DKR-KABUM-18-TSHA-010

🚧 This website is under continued development. We appreciate your patience!

Previous Text Back to Volume PageNext Text

ཤྲཱི་ཧེ་རུ་ཀ་མཆེད་ལྔའི་ཐུགས་ཏིག་གི་ལོ་རྒྱུས།

Wylie title	shrI he ru ka mched lnga'i thugs tig gi lo rgyus
Location	dil mgo mkhyen brtse bka' 'bum Volume 18, Text 10, Pages 50-52 (Folios 1a to 3b2)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་ (Khyentse, Dilgo)
Citation	Khyentse, Dilgo. ShrI he ru ka mched lnga'i thugs tig gi lo rgyus. In Skyabs rje dil mgo mkhyen brtse rin po che'i bka' 'bum, Vol. 18: 50-52. Delhi: Shechen Publications, 1994.
Genre	History Texts - lo rgyus
Cycle	ཤྲཱི་ཧེ་རུ་ཀ་མཆེད་ལྔའི་ཐུགས་ཏིག་ (shri he ru ka mched lnga'i thugs tig)

Tibetan Text

Wylie

[edit]

༄༅། །འཇམ་དབྱངས་མཁྱེན་བརྩེས་འོད་གསལ་དག་པའི་སྣང་ཆར་འཕགས་ཡུལ་ལྟ་བུའི་ས་གཞི་ཤིན་ཏུ་རྒྱ་ཆེ་ཞིང་ཁོད་སྙོམས་པ། སྤང་ལྗོངས་ནེའུ་གསེང་ཆུ་མཚོ་རྣམས་ལ་མེ་ཏོག་སྣ་ཚོགས་ཀྱིས་སྤྲས་ཤིང༌། ཤིན་ཏུ་ཉམས་དགའ་ལ་ཡིད་དུ་འོང་བ་ཞིག་ཏུ་ཕེབས་འདུག་པར་རྗེ་ཉིད་ཀྱིས་རུས་སྦལ་ཞིག་ལ་ཆིབས་པ་ནི་འཇམ་དབྱངས་ཀྱི་སྤྲུལ་པར་མཚོན་ནོ། །ཞྭ་ལུ་མཆོག་སྤྲུལ་བློ་གསལ་བསྟན་སྐྱོང་གིས་སེང་གེ་དཀར་མོ་ཆིབས་པ་དུས་འཁོར་གྱི་སྤྲུལ་པར་མཚོན་ཅིང༌། དཔལ་ས་སྐྱའི་རིང་ལུགས་ལ་བཀའ་དྲིན་གང་ལས་ཆེ། རྫོགས་ཆེན་པ་གཞན་ཕན་མཐའ་ཡས་ཀྱིས་གླང་ཆེན་ཐལ་ཀར་ཆིབས་པ་ནི་བདག་ཅག་སྟོན་པ་བཀའ་དྲིན་ཅན་གྱི་སྤྲུལ་པར་མཚོན་ཅིང༌། གཏེར་ཆེན་མཆོག་གྱུར་གླིང་པས་རྒྱ་སྟག་ངར་མ་ཆིབས་པ་ནི་ཨོ་རྒྱན་དུས་གསུམ་མཁྱེན་པའི་སྤྲུལ་པ་མཚོན་ཅིང༌། འཇམ་མགོན་ཀོང་སྤྲུལ་པདྨ་གར་དབང་གཡུ་འབྲུག་སྔོན་མོ་ལ་ཞོན་པ་ནི་ལོ་ཆེན་བཻ་རོ་ཙ་ནའི་སྤྲུལ་པར་མཚོན་ཅིང༌། འདི་གསུམ་ནི་སྔ་འགྱུར་བཀའ་གཏེར་གྱི་བསྟན་པ་ལ་བཀའ་དྲིན་ཤིན་ཏུ་ཆེ་བ་ལགས། ཐམས་ཅད་ཧེ་རུ་ཀའི་ཆ་བྱད་དཔའ་བོ་མཁའ་འགྲོ་དར་དང་རིན་ཆེན་རུས་པའི་རྒྱན་ལྡན་ཤིན་ཏུ་མང་པོ་དང་ཌཱ་དྲིལ་སོགས་ཕྱག་མཚན་སྣ་ཚོགས་ཐོགས་པ་རྣམས་དང་ལྷན་ཅིག་རྡོ་རྗེའི་གླུ་ལེན་ཅིང་གར་བསྒྱུར་བས་ཤིན་ཏུ་དགྱེས་པའི་སྣང་བ་ཡུན་རིང་མོ་བྱུང་གསུང་ནས་ཐུགས་ངོ་མཚར་བའི་ཚུལ་མཛད་དོ། ༈ རྗེ་བཙུན་བླ་མ་ཐམས་ཅད་མཁྱེན་གཟིགས་མཁྱེན་བརྩེའི་དབང་པོའི་དག་སྣང་གཟིགས་པ་ལྔ་ལྡན་གྱི་ལོ་རྒྱུས་རྣམ་ཐར་ཆེན་མོར་མཇལ་བས་འདི་ཡི་བླ་སྒྲུབ་ཚིག་དོན་ཟབ་ཅིང་རྒྱ་ཆེ་བ་ཞིག་ཡོད་ངེས་སྙམ་པ་ཡིད་ལ་ཡང་ཡང་དྲན་པས་རྐྱེན་བྱས། རང་ལོ་སོ་དྲུག་སྐོར་སྒྲུབ་གནས་དཀར་པོ་ནང་ཞེས་པར་ཕ་གཅིག་དམ་པ་སངས་རྒྱས་ཀྱི་སྒྲུབ་ཕུག་ལ་བརྟེན་ནས་གནས་པས་ཆོ་འཕྲུལ་ཟླ་བའི་དམར་ཕྱོགས་ཀྱི་ཚེས་བཅུར་ཟླ་བ་གྲོ་བཞིན་གྱི་འཕྲོད་སྦྱོར་དང་ལྡན་འདུག་པའི་ཉིན་འཆི་མེད་འཕགས་མའི་སྙིང་ཐིག་གི་ཚོགས་མཆོད་རྒྱས་པར་ཕུལ་ཞིང༌། དགའ་བཞི། སྟོང་བཞི། སྣང་བཞི་དང་སྦྱར་བའི་གཟིགས་པ་ལྔར་གསལ་བའི་རྣལ་འབྱོར་གྱི་དབང་ཕྱུག་ལྔ་ལ་གསོལ་འདེབས་ཞིག་བྲིས་ནས་ཚར་ཁ་ཤས་བཏོན་པས་གློ་བུར་དུ་གཞུང་དེར་ཆུ་བོ་ཞིག་འདུག་པ་རབ་ཏུ་རྒྱས་ནས་བྱུང་བ་རྟེན་འབྱུང་དགེ་སྙམ་ཞིང༌། ཕྱིས་རང་ལོ་ཞེ་བདུན་སྟེང་ཤྲཱི་ནཱ་ལེནྡྲ་གཉིས་པ་རྫོང་གསར་བཀྲ་ཤིས་ལྷ་རྩེར་རྗེ་གོང་མའི་སྐུ་མཆོད་རྫོགས་ནས་རིང་པོར་མ་ལོན་པར་སླེབས་པས་གཟིགས་པ་ལྔའི་ཞལ་ཐང་ཞིག་གཟིམས་ཆུང་དུ་བཀྲམ་ནས་བཞུགས་འདུག་པ་མཇལ་བ་དང༌། འཇམ་མགོན་ཆོས་རྗེ་དགོངས་པ་རྫོགས་པའི་གཟིམས་སྦུག་ཏུ་གསོལ་འདེབས་བླ་མའི་རྣལ་འབྱོར་འདྲ་བགྱིས་ཏེ་གནས་པ་ཀུན་གཟིགས་བླ་མའི་ཕྱག་བྲིས་དངོས་ཧེ་རུ་ཀ་འདུས་པའི་སྙིང་ཐིག་ཞེས་རྩ་ཐོ་ལྟ་བུ་མཇལ་བ་མཆོག་གླིང་ཡང་དག་སངས་རྒྱས་མཉམ་སྦྱོར་འབེབས་སྐབས་བརྡ་བསྒྱུར་གྱི་ཕྱག་ཐོ་ཡིན་པ་འདྲ་ཡང་རྐྱེན་དེས་བསྐུལ་ཏེ་ཤྲཱི་ཧེ་རུ་ཀ་མཆེད་ལྔའི་སྙིང་ཐིག་ཅེས་ཕྱི་གཟིགས་པ་ལྔའི་བླ་སྒྲུབ་རྫོགས་རིམ་ལ་སྒྱུ་འཕྲུལ་ལམ་རིམ། དུས་འཁོར་སྦྱོར་དྲུག །བདེ་མཆོག་རིམ་ལྔ། གྲོ་ལོད་ཧཱུྃ་ལྔ། འཇམ་དཔལ་རྫོགས་ཆེན་རྣམས་ཀྱི་རྡོ་རྗེའི་ཚིག་རྐང་ཡོད་པ་ཞིག་བྲིས་པ་རྗེ་བླ་མར་གཟིགས་འབུལ་ཞུས་པས་ཁར་སེང་ཕྲན་ལ་ཡང་འདས་མཆོད་སྐབས་ཐང་ཀ་འདི་མཇལ་བས་རྐྱེན་བྱས་འདི་འདྲ་ཞིག་བྲི་འདོད་བྱུང་བ་གཡས་ཆུང་ངུ་བཞག་སྟེ་བྲི་རྒྱུ་མ་བྱུང༌། ཁྱེད་ནས་བྲིས་པ་ལེགས་འདུག་གསུངས་ཏེ་དེ་འཕྲལ་དབང་གསན་ཏེ་ཕུལ་སྐབས་ཀཿཐོག་སི་ཏུ་མཆོག་སྤྲུལ་རིན་པོ་ཆེ་བྱམས་པ་ཆོས་ཀྱི་ཉི་མའང་ཕེབས་པས་དབང་ཕུལ་བ་རྟེན་འབྲེལ་ལེགས་འགྲིགས་བྱུང༌། ཕྱིས་སུ་རིམ་པ་བཞིན་ནང་སྒྲུབ་ཞི་ཁྲོ་རིགས་བརྒྱ། དུས་འཁོར། བདེ་མཆོག་དམར་པོ། གྲོ་ལོད། འཇམ་དབྱངས་རིགས་ལྔ་བཅས་སྒོས་སྒྲུབ་དང༌། གསང་སྒྲུབ་ཆིག་དྲིལ་བཀའ་བརྒྱད་བཅས་སོ་སོའི་དབང༌། སྒྲུབ་ཐབས་བྲིས་ཤིང་རྗེ་བླ་མས་སྨིན་གྲོལ་ཚང་བར་གསན་ཀྱང་ད་ལྟ་དཔེ་བཞུགས་པ་འཇམ་དཔལ་རིགས་ལྔ་ཙམ་ལས་མ་བྱུང་བར་དེ་ལ་ཕྱི་ནང་གསང་བ་ཆིག་དྲིལ་གྱི་དགོངས་པ་གུང་བསྡེབས་ཡིན་ཁུལ་གྱིས་ཆོག་ཁྲིགས་སུ་བསྡེབས་པ་ཙམ་མོ། ༈ ནང་སྒྲུབ་འདི་དག་རེ་རེ་བཞིན་གསལ་སྣང་རེ་རེས་བྲི་དགོས་པ་བྱུང་ཡང་ཡུན་རིང་སོང་བས་ད་ལྟ་ཞིབ་གསལ་ཡིད་ཡུལ་དུ་མ་མཆིས་སོ། ༈ གསང་སྒྲུབ་བཀའ་བརྒྱད་འདི་ཤིང་སྤྲེལ་སྟོན་ཟླའི་སྐོར་ཛཾ་ནང་པདྨ་ཤེལ་ཕུག་ཏུ་ཁྱབ་བདག་འཇམ་དཔའི་དབྱངས་དྷརྨ་མ་ཏི་ཆེད་ཕེབས་ཀྱིས་བཀའ་འདུས་ཆོས་ཀྱི་རྒྱ་མཚོ་དཀྱིལ་འཁོར་ཚོམ་བུ་ཉེར་གཅིག་གི་སྨན་སྒྲུབ་སྒྲུབ་ཆེན་དང་འབྲེལ་བར་མཛད་པ་རང་ཡང་ཚོགས་གྲལ་དུ་དབུགས་འབྱིན་བསྩལ་བའི་སྐལ་བཟང་གི་སྐབས་ཞིག་ཉམས་རྨིས་གང་ཡིན་མ་ངེས་པར་སྒྲུབ་ཕུག་ཉིད་དཔལ་ཆེན་སྒྲུབ་སྡེ་བརྒྱད་གཙོ་འཁོར་ཐམས་ཅད་རང་བྱོན་དུ་བཞུགས་པར་གསུངས་པ་དྲན་པའི་རྐྱེན་གྱིས་ཆེ་མཆོག་དཔལ་དགུའི་གསལ་སྣང་བརྟན་པོ་ཤར་བའི་རྐྱེན་གྱིས་བྲི་འདོད་བྱུང་བ་ལགས། ༈ ཡང༌། མཁྱེན་བརྩེ་རིན་པོ་ཆེའི་གཟིགས་པ་ལྔ་ལ། མཁྱེན་བརྩེས་རུས་སྦལ་ཆིབས་པ་སྤྲུལ་གཞི་འཇམ་དབྱངས། ཞྭ་ལུ་བློ་གསལ་བསྟན་སྐྱོང་སེང་གེ་སྤྲུལ་གཞི་དུས་འཁོར། འཇམ་མགོན་ཀོང་སྤྲུལ་འབྲུག་ལ་ཆིབས་པ་སྤྲུལ་གཞི་བཻ་རོ། མཆོག་གླིང་སྟག་ལ་ཆིབས་པ་སྤྲུལ་གཞི་གུ་རུ། རྒྱལ་སྲས་གཞན་ཕན་མཐའ་ཡས་གླང་ཆེན་ལ་ཆིབས་པ་སྤྲུལ་གཞི་སྟོན་པ་ཐུབ་དབང་ཡིན་པའི་བརྡ་རྟགས། སྤྱིར་སྐྱེས་བུ་ཆེན་པོ་འདི་དག་སོ་སོ་ལྟར་སྣང་ཡང་དོན་ལ་ཐུགས་རྒྱུད་གཅིག་པ། གང་དུ་སྐྱེ་བ་བཞེས་ཀྱང་ཐུགས་བསྐྱེད་སྨོན་ལམ་གྱིས་གཅིག་གྲོགས་གཅིག་གིས་མཛད་དགོས་པ་ཡིན་འདྲ། མཁྱེན་བརྩེའི་གཟིགས་པ་ལྔའི་ལོ་རྒྱུས་རྣམ་ཐར་དུ་རྒྱ་གར་གྱི་ས་ལྟ་བུའི་ཐང་ཡངས་པ་གསུངས་པས་སྐྱེས་བུ་འདི་དག་གི་སྤྲུལ་པ་རྒྱ་གར་སྔགས་འཆང་གི་ཚུལ་དུ་ཕེབས་ནས་བསྟན་པ་སྤེལ་རྒྱུ་ཡིན་འདྲ། ཁོང་གི་མཁའ་འགྲོ་གསང་འདུས་བསྙེན་པ་བཏང་སྐབས། མཁྱེན་བརྩེ་རིན་པོ་ཆེ་ཆོས་ཀྱི་བློ་གྲོས། ཞེ་ཆེན་ཀོང་སྤྲུལ། ཕྲན་བཅས་པས་ཚོགས་འཁོར་ཞིག་གསུང་འདུག་པས་དང་པོ་མཁྱེན་བརྩེ་རིན་པོ་ཆེ། དེ་ནས་ཀོང་སྤྲུལ་ཁོང༌། དེ་ནས་ཕྲན་བཅས་ཧེ་རུ་ཀའི་ཆས་ཀྱིས་གར་བྱས་པ་རྨིས་གསུངས་ཀྱང་མཁྱེན་ཀོང་མཆོག་གླིང་གསུམ་ལས་གཞན་སུ་ཡིན་ཤེས་ཀྱི་མི་འདུག་ཞུ།།

[edit]

