JKCL-KABUM-12-NA-035

🚧 This website is under continued development. We appreciate your patience!

Previous Text"NA" is not a number. Back to Volume Page"NA" is not a number.Next Text "NA" is not a number.

Wylie title
Location	chos kyi blo gros bka' 'bum Volume , Text 35, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation
Genre	"NA" is not a number.

1 Texts in this Section (sde tshan or chos tshan)

127-143	ཀཿཐོག་སི་ཏུ་རིན་པོ་ཆེར་ཁྲི་སྟོན་ལེགས་འབུལ་གྱི་ཡི་གེ་བཀྲ་ཤིས་དབྱངས་སྙན། kaH thog si tu rin po cher khri ston legs 'bul gyi yi ge bkra shis dbyangs snyan Official Letters - chab shog	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

"NA" is not a number.

Tibetan Text

Wylie

[edit]

༄༅། །ཀཿཐོག་སི་ཏུ་རིན་པོ་ཆེར་ཁྲི་སྟོན་ལེགས་འབུལ་གྱི་ཡི་གེ་བཀྲ་ཤིས་དབྱངས་སྙན་ཅེས་བྱ་བ་བཞུགས་སོ། ། བཀྲ་ཤིས་མཚན་གྱི་གདུགས་དཀར་གསར་པ་ལྷར་བཅས་བླ་ན་བརྗིད་པའི་སྐུ། །བཀྲ་ཤིས་ཞི་བསིལ་བདུད་རྩིའི་སྣང་བས་འགྲོ་རྣམས་གདུང་བ་སེལ་བའི་གསུངས། །བཀྲ་ཤིས་ཟག་བྲལ་རྣམ་པར་མི་རྟོག་ཤེས་པ་ཀུན་ལ་ཁྱབ་པའི་ཐུགས། །བཀྲ་ཤིས་གསང་གསུམ་བསམ་མི་ཁྱབ་པ་དོན་ཀུན་གྲུབ་པས་དགེ་ལེགས་སྩོལ། །ཅེས་མཉམ་མེད་ཤཱཀྱའི་རྒྱལ་པོར་བསྔགས་པ་བརྗོད་པ་སཾ་བོད་ཀྱི་སྐད་གཉིས་སྡེབ་ལེགས་པར་སྦྱོར་བ་ཚིགས་སུ་བཅད་པའི་མེ་ཏོག་གི་བླ་བྲེ་སྔོན་དུ་བྲེས་ནས། འདིར་བདག་ཅག་གི་འདྲེན་མཆོག་མཚུངས་ཟླ་དང་བྲལ་བ་བྱམས་ཆེན་རྒྱལ་བའི་སྒྱུ་འཕྲུལ་ཏཱའི་སི་ཏུ་ཆོས་ཀྱི་རྒྱ་མཚོ་ཞེས་མཚན་ཉི་ཟླ་ལྟར་གྲགས་པ་དེ་ཉིད་ཞི་བའི་དབྱིངས་སུ་གཟིགས་པ་ཡོལ་བའི་ཚུལ་བསྟན་ནས། སླར་ཡང་བསྟན་འགྲོའི་དོན་ལ་ཐུགས་བསྐྱེད་ཀྱི་དམ་བཅའ་མི་ལྷོད་པར་རྣམ་རོལ་ཆུ་ཟླའི་ཟློས་གར་ཅིར་ཡང་སྒྱུར་བའི་ཡང་སྲིད་རིན་པོ་ཆེ་ཁྲིར་ཕེབས་ཀྱི་སྐབས་འདིར་ལེགས་འབུལ་ཀྱི་མཆོད་སྤྲིན་ཅུང་ཟད་སྤྲོ་བ་ལ་ཐོག་མར་ལོ་རྒྱུས་དང་འབྲེལ་བའི་ཤིས་པ་བརྗོད་པ་ཚངས་སྲས་དགྱེས་པའི་ཏམྦུ་རའི་སྒྲ་ལས་དྲངས་ཏེ་མངོན་པར་གསོལ་བ་ནི། །གདོད་ནས་རྣམ་གྲོལ་མཆོག་ཏུ་ཞི་བ་འོད་གསལ་རྟག་པ་དམ་པའི་མཁར། །ལྷུན་གྲུབ་ཉི་ཟླའི་ཚོམ་བུས་མཛེས་ཤིང་འོད་ཟེར་དྲྭ་བས་ཀུན་ནས་བརྒྱན། །མཆོག་ཏུ་མི་འགྱུར་རྡོ་རྗེའི་ལྷུན་པོ་སྐུ་བཞིའི་བང་རིམ་བཞིས་འཁྱུད་པ། །སྲིད་ཞིའི་བླ་ན་གཙུག་ཏོར་མཆོག་གྱུར་ཐེག་བརྒྱད་གསེར་རིས་དབུས་ན་བརྗིད། ༡ །བྱམས་ཆེན་ཐུགས་རྗེའི་འོད་ཟེར་རྡུལ་ཕྲེང་བྱེ་བ་ཕྲག་བརྒྱ་ཀུན་ཏུ་འཕྲོ། །སྲིད་གསུམ་རྨོངས་པའི་མུན་ཆེན་གཞིལ་ཞིང་བློ་གྲོས་དགེ་བའི་སྣང་བ་རྒྱས། །ཡང་དག་ཐར་པའི་ལམ་བཟང་སྟོན་མཁས་ཀུན་མཁྱེན་འགྲོ་བའི་བླ་མ་ནི། །ཏཱ་ཡི་སི་ཏུ་ཨོ་རྒྱན་ཆོས་ཀྱི་རྒྱལ་མཚན་གྲགས་པའི་མཚན་སྙན་ལྕི། ༢ །གང་གི་ཐུགས་རྗེ་འཛམ་བུའི་གསེར་བཟང་མོས་གུས་དག་པའི་ས་གཞི་ལ། །དུམ་བུར་འཐོར་བས་གང་འདུལ་སྤྲུལ་པའི་རྣམ་རོལ་སྣ་ཚོགས་ཅིར་ཡང་སྣང་། །འགྲོ་ལ་ཕན་པ་ལྷ་ལམ་ཡངས་པའི་རྗེས་སུ་འགྲོ་འདི་བསྟན་འགྲོའི་དབྱིག །རྡོ་རྗེ་རིན་ཆེན་རྒྱན་གྱིས་སྤྲས་པའི་མཆོད་སྡོང་སྲིད་ཞིའི་གཡང་དུ་ཁུག༣། སྔོན་ཚེ་འཕགས་ཡུལ་མ་ག་དྷཱ་རུ་མཉམ་མེད་ཟས་གཙང་སྲས་པོ་ཡིས། །ངོ་མཚར་མཛད་པའི་རོལ་གར་བཅུ་གཉིས་གཞན་ཡང་རྣམ་མང་མཛད་པ་བརྒྱ། །ཇི་སྙེད་བསྟན་པའི་འཇིག་རྟེན་ཁམས་སུ་ཕན་བདེའི་དབུགས་དབྱུང་སྦྱིན་དེ་དང་། །ཐ་དད་མ་མཆིས་བྱང་ཕྱོགས་ཐུབ་དབང་མི་ཡི་སེངྒེ་ཀུན་མཁྱེན་རྗེ། ༤ །གང་གི་རྣམ་ཐར་ཆ་ཤས་ཙམ་ཞིག་ཡིད་ལ་དྲན་པ་དེ་ཡི་མོད། །བདུད་རྩིའི་སྙིང་ལ་ཟུག་རྔུ་སྟེར་ཞིང་བདག་པོའི་རིམ་སེལ་ཀར་སུ་ར། །ནམ་ཡང་མི་བསྙེལ་དད་པའི་གེ་སར་མཆོག་ཏུ་རྒྱས་པའི་ཟེའུ་འབྲུའི་དབུས། །དགྱེས་པའི་འཛུམ་ཞལ་ཉ་རྒྱས་ཟླ་ལྟར་མཆོག་ཏུ་གསལ་བས་རྨོངས་པ་འཕྲོགས། ༥ །ཨེ་མ་བསམ་ཡས་ཡོན་ཏན་རྒྱ་མཚོ་རྡོ་རྗེའི་ལྗགས་ཀྱིས་བགྲང་ནུས་མིན། །བརྗོད་བྲལ་རང་བཞིན་གནས་ལུགས་འདི་ལ་བསམ་དང་བརྗོད་པས་ཅི་ཞིག་བྱ། །དེ་ལྟར་ན་ཡང་ཆུ་ཤེལ་ནོར་བུས་རེག་པའི་མོད་ལ་དབང་མེད་དུ། །བསྟོད་པའི་ཆུ་ཀླུང་མུ་ཏིག་སྦུ་ཕྲེང་ཆལ་ཆིལ་གཡོ་བས་རབ་ཏུ་མཆོད། ༦ །འཇམ་དབྱངས་བླ་མ་བློ་གྲོས་མི་ཟད་རྒྱ་མཚོའི་སྤྲིན་ལས་ཐོན་པ་ཡི། །དཔལ་ལྡན་ཀླུ་དབང་མཁས་གྲུབ་བྱེ་བས་ལེགས་པར་བསྟེན་པའི་གདེང་ཅན་གཙོ། །མདོ་སྔགས་ཆོས་ཚུལ་ནོར་བུའི་གྲུ་ཆར་མཛད་མེད་འཇོ་བས་ཕོངས་པ་སེལ། །ལྟ་ངན་རབ་བསལ་ཡང་དག་རིག་པའི་གློག་ཕྲེང་འཁྱུགས་དང་སྒྲ་བརྒྱ་སྒྲོགས། ༧ །རྡོ་རྗེའི་ཟེར་གྱིས་ལྟ་ངན་གླང་པོ་འགེམ་ལ་མི་འཇིགས་སྤོབས་པ་བརྟན། །འཇམ་དཔལ་རྡོ་རྗེའི་རིག་སྔགས་གྲུབ་པའི་བརྟུལ་ཞུགས་ཟླ་མེད་རྣལ་འབྱོར་རྒྱལ། །རྣམ་ཀུན་མཁྱེན་པའི་མིག་སྟོང་ལྡན་པས་ཇི་སྙེད་ཤེས་བྱའི་ཆོས་ཀུན་གསལ། །ཡང་དག་དོན་ནི་ཇི་བཞིན་གཟིགས་པའི་བདེན་དོན་དེ་བཞིན་ཉིད་དུ་གཤེགས། ༨ །དེ་ལྟར་དམ་པ་དམ་པའི་མགོན་དེ་ཡི། །རྣམ་རོལ་མཆོག་གི་སྤྲུལ་སྐུ་ཁྱོད་ཉིད་ནི། །ངེས་དོན་སྲིད་ཞིའི་འཆིང་ལས་རབ་གྲོལ་བ། །ཡོན་ཏན་རང་བཞིན་བདག་ཉིད་ཆེ་ཁྱོད་བསྔགས། ༩ །བྱིས་པར་བསྟན་ཀྱང་ཕལ་པའི་སྤྱོད་ལས་འདས། །བཟང་པོའི་དྲི་བསུང་རིང་དུ་འཕྲོ་བ་དང་། །གྲགས་སྙན་མ་ལ་ཡ་ཡི་ནགས་ཀླུང་ན། །རྣམ་པར་བརྩེ་བའི་དྲང་སྲོང་གཞོན་ནུ་ལགས། ༡༠། ཁྱོད་ཞལ་འོད་དཀར་ཅན་བཞིན་རབ་ཏུ་དཀར། །ཁྱོད་གསུང་ཨ་དཱི་ཀ་དཱིའི་གླུ་དབྱངས་ལེན། །གང་ཐུགས་ཟག་མེད་བདེ་ལ་སྙོམས་ཞུགས་པ། །གཞོན་ནུ་ཆུ་སྐྱེས་མཆོག་སྦྱིན་རྡོ་རྗེར་མཚུངས། ༡༡། ཚ་ཟེར་ཅན་གྱིས་པདྨ་རྒྱས་པ་ལྟར། །གང་གི་བློ་གྲོས་ནམ་མཁའི་ནོར་བུ་ཡིས། །སྐལ་བཟང་དད་པའི་སྨོན་ལམ་བཞད་པའི་གཉེན། །འགྱུར་བར་ཐེ་ཚོམ་སྒྲིབ་པའི་སྐབས་མ་མཆིས། ༡༢། བྱམས་པའི་ཆུ་ཁུར་ཕྱོགས་རིས་མེད་པར་སྙོམས། །ཐུགས་རྗེའི་གྲུ་ཆར་གདུལ་བྱའི་ཞིང་སར་འབེབས། །ལེགས་བྱས་དགེ་བའི་མྱུ་གུ་སྨིན་པ་འདི། །རྫོགས་ལྡན་དབྱར་གྱི་དཔལ་ཡོན་རྒྱས་པར་སྙམ། ༡༣། མཚན་དཔེའི་གཟི་བརྗིད་ལྟ་བས་མི་ངོམས་ཞིང་། །ཚངས་པའི་དབྱངས་ཀྱིས་ཆོས་སྒྲ་སྒྲོགས་མཛད་པས། །རྒྱལ་བསྟན་སྤྱི་དང་ངེས་གསང་སྙིང་པོ་ཡི། །བསྟན་པའི་རྒྱལ་མཚན་འཛིན་མཁས་གཞན་སུ་ཞིག༡༤། ག་པུར་རྡུལ་བརྩེགས་རྡོ་རྗེ་གདན་གྱི་སྤོར། །འཇིགས་བྲལ་ཆོས་ཀྱི་སེངྒེ་རབ་ཏུ་བརྟན། །བསླབ་གསུམ་གཡུ་ཡི་རལ་པས་མཛེས་པར་བརྒྱན། །བདེ་གཤེགས་གསུང་གི་ང་རོ་སྒྲོགས་མཛད་རྒྱལ། ༡༥། ཅེས་སྔོན་བྱུང་བ་ཆོས་རྗེ་གོང་མ་ཐམས་ཅད་མཁྱེན་གཟིགས་ཆེན་པོའི་རྣམ་ཐར་རྒྱ་མཚོའི་ཟེགས་མ་དང་། ད་ལྟར་གྱི་སྐབས་དོན་ལས་བརྩམས་པའི་བསྟོད་ཚིག་གི་ཕྲེང་བ་ཉུང་ངུས་མདུན་བསུས་སྟེ་དེང་གི་ཆར་གནས་ཕུན་སུམ་ཚོགས་པ་འཛམ་གླིང་བྱང་ཕྱོགས་སྤུར་རྒྱལ་བོད་ཀྱི་ལྗོངས་འདིར་བོད་དང་བོད་ཆེན་གཉིས་སུ་ཕྱེ་བ་ལས་བོད་ཆེན་པོའི་ཆར་གཏོགས་པ་མདོ་སྨད་འབྲི་ཟླ་ཟལ་མོ་སྒང་གི་ས་ཡི་ཆར་འཕགས་ཡུལ་མ་ག་དྷཱ་གཉིས་པ་ཤར་ཀཿཐོག་རྡོ་རྗེ་གདན་ཞེས་ཨོ་རྒྱན་དུས་གསུམ་མཁྱེན་པའི་རྡོ་རྗེའི་ལུང་གིས་གཏེར་ཁ་ཚད་ཐུབ་དུ་མ་ནས་ཡང་ཡང་བསྔགས་ཤིང་ལོ་ཆེན་བཻ་རོ་ཙ་ན་སོགས་གྲུབ་བརྙེས་རིག་འཛིན་རྣམས་ཀྱིས་ཞབས་ཀྱིས་བཅགས། མཐོང་ལམ་ས་དང་པོ་རབ་ཏུ་དགའ་བ་མངོན་ཏུ་མཛད་པ་དམ་པ་བདེ་བར་གཤེགས་པ་ཡབ་སྲས་ཀྱིས་གཙུག་ལག་ཁང་གི་གཞི་བཏིང་། ཆོས་ཀྱི་འཁོར་ལོ་ཆེན་པོ་བསྐོར་བའི་དགོན་གནས་ཁྱད་པར་འཕགས་པ་འོག་མིན་གྱི་ཞིང་དང་། ས་སྤྱོད་དཔལ་རི་པདྨ་འོད་ཀྱི་གཞལ་མེད་ཁང་ཆེན་པོ་དང་ཁྱད་པར་མ་མཆིས་པའི་གདན་ས་ཆེན་པོའི་འདུ་ཁང་གི་གོང་མ་རིམ་བྱོན་གྱི་བྱིན་གྱིས་བརླབས་པའི་གདོང་ལྔས་བཏེགས་པའི་ཆོས་ཀྱི་ཁྲི་ཆེན་པོ་ག་ལ་བར་སྟོན་པ་ཕུན་སུམ་ཚོགས་པ་དགའ་ལྡན་ལྷ་བརྒྱའི་བདག་པོ་༧རྒྱལ་བ་མི་ཕམ་མགོན་པོའི་རྣམ་རོལ་བྱམས་ཆེན་ཏཱ་ཡི་སི་ཏུ་ཆོས་ཀྱི་འབྱུང་གནས་ཞེས་མཚན་ཀྱི་སྙན་པས་རྒྱ་མཚོའི་ཕ་མཐར་ཁྱབ་པ་དེ་ཉིད་ཀྱི་སྐུ་ཕྲེང་བཞི་པ་བདག་ཅག་གི་དཔལ་ལྡན་བླ་མ་དམ་པ་དེ་བཞིན་གཤེགས་པ་ཐམས་ཅད་སྤྲོ་བ་དང་བསྡུ་བའི་བྱེད་པོ། ཆོས་ཐམས་ཅད་ཀྱི་འབྱུང་གནས། རྒྱལ་སྲས་བྱང་ཆུབ་སེམས་དཔའ་སྙིང་སྟོབས་ཆེན་པོ། མཁས་པ་ཐམས་ཅད་ཀྱི་གཙུག་གི་ནོར་བུ། མདོ་སྔགས་རིག་གནས་དང་བཅས་པ་ཡོངས་སུ་རྫོགས་པའི་པཎྜི་ཏ་གྲུབ་ཐོབ་རྣལ་འབྱོར་གྱི་དབང་ཕྱུག་ཆེན་པོ། བསྟན་འགྲོ་རིས་སུ་མ་ཆད་པའི་གདུལ་བྱ་ཀུན་ལ་མ་འདྲིས་པའི་མཛའ་བཤེས་ཐུགས་རྗེ་ཆེན་པོ་དང་ལྡན་པ་དེ་ཉིད། ངེས་པའི་དོན་དུ་སྐྱེ་འཆི་སྤྲོས་མཚན་ལས་འདས་ཀྱང་། དྲང་དོན་གདུལ་བྱའི་སྣང་ངོར་ཞིང་འདིར་གཟུགས་སྐུའི་མཛད་པ་ཐ་མ་ཉེ་བར་བསྟན་ནའང་། རྒྱལ་བའི་ཕྲིན་ལས་རྒྱུན་ཆད་མེད་པ་རྒྱལ་དང་དེ་སྲས་སེམས་དཔའ་ཆེན་པོ་རྣམས་ཀྱི་རང་བཞིན་དུ་གྱུར་པས་སྐུ་གསུང་ཐུགས་ཡོན་ཏན་ཕྲིན་ལས་ཀྱི་སྤྲུལ་པའི་རོལ་གར་བརྒྱ་ཕྲག་ཏུ་སྤྲོ་བར་མཛད་པ་ལས་བདག་ཅག་རྣམས་ཀྱི་སྐྱབས་མགོན་དུ་བསམ་བཞིན་བྱོན་པའི་རྗེ་བཙུན་འཇམ་དཔལ་གཞོན་ནུ་མཆོག་ཉིད་སྒ་སྟོད་ཀྱི་ས་ཡི་ཐིག་ལེ་འཕགས་མཆོག་སྤྱན་རས་གཟིགས་ཀྱི་བཞུགས་གནས་གྲུ་འཛིན་གྱི་ཕོ་བྲང་དང་ཉེ་བར་སྐུ་མཚན་དཔེའི་མེ་ཏོག་བཞད་པ་དང་། ལྔ་བརྒྱའི་གཙུག་རྒྱན་དྲི་མེད་བཤེས་གཉེན་གྱི་རོལ་གར་ཆོས་ཉིད་ཀྱི་བདེན་དོན་མངོན་སུམ་དུ་རྟོགས་པའི་འཕགས་ཆེན་གྱི་ཡེ་ཤེས་མེ་ལོང་གཙང་མའི་ངོགས་སུ་གསལ་བའི་ལུང་དོན་མངོན་གྱུར་ལྟར། བདག་ཅག་རྣམས་ཀྱི་དད་གསུམ་ཤིང་རྟའི་ཁ་ལོ་བསྒྱུར་བས་སྤྱན་དྲངས་ནས་ཞབས་པད་བཀྲ་ཤིས་ཀྱི་འཁོར་ལོ་རྩིབས་སྟོང་བཀྲ་བ་གདན་ས་ཆེན་པོར་བཀོད་དེ་འཇིགས་མེད་ཆོས་ཀྱི་ཁྲི་འཕང་མཐོན་པོར་གསང་གསུམ་ཉི་ཟླའི་གཟི་འོད་ལྟར་འཕྲོ་ཞིང་བསོད་ནམས་བརྒྱ་པའི་དཀྱིལ་འཁོར་སྒྲིབ་བྲལ་དུ་བཞུགས་པ་དང་། དུས་ཕུན་སུམ་ཚོགས་པ་ནི། དེ་ཡང་བཅོམ་ལྡན་འདས་ཀྱིས་དཔལ་ལྡན་འབྲས་སྤུངས་སུ་སྤྲུལ་པའི་ཆོས་རྒྱལ་ཟླ་བ་བཟང་པོ་ལ་ལེགས་པར་གསུངས་པའི་ཤྲཱི་ཀ་ལ་ཙཀྲའི་རྒྱུད་ཀྱི་རྒྱལ་པོ་ཆེན་པོ་བྱང་ཕྱོགས་ཤམྦྷ་ལའི་ཀ་ལ་པའི་གཞལ་མེད་ཁང་ཆེན་པོ་ནས་རིགས་ལྡན་ཆོས་ཀྱི་རྒྱལ་པོས་ཙི་ལུ་པ་དང་དུས་ཞབས་པ་ཆེན་པོར་རྒྱུད་དང་སྨིན་གྲོལ་གྱི་གདམས་པ་མཐའ་དག་སྩལ་ཏེ་རྒྱ་གར་འཕགས་པའི་ཡུལ་དབུས་སུ་དར་ཞིང་རབ་བྱུང་དང་པོ་མེ་ཡོས་ལོར་ཐོག་མར་བོད་དུ་ཕེབས་པ་ནས་བགྲང་བའི་དྲུག་ཅུའི་སྐོར་ཚེས་༡༥འདས་ཏེ་རབ་བྱུང་བཅུ་དྲུག་པའི་མགོ་ཚུགས་ནས་ལོ་ཡི་ཕུང་པོ་རིགས་བྱེད་ཀྱི་གྲངས་འདས་ཤིང་འཕགས་ཡུལ་སྟོད་འགྲེལ་པའི་སྐད་དུ་པྲ་ཛྭ་པ་ཏི། བོད་སྐད་དུ་སྐྱེས་བདག་ཅེས་རྒྱ་རྩིས་པའི་ལུགས་ཀྱི་ཟིན་ཝུའི་ཞེས་པ་ལྕགས་མོ་ལུག་གི་ལོ། དུས་འཁོར་བའི་དཔྱིད་འབྲིང་པོ། རགས་ཞིབ་མཐུན་པ། རྒྱུ་སྐར་གྱི་ལྷ་མོ་དབོ་ཡིས་ཆུ་ཤེལ་དབང་པོར་རྩེན་པའི་ཟླ་བ། རྒྱ་རྩིས་པའི་དབྱར་ར་ཤིང་མོ་སྦྲུལ་ཟླ་ཆུང་བ། རྟ་བདུན་དབང་པོ་ཉ་ཡི་ཁྱིམ་དུ་བསྐྱོད་པའི་དཀར་ཕྱོགས་ཀྱི་བཟང་པོ་གཉིས་པའི་ཚེས