JKW-KABAB-13-PA-014

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' babs Volume 13, Text 14, Pages (Folios to )
Author	འཇམ་མགོན་ཀོང་སྤྲུལ་
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Citation	'jam dbyangs mkhyen brtse'i dbang po. . In Rdzong sar 'jam dbyangs mkhyen brtse'i dbang po'i bka' babs, Vol. 13: 1-. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Revelations - gter ma  ·  Lineage Supplications - brgyud 'debs
Cycle	འཆི་མེད་འཕགས་མའི་སྙིང་ཐིག་ ('chi med 'phags ma'i snying thig)
Deity	sgrol ma dkar mo, sgrol ma yid bzhin 'khor lo
Karchag page	JKW-KABAB-Volume-13-PA-Karchag
RTZ	In the Rinchen Terdzö: https://rtz.tsadra.org/index.php/Terdzo-CHI-015

Tibetan Text

Wylie

[edit]

དྷཱི།༔ འཆི་མེད་འཕགས་མའི་སྙིང་ཐིག་ལས༔ ཕྲིན་ལས་ཡེ་ཤེས་སྣང་བ་བཞུགས༔ འཆི་མེད་ཡིད་བཞིན་འཁོར་ལོ་ལ༔ སྒོ་གསུམ་གུས་པས་ཕྱག་འཚལ་ནས༔ གང་དེའི་ཟབ་མོའི་རྣལ་འབྱོར་ནི༔ དངོས་གྲུབ་རྣམ་གཉིས་བསྒྲུབ་ཕྱིར་བཤད༔ ས་མ་ཡ༔ དབེན་ཞིང་ཉམས་དགའི་གནས་མཆོག་ཏུ༔ དབང་ཐོབ་དམ་ཚིག་ལ་གནས་པའི༔ སྔགས་པས་དཀྱིལ་འཁོར་སྤྱི་མཐུན་དབུས༔ བྷནྡྷ་དུམ་བུ་གསུམ་པའི་ནང་༔ ཅོང་ཞི་བྲག་ཞུན་འབྲས་བུ་གསུམ༔ དབང་པོ་ལག་པ་རྟག་ཏུ་ངུ་༔ རྩ་བ་ལྔ་རྣམས་མཉམ་སྦྱར་བའི༔ རིལ་བུ་སྲན་འཕོས་ཙམ་གྱིས་བཀང་༔ དར་དམར་ཁ་བཅད་མཆོད་གཏོར་བཤམ༔ བདེ་བའི་བསྟན་ལ་མཉམ་བཞག་ནས༔ སྦྱོར་དངོས་རྗེས་ཀྱིས་ཉམས་སུ་བླང་༔ ས་མ་ཡ༔ སྔོན་འགྲོའི་དང་པོ་སྐྱབས་འགྲོ་ནི༔ མདུན་མཁར་སྐྱབས་ཡུལ་གསལ་བཏབ་སྟེ༔ ན་མོ༔ བདག་སོགས་འགྲོ་ཀུན་བྱང་ཆུབ་བར༔ དཀོན་མཆོག་གསུམ་གྱི་ངོ་བོ་ཉིད༔ བླ་མ་ཡིད་བཞིན་འཁོར་ལོ་ལ༔ མི་ཕྱེད་གུས་པས་སྐྱབས་སུ་མཆི༔ གཉིས་པ་སྨོན་འཇུག་སེམས་བསྐྱེད་ནི༔ ཧོཿ མཁའ་མཉམ་སེམས་ཅན་མ་ལུས་ཀུན༔ སྡུག་བསྔལ་མཚོ་ལས་བསྒྲལ་བྱའི་ཕྱིར༔ རྗེ་བཙུན་འཕགས་མའི་རྣལ་འབྱོར་གྱིས༔ འཆི་མེད་བསྒྲུབ་པར་སེམས་བསྐྱེད་དོ༔ གསུམ་པ་ཡན་ལག་བདུན་པ་ནི༔ ཧོ༔ ཕྱོགས་དུས་རྒྱལ་བ་སྲས་བཅས་དང་༔ ཡུམ་གྱུར་སྒྲོལ་མའི་ཞབས་པདྨོར༔ ཞིང་རྡུལ་ཀུན་གྱི་གྲངས་སྙེད་ཀྱི༔ སྒོ་གསུམ་གུས་པས་ཕྱག་འཚལ་ལོ༔ ཕྱི་ནང་གསང་བ་བླ་མེད་པའི༔ ཀུན་བཟང་མཆོད་སྤྲིན་རྒྱ་མཚོས་མཆོད༔ སྡིག་སྒྲིབ་ཉེས་ལྟུང་མཐོལ་ཞིང་བཤགས༔ ཚོགས་གཉིས་སྤྱོད་ལ་རྗེས་ཡི་རང་༔ ཆོས་ཀྱི་འཁོར་ལོ་བསྐོར་བཞིན་ཏུ༔ མྱ་ངན་མི་འདའ་བཞུགས་གསོལ་འདེབས༔ དགེ་ཚོགས་བྱང་ཆུབ་སྙིང་པོར་བསྔོ༔ གཞན་དོན་སངས་རྒྱས་མྱུར་འགྲུབ་ཤོག༔ ཚོགས་ཞིང་རང་ཐིམ་གཉིས་མེད་ངང་༔ ལས་ཀྱི་ཁྲོ་བོའི་ང་རྒྱལ་གྱིས༔ བཞི་པ་བགེགས་གཏོར་སྦྱིན་པ་ནི༔ ཧཱུྃ༔ གདོད་ནས་འཁོར་འདས་དབྱེར་མེད་ཀྱང་༔ གློ་བུར་འཁྲུལ་པའི་གདོན་བགེགས་ཀུན༔ མཆོད་སྦྱིན་གཏོར་མ་འདི་ལོངས་ལ༔ རང་བཞིན་མེད་པའི་དབྱིངས་སུ་དེངས༔ དྲགས་སྔགས་བརྗོད་ཅིང་ཐུན་གྱིས་གཟིར༔ རྡོ་རྗེའི་ལྟ་བས་བལྟས་ནས་ནི༔ ལྔ་པ་སྲུང་བའི་འཁོར་ལོ་བསྒོམ༔ ཧྲཱི༔ སྣང་སྲིད་སྣོད་བཅུད་ཐམས་ཅད་ཀུན༔ རྡོ་རྗེ་སྲུང་བའི་གུར་ཁང་དང་༔ ལྷ་སྔགས་གཉུག་མའི་ཡེ་ཤེས་ལས༔ མཚམས་ཀྱི་དཀྱིལ་འཁོར་ལྷུན་གྱིས་གྲུབ༔ བཛྲ་ཛྙཱ་ན་རཀྵ་ཨོཾ་ཨཱཿཧཱུྃ༔ དྲུག་པ་བྱིན་ཆེན་དབབ་པ་ནི༔ བདག་ཉིད་འཕགས་མའི་གསལ་སྣང་བཅས༔ འོད་ཟེར་སྤྲིན་དང་གདུང་བའི་གླུ༔ སྤོས་དང་རོལ་མོའི་བརྡས་བསྐུལ་ཏེ༔ ཕྱོགས་བཅུ་དུས་བཞིའི་རྩ་གསུམ་ལྷ༔ འཕགས་མའི་གསང་གསུམ་ཕྱག་རྒྱར་སད༔ བདག་གནས་སྒྲུབ་པའི་རྫས་ལ་ཐིམ༔ བྱིན་རླབས་གཟི་བྱིན་འབར་བར་བསམ༔ ཨོཾ་ཨཱཿཧཱུྃ༔ ཨ་ལ་ལ་ཧོ༔ ས་མ་ཡ་ཧོ༔ ས་མ་ཡ་སྟྭྃ༔ གཞི་དབྱིངས་ཆོས་སྐུའི་ཕོ་བྲང་ནས༔ གཞི་སྣང་སོ་སོར་ཀུན་རྟོག་པ༔ པདྨའི་རིགས་མཆོག་བཅོམ་ལྡན་འདས༔ ཡིད་བཞིན་འཁོར་ལོ་ཚེ་འཕེལ་མས༔ གནས་འདིར་བྱིན་ཕོབ་དབང་མཆོག་སྐུར༔ ལུས་ངག་ཡིད་ལ་ཡེ་ཤེས་སྐྱེད༔ ཚེ་བསོད་དཔལ་འབྱོར་ཉམས་རྟོགས་སྤོར༔ མཆོག་དང་ཐུན་མོང་དངོས་གྲུབ་སྩོལ༔ ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ༔ ཛྙཱ་ན་བཛྲ་ས་མ་ཡ་ཨཱ་བེ་ཤ་ཡ་ཨ་ཨཱ༔ ཧྲཱིཾ་ཧྲཱིཾ་ཕེཾ་ཕེཾ༔ ཧཱུྃ་ཧཱུྃ་ཧཱུྃ༔ ཛཿཧཱུྃ་བྃ་ཧོ༔ བདུན་པ་མཆོད་རྫས་བྱིན་བརླབ་ནི༔ ཨོཾ་ཨཱཿཧཱུྃ༔ གནས་ཡུལ་བདེ་ཆེན་པདྨོ་བཀོད༔ དག་པ་རབ་འབྱམས་ཞིང་གི་དབུས༔ ཕྱི་ནང་གསང་བའི་མཆོད་རྫས་ཀུན༔ ནམ་མཁའ་མཛོད་ཀྱི་འཁོར་ལོར་གྱུར༔ ཨོཾ་ཨཱཿཧཱུྃ་སརྦ་པཱུ་ཛ་མེ་གྷ་ས་མ་ཡ་ཧཱུྃ༔ ས་མ་ཡ༔ རྒྱ་རྒྱ་རྒྱ གཉིས་པ་དངོས་གཞིའི་ལས་རིམ་ལ༔ དང་པོ་དམ་ཚིག་བསྐྱེད་པ་ནི༔ ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾཿ འཁོར་འདས་ཆོས་ཀུན་བཟོད་མ་ནས༔ འོད་གསལ་དེ་བཞིན་ཉིད་དབྱིངས་ལས༔ ཟུང་འཇུག་ཀུན་སྣང་སྙིང་རྗེའི་རྩལ༔ རྒྱུ་ཡི་ཏིང་འཛིན་ཏཱྃ་དཀར་པོ༔ མཁའ་ལས་འཇའ་ཚོན་བཞིན་ཏུ་ཤར༔ འོད་འཕྲོས་སྣོད་བཅུད་དངོས་འཛིན་སྦྱངས༔ འབྱུང་ལྔ་ཡུམ་གྱི་མཁའ་ཀློང་དུ༔ ནོར་བུ་ཆུ་ཤེལ་ལས་གྲུབ་པའི༔ ཐར་པ་ཆེན་པོའི་གཞལ་མེད་ཁང་༔ གྲུ་བཞི་སྒོ་བཞི་མཚན་ཉིད་རྫོགས༔ ཡིད་བཞིན་རིན་ཆེན་ཏོག་གིས་མཛེས༔ རྟ་བབས་ཆོས་འཁོར་རི་དྭགས་གདུགས༔ ཕ་གུ་དྲཱ་བ་དྲྭ་ཕྱེད་དང་༔ ཤར་བུ་མདའ་ཡབ་རྒྱན་གྱིས་བརྒྱན༔ འདོད་སྣམ་མཆོད་པའི་ལྷ་མོ་དང་༔ ཕྱི་རོལ་འཇིག་རྟེན་སྐྱོང་བས་བསྐོར༔ དེ་དབུས་པདྨ་འདབ་བཞིའི་སྟེང་༔ ཐབས་ཤེས་ཉི་ཟླ་ཁ་སྦྱོར་དབུས༔ ཟུང་འཇུག་ཏཱྃ་ཡིག་སྙོམས་པར་ཞུགས༔ དེ་ལས་འོད་འཕྲོས་འཕགས་པ་མཆོད༔ འཁོར་འདས་དྭངས་བཅུད་གཅིག་ཏུ་འདུས༔ ཡོངས་གྱུར་ཡེ་ཤེས་སྒྱུ་མའི་སྐུ༔ དུས་གསུམ་རྒྱལ་བའི་ཕྲིན་ལས་བདག༔ འཆི་མེད་ཡིད་བཞིན་འཁོར་ལོ་ནི༔ རབ་དཀར་ཞལ་གཅིག་ཕྱག་གཉིས་མ༔ ཕྱག་གཡས་མཆོག་སྦྱིན་གཡོན་པ་ནི༔ དཀོན་མཆོག་གསུམ་མཚོན་སྐྱབས་སྦྱིན་རྒྱས༔ ཨུཏྤ་ལར་གནས་ཚེ་བུམ་བསྣམས༔ ཞི་འཛུམ་ཡེ་ཤེས་སྤྱན་བདུན་ལྡན༔ དར་དང་རིན་ཆེན་རྒྱན་གྱིས་མཛེས༔ ཞབས་གཉིས་རྡོ་རྗེའི་སྐྱིལ་ཀྲུང་གིས༔ པདྨ་ཟླ་བའི་གདན་ལ་བཞུགས༔ རང་འདྲ་ཐབས་མཆོག་གར་གྱི་དབང་༔ པདྨ་ཚེ་བུམ་བསྣམས་པས་འཁྲིལ༔ རྗེས་ཆགས་བདེ་ཆེན་དགའ་བ་བཞིར༔ སྙོམས་པ་བཞུགས་པའི་མཁའ་གསང་ནས༔ བྱང་སེམས་ས་བོན་ཏཱྃ་དང་བྷྲཱུྃ༔ ཧྲཱིཿཧཱུྃ་འཕྲོ་འདུའི་སྦྱོར་བ་ལས༔ ཤར་དུ་རྡོ་རྗེ་སྒྲོལ་མ་མཐིང་༔ མཆོག་སྦྱིན་ཨུཏྤལ་རྡོ་རྗེ་བསྣམས༔ ལྷོ་རུ་རིན་ཆེན་སྒྲོལ་མ་སེར༔ མཆོག་སྦྱིན་ཨུཏྤལ་རིན་ཆེན་བསྣམས༔ ནུབ་ཏུ་པདྨའི་སྒྲོལ་མ་དམར༔ མཆོག་སྦྱིན་ཨུཏྤལ་ལྕགས་ཀྱུ་བསྣམས༔ བྱང་དུ་ལས་ཀྱི་སྒྲོལ་མ་ནག༔ མཆོག་སྦྱིན་ཨུཏྤལ་རལ་གྲི་བསྣམས༔ ཐམས་ཅད་དར་དང་རིན་ཆེན་བརྒྱན༔ ཞི་རྒྱས་དབང་དྲག་ཉམས་དང་ལྡན༔ ཞབས་ཟུང་ཕྱེད་སྐྱིལ་པད་ཟླར་བཞུགས༔ སླར་ཡང་ཛཿཧཱུྃ་བྃ་ཧོཿའཕྲོས༔ སྒོ་བཞིར་པད་ཉིའི་གདན་གྱི་སྟེང་༔ རྡོ་རྗེ་ལྕགས་ཀྱུ་ཞགས་པ་དང་༔ ལྕགས་སྒྲོག་དྲིལ་བུའི་སྒྲོལ་མ་ནི༔ དཀར་སེར་དམར་ལྗང་ཞི་ཁྲོའི་ཉམས༔ རང་རྟགས་ཕྱག་མཚན་ཨུཏྤལ་བསྣམས༔ བརྐྱང་བསྐུམ་གར་གྱིས་བདུད་བཞི་བརྫིས༔ དར་དང་རཏྣའི་རྒྱན་གྱིས་མཛེས༔ བར་མཚམས་རྩ་གསུམ་ཆོས་སྲུང་ཚོགས༔ དབྱིངས་ལས་ཡེ་ཤེས་རང་ཤར་བའི༔ སྒྱུ་འཕྲུལ་དྲྭ་བ་ཆེན་པོའི་ཚུལ༔ ཉི་མ་དང་ནི་འོད་ཟེར་བཞིན༔ སོ་སོའི་རིགས་ཀྱི་ཚོམ་བུར་བཅས༔ སྣང་སྲིད་གཞིར་བཞེངས་ཆེན་པོའི་ལྷ༔ མ་བསྐྱེད་ཡེ་རྫོགས་ཚུལ་དུ་གསལ༔ ཀུན་ཀྱང་སྤྱི་མགྲིན་ཐུགས་ཀ་རུ༔ རྡོ་རྗེ་གསུམ་གྱི་ཡི་གེས་མཚན༔ དེ་ལས་འཕྲོས་པའི་འོད་ཟེར་གྱིས༔ ཡེ་ཤེས་སེམས་དཔའ་སྤྱན་དྲངས་བསམ༔ གཉིས་པ་ཡེ་ཤེས་བསྐུལ་བ་ནི༔ ཧྲཱི༔ སོ་སོར་ཀུན་ཏུ་རྟོག་པ་ཡི༔ ཡེ་ཤེས་ཆེན་པོ་ཚེ་ཡི་ལྷ༔ འོད་དཔག་མེད་པའི་དབུ་རྒྱན་ཅན༔ དུས་གསུམ་སངས་རྒྱས་ཕྲིན་ལས་མ༔ ཚུར་གཤེགས་ཡིད་བཞིན་འཁོར་ལོ་འཆང་༔ རིགས་ཀྱི་ཚོམ་བུ་སྤྲུལ་འཁོར་བཅས༔ ཆོས་སྐུ་སྐྱེ་བ་མེད་པ་ལས༔ སྐྱེ་བའི་ཆོ་འཕྲུལ་གཟུགས་ཀྱི་སྐུ༔ སྙིང་རྗེ་ཆེན་པོའི་ཐུགས་དམ་གྱིས༔ སྒྲུབ་ལ་དངོས་གྲུབ་མཆོག་སྩོལ་ཕྱིར༔ དམ་ཚིག་དཀྱིལ་འཁོར་འདིར་དགོངས་ལ༔ རྡོ་རྗེའི་ཡེ་ཤེས་བསྐྱེད་དུ་གསོལ༔ ས་མ་ཡ་ཧོཿ ས་མ་ཡ་སྟྭཾ༔ ཨེ་ཨཱ་རལླི་ཧྲཱིཾ་ཧྲཱིཾ་ཛཿ ཛྙཱ་ན་ས་ཏྭ་ཨ་ཨཱ༔ གསུམ་པ་བརྟན་པར་བྱ་བ་ནི༔ དབྱིངས་ནས་སྤྱན་དྲངས་ཡེ་ཤེས་པ༔ དམ་ཚིག་འཁོར་ལོར་དགུག་གཞུག་བཅིང་༔ དགྱེས་མཉམ་ཆེན་པོར་རོ་གཅིག་བསམ༔ ཨོཾཿ རྡོ་རྗེའི་ཡེ་ཤེས་བླ་མེད་པའི༔ སྐུ་གསུང་ཐུགས་ཀྱི་ཕྱག་རྒྱ་ནི༔ ཏིང་འཛིན་སྤྲུལ་པའི་ལྷ་ཚོགས་དང་༔ དབྱེར་མེད་ཆེན་པོར་བརྟན་པར་བཞུགས༔ བཛྲ་ཛྙཱ་ན་ཛཿཧཱུྃ་བྃ་ཧོཿ ས་མ་ཡ་ཏིཥྛ་ལྷནཿ བཞི་པ་གུས་ཕྱག་འཚལ་བ་ནི༔ ཧྲཱིཿ འཆི་མེད་འཕགས་མའི་དཀྱིལ་འཁོར་པ༔ གདོད་ནས་རང་དང་ལྷན་ཅིག་སྐྱེས༔ གཉིས་འཛིན་བྲལ་བ་ལྟ་བའི་ཕྱག༔ དག་མཉམ་ཆོས་སྐུའི་དབྱིངས་སུ་འཚལ༔ ཨ་ལ་ལ་ཧོཿ ཨ་ཏི་པུ་ཧོ༔ པྲ་ཏཱིཙྪ་ཧོ༔ ལྔ་པ་མཆོད་པ་འབུལ་བ་ནི༔ རང་ལས་རྡོ་རྗེའི་ལྷ་མོའི་ཚོགས༔ ནམ་མཁའ་གང་བར་རབ་སྤྲོས་ཏེ༔ མཆོད་པའི་སྤྲིན་ཆེན་གཏིབས་པར་བསམ༔ ཨོཾ༔ དངོས་འབྱོར་ཡིད་ཀྱིས་རྣམ་སྤྲུལ་པའི༔ ཞིང་ཁམས་རྒྱ་མཚོའི་མཆོད་རྫས་ཀུན༔ འཕགས་མ་ཡིད་བཞིན་འཁོར་ལོར་འབུལ༔ བཞེས་ནས་འཆི་མེད་དངོས་གྲུབ་སྩོལ༔ ཨོཾ་ཨཱརྻཱ་ཏཱ་རཱ་ས་པ་རི་ཝ་ར་ཨརྒྷཾ་པཱ་དྱཾ་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནི་ཝི་དྱཱ་ཤབྡ་པྲ་ཏཱིཙྪ་སྭཱ་ཧཱ༔ ཨོཾ༔ ཡུལ་དང་དབང་པོར་འབྲེལ་བ་ཡི༔ གཟུང་འཛིན་བདེ་བ་ཆེན་པོར་ཤར༔ རྡོ་རྗེའི་གཟུགས་སྒྲ་དྲི་རོ་རེག༔ མཆོད་པའི་ཕྱག་རྒྱ་ཆེན་པོར་བཞེས༔ ཨོཾ་ཨཱརྻཱ་ཏཱ་རཱ་ས་པ་རི་ཝཱ་ར་རཱུ་པ་ཤབྡ་གནྡེ་ར་ས་སྤར་ཤེ་པྲ་ཏཱིཙྪ་སྭཱ་ཧཱ༔ ཨོཾ༔ རྩ་བརྒྱད་སྟོང་སྦྱར་ཨ་མྲྀ་ཏ༔ ཁམས་གསུམ་བསྒྲལ་བའི་རཀྟའི་བཅུད༔ འདོད་ཡོན་ལྔ་ལྡན་བ་ལིཾ་ཏས༔ དཀྱིལ་འཁོར་ལྷ་ཚོགས་མཉེས་གྱུར་ཅིག༔ སརྦ་པཉྩ་ཨ་མྲྀ་ཏ་མ་ཧཱ་རཀྟ་མ་ཧཱ་བ་ལིཾ་ཏ་ཁཱ་ཧི༔ ཨཱཿ མཆོད་བྱ་མཆོད་བྱེད་མཆོད་ཡུལ་སོགས༔ འཁོར་གསུམ་སྤྲོས་པ་ལས་འདས་པའི༔ རང་བཞིན་འོད་གསལ་བྱང་ཆུབ་སེམས༔ མཆོག་གི་མཆོད་པ་ཆེན་པོར་བཞེས༔ སརྦ་དྷརྨ་དྷཱ་ཏུ་ཨཱཏྨ་ཀོ྅ཧཾཿ དྲུག་པ་རྡོ་རྗེའི་གླུ་ཡིས་བསྟོད༔ ཨོཾ༔ འཇིག་རྟེན་དབང་ཕྱུག་སྙིང་རྗེའི་བདག༔ ཞལ་གྱི་ཆུ་སྐྱེས་ལས་བྱུང་བ༔ དུས་གསུམ་སངས་རྒྱས་སྐྱེད་མཛད་ཡུམ༔ ཡིད་བཞིན་འཁོར་ལོ་ཁྱོད་ལ་བསྟོད༔ དྲི་མེད་ཟླ་བ་ནོར་བུའི་མདོག༔ མཆོག་སྦྱིན་ཨུཏྤལ་ཕྱག་རྒྱ་ཅན༔ ཞི་འཛུམ་མཚན་དཔེའི་དཔལ་འབར་བའི༔ རྡོ་རྗེའི་སྐུ་ལ་ཕྱག་འཚལ་བསྟོད༔ དབྱངས་ཀྱི་ཡན་ལག་རྒྱ་མཚོ་ལས༔ ཞི་བསིལ་བདུད་རྩིའི་ཆར་འབེབས་པས༔ སེམས་ཅན་ཁམས་རྣམས་སད་མཛད་པ༔ ཚངས་པའི་གསུང་ལ་ཕྱག་འཚལ་བསྟོད༔ མཁྱེན་དང་བརྩེ་བའི་ཡེ་ཤེས་ཀྱིས༔ ཤེས་བྱ་ཀུན་ལ་སྙོམས་པར་འཇུག༔ བསམ་གྱིས་མི་ཁྱབ་ཕྱག་རྒྱ་ཆེ༔ འོད་གསལ་ཐུགས་ལ་ཕྱག་འཚལ་བསྟོད༔ གང་གིས་ཁྱོད་ལ་གསོལ་བཏབ་པས༔ དེ་ལ་དེ་མ་ཐག་བྱིན་རློབ༔ དངོས་གྲུབ་འདོད་དགུ་སྩོལ་མཛད་པའི༔ ཡོན་ཏན་ཕ་མཐའ་ཡས་ལ་བསྟོད༔ མཚན་དང་སྐུ་ཡི་བཀོད་པ་དང་༔ རིག་པའི་གསང་སྔགས་སྣ་ཚོགས་པས༔ ཞི་རྒྱས་དབང་དང་མངོན་སྤྱོད་ཀྱི༔ ཕྲིན་ལས་ལྷུན་གྱིས་གྲུབ་ལ་བསྟོད༔ ཆོས་ཉིད་གཅིག་ལས་མ་གཡོས་ཀྱང་༔ གདུལ་བྱའི་བསམ་པ་ཇི་བཞིན་ཏུ༔ སྒྱུ་འཕྲུལ་དྲྭ་བའི་ཚུལ་སྟོན་པ༔ དཀྱིལ་འཁོར་ལྷ་ཚོགས་ཀུན་ལ་འདུད༔ བདུན་པ་བཟླས་པ་བྱ་བ་ལ༔ ཐུགས་དམ་ཉེ་བར་བསྙེན་པ་ནི༔ རང་ཉིད་འཕགས་མའི་ཐུགས་ཀ་རུ༔ ཡེ་ཤེས་སེམས་དཔའ་ཚེ་དཔག་མེད༔ དཀར་གསལ་མཉམ་བཞག་ཚེ་བུམ་འཛིན༔ དར་དང་རིན་ཆེན་རྒྱན་གྱིས་མཛེས༔ རྡོ་རྗེའི་སྐྱིལ་ཀྲུང་པད་ཟླར་བཞུགས༔ འོད་དང་འོད་ཟེར་འཕྲོ་བ་ཡི༔ ཐུགས་དབུས་ཆུ་སྐྱེས་ཉི་ཟླའི་དབུས༔ ཏཱྃ་མཐར་སྔགས་ཀྱི་ཕྲེང་བས་བསྐོར༔ བཟླས་པས་ཐུགས་དམ་རྒྱུད་བསྐུལ་ཏེ༔ འོད་ཀྱི་སྣང་བ་མཐའ་ཡས་པ༔ གཙུག་ཏོར་ནོར་བུའི་རྩེ་ནས་འཐོན༔ དེ་ལས་འཕགས་མ་རྣམ་པར་རྒྱལ༔ ཆུ་ཤེལ་མདོག་ཅན་ཕྱག་གཡས་ཀྱིས༔ སྐྱབས་སྦྱིན་ཕྱག་རྒྱས་ལྕགས་ཀྱུ་དང་༔ གཡོན་པས་མཆོག་སྦྱིན་ཚེ་བུམ་བསྣམས༔ འོད་དང་འོད་ཟེར་དང་བཅས་པ༔ གྲངས་མེད་ཉི་ཟེར་རྡུལ་ལྟར་འཕྲོས༔ དཀྱིལ་འཁོར་ལྷ་ཚོགས་ཐམས་ཅད་དང་༔ ཕྱོགས་བཅུའི་རྒྱལ་བ་སྲས་དང་བཅས༔ ཡི་དམ་དཔའ་བོ་རྣལ་འབྱོར་མ༔ རྡོ་རྗེའི་ཆོས་སྲུང་རྒྱ་མཚོ་ཡི༔ མཁྱེན་བརྩེ་ནུས་པའི་ཡེ་ཤེས་དང་༔ བརྟན་གཡོའི་དྭངས་བཅུད་ཐམས་ཅད་ཀུན༔ གྲུབ་པའི་དངུལ་ཆུ་ཇི་བཞིན་ཏུ༔ བདེ་བ་ཆེན་པོའི་རྣམ་པར་བསྡུས༔ བདག་དང་སྒྲུབ་པའི་རྫས་ལ་ཐིམ༔ འཆི་མེད་ཚེ་ཡི་དངོས་གྲུབ་དང་༔ བདེ་ཆེན་ཡེ་ཤེས་རྒྱས་པར་བསམ༔ ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ༔ བཙོ་བོར་བཟླ་ཞིང་བར་མཚམས་སུ༔ ཨོཾ་ཏཱ་རེ་ཏུཏྟཱ་རེ་ཏུ་རེ་ཧྲཱིཿབྷྲཱུྃ་བཛྲ་ཛྙཱ་ན་ཨཱ་ཡུ་ཥེ་སྭཱ་ཧཱ༔ ཞེས་པས་འདོད་པའི་དངོས་གྲུབ་བསྐུལ༔ ཡེ་ཤེས་སེམས་དཔའ་སྤྲུལ་པར་བཅས༔ ཉེ་བར་བསྙེན་ཕྱིར་རྡོ་རྗེའི་སྔགས༔ འདི་དག་ཀྱང་ནི་བཟླ་བར་བྱ༔ ཨོཾ་ཨ་མཱ་ར་ཎི་ཛཱི་བནྟི་ཡེ་སྭཱ་ཧཱ༔ ཨོཾ་ཨ་མྲྀ་ཏ་ཨཱ་ཡུརྡ་དེ་སྭཱ་ཧཱཿ བདུན་ཕྲག་གསུམ་དུ་བརྩོན་པ་ན༔ དངོས་ཉམས་རྨི་ལམ་ཅི་རིགས་པར༔ དཀྱིལ་འཁོར་ལྷ་ཡི་ཞལ་མཐོང་ཞིང་༔ གསུང་ཐོས་ཏིང་འཛིན་དྲོད་ཚད་རྙེད༔ ཉི་ཟླ་ཤར་དང་མེ་ཏོག་རྒྱས༔ དངོས་སུ་བྷནྡྷ་འཕར་བ་དང་༔ རིལ་བུ་འཕེལ་ཞིང་དྲི་བཟང་འཐུལ༔ དེ་སོགས་དགེ་བའི་མཚན་མ་འབྱུང་༔ ས་མ་ཡ༔ སྣང་བ་ཕྱག་རྒྱར་བསྒྲུབ་པ་ནི༔ སླར་ཡང་འོད་ཟེར་འཕྲོ་འདུའི་སྤྲིན༔ དཀྱིལ་འཁོར་ལྷ་ཚོགས་ཐུགས་ཀར་ཐིམ༔ ཟག་མེད་བདེ་བ་ཆེན་པོའི་ཉམས༔ རྡོ་རྗེའི་ཡེ་ཤེས་མཆོག་ཏུ་བསྐྱེད༔ བདེ་སྟོང་རོལ་པའི་སྣང་བ་ཡིས༔ ཁམས་གསུམ་བརྟན་གཡོ་ཐམས་ཅད་ཁྱབ༔ ཕྱི་སྣོད་ཀློང་ལྔ་དབྱིངས་ཀྱི་དལ༔ ནང་བཅུད་རིག་པ་ཕྱག་རྒྱའི་སྐུ༔ གཞོམ་མེད་སྔགས་ཀྱི་སྒྲ་གདངས་དང་༔ མཆོག་ཏུ་མི་འགྱུར་འོད་གསལ་བའི༔ ཏིང་འཛིན་གཅིག་གི་ཆོ་འཕྲུལ་གྱིས༔ འཁོར་འདས་སྣང་སྲིད་ཆོས་རྣམས་ཀུན༔ སྒྱུ་འཕྲུལ་དྲྭ་བའི་འཁོར་ལོར་བསམ༔ གཞན་དུ་མི་འཕྲོའི་སེམས་ཀྱིས་ནི༔ བསྙེན་པའི་བཟླས་པ་རྣམ་གསུམ་དང་༔ ཨོཾ་ཏཱ་རེ་ཏཱྃ་སྭཱ་ཧཱ༔ ཨོཾ་ཏཱ་རེ་བྷྲཱུྃ་སྭཱ་ཧཱ༔ ཨོཾ་ཏཱ་རེ་ཧྲཱིཿསྭཱ་ཧཱ༔ ཨོཾ་ཏཱ་རེ་ཧཱུྃ་སྭཱ་ཧཱ༔ ཞེས་བཟླས་ལྷ་སྔགས་རེ་རེ་བཞིན༔ སེམས་འཛིན་སྤྲོ་བསྡུའི་སྦྱོར་བ་བྱ༔ བདུན་ཕྲག་གཅིག་གིས་དངོས་གྲུབ་ཀྱི༔ མཚན་མ་བརྟན་ཅིང་ནུས་ལྡན་འགྱུར༔ ས་མ་ཡ༔ གྲུབ་པ་ལས་ལ་སྦྱར་བ་ནི༔ རང་ཉིད་དམ་ཚིག་ཡེ་ཤེས་དང་༔ སྤྲུལ་པའི་སེམས་དཔའ་རྣམ་གསུམ་གྱི༔ ཐུགས་རྗེའི་འོད་ཟེར་རབ་འཕྲོས་པས༔ སྒྲོལ་མ་རིགས་བཞིའི་ཐུགས་རྒྱུད་བསྐུལ༔ དེ་ལས་འཕྲོས་པའི་འོད་ཟེར་གྱིས༔ ཕྲིན་ལས་སྒོ་མའི་རྒྱུད་བསྐུལ་ནས༔ སྔགས་ཀྱི་རང་སྒྲ་སྒྲོགས་པའི་སྐུ༔ ནམ་མཁའ་གང་བར་ཕྱོགས་བཅུར་ཁྱབ༔ གང་འདུལ་མཛད་པ་མཐའ་ཡས་ཀྱིས༔ ནད་གདོན་སྡིག་སྒྲིབ་དབྱིངས་སུ་ཞི༔ ཚེ་བསོད་དཔལ་འབྱོར་རིག་པ་རྒྱས༔ ཁམས་གསུམ་རླུང་སེམས་རང་དབང་བསྒྱུར༔ དགྲ་བགེགས་གཟུང་འཛིན་ཚར་བཅད་པའི༔ ཐུན་མོང་མཆོག་གི་ཕྲིན་ལས་རྣམས༔ ཏིང་འཛིན་སྤྲོ་བསྡུའི་ཆོ་འཕྲུལ་གྱིས༔ ཡིད་བཞིན་ཉིད་དུ་འགྲུབ་པར་བསམ༔ ཨོཾ་ཏཱ་རེ་ཏཱྃ་ཛཿཤཱནྟིཾ་ཀུ་རུ་སྭཱ་ཧཱཿ ཨཱོཾ་ཏཱ་རེ་བྷྲཱུྃ་ཧཱུྃ་པུཥྟིཾ་ཀུ་རུ་ཨོཾ༔ ཨོཾ་ཏཱ་རེ་ཧྲཱིཿབཾ་ཝ་ཤཾ་ཀུ་རུ་ཧོ༔ ཨོཾ་ཏཱ་རེ་ཧཱུྃ་ཧོཿམཱ་ར་ཡ་ཕཊཿ ཐོ་རངས་ཞི་བ་ཉི་ཤར་རྒྱས༔ དགོངས་མོ་དབང་སྟེ་སྲོད་ཀྱི་དུས༔ དྲག་པོའི་ཏིང་འཛིན་གནད་དུ་བསྣུན༔ རྡོ་རྗེ་སྲིན་པོའི་ནམ་ལངས་ཚེ༔ དངོས་གྲུབ་བསྐུལ་ཞིང་སྒྲུབ་རྫས་ལས༔ དབང་བླང་དམ་ཚིག་བདུད་རྩི་མྱང་༔ དངོས་གྲུབ་རྣམ་གཉིས་ཐོབ་པར་བསམ༔ རིལ་བུའི་ལྷག་མ་མགུལ་དུ་འཆང་༔ ཤིན་ཏུ་གསང་བས་སྤྱད་པར་བྱ༔ ས་མ་ཡ༔ དེ་ལྟར་བསྙེན་སྒྲུབ་ལས་གསུམ་གྱིས༔ འཕགས་མའི་བསམ་གཏན་ལ་བརྟེན་ནས༔ བདག་དོན་རྡོ་རྗེའི་ཚེ་འགྲུབ་ཅིང་༔ གཞན་དོན་ཕྲིན་ལས་མཁའ་ཁྱབ་འགྱུར༔ ས་མ་ཡ༔ རྒྱ་རྒྱ་རྒྱ༔ བདེ་ཆེན་ཚོགས་ཀྱི་མཆོད་པ་ནི༔ མ་ད་ན་དང་བཱ་ལ་སོགས༔ དམ་ཚིག་རྫས་རྣམས་འདུ་བྱས་ལ༔ རྃ་ཡྃ་ཁྃ་བརྗོད་བདུད་རྩིས་བསང་༔ སྟོང་པའི་ངང་ལས་རླུང་མེའི་སྟེང་༔ སྣོད་ནི་བདེ་ཆེན་ཀ་པཱ་ལར༔ བཅུད་ནི་རིགས་ལྔའི་དམ་ཚིག་རྫས༔ འདོད་ཡོན་བདུད་རྩིའི་ཕུང་པོར་གྱུར༔ ཨོཾ་བྷྲཱུྃ་ཏྲཱྃ་ཧྲཱིཿཨཱཿ ཧ་ཧོཿཧྲཱིཿ ཧྲཱིཿ འོག་མིན་ཆོས་དབྱིངས་ཕོ་བྲང་དང་༔ གཡུ་ལོ་བཀོད་དང་པོ་ཏ་ལ༔ དུར་ཁྲོད་བརྒྱད་དང་ཉེར་བཞིའི་ཡུལ༔ སུམ་ཅུ་རྩ་གཉིས་གནས་མཆོག་ནས༔ ཀུན་བཟང་རྡོ་རྗེ་རྣལ་འབྱོར་མ༔ རྗེ་བཙུན་འཁོར་བ་སྒྲོལ་མཛད་ཡུམ༔ རྩ་གསུམ་ཆོས་སྲུང་རྒྱ་མཚོར་བཅས༔ ཚོགས་ཀྱི་འདུ་བར་སྤྱན་འདྲེན་ན༔ ཐུགས་རྗེའི་དབང་གིས་གཤེགས་སུ་གསོལ༔ ཚོགས་ཁང་རང་བཞིན་སྤྲུལ་པའི་ཞིང་༔ འདོད་ཡོན་རྡོ་རྗེའི་དམ་ཚིག་རྫས༔ ཅིར་སྣང་ལྷ་དང་སྔགས་ཀྱི་སྒྲ༔ ཡེ་ཤེས་ཆེན་པོར་བྱིན་ཕོབ་ཅྀག༔ སརྦ་ས་མ་ཡ་ཛཿཛཿ ཧོ༔ རང་བྱུང་མཚན་ལྡན་ཀ་པཱ་ལར༔ བཟའ་བཅའ་བཏུང་བའི་ཚོགས་གཏོར་བཤམས༔ ཐབས་དང་ཤེས་རབ་དམ་རྫས་འདི༔ ཕྱི་ཡི་མཆོད་པར་བཞེས་སུ་གསོལ༔ རྣལ་འབྱོར་བདག་ཅག་འཁོར་བཅས་ཀྱི༔ སྐུ་ཡི་དམ་ཚིག་ཉམས་པ་བཤགས༔ ཕུང་པོའི་བདུད་ཚོགས་དབྱིངས་སུ་སྒྲོལ༔ མི་ཤིགས་སྐུ་ཡི་ཚེ་དབང་སྩོལ༔ ས་མ་ཡ་ག་ཎ་ཙཀྲ་པཱུ་ཛ་ཧོ༔ ཨཱཿ སྣང་བ་སྣོད་ཀྱི་ཀ་པཱ་ལར༔ སྲིད་པ་བཅུད་ཀྱི་ཚོགས་གཏོར་བཤམས༔ འདོད་ཡོན་རྒྱ་མཚོའི་དམ་རྫས་འདི༔ ནང་གི་མཆོད་པར་བཞེས་སུ་གསོལ༔ རྣལ་འབྱོར་བདག་ཅག་འཁོར་བཅས་ཀྱི༔ གསུང་གི་དམ་ཚིག་ཉམས་པ་བཤགས༔ འཆི་བདག་བདུད་ཚོགས་དབྱིངས་སུ་སྒྲོལ༔ འགགས་མེད་གསུང་གི་ཚེ་དབང་སྩོལ༔ པཉྩ་ཀཱ་མ་ག་ཎ་ཙཀྲ་པཱུ་ཛ་ཧོ༔ ཧཱུྃཿ རྩ་གསུམ་འཁོར་ལོའི་ཀ་པཱ་ལར༔ བྱང་ཆུབ་སེམས་ཀྱི་ཚོགས་གཏོར་བཤམས༔ བདེ་སྟོང་དབྱེར་མེད་དམ་རྫས་འདི༔ གསང་བའི་མཆོད་པར་བཞེས་སུ་གསོལ༔ རྣལ་འབྱོར་བདག་ཅག་འཁོར་བཅས་ཀྱི༔ ཐུགས་ཀྱི་དམ་ཚིག་ཉམས་པ་བཤགས༔ ཉོན་མོངས་བདུད་ཚོགས་དབྱིངས་སུ་སྒྲོལ༔ འོད་གསལ་ཐུགས་ཀྱི་ཚེ་དབང་སྩོལ༔ མ་ཧཱ་སུ་ཁ་ག་ཎ་ཙཀྲ་པཱུ་ཛ་ཧོ༔ ཧོཿ ཆོས་དབྱིངས་སྤྲོས་བྲལ་ཀ་པཱ་ལར༔ རིག་པ་རང་གསལ་ཚོགས་གཏོར་བཤམས༔ ཟུང་འཇུག་ཆེན་པོའི་དམ་རྫས་འདི༔ བླ་མེད་མཆོད་པར་བཞེས་སུ་གསོལ༔ རྣལ་འབྱོར་བདག་ཅག་འཁོར་བཅས་ཀྱི༔ གསང་གསུམ་དམ་ཚིག་ཉམས་པ་བཤགས༔ ལྷ་བུའི་བདུད་ཚོགས་དབྱིངས་སུ་སྒྲོལ༔ ཡེ་ཤེས་རྡོ་རྗེའི་ཚེ་དབང་སྩོལ༔ ཛྙཱ་ན་དྷ་ཏུ་ག་ཎ་ཙཀྲ་པཱུ་ཛ་ཧོ༔ དེ་ལྟར་ཕུད་ཀྱིས་དཀྱིལ་འཁོར་མཆོད༔ བར་པ་མཎྜལ་དྲུང་དུ་བཞག༔ ལྷ་ཚོགས་བདུད་རྩིས་རབ་མཉེས་ནས༔ བདེ་བའི་སྒྲ་དང་འོད་ཟེར་གྱིས༔ སྲིད་དང་ཞི་བའི་དངས་བཅུད་བསྡུས༔ དམ་ཚིག་ཚོགས་ཀྱི་རྫས་ལ་ཐིམ༔ མྱོང་གྲོལ་བདུད་རྩིའི་ཕུང་པོར་བསམ༔ ཨོཾ་ཨཱཿཧཱུྃ་ཛྙཱ་ན་ཨ་མྲྀ་ཏ་ག་ཎ་ཙཀྲ་སརྦ་སིདྡྷི་ཧཱུྃ་ཧྲཱི་ཋ༔ བརྒྱ་རྩ་བརྒྱད་ཀྱིས་བྱིན་བརླབས་ནས༔ ལུས་ཀྱི་དཀྱིལ་འཁོར་མཆོད་པར་བྱ༔ ཕྱི་ནས་དམ་ལྡན་གཞན་ལ་ཡང་༔ བྱིན་ན་ཚེ་དང་ཡེ་ཤེས་རྒྱས༔ ཐ་མ་ལྷག་མ་བསྔོ་བ་ནི༔ ཧྲཱིཿཕེཾཿ སྔོན་ཚེ་གྲུབ་པའི་ཧེ་རུ་ཀ༔ རིག་འཛིན་ཤྲཱི་སིཾ་ཧ་དང་༔ སློབ་དཔོན་བི་མ་མི་ཏྲ་དང་༔ འཆི་མེད་པདྨ་ཐོད་ཕྲེང་གིས༔ དུར་ཁྲོད་ཆེན་པོའི་གནས་བརྒྱད་དུ༔ ཚོགས་ཀྱྀ་འཁོར་ལོས་སྒྱུར་བའི་ཚེ༔ དཔའ་བོ་མཁའ་འགྲོ་ཞིང་སྐྱོང་གིས༔ ལྷག་མའི་གཏོར་མ་དངོས་སུ་བླངས༔ བཀའ་བཞིན་སྒྲུབ་པར་དམ་བཅས་པའི༔ རྡོ་རྗེའི་ཡལ་གམ་དེང་བསྐུལ་ན༔ འདོད་ཡོན་མཆོད་པ་འདི་བཞེས་ལ༔ རྣལ་འབྱོར་བདག་ཅག་འཁོར་བཅས་ཀྱི༔ ཕྱི་ནང་གསང་བའི་བར་ཆད་སོལ༔ ཚེ་བསོད་དཔལ་འབྱོར་ཡེ་ཤེས་སྐྱེས༔ རྣམ་བཞིའི་ཕྲིན་ལས་མྱུར་འགྲུབ་མཛོད༔ ཨུཙྪིཥྟ་ག་ཎ་ཙཀྲ་པཱུ་ཛ་ཧོ༔ བདེ་ཆེན་རྡོ་རྗེའི་དམ་ཚིག་རྫས༔ ཚོགས་ཀྱི་མཆོད་པ་བླ་ན་མེད༔ དགྱེས་པ་ཆེན་པོའི་ལོངས་སྤྱོད་ཀྱིས༔ འཆི་མེད་ཡེ་ཤེས་སྐུར་གྲུབ་ཤོག༔ སྨོན་ལམ་གདབ་ཅིང་སྤྱོད་པ་བསྐྱང་༔ བདེ་ཆེན་ཚོགས་ཀྱི་འདུ་བ་འདིར༔ འབྲེལ་ཚད་བགེགས་ཞི་ཚེ་བསོད་འཕེལ༔ ཕྱི་མ་ཨོ་རྒྱན་མཁའ་འགྲོའི་གླིང་༔ རྡོ་རྗེའི་རིག་འཛིན་མཆོག་ཏུ་འགྱུར༔ གུ་ཧྱ་ས་མ་ཡ༔ རྒྱ་རྒྱ་རྒྱ༔ སྲུང་མར་སྔོན་གྱི་ཐ་ཚིག་བསྒྲག༔ ཧཱུྃ་བྷྱོ༔ དུས་གསུམ་འཕོ་འགྱུར་མེད་པའི་ཀློང་༔ རིག་པ་རང་གསལ་སྐད་ཅིག་མ༔ ཕྱག་རྒྱའི་གཟུགས་སུ་ཤར་བ་ན༔ གཙུག་ཏོར་རྣམ་པར་རྒྱལ་མ་ཡིས༔ རིག་འཛིན་ཤྲཱི་སིཾ་ཧ་ལ༔ མི་འགྱུར་རྟག་པའི་དངོས་གྲུབ་སྩལ༔ འཆི་མེད་ཡིད་བཞིན་འཁོར་ལོ་ཡིས༔ སློབ་དཔོན་ཆེན་པོ་བི་མ་ལར༔ རྡོ་རྗེ་ཚེ་ཡི་མཆོག་དབང་བསྐུར༔ ཚེ་བདག་མགོན་པོ་ཡབ་ཡུམ་གྱིས༔ ཨོ་རྒྱན་པདྨ་ཐོད་ཕྲེང་ལ༔ སྐྱེ་ཤི་མེད་པར་དབང་བསྐུར་ཚེ༔ ཡེ་ཤེས་ལས་དང་འཇིག་རྟེན་གྱི༔ ཆོས་སྲུང་དམ་ཅན་རྒྱ་མཚོ་ཀུན༔ མཁའ་ལ་སྤྲིན་ལྟར་གཏིབས་ནས་ཀྱང་༔ མ་འོངས་རྗེས་འཇུག་རིག་འཛིན་རྣམས༔ བུ་བཞིན་སྐྱོང་བར་མ་ཆད་དམ༔ རྡོ་རྗེའི་ཐ་ཚིག་དེང་དགོངས་ལ༔ འདོད་ཡོན་རྒྱ་མཚོའི་གཏོར་མ་དང་༔ སྨན་རཀ་ཕུད་ཀྱི་མཆོད་པ་བཞེས༔ བདུད་བཞིའི་བར་ཆད་དབྱིངས་སུ་ཟློག༔ གཟུང་འཛིན་དགྲ་བགེགས་ཀློང་དུ་སྒྲོལ༔ བདེ་བ་ཆེན་པོའི་ཡེ་ཤེས་ཀྱིས༔ འཆི་མེད་འགྲུབ་པའི་ཕྲིན་ལས་མཛོད༔ ས་མ་ཡ་སརྦ་ཀརྨ་ཀུ་རུ་ཧོ༔ བཤལ་ཆུའི་བདུད་རྩིས་བརྟན་མ་མཆོད༔ ཧཱུྃ༔ དུས་སྦྱོར་འཕོ་བ་གནས་དག་པའི༔ རྡོ་རྗེའི་བསྟན་སྐྱོང་མ་སྲིང་ཚོགས༔ བཤལ་ཆུའི་བདུད་རྩི་འདི་གསོལ་ལ༔ བོད་ཁམས་བདེ་བའི་ཕྲིན་ལས་སྒྲུབས༔ མ་མ་ཧྲཱིཾ་ཧྲཱིཾ་ཨ་མྲྀ་ཏ་པུ་ཛ་ཧོ༔ ལས་འཇུག་རྡོ་རྗེའི་བྲོ་ཡིས་བསྡུ༔ ཧཱུྃ༔ བདག་ཏུ་ལྟ་བའི་དམ་སྲིའི་དཔུང་༔ བདག་མེད་རྡོ་རྗེའི་ཨེ་དབྱིངས་མནན༔ རྣམ་ཐར་གསུམ་གྱི་བྲོ་བརྡུངས་པས༔ དུས་གསུམ་མཚན་མ་དབྱིངས་སུ་ཡལ༔ སརྦ་བིགྷྣཱན་སྟཱཾ་བྷ་ཡ་ཨ་ཨ་ཨ༔ ས་མ་ཡཿ རྒྱ་རྒྱ་རྒྱ༔ གསུམ་པ་རྗེས་ཀྱི་ལས་རིམ་ལ༔ དང་པོ་མཆོད་བསྟོད་དངོས་གྲུབ་བླང་༔ ཨོཾ༔ རྗེ་བཙུན་འཕགས་མ་ཚེ་ཡི་བདག༔ རིགས་ཀྱི་ཚོམ་བུ་སྤྲུལ་འཁོར་བཅས༔ སྐྱེ་མེད་ཆོས་སྐུའི་ངང་ཉིད་ལས༔ གང་འདུལ་གཟུགས་ཀྱི་སྐུར་སྣང་བའི༔ ཐུགས་རྗེ་ཐུགས་དམ་དུས་ལ་བབ༔ འགྱུར་མེད་སྐུ་ཡི་དཀྱིལ་འཁོར་ནས༔ རྡོ་རྗེ་ཚེ་ཡི་དངོས་གྲུབ་སྩོལ༔ འགགས་མེད་གསུང་གི་དཀྱིལ་འཁོར་ནས༔ མི་ཤིགས་ཚེ་ཡི་དངོས་གྲུབ་སྩོལ༔ འཁྲུལ་མེད་ཐུགས་ཀྱི་དཀྱིལ་འཁོར་ནས༔ འོད་གསལ་ཚེ་ཡི་དངོས་གྲུབ་སྩོལ༔ བསམ་ཡས་ཡོན་ཏན་དཀྱིལ་འཁོར་ནས༔ འདོད་འབྱུང་ཚེ་ཡི་དངོས་གྲུབ་སྩོལ༔ ཐོགས་མེད་ཕྲིན་ལས་དཀྱིལ་འཁོར་ནས༔ གང་འདུལ་ཚེ་ཡི་དངོས་གྲུབ་སྩོལ༔ ཐུན་མོང་ལས་བཞིའི་དངོས་གྲུབ་སྩོལ༔ ཁྱད་པར་དབང་བཅུའི་དངོས་གྲུབ་སྩོལ༔ བླ་མེད་མཆོག་གི་དངོས་གྲུབ་སྩོལ༔ ཀཱ་ཡ་ཝཱ་ཀ་ཙིཏྟ་གུ་ཎ་ཀརྨ་སརྦ་སིདྡྷི་ཕ་ལ་ཧོ༔ གཉིས་པ་ནོངས་ཚོགས་བཟོད་གསོལ་ནི༔ ཧོཿ རྗེ་བཙུན་འཕགས་མའི་དཀྱིལ་འཁོར་དུ༔ མཆོད་དང་ཏིང་འཛིན་ཕྲིན་ལས་སོགས༔ ཚུལ་བཞིན་མ་བགྱིས་ནོངས་པ་ཀུན༔ འོད་གསལ་གཉུག་མའི་ངང་དུ་བཤགས༔ ཨ་ཨ་ཨ༔ གསུམ་པ་དཀྱིལ་འཁོར་བསྡུ་བ་ནི༔ ཨ༔ རིག་པ་རང་སྣང་དམ་ཚིག་པ༔ རང་བྱུང་ཡེ་ཤེས་དབྱིངས་ཀྱི་ཀློང་༔ འདུ་འབྲལ་མེད་པར་རོ་གཅིག་ཕྱིར༔ ཞལ་ཕྱག་མཚན་མ་དབྱིངས་སུ་ཐིམ༔ ཨ་ཨ་ཨ༔ བཞི་པ་རྗེས་སྤྱོད་བསྐྱང་བ་ནི༔ ཏཱྃ༔ སླར་ཡང་མཁའ་ལས་འཇའ་ཚོན་ལྟར༔ བདག་ཉིད་འཆི་མེད་འཕགས་མའི་སྐུ༔ སྣང་གྲགས་རྟོག་གསུམ་ལྷ་དང་སྔགས༔ ཡེ་ཤེས་ཆེན་པོའི་རོལ་པར་ཤར༔ ཨོཾ་ཨཱཿཧཱུྃ༔ ལྔ་པ་དགེ་བ་བསྔོ་བ་ནི༔ ཧོཿ གདོད་ནས་དག་པའི་ཡེ་ཤེས་དང་༔ རྟེན་ཅིང་འབྲེལ་འབྱུང་བསོད་ནམས་ཚོགས༔ ཟུང་འཇུག་འདུས་མ་བྱས་པའི་ཀློང་༔ བྱང་ཆུབ་སྙིང་པོའི་དབྱིངས་སུ་བསྔོ༔ དྲུག་པ་སྨོན་ལམ་གདབ་པ་ནི༔ འདི་ནས་སྐྱེ་བ་ཐམས་ཅད་དུ༔ འཕགས་མ་མཆོག་གིས་རྗེས་བཟུང་ནས༔ ཚེ་དང་ཡེ་ཤེས་དངོས་གྲུབ་ཀྱིས༔ རང་གཞན་དོན་གཉིས་ལྷུན་གྲུབ་ཤོག༔ བདུན་པ་ཤིས་པ་བརྗོད་པ་ནི༔ ཨོཾ༔ དགོངས་བརྡ་སྙན་བརྒྱུད་རིག་རྩལ་འཆང་༔ རིག་འཛིན་བླ་མའི་བཀྲ་ཤིས་ཤོག༔ རབ་འབྱམས་ཞི་ཁྲོའི་ཕྱག་རྒྱར་སྣང་༔ ཡི་དམ་ལྷ་ཡི་བཀྲ་ཤིས་ཤོག༔ རྣལ་འབྱོར་གྲོགས་མཛད་བདེ་ཆེན་སྤེལ༔ ཕྱི་ནང་མཁའ་འགྲོའི་བཀྲ་ཤིས་ཤོག༔ ལེགས་ཉེས་སྟངས་འཛིན་བར་ཆད་སེལ༔ ཆོས་སྲུང་རྒྱ་མཚོའི་བཀྲ་ཤིས་ཤོག༔ གནས་སྐབས་རྣམ་བཞིའི་ཕྲིན་ལས་ཀྱིས༔ དོན་གཉིས་མཐར་ཕྱིན་བཀྲ་ཤིས་ཤོག༔ མཐར་ཐུག་འཆི་མེད་ཡེ་ཤེས་སྐུ༔ མངོན་སུམ་འགྲུབ་པའི་བཀྲ་ཤིས་ཤོག༔ ཅེས་བརྗོད་མེ་ཏོག་ཕྱོགས་ཀུན་འཐོར༔ དགའ་སྟོན་བྱ་ཞིང་ཚོགས་གཉིས་སྤེལ༔ ས་མ་ཡ༔ རྒྱ་རྒྱ་རྒྱ༔ ཨེ་མ་འཆི་མེད་འཕགས་མ་རྗེའི༔ ཕྲིན་ལས་ཡེ་ཤེས་སྣང་བའི་ལམ༔ གྲུབ་པའི་སློབ་དཔོན་རྣམ་གསུམ་གྱི༔ ཐུགས་ཀྱི་དགོངས་ཉམས་མཐར་ཐུག་འདི༔ བདག་ཉིད་པདྨ་སཾ་བྷ་ཝས༔ མ་འོངས་སྐལ་ལྡན་དོན་དུ་བསྟན༔ ཚིག་ཉུང་དོན་འདྲིལ་བྱིན་རླབས་ཆེ༔ གང་གིས་ཉམས་སུ་བླངས་པ་ཀུན༔ གནས་སྐབས་བགེགས་ཞི་ཚེ་བསོད་འཕེལ༔ ཟབ་མོའི་ཤེས་རབ་ཕྱོགས་མེད་འཆར༔ གཟུངས་དྲན་མངོན་ཤེས་གཏེར་མཛོད་རྡོལ༔ ཞག་བདུན་ཙམ་ཞིག་བརྩོན་པས་ཀྱང་༔ དུས་མིན་འཆི་བ་ངེས་པར་བཟློག༔ མཐར་ཐུག་འཕགས་མས་རྗེས་བཟུང་ཞིང་༔ ནང་གི་ས་ལམ་མྱུར་བགྲོད་ནས༔ ཚེ་གཅིག་བྱང་ཆུབ་སྐལ་ལྡན་འགྱུར༔ དེ་ཕྱིར་ཟབ་རྒྱའི་ཡང་ཞུན་འདི༔ ད་ལྟ་མངའ་བདག་ཡབ་སྲས་སོགས༔ རྗེ་འབངས་གྲོགས་ལྔའི་ཚོགས་ལ་གདམས༔ མ་འོངས་དེ་རྣམས་སྐྱེ་བའི་དོན༔ ཐིག་ལེ་ཆེན་པོའི་ཀློང་དུ་སྦོས༔ ནམ་ཞིག་རྟེན་འབྲེལ་དུས་བབས་ཚེ༔ གཞན་དོན་རྒྱ་ཆེར་འབྱུང་བར་ཤོག༔ ས་མ་ཡཿ རྒྱ་རྒྱ་རྒྱ༔ གུ་ཧྱཿ དྷ་ཐིམ༔

[edit]

d+hI/:____'chi med 'phags ma'i snying thig las:__phrin las ye shes snang ba bzhugs:__'chi med yid bzhin 'khor lo la:__sgo gsum gus pas phyag 'tshal nas:__gang de'i zab mo'i rnal 'byor ni:__dngos grub rnam gnyis bsgrub phyir bshad:__sa ma ya:__dben zhing nyams dga'i gnas mchog tu:__dbang thob dam tshig la gnas pa'i:__sngags pas dkyil 'khor spyi mthun dbus:__b+han+d+ha dum bu gsum pa'i nang :__cong zhi brag zhun 'bras bu gsum:__dbang po lag pa rtag tu ngu :__rtsa ba lnga rnams mnyam sbyar ba'i:__ril bu sran 'phos tsam gyis bkang :__dar dmar kha bcad mchod gtor bsham:__bde ba'i bstan la mnyam bzhag nas:__sbyor dngos rjes kyis nyams su blang :__sa ma ya:__sngon 'gro'i dang po skyabs 'gro ni:__mdun mkhar skyabs yul gsal btab ste:__na mo:__bdag sogs 'gro kun byang chub bar:__dkon mchog gsum gyi ngo bo nyid:__bla ma yid bzhin 'khor lo la:__mi phyed gus pas skyabs su mchi:__gnyis pa smon 'jug sems bskyed ni:__hoH__mkha' mnyam sems can ma lus kun:__sdug bsngal mtsho las bsgral bya'i phyir:__rje btsun 'phags ma'i rnal 'byor gyis:__'chi med bsgrub par sems bskyed do:__gsum pa yan lag bdun pa ni:__ho:__phyogs dus rgyal ba sras bcas dang :__yum gyur sgrol ma'i zhabs pad+mor:__zhing rdul kun gyi grangs snyed kyi:__sgo gsum gus pas phyag 'tshal lo:__phyi nang gsang ba bla med pa'i:__kun bzang mchod sprin rgya mtshos mchod:__sdig sgrib nyes ltung mthol zhing bshags:__tshogs gnyis spyod la rjes yi rang :__chos kyi 'khor lo bskor bzhin tu:__mya ngan mi 'da' bzhugs gsol 'debs:__dge tshogs byang chub snying por bsngo:__gzhan don sangs rgyas myur 'grub shog:__tshogs