@#/__/'jam dbyangs mkhyen brtses 'od gsal dag pa'i snang char 'phags yul lta bu'i sa gzhi shin tu rgya che zhing khod snyoms pa/_spang ljongs ne'u gseng chu mtsho rnams la me tog sna tshogs kyis spras shing*/_shin tu nyams dga' la yid du 'ong ba zhig tu phebs 'dug par rje nyid kyis rus sbal zhig la chibs pa ni 'jam dbyangs kyi sprul par mtshon no/_/zhwa lu mchog sprul blo gsal bstan skyong gis seng ge dkar mo chibs pa dus 'khor gyi sprul par mtshon cing*/_dpal sa skya'i ring lugs la bka' drin gang las che/_rdzogs chen pa gzhan phan mtha' yas kyis glang chen thal kar chibs pa ni bdag cag ston pa bka' drin can gyi sprul par mtshon cing*/_gter chen mchog gyur gling pas rgya stag ngar ma chibs pa ni o rgyan dus gsum mkhyen pa'i sprul pa mtshon cing*/_'jam mgon kong sprul pad+ma gar dbang g.yu 'brug sngon mo la zhon pa ni lo chen bai ro tsa na'i sprul par mtshon cing*/_'di gsum ni snga 'gyur bka' gter gyi bstan pa la bka' drin shin tu che ba lags/_thams cad he ru ka'i cha byad dpa' bo mkha' 'gro dar dang rin chen rus pa'i rgyan ldan shin tu mang po dang DA dril sogs phyag mtshan sna tshogs thogs pa rnams dang lhan cig rdo rje'i glu len cing gar bsgyur bas shin tu dgyes pa'i snang ba yun ring mo byung gsung nas thugs ngo mtshar ba'i tshul mdzad do/__!__rje btsun bla ma thams cad mkhyen gzigs mkhyen brtse'i dbang po'i dag snang gzigs pa lnga ldan gyi lo rgyus rnam thar chen mor mjal bas 'di yi bla sgrub tshig don zab cing rgya che ba zhig yod nges snyam pa yid la yang yang dran pas rkyen byas/_rang lo so drug skor sgrub gnas dkar po nang zhes par pha gcig dam pa sangs rgyas kyi sgrub phug la brten nas gnas pas cho 'phrul zla ba'i dmar phyogs kyi tshes bcur zla ba gro bzhin gyi 'phrod sbyor dang ldan 'dug pa'i nyin 'chi med 'phags ma'i snying thig gi tshogs mchod rgyas par phul zhing*/_dga' bzhi/_stong bzhi/_snang bzhi dang sbyar ba'i gzigs pa lngar gsal ba'i rnal 'byor gyi dbang