ཁྲོ་བོའི་རྒྱལ་པོ་བདུད་རྩི་འཁྱིལ་བའི་སྒྲུབ་ཐབས་རྗེས་གནང་ལས་ཚོགས་དང་བཅས་པ་གྲུབ་པའི་ཟིལ་དངར་།

🚧 This website is under continued development. We appreciate your patience!

Previous Text Back to Volume PageNext Text

Wylie title	khro bo'i rgyal po bdud rtsi 'khyil ba'i sgrub thabs rjes gnang las tshogs dang bcas pa grub pa'i zil dngar
Location	mkhyen brtse'i bka' 'bum Volume 11, sde tshan 14, Text 12, Pages 526-549 (Folios 62b6 to 74a3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. khro bo'i rgyal po bdud rtsi 'khyil ba'i sgrub thabs rjes gnang las tshogs dang bcas pa grub pa'i zil dngar. In 'jam dbyangs mkhyen brtse'i dbang po'i bka' 'bum, Vol. 11: 526-549. Khams sde dge rdzong sar dgon: Rdzong sar blo gros phun tshogs, 2020.
Genre	Activity Manual - las byang  ·  Permission to Invoke (anujñā) - rjes gnang  ·  Sadhanas - Evocation Ritual - sgrub thabs  ·  Activity Practices - las tshogs
Deity	khro rgyal bdud rtsi 'khyil ba
Colophon	།ཅེས་པའང་འཇམ་མགོན་རྡོ་རྗེ་འཆང་བློ་གྲོས་མཐའ་ཡས་པའི་ཞལ་སྔ་ནས་འདིའི་རྗེས་སུ་གནང་བ་ནོས་ཤིང་། མན་ངག་གི་ཡིག་ཆ་ཅུང་ཟད་མཐོང་བ་ལ་བརྟེན་ནས་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་གཞན་ལ་ཕན་པའི་སེམས་ཀྱིས་སྦྱར་བ་རྣམ་པ་ཀུན་ཏུ་དགེ་ལེགས་སུ་གྱུར་ཅིག། །།མངྒ་ལཾ།།
	ces pa'ang 'jam mgon rdo rje 'chang blo gros mtha' yas pa'i zhal snga nas 'di'i rjes su gnang ba nos shing /__man ngag gi yig cha cung zad mthong ba la brten nas bya bral ba 'jam dbyangs mkhyen brtse'i dbang pos gzhan la phan pa'i sems kyis sbyar ba rnam pa kun tu dge legs su gyur cig/__//mang+ga laM/

1 Texts in this Section (sde tshan or chos tshan)

12 526-549	ཁྲོ་བོའི་རྒྱལ་པོ་བདུད་རྩི་འཁྱིལ་བའི་སྒྲུབ་ཐབས་རྗེས་གནང་ལས་ཚོགས་དང་བཅས་པ་གྲུབ་པའི་ཟིལ་དངར་། khro bo'i rgyal po bdud rtsi 'khyil ba'i sgrub thabs rjes gnang las tshogs dang bcas pa grub pa'i zil dngar Activity Manual - las byang   ·   Permission to Invoke (anujñā) - rjes gnang   ·   Sadhanas - Evocation Ritual - sgrub thabs   ·   Activity Practices - las tshogs	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །ཁྲོ་བོའི་རྒྱལ་པོ་བདུད་རྩི་འཁྱིལ་བའི་སྒྲུབ་ཐབས་རྗེས་གནང་ལས་ཚོགས་དང་བཅས་པ་གྲུབ་པའི་ཟིལ་དངར་ཞེས་བྱ་བ་བཞུགས་སོ། །རྒྭ་ལོ་ལུགས། ཨོཾ་སྭ་སྟི། ཁྲོ་རྒྱལ་བདུད་རྩི་འཁྱིལ་བ་དང་། །དབྱེར་མེད་བླ་མ་ལ་བཏུད་ནས། །དེ་ཡི་སྒྲུབ་ཐབས་རྗེས་གནང་དང་། །ལས་ཀྱི་རིམ་པ་ཅུང་ཟད་དབྱེ། །འདི་ལ་གསུམ། སྒྲུབ་པའི་ཐབས། རྗེས་སུ་གནང་བའི་ཆོ་ག །ལས་ཀྱི་རིམ་པའོ། །དང་པོ་ནི། སྐྱབས་སེམས་ཚད་མེད་བཞི་བསྒོམ་པ་སྔོན་དུ་འགྲོ་བས། སྭ་བྷཱ་ཝས་སྦྱངས། སྟོང་པའི་ངང་ལས་རང་ཉིད་ཁྲོ་བོ་བདུད་རྩི་འཁྱིལ་བ་སྐུ་མདོག་ལྗང་གུ་ཞལ་གཅིག་ཕྱག་གཉིས་སྤྱན་གསུམ་མཆེ་བ་གཙིགས་པ། ཕྱག་གཡས་པས་རྡོ་རྗེ་རྒྱ་གྲམ་གྱིས་མཚན་པའི་དབྱུག་པ་དང་། གཡོན་པས་སྡིགས་མཛུབ་ལ་དཀྲིས་པའི་ཞགས་པ་བསྣམས་པ། ཀླུ་ཆེན་པོ་བརྒྱད་ཀྱིས་བརྒྱན་ཅིང་སྟག་གི་པགས་པའི་ཤམ་ཐབས་དང་། དར་སྔོན་པོའི་སྟོད་གཡོགས་དར་དཔྱངས་དང་བཅས་པའི་རིན་པོ་ཆེའི་རྩེ་བྲན་ཅན། དབུ་སྐྲ་དང་སྨིན་མ་དང་སྨ་ར་དམར་སེར་གྱེན་དུ་འབར་བ། པདྨ་དང་ཉི་མའི་གདན་ལ་ཞབས་གཡས་བརྐྱང་གཡོན་བསྐུམ་པ་མེ་ཕུང་འབར་བའི་སྐུར་གྱུར། དེའི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ། ཐུགས་ཀའི་ཧཱུྃ་ལས་འོད་ཟེར་འཕྲོས་པས་བསྒོམས་པ་དང་འདྲ་བའི་ཡེ་ཤེས་པ་སྤྱན་དྲངས། བཛྲ་ས་མཱ་ཛཿཛཿཧཱུྃ་བྃ་ཧོཿ གཉིས་སུ་མེད་པར་གྱུར། སླར་ཡང་ཐུགས་ཀའི་ཧཱུྃ་ལས་འོད་ཟེར་འཕྲོས། རིགས་ལྔ་འཁོར་བཅས་སྤྱན་དྲངས། ཨོཾ་བཛྲ་ཨརྒྷཾ་སོགས་ཀྱིས་མཆོད། ཨོཾ་སརྦ་ཏ་ཐཱ་ག་ཏ་ཨབྷི་ཥིཉྩ་ཏུ་མཱཾ། ཞེས་གསོལ་བ་བཏབ་པས་རིགས་ལྔ་འཁོར་བཅས་ཀྱིས་བདུད་རྩིའི་བུམ་པ་ཐོགས་ནས། ཨོཾ་སརྦ་ཏ་ཐཱ་ག་ཏ་ཨབྷི་ཥེ་ཀ་ཏེ་ས་མ་ཡ་ཤྲི་ཡེ་ཧཱུྃ། ཞེས་གསུང་ཞིང་དབང་བསྐུར་བའི་ཆུ་རྒྱུན་གྱིས་སྐུ་གང་། དྲི་མ་དག །ཆུའི་ལྷག་མ་གྱེན་དུ་འཁྱིལ་བ་ལས་བཅོམ་ལྡན་འདས་མི་བསྐྱོད་པས་དབུར་བརྒྱན་པར་གྱུར། དེའི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་ཡིག་གི་མཐར་སྔགས་ཀྱི་ཡིག་འབྲུ་མརྒད་ཀྱི་ཕྲེང་བ་ལྟ་བུས་བསྐོར་བ། དེ་ལས་འོད་ཟེར་འཕྲོས། ལུས་ཐམས་ཅད་ཁྱབ། ནད་གདོན་སྡིག་སྒྲིབ་ཐམས་ཅད་བསལ། གནོད་བྱེད་ཀྱི་གདུག་རྩུབ་ཐམས་ཅད་ཞི་ནས་གུས་ཤིང་འདུད་པ་དང་། རང་ཉིད་མཐུ་སྟོབས་རབ་ཏུ་རྒྱས་ཤིང་ཡོན་ཏན་ཕྲིན་ལས་མཐའ་དག་འགྲུབ་པར་གྱུར། ཅེས་བརྗོད་ཅིང་བསམས་ལ་དྲན་པ་མངོན་དུ་བཞག་སྟེ། ཨོཾ་བཛྲ་ཨམྲྀ་ཏ་ཀུཎྜ་ལི་ཧཱུྃ་ཕཊ། ཅེས་སྙིང་པོ་གཙོ་བོར་བཟླ་ཞིང་། ཨོཾ་བཛྲ་ཨམྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཕ྄ཊ། ཅེས་ལས་སྔགས་ཀྱང་ཅི་རིགས་པར་བཟླ། སྤྲོ་ན་རྩ་སྔགས་སམ་སྔགས་རིང་དུ་གྲགས་པའང་ཅུང་ཟད་བཟླའོ། །ཐུན་འཇོག་པ་ན། བཅོམ་ལྡན་འདས་བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཞེས་འདོད་དོན་ལ་གསོལ་བ་གདབ། རང་གི་གནས་གསུམ་དུ་ཨོཾ་ཨཱཿཧཱུྃ་གིས་མཚན་པར་མོས་ལ་བསྔོ་སྨོན་ཤིས་བརྗོད་སྤྱི་ལྟར་བྱ། བསྙེན་པ་བྱེད་ན། དེ་ལྟ་བུའི་རིམ་པས་ཐུན་བཞིར་བཅད་ལ་སྙིང་པོ་འབུམ་ཕྲག་བཞི། ལས་སྔགས་འབུམ་ཕྲག་གཅིག །སྤྲོ་ཞིང་ནུས་ན་སྔགས་རིང་ཡང་ཇི་ལྟར་རིགས་པ་བཟླའོ། །གཉིས་པ་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། སྟེགས་བུའི་དབུས་སུ་མཎྜ་ལར་སྐུ་བརྙན་ནམ་མེ་ཏོག་གི་ཚོམ་བུ་གཅིག་དགོད། དེའི་གཡས་སུ་རྣམ་བུམ་དང་། གཡོན་དུ་ལས་བུམ་བཅུད་ལྡན། མདུན་དུ་འབུལ་གཏོར། མཐར་ཆུ་གཉིས་སྔོན་འགྲོའི་ཉེར་སྤྱོད། ཉེ་ལོགས་སུ་སྔོན་གཏོར་སོགས་འདུ་བྱ། གཉིས་པ་ནི། སྔོན་གཏོར་ཨམྲྀ་ཏས་བསང་། སྭཱ་བྷཱ་ཝས་སྦྱངས། ཨ་ཀཱ་རོས་བརླབ། རང་སྐད་ཅིག་གིས་ཁྲོ་རྒྱལ་བདུད་རྩི་འཁྱིལ་བ་གསལ་བའི་ཐུགས་ཀའི་ས་བོན་གྱི་འོད་ཀྱིས་ཕྱོགས་སྐྱོང་དང་གཞི་བདག་རྣམས་སྤྱན་དྲངས་པར་བསམས་ལ། ཨོཾ་ད་ཤ་དིཀ་ལོ་ཀ་པཱ་ལ་ས་པ་རི་ཝཱ་ར་ཨེ་ཧྱེ་ཧིས་སྤྱན་དྲངས། པདྨ་ཀ་མ་ལཱ་ཡ་སྟྭཾ་གྱིས་གདན་དབུལ། གོང་གི་སྔགས་མཐར་ཨརྒྷཾ་སོགས་བཏགས་པས་མཆོད་པ་དང་། ན་མཿསྶརྦ་ཏ་ཐཱ་ག་ཏ་བྷྱོ་བིཤྭ་སོགས་བཏགས་པ་ལན་གསུམ་གྱིས་གཏོར་མ་དབུལ། གང་ཡང་འདིར་གནས་ལྷ་དང་ཀླུ། །གནོད་སྦྱིན་སྲིན་པོ་སྡེ་བརྒྱད་སོགས། མཆོད་སྦྱིན་གཏོར་མ་འདི་བཞེས་ལ། །སོགས་ནས། ཡིད་ལ་འདོད་པ་ཀུན་འགྲུབ་མཛོད། །ཅེས་པའི་བར་གྱིས་ཕྲིན་ལས་བཅོལ། གང་དག་གསང་སྔགས་ཀྱི་ཆོ་ག་མཐོང་བ་དང་ཐོས་པར་མི་དབང་བ་རྣམས་ཀྱང་གཏོར་མ་འདིས་ཚིམ་པར་གྱིས་ལ་རང་གནས་སུ་དེངས་ཤིག །གལ་ཏེ་མི་འགྲོ་ན་རབ་ཏུ་འབར་བའི་ཡེ་ཤེས་ཀྱི་རྡོ་རྗེས་མགོ་བོ་འགེམས་པར་བྱེད་དོ། །ཞེས་དང་། ཨ་མྲྀ་ཏའི་མཐར་སུམྦྷ་སོགས་སྦྲེལ། རོལ་མོ་དང་བཅས་གཏོར་མ་ཕྱིར་དོར། རང་གི་སྙིང་ག་ནས་སྤྲོས་པའི་ཁྲོ་ཚོགས་དུ་མས་བགེགས་རྣམས་ཕྱིར་བསྐྲད། ཁྲོ་བོ་རྣམས་རང་ཉིད་ལ་ཐིམ། སླར་ཡང་ཐུགས་ཀའི་ས་བོན་ལས་འོད་ཟེར་ཕྱོགས་བཅུར་འཕྲོས་པ་ལས་བྱུང་བའི་རྡོ་རྗེའི་ས་གཞི་ར་བ་དྲྭ་བ་གུར་བླ་བྲེ་ཡེ་ཤེས་ཀྱི་མེ་རབ་ཏུ་འབར་བ་དང་བཅས་པའི་སྲུང་བའི་འཁོར་ལོ་ཡངས་ཤིང་རྒྱ་ཆེ་བ་ཀུན་ནས་བརྟན་པར་གྱུར་པར་བསམས་ལ། ཨོཾ་བཛྲ་རཀྵ་རཀྵ་ཧཱུྃ་ཧཱུྃ་ཧཱུྃ་ཕ྄ཊ་སྭཱ་ཧཱ། ཞེས་བརྗོད། མཆོད་པ་རྣམས་བསང་སྦྱངས། སྟོང་པའི་ངང་ལས་ཨོཾ་ཡིག་ལས། །རིན་ཆེན་སྣོད་ཀྱི་ནང་དུ་ནི། །ཧཱུྃ་ལས་མཆོད་ཡོན་ཞབས་བསིལ་དང་། །མེ་ཏོག་བདུག་སྤོས་སྣང་གསལ་དང་། །དྲི་མཆོག་ཞལ་ཟས་རོལ་མོ་སོགས། །མཆོད་རྫས་བསམ་མི་ཁྱབ་པར་གྱུར། །ཨོཾ་བཛྲ་ཨརྒྷཾ་ཨཱཿཧཱུྃ་ནས། ཤཔྡའི་བར་སྦྱར་བས་བརླབ། སྐྱབས་སེམས་ནས་བཟླས་པ་གསོལ་གདབ་བར་གྱི་བདག་བསྐྱེད་སྔོན་དུ་འགྲོ་བས། ཚོམ་བུ་བསང་སྦྱངས། སྟོང་པའི་ངང་ལས་མདུན་དུ་སྐད་ཅིག་གིས་ཁྲོ་བོའི་རྒྱལ་པོ་བདུད་རྩི་འཁྱིལ་བ་ཞེས་སོགས་ནས། མི་བསྐྱོད་པས་དབུར་བརྒྱན་པར་གྱུར་ཅེས་པའི་བར་བདག་བསྐྱེད་བཞིན་ལ། ཨོཾ་སརྦ་ཏ་ཐཱ་ག་ཏ་ཨབྷི་ཥིཉྩ་ཏྟ་མཱཾ་ཞེས་པའི་ཚབ་ཏུ། དེ་བཞིན་གཤེགས་པ་ཐམས་ཅད་ཀྱིས་འདི་ལ་མངོན་པར་དབང་བསྐུར་བ་སྩལ་དུ་གསོལ། །ཞེས་སྦྱར། མདུན་བསྐྱེད་ཀྱི་ཐུགས་ཀར་ཉི་མ་ལ་ཧཱུྃ་གི་མཐར་སྔགས་ཀྱི་ཡིག་འབྲུ་མརྒད་ཀྱི་ཕྲེང་བ་ལྟ་བུས་བསྐོར་བ་ལས་འོད་ཟེར་འཕྲོས་པས་ལས་ཐམས་ཅད་གྲུབ་པར་གྱུར་པའི་མོས་པས་བཟླས་པ་ཅི་རིགས་མཐར་གསོལ་བ་གདབ། སྤྲོ་ན་ཚིགས་བཅད་ཇི་ལྟར་རིགས་པ་དང་སྤེལ་བའམ། གང་ལྟར་ཡང་། ཨོཾ་བཛྲ་ཨ་མྲྀ་ཏ་ཀུཎྜ་ལི་ཨརྒྷཾ་ནས། ཤཔྡ་པྲ་ཏཱི་ཙྪ་སྭཱ་ཧཱའི་བར་གྱིས་མཆོད། བཅོམ་ལྡན་བདུད་རྩིའི་ཐལ་མོ་ལེགས་སྦྱར་བས། །བྱང་སེམས་སྤྱི་བོར་གཤེགས་པའི་མཐུ་སྟོབས་ཀྱིས། །བདུད་བཞི་རྩད་ནས་གཅོད་པའི་དགྲ་ཐབས་མཁན། །བཅོམ་ལྡན་ཁྲོ་བོ་ཆེན་པོར་ཕྱག་འཚལ་བསྟོད། །ཅེས་བསྟོད། རྣམ་བུམ་བསང་སྦྱངས། སྟོང་པའི་ངང་ལས་པྃ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་བྷྲཱུྃ་ལས་རིན་པོ་ཆེའི་བུམ་པ་ལྟོ་བ་ལྡིར་བ། མགྲིན་པ་རིང་བ། ཁ་ཡངས་པ། ཞབས་ཞུམ་པ། མཆུ་འཕྱང་བ། ལྷ་རྫས་ཀྱི་གོས་ཀྱིས་མགུལ་པ་བཅིངས་པ། དཔག་བསམ་གྱི་ཤིང་གིས་ཁ་བརྒྱན་པ། ནང་ཆུ་དང་བཅུད་ཀྱིས་གང་བའི་དབུས་སུ་སྐད་ཅིག་གིས་ཁྲོ་བོའི་རྒྱལ་པོ་བདུད་རྩི་འཁྱིལ་བ་སོགས་ནས། དབུར་བརྒྱན་པར་གྱུར་ཅེས་པའི་བར་མདུན་བསྐྱེད་ལྟར་གསལ་གདབ། མཆོད་བསྟོད་བྱ། བཟླས་པ་ནི། བུམ་ལྷའི་ཐུགས་ཀར་ཉི་མ་ལ་ཧཱུྃ་གི་མཐར་སྔགས་ཀྱིས་བསྐོར་བ། རང་གི་ཐུགས་ཀ་ནས་སྔགས་ཕྲེང་བྱུང་། ཞལ་ནས་ཐོན། གཟུངས་ཐག་ལ་འཁྲིལ་ཏེ་བུམ་པའི་ལྷའི་ཐུགས་ཀར་ཐིམ་པས་ཐུགས་སྲོག་སྔགས་ཕྲེང་དང་བཅས་པ་ལས་འོད་ཟེར་འཕྲོས། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། བདུད་རྩི་འཁྱིལ་བའི་གོ་འཕང་ལ་བཀོད། དེ་བཞིན་གཤེགས་པ་རྣམས་ཀྱི་བྱིན་རླབས་དང་ནུས་མཐུ་ཐམས་ཅད་བསྡུས་ཏེ་བུམ་པའི་ལྷའི་ཐུགས་ཀར་ཐིམ། སྔགས་ཕྲེང་དང་སྐུའི་ཆ་རྣམས་ལས་བདུད་རྩིའི་རྒྱུན་བབས་པས་བུམ་པ་གང་བར་གྱུར། ཅེས་བརྗོད་ཅིང་བསམས་ལ་བཟླས་པ་ཅི་རིགས་པའི་རྗེས། བུམ་ལྷ་བདུད་རྩིར་ཞུ་བ་བུམ་པའི་ཆུར་གྱུར་པར་བསམ། ལས་བུམ་བསང་སྦྱངས། སྟོང་པའི་ངང་ལས་ལས་བུམ་གྱི་ནང་དུ་པད་ཉི་ལ་ཧཱུྃ་ལས་བདུད་རྩི་འཁྱིལ་བ་སྐུ་མདོག་ལྗང་སྔོན་གཡས་རྡོ་རྗེའི་དབྱུག་པ་དང་། གཡོན་སྡིགས་མཛུབ་མཛད་པ། ཁྲོ་བོའི་ཆས་ཐམས་ཅད་དང་ལྡན་པའི་ཐུགས་ཀར་ཧཱུྃ་གི་མཐར་སྔགས་ཀྱིས་བསྐོར་བར་གྱུར་པར་མོས་ཏེ། ཨོཾ་བཛྲ་ཨམྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཕ྄ཊ། ཅུང་ཟད་བཟླ། ཁྲོ་བོ་ཁྱེད་ཀྱིས་བགེགས་བཟློག་པར་མཛོད་ཅིག་ཅེས་གསོལ་བས་ལས་ཀྱི་ལྷ་འོད་དུ་ཞུ་ནས་བདུད་རྩིར་གྱུར་པར་བསམ། གཏོར་མ་བསང་སྦྱངས། སྟོང་པའི་ངང་ལས་ཨོཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་ཡིད་དུ་འོང་བའི་ནང་དུ་ཨོཾ་ཨཱཿཧཱུྃ་འོད་དུ་ཞུ་བ་ལས་བྱུང་བའི་གཏོར་མ་དྭངས་ཤིང་ཐོགས་པ་མེད་པ་ཁ་དོག་དྲི་རོ་ནུས་པ་ཕུན་སུམ་ཚོགས་པ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་ལན་གསུམ་གྱིས་བརླབ། ཨོཾ་བཛྲ་ཨམྲྀ་ཏ་ཀུཎྜ་ལི་ཧཱུྃ་ཕཊ྄་ཨི་དཾ་བ་ལི་དྟ་ཁ་ཁ་ཁཱ་ཧི་ཁཱ་ཧི། ལན་གསུམ་གྱིས་དབུལ། མཆོད་ཅིང་བསྟོད། ཁྲོ་བོའི་རྒྱལ་པོ་བདུད་རྩི་འཁྱིལ། །མཆོད་སྦྱིན་གཏོར་མ་འདི་བཞེས་ལ། །སོགས་ནས། ཀུན་འགྲུབ་མཛོད་བར་གྱིས་གསོལ་བ་གདབ་པ་རྣམས་སློབ་དཔོན་གྱི་བྱ་བའོ། །སློབ་མ་ལ་བྱ་བ་ནི། ལས་བུམ་གྱི་ཆུ་དང་། ཇི་ལྟར་བལྟམས་པ་སོགས་ཀྱིས་ཁྲུས་བྱས་གྲལ་ལ་འཁོད། སྔོན་གཏོར་གཏོང་། སྲུང་འཁོར་བསྒོམ། མེ་ཏོག་བཀྱེ་བསྡུ་གྲུབ་ནས། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་རྗེས་སུ་གནང་བ་ཟབ་མོ་ཞུ་སྙམ་པ་ཀུན་སློང་བྱང་ཆུབ་ཀྱི་མཆོག་ཏུ་སེམས་བསྐྱེད་པ་དང་། ཆོས་གསན་པའི་ཀུན་ཏུ་སྤྱོད་པ་རྣམས་ཀྱང་ལེགས་པར་གསལ་བཏབ་སྟེ་གསན་འཚལ། དེ་ལ་འདིར་གང་གསན་པར་བྱ་བའི་ཆོས་ནི། རྡོ་རྗེའི་རིགས་ཀྱི་ཁྲོ་བོའི་རྒྱལ་པོ་བདུད་རྩི་འཁྱིལ་བ་འདི་ཉིད་རྒྱུད་སྡེ་ཆེན་པོ་བཞི་ཀ་ནས་ལས་ཀྱི་ལྷ་ཁྱད་པར་ཅན་དུ་གསུངས་ཤིང་། འདིའི་སྔགས་ཟློ་བ་པོའི་ལྟ་སྟངས་ཀྱིས་གཟིར་བའམ། སྔགས་ཆུས་འཐོར་བ་ཙམ་གྱིས་ཀྱང་གདོན་དང་། བགེགས་དང་། ལོག་པར་འདྲེན་པ་རྣམས་ཕྱོགས་སུ་ཉེ་མི་ནུས་པས་མཚོན་བྱིན་རླབས་དང་དངོས་གྲུབ་ཀྱི་གཏེར་ཆེན་པོར་གྱུར་པ་ལའང་སྒྲུབ་ཐབས་དང་མན་ངག་གི་བཀའ་སྲོལ་ཅི་རིགས་པར་མཆིས་པ་ལས། འདིར་པཎ་གྲུབ་དབང་པོ་འཇིགས་མེད་འབྱུང་གནས་སྦས་པ་ནས་ཉེ་བར་བརྒྱུད་ཅིང་། གངས་ཅན་གྱི་ལྗོངས་འདིར་དཔལ་ཆེན་པོ་རྒྭ་ལོ་ཙཱ་བས་སྣང་བར་མཛད་པའི་རྗེས་གནང་ཟབ་མོ་གསན་པའི་ཡོན་དུ་མཎྜལ་འབུལ་འཚལ། གསོལ་བ་འདེབས་པ་འདིའི་རྗེས་ཟློས་མཛོད། དུས་གསུམ་སངས་རྒྱས་ཐམས་ཅད་དང་། །དཔལ་ལྡན་བླ་མའི་བཀའ་དྲིན་གྱིས། །བདག་ལ་བདུད་རྩི་འཁྱིལ་བ་ཡི། །རྗེས་སུ་གནང་བ་སྩལ་དུ་གསོལ། །རྒྱུད་དག་པར་བྱ་བའི་སླད་དུ་བླ་མ་དང་ཡི་དམ་དབྱེར་མེད་པའི་སྤྱན་སྔར་ཡན་ལག་བདུན་དང་ལྡན་པའི་སྒོ་ནས་བྱང་ཆུབ་མཆོག་ཏུ་སེམས་བསྐྱེད་པ་འདིའི་རྗེས་ཟློས་མཛོད། དཀོན་མཆོག་གསུམ་ལ་བདག་སྐྱབས་མཆི་སོགས་ལན་གསུམ། དེ་ནས་རྗེས་གནང་གི་གཞི་དགོད་པའི་སླད་དུ་དམིགས་པ་འདི་བཞིན་དུ་མཛོད། ལས་བུམ་གྱི་ཆུས་བསང་སྦྱངས། སྟོང་པའི་ངང་ལས་ཁྱེད་རང་རྣམས་སྐད་ཅིག་གིས་ཁྲོ་བོའི་རྒྱལ་པོ་བདུད་རྩི་འཁྱིལ་བ་སོགས་ནས། ཐུགས་ཀར་ཧཱུྃ་སྔོན་པོ་རྣམས་ཀྱིས་མཚན་པར་བསྒོམ་མཛོད། མདུན་བསྐྱེད་ཀྱི་རྟེན་འདི་ཉིད་ཀྱང་བསྒྲུབས་ཟིན་པ་ལྟར་ཁྲོ་བོ་བདུད་རྩི་འཁྱིལ་བ་སོགས་ནས། ཧཱུྃ་སྔོན་པོས་མཚན་པ་དང་། སློབ་དཔོན་ཀྱང་ཁྲོ་བོའི་རྒྱལ་པོ་བདུད་རྩི་འཁྱིལ་བ་དངོས་སུ་གསལ་བ་ལ་མོས་འདུན་དྲག་པོ་བྱས་པས་སློབ་དཔོན་དང་མདུན་བསྐྱེད་ཀྱི་སྐུའི་གནས་ཐམས་ཅད་ནས་འོད་ཟེར་ཁ་དོག་སྣ་ཚོགས་དང་མེའི་ཚྭ་ཚྭ་ལྟ་བུ་འཕྲོས་པས་ལུས་ལ་གནོད་བྱེད་ཐམས་ཅད་ཚར་བཅད། ཁྲོ་བོའི་རྒྱལ་པོ་བདུད་རྩི་འཁྱིལ་བའི་ལྷ་ཚོགས་བསྒོམས་པ་དང་འདྲ་བའི་ཡེ་ཤེས་པ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་དཔག་ཏུ་མེད་པ་སྤྱན་དྲངས་ཁྱེད་རང་རྣམས་ལ་ཐིམ་པས། ཁྱེད་རང་རྣམས་ཀྱི་སྒོ་གསུམ་དང་། ཁྲོ་བོའི་རྒྱལ་པོ་བདུད་རྩི་འཁྱིལ་བའི་སྐུ་གསུང་ཐུགས་དབྱེར་མི་ཕྱེད་པར་གྱུར་ཅིང་ཡེ་ཤེས་པ་ཕེབས་བྱུང་སྙམ་པ་གྱིས་ལ་སེམས་མ་བཅོས་པ་རང་བབས་སུ་འཇོག་མཛོད། སྔགས་མཐར་ཨཱ་བེ་ཤ་ཡ་ཨཿཨཿབཏགས་པ་མང་དུ་བརྗོད་ཅིང་སྤོས་རོལ་བྱ། སྤྱི་བོར་རྡོ་རྗེ་བཞག་ལ་ཏིཥྛ་བཛྲ་ཞེས་བརྗོད་པས་བརྟན་པར་བྱས་པའི་མོས་པ་མཛོད། དེས་རྗེས་གནང་གི་གཞི་དགོད་པའི་རིམ་པ་སོང་ནས། དངོས་གཞི་སྐུ་གསུང་ཐུགས་ཀྱི་རྗེས་གནང་ཞུ་བའི་དོན་དུ་གསོལ་བ་འདེབས་པ་འདིའི་རྗེས་ཟློས་མཛོད། དུས་གསུམ་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་སློབ་དཔོན་གྱིས། །བདག་ལ་བདུད་རྩི་འཁྱིལ་བ་ཡི། །སྐུ་གསུང་ཐུགས་ཀྱི་རྗེས་གནང་སྩོལ། །དེ་ལྟར་གསོལ་བ་བཏབ་པས། སློབ་དཔོན་མདུན་བསྐྱེད་ཁྱེད་རང་རྣམས་ལྷར་གསལ་བ་དང་བཅས་པའི་ཐུགས་ཀ་ནས་འོད་ཟེར་འཕྲོས། དབང་གི་ལྷ་ནམ་མཁའ་གང་བར་སྤྱན་དྲངས་པ་རྣམས་ཀྱིས་བུམ་པ་བདུད་རྩིས་གང་བ་ཐོགས་ཏེ་དབང་བསྐུར་བའི་མོས་པ་མཛོད། རྣམ་བུམ་སྤྱི་བོར་བཞག་ཅིང་། ཇི་ལྟར་བལྟམས་པ་སོགས་ནས། བདག་གིས་དབང་བསྐུར་རོ། །ཨོཾ་སརྦ་ཏ་ཐཱ་ག་ཏ་ཨབྷི་ཥེ་ཀ་ཏེ་ས་མ་ཡ་ཤྲི་ཡེ་ཧཱུྃ། བུམ་ཆུ་སྦྱིན། ཞེས་པས་དབང་བསྐུར་བས་སྐུ་གང་། དྲི་མ་དག །ཆུའི་ལྷག་མ་ཡར་ལུད་པ་ལས་རིགས་ཀྱི་བདག་པོ་མི་བསྐྱོད་པས་དབུར་བརྒྱན། དབང་གི་ལྷ་རྣམས་ཀྱང་དེ་ཉིད་ལ་ཐིམ་པའི་མོས་པ་མཛོད། ཨོཾ་བཛྲ་ཨརྒྷཾ་སོགས་ཀྱིས་མཆོད། དེས་ཁྱེད་རང་རྣམས་ཀྱིས་ལུས་ཀྱི་སྒོ་ནས་བསགས་པའི་སྡིག་སྒྲིབ་ཐམས་ཅད་དག །ལུས་ལ་གནོད་ཅིང་འཚེ་བའི་འགལ་རྐྱེན་ནད་གདོན་བགེགས་དང་བར་ཆད་འབྱུང་པོ་མི་དང་མི་མ་ཡིན་གྱི་གནོད་པ་གྲིབ་དང་མི་གཙང་བ་དུས་མ་ཡིན་པར་འཆི་བའི་འཇིགས་པ་ལ་སོགས་པ་མི་མཐུན་པའི་རྐྱེན་ཐམས་ཅད་ཞི། སྐུའི་བྱིན་རླབས་ཞུགས། ལུས་ཀྱི་སྒོ་ནས་ཁྲོ་བོའི་རྒྱལ་པོ་བདུད་རྩི་འཁྱིལ་བའི་སྐུ་བསྒོམ་པ་ལ་དབང་། འབྲས་བུ་མཚན་དཔེས་བརྒྱན་པའི་སྤྲུལ་པའི་སྐུ་འགྲུབ་པར་འགྱུར་བ་ནི་སྐུའི་རྗེས་གནང་ངོ་། །གསུང་གི་རྗེས་གནང་ནི། མདུན་བསྐྱེད་དང་སློབ་དཔོན་གཉིས་ཀ་བདུད་རྩི་འཁྱིལ་བར་གསལ་བའི་ཐུགས་ཀར་ཉི་མ་ལ་ཧཱུྃ་གི་མཐར་སྔགས་ཀྱི་ཕྲེང་བས་བསྐོར་བ་ལས་སྔགས་ཕྲེང་གཉིས་པ་ཞིག་ཆད། ཁྱེད་རང་རྣམས་བདུད་རྩི་འཁྱིལ་བར་གསལ་བའི་ཞལ་དུ་ཞུགས། ཐུགས་ཀར་ཉི་མ་ལ་ཧཱུྃ་གི་མཐར་འཁོད་པར་བསྒོམས་ལ་སྔགས་འདིའི་རྗེས་ཟློས་མཛོད་ཅེས་བརྡ་སྦྱར་ལ། སྔགས་ལན་གསུམ་བཟླར་གཞུག །དེ་ནས་ཁྱེད་རང་རྣམས་ཀྱིས་སློབ་དཔོན་ལ་མེ་ཏོག་གི་ཕྲེང་བ་རེ་ཕུལ་བར་བསམས་ལ་འདིའི་རྗེས་ཟློས་མཛོད། བཅོམ་ལྡན་བདག་གིས་གཟུང་ལགས་ཀྱིས། །བདག་ལ་འགོ་བར་མཛད་དུ་གསོལ། །གསུམ། སླར་ཡང་སྔགས་ཕྲེང་དེ་ཉིད་མེ་ཏོག་གི་ཕྲེང་བར་བྱས་ནས་སྤྱི་བོར་བཅིངས་པའི་མོས་པ་མཛོད། བཅོམ་ལྡན་འདི་ལ་སྩལ་ལགས་ཀྱི། །འདི་ལ་འགོ་བར་མཛད་དུ་གསོལ། །སྔགས་ཀྱི་དངོས་གྲུབ་སྩལ་དུ་གསོལ། །ཕྲིན་ལས་རྫོགས་པར་མཛད་དུ་གསོལ། །བརྟུལ་ཞུགས་བརྟན་པར་མཛད་དུ་གསོལ། །རིག་པ་འཛིན་པ་འདི་རྣམས་ཀྱི་རྒྱུད་ལ་ཁྲོ་བོའི་རྒྱལ་པོ་བདུད་རྩི་འཁྱིལ་བའི་སྐུ་གསུང་ཐུགས་ཀྱི་བྱིན་རླབས་དང་ནུས་མཐུ་ཐམས་ཅད་འཇུག་པར་གྱུར་ཅིག །ཅེས་བརྗོད་ཅིང་མེ་ཏོག་འཐོར། དེས་ཁྱེད་རང་རྣམས་ཀྱིས་ངག་གི་སྒོ་ནས་བསགས་པའི་སྡིག་སྒྲིབ་ཐམས་ཅད་དག །ངག་ལ་གནོད་ཅིང་འཚེ་བའི་འགལ་རྐྱེན་ཞི། གསུང་གི་བྱིན་རླབས་ཞུགས། ངག་གི་སྒོ་ནས་ཁྲོ་བོའི་རྒྱལ་པོ་བདུད་རྩི་འཁྱིལ་བའི་སྔགས་བཟླ་བ་ལ་དབང་། འབྲས་བུ་ཚངས་དབྱངས་ཡན་ལག་དྲུག་ཅུ་དང་ལྡན་པའི་ལོངས་སྤྱོད་རྫོགས་པའི་སྐུ་འགྲུབ་པར་འགྱུར་བ་ནི་གསུང་གི་རྗེས་གནང་ངོ་། །ཐུགས་ཀྱི་རྗེས་གནང་ནི། སློབ་དཔོན་བདུད་རྩི་འཁྱིལ་བར་གསལ་བའི་ཐུགས་ཀ་ནས་འོད་འཕྲོས། མདུན་བསྐྱེད་ཀྱི་ཐུགས་ཀར་ཕོག །དེའི་ཐུགས་ཀ་ནས་ཐུགས་ཕྱག་མཚན་རྡོ་རྗེ་རྒྱ་གྲམ་གྱིས་མཚན་པའི་དབྱུག་པ་དང་། རྡོ་རྗེའི་ཞགས་པའི་ཚོགས་དུ་མ་འཕྲོས། ཁྱེད་རང་རྣམས་ཀྱི་སྙིང་གར་ཐིམ་པས་ཁྲོ་བོའི་རྒྱལ་པོ་བདུད་རྩི་འཁྱིལ་བའི་ཐུགས་ཀྱི་དངོས་གྲུབ་ཐོབ་སྙམ་པ་གྱིས་ལ་ཕྱག་རྒྱ་ཆེན་པོའི་ངང་དུ་མཉམ་པར་འཇོག་མཛོད། སྐུའམ་ཚོམ་བུ་སློབ་མའི་སྤྱི་བོར་བཞག་ལ། སྔགས་མཐར་བཛྲ་ས་མ་ཡ་སྟྭཾ་ཞེས་བརྗོད། དེས་ཁྱེད་རང་རྣམས་ཀྱིས་ཡིད་ཀྱི་སྒོ་ནས་བསགས་པའི་སྡིག་སྒྲིབ་མ་རིག་པ་བག་ཆགས་དང་བཅས་འདག །ཡིད་ལ་གནོད་ཅིང་འཚེ་བའི་འགལ་རྐྱེན་ནད་གདོན་བགེགས་དང་སྡིག་སྒྲིབ་བར་ཆད་འབྱུང་པོ་མི་དང་མི་མ་ཡིན་པའི་གནོད་པ། གྲིབ་དང་མི་གཙང་བ། མ་རིག་པ། མི་ཤེས་པ་དང་གཏི་མུག་ལ་སོགས་པའི་མི་མཐུན་པའི་རྐྱེན་ཐམས་ཅད་ཞི། ཐུགས་ཀྱི་བྱིན་རླབས་ཞུགས། ཡིད་ཀྱི་སྒོ་ནས་ཁྲོ་བོའི་རྒྱལ་པོ་བདུད་རྩི་འཁྱིལ་བའི་ཏིང་ངེ་འཛིན་བསྒོམ་པ་ལ་དབང་། འབྲས་བུ་མཁྱེན་བརྩེ་ནུས་པ་ཕུན་སུམ་ཚོགས་པ་དང་ལྡན་པའི་ཆོས་ཀྱི་སྐུ་འགྲུབ་པར་འགྱུར་བ་ནི་ཐུགས་ཀྱི་རྗེས་གནང་ངོ་། །དེ་ལྟ་བུའི་རྗེས་གནང་ཐོབ་ནས་དམ་ཚིག་ལ་གནས་ཤིང་འདི་ཉིད་ཡི་དམ་དུ་འཛིན་སྙམ་པས་འདིའི་རྗེས་ཟློས་མཛོད། གཙོ་བོས་ཇི་ལྟར་སོགས། གཏང་རག་གི་སླད་དུ་མཎྜལ་དབུལ། ལུས་ལོངས་སྤྱོད་དྲུག་ཆ་འབུལ་སྙམ་པས་འདིའི་རྗེས་ཟློས་མཛོད། དེང་ནས་བརྩམས་ཏེ་སོགས། དེས་ཁྲོ་བོའི་རྒྱལ་པོ་བདུད་རྩི་འཁྱིལ་བའི་རྗེས་གནང་ཐོབ་པ་ཡིན་པས། དེའི་སྒོ་ནས་རང་གཞན་གྱི་དོན་རྒྱ་ཆེན་པོ་སྒྲུབས་ཤིག །ཅེས་དང་། བསོད་ནམས་འདི་ཡིས་སོགས་བསྔོ་སྨོན་བྱ་བ་ནས་སློབ་མ་རྣམས་རང་གནས་སུ་གཏོང་ངོ་། །འདི་ནི་རྗེས་གནང་གཅིག་ཤེས་ཀུན་གྲོལ་གྱི་ཕྱག་ལེན་འབྲིང་པོ་ལྟར་བྲིས་པ་ཡིན་ལ། །རྒྱས་པར་སྤྲོ་ན་ལྷ་ཞི་དྲག་གི་ཁྱད་པར་ཅུང་ཟད་མ་གཏོགས། འཇམ་མགོན་བློ་གྲོས་མཐའ་ཡས་ཀྱི་གསུང་རབ་སྒྲོལ་དཀར་གྱི་ཆོ་ག་ཟླ་བའི་འདོད་འཇོའི་རྗེས་གནང་ལ་ལྷ་སྔགས་ཁ་བསྒྱུར་པས་གྲུབ་པ་ཡིན་ནོ། །གསུམ་པ་ནི། མཆོད་པ་ཞལ་གསོས་བསང་སྦྱངས་བྱིན་རླབས་སྔོན་དུ་འགྲོ་བས་གཏང་རག་གི་མཆོད་བསྟོད་བྱ། ཡིག་བརྒྱ་ལན་གསུམ་དང་། མ་འབྱོར་པ་དང་སོགས་ཀྱིས་ནོངས་པ་བཤགས། རྟེན་ཡོད་ན་བརྟན་བཞུགས་དང་། མེད་ན་བཛྲ་མུཿས་ཡེ་ཤེས་པ་གཤེགས། དམ་ཚིག་པ་རང་ལ་བསྟིམ། རང་གི་གནས་གསུམ་དུ་ཨོཾ་ཨཱཿཧཱུྃ་གིས་མཚན་པར་མོས་ལ་བསྔོ་སྨོན་ཤིས་བརྗོད་བྱ། ལས་ཀྱི་རྗེས་མི་མངོན་པར་བསྡུའོ། །གསུམ་པ་ལས་ཚོགས་མདོ་ཙམ་བརྗོད་ན། རིལ་བུ་སྔགས་མདུད་འཁོར་ལོ་དང་། །སྦྱིན་སྲེག་ཁྲུས་ཀྱི་ཆོ་ག་སྟེ། །ལས་ཀྱི་རིམ་པ་རྣམ་ལྔ་ཡིས། །རང་གཞན་ཕན་བདེ་བསྒྲུབ་པར་བྱ། །ཞེས་པ་ལྟར་ལས། དང་པོ་ལ་གཉིས། སྒྲུབ་པ་དང་། ལས་ལ་སྦྱར་བའོ། །དང་པོ་ནི། འབྱུང་པོ་གདུག་པ་ཅན་རྣམས་ཀྱི་ཡིད་དང་། སྦྱོར་བ་དང་། མཐོང་བ་དང་། ཁ་རླངས་དང་། རེག་པའི་དུག་ལྔ་ཡོད་པའི་གཉེན་པོར། མུ་ཟི་ནག་པོ། གླ་རྩི་ཟོལ་མེད། ཤུ་དག་ནག་པོ། རྨ་བྱའི་མདོངས། གུ་གུལ་ནག་པོའོ། །དེ་ལྟ་བུའི་རྫས་ལ་ཡི་དྭགས་ཕྲ་མོའི་ཚོགས་ཀྱིས་དྲི་རོའི་ནུས་པ་བརྐུ་བའི་གེགས་འཕྲོག་པའི་རྫས་ནི། ཤིང་ཀུན། རྟ་བོན་པ། རྭ་གཞོབ། དྲི་ཆེན། དྲི་ཆུའོ། །རྫས་དེ་ལ་གཉེན་པོ་དང་རིག་སྔགས་གཞན་གྱི་གནོད་པ་ཟློག་པའི་རྫས་ནི། བཙན་དུག །རྒྱ་ཁྱི་རྒྱ་བོའི་བྲུན་གྱི་རྩེ་མོར་དཀར་པོ་འབྱུང་བ་དེའོ། །ཚིལ། ཤ་ཆེན། ཚིལ་ཆེན། སྤྱང་བྲུན་ལྔ། དེ་ལྟར་རྫས་བཅོ་ལྔ་པོ་དེ་རྣམས་རྡོ་གཞོང་དུ་པདྨ་འདབ་བཞི་དབུས་དང་ལྔར། དབུས་སུ་མུ་ཟིན་ནག་པོ། བཙན་དུག །དྲི་ཆུ་གསུམ། ཤར་གྱི་འདབ་མར་གླ་རྩི། དྲི་ཆེན། རྒྱ་ཚིལ། ལྷོའི་འདབ་མར་གུ་གུལ། རྭ་གཞོབ། སྤྱང་བྲུན། ནུབ་ཀྱི་འདབ་མར་རྨ་བྱའི་སྒྲོ། རྟ་བོན་པ། ཚིལ་ཆེན། བྱང་གི་འདབ་མར་ཤུ་དག །ཤིང་ཀུན། ཤ་ཆེན་རྣམས་བཀོད་པའི་མཐར་མཆོད་པས་བསྐོར། བྱང་ཆུབ་སེམས་གཉིས་སྒོ་དུ་མ་ནས་ཡིད་ལ་བྱས་ཏེ་མཆོད་པ་བྱིན་རླབས་དང་། སྐྱབས་སེམས་ཚད་མེད་བཞི་བསྒོམ་པ་སྔོན་དུ་འགྲོ་བས་བདག་བསྐྱེད་གོང་ལྟར་གསལ་གདབ། བཟླས་པའི་སྐབས། རང་གི་ཐུགས་ཀར་ཉི་མ་ཁ་སྦྱོར་གྱི་དབུས་སུ་ཡི་གེ་མྃ་གྱི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་འཕྲོས། སྤྱིར་སེམས་ཅན་ཐམས་ཅད་དང་། ཁྱད་པར་སེམས་ཅན་གདུག་པ་ཅན་ཐམས་ཅད་བཅོམ་ལྡན་འདས་ཁྲོ་བོའི་རྒྱལ་པོ་བདུད་རྩི་འཁྱིལ་བའི་གོ་འཕང་ལ་བཀོད་པར་གྱུར་བའི་མོས་པས། ཨོཾ་བཛྲ་ཨམྲྀ་ཏ་ཀུཎྜ་ལི་ཧཱུྃ་ཕ྄ཊ། ཅེས་སྙིང་པོ་ཅི་ནུས་སུ་བཟླ། བྱེ་བྲག་ཏུ་སྔགས་ཀྱི་ཡི་གེ་དེ་རྣམས་མགར་གྱི་སོལ་མེ་ལྟར་འབར་བ་ལས་ཁྲོ་བོ་བཅུ་མི་མོར་གནས་པའི་རིག་སྔགས་འབྲུ་དྲུག་པར་གྱུར་པ་མདུན་གྱི་སྨན་རྣམས་ཀྱི་ངོ་བོར་བཞུགས་པར་བསྒོམས་ཏེ། ཨོཾ་དཱ་ན་རི་ཧཱུྃ་ཛཿ ཞེས་ལས་སྔགས་ཀྱང་བཟླས་པས་ལེགས་པར་བསྔགས། ཐུན་བསྡུ་བ་ན་བདག་བསྐྱེད་དང་རྫས་ལྷ་སྔགས་ཀྱི་ངོ་བོར་གྱུར་པ་ལ་མཆོད་བསྟོད་དང་། བསྔོ་སྨོན་ཤིས་བརྗོད་སོགས་བྱས་ཏེ་རྫས་རྣམས་ཕྱོགས་གཅིག་ཏུ་བསྡུས་ལ་ཞིབ་ཏུ་འཐགས། རིལ་བུར་དྲིལ། འདི་དག་གི་སྐབས་སུའང་རྫས་རྣམས་ངོ་བོ་ལྷ་ལ་རྣམ་པ་ཡེ་ཤེས་ཀྱི་མེ་འབར་བར་བསྒོམ། དེ་ནས་རིལ་བུ་རིན་པོ་ཆེའི་སྣོད་དུ་བླུག །མཆོད་པ་བཤམ། བདག་བསྐྱེད་བཟླས་པ་བཅས་གོང་ལྟར་དང་། རིལ་བུ་ལྷ་དང་སྔགས་ཀྱི་ངོ་བོ་ཡེ་ཤེས་ཀྱི་མེ་འབར་བའི་ནམ་པར་གྱུར་པས་དྲི་རོ་སྒྲ་ཚོར་བའི་གནས་སུའང་ཕྱོགས་སྐྱོང་བཅུ་སོགས་འབྱུང་པོ་རྣམས་ཀྱིས་གླགས་མི་རྙེད་པར་ཡེ་ཤེས་ཀྱི་མེས་སྲེག་པའི་ནུས་པ་ཅན་དུ་གྱུར་པར་མོས་ཏེ་སྙིང་པོ་དང་། ལས་སྔགས་བཟླ། ཐུན་བསྡུ་བའི་ཚེ། རང་གི་ཐུགས་ཀ་ནས་མཆོད་པའི་ལྷ་མོ་རྣམས་སྤྲོས་ཏེ་བདག་ཉིད་དང་རིལ་བུ་ལྷའི་ངོ་བོར་གནས་པ་ལ་མཆོད་པར་མོས་ཏེ་མཆོད་བསྟོད་དང་། འདོད་དོན་གསོལ། བསྔོ་སྨོན་ཤིས་བརྗོད་བྱ། དེ་ལྟར་ཞག་བདུན་ཕྲག་གཅིག་གམ། གཉིས་སམ། གསུམ་དུ་ཁྲུས་དང་གཙང་སྦྲ་ལ་གནས་པས་ལེགས་པར་བསྒྲུབས་ཟིན་པ་ན་རིལ་བུ་དེ་དར་སྣ་ལྔས་དྲིལ་ཏེ། རིན་ཆེན་བཟང་པོ་ལྔ་དང་། ནོར་བུ་འོད་འཕྲོ་བ་དང་ལྷན་ཅིག་ཏུ་སྐུ་གསུང་ཐུགས་ཀྱི་རྟེན་རྣམས་དང་ལྷན་དུ་བཞུགས་སུ་གསོལ་བར་བྱའོ། །གཉིས་པ་ལས་ལ་སྦྱར་བ་ནི། འདི་ཉིད་སྨན་གཞན་དང་མ་འདྲེས་པར་བྱས་ཏེ་འབྲས་སོགས་ལ་སྲབ་མཐུག་བྱ་སྒྲོ་ཙམ་དུ་བྱུགས་ན་རེག་པས་གྲོལ་བ་དང་། དྲི་ཆུས་རིལ་བུ་བྱས་ནས་ཡུངས་ཀར་ཙམ་ལྟོ་སྟོང་ལ་བཏང་ན་སྟེང་གདོན་དང་འོག་གདོན་དང་འགོ་ནད་ཐམས་ཅད་ཐུབ་པ་དང་། སྲིའུ་གསོན་མི་ལྤགས་ཀྱིས་གཏུམས་ཏེ་མ་བུ་གཉིས་ཀའི་མགུལ་དུ་བཅངས་ན་འཚེ་བ་ཐམས་ཅད་ལས་གྲོལ་བ་དང་། ལུས་ཀྱི་བུ་ག་དགུར་དགེ་སློང་རྣམ་དག་གི་བདུད་རྩི་དང་སྦྱར་ཏེ་མ་ཆག་པར་བྱུགས་ན་བྱད་གཏད་ཕར་ལ་བྱས་པ་ཚུར་ལ་མི་ལྡོག་པ་དང་། གཞན་གྱི་བྱད་གཏད་ཕུར་ཁ་རྣམས་ཀྱང་བཟློག་པར་འབྱུང་ཞིང་། རྫས་འདི་དག་གི་ཁར་གཟའ་དུག །རུ་སྦལ་ཁོག་པ། ཕག་རྒོད་མཆེ་བ་རྣམས་དང་བསྲེས་ཏེ་བཏང་ན་སྟེང་འོག་གི་གདོན་ཐམས་ཅད་ཐུབ་ཅིང་། གྱང་རོལ་རྙིང་པ་དང་ཤ་བོ་རུ་རྟའི་ཕྱེ་མ་དང་སྦྱར་ཏེ་ཆུ་གྲང་གིས་ཕུལ་ཏེ་བཏང་ན་ཐོག་དང་བརྒྱལ་ཐབས་ལྟ་བུས་ཁ་ལྐུག་པའང་བྱེ་བར་འགྱུར་རོ། །སྨན་འདི་དག་དང་། བཟང་དྲུག །གུ་གུལ་དཀར་ནག །རྒྱ་སྤོས། ཙནྡན་དཀར་པོ། ཨ་ག་རུ་སོགས་དང་སྦྱར་ཏེ་མེ་ལ་བསྲེགས་ན་འབྱུང་པོ་གདུག་པ་ཅན་རྣམས་རྒྱང་གྲགས་གཉིས་ཚུན་ལ་ཉེ་བར་འོང་མི་ནུས་སོ། །དེའང་ཡེ་ཤེས་ཌཱ་ཀིས་སློབ་དཔོན་དགྲ་ལས་རྣམ་རྒྱལ་ལ་དྲི་དང་སྒྲའི་སྒོ་ནས་ནད་གདོན་སྲུང་བའི་གདམས་པ་འདི་གནང་བ། རྡོ་རྗེ་གདན་དུ་ཡམས་ནད་བྱུང་བ་ལ་དུང་གི་ནང་དུ་བྱུགས་ནས་བུས་པས་ཡམས་ནད་ཆད་པ་དང་། ཤྲཱི་ནཱ་ལེནྡྲར་ཡམས་ནད་བྱུང་དུས་དགེ་འདུན་གྱི་དྲི་གཙང་ཁང་གི་སྒོར་བྱུགས་པས་ཡམས་ནད་ཆད་སྐད་པ་འདི། མཁས་པ་ཆེན་པོ་བ་རི་ལོ་ཙཱས་བསྒྱུར་ཏེ་རྒྱལ་བའི་དབང་པོ་མི་བསྐྱོད་ཞབས་སོགས་ཀྱིས་ཕྱག་ལེན་དུ་གཏན་ལ་ཕབ་པའི་ཡིད་ཆེས་ཅན་ཡིན་ནོ། །གཉིས་པ་ནི། རྩྭ་ཀུ་ཤའམ། གཞོན་ནུ་མས་བཀལ་བའི་སྐུད་པ་ལ་རྡོ་རྗེའི་མདུད་པ་གསུམ་གྱིས་བཏབ་སྟེ་སྙིང་པོ་དང་ལས་སྔགས་ཀྱིས་མངོན་པར་བསྔགས་པ་སྐྱེས་པའི་དཔུང་པ་གཡོན་དང་བུད་མེད་ཀྱི་གཡས་སུ་བཅིངས་བས་བགེགས་ཀྱི་ཚོགས་སྤྱི་དང་། ཁྱད་པར་ཁམས་དང་བླ་གནས་འཕོ་བའི་ཉེས་པ་ཀུན་སྲུང་བར་བཤད་དོ། །གསུམ་པ་ནི། གྲོ་གའམ། ཤོག་བུ་ལ་འཁོར་ལོ་མུ་ཁྱུད་དྲུག་ཏུ་བསྐོར་བའི་ལྟེ་བར་རྡོ་རྗེ་རྒྱ་གྲམ་གྱི་དབུས་དང་ཕྱོགས་ཀྱི་རྭ་བཞི་ལ་ཧཱུྃ་རེ་རེས་མཚན་པ་དང་། མུ་ཁྱུད་དང་པོ་ལ་རྡོ་རྗེའི་ཞགས་པའི་ཕྲེང་བས་བསྐོར་བ་ནི་ཡིད་སྲུང་བར་བྱེད་པ་ཐུགས་ཀྱི་འཁོར་ལོ། མུ་ཁྱུད་གཉིས་པར་སྙིང་པོ་དང་ལས་སྔགས་ཀྱི་མཐར་བསྒྲུབ་བྱའི་མིང་དང་གང་བསྲུང་བར་འདོད་པའི་སྤེལ་ཚིག་གི་མཐར་རཀྵ་རཀྵ་ཀུ་རུ་ཞེས་བྲིས་པ་ནི་ངག་སྲུང་བར་བྱེད་པ་གསུང་གི་འཁོར་ལོ། མུ་ཁྱུད་གསུམ་པར་སྔགས་རིང་། ན་མཿས་མནྟ་ཀཱ་ཡ་ཝཱ་ཀྩིཏྟ་བཛྲཱ་ཎཱཾ། ཕྱག་འཚལ་ལོ་ཀུན་ནས་སྐུ་གསུང་ཐུགས་རྡོ་རྗེ་ལ། ན་མོ་བཛྲ་ཀྲོ་དྷཱ་ཡ། ཕྱག་འཚལ་ལོ་རྡོ་རྗེ་ཁྲོ་བོ། མ་ཧཱ་དྭཾ་ཥྟོ་ཏྟ་ཊབྷཻར་ཝཱ་ཡ། ཆེན་པོ་མཆེ་བ་གཙིགས་པ་འཇིགས་སུ་རུང་བ། ཨ་སི་མུ་ས་ལ། རལ་གྲི་གཏུན་ཤིང་། པར་ཤུ་པཱ་ཤ་ཧ་སྟྭ་ཡ། དགྲ་སྟྭ་ཞགས་པ་ཕྱག་ན་བསྣམས་པ་ལ། ཨོཾ་ཨ་མྲྀ་ཏ་ཀུཎྜ་ལི། བདུད་རྩི་འཁྱིལ་བ། ཁ་ཁ་ཁཱ་ཧི་ཁཱ་ཧི། ཟོ་ཟོ་ཟོ་ཞིག་ཟོ་ཞིག །ཧུ་ལུ་ཧུ་ལུ། ཆུ་གཅིག་ཆུ་གཅིག །ཏིཥྛ་ཏིཥྛ། གནས་པར་གྱིས་གནས་པར་གྱིས། བནྡྷ་བནྡྷ། ཆིངས་ཆིངས། ཧ་ན་ཧ་ན། རྒྱོབ་རྒྱོབ། ད་ཧ་ད་ཧ། སྲེགས་སྲེགས། པ་ཙ་པ་ཙ། ཚོས་ཚོས། གརྫྫ་གརྫྫ། སྒྲོགས་སྒྲོགས། བི་སྥོ་ཊ་ཡ་བི་སྥོ་ཊ་ཡ། རྣམ་པར་ཁོས་རྣམ་པར་ཁོས། སརྦ་བིགྷྣཱན྄་བི་ནཱ་ཡ་ཀཱ་ན། བགེགས་དང་ལོག་འདྲེན་ཐམས་ཅད། མ་ཧཱ་ག་ཎ་པ་ཏི་ཛཱི་ཝི་ཏཱནྟ་ཀ་རཱ་ཡ་སྭཱ་ཧཱ། ཚོགས་བདག་ཆེན་པོའི་སྲོག་མཐར་བྱེད་པ་ལ། ཞེས་པའི་མཐར་སྤེལ་ཚིག་དང་བཅས་པ་ནི་ལུས་སྲུང་བར་བྱེད་པ་སྐུའི་འཁོར་ལོ། མུ་ཁྱུད་བཞི་པར་དབྱངས་གསལ་དང་རྟེན་སྙིང་སྤེལ་ཚིག་དང་བཅས་པ་ནི་བྱ་བ་སྲུང་བྱེད་ཡོན་ཏན་གྱི་འཁོར་ལོ། ལྔ་པར་རྡོ་རྭ་དང་དྲུག་པར་མེ་རིས་བསྐོར་བ་ནི་བྱེད་པ་སྲུང་བ་ཕྲིན་ལས་ཀྱི་འཁོར་ལོ་སྟེ། དེ་ལྟར་ལེགས་པར་བྲིས་ནས་གུར་གུམ། གི་ཝང་། ཤུ་དག་རྣམས་ཀྱིས་བྱུག །ལྷར་བསྐྱེད་བསྟིམ་རབ་ཏུ་གནས་པ་དང་བཅས་འོད་དུ་ཞུ་བ་ལས་བྲིས་པའི་འཁོར་ལོའི་རྣམ་པར་བསམས་ཏེ་སླར་ཡང་བརྟན་བཞུགས་དང་ཤིས་པ་བརྗོད་ཅིང་མེ་ཏོག་གི་ཆར་དབབ། ལྟེ་བ་མ་ཉམས་པར་བལྟབ། ཚོན་སྐུད་ཀྱིས་དཀྲིས་ཏེ་མགུལ་ལམ་དཔུང་པར་བཏགས་པ་རྡོ་རྗེའི་སྲུང་བ་ཆེན་པོར་འགྱུར་རོ། །བཞི་པ་ནི། རྒྱས་པར་གསང་བ་སྤྱིའི་ཆོ་ག་ལས་འབྱུང་བས་ཁོག་ཕུབ་སྟེ་འདི་ཉིད་ཀྱི་ལྷ་སྔགས་འབྱིན་འཇུག་བྱ། བསྡུས་པ་གློ་བུར་བའམ། རྒྱུན་གྱི་རྣལ་འབྱོར་ལྟ་བུའི་ཚེ། ཁམ་ཕོར་དུ་ཤུག་པ་སོགས་རུང་བའི་བུད་ཤིང་བརྩེགས་པའི་མདུན་དུ་མཆོད་གཏོར་བཤམ། རང་གི་མདུན་དུ་ཏིལ་ཅུང་ཟད་འདུ་བྱ། བདག་བསྐྱེད་སྔོན་དུ་འགྲོ་བས་མཆོད་པ་བྱིན་གྱིས་བརླབ། ལས་མཐུན་གྱི་མེ་སྦར་ལ་བསང་སྦྱངས། སྟོང་པའི་ངང་ལས་ཡེ་ཤེས་ཀྱི་མེ་འབར་བའི་དབུས་སུ་ཁྲོ་བོའི་རྒྱལ་པོ་བདུད་རྩི་འཁྱིལ་བ་ཞེས་སོགས་མདུན་བསྐྱེད་ལྟར་བསྐྱེད། མཆོད་ཅིང་བསྟོད། དེ་ནས་རང་ངམ་བསྒྲུབ་བྱའི་སྡིག་སྒྲིབ་ཉེས་ལྟུང་གྲིབ་དང་མི་གཙང་བ་ནད་གདོན་འབྱུང་པོའི་འཚེ་བ་ཐམས་ཅད་འོད་ནག་པོའི་རྣམ་པར་སྙིང་གར་འདུས་པ་རླུང་དང་འགྲོགས་ཏེ་སྣ་བུག་ནས་བྱུང་། མདུན་གྱི་ཏིལ་ལ་ཐིམ་པ་ཁྲོ་བོའི་རྒྱལ་པོའི་ཞལ་དུ་ཕུལ་བས་ཐུགས་ཀའི་ཡེ་ཤེས་ཀྱི་མེས་ལྷག་མེད་དུ་བསྲེགས་པར་བསམས་ལ། སྔགས་ཀྱི་མཐར། ཨོཾ་སརྦ་པཱ་པཾ་ཀླེ་ཤ་ད་ཧ་ན་བྷ་སྨི་ཀུ་རུ་སྭཱ་ཧཱ། ཞེས་བརྒྱ་རྩ་སོགས་དབུལ། མཐར་གཏོར་འབུལ། འདོད་གསོལ། ནོངས་བཤགས། ཡེ་ཤེས་པ་གཤེགས། དམ་ཚིག་པ་རང་ལ་བསྟིམ། བསྔོ་སྨོན་ཤིས་བརྗོད་བྱའོ། །འདིས་སྤྱིར་མི་མཐུན་པའི་ཕྱོགས་ཐམས་ཅད་ཞི་ཞིང་། ཁྱད་པར་བསྙེན་སྒྲུབ་སོགས་ཀྱི་སྐབས་གྲིབ་དང་མི་གཙང་བའི་ལྟས་བྱུང་ན་ངེས་པར་ཕན་ནོ། །ལྔ་པ་ནི། བདག་བསྐྱེད་སྔོན་དུ་འགྲོ་བས་བུམ་པ་གོང་བཞིན་བསྒྲུབ། སྦྱང་བ་གསུམ་དང་བཀྲུ་བྱབས་སྲུང་བ་སོགས་རྣམ་འཇོམས་ལྟ་བུའི་ཁྲུས་ཆོག་ལ་ལྷ་སྔགས་བསྒྱུར་ཏེ་བགྱིས་པས་གྲིབ་དང་ནད་གདོན་སོགས་ལ་ཤིན་ཏུ་ཕན། ཚུལ་བཞིན་བསྒྲུབས་པའི་བུམ་ཆུ་གནས་དང་ཡོ་བྱད་སོགས་ལ་འཐོར་པས་དེ་དང་དེའི་གྲིབ་ཞི་བ་དང་། བསྙེན་སྒྲུབ་ཀྱི་སྐབས་བཀྲུ་བ་དང་། ཁོང་དུ་བཏུང་བས་དབང་པོ་གསལ་ཞིང་ཁམས་དྭངས། ཏིང་ངེ་འཛིན་གྱི་བར་ཆད་ཐམས་ཅད་སེལ་བ་སོགས་ལ་མཆོག་ཏུ་བསྔགས་ཤིང་མྱོང་བས་ཀྱང་གྲུབ། བུམ་སྒྲུབ་རྒྱས་པར་མ་གྲུབ་ཀྱང་། རིན་པོ་ཆེའི་སྣོད་དུ་ཆུ་གཙང་མ་བླུགས་པ་མདུན་དུ་བདར་ཏེ་བསང་སྦྱངས། སྟོང་པའི་ངང་ལས་བསང་ཆུའི་སྟེང་དུ་ཉི་མ་ལ་ཧཱུྃ་གི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་སྤྱན་དྲངས། སྔགས་ཕྲེང་ལ་ཐིམ། དེ་ལས་བདུད་རྩིའི་རྒྱུན་བབས་པས་ཆུ་ནུས་པ་དང་ལྡན་པར་གྱུར། ཅེས་བསམས་ལ། སྙིང་པོ་དང་ལས་སྔགས་བཟླ། མཐར་སྔགས་ཕྲེང་གདན་དང་བཅས་པ་འོད་དུ་ཞུ་བ་ལས་ཆུ་ནུས་པ་དང་ལྡན་པར་མོས་ཏེ། གོང་བཞིན་ལས་ལ་སྦྱར་བས་ཀྱང་ཕན་བདེ་འཕྲལ་དུ་སྟེར་བར་འགྱུར་རོ། །གྲུབ་པའི་ཞལ་ལུང་དག་བྱེད་གཏེར། །བསྲུབས་སྐྱེས་གདམས་པའི་ཟིལ་དངར་གྱིས། །ས་གསུམ་འགྲོ་བའི་གདུང་སེལ་ཞིང་། །ཐར་བདེའི་ངལ་འཚོ་རྒྱས་གྱུར་ཅིག །ཅེས་པའང་འཇམ་མགོན་རྡོ་རྗེ་འཆང་བློ་གྲོས་མཐའ་ཡས་པའི་ཞལ་སྔ་ནས་འདིའི་རྗེས་སུ་གནང་བ་ནོས་ཤིང་། མན་ངག་གི་ཡིག་ཆ་ཅུང་ཟད་མཐོང་བ་ལ་བརྟེན་ནས་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་གཞན་ལ་ཕན་པའི་སེམས་ཀྱིས་སྦྱར་བ་རྣམ་པ་ཀུན་ཏུ་དགེ་ལེགས་སུ་གྱུར་ཅིག། །།མངྒ་ལཾ།། །། ༈

[edit]

khro bo'i rgyal po bdud rtsi 'khyil ba'i sgrub thabs rjes gnang las tshogs dang bcas pa grub pa'i zil dngar / @#/_/khro bo'i rgyal po bdud rtsi 'khyil ba'i sgrub thabs rjes gnang las tshogs dang bcas pa grub pa'i zil dngar zhes bya ba bzhugs so/_/rgwa lo lugs/__oM swa sti/__khro rgyal bdud rtsi 'khyil ba dang /__/dbyer med bla ma la btud nas/__/de yi sgrub thabs rjes gnang dang /__/las kyi rim pa cung zad dbye/__/'di la gsum/__sgrub pa'i thabs/__rjes su gnang ba'i cho ga__/las kyi rim pa'o/__/dang po ni/__skyabs sems tshad med bzhi bsgom pa sngon du 'gro bas/__swa b+hA was sbyangs/__stong pa'i ngang las rang nyid khro bo bdud rtsi 'khyil ba sku mdog ljang gu zhal gcig phyag gnyis spyan gsum mche ba gtsigs pa/__phyag g.yas pas rdo rje rgya gram gyis mtshan pa'i dbyug pa dang /__g.yon pas sdigs mdzub la dkris pa'i zhags pa bsnams pa/__klu chen po brgyad kyis brgyan cing stag gi pags pa'i sham thabs dang /__dar sngon po'i stod g.yogs dar dpyangs dang bcas pa'i rin po che'i rtse bran can/__dbu skra dang smin ma dang sma ra dmar ser gyen du 'bar ba/__pad+ma dang nyi ma'i gdan la zhabs g.yas brkyang g.yon bskum pa me phung 'bar ba'i skur gyur/__de'i dpral bar oM dkar po/__mgrin par AHdmar po/__thugs kar hU~M sngon po/__thugs ka'i hU~M las 'od zer 'phros pas bsgoms pa dang 'dra ba'i ye shes pa spyan drangs/__badz+ra sa mA dzaHdzaHhU~M ba~M hoH__gnyis su med par gyur/__slar yang thugs ka'i hU~M las 'od zer 'phros/__rigs