DKR-KABUM-22-ZA-008

🚧 This website is under continued development. We appreciate your patience!

Previous Text Back to Volume PageNext Text

Wylie title	'
Location	dil mgo mkhyen brtse bka' 'bum Volume 22, Text 8, Pages (Folios 1a to )
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	ཨོ་རྒྱན་གླིང་པ་, འཇམ་དབྱངས་མཁྱེན་བརྩེའི་དབང་པོ་ (o rgyan gling pa, 'jam dbyangs mkhyen brtse'i dbang po)
Citation	Khyentse, Dilgo. '. In Skyabs rje dil mgo mkhyen brtse rin po che'i bka' 'bum, Vol. 22: . Delhi: Shechen Publications, 1994.
Genre	Sadhanas - Evocation Ritual - sgrub thabs
Cycle	དཔལ་བཀའ་འདུས་ཆོས་ཀྱི་རྒྱ་མཚོ་ (dpal bka' 'dus chos kyi rgya mtsho)
Deity	zhi khro

Tibetan Text

Wylie

[edit]

༼༑ྃ༽ དཔལ་བཀའ་འདུས་གསང་བ་སྙིང་ཏིག་སྙིང་པོ་དོན་གྱི་མན་ངག་ཟབ་མོ་ཧཱུྃ་གི་སྒྲུབ་ཐབས་བཞུགས༔ ༼༑ྃ༽ ༔བརྡ་ཡིག༔༔ དཔལ་ཧེ་རུ་ཀ་ཆེན་པོ་ལ་ཕྱག་འཚལ་ལོ༔ ཧཱུྃ་ཆེན་ཐུགས་ཀྱི་ཡེ་ཤེས་ནི༔ འཇོམས་དང་གཅོད་དང་འབར་བ་ཆེ༔ ཐོགས་མེད་མི་འགྱུར་སྲོག་གི་ཏིག༔ ཡི་གེ་ཆེན་པོ་སྒྲ་ཆེན་ལྡན༔ དཀྱིལ་འཁོར་ལས་རྣམས་མ་ལུས་འབྱུང༔ དེ་ཕྱིར་ནང་གི་རྣལ་འབྱོར་པས༔ མཉམ་བཞག་ཏིང་འཛིན་གཙོར་བཏོན་ཏེ༔ དབང་དང་བསྐྱེད་རྫོགས་རྣལ་འབྱོར་ལས༔ ཀུན་ཀྱང་ཧཱུྃ་ལ་བསྟེན་ནས་སྒྲུབ༔ ས་མ་ཡ༔ ཡེ་ཤེས་ཐུགས་ཀྱི་དཀྱིལ་འཁོར་ནི༔ རྡོ་རྗེ་གསང་བ་ཧཱུྃ་དུ་གནས༔ བརྡ་ཡི་དཀྱིལ་འཁོར་ལ་བསྟེན་ནས༔ རྫས་རྣམས་གཞུང་ལྟར་ཚོགས་པར་བཤམས༔ ཡང་དག་སྒྲུབ་པའི་གཞུང་བསྲངས་ཏེ༔ སྣོད་ལྡན་སློབ་མ་སྨིན་པར་བྱ༔ བསྟན་པའི་བབ་དང་ལོ་རྒྱུས་བཤད༔ མཎྜལ་ཕུལ་ལ་གསོལ་གསུམ་གདབ༔ བླ་མ་དཔལ་ཆེན་ཧེ་རུ་ཀ༔ དཀྱིལ་འཁོར་ཀུན་གྱི་ཁྱབ་བདག་ཆེ༔ རྡོ་རྗེ་གསུམ་གྱི་དཀྱིལ་འཁོར་དུ༔ འཇུག་ཅིང་སྨིན་པར་མཛད་དུ་གསོལ༔ གསོལ་བཏབ་ཐུགས་རྗེས་འཛིན་པའི་བརྡར༔ ཧོ༔ ལས་དང་སྙིང་པོའི་སྐལ་པ་ལྡན༔ དད་བརྩོན་བློ་གྲོས་རྨད་དུ་བྱུང༔ ཡང་དག་ངེས་པའི་ལམ་འདོད་ན༔ དཀྱིལ་འཁོར་བཞི་རུ་སྨིན་པར་བྱ༔ གནང་སྦྱིན་བཀའ་ནན་རྣམ་པ་བཅུའི༔ བསགས་སྦྱང་རྒྱུད་ནི་དག་པར་བྱ༔ ཕྱི་རུ་དབང་གི་རྟེན་འབྲེལ་བསྒྲིགས༔ ངེས་པར་དཀྱིལ་འཁོར་དུ་གཞུག་ཕྱིར༔ རྡོ་རྗེ་སེམས་དཔའི་ཆུ་ནན་སྦྱིན༔ སྲོག་གི་ཏི་ལ་ཀ་བསྟིམ་བསྲེ༔ སློབ་མའི་ལུས་སྦྱངས་འོད་ཀྱི་ཐིག༔ ཧེ་རུ་ཀ་ཡི་ཞལ་ཞུགས་བཞུ༔ མཁའ་གསང་ནས་སྤྲོས་ལྷག་པའི་སེམས༔ དངུལ་ཆུའི་གོང་བུ་ལྟ་བུ་ཡང༔ དཀྱིལ་འཁོར་ཤར་སྒོར་དབང་སྟེགས་བཞག༔ དཀྱིལ་འཁོར་གཙོ་བོའི་སྐུར་བསྐྱེད་ལ༔ གནས་གསུམ་བྱིན་རླབས་གདུང་ཤུགས་བསྐྱེད༔ སྤོས་རོལ་དང་བཅས་དབྱངས་ཀྱིས་བསྐུལ༔ ཕྱོགས་དུས་བླ་མ་རྒྱལ་བ་སྲས༔ དཔའ་བོ་རྣལ་འབྱོར་མའི་ཚོགས་བཅས༔ སྟེང་འོག་བར་གསུམ་ཁྱབ་པར་བྱོན༔ སློབ་མའི་ལུས་ཞུགས་ནང་ཀུན་ཁེངས༔ མངོན་སུམ་བྱིན་རླབས་གཟི་འབར་ཞིང༔ བདེ་གསལ་མི་རྟོག་ཡེ་ཤེས་སྐྱེས༔ བྱུང་རྒྱལ་ཉམས་བསྐྱངས་བརྟན་པར་བཞུགས༔ ཕྱི་ནང་འཇུག་པའི་ཆོས་སྔོན་འགྲོའི་ཡི༔ ཐོག་མར་བུམ་པའི་དབང་སྐུར་སྦྱིན༔ ཨོཾ༔ སྣང་སྟོང་ཡེ་ཤེས་སྒྱུ་འཕྲུལ་དྲྭ་བ་ཡི༔ སྐུ་ཡི་བུམ་པར་ཡེ་ཤེས་བདུད་རྩིས་གཏམས༔ སྐལ་ལྡན་རིགས་ཀྱི་བུ་ལ་དབང་སྐུར་བས༔ ཕུང་ཁམས་སྐྱེ་མཆེད་གཉུག་མའི་ལྷར་སྨིན་ཤོག༔ ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡེ་ཤྲཱི་ཧཱུྃ༔ བདུད་རྩིའི་ལུས་གང་སྒྲིབ་ཚོགས་བཀྲུས༔ ཡེ་ཤེས་ནུས་པ་མངོན་སུམ་སྨིན༔ ལྷ་དང་སྐལ་མཉམ་བྱས་པ་ཡིན༔ མ་ཧཱའི་སྤྲོས་བཅས་སྒྲུབ་དབང་རྫོགས༔ སློབ་དཔོན་བདེ་ཆེན་ཧེ་རུ་ཀ༔ སྟངས་དཔྱལ་སྦྱོར་བའི་འོད་དང་སྒྲས༔ རྒྱལ་ཀུན་ཆགས་པ་ཆེ་བསྐུལ་ཏེ༔ དབང་ཕྱུག་ཞལ་ཞུགས་རྗེས་ཆགས་ཀྱིས༔ བཞུས་པའི་སེམས་སྤྲིན་མཁའ་རུ་བསྐྱིལ༔ རྡོ་རྗེའི་ལྕེ་ལ་དངོས་སུ་བཞག༔ ཨཱཿ གསལ་སྟོང་གཉིས་མེད་ལྷག་པའི་སེམས་ཀྱི་སྤྲིན༔ མཆོག་ཏུ་མི་འགྱུར་རྡོ་རྗེ་སེམས་དཔའི་བཅུད༔ སྐལ་ལྡན་བུ་ཡི་ལྕེར་བཞག་མྱང་བའི་མཐུས༔ རྟོག་བྲལ་བདེ་བའི་དེ་ཉིད་མངོན་གྱུར་ཤོག༔ ཨོཾ་བོ་དྷི་ཙིཏྟ་མ་ཧཱ་སུ་ཁ་ཨ་བྷི་ཥིཉྩ་ཨཱ༔ བདུད་རྩི་ཞུ་བས་དཀར་དམར་ཁམས༔ གཡོས་པའི་བདེ་བས་རྟོག་པ་འགགས༔ ལྷན་སྐྱེས་དོན་གྱི་དགོངས་པའི་མཐུ༔ མངོན་བྱེད་བདེ་བ་སྐྱེས་པར་བསམ༔ གཙོ་བོའི་ཡུམ་ལས་ཕྱག་རྒྱ་མ༔ མཚན་རྫོགས་རིག་དང་ལྡན་པ་ནི༔ ཡིད་འོང་བཅུ་དྲུག་ལང་ཚོ་ཅན༔ སྤྲོས་སྟེ་ཐར་པ་བསྟེན་པར་མོས༔ ཧཱུྃ༔ བདེ་སྟོང་གཉིས་མེད་ཡེ་ཤེས་དཔལ་སྟེར་མ༔ བཅུ་དྲུག་དགའ་བཞིའི་ཕོ་ཉའི་མཆོག་གྱུར་པས༔ སྐལ་ལྡན་ཐར་པ་བསྟེན་པའི་ཐབས་བྱིན་པས༔ ལྷན་སྐྱེས་ཕྱག་རྒྱ་ཆེན་པོའི་དབང་སྦྱིན་ཤོག༔ ཨོཾ་མ་ཧཱ་སུ་ཁཔྲཛྙཱ་ཛྙཱ་ན་ཨ་བྷི་ཥིཉྩ་ཧོ༔ ཕོ་ཉའི་ཆུ་སྐྱེས་གསང་བའི་རྩ༔ རྡོ་རྗེའི་བུ་གར་བཅུག་ཅིང་སྤྱོད༔ རྒྱུ་འབྲས་དགའ་བའི་ཡེ་ཤེས་དཀྱིལ༔ དཔེ་བྱས་དོན་ལ་སྦྱོར་བར་བསམ༔ དེས་ནི་བདེ་ཆེན་ཐབས་ཀྱི་མཆོག༔ ཨ་ནུ་ཡོ་གའི་དབང་རྫོགས་པའོ༔ བརྡ་ནི་རང་བྱུང་མན་ཤེལ་ཏེ༔ དོན་གྱི་དགོངས་པ་གཏད་པས་འཕོ༔ ཡེ་ཤེས་དྲི་མེད་དཀྱིལ་འཁོར་དུ༔ མངོན་སུམ་གཞུག་པས་དབང་འདིར་སྦྱིན༔ ཧོ༔ མཐའ་དབུས་ཀུན་བྲལ་ཡེ་ཤེས་རྡོ་རྗེའི་དབྱིངས༔ ཡིད་བྱེད་ཚིག་གིས་མི་མཚོན་རྫོགས་པ་ཆེའི༔ གནས་ལུགས་མངོན་སུམ་རྟོགས་པའི་དབང་སྦྱིན་པས༔ མཐར་ཐུག་དབྱིངས་རིག་གཉིས་མེད་སངས་རྒྱས་ཤོག༔ ཨོཾ་ཛྙཱ་ན་དྷཱ་ཏུ་ཧེ་རུ་ཀ་ཨཏྨ་ཀོ྅་ཧྃ༔ བླ་མ་ལྷ་ཡི་བྱིན་རླབས་དང༔ ཐབས་དང་མོས་པའི་རྟེན་འབྲེལ་གྱིས༔ དོན་གྱི་ཡེ་ཤེས་རྗེན་པ་རུ༔ མངོན་སུམ་མཐོང་བ་གདོན་མི་ཟ༔ ཡེ་ཤེས་དཀྱིལ་འཁོར་སྨིན་བྱས་པས༔ ཨ་ཏིའི་དབང་སྐུར་རྫོགས་པར་ཐོབ༔ དབང་ཀུན་ཆིག་དྲིལ་གཏོར་མའི་དབང༔ མཐའ་རྟེན་ཚུལ་དུ་སྦྱིན་པ་ནི༔ ཧཱུྃ་ཧྲཱིཿ གཏོར་སྣོད་རིན་ཆེན་དུར་ཁྲོད་གཞལ་ཡས་ཁང༔ གཏོར་མ་རྒྱན་ལྡན་བཀའ་འདུས་དཀྱིལ་འཁོར་ལྷ༔ སྣོད་བཅུད་ཡོངས་རྫོགས་དམ་རྫས་བ་ལིཾ་ཏ༔ རབ་འབྱམས་དབང་དང་དངོས་གྲུབ་ཀུན་གྱི་གཞི༔ ཐོག་མར་ལྷ་དང་གཉིས་མེད་སྒྲུབ་པའི་རྟེན༔ བར་དུ་འདོད་ཡོན་ཀུན་འབྱུང་མཆོད་པའི་མཆོག༔ ཐ་མ་དབང་དང་དངོས་གྲུབ་དབྱིག་གི་རྫས༔ ཀུན་འབྱུང་སྒྱུ་འཕྲུལ་དྲྭ་བའི་རྒྱན་རྫོགས་པའི༔ སྣང་སྟོང་བརྡ་ཡི་བུམ་པའི་དབང་བསྐུར་རྫོགས༔ བདུད་རྩིར་ཞུ་བ་མྱོང་བས་གསང་བའི་དབང༔ ཟག་མེད་བདེ་བའི་དཔལ་འདྲེན་གསུམ་པ་སྟེ༔ དོན་ལ་དབྱིངས་རིག་གཉིས་མེད་བཞི་པའི་དངོས༔ ལྷ་ཚོགས་སྐུ་གསུང་ཐུགས་ཀྱི་དཀྱིལ་འཁོར་ཤར༔ སྨིན་གྲོལ་གདམས་པ་རྫོགས་པའི་བྱིན་རླབས་མཐུས༔ རྡོ་རྗེའི་སྐུ་གསུང་ཐུགས་ཀྱི་ཡེ་ཤེས་སྨིན༔ མ་ལུས་སྒྲིབ་བྱང་ནད་གདོན་སྡིག་སྒྲིབ་དག༔ དབྱེར་མེད་ཡེ་ཤེས་མཆོག་ཏུ་སྨིན་གྲོལ་ཤོག༔ ཨོཾ་ཨཱཿཧཱུྃ་བོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱ་ཏུ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཀཱ་ཡ་ཝཱཀྩིཏྟ་གུ་ཎ་ཀརྨ་ཨ་བྷི་ཥིཉྩ་ཨོཾ་ཨཱཿཧཱུྃ་ཧོ༔ སརྦ་སིདྡྷི་ཕ་ལ་ཧཱུྃ་ཨཱཿ གཏོར་མ་གནས་བཞིར་བཞག་ཅིང་མྱོང༔ རྩ་བ་ཡན་ལག་དབང་རྫོགས་ཐོབ༔ ས་མ་ཡ༔ ཧཱུྃ་སྔོན་ཡེ་ཤེས་མཚོན་ཆེན་པོ༔ མ་ལུས་དཀྱིལ་འཁོར་མཐའ་ཡས་འབྱུང༔ ཐུགས་ཀྱི་སྙིང་པོ་ས་བོན་ཆེ༔ རྒྱུ་འབྲས་རྟེན་དང་བརྟེན་པ་རྫོགས༔ ཧཱུྃ༔ ཆོས་སྐུ་ཡང་དག་དེ་བཞིན་ཉིད༔ འཁོར་འདས་དངོས་འཛིན་ཀ་ནས་དག༔ དངོས་པོ་མཚན་མ་མེད་པའི་དབྱིངས༔ ཡིད་བྱེད་བློ་དང་བྲལ་བའོ༔ ཧཱུྃ༔ ལོངས་སྐུ་པདྨ་ཀུན་ཏུ་སྣང༔ རྗེས་ཆགས་སྙིང་རྗེ་མཁའ་མཉམ་བརྡལ༔ མ་རྟོགས་འགྲོ་རྣམས་བསྒྲལ་བའི་ཕྱིར༔ རང་བྱུང་བརྩེ་བའི་ཡེ་ཤེས་ཤར༔ ཧཱུྃ༔ སྤྲུལ་སྐུ་རྒྱུ་ཡི་ས་བོན་ཧཱུྃ༔ གཟུགས་ཀྱི་རྡོ་རྗེ་རྟག་པའི་དབྱིངས༔ སྐུ་དང་ཞིང་ཁམས་རྣམ་སྣང་བའི༔ ས་བོན་ཧཱུྃ་ཡིག་ཉི་ལྟར་འབར༔ འོད་ཀྱིས་སྣོད་བཅུད་དབྱིངས་སུ་སྦྱངས༔ ཡེ་ཤེས་རྡོ་རྗེའི་སྲུང་བའི་གུར༔ ཡངས་ཤིང་རྒྱ་ཆེ་མི་ཤིགས་མཁྲེགས༔ འབར་བའི་མེ་མཚོན་ཕྲེང་བ་འཁྲུགས༔ ནང་དུ་འབྱུང་བ་རིམ་བརྩེགས་སྟེང༔ རྡོ་རྗེའི་རི་རབ་བང་རིམ་ལྡན༔ སྟེང་དུ་རྡོ་རྗེའི་རྭ་བ་མེ༔ དུར་ཁྲོད་འཇིགས་པའི་བཀོད་པ་རྫོགས༔ དབུས་སུ་པདྨ་ཉི་མའི་སྟེང༔ རྒྱ་གྲམ་ལྟེ་བར་ཧཱུྃ་ལྔ་ལྡན༔ ཡེ་ཤེས་གཞལ་ཡས་ས་བོན་ལས༔ ཡོངས་གྱུར་གྲུ་བཞི་སྒོ་རྟ་བབ༔ རིན་ཆེན་ཐོད་མཁར་འབར་བ་ཡི༔ ཕོ་བྲང་རྒྱན་བཀོད་བརྡ་རྟགས་རྫོགས༔ དབུས་སུ་རྡོ་རྗེའི་བྲག་ཆེན་དང༔ པད་ཉི་དྲེགས་པ་ཁྱོ་ཤུག་སྟེང༔ ཐུགས་སྲོག་ཧཱུྃ་བབ་ཡོངས་གྱུར་ལས༔ འབར་བའི་རྡོ་རྗེ་རྩེ་ལྔ་པ༔ ལྟེ་བར་ཧཱུྃ་མཚན་སྤྲོ་བསྡུ་ཡིས༔ དོན་གཉིས་བྱས་པ་ཡོངས་གྱུར་པ༔ འཁོར་འདས་རྫོགས་པའི་སྤྱི་དཔལ་ཆེ༔ ཧེ་རུ་ཀ་དཔལ་ནམ་མཁའི་སྐུ༔ མཐིང་ག་ཁྱབ་པ་ཆེན་པོའི་ཚུལ༔ སྒེག་དཔའ་འཇིགས་རུང་གཟི་བྱིན་འབར༔ ཡེ་ཤེས་སྤྱན་གསུམ་བགྲད་ཅིང་གཟིར༔ ཞལ་གདང་ལྗགས་འདྲིལ་མཆེ་བ་གཙིགས༔ རྒོད་གཤེ་དྲག་ཤུལ་ཧཱུྃ་སྒྲ་འབྱིན༔ ལྗགས་བསྒྲིལ་སྨ་ར་སྨིན་མ་འབར༔ ཐོད་སྐམ་དབུ་རྒྱན་རལ་པ་མཛེས༔ དབང་རྟགས་རྡོ་རྗེ་རྩེ་ལྔ་གདེང༔ ཕྱག་གཉིས་རྡོ་རྗེ་དྲིལ་བུ་འཛིན༔ དུར་ཁྲོད་གནས་པའི་མཁའ་འགྲོ་མ༔ དབང་བྱེད་ཆས་བརྒྱད་བདུད་རུ་ཏྲ༔ བསྒྲལ་བའི་དཔལ་གྱི་ཆེ་རྟགས་བརྒྱན༔ ཞབས་གཉིས་གྱད་ཀྱི་དོར་སྟབས་ཀྱིས༔ དྲེགས་པ་ལྷ་ཆེན་ཁྱོ་ཤུག་མནན༔ འབར་བ་འོད་དང་མེ་ལྕེའི་ཕྲེང༔ འཁྲུགས་ཤིང་འཁྱིལ་པའི་ཀློང་ན་འགྱིངས༔ སྦྱོར་བའི་ཡུམ་ཆེན་དམར་ལ་སྒེག༔ གཅེར་བུ་གཟིག་ཤམ་རུས་རྒྱན་ཅན༔ ཕྱག་རྒྱ་ལྔས་མཛེས་གྲི་ཐོད་ཅན༔ གཉིས་མེད་བདེ་སྟོང་ཆེན་པོར་སྦྱོར༔ སྣང་སྟོང་ཆུ་ཟླ་འཇའ་ཚོན་ལྟར༔ གསལ་ལ་མ་འདྲེས་ཡེ་ཤེས་སྐུ༔ ཀུན་ཁྱབ་ཀུན་གྱི་བདག་ཉིད་ཅན༔ སྲིད་ཞིའི་དབང་ཕྱུག་ལྷུན་གྱིས་གྲུབ༔ དངོས་པོ་ལས་འདས་སྒྱུ་མའི་སྐུའི༔ དབྱིངས་སུ་མི་ཕྱེད་དབུ་མའི་རྩ༔ འཁོར་ལོ་བཞི་བཅས་ལྷུན་གྲུབ་པ༔ དྭངས་མ་འོད་ཀྱི་ནང་ཉིད་དུ༔ སྤྱི་བོར་བུདྡྷ་ཧེ་རུ་ཀ༔ ཟིལ་གནོན་འཇམ་དཔལ་གཤིན་རྗེ་གཤེད༔ སེར་ནག་བེ་ཅོན་འཁོར་ལོ་འཛིན༔ བཻ་ཏ་ཟ་བྱེད་ནག་མོ་ཡུམ༔ འཁོར་དུ་རྡོ་རྗེ་ཐོད་ཕྲེང་རྩལ༔ བཅོམ་ལྡན་འཁོར་ལོ་བདེ་བའི་མཆོག༔ བླ་མེད་མངོན་རྫོགས་ཧེ་རུ་ཀ༔ རཏྣ་རྩལ་རྫོགས་ཡུམ་བཅས་གསལ༔ མགྲིན་པར་པདྨ་ཧེ་རུ་ཀ༔ དབང་ཆེན་རྟ་མཆོག་རོལ་པ་རྩལ༔ དམར་ནག་བཻ་ཅོན་དུང་ཁྲག་འཛིན༔ ཡུམ་ཆེན་པདྨ་གཟི་ལྡན་འཁོར༔ དགྱེས་པ་རྡོ་རྗེ་ཧེ་རུ་ཀ༔ བཅོམ་ལྡན་མི་བསྐྱོད་གསང་བ་འདུས༔ དྲེགས་པ་ཀུན་འདུས་དཔལ་ཆེན་པོ༔ པདྨ་རྩལ་རྫོགས་ཡུམ་བཅས་གསལ༔ ཐུགས་ཀར་བཛྲ་ཧེ་རུ་ཀ༔ ཡང་དག་རྡོ་རྗེ་མཉམ་སྦྱོར་ལྷ༔ མཐིང་ནག་རྡོ་རྗེ་དུང་ཁྲག་འཛིན༔ ཀྲོ་དྷཱི་ཤྭ་རི་དབྱིངས་ཕྱུག་ཡུམ༔ འཁོར་དུ་རྡོ་རྗེ་ཕྲེང་བ་ཆེ༔ བདུད་འདུལ་གསང་བའི་བདག་པོ་མཆོག༔ སྟོབས་ལྡན་དྲག་པོ་དྲག་སྔགས་བདག༔ རྡོ་རྗེ་རྩལ་རྫོགས་ཆེན་པོས་བསྐོར༔ ལྟེ་བར་ཀརྨ་ཧེ་རུ་ཀ༔ ཕྲིན་ལས་རྡོ་རྗེ་གཞོན་ནུ་ཡབ༔ ཕྱག་གཉིས་རྡོ་རྗེ་ཕུར་པ་འདྲིལ༔ འཁོར་ལོ་རྒྱས་འདེབས་རོལ་པའི་ཡུམ༔ འཁོར་དུ་ཡོན་ཏན་ཆེ་བའི་མཆོག༔ དཔལ་ལྡན་དུས་ཀྱི་འཁོར་ལོ་དང༔ འདོད་འབྱུང་མཁའ་ཀློང་འཁྱིལ་བའི་ལྷ༔ ཀརྨ་རྩལ་རྫོགས་བཅས་པས་བསྐོར༔ ཀུན་ཀྱང་དྭངས་མ་ཐིག་ལེའི་སྐུ༔ འོད་ཕུང་འཇའ་ཚོན་ལྟར་བཀྲ་ཞིང༔ བདེ་དྲོད་གཟི་བྱིན་ལམ་མེ་བ༔ ཕྲ་ལ་སྐྱེ་མཆེད་རྫོགས་པར་གསལ༔ ཕུང་ཁམས་སྐྱེ་མཆེད་ཡན་ལག་བཅས༔ བདེ་གཤེགས་ཞི་བ་རྡོ་རྗེ་དབྱིངས༔ གདན་གསུམ་དཀྱིལ་འཁོར་ཡེ་རྫོགས་པས༔ རབ་འབྱམས་ཞི་ཁྲོའི་ཁྱབ་བདག་གི༔ བ་སྤུའི་ཁུང་བུ་ཡན་ཆོད་ཀྱང༔ སངས་རྒྱས་སྟོང་རྩ་འདོད་ཡོན་གྱི༔ ལྷ་མོ་མཁའ་འགྲོ་གིང་ལང་སོགས༔ མ་བསྐྱེད་རང་བྱུང་ཚུལ་དུ་གསལ༔ ལུས་ངག་ཡིད་གསུམ་ཕྱིའི་སྲིད་པ༔ ཁམས་གསུམ་དག་པ་སྐུ་གསུང་ཐུགས༔ གཉུག་མའི་རྡོ་རྗེ་གསུམ་གྱི་དབྱིངས༔ དེ་བཞིན་གཤེགས་པ་ཐམས་ཅད་ཀྱི༔ གསང་བ་གསུམ་གྱི་ངོ་བོར་རྫོགས༔ ཡེ་ཤེས་ལྔ་ལྡན་རིགས་མཆོག་གི༔ ཕྱག་རྒྱས་ཡུལ་དབང་ཤེས་པའི་ཆོས༔ ཕུང་ཁམས་ཀུན་ལ་རྒྱས་བཏབ་པས༔ རིགས་ལྔའི་དབང་བསྐུར་རྒྱན་དུ་འཆང༔ ཨོཾ་ཨཱཿཧཱུྃ༔ ཧཱུྃ་ཨོཾ་ཏྲཱྃ་ཧྲཱིཿཨ༔ རང་བཞིན་གནས་པའི་ཡེ་ཤེས་ལྷ༔ མཚན་མའི་དངོས་པོར་མ་གྲུབ་ཀྱང༔ རང་བཞིན་རྟགས་ཀྱི་རོལ་པ་ནི༔ བཀོད་པ་ཚད་མེད་ཅིར་ཡང་སྣང༔ བ་སྤུའི་བུ་ག་ཚུན་ཆད་ཀྱང༔ ཡེ་ཤེས་ཀློང་ལས་མ་འདས་པས༔ ཟག་མེད་ཡོན་ཏན་རྗེས་མཚོན་པའི༔ བརྡ་རྟགས་རོལ་པ་བསམ་ལས་འདས༔ གནས་ལུགས་དོན་གྱི་བཞུགས་ཚུལ་ལ༔ སངས་རྒྱས་སེམས་ཅན་གཉིས་མེད་པའི༔ དག་པ་སྐུ་དང་ཡེ་ཤེས་སུ༔ བཞུགས་པས་བཟང་ངན་རྣམ་བཞག་བྲལ༔ དཔལ་གྱི་ང་རྒྱལ་བརྟན་པོའི་ངང༔ དག་པའི་གསལ་སྣང་རྩེ་གཅིག་སྒྲུབ༔ དག་པ་དྲན་པས་བོགས་དབྱུང་སྟེ༔ རང་རྒྱུད་ཞེན་པའི་གོལ་ས་གཅོད༔ གཞིར་རྫོགས་ཆེན་པོའི་ཏིང་འཛིན་ནི༔ གོང་མའི་ལམ་གྱི་སྨིན་བྱེད་དོ༔ ས་མ་ཡ༔ འཁོར་འདས་ཆོ་འཕྲུལ་བཀོད་པ་ནི༔ མ་ངེས་བསམ་ཡས་ཀུན་སྣང་ཀྱང༔ གནས་ལུགས་དོན་གྱི་ཡེ་ཤེས་ལ༔ ཆོས་ཉིད་གཅིག་ལས་འདུ་འབྲལ་མེད༔ ཉི་མ་ལས་བྱུང་འོད་ཟེར་ནི༔ མུན་པ་ནམ་ཡང་མི་སྲིད་བཞིན༔ དེ་ཉིད་ལས་བྱུང་ཆོས་ཅན་དངོས༔ ཅི་སྣང་སྐུ་དང་ཡེ་ཤེས་དག༔ དེ་གཉིས་དབྱེར་མེད་མཉམ་པ་ལ༔ རྣམ་ཀུན་མཆོག་ལྡན་སྟོང་ཉིད་ལས༔ མ་འདས་གཟོད་ནས་དེའི་ཀློང་དུ༔ རང་ཤར་དཔལ་གྱི་སྲོག་གི་ཏིག༔ དག་མཉམ་བདེན་པ་དབྱེར་མེད་པའི༔ དོན་དང་མཐུན་པའི་བསྐྱེད་རིམ་ནི༔ སྐུ་དང་ཡེ་ཤེས་གཉིས་མེད་པའི༔ སངས་རྒྱས་ཀུན་གྱི་གསང་བ་འདུས༔ སེམས་ཅན་ཀུན་གྱི་སྙིང་པོའི་ཁམས༔ རྣམ་དབྱེར་མེད་པའི་ཆོས་ཉིད་ཀྱི༔ རྩལ་སྣང་མཚན་བཅས་ཏིང་འཛིན་བཏགས༔ ཡང་དག་ལྟ་སྒོམ་སྤྱོད་པ་ཡིས༔ དོན་ལ་ངེས་པར་གཏན་དབབ་ན༔ སྐུ་གསུང་ཐུགས་གསུམ་མི་ཕྱེད་པའི༔ རང་བྱུང་སྤྱི་དཔལ་རིགས་ཀུན་བདག༔ སྣང་བཅས་སྐུ་དང་སྟོང་ཉིད་གསུང༔ གཉིས་མེད་ཐུགས་དང་ཡེ་ཤེས་ལས༔ སྤྲོ་བསྡུའི་ཆོ་འཕྲུལ་རྨད་བྱུང་བས༔ བཀའ་འདུས་ཆོས་ཀྱི་རྒྱ་མཚོ་ཆེའི༔ དཀྱིལ་འཁོར་ལྷ་སྔགས་ཏིང་ངེ་འཛིན༔ བསྙེན་སྒྲུབ་ལས་གསུམ་དབང་བསྐྱེད་རྫོགས༔ ཟབ་རྒྱས་རིམ་པ་ཇི་སྙེད་ཀུན༔ བཤད་ཅིང་འབྱུང་བའི་གནས་སུ་ཤར༔ དེས་ན་ལྷ་སྔགས་ཏིང་འཛིན་སྒོ༔ ཆིག་དྲིལ་གདམས་པ་རྒྱ་མཚོའི་སྲོག༔ ཡང་དག་ངེས་པ་རྡོ་རྗེའི་ཚིག༔ ཉམས་ལེན་སྙིང་གི་ཏི་ཀའོ༔ ས་མ་ཡ༔ དབྱིངས་དང་རིག་པ་ཐུགས་རྗེའི་རྩལ༔ སྣང་ཞིང་འབྱུང་བར་བྱེད་པ་རླུང༔ ཀུན་ཁྱབ་གཡོ་དང་སྡུད་པ་ཡི༔ བྱེད་ལས་ཅན་དུ་ལྷུན་གྱིས་གྲུབ༔ ལྔ་ཡི་བདག་ཉིད་བཅུ་མིང་ཅན༔ ཐབས་ཀྱིས་མ་ཟིན་སྲིད་པའི་རྒྱུ༔ ཐབས་དང་བྱེད་པས་གཅུན་པ་ལས༔ དག་པའི་ཡེ་ཤེས་སྣང་བ་འཆར༔ ཏིང་འཛིན་མངོན་ཤེས་རྫུ་འཕྲུལ་སྒོ༔ སྒྲུབ་པའི་ཉེ་རྒྱུ་བླ་ན་མེད༔ ཡང་དག་ལམ་ལ་སྦྱར་འདོད་ན༔ ངག་ཡིད་རྡོ་རྗེའི་བཟླས་པས་སྒྲུབ༔ རང་ཉིད་དཔལ་ཆེན་ཐུགས་ཀྱི་ཀློང༔ ཡེ་ཤེས་སེམས་དཔའ་ཕབ་འཕྲོ།

[edit]

(|\u0f83)___dpal bka' 'dus gsang ba snying tig snying po don gyi man ngag zab mo hU~M gi sgrub thabs bzhugs: (|\u0f83)___:brda yig::_dpal he ru ka chen po la phyag 'tshal lo:_hU~M chen thugs kyi ye shes ni:_'joms dang gcod dang 'bar ba che:_thogs med mi 'gyur srog gi tig:_yi ge chen po sgra chen ldan:_dkyil 'khor las rnams ma lus 'byung:_de phyir nang gi rnal 'byor pas:_mnyam bzhag ting 'dzin gtsor bton te:_dbang dang bskyed rdzogs rnal 'byor las:_kun kyang hU~M la bsten nas sgrub:_sa ma ya:_ye shes thugs kyi dkyil 