JKW-KABUM-11-DA-014-011

🚧 This website is under continued development. We appreciate your patience!

Previous Text Back to Volume PageNext Text

མཁའ་འགྲོ་མ་སྨེ་བ་བརྩེགས་མའི་སྒྲུབ་ཐབས་ཕྲིན་ལས་ཀྱི་ཆོ་ག་དང་བཅས་པ་སྙིང་པོར་དྲིལ་བ་བདུད་རྩིའི་བུམ་བཟང་།

Wylie title	mkha' 'gro ma sme ba brtsegs ma'i sgrub thabs phrin las kyi cho ga dang bcas pa snying por dril ba bdud rtsi'i bum bzang
Location	mkhyen brtse'i bka' 'bum Volume 11, sde tshan 14, Text 11, Pages 505-526 (Folios 52a6 to 62b6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. mkha' 'gro ma sme ba brtsegs ma'i sgrub thabs phrin las kyi cho ga dang bcas pa snying por dril ba bdud rtsi'i bum bzang. In 'jam dbyangs mkhyen brtse'i dbang po'i bka' 'bum, Vol. 11: 505-526. Khams sde dge rdzong sar dgon: Rdzong sar blo gros phun tshogs, 2020.
Genre	Activity Manual - las byang  ·  Fire Offerings - sbyin sreg  ·  Sadhanas - Evocation Ritual - sgrub thabs  ·  Activity Practices - las tshogs
Deity	mkha' 'gro ma
Colophon	།དེ་ཡང་སྤྱིར་སྙིགས་མའི་དུས་འདིར་གྲིབ་ཀྱི་རིགས་ཐ་དད་པ་མང་པོ་དང་། ལྷག་པར་མ་མོ་མཁའ་འགྲོ་ཁྲོས་པའི་གྲིབ་ཡམས་ཐབས་སུ་འགོ་བའི་རིམས་དང་། དམ་ཚིག་ཉམས་པའི་གྲིབ་ཀྱིས་འདི་ཕྱིའི་བདེ་ལེགས་ཐམས་ཅད་འགྲིབ་པ་སོགས་ཀྱི་གཉེན་པོར་གྲིབ་སེལ་གྱི་རིགས་མཐའ་ཀླས་པ་ཞིག་གསུངས་པའི་ནང་ནས། ཁྲོ་མོ་སྨེ་བརྩེགས་འདི་ཉིད་གསར་རྙིང་གི་གདམས་པ་ཟུང་དུ་འབྲེལ་ཞིང་། བྱ་སླ་ཚེགས་ཆུང་ཕན་ཡོན་ཆེ་བར་མྱོང་བས་གྲུབ་པའི་ཕྱིར། རང་གཞན་ཀུན་ལ་སྨན་པའི་བསམ་པ་བཟང་པོས་ཀུན་ནས་བསླངས་ཏེ། ཉེར་མཁོའི་གདམ་ངག་འགའ་ཞིག་ཕྱོགས་གཅིག་ཏུ་བསྡེབས་པ་འདི་ཡང་། རིག་འཛིན་གྱི་བཙུན་པ་མཉྫུ་གྷོ་ཥས་སྦྱར་བའི་དགེ་བས་འགྲོ་ཀུན་མི་མཐུན་པའི་རྒུད་པ་ཐམས་ཅད་ཉེ་བར་ཞི་བའི་རྒྱུར་གྱུར་ཅིག
	de yang spyir snyigs ma'i dus 'dir grib kyi rigs tha dad pa mang po dang /__lhag par ma mo mkha' 'gro khros pa'i grib yams thabs su 'go ba'i rims dang /__dam tshig nyams pa'i grib kyis 'di phyi'i bde legs thams cad 'grib pa sogs kyi gnyen por grib sel gyi rigs mtha' klas pa zhig gsungs pa'i nang nas/__khro mo sme brtsegs 'di nyid gsar rnying gi gdams pa zung du 'brel zhing /__bya sla tshegs chung phan yon che bar myong bas grub pa'i phyir/__rang gzhan kun la sman pa'i bsam pa bzang pos kun nas bslangs te/__nyer mkho'i gdam ngag 'ga' zhig phyogs gcig tu bsdebs pa 'di yang /__rig 'dzin gyi btsun pa many+dzu g+ho Shas sbyar ba'i dge bas 'gro kun mi mthun pa'i rgud pa thams cad nye bar zhi ba'i rgyur gyur cig

1 Texts in this Section (sde tshan or chos tshan)

11 505-526	མཁའ་འགྲོ་མ་སྨེ་བ་བརྩེགས་མའི་སྒྲུབ་ཐབས་ཕྲིན་ལས་ཀྱི་ཆོ་ག་དང་བཅས་པ་སྙིང་པོར་དྲིལ་བ་བདུད་རྩིའི་བུམ་བཟང་། mkha' 'gro ma sme ba brtsegs ma'i sgrub thabs phrin las kyi cho ga dang bcas pa snying por dril ba bdud rtsi'i bum bzang Activity Manual - las byang   ·   Fire Offerings - sbyin sreg   ·   Sadhanas - Evocation Ritual - sgrub thabs   ·   Activity Practices - las tshogs	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །མཁའ་འགྲོ་མ་སྨེ་བ་བརྩེགས་མའི་སྒྲུབ་ཐབས་ཕྲིན་ལས་ཀྱི་ཆོ་ག་དང་བཅས་པ་སྙིང་པོར་དྲིལ་བ་བདུད་རྩིའི་བུམ་བཟང་ཞེས་བྱ་བ་བཞུགས་སོ། །ན་མོ་གུ་རུ་བྷྱཿ འདིར་གྲུ་སྤང་རྩེ་བ་རྡོ་རྗེ་སེང་གེ་ལ། མཁའ་འགྲོ་མ་སེང་གེའི་གདོང་ཅན་གྱིས་གནང་བའི་ཁྲོ་མོ་སྨེ་བརྩེགས་ཀྱི་སྒོམ་བཟླས་ཉམས་སུ་བླང་བར་འདོད་པས། སྐྱབས་འགྲོ་སེམས་བསྐྱེད་ཚད་མེད་བཞི་བསྒོམ་པ་སྔོན་དུ་སོང་ནས། །རང་སྐད་ཅིག་གིས་མཁའ་འགྲོ་མ་སྨེ་བ་བརྩེགས་མ་སྐུ་མདོག་སོལ་བ་ལྟར་ནག་པ། སྐྱོན་ཅིས་ཀྱང་འགོས་སུ་མི་བཏུབ་པ། ཕྱག་གཉིས་ཐུགས་ཀར་བསྣོལ་བའི་ཕྱག་རྒྱས་དག་བྱེད་ཀྱི་བུམ་པ་ཆུས་བཀང་བ་བསྣམས་པ། ཉམས་གྲིབ་དང་མི་གཙང་བ་ཐམས་ཅད་འཁྲུད་པར་མཛད་པ། གཅེར་བུ་རྒྱན་སྤངས་ཤིང་པད་ཉིའི་གདན་ལ་ཞབས་གཉིས་མཉམ་པའི་སྟབས་ཀྱིས་བཞེངས་པའི་སྐུ་ཅན་དུ་གྱུར་པར་དམིགས་ལ། ཨོཾ་ཁ་རྦཾ་ཛི་རྦཾ་བི་མ་ལ་སེ་ཨུ་ཙུཥྨ་ཀྲོ་དྷཱི་ཧཱུྃ་ཕཊ། ཅེས་བརྒྱ་རྩ་ལ་སོགས་པ་ཇི་ལྟར་རིགས་པ་བཟླས་པའི་མཐར། བཅོམ་ལྡན་འདས་མ་ཁྲོ་མོའི་རྒྱལ་མོ་སྨེ་བ་བརྩེགས་མས་བདག་དང་སེམས་ཅན་ཐམས་ཅད་ཀྱི་ནད་གདོན་སྡིག་སྒྲིབ་ཉམས་གྲིབ་དང་མི་གཙང་བ་ཐམས་ཅད་ཞི་བ་དང་། མྱུར་དུ་ཁྲོ་མོའི་རྒྱལ་མོ་སྨེ་བ་བརྩེགས་མའི་གོ་འཕང་ཐོབ་པར་བྱིན་གྱིས་བརླབ་ཏུ་གསོལ། །ཅེས་འདོད་པའི་དོན་ལ་གསོལ་བ་གདབ། མི་གཙང་བའི་ཉེས་པ་གང་གིས་ཀྱང་མི་གོས་པའི་ངེས་ཤེས་བརྟན་པོ་བྱ། གལ་ཏེ་མཛེ་ཕོ་དང་། ཡུགས་ས་དང་། མི་གདོང་སོ་མ་དང་། དམ་ཉམས་དང་། ཚུལ་ཁྲིམས་འཆལ་བ་དང་། དམེ་ཅན་དང་། འཁོན་ཅན་ལ་སོགས་པ་དང་འགྲོགས་དགོས་པ་བྱུང་ན། སྐད་ཅིག་གིས་ལྷར་བསམས་ལ་བཟླས་བརྗོད་ཤུབ་བུར་བྱ་བའམ། མ་གྲུབ་ནའང་ཁྲོ་མོའི་བསྐྱེད་རིམ་གྱི་ང་རྒྱལ་བརྟན་པར་བྱས་པས། ཉེས་པས་མི་གོས་པ་ནི་མྱོང་བས་གྲུབ་པ་ཡིན་ནོ། །བུམ་ཆོག་བྱེད་ན། སྟེགས་ཀྱི་ཁར་པདྨ་འདབ་མ་བརྒྱད་པའི་དབུས་སུ་བུམ་པ་བཅུད་ལྡན་ཁ་རྒྱན་མགུལ་ཆིངས་དུང་ཆོས་གཟུངས་རྡོར་དང་བཅས་པའི་མདུན་དུ་ཟླུམ་གཏོར་དཀར་པོ་དང་། ཆུ་གཉིས་སྔོན་འགྲོའི་ཉེར་སྤྱོད་བཅས་བཤམ། མཆོད་རྫས་རྣམས། ཨོཾ་ཨམྲྀ་ཏ་ཧཱུྃ་ཕཊ་ཀྱིས་བསང་སྭ་བྷཱ་ཝས་སྦྱང་། སྟོང་པའི་ངང་ལས་ཨོཾ་ལས་བྱུང་བའི་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་འོད་དུ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་མཆོག །ཞལ་ཟས། རོལ་མོ་རྣམས་དྭངས་ཤིང་ཐོགས་པ་མེད་པ་ནམ་མཁའི་མཐའ་ཀླས་པར་གྱུར། ཨོཾ་བཛྲ་ཨརྒྷཾ་ཨཱཿཧཱུྃ་ནས་ཤཔྡའི་བར་དང་། དྷརྨཱ་ར་ཎི་ཏ་ལན་གསུམ་གྱིས་བྱིན་དབབ། སྐྱབས་འགྲོ་ནས་བདག་བསྐྱེད་བཟླས་པ་འདོད་གསོལ་ཡན་གོང་ལྟར་མཐར། མདུན་གྱི་བུམ་པ། ཨམྲྀ་ཏས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་པྃ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་བྷྲཱུྃ་ལས་རིན་པོ་ཆེའི་བུམ་པ་ཡངས་ཤིང་རྒྱ་ཆེ་བ། ལྟོ་བ་ལྡིར་བ། ཞབས་ཞུམ་པ། མགྲིན་པ་ཕྲ་བ། ཁ་གཡེལ་བ། མཆུ་འཕྱང་བ། ལྷ་རྫས་ཀྱི་གོས་ཀྱིས་མགུལ་པ་བཅིངས་ཤིང་། དཔག་བསམ་གྱི་ཤིང་གིས་ཁ་བརྒྱན་པ། ནང་ཆུ་དང་བཅུད་སྣ་ཚོགས་ཀྱིས་ཡོངས་སུ་གང་བའི་ནང་དུ་སྐད་ཅིག་གིས་མཁའ་འགྲོ་མ་སྨེ་བ་བརྩེགས་མ་ནས། སྐུ་ཅན་དུ་གྱུར་པར་བདག་བསྐྱེད་ལྟར་གསལ་བཏབ་ལ། ཨོཾ་ཨུ་ཙུཥྨ་ཀྲོ་དྷཱི་ཨརྒྷཾ་པྲ་ཏཱིཙྪ་སྭཱ་ཧཱ་ནས་ཤཔྡའི་བར་དང་། དྷ་རྨཱ་ར་ཎི་ཏས་མཆོད། རྡོ་རྗེ་དྲིལ་བུ་འཛིན་པས། གང་གི་མཚན་ཙམ་དྲན་པས་ཀྱང་། །མི་མཐུན་དྲི་མ་ཀུན་སེལ་ཞིང་། །གཙང་དག་བདེ་ལ་འགོད་མཛད་པ། །མཁའ་འགྲོའི་དབང་མོ་ལ་ཕྱག་འཚལ། །ཞེས་པས་བསྟོད། གཏོར་མ་བསང་སྦྱང་། སྟོང་པའི་ངང་ལས་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་ལན་གསུམ། སྔགས་ཀྱི་མཐར། ཨ་ཀཱ་རོ་བཏགས་པ་གསུམ་མམ་བདུན་གྱིས་ཕུལ། གོང་བཞིན་མཆོད་ཅིང་བསྟོད། བཅོམ་ལྡན་འདས་མ་ཁྲོ་མོའི་རྒྱལ་མོ་སྨེ་བ་བརྩེགས་མས་སོགས། བདག་བསྐྱེད་ཀྱི་མཇུག་གི་འདོད་གསོལ་སྦྱར། གཟུངས་ཐག་ལ་བཟུང་སྟེ། རང་གི་སྙིང་ག་ནས་སྔགས་ཀྱི་ཕྲེང་བ་གཟུངས་ཐག་ལ་ཞོན་ཏེ་བུམ་པའི་ནང་དུ་སོང་། བུམ་ནང་གི་ལྷ་ཡི་ཐུགས་ཀར་ཕོག །དེའི་སྐུ་ལས་བདུད་རྩིའི་རྒྱུན་བྱུང་བས་བུམ་པ་གང་བར་གྱུར་པར་བསམས་ལ། བཟླས་པ་ཅི་ནུས་དང་། མཐར། ཨོཾ་ཨེ་ཧོ་ཤུདྡྷེ་ཤུདྡྷེ། བཾ་ཧོ་ཤུདྡྷེ་ཤུདྡྷེ། རཾ་ཧོ་ཤུདྡྷེ་ཤུདྡྷེ། ཨེ་བཾ་རཾ་ཤུདྡྷེ་ཤུདྡྷེ། ཨ་ཨ་ཨ་སྭཱ་ཧཱ། ཞེས་པའང་ཅུང་ཟད་བཟླས་མཆོད་བསྟོད་འདོད་གསོལ་གོང་ལྟར་དང་། ཡིག་བརྒྱ་ལན་གསུམ། མ་འབྱོར་པ་དང་སོགས་ཀྱིས་ནོངས་པ་བཟོད་པར་གསོལ། ཨོཾ་ཨཱཿཧཱུྃ། མཆོད་ཡོན་ཕུལ་བའི་རྐྱེན་གྱིས་བུམ་ནང་གི་ལྷ་འོད་དུ་ཞུ་བ་ལས་བྱུང་བའི་བུམ་པའི་ཆུ་བདུད་རྩིར་གྱུར། ཅེས་བརྗོད་ཅིང་གཟུངས་ཐག་བསྡུ། ཁྲུས་ཆུ་རང་ཉིད་ཀྱིས་བཏུང་བ་དང་གནས་ཁང་ལ་གཏོར་བས་ཉམས་གྲིབ་མི་གཙང་བ་ཐམས་ཅད་སེལ་བའི་མཆོག་ཏུ་གསུངས་ཤིང་། གཞན་བཀྲུ་བྱབས་སྲུང་གསུམ་གྱིས་རྗེས་སུ་འཛིན་པར་འདོད་ན། བསྒྲུབ་བྱ་མདུན་དུ་འཁོད་པར། སྦྱོང་ཆས་རྣམས་ཕྱག་ལེན་བཞིན་བཤམས་ལ་གཏོར་མ་ཆབ་ཀྱིས་བྲན་ཏེ། སློབ་དཔོན་གྱིས། འོ་ཁྱེད་རང་རྣམས་ཀྱི་འགལ་རྐྱེན་ནད་གདོན་གྲིབ་དང་མི་གཙང་བ་ཐམས་ཅད་ཞི་ཞིང་བསྲུང་བར་བྱ་བ་དང་། མཐུན་རྐྱེན་ཤིས་པའི་ལེགས་ཚོགས་ཐམས་ཅད་གོང་ནས་གོང་དུ་འཕེལ་ཞིང་རྒྱས་པར་བྱ་བའི་སླད་དུ་ཁྲོ་མོའི་རྒྱལ་མོ་སྨེ་བ་བརྩེགས་མའི་ཁྲུས་ཀྱི་ཆོ་གའི་སྒོ་ནས་རྗེས་སུ་འཛིན་པ་ལའང་། གདོན་བགེགས་ལ་གཏོར་མ་སྦྱིན་པའི་སྒོ་ནས་སྦྱོང་བ་སོགས་བྱ་བ་དང་། བགེགས་ཞི་བའི་ཕྱིར་བཀྲུ་བྱབས་སྲུང་གསུམ་དང་། བདེན་པའི་སྟོབས་བརྗོད་པ་དང་། ཤིས་པར་བྱ་བ་རྣམས་སུ་ཡོད་པ་ལས། ཐོག་མར་གདོན་བགེགས་ལ་གཏོར་མ་སྦྱིན་པའི་སྒོ་ནས་སྦྱོང་བ་བྱས་པའི་མོས་པ་མཛོད། ལས་ཀྱི་རྡོ་རྗེས་བསྒྲུབ་བྱ་ལ་གཏོར་མ་གཡས་ཕྱོགས་སུ་བསྐོར་ཞིང་། རང་གི་ལག་པ་གཡས་མཆོག་སྦྱིན་གྱི་ཕྱག་རྒྱ་དང་། ཨོཾ་སརྦ་བིགྷྣཱན་ན་མཿསརྦ་ཏ་ཐཱ་ཁ་ཏ་ཞེས་སོགས་བརྗོད་དེ་སེ་གོལ་གྱི་སྒྲ་བྱ། དེ་ལྟ་བུ་ལན་གསུམ་བྱས་ལ་ཞི་བས་སྦྱང་། དེ་བཞིན་དུ་ཏིང་ལོ་དང་ཆངས་བུ་བསྐོར་བ་དང་བསྟུན་ལ་རྡོ་རྗེ་གསོར་ཞིང་རྩ་སྔགས་དང་སུམྦྷ་ལན་གསུམ་གྱི་མཐར། འདིར་རྡོ་རྗེ་སློབ་མའམ་སྦྱིན་པའི་བདག་པོ་ཆེ་གེ་མོ་ཞེས་བགྱི་བ་ལ་བར་དུ་གཅོད་པར་རྩོམ་པའི་གདོན་བགེགས་ཀྱི་རིགས་གང་ཡིན་པ་དེ་དག་ཐམས་ཅད་གཏོར་མ་ལམ་བརྔན། ཏིང་ལོ་ལམ་སྒྲོན། ཆངས་བུ་ལམ་བརྒྱགས་ཀྱི་ཚུལ་དུ་ཁྱེར་ལ་སའི་ཕྱོགས་འདིར་མ་གནས་པར་གཞན་དུ་སོང་ཞིག །ཅེས་ཞི་དྲག་ཕྱེད་མས་སྦྱང་། སྤྲོ་ན་ཁྲོ་བོ་སྤྱན་འདྲེན་གདན་འབུལ་མཆོད་བསྟོད་རྣམས་བྱས་པའི་མཐར། ཧཱུྃ་མཛད་ཀྱི་ཕྱག་རྒྱ་བྱས་ལ། རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ་བདེན་པ་དང་། ཆོས་ཀྱི་བཀའ་བདེན་པ་དང་། དགེ་འདུན་གྱི་བཀའ་བདེན་པ་དང་། གསང་སྔགས་དང་རིག་སྔགས་ཀྱི་རྒྱལ་པོ་ཁྲོ་བོ་ཁྲོ་མོ་རྣམས་ཀྱི་བཀའ་བདེན་པ་དང་། བཅོམ་ལྡན་འདས་མ་ཁྲོ་མོའི་རྒྱལ་མོ་སྨེ་བ་བརྩེགས་མའི་བཀའ་བདེན་པ་དང་། བདེན་པ་ཆེན་པོའི་བྱིན་རླབས་ཀྱིས། དེང་འདིར་རྡོ་རྗེ་སློབ་མའམ་སྦྱིན་པའི་བདག་པོ་ཆེ་གེ་མོ་ཞེས་བགྱི་བ་ལ་བར་དུ་གཅོད་པར་རྩོམ་པའི་གདོན་བགེགས་ལོག་པར་འདྲེན་པའི་ཚོགས་ཐམས་ཅད་ལ་རྒྱུད་སྡེ་དང་མཐུན་པའི་སྦྱོང་བ་རྣམ་པར་དག་པ་བྱས་ཟིན་པ་དེས་མགུ་པར་གྱིས་ལ། སའི་ཕྱོགས་འདིར་མ་གནས་པར་གཞན་དུ་སོང་ཞིག །གང་དག་མི་འགྲོ་བ་དེ་དག་ལ་དེ་བཞིན་གཤེགས་པ་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་ལས་བྱུང་བའི་ཁྲོ་བོའི་རྡོ་རྗེ་འབར་ཞིང་རབ་ཏུ་འབར་བ་འདིས་ཁྱེད་རྣམས་ཀྱི་མགོ་བོ་ཚལ་པ་བརྒྱར་འགས་པར་འགྱུར་རོ། །ཞེས་དང་ལྷའི་ང་རྒྱལ་བརྟན་པོས་རྩ་སྔགས་དང་། སུམྦྷ་བཟླ་ཞིང་རོལ་མོ་དྲག་ཏུ་བྱ། གུ་གུལ་གྱིས་བདུག །ཡུངས་ཀར་གྱིས་བྲབས་ལ་གོང་དུ་ཁྲོ་བོ་སྤྱན་འདྲེན་བྱས་ན་སླར་ཡང་། འཇིགས་པའི་ཧཱུྃ་སྒྲ་ངེས་སྒྲོགས་ཤིང་སོགས་ཀྱི་མཐར། རྗེ་བཙུན་རྩ་བ་དང་ཞེས་སོགས་སྦྱར་བ་ལན་གཉིས་ཏེ་དྲག་པོའི་སྦྱོང་བ་ལན་གསུམ་བྱ། གཉིས་པ་བགེགས་ཞི་བའི་ཕྱིར་བཀྲུ་བྱབས་སྲུང་གསུམ་ལས། ཐོག་མར་བཀྲུ་བའི་སླད་དུ་སློབ་དཔོན་གྱིས་བུམ་པ་ཡེ་ཤེས་ཀྱི་བདུད་རྩིས་གང་བར་ཐོགས་ཏེ་ཁྱེད་རང་རྣམས་ལ་ཁྲུས་བགྱིས་པ་ལ་བརྟེན་ནས་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་པ་དང་སྒྲིབ་པ་ནད་གདོན་གྲིབ་དང་མི་གཙང་བ་ཐམས་ཅད་བྱང་ཞིང་དག་པའི་མོས་པ་མཛོད། ཅེས་བརྡ་སྦྱར་ལ། ཇི་ལྟར་བལྟམས་པ་སོགས་དང་། འདི་ནི་ཁྲུས་མཆོག་སོགས་ཀྱི་མཐར། རྩ་སྔགས་དང་། སརྦ་པཱ་བེ་བྷྱཿཤཱནྟི་ཀུ་རུ་སྭཱ་ཧཱ། དེ་བཞིན་དུ་སྦྱར་ཏེ། སརྦ་བིགྷྣཱན༴ སརྦ་རོ་གེ། སརྦ་དུཥྟཱན༴ སརྦ་གྲ་ཧེ༴ སརྦ་ཛྭཱ་ར༴ སརྦ་བྱཱ་དྷི༴ སརྦ་ཨུ་པ་དྲ་བེ༴ སརྦ་ཨ་ཀཱ་ལ་མྲྀ་ཏྱུ༴ སརྦ་དུཪྶ་པྣི༴ སརྦ་དུརྣི་མིཏྟེ༴ སརྦ་ཙིཏྟ་ཀུ་ལེ་བྷྱཿཤཱིནྟི་ཀུ་རུ་སྭཱ་ཧཱ། ཞེས་བརྗོད་ཅིང་བཀྲུའོ། །ཁར་ཆུ་ཅུང་ཟད་འཛིན་དུ་བཅུག་ལ། དེ་ནས་བྱབས་པའི་སླད་དུ་རྨ་བྱའི་མདོངས་ཀྱི་ཐིག་ལེའི་དབུས་སུ་ཉི་མ་ལ་གནས་པའི་ཧཱུྃ་ཡིག་མཐིང་ནག་གི་མཐར་སྔགས་ཕྲེང་དང་བཅས་པ་གསལ་བཏབ་ནས། སློབ་དཔོན་གྱིས་རྡོ་རྗེ་དང་བཅས་པའི་སྒྲོས་བསྐོར་ཞིང་བྱབས་པ་དང་། སྔགས་ཕྲེང་ལས་འཕྲོས་པའི་འོད་ཟེར་གྱིས་བཀྲུས་པས་མ་དག་པའི་ནད་གདོན་སྡིག་སྒྲིབ་གྲིབ་དང་མི་གཙང་བ་ཐམས་ཅད་ལྷག་མ་མེད་པར་རྡོ་ཁབ་ལེན་གྱིས་ལྕགས་ཕྱེ་ལེན་པ་ལྟར་ཙེན་གྱིས་བླངས་ཏེ་ཕྱིར་དོར་བའི་མོས་པ་མཛོད། རྩ་སྔགས་མཐར། སརྦ་པཱ་པེ་བྷྱཿཨ་པ་ན་ཡེ་སྭཱ་ཧཱ། དེ་བཞིན་དུ་གཞན་རྣམས་ལའང་སྦྱར་ཏེ་བྱབས་ལ། ཁ་ཡི་ཆུ་ཕྱིར་འདོན། སླར་ཡང་བསྲུང་བར་བྱ་བའི་སླད་དུ། ཁྱེད་རང་རྣམས་ཀྱི་སྤྱི་བོ་ལ་སོགས་པའི་གནས་རྣམས་སུ་སློབ་དཔོན་གྱིས་རྡོ་རྗེས་རེག་པས། རྡོ་རྗེ་དེ་ལས་དེ་འདྲ་བའི་རིགས་ཅན་བསམ་གྱིས་མི་ཁྱབ་པ་བྱུང་སྟེ་ལུས་ལ་རྡོ་རྗེའི་གོ་ཁྲབ་བཞུ་ལུགས་སུ་གྱོན་ནས་ཕྱིན་ཆད་ནད་གདོན་ཉེར་འཚེ་གང་གིས་ཀྱང་མི་ཚུགས་པ་བསྲུང་བར་བྱས་པ་ཡིན་སྙམ་དུ་ཐུགས་མོས་མཛོད། །ཅེས་སློབ་མའི་སྤྱི་བོ་དང་། མདུན་རྒྱབ་གཉིས། དཔུང་པ་གཉིས། པུས་མོ་གཉིས་ཏེ་གནས་བདུན་དུ་རྡོ་རྗེས་རྒྱ་གྲམ་དུ་རེག་ལ་སྔགས་དང་། སརྦ་པཱ་བེ་བྷྱཿརཀྵ་རཀྵ། ཞེས་སོགས་སྦྱར་ལ་བསྲུང་། གསུམ་པ་བདེན་པའི་སྟོབས་བརྗོད་པའི་སླད་དུ། ཁྱེད་རང་རྣམས་ཀྱི་སྤྱི་བོར་རྡོ་རྗེ་བཞག་སྟེ་བྱིན་གྱིས་བརླབ་པའི་མོས་པ་མཛོད། །སྔག་ཀྱི་མཐར། རྒྱལ་བ་སྲས་བཅས་བདེན་པའི་བྱིན་རླབས་དང་། །ཁྲོ་རྒྱལ་སྨེ་བ་བརྩེགས་མའི་ནུས་མཐུ་ཡིས། །འགྲོ་བ་འདི་དག་བདག་གིས་བསྲུངས་ཟིན་གྱིས། །འདི་ལ་སུས་ཀྱང་གནོད་པར་མ་བྱེད་ཅིག །བཞི་པ་ཤིས་པར་བྱ་བའི་སླད་དུ། མདུན་གྱི་ནམ་མཁར་ཁྲོ་མོའི་རྒྱལ་མོ་སྨེ་བ་བརྩེགས་མ་ལ། གཞན་ཡང་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའི་ཚོགས་བསམ་གྱིས་མི་ཁྱབ་པས་བསྐོར་བར་གསལ་བཏབ་ནས། སློབ་དཔོན་དང་ལྷན་ཅིག་ཏུ་མེ་ཏོག་གི་ཆར་འབེབས་ཤིང་བཀྲ་ཤིས་པའི་ཚིགས་སུ་བཅད་པས་ཀྱང་མངའ་གསོལ་བའི་ཐུགས་མོས་མཛོད། ཆེ་བའི་ཆེ་མཆོག་སོགས་ཤིས་བརྗོད་ཇི་ལྟར་རིགས་པར་བྱའོ། །རྗེས་གནང་བྱེད་ན། སྟེགས་ཀྱི་དབུས་སུ་མཎྜལ་ཚོམ་བུ་གཅིག་པ་དང་། ཟླུམ་གཏོར། ཆུ་གཉིས་སྔོན་འགྲོའི་ཉེར་སྤྱོད་རྣམས་བཤམ། མཆོད་པ་བྱིན་རླབས་ནས་བདག་བསྐྱེད་བཟླས་པ་འདོད་གསོལ་ཡན་སྔར་ལྟར་ལས། ཚོམ་བུ་བསང་སྦྱང་། སྟོང་པའི་ངང་ལས་སྐད་ཅིག་གིས་མཁའ་འགྲོ་མ་སྨེ་བ་བརྩེགས་མ་ནས། སྐུ་ཅན་དུ་གྱུར་པར་བདག་བསྐྱེད་བཞིན་གསལ་བཏབ། མཆོད་བསྟོད་གཏོར་འབུལ་འདོད་གསོལ་རྣམས་བུམ་ཆོག་བཞིན་དང་། མདུན་བསྐྱེད་བརྟེན་བྱེད་ཀྱི་བཟླས་པ་ཅུང་ཟད་བྱ། དེ་ནས་སློབ་མ་རྣམས་ཁྲུས་བྱས་གྲལ་དུ་འཁོད་པར། མེ་ཏོག་བཀྱེ་བསྡུ་གྲུབ་རྗེས། སེམས་བསྐྱེད་གསལ་གདབ་སོགས་སྤྱི་འགྲེ་དང་། མཚམས་སྦྱོར་གྱི་ཁྱད་པར། འདིར་གྲུ་སྤང་རྩེ་བ་རྡོ་རྗེ་སེང་གེ་ལ། ཡེ་ཤེས་ཀྱི་མཁའ་འགྲོ་སེང་གེའི་གདོང་པ་ཅན་གྱིས་དངོས་སུ་གནང་བའི་ཁྲོ་མོའི་རྒྱལ་མོ་སྨེ་བ་བརྩེགས་མའི་རྗེས་སུ་གནང་བ་ཟབ་མོ་སྒྲུབ་པ་ལ། སློབ་དཔོན་གྱི་བྱ་བ་རྣམས་གྲུབ་ནས་སོགས་སྒྲེས་ལ་མཎྜལ་འབུལ། དུས་གསུམ་སངས་རྒྱས་ཐམས་ཅད་དང་། །སོགས་ཀྱིས་གསོལ་བ་གདབ། དཀོན་མཆོག་གསུམ་ལ་བདག་སྐྱབས་མཆི། །སོགས་རྒྱུན་བཤགས་བྱ། གཞི་དགོད་ལ་ཡེ་ཤེས་པ་སྤྱན་དྲངས་ནས་བསྟིམ། རྗེས་སུ་བཟླས་པའི་ལུང་གི་སྐབས། སློབ་དཔོན་གྱི་ཐུགས་ཀར་ཉི་མའི་དཀྱིལ་འཁོར་གྱི་མཐར་སྔགས་ཀྱི་ཕྲེང་བས་བསྐོར་བ་ལས། སྔགས་ཕྲེང་གཉིས་པ་ཆད་ནས་སློབ་མའི་ཞལ་དུ་ཞུགས་པར་བསམ་པ་ཙམ་མ་གཏོགས། གཞན་དམ་བཅའ་བའི་ལུང་། བྱིན་གྱིས་བརླབ་པའི་ལུང་རྣམས་སྒྲུབ་ཐབས་བརྒྱ་རྩ་ལྟར་བྱ། དམ་ཚིག་ཁས་བླང་། གཏང་རག་གི་མཎྜལ། ལུས་ལོངས་སྤྱོད་འབུལ་བ། དགེ་བ་བསྔོ་བ་རྣམས་བྱས་ལ་སློབ་མ་རང་གནས་སུ་བཏང་། སློབ་དཔོན་གྱིས་མཆོད་པ་བསང་སྦྱང་བྱིན་གྱིས་བརླབ། མཆོད་བསྟོད། གསོལ་བ་གདབ། ལྷག་ཆད་ཁ་བསྐང་། བཟོད་པར་གསོལ། ཡེ་ཤེས་པ་གཤེགས། དམ་ཚིག་པ་རང་ལ་བསྡུ། གནས་གསུམ་བསྲུང་། དགེ་བ་བསྔོ་ཞིང་ཤིས་པ་བརྗོད་པ་རྣམས་སྤྱི་ལྟར་བྱའོ། །རྗེས་གནང་དང་འབྲེལ་བར་ཁྲུས་ཆོག་བྱེད་ན། མདུན་བསྐྱེད་ཀྱི་མཆོད་བསྟོད་ཚར་བའི་རྗེས་སུ། གོང་དུ་བཤད་པའི་བུམ་ཆོག་བྱས་ལ། རྗེས་གནང་གི་བྱིན་གྱིས་བརླབ་པའི་ལུང་ཡན་ཆད་གྲུབ་རྗེས་དེས་རྗེས་གནང་གི་དངོས་གཞི་ལེགས་པར་གྲུབ་ནས། མཐའ་རྟེན་དུ་གདོན་བགེགས་ལ་གཏོར་མ་སྦྱིན་པའི་སྒོ་ནས་སྦྱོང་བ་སོགས་བྱ་བ་དང་། ཞེས་སོགས་དཀྱུས་ལྟར་བརྗོད་པར་བྱ། དེས་རྗེས་གནང་གི་དངོས་གཞི་མཐའ་རྟེན་དང་བཅས་པ་ལེགས་པར་གྲུབ་ནས། གནས་སྐབས་དེ་དག་ཏུ་སོགས་དཀྱུས་ལྟར་རོ། །ཡང་འདིའི་སྒོ་ནས་གྲིབ་སེལ་བྱ་བར་འདོད་ན། སྲོད་ཀྱི་དུས་ལ་བབས་པའི་ཚེ། ཁྲུས་ཆོག་དང་འབྲེལ་བར་བྱེད་ན་གོང་དུ་བཤད་པ་བཞིན་བུམ་པ་དང་མཆོད་གཏོར་སོགས་བཤམ། གང་ལྟར་ཡང་ཉེ་ལོགས་ཅི་རིགས་པར། ནད་པའི་ཟན་ལྷག་ལ་དྲི་མ་བསྲེས་ཤིང་ཁ་སྣའི་དབུགས་ཀྱིས་བདུག་པར་གླུད་ལྔ་བཅོས་ཏེ། ལྕགས་དང་མཁར་བ་མ་ཡིན་པའི་སྣོད་དུ་བཞག །གླུད་རེ་རེ་ལ་ཐེབ་ཀྱུ་དང་། ཆངས་བུ་གསུམ་རེ། རིལ་བུ་ཉེར་གཅིག་རེ་བླུགས་ནད་པའི་ཁ་གདོང་བཤལ་བའི་ཆུ་ཐིགས་ཉེར་གཅིག་གིས་བྲན། སྐྱེས་པ་ཡིན་ན་ཐུ་བ་གཡས་དང་། བུད་མེད་ཡིན་ན་ཐུ་བ་གཡོན་པའི་དུམ་བུས་བརྒྱན་ཏེ་བཞག་གོ །དེ་ནས་སློབ་དཔོན་གྱིས་བདག་བསྐྱེད་དང་། བུམ་པ་བསྒྲུབ་པ་གོང་བཞིན་གྲུབ་རྗེས། ནད་པའི་མདུན་དུ་གདན་ནག་པོའི་ཁར་གླུད་རྣམས་དབུས་དང་ཕྱོགས་བཞིར་ནད་པ་ལ་ཁ་ཕྱོགས་ཏེ་བཀོད་ལ། ཁྲུས་ཆོག་དང་འབྲེལ་བའི་ཚེ། འོ། ཁྱེད་རང་རྣམས་ཀྱི་སོགས་ཁྲུས་ཆོག་ལྟར་ལ། སྨེ་བ་བརྩེགས་མའི་གྲིབ་སེལ་གྱི་ཆོ་ག་ཟབ་མོའི་སྒོ་ནས་རྗེས་སུ་འཛིན་པ་ལའང་། སྦྱོར་དངོས་རྗེས་གསུམ་ལས། སྦྱོར་བའི་རིམ་པ་ལ། ཐོག་མར་བཀྲུ་བའི་སླད་དུ་སོགས་དཀྱུས་ལྟར། བྱབས་པའི་སླད་དུ་སོགས་ནས། ཕྱིར་དོར་བ་གྲིབ་གླུད་རྣམས་ལ་ཐིམ་པའི་མོས་པ་མཛོད། བྱབས་སྔགས་བརྗོད། ཁྲུས་ཁུ་གླུད་རྣམས་ཀྱི་ནང་དུ་བླུགས། དེ་ནས་གྲིབ་སེལ་གྱི་དངོས་གཞི་གྲིབ་བདག་མ་མོ་མཁའ་འགྲོ་རྣམས་ལ་གླུད་དང་གཏོར་མ་སྦྱིན་པའི་སྒོ་ནས་ཕྱིར་བསྐྲད་པའི་མོས་པ་མཛོད། ཅེས་བརྡ་སྦྱར་ལ་གླུད་གཏོར་རྣམས་ལ་ཆབ་ཀྱིས་བྲན་ཏེ། སྔགས་དྲུག་ཕྱག་དྲུག་གིས་བྱིན་གྱིས་བརླབ་པ་ནི། ཐལ་མོ་ཁོང་སྟོང་སྙིང་གར་སྦྱར་བ་ཆོས་ཉིད་རྣམ་དག་གི་རྒྱས། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅་ཧཾ། ཞེས་ལན་གསུམ་བརྗོད་པས། རྫས་རྣམས་རང་བཞིན་གྱིས་དག་པའི་སྟོང་པ་ཉིད་དུ་གྱུར། ཐལ་མོ་ཁོང་སྟོང་སོར་རྩེ་སྤྲད་པ་ཚིགས་ཟུར་བཅག་ནས་སྨིན་མཚམས་སུ་བཞག་པ་ནམ་མཁའ་མཛོད་ཀྱི་རྒྱས། ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿ སརྦ་ཐཱ་ཁཾ་ཨུངྒ་ཏེ་སྥར་ཎ་ཨི་མཾ་ག་ག་ན་ཁཾ་སྭཱ་ཧཱ། འདོད་པའི་ཡོན་ཏན་ལྔ་ཟད་མི་ཤེས་པས་ནམ་མཁའ་གང་བར་གྱུར། ཐལ་མོ་སྦྱར་བ་ཕྱིར་བསྐྱེད་མཐེ་བོང་གཉིས་བསྣོལ་ཏེ་ཁའི་ཐད་ཀར་འཇོག་པ་བདུད་རྩི་ཐལ་སྦྱོར་གྱི་རྒྱས། ཨོཾ་བཛྲ་ཨམྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ། ཡོ་བྱད་ཐམས་ཅད་བདུད་རྩིའི་རྒྱ་མཚོར་གྱུར། གཡས་རྡོ་རྗེ་ཁུ་ཚུར་བཅངས་པའི་མཛུབ་མོ་བསྒྲེང་། གཡོན་ས་གནོན་བྱ་བ་རྒྱ་ཆེན་ཤུགས་ལྡན་གྱི་རྒྱས། ཨོཾ་ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སཾ་བྷ་ར་སཾ་བྷ་ར་ཧཱུྃ། ཡོ་བྱད་ཐམས་ཅད་སོ་སོའི་བསམ་པ་དང་མཐུན་པར་གྱུར། གཡས་རྡོ་རྗེ་ཁུ་ཚུར་སྙིང་གར་བཅང་། གཡོན་མཆོག་སྦྱིན་གྱིས་སྣོད་འདེགས་ཚུལ་ཡེ་ཤེས་སྐར་མདའི་རྒྱས། ཨོཾ་ཛྙཱ་ན་ཨ་ཝ་ལོ་ཀི་ཏེ་ན་མཿས་མནྟ་སྥར་ཎ་རསྨི་བྷ་ཝ་ས་མ་ཡ་མ་ཧཱ་མ་ཎི་དུ་རུ་དུ་རུ་ཧྲི་ད་ཡ་ཛྭ་ལ་ནི་ཧཱུྃ། ཡོ་བྱད་ལ་མགྲོན་རྣམས་འཐབ་རྩོད་མེད་པར་ལོངས་སྤྱོད་པར་གྱུར། ལག་གཉིས་སོར་མོ་ནང་དུ་བསྣོལ་བའི་མཁྲིག་མ་སྦྱར་མཐེ་བོང་གཉིས་གཤིབས་ཏེ་བསྒྲེངས་པ་སྤྱི་བོར་འཇོག་པ་དབང་སྒྱུར་འཁོར་ལོའི་རྒྱས། ན་མཿས་མནྟ་བུདྡྷཱ་ནཱཾ་གྲ་ཧེ་ཤྭ་རི་པྲ་བྷཉྫ་ཏི་མ་ཧཱ་ས་མ་ཡ་སྭཱ་ཧཱ། མགྲོན་རྣམས་ཐམས་ཅད་བདག་གི་དབང་དུ་འདུས་པར་གྱུར་པར་བསམ་ཞིང་སྔགས་རྣམས་ལན་གསུམ་བརྗོད་ཅིང་ཕྱག་རྒྱ་འགྲོལ་བ་ན་སེ་གོལ་བྱའོ། །ན་མོ། བདག་གི་བསམ་པའི་སྟོབས་དང་ནི། །དེ་བཞིན་གཤེགས་པའི་སྦྱིན་སྟོབས་དང་། །ཆོས་ཀྱི་དབྱིངས་ཀྱི་སྟོབས་རྣམས་ཀྱིས། །དོན་རྣམས་གང་དག་བསམས་པ་ཀུན། །དེ་དག་ཐམས་ཅད་ཅི་རིགས་པ། །ཐོགས་པ་མེད་པར་འབྱུང་གྱུར་ཅིག །ཅེས་བདེན་པའི་སྟོབས་བརྗོད། རྡོ་རྗེ་དྲིལ་བུ་འཛིན་པས་ཧཱུྃ་མཛད་ཀྱི་ཕྱག་རྒྱ་དང་བཅས་ཏིང་ངེ་འཛིན་གྱི་ང་རྒྱལ་བརྟན་པོས། རྗེ་བཙུན་རྩ་བ་དང་སོགས་ནས། བདེན་པ་ཆེན་པོའི་བྱིན་གྱི་རླབས་ཀྱིས་དེང་འདིར་རྡོ་རྗེ་སློབ་མའམ། སྦྱིན་པའི་བདག་པོ་འདི་ཉིད་ཀྱི་ལུས་ངག་ཡིད་གསུམ་ལ་བར་དུ་གཅོད་པར་རྩོམ་པའི་གྲིབ་བདག་མ་མོ་མཁའ་འགྲོའི་རིགས་སུ་གྱུར་པ་ཐམས་ཅད་ཞི་བའི་སེམས་དང་ལྡན་པས་གླུད་གཏོར་ལེན་པའི་སླད་དུ་འདིར་མཆིས་པར་གྱུར་ཅིག །ཊཱ་ཀི་ཧཱུྃ་ཛཿ ཛཿཧཱུྃ་བྃ་ཧོཿ ལན་གསུམ་གྱིས་བཀུག་པས་མགྲོན་རྣམས་མདུན་དུ་འཁོད་པར་བསམས་ལ། གླུད་གཏོར་བསྔོ་བ་ནི། ཧཱུྃ། ཤར་གྱི་ཕྱོགས་ནས་གྲིབ་སེལ་མ། སྐུ་མདོག་མུན་ལྟར་ནག་མོ་ལ། །དར་ནག་གོ་ཟུ་ཞ་ལ་ལ། །ཆིབས་སུ་གྲིབ་རྟ་ནག་པོ་ཆིབས། །རོལ་དུ་གྲིབ་ཁྱི་ནག་པོ་ཁྲིད། །ཀླད་ལ་གྲིབ་བྱ་ནག་པོ་ལྡིང་། །ཕྱག་ན་གྲིབ་མདུང་ནག་པོ་བསྣམས། །དབུ་ལ་གྲིབ་ཐོད་ནག་པོ་བཅིངས། །གྲིབ་ལེན་མང་པོའི་འཁོར་དང་བཅས། །དོ་ནུབ་གྲིབ་འདི་ལེན་པར་མཛོད། །དོ་ནུབ་ནད་འདི་ལེན་པར་མཛོད། །དོ་ནུབ་རིམས་འདི་ལེན་པར་མཛོད། །དོ་ནུབ་ཡམས་འདི་ལེན་པར་མཛོད། །གྲིབ་བདག་ཆེན་མོ་གྲིབ་ལོངས་ཤིག །ནད་བདག་ཆེན་མོ་ནད་ལོངས་ཤིག །རིམ་བདག་ཆེན་མོ་རིམས་ལོངས་ཤིག །ཡམས་བདག་ཆེན་མོ་ཡམས་ལོངས་ཤིག །ཅེས་དང་། ལག་གཡས་མཆོག་སྦྱིན་གྱི་ཕྱག་རྒྱ་བཅས། ན་མསྶ་མནྟ་བུདྡྷཱ་ནཱཾ། ན་མསྶརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སཾ་བྷ་ར་སཾ་བྷ་ར་ཧཱུྃ། ཨོཾ་ཨེ་ཧོ་ཤུདྡྷེ་ཤུདྡྷེ། བཾ་ཧོ་ཤུདྡྷེ་ཤུདྡྷེ། རཾ་ཧོ་ཤུདྡྷེ་ཤུདྡྷེ། ཨེ་བཾ་རཾ་ཤུདྡྷེ་ཤུདྡྷེ། ཨ་ཨ་ཨ་སྭཱ་ཧཱ། ཞེས་རེ་རེའི་མཐར་སེ་གོལ་གཏོགས་པ་དང་བཅས་ལན་བདུན་གྱིས་བསྔོས་ནས། གྲིབ་རྫས་ལས་གྲུབ་པའི་གླུད་གཏོར་གྲིབ་བདག་རྣམས་གང་འདོད་པའི་ཡོན་ཏན་དང་ལྡན་པ་འདིས། ཤར་ཕྱོགས་ཀྱི་གྲིབ་བདག་མ་མོ་མཁའ་འགྲོ་ཐམས་ཅད་ཚིམས་ནས། བདག་ཅག་དཔོན་སློབ་ཡོན་མཆོད་འཁོར་དང་བཅས་པ་གྲིབ་ཀྱི་གནོད་པ་ལས་གྲོལ་བར་གྱུར་ཅིག །ཅེས་བདེན་སྟོབས་བརྗོད་ལ། ཤར་གྱི་གླུད་ཁ་ཕྱིར་བསྒྱུར། དེ་བཞིན་དུ། ཧཱུྃ། ལྷོ་ཡི་ཕྱོགས་ནས་གྲིབ་སེལ་མ། །སྐུ་མདོག་མུན་ལྟར་ནག་མོ་ལ། །སོགས་གོང་བཞིན་བདེན་སྟོབས་བརྗོད་པའི་བར་དང་། དེས་རིགས་འགྲེ་བས། ཧཱུྃ། ནུབ་ཀྱི་ཕྱོགས་ནས་སོགས་དང་། ཧཱུྃ། བྱང་གི་ཕྱོགས་ནས་སོགས་དང་། ཧཱུྃ། དབུས་ཀྱི་ཕྱོགས་ནས་སོགས་གོང་བཞིན་སྦྱར། དེ་ནས་གླུད་ཐམས་ཅད་སྣོད་གཅིག་ཏུ་བྱས་ལ། ཁ་ཕྱིར་བསྒྱུར། ཧཱུྃ། ད་ནི་གཤེགས་སོ་ཤ་ར་ར། །ད་ནི་བཞུད་དོ་སི་ལི་ལི། །འཁོར་བཅས་དགྱེས་པའི་གར་དང་བཅས། །རང་གི་གནས་དང་རྟེན་ལ་གཤེགས། །ཞེས་པས་ཕྱོགས་སོ་སོར་བསྐྱལ་བ་དང་ལྷན་ཅིག །རྗེ་བཙུན་རྩ་བ་དང་སོགས་ནས། གྲིབ་བདག་མ་མོ་མཁའ་འགྲོའི་རིགས་སུ་གྱུར་པ་ཐམས་ཅད་གླུད་གཏོར་རྒྱ་ཆེན་པོ་བྱིན་པ་འདིས་ཚིམས་པར་གྱིས་ལ་སོ་སོ་རང་རང་གི་གནས་སུ་བདེ་བར་དེངས་ཤིག །གང་དག་མི་འགྲོ་བ་དེ་དག་ལ་དེ་བཞིན་གཤེགས་པ་ཐམས་ཅད་ཀྱི་སོགས་དཀྱུས་ལྟར་སྦྱར་ལ། རྩ་སྔགས་དང་། སུམྦྷ་བཟླ་ཞིང་བསྐྲད། རོལ་མོ་བྱ། གུ་གུལ་གྱིས་བདུག །ཡུངས་ཀར་གྱིས་བྲབ། དེས་གྲིབ་སེལ་གྱི་དངོས་གཞི་གྲུབ་ནས། རྗེས་ཀྱི་རིམ་པ་ལ་བསྲུང་བར་བྱ་བའི་སླད་དུ་སོགས་དང་། དེ་ནས་བདེན་པའི་སྟོབས་བརྗོད་པའི་སླད་དུ་སོགས་དང་། སླར་ཡང་ཤིས་པར་བྱ་བའི་སླད་དུ་སོགས་སྦྱར་ལ་དཀྱུས་ལྟར་བྱའོ། །གྲིབ་སེལ་རྐྱང་པ་བྱེད་ན། བདག་བསྐྱེད་སྔོན་དུ་འགྲོ་བས། གླུད་གཏོར་བྱིན་གྱིས་བརླབ་པ་ནས། ཕྱིར་བསྐྲད་པའི་བར་གོང་བཞིན་ལ། སླར་ཡང་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་པས་ཕྱོགས་མཚམས་སྟེང་འོག་ཐམས་ཅད་རྡོ་རྗེའི་ས་གཞི་ར་བ་དྲྭ་བ་གུར་བླ་བྲེ་ཡེ་ཤེས་ཀྱི་མེ་འབར་བ་དང་བཅས་པའི་སྲུང་བའི་འཁོར་ལོ་ཅིས་ཀྱང་མི་ཆོད་མི་ཤིག་པར་གྱུར་པའི་མོས་པ་མཛོད། ཨོཾ་བཛྲ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ལན་གསུམ་གྱིས་བརྟན་པར་བྱ་ཞིང་། ཤིས་པ་བརྗོད། བསྡུ་ན། མགྲོན་སོ་སོར་སྔགས་ཀྱིས་བསྔོ་བ་དང་བདེན་བརྗོད་བཞག་ནས། ཚིགས་བཅད་རྣམས་རྐྱང་པས་གླུད་གཏོར་བསྔོས་པའི་མཐར། ཧཱུྃ། ད་ནི་གཤེགས་སོ་ཞེས་སོགས་སྦྱར་བས་ཀྱང་རུང་ངོ་། །འདི་ནི་གྲུབ་པའི་སློབ་དཔོན་ཆེན་པོ་ཨོ་རྒྱན་པ་རིན་ཆེན་དཔལ་ལ་མཁའ་འགྲོ་མ་འགྲོ་བ་བཟང་མོས་ཕུལ་པའི་མཁའ་འགྲོ་གྲིབ་སེལ་གྱི་གདམ་ངག་ཅེས་གྲུབ་མཐའ་ཀུན་ལ་ཡོངས་སུ་གྲགས་ཤིང་། བྱ་སླ་ཞིང་ཚེགས་ཆུང་ལ་མྱོང་བས་གྲུབ་པ་སྟེ། ཁྲོ་བོ་སྨེ་བརྩེགས་སོགས་ལའང་སྦྱར་དུ་རུང་ཞིང་། སྐབས་འགའ་ཞིག་ཏུ་རྗེས་གནང་དང་འབྲེལ་བར་བྱེད་ན། གྲིབ་སེལ་གྱི་སྦྱོར་དངོས་རྗེས་གསུམ་ཚང་བར་སྔོན་དུ་བཏང་ནས། རྗེས་གནང་དཀྱུས་བཞིན་དུ་བྱ་བ་ཕྱག་ལེན་ནོ། །གཞན་ཡང་ལས་ཕྲན་ཚེགས་ལ། འཕྲལ་དུ་གྲིབ་སེལ་གྱི་བུམ་སྒྲུབ་བསྡུས་པ་ནི། བདག་བསྐྱེད་སྔོན་དུ་འགྲོ་བས། བུམ་པའམ་སྣོད་གཙང་མར་སྲོག་ཆགས་མེད་པའི་ཆུ་གཙང་མ་ལ་བུམ་རྫས་ཡོད་དམ་མེད་ཀྱང་རུང་སྟེ། ཆུ་ཡི་སྟེང་དུ་ཟླ་བ་ལ་གནས་པའི་ཧཱུྃ་ཡིག་མཐིང་ནག་གི་མཐར་སྔགས་ཀྱི་ཕྲེང་བས་བསྐོར་བ། རང་གི་ཐུགས་ཀའི་ས་བོན་ལས་འོད་ཟེར་འཕྲོས། མདུན་གྱི་སྔགས་ཕྲེང་ལ་ཕོག །དེ་ལས་བདུད་རྩིའི་རྒྱུན་བབས་པས་སྣོད་གང་བར་བསམས་ལ། སྔགས་བརྒྱའམ་ཉེར་གཅིག་བཟླས་མཐར། སྔགས་ཕྲེང་གདན་དང་བཅས་པ་ཆུ་ལ་ཐིམ་པས་བདུད་རྩིའི་རང་བཞིན་དུ་གྱུར་པར་མོས་ནས། རང་གི་ཁོང་དུ་བཏང་བ་དང་ཁྲུས་བྱས་ན་གྲིབ་དང་མི་གཙང་བས་མི་ཚུགས་ཤིང་། ཟས་གོས་གནས་མལ་གྲིབ་ཅན་སོགས་ལའང་སྔགས་ཆུ་གཏོར་བས་ཐུབ་ངེས་སོ། །གཞན་རྗེས་སུ་འཛིན་ན། གོང་གི་བདུད་རྩིའི་རང་བཞིན་དུ་གྱུར། ཅེས་པའི་མཚམས། དེས་ཁྱེད་རང་རྣམས་ལ་ཁྲུས་བགྱིས་པ་ལ་བརྟེན་ནས་ནད་གདོན་སྡིག་སྒྲིབ་གྲིབ་དང་མི་གཙང་བ་ཐམས་ཅད་བྱང་ཞིང་དག་པའི་མོས་པ་མཛོད། ཅེས་བརྡ་སྦྱར་ལ། རྩ་སྔགས། ལས་སྔགས། སྤེལ་ཚིག་དང་བཅས་པས་བཀྲུ་ཞིང་ཤིས་པ་བརྗོད་དོ། །སྔགས་མཆིལ་གྱིས་གྲིབ་སེལ་བ་ནི། ཁ་ཟས་གྲིབ་ཅན་སོགས་ལ་ལོངས་སྤྱོད་དགོས་པ་བྱུང་ན། བདག་ཉིད་ལྷ་ཡི་ང་རྒྱལ་དང་ལྡན་པས། གྲིབ་ཅན་དེའི་སྟེང་དུ་རྃ་དམར་པོ་མེ་ཡི་རང་བཞིན་ཅན་གཅིག་བསམས་ལ། སྔགས་ཉེར་གཅིག་བཟླས་པའི་མཆིལ་མ་ཐུ་ཐུ་ཞེས་གཏོར་བས། རྃ་ལས་མེ་འབར་བས་ཉེས་སྐྱོན་ཐམས་ཅད་བསྲེག་པར་བསམས་ལ་ལོངས་སྤྱོད་དོ། །ཆུ་མིག་དང་། རྫིང་བུ་དང་། ཁྲོན་པ་དང་། ཆུ་ར་སོགས་ཀྱི་ནང་དུ། རྡོ་ལ་ཁྲོ་མོའི་སྐུ་དང་། རྒྱབ་ཏུ་རྩ་སྔགས། ལས་སྔགས། འདོད་གསོལ་དང་བཅས་པ་བརྐོས་པར་བསྐྱེད་བསྟིམ་བརྟན་བཞུགས་ཚུལ་བཞིན་དུ་བྱས་ན། ཆུ་དེ་ལ་ལོངས་སྤྱོད་པ་ཐམས་ཅད་ཀྱི་གྲིབ་སེལ་ལོ། །ནད་ཀྱི་རིགས་གང་ལའང་སྔགས་ཆུ་བླུད་པའམ། སྔགས་མཆིལ་བཏབ་པ་དང་། ཁྱད་པར་ཆུ་འགགས་ལ་མར་དང་། གླ་རྩི། མ་ཞུ་བ་དང་། སྤོས་པ་ལ་ལན་ཚྭ་བརྔོས་པ་དང་། ལོ་བརྒྱད་དྲི་ཆུ། རིམས་ལ་དྲི་ཆུ་བར་པ་རྣམས་ལ་སྔགས་བརྒྱ་རྩ་བཏབ་ནས་བཏང་བས་སེལ་ཞིང་། གྲིབ་ལས་བྱུང་བའི་ཤུ་ཐོར་དང་། སྐྲངས་འབུར་སོགས་ལའང་སྔགས་བཟླས་པའི་མཆིལ་མ་བུལ་ཏོག་དང་ས་ཚི་ཅན་ལ་བཏབ་ནས་བྱུགས་པས་ཕན་ནོ། །གདོན་གྱི་རིགས་དང་། སྨྱོ་འབོག་དང་། གྲིབ་གཟེར་སོགས་ལ། གུ་གུལ་ནག་པོ། ཤུ་དག་ནག་པོ། བོང་ང་ནག་པོ། ཡུངས་ཀར། ཤ་ཆེན་རྣམས་ལ་སྔགས་ནས་བདུག་པས་འཕྲལ་དུ་ཞི་བར་འགྱུར་ཞིང་། ཡང་ནད་གདོན་གྲིབ་རིགས་སྤྱི་ལ། གནས་ཆེན་ལྟ་བུར་སྐྱེས་པའི་ཤུག་པ། བལ་བུ། མཁན་དཀར་རྣམས་གཙོ་བོར་གྱུར་པའི་དྲི་ཞིམ་གྱི་སྨན་ཤིང་སྣ་ཚོགས་པ་ལོ་མ་རྒྱས་པའི་དུས་སུ་བཏུས་ལ་གྲིབ་སྐམ་བྱ། དེའི་སྟེང་དུ་སྔར་བཤད་པ་ལྟར་ཟླ་དཀྱིལ་སྔགས་ཕྲེང་སོགས་བཀོད་ནས་འོད་ཟེར་སྤྲོ་བསྡུ་དང་བཅས་བཟླས་པ་མང་དུ་བྱས་པའི་དུད་པས་བདུག་ན་ཤིན་ཏུ་ཕན་ཞིང་། ལུག་ནག་པོའི་སོག་པ་གཡས་པའི་བལ་སྐུད་ལ་རྡོ་རྗེའི་མདུད་པ་གསུམ་གྱིས་བཏབ་པ་སྐད་ཅིག་གིས་ལྷར་བསྐྱེད་ཅིང་། བཟླས་པའི་མཐར་མདུད་པ་ལ་བསྟིམས་ནས་མགུལ་དུ་བཏགས་ན་སྲུང་པའི་མཆོག་ཏུ་འགྱུར་རོ། །གྲིབ་རིགས་ཚབ་ཆེན་ལ་སྦྱོང་ཁྲུས་དང་གྲིབ་སེལ་ཡང་ཡང་བྱས་པའི་མཐར། ཤུག་པ་སོགས་སྨན་ཤིང་སྣ་ཚོགས་ཀྱི་མེ་ལ། མཁའ་འགྲོ་མ་སྨེ་བརྩེགས་སྐད་ཅིག་གིས་བསྐྱེད། ནད་པའི་སྐྲ་སེན་སོགས་དང་སྦྱར་བའི་ཏིལ་ནག་པོ་གྲིབ་དང་མི་གཙང་བའི་ངོ་བོར་མོས་ལ། བདུད་རྩིར་བྱིན་གྱིས་བརླབས་ཏེ་རྩ་སྔགས་ཀྱིས་ལན་བརྒྱ་རྩ་སོགས་འབུལ། མཐར་ཡི་དམ་གྱི་ལྷ་མེ་འབར་བའི་རྣམ་པར་གྱུར་པ་ལ་བསྒྲུབ་བྱས་ལན་བདུན་འགོང་པས་གྲིབ་དང་མི་གཙང་བ་ཐམས་ཅད་ལྷག་མེད་དུ་ཚིག་པར་བསམ། གྲིབ་སྲུང་གི་འཁོར་ལོ་རྒྱས་པར་གཞན་ནས་འབྱུང་བ་ལྟར་རམ། བསྡུ་ན། ཤོག་བུ་ལ་ཙཀྲ་མུ་ཁྱུད་ལྔ་པའི་ལྟེ་བར་ཧཱུྃ། མུ་ཁྱུད་དང་པོ་ལ་རྩ་སྔགས་དང་། གཉིས་པར་ལས་སྔགས། གསུམ་པར་ཨཱ་ལི། བཞི་པར་ཀཱ་ལི། ལྔ་པར་རྟེན་འབྲེལ་སྙིང་པོ་རྣམས་ཀྱི་མཐར། འཆང་བ་པོ་ལ་གྲིབ་དང་མི་གཙང་བ་ཐམས་ཅད་རཀྵ་རཀྵཿ ཞེས་སྦྱར་བ་བྲིས་པའི་ཕྱི་རོལ་ཏུ་མེ་རིས་བསྐོར། རབ་གནས་སྤྱི་ལྟར་བྱས་ལ། ཤེལ་ཟུར་མ་ཉམས་པ། བྱ་རྒོད་ཀྱི་སྡེར་མོ། གྲུམ་པའི་སྤུ་དང་བཅས་པ་རྣམས་བཅུག་ལ་ཚོན་སྐུད་སྣ་ལྔས་བཅིང་། དར་དམར་པོས་དྲིལ་ཏེ་མགུལ་དུ་དྲོད་དང་མ་བྲལ་བར་བཅང་ངོ་། །དེ་ཡང་སྤྱིར་སྙིགས་མའི་དུས་འདིར་གྲིབ་ཀྱི་རིགས་ཐ་དད་པ་མང་པོ་དང་། ལྷག་པར་མ་མོ་མཁའ་འགྲོ་ཁྲོས་པའི་གྲིབ་ཡམས་ཐབས་སུ་འགོ་བའི་རིམས་དང་། དམ་ཚིག་ཉམས་པའི་གྲིབ་ཀྱིས་འདི་ཕྱིའི་བདེ་ལེགས་ཐམས་ཅད་འགྲིབ་པ་སོགས་ཀྱི་གཉེན་པོར་གྲིབ་སེལ་གྱི་རིགས་མཐའ་ཀླས་པ་ཞིག་གསུངས་པའི་ནང་ནས། ཁྲོ་མོ་སྨེ་བརྩེགས་འདི་ཉིད་གསར་རྙིང་གི་གདམས་པ་ཟུང་དུ་འབྲེལ་ཞིང་། བྱ་སླ་ཚེགས་ཆུང་ཕན་ཡོན་ཆེ་བར་མྱོང་བས་གྲུབ་པའི་ཕྱིར། རང་གཞན་ཀུན་ལ་སྨན་པའི་བསམ་པ་བཟང་པོས་ཀུན་ནས་བསླངས་ཏེ། ཉེར་མཁོའི་གདམ་ངག་འགའ་ཞིག་ཕྱོགས་གཅིག་ཏུ་བསྡེབས་པ་འདི་ཡང་། རིག་འཛིན་གྱི་བཙུན་པ་མཉྫུ་གྷོ་ཥས་སྦྱར་བའི་དགེ་བས་འགྲོ་ཀུན་མི་མཐུན་པའི་རྒུད་པ་ཐམས་ཅད་ཉེ་བར་ཞི་བའི་རྒྱུར་གྱུར་ཅིག ། ༈

[edit]

mkha' 'gro ma sme ba brtsegs ma'i sgrub thabs phrin las kyi cho ga dang bcas pa snying por dril ba bdud rtsi'i bum bzang / @#/_/mkha' 'gro ma sme ba brtsegs ma'i sgrub thabs phrin las kyi cho ga dang bcas pa snying por dril ba bdud rtsi'i bum bzang zhes bya ba bzhugs so/__/na mo gu ru b+h+yaH__'dir gru spang rtse ba rdo rje seng ge la/__mkha' 'gro ma seng ge'i gdong can gyis gnang ba'i khro mo sme brtsegs kyi sgom bzlas nyams su blang bar 'dod pas/__skyabs 'gro sems bskyed tshad med bzhi bsgom pa sngon du song nas/__/rang skad cig gis mkha' 'gro ma sme ba brtsegs ma sku mdog sol ba ltar nag pa/__skyon cis kyang 'gos su mi btub pa/__phyag gnyis thugs kar bsnol ba'i phyag rgyas dag byed kyi bum pa chus bkang ba bsnams pa/__nyams grib dang mi gtsang ba thams cad 'khrud par mdzad pa/__gcer bu rgyan spangs shing pad nyi'i gdan la zhabs gnyis mnyam pa'i stabs kyis bzhengs pa'i sku can