JKW-KABUM-10-THA-004-028

🚧 This website is under continued development. We appreciate your patience!

Previous Text Back to Volume PageNext Text

དབྱངས་ཅན་དཀར་མོ་ཕྱག་བཞི་མའི་སྒྲུབ་རྗེས་ཟླ་བ་གཞོན་ནུའི་འཁྲི་ཤིང་།

Wylie title	dbyangs can dkar mo phyag bzhi ma'i sgrub rjes zla ba gzhon nu'i 'khri shing
Location	mkhyen brtse'i bka' 'bum Volume 10, sde tshan 4, Text 28, Pages 369-376 (Folios 94a5 to 97b6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. dbyangs can dkar mo phyag bzhi ma'i sgrub rjes zla ba gzhon nu'i 'khri shing. In 'jam dbyangs mkhyen brtse'i dbang po'i bka' 'bum, Vol. 10: 369-376. Khams sde dge rdzong sar dgon: Rdzong sar blo gros phun tshogs, 2020.
Genre	Activity Manual - las byang  ·  Permission to Invoke (anujñā) - rjes gnang  ·  Sadhanas - Evocation Ritual - sgrub thabs  ·  Liturgy - ngag 'don
Deity	dbyangs can ma dkar mo
Colophon	ཅེས་པའང་རྒྱ་བོད་ཀྱི་ཡིག་རྙིང་གསལ་བྱེད་དང་བཅས་པ་ལས་ངག་འདོན་མདོར་བསྡུས་པའི་ཚུལ་གྱིས་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་སྦྱར་བའི་དགེ་བས་འགྲོ་ཀུན་སོ་སོ་ཡང་དག་པའི་རིག་པ་བཞིའི་ཡེ་ཤེས་ལ་དབང་འབྱོར་པའི་རྒྱུར་གྱུར་ཅིག། །།སརྦ་དཱ་ཀ་ལྱཱ་ཎཾ་བྷ་བ་ཏུ།།
	ces pa'ang rgya bod kyi yig rnying gsal byed dang bcas pa las ngag 'don mdor bsdus pa'i tshul gyis 'jam dbyangs bla ma dgyes pa'i 'bangs mkhyen brtse'i dbang pos sbyar ba'i dge bas 'gro kun so so yang dag pa'i rig pa bzhi'i ye shes la dbang 'byor pa'i rgyur gyur cig/__//sarba dA ka l+yA NaM b+ha ba tu

1 Texts in this Section (sde tshan or chos tshan)

28 369-376	དབྱངས་ཅན་དཀར་མོ་ཕྱག་བཞི་མའི་སྒྲུབ་རྗེས་ཟླ་བ་གཞོན་ནུའི་འཁྲི་ཤིང་། dbyangs can dkar mo phyag bzhi ma'i sgrub rjes zla ba gzhon nu'i 'khri shing Activity Manual - las byang   ·   Permission to Invoke (anujñā) - rjes gnang   ·   Sadhanas - Evocation Ritual - sgrub thabs   ·   Liturgy - ngag 'don	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །དབྱངས་ཅན་མ་དཀར་མོ་ཕྱག་བཞི་མའི་སྒྲུབ་ཐབས་རྗེས་གནང་མན་ངག་དང་བཅས་པ་ཟླ་བ་གཞོན་ནུའི་འཁྲི་ཤིང་ཞེས་བྱ་བ་བཞུགས་སོ། །ཨོཾ་སྭ་སྟི་སིདྡྷཾ། འཕགས་བཞི་སྐྱེད་དང་རོལ་པའི་ཡུམ། །རྡོ་རྗེ་ལྷ་མོ་དབྱངས་ཅན་མར། །བཏུད་ནས་དེ་ཡི་སྒྲུབ་ཐབས་དང་། །རྗེས་གནང་མན་ངག་འདུས་གསལ་བྲི། །འདི་ལ་གསུམ། སྒྲུབ་པའི་ཐབས། རྗེས་སུ་གནང་བ། ལས་ཚོགས་ཀྱི་ངེས་པའོ། །དང་པོ་ནི། ཕ་རོལ་གྱི་རྒོལ་བ་ཚར་གཅད་པ་དང་། མཐའ་ཡས་པའི་སྤོབས་པ་བསྐྱེད་པ་དང་། ཕྲིན་ལས་སྣ་ཚོགས་པ་བསྒྲུབ་པར་འདོད་པས། ཉམས་དགའ་བའི་སྨན་ལྗོངས་དང་། ཡིད་དུ་འོང་བའི་བྲག་རི་ཟླ་བ་ལྟར་དཀར་བའི་ཕུག་ཏུ། ཁྲུས་དང་གཙང་སྦྲ་ལ་གནས་པས། སྒོ་གསུམ་རྣམ་པར་གཡེང་བའི་ཚོགས་སྤངས་ཤིང་རྩེ་གཅིག་པའི་ཡིད་ཀྱིས་འཇུག་པར་བྱ་སྟེ། འགྲོ་རྣམས་བསྒྲལ་འདོད་བསམ་པ་ཡིས། །སངས་རྒྱས་ཆོས་དང་དགེ་འདུན་ལ། །བྱང་ཆུབ་སྙིང་པོར་མཆིས་ཀྱི་བར། རྟག་པར་བདག་ནི་སྐྱབས་སུ་མཆི། །ཞེས་སྐྱབས་འགྲོ་ཅི་ནུས་དང་། ཤེས་རབ་སྙིང་བརྩེ་དང་བཅས་པའི། །བརྩོན་པས་སེམས་ཅན་དོན་དུ་བདག །སངས་རྒྱས་མདུན་དུ་གནས་བཅས་ཏེ། །རྫོགས་པའི་བྱང་ཆུབ་སེམས་བསྐྱེད་བགྱི། ཞེས་ལན་གསུམ་གྱིས་སེམས་བསྐྱེད། སེམས་ཅན་ཐམས་ཅད་བདེ་བ་དང་སོགས་ཚད་མེད་བཞི་བསྒོམ། རང་སྐད་ཅིག་གིས་རྡོ་རྗེ་དབྱངས་ཅན་མར་གསལ་བའི་ཐུགས་ཀར་ཟླ་བ་ལ་གནས་པའི་ཧྲཱིཾཿཡིག་ལས་འོད་ཟེར་འཕྲོས་པས། ལྷོ་ཕྱོགས་ཡིད་ཀྱི་རོལ་མཚོ་ན་བཞུགས་པའི་འཕགས་མའི་ཐུགས་ཀའི་འཁོར་ལོ་རིན་པོ་ཆེའི་གཞལ་མེད་ཁང་དང་བཅས་པ་མདུན་གྱི་ནམ་མཁར་སྤྱན་དྲངས་པར་གྱུར། ཨོཾ་ཨེ་ཧྱེ་ཧི་བཛྲ་དེ་ཝཱི་མ་ཧཱ་ཙཀྲ་ས་མ་ཡཱཥྟཾ་ས་མཱ་ཛཿ ཨོཾ་བཛྲ་ཨརྒྷཾ་ཨཱཿཧཱུྃ། དེ་བཞིན་དུ། པཱ་དྱཾ། ཨཉྩ་མ་ནཾ། །པུཥྤེ་ནས་ཤབྡའི་བར་དང་། ཨ་ལཾ་ཀཱ་ར། མཱ་ལ། ཝཱི་ཎི། ཨོཾ་ཨཿཧཱུྃ་གཱི་རྟི་ནཱི་རྟི་ཞེས་སྦྱར་བ་དང་། རྡོ་རྗེ་དབྱངས་ཅན་ལྷ་མོ་ལ། །གུས་པས་ཕྱག་འཚལ་མཆོད་པ་འབུལ། །སྡིག་པའི་ཚོགས་ཀུན་སོ་སོར་བཤགས། །དགེ་བ་ཀུན་ལ་རྗེས་ཡི་རང་། །ཆོས་ཀྱི་འཁོར་ལོ་བསྐོར་བར་བསྐུལ། །མྱ་ངན་མི་འདའ་བཞུགས་གསོལ་འདེབས། །བསོད་ནམས་འགྲོ་བ་ཡོངས་ལ་བསྔོ། །བླ་མེད་བྱང་ཆུབ་མྱུར་ཐོབ་ཤོག །ཅེས་ཡན་ལག་བརྒྱད་དང་བཅས་པས་མཆོད། བཅོམ་ལྡན་འདས་མས་བདག་གི་རྒྱུད་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས་མདུན་གྱི་གཞལ་མེད་ཁང་གནས། ལྷ་མོའི་སྐུ་རང་ལུས། ཐུགས་ཀའི་འཁོར་ལོ་སྙིང་གར་ཐིམ་པ་ལས། གནས་ཁང་ཤེལ་དང་བཻཌཱུཪྻ་དང་། པདྨ་རཱ་ག་དང་། གསེར་བཟང་ལས་གྲུབ་པའི་གཞས་མེད་ཁང་གྲུ་བཞི་སྒོ་བཞི་རྟ་བབས་བཞིས་མཛེས་པ། རྒྱན་སྣ་ཚོགས་ཀྱིས་ཀུན་ནས་སྤྲས་པའི་དབུས་སུ། རང་ཉིད་སྐད་ཅིག་གིས་ལྷ་མོ་དབྱངས་ཅན་མར་གྱུར་པ་ནི། སྐུ་མདོག་དང་ཞལ་གསུམ་དཀར་བ། ཕྱག་དང་པོ་གཉིས་ཀྱིས་རལ་གྲི་དང་། ཨུཏྤལ། འོག་མ་གཉིས་ཀྱིས་པི་ཝཾ་སྦྲེང་བ། པད་ཟླ་ལ་རྡོ་རྗེའི་སྐྱིལ་ཀྲུང་གིས་བཞུགས་ཤིང་ལོ་བཅུ་དྲུག་ལོན་པ་ལྟར་ལང་ཚོ་ལ་བབ་པ། དར་དང་རིན་པོ་ཆེས་བརྒྱན་པ། སྙིང་པདྨ་འདབ་བརྒྱད་ཁ་ཟུམ་པའི་དབུས་སུ་ཧྲཱིཾ་ཡིག་དཀར་པོ་རིན་པོ་ཆེའི་སྒྲོན་མེ་ལྟར་འབར་བའི་འོད་ཀྱིས་སྙིང་གི་པདྨ་ཁ་བྱེ་བའི་འདབ་མ་བརྒྱད་ལ་དབྱངས་ཡིག་གཉིས་གཉིས་གནས་པ་དང་བཅས་པ་ལས་འོད་ཟེར་འཕྲོས། རང་དང་སེམས་ཅན་ཐམས་ཅད་ཀྱི་མ་རིག་པའི་མུན་པ་བསལ། རྒྱལ་བ་སྲས་དང་བཅས་པའི་མཁྱེན་པའི་ཡེ་ཤེས་བདུད་རྩིའི་རྣམ་པར་སྤྱན་དྲངས་ཏེ་ཐིམ་པས་པདྨ་ཡི་གེ་དང་བཅས་པ་གསལ་ཞིང་འབར་བའི་སྣང་བས་ཤེས་བྱ་ཐམས་ཅད་ལ་ཐོགས་པ་མེད་པའི་བློ་གྲོས་ཀྱི་མཐུ་མཆོག་ཏུ་རྒྱས་པར་བསམས་ལ། ཧྲཱིཾ་ཞེས་པའི་ཡི་གེ་འབྲུ་གཅིག་པ་འབུམ་ཕྲག་བཅོ་ལྔ་བཟླས་པས་འོག་ནས་འབྱུང་བའི་ལྟས་རྣམས་མཐོང་བ་ནི་བསྙེན་པའི་ཚུལ་ལོ། །སྒྲུབ་པ་དང་རྗེས་སུ་མཐུན་པའི་བཟླས་པ་ནི། ཐུགས་ཀར་པདྨ་དཀར་པོ་འདབ་མ་བརྒྱད་པའི་ལྟེ་བར་ཧྲཱིཾ། འདབ་མ་བརྒྱད་ལ་དབྱངས་བཅུ་དྲུག་གཡས་སྐོར། ཡིག་འབྲུ་རྣམས་རལ་གྲི་ཕྱེད་པའི་གདན་ལ་གནས་པ། དེ་ལས་འོད་ཟེར་འཕྲོས། རང་གི་སྒྲིབ་གཉིས་ཀྱི་མུན་པ་བསལ་ཞིང་བློ་གྲོས་ཀྱི་མཐུ་བརྟན་པར་བྱས། སེམས་ཅན་ཐམས་ཅད་ཀྱི་སྒྲིབ་གཉིས་བག་ཆགས་དང་བཅས་སྦྱངས་ཏེ། ཚུར་འདུས་པ་དང་ལྷན་ཅིག་ཏུ་བརྟན་གཡོའི་དྭངས་བཅུད་ཐམས་ཅད་སྙིང་གའི་ས་བོན་སྔགས་ཕྲེང་དང་བཅས་པ་ལ་ཐིམ་པར་མོས་པས། ཨོཾ་བཛྲ་དེ་ཝཱི་པི་ཙུ་པི་ཙུ་པྲཛྙཱ་ཝརྡྷ་ཧྲཱིཾ་ཧཱུྃ། འབུམ་ཕྲག་གསུམ་བཟླ་བར་གསུངས་ནའང་བཞི་འགྱུར་གྱི་རིགས་པས་བཅུ་གཉིས་བཟླས་ན་རྟགས་རྣམས་རྫོགས་པར་འགྱུར་རོ། །རྟགས་ནི། ནངས་པར་སྐྱ་རེངས་ཤར་བའི་དུས་སུ་ཟླ་བ་རྒྱས་པ་དང་། སྐར་མ་པ་ཝ་སངས་དང་། སྒྲོན་མེ་འབར་བ་རྣམས་དངོས་སམ་རྨི་ལམ་དུ་མཐོང་ན་རིམ་པ་བཞིན་དུ་གཟི་བརྗིད་རྒྱས་པ་དང་། དབྱངས་སྙན་པ་དང་། ཡིད་གསལ་བར་འགྱུར་ཞིང་། ཐུན་མོང་དུ་ལྐུགས་པ་ཡིན་ཀྱང་ངག་གི་དབང་ཕྱུག་ཆེན་པོའི་གནས་ཐོབ་པར་གསུངས་ལ། མཚོན་ཆའི་འཁོར་ལོ་མཐོང་ན་ནུས་པ་དང་ལྡན་པར་འགྱུར་རོ། །རྟགས་རྫོགས་པས་ལས་ཐམས་ཅད་ཐོགས་པ་མེད་པར་འགྲུབ་བོ། །ཐུན་ལས་ལྡང་བ་ན། རང་ལྷ་མོར་གསལ་བ་ཐུགས་ཀའི་འཁོར་ལོ་ལ་ཐིམ། དེ་ཧྲཱིཾ་ལ་ཐིམ་པར་གྱུར་པའི་མོས་པས་སེམས་བཟུང་ཞིང་མཐར་དམིགས་མེད་དུ་བཞག །དགེ་བ་བསྔོ་ཞིང་སྨོན་ལམ་གདབ། ཐུན་མཚམས་ཀྱི་བྱ་བ་ལ་འཇུག་གོ །གཉིས་པ་ནི། སྟེགས་བུའི་དབུས་སུ་མཉྫིའི་ཁར་མཎྜ་ལར་མེ་ཏོག་གི་ཚོམ་བུ་དང་། མདུན་དུ་དཀར་གསུམ་མངར་གསུམ་གྱི་གཏོར་མ། ཆུ་གསུམ་སྔོན་དུ་འགྲོ་བའི་ཉེར་སྤྱོད་རྣམས་བཤམ། བསང་སྦྱངས། སྟོང་པའི་ངང་ལས་ཨོཾ་ལས་བྱུང་བའི་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བར་ཨོཾ་འོད་དུ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། ཞལ་བསིལ། མེ་ཏོག་སོགས་མཆོད་པ་བྱིན་རླབས་སྤྱི་ལྟར་དང་། །པཱ་དྱཾ་གྱི་རྗེས་སུ། ཨཉྩ་མཾ་ནཾ་སྦྱར་བ་སྔོན་དུ་འགྲོ་བས་བདག་བསྐྱེད་གོང་ལྟར་བྱ། མདུན་བསྐྱེད་ནི། རང་གི་སྙིང་གའི་ས་བོན་ལས་འོད་ཟེར་འཕྲོས་པས་ལྷོ་ཕྱོགས་ཡིད་ཀྱི་རོལ་མཚོ་ནས་འཕགས་མ་རྟེན་དང་བརྟེན་པར་བཅས་པ་མདུན་གྱི་ནམ་མཁར་སྤྱན་དྲངས་པར་གྱུར། ཨོཾ་ཨེ་ཧྱེ་ཧི་སོགས་ནས། ནཱི་རྟི་ཞེས་མཆོད་པའི་བར་གོང་ལྟར་དང་། ཛཿཧཱུྃ་བྃ་ཧོཿ མདུན་གྱི་རྟེན་དང་དབྱེར་མེད་དུ་ཐིམ། དེ་ཡོངས་སུ་གྱུར་བ་ལས་ཤེལ་དང་སོགས་ནས། སྤྲས་པའི་དབུས་སུ། ལྷ་མོ་དབྱངས་ཅན་མ་སྐུ་མདོག་དང་ཞལ་གསུམ་དཀར་བ་སོགས་ནས། རིན་པོ་ཆེས་བརྒྱན་པ། ཐུགས་ཀར་པདྨ་དཀར་པོ་འདབ་མ་བརྒྱད་པ་རབ་ཏུ་རྒྱས་པའི་དབུས་སུ་ཧྲཱིཾ། འདབ་མ་བརྒྱད་ལ་དབྱངས་ཡིག་གཉིས་གཉིས་གནས་པར་གྱུར། མཆོད་པ་བསང་སྦྱངས་བྱིན་རླབས་སྔོན་དུ་འགྲོ་བས། ཨོཾ་བཛྲ་དེ་ཝཱི་སྭ་ར་སྭ་སྟི་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ་ནས། ཨོཾ་ཨཱཿཧཱུྃ་གཱི་རྟི་ནཱི་རྟི་བར་སྦྱར་བས་མཆོད། འཇམ་དབྱངས་ལྷ་མོ་དབྱངས་སྙན་མ། །རབ་མཛེས་ཚངས་དབྱངས་བློ་བཟང་མ། །མཚུངས་མེད་སྙིང་དབུས་མགྲིན་སྐྱོང་མ། །འདོད་རྒུར་བསྒྱུར་ལ་ཕྱག་འཚལ་ལོ། །བདེ་ལྡན་ངག་གི་དབང་ཕྱུག་མ། །མི་འཚེ་མི་བསླུ་ཚེ་འཛིན་མ། །བག་ཡོད་ཡིད་འོང་བདེ་སྟེར་མ། །ཚངས་སྤྱོད་ཚངས་རིགས་མ་ཁྱོད་འདུད། །ཅེས་བསྟོད། བཅོམ་ལྡན་འདས་མས་བདག་དང་སེམས་ཅན་ཐམས་ཅད་ལ་བློ་གྲོས་ཀྱི་མཐུ་ཕུན་སུམ་ཚོགས་པ་སྩལ་དུ་གསོལ། ཞེས་གསོལ་བ་གདབ། མདུན་བསྐྱེད་ལ་དམིགས་པའི་བཟླས་པ་ཅུང་ཟད་བྱ། མཐར་གཏོར་མ་བསང་སྦྱངས། ཨོཾ་ཨཱཿཧཱུྃ་དང་ཨ་ཀཱ་རོས་བརླབ། ཨོཾ་ཨཱཿབཛྲ་པྲཱི་ཏི་དེ་ཝཱི་ས་པ་རི་ཝཱ་ར་ཨ་མྲྀ་ཏ་བ་ལིཾ་ཁཱ་ཧི་ཁཱ་ཧི། མ་མ་སརྦ་སིདྡྷི་ཧཱུྃ་ཕ྄ཊ་སྭཱ་ཧཱ། ལན་གསུམ་གྱིས་དབུལ། གོང་ལྟར་མཆོད་ཅིང་བསྟོད་ལ་འདོད་དོན་གསོལ། དེ་ནས་རྗེས་གནང་དངོས་ནི། ཆོས་བཤད་ཇི་ལྟར་རིགས་པས་མཚམས་སྦྱར་ཏེ། དེ་ལ་འདིར་གང་གསན་པར་བྱ་བའི་ཆོས་ནི། འཕགས་མ་དབྱངས་ཅན་མས་རྗེས་སུ་བཟུང་བའི་པཎྜི་ཏ་ཆེན་པོ་ཟླ་བ་གཞོན་ནུ་ནས་ཉེ་བར་བརྒྱུད་དེ། བལ་པོའི་པཎྜི་ཏ་བུདྡྷ་ཤྲཱི་ལས་ཁྲོ་ཕུ་ལོ་ཙཱ་བ་ཆེན་པོ་གནུབས་བྱམས་པའི་དཔལ་གྱིས་གསན་པའི་རྡོ་རྗེ་ལྷ་མོ་དབྱངས་ཅན་མ་དཀར་མོ་ཕྱག་བཞི་མའི་རྗེས་སུ་གནང་བ་བསྒྲུབ་པ་ལ་སློབ་དཔོན་གྱི་བྱ་བ་གྲུབ་ནས་སོགས་འབྲེལ་བཀོད་ལ། མཎྜལ། གསོལ་འདེབས་ནས་བཟུང་དགེ་བསྔོ་བར་ཁོ་བོས་བྱས་པའི་ནི་རི་ཏེ་པའི་ལུགས་ཀྱི་བྱམས་པའི་རྗེས་གནང་ལ་ལྷ་སྔགས་ཀྱི་ཁྱད་པར་སོགས་མ་འཁྲུལ་པར་སྦྱར་བས་གྲུབ་ཅིང་། རྗེས་སུ་མདུན་བསྐྱེད་ལ་མཆོད་བསྟོད། ནོངས་བཤགས། གཤེགས་གསོལ། བདག་བསྐྱེད་བསྡུ་རིམ་བསྔོ་སྨོན་ཤིས་བརྗོད་བཅས་སྤྱི་ལྟར་བྱའོ། །གསུམ་པ་ནི། གོང་དུ་བཤད་པའི་བསྙེན་སྒྲུབ་སྔོན་དུ་སོང་བས། ཚར་བཅད་པའི་ལས་ལྔ་དང་། རྗེས་སུ་བཟུང་བའི་ལས་ལྔ་སྟེ་བཅུ་ཕྲག་རྣམས་བསྒྲུབ་པ་སྟེ། རྒྱ་གཞུང་ས་བཅད་དང་བཅས་པ་ལས་བློ་གྲོས་ཀྱི་མིག་ཕྱེ་སྟེ་ཤེས་པར་བྱའོ། །འཇམ་པའི་དབྱངས་སོགས་འཕགས་རྣམས་ཀྱི། །མཁྱེན་བརྩེའི་དབང་པོ་བརྙེས་འདོད་ན། །ཟླ་བ་གཞོན་ནུའི་འཁྲི་ཤིང་འདིས། །རིག་པའི་ཆུ་གཏེར་རྒྱས་པར་མཛོད། ཅེས་པའང་རྒྱ་བོད་ཀྱི་ཡིག་རྙིང་གསལ་བྱེད་དང་བཅས་པ་ལས་ངག་འདོན་མདོར་བསྡུས་པའི་ཚུལ་གྱིས་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་སྦྱར་བའི་དགེ་བས་འགྲོ་ཀུན་སོ་སོ་ཡང་དག་པའི་རིག་པ་བཞིའི་ཡེ་ཤེས་ལ་དབང་འབྱོར་པའི་རྒྱུར་གྱུར་ཅིག། །།སརྦ་དཱ་ཀ་ལྱཱ་ཎཾ་བྷ་བ་ཏུ།། །། ༈

