JKW-KABUM-15-BA-006-011

🚧 This website is under continued development. We appreciate your patience!

Previous Text Back to Volume PageNext Text

བསྙེན་སྒྲུབ་རྒྱས་པ་བཏང་ཚུལ།

Wylie title	bsnyen sgrub rgyas pa btang tshul
Location	mkhyen brtse'i bka' 'bum Volume 15, sde tshan 6, Text 11, Pages 177-181 (Folios 26a6 to 28a3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	མཆོག་གྱུར་གླིང་པ་ (mchog gyur gling pa)
Citation	'jam dbyangs mkhyen brtse'i dbang po. bsnyen sgrub rgyas pa btang tshul. In 'jam dbyangs mkhyen brtse'i dbang po'i bka' 'bum, Vol. 15: 177-181. Khams sde dge rdzong sar dgon: Rdzong sar blo gros phun tshogs, 2020.
Genre	Recitation Manual - bsnyen yig
Cycle	བླ་མའི་ཐུགས་སྒྲུབ་བར་ཆད་ཀུན་ (bla ma'i thugs sgrub bar chad kun sel)

1 Texts in this Section (sde tshan or chos tshan)

11 177-181	བསྙེན་སྒྲུབ་རྒྱས་པ་བཏང་ཚུལ། bsnyen sgrub rgyas pa btang tshul Recitation Manual - bsnyen yig	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཐུགས་སྒྲུབ་བསྙེན་ཐོ་དགེ། །སྭསྟི། །ཐུགས་སྒྲུབ་བསྙེན་སྒྲུབ་ལས་གསུམ་རྒྱས་པར་བཏང་ན། ཐོག་མར་སྔོན་འགྲོ་ཟླ་བ་གཅིག་སོགས་ལོང་སྐབས་དང་བསྟུན། མ་མཐའ་འང་སྐྱབས་འགྲོ་ཁྲི། སེམས་བསྐྱེད་ཅི་ནུས། ཡིག་བརྒྱ་ཁྲི། མཎྜལ་རྒྱས་བསྡུས་གང་རིགས་ཁྲི། བླ་མའི་རྣལ་འབྱོར་ཕྱི་སྒྲུབ་གསོལ་འདེབས་བསྡུས་པ་ཁྲི་དང་སྦྲགས་ཏེ་ཕྱག་དེ་མཚུངས་སོང་ནའང་ལེགས། བར་ཆད་ལམ་སེལ་ཀྱང་སྟོང་ཕྲག་ཙམ་གྲུབ་ན་བྱ། ནང་སྒྲུབ་བཛྲ་གུ་རུ་བཞི་འབུམ། གསང་སྒྲུབ་དགོངས་པ་བསྐྱང་བ་ཐུན་ཐམས་ཅད་ཀྱི་མཇུག་ཏུ་བྱ་ཏེ། དེ་ལྟར་སྔོན