phyug lnga la gsol 'debs zhig bris nas tshar kha shas bton pas glo bur du gzhung der chu bo zhig 'dug pa rab tu rgyas nas byung ba rten 'byung dge snyam zhing*/_phyis rang lo zhe bdun steng shrI nA len+d+ra gnyis pa rdzong gsar bkra shis lha rtser rje gong ma'i sku mchod rdzogs nas ring por ma lon par slebs pas gzigs pa lnga'i zhal thang zhig gzims chung du bkram nas bzhugs 'dug pa mjal ba dang*/_'jam mgon chos rje dgongs pa rdzogs pa'i gzims sbug tu gsol 'debs bla ma'i rnal 'byor 'dra bgyis te gnas pa kun gzigs bla ma'i phyag bris dngos he ru ka 'dus pa'i snying thig zhes rtsa tho lta bu mjal ba mchog gling yang dag sangs rgyas mnyam sbyor 'bebs skabs brda bsgyur gyi phyag tho yin pa 'dra yang rkyen des bskul te shrI he ru ka mched lnga'i snying thig ces phyi gzigs pa lnga'i bla sgrub rdzogs rim la sgyu 'phrul lam rim/_dus 'khor sbyor drug_/bde mchog rim lnga/_gro lod hU~M lnga/_'jam dpal rdzogs chen rnams kyi rdo rje'i tshig rkang yod pa zhig bris pa rje bla mar gzigs 'bul zhus pas khar seng phran la yang 'das mchod skabs thang ka 'di mjal bas rkyen byas 'di 'dra zhig bri 'dod byung ba g.yas chung ngu bzhag ste bri rgyu ma byung*/_khyed nas bris pa legs 'dug gsungs te de 'phral dbang gsan te phul skabs kaHthog si tu mchog sprul rin po che byams pa chos kyi nyi ma'ang phebs pas dbang phul ba rten 'brel legs 'grigs byung*/_phyis su rim pa bzhin nang sgrub zhi khro rigs brgya/_dus 'khor/_bde mchog dmar po/_gro lod/_'jam dbyangs rigs lnga bcas sgos sgrub dang*/_gsang sgrub chig dril bka' brgyad bcas so so'i dbang*/_sgrub thabs bris shing rje bla mas smin grol tshang bar gsan kyang da lta dpe bzhugs pa 'jam dpal rigs lnga tsam las ma byung bar de la phyi nang gsang ba chig dril gyi dgongs pa gung bsdebs yin khul gyis chog khrigs su bsdebs pa tsam mo/__!