JKCL-KABUM-10-THA-007

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	chos kyi blo gros bka' 'bum Volume 10, Text 7, Pages (Folios 1a to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. '. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 10: . Bir, H.P.: Khyentse Labrang, 2012.
Genre

1 Texts in this Section (sde tshan or chos tshan)

33-38	སྙན་བརྒྱུད་དམ་པའི་བླ་སྒྲུབ་སྙིང་ཐིག་གི། དབང་ཆོག་ཡེ་ཤེས་བཅུད་ཐིག། snyan brgyud dam pa'i bla sgrub snying thig gi/ dbang chog ye shes bcud thig Empowerment Ritual - dbang chog - dbang skur	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

སྙན་བརྒྱུད་དམ་པའི་བླ་སྒྲུབ་སྙིང་ཐིག་གི། དབང་ཆོག་ཡེ་ཤེས་བཅུད་ཐིག་བཞུགས། ཕ་གཅིག་དམ་པ་རྗེ་ལ་འདུད། ཤིན་ཏུ་གསང་བའི་རྣལ་འབྱོར་ནི། །ཉམས་བླངས་སྨིན་པར་བྱེད་པའི་ཐབས། །དཀྱིལ་འཁོར་དམར་ཟླུམ་ལྟེ་བ་རུ། །ཐིག་ལེ་མཐིང་ག་ཆེན་པོའི་དབུས། །ཧྲཱི་དྷཱི་མཱུྃ་གྱི་ས་བོན་བཀོད། །བུམ་པ་ཐོད་ཆང་རིག་ཙག་དང་། བརྟུལ་ཞུགས་སྤྱོད་པའི་ཆས་རྣམས་དང་། །ཚེ་ཡི་དངོས་གྲུབ་རྫས་རྣམས་བཀྲམ། །མེ་ལོང་ཤེལ་རྡོ་དང་བཅས་མཐར། །ཕྱི་ནང་མཆོད་ཚོགས་ཅི་འབྱོར་བཤམས། །སློབ་དཔོན་རང་ཉིད་ནུས་ལྡན་སྒྲུབ། །དབང་རྫས་དབྱངས་གསལ་རྟེན་སྙིང་གིས། །བྱིན་གྱིས་བརླབ་ཅིང་ནུས་ལྡན་བྱ། །ཏིང་ངེ་འཛིན་གྱི་དབང་བླངས་ཤིང་། །རྣམ་པར་འཇོམས་པས་ལས་བུམ་སྒྲུབ། །སློབ་མ་ཁྲུས་དབྱུངས་བགེགས་བསལ་ཞིང་། །ལོ་རྒྱུས་ཇི་ལྟར་རིགས་པ་བརྗོད། །མཎྜལ་ཕུལ་བ་གསོལ་བ་བཏབ། །སངས་རྒྱས་ཀུན་བདག་ངོ་བོ་ཉིད། །ཧེ་རུ་ཀ་དཔལ་དམ་པ་རྗེར། །གུས་པས་གསོལ་བཏབ་བདག་རྒྱུད་ནི། །ཡོངས་སུ་གྲོལ་བར་མཛད་དུ་གསོལ། །ལན་གསུམ། སྐྱབས་སེམས་ཚོགས་བསགས་དང་། །སྡོམ་བཟུང་ཇི་ལྟར་རིགས་པར་བྱ། །དངོས་གཞི་ལྷར་བསྐྱེད་ཡེ་ཤེས་དབང་། །ཏིཥྛ་བཛྲས་བརྟན་པར་བྱ། །དབང་ལྷ་སྤྱན་དྲངས་མཆོད་གསོལ་གདབ། །དེ་ནས་དབང་རྣམས་རིམ་པར་བསྐུར། །བུམ་པ་བཟང་པོ་ཆེ་བའི་མཆོག །ཡོན་ཏན་ཀུན་གྱི་རྒྱན་ལྡན་པ། །བྱང་ཆུབ་སེམས་ཀྱི་རྒྱུན་བཟང་པོས། །སྐལ་ལྡན་ཁྱོད་ལ་དབང་བསྐུར་སྦྱིན། །ཇི་ལྟར་བདེ་གཤེགས་རྒྱལ་རྣམས་ཀྱིས། །དེ་བཞིན་སྲས་རྣམས་དབང་བསྐུར་ལྟར། །དབང་བསྐུར་རྡོ་རྗེ་ཆེན་པོ་འདིས། །དེས་ནི་ཁྱོད་ལ་དབང་བསྐུར་རོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། ཨོཾ་བཛྲི