'khor ni:_rdo rje gsang ba hU~M du gnas:_brda yi dkyil 'khor la bsten nas:_rdzas rnams gzhung ltar tshogs par bshams:_yang dag sgrub pa'i gzhung bsrangs te:_snod ldan slob ma smin par bya:_bstan pa'i bab dang lo rgyus bshad:_maN+Dal phul la gsol gsum gdab:_bla ma dpal chen he ru ka:_dkyil 'khor kun gyi khyab bdag che:_rdo rje gsum gyi dkyil 'khor du:_'jug cing smin par mdzad du gsol:_gsol btab thugs rjes 'dzin pa'i brdar:_ho:_las dang snying po'i skal pa ldan:_dad brtson blo gros rmad du byung:_yang dag nges pa'i lam 'dod na:_dkyil 'khor bzhi ru smin par bya:_gnang sbyin bka' nan rnam pa bcu'i:_bsags sbyang rgyud ni dag par bya:_phyi ru dbang gi rten 'brel bsgrigs:_nges par dkyil 'khor du gzhug phyir:_rdo rje sems dpa'i chu nan sbyin:_srog gi ti la ka bstim bsre:_slob ma'i lus sbyangs 'od kyi thig:_he ru ka yi zhal zhugs bzhu:_mkha' gsang nas spros lhag pa'i sems:_dngul chu'i gong bu lta bu yang:_dkyil 'khor shar sgor dbang stegs bzhag:_dkyil 'khor gtso bo'i skur bskyed la:_gnas gsum byin rlabs gdung shugs bskyed:_spos rol dang bcas dbyangs kyis bskul:_phyogs dus bla ma rgyal ba sras:_dpa' bo rnal 'byor ma'i tshogs bcas:_steng 'og bar gsum khyab par byon:_slob ma'i lus zhugs nang kun khengs:_mngon sum byin rlabs gzi 'bar zhing:_bde gsal mi rtog ye shes skyes:_byung rgyal nyams bskyangs brtan par bzhugs:_phyi nang 'jug pa'i chos sngon 'gro'i yi:_thog mar bum pa'i dbang skur sbyin:_oM:_snang stong ye shes sgyu 'phrul drwa ba yi:_sku yi bum par ye shes bdud rtsis gtams:_skal ldan rigs kyi bu la dbang skur bas:_phung khams skye mched gnyug ma'i lhar smin shog:_oM sarba ta thA ga ta a b+hi She ka te sa ma ye shrI hU~M:_bdud rtsi'i lus gang sgrib tshogs bkrus:_ye shes nus pa mngon sum smin:_lha dang skal mnyam byas pa yin:_ma hA'i spros bcas sgrub dbang rdzogs:_slob dpon bde chen he ru ka:_stangs dpyal sbyor ba'i 'od dang sgras:_rgyal kun chags pa che bskul te:_dbang phyug zhal zhugs rjes chags kyis:_bzhus pa'i sems sprin mkha' ru bskyil:_rdo rje'i lce la dngos su bzhag:_AH_gsal stong gnyis med lhag pa'i sems kyi sprin:_mchog tu mi 'gyur rdo rje sems dpa'i bcud:_skal ldan bu yi lcer bzhag myang ba'i mthus:_rtog bral bde ba'i de nyid mngon gyur shog:_oM bo d+hi tsit+ta ma hA su kha a b+hi Shiny+tsa A:_bdud rtsi zhu bas dkar dmar khams:_g.yos pa'i bde bas rtog pa 'gags:_lhan skyes don gyi dgongs pa'i mthu:_mngon byed bde ba skyes par bsam:_gtso bo'i yum las phyag rgya ma:_mtshan rdzogs rig dang ldan pa ni:_yid 'ong bcu drug lang tsho can:_spros ste thar pa bsten par mos:_hU~M:_bde stong gnyis med ye shes dpal ster ma:_bcu drug dga' bzhi'i pho nya'i mchog gyur pas:_skal ldan thar pa bsten pa'i thabs byin pas:_lhan skyes phyag rgya chen po'i dbang sbyin shog:_oM ma hA su khapradz+nyA dz+nyA na a b+hi Shiny+tsa ho:_pho nya'i chu skyes gsang ba'i