་གཟའ་སྐར་གྱི་འཕྲོད་སྦྱོར་ལེགས་ཤིང་ཨོ་རྒྱན་གྱི་སློབ་དཔོན་ཆེན་པོ་ཉིད་རབ་ཏུ་བྱུང་སྟེ་གུ་རུ་ཤཱཀྱ་སེང་གེའི་མཚན་གྱི་སྒྱུ་འཕྲུལ་ངོམ་པའི་དུས་ཆེན་མངོན་དུ་གྱུར་པ་ལགས། འཁོར་ཕུན་སུམ་ཚོགས་པ་བསླབ་པ་གསུམ་གྱི་ལུས་སྟོབས་ཡོངས་སུ་རྫོགས་ཤིང་། སྡེ་སྣོད་གསུམ་གྱི་འབྱོར་པའི་ཕྱུགས་པ་དང་ལུང་དང་རྟོགས་པའི་ཡོན་ཏན་རྒྱ་མཚོ་ལ་མངའ་དབང་འབྱོར་པས་འཇམ་དབྱངས་བླ་མ་གོང་མ་དེ་ཉིད་ཀྱི་སྲས་ཀྱི་ཐུ་བོ་མཁས་པའི་གཙུག་རྒྱན། གྲུབ་པའི་དབང་ཕྱུག་སྐྱབས་མགོན་མཆོག་སྤྲུལ་རིན་པོ་ཆེ་རྣམས་དང་། བརྟན་མཁས་ཕན་འདོགས་ཀྱི་ཡོན་ཏན་དུ་མས་མངོན་པར་མཐོ་བ་མཁན་ཆེན་རིན་པོ་ཆེའི་དབུས་སྡེ་སྣོད་འཛིན་པ་ཆེན་པོ་དུ་མ་དང་། ལྡན་གྲོལ་གྱི་འབྱོར་པ་དམ་པས་མཛེས་ཤིང་ངུར་སྨྲིག་འཆང་བའི་འདུས་པའི་སྡེ་ཚོགས་དམར་སེར་ཐུན་མཚམས་གསར་པའི་འོད་སྣང་ལ་འགྲན་པར་ཆས་པ་རྣམས་དང་། སྟོབས་ལྡན་གྱི་རྒྱལ་པོ། འབྱོར་ལྡན་གྱི་ཁྱིམ་བདག་སོགས་རིགས་ཅན་དྲྭ་མ་རྣམས་ཀྱི་འཁོར་ཚོགས་བགྲངས་ལས་འདས་ཤིང་། བསྟན་ལ་མངོན་པར་དགའ་བའི་དཀར་ཕྱོགས་ཀྱི་ལྷ་ཀླུ་གནོད་སྦྱིན་གཞི་བདག་བྱེ་བ་འབུམ་སྡེའི་ཚོགས་ཀྱིས་ཡོངས་སུ་བསྐོར་བ་དང་། ཆོས་ཕུན་སུམ་ཚོགས་པ་དུས་གསུམ་ཀུན་མཁྱེན་པདྨ་སཾ་བྷཱ་ཝཱའི་ཐུགས་ཀྱི་ཉིང་ཁུ། ལང་གྲོ་ལོ་ཙཱའི་ཆོས་སྐལ་ཚེ་སྒྲུབ་ཡང་གསང་བླ་མེད་ཀྱི་དཀྱིལ་འཁོར་ཆེན་པོའི་སྒྲུབ་མཆོད་དང་རྗེས་སུ་འབྲེལ་བར་ཞབས་བརྟན་མངའ་དབུལ་གྱི་ཆོ་ག་རྣམ་པར་དག་པ་དང་། ལུང་རིག་སྨྲ་བའི་དབང་པོ་རྣམས་ཀྱིས་དཔྱོད་ལྡན་ཡིད་ཀྱི་བརྟན་པ་འཕྲོག་པའི་ལེགས་བཤད་རྨད་དུ་བྱུང་བའི་མཆོད་སྤྲིན་རྒྱ་ཆེར་སྤྲོ་བས་བླ་ན་མེད་པའི་ཆོས་ཀྱི་མཆོད་པ་ཆེན་པོས་ཕྱོགས་བཅུའི་ཞིང་ཁམས་རྒྱས་པར་འགེངས་པའི་དགའ་སྟོན་ཟབ་མོ་ཉམས་སུ་མྱོང་བ་སྟེ། དེ་ལྟར་ཕུན་སུམ་ཚོགས་པ་དུ་མས་ཁྱད་པར་དུ་བྱས་པའི་སྐབས་འདིར། རྗེ་གོང་མ་དེ་ཉིད་ཀྱི་བཀའ་འབངས་ཀྱི་གྲལ་མཐར་འཁོད་པའི་རྨོངས་བརྟུལ་འདུ་ཤེས་གསུམ་པ་ཡང་སྐྱབས་མཆོག་དེ་ཉིད་ཀྱིས་ཚད་མེད་པའི་བཀའ་དྲིན་ཆེན་པོས་ཡང་ཡང་བསྐྱངས་བའི་ཉེར་ལེན་གྱི་འཐུ་ལས། དེང་གི་དུས་སུ་འཇམ་མགོན་པད་དཀར་གཞོན་ནུ་མཆོག་གི་གསེར་ཞལ་མིག་གི་བདུད་རྩིར་གྱུར། གསུང་གི་བདུད་རྩིས་རྗེས་སུ་གདམས་པའི་སྐལ་བཟང་གི་དགའ་སྟོན་གསར་དུ་འཆར་བའི་དུས་འདིར། ཡིད་ཀྱིས་སྤྲུལ་པའི་མཆོད་སྤྲིན་ཀུན་ཏུ་བཟང་པོའི་རྣམ་ཐར་ལ་ཅོ་འདྲི་བ་བདག་གིར་བྱེད་པ་དང་ལྷན་ཅིག །དངོས་འབྱོར་གྱི་མཆོད་སྤྲིན་རྒྱ་ཆེར་སྟོབས་པའི་དུས་ཁེལ་གྱུར་ཀྱང་། རྟེན་བཞེངས་སོགས་ཀྱི་བགྱི་སྒོ་མང་བས་རེ་ཞིག་དངོས་རྫས་ཀྱི་བདོག་པ་ཕྲ་མོ་ཆུ་ཐིག་གི་ཟེག་མ་ཙམ་མཎྜལ་མཚོན་བྱེད་དུ་འབུལ་བ་ལ། ཐོག་མར། བཀྲ་ཤིས་པའི་ལྷ་རྫས་ཉིན་མོ་བདེ་ལེགས་ཟླ་ཞུན་ཐགས་སུ་བཏགས་པའི་མདང་ལྡན། ལི་ཡི་མཎྜལ་སྣོད་བཅུད་རི་གླིང་གི་ཚོམ་བུས་བརྒྱན་པ། བཀྲ་ཤིས་རྫས་བརྒྱད་ཀྱི་ཙཀ་ལི། གང་སྐུ་བསྐལ་པ་རྒྱ་མཚོར་ཚེ་འོད་མཐའ་ཡས་ཀྱི་ངོ་བོར་འཚོ་ཞིང་བཞེས་པའི་སླད་དུ་རྒྱལ་བ་ཚེ་དཔག་མེད་ཀྱི་སྣང་བརྙན་གསེར་ཟངས་ལས་གྲུབ་པ། གསུང་འགགས་པ་མེད་པ་རིས་མེད་ཆོས་ཚུལ་རྒྱ་མཚོའི་སྒྲ་དབྱངས་གདུལ་བྱའི་བསམ་པ་དང་མཐུན་པར་འཇུག་པའི་རྟེན་འབྱུང་དུ་བདག་ཅག་གི་སྟོན་པའི་སྐྱེས་རབས་སོ་བཞི་པ་སློབ་དཔོན་དཔའ་བོ་ཞབས་ཀྱིས་མཛད་པ་རྒྱལ་དབང་རང་བྱུང་རྡོ་རྗེས་ཁ་སྐོངས་ཅན་གྱི་པུསྟི་ཀཿགང་ཐུགས་བདེ་སྟོང་ཟུང་འཇུག་སྲིད་ཞི་ཀུན་ཁྱབ་ཀ་དག་འགྱུར་མེད་འོད་གསལ་ལྷུན་གྲུབ་ཆེན་པོ་ལས་ནམ་ཡང་མི་འདའ་བར་མཚོན་བྱེད་རྡོ་རྗེ་དང་དྲིལ་བུ། ཡོན་ཏན་དབང་བཅུ་མི་ཟད་གྲུབ་གཉིས་གཏེར་གྱི་འབྱོར་པས་མངོན་པར་མཐོ་བ་མཚོན་བྱེད་ཟངས་གསེར་གྱི་ཚེ་ཡི་བུམ་བཟང་ཁ་རྒྱུན་དང་སྟེགས་བཅས་རང་འགྲིགས། ཕྲིན་ལས་ཀུན་ཁྱབ་རྡོ་རྗེའི་རོལ་མོ་ཕྱོགས་ཐམས་ཅད་དུ་ཁྱབ་པར་སྒྲོགས་པའི་རྟེན་འབྱུང་དུ་སྦུབས་ཆོལ་ཆ། ༡གསེར་དངུལ་ཕྲ་མའི་ནང་མཆོད་ཁེབས་ལྡན་ཟངས་གསེར་འབྲུ་ཕོར་ལྷུ་གཉིས་མ། ཐོད་ཌཾ་དངུལ་དཀྲིས་ཅན་གཡུ་བྱེ་ཕྲ་ཅན་རྒྱ་ཚེམ་འཕན་ལྡན། རག་གི་སྨན་རཀ་ཆ་༡སྟེགས་བཅས་ཁེབས་ལྡན། དངུལ་གྱི་བདུན་ཚར་ཆ། ༡དངུལ་གྱི་རྐོང་བུ་ཆ། ༡དངུལ་གྱི་ཕུད་ཕོར། ༡ཆུ་ཚོད་འཁོར་ལོ། ༡ཤེལ་དམ་ཆ། ༡མགྲོན་བུ་ཆེ་ཆ། ༡སྦ་གླིང་ཆ། ༡རྒྱ་སྣག་སྦགས་ཆ། ༡ལིང་སྣས་སྤྲས་པའི་སྟེགས་ཁེབས། ༡ཉ་ཕྱིས་པ་ཏྲ་ཅན་གྱི་དུང་ཕོར་ཆ། ༡ཀར་ཡོལ་འབྲུག་མ་ཆ། ༡ཤེལ་སྡེར། ༡གུ་ཤན་གསོལ་སྡེར། ༡གུར་ཤན་སྣོད་ཐོག་འོག་ཅན་ཁེབས་འབྱར། ༡རག་སྡེར་པད་ཁ། ༡གསེར་སྤར། ༡ཤོག་མེ་ཆ། ༡དུང་ཆོས་སྤུས་ལྡན། ༡ལི་མེ་སྤུས་ལྡན། ༡ཀུ་ཤ་དང་། རྨ་བྱའི་སྒྲོ་ཕོན། རྒྱ་གར་རས་ཚོན་ཁྲ་ཅན་གྱི་གཞི་ཁེབས། ཆུ་ཚགས། ༡སྟོང་སྐུད་ཆོས་ཐིགས་ཆ། ༡ཤུད་གཙང་ས་དཀར། སེར། དམར། སྔོ། ལྗང་། ཟམ་དཀར། དམར། ལྗང་། ནག །སྔོ། སེར་བཅས་ཤར་རེ། ཧུ་ཛུས་སེར་པོའི་སྐ་རགས། ཀྱིན་ཁབ་སྟོད་འགག །ཨ་ཐི་སེར་པོ་ཡུག་ཆེན། ཕྲུག་བན་ཚོས་བུབ། ༡རྒྱ་གར་ཐེར་མའི་སྐུ་གཟན་རྒྱུ། གམ་གྲུམ། ནར་གདན། བཟང་གོས་དམར་ཁ་དོ། ༡སྔོ་ཁ་དོ། ༡སེར་པོ་གཡུང་དྲུང་ལག་བརྒྱུད་ཁ་བཅུ། སྔོོ་ཚོས་གཉིས། ལྗང་ཚོས། ༢དམར་ཚོས། ༢སྨུག་ཚོས་གཉིས་རྣམས་ཁ་དོ་རེ། སྦ་ཇ་གྲུ་གུ། ༡༢ཁྲུས་རས་དཀར། ཞྭ་སྣམ་སེར། རྟ་སྡོམ་ཆ། ༡ཡང་ལ་སྦགས་ཆ། ༢བལ་རས་མཆོད་བཅུའི་ཡོལ་བ། རས་འཐགས་འགའ་དཀར་ཁྲ། དམར་ཁྲ། ཕྲུག་པིར་ཐིག་བུབ། ༡མགོ་མཚལ་ཁ་གང་། ཐོག་སྣམ་ལྗང་ཁ་ཕྱེད། ཟིང་ལིང་ཏིང་ཚར་བདུན་ཆ་ཐོག་འོག་འབྱར། ཁོག་ཚི་ཆ། ༨གཟིགས་རྟ་ཆ། ༡ཤ་ཀོ་བུབ། ༡རྣ་པགས། ༢བླ་ཤུན། ༢ཁ་ཤའི་པགས་པ། རལ་གྲི། མེ་བོག །ལྟིར་དཀར། ཟངས་ལྟིར། ཟངས་རག་ཕྲ་མའི་ཞག་སྤར། ཝ། སྤྱང་། སྲམ། གཡི། གུང་། གཟིག །སྟག་བཅས་ཀྱི་ལྤགས་ཤུན། འབྲི། ༢ཁལ། ༣མཛོ་མོ། ༡ཆེ་མཛོ། ༡ཆིབས་དིལ་མགོ་བྲ་ནག་ཟིང་རྟ་སྤུས་ལྡན་རྡོ་ཚད་གསུམ་འགྲོ་ངེས། ཆིབས་རོལ་དཀྱུས་རྟ། ༡དྲེའུ་ཨ་མདོ། ༡ཇ་སྒམ། ༡འབྲུ་ཁལ་ཆིག་བརྒྱ་ལྔ་བཅུ་ཐམ་པ། དངུལ་སྲང་བརྒྱ་ཐམ་པ། སྐྱོགས་དཀར་ཆ། ༡སྟན་དཀར་རྡོ་རྗེ་རྒྱ་གྲམ་དང་གཡུང་དྲུང་གི་རི་མོ་བཀྲ་བ། ཀཱ་ཤི་ཡུག་རིང་བཅས་རྣམ་གྲངས་བརྒྱ་ཕྲག་གཅིག་དང་ལྔ་བཅུ་ང་བདུན་འབུལ་ལམ་ཞུ་ན། དངོས་པོའི་མཆོད་རྫས་པད་སྣལ་ལྟར་ཤིན་ཏུ་ཕྲ་ཡང་། དགྱེས་པའི་སྤྱན་ཟུར་གྱི་འབབ་སྟེགས་དམ་པར་ཡུད་ཙམ་སྨིན་པ་དང་། སླར་ཡང་གསོལ་པ། ཤྲཱི་བི་ཛ་ཡནྟུ། ཚེ་འོད་དཔག་མེད་རྔ་སྒྲའི་རྒྱལ་པོ་ཚེ་ཡུམ་ལྷ་མོ་གོས་དཀར་མོ། །ཡིད་བཞིན་འཁོར་ལོ་རྣམ་པར་རྒྱལ་མ་རྨ་བྱ་ཆེན་མོ་འཆི་བདག་འཇོམས། །འཆི་མེད་རིག་འཛིན་རྡོ་རྗེའི་སྐུ་བརྙེས་པདྨ་ལས་གྲོལ་སྤྲུལ་པའི་སྐུ། །གྲུབ་པའི་རྒྱལ་མོ་མི་ཏྲ་ཛོ་ཀི་དགྲ་ལས་རྣམ་རྒྱལ་བརྩོན་འགྲུས་བཟང་། ༡ །འཆི་མེད་རྡོ་རྗེའི་སྲོག་གི་ཀ་བ་རྟག་པར་སྒྲུབ་ལ་ཟླ་མེད་པའི། །གྲུབ་པའི་རིག་འཛིན་བྱེ་བའི་ཚོགས་ཀྱིས་རྒྱལ་བའི་མྱུ་གུ་བསྐྱེད་བསྲིངས་ཏེ། །མཁྱེན་བརྩེའི་བསིལ་ཟེར་འོད་སྣང་མཐའ་ཡས་ངག་གི་དབང་ཕྱུག་འཇམ་པའི་དཔལ། །རྡོ་རྗེ་སེམས་དཔའི་ལང་ཚོ་རབ་རྒྱས་བདེ་ཆེན་སྙིང་རྗེས་རབ་མྱོས་པ། ༢ །དཔལ་ལྡན་ཁྱབ་བདག་འཇིག་རྟེན་མགོན་པོ་རྡོ་རྗེའི་ཁྲི་ལ་རྟག་བཞུགས་ཤིང་། །གང་འདུལ་གདུལ་བྱའི་བློ་དང་མཚམས་པའི་ཆོས་ཀྱི་འཁོར་ལོ་ཕྱོགས་བརྒྱར་བསྐོར། །ལམ་ལྔར་འཕྱན་པའི་འགྲོ་ཚོགས་རྒྱ་མཚོ་ཐར་པའི་ཁང་བཟང་ཉམས་དགའ་བར། །རིམ་གྱིས་འཁྲིད་ལ་དུབ་པ་མི་མངའ་རྒྱལ་སྲས་སྙིང་སྟོབས་ཆེན་པོ་རྒྱལ། ༣ །གང་གི་རང་བཞིན་ནམ་ཡང་འགྱུར་མེད་རྡོ་རྗེའི་ཆོས་བདུན་ངོ་བོ་རུ། །མི་གཡོ་མི་འཕོ་བརྟན་པར་བཞུགས་ནས་བདག་སོགས་འགྲོ་ལ་རྗེས་བརྩེ་བའི། །ཐུགས་རྗེའི་སྤྱན་གྱི་འདབ་མ་བཟང་པོས་ཡང་ཡང་རྟག་ཏུ་སྐྱོབས་པ་དང་། །མཁས་ཚུལ་གསུམ་གྱིས་ཐུབ་བསྟན་སྒྲོན་མེ་སྲིད་མཐའི་བར་དུ་སྣང་བར་མཛོད། ༤ །བར་ཆད་བདུད་ཀྱི་གཡུལ་ལས་རྣམ་རྒྱལ་ཞིང་། །ཐོས་བསམ་སྒོམ་པའི་རྩལ་ཆེན་རྫོགས་པ་དང་། །འཕགས་ནོར་རིན་ཆེན་བདུན་གྱིས་མངོན་མཐོ་བའི། །ཆོས་ཀྱི་རྒྱལ་པོ་བསྐལ་བརྒྱར་ཞབས་བརྟན་གསོལ། ༥ །བསྟན་འཛིན་སྐྱེས་རྣམས་སྐུ་ཚེ་བརྟན་པ་དང་། །བསྟན་པའི་སྦྱིན་བདག་དབུ་འཕང་རབ་མཐོ་ཞིང་། །བསྟན་ལ་དད་རྣམས་བསམ་དོན་ཡིད་བཞིན་འགྲུབ། །བསྟན་པའི་ཉེར་འཚེ་མིང་ཡང་མེད་པར་ཤོག༦། དཔལ་ལྡན་བླ་མ་རྒྱལ་བ་རྒྱ་མཚོ་དེ་སྲས་འཕགས་པའི་ཚོགས་རྣམས་ཀྱི། །ཐུགས་བསྐྱེད་སྨོན་ལམ་མཛད་པ་ཕྲིན་ལས་ནུས་མཐུ་བསམ་གྱིས་མི་ཁྱབ་པ། །དཀའ་བ་མེད་པར་ལྷུན་གྱིས་གྲུབ་སྟེ་རྒྱལ་སྲས་མཆོག་ལ་ཡོངས་རྫོགས་ཤིང་། །དཔག་བསམ་ཤིང་དང་ཡིད་བཞིན་ནོར་ལྟར་འགྲོ་བའི་རེ་འདོད་ཡོང་བསྐོང་ཤོག༧། སྦྱིན་པའི་གསེར༷་ཉ༷་ཚུལ་ཁྲིམས་བུམ༷་བཟ༷ང་བཟོད་པའི་པ༷དྨ༷་དཀར་པོ་དང་། །བརྩོན་འགྲུས་འཁོར༷་ལོ༷་བསམ་བཏན་དཔལ༷་བེ༷་ཤེས་རབ་དུང༷་ཆེན༷་གཡས་སུ་འཁྱིལ། །ཕྱོགས་ལས་རྣམ་རྒྱལ་མི་ནུབ་རྒྱལ༷་མཚན༷་དབང་བཅུའི་དར་གྱི་ཤམ་བུ་གཡོ། །ཕུལ་བྱུང་རྒྱལ་བའི་བཀྲ་ཤིས་རྟགས་ཀྱིས་ལྷ་མིའི་མགོན་ཁྱོད་མཛེས་གྱུར་ཅིག །མེ༷་ལོ༷ང་གྷི་ཝ༷ཾ་བ་མཆོག་ཞོ༷་དཀར་ཚེ་ཡི་ལྗོན་བཟང་དུཪྺ༷་དང་། །བིལ༷་བའི་འབྲས་བཟང་དབང་མཛད་ལི༷་ཁྲི་ཆོས་ཀྱི་དུང༷་སྒྲས་ཁམས་གསུམ་ཁྱབ། །བགེགས་ཀུན་འཇོམས་བྱེད་ཡུང༷ས་དཀར་ལ་སོགས་བཀྲ་ཤིས་དགེ་བའི་རྫས༷་རྣམས་ཀྱིས། །དུས་ཀུན་བཀྲ་ཤིས་དཔལ་གྱི་འབྱོར་པས་ཕྱོགས་རྣམས་ཀུན་ཏུ་བཀྲ་ཤིས་ཤོག །སརྦ་དཱ་ཀ་ལྱཱ་ཎཾ་བྷ་ཝ་ཏུ།། །།

[edit]

@#/__/kaHthog si tu rin po cher khri ston legs 'bul gyi yi ge bkra shis dbyangs snyan ces bya ba bzhugs so/__/ bkra shis mtshan gyi gdugs dkar gsar pa lhar bcas bla na brjid pa'i sku/__/bkra shis zhi bsil bdud rtsi'i snang bas 'gro rnams gdung ba sel ba'i gsungs/__/bkra shis zag bral rnam par mi rtog shes pa kun la khyab pa'i thugs/__/bkra shis gsang gsum bsam mi khyab pa don kun grub pas dge legs stsol/__/ces mnyam med shAkya'i rgyal por bsngags pa brjod pa saM bod kyi skad gnyis sdeb legs par sbyor ba tshigs su bcad pa'i me tog gi bla bre sngon du bres nas/__'dir bdag cag gi 'dren mchog mtshungs zla dang bral ba byams chen rgyal ba'i sgyu 'phrul tA'i si tu chos kyi rgya mtsho zhes mtshan nyi zla ltar grags pa de nyid zhi ba'i dbyings su gzigs pa yol ba'i tshul bstan nas/__slar yang bstan 'gro'i don la thugs bskyed kyi dam bca' mi lhod par rnam rol chu zla'i zlos gar cir yang sgyur ba'i yang srid rin po che khrir phebs kyi skabs 'dir legs 'bul kyi mchod sprin cung zad spro ba la thog mar lo rgyus dang 'brel ba'i shis pa brjod pa tshangs sras dgyes pa'i tam+bu ra'i sgra las drangs te mngon par gsol ba ni/__/gdod nas rnam grol mchog tu zhi ba 'od