་བྷ་ཝ་ཨབྷི་ཥིཉྩ་ཧཱུྃ། སྤྱི་བོ་ནས་ནི་དབང་བསྐུར་ཞིང་། །སྒྲིབ་དག་བྱིན་བརླབས་ལུས་གང་ཞིང་། །བདེ་བ་ཆེན་པོ་ཉམས་སུ་མྱོངས། །ཆུ་ལྷག་སྤྱི་བོར་ལུད་པ་ལས། །པདྨའི་རིགས་ཀྱི་གཙོར་གྱུར་པའི། །དབང་ལྷས་དབུར་བརྒྱན་རྒྱས་གདབ་བྱ། དབང་ལྷ་བསྟིམ་ཞིང་བརྟན་བཞུགས་དང་། །མངའ་གསོལ་ཤིས་བརྗོད་ཅི་རིགས་བྱ། །བླ་མའི་སྨིན་མཚམས་ཨོཾ་ཡིག་ལས། །ཨོཾ་དང་སྐུ་འཕྲོས་བུམ་དབང་ཐོབ། །སྐུ་ཡི་གསང་བའི་བྱིན་རླབས་ཞུགས། །བརྟན་བྱེད་སྣང་བརྙན་སྤྱི་གཙུག་བཞག །ཨོཾ། སངས་རྒྱས་ཀུན་གྱི་སྐུ་ཡི་བདག །ཧེ་རུ་ཀ་དཔལ་དཔའ་བོ་ཆེ། །དམ་པ་སངས་རྒྱས་འགྲོ་མགོན་གྱིས། །སྐུ་ཡི་བྱིན་བརླབས་སྦྱིན་པར་བྱ། །སྔགས་མཐར། ཀཱ་ཡ་ཨ་བྷི་ཥིཉྩ་ཨོཾ། བླ་མའི་མགྲིན་པའི་ཨཱཿ ཡིག་ལས། །ཨཱཿ དམར་སྔགས་ཀྱི་ཕྲེང་བ་འཕྲོས། །གསུང་གི་གསང་བའི་བྱིན་རླབས་ཞུགས། །བཟླས་ལུང་སྦྱིན་ཅིང་བགྲངས་ཕྲེང་ནི། །མགྲིན་པར་བཞག་ཅིང་བརྟན་པར་བྱ། ཨཱཿ ཇི་སྙེད་བརྗོད་པ་ཀུན་གྱི་གཞི། །སྒྲ་ཚིག་ལས་འདས་རང་བྱུང་གི། བདག་མེད་སེངྒེའི་སྒྲ་ལྡན་པ། །ཀུན་ཏུ་བརྗོད་པས་དབང་བསྐུར་རོ། །སྔགས་མཐར། ཝཱ་ཀ་ཨ་བྷི་ཥིཉྩ་ཨཱཿ ཐུགས་ནི་ཙིཏྟ་དམར་པོ་ནི། །ཧཱུྃ་གིས་མཚན་པ་སྙིང་དབུས་བཞག །བླ་མའི་ཐུགས་ནས་འོད་དམར་གྱི། །གོང་བུ་ཧཱུྃ་གིས་མཚན་པ་སྤྲོས། །སྙིང་གའི་དབུས་སུ་ཐིམ་པར་བསམ། ཧཱུྃ། མི་རྟོག་ཡེ་ཤེས་བསམ་ལས་འདས། །གཟུང་འཛིན་སྤྲོས་པ་ཀུན་ཞི་བ། །རིག་སྟོང་འོད་གསལ་ཐུགས་ཀྱི་དབང་། །འཕོ་འགྱུར་མེད་པ་མངོན་གྱུར་ཤོག །སྔགས་མཐར། ཙིཏྟ་ཨ་བྷི་ཥིཉྩ་ཧཱུྃ། བུམ་དབང་རྟོགས་བསྐྱེད་གསང་དབང་སྦྱིན། ཨཱཿ རང་བྱུང་པདྨ་བྷཉྫའི་སྣོད། །བླ་མ་ཧེ་རུ་ཀ་དཔལ་ཉིད། །དགྱེས་པ་ཆེན་པོས་སྙོམས་ཞུགས་པའི། །བྱང་ཆུབ་སེམས་ཀྱི་བདུད་རྩིའི་བཅུད། །སྐལ་ལྡན་ལྕེ་ལ་བཞག་པ་ཡིས། །རྩ་ཁམས་ཡི་གེའི་འཁོར་ལོར་སྨིན། །རླུང་བཅུ་རྣམ་པར་དག་གྱུར་ཏེ། །དེ་བཞིན་གཤེགས་པའི་གསང་བ་ཆེའི། །ཡེ་ཤེས་ཐིག་ལེའི་བཅུད་ཐོབ་ཤོག །ཨ་ཧོ་མ་ཧཱ་སུ་ཁ་ཧོཿ། བདེ་བའི་ཡེ་ཤེས་ངོ་སྤྲད་ཅིང་། །དབང་གི་རྟོགས་བསྐྱེད་ཤེར་དབང་སྦྱིན། །རིག་པའི་གཟུགས་བརྙན་ལ་སོགས་པ། །དབང་པོའི་རིམ་པ་དང་བསྟུན་བྱ། །ཧོཿཆོས་རྣམས་ཀུན་གྱི་འབྱུང་གནས་ཆེ། །བདེ་བ་ཆེན་པོ་གསང་བའི་ཡུམ། །རིགས་ཀྱི་བུ་ལ་སྦྱིན་པར་བྱ། །སྔོན་བྱོན་རྒྱལ་བ་ཐམས་ཅད་ཀྱང་། །ཐབས་མཆོག་འདི་ལ་བརྟེན་ནས་གྲོལ། །འདི་སྤངས་ན་ནི་དངོས་གྲུབ་མེད། །དེ་བས་བློ་གྲོས་ཐབས་ཆེན་པོས། །གསང་བ་མཆོག་ལ་སྤྱོད་པར་བགྱི། །པདྨ་བྷཉྫ་མོ་ཀྵ་