JKW-KABUM-06-CHA-002-003

🚧 This website is under continued development. We appreciate your patience!

Previous Text Back to Volume PageNext Text

Wylie title	grub mtha' bzhi'i bden gnyis kyi legs bshad snying po'i rgyan
Location	mkhyen brtse'i bka' 'bum Volume 6, sde tshan 2, Text 3, Pages 158-165 (Folios 13b1 to 17a3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. grub mtha' bzhi'i bden gnyis kyi legs bshad snying po'i rgyan. In 'jam dbyangs mkhyen brtse'i dbang po'i bka' 'bum, Vol. 6: 158-165. Khams sde dge rdzong sar dgon: Rdzong sar blo gros phun tshogs, 2020.
Genre	Doxographies - grub mtha'  ·  Detailed Explanation - rnam bshad

1 Texts in this Section (sde tshan or chos tshan)

3 158-165	གྲུབ་མཐའ་བཞིའི་བདེན་གཉིས་ཀྱི་ལེགས་བཤད་སྙིང་པོའི་རྒྱན། grub mtha' bzhi'i bden gnyis kyi legs bshad snying po'i rgyan Doxographies - grub mtha'   ·   Detailed Explanation - rnam bshad	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

གྲུབ་མཐའ་བཞིའི་བདེན་གཉིས་ཀྱི་ལེགས་བཤད་སྙིང་པོའི་རྒྱན་ཅེས་བྱ་བ་བཞུགས་སོ། །ན་མོ་མུ་ནིནྷཱ་ཡ། བདེན་པ་གཉིས་ཀྱི་རྣམ་གཞག་ཅུང་ཟད་འཆད་ན་བཞི་སྟེ། དང་པོ་བྱེ་སྨྲ་བས། མཛོད་ལས། བཅོམ་པའམ་བློས་གཞིག་པ་ན་དེར་འཛིན་གྱི་བློ་འདོར་དུ་རུང་བའི་ཆོས། ཀུན་རྫོབ་བདེན་པའི་མཚན་ཉིད། མཚན་གཞི་ནི་བུམ་པ་དང་བུམ་ནང་གི་ཆུ་ལྟ་བུ་སྟེ། བུམ་པ་ནི་རྡུལ་དང་བཅོམ་པ་ན་བུམ་པའི་བློ་མི་འཇུག་ལ། ཆུ་ནི་བློས་རྡུལ་རྫས་ཀྱི་ཆོས་གཞན་བསལ་བས་ནི་བློ་མི་འཇུག་པ་སྟེ། ཀ་བ་ལ་སོགས་པ་ལའང་མཚོན་ནོ། །བཅོམ་པའམ་བློས་གཞིག་པ་ན་དེར་འཛིན་གྱི་བློ་འདོར་དུ་མི་རུང་བའི་ཆོས། དོན་དམ་བདེན་པའི་མཚན་ཉིད། དེའི་མཚན་གཞི་ནི། གཟུགས་དང་། རྡུལ་ཕྲ་རབ་དང་། འདུས་མ་བྱས་ལྟ་བུ་སྟེ། གཟུགས་དེ་རྡུལ་དུ་བཤིག་ཀྱང་གཟུགས་ཀྱི་བློ་མི་འདོར་ལ། རྡུལ་ཕྲ་རབ་ནི་དེ་ལས་ཤིན་ཏུ་བཤིག་རྒྱུ་མེད་ཅིང་། འདུས་མ་བྱས་པ་ཙམ་བློས་གཞིག་ཀྱང་དེ་ལས་མ་འདས་སོ། །གཉིས་པ་མདོ་སྡེ་པས་རྣམ་འགྲེལ་ལས། དོན་དམ་བྱེད་པ་ནུས་པ་གང་། །དེ་འདིར་དོན་དམ་ཡོད་པ་ཡིན། །གཞན་ནི་ཀུན་རྫོབ་ཡོད་པ་སྟེ། །དེ་དག་རང་སྤྱིའི་མཚན་ཉིད་བཤད། །ཅེས་པས། དོན་དམ་པར་དོན་བྱེད་ནུས་པའི་ཆོས་དོན་དམ་བདེན་པའི་མཚན་ཉིད། མཚན་གཞི་ནི་བུམ་པ་དང་ཀ་བ་ལ་སོགས་པ་ལྟ་བུ་སྟེ། ལུགས་འདིར་དོན་དམ་བདེན་པ། མི་རྟག་པ། དངོས་པོ། འདུས་བྱས། རང་མཚན་རྣམས་དོན་གཅིག་མིང་གི་རྣམ་གྲངས། ཕན་གནོད་སོགས་ཀྱི་དོན་བྱེད་ནུས་པ་ཞིག་དོན་དམ་བདེན་པར་འདོད་དེ། དེ་ཡང་དངོས་པོ་རྣམས་བདེན་གྲུབ་ཏུ་འདོད་པའི་དབང་གིས་ཡིན་ནོ། དོན་དམ་པར་དོན་བྱེད་མི་ནུས་པའི་ཆོས། ཀུན་རྫོབ་བདེན་པའི་མཚན་ཉིད། མཚན་གཞི་ནི། ནམ་མཁའ་དང་ཆོས་གང་ཡིན་ཀྱང་དེ་དང་གཅིག་དང་ཐ་དད་སོགས་ཀུན་བརྟགས་ཀྱི་རིགས་རྣམས་ལྟ་བུ་སྟེ། ཀུན་རྫོབ་བདེན་པ། རྟག་པ་དངོས་མེད་ཀྱི་ཆོས། འདུས་མ་བྱས། སྤྱི་མཚན་རྣམས་དོན་གཅིག་ཅིང་། ལུགས་འདིར་འདུས་མ་བྱས་མ་ཡིན་པའི་ཆོས་ཐམས་ཅད་ཀུན་རྫོབ་ཀྱི་བདེན་པ་ཡིན་པས། སྟོང་ཉིད་ཀྱང་ཀུན་རྫོབ་ཀྱི་བདེན་པའོ། །གསུམ་པ་སེམས་ཙམ་པས་ནི། བདེན་གཉིས་སོ་སོའི་མཚན་ཉིད། དབྱེ་བ་སོགས་ཕལ་ཆེར་རང་རྒྱུད་པ་དང་མཐུན་པ་ཡོད་ཀྱང་། མཚན་གཞི་ལ་མི་མཐུན་པ་ཡོད་དེ། སེམས་ཙམ་པས། གཟུགས་ཕྱི་རོལ་གྱི་དོན་གྱིས་སྟོང་པ་དང་། ངོ་བོ་དང་ཁྱད་པར་ལ་ཀུན་བརྟགས་པའི་ཀུན་བརྟགས་རང་གི་མཚན་ཉིད་ཀྱིས་མ་གྲུབ་པ། དོན་དམ་བདེན་པའི་མཚན་གཞིར་འདོད་ལ། རང་རྒྱུད་པས་དེ་ལྟར་མི་བྱེད་དོ། །གཞན་ཡང་འདི་པས་དོན་དམ་བདེན་པ་ཐམས་ཅད་བདེན་གྲུབ་ཏུ་འདོད་པ་ཡིན་ཏེ། དེས་ཡོངས་གྲུབ་དང་གཞན་དབང་གང་རུང་ཡིན་ཞིང་། བདེན་གྲུབ་ཡིན་པས་ཁྱབ་པར་བཞེད་པའི་ཕྱིར། ཡོངས་གྲུབ་རྣམས་ནི་གནས་ལུགས་མཐར་ཐུག་ཡིན་པས་ན་བདེན་གྲུབ་དང་། གཞན་དབང་རྣམས་ཀྱིས་རང་གི་འབྲས་བུ་བསྐྱེད་པའི་དོན་བྱེད་ནུས་པས་ན་བདེན་གྲུབ་ཏུ་བཞེད་པའི་ཕྱིར་རོ། །བཞི་པ་དབུ་མ་པར། རང་རྒྱུད་པའི་འདོད་པ་ཕལ་ཆེར་ཐལ་འགྱུར་བ་དང་འདྲ་ཡང་། རྣམ་པ་གཅིག་ཏུ་ན། ཁྱོད་གང་གིས་རྙེད་པའི་ཚད་མ་ལ་ལྟོས་ཏེ་མཐར་ཐུག་དཔྱོད་པའི་རིག་ཤེས་ཚད་མར་སོང་བ་དོན་དམ་དང་། ཁྱོད་གང་གིས་རྙེད་པའི་ཚད་མ་ལ་ལྟོས་ཏེ་ཐ་སྙད་དཔྱོད་པའི་རིག་ཤེས་ཚད་མར་སོང་བ། ཀུན་རྫོབ་བདེན་པའི་མཚན་ཉིད་དུ་འདོད། མཚན་གཞི་ནི་གཟུགས་སོགས་བློས་གཅོད་མེད་སྣང་བའི་དབང་གིས་བཞག་ཙམ་དུ་གྲུབ་པ་དེ། ཀུན་རྫོབ་བདེན་པ་དང་། དེའི་དབང་གིས་བཞག་ཙམ་མ་ཡིན་པར་ཡུལ་རང་གི་སྡོད་ལུགས་ཀྱི་ངོས་ནས་མ་གྲུབ་པ་དེ། དོན་དམ་བདེན་པའི་མཚན་གཞིར་འདོད་ཅིང་། གཞན་ཡང་ཀུན་རྫོབ་ལ། རང་ཉིད་གཙོ་བོར་སྣང་ཡུལ་དུ་བྱེད་པའི་བློ་ལ་སྣང་བ་དེ་ལྟར་གྲུབ་པའི་ཀུན་རྫོབ་ཡང་དག་ཀུན་རྫོབ་ཀྱི་མཚན་ཉིད། མཚན་གཞི་ནི་ཆུ་དང་། ཀ་བུམ་ལྟ་བུ་དང་། འདུས་མ་བྱས་དང་། ཤེས་པ་རྣམས་དང་། ཁ་དོག་ཐམས་ཅད་ལྟ་བུའོ། །རང་ཉིད་གཙོ་བོར་སྣང་ཡུལ་དུ་བྱེད་པའི་བློ་ལ་སྣང་བ་དེ་ལྟར་མ་གྲུབ་པར། ལོག་པའི་ཀུན་རྫོབ་ཀྱི་མཚན་ཉིད། མཚན་གཞི་ནི། སྨིག་རྒྱུའི་ཆུ། མེ་ལོང་གི་གཟུགས་བརྙན། སྒྱུ་མའི་རྟ་གླང་། རྨི་ལམ་གྱི་མི་ལྟ་བུའོ། །གཞན་ཡང་ཐལ་རང་གཉིས་ཀྱི་བདེན་པ་གཉིས་ཀྱི་ཁྱད་པར་ལ་དབྱེ་བ་ཕྲ་མོ་མང་ངོ་། །ཐལ་འགྱུར་བས་དབྱེ་གཞི་ཤེས་བྱ་ལ། དབྱེ་ངོ་བདེན་པ་གཉིས་སུ་གྲངས་ངེས་ཤིང་། དེ་ཡང་བདེན་རྫུན་གཉིས་སུ་གྲངས་ངེས་པ་གང་ཞིག །གཞི་གཅིག་གི་སྟེང་དུ་བདེན་པ་རྣམ་གཅོད་ལ་ཁེགས་ན་བརྫུན་པ་ཡིན་པ་ཡོངས་གཅོད་ལ་གྲུབ། བརྫུན་པ་ཡོངས་གཅོད་ལ་གྲུབ་ན་བདེན་པ་རྣམ་གཅོད་ལ་ཁེགས་པའི་ཕྱིར་ཏེ། དེ་གཉིས་ཕན་ཚུན་སྤངས་འགལ་གྱི་དངོས་འགལ་ཡིན་པའི་ཕྱིར་རོ། །ཆོས་ཐམས་ཅད་ཀྱི་སྟེང་དུ་རང་བཞིན་གྱིས་མེད་པ་དོན་དམ་དང་། ཐ་སྙད་དུ་ཡོད་པ་ཀུན་རྫོབ་པའི་ངོ་བོ་གཉིས་ཡོད་པ་ཡིན་པས་ན། རང་ཉིད་འཇལ་བའི་མཐར་ཐུག་དཔྱོད་པའི་རིག་ཤེས་ཚད་མས་རྙེད་དོན། དོན་དམ་བདེན་པའི་མཚན་ཉིད། མཚན་གཞི་ནི་མྱུ་གུ་རང་བཞིན་གྱིས་མེད་པ་ལྟ་བུ། མཐར་ཐུག་དཔྱོད་པའི་ཚད་མ་ནི། དོན་དམ་དཔྱོད་བྱེད་ཀྱི་ཚད་མ་ཡིན་ལ། དེའང་གཟུགས་སོགས་ཀྱི་དོན་དམ་པའི་གནས་ལུགས་མཐོང་བའི་ཚད་མ་ཞིག་ལ་བྱེད་པ་སྟེ། འོན་ཀྱང་སངས་རྒྱས་འཕགས་པའི་རྒྱུད་ཀྱི་དོན་དམ་དཔྱོད་པའི་ཚད་མའི་རྙེད་དོན་ལ། སྤྱིར་དོན་དམ་དཔྱོད་པའི་ཚད་མའི་རྙེད་དོན་ཡིན་པས་མ་ཁྱབ་བྱས་ན་བདེའོ། །དོན་དམ་བདེན་པའི་ངོ་བོའམ་སྟོང་གཞིའི་སྒོ་ནས་དབྱེ་ན་གང་ཟག་གི་བདག་མེད་ཕྲ་མོ་དང་། ཆོས་ཀྱི་བདག་མེད་ཕྲ་མོ་གཉིས་སམ། སྟོང་ཉིད་བཅུ་དྲུག་གམ། སྒྲས་བརྗོད་རིགས་ཀྱི་སྒོ་ནས་དབྱེ་ན། རྣམ་གྲངས་པ་དང་། རྣམ་གྲངས་མ་ཡིན་པའི་དོན་དམ་བདེན་པ་གཉིས་སོ། །ཐ་སྙད་དཔྱོད་པའི་ཚད་མའི་རྙེད་དོན་ཀུན་རྫོབ་བདེན་པའི་མཚན་ཉིད། མཚན་གཞི་ནི་མྱུ་གུ་ལྟ་བུ། ཐ་སྙད་དཔྱོད་པའི་ཚད་མ་ནི་ཀུན་རྫོབ་དཔྱོད་བྱེད་ཀྱི་ཚད་མའོ། །དེ་ལ་དབྱེ་ན། ལུགས་འདིར་སྤྱིར་ཡང་ལོག་གི་དབྱེ་བ་མི་བྱེད་ཀྱང་། འཇིག་རྟེན་ཤེས་ངོ་ལ་ལྟོས་ནས་དབྱེ་སྟེ། དེ་ཡང་ཡུལ་ཅན་གྱི་བློ་ཕུག་འཁྲུལ་རྒྱུ་མ་རིག་པས་བསླད་པར་མཚུངས་ཀྱང་། འཕྲལ་གྱི་འཁྲུལ་རྒྱུས་བསླད་མ་བསླད་ཀྱི་དབང་གིས་དེ་ལྟར་བཞག་པའི་ཕྱིར་རོ། །སྤྱིར་དང་པོ་ནི། མཐུན་པའི་ཡུལ་དང་། ཡུལ་ཅན་དོན་དམ་བདེན་པ་གཉིས། དང་པོ་ནི། མྱུ་གུ་བདེན་སྟོང་སྒྱུ་མ་བཞིན་དུ་སྣང་བའི་ཆ་ལྟ་བུ། གཉིས་པ་ནི། དེ་རྟོགས་པའི་རྗེས་དཔག་ཚད་མ་ལྟ་བུ། འདི་གཉིས་དོན་དམ་བདེན་པ་བཏགས་པ་ཙམ་ལས་དངོས་མིན། ཕྱི་མ་ལའང་སྒྲས་བརྗོད་རིགས་ཀྱིས་དབྱེ་ན། ཡུལ་དང་ཡུལ་ཅན་དོན་དམ་བདེན་པ་གཉིས། དང་པོ་ནི། སྟོང་ཉིད་ལྟ་བུ་སྟེ། དོན་དམ་བདེན་པ། ཇི་ལྟ་བ། སྟོང་ཉིད། ཡོངས་གྲུབ། ཡང་དག་མཐའ། ཆོས་དབྱིངས་རྣམས་དོན་གཅིག །གཉིས་པ་ནི། སློབ་པའི་རྒྱུད་ཀྱི་སྟོང་ཉིད་མངོན་སུམ་རྟོགས་པའི་ཡེ་ཤེས་ལྟ་བུ་སྟེ། འདི་རྣམ་གྲངས་མ་ཡིན་པའི་དོན་དམ་དངོས་ཡིན་ཅེས་ཁ་ཅིག་བཞེད་ཀྱང་། དོན་དམ་དངོས་ནི་མིན་ནོ། །ཀུན་རྫོབ་ལ་དབྱེ་བ་མི་བྱེད་དེ། ཀུན་རྫོབ་ལ་སྣང་བ་ལྟར་གྲུབ་མ་གྲུབ་གཉིས་ཀྱི་དབྱེ་བ་མེད་པའི་ཕྱིར་ཏེ། ཀུན་རྫོབ་ཡིན་ན་སྣང་བ་ལྟར་མ་གྲུབ་པས་ཁྱབ་པའི་ཕྱིར་རོ། །སྒྲ་དོན་ནི། བུམ་པ་བདེན་སྟོང་དེ་ལ་དོན་དམ་བདེན་པ་ཞེས་བརྗོད་པའི་རྒྱུ་མཚན་ཡོད་དེ། དེ་བློ་དོན་དམ་སྟོང་ཉིད་མངོན་སུམ་དུ་རྟོགས་པའི་མཉམ་གཞག་ཡེ་ཤེས་ཀྱི་གཟིགས་ངོར་བདེན་ཅིང་དོན་དམ་པར་བདེན་པ་ན་དེ་སྐད་བརྗོད་པའི་ཕྱིར། མཉམ་གཞག་གི་ཡེ་ཤེས་དེར་ཡུལ་ཅན་དོན་དམ་ཞེས་བརྗོད་པའི༴ ཡུལ་དོན་དམ་གྱི་བདེན་པ་ཇི་ལྟ་བ་བཞིན་གཟིགས་པའི་རྒྱུ་མཚན་གྱིས་དེ་ལྟར་བརྗོད་པའི་ཕྱིར། བུམ་པ་དེ་ལ་ཀུན་རྫོབ་ཀྱི་བདེན་པ་ཞེས་བརྗོད་པའི་རྒྱུ་མཚན༴ བློ་ཀུན་རྫོབ་ཀྱི་བདེན་འཛིན་ངོར་བདེན་ཡང་། དོན་དམ་གནས་ཚོད་ལ་བརྫུན་པས་དེ་ལྟར་བརྗོད་པའི་ཕྱིར། བདེན་འཛིན་ལ་ཀུན་རྫོབ་ཅེས་བརྗོད་པའི༴ དེ་ཁོ་ན་མཐོང་བ་ལ་སྒྲིབ་པར་བྱེད་པའི་ཕྱིར། བདེན་གཉིས་ངོ་བོ་ཐ་དད་པར་མི་རུང་སྟེ་འབྲེལ་མེད་དོན་གཞན་དུ་འགྱུར་བའི་ཕྱིར། བུམ་པ་བདེན་སྟོང་བསྒོམས་པས་བདེན་འཛིན་སྤོང་མི་ནུས་པར་ཐལ། ཐ་དད་གཏན་མེད་ཀྱི་གཅིག་པ་མ་ཡིན་ཏེ། དེ་ལྟར་ན་བུམ་པ་མཐོང་བས་ཀྱང་བུམ་པའི་ཆོས་ཉིད་མངོན་སུམ་དུ་རྟོགས་པར་ཐལ། འདོད་ན། སོ་སྐྱེས་མིག་ཤེས་ཀྱིས་ཀྱང་སྟོང་ཉིད་མངོན་སུམ་དུ་རྟོགས་པར་ཐལ། འདོད་མི་ནུས་ཏེ། འཕགས་ལམ་བསྐྱེད་པ་དོན་མེད་དུ་འགྱུར་བའི་ཕྱིར་རོ། །དེས་ན་བདེན་གཉིས་ངོ་བོ་གཅིག་ལ་ལྡོག་པ་ཐ་དད་མེད་ཅིང་། མེད་ན་མི་འབྱུང་བའི་འབྲེལ་པར་གྲུབ་པ་ཡིན་ལ། ཆོས་ཐམས་ཅད་རང་བཞིན་གྱིས་སྟོང་པ་དང་། དེའང་དེ་རྣམས་ཀྱི་སྟེང་ནས་འཇོག་པར་ཤེས་དགོས་སོ། །དེ་ལྟར་བདེན་གཉིས་ཀྱི་རྣམ་གཞག་ཤེས་པ་ལ་དགོས་པ་ཡོད་དེ། རྒྱལ་བའི་གསུང་རབས་ཀྱི་དགོངས་པ་ཤེས་ཏེ་ཚོགས་རྫོགས་ནས་འཚང་རྒྱ་བ་དང་། ཐ་སྙད་ཀྱི་ཀུན་རྫོབ་ཀྱི་འཇོག་ཚུལ་ལ་བརྟེན་ནས་དོན་དམ་པ་རྟོགས་པར་འགྱུར་བ་དང་། གཞི་བདེན་གཉིས་ཀྱི་རྣམ་གཞག་ཤེས་ནས་ལམ་ཚོགས་གཉིས་བསགས་པས་འབྲས་བུ་སྐུ་གཉིས་གྲུབ་པར་འབྲེལ་བའི་ཕྱིར། མ་ཤེས་པ་ལ་སྐྱོན་ཡོད་དེ། དཔལ་ལྡན་ཟླ་བས། ཐ་སྙད་བདེན་པ་ཐབས་སུ་གྱུར་པ་དང་། །དོན་དམ་བདེན་པ་ཐབས་བྱུང་གྱུར་པ་སྟེ། །དེ་གཉིས་རྣམ་དབྱེ་གང་གིས་མི་ཤེས་པས། །དེ་ནི་རྣམ་རྟོག་ལོག་པའི་ལམ་ངན་ཞུགས། །ཞེས་གསུངས་པའི་ཕྱིར། དེས་ན་བདེན་གཉིས་ཀྱི་གནས་ཚུལ་ལུང་དང་རིགས་པ་དུ་མས་གཏན་ལ་དབབ་པ་ཤིན་ཏུ་གཅེས་སོ། །ཞེས་པའང་ཉེར་མཁོའི་ལེའུ་ཚན་ནོ། །ཤུ་བྷཾ།། །། ༈

[edit]

grub mtha' bzhi'i bden gnyis kyi legs bshad snying po'i rgyan/ grub mtha' bzhi'i bden gnyis kyi legs bshad snying po'i rgyan ces bya ba bzhugs so/__/na mo mu nin+hA ya/__bden pa gnyis kyi rnam gzhag cung zad 'chad na bzhi ste/__dang po bye smra bas/__mdzod las/__bcom pa'am blos gzhig pa na der 'dzin gyi blo 