DKR-KABUM-22-ZA-024

🚧 This website is under continued development. We appreciate your patience!

Previous Text<ul><li>"textnuminvol::" can not be assigned to a declared number type with value 23.</li> <!--br--><li>Some use of "" in your query was not closed by a matching "".</li></ul> Back to Volume Page<ul><li>"]]" is not a number.</li> <!--br--><li>Some use of "" in your query was not closed by a matching "".</li></ul>Next Text <ul><li>"textnuminvol::" can not be assigned to a declared number type with value 25.</li> <!--br--><li>Some use of "" in your query was not closed by a matching "".</li></ul>

ཐུབ་ཆོག་བྱིན་རླབས་གཏེར་མཛོད།

Wylie title	thub chog byin rlabs gter mdzod
Location	dil mgo mkhyen brtse bka' 'bum Volume ', Text 24', Pages 218-221 (Folios 1a to 4b6)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Source Author(s)	མི་ཕམ་རྒྱ་མཚོ་ (mi pham rgya mtsho)
Citation	Khyentse, Dilgo. Thub chog byin rlabs gter mdzod. In Skyabs rje dil mgo mkhyen brtse rin po che'i bka' 'bum, Vol. 22: 218-221. Delhi: Shechen Publications, 1994.
Genre	Sadhanas - Evocation Ritual - sgrub thabs
Deity	Śākyamuni
Karchag page	<ul><li>"]]dkarchagpage::+" is not a number.</li> <!--br--><li>Some use of "" in your query was not closed by a matching "".</li></ul>
Colophon	།ཞེས་པ་འདི་ནི་བསླབ་གསུམ་ནོར་བུའི་མཛོད་མངའ་དབོན་རིན་པོ་ཆེ་ཨོ་རྒྱན་བསྟན་འཛིན་ནོར་བུ་ནས་བཀྲ་ཤིས་པའི་ལྷ་རྫས་དང་བཅས་ཏེ་ནན་ཏན་བསྐུལ་བ་ཡིད་ལ་འཇགས་པའི་སྟེང་དུ། ཉེ་ཆར་ཡང་དབོན་རིན་པོ་ཆེ་ཉིད་ནས་སྤྲུལ་པའི་སྐུ་འཇིགས་མེད་པདྨ་བདེ་ཆེན་ལ་སྦྲན་ཏེ། རིན་ཆེན་དང་པོ་སོགས་བཀྲ་ཤིས་པའི་ལྷ་རྫས་ཀྱི་སྐྱེས་དང་བཅས་མྱུར་དུ་གྲུབ་པར་གྱིས་ཞེས་དམ་པ་ཟུང་གི་བཀས་བསྐུལ་བ་ལ་བརྟེན་ནས། སྟོན་པ་མཆོག་ལ་མི་ཕྱེད་པའི་དད་པ་ཐོབ་ཅིང༌། དུས་མཐར་ཆོས་སྨྲ་བའི་མིང་ཙམ་འཛིན་པ་ཤཱཀྱའི་རྗེས་འཇུག་མི་ཕམ་འཇམ་དབྱངས་རྣམ་རྒྱལ་རྒྱ་མཚོས། རྫ་རྡོ་རྗེ་འཕན་ཕྱུག་གི་རི་ཞོལ་ཕུན་ཚོགས་ནོར་བུའི་གླིང་དུ། ཀུན་ལྡན་ལྕགས་བྱི་གསར་ཚེས་ཆོ་འཕྲུལ་ཆེན་པོའི་ཟླ་བའི་ཡར་ཚེས་བརྒྱད་ལ་གྲུབ་པར་བགྱིས་པ་འདིས་ཀྱང་བསྟན་འགྲོ་ལ་ཕན་པ་རྨད་དུ་བྱུང་བ་རྒྱུན་མི་འཆད་པར་བྱེད་པ་དང༌། ཚུལ་འདི་མཐོང་ཐོས་དྲན་རེག་གི་འགྲོ་བ་རྣམས་ཀྱི་རྒྱུད་ལ་སྟོན་པའི་དབང་པོའི་བྱིན་རླབས་མཚུངས་པ་མེད་པ་མངོན་དུ་འཇུག་པར་གྱུར་ཅིག །མངྒ་ལཾ།།