ཧོཿརྗེས་ཆགས་སྙོམས་ཞུགས་བདེ་ཆེན་ནི། །རྣམ་བཅས་སྟོང་ཉིད་སྒྱུ་མའི་འཕྲུལ། །ངོ་སྤྲོད་དེ་ཡི་དོན་བསྐྱངས་ཤིང་། །རྗེས་འབྲེལ་བརྟུལ་ཞུགས་ཆས་རྣམས་སྦྱིན། །ཨེ་མ་ཧོཿདགྱེས་པའི་གར་གྱིས་རྣམ་རོལ་པ། །བདེ་མཆོག་བརྟུལ་ཞུགས་གྲུབ་པ་ཆེ། །རྡོ་རྗེའི་གནས་ཡུལ་ཀུན་ཏུ་རྒྱུ། །འཇིགས་པ་མེད་པའི་བརྟུལ་ཞུགས་ཀྱིས། །ཞུམ་མེད་སྣང་བ་ཟིལ་གནོན་ཅིང་། །མཁའ་འགྲོའི་རུས་རྒྱན། སྟག་ཤམ། ཌཱར་རྐང་། རོ་གདན། ཁ་ཊྭཱྃ། རྟེན་འབྲེལ་གལ་རྟ་རྣམས། ཚོགས་དང་སྐལ་མཉམ་ཕྱིར། །རྣལ་འབྱོར་རོལ་པའི་ཆས་འདི་ལོངས། །སྔགས་དང་དབྱངས་གསལ་རྟེན་སྙིང་མཐར། ཙཪྻ་ཨ་བྷི་ཥིཉྩ་ཧཱུྃཿདབང་གི་རྟོགས་བསྐྱེད་ཚིག་དབང་སྦྱིན། །མེ་ལོང་ཤེལ་རྡོའི་བརྡས་མཚོན་ཏེ། ཨོཾ་ཨཱཿཧཱུྃ་ཧོཿཨ་ཧོ་ཡེ། སྐྱེ་མེད་སྟོང་པའི་རང་སྒྲ་ལས། །ཚིག་ཏུ་བརྗོད་པ་ཀུན་ཏུ་སྣང་། །དོན་གྱི་ཡུམ་ཆེན་ཤེར་ཕྱིན་ནི། །ཀུན་ཏུ་བཟང་པོའི་དགོངས་པའི་ཀློང་། །ཡེ་ནས་རང་ལ་རྫོགས་པ་ལ། །སྤང་ཐོབ་བྲལ་བའི་ཆོས་ཀྱི་དབྱིངས། །གཏིང་གསལ་འདུས་མ་བྱས་པ་ལ། །ངོ་བོ་སྐུ་དང་ཡེ་ཤེས་རྫོགས། །ལམ་ལྔའི་རྟོག་པ་དབྱིངས་སུ་ཆོད། །རྟེན་འབྲེལ་སྒྱུ་མ་ལྟར་སྣང་ཡང་། །དོན་ལ་བྲི་གང་འཕོ་འགྱུར་བྲལ། །དེ་བཞིན་ཉིད་དབྱིངས་ཀློང་དུ་ཨ། ཨ་ཨ་ཨ། ཞེས་དགོངས་པ་གཏད་ཅིང་རིག་པ་བསྲེ། །དབང་གི་རྟོགས་བསྐྱེད་མཐའ་རྟེན་དུ། །ཚེ་ཡི་དངོས་གྲུབ་སྦྱིན་ཅིང་བསྐུལ། །ཚེ་ཡི་འབྲང་རྒྱས་བཟང་པོ་ཐོགས། །ཧྲཱིཿའཆི་མེད་ཡེ་ཤེས་འོད་ཀྱི་སྐུ། །ཚེ་བདག་འདུས་པའི་ངོ་བོ་ཉིད། །འཇའ་ལུས་རྡོ་རྗེའི་སྐུ་བརྙེས་པ། །ཧེ་རུ་ཀ་དཔལ་དམ་པ་རྗེའི། །འཆི་མེད་ཚེ་ཡི་དབང་བསྐུར་བས། །སྐྱེ་འཆིའི་རྟོགས་པ་དབྱིངས་སུ་གཞོམ། །ཚེ་དཔག་མེད་མགོན་ཡབ་ཡུམ་གྱི། །གསང་གསུམ་རྟག་པའི་དབང་བསྐུར་སྦྱིན། །སྔགས་མཐར། ཨོཾ་བཛྲ་ཨ་ཡུ་ཥེ་ཚེ་བྷྲཱུཾནྲྀ་ཛ་སརྦ་སིདྡྷི་ཕ་ལ་ཧཱུྃ། ཨོཾ་ཨ་མཱ་ར་ཎི་ཛཱི་ཝནྟི་ཡེ་སྭཱ་ཧཱ། ཞེས་བརྗོད་ཚེ་འབྲང་ཚེ་རྫས་དངོས་གྲུབ་སྦྱིན། །ཤིས་པ་བརྗོད་ཅིང་དགའ་སྟོན་བྱ། །དམ་ཚིག་བསྒྲགས་བཟུང་གཏོང་རག་འབུལ། །དེས་ནི་ཡོངས་སུ་སྨིན་པར་འགྱུར། །ས་མ་ཡ། གུ་ཧྱ། རྒྱ་རྒྱ་རྒྱ། ཅེས་པའང་ཁོ་བོ་པདྨ་ཡེ་ཤེས་རྡོ་རྗེ་རང་ལོ་༦༥བ་མེ་བྱ་ཟླ་༡༢ཚེས་༢༢ལ་དམ་པ་སངས་རྒྱས་དེ་ཉིད་ཀྱི་སྐུ་ཡི་སྣང་བརྙན་ར་རིས་འཆར་བའི་རྐྱེན་གྱིས་ཡིད་ངོར་ཤར་བ་བཞིན། རྗེ་བླ་མ་པདྨ་འོད་གསལ་མདོ་སྔགས་གླིང་པའི་དམ་པའི་བླ་སྒྲུབ་དག་སྣང་སྙན་བརྒྱུད་ཀྱི་སྨིན་བྱེད་དུ་ཡིན་པར་རློམ་ནས་འབྲས་ལྗོངས་མཁའ་སྤྱོད་ཌཱ་ཀིའི་ཕོ་བྲང་ངོ་མཚར་སྤྲུལ་པའི་ཞིང་གི་གཙུག་ལག་ཁང་ཆེན་པོའི་འགྲམ་ལོག་གི་བ་གམ་དུ་ཤར་མར་བྲིས་པ་ནོངས་པར་གྱུར་ན་སྙིང་ནས་བཤགས་ཤིང་སྒྲིབ་པར་མི་འགྱུར་བ་དང་། ལེགས་བྱས་ཀྱིས་གདུལ་བྱ་སྐལ་བཟང་རྣམས་རྒྱུད་ཡོངས་སུ་སྨིན་ཅིང་ཕ་གཅིག་དམ་པའི་གསང་བ་གསུམ་གྱི་བྱིན་རླབས་སྙིང་ལ་སིམ་པའི་རྒྱུར་གྱུར་ཅིག །སརྦ་དཱ་མངྒ་ལཾ། ཤུ་བྷཾ། གོང་གི་རྒྱལ་ཟླའི་ཚེས་༢༠སྐོར་འགོས་ལོའི་དེབ་ཐེར་སྔོན་པོ་མཇལ་བས་ཞི་བྱེད་སྐོར་གྱི་རྣམ་ཐར་ལམ་ཙམ་རེ་བལྟས་སྐབས། དམ་པ་སངས་རྒྱས་སྐུ་མདོག་དམར་སྨུག་དབུ་སྐྲ་ནག་པོ་རལ་པ་རིང་པོའང་མིན་པ། ཐུང་ངུའང་མིན་པ་ཨརྦད་ཅན་ལྟ་བུ་ཕྱག་གཉིས་རེས་དཔྲལ་བར་ནམ་མཁའ་མཛོད་རྒྱ་ཅན། རེས་ཌཱ་རུ་ཐོད་པ་བསྣམ་པ་ཞིག་ཡིད་ངོར་ལམ་ལམ་གསལ་བ་བྱུང་ངོ་། །སརྦ་དཱ་མངྒ་ལཾ།། །།

[edit]

snyan brgyud dam pa'i bla sgrub snying thig gi/__dbang chog ye shes bcud thig bzhugs/__pha gcig dam pa rje la 'dud/__shin tu gsang ba'i rnal 'byor ni/__/nyams blangs smin par byed pa'i thabs/__/dkyil 'khor dmar zlum lte ba ru/__/thig le mthing ga chen po'i dbus/__/hrI d+hI mU~M gyi sa bon bkod/__/bum pa thod chang rig tsag dang /__brtul zhugs spyod pa'i chas rnams dang /__/tshe yi dngos grub rdzas rnams bkram/__/me long shel rdo dang bcas mthar/__/phyi nang mchod tshogs ci 'byor bshams/__/slob dpon rang nyid nus ldan sgrub/__/dbang rdzas dbyangs gsal rten snying gis/__/byin gyis brlab cing nus ldan bya/__/ting nge 'dzin gyi dbang blangs shing /__/rnam par 'joms pas las bum sgrub/__/slob ma khrus dbyungs bgegs bsal zhing /__/lo rgyus ji ltar rigs pa brjod/__/maN+Dal phul ba gsol ba btab/__/sangs rgyas kun bdag ngo bo nyid/__/he ru ka dpal dam pa rjer/__/gus pas gsol btab bdag rgyud ni/__/yongs su grol bar mdzad du gsol/__/lan gsum/__skyabs sems tshogs bsags dang /__/sdom bzung ji ltar rigs par bya/__/dngos gzhi lhar bskyed ye shes dbang /__/tiSh+Tha badz+ras brtan par bya/__/dbang lha spyan drangs mchod gsol gdab/__/de nas dbang rnams rim par bskur/__/bum pa bzang po che ba'i mchog__/yon tan kun gyi rgyan ldan pa/__/byang