JKW-KABAB-12-NA-021

🚧 This website is under continued development. We appreciate your patience!

Previous Text Back to Volume PageNext Text

Wylie title	dpal rta mgrin gnyen po lha lnga snyan brgyud snying po'i yang zhun
Location	mkhyen brtse'i bka' babs Volume 12, Text 21, Pages 655-667 (Folios 1a to 7a1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	མཆོག་ལྡན་མགོན་པོ་, འཇམ་དབྱངས་མཁྱེན་བརྩེའི་དབང་པོ་ (mchog ldan mgon po, 'jam dbyangs mkhyen brtse'i dbang po)
Citation	'jam dbyangs mkhyen brtse'i dbang po. dpal rta mgrin gnyen po lha lnga snyan brgyud snying po'i yang zhun. In Rdzong sar 'jam dbyangs mkhyen brtse'i dbang po'i bka' babs, Vol. 12: 655-667. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Revelations - gter ma  ·  Root Treasure - gter gzhung
Cycle	དཔལ་རྟ་མགྲིན་གཉེན་པོ་ལྷ་ལྔ་ (dpal rta mgrin gnyen po lha lnga)
Karchag page	JKW-KABAB-Volume-12-NA-Karchag
RTZ	In the Rinchen Terdzö: https://rtz.tsadra.org/index.php/Terdzo-MI-030
Colophon	ལོ་ཆེན་བཻ་རོའི་ཐུགས་སྤྲུལ་རིག་འཛིན་མཆོག་ལྡན་མགོན་པོའམ་སྤྲུལ་པའི་གཏེར་ཆེན་ཨོ་རྒྱན་མདོ་སྔགས་གླིང་པ་ལ་གུ་རུ་རིན་པོ་ཆེས་སྙན་བརྒྱུད་དུ་སྩལ་བ་ཉིད། སླད་ཆར་པདྨ་འོད་གསལ་མདོ་སྔགས་གླིང་པ་ལ་གཏེར་སྟོན་ཉིད་ཀྱི་སྐུས་སྙན་བརྒྱུད་དུ་གདམས་ཏེ་གཏན་ལ་ཕབ་ནས་རིག་འཛིན་མཁའ་འགྲོའི་བརྡས་བསྐུལ་བ་ལྟར། ཁོ་བོ་འཆི་མེད་བསྟན་གཉིས་གཡུང་དྲུང་གླིང་པ་ལ་སྨིན་གྲོལ་ཚང་སྤྲུགས་སུ་སྩལ་ཏེ་བར་ཆད་ཀྱི་འཕྲང་བསལ་བར་མཛད་པས་བཀའ་དྲིན་བསམ་གྱིས་མི་ཁྱབ་པ་ཐོབ་པའོ། །དགེ་ལེགས་འཕེལ།།
	lo chen bai ro'i thugs sprul rig 'dzin mchog ldan mgon po'am sprul pa'i gter chen o rgyan mdo sngags gling pa la gu ru rin po ches snyan brgyud du stsal ba nyid/__slad char pad+ma 'od gsal mdo sngags gling pa la gter ston nyid kyi skus snyan brgyud du gdams te gtan la phab nas rig 'dzin mkha' 'gro'i brdas bskul ba ltar/__kho bo 'chi med bstan gnyis g.yung drung gling pa la smin grol tshang sprugs su stsal te bar chad kyi 'phrang bsal bar mdzad pas bka' drin bsam gyis mi khyab pa thob pa'o/__/dge legs 'phel

Tibetan Text

Wylie

[edit]

༁ྃ༔ དཔལ་རྟ་མགྲིན་གཉེན་པོ་ལྷ་ལྔ་སྙན་བརྒྱུད་སྙིང་པོའི་ཡང་ཞུན་བཞུགས་སོ༔ ༔

༁ྃ༔ ཧེ་རུ་ཀ་ལ་ཕྱག་འཚལ་ལོ༔ ཨེ་མ་སྐལ་ལྡན་པདྨའི་བུ༔ བསྟན་འགྲོའི་དོན་ཆེན་སྒྲུབ་པ་ལེགས༔ འོན་ཀྱང་མཐའ་དམག་གདུག་པ་ཡི༔ གཉེན་པོ་ལས་ལ་སྦྱར་བའི་ཚེ༔ ནགས་ཕྱོགས་གཟའ་ཀླུ་རྒྱལ་གསུམ་དང་༔ བདུད་བཞིའི་ཚོགས་རྣམས་རབ་ཏུ་འཁྲུགས༔ གློ་བུར་ཚེ་ལ་བར་ཆད་འབྱུང་༔ དེ་རྣམས་གཉེན་པོ་སྟོབས་ཀྱི་ལྷ༔ ཨོ་རྒྱན་བདག་གི་ཐུགས་བཅུད་འདི༔ ཡལ་བར་མ་དོར་ཉམས་སུ་ལོང་༔ རང་གཞན་དོན་ཆེན་འགྲུབ་པར་ངེས༔ ས་མ་ཡ༔ སྐྱབས་འགྲོ་སེམས་བསྐྱེད་ཚོགས་བསག་དང་༔ བགེགས་བསྐྲད་མཚམས་གཅོད་བྱིན་རླབས་སོགས༔ ལས་རིམ་སྤྱི་ལྟར་སྔོན་འགྲོ་བས༔ དངོས་གཞི་བསྐྱེད་པའི་རིམ་པ་ནི༔ ཧཱུྃ༔ དེ་བཞིན་ཉིད་དབྱིངས་མ་བཅོས་འོད་གསལ་གདངས༔ དམིགས་མེད་བརྩེ་བའི་ཆོ་འཕྲུལ་ཧཱུྃ་མཐིང་གའི༔ རིག་རྩལ་རོལ་པས་སྣོད་བཅུད་སྟོང་པར་སྦྱངས༔ སྟོང་པའི་ངང་ནས་མཁའ་ལས་འཇའ་ཚོན་ལྟར༔ འབྱུང་བ་རིམ་བརྩེགས་རྡོ་རྗེའི་རི་རབ་དང་༔ མི་ཕྱེད་སྲུང་འཁོར་དུར་ཁྲོད་གཞལ་མེད་དབུས༔ སྣ་ཚོགས་པདྨ་ཉི་མའི་དཀྱིལ་འཁོར་དང་༔ བདུད་བཞི་དྲེགས་པ་གཟའ་ཀླུ་རྒྱལ་འགོང་སོགས༔ འདར་ཞིང་འདུད་པ་བྱི་ཆིངས་བསྣོལ་བའི་སྟེང་༔ རིག་པ་ཧཱུྃ་ལས་བདག་ཉིད་རྩ་བའི་ལྷ༔ རིག་འཛིན་འཆོལ་བའི་ཁྲོ་རྒྱལ་གྲོ་བོ་ལོད༔ ཡཀྴ་ཀཱ་ལ་དཔལ་ཆེན་རྟ་མགྲིན་རྒྱལ༔ སྐུ་མདོག་དུས་མཐའི་ཆར་སྤྲིན་འཁྲུགས་པའི་མདངས༔ ཞལ་གདངས་མཆེ་གཙིགས་སྤྱན་གསུམ་དམར་ལ་ཟླུམ༔ སྨ་ར་སྨིན་མ་ཨག་ཚོམ་མེ་ལྟར་འབར༔ ཁྲོ་གཉེར་རབ་བསྡུས་ལྗགས་འདྲིལ་ཧཱུྃ་སྒྲ་སྒྲོགས༔ དར་ནག་བེར་གསོལ་དུར་ཁྲོད་ཆས་ཀྱིས་བརྒྱན༔ ཕྱག་གཡས་གནམ་ལྕགས་རྡོ་རྗེ་རྭ་དགུ་པ༔ སྡིགས་པའི་མཛུབ་མོས་ནམ་མཁའི་དབྱིངས་སུ་བསྒྲེངས༔ རྩེ་ལས་གདུག་པ་ཀླུ་གདོན་འདུལ་བའི་གཉེན༔ ཡེ་ཤེས་ཁྱུང་ཆེན་མཐིང་ནག་ཁྲ་ཐབས་འཕྲོ༔ ཕྱག་གཡོན་རི་རབ་ཕུར་བུ་གསོལ་བ་ལས༔ བར་ཆད་བདུད་འདུལ་བཛྲ་ཀཱི་ལ་ཡ༔ ལྗང་ནག་ཕུར་བུ་འདྲིལ་བ་རླུང་ལྟར་འཚུབས༔ སྤྱི་གཙུག་རྟ་གདོང་ལྗང་ཞུར་འཚེར་བ་ཡིས༔ འཇིག་རྟེན་ཁམས་ཀུན་ཤིག་ཤིག་ཡོམ་ཡོམ་འགུལ༔ རྔོག་མ་དམར་པོ་མེ་འབར་ཐིག་ལེའི་དབུས༔ པད་ཉིའི་སྟེང་དུ་དུས་མིན་འཆི་བ་ཡི༔ གཉེན་པོའི་ལྷ་མཆོག་བཅོམ་ལྡན་ཚེ་དཔག་མེད༔ ཁྲོས་པའི་སྐུར་བཞེངས་པདྨ་ཧེ་རུ་ཀ༔ ཕྱག་གཡས་པདྨ་དམར་པོས་ཚེ་བཅུད་སྡུད༔ གཡོན་པས་ཚེ་བུམ་སྒྲུབ་ལ་དངོས་གྲུབ་སྩལ༔ དར་དང་རིན་ཆེན་རུས་པའི་ཕྱག་རྒྱས་སྤྲས༔ རང་འོད་ཡུམ་འཁྱུད་ཞབས་གཉིས་སྐྱིལ་ཀྲུང་བཞུགས༔ ཐུགས་ཀར་པདྨ་ཉི་མའི་གདན་གྱི་སྟེང་༔ ཡེ་ཤེས་སེམས་དཔའ་ཀླུ་གཤེད་གསང་བའི་བདག༔ རྡོ་རྗེ་སྡིགས་མཛུབ་མཐིང་ནག་ཁྲོ་ཆས་རྫོགས༔ རང་བྱུང་རིག་པ་འོད་སྐུར་ལམ་མེར་གསལ༔ བདག་ཉིད་རྒྱལ་འགོང་དམ་སྲི་འབྱུང་པོའི་གཤེད༔ ཞབས་ཟུང་དོར་སྟབས་དྲག་མེ་འཁྲུགས་པའི་ཀློང་༔ རབ་འབྱམས་ཁྲོ་བོའི་སྤྲུལ་པ་སྤྲོ་ཞིང་བསྡུ༔ དེ་ལྟར་གསལ་བའི་ལྷ་ཚོགས་ཐམས་ཅད་ཀྱི༔ གནས་གསུམ་རྡོ་རྗེ་གསུམ་གྱི་ཡི་གེས་མཚན༔ ཡེ་ཤེས་དབང་བསྐུར་རིགས་ལྔའི་ཕྱག་རྒྱས་བརྒྱན༔ ཕུང་ཁམས་སྐྱེ་མཆེད་ཁྲག་འཐུང་ཕྱག་རྒྱར་རྫོགས༔ ཨོཾ་ཨཱཿཧཱུྃ་བཛྲ་ཀཱ་ཝཱ་ཙི་ཨཱཏྨ་ཀོ྅་ཧཾ༔ ཧཱུྃ་ཨོཾ་ཏྲཱྃ་ཧྲཱིཿཨཱཿ ཨ་བྷི་ཥིཉྩ་སུ་ར་ཏ་སྟྭཾ་ཨ་ཧཾ༔ ཧཱུྃ༔ ཆོས་དབྱིངས་སྐྱེ་བ་མེད་པའི་ངང་ཉིད་ལས༔ འབར་བའི་སྐུར་བཞེངས་གཉེན་པོ་སྟོབས་ཀྱི་ལྷ༔ ཁྲག་འཐུང་རིགས་ལྔའི་ལྷ་ཚོགས་གནས་འདིར་གཤེགས༔ དབང་སྐུར་བྱིན་ཕོབ་མཐུ་རྩལ་དངོས་གྲུབ་སྩོལ༔ ཨོཾ་སརྦ་མ་ཧཱ་ཀྲོ་དྷཱ་རཱ་ཛ་ཨེ་ཧྱེ་ཧི༔ ཛཿཧཱུྃ་བཾ་ཧོཿ ཛྙཱ་ན་ས་མ་ཡ་སྟྭཾ༔ ཧཱུྃ༔ དམ་ཚིག་རྟེན་ལ་ཡེ་ཤེས་གཉིས་མེད་བཞུགས༔ བྱང་ཆུབ་བར་དུ་རོ་གཅིག་ཏིཥྛ་ལྷན༔ རང་ལས་སྤྲུལ་པའི་ཕྱག་རྒྱའི་དྷཱ་ཀི་ནཱིས༔ སྒོ་གསུམ་གུས་པའི་བརྡ་ཡིས་འདུད་ཕྱག་འཚལ༔ ཨ་ཏི་པུ་ཧོ༔ པྲ་ཏཱི་ཙྪ་ཧོ༔ ཧཱུྃཿ གདུག་པའི་དགྲ་བགེགས་བསྒྲལ་བའི་ཕུང་ཁམས་ཚོགས༔ དྲག་པོའི་ཉེར་སྤྱོད་འདོད་ཡོན་བརྗིད་ཅིང་རྔམས༔ སྨན་རཀ་གཏོར་ཚོགས་སྦྱོར་སྒྲོལ་མཆོད་པའི་སྤྲིན༔ འབུལ་ལོ་བཞེས་ནས་མཐུ་དབང་དངོས་གྲུབ་སྩོལ༔ ཨོཾ་བཛྲ་མ་ཧཱ་ཀྲོ་དྷ་སརྦ་པཱུ་ཛ་ཨཱཿཧཱུྃ༔ པཉྩ་ཨ་མྲྀ་ཏ་རཀྟ་ལིཾ་ཏ་ཁ་ཁ་ཁཱ་ཧི་ཁཱ་ཧིཿ ཧཱུྃ༔ ཁྲོ་རྒྱལ་ཀུན་འདུས་གཉེན་པོ་སྟོབས་ཀྱི་ལྷ༔ དུས་མིན་འཆི་དང་བདུད་བཞིའི་བར་ཆད་འཇོམས༔ སྲོག་བདག་གཟའ་ཀླུ་རྒྱལ་འགོང་ཚར་གཅོད་པའི༔ རྡོ་རྗེ་འདུ་འཕྲོ་མཛད་ལ་ཕྱག་འཚལ་བསྟོད༔ དེ་ལྟར་ལྷ་སྐུ་གསལ་བཏབ་ནས༔ ཡིད་མིག་རླུང་གསུམ་རྩེ་གཅིག་གཏད༔ ཀུན་གཞི་མ་བཅོས་རིག་པའི་མདངས༔ ཕྱག་རྒྱའི་གཟུགས་སུ་ཡང་ཡང་བརྟག༔ རྟོག་ཚོགས་ལྷ་སྐུར་ཐིམ་པ་ན༔ རླུང་གི་རྒྱུ་བའང་དེར་ཐིམ་ནས༔ རླུང་སེམས་དབྱེར་མེད་གཟུགས་ཀྱི་སྐུའི༔ གསལ་བརྟན་གྱད་དུ་གྱུར་པའི་ཚེ༔ གཟུང་འཛིན་སྣང་ཞེན་རྒྱུར་བཅས་ཀྱིས༔ དེ་ལ་བར་ཆོད་བྱར་མེད་ན༔ ཕྱི་རོལ་བགེགས་ཀྱིས་སྨྲོས་ཅི་དགོས༔ རྡོ་རྗེའི་བཙན་རྫོང་གྲུབ་པའོ༔ ས་མ་ཡ༔ བཟླས་པ་སྔགས་ཀྱི་མན་ངག་གི༔ ཡེ་ཤེས་སེམས་དཔའ་གསང་བདག་གི༔ ཐུགས་ཀར་ཉི་སྟེང་རྡོ་རྗེའི་སྦུབས༔ ཧཱུྃ་མཐར་སྔགས་ཀྱིས་བསྐོར་བ་ལས༔ འོད་འཕྲོས་རྩ་གསུམ་རབ་འབྱམས་མཆོད༔ འགྲོ་བ་ཀུན་གྱི་བར་ཆོད་བསལ༔ འཆི་བདག་གདོན་དང་བདུད་ཀྱི་སྡེ༔ མ་རུངས་གཟའ་ཀླུ་རྒྱལ་འགོང་སོགས༔ སྡེ་བརྒྱད་འབྱུང་པོའི་ཚོགས་རྣམས་ཀུན༔ དབང་དུ་བསྡུས་ཤིང་བྲན་དུ་བཀོལ༔ བསད་གཟིར་བསྐྲད་མནན་ཆོས་དབྱིངས་བསྟྀམས༔ ཐམས་ཅད་ཀ་དག་རིག་པའི་གདངས༔ ལྷུན་གྲུབ་དཔལ་གྱི་ཕྱག་རྒྱར་རྫོགས༔ ཚུར་འདུས་བདག་ཐིམ་ནུས་སྟོབས་འབར༔ གཉེན་པོ་སྟོབས་ཀྱི་ལྷ་ལྔ་དང་༔ དབྱེར་མེད་དགོངས་པའི་རྩལ་རྫོགས་བསམ༔ སྤྱི་དྲིལ་བསྙེན་སྒྲུབ་ལས་སྦྱོར་གྱི༔ བཟླས་བརྗོད་ཆུ་བོའི་གཞུང་ལྟར་བྱ༔ ཨོཾ་བཛྲ་ཀྲོ་དྷ་ཧ་ཡ་གྲཱི་ཝ་ཧྲཱི༔ ཧཱུྃ་ཁྲོཾ་ཀཱི་ལ་ཡ་སརྦ་བིགྷྣཱན་བྃ་ཧཱུྃ་ཕཊ༔ སོ་སོའི་བཟླས་པ་བྱ་འདོད་ན༔ སྤྱི་བོའི་པདྨ་ཧེ་རུ་ཀའི༔ ཐུགས་སྲོག་ཧྲཱིཿལས་འོད་འཕྲོས་པས༔ རང་གི་བླ་ཚེ་ཆད་ཡར་དང་༔ འཁོར་འདས་དྭངས་བཅུད་བདུད་རྩིར་བསྡུས༔ ཞལ་ཞུགས་སྐུ་ཡི་དབྱིབས་བརྒྱུད་ནས༔ སྦྱོར་མཚམས་ལས་བྱུང་བདག་ཉིད་ཀྱི༔ སྤྱི་བོ་ནས་བརྒྱུད་རྩ་ཁམས་གང་༔ འཆི་མེད་རྡོ་རྗེའི་སྲོག་འགྲུབ་བསམ༔ ཨོཾ་ཧྲཱིཿཔདྨ་ཀྲོ་དྷ་བཛྲ་ཨཱ་ཡུ་ཥེ་སྭཱ་ཧཱ༔ ཡེ་ཤེས་སེམས་དཔའི་ཐུགས་ཀ་ནས༔ ཐུགས་སྲོག་ཧཱུྃ་མཐིང་ཐོག་ལྟར་སྤྲོས༔ སྟེང་གདོན་གཟའ་རྣམས་བྲན་དུ་བཀོལ༔ གདུག་པ་ཅན་ཀུན་ཚར་བཅད་བསམ༔ ཨོཾ་ཧཱུྃ་བཛྲ་ཙཎྜ་སརྦ་དུཥྟཱན་མཱ་ར་ཡ་ཕཊ༔ ཕྱག་གཡས་རྡོ་རྗེའི་རྩེ་མོ་ལས༔ ཡེ་ཤེས་ཁྱུང་ཆེན་སྐར་ལྟར་འཕྲོས༔ འོག་གདོན་གདུག་པ་ཀླུ་ཡི་ཚོགས༔ གཟིར་མནན་མ་རུངས་ཚར་བཅད་བསམ༔ ཨོཾ་ཁྲོཾ་བཛྲ་ག་རུ་ཌ་ནཱ་ག་སརྦ་དུཥྟཱན་ཧཱུྃ་ཕཊ༔ ཕྱག་གཡོན་རྡོ་རྗེ་གཞོན་ནུ་ལས༔ གནམ་ལྕགས་ཕུར་པ་སེར་ལྟར་འདྲིལ༔ བདུད་བཞི་ལ་སོགས་བར་ཆད་ཀུན༔ བསད་གཟིར་བསྐྲད་མནན་དབྱིངས་བསྟིམ་བསམ༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་མཱ་ར་སེ་ན་བྃ་ཧཱུྃ་ཕཊ༔ སྤྱི་དྲིལ་བསྙེན་པ་འབུམ་བཞི་སྟེ༔ སོ་སོའི་རིག་པ་འབུམ་དུ་བཟླ༔ ལས་རྣམས་ཐམས་ཅད་རྫོགས་པ་ཡི༔ མཐུ་རྩལ་འགྲུབ་པར་གདོན་མི་ཟ༔ ས་མ་ཡ༔ རྫོགས་པའི་རིམ་པ་རྒྱུན་གྱི་རྣལ་འབྱོར་ནི༔ མི་རྟག་རྒྱུད་བསྐུལ་ངེས་འབྱུང་བྱང་སེམས་སྦྱང་༔ སྐྱབས་འགྲོ་སེམས་བསྐྱེད་བླ་མར་གསོལ་བ་གདབ༔ ཐུགས་ཡིད་གཅིག་བསྲེས་ཀ་དག་དགོངས་པའི་ངང་༔ ལྷུན་གྲུབ་རིག་རྩལ་ལྷ་སྔགས་སྒྱུ་མར་སྦྱང་༔ ལུས་བསྲང་རླུང་དལ་མིག་འབྲས་ནམ་མཁར་གཏད༔ རིག་པ་མ་བཅོས་སྤྲོ་བསྡུ་བྲལ་བར་བཞག༔ དེ་ཚེ་དུག་ལྔའི་རྟོག་པ་ཅི་ཤར་ཡང་༔ སྔོན་བསུ་རྗེས་གཅོད་བློ་ཡིས་མ་བཅོས་པས༔ སྦྲུལ་མདུད་བཞིན་དུ་འགྱུ་དྲན་རང་སར་གྲོལ༔ གཏི་མུག་རྣམ་རྟོག་དུས་མིན་འཆི་བ་ཀུན༔ རིག་སྟོང་ཆོས་དབྱིངས་ཡེ་ཤེས་ངང་དུ་ཐིམ༔ ང་རྒྱལ་དམ་སྲི་འབྱུང་པོ་དཔུང་དང་བཅས༔ གསལ་སྟོང་མཉམ་པ་ཉིད་དུ་ལྷུན་གྱིས་རྫོགས༔ ཞེ་སྡང་འབར་ཞིང་འཁྲུགས་པའི་གཟའ་ཡི་གདོན༔ མྱང་སྟོང་མེ་ལོང་ཡེ་ཤེས་ཀློང་དུ་ཞི༔ འདོད་ཆགས་ཆུ་ལྟར་གཡོ་བའི་གདུག་པའི་ཀླུ༔ བདེ་སྟོང་སོ་སོར་རྟོག་པའི་ཕྱག་རྒྱས་ཐེབས༔ ཕྲག་དོག་རླུང་དམར་འཚུབས་པའི་བདུད་ཀྱི་སྡེ༔ དྲན་སྟོང་བྱ་གྲུབ་ཡེ་ཤེས་རྒྱན་དུ་ཤར༔ སྐབས་སུ་ཧཱུྃ་གི་གླུ་བླངས་བདེན་ཞེན་བཤིག༔ རེས་འགའ་ཅིར་ཡང་མི་དམིགས་སྟོང་པར་སྦྱང་༔ རྣམས་ཀུན་མ་ཡེངས་མི་སྒོམ་རིག་པའི་གཟེར༔ ཆུ་བོའི་རྒྱུན་བཞིན་རྟག་ཏུ་སུས་གོམས་པ༔ དུག་ལྔ་གནས་དག་གདོན་ལྔ་རང་སར་གྲོལ༔ ཁྲག་འཐུང་རིགས་ལྔའི་ཡེ་ཤེས་ཚེ་འདིར་རྙེད༔ མི་མཐུན་གཟུང་འཛིན་གཡུལ་ལས་རྣམ་པར་རྒྱལ༔ ལྷུན་གྲུབ་རིག་འཛིན་གོ་འཕང་མངོན་དུ་འགྱུར༔ ས་མ་ཡ༔ སློབ་མ་སྨིན་བྱེད་དབང་བསྐུར་གྱི༔ ཆོ་གའི་རིམ་པ་བསྒྲུབ་འདོད་ན༔ དབེན་པར་རྫས་དང་མཆོད་གཏོར་བཤམ༔ བསྐྱེད་བཟླས་བདག་ཉིད་ནུས་ལྡན་བྱ༔ དེ་ནས་གསང་བའི་སྣོད་རུང་རྣམས༔ ཁྲུས་ནས་དབྱུང་ཞིང་འགལ་རྐྱེན་གསལ༔ མཐུན་རྐྱེན་ཚོགས་ཕྱིར་མཎྜལ་ཕུལ༔ གུས་པས་གསོལ་བ་འདི་སྐད་གདབ༔ ཨེ་མ་རྡོ་རྗེ་སློབ་དཔོན་དགོངས༔ བདག་ཅག་སྐལ་ལྡན་རིགས་ཀྱི་བུ༔ ཁྲག་འཐུང་གཉེན་པོ་ལྷ་ལྔ་ཡི༔ དབང་བསྐུར་བྱིན་རླབས་སྩལ་དུ་གསོལ༔ ཞེས་ཞུ་རྒྱུད་སྦྱང་སྡོམ་པ་སྦྱིན༔ དམ་ཚིག་གསལ་གདབ་ཡེ་ཤེས་བརྟན༔ དེ་ནས་བུམ་པ་སྤྱི་བོར་བཞག༔ ཧཱུྃ༔ རིན་ཆེན་བུམ་པ་དུར་ཁྲོད་གཞལ་མེད་ཁང་༔ ནང་བཅུད་ཁྲག་འཐུང་ལྷ་ལྔའི་ཕྱག་རྒྱའི་ཚོགས༔ འོད་ཞུ་བྱང་སེམས་བདུད་རྩིས་དབང་བསྐུར་བས༔ རྒྱུད་དག་ཡེ་ཤེས་ནུས་རྩལ་རྫོགས་པར་ཤོག༔ སྔགས་མཐར་ཧཱུྃ་ཨོཾ་ཏྲཱྃ་ཧྲཱིཿཨཱཿ བཛྲ་ཨ་མྲྀ་ཏ་ཨུ་ད་ཀ་སུ་ར་ཏ་སྟྭཾ་ཨ་བྷི་ཥིཉྩཱ་མིཿ དབང་བསྐུར་རིགས་བདག་ཕྱག་རྒྱས་གདབ༔ ཡེ་ཤེས་སྐུ་ལས་གཉིས་པ་བསྟིམ༔ ཧཱུྃ༔ དཔལ་ཆེན་རྟ་མགྲིན་ཁྲོ་བོའི་རྒྱལ་པོ་ཡི༔ རྡོ་རྗེའི་སྐུ་ཡི་བྱིན་རླབས་མ་ལུས་པ༔ སྐལ་ལྡན་སློབ་མ་འདི་ལ་སྩལ་ནས་ཀྱང་༔ རྒྱལ་འགོང་དམ་སྲིའི་གཉེན་པོར་གྲུབ་པར་ཤོག༔ བཛྲ་ཀྲོ་དྷ་ཧ་ཨ་གྲཱི་ཝ་ཀཱ་ཡ་ཨ་བྷི་ཥིཉྩ་ཨོཾ༔ ཧྲཱིཿ ཚེ་དཔག་མེད་མགོན་པདྨ་ཧེ་རུ་ཀའི༔ རྡོ་རྗེའི་སྐུ༴ སྐལ་ལྡན༴ དུས་མིན་འཆི་བའི་གཉེན་པོར་གྲུབ་པར་ཤོག༔ ཧྲཱིཿཔདྨ་ཀྲོ་དྷ་ཀཱ་ཡ༴ ཧཱུྃ༔ བཅོམ་ལྡན་གསང་བ་འཛིན་པའི་བདག་པོ་ཡི༔ རྡོ་རྗེའི་སྐུ༴ སྐལ་ལྡན༴ དྲེགས་པ་གཟའ་ཡི་གཉེན་པོར༴ ཧཱུྃ་བཛྲ་ཙཎྜ་ཀཱ་ཡ༴ ཁྲོཾ༔ ཁྲོ་རྒྱལ་སྤྲུལ་པ་ཡེ་ཤེས་ག་རུ་ཌའི༔ རྡོ་རྗེའི་སྐུ༴ སྐལ་ལྡན༴ གདུག་པ་ཀླུ་ཡི་གཉེན་པོར༴ ཁྲོཾ་ག་རུ་ཌ་ཧཱུྃ༴ ཧཱུྃ༔ ཕྲིན་ལས་རྩལ་རྫོགས་བཛྲ་ཀཱི་ལ་ཡའི༔ རྡོ་རྗེའི༴ སྐལ་ལྡན༴ མ་རུངས་བདུད་བཞིའི་གཉེན་པོར༴ ཧཱུྃ་བཛྲ་ཀཱི་ལ་ཡ་ཀཱ་ཡ་ཨ་བྷི་ཥིཉྩ་ཨོཾ༔ བཟླས་ལུང་སྦྱིན་ཞིང་བགྲང་ཕྲེང་གཏད༔ ཨཱཿ གཉེན་པོ་སྟོབས་འདུས་ཁྲོ་རྒྱལ་ལྷ་ཚོགས་ཀྱི༔ རྡོ་རྗེའི་གསུང་གི་བྱིན་རླབས་མ་ལུས་པ༔ སྐལ་ལྡན་སློབ་མ་འདི་ལ་སྩལ་ནས་ཀྱང་༔ ནུས་པ་སྔགས་ཀྱི་ཡེ་ཤེས་གྲུབ་པར་ཤོག༔ སྔགས་མཐར་ཝཱ་ཀ་ཨ་བྷི་ཥིཉྩ་ཨཱ༔ རྡོ་རྗེའི་གཟུགས་བརྙན་མེ་ལོང་དུ༔ གསལ་བར་འཆར་བས་མཚོན་བྱས་ཏེ༔ ཧཱུྃ༔ ཁྲོ་རྒྱལ་རྣམས་ཀྱི་སྟོང་གསལ་ཡེ་ཤེས་དབྱིངས༔ རྡོ་རྗེའི་ཐུགས་ཀྱི་བྱིན་རླབས་མ་ལུས་པ༔ སྐལ་ལྡན་སློབ་མ་འདི་ལ་སྩལ་ནས་ཀྱང་༔ རང་བྱུང་དགོངས་པའི་རྩལ་ཆེན་རྫོགས་པར་ཤོག༔ སྔགས་མཐར་ཙིཏྟ་ཨ་བྷི་ཥིཉྩ་ཧཱུྃ༔ མཐའ་རྟེན་སོ་སོའི་རྫས་བྱིན་ལ༔ ཧྲཱིཿ ཟླ་གམ་དམར་པོ་འོད་ཀྱི་ཐིག་ལེ་རུ༔ ཚེ་བདག་མགོན་པོ་ཁྲོ་བོའི་ལྷ་ཚོགས་བཞུགས༔ འཆི་མེད་བདུད་རྩིའི་རྒྱུན་གྱིས་དབང་སྐུར་བས༔ མི་ཕྱེད་རྡོ་རྗེའི་སྲོག་ཏུ་ཡོངས་གྲུབ་ཤོག༔ ཧྲཱིཿཨཱ་ཡུརྫྙཱ་ན་ཨ་བྷི་ཥིཉྩ་མི༔ ཚེ་རིལ་བདུད་རྩི་དག་ཀྱང་སྦྱིན༔ ཧཱུྃ༔ སྲིད་པ་གསུམ་པོ་འདར་ཞིང་གཡོ་བྱེད་པའི༔ རྟ་གདོང་ཞལ་གྱི་ཕྱག་རྒྱས་དབང་བསྐུར་བས༔ རྡོ་རྗེའི་རྟ་སྐད་ནམ་མཁར་འཚེར་བའི་སྒྲས༔ རྒྱལ་འགོང་དམ་སྲིའི་དཔུང་ཚོགས་ཟིལ་གནོན་ཤོག༔ ཧྲཱིཿཧ་ཡ་གྲཱི་བ་ཧི་ཧི་ཧི་ཨ་བྷི་ཥིཉྩ་མི༔ ཧཱུྃ༔ གནམ་ལྕགས་འབར་བའི་རྡོ་རྗེ་རྩེ་དགུ་ལ༔ གསང་བདག་ཁྲོ་རྒྱལ་ཆེན་པོའི་ནུས་མཐུ་རྫོགས༔ གསོར་བ་ཙམ་གྱིས་སྟེང་གདོན་གཟའ་ཡི་ཚོགས༔ གཟིར་མནན་ལས་ལ་ཁོལ་བའི་ནུས་སྟོབས་ཤོག༔ ཧཱུྃ་བཛྲ་ཨ་བྷཱི་ཥིཉྩཱ་མི༔ ཁྲོཾ༔ དུག་ལྔའི་རང་བཞིན་ཀླུ་གདོན་འདུལ་བའི་དཔལ༔ འཇོམས་བྱེད་ཁྱུང་ཆེན་རིགས་ལྔའི་ངོ་བོ་ཉིད༔ གཉེན་པོ་རྫས་ཀྱི་རིལ་བུ་འདི་བྱིན་པས༔ གདུག་པ་ནཱ་གའི་ཚོགས་རྣམས་ཚར་གཅོད་ཤོག༔ ཁྲོཾ་པཉྩ་ག་རུ་ཌ་ཨ་བྷི་ཥིཉྩཱ་མི༔ ཧཱུྃ༔ ཕྲིན་ལས་སྟོབས་རྫོགས་བཛྲ་ཀཱི་ལ་ཡའི༔ ཕུར་བུ་འདྲིལ་ཞིང་འདེབས་པའི་དབང་བསྐུར་བས༔ བྱང་ཆུབ་ལམ་གྱི་བར་ཆད་མ་ལུས་ཀུན༔ ཚར་གཅོད་མངོན་སྤྱོད་ལས་ཀུན་གྲུབ་པར་ཤོག༔ ཧཱུྃ་བཛྲ་ཀཱི་ལ་ཡ་ཨ་བྷི་ཥིཉྩཱ་མི༔ ཤིས་བརྗོད་དམ་ཚིག་ཁས་བླང་སོགས༔ རྗེས་ཀྱི་རིམ་པ་སྤྱི་ལྟར་བྱ༔ ལྟ་དགོངས་གདིང་ལྡན་སློབ་དཔོན་གྱིས༔ དམ་ཚིག་དག་པའི་སློབ་མ་ལ༔ དབང་འདི་ལན་གཅིག་བསྐུར་བས་ཀྱང་༔ བྱང་ཆུབ་སྒྲུབ་པའི་བར་ཆོད་ཀྱི༔ གཡུལ་ལས་རྣམ་པར་རྒྱལ་འགྱུར་ན༔ བསྐྱེད་རྫོགས་ལམ་ལ་བརྩོན་པ་ཡིས༔ དངོས་གྲུབ་ཐོབ་པ་སྨོས་ཅི་དགོས༔ དེ་ཕྱིར་ཤིན་ཏུ་གཅེས་པར་ཟུང་༔ ས་མ་ཡ༔ དེ་ལྟར་གཉེན་པོ་ལྷ་ལྔའི་ཚོགས༔ གཅིག་འདྲིལ་སྙིང་པོའི་སྒྲུབ་ཐབས་འདི༔ སྔོན་ཆད་གཞན་དུ་མ་བསྟན་པ༔ ལོ་ཙཱ་ཆེན་པོའི་སྐྱེ་བའི་མཐའ༔ སྐལ་ལྡན་ཁྱོད་ལ་བརྩེ་བས་གདམས༔ གཞན་ལ་མ་སྤེལ་རང་ཉམས་ལོངས༔ མ་འོངས་ཤིན་ཏུ་རྩུབ་འགྱུར་དུས༔ གསང་བ་ཀུན་འཛིན་པདྨའི་བུ༔ ཁྱོད་ཀྱི་མིང་དང་མཐུན་པ་ལ༔ སྙན་བརྒྱུད་བྱིན་རླབས་ཚུལ་དུ་གདམས༔ སྣོད་ལྡན་འགའ་རེའི་དོན་དུ་འགྱུར༔ ས་མ་ཡ་རྒྱ་རྒྱ༔ གུ་ཧྱ༔ བརྡ་ཐིམ༔ ལོ་ཆེན་བཻ་རོའི་ཐུགས་སྤྲུལ་རིག་འཛིན་མཆོག་ལྡན་མགོན་པོའམ་སྤྲུལ་པའི་གཏེར་ཆེན་ཨོ་རྒྱན་མདོ་སྔགས་གླིང་པ་ལ་གུ་རུ་རིན་པོ་ཆེས་སྙན་བརྒྱུད་དུ་སྩལ་བ་ཉིད། སླད་ཆར་པདྨ་འོད་གསལ་མདོ་སྔགས་གླིང་པ་ལ་གཏེར་སྟོན་ཉིད་ཀྱི་སྐུས་སྙན་བརྒྱུད་དུ་གདམས་ཏེ་གཏན་ལ་ཕབ་ནས་རིག་འཛིན་མཁའ་འགྲོའི་བརྡས་བསྐུལ་བ་ལྟར། ཁོ་བོ་འཆི་མེད་བསྟན་གཉིས་གཡུང་དྲུང་གླིང་པ་ལ་སྨིན་གྲོལ་ཚང་སྤྲུགས་སུ་སྩལ་ཏེ་བར་ཆད་ཀྱི་འཕྲང་བསལ་བར་མཛད་པས་བཀའ་དྲིན་བསམ་གྱིས་མི་ཁྱབ་པ་ཐོབ་པའོ། །དགེ་ལེགས་འཕེལ།།

[edit]