zhing rang thim gnyis med ngang :__las kyi khro bo'i nga rgyal gyis:__bzhi pa bgegs gtor sbyin pa ni:__hU~M:__gdod nas 'khor 'das dbyer med kyang :__glo bur 'khrul pa'i gdon bgegs kun:__mchod sbyin gtor ma 'di longs la:__rang bzhin med pa'i dbyings su dengs:__drags sngags brjod cing thun gyis gzir:__rdo rje'i lta bas bltas nas ni:__lnga pa srung ba'i 'khor lo bsgom:__hrI:__snang srid snod bcud thams cad kun:__rdo rje srung ba'i gur khang dang :__lha sngags gnyug ma'i ye shes las:__mtshams kyi dkyil 'khor lhun gyis grub:__badz+ra dz+nyA na rak+Sha oM AHhU~M:__drug pa byin chen dbab pa ni:__bdag nyid 'phags ma'i gsal snang bcas:__'od zer sprin dang gdung ba'i glu:__spos dang rol mo'i brdas bskul te:__phyogs bcu dus bzhi'i rtsa gsum lha:__'phags ma'i gsang gsum phyag rgyar sad:__bdag gnas sgrub pa'i rdzas la thim:__byin rlabs gzi byin 'bar bar bsam:__oM AHhU~M:__a la la ho:__sa ma ya ho:__sa ma ya s+t+wa~M:__gzhi dbyings chos sku'i pho brang nas:__gzhi snang so sor kun rtog pa:__pad+ma'i rigs mchog bcom ldan 'das:__yid bzhin 'khor lo tshe 'phel mas:__gnas 'dir byin phob dbang mchog skur:__lus ngag yid la ye shes skyed:__tshe bsod dpal 'byor nyams rtogs spor:__mchog dang thun mong dngos grub stsol:__oM tA re tut+tA re tu re swA hA:__dz+nyA na badz+ra sa ma ya A be sha ya a A:__hrIM hrIM pheM pheM:__hU~M hU~M hU~M:__dzaHhU~M ba~M ho:__bdun pa mchod rdzas byin brlab ni:__oM AHhU~M:__gnas yul bde chen pad+mo bkod:__dag pa rab 'byams zhing gi dbus:__phyi nang gsang ba'i mchod rdzas kun:__nam mkha' mdzod kyi 'khor lor gyur:__oM AHhU~M sarba pU dza me g+ha sa ma ya hU~M:__sa ma ya:__rgya rgya rgya__gnyis pa dngos gzhi'i las rim la:__dang po dam tshig bskyed pa ni:__oM ma hA shU n+ya tA dz+nyA na badz+ra swa b+hA wa At+ma ko\u0f85haMH__'khor 'das chos kun bzod ma nas:__'od gsal de bzhin nyid dbyings las:__zung 'jug kun snang snying rje'i rtsal:__rgyu yi ting 'dzin tA~M dkar po:__mkha' las 'ja' tshon bzhin tu shar:__'od 'phros snod bcud dngos 'dzin sbyangs:__'byung lnga yum gyi mkha' klong du:__nor bu chu shel las grub pa'i:__thar pa chen po'i gzhal med khang :__gru bzhi sgo bzhi mtshan nyid rdzogs:__yid bzhin rin chen tog gis mdzes:__rta babs chos 'khor ri dwags gdugs:__pha gu drA ba drwa phyed dang :__shar bu mda' yab rgyan gyis brgyan:__'dod snam mchod pa'i lha mo dang :__phyi rol 'jig rten skyong bas bskor:__de dbus pad+ma 'dab bzhi'i steng :__thabs shes nyi zla kha sbyor dbus:__zung 'jug tA~M yig snyoms par zhugs:__de las 'od 'phros 'phags pa mchod:__'khor 'das dwangs bcud gcig tu 'dus:__yongs gyur ye shes sgyu ma'i sku:__dus gsum rgyal ba'i phrin las bdag:__'chi med yid bzhin 'khor lo ni:__rab dkar zhal gcig phyag gnyis ma:__phyag g.yas mchog sbyin g.yon pa ni:__dkon mchog gsum mtshon skyabs sbyin rgyas:__ut+pa lar gnas tshe bum bsnams:__zhi 'dzum ye shes spyan bdun ldan:__dar dang rin chen rgyan gyis mdzes:__zhabs gnyis rdo rje'i skyil krung gis:__pad+ma zla ba'i gdan la bzhugs:__rang 'dra thabs mchog gar gyi dbang :__pad+ma tshe bum bsnams pas 'khril:__rjes chags bde chen dga' ba bzhir:__snyoms pa bzhugs pa'i mkha' gsang nas:__byang sems sa bon tA~M dang b+h+rU~M:__hrIHhU~M 'phro 'du'i sbyor ba las:__shar du rdo rje sgrol ma mthing :__mchog sbyin ut+pal rdo rje bsnams:__lho ru rin chen sgrol ma ser:__mchog sbyin ut+pal rin chen bsnams:__nub tu pad+ma'i sgrol ma dmar:__mchog sbyin ut+pal lcags kyu bsnams:__byang du las kyi sgrol ma nag:__mchog sbyin ut+pal ral gri bsnams:__thams cad dar dang rin chen brgyan:__zhi rgyas dbang drag nyams dang ldan:__zhabs zung phyed skyil pad zlar bzhugs:__slar yang dzaHhU~M ba~M hoH'phros:__sgo bzhir pad nyi'i gdan gyi steng :__rdo rje lcags kyu zhags pa dang :__lcags sgrog dril bu'i sgrol ma ni:__dkar ser dmar ljang zhi khro'i nyams:__rang rtags phyag mtshan ut+pal bsnams:__brkyang bskum gar gyis bdud bzhi brdzis:__dar dang rat+na'i rgyan gyis mdzes:__bar mtshams rtsa gsum chos srung tshogs:__dbyings las ye shes rang shar ba'i:__sgyu 'phrul drwa ba chen po'i tshul:__nyi ma dang ni 'od zer bzhin:__so so'i rigs kyi tshom bur bcas:__snang srid gzhir bzhengs chen po'i lha:__ma bskyed ye rdzogs tshul du gsal:__kun kyang spyi mgrin thugs ka ru:__rdo rje gsum gyi yi ges mtshan:__de las 'phros pa'i 'od zer gyis:__ye shes sems dpa' spyan drangs bsam:__gnyis pa ye shes bskul ba ni:__hrI:__so sor kun tu rtog pa yi:__ye shes chen po tshe yi lha:__'od dpag med pa'i dbu rgyan can:__dus gsum sangs rgyas phrin las ma:__tshur gshegs yid bzhin 'khor lo 'chang :__rigs kyi tshom bu sprul 'khor bcas:__chos sku skye ba med pa las:__skye ba'i cho 'phrul gzugs kyi sku:__snying rje chen po'i thugs dam gyis:__sgrub la dngos grub mchog stsol phyir:__dam tshig dkyil 'khor 'dir dgongs la:__rdo rje'i ye shes bskyed du gsol:__sa ma ya hoH__sa ma ya s+t+waM:__e A ral+li hrIM hrIM dzaH__dz+nyA na sa twa a A:__gsum pa brtan par bya ba ni:__dbyings nas spyan drangs ye shes pa:__dam tshig 'khor lor dgug gzhug bcing :__dgyes mnyam chen por ro gcig