__nang sgrub 'di dag re re bzhin gsal snang re res bri dgos pa byung yang yun ring song bas da lta zhib gsal yid yul du ma mchis so/__!__gsang sgrub bka' brgyad 'di shing sprel ston zla'i skor dzaM nang pad+ma shel phug tu khyab bdag 'jam dpa'i dbyangs d+harma ma ti ched phebs kyis bka' 'dus chos kyi rgya mtsho dkyil 'khor tshom bu nyer gcig gi sman sgrub sgrub chen dang 'brel bar mdzad pa rang yang tshogs gral du dbugs 'byin bstsal ba'i skal bzang gi skabs zhig nyams rmis gang yin ma nges par sgrub phug nyid dpal chen sgrub sde brgyad gtso 'khor thams cad rang byon du bzhugs par gsungs pa dran pa'i rkyen gyis che mchog dpal dgu'i gsal snang brtan po shar ba'i rkyen gyis bri 'dod byung ba lags/__!__yang*/_mkhyen brtse rin po che'i gzigs pa lnga la/_mkhyen brtses rus sbal chibs pa sprul gzhi 'jam dbyangs/_zhwa lu blo gsal bstan skyong seng ge sprul gzhi dus 'khor/_'jam mgon kong sprul 'brug la chibs pa sprul gzhi bai ro/_mchog gling stag la chibs pa sprul gzhi gu ru/_rgyal sras gzhan phan mtha' yas glang chen la chibs pa sprul gzhi ston pa thub dbang yin pa'i brda rtags/_spyir skyes bu chen po 'di dag so so ltar snang yang don la thugs rgyud gcig pa/_gang du skye ba bzhes kyang thugs bskyed smon lam gyis gcig grogs gcig gis mdzad dgos pa yin 'dra/_mkhyen brtse'i gzigs pa lnga'i lo rgyus rnam thar du rgya gar gyi sa lta bu'i thang yangs pa gsungs pas skyes bu 'di dag gi sprul pa rgya gar sngags 'chang gi tshul du phebs nas bstan pa spel rgyu yin 'dra/_khong gi mkha' 'gro gsang 'dus bsnyen pa btang skabs/_mkhyen brtse rin po che chos kyi blo gros/_zhe chen kong sprul/_phran bcas pas tshogs 'khor zhig gsung 'dug pas dang po mkhyen brtse rin po che/_de nas kong sprul khong*/_de nas phran bcas he ru ka'i chas kyis gar byas pa rmis gsungs kyang mkhyen kong mchog gling gsum las gzhan su yin shes kyi mi 'dug zhu//