'dor du rung ba'i chos/__kun rdzob bden pa'i mtshan nyid/__mtshan gzhi ni bum pa dang bum nang gi chu lta bu ste/__bum pa ni rdul dang bcom pa na bum pa'i blo mi 'jug la/__chu ni blos rdul rdzas kyi chos gzhan bsal bas ni blo mi 'jug pa ste/__ka ba la sogs pa la'ang mtshon no/__/bcom pa'am blos gzhig pa na der 'dzin gyi blo 'dor du mi rung ba'i chos/__don dam bden pa'i mtshan nyid/__de'i mtshan gzhi ni/__gzugs dang /__rdul phra rab dang /__'dus ma byas lta bu ste/__gzugs de rdul du bshig kyang gzugs kyi blo mi 'dor la/__rdul phra rab ni de las shin tu bshig rgyu med cing /__'dus ma byas pa tsam blos gzhig kyang de las ma 'das so/__/gnyis pa mdo sde pas rnam 'grel las/__don dam byed pa nus pa gang /__/de 'dir don dam yod pa yin/__/gzhan ni kun rdzob yod pa ste/__/de dag rang spyi'i mtshan nyid bshad/__/ces pas/__don dam par don byed nus pa'i chos don dam bden pa'i mtshan nyid/__mtshan gzhi ni bum pa dang ka ba la sogs pa lta bu ste/__lugs 'dir don dam bden pa/__mi rtag pa/__dngos po/__'dus byas/__rang mtshan rnams don gcig ming gi rnam grangs/__phan gnod sogs kyi don byed nus pa zhig don dam bden par 'dod de/__de yang dngos po rnams bden grub tu 'dod pa'i dbang gis yin no/__don dam par don byed mi nus pa'i chos/__kun rdzob bden pa'i mtshan nyid/__mtshan gzhi ni/__nam mkha' dang chos gang yin kyang de dang gcig dang tha dad sogs kun brtags kyi rigs rnams lta bu ste/__kun rdzob bden pa/__rtag pa dngos med kyi chos/__'dus ma byas/__spyi mtshan rnams don gcig cing /__lugs 'dir 'dus ma byas ma yin pa'i chos thams cad kun rdzob kyi bden pa yin pas/__stong nyid kyang kun rdzob kyi bden pa'o/__/gsum pa sems tsam pas ni/__bden gnyis so so'i mtshan nyid/__dbye ba sogs phal cher rang rgyud pa dang mthun pa yod kyang /__mtshan gzhi la mi mthun pa yod de/__sems tsam pas/__gzugs phyi rol gyi don gyis stong pa dang /__ngo bo dang khyad par la kun brtags pa'i kun brtags rang gi mtshan nyid kyis ma grub pa/__don dam bden pa'i mtshan gzhir 'dod la/__rang rgyud pas de ltar mi byed do/__/gzhan yang 'di pas don dam bden pa thams