JKW-KABAB-06-CHA-028

🚧 This website is under continued development. We appreciate your patience!

Previous Text Back to Volume PageNext Text

Wylie title	mkha' 'gro'i smre bshags
Location	mkhyen brtse'i bka' babs Volume 6, Text 28, Pages 313-316 (Folios 1a1 to 2b2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	འཇམ་དབྱངས་མཁྱེན་བརྩེའི་དབང་པོ་, ཇོ་མོ་སྨན་མོ་ ('jam dbyangs mkhyen brtse'i dbang po, jo mo sman mo)
Citation	'jam dbyangs mkhyen brtse'i dbang po. mkha' 'gro'i smre bshags. In Rdzong sar 'jam dbyangs mkhyen brtse'i dbang po'i bka' babs, Vol. 6: 313-316. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Confessions - bshags pa
Cycle	མཁའ་འགྲོ་གསང་བ་ཀུན་འདུས་ (mkha' 'gro gsang ba kun 'dus)
Karchag page	JKW-KABAB-Volume-06-CHA-Karchag
RTZ	In the Rinchen Terdzö: https://rtz.tsadra.org/index.php/Terdzo-NGI-057

Tibetan Text

Wylie

[edit]

༄༅། །མཁའ་འགྲོའི་སྨྲེ་བཤགས་བཞུགས་སོ། ཨོཾ། །ཡེ་ཤེས་མཁའ་འགྲོ་དབང་ཕྱུག་ཁྲོ་རྒྱལ་གཙོ། །བདེ་ཆེན་གཉིས་མེད་ཡུམ་གྱི་དབྱིངས་སུ་སྦྱོར། །བདག་ཏུ་ལྟ་བའི་ང་རྒྱལ་འཇོམས་མཛད་པའི། །དཔང་གྱུར་རྡོ་རྗེ་དམ་ཅན་དགོངས་སུ་གསོལ། །ཏ་ནའི་གནས་མཆོག་སྒྲོལ་བ་གནས་མ་སྟོབས། །ག་ཎའི་གནས་མཆོག་སྦྱོར་བ་བྱིན་མ་བརླབས། །དཔལ་ཆེན་ཁྲོ་རྒྱལ་ཐུགས་དང་ཅི་འགལ་བ། །ཐུགས་རྗེ་ཆེ་མངའ་ཁྱེད་ལ་བཟོད་པར་གསོལ། །རྨད་དུ་བྱུང་བའི་མཆོད་པ་ཏན་གཎ་ནི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པ་ལྔ་ཡི་ཡོན་ཏན་བསམ་ཡས་ཀྱིས། །ཡེ་ཤེས་མཁའ་འགྲོའི་ཐུགས་དམ་བསྐང་གྱུར་ཅིག །དཔལ་ཆེན་ཁྲོ་རྒྱལ་ཡབ་ཡུམ་ཐུགས་རྗེ་ཡིས། །རྩེ་གཅིག་སྒྲུབ་པ་པོ་ཡི་གྲོགས་མཛོད་ལ། །བར་གཅོད་བྱེད་པའི་དགྲ་བགེགས་རྡུལ་དུ་རློག །གྲུབ་པའི་འབྲས་བུ་དུས་འདིར་སྩལ་དུ་གསོལ། ཧཱུྃ། རྡོ་རྗེ་མཁའ་འགྲོ་དབང་ཕྱུག་གོ་རི་བརྒྱད། །སིཾ་ཧ་ལ་སོགས་ཡུལ་གྱི་ཕྲ་མེན་བརྒྱད། །རྟ་གདོང་ལ་སོགས་འབར་མ་ཁྲོ་མོ་བཞི། །དཔང་གྱུར་རྡོ་རྗེ་དམ་ཅན་དགོངས་སུ་གསོལ། ཨོཾ། སྒོམ་སྒྲུབ་དུས་ལས་གཡེལ་བར་གྱུར་པ་ཡིས། །སྒྲུབ་པའི་རྫས་མཆོག་བདུད་རྩི་ཨ་མྲྀ་ཏ། །དུས་དྲུག་མཆོད་པའི་ཚུལ་དུ་མ་སྦྱར་བ། །བཟོད་པར་གསོལ་ལོ་ཚངས་པར་སྩལ་དུ་གསོལ། །བྱང་ཆུབ་སེམས་དང་མཱཾ་ས་རཀྟ་དང༌། །དྲི་ཆེན་དྲི་ཆུ་གོ་ཀུ་ད་ཧ་ན། །གཉིས་མེད་སྦྱར་བའི་སྨན་མཆོག་ཨ་མྲྀ་ཏས། །རྡོ་རྗེ་མཁའ་འགྲོའི་ཐུགས་དམ་བསྐང་གྱུར་ཅིག །འབར་བའི་སྐུ་མཆོག་རྫོགས་པའི་དཀྱིལ་འཁོར་དུ། །བདུད་དང་སྲིན་པོ་མ་ལུས་འདུལ་བའི་ཕྱིར། །རྩེ་གཅིག་སྒྲུབ་པ་པོ་ལ་ཞལ་སྟོན་ལ། །བར་གཅོད་བྱེད་པའི་དགྲ་བགེགས་རྡུལ་དུ་རློག ཨོཾ། ཤ་ཟ་མཁའ་འགྲོ་དབང་ཕྱུག་ཉི་ཤུ་བརྒྱད། །སྲིད་གསུམ་རྒྱལ་མོ་དུར་ཁྲོད་བརྒྱད་ཀྱི་ཡུམ། །གཙོ་མོ་མངོན་སྤྱོད་མ་བདུན་འཁོར་དང་བཅས། །དཔང་གྱུར་རྡོ་རྗེ་དམ་ཅན་དགོངས་སུ་གསོལ། །མཆོད་པ་ལོ་ཟླའི་དུས་ལས་འདས་པ་དང༌། །རྫས་དང་ཕྱག་རྒྱ་དུས་འདིར་མ་རྫོགས་ཤིང༌། །ཤ་ཁྲག་དམར་གྱི་དམ་ལས་གཡེལ་གྱུར་ཏེ། །ཤ་ཟ་མཁའ་འགྲོའི་ཐུགས་དང་ཅི་འགལ་བ། །བཟོད་པར་གསོལ་ལོ་ཚངས་པར་སྩལ་དུ་གསོལ། །དུར་ཁྲོད་རྫས་མཆོག་ཐལ་ཆེན་བ་སུ་ཏ། །ཤ་ཁྲག་དམར་གྱི་མཆོད་པ་རབ་སྦྱར་ཏེ། །བྷནྡྷའི་སྣོད་དུ་དམར་ཆེན་བསྐྱིལ་བ་འདིས། །ཤ་ཟ་མཁའ་འགྲོའི་ཐུགས་དམ་བསྐང་གྱུར་ཅིག ཨོཾ། སྔོན་ཚེ་དཔལ་ཆེན་ཁྲོ་རྒྱལ་སྤྱན་སྔ་རུ། །སུས་ཀྱང་མ་བཅོལ་ཉིད་ཀྱིས་ཞལ་འཆེས་ཏེ། །རྩེ་གཅིག་སྒྲུབ་པ་པོ་ཡི་གྲོགས་མཛོད་ལ། །རྣལ་འབྱོར་དབང་ཕྱུག་ཆེན་པོས་འཁོར་སྲུངས་ཤིག