JKW-KABAB-07-JA-020

🚧 This website is under continued development. We appreciate your patience!

Previous Text Back to Volume PageNext Text

dpal rdo rje bdud rtsi'i bka' srung e ka dzA Ti'i srog gtad kyi yi ge srog gi thig le

Wylie title
Location	mkhyen brtse'i bka' babs Volume 7, Text 20, Pages 621-630 (Folios 1a to 5b3)
Author	འཇམ་མགོན་ཀོང་སྤྲུལ་
Less details More details
Tertön	ར་མོ་ཤེལ་སྨན་, འཇམ་དབྱངས་མཁྱེན་བརྩེའི་དབང་པོ་ (ra mo shel sman, 'jam dbyangs mkhyen brtse'i dbang po)
Citation	'jam mgon kong sprul. dpal rdo rje bdud rtsi'i bka' srung e ka dzA Ti'i srog gtad kyi yi ge srog gi thig le. In Rdzong sar 'jam dbyangs mkhyen brtse'i dbang po'i bka' babs, Vol. 7: 621-630. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Protector Entrustment Rituals- srog gtad
Cycle	དཔལ་རྡོ་རྗེ་བདུད་རྩི་བདེ་བ་ཆེན་པོ་ (dpal rdo rje bdud rtsi bde ba chen po)
Deity	e ka dzA TI
Karchag page	JKW-KABAB-Volume-07-JA-Karchag
RTZ	In the Rinchen Terdzö: https://rtz.tsadra.org/index.php/Terdzo-A-011
Colophon	ཅེས་པའང་རིགས་ཀུན་ཁྱབ་བདག་གཏེར་ཆེན་བླ་མས་ཇི་ལྟར་སྩལ་བའི་དགོངས་དོན་ལྟར་པདྨ་གར་དབང་བློ་གྲོས་མཐའ་ཡས་ཀྱིས་རྫོང་ཤོད་བདེ་གཤེགས་འདུས་པའི་སྒྲུབ་གནས་སུ་བཀོད་པ་དགེ་ལེགས་འཕེལ།།
	ces pa'ang rigs kun khyab bdag gter chen bla mas ji ltar stsal ba'i dgongs don ltar pad+ma gar dbang blo gros mtha' yas kyis rdzong shod bde gshegs 'dus pa'i sgrub gnas su bkod pa dge legs 'phel

Tibetan Text

Wylie

[edit]

དྷི༔ དཔལ་རྡོ་རྗེ་བདུད་རྩིའི་བཀའ་སྲུང་ཨེ་ཀ་ཛཱའ་ཊིའི་སྲོག་གཏད་ཀྱི་ཡི་གེ་སྲོག་གི་ཐིག་ལེ་ཞེས་བྱ་བ་བཞུགས་སོ། །ན་མོ་གུ་ར་བེ། །སྤྲོས་པ་ཀུན་བྲལ་བཟང་མོ་ཡུམ། །བདུད་འདུལ་བསྟན་པའི་གཉེར་འཛིན་ཕྱིར། །སྨུག་ནག་ཁྲོས་མར་བཞེངས་པ་དེས། །བྱང་ཆུབ་བར་དུ་བདག་སྐྱོང་མཛོད། །བདུད་རྩི་གསང་བའི་སྲུང་མ་ཁྱད་པར་ཅན་འདིའི་སྲོག་གཏད་བརྒྱུད་པ་འཛིན་ཅིང་དམ་ཚིག་ཐུབ་ངེས་པའི་སློབ་མ་ལ་སྦྱིན་པའི་ཚེ། གོང་དུ་དཔལ་རྡོ་རྗེ་བདུད་རྩིའི་གཏོར་མཆོད་ལ་སོགས་པ་སྐབས་བབས་བཤམ། མདུན་ཏུ་མཎྜལ་དུག་ཁྲག་གིས་བྱུགས་པ་ཆོས་འབྱུང་ཁྲག་མཚོ་དང་བཅས་པའི་གནམ་ལྕགས་འཁོར་ལོ་རྩིབས་བཞི་པའི་ལྟེ་བར་བྷྱོ་ཡིག་མཐིང་ནག །རྩིབས་བཞིར་ཤར་ནས་གཡས་བསྐོར་དུ་ཐིག་ལེ་དཀར་སེར་དམར་ལྗང༌། ཕྱི་རོལ་མེ་རླུང་ཕྲེང་བས་བསྐོར་བའི་དབུས་སུ་ཐོད་པའམ་ཟངས་ལྕགས་ཀྱི་སྣོད་དུ་དཔལ་གཏོར་བརྗིད་ལྡན་འཁོར་རང་འདྲ་བཞི་དང་ཐེབས་ཀྱུས་བསྐོར་བ། མེ་རིས་བརྒྱན་ཅིང་སྐུ་ཙཀ་དར་གདུགས་མཐིང་གས་སྤྲས་པ་བཞག །མདུན་དུ་སྔགས་བྱང༌། སྨན་གཏོར་རཀྟ། དྲག་མཆོད་ཕྲེང་ཚར་དུ་བཤམ། བདུད་རྩི་རྩ་བའི་དབང་བསྐུར་བའི་ཞར་བྱུང་ཡིན་ན་ཚོགས་མཆོད་ཀྱི་གོང་དུ་འདིའི་ལས་བྱང་བཟླས་པ་སྐོང་གསོ་རྣམས་ཞོར་ལ་སོངས་བས་འཐུས། དབང་ཐམས་ཅད་གྲུབ་པའི་རྗེས་སུ་དམ་ལྡན་གཅིག་གམ་གསུམ་ལས་མི་མང་བ་ལ་སྲོག་གཏད་བྱ། འདི་ཉིད་སྒེར་དུ་བྱེད་ན་རྡོ་རྗེ་བདུད་རྩིའི་བདག་བསྐྱེད་ཕྲིན་ལས་བཟླས་པ་བཅས་སོང་ནས། འདི་ཉིད་ཀྱི་ཕྲིན་ལས་བཏང་ལ་མདུན་བསྐྱེད་མཆོད་བསྟོད་བཟླས་པ་ཅི་ནུས་ཀྱིས་ཐུགས་རྒྱུད་བསྐུལ། བྱིན་རླབས་བཅས་སྐོང་བ་འདོན། བདུད་རྩིའི་ཚོགས་མཆོད་ཕུལ། སློབ་མ་ཁྲུས་བྱ། བགེགས་བསྐྲད། སེམས་བསྐྱེད་གསལ་བཏབ་ལ། དེའང་མཚན་ཙམ་ཐོས་པར་དཀའ་བའི་སངས་རྒྱས་ཀྱི་བསྟན་པ་རིན་པོ་ཆེ་སྤྱི་དང༌། བྱེ་བྲག་གསང་སྔགས་རྡོ་རྗེ་ཐེག་པའི་བསྟན་པ་འཇིག་རྟེན་དུ་དར་བ་ལ་དེ་ཉིད་མི་ནུབ་པར་སྐྱོང་ཞིང་གེགས་བྱེད་ཐམས་ཅད་ཚར་གཅོད་པར་ནུས་པའི་མཐུ་སྟོབས་ཅན་གྱི་སྲུང་མ་རྣམས་མེད་དུ་མི་རུང་ཞིང༌། རྒྱལ་བའི་སྤྱན་སྔར་རྡོ་རྗེའི་གཡར་དམ་ནོས་པའི་ཆོས་སྐྱོང་ཕོ་མོ་མ་ནིང་གི་རིགས་ཇི་སྙེད་ཅིག་མཆིས་པའི་ནང་ནས་ཁྱད་པར་མཆོག་ཏུ་གྱུར་པ། འཕགས་བཞི་སྐྱེད་པའི་ཡུམ་ཀུན་ཏུ་བཟང་མོ་དབྱིངས་ཀྱི་དབང་ཕྱུག་མ་ཉིད་སྨུག་ནག་ཁྲོས་མ་ཆེན་མོའི་སྐུར་བཞེངས་པ། ཡེ་ཤེས་ལས་དང་འཇིག་རྟེན་ལས་གྲུབ་པའི་མ་མོ་མཁའ་འགྲོ་ཡོངས་ཀྱི་རྗེ་མོ། །གསང་ཆེན་བླ་ན་མེད་པ་སྤྱི་དང་ཁྱད་པར་འོད་གསལ་རྡོ་རྗེ་རྩེ་མོའི་བསྟན་པ་སྲུང་བ་ཡོངས་ཀྱི་འཁོར་ལོས་སྒྱུར་མ། དཔལ་ཆེན་པོ་རྡོ་རྗེ་བདུད་རྩི་དང༌། སངས་རྒྱས་གཉིས་པ་ཨོ་རྒྱན་གྱི་སློབ་དཔོན་བདེ་བ་ཆེན་པོ་ཡབ་ཡུམ་གྱིས་བདུད་རྩི་གསང་བའི་དཀྱིལ་འཁོར་གཉན་པོ་སྐྱོང་བའི་དམ་ཚིག་གི་གཉེར་གཏད་པའི་སྲུང་མ་ཆེན་མོ་འདི་ཉིད་ཀྱི་སྲོག་གཏད་ཟབ་མོ་བསྒྲུབ་པར་བགྱི་བ་ལ་སོགས་ཀྱིས་མཚམས་སྦྱར་ཏེ། དྲག་པོའི་རྫས་ཡུངས་ཀར་ཤ་ཁྲག་ལ་སོགས་པ་དང་མཚོན་ཆའི་རིགས་ཀྱི་མཎྜལ་འབུལ་དུ་གཞུག །སློབ་དཔོན་དཔལ་ཧེ་རུ་ཀ་རྡོ་རྗེ་བདུད་རྩི་དངོས་སུ་གསལ་བ་ལ་དད་གུས་བསྐྱེད་དེ་གསོལ་བ་འདེབས་པ་འདིའི་རྗེས་ཟློས། སངས་རྒྱས་བསྟན་པ་བསྲུང་བ་དང༌། ཉམས་པའི་དགྲ་བགེགས་བསྒྲལ་བའི་ཕྱིར༔ བདུད་རྩི་གསང་བའི་སྲུང་མ་ཡི༔ སྲོག་གཏད་རྗེས་གནང་སྩལ་དུ་གསོལ༔ ལན་གསུམ། དེ་ལྟར་གསོལ་བ་བཏབ་པ་ལ་གནང་བ་སྦྱིན་ཅིང་དམ་ཚིག་ལ་གནས་དགོས་པར་གདམས་པ་འདི་ལ་གསན་འཚལ། སྔགས་སྲུང་མ་མོ་འབུམ་སྡེ་ཡི༔ སྲོག་གི་ཡེ་ཤེས་ཁྱོད་ལ་སྦྱིན༔ དམ་ལས་འདས་ན་གཤེད་དུ་འགྱུར༔ དེ་ཕྱིར་རྡོ་རྗེའི་དམ་ཚིག་སྲུང་༔ ས་མ་ཡ་རཀྵནྟུ༔ ཞེས་གདམས་ཤིང་བདུད་རྩི་སྦྱིན། དེང་ནས་སྤྱི་དང་ཁྱད་པར་གྱི་དམ་ཚིག་ཚུལ་བཞིན་ཉམས་པ་མེད་པར་བསྲུང་སྙམ་པས་རྡོ་རྗེའི་གྲོ་བོར་བ་འདིའི་རྗེས་ཟློས། ས་མ་ཡ་བཛྲ་རཀྴ་སཱི་ན་ར་ཀན༔ རྒྱུད་རྣམ་པར་དག་པར་བྱ་བའི་སླད་དུ་བླ་མ་དང་གཉིས་སུ་མེད་པའི་བཅོམ་ལྡན་འདས་རྡོ་རྗེ་བདུད་རྩིའི་དཀྱིལ་འཁོར་ལ་རྩ་གསུམ་རྒྱལ་བ་སྲས་དང་བཅས་པས་བསྐོར་ཏེ་མངོན་སུམ་བཞིན་དུ་བཞུགས་པའི་སྤྱན་སྔར་བསགས་སྦྱང་ཚུལ་བཞིན་བགྱི་བའི་འདུན་པ་དང་སོ་སོའི་དམིགས་འདོན་ཟུང་དུ་ཆུད་པས་འདིའི་རྗེས་ཟློས། རྡོ་རྗེ་སློབ་དཔོན་སངས་རྒྱས་དཔལ། སོགས་ལན་གསུམ། དེ་ནས་ཁྱོད་རང་རྣམས་གཉེན་པོ་སྟོབས་ཀྱི་ལྷའི་ཕྱག་རྒྱ་འདི་བཞིན་ཏུ་གསལ་ཐོབ་ཅིག །སྟོང་པའི་ངང་ལས་སྐད་ཅིག་གིས་རང་ཉིད་གང་དུ་གནས་པའི་གོ་སར་པདྨ་དང་ཉི་མའི་དཀྱིལ་འཁོར་གྱི་གདན་ལ་ཁྱེད་རང་རྣམས་དཔལ་ཆེན་པོ་རྡོ་རྗེ་བདུད་རྩི་ཧེ་རུ་ཀ་སྐུ་མདོག་མཐིང་ནག་རབ་ཏུ་ཁྲོས་ཤིང་ཤིན་ཏུ་འཇིགས་པའི་ཉམས་ཅན། ཕྱག་གཡས་པས་རྡོ་རྗེ་གདེངས་ཤིང་གཡོན་པས་ཁ་ཊྭཱྃ་ག་གསོར་བའི་སྟབས་ཀྱིས་བསྣམས་པ། རུས་པ་དང་སྦྲུལ་གྱིས་བརྒྱན་ཅིང་སྟག་ལྤགས་ཀྱི་ཤམ་ཐབས་ཅན། རང་འོད་ཀྱི་ཡུམ་དང་མཉམ་པར་སྦྱོར་ཞིང་གར་དགུའི་ཉམས་ལྡན་ཡེ་ཤེས་ཀྱི་མེ་ཕུང་འབར་བའི་ཀློང་ན་བརྗིད་ཅིང་འགྱིང་བའི་གནས་གསུམ་དུ་ཨོཾ་ཨཱཿཧཱུྃ་གི་ཡི་གེས་མཚན་པ་དང༌། སློབ་དཔོན་གྱི་ཐུགས་ཀ་ནས་ཀྱང་འོད་ཟེར་ནམ་མཁའི་ཁམས་གང་བར་འཕྲོས་པས་རྒྱལ་བ་སྲས་དང་བཅས་པ་རྣམས་དང༌། ཁྱད་པར་རྡོ་རྗེ་ཉི་མའི་རིགས་ཀྱི་ཁྲོ་བོ་ཆེན་པོ་རྣམས་ཀྱི་ཐུགས་དམ་གྱི་རྒྱུད་བསྐུལ། དེ་རྣམས་ཀྱི་གསང་བ་གསུམ་གྱི་བྱིན་རླབས་མ་ལུས་པ་དཔལ་རྡོ་རྗེ་བདུད་རྩི་ཧེ་རུ་ཀའི་སྐུ་དང་སྔགས་ཕྲེང་ཕྱག་མཚན་འོད་ཟེར་རྣམ་པར་སྤྱན་དྲངས། ནམ་མཁའ་ནས་ཆར་ཆེན་པོ་འབབས་པ་ལྟར་བྱོན་ཏེ་ཁྱེད་རང་རྣམས་ཀྱི་སྒོ་གསུམ་ལ་སིབ་སིབ་ཐིམ་པར་མོས་ཤིག །སྤོས་དང་རོལ་མོའི་སྒྲ་སྦྱར་ལ། ཨོཾ་ཛྭ་ལ་ཛྭ་ལ་ཧཱུྃ་ཕཊ་བྷྱོ་སྭཱ་ཧཱ༔ ཨེ་ཨཱ་རལླི་ཛྙཱ་ན་ཨཱ་བེ་ཤ་ཡ་ཨ་ཨཱཿ ཞེས་དྲག་ཏུ་བརྗོད་ལ་བྱིན་དབབ། ཏིཥྛ་བཛྲས་བརྟན་པར་བྱས། དངོས་གཞི་བསྟན་སྐྱོང་ཡེ་ཤེས་ཀྱི་མ་མོའི་སྐུ་ཕྱག་རྒྱ་གཏད་པ་ལ་སྔར་བསྒྲུབས་པའི་རྟེན་གྱི་གཏོར་མ་ཉིད་སླར་ཡང་གསལ་འདེབས་བསྐྱར་མ་འདི་བཞིན་ཏུ་མཛོད་ཅིག །སློབ་དཔོན་དང་ཁྱེད་རང་དཔལ་རྡོ་རྗེ་བདུད་རྩི་ཧེ་རུ་ཀ་དངོས་སུ་གསལ་བའི་མདུན་ཏུ་ཆོས་འབྱུང་འབར་བ་ཡངས་ཤིང་རྒྱ་ཆེ་བའི་ཕོ་བྲང་ཕྱི་ནང་ཀུན་ཏུ་མེ་རླུང་འཚུབས་ཤིང་ཁྲག་གི་རྒྱ་མཚོ་འཁྱིལ་བའི་དབུས་སུ་གནམ་ལྕགས་ཀྱི་འཁོར་ལོ་རྩིབས་བཞི་པའི་ལྟེ་བར་པདྨ་ཉི་མ་བམ་རོའི་གདན་གྱི་སྟེང་དུ། དཔལ་ཡེ་ཤེས་མ་མོ་སྔགས་སྲུང་ཨེ་ཀ་ཛཱ་ཏི་སྐུ་མདོག་མཐིང་ནག་ནམ་མཁའ་དྭངས་པའི་མདོག་ཅན་ཞལ་གཅིག་ཕྱག་གཉིས་པ། དཔྲལ་བའི་དབྱིངས་ན་སྤྱན་གཅིག་གྱེན་དུ་གཟིགས་ཤིང་ཞལ་ནས་མཆེ་བ་གཅིག་མཐུར་དུ་གཙིགས་པ། དབུ་གཙུགས་གཡུའི་རལ་པ་ཉག་གཅིག་མཁའ་ལ་སྒྲེང་ཞིང་བྲང་ངོས་སུ་ནུ་མ་གཅིག་འཕྱང་བ། ཕྱག་གཡས་པས་ཞིང་གི་དབྱུག་པ་ཀླད་ལ་ཕྱར་ཞིང་གཡོན་པས་དགྲ་བགེགས་ཀྱི་སྙིང་ཟ་བ། དཔུང་པ་གཡོན་ནས་ལྕགས་ཀྱི་སྤྱང་མོ་འགྱེད་པ་སྤྲིན་དཀར་གྱིས་སྟོད་གཡོགས་ཤིང་སྟག་ལྤགས་སྨད་ལ་དཀྲིས་པ། རུས་པའི་ཕྱག་རྒྱ་ལྔ་དང་སྦྲུལ་གྱི་ཆུན་པོས་བརྒྱན་ཅིང་ཡེ་ཤེས་ཀྱི་མེ་ཕུང་རབ་ཏུ་འབར་ཞིང་འཁྲུགས་པའི་ཀློང་ན་ཞབས་འདོར་ཐབས་རྔམས་བརྗིད་འཇིགས་པའི་ཚུལ་དུ་བཞུགས་པའི་ཤར་དུ་སྐུ་སྤྲུལ་དཀར་མོ་འབུམ་སྡཻ། ལྷོར་ཡོན་ཏན་སྤྲུལ་པ་སེར་མོ་འབུམ་སྡཻ། ནུབ་ཏུ་གསུང་སྤྲུལ་དམར་མོ་འབུམ་སྡེ། བྱང་དུ་ཕྲིན་ལས་ཀྱི་སྤྲུལ་པ་ལྗང་མོ་འབུམ་སྡཻ། གཞན་ཡང་ལས་དང་འཇིག་རྟེན་གྱི་མ་མོ་བསམ་ལས་འདས་པས་བསྐོར་ནས་བཞུགས་པ་དེ་ཉིད་དམ་ཚིག་དབང་གིས་མདུན་ཏུ་བྱོན་ཏེ་སློབ་དཔོན་དཔལ་ཧེ་རུ་ཀས་བཀའ་བསྒོས་པ་ཙམ་གྱིས་ཇི་ལྟར་བཅོལ་བའི་ཕྲིན་ལས་སྒྲུབ་པར་ཞལ་གྱིས་བཞེས་པར་མོས་ཤིག །རྟེན་གཏོར་ལག་ཏུ་གཏད་ལ། བྷྱོ༔ སྔགས་སྲུངས་མ་མོ་འབུམ་སྡཻའི་ཚོགས༔ དཔལ་ལྡན་རྡོ་རྗེ་སློབ་མ་འདིའི༔ ལུས་དང་གྲིབ་བཞིན་འགྲོགས་ནས་ཀྱང་༔ རྣམ་བཞིའི་ཕྲིན་ལས་བསྒྲུབ་པར་གྱིས༔ བྷྱོ་མ་མ་ཨེ་ཀ་ཛཱ་ཊི་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཀཱ་ཡ་བཛྲ་ས་མ་ཡ་སྟྭཾ༔ མ་མོའི་སྐུ་ལས་སྐུ་གཉིས་པ་འོད་དང་གཟི་བརྗིད་འབར་བ་འཕྲོས། ཁྱེད་རང་ཧེ་རུ་ཀར་གསལ་བའི་ཐུགས་སྲོག་ཉི་གདན་ལ་ཐིམ་པས་སྐུ་དབང་དུ་གྱུར་པར་མོས་ཤིག །གསུང་གི་རིག་པ་གཏད་པའི་སླད་དུ། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་མདུན་བསྐྱེད་མ་མོའི་ཐུགས་རྒྱུད་བསྐུལ། ཐུགས་སྲོག་སྔགས་ཕྲེང་དང་བཅས་པ་ལས་སྔགས་ཕྲེང་གཉིས་པ་ཆད། ཞལ་ནས་ཐོན། ཁྱེད་རང་གི་ཞལ་དུ་ཞུགས། ཐུགས་སྲཽག་ཧཱུྃ་མཐིང་ནག་འབར་བའི་གདན་ལ་ཐིམ་པས་གསུང་དབང་དུ་གྱུར་པར་མོས་ལ་སྙིང་པོ་འདིའི་རྗེས་ཟློས་ལན་གསུམ་མཛོད། བྷྱོ་མ་མ་ཨེ་ཀ་ཛཱ་ཊི་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ལན་གསུམ་རྗེས་ཟློས་བྱར་གཞུག །སྔགས་བྱང་གཏད་ལ། བྷྱོ༔ མ་མོའི་སྲོག་གི་སྙིང་པོ་འདི༔ གཉེན་པོ་སྟོབས་དང་ལྡན་པར་ཟློས༔ མཆོད་བསྟོད་སྒྲུབ་ལ་བརྩོན་པར་གྱིས༔ དངོས་གྲུབ་རྣམ་གཉིས་འགྲུབ་པར་འགྱུར༔ བྷྱོ་མ་མ་ཨེ་ཀ་ཛཱ་ཊི་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཝཱ་ཀ་བཛྲ་ས་མ་ཡ་སྟྭཾ༔ ཐུགས་ཀྱི་དགོངས་པའི་དེ་ཁོ་ན་ཉིད་ངོ་སྤྲོད་པའི་སླད་དུ་མ་མོ་འཁོར་དང་བཅས་པ་འོད་དུ་ཞུ་ནས་ཐིག་ལེ་སྔོན་པོ་ཕྲ་ལ་འཚེར་བར་གྱུར་པ་ཁྱེད་རང་དཔལ་ཆེན་པོའི་ཐུགས་སྲོག་གི་གདན་ལ་ཐིམ་པས་མ་མོའི་ཐུགས་དབང་དུ་གྱུར་པར་མོས་ལ་དབྱིངས་རིག་ཟུང་འཇུག་གི་ངང་དུ་མཉམ་པར་ཞོག་ཅིག །བྷྱོ་མ་མ་ཨེ་ཀ་ཛཱ་ཊི་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཙིཏྟ་བཛྲ་ས་མ་ཡ་སྟྭཾ༔ དེས་ཐུན་མོང་སྐུ་གསུང་ཐུགས་ཀྱི་སྲོག་གཏད་པ་སོང་ནས། ཁྱད་པར་དོན་དམ་ཡེ་ཤེས་ཀྱི་སྲོག་ལ་དབང་བྱེད་པའི་མན་ངག་སྦྱིན་པ་ལགས་པས་ཚིག་ཟུངས་སུ་བཟུང་ཞིང་དོན་ཐུགས་ལ་གཅག་པས་ཉམས་ལེན་གྱི་སྙིང་པོར་དྲིལ་བ་ཞུ། བྷྱོ༔ འཇིག་རྟེན་མ་མོ་རྩ་ཡིན་ཏེ༔ འཁོར་ལོ་རྣམ་བཞི་དབུ་མར་གཞུག༔ ལས་ཀྱི་མ་མོ་རླུང་ཡིན་ཏེ༔ སྦྱོར་བ་བཞི་ཡིས་རབ་ཏུ་གཅུན༔ ཡེ་ཤེས་མ་མོ་ཐིག་ལེ་སྟེ༔ དགའ་བ་བཞི་ཡི་དབྱིངས་སུ་བསྟིམ༔ དབྱིངས་ཀྱི་མ་མོ་སེམས་ཡིན་ཏེ༔ སྟོང་པ་བཞི་ཡི་ཡེ་ཤེས་བསྐྱེད༔ སྟོང་སྲོག་རང་རིག་ཆོས་སྐུར་བཅད༔ དོན་གྱི་མ་མོ་འགྲུབ་པར་འགྱུར༔ ཛྙཱ་ན་དྷཱ་ཏུ་ཨ་ཨ༔ དེ་ལྟར་ཐུན་མོང་དང་ཁྱད་པར་གྱི་སྲོག་གཏད་པ་ཐོབ་པའི་ཕན་ཡོན་དང་དམ་ཚིག་ལ་གནས་པ་གལ་ཆེ་བར་གདམས་པ་རང་གཞུང་ཉིད་ལས། བདུད་རྩི་གསང་བའི་སྲུང་མ་ཆེ༔ སྔགས་ཀྱི་གཉེར་འཛིན་རལ་གཅིག་མའི༔ སྲོག་གི་རིམ་པ་འདི་གཏད་པས༔ མ་མོ་ནམ་ཡང་མི་འབྲལ་འགྲོགས༔ དམ་ཚིག་གཞུང་བཞིན་སྤྱོད་པ་ལ༔ དངོས་གྲུབ་ཐམས་ཅད་འབད་མེད་སྟེར༔ དམ་ལས་འགལ་ན་གཤེད་དུ་འབེབས༔ དེ་ཕྱིར་དམ་ཚིག་མཆོག་ཏུ་གཅེས༔ ཞེས་གསུངས་པ་ལྟར་རྡོ་རྗེ་ཐེག་པ་སྤྱི་དང་ཁྱད་པར་དཔལ་ལྡན་སྔགས་ཀྱི་སྲུང་མའི་རྡོ་རྗེའི་དམ་ཚིག་རྣམས་ཚུལ་བཞིན་བསྲུང་བའི་བློས་འདིའི་རྗེས་ཟློས། གཙོ་བོས་ཇི་ལྟར་སོགས་དང༌། གཏང་རག་མཎྜལ་ཕྱིན་སྤྱི་ལྟར་བྱ། ཚོགས་ལ་རོལ་ཅིང་ལྷག་མ་བཏང༌། སྲུང་མའི་གཤམ་ནས་འབྱུང་བའི་གཏོར་འབུལ་ཆད་བརྟན་རྣམས་དང༌། ལས་བྱང་གི་གཏང་རག་མཆོད་བསྟོད་ནས་ཤིས་བརྗོད་ཀྱི་བར་ཡང་སྤྱི་ལྟར་བྱའོ། །གསང་བ་ལམ་བྱེད་སྒྲུབ་པ་པོ། །རྐྱེན་སེལ་དངོས་གྲུབ་སྒྲུབ་པའི་གྲོགས། །རིང་དུ་གྱུར་ནས་འཛིན་མའི་ཁོངས། །རྣལ་འབྱོར་སྤྱོད་པས་རྟག་ཁྱབ་ཤོག །ཅེས་པའང་རིགས་ཀུན་ཁྱབ་བདག་གཏེར་ཆེན་བླ་མས་ཇི་ལྟར་སྩལ་བའི་དགོངས་དོན་ལྟར་པདྨ་གར་དབང་བློ་གྲོས་མཐའ་ཡས་ཀྱིས་རྫོང་ཤོད་བདེ་གཤེགས་འདུས་པའི་སྒྲུབ་གནས་སུ་བཀོད་པ་དགེ་ལེགས་འཕེལ།། །།

[edit]

