ཐམས་ཅད་ལ། །ཐོགས་པ་མེད་པའི་བློ་གྲོས་རྒྱས་པར་གྱུར། །ཅེས་བརྗོད་ཅིང་བསམས་ལ། ཨོཾ་སྭ་ར་སྭ་ཏྱཻ་ཧྲཱིཾཿཧྲཱིཾཿཧྲཱིཾཿསྭཱ་ཧཱ། ཞེས་སྔགས་ཕྲེང་ཀློག་པའི་ཚུལ་དུ་ཅི་ནུས་སུ་བཟླ། །བསྙེན་པའི་ཚད་ནི་བདུན་ཕྲག་གཅིག་ཏུ་བཟླས་ན་བློ་གྲོས་ཀྱི་མཐུ་ཆེན་པོ་ཐོབ་པར་བཤད་དོ། །ཐུན་མཐར། ཐུགས་སྲོག་འོད་ཀྱིས་རྒྱལ་བ་སྲས་བཅས་དང་། །མཁས་རྣམས་མཁྱེན་རབ་ཧྲཱིཾཿཡིག་རྣམ་པར་བསྡུས། །སྙིང་གར་ཐིམ་པས་འོད་ཀྱིས་ལུས་ཀུན་ཁྱབ། །བློ་གྲོས་པདྨོ་མཆོག་ཏུ་རྒྱས་གྱུར་ཅིག །ཅེས་བརྗོད་ཅིང་ཡང་ཡང་བསམ། །དགེ་བ་འདི་ཡིས་བདག་སོགས་སེམས་ཅན་ཀུན། །སྒྲ་དབྱངས་ལྷ་མོ་གསུང་གི་དབང་ཕྱུག་མས། །ཚེ་རབས་ཀུན་ཏུ་འབྲལ་མེད་རྗེས་བཟུང་ནས། །ཐམས་ཅད་གཟིགས་པའི་གོ་འཕང་མྱུར་ཐོབ་ཤོག །ཅེས་དགེ་བ་བསྔོ་ཞིང་སྨོན་ལམ་གདབ་ནས་ཐུན་མཚམས་ཀྱི་བྱ་བ་ལ་འཇུག་པར་བྱའོ། །ཡང་འདིའི་བསྙེན་སྒྲུབ་སྒྲགས་མ་བྱ་བར་འདོད་ན་གནས་དབེན་ཞིང་ཡིད་དང་མཐུན་པར་བའི་ལྕི་བ་ས་ལ་མ་ལྷུངས་པས་བྱུགས། མཎྜལ་གྲུ་བཞི་པའི་ངོས་སུ་རྡུལ་ཚོན་གྱིས་པདྨ་འདབ་བརྒྱད་ལྟེ་བ་དཀར་པོ་ཅན་བྲིས་པའི་སྟེང་དུ་རིན་པོ་ཆེའམ་རྫའི་བུམ་པར་བུ་མོ་གྲོང་པའི་ཆོས་ཀྱིས་མ་གོས་པས་བླངས་པའི་ཆུ་གཙང་མར་རིན་པོ་ཆེ་ལྔ། འབྲུ་ལྔ། བཟང་པོ་དྲུག །སིནྡྷུ་ར་རྣམས་མེ་ལོང་གི་ནང་དུ་སྦྱར་བ་བླུགས། དར་ལེབ་རྒན་ཁ་གང་གིས་ཁ་བཅད། མཆོད་གཏོར་སོགས་མཛེས་པར་བཤམས་ལ། ཐོག་མར་མཆོད་པ་རྣམས། ཨོཾ་ཨ་མྲྀ་ཏེ་ཧཱུྃ་ཕཊ་ཀྱིས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་ཨོཾ་ལས་རིན་ཆེན་སྣོད། །ཡངས་ཤིང་རྒྱ་ཆེར་ཨོཾ་ཡིག་ཞུ་བ་ལས། །བྱུང་བའི་ལྷ་རྫས་ལས་གྲུབ་མཆོད་པའི་སྤྲིན། །དྭངས་ཤིང་ཐོགས་མེད་ནམ་མཁའི་ཁམས་གང་གྱུར། །ཨོཾ་བཛྲ་ཨརྒྷཾ་ཨཿཧཱུྃ་ནས། ཤབྡ་ཨཱཿཧཱུྃ་གི་བར་གྱིས་བརླབ། དེ་ནས་སྐྱབས་སེམས་ནས་བཟུང་། །ཡེ་ཤེས་པ་རང་ལ་བསྟིམས་པའི་བར་བདག་བསྐྱེད་ལྟར་སྔོན་དུ་སོང་ནས། བུམ་པ་བསང་སྦྱང་། སྟོང་པའི་ངང་ལས་བྷྲཱུྃ་ཡིག་ལས་བྱུང་བའི། །རིན་ཆེན་བུམ་པ་མཚན་ཉིད་ཡོངས་རྫོགས་དབུས། །པྃ་ལས་པད་དཀར་ཨ་ལས་ཟླ་བའི་སྟེང་། །ཐུགས་སྲོག་ངོ་བོ་ཧྲཱིཿཡིག་དམར་པོ་ལས། །འོད་འཕྲོས་འཕགས་མཆོད་འགྲོ་ཀུན་སྒྲིབ་གཉིས་སྦྱངས། ཞེས་པ་ནས། ཛཿཧཱུྃ་བྃ་ཧོཿ ཞེས་པའི་བར་བདག་བསྐྱེད་ལྟར་བྱ། མདུན་གྱི་མཆོད་པ་རྣམས་ལ་དམིགས་ཏེ། དངོས་སུ་འབྱོར་དང་ཡིད་ལས་བྱུང་བ་ཡི། མཆོད་ཡོན་ཞབས་བསིལ་མེ་ཏོག་བདུག་སྤོས་དང་། །མར་མེ་དྲི་ཆབ་ཞབ་ཟས་རོལ་མོ་སོགས། །ཀུན་བཟང་རྣམ་འཕྲུལ་མཆོད་སྤྲིན་རྒྱ་མཚོས་མཆོད། ཨོཾ་སྭ་ར་སྭ་ཏྱཻ་ཨརྒྷཾ་པྲ་ཏཱིཙྪ་སྭཱ་ཧཱ། །ཞེས་སོགས་ཀྱིས་མཆོད། མཐའ་ཀླས་སྲས་བཅས་རྒྱལ་བ་ཐམས་ཅད་ཀྱི། །ཡེ་ཤེས་ཕུང་པོ་གཅིག་ཏུ་བསྡུས་པའི་གཟུགས། །དྲན་པ་ཙམ་གྱིས་བློ་གྲོས་མཆོག་སྩོལ་བའི། །རྡོ་རྗེ་དབྱངས་ཅན་མ་ལ་ཕྱག་འཚལ་ལོ། །ཞེས་པས་བསྟོད། །བདག་མདུན་ཐུགས་ཀར་ཟླ་སྟེང་ཧྲཱིཾཿདམར་མཐར། །ཞེས་སོགས་བཟླས་དམིགས་གསལ་བཏབ་ལ་བཟླས་པ་ཅི་ནུས་སུ་བྱ། ཐུན་མཐར་བདག་མདུན་གཉིས་ཀ་ལ་དམིགས་ནས། །ཐུགས་སྲོག་འོད་ཀྱིས་རྒྱལ་བ་སྲས་བཅས་དང་། །ཞེས་སོགས་བརྗོད་ཅིང་བསམ། ཐུན་མཚམས་སུ། གཏོར་མ་བསང་སྦྱང་། སྟོང་པའི་ངང་ལས་བྷྲཱུྃཿཡིག་ལས། །བྱུང་བའི་རིན་ཆེན་སྣོད་ཡངས་སུ། །འབྲུ་གསུམ་འོད་དུ་ཞུ་བ་ལས། །གཏོར་མ་བདུད་རྩིའི་རྒྱ་མཚོར་གྱུར། །ཨོཾ་ཨཿཧཱུྃ་ལན་གསུམ་གྱིས་བརླབས། ཨོཾ་སྭ་ར་སྭ་ཏྱཻ་ཧྲཱིཾཿཧྲཱིཾཿཧྲཱིཾཿཨི་དམ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། གསུམ་མམ་བདུན་གྱིས་ཕུལ། མཆོད་བསྟོད་གོང་བཞིན་གྱི་མཐར། །བཅོམ་ལྡན་འདས་མས་བདག་སོགས་སེམས་ཅན་ཀུན། །མ་རིག་མུན་པའི་འཆིང་བ་རབ་བསལ་ནས། །ཤེས་བྱ་ཀུན་ལ་ཐོགས་པ་མེད་པ་ཡི། །བློ་གྲོས་སྣང་བ་རྒྱས་པར་མཛད་དུ་གསོལ། །ཞེས་པས་འདོད་དོན་གསོལ། དགེ་བ་བསྔོ་ཞིང་སྨོན་ལམ་གདབ། །དེ་ལྟ་བུའི་ཚུལ་ཀྱིས་ཞག་བདུན་གྱི་བར་དུ་ཐུན་བཞིར་མ་ཆག་པར་ཉམས་སུ་བླངས་མཐར། བཛྲ་མུཿས་བུམ་པའི་ཡེ་ཤེས་པ་གཤེགས། དམ་ཚིག་པ་བུམ་ཆུར་དམར་ལྟེམ་གྱིས་སོང་བར་བསམས་ལ་ཁྲུས་བྱ། །འདིའི་བསྙེན་སྒྲུབ་སྦགས་པར་ཞག་བདུན་པོ་དེས་ཆོག་ཅིང་། རྒྱུན་དུ་བདག་བསྐྱེད་ཁོ་ན་མ་ཆག་པས་དོན་འགྲུབ་བོ། །ཞེས་པའང་རང་སློབ་མཉྫུའི་མིང་ཅན་གྱི་སྐྱེས་ཐོབ་ཀྱི་ལང་ཚོ་སྒེག་པའི་ཆ་རྐྱེན་དུ་ཤཱཀྱའི་དགེ་སློང་འཇམ་དབྱངས་མཁྱེན་བརྩེའི་དབང་པོས་སྦྱར་བའི་དགེ་བས་འགྲོ་ཀུན་སོ་སོར་རྟོག་པའི་ཤེས་རབ་ཀྱི་སྣང་བ་མཆོག་ཏུ་རྒྱས་པའི་རྒྱུར་གྱུར་ཅིག །སརྦ་དཱ་ཤྲེ་ཡོ་བྷ་བ་ཏུ།། །།དགེའོ།།

[edit]

dbyangs can dmar mo'i gsang sgrub nyams len blo gros ut+pal rgyas pa'i nyin byed/__ @#/_/dbyangs can ma dmar mo gsang sgrub kyi nyams su len tshul mdor bsdus pa blo gros ut+pal rgyas pa'i nyin byed ces bya ba bzhugs so/__/na maHshrI mAM gu ru swa ra swa t+ye/__de la 'dir shin tu zab pa'i dbyangs can ma dmar mo gsang sgrub la brten nas so sor rtog pa'i shes rab kyi snang ba mchog tu rgyas par 'dod pas/__rjes su gnang ba legs par mnos te/__stan bde ba la sems dpa'i skyil mo krung gis 'khod nas/__khrus dang gtsang sbra sngon du 'gro bas skyabs sems