ཨོཾ། ལས་ཀྱི་མཁའ་འགྲོ་ཕྱི་ཡི་རྣལ་འབྱོར་བཞི། །བདག་ཉིད་ཆེན་མོ་ལ་སོགས་མ་མོའི་ཚོགས། །ལྷ་དང་ལྷ་མིན་ཕྱོགས་བཅུའི་མཁའ་འགྲོ་མ། །དཔང་གྱུར་རྡོ་རྗེ་དམ་ཅན་དགོངས་སུ་གསོལ། །ལྟ་བ་མཐོས་པས་སྤྱོད་ལམ་རྩིངས་པ་དང༌། །ཉ་སྟོང་གསོ་སྦྱོང་དུས་ལས་གཡེལ་གྱུར་ཅིང༌། །གཉིད་ཆང་རྨོངས་པས་ཕྱི་མཆོད་མ་བསྐངས་པ། །བཟོད་པར་གསོལ་ལོ་ཚངས་པར་སྩལ་དུ་གསོལ། །དམ་ཚིག་ལྷག་མ་ཁ་ཆུའི་འོད་ཟེར་འཕྲོ། །ཀུན་ཏུ་བཟང་པོའི་མཆོད་སྤྲིན་ཨ་མྲྀ་ཏ། །ཤ་ཁྲག་བདུད་རྩིའི་མཆོད་པ་ཆེན་པོ་འདིས། །ལས་ཀྱི་མཁའ་འགྲོའི་ཐུགས་དམ་བསྐང་གྱུར་ཅིག ཨོཾ། སྟོང་ཁམས་ཡོངས་སུ་འཆོལ་བར་གྱུར་མོད་ཀྱང༌། །བདག་ནི་རྡོ་རྗེའི་དམ་ལས་མི་འདའ་ཞིང༌། །དཔལ་ཆེན་སྒོམ་སྒྲུབ་ལས་ལ་བརྩོན་ལགས་ན། །སྐྱེས་ཆེན་ཁྱེད་ཀྱི་ཐུགས་དམ་མཉེས་གྱུར་ཅིག །དུར་ཁྲོད་ཀློང་དགུའི་མཁའ་འགྲོ་རྣམ་བཞིའི་ཚོགས། །ཁམས་གསུམ་འཁོར་བའི་སྡུག་བསྔལ་ཅི་འདྲ་བ། །བྱམས་མགོན་ཁྱེད་ཀྱི་ཐུགས་ལ་དེ་ལྟར་གསལ། །དམྱལ་ཚོགས་མེ་ལྟར་འབར་བ་ཞི་བར་མཛོད། །ཐུགས་རྗེའི་གདུང་འཚོབ་རིག་འཛིན་བདག་གིས་ནི། །དང་པོར་བྱང་ཆུབ་མཆོག་ཏུ་སེམས་བསྐྱེད་ནས། །འདའ་ཀ་རྡོ་རྗེ་དམ་ཚིག་མཆོག་གསུམ་པོ། །རྒྱལ་བའི་བཀའ་ལས་འདའ་བར་མི་བགྱིད་ལ། །གསང་སྔགས་འཆོལ་བར་འགྱུར་གྱིས་བསལ་དཀའ་མོད། །ཉམས་དང་ཚོགས་འདྲེས་གྱུར་པ་བསྐངས་སོ་འཚལ། །བློ་སེམས་རྟུལ་བས་སྐྱོན་ཅན་མ་རྟོགས་ཏེ། །རང་གནོང་འགྱོད་པའི་སེམས་ཀྱིས་མཐོལ་བཤགས་ན། །གྲོགས་ངན་ཉམས་གྲིབ་སྐྱོན་གྱིས་མ་གོས་ཤིང༌། །ཉམས་པ་རྣམས་ལ་ཆད་པའི་སྒོ་བཅད་དེ། །འདི་ཕྱིའི་རྐྱེན་དང་སྒྲིབ་པར་མི་འགྱུར་བར། །ཕྲ་མེན་སྤྲུལ་ཚོགས་ཁྱེད་ཀྱིས་དབྱེ་བསལ་མཛད་དུ་གསོལ།། །།

