JKCL-KABUM-10-THA-034

Previous Text Back to Volume PageNext Text

ཁྱུང་ལྟག་གནས་ཡིག་རྒྱ་རོང་མཁའ་འགྲོ་ཆེན་མོའི་དགོངས་ཉམས།

Wylie title	khyung ltag gnas yig rgya rong mkha' 'gro chen mo'i dgongs nyams
Location	chos kyi blo gros bka' 'bum Volume 10, Text 34, Pages 317-324 (Folios 1a1 to 4b2)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. khyung ltag gnas yig rgya rong mkha' 'gro chen mo'i dgongs nyams. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 10: 317-324. Bir, H.P.: Khyentse Labrang, 2012.
Genre	Pilgrimage Guides - gnas yig
Colophon	ཅེས་པའང་རབ་བྱུང་བཅུ་དྲུག་པའི་ཆུ་སྦྲུལ་ལོར་གྲོ་བཞིན་ཟླ་ཚེས་བརྒྱད་ལ་ཌཱ་ཀི་དྷརྨ་ཙནྡྲ་ལ་ཆོས་ཀྱི་བློ་གྲོས་པས་བསྐུལ་བན་ཉམས་ངོར་ཇི་ལྟར་གསལ་བ་གསུང་རིམ་བཞིན་དུ་བསྐུལ་བ་པོ་རང་ཉིད་ཀྱིས་ཡི་གེར་བཏབ་པ་དགེ་ལེགས་སུ་གྱུར་ཅིག།
	ces pa'ang rab byung bcu drug pa'i chu sbrul lor gro bzhin zla tshes brgyad la DA ki d+harma tsan+d+ra la chos kyi blo gros pas bskul ban nyams ngor ji ltar gsal ba gsung rim bzhin du bskul ba po rang nyid kyis yi ger btab pa dge legs su gyur cig/

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

ཁྱུང་ལྟག་གནས་ཡིག་རྒྱ་རོང་མཁའ་འགྲོ་ཆེན་མོའི་དགོངས་ཉམས། ཨེ་མ་ཧོ༔ འགགས་མེད་རང་བྱུང་རྣལ་འབྱོར་མ༔ མཉམ་པ་ཉིད་ཀྱི་ཀློང་ཆེན་ལས༔ མ་འགགས་རིག་པའི་བརྡའ་རིས་ཤར༔ རིག་འཛིན་དཔའ་མོ་དགྱེས་པའི་གླུ༔ ཕྱོགས་བཞིར་དོ་ར་ཡངས་པར་བརྡལ༔ ཕྱི་ལྟར་འོག་མིན་ཆོས་དབྱིངས་ཞིང་༔ ནང་ལྟར་དཔའ་བོ་མཁའ་འགྲོའི་གྲོང་༔ གསང་བ་བདེ་མཆོག་ཐུགས་ཀྱི་གནས༔ ཤར་ཕྱོགས་གནས་ནི་མགོན་པོ་ཆེ༔ མ་ནིང་དང་ནི་ཚོགས་ཀྱི་བདག༔ དཔལ་མགོན་བདུན་ཅུའི་ཚོགས་ཀྱིས་བསྐོར༔ ཕྱག་མཚན་སྣ་ཚོགས་མངོན་པར་གསལ༔ ཐུགས་ཀར་ཤྲཱི་ཧེ་རུ་ཀའི༔ ཕྱག་རྒྱའི་གཟུགས་བརྙན་མངོན་པར་བཀྲ། ལྷོ་ཕྱོགས་བྲག་རི་དམར་གཏོར་འདྲ༔ རོལ་པ་རྐྱ་བདུན་འཁོར་གྱིས་བསྐོར༔ མཚམས་སུ་རྦོད་གཏོང་མ་མོའི་གནས༔ མི་ལྤགས་བླ་བྲེ་ཞིང་རྒྱ་མཚན༔ རྒྱུ་མ་གློ་སྙིང་དྲྭ་ཕྱེད་འཕྱང་༔ མདུན་དུ་མི་ལྤགས་རྐང་གསུམ་དབྱིབས༔ ཚིལ་ཆེན་དུད་པའི་སྤྲིན་ཕུང་འཕྲོ༔ དྲག་པོའི་ཤིང་ནི་རྔམ་བརྗིད་ལྡན༔ སྐམ་རིང་དག་གིས་མཐའ་ནས་བསྐོར༔ ནུབ་ཕྱོགས་པདྨ་དབང་གི་གནས༔ བྲག་རི་ཟླ་གམ་དབྱིངས་ཅན་ལ༔ མཐའ་ནས་པདྨ་འབུམ་གྱིས་བསྐོར༔ པདྨའི་རིགས་ཀྱི་མཁའ་འགྲོ་མ༔ ལྕགས་ཀྱུ་ཞགས་ཐོགས་གྲངས་མེད་བཞུགས༔ གཡས་སུ་དགེ་བསྙེན་རྟ་ནག་ཞོན༔ ལག་ན་བ་དན་མདུང་དར་ཐོགས༔ འཁོར་དུ་དགེ་བསྙེན་འབུམ་སྡེས་བསྐོར༔ པདྨ་གསུང་གི་ཟབ་གཏེར་བཞུགས༔ བྱང་ཕྱོགས་དམོད་པ་དྲག་སྔགས་ཞིང་༔ བྲག་རི་ཁྱུང་ཆེན་གནམ་ལྡིང་འདྲ༔ ཕྱོགས་མཚམས་བཀའ་བརྒྱད་ལྷ་ཚོགས་ཞིང་༔ བདུན་བརྒྱ་ཉེར་ལྔའི་ཚོམ་བུ་བཀྲ༔ ལོགྟི་ཟབ་གཏེར་དངོས་གྲུབ་འབྱུང་༔ མ་རུང་རྒྱལ་བསེན་དམ་སྲི་འདུལ༔ བྱད་ཁ་རྦོད་གཏོང་མཁན་དག་གིས༔ ནམ་ཡང་རྦོད་པར་མི་ནུས་ཤིང་༔ ཨ་ཀྲོ་ཏེ་ཀའི་རང་བྱོན་རྡོལ༔ བྱང་ཤར་མཚམས་སུ་རྣམ་སྲས་ལ༔ ཛཾ་ལྷ་རིགས་ལྔའི་འཁོར་གྱིས་བསྐོར༔ ཛཾ་གླིང་ནོར་གཏེར་དབུལ་ཕོངས་སེལ༔ ནེའུ་དང་ནི་ནོར་བུ་སྤུངས༔ བསྐོར་བས་འདོད་རྒུ་འབད་མེད་འབྱུང་༔ བྱང་ཤར་མཚམས་ན་དུར་ཁྲོད་ནི༔ ཧེ་ཆེན་བརྡལ་བར་མི་ལྤགས་བརྒྱང་༔ རྡོ་ཡི་ལིངྒ་རྟགས་ཀྱིས་མཚན༔ ཤར་ལྷོའི་མཚམས་ན་དུར་ཁྲོད་ནི༔ ཀླུ་མོ་ཆེ་ལ་དུར་བྱ་དང་༔ རྡོ་ཡི་དུར་མི་མཆོད་རྟེན་ཡོད༔ བར་མཚམས་དུར་ཁྲོད་ལངྐ་བརྩེགས༔ ཆུ་གླང་མདོག་དབྱིབས་བྲག་རིའི་རྩེར༔ དུར་ཤིང་ཡོད་པའི་མཐའ་བསྐོར་དུ༔ ཆུ་མིག་མང་པོ་དག་གིས་བསྐོར༔ ནུབ་བྱང་དུར་ཁྲོད་བཾམ་རོ་བརྩེགས༔ གཡང་གཞི་གན་རྐྱལ་བསྒྱེལ་བའི་སྟེང་༔ དུར་བདག་ཕོ་མོ་མང་པོ་ནི༔ རུས་པའི་རྒྱན་ལྡན་བྲོ་གར་བྱེད༔ དེ་ཡི་གཡས་ཕྱོགས་འཇིགས་བརྒྱད་ལས༔ སྐྱོབས་པའི་སྒྲོལ་མའི་སྐུ་དང་སྔགས༔ ཡི་གེ་བཅུ་པའི་རང་བྱོན་དང་༔ མདུན་དུ་ཀ་པཱ་ལ་ཡི་གཟུགས༔ བྲག་གི་མདུན་ནས་ཚེ་ཆུ་ནི༔ ཆུ་བོའི་རྒྱུན་དང་འདྲེས་པར་ཡོད༔ ཏཱ་རེ་ཏཱྃ་སོགས་སྔགས་སྒྲ་སྒྲོགས༔ དེའི་གཡས་ཕུག་པ་གཤིན་རྗེའི་གནས༔ བྲག་རི་རྩེ་མཐོ་མཚོན་གཟིངས་འདྲ༔ དེ་རུ་བྲག་ཕུག་གཏིང་ཟབ་པ༔ ཡ་མནྟ་ཀའི་སྒྲ་སྒྲོགས་ཡོད༔ གཤིན་རྗེའི་དམག་ཚོགས་དཔག་མེད་བཞུགས༔ དེ་མཚམས་ཤ་ཟ་ཌཱ་ཀི་ཡི༔ འདུ་གླིང་ཤ་ཟ་འབུམ་ཁྲག་གནས༔ གཡས་གཡོན་ཆུ་རྒྱུན་དབུས་རྡོལ་ཁྲི༔ ཟུར་བཞིས་མཚན་པ་གནས་ཆེན་པོར༔ ཚོགས་མཆོད་འབུལ་བའི་ཚུལ་དུ་ཡོད༔ དེ་ནས་ཡར་ལ་འོང་བ་ན༔ སྨན་བླ་མཆེད་བརྒྱད་གནས་ཆེན་པོར༔ བྲག་རི་བུམ་པའི་དབྱིབས་ཅན་རྩེར༔ ཁ་རྒྱན་ཤིང་གི་སྡོང་པོས་བརྒྱན༔ འོག་ནས་ཆུ་བོ་ཤར་དུ་འབབས༔ ཡན་ལག་བརྒྱད་ལྡན་བདུད་རྩིའི་ཆུས༔ ནད་རིགས་བཞི་བརྒྱ་རྩ་བཞི་སེལ༔ ཤར་ཕྱོགས་མ་ཅིག་ལབ་སྒྲོན་ཕུག༔ བྲག་དཀར་ནམ་མཁར་ལྡིང་བ་ཡོད༔ མ་ཡི་སྲས་བརྒྱུད་མཆེད་ལྔས་བསྐོར༔ མདུན་དུ་དུར་ཁྲོད་དགའ་བ་འཁྱིལ༔ དེ་རུ་གཉན་གཅོད་བྱས་གྱུར་ན༔ ཡུམ་ཆེན་སྐྱེ་མེད་དགོངས་པ་རྟོགས༔ སྐྲ་སེན་འཕང་བས་འབྲེལ་པ་ཐོབ༔ དེ་ནས་ཡར་ལ་འོང་བ་ན༔ སྨན་བཙུན་མཆེད་ལྔའི་གནས་མཆོག་ནི༔ བྲག་རི་ཌཱ་ཀི་གར་བྱེད་ལྟར༔ སྔ་ཚོམ་ཚུལ་དུ་ཡོད་པ་ལ༔ དཔག་བསམ་ཤིང་དང་ཆུ་མིག་བསྐོར༔ དེ་སྟེང་རང་བྱུང་ཤར་བའི་གནས༔ ཟབ་གཏེར་སྣ་ཚོགས་ལྡེའུ་མིག་ཡོད༔ དེ་གཡོན་རྡོ་རྗེ་གཡུ་སྒྲོན་གནས༔ བྲག་རི་ཤེལ་གྱི་བ་གམ་བརྩེགས༔ གཤམས་ལ་གོས་ཀྱི་སུལ་ལྟ་བུ༔ བྲག་དབྱིབས་ལྷ་མོའི་སྐུ་ཡི་ཚུལ༔ མཐའ་བསྐོར་སྨན་མོ་འབུམ་ཕྲག་གནས༔ ལྷ་ཀླུ་མི་ཡི་ལོངས་སྤྱོད་འབྱུང་༔ དེ་བསྐོར་ལོངས་སྤྱོད་ལྡན་པར་བྱེད༔ དེ་རྣམས་སྒོ་སྲུངས་ཚུལ་དུ་ཡོད༔ དབུས་ཀྱི་རྡོ་རྗེའི་ཁྱུང་བྲག་ཆེ༔ ཕྱི་ལྟར་དེ་ཝཱི་ཀོ་ཊི་དང་༔ ནང་དུ་བདེ་མཆོག་འཁོར་ལོ་སྡོམ༔ གསང་བ་ཡེ་ཤེས་ཁྱུང་ཆེན་ཕུག༔ གཡས་སུ་མཁར་ཆེན་མཚོ་རྒྱལ་ཕུག༔ གཡོན་དུ་ཚོགས་ཁང་པདྨ་བརྩེགས༔ དབུས་སུ་རིག་འཛིན་གསང་བའི་ཕུག༔ འབུམ་ཕྲག་དཔའ་བོ་མཁའ་འགྲོ་འདུ༔ བསྙེན་སྒྲུབ་ཟབ་མོའི་དོན་བསྒོམ་ན༔ མཆོག་ཐུན་དངོས་གྲུབ་ངེས་ཐོབ་ཅིང་༔ མཆོག་རྣམས་ཕུང་པོ་འོད་སྐུར་གྲོལ༔ ཤར་ཕྱོགས་ཡང་དག་སྒྲུབ་གནས་ཆེར༔ ཕུག་དཀར་ཟླ་བ་ཚེས་པ་འདྲ༔ ཧཱུྃ་ཆེན་ཀཱ་རའི་སྒྲུབ་ཕུག་ཡོད༔ རྡོ་རྗེ་སེམས་དཔའི་ཆོས་སྐོར་སྦས༔ དེ་ནས་ཡར་ལ་འོང་བ་ན༔ རྡོ་རྗེ་ཕུར་བུའི་གནས་ཆེན་པོ༔ ཕུར་པའི་དབལ་དབྱིབས་སློབ་དཔོན་ནི༔ ཤཱནྟིཾ་གརྦྷའི་སྒྲུབ་ཕུག་ཡོད༔ དམོད་པ་དྲག་སྔགས་ཆོས་གཏེར་བཞུགས༔ དེ་རུ་བསྙེན་སྒྲུབ་བརྩོན་བྱས་ན༔ བདུད་ལས་རྒྱལ་ཞིང་མཐའ་དམག་གིས༔ བྱད་ཁ་རྦོད་གཏོང་གནོད་པ་བཟློག༔ དེ་ནས་ཚུར་ལ་འོང་བ་ན༔ དབུས་ཀྱི་ཡང་རྩེར་རྒྱ་གར་གྱི༔ ས་ར་ཧ་པའི་རང་བྱོན་དང་༔ གྲུབ་ཆེན་བརྒྱད་ཅུ་རྩ་བཞི་ཡི༔ བྲག་སྐྱིབས་ཆེ་ཆུང་མ་ངེས་ཡོད༔ རིན་ཆེན་ནོར་བུ་སྤུངས་འདྲ་བའི༔ དིལ་འབུར་ཆེ་ཆུང་མཆོད་པའི་ཚུལ༔ དབུས་གནས་ཤར་རི་སྤང་བྲག་གི༔ རི་བོ་དཔལ་ལྡན་ལྷ་མོའི་གནས༔ མི་ལྤགས་རྒྱལ་མཚན་རྨ་བྱའི་གདུགས༔ ཙིཏྟའི་ཏོག་གིས་མཛེས་པར་བརྒྱན༔ འཁོར་དུ་མ་མོ་མདུང་ཐུང་ཅན༔ འབུམ་ཕྲག་ཚོགས་ཀྱི་དབུས་ན་བཞུགས༔ མདུན་དུ་དུར་ཁྲོད་རོ་ཐང་བརྡལ༔ མི་རོ་ཞིང་ལྤགས་གདན་བཏིངས་འདྲ༔ དེ་འོག་སྨན་མོའི་བྲོ་ར་ནི༔ གྲུ་བཞི་ཆོས་འབྱུང་བསྣོལ་མ་ན༔ སྨན་མོས་བྲོ་གར་ཁྲིག་སེ་ཁྲིག༔ ཁ་ནས་བརྡ་གླུ་སྣ་ཚོགས་སྟོན༔ ལྷོ་ཕྱོགས་འཇམ་དཔལ་བཤེས་གཉེན་ཕུག༔ དྷཱིཿདང་ཧྲཱིཿཡིག་རང་བྱོན་གསལ༔ དེ་ཡི་བར་གྱི་མཚམས་ཤེད་ན༔ ཨོ་རྒྱན་སྤྲིན་ནག་འཁྲིགས་པའི་ཕུག༔ མདུན་དུ་ལྗོན་ཤིང་ལོ་འདབས་ཀྱིས༔ བསྐོར་བའི་སྐྱེད་ཚལ་རྔམས་ཆེན་བརྗིད༔ ཉེ་བར་སྨན་གྱི་དྲང་སྲོང་གི༔ བཞུགས་གནས་བྲག་སྐྱིབས་ཁ་ནུབ་བསྟན༔ དྲང་སྲོང་ཚོམ་བུའི་དབྱིབས་ཅན་དང་༔ སྨན་ཤིང་སྣ་ཚོགས་མང་དུ་གསལ༔ དེ་ནས་ཕར་ལ་བསྒྲོད་པ་ན༔ གཤིན་རྗེའི་སྒྲུབ་གནས་ཕྱི་ལྟར་ན༔ མེ་དུད་འཁྲིགས་པའི་དབྱིབས་ཅན་དང་༔ ནང་དུ་གཤིན་རྗེའི་ཕོ་བྲང་ཆེ༔ དེ་རུ་གཤིན་རྗེའི་དོང་ཁ་ནི༔ ཞལ་ནང་ལིངྒའི་རང་བྱོན་ཅན༔ འཐོར་རླུང་དྲག་པོ་རབ་ཏུ་འཁྲུགས༔ ཡང་ཅིག་ཡར་ལ་སོང་བ་ན༔ ཀུ་རུ་ཀུལླེའི་སྒྲུབ་གནས་དེར༔ དབྱངས་ཅན་ལྷ་མོའི་སྐུ་དང་ནི༔ ཕྱག་མཚན་རང་བྱོན་མ་འདྲེས་གསལ༔ མདའ་གཞུ་ལྕགས་ཀྱུ་མེ་ཕྲེང་སོགས། དེ་ནས་ཚུར་ལ་འོང་བ་ན༔ རི་ནི་བུམ་པའི་དབྱིབས་ཅན་ནི༔ སྟེང་དུ་བུག་པ་ཡོད་པ་ནི༔ དཔལ་གྱི་རྡོ་རྗེའི་སྒྲུབ་པའི་ཕུག༔ རླུང་སེམས་དབུ་མར་ཐིམ་པའི་རྟགས༔ བྲག་གི་ཀླད་པའི་མཐིལ་ཟངས་ཐལ༔ སྟེང་ནས་ཕར་ལ་བསྒྲོད་པ་ན༔ རི་དབྱིབས་མཁའ་འགྲོ་གར་བྱེད་ལ༔ བྲག་དམར་རྔམ་བརྗིད་ཆེ་བ་རུཿཁ་ཊྭཱྃ་གྲི་ཐོད་རང་བྱོན་གསལ༔ མཁའ་སྤྱོད་སྒྲུབ་པའི་ཕུག་པ་ནི༔ བྷ་གའི་དབྱིབས་ཅན་གནས་དེ་རུ༔ བསྙེན་སྒྲུབ་བརྩོན་པས་མཆོག་དངོས་མྱུར༔ གཡས་བྲག་མ་ཧཱ་དེ་ཝའི་གནས༔ དབང་གི་ཟབ་གཏེར་མང་པོ་སྦས༔ གཡོན་ཕྱོགས་མ་ཧཱ་གུ་རུའི་ཕུག༔ པད་འབྱུང་ཡབ་ཡུམ་བྱང་སེམས་ཀྱི༔ གཏེར་ཡོད་ཚོས་དུས་བཟང་པོར་འབབ༔ མྱོང་བས་དགའ་བཞིའི་ཡེ་ཤེས་བསྐྱེད༔ དེ་ནས་ཚུར་འོང་བྲག་སྐྱིབས་ནི༔ བི་མ་མི་ཏྲའི་འོད་གསལ་ཕུག༔ དམ་པ་རྒྱ་གར་བཞུགས་པའི་གནས༔ དེ་ཡི་སྐུ་རྗེས་རང་བྱོན་དང་༔ ཌཱ་མ་རུ་དང་གླིང་བུའི་རྗེས༔ དེ་རུ་འོད་གསལ་བསྒོམ་བྱས་ན༔ ཚེ་འདིར་གྲོལ་བའི་གདིང་ཆེན་རྙེད༔ དེ་ལྟའི་གནས་མཆོག་དམ་པ་དེའི༔ ཚེས་གྲངས་དུས་ཆེན་བཟང་པོ་ལ༔ རྩེ་བསྐོར་གཅིག་ལ་ཡིག་དྲུག་དང་༔ སིདྡྷི་དུང་གཉིས་ཕན་ཡོན་ཐོབ༔ རྒྱུན་བསྐོར་ཉི་ཤུ་རྩ་ལྔ་ལ༔ ཡིག་དྲུག་སིདྡྷི་དུང་ཕྱུར་རེ༔ བར་བསྐོར་གཅིག་ལ་ལྷག་བསམ་བཟང་༔ རྣལ་འབྱོར་དག་པས་བསྐོར་བ་རེར༔ ཡིག་དྲུག་དུང་དང་སིདྡྷི་ནི༔ དུང་ཕྱུར་གསུམ་གྱི་འགྱུར་ཁྱད་ཡོད༔ མཐའ་བསྐོར་གནས་རི་ཡོངས་རྫོགས་ནི༔ བསྐོར་བ་གཅིག་ལ་ཡིག་དྲུག་དང་༔ སིདྡྷི་དུང་ཕྱུར་བདུན་རེ་ཡི༔ ཕན་ཡོན་ཐོབ་ཅིང་གནས་འདི་རུ༔ ཕྱག་མཆོད་བསྐོར་དང་ཚོགས་འཁོར་དང་༔ བསྙེན་སྒྲུབ་སྦྱིན་བསྲེག་བརྩོན་གྱུར་ན༔ དུས་འཁྲུགས་བཟློག་ཅིང་བསྟན་ལ་ཕན༔ རང་གཞན་བསོད་ནམས་ཚོགས་ཆེན་རྫོགས༔ སྒྲིབ་དག་ཕྱི་མར་རྔ་ཡབ་ཀྱི༔ དཔལ་རི་པདྨ་འོད་ཞིང་དུ༔ གུ་རུའི་ཞལ་མཐོང་དབང་བསྐུར་ཐོབ༔ རིག་འཛིན་གྲལ་དུ་འཁོད་པར་འགྱུར༔ དེ་འོག་བྲག་རི་རྟ་ཕག་གནས༔ རྟ་མགྲིན་ཕག་མོའི་རང་བྱོན་དང་༔ དེ་ཡི་ཤར་འདབས་ཨེ་ཡི་གྲུ་གསུམ་གླིང་༔ ཕུག་ཏུ་ཟབ་གཏེར་ལྡེའུ་མིག་ཡོད༔ དཔལ་གྱི་མིང་ཅན་སྙིང་ག་རུ༔ སྨེ་བས་མཚན་པས་སྤྱོད་པར་འགྱུར༔ ཅེས་པའང་རབ་བྱུང་བཅུ་དྲུག་པའི་ཆུ་སྦྲུལ་ལོར་གྲོ་བཞིན་ཟླ་ཚེས་བརྒྱད་ལ་ཌཱ་ཀི་དྷརྨ་ཙནྡྲ་ལ་ཆོས་ཀྱི་བློ་གྲོས་པས་བསྐུལ་བན་ཉམས་ངོར་ཇི་ལྟར་གསལ་བ་གསུང་རིམ་བཞིན་དུ་བསྐུལ་བ་པོ་རང་ཉིད་ཀྱིས་ཡི་གེར་བཏབ་པ་དགེ་ལེགས་སུ་གྱུར་ཅིག། །།

[edit]