chub sems kyi rgyun bzang pos/__/skal ldan khyod la dbang bskur sbyin/__/ji ltar bde gshegs rgyal rnams kyis/__/de bzhin sras rnams dbang bskur ltar/__/dbang bskur rdo rje chen po 'dis/__/des ni khyod la dbang bskur ro/__/oM sarba ta thA ga ta a b+hi She ka ta sa ma ya shrI ye hU~M/__oM badz+ri b+ha wa ab+hi Shiny+tsa hU~M/__spyi bo nas ni dbang bskur zhing /__/sgrib dag byin brlabs lus gang zhing /__/bde ba chen po nyams su myongs/__/chu lhag spyi bor lud pa las/__/pad+ma'i rigs kyi gtsor gyur pa'i/__/dbang lhas dbur brgyan rgyas gdab bya/__dbang lha bstim zhing brtan bzhugs dang /__/mnga' gsol shis brjod ci rigs bya/__/bla ma'i smin mtshams oM yig las/__/oM dang sku 'phros bum dbang thob/__/sku yi gsang ba'i byin rlabs zhugs/__/brtan byed snang brnyan spyi gtsug bzhag__/oM/__sangs rgyas kun gyi sku yi bdag__/he ru ka dpal dpa' bo che/__/dam pa sangs rgyas 'gro mgon gyis/__/sku yi byin brlabs sbyin par bya/__/sngags mthar/__kA ya a b+hi Shiny+tsa oM/__bla ma'i mgrin pa'i AH__yig las/__/AH__dmar sngags kyi phreng ba 'phros/__/gsung gi gsang ba'i byin rlabs zhugs/__/bzlas lung sbyin cing bgrangs phreng ni/__/mgrin par bzhag cing brtan par bya/__AH__ji snyed brjod pa kun gyi gzhi/__/sgra tshig las 'das rang byung gi/__bdag med seng+ge'i sgra ldan pa/__/kun tu brjod pas dbang bskur ro/__/sngags mthar/__wA ka a b+hi Shiny+tsa AH__thugs ni tsit+ta dmar po ni/__/hU~M gis mtshan pa snying dbus bzhag__/bla ma'i thugs nas 'od dmar gyi/__/gong bu hU~M gis mtshan pa spros/__/snying ga'i dbus su thim par bsam/__hU~M/__mi rtog ye shes bsam las 'das/__/gzung 'dzin spros pa kun zhi ba/__/rig stong 'od gsal thugs kyi dbang /__/'pho 'gyur med pa mngon gyur shog__/sngags mthar/__tsit+ta a b+hi Shiny+tsa hU~M/__bum dbang rtogs bskyed gsang dbang sbyin/__AH__rang byung pad+ma b+hany+dza'i snod/__/bla ma he ru ka dpal nyid/__/dgyes pa chen pos snyoms zhugs