\u0f01\u0f83:__dpal rta mgrin gnyen po lha lnga snyan brgyud snying po'i yang zhun bzhugs so:__: \u0f01\u0f83:__he ru ka la phyag 'tshal lo:__e ma skal ldan pad+ma'i bu:__bstan 'gro'i don chen sgrub pa legs:__'on kyang mtha' dmag gdug pa yi:__gnyen po las la sbyar ba'i tshe:__nags phyogs gza' klu rgyal gsum dang :__bdud bzhi'i tshogs rnams rab tu 'khrugs:__glo bur tshe la bar chad 'byung :__de rnams gnyen po stobs kyi lha:__o rgyan bdag gi thugs bcud 'di:__yal bar ma dor nyams su long :__rang gzhan don chen 'grub par nges:__sa ma ya:__skyabs 'gro sems bskyed tshogs bsag dang :__bgegs bskrad mtshams gcod byin rlabs sogs:__las rim spyi ltar sngon 'gro bas:__dngos gzhi bskyed pa'i rim pa ni:__hU~M:__de bzhin nyid dbyings ma bcos 'od gsal gdangs:__dmigs med brtse ba'i cho 'phrul hU~M mthing ga'i:__rig rtsal rol pas snod bcud stong par sbyangs:__stong pa'i ngang nas mkha' las 'ja' tshon ltar:__'byung ba rim brtsegs rdo rje'i ri rab dang :__mi phyed srung 'khor dur khrod gzhal med dbus:__sna tshogs pad+ma nyi ma'i dkyil 'khor dang :__bdud bzhi dregs pa gza' klu rgyal 'gong sogs:__'dar zhing 'dud pa byi chings bsnol ba'i steng :__rig pa hU~M las bdag nyid rtsa ba'i lha:__rig 'dzin 'chol ba'i khro rgyal gro bo lod:__yak+sha kA la dpal chen rta mgrin rgyal:__sku mdog dus mtha'i char sprin 'khrugs pa'i mdangs:__zhal gdangs mche gtsigs spyan gsum dmar la zlum:__sma ra smin ma ag tshom me ltar 'bar:__khro gnyer rab bsdus ljags 'dril hU~M sgra sgrogs:__dar nag ber gsol dur khrod chas kyis brgyan:__phyag g.yas gnam lcags rdo rje rwa dgu pa:__sdigs pa'i mdzub mos nam mkha'i dbyings su bsgrengs:__rtse las gdug pa klu gdon 'dul ba'i gnyen:__ye shes khyung chen mthing nag khra thabs 'phro:__phyag g.yon ri rab phur bu gsol ba las:__bar chad bdud 'dul badz+ra kI la ya:__ljang nag phur bu 'dril ba rlung ltar 'tshubs:__spyi gtsug rta gdong ljang zhur 'tsher ba yis:__'jig rten khams kun shig shig yom yom 'gul:__rngog ma dmar po me 'bar thig le'i dbus:__pad nyi'i steng du dus min 'chi ba yi:__gnyen po'i lha mchog bcom ldan tshe dpag med:__khros pa'i skur bzhengs pad+ma he ru ka:__phyag g.yas pad+ma dmar pos tshe bcud sdud:__g.yon pas tshe bum sgrub la dngos grub stsal:__dar dang rin chen rus pa'i phyag rgyas spras:__rang 'od yum 'khyud zhabs gnyis skyil krung bzhugs:__thugs kar pad+ma nyi ma'i gdan gyi steng :__ye shes sems dpa' klu gshed gsang ba'i bdag:__rdo rje sdigs mdzub mthing nag khro chas rdzogs:__rang byung rig pa 'od skur lam mer gsal:__bdag nyid rgyal 'gong dam sri 'byung po'i gshed:__zhabs zung dor stabs drag me 'khrugs pa'i klong :__rab 'byams khro bo'i sprul pa spro zhing bsdu:__de ltar gsal ba'i lha tshogs thams cad kyi:__gnas gsum rdo rje gsum gyi yi ges mtshan:__ye shes dbang bskur rigs lnga'i phyag rgyas brgyan:__phung khams skye mched khrag 'thung phyag rgyar rdzogs:__oM AHhU~M badz+ra kA wA tsi At+ma ko\u0f85 haM:__hU~M oM trA~M hrIHAH__a b+hi Shiny+tsa su ra ta s+t+waM a haM:__hU~M:__chos dbyings skye ba med pa'i ngang nyid las:__'bar ba'i skur bzhengs gnyen po stobs kyi lha:__khrag 'thung rigs lnga'i lha tshogs gnas 'dir gshegs:__dbang skur byin phob mthu rtsal dngos grub stsol:__oM sarba ma hA kro d+hA rA dza e h+ye hi:__dzaHhU~M baM hoH__dz+nyA na sa ma ya s+t+waM:__hU~M:__dam