du gyur par dmigs la/__oM kha rbaM dzi rbaM bi ma la se u tsuSh+ma kro d+hI hU~M phaT/__ces brgya rtsa la sogs pa ji ltar rigs pa bzlas pa'i mthar/__bcom ldan 'das ma khro mo'i rgyal mo sme ba brtsegs mas bdag dang sems can thams cad kyi nad gdon sdig sgrib nyams grib dang mi gtsang ba thams cad zhi ba dang /__myur du khro mo'i rgyal mo sme ba brtsegs ma'i go 'phang thob par byin gyis brlab tu gsol/__/ces 'dod pa'i don la gsol ba gdab/__mi gtsang ba'i nyes pa gang gis kyang mi gos pa'i nges shes brtan po bya/__gal te mdze pho dang /__yugs sa dang /__mi gdong so ma dang /__dam nyams dang /__tshul khrims 'chal ba dang /__dme can dang /__'khon can la sogs pa dang 'grogs dgos pa byung na/__skad cig gis lhar bsams la bzlas brjod shub bur bya ba'am/__ma grub na'ang khro mo'i bskyed rim gyi nga rgyal brtan par byas pas/__nyes pas mi gos pa ni myong bas grub pa yin no/__/bum chog byed na/__stegs kyi khar pad+ma 'dab ma brgyad pa'i dbus su bum pa bcud ldan kha rgyan mgul chings dung chos gzungs rdor dang bcas pa'i mdun du zlum gtor dkar po dang /__chu gnyis sngon 'gro'i nyer spyod bcas bsham/__mchod rdzas rnams/__oM amr-i ta hU~M phaT kyis bsang swa b+hA was sbyang /__stong pa'i ngang las oM las byung ba'i rin po che las grub pa'i snod yangs shing rgya che ba rnams kyi nang du oM 'od du zhu ba las byung ba'i lha rdzas las grub pa'i mchod yon/__zhabs bsil/__me tog__/bdug spos/__mar me/__dri mchog__/zhal zas/__rol mo rnams dwangs shing thogs pa med pa nam mkha'i mtha' klas par gyur/__oM badz+ra ar+g+haM AHhU~M nas shap+da'i bar dang /__d+harmA ra Ni ta lan gsum gyis byin dbab/__skyabs 'gro nas bdag bskyed bzlas pa 'dod gsol yan gong ltar mthar/__mdun gyi bum pa/__amr-i tas bsang /__swa b+hA was sbyang /__stong pa'i ngang las pa~M las pad+ma dang a las zla ba'i dkyil 'khor gyi steng du b+h+rU~M las rin po che'i bum pa yangs shing rgya che ba/__lto ba ldir ba/__zhabs zhum pa/__mgrin pa phra ba/__kha g.yel ba/__mchu 'phyang ba/__lha rdzas kyi gos kyis mgul pa bcings shing /__dpag bsam gyi shing gis kha brgyan pa/__nang chu dang bcud sna tshogs kyis yongs su gang ba'i nang du skad cig gis mkha' 'gro ma sme ba brtsegs ma nas/__sku can du gyur par bdag bskyed ltar gsal btab la/__oM u tsuSh+ma kro d+hI ar+g+haM pra tIts+tsha swA hA nas shap+da'i bar dang /__d+ha rmA ra Ni tas mchod/__rdo rje dril bu 'dzin pas/__gang gi mtshan tsam dran pas kyang /__/mi mthun dri ma kun sel zhing /__/gtsang dag bde la 'god mdzad pa/__/mkha' 'gro'i dbang mo la phyag 'tshal/__/zhes pas bstod/__gtor ma bsang sbyang /__stong pa'i ngang las rin po che las grub pa'i snod yangs shing rgya che ba'i nang du gtor ma kha dog dri ro nus pa phun sum tshogs pa bdud rtsi'i rgya mtsho chen por gyur/__oM AHhU~M lan gsum/__sngags kyi mthar/__a kA ro btags pa gsum mam bdun gyis phul/__gong bzhin mchod cing bstod/__bcom ldan 'das ma khro mo'i rgyal mo sme ba brtsegs mas sogs/__bdag bskyed kyi mjug gi 'dod gsol sbyar/__gzungs thag la bzung ste/__rang gi snying ga nas sngags kyi phreng ba gzungs thag la zhon te bum pa'i nang du song /__bum nang gi lha yi thugs kar phog__/de'i sku las bdud rtsi'i rgyun byung bas bum pa gang bar gyur par bsams la/__bzlas pa ci nus dang /__mthar/__oM e ho shud+d+he shud+d+he/__baM ho shud+d+he shud+d+he/__raM ho shud+d+he shud+d+he/__e baM raM shud+d+he shud+d+he/__a a a swA hA/__zhes pa'ang cung zad bzlas mchod bstod 'dod gsol gong ltar dang /__yig brgya lan gsum/__ma 'byor pa dang sogs kyis nongs pa bzod par gsol/__oM AHhU~M/__mchod yon phul ba'i rkyen gyis bum nang gi lha 'od du zhu ba las byung ba'i bum pa'i chu bdud rtsir gyur/__ces brjod cing gzungs thag bsdu/__khrus chu rang nyid kyis btung ba dang gnas khang la gtor bas nyams grib mi gtsang ba thams cad sel ba'i mchog tu gsungs shing /__gzhan bkru byabs srung gsum gyis rjes su 'dzin par 'dod na/__bsgrub bya mdun du 'khod par/__sbyong chas rnams phyag len bzhin bshams la gtor ma chab kyis bran te/__slob dpon gyis/__'o khyed rang rnams kyi 'gal rkyen nad gdon grib dang mi gtsang ba thams cad zhi zhing bsrung bar bya ba dang /__mthun rkyen shis pa'i legs tshogs thams cad gong nas gong du 'phel zhing rgyas par bya ba'i slad du khro mo'i rgyal mo sme ba brtsegs ma'i khrus kyi cho ga'i sgo nas rjes su 'dzin pa la'ang /__gdon bgegs la gtor ma sbyin pa'i sgo nas sbyong ba sogs bya ba dang /__bgegs zhi ba'i phyir bkru byabs srung gsum dang /__bden pa'i stobs brjod pa dang /__shis par bya ba rnams su yod pa las/__thog mar gdon bgegs la gtor ma sbyin pa'i sgo nas sbyong ba byas pa'i mos pa mdzod/__las kyi rdo rjes bsgrub bya la gtor ma g.yas phyogs su bskor zhing /__rang gi lag pa g.yas mchog sbyin gyi phyag rgya dang /__oM sarba big+h+nAn na maHsarba ta thA kha ta zhes sogs brjod de se gol gyi sgra bya/__de lta bu lan gsum byas la zhi bas sbyang /__de bzhin du ting lo dang changs bu bskor ba dang bstun la rdo rje gsor zhing rtsa sngags dang sum+b+ha lan gsum gyi mthar/__'dir rdo rje slob ma'am sbyin pa'i bdag po che ge mo zhes bgyi ba la bar du gcod par rtsom pa'i gdon bgegs kyi rigs gang yin pa de dag thams cad gtor ma lam brngan/__ting lo lam sgron/__changs bu lam brgyags kyi tshul du khyer la sa'i phyogs 'dir ma gnas par gzhan du song zhig_/ces zhi drag phyed mas sbyang /__spro na khro bo spyan 'dren gdan 'bul mchod bstod rnams byas pa'i mthar/__hU~M mdzad kyi phyag rgya byas la/__rje btsun rtsa ba dang brgyud par bcas pa'i dpal ldan bla ma dam pa rnams kyi bka' bden pa dang /__sangs rgyas kyi bka' bden pa dang /__chos kyi bka' bden pa dang /__dge 'dun gyi bka' bden pa dang /__gsang sngags dang rig sngags kyi rgyal po khro bo khro mo rnams kyi bka' bden pa dang /__bcom ldan 'das ma khro mo'i rgyal mo sme ba brtsegs ma'i bka' bden pa dang /__bden pa chen po'i byin rlabs kyis/__deng 'dir rdo rje slob ma'am sbyin pa'i bdag po che ge mo zhes bgyi ba la bar du gcod par rtsom pa'i gdon bgegs log par 'dren pa'i tshogs thams cad la rgyud sde dang mthun pa'i sbyong ba rnam