ni/__bdag sogs 'gro kun byang chub snying po'i bar/__/bla ma dkon mchog gsum la skyabs su mchi/__/yid can srid pa'i mtsho las bsgral ba'i phyir/__/rdo rje sgra dbyangs lha mo bsgom par bgyi/__/lan gsum/__phyogs dus rgyal ba sras dang bcas pa kun/__/mdun gyi nam mkhar badz+ra sa mA dzaH__dngos su 'byor dang yid las byung ba yi/__/kun bzang rnam 'phrul mchod sprin rgya mtshos mchod/__/oM badz+ra ar+g+haM AHhU~M nas/__shab+ha AHhU~M gi bar gyis mchod/__dkon mchog gsum la bdag skyabs mchi/__/zhes sogs lan gsum gyis yan lag bdun pa dang /__sems can thams cad bde ba dang sogs kyis tshad med bzhi bsgom/__oM swa b+hA wa shud+d+haHsarba d+harmAHswa b+hA wa shud+d+ho\u0f85haM/__chos rnams mi dmigs stong pa'i ngang nyid las/__/pa~M yig las 'khrungs pad dkar 'dab brgyad dang /__/a las dri med zla ba'i dkyil 'khor steng /__/rang sems ngo bo hrIMHyig dmar po las/__/'od 'phros 'phags mchod 'gro kun sgrib gnyis sbyangs/__/tshur 'dus ye shes me long cig tu gyur/__/de nyid yongs gyur sgra dbyangs lha mo ni/__/sku mdog bye ru'i rdul brtsegs lhun po la/__/nyi gzhon stong gis 'khyud pa'i gzi byin 'bar/__/rab mdzes zhi 'dzum brgyad gnyis lang tshos sgeg__/phyag g.yas 'dod 'byung yid bzhin nor bu dang /__/g.yon pas dwangs gsal ye shes me long bsnams/__/zhabs gnyis g.yas brkyangs g.yon bskums pad zlar rol/__/yid 'phrog dar dang rin chen rgyan gyis mdzes/__/snang stong zung 'jug chu zla'i gzugs brnyan ltar/__/gsal ba'i gnas gsum yi ge 'bru gsum dang /__/thugs dbus hrIMHlas byung ba'i 'dzum zer gyis/__/lho phyogs rig 'dzin dgyes pa'i dga' tshal nas/__/ye shes spyan drangs gnyis su med par thim/__/oM shrI swa ra swa t+yai badz+ra sa mA dzaH__oM badz+ra ar+g+haM sogs nas/__shab+da'i bar dang /__dzaHhU~M ba~M hoH__thugs kar zla steng hrIMHyig dmar po'i mthar/__/sngags phreng g.yon du 'khor ba'i 'od zer gyis/__/sdig sgrib kun sbyangs shes bya thams cad la/__/thogs pa med pa'i blo gros rgyas par gyur/__/ces brjod cing bsams la/__oM swa ra swa