tshig rten la ye shes gnyis med bzhugs:__byang chub bar du ro gcig tiSh+Tha lhan:__rang las sprul pa'i phyag rgya'i d+hA ki nIs:__sgo gsum gus pa'i brda yis 'dud phyag 'tshal:__a ti pu ho:__pra tI ts+tsha ho:__hU~MH__gdug pa'i dgra bgegs bsgral ba'i phung khams tshogs:__drag po'i nyer spyod 'dod yon brjid cing rngams:__sman raka gtor tshogs sbyor sgrol mchod pa'i sprin:__'bul lo bzhes nas mthu dbang dngos grub stsol:__oM badz+ra ma hA kro d+ha sarba pU dza AHhU~M:__pany+tsa a mr-i ta rak+ta liM ta kha kha khA hi khA hiH__hU~M:__khro rgyal kun 'dus gnyen po stobs kyi lha:__dus min 'chi dang bdud bzhi'i bar chad 'joms:__srog bdag gza' klu rgyal 'gong tshar gcod pa'i:__rdo rje 'du 'phro mdzad la phyag 'tshal bstod:__de ltar lha sku gsal btab nas:__yid mig rlung gsum rtse gcig gtad:__kun gzhi ma bcos rig pa'i mdangs:__phyag rgya'i gzugs su yang yang brtag:__rtog tshogs lha skur thim pa na:__rlung gi rgyu ba'ang der thim nas:__rlung sems dbyer med gzugs kyi sku'i:__gsal brtan gyad du gyur pa'i tshe:__gzung 'dzin snang zhen rgyur bcas kyis:__de la bar chod byar med na:__phyi rol bgegs kyis smros ci dgos:__rdo rje'i btsan rdzong grub pa'o:__sa ma ya:__bzlas pa sngags kyi man ngag gi:__ye shes sems dpa' gsang bdag gi:__thugs kar nyi steng rdo rje'i sbubs:__hU~M mthar sngags kyis bskor ba las:__'od 'phros rtsa gsum rab 'byams mchod:__'gro ba kun gyi bar chod bsal:__'chi bdag gdon dang bdud kyi sde:__ma rungs gza' klu rgyal 'gong sogs:__sde brgyad 'byung po'i tshogs rnams kun:__dbang du bsdus shing bran du bkol:__bsad gzir bskrad mnan chos dbyings bst-ims:__thams cad ka dag rig pa'i gdangs:__lhun grub dpal gyi phyag rgyar rdzogs:__tshur 'dus bdag thim nus stobs 'bar:__gnyen po stobs kyi lha lnga dang :__dbyer med dgongs pa'i rtsal rdzogs bsam:__spyi dril bsnyen sgrub las sbyor gyi:__bzlas brjod chu bo'i gzhung ltar bya:__oM badz+ra kro d+ha ha ya grI wa hrI:__hU~M khroM kI la ya sarba big+h+nAn ba~M hU~M phaT:__so so'i bzlas pa bya 'dod na:__spyi bo'i pad+ma he ru ka'i:__thugs srog hrIHlas 'od 'phros pas:__rang gi bla tshe chad yar dang :__'khor 'das dwangs bcud bdud rtsir bsdus:__zhal zhugs sku yi dbyibs brgyud nas:__sbyor mtshams las byung bdag nyid kyi:__spyi bo nas brgyud rtsa khams gang :__'chi med rdo rje'i srog 'grub bsam:__oM hrIHpad+ma kro d+ha badz+ra A yu She swA hA:__ye shes sems dpa'i thugs ka nas:__thugs srog hU~M mthing thog ltar spros:__steng gdon gza' rnams bran du bkol:__gdug pa can kun tshar bcad bsam:__oM hU~M badz+ra tsaN+Da sarba duSh+tAn mA ra ya phaT:__phyag g.yas rdo rje'i rtse mo las:__ye shes khyung chen skar ltar 'phros:__'og gdon gdug pa klu yi tshogs:__gzir mnan ma rungs tshar bcad bsam:__oM khroM badz+ra ga ru Da nA ga sarba duSh+tAn hU~M phaT:__phyag g.yon rdo rje gzhon nu las:__gnam lcags phur pa ser ltar 'dril:__bdud bzhi la sogs bar chad kun:__bsad gzir bskrad mnan dbyings bstim bsam:__oM badz+ra kI li kI la ya sarba big+h+nAn mA ra se na ba~M hU~M phaT:__spyi dril bsnyen pa 'bum bzhi ste:__so so'i rig pa 'bum du bzla:__las rnams thams cad rdzogs pa yi:__mthu rtsal 'grub par gdon mi za:__sa ma ya:__rdzogs