pa'i/__/byang chub sems kyi bdud rtsi'i bcud/__/skal ldan lce la bzhag pa yis/__/rtsa khams yi ge'i 'khor lor smin/__/rlung bcu rnam par dag gyur te/__/de bzhin gshegs pa'i gsang ba che'i/__/ye shes thig le'i bcud thob shog__/a ho ma hA su kha hoH/__bde ba'i ye shes ngo sprad cing /__/dbang gi rtogs bskyed sher dbang sbyin/__/rig pa'i gzugs brnyan la sogs pa/__/dbang po'i rim pa dang bstun bya/__/hoHchos rnams kun gyi 'byung gnas che/__/bde ba chen po gsang ba'i yum/__/rigs kyi bu la sbyin par bya/__/sngon byon rgyal ba thams cad kyang /__/thabs mchog 'di la brten nas grol/__/'di spangs na ni dngos grub med/__/de bas blo gros thabs chen pos/__/gsang ba mchog la spyod par bgyi/__/pad+ma b+hany+dza mo k+Sha hoHrjes chags snyoms zhugs bde chen ni/__/rnam bcas stong nyid sgyu ma'i 'phrul/__/ngo sprod de yi don bskyangs shing /__/rjes 'brel brtul zhugs chas rnams sbyin/__/e ma hoHdgyes pa'i gar gyis rnam rol pa/__/bde mchog brtul zhugs grub pa che/__/rdo rje'i gnas yul kun tu rgyu/__/'jigs pa med pa'i brtul zhugs kyis/__/zhum med snang ba zil gnon cing /__/mkha' 'gro'i rus rgyan/__stag sham/__DAr rkang /__ro gdan/__kha T+wA~M/__rten 'brel gal rta rnams/__tshogs dang skal mnyam phyir/__/rnal 'byor rol pa'i chas 'di longs/__/sngags dang dbyangs gsal rten snying mthar/__tsaR+Ya a b+hi Shiny+tsa hU~MHdbang gi rtogs bskyed tshig dbang sbyin/__/me long shel rdo'i brdas mtshon te/__oM AHhU~M hoHa ho ye/__skye med stong pa'i rang sgra las/__/tshig tu brjod pa kun tu snang /__/don gyi yum chen sher phyin ni/__/kun tu bzang po'i dgongs pa'i klong /__/ye nas rang la rdzogs pa la/__/spang thob bral ba'i chos kyi dbyings/__/gting gsal 'dus ma byas pa la/__/ngo bo sku dang ye shes rdzogs/__/lam lnga'i rtog pa dbyings su chod/__/rten 'brel sgyu ma ltar snang yang /__/don la bri gang 'pho 'gyur bral/__/de bzhin nyid dbyings klong du a/__a a a/__zhes