bsam:__oMH__rdo rje'i ye shes bla med pa'i:__sku gsung thugs kyi phyag rgya ni:__ting 'dzin sprul pa'i lha tshogs dang :__dbyer med chen por brtan par bzhugs:__badz+ra dz+nyA na dzaHhU~M ba~M hoH__sa ma ya tiSh+Tha lhanaH__bzhi pa gus phyag 'tshal ba ni:__hrIH__'chi med 'phags ma'i dkyil 'khor pa:__gdod nas rang dang lhan cig skyes:__gnyis 'dzin bral ba lta ba'i phyag:__dag mnyam chos sku'i dbyings su 'tshal:__a la la hoH__a ti pu ho:__pra tIts+tsha ho:__lnga pa mchod pa 'bul ba ni:__rang las rdo rje'i lha mo'i tshogs:__nam mkha' gang bar rab spros te:__mchod pa'i sprin chen gtibs par bsam:__oM:__dngos 'byor yid kyis rnam sprul pa'i:__zhing khams rgya mtsho'i mchod rdzas kun:__'phags ma yid bzhin 'khor lor 'bul:__bzhes nas 'chi med dngos grub stsol:__oM Ar+YA tA rA sa pa ri wa ra ar+g+haM pA d+yaM puSh+pe d+hU pe A lo ke gan+d+he ni wi d+yA shab+da pra tIts+tsha swA hA:__oM:__yul dang dbang por 'brel ba yi:__gzung 'dzin bde ba chen por shar:__rdo rje'i gzugs sgra dri ro reg:__mchod pa'i phyag rgya chen por bzhes:__oM Ar+YA tA rA sa pa ri wA ra rU pa shab+da gan+de ra sa spar she pra tIts+tsha swA hA:__oM:__rtsa brgyad stong sbyar a mr-i ta:__khams gsum bsgral ba'i rak+ta'i bcud:__'dod yon lnga ldan ba liM tas:__dkyil 'khor lha tshogs mnyes gyur cig:__sarba pany+tsa a mr-i ta ma hA rak+ta ma hA ba liM ta khA hi:__AH__mchod bya mchod byed mchod yul sogs:__'khor gsum spros pa las 'das pa'i:__rang bzhin 'od gsal byang chub sems:__mchog gi mchod pa chen por bzhes:__sarba d+harma d+hA tu At+ma ko\u0f85haMH__drug pa rdo rje'i glu yis bstod:__oM:__'jig rten dbang phyug snying rje'i bdag:__zhal gyi chu skyes las byung ba:__dus gsum sangs rgyas skyed mdzad yum:__yid bzhin 'khor lo khyod la bstod:__dri med zla ba nor bu'i mdog:__mchog sbyin ut+pal phyag rgya can:__zhi 'dzum mtshan dpe'i dpal 'bar ba'i:__rdo rje'i sku la phyag 'tshal bstod:__dbyangs kyi yan lag rgya mtsho las:__zhi bsil bdud rtsi'i char 'bebs pas:__sems can khams rnams sad mdzad pa:__tshangs pa'i gsung la phyag 'tshal bstod:__mkhyen dang brtse ba'i ye shes kyis:__shes bya kun la snyoms par 'jug:__bsam gyis mi khyab phyag rgya che:__'od gsal thugs la phyag 'tshal bstod:__gang gis khyod la gsol btab pas:__de la de ma thag byin rlob:__dngos grub 'dod dgu stsol mdzad pa'i:__yon tan pha mtha' yas la bstod:__mtshan dang sku yi bkod pa dang :__rig pa'i gsang sngags sna tshogs pas:__zhi rgyas dbang dang mngon spyod kyi:__phrin las lhun gyis grub la bstod:__chos nyid gcig las ma g.yos kyang :__gdul bya'i bsam pa ji bzhin tu:__sgyu 'phrul drwa ba'i tshul ston pa:__dkyil 'khor lha tshogs kun la 'dud:__bdun pa bzlas pa bya ba la:__thugs dam nye bar bsnyen pa ni:__rang nyid 'phags ma'i thugs ka ru:__ye shes sems dpa' tshe dpag med:__dkar gsal mnyam bzhag tshe bum 'dzin:__dar dang rin chen rgyan gyis mdzes:__rdo rje'i skyil krung pad zlar bzhugs:__'od dang 'od zer 'phro ba yi:__thugs dbus chu skyes nyi zla'i dbus:__tA~M mthar sngags kyi phreng bas bskor:__bzlas pas thugs dam rgyud bskul te:__'od kyi snang ba mtha' yas pa:__gtsug tor nor bu'i rtse nas 'thon:__de las 'phags ma rnam par rgyal:__chu shel mdog can phyag g.yas kyis:__skyabs sbyin phyag rgyas lcags kyu dang :__g.yon pas mchog sbyin tshe bum bsnams:__'od dang 'od zer dang bcas pa:__grangs med nyi zer rdul ltar 'phros:__dkyil 'khor lha tshogs thams cad dang :__phyogs bcu'i rgyal ba sras dang bcas:__yi dam dpa' bo rnal 'byor ma:__rdo rje'i chos srung rgya mtsho yi:__mkhyen brtse nus pa'i ye shes dang :__brtan g.yo'i dwangs bcud thams cad kun:__grub pa'i dngul chu ji bzhin tu:__bde ba chen po'i rnam par bsdus:__bdag dang sgrub pa'i rdzas la thim:__'chi med tshe yi dngos grub dang :__bde chen ye shes rgyas par bsam:__oM tA re tut+tA re tu re swA hA:__btso bor bzla zhing bar mtshams su:__oM tA re tut+tA re tu re hrIHb+h+rU~M badz+ra dz+nyA na A yu She swA hA:__zhes pas 'dod pa'i dngos grub bskul:__ye shes sems dpa' sprul par bcas:__nye bar bsnyen phyir rdo rje'i sngags:__'di dag kyang ni bzla bar bya:__oM a mA ra Ni dzI ban+ti ye swA hA:__oM a mr-i ta A yurda de swA hAH__bdun phrag gsum du brtson pa na:__dngos nyams rmi lam ci rigs par:__dkyil 'khor lha yi zhal mthong zhing :__gsung thos ting 'dzin drod tshad rnyed:__nyi zla shar dang me tog rgyas:__dngos su b+han+d+ha 'phar ba dang :__ril bu 'phel zhing dri bzang 'thul:__de sogs dge ba'i mtshan ma 'byung :__sa ma ya:__snang ba phyag rgyar bsgrub pa ni:__slar yang 'od zer 'phro 'du'i sprin:__dkyil 'khor lha tshogs thugs kar thim:__zag med bde ba chen po'i nyams:__rdo rje'i ye shes mchog tu bskyed:__bde stong rol pa'i snang ba yis:__khams gsum brtan g.yo thams cad khyab:__phyi snod klong lnga dbyings kyi dal:__nang bcud rig pa phyag rgya'i sku:__gzhom med sngags kyi sgra gdangs dang :__mchog tu mi 'gyur 'od gsal ba'i:__ting 'dzin gcig gi cho 'phrul gyis:__'khor 'das snang srid chos rnams kun:__sgyu 'phrul drwa ba'i 'khor lor bsam:__gzhan du mi 'phro'i sems kyis ni:__bsnyen pa'i bzlas pa rnam gsum dang :__oM