[edit]

dbyangs can dkar mo phyag bzhi ma'i sgrub rjes zla ba gzhon nu'i 'khri shing / @#/_/dbyangs can ma dkar mo phyag bzhi ma'i sgrub thabs rjes gnang man ngag dang bcas pa zla ba gzhon nu'i 'khri shing zhes bya ba bzhugs so/__/oM swa sti sid+d+haM/__'phags bzhi skyed dang rol pa'i yum/__/rdo rje lha mo dbyangs can mar/__/btud nas de yi sgrub thabs dang /__/rjes gnang man ngag 'dus gsal bri/__/'di la gsum/__sgrub pa'i thabs/__rjes su gnang ba/__las tshogs kyi nges pa'o/__/dang po ni/__pha rol gyi rgol ba tshar gcad pa dang /__mtha' yas pa'i spobs pa bskyed pa dang /__phrin las sna tshogs pa bsgrub par 'dod pas/__nyams dga' ba'i sman ljongs dang /__yid du 'ong ba'i brag ri zla ba ltar dkar ba'i phug tu/__khrus dang gtsang sbra la gnas pas/__sgo gsum rnam par g.yeng ba'i tshogs spangs shing rtse gcig pa'i yid kyis 'jug par bya ste/__'gro rnams bsgral 'dod bsam pa yis/__/sangs rgyas chos dang dge 'dun la/__/byang chub snying por mchis kyi bar/__rtag par bdag ni skyabs su mchi/__/zhes skyabs 'gro ci nus dang /__shes rab snying brtse dang bcas pa'i/__/brtson pas sems can don du bdag__/sangs rgyas mdun du gnas bcas te/__/rdzogs pa'i byang chub sems bskyed bgyi/__zhes lan gsum gyis sems bskyed/__sems can thams cad bde ba dang sogs tshad med bzhi bsgom/__rang skad cig gis rdo rje dbyangs can mar gsal ba'i thugs kar zla ba la gnas pa'i hrIMHyig las 'od zer 'phros pas/__lho phyogs yid kyi rol mtsho na bzhugs pa'i 'phags ma'i thugs ka'i 'khor lo rin po che'i gzhal med khang dang bcas pa mdun gyi nam mkhar spyan drangs par gyur/__oM e h+ye hi badz+ra de wI ma hA tsakra sa ma yASh+taM sa mA dzaH__oM badz+ra ar+g+haM AHhU~M/__de bzhin du/__pA d+yaM/__any+tsa ma naM/__/puSh+pe nas shab+da'i bar dang /__a laM kA ra/__mA la/__wI Ni/__oM aHhU~M gI rti nI rti zhes sbyar ba dang /__rdo rje dbyangs can lha mo la/__/gus pas phyag 'tshal mchod pa 'bul/__/sdig pa'i tshogs kun so sor bshags/__/dge ba kun la rjes yi rang /__/chos kyi 'khor lo bskor bar bskul/__/mya ngan mi 'da' bzhugs