lnga 'khor bcas spyan drangs/__oM badz+ra ar+g+haM sogs kyis mchod/__oM sarba ta thA ga ta ab+hi Shiny+tsa tu mAM/__zhes gsol ba btab pas rigs lnga 'khor bcas kyis bdud rtsi'i bum pa thogs nas/__oM sarba ta thA ga ta ab+hi She ka te sa ma ya shri ye hU~M/__zhes gsung zhing dbang bskur ba'i chu rgyun gyis sku gang /__dri ma dag__/chu'i lhag ma gyen du 'khyil ba las bcom ldan 'das mi bskyod pas dbur brgyan par gyur/__de'i thugs kar nyi ma'i dkyil 'khor gyi steng du hU~M yig gi mthar sngags kyi yig 'bru margad kyi phreng ba lta bus bskor ba/__de las 'od zer 'phros/__lus thams cad khyab/__nad gdon sdig sgrib thams cad bsal/__gnod byed kyi gdug rtsub thams cad zhi nas gus shing 'dud pa dang /__rang nyid mthu stobs rab tu rgyas shing yon tan phrin las mtha' dag 'grub par gyur/__ces brjod cing bsams la dran pa mngon du bzhag ste/__oM badz+ra amr-i ta kuN+Da li hU~M phaT/__ces snying po gtso bor bzla zhing /__oM badz+ra amr-i ta kuN+Da li ha na ha na hU~M pha?T/__ces las sngags kyang ci rigs par bzla/__spro na rtsa sngags sam sngags ring du grags pa'ang cung zad bzla'o/__/thun 'jog pa na/__bcom ldan 'das bdag dang sems can thams cad la mchog dang thun mong gi dngos grub ma lus pa stsal du gsol/__zhes 'dod don la gsol ba gdab/__rang gi gnas gsum du oM AHhU~M gis mtshan par mos la bsngo smon shis brjod spyi ltar bya/__bsnyen pa byed na/__de lta bu'i rim pas thun bzhir bcad la snying po 'bum phrag bzhi/__las sngags 'bum phrag gcig__/spro zhing nus na sngags ring yang ji ltar rigs pa bzla'o/__/gnyis pa la gsum/__sbyor ba/__dngos gzhi/__rjes so/__/dang po ni/__stegs bu'i dbus su maN+Da lar sku brnyan nam me tog gi tshom bu gcig dgod/__de'i g.yas su rnam bum dang /__g.yon du las bum bcud ldan/__mdun du 'bul gtor/__mthar chu gnyis sngon 'gro'i nyer spyod/__nye logs su sngon gtor sogs 'du bya/__gnyis pa ni/__sngon gtor amr-i tas bsang /__swA b+hA was sbyangs/__a kA ros brlab/__rang skad cig gis khro rgyal bdud rtsi 'khyil ba gsal ba'i thugs ka'i sa bon gyi 'od kyis phyogs skyong dang gzhi bdag rnams spyan drangs par bsams la/__oM da sha dika lo ka pA la sa pa ri wA ra e h+ye his spyan drangs/__pad+ma ka ma lA ya s+t+waM gyis gdan dbul/__gong gi sngags mthar ar+g+haM sogs btags pas mchod pa dang /__na maHs+sarba ta thA ga ta b+h+yo bishwa sogs btags pa lan gsum gyis gtor ma dbul/__gang yang 'dir gnas lha dang klu/__/gnod sbyin srin po sde brgyad sogs/__mchod sbyin gtor ma 'di bzhes la/__/sogs nas/__yid la 'dod pa kun 'grub mdzod/__/ces pa'i bar gyis phrin las bcol/__gang dag gsang sngags kyi cho ga mthong ba dang thos par mi dbang ba rnams kyang gtor ma 'dis tshim par gyis la rang gnas su dengs shig__/gal te mi 'gro na rab tu 'bar ba'i ye shes kyi rdo rjes mgo bo 'gems par byed do/__/zhes dang /__a mr-i ta'i mthar sum+b+ha sogs sbrel/__rol mo dang bcas gtor ma phyir dor/__rang gi snying ga nas spros pa'i khro tshogs du mas bgegs rnams phyir bskrad/__khro bo rnams rang nyid la thim/__slar yang thugs ka'i sa bon las 'od zer phyogs bcur 'phros pa las byung ba'i rdo rje'i sa gzhi ra ba drwa ba gur bla bre ye shes kyi me rab tu 'bar ba dang bcas pa'i srung ba'i 'khor lo yangs shing rgya che ba kun nas brtan par gyur par bsams la/__oM badz+ra rak+Sha rak+Sha hU~M hU~M hU~M pha?T swA hA/__zhes brjod/__mchod pa rnams bsang sbyangs/__stong pa'i ngang las oM yig las/__/rin chen snod kyi nang du ni/__/hU~M las mchod yon zhabs bsil dang /__/me tog bdug spos snang gsal dang /__/dri mchog zhal zas rol mo sogs/__/mchod rdzas bsam mi khyab par gyur/__/oM badz+ra ar+g+haM AHhU~M nas/__shap+da'i bar sbyar bas brlab/__skyabs sems nas bzlas pa gsol gdab bar gyi bdag bskyed sngon du 'gro bas/__tshom bu bsang sbyangs/__stong pa'i ngang las mdun du skad cig gis khro bo'i rgyal po bdud rtsi 'khyil ba zhes sogs nas/__mi bskyod pas dbur brgyan par gyur ces pa'i bar bdag bskyed bzhin la/__oM sarba ta thA ga ta ab+hi Shiny+tsa t+ta mAM zhes pa'i tshab tu/__de bzhin gshegs pa thams cad kyis 'di la mngon par dbang bskur ba stsal du gsol/__/zhes sbyar/__mdun bskyed kyi thugs kar nyi ma la hU~M gi mthar sngags kyi yig 'bru margad kyi phreng ba lta bus bskor ba las 'od zer 'phros pas las thams cad grub par gyur pa'i mos pas bzlas pa ci rigs mthar gsol ba gdab/__spro na tshigs bcad ji ltar rigs pa dang spel ba'am/__gang ltar yang /__oM badz+ra a mr-i ta kuN+Da li ar+g+haM nas/__shap+da pra tI ts+tsha swA hA'i bar gyis mchod/__bcom ldan bdud rtsi'i thal mo legs sbyar bas/__/byang sems spyi bor gshegs pa'i mthu stobs kyis/__/bdud bzhi rtsad nas gcod pa'i dgra thabs mkhan/__/bcom ldan khro bo chen por phyag 'tshal bstod/__/ces bstod/__rnam bum bsang sbyangs/__stong pa'i ngang las pa~M las pad+ma dang a las zla ba'i dkyil 'khor gyi steng du b+h+rU~M las rin po che'i bum pa lto ba ldir ba/__mgrin pa ring ba/__kha yangs pa/__zhabs zhum pa/__mchu 'phyang ba/__lha rdzas kyi gos kyis mgul pa bcings pa/__dpag bsam gyi shing gis kha brgyan pa/__nang chu dang bcud kyis gang ba'i dbus su skad cig gis khro bo'i rgyal po bdud rtsi 'khyil ba sogs nas/__dbur brgyan par gyur ces pa'i bar mdun bskyed ltar gsal gdab/__mchod bstod bya/__bzlas pa ni/__bum lha'i thugs kar nyi ma la hU~M gi mthar sngags kyis bskor ba/__rang gi thugs ka nas sngags phreng byung /__zhal nas thon/__gzungs thag la 'khril te bum pa'i lha'i thugs kar thim pas thugs srog sngags phreng dang bcas pa las 'od zer 'phros/__sems can thams cad kyi sdig sgrib sbyangs/__bdud rtsi 'khyil ba'i go 'phang la bkod/__de bzhin gshegs pa rnams kyi byin rlabs dang nus mthu thams cad bsdus te bum pa'i lha'i thugs kar thim/__sngags phreng dang sku'i cha rnams las bdud rtsi'i rgyun babs pas bum pa gang bar gyur/__ces brjod cing bsams la bzlas pa ci rigs pa'i rjes/__bum lha bdud rtsir zhu ba bum pa'i chur gyur par bsam/__las bum bsang sbyangs/__stong pa'i ngang las las bum gyi nang du pad nyi la hU~M las bdud rtsi 'khyil ba sku mdog ljang sngon g.yas rdo rje'i dbyug pa dang /__g.yon sdigs mdzub mdzad pa/__khro bo'i chas thams cad dang ldan pa'i thugs kar hU~M gi mthar sngags kyis bskor bar gyur par mos te/__oM badz+ra amr-i ta kuN+Da li ha na ha na hU~M pha?T/__cung zad bzla/__khro bo khyed kyis bgegs bzlog par mdzod cig ces gsol bas las kyi lha 'od du zhu nas bdud rtsir gyur par bsam/__gtor ma bsang sbyangs/__stong