gsal rtag pa dam pa'i mkhar/__/lhun grub nyi zla'i tshom bus mdzes shing 'od zer drwa bas kun nas brgyan/__/mchog tu mi 'gyur rdo rje'i lhun po sku bzhi'i bang rim bzhis 'khyud pa/__/srid zhi'i bla na gtsug tor mchog gyur theg brgyad gser ris dbus na brjid/__1_/byams chen thugs rje'i 'od zer rdul phreng bye ba phrag brgya kun tu 'phro/__/srid gsum rmongs pa'i mun chen gzhil zhing blo gros dge ba'i snang ba rgyas/__/yang dag thar pa'i lam bzang ston mkhas kun mkhyen 'gro ba'i bla ma ni/__/tA yi si tu o rgyan chos kyi rgyal mtshan grags pa'i mtshan snyan lci/__2_/gang gi thugs rje 'dzam bu'i gser bzang mos gus dag pa'i sa gzhi la/__/dum bur 'thor bas gang 'dul sprul pa'i rnam rol sna tshogs cir yang snang /__/'gro la phan pa lha lam yangs pa'i rjes su 'gro 'di bstan 'gro'i dbyig__/rdo rje rin chen rgyan gyis spras pa'i mchod sdong srid zhi'i g.yang du khug3/__sngon tshe 'phags yul ma ga d+hA ru mnyam med zas gtsang sras po yis/__/ngo mtshar mdzad pa'i rol gar bcu gnyis gzhan yang rnam mang mdzad pa brgya/__/ji snyed bstan pa'i 'jig rten khams su phan bde'i dbugs dbyung sbyin de dang /__/tha dad ma mchis byang phyogs thub dbang mi yi seng+ge kun mkhyen rje/__4_/gang gi rnam thar cha shas tsam zhig yid la dran pa de yi mod/__/bdud rtsi'i snying la zug rngu ster zhing bdag po'i rim sel kar su ra/__/nam yang mi bsnyel dad pa'i ge sar mchog tu rgyas pa'i ze'u 'bru'i dbus/__/dgyes pa'i 'dzum zhal nya rgyas zla ltar mchog tu gsal bas rmongs pa 'phrogs/__5_/e ma bsam yas yon tan rgya mtsho rdo rje'i ljags kyis bgrang nus min/__/brjod bral rang bzhin gnas lugs 'di la bsam dang brjod pas ci zhig bya/__/de ltar na yang chu shel nor bus reg pa'i mod la dbang med du/__/bstod pa'i chu klung mu tig sbu phreng chal chil g.yo bas rab tu mchod/__6_/'jam dbyangs bla ma blo gros mi zad rgya mtsho'i sprin las thon pa yi/__/dpal ldan klu dbang mkhas grub bye bas legs par bsten pa'i gdeng can gtso/__/mdo sngags chos tshul nor bu'i gru char mdzad med 'jo bas phongs pa sel/__/lta ngan rab bsal yang dag rig pa'i glog phreng 'khyugs dang sgra brgya sgrogs/__7_/rdo rje'i zer gyis lta ngan glang po 'gem la mi 'jigs spobs pa brtan/__/'jam dpal rdo rje'i rig sngags grub pa'i brtul zhugs zla med rnal 'byor rgyal/__/rnam kun mkhyen pa'i mig stong ldan pas ji snyed shes bya'i chos kun gsal/__/yang dag don ni ji bzhin gzigs pa'i bden don de bzhin nyid du gshegs/__8_/de ltar dam pa dam pa'i mgon de yi/__/rnam rol mchog gi sprul sku khyod nyid ni/__/nges don srid zhi'i 'ching las rab grol ba/__/yon tan rang bzhin bdag nyid che khyod bsngags/__9_/byis par bstan kyang phal pa'i spyod las 'das/__/bzang po'i dri bsung ring du 'phro ba dang /__/grags snyan ma la ya yi nags klung na/__/rnam par brtse ba'i drang srong gzhon nu lags/__10/__khyod zhal 'od dkar can bzhin rab tu dkar/__/khyod gsung a dI ka dI'i glu dbyangs len/__/gang thugs zag med bde la snyoms zhugs pa/__/gzhon nu chu skyes mchog sbyin rdo rjer mtshungs/__11/__tsha zer can gyis pad+ma rgyas pa ltar/__/gang gi blo gros nam mkha'i nor bu yis/__/skal bzang dad pa'i smon lam bzhad pa'i gnyen/__/'gyur bar the tshom sgrib pa'i skabs ma mchis/__12/__byams pa'i chu khur phyogs ris med par snyoms/__/thugs rje'i gru char gdul bya'i zhing sar 'bebs/__/legs byas dge ba'i myu gu smin pa 'di/__/rdzogs ldan dbyar gyi dpal yon rgyas par snyam/__13/__mtshan dpe'i gzi brjid lta bas mi ngoms zhing /__/tshangs pa'i dbyangs kyis chos sgra sgrogs mdzad pas/__/rgyal bstan spyi dang nges gsang snying po yi/__/bstan pa'i rgyal mtshan 'dzin mkhas gzhan su zhig14/__ga pur rdul brtsegs rdo rje gdan gyi spor/__/'jigs bral chos kyi seng+ge rab tu brtan/__/bslab gsum g.yu yi ral pas mdzes par brgyan/__/bde gshegs gsung gi nga ro sgrogs mdzad rgyal/__15/__ces sngon byung ba chos rje gong ma thams cad mkhyen gzigs chen po'i rnam thar rgya mtsho'i zegs ma dang /__da ltar gyi skabs don las brtsams pa'i bstod tshig gi phreng ba nyung ngus mdun bsus ste deng gi char gnas phun sum tshogs pa 'dzam gling byang phyogs spur