cad bden grub tu 'dod pa yin te/__des yongs grub dang gzhan dbang gang rung yin zhing /__bden grub yin pas khyab par bzhed pa'i phyir/__yongs grub rnams ni gnas lugs mthar thug yin pas na bden grub dang /__gzhan dbang rnams kyis rang gi 'bras bu bskyed pa'i don byed nus pas na bden grub tu bzhed pa'i phyir ro/__/bzhi pa dbu ma par/__rang rgyud pa'i 'dod pa phal cher thal 'gyur ba dang 'dra yang /__rnam pa gcig tu na/__khyod gang gis rnyed pa'i tshad ma la ltos te mthar thug dpyod pa'i rig shes tshad mar song ba don dam dang /__khyod gang gis rnyed pa'i tshad ma la ltos te tha snyad dpyod pa'i rig shes tshad mar song ba/__kun rdzob bden pa'i mtshan nyid du 'dod/__mtshan gzhi ni gzugs sogs blos gcod med snang ba'i dbang gis bzhag tsam du grub pa de/__kun rdzob bden pa dang /__de'i dbang gis bzhag tsam ma yin par yul rang gi sdod lugs kyi ngos nas ma grub pa de/__don dam bden pa'i mtshan gzhir 'dod cing /__gzhan yang kun rdzob la/__rang nyid gtso bor snang yul du byed pa'i blo la snang ba de ltar grub pa'i kun rdzob yang dag kun rdzob kyi mtshan nyid/__mtshan gzhi ni chu dang /__ka bum lta bu dang /__'dus ma byas dang /__shes pa rnams dang /__kha dog thams cad lta bu'o/__/rang nyid gtso bor snang yul du byed pa'i blo la snang ba de ltar ma grub par/__log pa'i kun rdzob kyi mtshan nyid/__mtshan gzhi ni/__smig rgyu'i chu/__me long gi gzugs brnyan/__sgyu ma'i rta glang /__rmi lam gyi mi lta bu'o/__/gzhan yang thal rang gnyis kyi bden pa gnyis kyi khyad par la dbye ba phra mo mang ngo /__/thal 'gyur bas dbye gzhi shes bya la/__dbye ngo bden pa gnyis su grangs nges shing /__de yang bden rdzun gnyis su grangs nges pa gang zhig__/gzhi gcig gi steng du bden pa rnam gcod la khegs na brdzun pa yin pa yongs gcod la grub/__brdzun pa yongs gcod la grub na bden pa rnam gcod la khegs pa'i phyir te/__de gnyis phan tshun spangs 'gal gyi dngos 'gal yin pa'i phyir ro/_/chos thams cad kyi steng du rang bzhin gyis med pa don dam dang /__tha snyad du yod pa kun rdzob pa'i ngo bo gnyis yod pa yin pas na/__rang nyid 'jal ba'i mthar thug