khyung ltag gnas yig rgya rong mkha' 'gro chen mo'i dgongs nyams/__e ma ho:__'gags med rang byung rnal 'byor ma:__mnyam pa nyid kyi klong chen las:__ma 'gags rig pa'i brda' ris shar:__rig 'dzin dpa' mo dgyes pa'i glu:__phyogs bzhir do ra yangs par brdal:__phyi ltar 'og min chos dbyings zhing :__nang ltar dpa' bo mkha' 'gro'i grong :__gsang ba bde mchog thugs kyi gnas:__shar phyogs gnas ni mgon po che:__ma ning dang ni tshogs kyi bdag:__dpal mgon bdun cu'i tshogs kyis bskor:__phyag mtshan sna tshogs mngon par gsal:__thugs kar shrI he ru ka'i:__phyag rgya'i gzugs brnyan mngon par bkra/__lho phyogs brag ri dmar gtor 'dra:__rol pa rkya bdun 'khor gyis bskor:__mtshams su rbod gtong ma mo'i gnas:__mi lpags bla bre zhing rgya mtshan:__rgyu ma glo snying drwa phyed 'phyang :__mdun du mi lpags rkang gsum dbyibs:__tshil chen dud pa'i sprin phung 'phro:__drag po'i shing ni rngam brjid ldan:__skam ring dag gis mtha' nas bskor:__nub phyogs pad+ma dbang gi gnas:__brag ri zla gam dbyings can la:__mtha' nas pad+ma 'bum gyis bskor:__pad+ma'i rigs kyi mkha' 'gro ma:__lcags kyu zhags thogs grangs med bzhugs:__g.yas su dge bsnyen rta nag zhon:__lag na ba dan mdung dar thogs:__'khor du dge bsnyen 'bum sdes bskor:__pad+ma gsung gi zab gter bzhugs:__byang phyogs dmod pa drag sngags zhing :__brag ri khyung chen gnam lding 'dra:__phyogs mtshams bka' brgyad lha tshogs zhing :__bdun brgya nyer lnga'i tshom bu bkra:__log+ti zab gter dngos grub 'byung :__ma rung rgyal bsen dam sri 'dul:__byad kha rbod gtong mkhan dag gis:__nam yang rbod par mi nus shing :__a kro te ka'i rang byon rdol:__byang shar mtshams su rnam sras la:__dzaM lha rigs lnga'i 'khor gyis bskor:__dzaM gling nor gter dbul phongs sel:__ne'u dang ni nor bu spungs:__bskor bas 'dod rgu 'bad med 'byung :__byang shar mtshams na dur khrod ni:__he chen brdal bar mi lpags brgyang :__rdo yi ling+ga rtags kyis mtshan:__shar lho'i mtshams na dur khrod ni:__klu mo che la dur bya dang :__rdo yi dur mi mchod rten yod:__bar mtshams dur khrod lang+ka brtsegs:__chu glang mdog dbyibs brag ri'i rtser:__dur shing yod pa'i mtha' bskor du:__chu mig mang po dag gis bskor:__nub byang dur khrod baMm ro brtsegs:__g.yang gzhi gan rkyal bsgyel ba'i steng :__dur bdag pho mo mang po ni:__rus pa'i rgyan