rgyal bod kyi ljongs 'dir bod dang bod chen gnyis su phye ba las bod chen po'i char gtogs pa mdo smad 'bri zla zal mo sgang gi sa yi char 'phags yul ma ga d+hA gnyis pa shar kaHthog rdo rje gdan zhes o rgyan dus gsum mkhyen pa'i rdo rje'i lung gis gter kha tshad thub du ma nas yang yang bsngags shing lo chen bai ro tsa na sogs grub brnyes rig 'dzin rnams kyis zhabs kyis bcags/__mthong lam sa dang po rab tu dga' ba mngon tu mdzad pa dam pa bde bar gshegs pa yab sras kyis gtsug lag khang gi gzhi bting /__chos kyi 'khor lo chen po bskor ba'i dgon gnas khyad par 'phags pa 'og min gyi zhing dang /__sa spyod dpal ri pad+ma 'od kyi gzhal med khang chen po dang khyad par ma mchis pa'i gdan sa chen po'i 'du khang gi gong ma rim byon gyi byin gyis brlabs pa'i gdong lngas btegs pa'i chos kyi khri chen po ga la bar ston pa phun sum tshogs pa dga' ldan lha brgya'i bdag po 7rgyal ba mi pham mgon po'i rnam rol byams chen tA yi si tu chos kyi 'byung gnas zhes mtshan kyi snyan pas rgya mtsho'i pha mthar khyab pa de nyid kyi sku phreng bzhi pa bdag cag gi dpal ldan bla ma dam pa de bzhin gshegs pa thams cad spro ba dang bsdu ba'i byed po/__chos thams cad kyi 'byung gnas/__rgyal sras byang chub sems dpa' snying stobs chen po/__mkhas pa thams cad kyi gtsug gi nor bu/__mdo sngags rig gnas dang bcas pa yongs su rdzogs pa'i paN+Di ta grub thob rnal 'byor gyi dbang phyug chen po/__bstan 'gro ris su ma chad pa'i gdul bya kun la ma 'dris pa'i mdza' bshes thugs rje chen po dang ldan pa de nyid/__nges pa'i don du skye 'chi spros mtshan las 'das kyang /__drang don gdul bya'i snang ngor zhing 'dir gzugs sku'i mdzad pa tha ma nye bar bstan na'ang /__rgyal ba'i phrin las rgyun chad med pa rgyal dang de sras sems dpa' chen po rnams kyi rang bzhin du gyur pas sku gsung thugs yon tan phrin las kyi sprul pa'i rol gar brgya phrag tu spro bar mdzad pa las bdag cag rnams kyi skyabs mgon du bsam bzhin byon pa'i rje btsun 'jam dpal gzhon nu mchog nyid sga stod kyi sa yi thig le 'phags mchog spyan ras gzigs kyi bzhugs gnas gru 'dzin gyi pho brang dang nye bar sku mtshan dpe'i me tog bzhad pa dang /__lnga brgya'i gtsug rgyan dri med bshes gnyen gyi rol gar chos nyid kyi bden don mngon sum du rtogs pa'i 'phags chen gyi ye shes me long gtsang ma'i ngogs su gsal ba'i lung don mngon gyur ltar/__bdag cag rnams kyi dad gsum shing rta'i kha lo bsgyur bas spyan drangs nas zhabs pad bkra shis kyi 'khor lo rtsibs stong bkra ba gdan sa chen por bkod de 'jigs med chos kyi khri 'phang mthon por gsang gsum nyi zla'i gzi 'od ltar 'phro zhing bsod nams brgya pa'i dkyil 'khor sgrib bral du bzhugs pa dang /__dus phun sum tshogs pa ni/__de yang bcom ldan 'das kyis dpal ldan 'bras spungs su sprul pa'i chos rgyal zla ba bzang po la legs par gsungs pa'i shrI ka la tsakra'i rgyud kyi rgyal po chen po byang phyogs sham+b+ha la'i ka la pa'i gzhal med khang chen po nas rigs ldan chos kyi rgyal pos tsi lu pa dang dus zhabs pa chen por rgyud dang smin grol gyi gdams pa mtha' dag stsal te rgya gar 'phags pa'i yul dbus su dar zhing rab byung dang po me yos lor thog mar bod du phebs pa nas bgrang ba'i drug cu'i skor tshes 15'das te rab byung bcu drug pa'i mgo tshugs nas lo yi phung po rigs byed kyi grangs 'das shing 'phags yul stod 'grel pa'i skad du pra dz+wa pa ti/__bod skad du skyes bdag ces rgya rtsis pa'i lugs kyi zin wu'i zhes pa lcags mo lug gi lo/__dus 'khor ba'i dpyid 'bring po/__rags zhib mthun pa/__rgyu skar gyi lha mo dbo yis chu shel dbang por rtsen pa'i zla ba/__rgya rtsis pa'i dbyar ra shing mo sbrul zla chung ba/__rta bdun dbang po nya yi khyim du bskyod pa'i dkar phyogs kyi bzang po gnyis pa'i tshes gza' skar gyi 'phrod sbyor legs shing o rgyan gyi slob dpon chen po nyid rab tu byung ste gu ru shAkya seng ge'i mtshan gyi sgyu 'phrul ngom pa'i dus chen mngon du gyur pa lags/__'khor phun sum tshogs pa bslab pa gsum gyi lus stobs yongs su rdzogs shing /__sde snod gsum gyi 'byor pa'i phyugs pa dang lung dang rtogs pa'i yon tan rgya mtsho la mnga' dbang 'byor pas 