gsol 'debs/__/bsod nams 'gro ba yongs la bsngo/__/bla med byang chub myur thob shog__/ces yan lag brgyad dang bcas pas mchod/__bcom ldan 'das mas bdag gi rgyud byin gyis brlab tu gsol/__zhes gsol ba btab pas mdun gyi gzhal med khang gnas/__lha mo'i sku rang lus/__thugs ka'i 'khor lo snying gar thim pa las/__gnas khang shel dang baiDUR+Ya dang /__pad+ma rA ga dang /__gser bzang las grub pa'i gzhas med khang gru bzhi sgo bzhi rta babs bzhis mdzes pa/__rgyan sna tshogs kyis kun nas spras pa'i dbus su/__rang nyid skad cig gis lha mo dbyangs can mar gyur pa ni/__sku mdog dang zhal gsum dkar ba/__phyag dang po gnyis kyis ral gri dang /__ut+pal/__'og ma gnyis kyis pi waM sbreng ba/__pad zla la rdo rje'i skyil krung gis bzhugs shing lo bcu drug lon pa ltar lang tsho la bab pa/__dar dang rin po ches brgyan pa/__snying pad+ma 'dab brgyad kha zum pa'i dbus su hrIM yig dkar po rin po che'i sgron me ltar 'bar ba'i 'od kyis snying gi pad+ma kha bye ba'i 'dab ma brgyad la dbyangs yig gnyis gnyis gnas pa dang bcas pa las 'od zer 'phros/__rang dang sems can thams cad kyi ma rig pa'i mun pa bsal/__rgyal ba sras dang bcas pa'i mkhyen pa'i ye shes bdud rtsi'i rnam par spyan drangs te thim pas pad+ma yi ge dang bcas pa gsal zhing 'bar ba'i snang bas shes bya thams cad la thogs pa med pa'i blo gros kyi mthu mchog tu rgyas par bsams la/__hrIM zhes pa'i yi ge 'bru gcig pa 'bum phrag bco lnga bzlas pas 'og nas 'byung ba'i ltas rnams mthong ba ni bsnyen pa'i tshul lo/__/sgrub pa dang rjes su mthun pa'i bzlas pa ni/__thugs kar pad+ma dkar po 'dab ma brgyad pa'i lte bar hrIM/__'dab ma brgyad la dbyangs bcu drug g.yas skor/__yig 'bru rnams ral gri phyed pa'i gdan la gnas pa/__de las 'od zer 'phros/__rang gi sgrib gnyis kyi mun pa bsal zhing blo gros kyi mthu brtan par byas/__sems can thams cad kyi sgrib gnyis bag chags dang bcas sbyangs te/__tshur 'dus pa dang lhan cig tu brtan g.yo'i dwangs bcud thams cad snying ga'i sa bon sngags phreng dang bcas pa la thim par mos pas/__oM badz+ra de wI pi tsu pi tsu pradz+nyA war+d+ha hrIM hU~M/__'bum phrag gsum bzla bar gsungs na'ang bzhi 'gyur gyi rigs pas bcu gnyis bzlas na rtags