ldan bro gar byed:__de yi g.yas phyogs 'jigs brgyad las:__skyobs pa'i sgrol ma'i sku dang sngags:__yi ge bcu pa'i rang byon dang :__mdun du ka pA la yi gzugs:__brag gi mdun nas tshe chu ni:__chu bo'i rgyun dang 'dres par yod:__tA re tA~M sogs sngags sgra sgrogs:__de'i g.yas phug pa gshin rje'i gnas:__brag ri rtse mtho mtshon gzings 'dra:__de ru brag phug gting zab pa:__ya man+ta ka'i sgra sgrogs yod:__gshin rje'i dmag tshogs dpag med bzhugs:__de mtshams sha za DA ki yi:__'du gling sha za 'bum khrag gnas:__g.yas g.yon chu rgyun dbus rdol khri:__zur bzhis mtshan pa gnas chen por:__tshogs mchod 'bul ba'i tshul du yod:__de nas yar la 'ong ba na:__sman bla mched brgyad gnas chen por:__brag ri bum pa'i dbyibs can rtser:__kha rgyan shing gi sdong pos brgyan:__'og nas chu bo shar du 'babs:__yan lag brgyad ldan bdud rtsi'i chus:__nad rigs bzhi brgya rtsa bzhi sel:__shar phyogs ma cig lab sgron phug:__brag dkar nam mkhar lding ba yod:__ma yi sras brgyud mched lngas bskor:__mdun du dur khrod dga' ba 'khyil:__de ru gnyan gcod byas gyur na:__yum chen skye med dgongs pa rtogs:__skra sen 'phang bas 'brel pa thob:__de nas yar la 'ong ba na:__sman btsun mched lnga'i gnas mchog ni:__brag ri DA ki gar byed ltar:__snga tshom tshul du yod pa la:__dpag bsam shing dang chu mig bskor:__de steng rang byung shar ba'i gnas:__zab gter sna tshogs lde'u mig yod:__de g.yon rdo rje g.yu sgron gnas:__brag ri shel gyi ba gam brtsegs:__gshams la gos kyi sul lta bu:__brag dbyibs lha mo'i sku yi tshul:__mtha' bskor sman mo 'bum phrag gnas:__lha klu mi yi longs spyod 'byung :__de bskor longs spyod ldan par byed:__de rnams sgo srungs tshul du yod:__dbus kyi rdo rje'i khyung brag che:__phyi ltar de wI ko Ti dang :__nang du bde mchog 'khor lo sdom:__gsang ba ye shes khyung chen phug:__g.yas su mkhar chen mtsho rgyal phug:__g.yon du tshogs khang pad+ma brtsegs:__dbus su rig 'dzin gsang ba'i phug:__'bum phrag dpa' bo mkha' 'gro 'du:__bsnyen sgrub zab mo'i don bsgom na:__mchog thun dngos grub nges thob cing :__mchog rnams phung po 'od