'jam dbyangs bla ma gong ma de nyid kyi sras kyi thu bo mkhas pa'i gtsug rgyan/__grub pa'i dbang phyug skyabs mgon mchog sprul rin po che rnams dang /__brtan mkhas phan 'dogs kyi yon tan du mas mngon par mtho ba mkhan chen rin po che'i dbus sde snod 'dzin pa chen po du ma dang /__ldan grol gyi 'byor pa dam pas mdzes shing ngur smrig 'chang ba'i 'dus pa'i sde tshogs dmar ser thun mtshams gsar pa'i 'od snang la 'gran par chas pa rnams dang /__stobs ldan gyi rgyal po/__'byor ldan gyi khyim bdag sogs rigs can drwa ma rnams kyi 'khor tshogs bgrangs las 'das shing /__bstan la mngon par dga' ba'i dkar phyogs kyi lha klu gnod sbyin gzhi bdag bye ba 'bum sde'i tshogs kyis yongs su bskor ba dang /__chos phun sum tshogs pa dus gsum kun mkhyen pad+ma saM b+hA wA'i thugs kyi nying khu/__lang gro lo tsA'i chos skal tshe sgrub yang gsang bla med kyi dkyil 'khor chen po'i sgrub mchod dang rjes su 'brel bar zhabs brtan mnga' dbul gyi cho ga rnam par dag pa dang /__lung rig smra ba'i dbang po rnams kyis dpyod ldan yid kyi brtan pa 'phrog pa'i legs bshad rmad du byung ba'i mchod sprin rgya cher spro bas bla na med pa'i chos kyi mchod pa chen pos phyogs bcu'i zhing khams rgyas par 'gengs pa'i dga' ston zab mo nyams su myong ba ste/__de ltar phun sum tshogs pa du mas khyad par du byas pa'i skabs 'dir/__rje gong ma de nyid kyi bka' 'bangs kyi gral mthar 'khod pa'i rmongs brtul 'du shes gsum pa yang skyabs mchog de nyid kyis tshad med pa'i bka' drin chen pos yang yang bskyangs ba'i nyer len gyi 'thu las/__deng gi dus su 'jam mgon pad dkar gzhon nu mchog gi gser zhal mig gi bdud rtsir gyur/__gsung gi bdud rtsis rjes su gdams pa'i skal bzang gi dga' ston gsar du 'char ba'i dus 'dir/__yid kyis sprul pa'i mchod sprin kun tu bzang po'i rnam thar la co 'dri ba bdag gir byed pa dang lhan cig__/dngos 'byor gyi mchod sprin rgya cher stobs pa'i dus khel gyur kyang /__rten bzhengs sogs kyi bgyi sgo mang bas re zhig dngos rdzas kyi bdog pa phra mo chu thig gi zeg ma tsam maN+Dal mtshon byed du 'bul ba la/__thog mar/__bkra shis pa'i lha rdzas nyin mo bde legs zla zhun thags su btags pa'i mdang ldan/__li yi maN+Dal snod bcud ri gling gi tshom bus brgyan pa/__bkra shis rdzas brgyad kyi tsaka li/__gang sku bskal pa rgya mtshor tshe 'od mtha' yas kyi ngo bor 'tsho zhing bzhes pa'i slad du rgyal ba tshe dpag med kyi snang brnyan gser zangs las grub pa/__gsung 'gags pa med pa ris med chos tshul rgya mtsho'i sgra dbyangs gdul bya'i bsam pa dang mthun par 'jug pa'i rten 'byung du bdag cag gi ston pa'i skyes rabs so bzhi pa slob dpon dpa' bo zhabs kyis mdzad pa rgyal dbang rang byung rdo rjes kha skongs can gyi pusti kaHgang thugs bde stong zung 'jug srid zhi kun khyab ka dag 'gyur med 'od gsal lhun grub chen po las nam yang mi 'da' bar mtshon byed rdo rje dang dril bu/__yon tan dbang bcu mi zad grub gnyis gter gyi 'byor pas mngon par mtho ba mtshon byed zangs gser gyi tshe yi bum bzang kha rgyun dang stegs bcas rang 'grigs/__phrin las kun khyab rdo rje'i rol mo phyogs thams cad du khyab par sgrogs pa'i rten 'byung du sbubs chol cha/__1gser dngul phra ma'i nang mchod khebs ldan zangs gser 'bru phor lhu gnyis ma/__thod DaM dngul dkris can g.yu bye phra can rgya tshem 'phan ldan/__rag gi sman raka cha 1stegs bcas khebs ldan/__dngul gyi bdun tshar cha/__1dngul gyi rkong bu cha/__1dngul gyi phud phor/__1chu tshod 'khor lo/__1shel dam cha/__1mgron bu che cha/__1sba gling cha/__1rgya snag sbags cha/__1ling snas spras pa'i stegs khebs/__1nya phyis pa tra can gyi dung phor cha/__1kar yol 'brug ma cha/__1shel sder/__1gu shan gsol sder/__1gur shan snod thog 'og can khebs 'byar/__1rag sder pad kha/__1gser spar/__1shog me cha/__1dung chos spus ldan/__1li me spus ldan/__1ku sha dang /__rma bya'i sgro phon/__rgya gar ras tshon khra can gyi gzhi khebs/__chu tshags/__1stong skud chos thigs cha/__1shud gtsang sa dkar/__ser/__dmar/__sngo/__ljang /__zam dkar/__dmar/__ljang /__nag__/sngo/__ser bcas shar re/__hu dzus ser po'i ska rags/__kyin khab stod 'gag__/a thi