pa'i rim pa rgyun gyi rnal 'byor ni:__mi rtag rgyud bskul nges 'byung byang sems sbyang :__skyabs 'gro sems bskyed bla mar gsol ba gdab:__thugs yid gcig bsres ka dag dgongs pa'i ngang :__lhun grub rig rtsal lha sngags sgyu mar sbyang :__lus bsrang rlung dal mig 'bras nam mkhar gtad:__rig pa ma bcos spro bsdu bral bar bzhag:__de tshe dug lnga'i rtog pa ci shar yang :__sngon bsu rjes gcod blo yis ma bcos pas:__sbrul mdud bzhin du 'gyu dran rang sar grol:__gti mug rnam rtog dus min 'chi ba kun:__rig stong chos dbyings ye shes ngang du thim:__nga rgyal dam sri 'byung po dpung dang bcas:__gsal stong mnyam pa nyid du lhun gyis rdzogs:__zhe sdang 'bar zhing 'khrugs pa'i gza' yi gdon:___myang stong me long ye shes klong du zhi:__'dod chags chu ltar g.yo ba'i gdug pa'i klu:__bde stong so sor rtog pa'i phyag rgyas thebs:__phrag dog rlung dmar 'tshubs pa'i bdud kyi sde:__dran stong bya grub ye shes rgyan du shar:__skabs su hU~M gi glu blangs bden zhen bshig:__res 'ga' cir yang mi dmigs stong par sbyang :__rnams kun ma yengs mi sgom rig pa'i gzer:__chu bo'i rgyun bzhin rtag tu sus goms pa:__dug lnga gnas dag gdon lnga rang sar grol:__khrag 'thung rigs lnga'i ye shes tshe 'dir rnyed:__mi mthun gzung 'dzin g.yul las rnam par rgyal:__lhun grub rig 'dzin go 'phang mngon du 'gyur:__sa ma ya:__slob ma smin byed dbang bskur gyi:__cho ga'i rim pa bsgrub 'dod na:__dben par rdzas dang mchod gtor bsham:__bskyed bzlas bdag nyid nus ldan bya:__de nas gsang ba'i snod rung rnams:__khrus nas dbyung zhing 'gal rkyen gsal:__mthun rkyen tshogs phyir maN+Dal phul:__gus pas gsol ba 'di skad gdab:__e ma rdo rje slob dpon dgongs:__bdag cag skal ldan rigs kyi bu:__khrag 'thung gnyen po lha lnga yi:__dbang bskur byin rlabs stsal du gsol:__zhes zhu rgyud sbyang sdom pa sbyin:__dam tshig gsal gdab ye shes brtan:__de nas bum pa spyi bor bzhag:__hU~M:__rin chen bum pa dur khrod gzhal med khang :__nang bcud khrag 'thung lha lnga'i phyag rgya'i tshogs:__'od zhu byang sems bdud rtsis dbang bskur bas:__rgyud dag ye shes nus rtsal rdzogs par shog:__sngags mthar hU~M oM trA~M hrIHAH__badz+ra a mr-i ta u da ka su ra ta s+t+waM a b+hi Shiny+tsA miH__dbang bskur rigs bdag phyag rgyas gdab:__ye shes sku las gnyis pa bstim:__hU~M:__dpal chen rta mgrin khro bo'i rgyal po yi:__rdo rje'i sku yi byin rlabs ma lus pa:__skal ldan slob ma 'di la stsal nas kyang :__rgyal 'gong dam sri'i gnyen por grub par shog:__badz+ra kro d+ha ha a grI wa kA ya a b+hi Shiny+tsa oM:__hrIH__tshe dpag med mgon pad+ma he ru ka'i:__rdo rje'i sku=__skal ldan=__dus min 'chi ba'i gnyen por grub par shog:__hrIHpad+ma kro d+ha kA ya=__hU~M:__bcom ldan gsang ba 'dzin pa'i bdag po yi:__rdo rje'i sku=__skal ldan=__dregs pa gza' yi gnyen por=__hU~M badz+ra tsaN+Da kA ya=__khroM:__khro rgyal sprul pa ye shes ga ru Da'i:__rdo rje'i sku=__skal ldan=__gdug pa klu yi gnyen por=__khroM ga ru Da hU~M=__hU~M:__phrin las rtsal rdzogs badz+ra kI la ya'i:__rdo rje'i=__skal ldan=__ma rungs bdud bzhi'i gnyen por=__hU~M badz+ra kI la ya kA ya a b+hi Shiny+tsa oM:__bzlas lung sbyin zhing bgrang phreng gtad:__AH__gnyen po stobs 