skur grol:__shar phyogs yang dag sgrub gnas cher:__phug dkar zla ba tshes pa 'dra:__hU~M chen kA ra'i sgrub phug yod:__rdo rje sems dpa'i chos skor sbas:__de nas yar la 'ong ba na:__rdo rje phur bu'i gnas chen po:__phur pa'i dbal dbyibs slob dpon ni:__shAn+tiM gar+b+ha'i sgrub phug yod:__dmod pa drag sngags chos gter bzhugs:__de ru bsnyen sgrub brtson byas na:__bdud las rgyal zhing mtha' dmag gis:__byad kha rbod gtong gnod pa bzlog:__de nas tshur la 'ong ba na:__dbus kyi yang rtser rgya gar gyi:__sa ra ha pa'i rang byon dang :__grub chen brgyad cu rtsa bzhi yi:__brag skyibs che chung ma nges yod:__rin chen nor bu spungs 'dra ba'i:__dil 'bur che chung mchod pa'i tshul:__dbus gnas shar ri spang brag gi:__ri bo dpal ldan lha mo'i gnas:__mi lpags rgyal mtshan rma bya'i gdugs:__tsit+ta'i tog gis mdzes par brgyan:__'khor du ma mo mdung thung can:__'bum phrag tshogs kyi dbus na bzhugs:__mdun du dur khrod ro thang brdal:__mi ro zhing lpags gdan btings 'dra:__de 'og sman mo'i bro ra ni:__gru bzhi chos 'byung bsnol ma na:__sman mos bro gar khrig se khrig:__kha nas brda glu sna tshogs ston:__lho phyogs 'jam dpal bshes gnyen phug:__d+hIHdang hrIHyig rang byon gsal:__de yi bar gyi mtshams shed na:__o rgyan sprin nag 'khrigs pa'i phug:__mdun du ljon shing lo 'dabs kyis:__bskor ba'i skyed tshal rngams chen brjid:__nye bar sman gyi drang srong gi:__bzhugs gnas brag skyibs kha nub bstan:__drang srong tshom bu'i dbyibs can dang :__sman shing sna tshogs mang du gsal:__de nas phar la bsgrod pa na:__gshin rje'i sgrub gnas phyi ltar na:__me dud 'khrigs pa'i dbyibs can dang :__nang du gshin rje'i pho brang che:__de ru gshin rje'i dong kha ni:__zhal nang ling+ga'i rang byon can:__'thor rlung drag po rab tu 'khrugs:__yang cig yar la song ba na:__ku ru kul+le'i sgrub gnas der:__dbyangs can lha mo'i sku dang ni:__phyag mtshan rang byon ma 'dres gsal:__mda' gzhu lcags kyu me phreng sogs/__de nas tshur la 'ong ba na:__ri ni bum pa'i dbyibs can ni:__steng du bug pa yod pa ni:__dpal gyi rdo rje'i sgrub pa'i phug:__rlung