rtsa:_rdo rje'i bu gar bcug cing spyod:_rgyu 'bras dga' ba'i ye shes dkyil:_dpe byas don la sbyor bar bsam:_des ni bde chen thabs kyi mchog:_a nu yo ga'i dbang rdzogs pa'o:_brda ni rang byung man shel te:_don gyi dgongs pa gtad pas 'pho:_ye shes dri med dkyil 'khor du:_mngon sum gzhug pas dbang 'dir sbyin:_ho:_mtha' dbus kun bral ye shes rdo rje'i dbyings:_yid byed tshig gis mi mtshon rdzogs pa che'i:_gnas lugs mngon sum rtogs pa'i dbang sbyin pas:_mthar thug dbyings rig gnyis med sangs rgyas shog:_oM dz+nyA na d+hA tu he ru ka at+ma ko\u0f85 ha~M:_bla ma lha yi byin rlabs dang:_thabs dang mos pa'i rten 'brel gyis:_don gyi ye shes rjen pa ru:_mngon sum mthong ba gdon mi za:_ye shes dkyil 'khor smin byas pas:_a ti'i dbang skur rdzogs par thob:_dbang kun chig dril gtor ma'i dbang:_mtha' rten tshul du sbyin pa ni:_hU~M hrIH_gtor snod rin chen dur khrod gzhal yas khang:_gtor ma rgyan ldan bka' 'dus dkyil 'khor lha:_snod bcud yongs rdzogs dam rdzas ba liM ta:_rab 'byams dbang dang dngos grub kun gyi gzhi:_thog mar lha dang gnyis med sgrub pa'i rten:_bar du 'dod yon kun 'byung mchod pa'i mchog:_tha ma dbang dang dngos grub dbyig gi rdzas:_kun 'byung sgyu 'phrul drwa ba'i rgyan rdzogs pa'i:_snang stong brda yi bum pa'i dbang bskur rdzogs:_bdud rtsir zhu ba myong bas gsang ba'i dbang:_zag med bde ba'i dpal 'dren gsum pa ste:_don la dbyings rig gnyis med bzhi pa'i dngos:_lha tshogs sku gsung thugs kyi dkyil 'khor shar:_smin grol gdams pa rdzogs pa'i byin rlabs mthus:_rdo rje'i sku gsung thugs kyi ye shes smin:_ma lus sgrib byang nad gdon sdig sgrib dag:_dbyer med ye shes mchog tu smin grol shog:_oM AHhU~M bo d+hi tsit+ta ma hA su kha dz+nyA na d+hA tu ru lu ru lu hU~M b+h+yo hU~M:_kA ya wAk+tsit+ta gu Na karma a b+hi Shiny+tsa oM AHhU~M ho:_sarba sid+d+hi pha la hU~M AH_gtor ma gnas bzhir bzhag cing myong:_rtsa ba yan lag dbang rdzogs thob:_sa ma ya:_hU~M sngon ye shes mtshon chen po:_ma lus dkyil 'khor mtha' yas 'byung:_thugs kyi snying po sa bon che:_rgyu 'bras rten dang brten pa rdzogs:_hU~M:_chos sku yang dag de bzhin nyid:_'khor 'das dngos 'dzin ka nas dag:_dngos po mtshan ma med pa'i dbyings:_yid byed blo dang bral ba'o:_hU~M:_longs sku pad+ma kun tu snang:_rjes chags snying rje mkha' mnyam brdal:_ma rtogs 'gro rnams bsgral ba'i phyir:_rang byung brtse ba'i ye shes shar:_hU~M:_sprul sku rgyu yi sa bon hU~M:_gzugs kyi rdo rje rtag pa'i dbyings:_sku dang zhing khams rnam snang ba'i:_sa bon hU~M yig nyi ltar 'bar:_'od kyis snod bcud dbyings su sbyangs:_ye shes rdo rje'i srung ba'i gur:_yangs shing rgya che mi shigs mkhregs:_'bar ba'i me mtshon phreng ba 'khrugs:_nang du 'byung ba rim brtsegs steng:_rdo rje'i ri rab bang rim ldan:_steng du rdo rje'i rwa ba me:_dur khrod 'jigs pa'i bkod pa rdzogs:_dbus su pad+ma nyi ma'i steng:_rgya gram lte bar hU~M