'dus khro rgyal lha tshogs kyi:__rdo rje'i gsung gi byin rlabs ma lus pa:__skal ldan slob ma 'di la stsal nas kyang :__nus pa sngags kyi ye shes grub par shog:__sngags mthar wA ka a b+hi Shiny+tsa A:__rdo rje'i gzugs brnyan me long du:__gsal bar 'char bas mtshon byas te:__hU~M:__khro rgyal rnams kyi stong gsal ye shes dbyings:__rdo rje'i thugs kyi byin rlabs ma lus pa:__skal ldan slob ma 'di la stsal nas kyang :__rang byung dgongs pa'i rtsal chen rdzogs par shog:__sngags mthar tsit+ta a b+hi Shiny+tsa hU~M:__mtha' rten so so'i rdzas byin la:__hrIH__zla gam dmar po 'od kyi thig le ru:__tshe bdag mgon po khro bo'i lha tshogs bzhugs:__'chi med bdud rtsi'i rgyun gyis dbang skur bas:__mi phyed rdo rje'i srog tu yongs grub shog:__hrIHA yur+dz+nyA na a b+hi Shiny+tsa mi:__tshe ril bdud rtsi dag kyang sbyin:__hU~M:__srid pa gsum po 'dar zhing g.yo byed pa'i:__rta gdong zhal gyi phyag rgyas dbang bskur bas:__rdo rje'i rta skad nam mkhar 'tsher ba'i sgras:__rgyal 'gong dam sri'i dpung tshogs zil gnon shog:__hrIHha ya grI ba hi hi hi a b+hi Shiny+tsa mi:__hU~M:__gnam lcags 'bar ba'i rdo rje rtse dgu la:__gsang bdag khro rgyal chen po'i nus mthu rdzogs:__gsor ba tsam gyis steng gdon gza' yi tshogs:__gzir mnan las la khol ba'i nus stobs shog:__hU~M badz+ra a b+hI Shiny+tsA mi:__khroM:__dug lnga'i rang bzhin klu gdon 'dul ba'i dpal:__'joms byed khyung chen rigs lnga'i ngo bo nyid:__gnyen po rdzas kyi ril bu 'di byin pas:__gdug pa nA ga'i tshogs rnams tshar gcod shog:__khroM pany+tsa ga ru Da a b+hi Shiny+tsA mi:__hU~M:__phrin las stobs rdzogs badz+ra kI la ya'i:__phur bu 'dril zhing 'debs pa'i dbang bskur bas:__byang chub lam gyi bar chad ma lus kun:__tshar gcod mngon spyod las kun grub par shog:__hU~M badz+ra kI la ya a b+hi Shiny+tsA mi:__shis brjod dam tshig khas blang sogs:__rjes kyi rim pa spyi ltar bya:__lta dgongs gding ldan slob dpon gyis:__dam tshig dag pa'i slob ma la:__dbang 'di lan gcig bskur bas kyang :__byang chub sgrub pa'i bar chod kyi:__g.yul las rnam par rgyal 'gyur na:__bskyed rdzogs lam la brtson pa yis:__dngos grub thob pa smos ci dgos:__de phyir shin tu gces par zung :__sa ma ya:__de ltar gnyen po lha lnga'i tshogs:__gcig 'dril snying po'i sgrub thabs 'di:__sngon chad gzhan du ma bstan pa:__lo tsA chen po'i skye ba'i mtha':__skal ldan khyod la brtse bas gdams:__gzhan la ma spel rang nyams longs:__ma 'ongs shin tu rtsub 'gyur dus:__gsang ba kun 'dzin pad+ma'i bu:__khyod kyi ming dang mthun pa la:__snyan brgyud byin rlabs tshul du gdams:__snod ldan 'ga' re'i don du 'gyur:__sa ma ya rgya rgya:__gu h+ya:__brda thim:__lo chen bai ro'i thugs sprul rig 'dzin mchog ldan mgon po'am sprul pa'i gter chen o rgyan mdo sngags gling pa la gu ru rin po ches snyan brgyud du stsal ba nyid/__slad char pad+ma 'od gsal mdo sngags gling pa la gter ston nyid kyi skus snyan brgyud du gdams te gtan la phab nas rig 'dzin mkha' 'gro'i brdas bskul ba ltar/__kho bo 'chi med bstan gnyis g.yung drung gling pa la smin grol tshang sprugs su stsal te bar chad kyi 'phrang bsal bar mdzad pas bka' drin bsam gyis mi khyab pa thob pa'o/__/dge legs 'phel//_____