par dag pa byas zin pa des mgu par gyis la/__sa'i phyogs 'dir ma gnas par gzhan du song zhig__/gang dag mi 'gro ba de dag la de bzhin gshegs pa thams cad kyi thugs gnyis su med pa'i ye shes las byung ba'i khro bo'i rdo rje 'bar zhing rab tu 'bar ba 'dis khyed rnams kyi mgo bo tshal pa brgyar 'gas par 'gyur ro/__/zhes dang lha'i nga rgyal brtan pos rtsa sngags dang /__sum+b+ha bzla zhing rol mo drag tu bya/__gu gul gyis bdug__/yungs kar gyis brabs la gong du khro bo spyan 'dren byas na slar yang /__'jigs pa'i hU~M sgra nges sgrogs shing sogs kyi mthar/__rje btsun rtsa ba dang zhes sogs sbyar ba lan gnyis te drag po'i sbyong ba lan gsum bya/__gnyis pa bgegs zhi ba'i phyir bkru byabs srung gsum las/__thog mar bkru ba'i slad du slob dpon gyis bum pa ye shes kyi bdud rtsis gang bar thogs te khyed rang rnams la khrus bgyis pa la brten nas tshe 'khor ba thog ma med pa nas bsags pa'i sdig pa dang sgrib pa nad gdon grib dang mi gtsang ba thams cad byang zhing dag pa'i mos pa mdzod/__ces brda sbyar la/__ji ltar bltams pa sogs dang /__'di ni khrus mchog sogs kyi mthar/__rtsa sngags dang /__sarba pA be b+h+yaHshAn+ti ku ru swA hA/__de bzhin du sbyar te/__sarba big+h+nAn=__sarba ro ge/__sarba duSh+tAn=__sarba gra he=__sarba dz+wA ra=__sarba byA d+hi=__sarba u pa dra be=__sarba a kA la mr-i t+yu=__sarba duR+sa p+ni=__sarba durni mit+te=__sarba tsit+ta ku le b+h+yaHshIn+ti ku ru swA hA/__zhes brjod cing bkru'o/__/khar chu cung zad 'dzin du bcug la/__de nas byabs pa'i slad du rma bya'i mdongs kyi thig le'i dbus su nyi ma la gnas pa'i hU~M yig mthing nag gi mthar sngags phreng dang bcas pa gsal btab nas/__slob dpon gyis rdo rje dang bcas pa'i sgros bskor zhing byabs pa dang /__sngags phreng las 'phros pa'i 'od zer gyis bkrus pas ma dag pa'i nad gdon sdig sgrib grib dang mi gtsang ba thams cad lhag ma med par rdo khab len gyis lcags phye len pa ltar tsen gyis blangs te phyir dor ba'i mos pa mdzod/__rtsa sngags mthar/__sarba pA pe b+h+yaHa pa na ye swA hA/__de bzhin du gzhan rnams la'ang sbyar te byabs la/__kha yi chu phyir 'don/__slar yang bsrung bar bya ba'i slad du/__khyed rang rnams kyi spyi bo la sogs pa'i gnas rnams su slob dpon gyis rdo rjes reg pas/__rdo rje de las de 'dra ba'i rigs can bsam gyis mi khyab pa byung ste lus la rdo rje'i go khrab bzhu lugs su gyon nas phyin chad nad gdon nyer 'tshe gang gis kyang mi tshugs pa bsrung bar byas pa yin snyam du thugs mos mdzod/__/ces slob ma'i spyi bo dang /__mdun rgyab gnyis/__dpung pa gnyis/__pus mo gnyis te gnas bdun du rdo rjes rgya gram du reg la sngags dang /__sarba pA be b+h+yaHrak+Sha rak+Sha/__zhes sogs sbyar la bsrung /__gsum pa bden pa'i stobs brjod pa'i slad du/__khyed rang rnams kyi spyi bor rdo rje bzhag ste byin gyis brlab pa'i mos pa mdzod/__/sngag kyi mthar/__rgyal ba sras bcas bden pa'i byin rlabs dang /__/khro rgyal sme ba brtsegs ma'i nus mthu yis/__/'gro ba 'di dag bdag gis bsrungs zin gyis/__/'di la sus kyang gnod par ma byed cig__/bzhi pa shis par bya ba'i slad du/__mdun gyi nam mkhar khro mo'i rgyal mo sme ba brtsegs ma la/__gzhan yang phyogs bcu'i sangs rgyas dang byang chub sems dpa'i tshogs bsam gyis mi khyab pas bskor bar gsal btab nas/__slob dpon dang lhan cig tu me tog gi char 'bebs shing bkra shis pa'i tshigs su bcad pas kyang mnga' gsol ba'i thugs mos mdzod/__che ba'i che mchog sogs shis brjod ji ltar rigs par bya'o/__/rjes gnang byed na/__stegs kyi dbus su maN+Dal tshom bu gcig pa dang /__zlum gtor/__chu gnyis sngon 'gro'i nyer spyod rnams bsham/__mchod pa byin rlabs nas bdag bskyed bzlas pa 'dod gsol yan sngar ltar las/__tshom bu bsang sbyang /__stong pa'i ngang las skad cig gis mkha' 'gro ma sme ba brtsegs ma nas/__sku can du gyur par bdag bskyed bzhin gsal btab/__mchod bstod gtor 'bul 'dod gsol rnams bum chog bzhin dang /__mdun bskyed brten byed kyi bzlas pa cung zad bya/__de nas slob ma rnams khrus byas gral du 'khod par/__me tog bkye bsdu grub rjes/__sems bskyed gsal gdab sogs spyi 'gre dang /__mtshams sbyor gyi khyad par/__'dir gru spang rtse ba rdo rje seng ge la/__ye shes kyi mkha' 'gro seng ge'i gdong pa can gyis dngos su gnang ba'i khro mo'i rgyal mo sme ba brtsegs ma'i rjes su gnang ba zab mo sgrub pa la/__slob dpon gyi bya ba rnams grub nas sogs sgres la maN+Dal 'bul/__dus gsum sangs rgyas thams cad dang /__/sogs kyis gsol ba gdab/__dkon mchog gsum la bdag skyabs mchi/__/sogs rgyun bshags bya/__gzhi dgod la ye shes pa spyan drangs nas bstim/__rjes su bzlas pa'i lung gi skabs/__slob dpon gyi thugs kar nyi ma'i dkyil 'khor gyi mthar sngags kyi phreng bas bskor ba las/__sngags phreng gnyis pa chad nas slob ma'i zhal du zhugs par bsam pa tsam ma gtogs/__gzhan dam bca' ba'i lung /__byin gyis brlab pa'i lung rnams sgrub thabs brgya rtsa ltar bya/__dam tshig khas blang /__gtang rag gi maN+Dal/__lus longs spyod 'bul ba/__dge ba bsngo ba rnams byas la slob ma rang gnas su btang /__slob dpon gyis mchod pa bsang sbyang byin gyis brlab/__mchod bstod/__gsol ba gdab/__lhag chad kha bskang /__bzod par gsol/__ye shes pa gshegs/__dam tshig pa rang la bsdu/__gnas gsum bsrung /__dge ba bsngo zhing shis pa brjod pa rnams spyi ltar bya'o/__/rjes gnang dang 'brel bar khrus chog byed na/__mdun bskyed kyi mchod bstod tshar ba'i rjes su/__gong du bshad pa'i bum chog byas la/__rjes gnang gi byin gyis brlab pa'i lung yan chad grub rjes des rjes gnang gi dngos gzhi legs par grub nas/__mtha' rten du gdon bgegs la gtor ma sbyin pa'i sgo nas sbyong ba sogs bya ba dang /__zhes sogs dkyus ltar brjod par bya/__des rjes gnang gi dngos gzhi mtha' rten dang bcas pa legs par grub nas/__gnas skabs de dag tu sogs dkyus ltar ro/__/yang 'di'i sgo nas grib sel bya bar 'dod na/__srod kyi dus la babs pa'i tshe/__khrus chog dang 'brel bar byed na gong du bshad pa bzhin bum pa dang mchod gtor sogs bsham/__gang ltar yang nye logs ci rigs par/__nad pa'i zan lhag la dri ma bsres shing kha sna'i dbugs kyis bdug par glud lnga bcos te/__lcags dang mkhar ba ma yin pa'i