་འགྲོ་རྣམས་ལེགས་པར་གྲུབ་ནས། དངོས་གཞི་བསྙེན་པའི་སྐབས་འདིར་སྨན་རཀ་གཏོར་གསུམ་ཉེར་སྤྱོད་ཙམ་བཤམས། ཐུན་བཞིའི་ཐོར་ཐུན་ལ་སྔོན་འགྲོ་ཚང་བ་དང་། ལས་བྱང་འབྲིང་པོའམ། རྒྱུན་ཁྱེར། སྔ་ཐུན་ལ་ལས་བྱང་རྒྱས་པ། ཕྱི་ཐུན་ལ་ལས་བྱང་འབྲིང་པོ། ཕྱི་ཐུན་མཇུག་ཏུ་ལས་བྱང་རྒྱས་པ་ལྟར་ཚོགས་ནས་བཀྲ་ཤིས་ཡན། ཆད་བསྟན་གཏོར་བྲོ་རྒྱུན་དུ་མ་གྲུབ་ཀྱང་ཆོག །ཚེས་བཅུ་སོགས་ལ་ངེས་པར་བཏང་། ཚོགས་ཀྱི་མགོའམ། ལྷག་མའི་གང་དུ་ཚེ་རིང་མཆེད་ལྔའི་གཏོར་ཆོག་བསྟོད་པ་ཡན་དང་། ཁ་རག་ཁྱུང་བཙུན་གཏོར་འབུལ་བྱ། སྐོང་བ། འཁྲུགས་སྐོང་། བརྟན་གསོལ་རྣམས་རྒྱུན་དུ་མ་གྲུབ་ན་ཚེས་བཅུ་སོགས་དུས་ཆེན་སྐབས་བྱ། ཁྱད་པར་ཚེས་བརྒྱད་ལ་བསྐང་བ་རྒྱས་པར་བྱ། སྲོད་ཐུན་ལ་ལས་བྱང་འབྲིང་པོ་བཏང་། དེ་ཡང་ལས་བྱང་འབྲིང་བསྡུས་གང་ཡིན་ཀྱང་བསྟོད་པའི་མཇུག་ཏུ། བྷྲཱུྃ་བི་ཤྭ་བི་ཤུདྡྷེ་ཧྲཱིཿཧཱུྃ་ཕཊ་ཛཿ ཞེས་པས་ཛཔ྄་ཁང་དབྱེ། ཛཔ྄་བསྐུལ་ལ་ལས་བྱང་རྒྱས་པའི་སྐབས། སྣང་བ་མཐའ་ཡས་ལྷ་ཚོགས་དབྱིངས་ནས་བཞེངས༔ སོགས་བསྒྱུར་ལ། ཛཔ྄་དམིགས་རྒྱས་པ་དང་བཅས་བཟླ། འབྲིང་པོ་གཞུང་ལྟར། དེས་གཞན་གཉིས་ཀ་ལ་འགྲེ། ཐུན་བསྡུ་ན་ཚེ་བསྙེན་སྐབས་ཡིག་བདུན་དང་། བཛྲ་གུ་རུ་པདྨ་ཐོད་ཕྲེང་རྩལ། ཧ་རི་ནི་ས་བཅས་ལས་བྱང་འབྲིང་པོ་ལྟར་ཅི་ནུས་རེ་དབྱངས་གསལ་རྟེན་སྙིང་བཅས་བཟླ། དེས་མཚོན་ཏེ་ཡིག་བདུན་སོགས་ཀྱི་སྐབས་གོང་འོག་གི་བསྙེན་པ་རྣམས་མ་ཆགས་ཙམ་བྱ། མཐར་ལས་བྱང་རྒྱས་པ་ལྟར་ན། ཡེ་ཤེས་ལྷ་ཚོགས་སྤྱན་འདྲེན་གཤེགས༔ སོགས་དང་། ཨོཾ་བདེ་གཤེགས་ཡེ་ཤེས་སོགས་བསྟོད་པ། གསོལ་འདེབས་བར་ཆད་ལམ་སེལ། ཨོཾ་རིག་འཛིན་དཀྱིལ་འཁོར་སོགས་ནོངས་བཤགས༔ ཨོཾ་ཨཱཿཧཱུྃ་སྭཱ་ཧཱ། །སོགས་རིག་པའི་མེ་ཏོག་དོར་ཞིང་མདུན་གྱི་ཡེ་ཤེས་པ་རང་ལ་བསྟིམ་པ་ཡི་གེ་བརྒྱ་པས་བརྟན་པར་བྱ། ཧཱུྃ། །མ་སྐྱེས་སྟོང་པའི་སོགས་བསྡུ་ལྡང་ནས་བཀྲ་ཤིས་བར་བྱ། ལས་བྱང་འབྲིང་པོ་ལྟར་ན། དབྱངས་གསལ་རྟེན་སྙིང་བཟླ་བ་ཡན་གང་ལྟར་ལ། ཡེ་ཤེས་ལྷ་ཚོགས་སོགས་སྟོང་ཚིག་མཆོད་པ་དང་། གསོལ་འདེབས་བར་ཆད་ལམ་སེལ་མཐར། ཡི་གེ་བརྒྱ་པས་ནོངས་པ་བཤགས། ཛཿཧཱུྃ་བྃ་ཧོཿ མདུན་གྱི་ཡེ་ཤེས་པ་རང་ལ་ཐིམ་པར་བསམས་ལ་ཡི་གེ་བརྒྱ་པས་བརྟན་པར་བྱ་ཞིང་། ཧཱུྃ་གསུམ་གྱིས་བསྡུ་བ་ནས་ཤིས་བརྗོད་ཡན་དཀྱུས་ལྟར་བྱའོ། །དེ་ལྟ་བུའི་རིམ་པས་ཨ་མཱ་ར་ཎི་འབུམ་ཕྲག་བཅུ་གཅིག་གམ། ཟླ་བ་གཉིས་ཙམ་གྱི་དབང་དུ་བྱས་ན་འབུམ་ཕྲག་བཞི། ཡི་གེ་བདུན་པ་འབུམ་ཕྲག་བཅུའམ། འབུམ་ཕྲག་བདུན་ནམ། མ་གྲུབ་ན་སྤྱི་བཏང་ལྟར་འབུམ་ཕྲག་བཞི། བཛྲ་གུ་རུ་འབུམ་ཕྲག་བཅུ་གཉིས་ཁ་སྐོང་བཅས་འགྲོ་ངེས་བྱ། དེ་ནས་བསྒྲུབ་པ་དང་དཀྱུས་གཅིག་ཏུ་སྦྲེལ་ན། རྒྱས་པར་སྒྲུབ་ཆེན་ཁོག་དབུབ་ཚུལ་བཞིན་བྱ་བའམ། མ་གྲུབ་ན་རྒྱལ་ཆེན་ཐོ་འཛུག་རྒྱས་པར་བྱ་ཞིང་སྒྲུབ་པ་ལ་འཇུག །གལ་སྲིད་བར་བཞག་དགོས་བྱུང་ན། འདིར་ཡང་སྒྲུབ་པ་མདོར་བསྡུས་ཤིག་ལས་སྦྱོར་བཅས་གྲུབ་ན་ལེགས་པས། ལས་བྱང་འབྲིང་པོའི་དམིགས་གནད་སྦྱར་ཏེ་ཐོད་ཕྲེང་རྩལ་འབུམ་ཕྲག་བཞི་དང་། ཧ་རི་ནི་ས་ཁྲི་གཅིག་བཟླས་ཏེ། ཁ་སྐོང་གི་སྦྱིན་སྲེག་གྲུབ་ན་ལེགས། མ་གྲུབ་ན་ཡིག་བརྒྱ་ཉིན་ཆ་ཤས་ཐུན་མཇུག་ཏུ་བཟླ་ཞིང་། ཚོགས་འཁོར་བརྒྱ་རྩ་དང་། ཆོས་སྲུང་སྐོང་བཤགས་སོགས་གཏོང་རག་གི་མཆོད་པ་རྒྱས་པར་བྱས་ནས་མཚམས་གྲོལ། སྒྲུབ་པ་ལས་འཇུག་ན་ཟུར་དུ་ཤེས། སྔོན་འགྲོའི་སྐབས་རྒྱལ་ཆེན་ཐོ་འཛུག་བྱ་བའམ། དེ་མིན་ཕྱི་མཚམས་ཙམ་ལ་བརྟེན་ཀྱང་རུང་ཞིང་། བསྙེན་པ་གཟའ་སྐར་བཟང་བའི་མར་ངོའི་ཕྱི་དྲོ་དབུ་ཚུགས་པ་བྱུང་ན་ལེགས་པས། རྒྱལ་ཆེན་ཐོ་འཛུག་བྱ། གྲོལ་རྒྱུ་ཡར་ངོའི་གཟའ་ཚེས་བཟང་པོའི་ཐོར་ཐུན་གྱི་མཇུག་ཏུ་དངོས་གྲུབ་ལེན་ཆོག་རྒྱས་པར་བྱ་ཞིང་ཉི་ཤར་གྲོལ་ལོ། །གཞན་མཚམས་ཀྱི་སྤང་བླང་སོགས་བསྙེན་ཡིག་སྤྱི་འགྲེ་ལྟར་ཤེས་པར་བྱའོ། ། ༈