dpyod pa'i rig shes tshad mas rnyed don/__don dam bden pa'i mtshan nyid/__mtshan gzhi ni myu gu rang bzhin gyis med pa lta bu/__mthar thug dpyod pa'i tshad ma ni/__don dam dpyod byed kyi tshad ma yin la/__de'ang gzugs sogs kyi don dam pa'i gnas lugs mthong ba'i tshad ma zhig la byed pa ste/__'on kyang sangs rgyas 'phags pa'i rgyud kyi don dam dpyod pa'i tshad ma'i rnyed don la/__spyir don dam dpyod pa'i tshad ma'i rnyed don yin pas ma khyab byas na bde'o/__/don dam bden pa'i ngo bo'am stong gzhi'i sgo nas dbye na gang zag gi bdag med phra mo dang /__chos kyi bdag med phra mo gnyis sam/__stong nyid bcu drug gam/__sgras brjod rigs kyi sgo nas dbye na/__rnam grangs pa dang /__rnam grangs ma yin pa'i don dam bden pa gnyis so/__/tha snyad dpyod pa'i tshad ma'i rnyed don kun rdzob bden pa'i mtshan nyid/__mtshan gzhi ni myu gu lta bu/__tha snyad dpyod pa'i tshad ma ni kun rdzob dpyod byed kyi tshad ma'o/__/de la dbye na/__lugs 'dir spyir yang log gi dbye ba mi byed kyang /__'jig rten shes ngo la ltos nas dbye ste/__de yang yul can gyi blo phug 'khrul rgyu ma rig pas bslad par mtshungs kyang /__'phral gyi 'khrul rgyus bslad ma bslad kyi dbang gis de ltar bzhag pa'i phyir ro/__/spyir dang po ni/__mthun pa'i yul dang /__yul can don dam bden pa gnyis/__dang po ni/__myu gu bden stong sgyu ma bzhin du snang ba'i cha lta bu/__gnyis pa ni/__de rtogs pa'i rjes dpag tshad ma lta bu/__'di gnyis don dam bden pa btags pa tsam las dngos min/__phyi ma la'ang sgras brjod rigs kyis dbye na/__yul dang yul can don dam bden pa gnyis/__dang po ni/__stong nyid lta bu ste/__don dam bden pa/__ji lta ba/__stong nyid/__yongs grub/__yang dag mtha'/__chos dbyings rnams don gcig__/gnyis pa ni/__slob pa'i rgyud kyi stong nyid mngon sum rtogs pa'i ye shes lta bu ste/__'di rnam grangs ma yin pa'i don dam dngos yin ces kha cig bzhed kyang /__don dam dngos ni min no/__/kun rdzob la dbye ba mi byed de/__kun rdzob la snang ba ltar grub ma grub gnyis kyi dbye ba med pa'i phyir te/__kun rdzob yin na snang ba ltar ma grub pas khyab pa'i phyir ro/__/sgra