	/zhes pa 'di ni bslab gsum nor bu'i mdzod mnga' dbon rin po che o rgyan bstan 'dzin nor bu nas bkra shis pa'i lha rdzas dang bcas te nan tan bskul ba yid la 'jags pa'i steng du/_nye char yang dbon rin po che nyid nas sprul pa'i sku 'jigs med pad+ma bde chen la sbran te/_rin chen dang po sogs bkra shis pa'i lha rdzas kyi skyes dang bcas myur du grub par gyis zhes dam pa zung gi bkas bskul ba la brten nas/_ston pa mchog la mi phyed pa'i dad pa thob cing*/_dus mthar chos smra ba'i ming tsam 'dzin pa shAkya'i rjes 'jug mi pham 'jam dbyangs rnam rgyal rgya mtshos/_rdza rdo rje 'phan phyug gi ri zhol phun tshogs nor bu'i gling du/_kun ldan lcags byi gsar tshes cho 'phrul chen po'i zla ba'i yar tshes brgyad la grub par bgyis pa 'dis kyang bstan 'gro la phan pa rmad du byung ba rgyun mi 'chad par byed pa dang*/_tshul 'di mthong thos dran reg gi 'gro ba rnams kyi rgyud la ston pa'i dbang po'i byin rlabs mtshungs pa med pa mngon du 'jug par gyur cig_/mang+ga laM//

Tibetan Text

Wylie

[edit]

༄༅། །ཐུབ་ཆོག་བྱིན་རླབས་གཏེར་མཛོད་བཞུགས་སོ།།

༄༅། །ན་མོ་གུ་རུ་ཤཱཀྱ་མུ་ན་ཡེ། དེ་ཡང་མདོ་ཏིང་འཛིན་རྒྱལ་པོ་ལས། འཆག་དང་འདུག་དང་འགྲེང་དང་ཉལ་བ་ན། །མི་གང་ཐུབ་པའི་ཟླ་བ་དྲན་བྱེད་པ། །དེ་ཡི་མདུན་ན་རྟག་ཏུ་སྟོན་པ་བཞུགས། །དེ་ནི་རྒྱ་ཆེར་མྱ་ངན་འདས་པར་འགྱུར། །ཞེས་དང༌། སྐུ་ལུས་དག་ནི་གསེར་གྱི་མདོག་འདྲ་བས། །འཇིག་རྟེན་མགོན་པོ་ཀུན་ནས་རབ་ཏུ་མཛེས། །དམིགས་པ་འདི་ལ་གང་གི་སེམས་འཇུག་པ། །བྱང་ཆུབ་སེམས་དཔའ་དེ་ནི་མཉམ་བཞག་ཡིན། ཞེས་གསུངས་པ་བཞིན་དུ། བདག་ཅག་རྣམས་ཀྱི་སྟོན་པ་མཚུངས་པ་མེད་པ་ཐུབ་པའི་དབང་པོ་རྗེས་སུ་དྲན་པའི་རྣལ་འབྱོར་དུ་བྱ་བ་ནི་འདི་ལྟ་སྟེ། སངས་རྒྱས་ཆོས་དང་ཚོགས་ཀྱི་སོགས་སྐྱབས་སེམས་དང༌། ཚད་མེད་བཞི་བསྒོམ་པ་སྔོན་དུ་བཏང་སྟེ། ཆོས་ཐམས་ཅད་སྣང་ལ་རང་བཞིན་མ་གྲུབ་པའི་དོན་ཡིད་ལ་དྲན་པའི་ངང་ནས། ཨ། སྐྱེ་མེད་སྟོང་པ་ཉིད་དང་རྟེན་འབྱུང་གི །སྣང་བ་འགག་མེད་ཟུང་འཇུག་སྒྱུ་མའི་ཚུལ། །རང་མདུན་ནམ་མཁར་མཆོད་སྤྲིན་རྒྱ་མཚོའི་དབུས། །རིན་ཆེན་སེང་ཁྲི་པད་ཉི་ཟླ་བའི་སྟེང༌། །སྟོན་པ་མཚུངས་མེད་ཤཱཀྱ་སེང་གེ་ནི། །གསེར་གྱི་མདོག་ཅན་མཚན་དང་དཔེ་བྱད་ལྡན། །ཆོས་གོས་གསུམ་གསོལ་རྡོ་རྗེའི་སྐྱིལ་ཀྲུང་བཞུགས། །ཕྱག་གཡས་ས་གནོན་ཕྱག་རྒྱ་ལེགས་བརྐྱངས་ཤིང༌། །ཕྱག་གཡོན་མཉམ་བཞག་བདུད་རྩིའི་ལྷུང་བཟེད་བསྣམས། །གསེར་གྱི་རི་ལྟར་གཟི་བརྗིད་དཔལ་འབར་བ། །ཡེ་ཤེས་འོད་ཟེར་དྲྭ་བས་མཁའ་དབྱིངས་ཁྱབ། །ཉེ་བའི་སྲས་བརྒྱད་གནས་བརྟན་བཅུ་དྲུག་སོགས། །འཕགས་ཚོགས་རྒྱ་མཚོའི་འཁོར་གྱིས་ཡོངས་བསྐོར་ཞིང༌། །དྲན་པ་ཙམ་གྱིས་སྲིད་ཞིའི་མཐའ་གཉིས་ལས། །རྣལ་གྲོལ་བདེ་བ་མཆོག་གི་དཔལ་སྩོལ་བ། །སྐྱབས་ཀུན་འདུས་པའི་བདག་ཉིད་ཆེན་པོར་གསལ། །ཞེས་དེ་ལྟར་སངས་རྒྱས་ཀྱི་སྐུ་ལ་དམིགས་ཏེ་དོན་དངོས་སུ་བཞུགས་ཡོད་སྙམ་པའི་སེམས་བསྐྱེད་མ་ཐག་ཏུ། སངས་རྒྱས་རྣམས་ཀྱི་ཡེ་ཤེས་ཀྱི་སྐུ་ལ་ཕྱོགས་དང་དུས་གང་དུ་ཡང་ཉེ་རིང་མི་མངའ་བའི་ཕྱིར། གང་དུ་དམིགས་པ་དེ་ཉིད་དུ་ངེས་པར་བཞུགས་པར་འགྱུར་ཏེ། མདོ་ལས། གང་ཞིག་སངས་རྒྱས་ཡིད་བྱེད་པ། །དེ་ཡི་མདུན་ན་དེ་བཞུགས་ཏེ། །རྟག་པར་བྱིན་གྱིས་རློབ་བྱེད་ཅིང༌། །ཉེས་པ་ཀུན་ལས་རྣམ་པར་གྲོལ། །ཞེས་གསུངས་ཤིང༌། རྒྱལ་བ་དེ་ཉིད་ལ་དམིགས་ནས་ཚོགས་བསགས་པ་ཡང་མི་ཟད་པའི་དགེ་རྩ་ཆུད་མི་ཟ་བ་ཡིན་ཏེ། ཕལ་པོ་ཆེ་ལས། རྒྱལ་བ་དེ་དག་ཐོས་མཐོང་མཆོད་པ་བྱས་པས་ཀྱང༌། །ཚད་མེད་པ་ཡི་བསོད་ནམས་ཕུང་པོ་འཕེལ་བར་འགྱུར། །ཉོན་མོངས་འཁོར་བའི་སྡུག་བསྔལ་ཐམས་ཅད་སྤང་གྱུར་དུ། །འདུས་བྱས་འདི་ནང་བར་མ་དོར་ནི་ཟད་མི་འགྱུར། ཞེས་དང༌། དེའི་མདུན་དུ་སྨོན་ལམ་ཇི་ལྟར་བཏབ་པ་ཡང་དེ་བཞིན་དུ་འགྲུབ་སྟེ། འཇམ་དཔལ་ཞིང་གི་ཡོན་ཏན་བསྟན་པ་ལས། ཆོས་རྣམས་ཐམས་ཅད་རྐྱེན་བཞིན་ཏེ། །འདུན་པའི་རྩེ་ལ་རབ་ཏུ་གནས། །གང་གིས་སྨོན་ལམ་ཅི་བཏབ་པ། །དེ་འདྲའི་འབྲས་བུ་ཐོབ་པར་འགྱུར། །ཞེས་གསུངས་པའི་ཚུལ་རྣམས་ལ་ངེས་པ་བརྟན་པོ་བསྐྱེད་དེ། སྙིང་རྗེ་ཆེན་པོས་རྩོད་ལྡན་སྙིགས་མའི་ཞིང༌། །བཟུང་ནས་སྨོན་ལམ་ཆེན་པོ་ལྔ་བརྒྱ་བཏབ། །པད་དཀར་ལྟར་བསྔགས་མཚན་ཐོས་ཕྱིར་མི་ལྡོག །སྟོན་པ་ཐུགས་རྗེ་ཅན་ལ་ཕྱག་འཚལ་ལོ། །བདག་གཞན་སྒོ་གསུམ་དགེ་ཚོགས་ལོངས་སྤྱོད་བཅས། །ཀུན་བཟང་མཆོད་པའི་སྤྲིན་དུ་དམིགས་ནས་འབུལ། །ཐོག་མེད་ནས་བསགས་སྡིག་ལྟུང་མ་ལུས་པ། །སྙིང་ནས་འགྱོད་པ་དྲག་པོས་སོ་སོར་བཤགས། །འཕགས་དང་སོ་སོའི་སྐྱེ་བོའི་དགེ་བ་ནི། །དུས་གསུམ་བསགས་ལ་རྗེས་སུ་ཡི་རང་ངོ༌། །ཟབ་ཅིང་རྒྱ་ཆེ་ཆོས་ཀྱི་འཁོར་ལོའི་ཚུལ། །ཕྱོགས་བཅུར་རྒྱུན་མི་འཆད་པར་བསྐོར་དུ་གསོལ། །ཁྱོད་ནི་ནམ་མཁའ་ལྟ་བུའི་ཡེ་ཤེས་སྐུ། །དུས་གསུམ་འཕོ་འགྱུར་མེད་པར་བཞུགས་མོད་ཀྱི། །གདུལ་བྱའི་སྣང་ངོར་སྐྱེ་འཇིག་ཚུལ་སྟོན་ཀྱང༌། །སྤྲུལ་པའི་གཟུགས་སྐུ་རྟག་ཏུ་སྣང་བར་མཛོད། །བདག་གིས་དུས་གསུམ་བསགས་པའི་དགེ་ཚོགས་ཀྱིས། །མཁའ་ཁྱབ་འགྲོ་བ་ཀུན་ལ་ཕན་སླད་དུ། །ཆོས་ཀྱི་རྒྱལ་པོ་རྟག་ཏུ་མཉེས་བྱེད་ཅིང༌། །ཆོས་རྗེ་རྒྱལ་བའི་གོ་འཕང་ཐོབ་པར་ཤོག །བདག་ཅག་སྙིགས་མའི་འགྲོ་བ་མགོན་མེད་རྣམས། །ཐུགས་རྗེས་ལྷག་པར་བཟུང་བའི་བཀའ་དྲིན་ལས། །ཞིང་དང་དུས་འདིར་རིན་ཆེན་རྣམ་གསུམ་གྱི། །སྣང་བ་ཇི་སྙེད་ཁྱོད་ཀྱི་ཕྲིན་ལས་ཉིད། །དེ་ཕྱིར་སྐྱབས་མཆོག་མཚུངས་མེད་གཅིག་པུ་རུ། །ཡིད་ཆེས་དད་པས་སྙིང་ནས་གསོལ་འདེབས་ན། །སྔོན་གྱི་དམ་བཅའ་ཆེན་པོ་མ་བསྙེལ་བར། །བྱང་ཆུབ་བར་དུ་ཐུགས་རྗེས་དགྱེས་འཛིན་མཛོད། །ཅེས་ཡིད་ཆེས་ཀྱི་དད་པ་དྲག་པོས་སྟོན་པ་དངོས་སུ་བཞུགས་ཡོད་སྙམ་པའི་སྐུ་ལ་རྩེ་གཅིག་ཏུ་དམིགས་ཏེ། བླ་མ་སྟོན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