tA re tA~M swA hA:__oM tA re b+h+rU~M swA hA:__oM tA re hrIHswA hA:__oM tA re hU~M swA hA:__zhes bzlas lha sngags re re bzhin:__sems 'dzin spro bsdu'i sbyor ba bya:__bdun phrag gcig gis dngos grub kyi:__mtshan ma brtan cing nus ldan 'gyur:__sa ma ya:__grub pa las la sbyar ba ni:__rang nyid dam tshig ye shes dang :__sprul pa'i sems dpa' rnam gsum gyi:__thugs rje'i 'od zer rab 'phros pas:__sgrol ma rigs bzhi'i thugs rgyud bskul:__de las 'phros pa'i 'od zer gyis:__phrin las sgo ma'i rgyud bskul nas:__sngags kyi rang sgra sgrogs pa'i sku:__nam mkha' gang bar phyogs bcur khyab:__gang 'dul mdzad pa mtha' yas kyis:__nad gdon sdig sgrib dbyings su zhi:__tshe bsod dpal 'byor rig pa rgyas:__khams gsum rlung sems rang dbang bsgyur:__dgra bgegs gzung 'dzin tshar bcad pa'i:__thun mong mchog gi phrin las rnams:__ting 'dzin spro bsdu'i cho 'phrul gyis:__yid bzhin nyid du 'grub par bsam:__oM tA re tA~M dzaHshAn+tiM ku ru swA hAH__A+oM tA re b+h+rU~M hU~M puSh+tiM ku ru oM:__oM tA re hrIHbaM wa shaM ku ru ho:__oM tA re hU~M hoHmA ra ya phaTaH__tho rangs zhi ba nyi shar rgyas:__dgongs mo dbang ste srod kyi dus:__drag po'i ting 'dzin gnad du bsnun:__rdo rje srin po'i nam langs tshe:__dngos grub bskul zhing sgrub rdzas las:__dbang blang dam tshig bdud rtsi myang :__dngos grub rnam gnyis thob par bsam:__ril bu'i lhag ma mgul du 'chang :__shin tu gsang bas spyad par bya:__sa ma ya:__de ltar bsnyen sgrub las gsum gyis:__'phags ma'i bsam gtan la brten nas:__bdag don rdo rje'i tshe 'grub cing :__gzhan don phrin las mkha' khyab 'gyur:__sa ma ya:__rgya rgya rgya:__bde chen tshogs kyi mchod pa ni:__ma da na dang bA la sogs:__dam tshig rdzas rnams 'du byas la:__ra~M ya~M kha~M brjod bdud rtsis bsang :__stong pa'i ngang las rlung me'i steng :__snod ni bde chen ka pA lar:__bcud ni rigs lnga'i dam tshig rdzas:__'dod yon bdud rtsi'i phung por gyur:__oM b+h+rU~M trA~M hrIHAH__ha hoHhrIH__hrIH__'og min chos dbyings pho brang dang :__g.yu lo bkod dang po ta la:__dur khrod brgyad dang nyer bzhi'i yul:__sum cu rtsa gnyis gnas mchog nas:__kun bzang rdo rje rnal 'byor ma:__rje btsun 'khor ba sgrol mdzad yum:__rtsa gsum chos srung rgya mtshor bcas:__tshogs kyi 'du bar spyan 'dren na:__thugs rje'i dbang gis gshegs su gsol:__tshogs khang rang bzhin sprul pa'i zhing :__'dod yon rdo rje'i dam tshig rdzas:__cir snang lha dang sngags kyi sgra:__ye shes chen por byin phob c-ig:__sarba sa ma ya dzaHdzaH__ho:__rang byung mtshan ldan ka pA lar:__bza' bca' btung ba'i tshogs gtor bshams:__thabs dang shes rab dam rdzas 'di:__phyi yi mchod par bzhes su gsol:__rnal 'byor bdag cag 'khor bcas kyi:__sku yi dam tshig nyams pa bshags:__phung po'i bdud tshogs dbyings su sgrol:__mi shigs sku yi tshe dbang stsol:__sa ma ya ga Na tsakra pU dza ho:__AH__snang ba snod kyi ka pA lar:__srid pa bcud kyi tshogs gtor bshams:__'dod yon rgya mtsho'i dam rdzas 'di:__nang gi mchod par bzhes su gsol:__rnal 'byor bdag cag 'khor bcas kyi:__gsung gi dam tshig nyams pa bshags:__'chi bdag bdud tshogs dbyings su sgrol:__'gags med gsung gi tshe dbang stsol:__pany+tsa kA ma ga Na tsakra pU dza ho:__hU~MH__rtsa gsum 'khor lo'i ka pA lar:__byang chub sems kyi tshogs gtor bshams:__bde stong dbyer med dam rdzas 'di:__gsang ba'i mchod par bzhes su gsol:__rnal 'byor bdag cag 'khor bcas kyi:__thugs kyi dam tshig nyams pa bshags:__nyon mongs bdud tshogs dbyings su sgrol:__'od gsal thugs kyi tshe dbang stsol:__ma hA su kha ga Na tsakra pU dza ho:__hoH__chos dbyings spros bral ka pA lar:__rig pa rang gsal tshogs gtor bshams:__zung 'jug chen po'i dam rdzas 'di:__bla med mchod par bzhes su gsol:__rnal 'byor bdag cag 'khor bcas kyi:__gsang gsum dam tshig nyams pa bshags:__lha bu'i bdud tshogs dbyings su sgrol:__ye shes rdo rje'i tshe dbang stsol:__dz+nyA na d+ha tu ga Na tsakra pU dza ho:__de ltar phud kyis dkyil 'khor mchod:__bar pa maN+Dal drung du bzhag:__lha tshogs bdud rtsis rab mnyes nas:__bde ba'i sgra dang 'od zer gyis:__srid dang zhi ba'i dngas bcud bsdus:__dam tshig tshogs kyi rdzas la thim:__myong grol bdud rtsi'i phung por bsam:__oM AHhU~M dz+nyA na a mr-i ta ga Na tsakra sarba sid+d+hi hU~M hrI Tha:__brgya rtsa brgyad kyis byin brlabs nas:__lus kyi dkyil 'khor mchod par bya:__phyi nas dam ldan gzhan la yang :__byin na tshe dang ye shes rgyas:__tha ma lhag ma bsngo ba ni:__hrIHpheMH__sngon tshe grub pa'i he ru ka:__rig 'dzin shrI siM ha dang :__slob dpon bi ma mi tra dang :__'chi med pad+ma thod phreng gis:__dur khrod chen po'i gnas brgyad du:__tshogs ky-i 'khor los sgyur ba'i tshe:__dpa' bo mkha' 'gro zhing skyong gis:__lhag ma'i gtor ma dngos su blangs:__bka' bzhin sgrub par dam bcas pa'i:__rdo rje'i yal gam deng bskul na:__'dod yon mchod pa 'di bzhes la:__rnal 'byor bdag cag 'khor bcas kyi:__phyi nang gsang ba'i bar chad sol:__tshe bsod dpal 'byor ye shes skyes:__rnam bzhi'i phrin las myur 'grub mdzod:__uts+tshiSh+ta ga Na tsakra pU dza ho:__bde chen rdo rje'i dam tshig rdzas:__tshogs kyi mchod pa bla na med:__dgyes pa chen po'i