lnga ldan:_ye shes gzhal yas sa bon las:_yongs gyur gru bzhi sgo rta bab:_rin chen thod mkhar 'bar ba yi:_pho brang rgyan bkod brda rtags rdzogs:_dbus su rdo rje'i brag chen dang:_pad nyi dregs pa khyo shug steng:_thugs srog hU~M bab yongs gyur las:_'bar ba'i rdo rje rtse lnga pa:_lte bar hU~M mtshan spro bsdu yis:_don gnyis byas pa yongs gyur pa:_'khor 'das rdzogs pa'i spyi dpal che:_he ru ka dpal nam mkha'i sku:_mthing ga khyab pa chen po'i tshul:_sgeg dpa' 'jigs rung gzi byin 'bar:_ye shes spyan gsum bgrad cing gzir:_zhal gdang ljags 'dril mche ba gtsigs:_rgod gshe drag shul hU~M sgra 'byin:_ljags bsgril sma ra smin ma 'bar:_thod skam dbu rgyan ral pa mdzes:_dbang rtags rdo rje rtse lnga gdeng:_phyag gnyis rdo rje dril bu 'dzin:_dur khrod gnas pa'i mkha' 'gro ma:_dbang byed chas brgyad bdud ru tra:_bsgral ba'i dpal gyi che rtags brgyan:_zhabs gnyis gyad kyi dor stabs kyis:_dregs pa lha chen khyo shug mnan:_'bar ba 'od dang me lce'i phreng:_'khrugs shing 'khyil pa'i klong na 'gyings:_sbyor ba'i yum chen dmar la sgeg:_gcer bu gzig sham rus rgyan can:_phyag rgya lngas mdzes gri thod can:_gnyis med bde stong chen por sbyor:_snang stong chu zla 'ja' tshon ltar:_gsal la ma 'dres ye shes sku:_kun khyab kun gyi bdag nyid can:_srid zhi'i dbang phyug lhun gyis grub:_dngos po las 'das sgyu ma'i sku'i:_dbyings su mi phyed dbu ma'i rtsa:_'khor lo bzhi bcas lhun grub pa:_dwangs ma 'od kyi nang nyid du:_spyi bor bud+d+ha he ru ka:_zil gnon 'jam dpal gshin rje gshed:_ser nag be con 'khor lo 'dzin:_bai ta za byed nag mo yum:_'khor du rdo rje thod phreng rtsal:_bcom ldan 'khor lo bde ba'i mchog:_bla med mngon rdzogs he ru ka:_rat+na rtsal rdzogs yum bcas gsal:_mgrin par pad+ma he ru ka:_dbang chen rta mchog rol pa rtsal:_dmar nag bai con dung khrag 'dzin:_yum chen pad+ma gzi ldan 'khor:_dgyes pa rdo rje he ru ka:_bcom ldan mi bskyod gsang ba 'dus:_dregs pa kun 'dus dpal chen po:_pad+ma rtsal rdzogs yum bcas gsal:_thugs kar badz+ra he ru ka:_yang dag rdo rje mnyam sbyor lha:_mthing nag rdo rje dung khrag 'dzin:_kro d+hI shwa ri dbyings phyug yum:_'khor du rdo rje phreng ba che:_bdud 'dul gsang ba'i bdag po mchog:_stobs ldan drag po drag sngags bdag:_rdo rje rtsal rdzogs chen pos bskor:_lte bar karma he ru ka:_phrin las rdo rje gzhon nu yab:_phyag gnyis rdo rje phur pa 'dril:_'khor lo rgyas 'debs rol pa'i yum:_'khor du yon tan che ba'i mchog:_dpal ldan dus kyi 'khor lo dang:_'dod 'byung mkha' klong 'khyil ba'i lha:_karma rtsal rdzogs bcas pas bskor:_kun kyang dwangs ma thig le'i sku:_'od phung 'ja' tshon ltar bkra zhing:_bde drod gzi byin lam me ba:_phra la skye mched rdzogs par gsal:_phung khams skye mched yan lag bcas:_bde gshegs zhi ba rdo rje dbyings:_gdan gsum dkyil 'khor ye rdzogs pas:_rab 'byams zhi khro'i khyab bdag gi:_ba spu'i khung bu yan chod