[edit]

@#/__/mkha' 'gro'i smre bshags bzhugs so/__oM/__/ye shes mkha' 'gro dbang phyug khro rgyal gtso/__/bde chen gnyis med yum gyi dbyings su sbyor/__/bdag tu lta ba'i nga rgyal 'joms mdzad pa'i/__/dpang gyur rdo rje dam can dgongs su gsol/__/ta na'i gnas mchog sgrol ba gnas ma stobs/__/ga Na'i gnas mchog sbyor ba byin ma brlabs/__/dpal chen khro rgyal thugs dang ci 'gal ba/__/thugs rje che mnga' khyed la bzod par gsol/__/rmad du byung ba'i mchod pa tan gaN ni/__/ye shes lnga yi 'od zer rnam par 'phro/__/'dod pa lnga yi yon tan bsam yas kyis/__/ye shes mkha' 'gro'i thugs dam bskang gyur cig__/dpal chen khro rgyal yab yum thugs rje yis/__/rtse gcig sgrub pa po yi grogs mdzod la/__/bar gcod byed pa'i dgra bgegs rdul du rlog__/grub pa'i 'bras bu dus 'dir stsal du gsol/__hU~M/__rdo rje mkha' 'gro dbang phyug go ri brgyad/__/siM ha la sogs yul gyi phra men brgyad/__/rta gdong la sogs 'bar ma khro mo bzhi/__/dpang gyur rdo rje dam can dgongs su gsol/__oM/__sgom sgrub dus las g.yel bar gyur pa yis/__/sgrub pa'i rdzas mchog bdud rtsi a mr-i ta/__/dus drug mchod pa'i tshul du ma sbyar ba/__/bzod par gsol lo tshangs par stsal du gsol/__/byang chub sems dang mAM sa rak+ta dang*/__/dri chen dri chu go ku da ha na/__/gnyis med sbyar ba'i sman mchog a mr-i tas/__/rdo rje mkha' 'gro'i thugs dam bskang gyur cig__/'bar ba'i sku mchog rdzogs pa'i dkyil 'khor du/__/bdud dang srin po ma lus 'dul ba'i phyir/__/rtse gcig sgrub pa po la zhal ston la/__/bar gcod byed pa'i dgra bgegs rdul du rlog__oM/__sha za mkha' 'gro dbang phyug nyi shu brgyad/__/srid gsum rgyal mo dur khrod brgyad kyi yum/__/gtso mo mngon spyod ma bdun 'khor dang bcas/__/dpang gyur rdo rje dam can dgongs su gsol/__/mchod pa lo zla'i dus las 'das pa dang*/__/rdzas dang phyag rgya dus 'dir ma rdzogs shing*/__/sha khrag dmar gyi dam las g.yel gyur te/__/sha za mkha' 'gro'i thugs dang ci 'gal ba/__/bzod par gsol lo tshangs par stsal du gsol/__/dur khrod rdzas mchog thal chen ba su ta/__/sha khrag dmar gyi mchod pa rab sbyar te/__/b+han+d+ha'i snod du dmar chen bskyil ba 'dis/__/sha za mkha' 'gro'i thugs dam bskang gyur cig__oM/__sngon tshe dpal chen khro rgyal spyan snga ru/__/sus kyang ma bcol nyid kyis zhal 'ches te/__/rtse gcig sgrub pa po yi grogs mdzod la/__/rnal 'byor dbang phyug chen pos 'khor srungs shig__oM/__las kyi mkha' 'gro phyi yi rnal 'byor bzhi/__/bdag nyid chen mo la sogs ma mo'i tshogs/__/lha dang lha min phyogs bcu'i mkha' 'gro ma/__/dpang gyur rdo rje dam can dgongs su gsol/__/lta ba mthos pas spyod lam rtsings pa dang*/__/nya stong gso sbyong dus las g.yel gyur cing*/__/gnyid chang rmongs pas phyi mchod ma bskangs pa/__/bzod par gsol lo tshangs par stsal du gsol/__/dam tshig lhag ma kha chu'i 'od zer 'phro/__/kun tu bzang po'i mchod sprin a mr-i ta/__/sha khrag bdud rtsi'i mchod pa chen po 'dis/__/las kyi mkha' 'gro'i thugs dam bskang gyur cig__oM/__stong khams yongs su 'chol bar gyur mod kyang*/__/bdag ni rdo rje'i dam las mi 'da' zhing*/__/dpal chen sgom sgrub las la brtson lags na/__/skyes chen khyed kyi thugs dam mnyes gyur cig__/dur khrod klong dgu'i mkha' 'gro rnam bzhi'i tshogs/__/khams gsum 'khor ba'i sdug bsngal ci 'dra ba/__/byams mgon khyed kyi thugs la de ltar gsal/__/dmyal tshogs me ltar 'bar ba zhi bar mdzod/__/thugs rje'i gdung 'tshob rig 'dzin bdag gis ni/__/dang por byang chub mchog tu sems bskyed nas/__/'da' ka rdo rje dam tshig mchog gsum po/__/rgyal ba'i bka' las 'da' bar mi bgyid la/__/gsang sngags 'chol bar 'gyur gyis bsal dka' mod/__/nyams dang tshogs 'dres gyur pa bskangs so 'tshal/__/blo sems rtul bas skyon can ma rtogs te/__/rang gnong 'gyod pa'i sems kyis mthol bshags na/__/grogs ngan nyams grib skyon gyis ma gos shing*/__/nyams pa rnams la chad pa'i sgo bcad de/__/'di phyi'i rkyen dang sgrib par mi 'gyur bar/__/phra men sprul tshogs khyed kyis dbye bsal mdzad du gsol//___//