d+hi:__dpal rdo rje bdud rtsi'i bka' srung e ka dzA' Ti'i srog gtad kyi yi ge srog gi thig le zhes bya ba bzhugs so/__/na mo gu ra be/__/spros pa kun bral bzang mo yum/__/bdud 'dul bstan pa'i gnyer 'dzin phyir/__/smug nag khros mar bzhengs pa des/__/byang chub bar du bdag skyong mdzod/__/bdud rtsi gsang ba'i srung ma khyad par can 'di'i srog gtad brgyud pa 'dzin cing dam tshig thub nges pa'i slob ma la sbyin pa'i tshe/__gong du dpal rdo rje bdud rtsi'i gtor mchod la sogs pa skabs babs bsham/__mdun tu maN+Dal dug khrag gis byugs pa chos 'byung khrag mtsho dang bcas pa'i gnam lcags 'khor lo rtsibs bzhi pa'i lte bar b+h+yo yig mthing nag__/rtsibs bzhir shar nas g.yas bskor du thig le dkar ser dmar ljang*/__phyi rol me rlung phreng bas bskor ba'i dbus su thod pa'am zangs lcags kyi snod du dpal gtor brjid ldan 'khor rang 'dra bzhi dang thebs kyus bskor ba/__me ris brgyan cing sku tsaka dar gdugs mthing gas spras pa bzhag__/mdun du sngags byang*/__sman gtor rak+ta/__drag mchod phreng tshar du bsham/__bdud rtsi rtsa ba'i dbang bskur ba'i zhar byung yin na tshogs mchod kyi gong du 'di'i las byang bzlas pa skong gso rnams zhor la songs bas 'thus/__dbang thams cad grub pa'i rjes su dam ldan gcig gam gsum las mi mang ba la srog gtad bya/__'di nyid sger du byed na rdo rje bdud rtsi'i bdag bskyed phrin las bzlas pa bcas song nas/__'di nyid kyi phrin las btang la mdun bskyed mchod bstod bzlas pa ci nus kyis thugs rgyud bskul/__byin rlabs bcas skong ba 'don/__bdud rtsi'i tshogs mchod phul/__slob ma khrus bya/__bgegs bskrad/__sems bskyed gsal btab la/__de'ang mtshan tsam thos par dka' ba'i sangs rgyas kyi bstan pa rin po che spyi dang*/__bye brag gsang sngags rdo rje theg pa'i bstan pa 'jig rten du dar ba la de nyid mi nub par skyong zhing gegs byed thams cad tshar gcod par nus pa'i mthu stobs can gyi srung ma rnams med du mi rung zhing*/__rgyal ba'i spyan sngar rdo rje'i g.yar dam nos pa'i chos skyong pho mo ma ning gi rigs ji snyed cig mchis pa'i nang nas khyad par mchog tu gyur pa/__'phags bzhi skyed pa'i yum kun tu bzang mo dbyings kyi dbang phyug ma nyid smug nag khros ma chen mo'i skur bzhengs pa/__ye shes las dang 'jig rten las grub pa'i ma mo mkha' 'gro yongs kyi rje mo/__/gsang chen bla na med pa spyi dang khyad par 'od gsal rdo rje rtse mo'i bstan pa srung ba yongs kyi 'khor los sgyur ma/__dpal chen po rdo rje bdud rtsi dang*/__sangs rgyas gnyis pa o rgyan gyi slob dpon bde ba chen po yab yum gyis bdud rtsi gsang ba'i dkyil 'khor gnyan po skyong ba'i dam tshig gi gnyer gtad pa'i srung ma chen mo 'di nyid kyi srog gtad zab mo bsgrub par bgyi ba la sogs kyis mtshams sbyar