dgongs pa gtad cing rig pa bsre/__/dbang gi rtogs bskyed mtha' rten du/__/tshe yi dngos grub sbyin cing bskul/__/tshe yi 'brang rgyas bzang po thogs/__/hrIH'chi med ye shes 'od kyi sku/__/tshe bdag 'dus pa'i ngo bo nyid/__/'ja' lus rdo rje'i sku brnyes pa/__/he ru ka dpal dam pa rje'i/__/'chi med tshe yi dbang bskur bas/__/skye 'chi'i rtogs pa dbyings su gzhom/__/tshe dpag med mgon yab yum gyi/__/gsang gsum rtag pa'i dbang bskur sbyin/__/sngags mthar/__oM badz+ra a yu She tshe b+h+rUMnr-i dza sarba sid+d+hi pha la hU~M/__oM a mA ra Ni dzI wan+ti ye swA hA/__zhes brjod tshe 'brang tshe rdzas dngos grub sbyin/__/shis pa brjod cing dga' ston bya/__/dam tshig bsgrags bzung gtong rag 'bul/__/des ni yongs su smin par 'gyur/__/sa ma ya/__gu h+ya/__rgya rgya rgya/__ces pa'ang kho bo pad+ma ye shes rdo rje rang lo 65ba me bya zla 12tshes 22la dam pa sangs rgyas de nyid kyi sku yi snang brnyan ra ris 'char ba'i rkyen gyis yid ngor shar ba bzhin/__rje bla ma pad+ma 'od gsal mdo sngags gling pa'i dam pa'i bla sgrub dag snang snyan brgyud kyi smin byed du yin par rlom nas 'bras ljongs mkha' spyod DA ki'i pho brang ngo mtshar sprul pa'i zhing gi gtsug lag khang chen po'i 'gram log gi ba gam du shar mar bris pa nongs par gyur na snying nas bshags shing sgrib par mi 'gyur ba dang /__legs byas kyis gdul bya skal bzang rnams rgyud yongs su smin cing pha gcig dam pa'i gsang ba gsum gyi byin rlabs snying la sim pa'i rgyur gyur cig__/sarba dA mang+ga laM/__shu b+haM/__gong gi rgyal zla'i tshes 20skor 'gos lo'i deb ther sngon po mjal bas zhi byed skor gyi rnam thar lam tsam re bltas skabs/__dam pa sangs rgyas sku mdog dmar smug dbu skra nag po ral pa ring po'ang min pa/__thung ngu'ang min pa arbad can lta bu phyag gnyis res dpral bar nam mkha' mdzod rgya can/__res DA ru thod pa bsnam pa zhig yid ngor lam lam gsal ba byung ngo /__/sarba dA mang+ga laM//___//