pa'i ngang las oM las rin po che'i snod yangs shing rgya che ba yid du 'ong ba'i nang du oM AHhU~M 'od du zhu ba las byung ba'i gtor ma dwangs shing thogs pa med pa kha dog dri ro nus pa phun sum tshogs pa bdud rtsi'i rgya mtsho chen por gyur/__oM AHhU~M lan gsum gyis brlab/__oM badz+ra amr-i ta kuN+Da li hU~M phaTa? i daM ba li d+ta kha kha khA hi khA hi/__lan gsum gyis dbul/__mchod cing bstod/__khro bo'i rgyal po bdud rtsi 'khyil/__/mchod sbyin gtor ma 'di bzhes la/__/sogs nas/__kun 'grub mdzod bar gyis gsol ba gdab pa rnams slob dpon gyi bya ba'o/__/slob ma la bya ba ni/__las bum gyi chu dang /__ji ltar bltams pa sogs kyis khrus byas gral la 'khod/__sngon gtor gtong /__srung 'khor bsgom/__me tog bkye bsdu grub nas/__nam mkha' dang mnyam pa'i sems can thams cad kyi don du rdzogs pa'i sangs rgyas kyi go 'phang thob par bya/__de'i ched du rjes su gnang ba zab mo zhu snyam pa kun slong byang chub kyi mchog tu sems bskyed pa dang /__chos gsan pa'i kun tu spyod pa rnams kyang legs par gsal btab ste gsan 'tshal/__de la 'dir gang gsan par bya ba'i chos ni/__rdo rje'i rigs kyi khro bo'i rgyal po bdud rtsi 'khyil ba 'di nyid rgyud sde chen po bzhi ka nas las kyi lha khyad par can du gsungs shing /__'di'i sngags zlo ba po'i lta stangs kyis gzir ba'am/__sngags chus 'thor ba tsam gyis kyang gdon dang /__bgegs dang /__log par 'dren pa rnams phyogs su nye mi nus pas mtshon byin rlabs dang dngos grub kyi gter chen por gyur pa la'ang sgrub thabs dang man ngag gi bka' srol ci rigs par mchis pa las/__'dir paN grub dbang po 'jigs med 'byung gnas sbas pa nas nye bar brgyud cing /__gangs can gyi ljongs 'dir dpal chen po rgwa lo tsA bas snang bar mdzad pa'i rjes gnang zab mo gsan pa'i yon du maN+Dal 'bul 'tshal/__gsol ba 'debs pa 'di'i rjes zlos mdzod/__dus gsum sangs rgyas thams cad dang /__/dpal ldan bla ma'i bka' drin gyis/__/bdag la bdud rtsi 'khyil ba yi/__/rjes su gnang ba stsal du gsol/__/rgyud dag par bya ba'i slad du bla ma dang yi dam dbyer med pa'i spyan sngar yan lag bdun dang ldan pa'i sgo nas byang chub mchog tu sems bskyed pa 'di'i rjes zlos mdzod/__dkon mchog gsum la bdag skyabs mchi sogs lan gsum/__de nas rjes gnang gi gzhi dgod pa'i slad du dmigs pa 'di bzhin du mdzod/__las bum gyi chus bsang sbyangs/__stong pa'i ngang las khyed rang rnams skad cig gis khro bo'i rgyal po bdud rtsi 'khyil ba sogs nas/__thugs kar hU~M sngon po rnams kyis mtshan par bsgom mdzod/__mdun bskyed kyi rten 'di nyid kyang bsgrubs zin pa ltar khro bo bdud rtsi 'khyil ba sogs nas/__hU~M sngon pos mtshan pa dang /__slob dpon kyang khro bo'i rgyal po bdud rtsi 'khyil ba dngos su gsal ba la mos 'dun drag po byas pas slob dpon dang mdun bskyed kyi sku'i gnas thams cad nas 'od zer kha dog sna tshogs dang me'i tshwa tshwa lta bu 'phros pas lus la gnod byed thams cad tshar bcad/__khro bo'i rgyal po bdud rtsi 'khyil ba'i lha tshogs bsgoms pa dang 'dra ba'i ye shes pa sangs rgyas dang byang chub sems dpa'i tshogs kyis bskor ba dpag tu med pa spyan drangs khyed rang rnams la thim pas/__khyed rang rnams kyi sgo gsum dang /__khro bo'i rgyal po bdud rtsi 'khyil ba'i sku gsung thugs dbyer mi phyed par gyur cing ye shes pa phebs byung snyam pa gyis la sems ma bcos pa rang babs su 'jog mdzod/__sngags mthar A be sha ya aHaHbtags pa mang du brjod cing spos rol bya/__spyi bor rdo rje bzhag la tiSh+Tha badz+ra zhes brjod pas brtan par byas pa'i mos pa mdzod/__des rjes gnang gi gzhi dgod pa'i rim pa song nas/__dngos gzhi sku gsung thugs kyi rjes gnang zhu ba'i don du gsol ba 'debs pa 'di'i rjes zlos mdzod/__dus gsum sangs rgyas thams cad kyi/__/sku gsung thugs kyi slob dpon gyis/__/bdag la bdud rtsi 'khyil ba yi/__/sku gsung thugs kyi rjes gnang stsol/__/de ltar gsol ba btab pas/__slob dpon mdun bskyed khyed rang rnams lhar gsal ba dang bcas pa'i thugs ka nas 'od zer 'phros/__dbang gi lha nam mkha' gang bar spyan drangs pa rnams kyis bum pa bdud rtsis gang ba thogs te dbang bskur ba'i mos pa mdzod/__rnam bum spyi bor bzhag cing /__ji ltar bltams pa sogs nas/__bdag gis dbang bskur ro/__/oM sarba ta thA ga ta ab+hi She ka te sa ma ya shri ye hU~M/__bum chu sbyin/__zhes pas dbang bskur bas sku gang /__dri ma dag__/chu'i lhag ma yar lud pa las rigs kyi bdag po mi bskyod pas dbur brgyan/__dbang gi lha rnams kyang de nyid la thim pa'i mos pa mdzod/__oM badz+ra ar+g+haM sogs kyis mchod/__des khyed rang rnams kyis lus kyi sgo nas bsags pa'i sdig sgrib thams cad dag__/lus la gnod cing 'tshe ba'i 'gal rkyen nad gdon bgegs dang bar chad 'byung po mi dang mi ma yin gyi gnod pa grib dang mi gtsang ba dus ma yin par 'chi ba'i 'jigs pa la sogs pa mi mthun pa'i rkyen thams cad zhi/__sku'i byin rlabs zhugs/__lus kyi sgo nas khro bo'i rgyal po bdud rtsi 'khyil ba'i sku bsgom pa la dbang /__'bras bu mtshan dpes brgyan pa'i sprul pa'i sku 'grub par 'gyur ba ni sku'i rjes gnang ngo /__/gsung gi rjes gnang ni/__mdun bskyed dang slob dpon gnyis ka bdud rtsi 'khyil bar gsal ba'i thugs kar nyi ma la hU~M gi mthar sngags kyi phreng bas bskor ba las sngags phreng gnyis pa zhig chad/__khyed rang rnams bdud rtsi 'khyil bar gsal ba'i zhal du zhugs/__thugs kar nyi ma la hU~M gi mthar 'khod par bsgoms la sngags 'di'i rjes zlos mdzod ces brda sbyar la/__sngags lan gsum bzlar gzhug__/de nas khyed rang rnams kyis slob dpon la me tog gi phreng ba re phul bar bsams la 'di'i rjes zlos mdzod/__bcom ldan bdag gis gzung lags kyis/__/bdag la 'go bar mdzad du gsol/__/gsum/__slar yang sngags phreng de nyid me tog gi phreng bar byas nas spyi bor bcings pa'i mos pa mdzod/__bcom ldan 'di la stsal lags kyi/__/'di la 'go bar mdzad du gsol/__/sngags kyi dngos grub stsal du gsol/__/phrin las rdzogs par mdzad du gsol/__/brtul zhugs brtan par mdzad du gsol/__/rig pa 'dzin pa 'di rnams kyi rgyud la khro bo'i rgyal po bdud rtsi 'khyil ba'i sku gsung thugs kyi byin rlabs dang nus mthu thams cad 'jug par gyur cig_/ces brjod cing me tog 'thor/__des khyed rang rnams kyis ngag gi sgo nas bsags pa'i sdig sgrib thams cad dag__/ngag la gnod cing 'tshe ba'i 'gal rkyen zhi/__gsung gi byin rlabs zhugs/__ngag gi sgo nas khro bo'i rgyal po bdud rtsi 'khyil ba'i sngags bzla ba la dbang /__'bras bu tshangs dbyangs yan lag drug cu dang ldan pa'i longs spyod rdzogs pa'i sku 'grub par 'gyur ba ni gsung gi rjes gnang