te/__drag po'i rdzas yungs kar sha khrag la sogs pa dang mtshon cha'i rigs kyi maN+Dal 'bul du gzhug__/slob dpon dpal he ru ka rdo rje bdud rtsi dngos su gsal ba la dad gus bskyed de gsol ba 'debs pa 'di'i rjes zlos/__sangs rgyas bstan pa bsrung ba dang*/__nyams pa'i dgra bgegs bsgral ba'i phyir:__bdud rtsi gsang ba'i srung ma yi:__srog gtad rjes gnang stsal du gsol:__lan gsum/__de ltar gsol ba btab pa la gnang ba sbyin cing dam tshig la gnas dgos par gdams pa 'di la gsan 'tshal/__sngags srung ma mo 'bum sde yi:__srog gi ye shes khyod la sbyin:__dam las 'das na gshed du 'gyur:__de phyir rdo rje'i dam tshig srung :__sa ma ya rak+Shan+tu:__zhes gdams shing bdud rtsi sbyin/__deng nas spyi dang khyad par gyi dam tshig tshul bzhin nyams pa med par bsrung snyam pas rdo rje'i gro bor ba 'di'i rjes zlos/__sa ma ya badz+ra rak+sha sI na ra kan:__rgyud rnam par dag par bya ba'i slad du bla ma dang gnyis su med pa'i bcom ldan 'das rdo rje bdud rtsi'i dkyil 'khor la rtsa gsum rgyal ba sras dang bcas pas bskor te mngon sum bzhin du bzhugs pa'i spyan sngar bsags sbyang tshul bzhin bgyi ba'i 'dun pa dang so so'i dmigs 'don zung du chud pas 'di'i rjes zlos/__rdo rje slob dpon sangs rgyas dpal/__sogs lan gsum/__de nas khyod rang rnams gnyen po stobs kyi lha'i phyag rgya 'di bzhin tu gsal thob cig__/stong pa'i ngang las skad cig gis rang nyid gang du gnas pa'i go sar pad+ma dang nyi ma'i dkyil 'khor gyi gdan la khyed rang rnams dpal chen po rdo rje bdud rtsi he ru ka sku mdog mthing nag rab tu khros shing shin tu 'jigs pa'i nyams can/__phyag g.yas pas rdo rje gdengs shing g.yon pas kha T+wA~M ga gsor ba'i stabs kyis bsnams pa/__rus pa dang sbrul gyis brgyan cing stag lpags kyi sham thabs can/__rang 'od kyi yum dang mnyam par sbyor zhing gar dgu'i nyams ldan ye shes kyi me phung 'bar ba'i klong na brjid cing 'gying ba'i gnas gsum du oM AHhU~M gi yi ges mtshan pa dang*/__slob dpon gyi thugs ka nas kyang 'od zer nam mkha'i khams gang bar 'phros pas rgyal ba sras dang bcas pa rnams dang*/__khyad par rdo rje nyi ma'i rigs kyi khro bo chen po rnams kyi thugs dam gyi rgyud bskul/__de rnams kyi gsang ba gsum gyi byin rlabs ma lus pa dpal rdo rje bdud rtsi he ru ka'i sku dang sngags phreng phyag mtshan 'od zer rnam par spyan drangs/__nam mkha' nas char chen po 'babs pa ltar byon te khyed rang rnams kyi sgo gsum la sib sib thim par mos shig__/spos dang rol mo'i sgra sbyar la/__oM dz+wa la dz+wa la hU~M phaT b+h+yo swA hA:___e A ral+li dz+nyA na A be sha ya a AH__zhes drag