་རྒྱལ་བ་ཤཱཀྱ་ཐུབ་པ་ལ་ཕྱག་འཚལ་ལོ། །མཆོད་དོ། །སྐྱབས་སུ་མཆིའོ། །ཞེས་ཅི་འགྲུབ་དང༌། ཐུགས་རྒྱུད་བསྐུལ་བའི་ཚུལ་དུ་ཤེར་ཕྱིན་ཡི་གེ་ཉུང་ངུ་ལས་གསུངས་པའི་གཟུངས་ནི། ཏདྱ་ཐཱ། ཨོཾ་མུ་ནེ་མུ་ནེ་མ་ཧཱ་མུ་ན་ཡེ་སྭཱ་ཧཱ། ཞེས་ཅི་རིགས་དང༌། ཨོཾ་མན་ཆད་ཅི་འགྲུབ་ཏུ་བཟླའོ། །འདི་དག་གི་སྐབས་སུ་སྟོན་པའི་ཡོན་ཏན་རྗེས་སུ་དྲན་ཏེ། དད་པའི་སེམས་ཀྱིས་རྩེ་གཅིག་ཏུ་སྐུ་ཡི་གསལ་སྣང་ལ་དམིགས་ནས། མཚན་བརྗོད་པ་དང་གཟུངས་བཟླས་པའི་རྐྱེན་གྱིས། སྟོན་པའི་སྐུ་ལས་ཡེ་ཤེས་ཀྱི་འོད་ཟེར་སྣ་ཚོགས་པའི་སྣང་བ་ཆེན་པོས་བདག་དང་སེམས་ཅན་ཐམས་ཅད་ཀྱི་སྒྲིབ་པ་ཐམས་ཅད་བསལ་ཞིང༌། ཐེག་པ་ཆེན་པོའི་ལམ་གྱི་ཡོན་ཏན་ཚུལ་བཞིན་དུ་སྐྱེས་ཏེ་ཕྱིར་མི་ལྡོག་པའི་ས་ནོན་པར་བསམ་ལ་དེ་ལྟར་ཅི་ནུས་སུ་བརྩོན་པར་བྱ། ཐུན་མཚམས་རྣམས་སུ་མཎྜལ་སོགས་མཆོད་པ་དང༌། ཐུབ་བསྟོད་ཀྱི་རིགས་དང༌། སྙིང་རྗེ་པད་དཀར། རྒྱ་ཆེར་རོལ་པ། སྐྱེས་རབས་སྣ་ཚོགས། དེ་བཞིན་གཤེགས་པའི་མཚན་བརྒྱ་རྩ་བརྒྱད་པ་སོགས་མདོ་གང་འདོད་ཅི་ལྟར་ནུས་པར་བཀླག །དགེ་བའི་རྩ་བ་རྣམས་བླ་མེད་བྱང་ཆུབ་ཏུ་བསྔོ་བ་དང་སྨོན་ལམ་གྱི་རྒྱས་གདབ་པར་བྱའོ། །སྤྱིར་འགྲོ་འཆག་ཉལ་འདུག་གི་སྐབས་ཀུན་ཏུ་སྟོན་པ་ཉིད་མ་བརྗེད་པར་དྲན་པ་དང༌། མཚན་མོ་ཡང་སྟོན་པ་དངོས་སུ་བཞུགས་པའི་སྐུ་ཡི་འོད་ཀྱིས་ཕྱོགས་ཐམས་ཅད་ཉིན་མོ་ཤིན་ཏུ་དྭངས་པའི་དུས་ལྟ་བུར་སྣང་བའི་འདུ་ཤེས་ཀྱི་ངང་དུ་གཉིད་ལོག་པར་བྱ། དུས་རྒྱུན་དུ་སྟོན་པ་ཉིད་ཀྱིས་སྔོན་ཇི་ལྟར་ཐུགས་བསྐྱེད་པའི་ཚུལ་ལས་བརྩམས་ཏེ། དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ་ཆེན་པོ་རྣམས་ཀྱི་རྣམ་པར་ཐར་པ་ལ་རྗེས་སུ་གཞོལ་བས་བྱང་ཆུབ་ཀྱི་སེམས་རིན་པོ་ཆེའི་དམ་བཅའ་ལྷོད་པ་མེད་པའི་ངང་ནས་བྱང་ཆུབ་སེམས་དཔའི་སྤྱོད་པ་སྤྱི་དང༌། ཁྱད་པར་ཞི་ལྷག་གི་རྣལ་འབྱོར་ལ་ཅི་ནུས་སུ་བརྩོན་པར་བྱས་པས་དལ་འབྱོར་ཐོབ་པ་དོན་ལྡན་དུ་འགྱུར་ཏེ། བདག་ཅག་གི་སྟོན་པ་འདི་ཉིད་ཀྱི་མཚན་ཐོས་པ་ཙམ་ཞིག་གིས་རིམ་གྱིས་བྱང་ཆུབ་ཆེན་པོའི་ལམ་ལས་ཕྱིར་མི་ལྡོག་པར་འགྱུར་བ་མདོ་དུ་མ་ནས་གསུངས་ལ། གོང་དུ་བསྟན་པའི་གཟུངས་འདི་ལས་སངས་རྒྱས་ཐམས་ཅད་འབྱུང་ཞིང༌། གཟུངས་འདི་རྙེད་པའི་མཐུས་ཤཱཀྱའི་རྒྱལ་པོ་ཉིད་སངས་རྒྱས་ཤིང༌། སྤྱན་རས་གཟིགས་བྱང་ཆུབ་སེམས་དཔའི་མཆོག་ཏུ་གྱུར་པ་དང༌། གཟུངས་འདི་ནི་ཐོས་པ་ཙམ་གྱིས་བསོད་ནམས་རྒྱ་ཆེན་པོ་ཚེགས་མེད་པར་འཐོབ་ཅིང་ལས་གྱི་སྒྲིབ་པ་ཐམས་ཅད་བྱང་བ་དང༌། སྔགས་སྒྲུབ་པ་ན་བགེགས་མ་མཆིས་པར་གྲུབ་པར་འགྱུར་རོ་ཞེས་ཤེས་རབ་ཀྱི་ཕ་རོལ་ཏུ་ཕྱིན་པ་ཡི་གེ་ཉུང་ངུ་ཞེས་པ་དེ་ཉིད་ལས་གསུངས་ཤིང༌། བཀའ་གཞན་ལས་ཀྱང་གཟུངས་འདི་ལན་གཅིག་བཟླས་པས་བསྐལ་པ་བྱེ་བ་བརྒྱ་ཕྲག་བརྒྱད་ཁྲིའི་བར་དུ་བྱས་པའི་སྡིག་པ་ཐམས་ཅད་བྱང་བར་འགྱུར་བ་སོགས་ཕན་ཡོན་ཚད་མེད་པ་དང་ལྡན་ཞིང༌། དེ་བཞིན་གཤེགས་པ་ཤཱཀྱ་ཐུབ་པའི་སྙིང་པོ་དམ་པ་ཉིད་