ngo /__/thugs kyi rjes gnang ni/__slob dpon bdud rtsi 'khyil bar gsal ba'i thugs ka nas 'od 'phros/__mdun bskyed kyi thugs kar phog__/de'i thugs ka nas thugs phyag mtshan rdo rje rgya gram gyis mtshan pa'i dbyug pa dang /__rdo rje'i zhags pa'i tshogs du ma 'phros/__khyed rang rnams kyi snying gar thim pas khro bo'i rgyal po bdud rtsi 'khyil ba'i thugs kyi dngos grub thob snyam pa gyis la phyag rgya chen po'i ngang du mnyam par 'jog mdzod/__sku'am tshom bu slob ma'i spyi bor bzhag la/__sngags mthar badz+ra sa ma ya s+t+waM zhes brjod/__des khyed rang rnams kyis yid kyi sgo nas bsags pa'i sdig sgrib ma rig pa bag chags dang bcas 'dag__/yid la gnod cing 'tshe ba'i 'gal rkyen nad gdon bgegs dang sdig sgrib bar chad 'byung po mi dang mi ma yin pa'i gnod pa/__grib dang mi gtsang ba/_ma rig pa/__mi shes pa dang gti mug la sogs pa'i mi mthun pa'i rkyen thams cad zhi/__thugs kyi byin rlabs zhugs/__yid kyi sgo nas khro bo'i rgyal po bdud rtsi 'khyil ba'i ting nge 'dzin bsgom pa la dbang /__'bras bu mkhyen brtse nus pa phun sum tshogs pa dang ldan pa'i chos kyi sku 'grub par 'gyur ba ni thugs kyi rjes gnang ngo /__/de lta bu'i rjes gnang thob nas dam tshig la gnas shing 'di nyid yi dam du 'dzin snyam pas 'di'i rjes zlos mdzod/__gtso bos ji ltar sogs/__gtang rag gi slad du maN+Dal dbul/__lus longs spyod drug cha 'bul snyam pas 'di'i rjes zlos mdzod/__deng nas brtsams te sogs/__des khro bo'i rgyal po bdud rtsi 'khyil ba'i rjes gnang thob pa yin pas/__de'i sgo nas rang gzhan gyi don rgya chen po sgrubs shig__/ces dang /__bsod nams 'di yis sogs bsngo smon bya ba nas slob ma rnams rang gnas su gtong ngo /__/'di ni rjes gnang gcig shes kun grol gyi phyag len 'bring po ltar bris pa yin la/__/rgyas par spro na lha zhi drag gi khyad par cung zad ma gtogs/__'jam mgon blo gros mtha' yas kyi gsung rab sgrol dkar gyi cho ga zla ba'i 'dod 'jo'i rjes gnang la lha sngags kha bsgyur pas grub pa yin no/__/gsum pa ni/__mchod pa zhal gsos bsang sbyangs byin rlabs sngon du 'gro bas gtang rag gi mchod bstod bya/__yig brgya lan gsum dang /__ma 'byor pa dang sogs kyis nongs pa bshags/__rten yod na brtan bzhugs dang /__med na badz+ra muHsa ye shes pa gshegs/__dam tshig pa rang la bstim/__rang gi gnas gsum du oM AHhU~M gis mtshan par mos la bsngo smon shis brjod bya/__las kyi rjes mi mngon par bsdu'o/__/gsum pa las tshogs mdo tsam brjod na/__ril bu sngags mdud 'khor lo dang /__/sbyin sreg khrus kyi cho ga ste/__/las kyi rim pa rnam lnga yis/__/rang gzhan phan bde bsgrub par bya/__/zhes pa ltar las/__dang po la gnyis/__sgrub pa dang /__las la sbyar ba'o/__/dang po ni/__'byung po gdug pa can rnams kyi yid dang /__sbyor ba dang /__mthong ba dang /__kha rlangs dang /__reg pa'i dug lnga yod pa'i gnyen por/__mu zi nag po/__gla rtsi zol med/__shu dag nag po/__rma bya'i mdongs/__gu gul nag po'o/__/de lta bu'i rdzas la yi dwags phra mo'i tshogs kyis dri ro'i nus pa brku ba'i gegs 'phrog pa'i rdzas ni/__shing kun/__rta bon pa/__rwa gzhob/__dri chen/__dri chu'o/__/rdzas de la gnyen po dang rig sngags gzhan gyi gnod pa zlog pa'i rdzas ni/__btsan dug__/rgya khyi rgya bo'i brun gyi rtse mor dkar po 'byung ba de'o/__/tshil/__sha chen/__tshil chen/__spyang brun lnga/__de ltar rdzas bco lnga po de rnams rdo gzhong du pad+ma 'dab bzhi dbus dang lngar/__dbus su mu zin nag po/__btsan dug__/dri chu gsum/__shar gyi 'dab mar gla rtsi/__dri chen/__rgya tshil/__lho'i 'dab mar gu gul/__rwa gzhob/__spyang brun/__nub kyi 'dab mar rma bya'i sgro/__rta bon pa/__tshil chen/__byang gi 'dab mar shu dag__/shing kun/__sha chen rnams bkod pa'i mthar mchod pas bskor/__byang chub sems gnyis sgo du ma nas yid la byas te mchod pa byin rlabs dang /__skyabs sems tshad med bzhi bsgom pa sngon du 'gro bas bdag bskyed gong ltar gsal gdab/__bzlas pa'i skabs/__rang gi thugs kar nyi ma kha sbyor gyi dbus su yi ge ma~M gyi mthar sngags kyi phreng bas bskor ba las 'od zer 'phros/__spyir sems can thams cad dang /__khyad par sems can gdug pa can thams cad bcom ldan 'das khro bo'i rgyal po bdud rtsi 'khyil ba'i go 'phang la bkod par gyur ba'i mos pas/__oM badz+ra amr-i ta kuN+Da li hU~M pha?T/__ces snying po ci nus su bzla/__bye brag tu sngags kyi yi ge de rnams mgar gyi sol me ltar 'bar ba las khro bo bcu mi mor gnas pa'i rig sngags 'bru drug par gyur pa mdun gyi sman rnams kyi ngo bor bzhugs par bsgoms te/__oM dA na ri hU~M dzaH__zhes las sngags kyang bzlas pas legs par bsngags/__thun bsdu ba na bdag bskyed dang rdzas lha sngags kyi ngo bor gyur pa la mchod bstod dang /__bsngo smon shis brjod sogs byas te rdzas rnams phyogs gcig tu bsdus la zhib tu 'thags/__ril bur dril/__'di dag gi skabs su'ang rdzas rnams ngo bo lha la rnam pa ye shes kyi me 'bar bar bsgom/__de nas ril bu rin po che'i snod du blug__/mchod pa bsham/__bdag bskyed bzlas pa bcas gong ltar dang /__ril bu lha dang sngags kyi ngo bo ye shes kyi me 'bar ba'i nam par gyur pas dri ro sgra tshor ba'i gnas su'ang phyogs skyong bcu sogs 'byung po rnams kyis glags mi rnyed par ye shes kyi mes sreg pa'i nus pa can du gyur par mos te snying po dang /__las sngags bzla/__thun bsdu ba'i tshe/__rang gi thugs ka nas mchod pa'i lha mo rnams spros te bdag nyid dang ril bu lha'i ngo bor gnas pa la mchod par mos te mchod bstod dang /__'dod don gsol/__bsngo smon shis brjod bya/__de ltar zhag bdun phrag gcig gam/__gnyis sam/__gsum du khrus dang gtsang sbra la gnas pas legs par bsgrubs zin pa na ril bu de dar sna lngas dril te/__rin chen bzang po lnga dang /__nor bu 'od 'phro ba dang lhan cig tu sku gsung thugs kyi rten rnams dang lhan du bzhugs su gsol bar bya'o/__/gnyis pa las la sbyar ba ni/__'di nyid sman gzhan dang ma 'dres par byas te 'bras sogs la srab mthug bya sgro tsam du byugs na reg pas grol ba dang /__dri chus ril bu byas nas yungs kar tsam lto stong la btang na steng gdon dang 'og gdon dang 'go nad thams cad thub pa dang /__sri'u gson mi lpags kyis gtums te ma bu gnyis ka'i mgul du bcangs na 'tshe ba thams cad las grol ba dang /__lus kyi bu ga dgur dge slong rnam dag gi bdud rtsi dang sbyar te ma chag par byugs na byad gtad phar la byas pa tshur la mi ldog pa dang /__gzhan gyi byad gtad phur kha rnams kyang bzlog par 'byung zhing /__rdzas 'di dag gi khar gza' dug_/ru sbal khog pa/__phag rgod mche ba rnams dang bsres te btang na