tu brjod la byin dbab/__tiSh+Tha badz+ras brtan par byas/__dngos gzhi bstan skyong ye shes kyi ma mo'i sku phyag rgya gtad pa la sngar bsgrubs pa'i rten gyi gtor ma nyid slar yang gsal 'debs bskyar ma 'di bzhin tu mdzod cig__/slob dpon dang khyed rang dpal rdo rje bdud rtsi he ru ka dngos su gsal ba'i mdun tu chos 'byung 'bar ba yangs shing rgya che ba'i pho brang phyi nang kun tu me rlung 'tshubs shing khrag gi rgya mtsho 'khyil ba'i dbus su gnam lcags kyi 'khor lo rtsibs bzhi pa'i lte bar pad+ma nyi ma bam ro'i gdan gyi steng du/__dpal ye shes ma mo sngags srung e ka dzA ti sku mdog mthing nag nam mkha' dwangs pa'i mdog can zhal gcig phyag gnyis pa/__dpral ba'i dbyings na spyan gcig gyen du gzigs shing zhal nas mche ba gcig mthur du gtsigs pa/__dbu gtsugs g.yu'i ral pa nyag gcig mkha' la sgreng zhing brang ngos su nu ma gcig 'phyang ba/__phyag g.yas pas zhing gi dbyug pa klad la phyar zhing g.yon pas dgra bgegs kyi snying za ba/__dpung pa g.yon nas lcags kyi spyang mo 'gyed pa sprin dkar gyis stod g.yogs shing stag lpags smad la dkris pa/__rus pa'i phyag rgya lnga dang sbrul gyi chun pos brgyan cing ye shes kyi me phung rab tu 'bar zhing 'khrugs pa'i klong na zhabs 'dor thabs rngams brjid 'jigs pa'i tshul du bzhugs pa'i shar du sku sprul dkar mo 'bum sdai/__lhor yon tan sprul pa ser mo 'bum sdai/__nub tu gsung sprul dmar mo 'bum sde/__byang du phrin las kyi sprul pa ljang mo 'bum sdai/__gzhan yang las dang 'jig rten gyi ma mo bsam las 'das pas bskor nas bzhugs pa de nyid dam tshig dbang gis mdun tu byon te slob dpon dpal he ru kas bka' bsgos pa tsam gyis ji ltar bcol ba'i phrin las sgrub par zhal gyis bzhes par mos shig__/rten gtor lag tu gtad la/__b+h+yo:__sngags srungs ma mo 'bum sdai'i tshogs:__dpal ldan rdo rje slob ma 'di'i:__lus dang grib bzhin 'grogs nas kyang :__rnam bzhi'i phrin las bsgrub par gyis:__b+h+yo ma ma e ka dzA Ti ru lu ru lu hU~M b+h+yo hU~M:__kA ya badz+ra sa ma ya s+t+waM:__ma mo'i sku las sku gnyis pa 'od dang gzi brjid 'bar ba 'phros/__khyed rang he ru kar gsal ba'i thugs srog nyi gdan la thim pas sku dbang du gyur par mos shig__/gsung gi rig pa gtad pa'i slad du/__slob dpon gyi thugs ka nas 'od zer 'phros mdun bskyed ma mo'i thugs rgyud bskul/__thugs srog sngags phreng dang bcas pa las sngags phreng gnyis pa chad/__zhal nas thon/__khyed rang gi zhal du zhugs/__thugs sraug hU~M mthing nag 'bar ba'i gdan la thim pas gsung dbang du gyur par mos la snying po 'di'i rjes zlos lan gsum mdzod/__b+h+yo ma ma e ka dzA Ti ru