kyang:_sangs rgyas stong rtsa 'dod yon gyi:_lha mo mkha' 'gro ging lang sogs:_ma bskyed rang byung tshul du gsal:_lus ngag yid gsum phyi'i srid pa:_khams gsum dag pa sku gsung thugs:_gnyug ma'i rdo rje gsum gyi dbyings:_de bzhin gshegs pa thams cad kyi:_gsang ba gsum gyi ngo bor rdzogs:_ye shes lnga ldan rigs mchog gi:_phyag rgyas yul dbang shes pa'i chos:_phung khams kun la rgyas btab pas:_rigs lnga'i dbang bskur rgyan du 'chang:_oM AHhU~M:_hU~M oM trA~M hrIHa:_rang bzhin gnas pa'i ye shes lha:_mtshan ma'i dngos por ma grub kyang:_rang bzhin rtags kyi rol pa ni:_bkod pa tshad med cir yang snang:_ba spu'i bu ga tshun chad kyang:_ye shes klong las ma 'das pas:_zag med yon tan rjes mtshon pa'i:_brda rtags rol pa bsam las 'das:_gnas lugs don gyi bzhugs tshul la:_sangs rgyas sems can gnyis med pa'i:_dag pa sku dang ye shes su:_bzhugs pas bzang ngan rnam bzhag bral:_dpal gyi nga rgyal brtan po'i ngang:_dag pa'i gsal snang rtse gcig sgrub:_dag pa dran pas bogs dbyung ste:_rang rgyud zhen pa'i gol sa gcod:_gzhir rdzogs chen po'i ting 'dzin ni:_gong ma'i lam gyi smin byed do:_sa ma ya:_'khor 'das cho 'phrul bkod pa ni:_ma nges bsam yas kun snang kyang:_gnas lugs don gyi ye shes la:_chos nyid gcig las 'du 'bral med:_nyi ma las byung 'od zer ni:_mun pa nam yang mi srid bzhin:_de nyid las byung chos can dngos:_ci snang sku dang ye shes dag:_de gnyis dbyer med mnyam pa la:_rnam kun mchog ldan stong nyid las:_ma 'das gzod nas de'i klong du:_rang shar dpal gyi srog gi tig:_dag mnyam bden pa dbyer med pa'i:_don dang mthun pa'i bskyed rim ni:_sku dang ye shes gnyis med pa'i:_sangs rgyas kun gyi gsang ba 'dus:_sems can kun gyi snying po'i khams:_rnam dbyer med pa'i chos nyid kyi:_rtsal snang mtshan bcas ting 'dzin btags:_yang dag lta sgom spyod pa yis:_don la nges par gtan dbab na:_sku gsung thugs gsum mi phyed pa'i:_rang byung spyi dpal rigs kun bdag:_snang bcas sku dang stong nyid gsung:_gnyis med thugs dang ye shes las:_spro bsdu'i cho 'phrul rmad byung bas:_bka' 'dus chos kyi rgya mtsho che'i:_dkyil 'khor lha sngags ting nge 'dzin:_bsnyen sgrub las gsum dbang bskyed rdzogs:_zab rgyas rim pa ji snyed kun:_bshad cing 'byung ba'i gnas su shar:_des na lha sngags ting 'dzin sgo:_chig dril gdams pa rgya mtsho'i srog:_yang dag nges pa rdo rje'i tshig:_nyams len snying gi ti ka'o:_sa ma ya:_dbyings dang rig pa thugs rje'i rtsal:_snang zhing 'byung bar byed pa rlung:_kun khyab g.yo dang sdud pa yi:_byed las can du lhun gyis grub:_lnga yi bdag nyid bcu ming can:_thabs kyis ma zin srid pa'i rgyu:_thabs dang byed pas gcun pa las:_dag pa'i ye shes snang ba 'char:_ting 'dzin mngon shes rdzu 'phrul sgo:_sgrub pa'i nye rgyu bla na med:_yang dag lam la sbyar 'dod na:_ngag yid rdo rje'i bzlas pas sgrub:_rang nyid dpal chen thugs kyi klong:_ye shes sems dpa' phab 'phro/