snod du bzhag__/glud re re la theb kyu dang /__changs bu gsum re/__ril bu nyer gcig re blugs nad pa'i kha gdong bshal ba'i chu thigs nyer gcig gis bran/__skyes pa yin na thu ba g.yas dang /__bud med yin na thu ba g.yon pa'i dum bus brgyan te bzhag go__/de nas slob dpon gyis bdag bskyed dang /__bum pa bsgrub pa gong bzhin grub rjes/__nad pa'i mdun du gdan nag po'i khar glud rnams dbus dang phyogs bzhir nad pa la kha phyogs te bkod la/__khrus chog dang 'brel ba'i tshe/__'o/__khyed rang rnams kyi sogs khrus chog ltar la/__sme ba brtsegs ma'i grib sel gyi cho ga zab mo'i sgo nas rjes su 'dzin pa la'ang /__sbyor dngos rjes gsum las/__sbyor ba'i rim pa la/__thog mar bkru ba'i slad du sogs dkyus ltar/__byabs pa'i slad du sogs nas/__phyir dor ba grib glud rnams la thim pa'i mos pa mdzod/__byabs sngags brjod/__khrus khu glud rnams kyi nang du blugs/__de nas grib sel gyi dngos gzhi grib bdag ma mo mkha' 'gro rnams la glud dang gtor ma sbyin pa'i sgo nas phyir bskrad pa'i mos pa mdzod/__ces brda sbyar la glud gtor rnams la chab kyis bran te/__sngags drug phyag drug gis byin gyis brlab pa ni/__thal mo khong stong snying gar sbyar ba chos nyid rnam dag gi rgyas/__oM swa b+hA wa shud+d+haHsarba d+harmAHswa b+hA wa shud+d+ho\u0f85 haM/__zhes lan gsum brjod pas/__rdzas rnams rang bzhin gyis dag pa'i stong pa nyid du gyur/__thal mo khong stong sor rtse sprad pa tshigs zur bcag nas smin mtshams su bzhag pa nam mkha' mdzod kyi rgyas/__na maHsarba ta thA ga te b+h+yo bi shwa mu khe b+h+yaH__sarba thA khaM ung+ga te s+phar Na i maM ga ga na khaM swA hA/__'dod pa'i yon tan lnga zad mi shes pas nam mkha' gang bar gyur/__thal mo sbyar ba phyir bskyed mthe bong gnyis bsnol te kha'i thad kar 'jog pa bdud rtsi thal sbyor gyi rgyas/__oM badz+ra amr-i ta kuN+Da lI ha na ha na hU~M phaT/__yo byad thams cad bdud rtsi'i rgya mtshor gyur/__g.yas rdo rje khu tshur bcangs pa'i mdzub mo bsgreng /__g.yon sa gnon bya ba rgya chen shugs ldan gyi rgyas/__oM na maHsarba ta thA ga ta a wa lo ki te oM saM b+ha ra saM b+ha ra hU~M/__yo byad thams cad so so'i bsam pa dang mthun par gyur/__g.yas rdo rje khu tshur snying gar bcang /__g.yon mchog sbyin gyis snod 'degs tshul ye shes skar mda'i rgyas/__oM dz+nyA na a wa lo ki te na maHsa man+ta s+phar Na rasmi b+ha wa sa ma ya ma hA ma Ni du ru du ru hri da ya dz+wa la ni hU~M/__yo byad la mgron rnams 'thab rtsod med par longs spyod par gyur/__lag gnyis sor mo nang du bsnol ba'i mkhrig ma sbyar mthe bong gnyis gshibs te bsgrengs pa spyi bor 'jog pa dbang sgyur 'khor lo'i rgyas/__na maHsa man+ta bud+d+hA nAM gra he shwa ri pra b+hany+dza ti ma hA sa ma ya swA hA/__mgron rnams thams cad bdag gi dbang du 'dus par gyur par bsam zhing sngags rnams lan gsum brjod cing phyag rgya 'grol ba na se gol bya'o/__/na mo/__bdag gi bsam pa'i stobs dang ni/__/de bzhin gshegs pa'i sbyin stobs dang /__/chos kyi dbyings kyi stobs rnams kyis/__/don rnams gang dag bsams pa kun/__/de dag thams cad ci rigs pa/__/thogs pa med par 'byung gyur cig__/ces bden pa'i stobs brjod/__rdo rje dril bu 'dzin pas hU~M mdzad kyi phyag rgya dang bcas ting nge 'dzin gyi nga rgyal brtan pos/__rje btsun rtsa ba dang sogs nas/__bden pa chen po'i byin gyi rlabs kyis deng 'dir rdo rje slob ma'am/__sbyin pa'i bdag po 'di nyid kyi lus ngag yid gsum la bar du gcod par rtsom pa'i grib bdag ma mo mkha' 'gro'i rigs su gyur pa thams cad zhi ba'i sems dang ldan pas glud gtor len pa'i slad du 'dir mchis par gyur cig__/TA ki hU~M dzaH__dzaHhU~M ba~M hoH__lan gsum gyis bkug pas mgron rnams mdun du 'khod par bsams la/__glud gtor bsngo ba ni/__hU~M/__shar gyi phyogs nas grib sel ma/__sku mdog mun ltar nag mo la/__/dar nag go zu zha la la/__/chibs su grib rta nag po chibs/__/rol du grib khyi nag po khrid/__/klad la grib bya nag po lding /__/phyag na grib mdung nag po bsnams/__/dbu la grib thod nag po bcings/__/grib len mang po'i 'khor dang bcas/__/do nub grib 'di len par mdzod/__/do nub nad 'di len par mdzod/__/do nub rims 'di len par mdzod/__/do nub yams 'di len par mdzod/__/grib bdag chen mo grib longs shig__/nad bdag chen mo nad longs shig__/rim bdag chen mo rims longs shig__/yams bdag chen mo yams longs shig__/ces dang /__lag g.yas mchog sbyin gyi phyag rgya bcas/__na mas+sa man+ta bud+d+hA nAM/__na mas+sarba ta thA ga ta a wa lo ki te oM saM b+ha ra saM b+ha ra hU~M/__oM e ho shud+d+he shud+d+he/__baM ho shud+d+he shud+d+he/__raM ho shud+d+he shud+d+he/__e baM raM shud+d+he shud+d+he/__a a a swA hA/__zhes re re'i mthar se gol gtogs pa dang bcas lan bdun gyis bsngos nas/__grib rdzas las grub pa'i glud gtor grib bdag rnams gang 'dod pa'i yon tan dang ldan pa 'dis/__shar phyogs kyi grib bdag ma mo mkha' 'gro thams cad tshims nas/__bdag cag dpon slob yon mchod 'khor dang bcas pa grib kyi gnod pa las grol bar gyur cig__/ces bden stobs brjod la/__shar gyi glud kha phyir bsgyur/__de bzhin du/__hU~M/__lho yi phyogs nas grib sel ma/__/sku mdog mun ltar nag mo la/__/sogs gong bzhin bden stobs brjod pa'i bar dang /__des rigs 'gre bas/__hU~M/__nub kyi phyogs nas sogs dang /__hU~M/__byang gi phyogs nas sogs dang /__hU~M/__dbus kyi phyogs nas sogs gong bzhin sbyar/__de nas glud thams cad snod gcig tu byas la/__kha phyir bsgyur/__hU~M/__da ni gshegs so sha ra ra/__/da ni bzhud do si li li/__/'khor bcas dgyes pa'i gar dang bcas/__/rang gi gnas dang rten la gshegs/__/zhes pas phyogs so sor bskyal ba dang lhan cig__/rje btsun rtsa ba dang sogs nas/__grib bdag ma mo mkha' 'gro'i rigs su gyur pa thams cad glud gtor rgya chen po byin pa 'dis tshims par gyis la so so rang rang gi gnas su bde bar dengs shig__/gang dag mi 'gro ba de dag la de bzhin gshegs pa thams cad kyi sogs dkyus ltar sbyar la/__rtsa sngags dang /__sum+b+ha bzla zhing bskrad/__rol mo bya/__gu gul gyis bdug__/yungs kar gyis brab/__des grib sel gyi dngos gzhi grub nas/__rjes kyi rim pa la bsrung bar bya ba'i slad du sogs dang /__de nas bden pa'i stobs brjod pa'i slad du sogs dang /__slar yang shis par