དུ་གསུངས་སོ། །དད་པ་བསྐྱེད་པ་དང་ཞི་ལྷག་གི་རྣལ་འབྱོར་ལ་ཇི་ལྟར་བརྩོན་པའི་ཚུལ་ཟུར་དུ་བཤད་པར་བྱའོ། །ཞེས་པ་འདི་ནི་བསླབ་གསུམ་ནོར་བུའི་མཛོད་མངའ་དབོན་རིན་པོ་ཆེ་ཨོ་རྒྱན་བསྟན་འཛིན་ནོར་བུ་ནས་བཀྲ་ཤིས་པའི་ལྷ་རྫས་དང་བཅས་ཏེ་ནན་ཏན་བསྐུལ་བ་ཡིད་ལ་འཇགས་པའི་སྟེང་དུ། ཉེ་ཆར་ཡང་དབོན་རིན་པོ་ཆེ་ཉིད་ནས་སྤྲུལ་པའི་སྐུ་འཇིགས་མེད་པདྨ་བདེ་ཆེན་ལ་སྦྲན་ཏེ། རིན་ཆེན་དང་པོ་སོགས་བཀྲ་ཤིས་པའི་ལྷ་རྫས་ཀྱི་སྐྱེས་དང་བཅས་མྱུར་དུ་གྲུབ་པར་གྱིས་ཞེས་དམ་པ་ཟུང་གི་བཀས་བསྐུལ་བ་ལ་བརྟེན་ནས། སྟོན་པ་མཆོག་ལ་མི་ཕྱེད་པའི་དད་པ་ཐོབ་ཅིང༌། དུས་མཐར་ཆོས་སྨྲ་བའི་མིང་ཙམ་འཛིན་པ་ཤཱཀྱའི་རྗེས་འཇུག་མི་ཕམ་འཇམ་དབྱངས་རྣམ་རྒྱལ་རྒྱ་མཚོས། རྫ་རྡོ་རྗེ་འཕན་ཕྱུག་གི་རི་ཞོལ་ཕུན་ཚོགས་ནོར་བུའི་གླིང་དུ། ཀུན་ལྡན་ལྕགས་བྱི་གསར་ཚེས་ཆོ་འཕྲུལ་ཆེན་པོའི་ཟླ་བའི་ཡར་ཚེས་བརྒྱད་ལ་གྲུབ་པར་བགྱིས་པ་འདིས་ཀྱང་བསྟན་འགྲོ་ལ་ཕན་པ་རྨད་དུ་བྱུང་བ་རྒྱུན་མི་འཆད་པར་བྱེད་པ་དང༌། ཚུལ་འདི་མཐོང་ཐོས་དྲན་རེག་གི་འགྲོ་བ་རྣམས་ཀྱི་རྒྱུད་ལ་སྟོན་པའི་དབང་པོའི་བྱིན་རླབས་མཚུངས་པ་མེད་པ་མངོན་དུ་འཇུག་པར་གྱུར་ཅིག །མངྒ་ལཾ།།

[edit]

@#/_/thub chog byin rlabs gter mdzod bzhugs so// @#/_/na mo gu ru shAkya mu na ye/_de yang mdo ting 'dzin rgyal po las/_'chag dang 'dug dang 'greng dang nyal ba na/_/mi gang thub pa'i zla ba dran byed pa/_/de yi mdun na rtag tu ston pa bzhugs/_/de ni rgya cher mya ngan 'das par 'gyur/_/zhes dang*/_sku lus dag ni gser gyi mdog 'dra bas/_/'jig rten mgon po kun nas rab tu mdzes/_/dmigs pa 'di la gang gi sems 'jug pa/_/byang chub sems dpa' de ni mnyam bzhag yin/_zhes gsungs pa bzhin du/_bdag cag rnams kyi ston pa mtshungs pa med pa thub pa'i dbang po rjes su dran pa'i rnal 'byor du bya ba ni 'di lta ste/_sangs rgyas chos dang tshogs kyi sogs skyabs sems dang*/_tshad med bzhi bsgom pa sngon du btang ste/_chos thams cad snang la rang bzhin ma grub pa'i don yid la dran pa'i ngang nas/_a/_skye med stong pa nyid dang rten 'byung gi_/snang ba 'gag med zung 'jug sgyu ma'i tshul/_/rang mdun nam mkhar mchod sprin rgya mtsho'i dbus/_/rin chen seng khri pad nyi zla ba'i steng*/_/ston pa mtshungs med shAkya seng ge ni/_/gser gyi mdog can mtshan dang dpe byad ldan/_/chos gos gsum gsol rdo rje'i skyil krung bzhugs/_/phyag g.yas sa gnon phyag rgya legs brkyangs shing*/_/phyag g.yon mnyam bzhag bdud rtsi'i lhung bzed bsnams/_/gser gyi ri ltar gzi brjid dpal 'bar