steng 'og gi gdon thams cad thub cing /__gyang rol rnying pa dang sha bo ru rta'i phye ma dang sbyar te chu grang gis phul te btang na thog dang brgyal thabs lta bus kha lkug pa'ang bye bar 'gyur ro/__/sman 'di dag dang /__bzang drug__/gu gul dkar nag__/rgya spos/__tsan+dan dkar po/__a ga ru sogs dang sbyar te me la bsregs na 'byung po gdug pa can rnams rgyang grags gnyis tshun la nye bar 'ong mi nus so/__/de'ang ye shes DA kis slob dpon dgra las rnam rgyal la dri dang sgra'i sgo nas nad gdon srung ba'i gdams pa 'di gnang ba/__rdo rje gdan du yams nad byung ba la dung gi nang du byugs nas bus pas yams nad chad pa dang /__shrI nA len+d+rar yams nad byung dus dge 'dun gyi dri gtsang khang gi sgor byugs pas yams nad chad skad pa 'di/__mkhas pa chen po ba ri lo tsAs bsgyur te rgyal ba'i dbang po mi bskyod zhabs sogs kyis phyag len du gtan la phab pa'i yid ches can yin no/__/gnyis pa ni/__rtswa ku sha'am/__gzhon nu mas bkal ba'i skud pa la rdo rje'i mdud pa gsum gyis btab ste snying po dang las sngags kyis mngon par bsngags pa skyes pa'i dpung pa g.yon dang bud med kyi g.yas su bcings bas bgegs kyi tshogs spyi dang /__khyad par khams dang bla gnas 'pho ba'i nyes pa kun srung bar bshad do/__/gsum pa ni/__gro ga'am/__shog bu la 'khor lo mu khyud drug tu bskor ba'i lte bar rdo rje rgya gram gyi dbus dang phyogs kyi rwa bzhi la hU~M re res mtshan pa dang /__mu khyud dang po la rdo rje'i zhags pa'i phreng bas bskor ba ni yid srung bar byed pa thugs kyi 'khor lo/__mu khyud gnyis par snying po dang las sngags kyi mthar bsgrub bya'i ming dang gang bsrung bar 'dod pa'i spel tshig gi mthar rak+Sha rak+Sha ku ru zhes bris pa ni ngag srung bar byed pa gsung gi 'khor lo/__mu khyud gsum par sngags ring /__na maHsa man+ta kA ya wA k+tsit+ta badz+rA NAM/__phyag 'tshal lo kun nas sku gsung thugs rdo rje la/__na mo badz+ra kro d+hA ya/__phyag 'tshal lo rdo rje khro bo/__ma hA dwaM Sh+to t+ta Tab+hair wA ya/__chen po mche ba gtsigs pa 'jigs su rung ba/__a si mu sa la/__ral gri gtun shing /__par shu pA sha ha s+t+wa ya/__dgra s+t+wa zhags pa phyag na bsnams pa la/__oM a mr-i ta kuN+Da li/__bdud rtsi 'khyil ba/__kha kha khA hi khA hi/__zo zo zo zhig zo zhig__/hu lu hu lu/__chu gcig chu gcig__/tiSh+Tha tiSh+Tha/__gnas par gyis gnas par gyis/__ban+d+ha ban+d+ha/__chings chings/__ha na ha na/__rgyob rgyob/__da ha da ha/__sregs sregs/__pa tsa pa tsa/__tshos tshos/__gar+dz+dza gar+dz+dza/__sgrogs sgrogs/__bi s+pho Ta ya bi s+pho Ta ya/__rnam par khos rnam par khos/__sarba big+h+nAna? bi nA ya kA na/__bgegs dang log 'dren thams cad/__ma hA ga Na pa ti dzI wi tAn+ta ka rA ya swA hA/__tshogs bdag chen po'i srog mthar byed pa la/__zhes pa'i mthar spel tshig dang bcas pa ni lus srung bar byed pa sku'i 'khor lo/__mu khyud bzhi par dbyangs gsal dang rten snying spel tshig dang bcas pa ni bya ba srung byed yon tan gyi 'khor lo/__lnga par rdo rwa dang drug par me ris bskor ba ni byed pa srung ba phrin las kyi 'khor lo ste/__de ltar legs par bris nas gur gum/__gi wang /__shu dag rnams kyis byug__/lhar bskyed bstim rab tu gnas pa dang bcas 'od du zhu ba las bris pa'i 'khor lo'i rnam par bsams te slar yang brtan bzhugs dang shis pa brjod cing me tog gi char dbab/__lte ba ma nyams par bltab/__tshon skud kyis dkris te mgul lam dpung par btags pa rdo rje'i srung ba chen por 'gyur ro/__/bzhi pa ni/__rgyas par gsang ba spyi'i cho ga las 'byung bas khog phub ste 'di nyid kyi lha sngags 'byin 'jug bya/__bsdus pa glo bur ba'am/__rgyun gyi rnal 'byor lta bu'i tshe/__kham phor du shug pa sogs rung ba'i bud shing brtsegs pa'i mdun du mchod gtor bsham/__rang gi mdun du til cung zad 'du bya/__bdag bskyed sngon du 'gro bas mchod pa byin gyis brlab/__las mthun gyi me sbar la bsang sbyangs/__stong pa'i ngang las ye shes kyi me 'bar ba'i dbus su khro bo'i rgyal po bdud rtsi 'khyil ba zhes sogs mdun bskyed ltar bskyed/__mchod cing bstod/__de nas rang ngam bsgrub bya'i sdig sgrib nyes ltung grib dang mi gtsang ba nad gdon 'byung po'i 'tshe ba thams cad 'od nag po'i rnam par snying gar 'dus pa rlung dang 'grogs te sna bug nas byung /__mdun gyi til la thim pa khro bo'i rgyal po'i zhal du phul bas thugs ka'i ye shes kyi mes lhag med du bsregs par bsams la/__sngags kyi mthar/__oM sarba pA paM kle sha da ha na b+ha smi ku ru swA hA/__zhes brgya rtsa sogs dbul/__mthar gtor 'bul/__'dod gsol/__nongs bshags/__ye shes pa gshegs/__dam tshig pa rang la bstim/__bsngo smon shis brjod bya'o/__/'dis spyir mi mthun pa'i phyogs thams cad zhi zhing /__khyad par bsnyen sgrub sogs kyi skabs grib dang mi gtsang ba'i ltas byung na nges par phan no/__/lnga pa ni/__bdag bskyed sngon du 'gro bas bum pa gong bzhin bsgrub/__sbyang ba gsum dang bkru byabs srung ba sogs rnam 'joms lta bu'i khrus chog la lha sngags bsgyur te bgyis pas grib dang nad gdon sogs la shin tu phan/__tshul bzhin bsgrubs pa'i bum chu gnas dang yo byad sogs la 'thor pas de dang de'i grib zhi ba dang /__bsnyen sgrub kyi skabs bkru ba dang /__khong du btung bas dbang po gsal zhing khams dwangs/__ting nge 'dzin gyi bar chad thams cad sel ba sogs la mchog tu bsngags shing myong bas kyang grub/__bum sgrub rgyas par ma grub kyang /__rin po che'i snod du chu gtsang ma blugs pa mdun du bdar te bsang sbyangs/__stong pa'i ngang las bsang chu'i steng du nyi ma la hU~M gi mthar sngags kyi phreng bas bskor ba las 'od zer 'phros/__'phags pa mchod/__sems can gyi don byas/__sangs rgyas dang byang chub sems dpa' thams cad kyi thugs ka nas ye shes kyi bdud rtsi spyan drangs/__sngags phreng la thim/__de las bdud rtsi'i rgyun babs pas chu nus pa dang ldan par gyur/__ces bsams la/__snying po dang las sngags bzla/__mthar sngags phreng gdan dang bcas pa 'od du zhu ba las chu nus pa dang ldan par mos te/__gong bzhin las la sbyar bas kyang phan bde 'phral du ster bar 'gyur ro/__/grub pa'i zhal lung dag byed gter/__/bsrubs skyes gdams pa'i zil dngar gyis/__/sa gsum 'gro ba'i gdung sel zhing /__/thar bde'i ngal 'tsho rgyas gyur cig__/ces pa'ang 'jam mgon rdo rje 'chang blo gros mtha' yas pa'i zhal snga nas 'di'i rjes su gnang ba nos shing /__man ngag gi yig cha cung zad mthong ba la brten nas bya bral ba 'jam dbyangs mkhyen brtse'i dbang pos gzhan la phan pa'i sems kyis sbyar ba rnam pa kun tu dge legs su gyur cig/__//mang+ga laM//____//__!_