[edit]

bsnyen sgrub rgyas pa btang tshul/__ thugs sgrub bsnyen tho dge/__/swasti/__/thugs sgrub bsnyen sgrub las gsum rgyas par btang na/__thog mar sngon 'gro zla ba gcig sogs long skabs dang bstun/__ma mtha' 'ang skyabs 'gro khri/__sems bskyed ci nus/__yig brgya khri/__maN+Dal rgyas bsdus gang rigs khri/__bla ma'i rnal 'byor phyi sgrub gsol 'debs bsdus pa khri dang sbrags te phyag de mtshungs song na'ang legs/__bar chad lam sel kyang stong phrag tsam grub na bya/__nang sgrub badz+ra gu ru bzhi 'bum/__gsang sgrub dgongs pa bskyang ba thun thams cad kyi mjug tu bya te/__de ltar sngon 'gro rnams legs par grub nas/__dngos gzhi bsnyen pa'i skabs 'dir sman raka gtor gsum nyer spyod tsam bshams/__thun bzhi'i thor thun la sngon 'gro tshang ba dang /__las byang 'bring po'am/__rgyun khyer/__snga thun la las byang rgyas pa/__phyi thun la las byang 'bring po/__phyi thun mjug tu las byang rgyas pa ltar tshogs nas bkra shis yan/__chad bstan gtor bro rgyun du ma grub kyang chog__/tshes bcu sogs la nges par btang /__tshogs kyi mgo'am/__lhag ma'i gang du tshe ring mched lnga'i gtor chog bstod pa yan dang /__kha rag khyung btsun gtor 'bul bya/__skong ba/__'khrugs skong /__brtan gsol rnams rgyun du ma grub na tshes bcu sogs dus chen skabs bya/__khyad par tshes brgyad la bskang ba rgyas par bya/__srod thun la las byang 'bring po btang /__de yang las byang 'bring bsdus gang yin kyang bstod pa'i mjug tu/__b+h+rU~M bi shwa bi shud+d+he hrIHhU~M phaT dzaH__zhes pas dzapa? khang dbye/__dzapa? bskul la las byang rgyas pa'i skabs/__snang ba mtha' yas lha tshogs dbyings nas bzhengs:__sogs bsgyur la/__dzapa? dmigs rgyas pa dang bcas bzla/__'bring po gzhung ltar/__des gzhan gnyis ka la 'gre/__thun bsdu na tshe bsnyen skabs yig bdun dang /__badz+ra gu ru pad+ma thod phreng rtsal/__ha ri ni sa bcas las byang 'bring po ltar ci nus re dbyangs gsal rten snying bcas bzla/__des mtshon te yig bdun sogs kyi skabs gong 'og gi bsnyen pa rnams ma chags tsam bya/__mthar las byang rgyas pa ltar na/__ye shes lha tshogs spyan 'dren gshegs:__sogs dang /__oM bde gshegs ye shes sogs bstod pa/__gsol 'debs bar chad lam sel/__oM rig 'dzin dkyil 'khor sogs nongs bshags:__oM AHhU~M swA hA/__/sogs rig pa'i me tog dor zhing mdun gyi ye shes pa rang la bstim pa yi ge brgya pas brtan par bya/__hU~M/__/ma skyes stong pa'i sogs bsdu ldang nas bkra shis bar bya/__las byang 'bring po ltar na/__dbyangs gsal rten snying bzla ba yan gang ltar la/__ye shes lha tshogs sogs stong tshig mchod pa dang /__gsol 'debs bar chad lam sel mthar/__yi ge brgya pas nongs pa bshags/__dzaHhU~M ba~M hoH__mdun gyi ye shes pa rang la thim par bsams la yi ge brgya pas brtan par bya zhing /__hU~M gsum gyis bsdu ba nas shis brjod yan dkyus ltar bya'o/__/de lta bu'i rim pas a mA ra Ni 'bum phrag bcu gcig gam/__zla ba gnyis tsam gyi dbang du byas na 'bum phrag bzhi/__yi ge bdun pa 'bum phrag bcu'am/__'bum phrag bdun nam/__ma grub na spyi btang ltar 'bum phrag bzhi/__badz+ra gu ru 'bum phrag bcu gnyis kha skong bcas 'gro nges bya/__de nas bsgrub pa dang dkyus gcig tu sbrel na/__rgyas par sgrub chen khog dbub tshul bzhin bya ba'am/__ma grub na rgyal chen tho 'dzug rgyas par bya zhing sgrub pa la 'jug__/gal srid bar bzhag dgos byung na/__'dir yang sgrub pa mdor bsdus shig las sbyor bcas grub na legs pas/__las byang 'bring po'i dmigs gnad sbyar te thod phreng rtsal 'bum phrag bzhi dang /__ha ri ni sa khri gcig bzlas te/__kha skong gi sbyin sreg grub na legs/__ma grub na yig brgya nyin cha shas thun mjug tu bzla zhing /__tshogs 'khor brgya rtsa dang /__chos srung skong bshags sogs gtong rag gi mchod pa rgyas par byas nas mtshams grol/__sgrub pa las 'jug na zur du shes/__sngon 'gro'i skabs rgyal chen tho 'dzug bya ba'am/__de min phyi mtshams tsam la brten kyang rung zhing /__bsnyen pa gza' skar bzang ba'i mar ngo'i phyi dro dbu tshugs pa byung na legs pas/__rgyal chen tho 'dzug bya/_grol rgyu yar ngo'i gza' tshes bzang po'i thor thun gyi mjug tu dngos grub len chog rgyas par bya zhing nyi shar grol lo/_/gzhan mtshams kyi spang blang sogs bsnyen yig spyi 'gre ltar shes par bya'o/__/__!