ba/_/ye shes 'od zer drwa bas mkha' dbyings khyab/_/nye ba'i sras brgyad gnas brtan bcu drug sogs/_/'phags tshogs rgya mtsho'i 'khor gyis yongs bskor zhing*/_/dran pa tsam gyis srid zhi'i mtha' gnyis las/_/rnal grol bde ba mchog gi dpal stsol ba/_/skyabs kun 'dus pa'i bdag nyid chen por gsal/_/zhes de ltar sangs rgyas kyi sku la dmigs te don dngos su bzhugs yod snyam pa'i sems bskyed ma thag tu/_sangs rgyas rnams kyi ye shes kyi sku la phyogs dang dus gang du yang nye ring mi mnga' ba'i phyir/_gang du dmigs pa de nyid du nges par bzhugs par 'gyur te/_mdo las/_gang zhig sangs rgyas yid byed pa/_/de yi mdun na de bzhugs te/_/rtag par byin gyis rlob byed cing*/_/nyes pa kun las rnam par grol/_/zhes gsungs shing*/_rgyal ba de nyid la dmigs nas tshogs bsags pa yang mi zad pa'i dge rtsa chud mi za ba yin te/_phal po che las/_rgyal ba de dag thos mthong mchod pa byas pas kyang*/_/tshad med pa yi bsod nams phung po 'phel bar 'gyur/_/nyon mongs 'khor ba'i sdug bsngal thams cad spang gyur du/_/'dus byas 'di nang bar ma dor ni zad mi 'gyur/_zhes dang*/_de'i mdun du smon lam ji ltar btab pa yang de bzhin du 'grub ste/_'jam dpal zhing gi yon tan bstan pa las/_chos rnams thams cad rkyen bzhin te/_/'dun pa'i rtse la rab tu gnas/_/gang gis smon lam ci btab pa/_/de 'dra'i 'bras bu thob par 'gyur/_/zhes gsungs pa'i tshul rnams la nges pa brtan po bskyed de/__snying rje chen pos rtsod ldan snyigs ma'i zhing*/_/bzung nas smon lam chen po lnga brgya btab/_/pad dkar ltar bsngags mtshan thos phyir mi ldog_/ston pa thugs rje can la phyag 'tshal lo/_/bdag gzhan sgo gsum dge tshogs longs spyod bcas/_/kun bzang mchod pa'i sprin du dmigs nas 'bul/_/thog med nas bsags sdig ltung ma lus pa/_/snying nas 'gyod pa drag pos so sor bshags/_/'phags dang so so'i skye bo'i dge ba ni/_/dus gsum bsags la rjes su yi rang ngo*/_/zab cing rgya che chos kyi 'khor lo'i tshul/_/phyogs bcur rgyun mi 'chad par bskor du gsol/_/khyod ni nam mkha' lta bu'i ye shes sku/_/dus gsum 'pho 'gyur med par bzhugs mod kyi/_/gdul bya'i snang ngor skye 'jig tshul ston kyang*/_/sprul pa'i gzugs sku rtag tu snang bar mdzod/_/bdag gis dus gsum bsags pa'i dge tshogs kyis/_/mkha' khyab 'gro ba kun la