longs spyod kyis:__'chi med ye shes skur grub shog:__smon lam gdab cing spyod pa bskyang :__bde chen tshogs kyi 'du ba 'dir:__'brel tshad bgegs zhi tshe bsod 'phel:__phyi ma o rgyan mkha' 'gro'i gling :__rdo rje'i rig 'dzin mchog tu 'gyur:__gu h+ya sa ma ya:__rgya rgya rgya:__srung mar sngon gyi tha tshig bsgrag:__hU~M b+h+yo:__dus gsum 'pho 'gyur med pa'i klong :__rig pa rang gsal skad cig ma:__phyag rgya'i gzugs su shar ba na:__gtsug tor rnam par rgyal ma yis:__rig 'dzin shrI siM ha la:__mi 'gyur rtag pa'i dngos grub stsal:__'chi med yid bzhin 'khor lo yis:__slob dpon chen po bi ma lar:__rdo rje tshe yi mchog dbang bskur:__tshe bdag mgon po yab yum gyis:__o rgyan pad+ma thod phreng la:__skye shi med par dbang bskur tshe:__ye shes las dang 'jig rten gyi:__chos srung dam can rgya mtsho kun:__mkha' la sprin ltar gtibs nas kyang :__ma 'ongs rjes 'jug rig 'dzin rnams:__bu bzhin skyong bar ma chad dam:__rdo rje'i tha tshig deng dgongs la:__'dod yon rgya mtsho'i gtor ma dang :__sman raka phud kyi mchod pa bzhes:__bdud bzhi'i bar chad dbyings su zlog:__gzung 'dzin dgra bgegs klong du sgrol:__bde ba chen po'i ye shes kyis:__'chi med 'grub pa'i phrin las mdzod:__sa ma ya sarba karma ku ru ho:__bshal chu'i bdud rtsis brtan ma mchod:__hU~M:__dus sbyor 'pho ba gnas dag pa'i:__rdo rje'i bstan skyong ma sring tshogs:__bshal chu'i bdud rtsi 'di gsol la:__bod khams bde ba'i phrin las sgrubs:__ma ma hrIM hrIM a mr-i ta pu dza ho:__las 'jug rdo rje'i bro yis bsdu:__hU~M:__bdag tu lta ba'i dam sri'i dpung :__bdag med rdo rje'i e dbyings mnan:__rnam thar gsum gyi bro brdungs pas:__dus gsum mtshan ma dbyings su yal:__sarba big+h+nAn stAM b+ha ya a a a:__sa ma yaH__rgya rgya rgya:__gsum pa rjes kyi las rim la:__dang po mchod bstod dngos grub blang :__oM:__rje btsun 'phags ma tshe yi bdag:__rigs kyi tshom bu sprul 'khor bcas:__skye med chos sku'i ngang nyid las:__gang 'dul gzugs kyi skur snang ba'i:__thugs rje thugs dam dus la bab:__'gyur med sku yi dkyil 'khor nas:__rdo rje tshe yi dngos grub stsol:__'gags med gsung gi dkyil 'khor nas:__mi shigs tshe yi dngos grub stsol:__'khrul med thugs kyi dkyil 'khor nas:__'od gsal tshe yi dngos grub stsol:__bsam yas yon tan dkyil 'khor nas:__'dod 'byung tshe yi dngos grub stsol:__thogs med phrin las dkyil 'khor nas:__gang 'dul tshe yi dngos grub stsol:__thun mong las bzhi'i dngos grub stsol:__khyad par dbang bcu'i dngos grub stsol:__bla med mchog gi dngos grub stsol:__kA ya wA ka tsit+ta gu Na karma sarba sid+d+hi pha la ho:__gnyis pa nongs tshogs bzod gsol ni:__hoH__rje btsun 'phags ma'i dkyil 'khor du:__mchod dang ting 'dzin phrin las sogs:__tshul bzhin ma bgyis nongs pa kun:__'od gsal gnyug ma'i ngang du bshags:__a a a:__gsum pa dkyil 'khor bsdu ba ni:__a:__rig pa rang snang dam tshig pa:__rang byung ye shes dbyings kyi klong :__'du 'bral med par ro gcig phyir:__zhal phyag mtshan ma dbyings su thim:__a a a:__bzhi pa rjes spyod bskyang ba ni:__tA~M:__slar yang mkha' las 'ja' tshon ltar:__bdag nyid 'chi med 'phags ma'i sku:__snang grags rtog gsum lha dang sngags:__ye shes chen po'i rol par shar:__oM AHhU~M:__lnga pa dge ba bsngo ba ni:__hoH__gdod nas dag pa'i ye shes dang :__rten cing 'brel 'byung bsod nams tshogs:__zung 'jug 'dus ma byas pa'i klong :__byang chub snying po'i dbyings su bsngo:__drug pa smon lam gdab pa ni:__'di nas skye ba thams cad du:__'phags ma mchog gis rjes bzung nas:__tshe dang ye shes dngos grub kyis:__rang gzhan don gnyis lhun grub shog:__bdun pa shis pa brjod pa ni:__oM:__dgongs brda snyan brgyud rig rtsal 'chang :__rig 'dzin bla ma'i bkra shis shog:__rab 'byams zhi khro'i phyag rgyar snang :__yi dam lha yi bkra shis shog:__rnal 'byor grogs mdzad bde chen spel:__phyi nang mkha' 'gro'i bkra shis shog:__legs nyes stangs 'dzin bar chad sel:__chos srung rgya mtsho'i bkra shis shog:__gnas skabs rnam bzhi'i phrin las kyis:__don gnyis mthar phyin bkra shis shog:__mthar thug 'chi med ye shes sku:__mngon sum 'grub pa'i bkra shis shog:__ces brjod me tog phyogs kun 'thor:__dga' ston bya zhing tshogs gnyis spel:__sa ma ya:__rgya rgya rgya:__e ma 'chi med 'phags ma rje'i:__phrin las ye shes snang ba'i lam:__grub pa'i slob dpon rnam gsum gyi:__thugs kyi dgongs nyams mthar thug 'di:__bdag nyid pad+ma saM b+ha was:__ma 'ongs skal ldan don du bstan:__tshig nyung don 'dril byin rlabs che:__gang gis nyams su blangs pa kun:__gnas skabs bgegs zhi tshe bsod 'phel:__zab mo'i shes rab phyogs med 'char:__gzungs dran mngon shes gter mdzod rdol:__zhag bdun tsam zhig brtson pas kyang :__dus min 'chi ba nges par bzlog:__mthar thug 'phags mas rjes bzung zhing :__nang gi sa lam myur bgrod nas:__tshe gcig byang chub skal ldan 'gyur:__de phyir zab rgya'i yang zhun 'di:__da lta mnga' bdag yab sras sogs:__rje 'bangs grogs lnga'i tshogs la gdams:__ma 'ongs de rnams skye ba'i don:__thig le chen po'i klong du sbos:__nam zhig rten 'brel dus babs tshe:__gzhan don rgya cher 'byung bar shog:__sa ma yaH_rgya rgya rgya:__gu h+yaH__d+ha thim:__