rnams rdzogs par 'gyur ro/__/rtags ni/__nangs par skya rengs shar ba'i dus su zla ba rgyas pa dang /__skar ma pa wa sangs dang /__sgron me 'bar ba rnams dngos sam rmi lam du mthong na rim pa bzhin du gzi brjid rgyas pa dang /__dbyangs snyan pa dang /__yid gsal bar 'gyur zhing /__thun mong du lkugs pa yin kyang ngag gi dbang phyug chen po'i gnas thob par gsungs la/__mtshon cha'i 'khor lo mthong na nus pa dang ldan par 'gyur ro/__/rtags rdzogs pas las thams cad thogs pa med par 'grub bo/___/thun las ldang ba na/__rang lha mor gsal ba thugs ka'i 'khor lo la thim/__de hrIM la thim par gyur pa'i mos pas sems bzung zhing mthar dmigs med du bzhag__/dge ba bsngo zhing smon lam gdab/__thun mtshams kyi bya ba la 'jug go__/gnyis pa ni/__stegs bu'i dbus su many+dzi'i khar maN+Da lar me tog gi tshom bu dang /__mdun du dkar gsum mngar gsum gyi gtor ma/__chu gsum sngon du 'gro ba'i nyer spyod rnams bsham/__bsang sbyangs/__stong pa'i ngang las oM las byung ba'i rin po che las grub pa'i snod yangs shing rgya che bar oM 'od du zhu ba las byung ba'i lha rdzas las grub pa'i mchod yon/__zhabs bsil/__zhal bsil/__me tog sogs mchod pa byin rlabs spyi ltar dang /__/pA d+yaM gyi rjes su/__any+tsa maM naM sbyar ba sngon du 'gro bas bdag bskyed gong ltar bya/__mdun bskyed ni/__rang gi snying ga'i sa bon las 'od zer 'phros pas lho phyogs yid kyi rol mtsho nas 'phags ma rten dang brten par bcas pa mdun gyi nam mkhar spyan drangs par gyur/__oM e h+ye hi sogs nas/__nI rti zhes mchod pa'i bar gong ltar dang /__dzaHhU~M ba~M hoH__mdun gyi rten dang dbyer med du thim/__de yongs su gyur ba las shel dang sogs nas/__spras pa'i dbus su/__lha mo dbyangs can ma sku mdog dang zhal gsum dkar ba sogs nas/__rin po ches brgyan pa/__thugs kar pad+ma dkar po 'dab ma brgyad pa rab tu rgyas pa'i dbus su hrIM/__'dab ma brgyad la dbyangs yig gnyis gnyis gnas par gyur/__mchod pa bsang sbyangs byin rlabs sngon du 'gro bas/__oM badz+ra de wI swa ra swa sti sa pa ri wA ra ar+g+haM pra tIts+tsha swA hA nas/__oM AHhU~M gI rti nI rti bar sbyar bas mchod/__'jam dbyangs lha mo dbyangs snyan ma/__/rab mdzes tshangs dbyangs blo bzang ma/__/mtshungs med