bya ba'i slad du sogs sbyar la dkyus ltar bya'o/__/grib sel rkyang pa byed na/__bdag bskyed sngon du 'gro bas/__glud gtor byin gyis brlab pa nas/__phyir bskrad pa'i bar gong bzhin la/__slar yang slob dpon gyi thugs ka nas 'od zer 'phros pas phyogs mtshams steng 'og thams cad rdo rje'i sa gzhi ra ba drwa ba gur bla bre ye shes kyi me 'bar ba dang bcas pa'i srung ba'i 'khor lo cis kyang mi chod mi shig par gyur pa'i mos pa mdzod/__oM badz+ra rak+Sha rak+Sha hU~M hU~M hU~M phaT swA hA/__lan gsum gyis brtan par bya zhing /__shis pa brjod/__bsdu na/__mgron so sor sngags kyis bsngo ba dang bden brjod bzhag nas/__tshigs bcad rnams rkyang pas glud gtor bsngos pa'i mthar/__hU~M/__da ni gshegs so zhes sogs sbyar bas kyang rung ngo /__/'di ni grub pa'i slob dpon chen po o rgyan pa rin chen dpal la mkha' 'gro ma 'gro ba bzang mos phul pa'i mkha' 'gro grib sel gyi gdam ngag ces grub mtha' kun la yongs su grags shing /__bya sla zhing tshegs chung la myong bas grub pa ste/__khro bo sme brtsegs sogs la'ang sbyar du rung zhing /__skabs 'ga' zhig tu rjes gnang dang 'brel bar byed na/__grib sel gyi sbyor dngos rjes gsum tshang bar sngon du btang nas/__rjes gnang dkyus bzhin du bya ba phyag len no/__/gzhan yang las phran tshegs la/__'phral du grib sel gyi bum sgrub bsdus pa ni/__bdag bskyed sngon du 'gro bas/__bum pa'am snod gtsang mar srog chags med pa'i chu gtsang ma la bum rdzas yod dam med kyang rung ste/__chu yi steng du zla ba la gnas pa'i hU~M yig mthing nag gi mthar sngags kyi phreng bas bskor ba/__rang gi thugs ka'i sa bon las 'od zer 'phros/__mdun gyi sngags phreng la phog__/de las bdud rtsi'i rgyun babs pas snod gang bar bsams la/__sngags brgya'am nyer gcig bzlas mthar/__sngags phreng gdan dang bcas pa chu la thim pas bdud rtsi'i rang bzhin du gyur par mos nas/__rang gi khong du btang ba dang khrus byas na grib dang mi gtsang bas mi tshugs shing /__zas gos gnas mal grib can sogs la'ang sngags chu gtor bas thub nges so/__/gzhan rjes su 'dzin na/__gong gi bdud rtsi'i rang bzhin du gyur/__ces pa'i mtshams/__des khyed rang rnams la khrus bgyis pa la brten nas nad gdon sdig sgrib grib dang mi gtsang ba thams cad byang zhing dag pa'i mos pa mdzod/__ces brda sbyar la/__rtsa sngags/__las sngags/__spel tshig dang bcas pas bkru zhing shis pa brjod do/__/sngags mchil gyis grib sel ba ni/__kha zas grib can sogs la longs spyod dgos pa byung na/__bdag nyid lha yi nga rgyal dang ldan pas/__grib can de'i steng du ra~M dmar po me yi rang bzhin can gcig bsams la/__sngags nyer gcig bzlas pa'i mchil ma thu thu zhes gtor bas/__ra~M las me 'bar bas nyes skyon thams cad bsreg par bsams la longs spyod do/__/chu mig dang /__rdzing bu dang /__khron pa dang /__chu ra sogs kyi nang du/__rdo la khro mo'i sku dang /__rgyab tu rtsa sngags/__las sngags/__'dod gsol dang bcas pa brkos par bskyed bstim brtan bzhugs tshul bzhin du byas na/__chu de la longs spyod pa thams cad kyi grib sel lo/__/nad kyi rigs gang la'ang sngags chu blud pa'am/__sngags mchil btab pa dang /__khyad par chu 'gags la mar dang /__gla rtsi/__ma zhu ba dang /__spos pa la lan tshwa brngos pa dang /__lo brgyad dri chu/__rims la dri chu bar pa rnams la sngags brgya rtsa btab nas btang bas sel zhing /__grib las byung ba'i shu thor dang /__skrangs 'bur sogs la'ang sngags bzlas pa'i mchil ma bul tog dang sa tshi can la btab nas byugs pas phan no/__/gdon gyi rigs dang /__smyo 'bog dang /__grib gzer sogs la/__gu gul nag po/__shu dag nag po/__bong nga nag po/__yungs kar/__sha chen rnams la sngags nas bdug pas 'phral du zhi bar 'gyur zhing /__yang nad gdon grib rigs spyi la/__gnas chen lta bur skyes pa'i shug pa/__bal bu/__mkhan dkar rnams gtso bor gyur pa'i dri zhim gyi sman shing sna tshogs pa lo ma rgyas pa'i dus su btus la grib skam bya/__de'i steng du sngar bshad pa ltar zla dkyil sngags phreng sogs bkod nas 'od zer spro bsdu dang bcas bzlas pa mang du byas pa'i dud pas bdug na shin tu phan zhing /__lug nag po'i sog pa g.yas pa'i bal skud la rdo rje'i mdud pa gsum gyis btab pa skad cig gis lhar bskyed cing /__bzlas pa'i mthar mdud pa la bstims nas mgul du btags na srung pa'i mchog tu 'gyur ro/__/grib rigs tshab chen la sbyong khrus dang grib sel yang yang byas pa'i mthar/__shug pa sogs sman shing sna tshogs kyi me la/__mkha' 'gro ma sme brtsegs skad cig gis bskyed/__nad pa'i skra sen sogs dang sbyar ba'i til nag po grib dang mi gtsang ba'i ngo bor mos la/__bdud rtsir byin gyis brlabs te rtsa sngags kyis lan brgya rtsa sogs 'bul/__mthar yi dam gyi lha me 'bar ba'i rnam par gyur pa la bsgrub byas lan bdun 'gong pas grib dang mi gtsang ba thams cad lhag med du tshig par bsam/__grib srung gi 'khor lo rgyas par gzhan nas 'byung ba ltar ram/__bsdu na/__shog bu la tsakra mu khyud lnga pa'i lte bar hU~M/__mu khyud dang po la rtsa sngags dang /__gnyis par las sngags/__gsum par A li/__bzhi par kA li/__lnga par rten 'brel snying po rnams kyi mthar/__'chang ba po la grib dang mi gtsang ba thams cad rak+Sha rak+ShaH__zhes sbyar ba bris pa'i phyi rol tu me ris bskor/__rab gnas spyi ltar byas la/__shel zur ma nyams pa/__bya rgod kyi sder mo/__grum pa'i spu dang bcas pa rnams bcug la tshon skud sna lngas bcing /__dar dmar pos dril te mgul du drod dang ma bral bar bcang ngo /__/de yang spyir snyigs ma'i dus 'dir grib kyi rigs tha dad pa mang po dang /__lhag par ma mo mkha' 'gro khros pa'i grib yams thabs su 'go ba'i rims dang /__dam tshig nyams pa'i grib kyis 'di phyi'i bde legs thams cad 'grib pa sogs kyi gnyen por grib sel gyi rigs mtha' klas pa zhig gsungs pa'i nang nas/__khro mo sme brtsegs 'di nyid gsar rnying gi gdams pa zung du 'brel zhing /__bya sla tshegs chung phan yon che bar myong bas grub pa'i phyir/__rang gzhan kun la sman pa'i bsam pa bzang pos kun nas bslangs te/__nyer mkho'i gdam ngag 'ga' zhig phyogs gcig tu bsdebs pa 'di yang /__rig 'dzin gyi btsun pa many+dzu g+ho Shas sbyar ba'i dge bas 'gro kun mi mthun pa'i rgud pa thams cad nye bar zhi ba'i rgyur gyur cig____/__!