sems dbu mar thim pa'i rtags:__brag gi klad pa'i mthil zangs thal:__steng nas phar la bsgrod pa na:__ri dbyibs mkha' 'gro gar byed la:__brag dmar rngam brjid che ba ruHkha T+wA~M gri thod rang byon gsal:__mkha' spyod sgrub pa'i phug pa ni:__b+ha ga'i dbyibs can gnas de ru:__bsnyen sgrub brtson pas mchog dngos myur:__g.yas brag ma hA de wa'i gnas:__dbang gi zab gter mang po sbas:__g.yon phyogs ma hA gu ru'i phug:__pad 'byung yab yum byang sems kyi:__gter yod tshos dus bzang por 'bab:__myong bas dga' bzhi'i ye shes bskyed:__de nas tshur 'ong brag skyibs ni:__bi ma mi tra'i 'od gsal phug:__dam pa rgya gar bzhugs pa'i gnas:__de yi sku rjes rang byon dang :__DA ma ru dang gling bu'i rjes:__de ru 'od gsal bsgom byas na:__tshe 'dir grol ba'i gding chen rnyed:__de lta'i gnas mchog dam pa de'i:__tshes grangs dus chen bzang po la:__rtse bskor gcig la yig drug dang :__sid+d+hi dung gnyis phan yon thob:__rgyun bskor nyi shu rtsa lnga la:__yig drug sid+d+hi dung phyur re:__bar bskor gcig la lhag bsam bzang :__rnal 'byor dag pas bskor ba rer:__yig drug dung dang sid+d+hi ni:__dung phyur gsum gyi 'gyur khyad yod:__mtha' bskor gnas ri yongs rdzogs ni:__bskor ba gcig la yig drug dang :__sid+d+hi dung phyur bdun re yi:__phan yon thob cing gnas 'di ru:__phyag mchod bskor dang tshogs 'khor dang :__bsnyen sgrub sbyin bsreg brtson gyur na:__dus 'khrugs bzlog cing bstan la phan:__rang gzhan bsod nams tshogs chen rdzogs:__sgrib dag phyi mar rnga yab kyi:__dpal ri pad+ma 'od zhing du:__gu ru'i zhal mthong dbang bskur thob:__rig 'dzin gral du 'khod par 'gyur:__de 'og brag ri rta phag gnas:__rta mgrin phag mo'i rang byon dang :__de yi shar 'dabs e yi gru gsum gling :__phug tu zab gter lde'u mig yod:__dpal gyi ming can snying ga ru:__sme bas mtshan pas spyod par 'gyur:__ces pa'ang rab byung bcu drug pa'i chu sbrul lor gro bzhin zla tshes brgyad la DA ki d+harma tsan+d+ra la chos kyi blo gros pas bskul ban nyams ngor ji ltar gsal ba gsung rim bzhin du bskul ba po rang nyid kyis yi ger btab pa dge legs su gyur cig/___//__