lu ru lu hU~M b+h+yo hU~M:__lan gsum rjes zlos byar gzhug__/sngags byang gtad la/__b+h+yo:__ma mo'i srog gi snying po 'di:__gnyen po stobs dang ldan par zlos:__mchod bstod sgrub la brtson par gyis:__dngos grub rnam gnyis 'grub par 'gyur:__b+h+yo ma ma e ka dzA Ti ru lu ru lu hU~M b+h+yo hU~M:__wA ka badz+ra sa ma ya s+t+waM:__thugs kyi dgongs pa'i de kho na nyid ngo sprod pa'i slad du ma mo 'khor dang bcas pa 'od du zhu nas thig le sngon po phra la 'tsher bar gyur pa khyed rang dpal chen po'i thugs srog gi gdan la thim pas ma mo'i thugs dbang du gyur par mos la dbyings rig zung 'jug gi ngang du mnyam par zhog cig__/b+h+yo ma ma e ka dzA Ti ru lu ru lu hU~M b+h+yo hU~M:__tsit+ta badz+ra sa ma ya s+t+waM:__des thun mong sku gsung thugs kyi srog gtad pa song nas/__khyad par don dam ye shes kyi srog la dbang byed pa'i man ngag sbyin pa lags pas tshig zungs su bzung zhing don thugs la gcag pas nyams len gyi snying por dril ba zhu/__b+h+yo:__'jig rten ma mo rtsa yin te:__'khor lo rnam bzhi dbu mar gzhug:__las kyi ma mo rlung yin te:__sbyor ba bzhi yis rab tu gcun:__ye shes ma mo thig le ste:__dga' ba bzhi yi dbyings su bstim:__dbyings kyi ma mo sems yin te:__stong pa bzhi yi ye shes bskyed:__stong srog rang rig chos skur bcad:__don gyi ma mo 'grub par 'gyur:__dz+nyA na d+hA tu a a:__de ltar thun mong dang khyad par gyi srog gtad pa thob pa'i phan yon dang dam tshig la gnas pa gal che bar gdams pa rang gzhung nyid las/__bdud rtsi gsang ba'i srung ma che:__sngags kyi gnyer 'dzin ral gcig ma'i:__srog gi rim pa 'di gtad pas:__ma mo nam yang mi 'bral 'grogs:__dam tshig gzhung bzhin spyod pa la:__dngos grub thams cad 'bad med ster:__dam las 'gal na gshed du 'bebs:__de phyir dam tshig mchog tu gces:__zhes gsungs pa ltar rdo rje theg pa spyi dang khyad par dpal ldan sngags kyi srung ma'i rdo rje'i dam tshig rnams tshul bzhin bsrung ba'i blos 'di'i rjes zlos/__gtso bos ji ltar sogs dang*/__gtang rag maN+Dal phyin spyi ltar bya/__tshogs la rol cing lhag ma btang*/__srung ma'i gsham nas 'byung ba'i gtor 'bul chad brtan rnams dang*/__las byang gi gtang rag mchod bstod nas shis brjod kyi bar yang spyi ltar bya'o/__/gsang ba lam byed sgrub pa po/__/rkyen sel dngos grub sgrub pa'i grogs/__/ring du gyur nas 'dzin ma'i khongs/__/rnal 'byor spyod pas rtag khyab shog__/ces pa'ang rigs kun khyab bdag gter chen bla mas ji ltar stsal ba'i dgongs don ltar pad+ma gar dbang blo gros mtha' yas kyis rdzong shod bde gshegs 'dus pa'i sgrub gnas su bkod pa dge legs 'phel//__//_