snying dbus mgrin skyong ma/__/'dod rgur bsgyur la phyag 'tshal lo/__/bde ldan ngag gi dbang phyug ma/__/mi 'tshe mi bslu tshe 'dzin ma/__/bag yod yid 'ong bde ster ma/__/tshangs spyod tshangs rigs ma khyod 'dud/__/ces bstod/__bcom ldan 'das mas bdag dang sems can thams cad la blo gros kyi mthu phun sum tshogs pa stsal du gsol/__zhes gsol ba gdab/__mdun bskyed la dmigs pa'i bzlas pa cung zad bya/__mthar gtor ma bsang sbyangs/__oM AHhU~M dang a kA ros brlab/__oM AHbadz+ra prI ti de wI sa pa ri wA ra a mr-i ta ba liM khA hi khA hi/__ma ma sarba sid+d+hi hU~M pha?T swA hA/__lan gsum gyis dbul/__gong ltar mchod cing bstod la 'dod don gsol/__de nas rjes gnang dngos ni/__chos bshad ji ltar rigs pas mtshams sbyar te/__de la 'dir gang gsan par bya ba'i chos ni/__'phags ma dbyangs can mas rjes su bzung ba'i paN+Di ta chen po zla ba gzhon nu nas nye bar brgyud de/__bal po'i paN+Di ta bud+d+ha shrI las khro phu lo tsA ba chen po gnubs byams pa'i dpal gyis gsan pa'i rdo rje lha mo dbyangs can ma dkar mo phyag bzhi ma'i rjes su gnang ba bsgrub pa la slob dpon gyi bya ba grub nas sogs 'brel bkod la/__maN+Dal/__gsol 'debs nas bzung dge bsngo bar kho bos byas pa'i ni ri te pa'i lugs kyi byams pa'i rjes gnang la lha sngags kyi khyad par sogs ma 'khrul par sbyar bas grub cing /__rjes su mdun bskyed la mchod bstod/__nongs bshags/__gshegs gsol/__bdag bskyed bsdu rim bsngo smon shis brjod bcas spyi ltar bya'o/__/gsum pa ni/__gong du bshad pa'i bsnyen sgrub sngon du song bas/__tshar bcad pa'i las lnga dang /__rjes su bzung ba'i las lnga ste bcu phrag rnams bsgrub pa ste/__rgya gzhung sa bcad dang bcas pa las blo gros kyi mig phye ste shes par bya'o/__/'jam pa'i dbyangs sogs 'phags rnams kyi/__/mkhyen brtse'i dbang po brnyes 'dod na/__/zla ba gzhon nu'i 'khri shing 'dis/__/rig pa'i chu gter rgyas par mdzod/__ces pa'ang rgya bod kyi yig rnying gsal byed dang bcas pa las ngag 'don mdor bsdus pa'i tshul gyis 'jam dbyangs bla ma dgyes pa'i 'bangs mkhyen brtse'i dbang pos sbyar ba'i dge bas 'gro kun so so yang dag pa'i rig pa bzhi'i ye shes la dbang 'byor pa'i rgyur gyur cig/__//sarba dA ka l+yA NaM b+ha ba tu//____//__!_