phan slad du/_/chos kyi rgyal po rtag tu mnyes byed cing*/_/chos rje rgyal ba'i go 'phang thob par shog_/bdag cag snyigs ma'i 'gro ba mgon med rnams/_/thugs rjes lhag par bzung ba'i bka' drin las/_/zhing dang dus 'dir rin chen rnam gsum gyi/_/snang ba ji snyed khyod kyi phrin las nyid/_/de phyir skyabs mchog mtshungs med gcig pu ru/_/yid ches dad pas snying nas gsol 'debs na/_/sngon gyi dam bca' chen po ma bsnyel bar/_/byang chub bar du thugs rjes dgyes 'dzin mdzod/_/ces yid ches kyi dad pa drag pos ston pa dngos su bzhugs yod snyam pa'i sku la rtse gcig tu dmigs te/_bla ma ston pa bcom ldan 'das de bzhin gshegs pa dgra bcom pa yang dag par rdzogs pa'i sangs rgyas dpal rgyal ba shAkya thub pa la phyag 'tshal lo/_/mchod do/_/skyabs su mchi'o/_/zhes ci 'grub dang*/_thugs rgyud bskul ba'i tshul du sher phyin yi ge nyung ngu las gsungs pa'i gzungs ni/_tad+ya thA/_oM mu ne mu ne ma hA mu na ye swA hA/_zhes ci rigs dang*/_oM man chad ci 'grub tu bzla'o/__/'di dag gi skabs su ston pa'i yon tan rjes su dran te/_dad pa'i sems kyis rtse gcig tu sku yi gsal snang la dmigs nas/_mtshan brjod pa dang gzungs bzlas pa'i rkyen gyis/_ston pa'i sku las ye shes kyi 'od zer sna tshogs pa'i snang ba chen pos bdag dang sems can thams cad kyi sgrib pa thams cad bsal zhing*/_theg pa chen po'i lam gyi yon tan tshul bzhin du skyes te phyir mi ldog pa'i sa non par bsam la de ltar ci nus su brtson par bya/_thun mtshams rnams su maN+Dal sogs mchod pa dang*/_thub bstod kyi rigs dang*/_snying rje pad dkar/_rgya cher rol pa/_skyes rabs sna tshogs/_de bzhin gshegs pa'i mtshan brgya rtsa brgyad pa sogs mdo gang 'dod ci ltar nus par bklag_/dge ba'i rtsa ba rnams bla med byang chub tu bsngo ba dang smon lam gyi rgyas gdab par bya'o/__/spyir 'gro 'chag nyal 'dug gi skabs kun tu ston pa nyid ma brjed par dran pa dang*/_mtshan mo yang ston pa dngos su bzhugs pa'i sku yi 'od kyis phyogs thams cad nyin mo shin tu dwangs pa'i dus lta bur snang ba'i 'du shes kyi ngang du gnyid log par bya/__dus rgyun du ston pa nyid kyis sngon ji ltar thugs bskyed pa'i tshul las brtsams te/_dus gsum gyi sangs rgyas dang byang chub sems dpa' chen po rnams kyi rnam par thar pa la rjes su gzhol bas