t+yai hrIMHhrIMHhrIMHswA hA/__zhes sngags phreng klog pa'i tshul du ci nus su bzla/__/bsnyen pa'i tshad ni bdun phrag gcig tu bzlas na blo gros kyi mthu chen po thob par bshad do/__/thun mthar/__thugs srog 'od kyis rgyal ba sras bcas dang /__/mkhas rnams mkhyen rab hrIMHyig rnam par bsdus/__/snying gar thim pas 'od kyis lus kun khyab/__/blo gros pad+mo mchog tu rgyas gyur cig__/ces brjod cing yang yang bsam/__/dge ba 'di yis bdag sogs sems can kun/__/sgra dbyangs lha mo gsung gi dbang phyug mas/__/tshe rabs kun tu 'bral med rjes bzung nas/__/thams cad gzigs pa'i go 'phang myur thob shog__/ces dge ba bsngo zhing smon lam gdab nas thun mtshams kyi bya ba la 'jug par bya'o/__/yang 'di'i bsnyen sgrub sgrags ma bya bar 'dod na gnas dben zhing yid dang mthun par ba'i lci ba sa la ma lhungs pas byugs/__maN+Dal gru bzhi pa'i ngos su rdul tshon gyis pad+ma 'dab brgyad lte ba dkar po can bris pa'i steng du rin po che'am rdza'i bum par bu mo grong pa'i chos kyis ma gos pas blangs pa'i chu gtsang mar rin po che lnga/__'bru lnga/__bzang po drug__/sin+d+hu ra rnams me long gi nang du sbyar ba blugs/__dar leb rgan kha gang gis kha bcad/__mchod gtor sogs mdzes par bshams la/__thog mar mchod pa rnams/__oM a mr-i te hU~M phaT kyis bsang /__swa b+hA was sbyang /__stong pa'i ngang las oM las rin chen snod/__/yangs shing rgya cher oM yig zhu ba las/__/byung ba'i lha rdzas las grub mchod pa'i sprin/__/dwangs shing thogs med nam mkha'i khams gang gyur/__/oM badz+ra ar+g+haM aHhU~M nas/__shab+da AHhU~M gi bar gyis brlab/__de nas skyabs sems nas bzung /__/ye shes pa rang la bstims pa'i bar bdag bskyed ltar sngon du song nas/__bum pa bsang sbyang /__stong pa'i ngang las b+h+rU~M yig las byung ba'i/__/rin chen bum pa mtshan nyid yongs rdzogs dbus/__/pa~M las pad dkar a las zla ba'i steng /__/thugs srog ngo bo hrIHyig dmar po las/__/'od 'phros 'phags mchod 'gro kun sgrib gnyis sbyangs/__zhes pa nas/__dzaHhU~M ba~M hoH__zhes pa'i bar bdag bskyed