don ni/__bum pa bden stong de la don dam bden pa zhes brjod pa'i rgyu mtshan yod de/__de blo don dam stong nyid mngon sum du rtogs pa'i mnyam gzhag ye shes kyi gzigs ngor bden cing don dam par bden pa na de skad brjod pa'i phyir/__mnyam gzhag gi ye shes der yul can don dam zhes brjod pa'i=__yul don dam gyi bden pa ji lta ba bzhin gzigs pa'i rgyu mtshan gyis de ltar brjod pa'i phyir/__bum pa de la kun rdzob kyi bden pa zhes brjod pa'i rgyu mtshan=__blo kun rdzob kyi bden 'dzin ngor bden yang /__don dam gnas tshod la brdzun pas de ltar brjod pa'i phyir/__bden 'dzin la kun rdzob ces brjod pa'i=__de kho na mthong ba la sgrib par byed pa'i phyir/__bden gnyis ngo bo tha dad par mi rung ste 'brel med don gzhan du 'gyur ba'i phyir/__bum pa bden stong bsgoms pas bden 'dzin spong mi nus par thal/__tha dad gtan med kyi gcig pa ma yin te/__de ltar na bum pa mthong bas kyang bum pa'i chos nyid mngon sum du rtogs par thal/__'dod na/__so skyes mig shes kyis kyang stong nyid mngon sum du rtogs par thal/__'dod mi nus te/__'phags lam bskyed pa don med du 'gyur ba'i phyir ro/__/des na bden gnyis ngo bo gcig la ldog pa tha dad med cing /__med na mi 'byung ba'i 'brel par grub pa yin la/__chos thams cad rang bzhin gyis stong pa dang /__de'ang de rnams kyi steng nas 'jog par shes dgos so/__/de ltar bden gnyis kyi rnam gzhag shes pa la dgos pa yod de/__rgyal ba'i gsung rabs kyi dgongs pa shes te tshogs rdzogs nas 'tshang rgya ba dang /__tha snyad kyi kun rdzob kyi 'jog tshul la brten nas don dam pa rtogs par 'gyur ba dang /__gzhi bden gnyis kyi rnam gzhag shes nas lam tshogs gnyis bsags pas 'bras bu sku gnyis grub par 'brel ba'i phyir/__ma shes pa la skyon yod de/__dpal ldan zla bas/__tha snyad bden pa thabs su gyur pa dang /__/don dam bden pa thabs byung gyur pa ste/__/de gnyis rnam dbye gang gis mi shes pas/__/de ni rnam rtog log pa'i lam ngan zhugs/__/zhes gsungs pa'i phyir/__des na bden gnyis kyi gnas tshul lung dang rigs pa du mas gtan la dbab pa shin tu gces so/__/zhes pa'ang nyer mkho'i le'u tshan no/__/shu b+haM//____//__!_