byang chub kyi sems rin po che'i dam bca' lhod pa med pa'i ngang nas byang chub sems dpa'i spyod pa spyi dang*/_khyad par zhi lhag gi rnal 'byor la ci nus su brtson par byas pas dal 'byor thob pa don ldan du 'gyur te/__bdag cag gi ston pa 'di nyid kyi mtshan thos pa tsam zhig gis rim gyis byang chub chen po'i lam las phyir mi ldog par 'gyur ba mdo du ma nas gsungs la/_gong du bstan pa'i gzungs 'di las sangs rgyas thams cad 'byung zhing*/_gzungs 'di rnyed pa'i mthus shAkya'i rgyal po nyid sangs rgyas shing*/_spyan ras gzigs byang chub sems dpa'i mchog tu gyur pa dang*/_gzungs 'di ni thos pa tsam gyis bsod nams rgya chen po tshegs med par 'thob cing las gyi sgrib pa thams cad byang ba dang*/_sngags sgrub pa na bgegs ma mchis par grub par 'gyur ro zhes shes rab kyi pha rol tu phyin pa yi ge nyung ngu zhes pa de nyid las gsungs shing*/_bka' gzhan las kyang gzungs 'di lan gcig bzlas pas bskal pa bye ba brgya phrag brgyad khri'i bar du byas pa'i sdig pa thams cad byang bar 'gyur ba sogs phan yon tshad med pa dang ldan zhing*/_de bzhin gshegs pa shAkya thub pa'i snying po dam pa nyid du gsungs so/__/dad pa bskyed pa dang zhi lhag gi rnal 'byor la ji ltar brtson pa'i tshul zur du bshad par bya'o/__/zhes pa 'di ni bslab gsum nor bu'i mdzod mnga' dbon rin po che o rgyan bstan 'dzin nor bu nas bkra shis pa'i lha rdzas dang bcas te nan tan bskul ba yid la 'jags pa'i steng du/_nye char yang dbon rin po che nyid nas sprul pa'i sku 'jigs med pad+ma bde chen la sbran te/_rin chen dang po sogs bkra shis pa'i lha rdzas kyi skyes dang bcas myur du grub par gyis zhes dam pa zung gi bkas bskul ba la brten nas/_ston pa mchog la mi phyed pa'i dad pa thob cing*/_dus mthar chos smra ba'i ming tsam 'dzin pa shAkya'i rjes 'jug mi pham 'jam dbyangs rnam rgyal rgya mtshos/_rdza rdo rje 'phan phyug gi ri zhol phun tshogs nor bu'i gling du/_kun ldan lcags byi gsar tshes cho 'phrul chen po'i zla ba'i yar tshes brgyad la grub par bgyis pa 'dis kyang bstan 'gro la phan pa rmad du byung ba rgyun mi 'chad par byed pa dang*/_tshul 'di mthong thos dran reg gi 'gro ba rnams kyi rgyud la ston pa'i dbang po'i byin rlabs mtshungs pa med pa mngon du 'jug par gyur cig_/mang+ga laM//