ltar bya/__mdun gyi mchod pa rnams la dmigs te/__dngos su 'byor dang yid las byung ba yi/__mchod yon zhabs bsil me tog bdug spos dang /__/mar me dri chab zhab zas rol mo sogs/__/kun bzang rnam 'phrul mchod sprin rgya mtshos mchod/__oM swa ra swa t+yai ar+g+haM pra tIts+tsha swA hA/__/zhes sogs kyis mchod/__mtha' klas sras bcas rgyal ba thams cad kyi/__/ye shes phung po gcig tu bsdus pa'i gzugs/__/dran pa tsam gyis blo gros mchog stsol ba'i/__/rdo rje dbyangs can ma la phyag 'tshal lo/__/zhes pas bstod/__/bdag mdun thugs kar zla steng hrIMHdmar mthar/__/zhes sogs bzlas dmigs gsal btab la bzlas pa ci nus su bya/__thun mthar bdag mdun gnyis ka la dmigs nas/__/thugs srog 'od kyis rgyal ba sras bcas dang /__/zhes sogs brjod cing bsam/__thun mtshams su/__gtor ma bsang sbyang /__stong pa'i ngang las b+h+rU~MHyig las/__/byung ba'i rin chen snod yangs su/__/'bru gsum 'od du zhu ba las/__/gtor ma bdud rtsi'i rgya mtshor gyur/__/oM aHhU~M lan gsum gyis brlabs/__oM swa ra swa t+yai hrIMHhrIMHhrIMHi dam ba liM ta kha kha khA hi khA hi/__gsum mam bdun gyis phul/__mchod bstod gong bzhin gyi mthar/__/bcom ldan 'das mas bdag sogs sems can kun/__/ma rig mun pa'i 'ching ba rab bsal nas/__/shes bya kun la thogs pa med pa yi/__/blo gros snang ba rgyas par mdzad du gsol/__/zhes pas 'dod don gsol/__dge ba bsngo zhing smon lam gdab/__/de lta bu'i tshul kyis zhag bdun gyi bar du thun bzhir ma chag par nyams su blangs mthar/__badz+ra muHsa bum pa'i ye shes pa gshegs/__dam tshig pa bum chur dmar ltem gyis song bar bsams la khrus bya/_/'di'i bsnyen sgrub sbags par zhag bdun po des chog cing /__rgyun du bdag bskyed kho na ma chag pas don 'grub bo/__/zhes pa'ang rang slob many+dzu'i ming can gyi skyes thob kyi lang tsho sgeg pa'i cha rkyen du shAkya'i dge slong 'jam dbyangs mkhyen brtse'i dbang pos sbyar ba'i dge bas 'gro kun so sor rtog pa'i shes rab kyi snang ba mchog tu rgyas pa'i rgyur gyur cig__/sarba dA shre yo b+ha ba tu//__//dge'o//_