ser po yug chen/__phrug ban tshos bub/__1rgya gar ther ma'i sku gzan rgyu/__gam grum/__nar gdan/__bzang gos dmar kha do/__1sngo kha do/__1ser po g.yung drung lag brgyud kha bcu/__sngo+o tshos gnyis/__ljang tshos/__2dmar tshos/__2smug tshos gnyis rnams kha do re/__sba ja gru gu/__12khrus ras dkar/__zhwa snam ser/__rta sdom cha/__1yang la sbags cha/__2bal ras mchod bcu'i yol ba/__ras 'thags 'ga' dkar khra/__dmar khra/__phrug pir thig bub/__1mgo mtshal kha gang /__thog snam ljang kha phyed/__zing ling ting tshar bdun cha thog 'og 'byar/__khog tshi cha/__8gzigs rta cha/__1sha ko bub/__1rna pags/__2bla shun/__2kha sha'i pags pa/__ral gri/__me bog__/ltir dkar/__zangs ltir/__zangs rag phra ma'i zhag spar/__wa/__spyang /__sram/__g.yi/__gung /__gzig__/stag bcas kyi lpags shun/__'bri/__2khal/__3mdzo mo/__1che mdzo/__1chibs dil mgo bra nag zing rta spus ldan rdo tshad gsum 'gro nges/__chibs rol dkyus rta/__1dre'u a mdo/__1ja sgam/__1'bru khal chig brgya lnga bcu tham pa/__dngul srang brgya tham pa/__skyogs dkar cha/__1stan dkar rdo rje rgya gram dang g.yung drung gi ri mo bkra ba/__kA shi yug ring bcas rnam grangs brgya phrag gcig dang lnga bcu nga bdun 'bul lam zhu na/__dngos po'i mchod rdzas pad snal ltar shin tu phra yang /__dgyes pa'i spyan zur gyi 'bab stegs dam par yud tsam smin pa dang /__slar yang gsol pa/__shrI bi dza yan+tu/__tshe 'od dpag med rnga sgra'i rgyal po tshe yum lha mo gos dkar mo/__/yid bzhin 'khor lo rnam par rgyal ma rma bya chen mo 'chi bdag 'joms/__/'chi med rig 'dzin rdo rje'i sku brnyes pad+ma las grol sprul pa'i sku/__/grub pa'i rgyal mo mi tra dzo ki dgra las rnam rgyal brtson 'grus bzang /__1_/'chi med rdo rje'i srog gi ka ba rtag par sgrub la zla med pa'i/__/grub pa'i rig 'dzin bye ba'i tshogs kyis rgyal ba'i myu gu bskyed bsrings te/__/mkhyen brtse'i bsil zer 'od snang mtha' yas ngag gi dbang phyug 'jam pa'i dpal/__/rdo rje sems dpa'i lang tsho rab rgyas bde chen snying rjes rab myos pa/__2_/dpal ldan khyab bdag 'jig rten mgon po rdo rje'i khri la rtag bzhugs shing /__/gang 'dul gdul bya'i blo dang mtshams pa'i chos kyi 'khor lo phyogs brgyar bskor/__/lam lngar 'phyan pa'i 'gro tshogs rgya mtsho thar pa'i khang bzang nyams dga' bar/__/rim gyis 'khrid la dub pa mi mnga' rgyal sras snying stobs chen po rgyal/__3_/gang gi rang bzhin nam yang 'gyur med rdo rje'i chos bdun ngo bo ru/__/mi g.yo mi 'pho brtan par bzhugs nas bdag sogs 'gro la rjes brtse ba'i/__/thugs rje'i spyan gyi 'dab ma bzang pos yang yang rtag tu skyobs pa dang /__/mkhas tshul gsum gyis thub bstan sgron me srid mtha'i bar du snang bar mdzod/__4_/bar chad bdud kyi g.yul las rnam rgyal zhing /__/thos bsam sgom pa'i rtsal chen rdzogs pa dang /__/'phags nor rin chen bdun gyis mngon mtho ba'i/__/chos kyi rgyal po bskal brgyar zhabs brtan gsol/__5_/bstan 'dzin skyes rnams sku tshe brtan pa dang /__/bstan pa'i sbyin bdag dbu 'phang rab mtho zhing /__/bstan la dad rnams bsam don yid bzhin 'grub/__/bstan pa'i nyer 'tshe ming yang med par shog6/__dpal ldan bla ma rgyal ba rgya mtsho de sras 'phags pa'i tshogs rnams kyi/__/thugs bskyed smon lam mdzad pa phrin las nus mthu bsam gyis mi khyab pa/__/dka' ba med par lhun gyis grub ste rgyal sras mchog la yongs rdzogs shing /__/dpag bsam shing dang yid bzhin nor ltar 'gro ba'i re 'dod yong bskong shog7/__sbyin pa'i gseraX nyaX tshul khrims bumaX bzaXng bzod pa'i paXd+maX dkar po dang /__/brtson 'grus 'khoraX loX bsam btan dpalaX beX shes rab dungaX chenaX g.yas su 'khyil/__/phyogs las rnam rgyal mi nub rgyalaX mtshanaX dbang bcu'i dar gyi sham bu g.yo/__/phul byung rgyal ba'i bkra shis rtags kyis lha mi'i mgon khyod mdzes gyur cig__/meX loXng g+hi waXM ba mchog zhoX dkar tshe yi ljon bzang duR+WaX dang /__/bilaX ba'i 'bras bzang dbang mdzad liX khri chos kyi dungaX sgras khams gsum khyab/__/bgegs kun 'joms byed yungaXs dkar la sogs bkra shis dge ba'i rdzasaX rnams kyis/__/dus kun bkra shis dpal gyi 'byor pas phyogs rnams kun tu bkra shis shog__/sarba dA ka l+yA NaM b+ha wa tu//___//